KA NAKRUH BO - II

_____________                     ____________
                     KA NAKRUH BO
                     (Chapter 10-18)

                         Chapter-X



Hmanhmawh deuh chuan ka kal hlawk hlawk a.

Kawngkhar pawh kik lem lo chuan meng an la awm thova a lan vang chuan ka arnghal luh ve ngawt a, an chhungte pahnih pathum vel hi an lo la awm hlawm a.

Ka kalchhan ber Zorini lah chu a mutthilh daih vang chuan a ho duh viau. Engemaw sawiin kan ti ti nual a, reife chu ka nghak a ni. A harh chuan si loh vang chuan rilru hrehawm ru tak chuan ka chhuahsan ta ringawt a, rilru chuan Lalvala tal a beisei a ni.

Lalvala te inlam pan bawk chuan ka kal leh ta vang vang a, khawlai chu a reh țhiap tawh mai a, ngaihtuah a thui duh vang vang khawp mai. Thutlukna ka lo siam mai pawh a ni.

An kawtah chuan ka han ding vang vang a, englah an ti mit țhiap mai bawk si. Thawm a awm tawh lo, an mu vek tawh a ni ngei ang. Vala pawh tuitaka a mut theih chuan tihbuai kher ka duh bik bawk si lo. Kan in lam pan chuan ka haw zui ta hnak hnak a.

Mutthilh a har kher mai.

Zingah chuan kan khawtlang hruaitu te ho chu an lo lut khawm nak nak a, eng tihkuak theih pawh awm chuang si lo hian ro an rel a ni ber mai. A țhenin ‘Jail i thleng lovang, an chhuah nghal ang che’ an ti bawk. Tapchhak ukil an tam kher asin.

“Theihtawpin khawtlang kan țangrual ang a, harsatna liantham a awm lo turah ngai ang, keini pawh inrualin kan lo kal ve nghal dawn a” tiin Pu Kaptea chuan min hrilh a.

Tukțhuan eikhamah chuan auhkhawm ang mai hian mualzawlah chuan mipui an țhahnem tawh a, engdang ti si lo hian nghah nei tih hriat reng hian an awm nghuk mai a, mualzawl kan han chuang chhuak chu mi zawng zawng chuan min thlir nimai hian ka hria, thildang han tih tur teh chiam nei ta lo chu Motor hnunglamah chuan ka lawn zui nghal mai a, sawi tur ber pawh ka hre lo.

 Lalvala chu zakdawh tiang nen ka bul maiah chuan a ding a, eng engemaw min hrilh sap sap a, ka bengkhawn viau emaw ka tihlaiin hriat a lawi chu ka nei hauh lo thung. Chutia thil a sawi mawlh mawlh lai chuan ‘saw Zorini a lo kal’ zawi sap chuan a ti a.

Miin an thlir țhup lam chu ka en ve thuai a, a nau hmeichhia hian a lo kalpui a, shawl-in a intuam hlan a, a taksa chu a chak lo hle a ni tih en mai pawh chuan hairual a ni lo. A dang bai mai bawk si, muangchang chuan ka chuanna motor lam pan chuan an lo kal ve zel a.

Kan bul an lo thlen dawnah chuan motor ațangin ka lo chhuk a, Lalvala bulah chuan lairu ang reng tak hian ka lo ding a. Mi zawng zawng chuan min en hian a lang bawk si. Awmdan tur pawh ka thiam lo tak zet  a ni. A zahthlak zawnga ngaihtuah chuan a zahthlak angreng viau bawk a.

Lalvala bawk hian hetiang hunah hian a tih tur a hai lo țhin.  A lo chiauau thuai a, Zorini pawh chuan awchhang niawm tak, tham țiak chuan a lo chhawn thuai a, sawitur ka haihchham lutuk chu hliahkhuhin ka awm ta phawt chu a nia.

“Nangmah kher kal lo hian a theih loh a mi?” min enkar chunga min zawttu chu hel hram ka duh asin mawle.

“Ah..umh, nia  keima tih tur a lawm hei chu, midang inrawlh buai a ngai lo”

Min en tlawk tlawk ringawt.

A kut chu ka hmersak vawng vawng a, a khur der der hian ka hria, Pu Kaptea chuan ‘Kan kal thei em?’ a rawn ti a. A lung a chhe thut a niang chu ka awmah chuan a rawn beithlawp a, a insut zui hraih a. Rilru nawm loh sa tawh mahnaklai a chutianga a han awmzui leh lek phei chu hrehawm tak a ni.

“Zorin, ka lo kir leh thuai dawn lawm, engmah hlauhthawn tur a awm lo a nia, tha deuhin lo in enkawl la aw”

A darah chuan dawmin min kuahna ațang chuan ka nam kiang deuh a, mittui luang ngiah ngiah chung chuan ka ban bulah chuan nghet zet hian a hmer a, ‘Kan kal ange aw, Ka hmangaih che’ tiin a beng bulah chuan ka hrilhru sap a, motorah chuan ka lawn zui nghal a.

Ka lehhawi ngam tawh lo.

Engemaw chen kha chu tutenge ka bula chuang pawh ka hre lo hialin ka hria. Kan khaw piah mai km 30 vela hla hi Police station a nih vangin rei han thangna tur tehchiam awm hek lo, tluanlohna dang kan nei em em bawk si lova. Police Station chu mawng a kham tak tak hma chuan kan thleng mai a, rilru no zual erawh chu a reh daih thung a.

Engengemaw tihfel neuh neuh chhung chuan khua a lo tlai duai hman a, Pu Kaptea te nen chuan zanriah khawchhungah kan ei a, chumi hnua kan luh chhoh leh chuan mi tihdan ang te tein Lock up lamah chuan min kalh khum ve ta khap mai kha a nia, chutia han awm takah chuan a dan a dang zar mai. Ngaih ang ngawt chu a lo ni hauh lo, ‘ta se ta se’ tih ngaihtuahna chuan hlauhna te pawh min siam sak lek lek zawk a lawm mawle.

Constable pakhat lo kal hnenah chuan Thingzaipa an dahna chu ka zawt a, a sawi chak vak lo niin ka hria, ka hriattham mang loh chuan a riat nawi vel a.

“Sawi a har viau a mi?” ka tih vin tak viau hnuah chuan kan piah pindanah chuan an lo dah niawm tak a ni.  Kei lock up-ah min dah laiin a ni hmundangah an dah maw!? Mai mai chuan a..

“Engnge awm zia? Kei lock up-ah min dah a, ani kha hmundangah in dah amaw!?” min chhang lo, ka ngaihdan ni lo lutuk chu ka ang zui chiam mai pek a, ka rawl a ring phian bawk sia, midang duty ho chu an lo lang țak țak a, ASI pakhat hian “Engnge harsatna i neih le?” tiin zaidam fe mai hian min rawn zawt a.

“Kei hetah lock up-ah min dah a, kha misual kha engvangin nge lock up-ah in dah ve loh?”

“A, in awmdun kha remchan lohna a awm vang a nia”

“Ani kha helai hmuna awm tur hi a ni asin, keimah nilovin”

“Keini thu a nilova, kan pu in ti tura min tih angin kan ti mai a nia”

“A nih hrep tak chu a, ka hre reng ang che u” ka tih khum hmak a.

ASI ber chu a inthiam lo deuh nge mawni ka rinai tak chuan a zawldawh rei thei a, “Hmundanga i awm chuan Handcuff te i bun angai dawn a..” a ti chauh chu “Hmundanga awm ka dil che a mi?” ka lo ti hmanhmawh a. Mi chhanna tur a hre lo chiang kher mai.

“Kha pa kha ka hmu duh, kawm ka duh bawk” ka ti zui a.

“A, chutiang chu a harsa ang, engthil emaw thleng palh ta se..”

“A thleng lovang, i duhleh i naute hi silai nen min ven tir la a ni mai alawm” ka la ti zui zel a.

Phalsak phei chu ka nih pawh ka ring bik chiah chuang lo.

“Chutia kan ti dawn a nih chuan i kut tal min handcuff tir la, rem i tih leh tih loh a ni mai” a ti zui ve mai a, keilah chuan ho hi ka’n ti ang reng khawp a, ‘Ka in peih e’ ka ti zui mai bawk a.

Ka kuta handcuff an vuah fel hnuah chuan kan misual pa chu an rawn hruai lut ta kha a nia.  Ka han hmu leh phat chu insum a har duh kher mai, ka kut chu lo handcuff hman lo sela chuan kutthlak tur chuan ka thawkchhuak ngeiin ka ring. Min lo vengthawng viau pawh chu thilawm tak a lo ni e.

Lock up kilkhatah chuan hmai rang neng nung hian a țhu ran a, mi pawh a melh ngam meuh lo chu a ni e. Engemaw chen police ho chuan min han thlir țaih a, a hnu deuhah chuan a tam zawk chu an kal kiang zui ta a, pakhat erawh chu corridor tawplam keimahni min hmuthei chinah chuan min thlithlai tur niawm tak hian a awm a, kan țawng erawh a hre phak kher lovang.

“Tunge i hming?”

“Khupa”

A mah hnaih deuh hlek chuan ka țhu a, țawngrin lutuk a ngai lo turah ka ngai. A țawngțhat duh loh viau chuan ka tlawh dawt a ni mai.

A thawmhnaw te lah chu a ngai ngaiin balhhmel zet chu  a la ha hnuang a, a lu a buk nasa mai bawk si, handcuff te chu bun lo se chuan han nel mai mai zia pawh niin a la lang chuang lo. Min hran khum hrep mai ang tih pawh hlauhawm tak a ni.

“Engvanga khatiang thil kha thlentir nge in nih ka hre duh, țha deuhin min han hrilh teh” uipui vawm zawh hlim koh leh ang mai hian min melh dui a. Khawngaih thei dinhmuna ding chu ni ila a mi melh dan ringawt pawh chu lainat fe tham a ni mahna. Mahse, chutiang em em a hmangaihna ngah chu ka lo ni bik awzawng si lo.

“Țha deuhin sawi la, engtinmah ka ti lovang che, i sawi țhatloh zawngin ka handcuff hian i lu-ah ka chhu a ni mai” tiin thlem ti tih chuan ka vau pah bawk a.

A bawp chu a han tawm deuh a, ka rinaia thui chuan ti hian a chanchin bulthum ațang chuan a sawi chho ta a.

“Ka pa hi tun thlengin tunge a nih ka la hre lova, ka chhungte pawhin min hrilh ngai hek lo” bangkil lam melh chuan a ngawi vang vang a.

“Kum 6 ka nihin ka nuin pasal min neihsan a, khata țang khan ka nun hian kawngdik zawhni a nei ta lo niin ka hria”

“Engngatinge, tu bulah nge i awm, tunge enkawl che?”

“Ka pi leh pu upa tak tawh te bulah ka awm a, harsa tak chungin an theih ang ang chuan min tuam hlawm ve hram hram a. Chhuanchham chuan kan awm ngai bik lo. Zirna pawh theih ang angin ka chhun zawm ve zel a, lehkha thiam thei ka nih lem loh vangin nuam erawh ka ti tehchiam pawhin ka hre lo. Hnathawk rual ka la nih loh vanga kal mai chauh niin ka inhre ber zawk”

“Kum li chuang mah chutianga ka pi te bula ka awm hnu chuan ka pu chuan min boral san a, loh theih lovin ka nu u, ka pute belin ka pi nen chuan kan awm leh a, engemaw chen kha chu ka nunphung a danglam hran lem lova. Mahse, ka piin min han boralsan leh zel takah chuan min hmangaihtu te an kiam zo ta!”

“Ka zirna ka chawlh san a, naupang te ni chungin inhlawhfa turin ka chhuah a țul a, ka putea nupui lah chuan inchhungkhur thil zawng zawng nen ka kutah engkim a dah vek mai bawk si, hrehawm ka tih tak em vang chuan ka nu te hnen lama awm turin ka putea pawh hrilh lo chuan kan khua ațang chuan ka chhuak ta ngawt a”

“Ka nu chuan min lo lawm viau a, a pasal pawhin a tir lamah chuan min tițha khawp mai a, mahse hrin hrang na na na chu rei a daih ta lo, hnawk min ti tih hi ka hre reng mai a. Mahse, kalna tur dang ka neih tawh chuan loh vangin hrehawm viau mahse ka tuar ve hram hram zel a, khawsak a awlai lo nen nun chu a thawpik thlak tak zet a ni”

“Ka pa lah chuan zu a rui nileng hi a ni mai a, Burma sawrkar hnuaiah chuan hna chhete a thawk ve a, mahse chu a hnathawh bera pawh chu chhungkaw tan han hnemhnanna tham a awm lo. A chhan chu a ma zu inna tur daih pawh a thawk chhuak zo lo!”

“Ka nu nen chuan theih ang angin chhungkua chu kan enkawl a ni ber mai a, chu tih lai karah ka pa chuan ka nu chu kut a thla zen mai bawk si. Kei chu mipa ka nih vang nge mawni kut em chu min thlak lo. Mahse, ka nu a han vaw țhin te chuan min tina em em si… ”

“Ka nu hriselna a țha lo bawk nen in enkawl a ngai a, khawsak a pan chho tial tial a. Chuti chung chuan a zu man tur ka nu a dil chu a țhulh phah chuang hauh bawk si lo. Ka thawhchhuah ve ang chhun chhun chu kan ei chu a ni mai a, chhuanchham em chuan awm lo mah ila kan khawsak chu a harsa tih mai hian a hrilhfiah zo awm love”

“Tlaikhat ka hnathawk bang chu chau hnep mai hian ka haw a, kartawp lam a nih vangin hlawh te pawh ka la ve a, ka nu damdawi tur te pawh kan lei ang a tiin ka insuangtuah haw nasa ve mai a. In ka han thlen chuan ka pa awka ri chu ka luh hma hauh pawh chuan ka hre nghal mai a, ka nu zu man a lo dil leh ngei a nih ka ring nghal mai a”

“Ngawireng chuan ka lut a, ka rin ang ngei chuan zu man dil chuan an lo in vin leh khur khur tawh hi a lo ni a, ka nu lah damsam lovin khumah a mu hlan a, pakhat lah a pawr tawlh tawlh mai si. Ka nu damlo khuma mu meuh kut a thlak takah chuan ka insum zo tawh lo chuan ka bula hmanraw awm ka hmuh chu chuhin a tukkhumah chuan ka va vaw ngheng mai a, vuak pawh ka vaw zui tawh lem lo”

“Mahse, vawikhat vuak kha a lo tawk viau a niang, a thi hman tlat..”

“Ka nu chuan tlanbo mai turin min ti a, ka nu lah dam lo bawk si chu ka ngaihtuah ve bawk si. Mahse, ka tan a hlauhthawnawm zia min hrilh takah chuan loh theih lohna vangin in chu ka chhuahsan leh a țul ta a ni”

“Ka pawisa hlawhchhuah awmchhun tlem te chu ka nu nen chuan kan inzah sem a, engtinnge a pasal boral ta pawh chu a tihzui ang tih pawh sawipui lo chuan zanah chuan kan in chu ka chhuahsan ta a..”

Sawichhunzawm tum hmel pawh a pu tawh lo, a mittui chu tla em lo mahse a rilru chu a na hle ang tih ka rinthiam pui mai. “Tichuan khawilamah nge i kal tak, engtin nge i khawsak zui a?” ka lo ti a.

“Motor ka hmuh remchang hmasa berah ka chuang a, a kalna lam lam pan chu ka tum a ni mai. Kal tumna lam pawh ka nei chuang lo. Motor a ding a, a dang ka man leh a, mi supply thiar bungraw chungah te, a remchang ang ang chuan ka inzep ve zel a, țiau kam velah engemaw chen chu ka khawsa a, inhlawhna ka hmuh ang ang chu ka thawk ve zel a, ka nu ka ngaihtuah bawk si vang chuan ka rilru hi a hrehawm thei em em a, intihhlum ka tum chang te pawh a awm hial!”

“Ka vannei a siamin nupui ka nei ve hlauh mai a, nunbul țana chhungkua ka han din thei tur chu ka lawm zia hi sawifiah thiam pawh a har zawk hialin ka ring. Ka nupui lah chuan mi tihhlim a thiam bawk si a, hna thawk chau hnep țhin mah ila ka lung hi a awi em em țhin”

“Kum chanve dawn kan inneih hnupawha a rai lo chu mak ka ti ang reng viau a, ka nupui bulah pawh chuan ka sawichhuak nghe nghe a, ani zawngin a eng zawng ngaihtuah awm takin ‘kan la pai ve mai ang chu’ a ti mai a, keipawh chuan ka enghelh zui hran lem lo”

“Kan inneih chhung khan kan inhauh awm pawh ka hre lo, chutiang khawp chuan keipawhin rethei tak chungin ka theihtawpin ka enkawl ve a, a hrehawm ka hlau a ni ber mai. Mahse, nun hi kan duh ang leh kan beisei ang diak diak hian a lo awm thei hauh lo mai hi a lo nia.

 Țhenawmte hnen ațangin ka nupui awmdan an duh loh thu chu chu ka hre ta zauh zauh mai a. Mahse, ka awihsak ngai lo!

An relna mai maiah ngaiin ka nupui pawh chu sawipui pawh ka tum chuang lo, hmeichhe thu han khukpui chiam kha țul ka ti ber si lova”

“Nikhat chu kan hnathawh a laklawh deuh vang hian hmatakah kan haw a, ka nupui bula awm nghakhlel tak chuan ka haw ding nal nal a”

“Kan in ka han thlen chuan a lo reh țhiap a, mahse a inkalh loh vang chuan ka nupui chu a mu a nih ka ring a, thawm dim tak chuan ka lut zui țham țham a, pindan puanzar chhunglamah chuan thawm bengverh zet ka hre ta tlat mai a, ngawireng chuan puan chu ka han keuva, ka nupui ka hmangaih leh ka duat em em mai chuan min lo phatsan mek lai chu ka va hmu ta a…”

A ngawi rei kher mai.

“Anni pawh chuan min rawn hmu ve mai a, a mipa chu tukverhah a zuangchhuak nghal a, ka nupui chu khumah chuan a mu tawm chal a, tih mai ngaihna pawh ka hre lo, ka hrilhhai lutuk chuan awmdan tur min ti hre lo a ni ber mai”

“Pawnah chuan ka chhuhsan daih a, a hnu deuhah chuan ani pawh thawmhnaw inbel chuan a lo chhuak ve ta a, chu chu ka hmuh hnuhnun ber a ni zui ta a ni” thawk a la hawk a.

“A uirena pa nen khan an tlanbo zui ta a ni awm e, engtinnge an khawsak ka ngaihtuah zui teh chiam tawh lo. Ka rilru erawh chu a na tak zet a ni. Chuta țang chuan ‘hmeichhia tupawh ka hmangaih tawh lovang’ tiin thu ka tiam ta hial a, hmangaih chu sawi loh an laka nunrawnna lantir hi ka chak et et reng tawh mai a ni”

“Khuaa awm reng chu nuam pawh ka tih tak loh vang chuan hmundanga awm tumin ka rilru ka siam a, chutih lai chuan kan țhenawm lawka mi helama (Mizoram) lama inhlawhfa țhin hi a lo haw a, chumi nena inkawp chuan helamah hian ka lo tla thla dun ta a, rei tak tak kan thang chang a awm a, kan ram lam nuam ka tih loh vang chuan chutia han chhuah vang vang mai chu hrehawmah pawh ka la chuang lo”

“A nih hmundangah kan khuaa thil thleng ang kha inti fo em?” ka lo ti a.

“Kan ti ngai lo, kan vawikhat tihna a ni”

“A nih leh damdawi te kha?”

“Kan ram lama kan hawchhoh hnuhnungberah khan sumdawng pakhat hian kha damdawi kha a lo zuar a, mamawhna a awm takin ti a lei mai ka ni a, ruahman lawkna nei a lei pawh ka ni hran lo. Tichuan helama hnathawka kan lo kalna lamah pawh ka lo keng tel ta zel a, kha nula kha kan hmanna hmasa ber a ni”

“Engtinnge in man dan han sawi teh an leilet ațang khan..”

“Luiah sangha man tumin kan kal a, amaha a lo awm ka hmuh khan ka rilruah thil țha lo pui pui a lo lut a, ka damdawi neih hmanchhin chakna te chu ka nei bawk a, tin hmeichhe chunga ka rilruna phuba lak ka lo chak bawk nen ka țhianpa chu ka hmin ta a, a hnunglam ațangin kan man ta a nih kha..”

“A nih puk te kha, engtinnge a awm tih inhriat?”

“Puk bul lawkah khan thingzaina a awm kha, kha kha kan lo chhuk hmasak a keimahni zaitawhna a nia, khami laia kan zaikhan puk a awm tih kha kan hre tawh a, a lansarh loh em vangin inhriat pawh kan ring lova, khatah khan kan thukru ta a nih kha..”

Thildang chu ka zawh belh ngam tawh lo.  Hriat pawh ka duh lo, mahse ka rilru a luah ngur mai bawk si, ‘Zorini a rai angem?” tih mawlh mai chu. An mutpui loh lah ka ring der bawk si lo.

 Kan case an chinkual vel dan chu a kip a kawiin sawi tawh lo mai ang aw.

Kha OC pa erawh kha chuan min tan tir a lo tum ruh khawp hi a ni awm a, kan lo chhawnchhaih tawhnaah a lawm vak a lovin phuba lak ve te pawh a tum a ni mahna le. Mahse, kan țhianpa pa, college a ka kawm țhin ber pain kan case a khawih miau vangin ani OC duh dan zawng zawng chuan thil a kal ta lo a nih hmel. Ka pain min bail nghal vang chuan lungin lama ka ring ka rawlh ve kher chu a țul hrih ta lo a ni.

Kan awmlai chuan Khupa te case chu an khawihzui nghal mai vangin an thu leh hla ngaichangin court tualah chuan ka lo han tawm sen ve reng a, ani zawng ramdangmi a lo ni bawk nen an dim vak ta lo aniang damchhung lungin tang turin an rawn hruaichhuah tak kha.

Motora police hovin an dah lut tur chuan min rawn hmu a, “Ka pu ka be duh” tiin a au ta chiam pek a. Police ho lah chu maktiin an ka hau hlawm mai a, “Saw ka pu saw” tiin ka lam hawi chuan a khabe chu a rawn dawh ta ringawt a. Keilah chuan maktiin ka țhutna motor bul ațang chuan ka lo thlir ve reng a. keimah min hmu duh nia a lan tak vang chuan ka va pan hnai ta a.

“Ka pu, jail-ah min lo tlawh rawh” a tih lai chuan police ho min melh dan chu rinhlelhna hlir ni hian ka hria, engtin phei chuan ka chhang let ve lem hlei lova. Ka ner sawk chauh a ni.

Engtin ka chhan ve tak lovah chuan motor-ah chuan an luhtir a, an tlan liam zui ta a.

Ka bengkhawn zui hran lo khawp mai, a chantawk a hmu taah ka ngai hmiah mai. Hmabak nei tlata inhre chung chuan helhkam nei țeuh si, engber nge hre bawk si lovin kan inluah lam pan chuan ka haw zui ta hnak hnak a.

Ka pa chuan School lam a ngaihtuah deuh vang chuan min hawsan a, ‘Han awm thawveng phawt la, duh leh college lamte chu i la zawm theih dawn leh ngaih ven la, i zawm theih leh i chhunzawm ang a” tiin thu min hnutchhiah kha a nia. Mahse, chhunzawm tumna em em pawh ka nei hran lo. A ngaihven lah ka ngaihven buai peih hek lo.

Zorini ka ngai, haw chhoh zui ve deuh mai chu a ni ka duh tak!

Karkhat em pawh ka awm peih lo a nih ber chu.  Hawchho tura ka rilru ka siamfel hnu chuan Khupa’n ‘Jail-ah min lo tlawh rawh’ a tih kha ka hre chhuak zawk a, tlawh chakna ka nei lo chiang, tlawh pawh ka tum buai ta lo.

Mahse, ka rilruah a thi thei reng reng lo mai a, ka haw hma ni chuan Central Jail lam pan chuan ka kal ta nge nge kha a nia, thuchah hnuhnung neih a duh te pawh a ni mahna le.

Harsa lo takin a awmna chu ka lut ve mai a, komol sin hian kilkhataha lo mu bam mai a, chhun chhunah te engngatinge maw le.

Kan thawm hria chuan a lo hawichhuak thuai a, a hmel chu a bui lek luk mai a, a tanpuite hovin an lo zilh ve nge maw ni dawn le?

“Luh i phal em?” tiin min hruaitu warder chu ka zawt a.

“Tumah kan luh tir ngai lo chu a nia” a ti ve mai a.

“Khawngaihin min luhtir mai teh, saw amah pawh a che tha thei bawk si lova” ka tih chuan a hrethiam ve mai a niang, kawngka chu hrehtakin min hawnsak a. ‘A reitheih loh aw’ a ti zui a.

A bul ka thlen chuan harsa ti tak hian a lo țhu chhuak a, ka hmel a hmu chu a lawm emawni ka ti, hlim hmel pu tlata ka hriat pek chu le!

A lukham kawr chu a zen rak rak a, lehkha hlai teh chiam lo, inthlep uluk tak mai thar ang reng tak hi a rawn phawrh chhuak a. Eng lehkha nge a nih phei chu ka hre lo. A  han kaipharh a, a chhungah chuan thil engemawni hi a inthai kual nuaih a, khawhming niawm tak te pawh awmin ka hria.

“Mi rinawm tak i ni tih ka hriat vangin ka thuruk tawpkhawk ka hrilh ang che” a tih chuan phawk fe hian ka melh a.

“Kei chu hetah hian ka damchhung hun hmang tawh tur ka ni a, engmah pawnlamah beisei tur ka nei tawh lo. Kha thil kha thleng lovin, hetiang hian awmlo ni ta ila chuan ruahmanna chu ka nei ve ngei a, Mahse, tunah chuan keimah ngeiin ka ruahmanna siam chu ka bawhpelh dawn ta a nih hi. Mi rintlak ka hmuh chhun i nih vangin i kuta ka dah ang a, a hnulama i rinawm ta lo a nih pawhin i thu ni rawh se”

Eng lam pang nge maw sawi a tum ber pawh ka hrethiam teh nuaih tawh lo ka ti!

“Țiau kamah..” a hrawk hnawk chu tihkian tumin a’n khuh leh kharh kharh phawt a..


___________           __________
            KA NAKRUH BO

                 Chapter-XI



“Ka awmna khua chu ka hrilh tawh che kha… Chutah chuan ka sum thawhchhuah ve ang chhun chhun leh ka neih zawng zawng ka dah a, chu chu i kuta awm turin ka duh a ni”

“Engngati maw? Chhungte pawh i nei tho sia”

“Ni e, Mahse ka chhungte nena kan inkar chu ka hrilh vek tawh che kha. Ka nu erawh chu a thi nge a dam pawh ka hre ta lo chu a nia. Ka hriat hnuhnun ber kha chu kum 2 liam ta vel kha a nia, chutah chuan ala dam ngei a, chu chu min han zawn chhuahsak la, a lo harsa viau emaw, a lo neinung viau emaw a nih pawhin ka sum lo khawl sa ve chu a kutah min hlan sak la ka duh a ni”

A beisei sang hi ka ti angreng khawp a! Ham ham che chuan tihzui mai ka nap ka ti.

“Chu thil chu ka tih duh i ring em?” tiin ka lo zawt khauh a.

“Mi rinawm tak i ni tih ka hria alawm”

“Enteh maw, mi rinawm tak chu ka lo ni țhin tawh mai thei. He thilah hi chuan i lakah hian ba ka neih awm reng reng ka hre lo” ka tih sak a.

“A dik alawm. Engmah ka laka bat i nei lo tih chu ka hria alawm. Min that hial theitu i ni tih pawh ka hria, mahse chuti chung chuan tunthlengin min la zuah a…”

“Lawm mai rawh” ka lo ti leh hmanhmawh a.

“Ka nu hnen i thlen thei lo a nih pawhin i duh leh nangma’n i nei mai dawn nia” te chu a la ti tak deuh deuh a.

“Chutiangin hah taka i thawhchhuahsa ka mamawh hleinem”

“Lawmthu ka sawinaah min pawmsak mai dawn nia. Ka nu chu a thi tawh pawh a ni thei a, i tan a harsat chuan pek kher pawh a ngai lo”

“Ka peksak ang che” a hmel chu hlim a ni tih hriat reng hian bui lek luk chung chuan a han nui deuh a. Peksak ka tum em em pawh a ni chuang lo. Ani damchhung tang tawh tur lung tih awi mai tum chauh ka ni zawk.

“Pawisa zawng ka nu i pe ang a… A dang chu i kutah”

“Engnge a dang awm a?”

“I hmuh hunah i hre mai ang” ani thingzai mai mai hian thilhlu tham a kawl a rinawm bawk si lova, chuta karah pawisa ni lo lehnghal phei chu!

“A hlu viau a niang maw!?” awih vak lo, tih el deuh chung chuan ka zawt a.

“Kawl puithiam nunna ka chhanchhuah sak a, chuta lawmman min pek chu a ni” a tih chuan a duhdan anga ka awm theihna tura a ruahmanna maiah ka ngai. Chawtak khuka han khukpui chiam turah ka ruat lem lo.

Tangvengtu-in “In hun a tawp e” a rawn tih tak vang chuan a duh ang pawh a sawi zawh hma chuan ka dinsan uaih a. Lehkha chu tangvengtu hmuhloh tur chuan min han rawlhruk zauh a, ka nuih a za ang reng, han tihhlawhtlin sak lah chu ka ba lo nasa mai si a.

“Jail-a ka awm thu hi ka nu chu hrilh lo la, Mizorama nuam taka ka awm thu min  lo hrilh sak dawn nia”

A tukah chuan ka nauteho hnen ațang chuan kan khawlam pan chuan ka haw chho leh ta a, hun harsa tak paltlang tawh hnua Zorini nen kan han inzui leh thei tur chu ka rilru a nuam ang reng viau a. Mahse, ka ngaihtuahna luah rengtu thil pakhat awm ta chu ‘a thianghlim ka ring tawh lo’ chu a ni.

Chu thil ka ngaihtuah chhuah apiang chuan chhun ang maiin ka na ngawih ngawih hian ka hria a, awmngaihna ka hre ngai meuh lo. Mahse, Zorini hi ka hmangaih a, a chunga thil thleng hi a duh reng vang a nih loh vangin ka pawm sak thei dawn love’m ni!?

Mahse, ka na takzet si.

 Hlimna pangkhing ru tak chung chuan kan khua chu ka thleng ta a, inleng lo chuangkai an awm ve reng bawk si vang chuan duh ang hunah pawh ka chhuak thei lo. Lalvala pawh tiang nen a rawn inhawl luh ve tak hial chu mawle. Ka rin ai takin a lo bai nasa tawh lo.

 Lenglen ar khuan hnu fe-ah chuan Vala nen chuan kan inzui chhuak ta kha a nia. Khawdang hawi lem lovin Zorini te inlam pan chuan kan kan ding nghal liah liah mai a ni.

Dan pangai ang bawkin a nau țhiante ho chu an lo awm leh țiai a, kan han inhmu chu kan ri ve hlut a, puitling dang leng an awm lem lo bawk mitmei ven tur vak awmin a lang lo.

Zorini chu tapchhakah mei vilin a țhu khar a, a țawng tlem hle a, chu chuan boruak a tinuam chiah lo, min intithlahrung zo niin ka hria. Rei tak pawh awm duh lovin midang rual chuan Vala nen pawh kan haw zui ve mai a. A rilru a la nuam chiah lo a ni ange tiin lunglohah pawh ka laksak bik lem chuang lo.

A tuk chhunlaiah chuan Vala hnen ațangin ka lehkha tur hi ka dawng nawlh mai a, amah lah chuan a sawi chiang duh bawk si lo. Zorini lehkha ngei a nih rinna chu ka nei sa tho mai.

Dear Chhuantea,


 A hmasain ka chunga i thiltih zawng zawng vang hian lawmthu ka hrilh che ni sela, ka damchhung pawhin i țhatna te hi ka rul seng tawhin ka ring lo.

 Nizana in lo kal laia ka mizia zahpuiawm tak vang khan khawngaih takin min hrethiam dawn a nia. Ka theih tawp chhuahin khatiang anga awm lo tur khan ka inbuatsaih ve nasa a sin. Mahse, min delh tu phurrit hi ka phur zo ngang lo a ni e.

 I bula awm tluka duhthusam dang hi ka nei ngai lova, i bulah lo chuan hlimna hi ka tan a awm thei pawhin ka ring lo. Mahse, i hriat angin kan duh reng vang pawh nilovin ka chungah hetiang thil hi a lo thleng ta si a, Chhuante i hnena he thusawi hi ka va han duh lo tak em… Mahse, duhthlan tur dang ka nei chuang si lo.

 I tana ka neih chhun leh ka lo chhuan ve em em țhin heti maia hnehchhuha a’n awm ta mai hi a na ka ti ngawih ngawih a ni. Nun hi ka tan a nuam lova, hlimna hi ka banphakah a awm ve ta lo. I bula hlimtaka awm chakin duh ngawih ngawih mah ila he ser hian engtikah mah min kiansan dawn chuang si lo.

 He thutlukna siam tur hian mittui ka va seng hnem em! Ka tana i thiltih zawng zawng te ka ngaihtuah chhuah chang phei chuan engatinge siamtu hian ka nunna min lak sak law law mai loh le tiin ka vui hial țhin asin. Nang kalsan tur che a thutlukna siam hi ka nunna nen hian thleng hial mai ka duh țhin.

 Ngawirengin he thil hi tuar tlang ngawt dawn ila nakinah min vuaklet hun a awm tho tho dawn si. Chu hun nghakthleng tur chuan ka huaisenna te hian a tlin thlawt lova, I hrehawm tuar hmel hmuh ka duh bawk si loh vangin engpawh huamin ‘kan ințhen’ mai hi a țhaah ka ngai ta a ni.

 Chhuante, ka hmangaih che tih i hriat kha, he thil hi kan pahnih hmakhua atana țha tur zawk vanga ka duhthlanna renga ti ka ni tih min hriatsak dawn nia.  Engtin pawh awm la, nupui pawh nei la keichuan sawisel lovin ka pawmpui vek ang che. I hlimna tluka duh ka nei lo a nia.

 Mahse, ka hmangaih che tih erawh hi chu min theihnghilh sak lo hram dawn nia.


‘Z’

Chu lehkha ka’n chhiar zo zet chu awm ngaihna reng ka hre lo. Ka bing mum mum niber hian ka hria, Lalvala chuan rangtakin ka lehkha kenlai chu a pawtthla vat a, a chhiarzui ve niin ka hria.

“A mak hle mai” a rawn ti chhuak sap a. Chhan enah pawh ka en lo, chhang dawn pawh ni ila chhan dan tur hre miau hek lovi!

“Chhuan, inah a awm ka ring. Amah zu hmu hrim hrim teh engpawh ni se” a tih chuan chutia tih chu a awm viau in ka hria.

“Kalpui i ngai em?” a ti zui a.

“Ngai love” ka ti ve mai a.

“He thil hi a thlen chu ka ring sa reng asin. Mahse, hetiang zawng kher hi chuan ka lo inbuatsaih miah lo” ka ti zui a.

“Hetiang zawng hian kei ka lo ngaihtuah ngai miah hleinem. A thuhrimah a chhan i hre vek a, a duh reng vanga thil thleng a ni lo tih hrechiang bertu a nia, i pawm thei a nih chuan ințhenloh a țha”

“Ka zuk kal ange aw, duh leh reideuh hlek hnuah lo chhuk ve hrim hrim la” te chu ka ti ta hram thova. Ani pawh chuan ‘Awle’ a tih kha.

Kalkawng tluan chuan mumal nei lo fe hian ka inngaihtuah a, ka hlauhthawn ang ngeia thil thleng chuan min țhawng viau tho mai. Mahse, ințhen phah em tur khawp chu a ni lo a ni lo’m ni? Kha thil thleng kha a duh reng vanga thil thleng a ni si loh kha. A nun hrehawm lai taka ka kalsan lehnghal phei chuan engtin nge hmangaihna awmzia ka hrilhfiah ve tak ang?

An in chu a lo reh țhiap a, kawngkhar chu ka kik kauh kauh a, inchhunga vawthlep ri, ri deuh thlarh thlarh chuan kawngkhar hawn tumin a lo pan a ni ngei ang. Tin, Zorini a nih ngei pawh ka beisei.

Ka lum pup pup hian ka hria.

Kawngka kalhna ri rek chu kawngka inhawng riai riai chuan a zui nghal a. Ka rin ang ngeiin Zorini chu mu tho hlim niawm tak hian zuai fe hian a rawn lang a. Engmah sawi lo chuan min en veng veng ringawt a.

Sawi mai tur ka hre bik lo, ani lah chu a țawng bawk si lo.

“Lut turin min sawm dawn nange?” ka ti ta hram a.

Chhanna ka hmu lo. A melh ngai chu a melh vang vang a, a mittui luang ngiai ngiai chu dan a tum pawhin ka hre lo. Chu chuan țawngka aiin thu a sawi thui zawk si a.

“Inchhungah lut ila, hetia awm ringawt chu” ka ti leh a. Mi pawh a la chhang chuang lo, kawngka chu a hawngzau ta deuhva, ka luhna tur rem chuan a mah pawh a ding rem nghal a.

Penthum chiah ka pen!

A hmel ka’n en chu natak tuar ni mai awm hian a lo inseh ruh tlawk tlawk a, kawngkhar vawnban chu a hmer ngawt ngawt a. A dara ka dawmsak lai chuan a rum chhuak hawk a.

“Zorin, ka hmangaih che” tihpahin ka kuah zui nghal a.

Ka awm a bei pah chuan a insut zui hlawp hlawp a, nghet taka kuah mai loh chu tihtheih dang a vang viau mai.

Reingial chu ding chung chuan kan kan inkuah reng a,  țhutthleng sei lam pan chuan tawlhpuiin ka țhutpui a, ka hmel chu a en ngam lo ni ber hian ka hria.

“Engatinge khatiang lehkha te i rawn ziah a?” ka tih chuan min chhang lo. Min kuah nghet sauh a, a mah chu a taksa a țang sauh niin ka hria.

“I harsatna hi hriatthiampui thei lo turah che min ngai a mi?”

“Ni lo…” engmah sawichhunzawm leh chuang lem lo chuan ka dar chhunglam behchhan chuan a hmai chu a thukru tlat a.

“Chuti a nih si chuan engngatinge khatiang kha i rawn tih si?”

“I hrethiam lo a ni”

“Ka hrethiam alawm, i chunga thil thlengah hian harsatna siam belhsak che hi ka tum lo asin”

“I hlimna tur zawk a ni a sin” a khur der der a.

“Ințhen hi ka hlimna zawk tur a ni ang maw?”

“I tan engmah neih ka nei tawh lo asin. Hun kan hman dawn apiangin….” Sawichhunzawm tur a awm lo, ka insut zui leh mai bawk si. Tih vak ngaihna pawh ka hre bik lo.

“Chutiang zawngin engmah ngaihtuah tur a ni hleinem, ka sawi tawh kha. I duh renga thil thleng chu ni se chuan min kalsan rawh i tih pawh ngai lovin ka kalsan thei ang che. Mahse, tunah hi chuan ka thei lo a ni”

“I hrechhuak fo dawn asin, tunah te chuan a sarhu lai a nia, a la pawmzam theih ang chu…” a ti hul hak a.

“Chutiang zawngin ngaihtuah suh”

“Nakina harsatna min thlentu tur tho a ni, chuvangin tuna kan tih fel mai hi kan pahnih atan a țha zawk asin”

“Harsatna thleng turah i ngai tlat a..”

”A thleng ngei dawn si alawm. Chutih hunah chuan inzawmna thuk tak kan lo nei tawh si ang a, harsatna kan insiam tam mai mai dawn asin”

“Kan paltlang thei mai ang”

“Chhuante, ka sawi chu awih hram teh khawngaih takin”

“Ințhen hrim hrim hi i duh tihna a mi?”

“Kan pahnih atan a țha ka tih chu”

“A țhatna tur ka hmu ve bawk silova”

“Ka hmu asin keima’n, khawngaih takin pawm hram rawh”

“Zorin, ka hmangaih che. Chu chu ka damchhung atan ka sawi a ni a sin”
Engmah sawi lo chuan min kuah zui vawng vawng ringawt a. Ka sawi chu a pawm ve mai ni-ah ka ngai.

A hnu deuhah chuan Lalvala a rawn thleng zui ve bawk a, tlem chuan kan ti ti pawh a zangkhai thei ta deuh va, a lungngai zawng chuan titi kan nei zui ta lo. Eirel dawn ruaiah chuan kan țin san a.

“Khawngaihin ka ngen che kha aw..” tiin kawngka biang ngheng meuh chuan a ti țha leh pek a!

Phawk fe a melh pah chuan, “Ka sawi tawh kha..” ka ti sap a.

“Ka hria alawm. Mahse, ka ngenna che kha min tihhlawhtlin sak hram rawh, khawngaihtakin ka ngen che a nih chu. Khawngaihna awm zia chu i hriat kha” a tih chuan a rilru zawng zawngin a sawi niberin ka hria.

Ngaihtuah dan pawh ka thiam lo. Lalvala lah a kal vuah vuah tawh bawk si.

“Ka thei lo. I thu ang nilovin, ka thu ang zawkin kan kal ang..” ka tih chuan en pawh min en lo, ngawireng chuan ka kalsan zui ve ta nghal a.

Ngaihtuah neuh neuh chuan Thingzaia inhlawhfa mai maiin nuamtawlna atana an hman hnu han pawm chatuan mai tur chu tlangval kei ka ni inti ve tan chuan a tlawmthlak ang reng viau mai. Mahse, a chhan leh vang hretu ka nih miau vangin chuti ngawta thlahthlam chu niin ka hre bawk si lo.

Amah lah thi hnu dam leh a ni ngawt a, a vanduai tawh aleia la phatsan leh si kha chu atan a thuahhnih dawn lutuk bawk si. A chana ka indah hian ka dam thei ngang lo a ni. Engpawh thleng dawn se a nihna ang anga pawm mai turin ka rilru chu ka insiam rem ve zel a ngai a ni mai.

Chutiang chuan ni chu kan hmang liam chho ve ta bek bek zel a, nidang ang em chuan kan hlimna chuana vawrtawp a la thleng thei meuh lo chu a ni. Mahse, he hun hi chu nakin lawkah kan la paltlang ve mai chuan ka ring. A dawhtheih lamah hian han ramțang phawt mai ila.

Zan khat ka leng chu Zorini chu a lo mu daih a, a nau chuan ‘a nuamsam lo a niang’ a lo ti mai a. Ngaihtuah viau mah ila an mut pindan ema han luhchilh chu niin ka hre bawk si lo. Rilru bet lo zet chuan ka țhu sawi ve reng a.

Engemaw na satliah mai a nihphei chu ka ring a, mahse amah hmu tura leng lut ta cheng hmulova haw leh ngawt chu a hrehawm dawn riau hian ka hre pek a!
Reitak phei chu ka țhului duh ta bik lem lova, rilru pangkhing zet chuan ka hawsan ta a.

A tukah chuan fehrehsan hun awmah hian ‘a damlo kan awmpui ange’ tiin an inlam pan chuan ka chhuak leh a, rinloh tak maiin an kawngkhar chu a lo in kalh bar mai a, a hrilhhai thlak duh ang reng hle mai.

Nizanah damlovin a mu a, tunah khawiah nge a kal ang a? A nu te hnathawk a zui ve nge, khawiah emaw a lengchhuak lawk zawk niang le?

A leng chhuak lawk a nih ring chuan an kawmchhakah chuan ka țhu ren rawn a. Mahse, nghahchhuah tih erawh ka nei lo thung.

A zia deuh anga a nute hnathawk tur a zui a nih dawn hi tiin ka haw ve ta daih a.
Lalvala te inlam bawk a ni ka pan leh pek ni.

Chumi ni ațang chuan Zorini nen chuan hun kan nei thei ta mang reng reng lo mai a. Engmah harsatna a neih a sawi chuang bawk si lo chu ka hrethiam lo ang reng viau a. Mahse, ka ti lang ngai lem lo thung. An ina ka len pawhin ka hnaiha awm loh hram dan chu a zawng niberin ka hria. Han tih vak ngaihna pawh ka hre chuang lo.

Lalvala ngaihdan a ni lo nasa mai.
“Țhen hmak la a ni mai lawm, a zah pawh a zak lo mawni le, nangmah vanga nunga la thaw ve mai mai a nih saw" a ti bei bei mai a.

"A khai chutiang zawngin an ti ngai lo" ti te chuan kan leh khap leh zawk zawmah a.

"A nia lawm mawle, lawm nachang pawh a hre lo a nih ber hi, nang awm lo la chuan a dam pawh a dam dawn em ni? Khanglang chuan..." a ti zui nang nang a.

Khap pawh ka khap zui duh ta bik lo. A thlirna ațang chuan thil awm lo pawh a ni bik chuangin ka hre lo. Hmai eng in zahna tal te chu awm ve se a mawi te pawh a mawi deuh mahna le te chu ka ti ru ve tho. Amah ka ui vang nge phei chu ka hre hauh law.

Min be duh lo tu biak luih țalh hi ka chek hian a mil teh chiam lo. Mi khawngaih dil tur khawpa ka dinhmun a tleu lah ka hre ngai hek lo. Chapo pawh min ti mahna le. Mahse, miin an tih theih chuan tih theih ve mai ka tum țhin. Min țhen thei a nih chuan eng aiah nge ka theih loh bik ang?

Engvangin nge tukkhum chhah min chhawn na na na khawngaih ka dil fo bik lem ang le.

Ka hmangaih teh meuh mai. Mahse, Hmangaihna hi hmangaihna veka chhan let a nih loh chuan engnge sawtna awm ang?

Thla kipa court lama in report tho ka ngaih vang chuan ka chhungte chuan Aizawl lama awm mai turin min beisei deuh a, ka bulah tak phei chuan an sawi dawt ngam lem lo. Zorini nen kan inkar a chat tih an hriat hnu phei chuan ngaihbel tur tingtang hian an sawi leh zauh țhin a.

Lalvala bialnu te inah zantin kan leng a a ni leh mai. Changdang han kan zia pawh kan ni lo.

Zankhat chu zanriah kan eikham hlawt tihah hian Lalvala a lo bai lut hlawl mai a, zantin hian keimah zawkin ka sawm a ni țhin si a, engtia chutia lo lang nawlh nve mawle. Eng thu emaw rawn paipawn a nei ngeiin ka ring tlat a ni.

"Kha i va dam tawh awm le le ve a" ka nu chuan a lo ti thuai a.

"Nia, ka pangai țep tawh"

"Pu Rorela ke na ang mai hian a bawkkhup thei tawk vel hian i lo awm ve ang ka ti" ka pain a lo tih chuan kan nui ham ham a.

Kan inzui chhuak zawt tihah chuan kopang lam hawia zun tur tur pah chuan "Zorini nuin 'lo leng teh se' a ti che a" a ti zui a.

Ka hawi phawk kher mai.

"Engngati nge?" ka ti hu pek a!

"Chutiang a chhan leh zel chu ka hriatpui bik nang, ka zui ngai i tih leh ka zui che anga, i thu thu.." a ti zui a.

"A, keimahin ka'n kal mai ange, a țul leh ka la pun mai dawn che nia, anni hmeithai chu ka hlau bik law" nuichung chuan ka ti zui a.

A bialnu te inlama a bai phei lauh lauh chu ka thlir zui reng a.

Zorini te ina ka luh chuan a la hma deuh nge ni an inleng țhin ho pawh tumah chuangkai an lo la awm hman lova. A nauteho lah hmuh tur an awm hek lo. A nu chuan tapchhak hnungpuak chung chuan sum te-ah sadah hi a lo deng charh charh a.

Zorini ber pawh chu ka hmu leh pek lo!

A nu kiangah chuan khawvawh vang em em pawh ni lo hian tapchhakah chuan ka han inhung sawi ve ta ran a.

Thil eng emaw sawi chuan kan ti ti dun reng a, chutah lenga min sawm chhan chu a țhet ta. Suka sawhdawt chu nepte hi a ni ringawt mai.

"Zorini hian nau a lo pai a..!!"


___________           __________
            KA NAKRUH BO

               Chapter-XII

Thuka meialh hlep hlep chuan nuihsawh takin thawm min chhuahkhum niber hian ka hria.

Chhan mai ngaihna ka hre lo.

"Ti tla mai tura kan tih lahin a duh bawk si lova" a tih chhunzawm a.

"Engngatinge?"

"Tual ka that thei lo a ni' a ti miau mai bawk si a, vanduai a tawh a leia heti tehhrep chu a chan hi a rapthlak tawh lutuk deuh a ni"

"Nangin titla turin i tih theih ka ring deuh a.." tiin beisei nei taka min melh pah chuan a sawi chhunzawm a.

Engtinnge ka tih tak ang le!

Min hmuhduh loh chhan chu ka hre ta ngei a. Mahse, ka rinloh lam lutuk a ni chuan min va han țhawng si em ve le.

Chaicheh chuan tapchhak lei chu ka thai ka thai ringawt a, ka țah a chhuak berin ka hria.

A nu bulah chuan 'theihtawp ka lo chhuah dawn nia' te chu ka'n ti ve bawk tak a, khawilama theihtawp chhuah nge maw ka'n tum leh chuan ang ni.

"Amah pawh va kawm hrim hrim la" a tih tak vang chuan ka dilchhuah pawh nilovin an pindan lam pan chuan ka kal zui ta nghal a.

An pindan chu chhaklam zawka awm a ni a, ka hriatsual loh chuan a nu leh an pangber hi pindan khatah, a thlang zawkah chuan awmin Zorini leh a chhang chiah hian pindan chhak zawk chu an hmang niin ka hria. Ka lut sual lo turah ngai ang.

Zorini chu bangkil lam hawi hian saisir zawngin a lo  mu ngât a, puanthuah pawh a sin lem loh vang chuan a muhilin ka ring chiah lo.

"Zorin"

Chhanna ka dawng lo. A chet lah a che hek lo.

"Heti ringawta awm hi a dik lo a ni"

"Khawngaihin min kalsan rawh" min chhang hrim hrim chu hmasawnna kawngkhat a ni tho tho.

"Tuna kalsana kalsan loh hian kori a tu lo, thil thleng tur chu a thleng vek tawh a, kan dan theih bak a nia lawm"

“Engmah hian kan tan awmzia a nei tawh lo”

“Chutiang ringawt a ni ngai lo. Thil chu a eng zawnga thlir hram hram hi a țha a sin”

“Sawtna awm tawh lo”

A khumah chuan muang changin ka țhu zui a. Han nawrluih chiam chi lah a ni mang bawk si lova, ngawi renga uipui tuilian thlira han thlir ngawt la a ni thei bawk si lo.

“Thil mumal zawka kan ngaihtuah a, kan sawidun a ngai a ni” ka ti leh a.

“Sawidun tur engmah kan nei tawh lo” a ti hul hak a.

“Kan nei” ka tih chuan a rawn inlet a, ka hmaiah chuan chiang takin min en pek a! A thiam lo zawk ang mai chuan ka zum dai lawi mai bawk si. Muangchang chuan khumah chuan a țhu chhuak zui ta a.

“I tan ngaihven tlak ka ni tawh lo, a tira ințhen ang ka tihlai khan lo pawm mai la țha tur a nia”

“Kawng a awm alawm” ka tih chuan a ngaihven teh chiam pawhin ka hre lo. A khupa a khabe nghat chuan a melh ngai a melh ngar a.

“Ka tan chuan a awm lo, i sawi tum pawh ka hria. Mahse, sawi lo mai rawh a sawtna a awm lovang” tiin mi daikhalh lawk hmak mai a.

“Engvangin?”

“He thil hi ka ti thei lo a ni”

“I tih ngei a ngai si alawm”

“Ka thei thlawt lo a ni, min dem pawh ni ula ka tuar mai ang”

“Vanduaina rapthlak tak i tawh hnuah chumi ser chu i inbel lui tlat mai dawn a sin. I damchhung nghawng thei a nia” ka tih sak a.

“Ka hria alawm. Mahse, ka ti thei ngang lo a ni”

“Zorin i mak ka ti hle mai, kha chen kha beiseina nen hun hrehawm tak paltlangin ka lo nghak ve che asin. Nangnena nupa kawpchawi nih a chhungkaw din hi ka suangtuah nasat ber a lo nih țhin vei nen.. Tunah chuan engmah lo maiah i chan tir dawn ta a nih hi”

Chhanna ka dawng lo.

“Chhuan, ka duh reng vanga thil thleng a ni lo tih chu a hretu ber i nia lawm. Pathian remruat danah hian lungawi hi a va’n har țhin tak em…” a hmai chu a hup tlawk tlawk a.

“Kawng awmchhun i hnawl bawk si a, keichuan hnem ngaihna vak che ka hre lo a ni. Vantlangin a hria pawh a ni lova. Bakah lo hria pawh nise tumahin an dem dawn lo che a, dem chu sawiloh mi tam zawk thlirna ațang phei chuan i tih ngei turah an ngai zawk hial ta ve ang..”

Muangchang chuan a lo dak chhuak a, “Chutiang ngawt chu a ni thei lo asin”

“Engnge a nih theih loh na chu?” ka vin viau em ka hre lo. Ka lawm lo hle a ni tih erawh ka chiang viau thung a.

“Mite chuan ngaihdan leh duhdan te chu an nei tur alawm. Mahse, mi thlirna vang ringawt emaw, mi hmuha mawi tumvang ringawt a thilțha nia kan hriat kan bawhpelh chuan eng mi nge kan nih tak ang?”

“Nau neih chu i duh zawk a maw!? Nangmah pawngsual a, i thih hial pawh pawisa miah lo tu, kan khawtlang tibuai em em tu hnamdang mai mai lehnghal fa pai chu țha i tia maw!?”

“Chutiang zawnga i thlir chuan țhatna pakhat mah i hmu zo lovang” a lo ti khauh a.

“I thlir dan zawng chu engpawh nise ka țawmpui thei lo hul hual ang che” ka ti tawl a.

“Chutiang tur chuan ka beisei lo reng che a ni. Chuvang chu a nia ințhen pawh kha ka han rawt țhat leh ni. Tunah chuan thutlukna ka siam fel tawh a, chu kawnga min kalpui thei a nih chuan lawmtakin ka pawm ang a, i thei lo a nih pawhin demna che ka nei hauh lovang”

“Engnge i thutlukna chu?”

“Nau hi ka ti tla dawn lo” a ti ta rawt a.

“I duhthlanna kawngah chuan thutlukna siampui che ka tum lo mai ang e. Mahse, Zorin ka hmangaih ka tih awmchhun ila ni, ka damchhungin chu thu chu ka vawng reng tawh ang” tiin kal mai tum chuan ka inher a.

“Ka hmangaih che” tih pah chuan a insut zui nghal hlawp hlawp a. Khum bula ding ran chung chuan ka en reng a, kha tihlaia ka rilru hrehawm zia kha aw.. Mumang ni se țhanharh san daih ka va han chak teh lul em..

Khum ațang chuan lo chhukin min rawn kuah thlawp a, “Engnge ka tihsual Chhuana, ka chungah hian engatinge chhiatna lam hlir a thlen bik le.” Ka kawrhma chu a mittui chuan a chiah huh rang kher mai. Ka hnungah chuan nghet takin a kuah a.

Ka mittui tla tur ka dan țang țangna lamah chuan ka khap hnam sawk lo thei ta lo a ni.

“Nang leh zelin min kalsan chuan engtinnge ka awm tak ang?” a ti leh lawi a.

Chhan pawh ka tum lo. Chhandan tur ka hria a zeng pawh a ni law.

“Ka tan dam hian awmzia a nei lo asin. Hmangaihtu leh ka lama țang tur pawh ka nei ve lo” a ti leh pek a!

“Tu thu mah i zawm duh si loh chuan tihngaihna a awm si lo a ni”

Rei ngial chu min țahkhum a, amah mantu te ka veh lai aimahin ka rilru ipikna chuan min bawh zual zawk mah tawhin ka hria. A thutlukna ber min hrilh chiang tawh a, ka tan beisei a awm loh zia chiang viau mah ila amah chu ka hmangaih miau vangin kalsan hlen tur chuan ka rilru ka la siam ngam thlawt lo a ni ber mai.

Mahse, chutia ințah khum ringawta hun hman chu hmasawnna awm si hek lo le. Inngaihtuah fim ran ka duh vang chuan min kuahna chu ka nam kian sak a, “Ka kal ange, i inngaihtuah țhat theih chuan a lawmawm ngawt ang” ka ti a.

“Naktukah dar 11 00 ah Pastor quarter-ah inhmuh i duh angem?” beisei nei tih hriat reng chuan min en a.

Ka chhang lem lo.

Ka chhuak tur chu “Ka lo nghak dawn che nia” tiin min thlah hram kha. A nu pawh chu ka be zui lo, biak nachang pawh ka hre lo a ni ber mai. Ka chhuak ding hle ringawt a ni.

In lah chu ka’n thleng hma khawp a, ka vei thuak thuak a, Lalvala te inlam bawk panchuan ka chhuak leh ringawt a, engnge kan ina ka va luh kawi kher chhan kha ka ngaihtuah chhuak zo lo.

Lalvala leng a lo la haw lo chu niin. A bialnute inlam pan chuan ka kal zui lehnghal a, an pahnih chuan tapchhakah vaihlo zial an lo ?awn dun mawlh mawlh a. A hma ang em chuan ka va arnghal luh ngawt tawh bik lo bawk a, an phu zuk tawh lem lo.

Ka hmel a phelh deuh nge ni Partei chuan “I rawn tlanchhe haw elo?” nui deuh chung chuan a lo la ti zui a. Mahni lo maha hah ve mahnaklai a!

Haw kawngah chuan lungdawhah bawk kan chawl dun leh a, ani meuh pawhin thurawn min pekdan tur a hre lova chha chu a ni e.

A tukzing tukțhuan eikham ațang chuan ka buai țan tawh a. ‘Ka kal ang nge, kal lovang aw’ tih ngaihtuahna chuan ka nunphung a ti danglam zo vek ni ber hian ka hria. Chhungte han rawnna chi em niin ka hre bawk si lo.

“Engngati nge i vei sek a?” tiin ka u chuan min zawt ta nge nge kha a nia.

Ka chhanna chu a awih ang’em ka hre lo.  Kei lah chuan lang lo lama Pastor Quarter lam chu a hmuh theihloh tih hre reng chungin ka melh sek lawi bawk sia.

Mawngvawmba an sawi chu nep te hi a ni ringawt mai. Uite vawihkhum ang chauh!!
Dar lah chu a kal chak viau mai leh ta nghal a, dar 10 a pel ruai chu a ni ta der mai.

Kal ta ila eng thil nge thleng chuang ang le? Kal lo ta ila engnge ka chan tur awm chiam chuang ang? Mahse, he thinlung hian kal a awn tlat mai bawk si. Ka duhlohna awmchhun chu ngaihpawimawh tham pawh a ni lo niber hian ka hria.

10:30am

Kal duh si chuan khum tlangah chuan ka țhu reng lawi bawk a. Ka’n țawngțai ve sasawi a, ka țawngțainaa ka chham te lah chu ka dil ber hnen a thleng zo pawh hian ka ring ngut lo!

Dar 11:00 a ri ta hial a, ka thin a rim hlur tawh. Engmah lah chu ka ti lem chuang bawk si lo. ‘Hetia ngawirenga tawrh ringawt hian awmzia a nei lo, a nih nih nih mai ngam a hun ta e’ ti te chuan ka’n infuih ve bawk a. Mahni leh mahni a ri lo lehnghal a infuih chu a thawkna lo teih teih khawp mai.

Ka tho nalh a, ‘ka  inngaihtuah rei ta bawk alawm’ tiin Pastor Quarter lam pan chuan ka kal ta kha a nia. Ka zam chu ka ti chiah lo. Mahse, thlangam tak chuan ka kal lawi si lo a ni.

Pastor quarter chu ka thleng ve mai a, ka lut mai ngam lo chu kawtzawlah chuan ka tawi hrut hrut a, Pastor chuan min lo hmu a ni ngei ang min lo ko lut ta a.

An țhutkhawmna pindan thlanglamah chuan Zorini pawh chu a lo awm reng tawh a, beiseinei mitmeng a a ni amahah chuan ka zu chhiarchhuah tak ni.

Inthlahrun hmel tak chuan min lo en a, chu hunah chuan a ni ka hmangaih Zorini hmel ngei mai kha ka hmuh leh tak ni.
Pastor chu kum la upa tak a ni lem lova, țhalai han tih tur chi phei chu a ni tawh bik lova, khawvel nunphung hretawk tur chuan hun a hmang tawh awm e.

“Chhuante, tunlai Biak in lamah i langkhat riau ania” a ti khauh a.

“Nia, tunlai chu kan boruak hip dang lutuk hian min tibuai a ni ber mai. Ngaihtuahna mumal tak pawh ka pu thei lo” ka ti ve mai a.

“A ni khawp mai tiraw. Mahse, kan chauh ber lai te, kan chak loh riau lai tak te hian tihhram hram zawk tur a nia, kan phur lai leh himdama kan inhriat lai chauh hian nuam hi kan tia. Kan mangan tawpah kan țawngțai leh ringawt a. A kawnghmang lo deuh țhin alawm tiraw..” a nui zur vur vur a.

“Tak tak a, hei in harsatna hi a namai lo hle mai a. Mi hriatpui chin chu chu awm bawk mahse mi hriatloh lamah a aia rip zawk emaw tih mai turin lungngaihna ti thuahhnih zawngin harsatna dangin an belh chhah che u a ni a. Mihring lam taka thlir chuan hei lo liama rapthlak han tih mai tur leh vanduai thlak ngawih ngawiha hriat mai pawh awl tak tur a ni a. Mahse, thil engpawh mai hi kilkhat leh thlirna ki khat ațang chauha kan thlir hian a lo fel mawh khawp mai a. Chuvangin hak kan tih zauh deuh te pawh a țul awm e” a tih chhunzawm zat a.

Sawi ve tur ka neiin ka hre lo.

“Hei, nangpawn i hria a, kan beisei loh tak maiin Zorini chuan vanduaina a tawh kal zelah nau a pai ta hlauh mai a ni a. I dinhmun tur ka’n ngaihtuah ringawt pawh hian a luhai thlak dawn khawp hian ka hria a, Zorini tan lah han sawichhuah mai awlai tak a lo ni lo bawk nen ințhen duhin hma te pawh a’n la a, nangin pawm harsa i lo ti țhin bawk si a. Chutih lai karah chuan hei Zorini’n puitling takin mi han rawn nachang a lo hria a, thutlukna ani tan chuan siam har tak tur pawh a ni reng a, mi tam zawk thlirna ațang chuan a naupai hi titla pawh nise an dem hauhvin a rinawm lova. Mahse, mite thlirna aia pawimawh zawk leh a mitmei kan ven zawk tura chu ‘Chunglam’ khi a ni”

“He thil hi Pastor ka nih vang renga sawiah pawh min ngai maithei a, a nihna lai te pawh a awm thei tho bawk a. Kan hriattur chu nautihtlak hrim hrim hi Pathian mithmuh a ni emaw, he khawvel dan ang pawh ni raw sek sek ‘tualthahna’a ni a, ; ‘sual’ a ni tawp mai a ni. Chu thil sual chu keimahni’n lanmawi kan duh vang te, mi ang nih leh kan duh vang te hian lemchang nun hmangin kan tilui fo ta a nih hi. Thilpawi tak a ni”

“Kum 1978 khan Dr Colin Brewer chuan survey a neih naa a hmuhchhuah chu, hmeichhia nau titla te hian an nau tihtlak avangin natna an chungah thleng em em hran lo mahse, an rilru chhungril a hlim ngai lova, nguina leh lungngaihna an chungah a thleng hma bik niin a tarlang. Dr Colin chuan, ‘Hmeichhia nau titla tawh te hian natna ho tak anga lang sawi neuh neuh tur an nei awlsam bik hle. Tin, an thil tihte avang khan nun hlimna an nei ngai meuh tawh lova, an nun a zalen lo riau ?hin’ tiin a sawi”

“Loh theih lohna avang entirn nan nu hriselna hlauhawm khawpa awm vangte emawa nau tihtlakna hi chu awm bawk mahse, a duh nazawngin nau an titla hi chu thil pawi tak a ni. Mihring hriselna hi a inchen lova, nau titla țhenkhatte hi chu an hriselna in tawrh phah lo mahse, mi hrisel lo nau titla te erawh chuan damchhung țhat loh phah nan an hmang thei a. Nau an tihtlak avang khan a dang pai lehzelna tur lakah harsatna an nei thei a ni. Tin, nau an pai leh a nih pawhin a hun lova hrin emaw chhiat an awlsam hle bawk. Kum la puitlin tak tak hma a nau tihtlak phei chu nunna in a tawrh theih avang leh piansualna hial pawh a thlen theih avangin a hlauhawm hle a ni. Vawikhat  titla pawh ni mai lo, vawihnih vawithum tihtlak phei chu a hlauhawm viau a nia”

“Nau tihtlak avang hian natna chi hrang hrang a rawn piangchhuak ve thei a. Mi hrisel lo tan phei chuan pawngpaw basa ngam ngawt chi a ni lo. Taksa hrisel țha pangngai ni țhin nau tihtlak avanga bawrhsawm ta viau mi tam tak an awm a ni. Nau tihtlak avang hian kal na, zun kawng țha lo, thi neih țhat theih lohna leh natna sawi neuh neuh tur tam tak a vei theih a ni”

“Hmeichhe tam tak chuan nau tihtlak hi eng teh ualah mah an ngai lova. Vawihnih vawithum titla te pawh an awm. Tualthat an ni tih hi an hrethiam lo niin a lang. Hetiang mite hian sex hi infiamna ang lekah an ngai a, anmahni ațanga nunna thar lo piang tur chu an tichhia a ni tih an hrethiam phak lo a ni. Nunna hi duh duh a siama tichhe thei tu an ni lo tih an hriat a țul. A pe thei tu leh a la thei tu, kan Pathian thinurna hi an chungah a thlen vaih chuan a rapthlak hle dawn a ni”

“Inchanchin kan hre vek a, hei Zorini pawh a chhungte leh țhian țha zawng zawngin nau ti tla turin an ti vek. Keiin ka lo rawn ve thung erawh chu ‘thilsual a ni’, ‘Tualthah i duh chuan titla rawh’ tih mai te hi a ni”

“Nunna hi Pathian siam a ni a, a pa a dik lo e tihvang ringawta a fa in ti hlum dawn a nih chuan tufa nge khawvel eng hmuhman awm ang?”

“Pathian huat berte zinga mi a nih avangin nau a tihtlak avang khan thilsual lian tak a ti dawn a ni tih ngaihtuah ila, mifel anga lan tum mahse, misual a ni tawh tho tho. Midangte hriat loha ti nia kan inngai a nih pawhin min hmu ru rengtu Pathian chu kan bum thei hauh lovang. Mihring te sual saa piang kan ni mah tih tawh a, a belhchhah nana tual thah zui leh kher hi chu a rapthlak dan a thuahhnih a ni"

 "Mualpho hlauh vang emaw mipate'n an neih leh duh loh vanga mahni rila rah ngei thah hi dawihzep hna a ni tih hriat tlat tur, tum loh tak leh duh loh takin nau a lo pai palh  a ni a, chumi vanga thilsual ti tura nawr hi nakina a hmakhua zel chu sawiloh a thlarau nun thlenga nghawng thei a ni tih hriatpui la, i țanpui thei lo a nih pawhin a tawrhna chu belhchhah tir kher suh”

Ka sawitur hre ve lo chu ka hawi lawl lawl ringawt mai a ni.

Ka ngaihdan min zawt lova, ruahmanna ka neih leh neih loh pawh an ngaichang chuang lo. Dik nia an hriat chu min hrilh nghek mai a ni ber e. Mahse, an thusawi chuan ka rilru hel viau chu a ti thawl riau hian ka hre pek a.

‘A duh leh nau pawh chu titla lo mai ta se..’

Thildang eng engemaw kan sawikual leh hnu chuan tihtur ka neih chhuanlamin ka thawhsan ta uaih a. Zorini lehlam hawia a mittui hru zauh mai chu ka hmu hman tho mai!

“Zorin, ka rualin lo chhuk ta che” ka tih chuan min melh zauh a, Pastor lam a melh zui leh a.

“Kal rawh u. Zanah i nute pawh ka rawn titi pui dawn nia. Engmah lungngaihna tur a awm lo” a ni pawhin a lo tih tak vang chuan thlangam loh hmel zet chuan min zui ta a.

Engemaw chen chu ngawirengin kan kal dun a, chuta ka ngaihtuah ber chu ‘nau ti tla lo ta se nupuiah ka nei tho ang em?’ tih hi a ni. A ruhlang rawta sawi chuan a titu hriat chian satliah chu sawi loh, thingzai mai mai sulhnu han chhawm chu ka tha ana tak zet. Thil thleng pangai a ni lo tih hre reng mah ila pawm mai chu a har ka ti viau a ni. Chu a chhapah nau a’n nei zui ang a…Ni lo, ka thei dawn em ni chutiang leh zel chu le.

“I in enkawl țha em?” ka tih chuan a phu deuh zawkin ka hria.

“Tih vak ngaihna a awm lo” a ti halh a.

“Rilru siam dan tur pawh ka hre thiam tawh lo a nia” ka ti a.

“Chhuante, engtin pawh awm la ka dem lo che asin. I duh dan danin awm la, min vengthawng reng reng suh” a tih chuan a rilru puitlinzia a tilang chiang viauin ka hria. A diktak sawi chuan min hmangaih em em a, ka kalsan hi a hlau tih ka hre chiang ve viau asin. Mahse, a duhthlanloh kawng a zawh miau mai bawk si.

Țhen ta ila, midang pawh nupuiah nei teh reng ila ka hlim ka ring chuang lo. Thutlukna dik lo  ka siam ang tih ka hlau tak zet.

An inlam pan chuan kan kal dun ta zel a, chhun reh lai a nih vangin tu tehchiam mah hmuh tur an awm hran lo. Min hmu pawh nise pawi han tih tehchiam chhan tur kha a awm chuang lova, maktiin tu mahin min thlir zui pawhin ka ring lo.

Amah lah chu sawitur a hre lo nge a inthlahrung ni a ngawi ran mai bawk si. Keilah ngaihtuah chawp zel ka ngai a, ka fa pai te zawng nise chuti tlawk tlawk chuan kan kal lo tur a sin mawle.

An in kan thleng a, nidang kan ang lo lutuk chu a hrilhhai thlak lehling hle mai.

“Tikhan lo țhu lawk rawh aw, ka’n inbual lawk ang” a tih chuan an thingrem lian chungah chuan nidang ang bawkin ka zal leh der tawh a. Rilru erawh a dang lawi bawk si.

Ka ngaihtuah nasat poh leh ka buai ting nimai hian ka hria a, tuemaw rawn tur tal awm se țha tur asin mawle.

A inbual zawh chuan Thingpui te min siam sak a, ka bulah chuan ka pawt țhu a, ani pawh chu țang lem lovin a lo țhu ve mai a. Sawitur erawh kan hre lem lo khawp mai.

Zanriah kan ei lai chuan ka pa chuan “Mama tlaiah khan Pastor nen kan inhmu a..” a tih chuan phawk fe hian ka en a, ka chawbar tur pawh ka țhulh hialin ka hria.

Ka hawi mawl deuhin a hria nge mawni a sawi chhunzawm leh nghal a. “I duh a nih phawt chuan nei rawh. Harsatna kan siam lovang che” a ti zui a.

Ka hamhaih kher mai! Ka ka hau tawh hial maithei ni. Ka nu leh ka u pawh chuan mak ti takin ka pa nen chuan min melh tawn a.

“A harsatna tawh hi a namai lo lutuk, nangin i phatsan leh zel phei chuan a tuar zo lo ang tih pawh a hlauhawm thei zawk dawn tlat. In inhmangaih a, chu chu a tawk viau. Hmalam hun emaw thil lo thleng tur ngaihtuah lawk vak a ngai lo. I nu leh pa kan awm a, i u nen; theihtawp chhuahin kan inpeizawn tlang thei vek a, harsatna tur a awm lo. Aizawl lamah kan awm duh e intih leh in awm thla mai ang a, nangpawhin zirna i chhunzawm leh theih phah anga a țha phian zawk mai thei bawk”

Ka pa thusawi chu chhandan tur ber ka hre tlat lo alawm. Mahse, kha tih lai ka rilru hrehawm chu chhawk ang huai ka ni hian ka hria. Kawlpui khenthlak an sawi ang em chu ni lo mahse ka nu leh pa rilru ka han hriat meuh chuan hah a dam ta huai e. Harsatna hi nu leh pate hian mawh min lo phursak thui hle a ni tih ka hriat phah, hrilh hriat vat hi thil țha tak a ni tih ka pawm ta.

“Ni e, rilruah hian in awm reng a, han tih vak ngaihna in awm chuang bawk si lo. Innei thuai ula a țhat ka ring” ka nu chuan a lo ti ve bawk a.

“Ka nu nau a pai alawm” ka lo ti sap a. Amah pawh chu ka en ngam lo a ni ber mai.

“A țha hlei hlei alawm chutiang a nih te phei chuan” a la ti tak deuh deuh a.

“Ka fa a ni lova..”

“Engnga..?” phawk fe chuan min melh a, ka pa chu a lo inrawlh ta vat a, “A vanduaina a thuah hnih deuh a ni” a lo tih chuan an hrethiam tlang a niang chu an ngawi ta țhap mai a.

Ka kham nalh a, kam pawh țhuah fumfe hman lo chuan ka pindan lamah ka lut tlang daih a. Mahse, engmah tihtur ka nei der mai si lo. Thosilen ban chu ka va hmer ngawt ngawt ringawt a.

Ka chhungte chuan engtinnge an sawizui ka hre tawh lo. Engtin emaw tak chuan an sawi zui ngei ang le.

A hnudeuhah chuan ka pindan kawngkhar lo inhawng riai riai ri chu la hria a, tunge lo lut phei chu ka hre lo. Ka hnungchhawn lam a awm a nih tlat vang chuan.

"Mama, hrehawm tihna tur engmah a awm lo a nia" ka hnung lam ațanga lo ti tu chu ka nu a ni.

"A nih nih a ni zo vek tawh a, kan duh reng vanga thil thleng a ni lo tih kan hriat vek tawh kha, chuvangin a lo thlen ang hian lawm taka kan pawm mai a ngai a ni" a ti leh a.

"Nu, tihngaihna ka hre hlawl lo a ni. Engtia awm tur nge pawh ka hrethiam lo" nu te bulah meuh chuan lung a chhe ruai mai alawm le.

"Ni e, a dik alawm. Chuvang chuan rilru fim zawk leh ngaihtuahna fim hmang zawkin ruahmanna kan siam ang chu i tana țha turah ngai la, chumi a nih loh chuan thu tlukna mumal nei thei si lovin i buai zual ting a ni mai"

"Mahse, naute lo piang tur hi kan chhung zingah kan pawm thei dawn em ni?"

"Thei teh lul mai. Harsatna engmah a awm lovang. Kan thisen zawmpui ang thlapin kan en ang lungngai reng reng suh. Vantlangin a rai tih an hriat hma hian innei turin i pain a duh che u a. A chhan pawh midang fa anga lantir kha a duh lo a"

Ka nu chu lawm avangin ka kuah lo thei lo a ni.

A awma bei a țah hliam hliam mai chu ka chak em asin. Ka mittui chu ka dangkir thei ngang lo a ni.

"Nu, ka lawm e" tih chu lawiruaiin ka chham chhuak thei hram a. "Inti harh la, nakinah mumal deuh zawkin kan la sawi țha leh dawn nia" tiin min chhuahsan zui a.

Tlanchhuah lawka Zorini te in lam pan nghal vang vang mai ka chak takzet a ni. Chu em chu niin ka hre bawk si lo.

Rei phei chu ka rial theiblo nasa!

Lalvala te inlam pan chuan ka chhuak thuai ta nghe nghe a, chu pawh Zorini te ina ka kal châk vang phêng a ni pek a.

Vala nen chuan kan chhungkaw thu chu kan sawi dun ngial a. "I chhungte berin chutia an tih te chuan a lawmawm a nih chu, an mitmei ka ven vang a ni ber a duh ang pawh a chet ka lak țhat ngam loh" a ti a. Ani pawhin min lawmpui khawp mai.

Zorini hrilh hlan ka nghakhlel lutuk chu rei pawh ka awm thei lo a chha chu a ni e.

Vala te in ațang chuan lenglen ar khuan khalh chuan ka chhuak ta nge nge a.

Ka'n muangchang lui deuh viau a chu a tih hleihtheih meuh lo a ni. Kawngka chu ka han kik karh karh a. 'Lo lut rawh u' an tih chuan ka daklut fel der tawh!

Pastor pawh a lo țhu vang tawh a. Zorini nu nen chuan thupui an vai dun a ni ngei ang. Zorini naute chuan zanriah eina an seng hawi mek a nih hmel e.

"Khawnge Zorini?"

"Pindan lamah khan a awm nge mawni le" a nu chuan a lo ti a.

A nu rawn deuh ti tuai chuan "Ka va lut lawk mai aw" ka ti zui a. Inhnar thu awm hek lo le. Pindan lam pan chuan ka kal zui nghal a.

Pindana ka penlut lai chu mu zangthal der chung chuan min lo en kiau va.

"Zorin, kan innei dawn" ka'n ti tawng mai a leh!!

___________           __________
            KA NAKRUH BO


               Chapter-XIII




Phawk fe chuan min melh a.

Zawhna nei tih hriatreng chuan min en hau mai a. Keilah chuan ka sawi chhunzawm mai bawk si lo.

Lo țhutchhuah pah chuan “Engnge a awmzia?” a ti a.

“Kan innei dawn” ka ti awlsam leh mai a.

“Engnge awmzia ka tia lawm chu chu..?”

A bulah chuan ka țhu a, ka sawi tur a nghakhlel tih min en dan ațang chuan ka hre reng mai. A darah chuan muangchangin ka’n kuah te te a. Sawihar min ti deuh nge maw ni a nûr náng tawh mai.

“Ka chhungte’n a rangthei ang bera innei turin min duh a”

“I chhungte’n maw?”

“Umh..tlaiah khan an sawi a”

“Chhuante…” nghet takin min kuah vawng vawng a. He thil hi ka tawnlohna ava rei ta em! Tunah chuan ka thlamuang leh ta siai siai mai.

“Chutiang a theih dawn em ni?”

“Engmah harsatna kan chhungkaw lamah chuan a awm lo asin”

“Mahse, nau ka pai hi…”

"Buaina tur a awm hleinem, engkim a fel vek"

"Chutiang ngawt a ni thei dawn em ni?"

Ka awma a bei chial mai chu ka kuai dak a, duhthaw zet chuan ka fawp vawng vawng a. Keiaimahin a duham zawkin ka hria, mi reng a țham nghet mai a.

Tih țhan loh pawh ni hek lo le lungchim fe a kan in fawh vang vang lai chuan ka mit chu ka han meng leh hram pek a, a mittui luang ngiai ngiai mai chu ka hmuh hmasak ber a ni.

"Chhuante, nakin lawka buaina turah hian kan inhnuklut mai mai ang tih ka hlau e" meng phe riai chuan min en a.

"Engmah hlau suh, chutiang thil a thleng lovang"

"Nang chu nangmah i nia, i chhungte pawh" a hlauhthawnna chu awm ka tihpui em em a ni.

"Engkim an hre vek a, chuvanga hmanhmawh chu anni reng alawm. Ka dil pawh an ni lo. Ka pa chuan 'miin a rai tih an hriat hmaain innei rawh u' a tia. Midang fa anga lang tur kha a duh lova"

A maimitchhing diar diar a, a mittui chu a dang zo ngang a lo a ni ngei ang. A hmui a pet khur der der a.

Am mangkhena ka fawh leh hnu chuan "Pindana awm reng hi a mawi vak lo a nia" ka ti a.

A chhanna ka hriat chu ngawih a ni mai.

Kha zana anga hlim khan ka awm khat ta hle mai ka ti.

Kan boruakin a zir tak em avang chuan chhungkhat te chu kan han inrawn khawm ta rum rum mai kha a nia. Keipawh nupui neitur awm chuan kan awm zui ve nghal ngawt pek a!

Palai thawhkhatna chu țhatakin an lo kir ve mai a, 'chhungkua kan han in rawn khawm ve ang a' tiin pangai takin an rawn thlah a.

Chhunlama ka len pawh ka sim ve ta, rei a rial tawh lo tura ngaiin ka insum ve hram hram a ni ber mai.

Rei han rial chi ni nghal lo chu Palai te pawh chu an thawkchhuak leh thuai a, tunah chuan a nî nen lama sawitheih nghal inringin ka pa te pawh chuan remchang tura an hriat hun te chu an ken tir kha a nia.

Ngaihven chung anga lan chi a nih siloh vang chuan Lalvala te inlamah ka tei phei a, lenchhuah a rawt pawh chuan ka sawizui pui duh lem lova. "Nakinah palaite lo haw hun awmah kan inlama kan phei dawn nia" ka tih sak a, a hrethiam ve mai.

"Kei ai a pa in ni hmasa tur hi chu ka tlawmngai deuh mange aw" min han tih khum zet a, a nui hak hak a.

"I chi a hût a niang nang ve hi, i kûi hnem tawh nen" ka lo tih sak chu a run kher mai.

Kan inlam pan chuan kan chhuak phei dun ta a, ka boruak chhaih chu nuam ve riu reu tak a ni. Ka pen te reng reng chu sau tak tak mai hi a nia! Ka ka pawh lo zen se ka seh lovang tih ang vel a ni. Heih heih mai raw.

Inchhung kan han lut chu an lo mûk hlawm kher mai. An boruak a dik chiah lo a ni tih an awm dan ațang chuan a lang reng mai a, eng thil nge maw thleng le? An sawi hma hmaa han zawh thawt thawt chu niin ka hre chiah bawk si lo.

Ka pindan lama luhtlang mai tum chuan ka kal tlang a, ka lut dawn țep tihah chuan ka pa chuan min lo au ding a, ‘Lo țhu ve teh, i pute va chhuak thu rawn hawn hi ngaihtuahho a ngai a nia” a ti zui a.

"Engatinge nia harsatna a awm em ni?" tiin Lalvala bulah chuan ka țhu zui nghal a.

"A, kan rin loh lam takin min lo chhang alawm mawle. Țan kan han khawh ngial nachungin tuang an tichhah ve tlat mai bawk sia, engtia han tihzui chi nge pawh kan hrethiam lo a nih hi" ka nu nau, ka pu Mawia chuan a ti zui a.

"Engtinnge an lo chhan che u a?"

"A pa Kima leh Rinawma(Zorini nu u) an lo awm ve bawk a, anni țawngka kha kan ngaihchan ber a nia, a nu phei chuan engmah a sawi lem law. Mahse, an thu kha a pawm ve tho tihna a ni mai a" tiin an ngawi leh rih a.

Vaihlo zial te chu an lakai kawi leh rih a, a hmanhmawh lo viau mai.

"An han sawi hmangah kha chuan naute a lo pai bawk si a, midang ina lawi tur chuan an ngaihtuah deuh a ni awm a, hnu leh boruak awm thei tur an veng ve a ni ber ang chu a landanah chuan"

"Kha kha chu ka pa te tihdan dan a ni mai a, engmah ngaihdan pawh ka nei rih lem lo" ka tih sak a.

Ka pa chuan, "Eng pawh nise hei i pute nen pawh kan lo sawi mek a, engkim hresa leh inhuam vanga palai kal tir kan ni tawh a, an chanchin lam hrechiang lovah min ngai pawh a lo ni mai thei a, chuvangin nakzanah han kal nawn leh phawt sela. Kan thu an hriat chuan an țanglui bik lo turah te pawh ngai ila. Kan inhriatpawh lovah an ngai pawh a ni maithei asin" damthlap hian a ti a.

A thlamuan thlak thei țhin mange.

Mahse, Zorini pawh ka hrilh chian viau kha mawle. Engmah a sawi ve lo tihna em ni dawn le. A mak hle mai. Zorini hmuh phawt a ngai a ni.

"Ni e, chu'ng te pawh chu thil awm thei a nia, keini va kal lahin engmah kan lo hre ve lem si lova. A hmunah kan va kût chi lo hawi ta vel mai mai kha a nia. Lungngaihna tham a awm loh chu kan sithlu em em ang" ka pu Mawia chuan a ti zui a.

An sawi ang tak tak chu a nih ka rin ve tho vang chuan harsatna teh chiam kan neih zui ka ring hran lova, lung han tih zin chiam pawh ka la tum hman lo a ni ber mai.

A tukzing tukțhuan kan eikham hnulawkah chuan kan țhenawmte vawk ke, chhuat awnga a tanna lamah a lo kar tliak a ni awm a, 'talh law law mai ang' an tih vang chuan min rawn pun a, sumruk tualleng zet tur chu kan han puah ve kha a nia, ti țhang kan lo awm lem lo bawk nen chhun chawfak hunah chuan kan zi awl awl tawh mai.

Kan hralh bang kan rep sak fe hnuah pawh Belpui pathumah kan la mung hluah mai a, 'lainaho eikhawmna remchang a ni mai' an ti hleuh a, a țha phian awm tak asin mawle.

"Chhuante, tuikhur mawngah khan hnah kan va la lawk dawn em ni. YMA thleng hawh chu tihfel a peihawm dawn loh emai, a hluiin siam mai ila, hlui tam a ngai dawn chuang lova tihfel a awlsam a ni mai kan tan pawh" tmkan țhenawm pa chuan a ti a.

"A țha mai alawm, i lo kal ve kher a ngai hleinem. Lak tam a ngaihloh phei chuan keimahin ka zu kal ange" ka ti a.

Kal chu a'n tum ve ut ut nain ka hnial thla thei ta hram a. Hnah la tur chuan Tuikhur kawng lam pan chuan ka chhuak phei ta a.

Zorini te in kal pelh chu chak viau mah ila a nuam dawn lo riauvin ka hre mai a, a nu te mawlhin min lo hmu ang tih ka hlau.

Thinphu deuh dêp dêp chuan Zorini te in chu ka kal pel a, a inkalh loh danah Zorini a awm ngei ka ring. Hmuh duh viau mah ila a hun chiah em ka hrethiam si lo a ni.

Tuikhurah chuan Nu Rotawni chu hnute uai țhuah hian a lo inbual siah siah mai pek a!! Min hmu mai bawk si lova keimah zawk chu ka lai thawthang a ni hawt mai.

Tuikhur chu kalpelh a ngaih vang chuan han din tlat thu a awm bawk si lo. Chhak deuh hlek, lang lo liam lamah chuan ka let chho leh a, chuta țang chuan ring zet mai hian ka'n zai thla liah liah mai pek a nih kha! 'Lo inha rawh ka lo kal e' ka tihna a nih ber chu.

Ka thlen thlak chuan puan a lo insilh fel thlap tawh!! Țha takin ka kalpel thei ta.

Mualrai țha lai chu ka chuangchhuak zet a, chuta țang chuan tuikhur mawnglamah chuan ka lut thla zui leh a, changel hnah na na na chu a phãnawm loh khawp mai.

Kar lovah Zâwng âwm tia lawng tur chu ka têl thei thuai a. Muangchang lo chuan ka haw chho zui ve leh nghal mai a.

Zorini te in ka kalpelh dawn laitak chuan zawi angreng tak fiah deuh si hian min lo au a, ka lehhawi chuan tukverh ațang hian min lo en reng mai chu lo niin. Ka lo hmu miah lova.

"I lo lut dawn lo a mi?" a ti a.

Luh pawh ka lo tum chiah hleinem mawle. Hawikual pah chuan ka'n tawi deuh a, mi hmuh ka nei lem loh vang chuan ka lut zui ta a.

"Engtur nge hnah te i lak a?"

"Kan țhenawmte vawk kan talh a, chaw eina tur"

"Pu Rina te maw?"

"Aw, a ke ruh a lo ti tliak a, kan talh pawp mai"

"Nih chu, a pawi-tui dawn nih chu mawle"

"Nia, lo ei ve ta che"

"Zahthlak e a. A rep ka eichak zawk"

"I lo ei dawn nia" ka tih chuan a nui seih a.

"Naktuk zanah palai te kha lo kal leh an tum a nia aw" ka ti a.

A ngawi veng veng a.

"Tinge, i duh vak lo a mi?"

"Awmzia a awm ka ring lem lo khawp mai"

"Engatinge?"

"Midang fa in hnena hrin ngawt kha nakina buaina mai mai tur niin an hria a.." a țawng ring lo kher mai.

"I bulah pawh ka sawi chian viau kha"

"Nia, ka hria alawm. Mahse, tun ang reng hian thil a kal thei dawn hleinem"

Chu țawngkam chuan min khei zak mai a. Ka lawm lo kher mai.

"Zorin, min ring miah nange?" ka ti ta rawt a.

"Ka ring che lawm"

"I awmdanah min ring tih a lang chuang bawk si lova. Țawngka ringawt chuan kawngro a su si lo a nih hi"

"Chhuante, hriatthiam tum hram la"

"Ni lo, ka hrethiam thei thlawt lo a ni. Min hmangaih loh chuan tlang takin min hrilh la, ka kalsan vang vang ang che"

"Chutiang a ni lo"

"Min hmangaih em?"

Min melh hrek a, a inthlahrung hmel chuan khawngaihthla a la kher mai. Mahse, tunțum chu duapkai zawk nih ka duh tawh bik tlat lo.

"Piang nawn leh dawn pawh ni ila ka thlang nawn leh ang che" min hrilh awm ang pawhin a awm lo. Tukverhah chuan a hawichhuak daih a.

"Chuti ni si, inneih duh bawk si lo chu engnge a awmzia?"

Mi chhanna  mumal a nei leh bawk si lo.

“I hrethiam ngai dawn lo a nih hi Chhuante”

“A neitu tur berin i duh miau loh chuan tihngaihna a awm lo a ni mai lawm” ka thusawi chu a laknat hmel kher mai.

 Hrehawm tih hmel zet chuan min en veng veng a, a duh leh hrehawm ve bawk rawh se. Amah vanga ka tawrhna zozai te hi han ngaihtuah ve se la mawle.

“Ka kal a nia” tih leh chhuah ka rual zui nghal a, hawilet map lo chuan ka kal vang vang a. Ka lum deuh pup pup mai hian ka hria. Kawnga uipui lo tlan mai mai te chu han pet beleuh țhawt țhawt mai hi ka duh a. Em em bawk chuan a, ka nihphung ka va hloh nasa ve le.

Ka thleng chu tu teh vak an lo awm lova, an haw țhen hlawm nge mawni. Keipawh intifai hmasa tur chuan kan inlam panin ka chhuak zui ve leh nghal mai a.

Ka inbual lai te, eng thil mai pawh ka tih mawlh mawlh lai pawh chuan ka ngaihtuahna chu thil pakhat chauh chuan a hruai a, ‘Palai te pawh chu kal lo mai rawh se’ ka ti mai dawn emaw ni le. An tan kalin awmzia a neih loh chuan an hah thlawn mai mai dawn ni te pawhin ka hria.

 Mahse, ka pain rem a tih ka ring chiah bawk si lo. ‘Beidawn țhak thleng le’ ti chi a nih miau vangin sawi mah ila a bengkhawn pawh ka ring chiah lo.

A zahthlak mai mai dawn hian ka hria.

Engatinge maw ințhen ang a tih mawlh mawlh lai te khan ka lo kalsan mai loh le. Heti teh hrepa min tibuai tur tih hriata lo ngaihven zui malek tur hi a nia. Khum kotlanga țhu chung chuan ka in sawh ka insawh ringawt a. Hmasawnna awm chuang si lo, bei a dawng duh bawk si lo chuan min ti mangang a ni ber a . Ani hi ka lo hmangaih hle a ni tih ka hriat chian phah hle.

Ka nupui ni lo tur chuan ka ngaihtuah ngam thlawt lo a ni.

Kan chhungin țhenawmah chuan chaw kan ei phei vek a, thil han sawina hun pawh a awm lo. Sawi pawh ni ila ka pa’n min pawmpui ka ring chiah chuang bawk si lo nen sawi ka tum buai duh ting tang ta lo mai.

Zanah chuan Lalvala nen chuan kan chung chang chu kan han khel dun leh ngial a, min beidawnpui ve khat ta a niang ti hram hram tur zawng chuan engmah min sawi pui duh ta lo.

“Țhianpa, a tawk viau tawhin ka hria. Inngaizawng in nihna chu dahțha ta ila, a chunga i thiltih vang ringawt pawh hian nangin i duh a nih phawt chuan han țang der ngam turah pawh ka ruat lo. Chu a chhapah a hmadaih ațanga inngaizawng tawh sa in la ni zui leh ta nghal a. Harsatna awm thei zawng zawng in hriat hnua palai tir in ni a, chuti chung pawha chhuanlam an la siam a nih chuan ‘A tawk e lumam’ tih a ni mai. I dawhrei ve tawk tawhin ka hria” a ti hmak a.

“Ni e, vawiin pawh ka ngaihtuah ka ngaihtuah a, ka lo hmangaih hle a ni tih ka hrechhuak a lawm. Ka nupui a ni lo tur ang ringawta ka ngaihtuah pawh hian awmngaihna ka hre meuh lo chu a ni"

“I hmangaih tih chu ka hria alawm. Hmangaihna hi a phutawka chhanlet a nih loh chuan tawrhna mai a ni. A  Hmangaih ve che a nih chuan engkim a huam tur a ni”

“A naupai ber hi a lawm a harsatna chu”

“Nia, ka hria alawm. Nangni paw’n inhre vek a, i nu leh pa thlengin a harsatna an hriatpui a, an pawm thlap a, a mualpho hman an hlauh ngawih ngawih laia ‘ka chuti kha ti e’ lo tih kawi leh hi ka ngaithiam thei thlawt lo. Duhleh beidawn nan palai te chu kal leh ang hmiang. A lehpek awm tawh lo hram rawh se. Inti paukhauh rawh” a ti a.

Palaite an kal leh zan chuan ka lengchhuak duh ta bik lova. Lalvala zawk chuan min rawn pan a, ka pindan lamah chuan kan pahnihin kan lo nghak dun ve ran a. Choka lamah ka nu leh pa leh kan țhenawmpa an awm bawk.

Dar 9:00 a la ri lo deuh tihah chuan an lo thleng ta.

Keini pahnih pawh chu koh ngai hran lovin kan chhuak dun nghal thuai a, thu lawmawm ngaihtuahna kilkhatin beisei ru reng mahse an thu lo hawn chu chutiang chu a ni lawi si lo a ni. Beidawngin a ni an lo kir tak ni.

“A pa Kima khan ro a rel zat zat a, țawng hun pawh kan chang ve meuh lo. Han beisei leh chi-ah pawh ka ruat lem lo keichuan. Nge, Chhuantea te pahnih hian sawidun te an lo nei a nih chuan han beidawn țhiai thu phei chu a awm law..” ka Pu Mawia chuan a ti a. Min melh deuh țhapa ka hriat vang chuan sawi loh theih ni nghal hek lo.

“A, sawi em em pawh kan nei hran lo” ka tih sak ta ngawt a.

“Hrangkima a awm zawngin engmah kan in rem hlei lovang e. Ka rin lawk ang vel a ni” ka pa chuan a lo ti hluk a.

“A tawk thawkhat viau e. A tum chu kan tum ve bawk alawm, a lungthu kimin kan kal a nia, heti pawh a an duh lo a nih chuan han tihluih țalh pawh kan ba bik tawh lem lo ve. A tlawm te pawh a tlawmthlak ve deuh alawm mawle.”

“A ni khawp mai. An chunga thil thleng hi engmah an hre duh lo ni ber hian ka hria, ka ngaihdan takah phei chuan zankhat kan kalnaah khan inneih ni nen lam kan sawi fel ang chu ka lo tia. An rilru a lo mak em a nih saw, Chhuana nang pawh bansan hmiah rawh. Tlangval țhalai in la nia, lungngaih tur a awm reng reng lo. Hmeichhia te zawng an tam emai” Ka pu Mawia kal pui chuan a lo ti a.

“A dik chiah chu chu, thutawp min siam hnan hnuah hian kan la inrim fo mai chuan a dik thei dawn lo. I thlah nghal hmak a țul ang, neih i la tum țalh a nih zawngin he in ațang ni lo hian hma i la ve tawh mai dawn nia. Vawithum palai kan kal bak kha patling hi ka tlawm thei lo a ni e. A nihna takah chuan khawilai foreigner emaw a kara thingzai mai mai fa lo chawi tlei kha kan ba bik reng reng hleinem. ‘em a kan tia, an mualpho thui hlauvin theihtawp kan chhuah a, lawm tak a ruanga hetih teh lek chu” ka pa chuan a ti nghut a.

Ka pain ‘a tawk’ a tih a ti nawn ngai lo. A tawk a ni mai.

Mahse, kei hi engtinnge ka awm tak ang? Zorini tel lova nun hman chu ka huphurh thlu a ni. Mahse, min duh miau mai bawk si lo. Kawng a awm tawh lo.

A hma ang bawkin ka tlaivar leh țhiai pek a. Lung a awi thei mawlh lo a ni e.

Khawvar hnulamah ka lo muhil ni ngei tur hi a nia, Lalval hian min lo kai thova. Sana ka’n bih chuan zinglam dar 11:00 a lo ri thuak tawh a, ekhai a ka lo um pawngpar leh pek a nih hi mawle.

“Kha hei hi chhiar teh” tiin lehkha hlai mang lem lo tak mai inthlep țat hi min pe a.

A tawi tek tawk kher mai.



Chhuante,

Engkim i huam tak zet a nih chuan keimah chu ka inpeih ta e.

Ka hmangaih che,

‘Z’

Tih zawng hi. A fun kim viau thung a ni.

“Engnge awmzia?” tiin makti takin Vala chu ka melh a.

“Eh ka hre bik nang, naupang min rawn pek tir a. ‘U Chhuantea lo pe rawh se an ti’ an rawn tia” chu zawng chu ka hriat chin chu a ni mai e.

“Ka hrethiam teh nuaih love a, min chhaih kual vel mai mai ni hian ka hre ber”

“A tih tak tak leh tak tak loh fiah kha chu kan bat a ni” Lalvala chuan a lo ti khauh a.

“Mahse, ka pa ten neih an remtih tawh loh kha”

“Ka hria ka hria, ar talh dan chikhat chauh a awm hleinem” a ti tlat lawi bawk si.

“Nangpaw’n bansak hmak tur i tih kha le, thu i va zuk leh hma si ve” tiin ka chachhuah ti tih a.

“Thilawmzia hi chiang taka kan hriat phawt a ngai” a ti duh chauh a.

“I duh leh nangmahin zuk kal mai rawh” ka ti chu a ner nang a, a ngei hmel kher asin!

Zorini te inlam pan chuan min hruaichhuak leh pek a nih kha, hnial hneh nghal hek lovi. Ka u lo hawlam nen kan la intawk zui ta lai a. ‘Nupui pawh nei thei hlei lo hi a nupui tur kan zawnpui ange’ tiin sawithui vak ngai lovin Lalvala chuan ka u chu a lo be hmasa a. Ani pawh chu a nui liam ve mai a.

An inah chuan amah chauh te hian a lo awm leh pek a, kan han lut chu lawm tih hriat reng hian a țhutna a țang chuan a lo tho chhuak thuai a.

Ka uksak tha pawh a tho nek love a!

“Engnge thil awmzia?” tiin Lalvala chuan a zawt nghal hmiah mai a.

“In awih bik lovang, hetiang rilru hi thawnthu-ah chauh emaw a lo awm țhin ka tia. Tunah chuan keimah ngei pawhin ka tawng ve ta a nih hi” a ti duah a. A zawhna chu chhang mai se la aw.

“Eng chu maw?” lungawi lo awm tak chuan ka han ti a.

“Ih..umh.. khawilai ațang berin nge ka sawi țan ang?” a la ti, tak deuh deuh chuan leh!!

“I pa leh ih.. i nu te…” sawi nuam a ti vak lo tih hriat reng chuan min melh ralh a..

___________           __________
            KA NAKRUH BO


               Chapter-XIV





"Engnga? Engnge ka nu leh pa te i sawi daih?"

"Umh.. An hunlai thil ațanga sawi a ngai a..."

"Engnge chu nen chuan inzawmna kan neih a?"

"Ka sawi dawn alawm. I lo țawng ve zel bawk sia" a ti ta reuh a.

Vala nen chuan kan han in melh leh rih a, kan man pha meuh lo a ang khawp mai keini țhiandun hian.

"Ni zana Pa Kima sawi ka hriat a nia, palaite an haw hnu khan ka mangang lutuk kha tukverh ațangin ka chhuak ru a, pan mai tur hrelovin ka awm reng a, engtia rei nge ka awm pawh ka hrethiam chiah lo kan kawmchhak kil thim deuh laiah khian ka țhu ngat ngat a"

"Pa Kima te haw tur lo chhuak ti ti ka hriat a nia tun a mi pawh hi"

"Ka nu te nen an in mangțha fel hnu chuan meizial te an la kai leh rih a, chutihlai chuan Pa Kima chuan 'Zotei tan chuan neih mai chu a țha mai thei a. Mahse, anni chhung leh kan chhungkua inzawm hi ka duh lo hul hual a ni. Tunhma lama thil thleng kha ka la theihnghilh thei thlawt lo' a tia"

"Ka nî chuan 'inneih a rem lo i ti teh tlat sia, innei mai sela țha tur a nia, tlangval lai thil daih daih nen a suihzawm tum te chu' a lo tih sak a"

"Ka na em a ni kha thil thleng vang khan, ka damchhung hian ka theihnghilh tawh dawn lo, chhuanlam tur remchangah nau a lo pai hman hlauh a, a țha khawp mai, an nupa sawn an duh ang ang an tih hi a rem bik lo' Pa Kima chuan a ti leh a."

"A eng deuh uau bawk sia, an țawng ngaithla chhunzawm turin ka che chhuak ngam tawh si lova. Anni lah an kal chho zui mai bawk sia" a ti leh a.

"A va mak awm teh nuaih ve" Vala chuan a lo ti a, chutiang deuh bawk chu a ni sawi ka tum keipawhin, kan la man chiah lo.

"Engmah chiangin ka hriat theih bik loh chu an tlangval lai daih a thil thleng a nih hmel bawk sia. A awmzia ni ta ber chu Pa Kima te leh i nu leh pa te hian an hun hmasa lamah intih thiam lohna engemaw tak an nei tihna a ni mai" a ti a.

'Hrangkima a awm zawngin engmah kan inrem hlei lo'nge' ka pain a tih kha ka hre chhuak zawk mai a. Zorini thilsawi nen pawh a inhmuh rem hmel viau mai ka ti.

"I Pa Kima te phal loh theih ngawt a ni a mi, anni hmanlai boruak vanga nangin i tawrh ngawt thu awm hleinem" Vala chuan a lo ti a.

"Nia, a dik ve reng. In hre vek a, Pa nei tawh lo kan nia, keimahni nufa maia thutlukna siam chu a dik lo ve deuh alawm. Ka Pa Kima te unau an la awm ve bawk sia. Hetiang tak hian thutlukna min siampui ang tih ka ring pha lo reng reng. A mawiah chuan min han rawn der ve bawk a. Nichina ka sawi ang kha ni mai. Ka naupai an chhuanlam tlat a, an hrevek ka tih pawhin barah an khawn duh tlat bawk si lova, thutawp siamfel hun ka nghak ta ringawt a nih hi"

"I nu pawhin chutiang chuan a ngai ve tho a mi?" ka lo ti a.

"Ngai lem lovin ka hria, kan rawn ve tawh a, in kutah kan innghat kan ti ve laklawh sia engmah a sawi duh tawh lova. A ngaihdan chu a ni chiah pawhin ka hre lo" tiin min chhang zui a.

"A țha a ni mai alawm chutianga a nih a nangber i inpeih te chuan" Lalvala chuan a tih zawm zat a.

Mahse, chutiang ngawta awlsamin thil a kal thei ngawt tawh lo. Ka pain thutlukna a siam fel tawh tlat!

Engtinnge ni ta ang?

"Țhianpa..?" Lalvala chuan mi ngaichang tih hriatreng chuan min melh a, a bula ding Zorini min melh dan lah a dang chuang bik a ni hek lo.

Chuti ngawta kalpaha thutlukna siam ngawt theih pawh a ni bik tawh hleinem mawle. Ngaihtuahna țhaber hman kan tum ve ang chu.

"Hmanhmawh rum rum theih pawh a ni lo" ka tih chuan Zorini chu a meng hnual rawih hian ka hria. Mahse, ka rilru dik tak ka sawi miau mai bawk sia.

"Engtinnge ni dawn a chuti a nih leh?" Vala bawk chuan min zawt leh a.

"Ka hrethiam chiah lo. Uluk deuh zawkin awmdan tur ngaihtuah ila a țhat ka ring"

"Chhuante.." Zorini chuan sawi duh a nei a ni.

"Lungngai suh. Lo nghal tawp rawh" la tih chuan engmah phei chu a sawi zui bik ta lova.

A ranglama thutlukna siam tur chuan kan hawsan ta kha a nia. Min en dan kha a hlauhthawn hmel riauvin ka hria. Kan khawsak dan lah han muanpui chi yeh chiam a lo ni bawk lo nen.

"Ruk mai chu a va ngaihhmel ve tiraw?"

"Nia, neih dawn chuan a ngaih hmel. Mahse, engtinnge niang?" ka ti a.

"Ruk te chu a huphurhawm loh emai a"

"Ni love, hmanzanah pawh i awm vek kha. Ka pa thilsawi khan min tibuai ber a. A tih tawh chu a ti ngut zel bawk sia"

"A ni tak e maw. Mahse, han sawi ve leh hrim hrim ila an ngaihdan te pawh a dang ve mai ang chu"

"A dan pawh ka ring chiah lo"

"A nih loh pawhin kan ru pawp ang a, chutia kan tih tawh hnuah chuan anni tan pawh inhauh vak theih a ni tawh nang. An hrethiam chhawm ve mai ang chu"

"Chutiang ngawt chu a ni lo. Inchhung boruak kan tichhe mai mai ang. Ka pa rilru a hel tawh laklawh bawk sia, tawngpawng ruk haw ngawt chu a dik thei lo"

"A nih engtinnge kan tih chuan ang?"

"Ka hrethiam lo. Aizawlah han chhuk pui ngawt dawn ila thawhchhuah ka la nei bawk si lo. Risk huai viau ngawt lah tihsual a hlauhawm ve bawk sia"

"Eng lovin ti mai ila, i pa hmaisa han tawn i huphurh leh Aizawl lamah chhukpui phawt la, khu lama in awm chhungin i chhungte pawh an rilru hmin ka lo tum ang a, an fapa neihchhun i nia, lungloha lak reng thu a awm hleinem" a ti a.

"Chutia tih mai loh chu kawngdang a vang khawp mai" ka lo ti ve a.

"Khulama in awmna tur mihrang an ni chuang lova  a remchang phian zawk ta ve ang"

Inchhung ka han lut chu ka nu chauh alo awm a. 'Tun hma lama thil thleng kha' ka hre ve ngei tur a ni. Keini an fate thlenga min nghawngtu ngei chu.

Ka pa zûk tur vaihlo a sawhna bulah chuan țhuthmun ka rem sauh sauh a, engtinnge bul ka țan tak ang aw..?

"Nu, ka pa nen in inneih hma hian eng thil nge thleng?"

Mak ti tih hriatreng chuan min melh a.

"Engnge awmzia, chutiang zawhna teh daih min zawh a?"

"Ka hre duh a ni. Ka hriat ve a țul tlat" ti chauh chuan ka chhang a.

"Chutiang thil thleng a awm awm pawh ka va hre love" a ti leh mai a.

"Awm chu a awm alawm. Pu Hrangkima pawn a sawi alawm" ka ti ta ngawt a.

"Hrangkima'n a!!?"

"Aw.."

"Engtinnge a sawi a?"

"A sawi țeuh mai. Mahse, a sawi dan kha ka man lutuk lova, Zorini nen a kan inneih loh chhan ber hi a tia lawm amah chuan"

"Mama chutiang tham em chu a ni dawn emawni le?" A hmel chu a phâ deuh dai hian ka hmu a, nu te mah nise, kan lakah zêp țhen annei a ni tih hriat na na na chuan en dan a dang lo thei lo. Kan hmangaih ta love tihna lam ni lovin.

"A, i sawi duh loh chuan sawi lo mai rawh. Mahse, kan inneih loh chhanah hian keimah emaw, Zorini te chhungkua emaw chu indem thei lovang. Nangmahni vang a ni" tiin ka pindan lamah ka luhsan hmak a.

Ka awmdan chu a mawi lo hle mai. Mahni hringtunu te ngei te chu thinrim awka a biak loh tur a sin mawle. Ka thiam lo hle mai.

Khumah chuan tukkhum dawm meuh hian ka țhu a, lungzing sa nen, ka nu khatia ka'n ti leh bawk si nen. Ka i pik kher mai.

Engnge an tunhma lam buaina chu ni ta ang le?

An sawi miau bawk siloh chuan hriat dan a awm bawk si lo.

Ka pindan kawngkhar ri riai riai chu melh pawh ka melh duh lo. Ka nu bak lo lut tur an awm chuang si lova.

"Mama, min ngaidam rawh, keima thiam loh vek a ni" tiin ka bulah chuan a lo țhu a. Ka chhang lo. Ka awmdan ngai chuan ka awm reng a, engnge a thiam lohna chu ni ta ang?

"Hetiang thil thleng thleng hian nghawng a nei ang tih ka ring phak lo a ni" a tih chuan amah chu ka va en a. A hlauhthawn hmel kher mai.

"Nu, thil kal tawh a ni a, tuna siamțhat theih a nih loh phei chuan hrehawm tih kher a ngai chuang hleinem. Eng thil nge thleng hrim hrim a?"

A hmelah chuan a sawi hreh tih a lang reng mai. Hriat ve ngei ka duh miau mai bawk si.

"Mama, thil sawinuam a ni lo asin. Kan chhungkua hi a nghawng chhe vek thei a..." a ti a. A awki ațang reng chuan thil namai lo tak mai a ni tih hairual a ni lo.

"Midang kâ ațangin kan hre leh tho bawk sia, engnge zêp chu awmzia awm anga?" ka la ti țalh a.

"A chanve pawh an hre lo, chu aia thuk zawk chu thildang a la awm cheu. Tu hnenah mah ka la sawichhuak lova, sawichhuah tumna pawh ka nei ngai lo. Mahse, hetia a lo irhchhuah takah chuan a țul a nih leh kan sawi chhuak ve tawh mai a ni ang chu, a nih nih kan ni mai ang a.."

"Nu, engthil pawh lo ni se, hun kal tawh a nia, siamțhat theih a ni tawh lo ka tih kha. Chuvangin i lamah ka țang tlat ang, eng harsatna pawh lo thleng se ka nu i nih angin i tan ka hmachhawn zel ang" ka tih chuan lawm vang nge lungngaih vang pawh ka hre lo a mittui chu a hru zauh a.

"Mama, ka hrilh vek dawn che a nia. Min dem ang tih chu ka ring sa a, ka dikna a awm miau loh vangin thiamchan kher pawh ka tum chuang lo. Mahse, khawngaihin he thil hi i pa bulah emaw, i u bulah emaw, khawihmunah mah richhuak lo hram se la ka duh a ni"

"Ka nu i duh ang tak chuan ka ti ang. Ka tiam a che"

"Fapa fel tak, innghahna tlak ka neih che vangin ka lawm e" a ti a.

"Hrangkima nen sawn hunrei tak kan inngaizawng a, mi zawng zawngin innei tur riakah min ngai vek tawh hial a. Inneih lam phei chu kan sawi ngai a zeng pawh a ni law"

"A kuma tluan maia inzui reng ta chu in ven sen vek theih pawh a ni lova, kan chesual fova, mahse mi mit tikham khawp em chuan kan khawsa bik lo chuan ka hria"

"Chu'ng hunlai chuan i pa hi kan khuaah Zirtirtu in a lo thawk thar a, a duh zawng ka ni thlu ngang a niang chu zepthu cheng lo zantin mai hian min lenchilh rawt mai a. Hrangkima te nen pawh boruak eng emaw tlangthang phak chiah si lo hian an nei deuh fo chuan ka hria"

"A tir lamah chuan ngaihzawng ka nei tih ka hrilh ve mai vangin chuti teh chiam chuan min nawr ngam lem lova. Mahse, ka mizia velah ka hnar lem lo tih a hria nge ni, kiansan chu sawi loh a uar zual sauh emaw tih mai tur hian a khawsa zel a"

"A diktak sawi chuan nangpawhin min dem mai thei e. Khawsak awlai tak kan ni hran lova, chutihlai kara kan khaw kamding tlangval berin min han beisei chu ka chhungte pawhin Hrangkima teh ngawt aichuan an lo bețha ve deuh bawk nen ka rilru pawh a hmin ve zel niin ka hria"

"Hrangkima nen lang lo lama kan inzui erawh chu kan bansan chuang lem lova, chu thil chuan vawiina ka thuruk hi a pianchhuah tir ta a ni"

"I pa hi chu'ng hunlai pawh chuan ka bechhia a ni lova, ka ngaizawng em em chuang bawk lova. Mahse, ka chhungte chuan Hrangkima bansan tur chuan min  nawr ti tih a. Chu thu chu engtin tin emawni Hrangkima chuan a lo hria a niang a thin hi a rim em em mai a, tihvak ngaihna a hre bawk si lova"

"In ruk puiah min sawm lahin ka duh bawk si lo, khatihlai khan i pa hi ka lo duh ru ve viau pawh a ni mahna le"

"Ka chhungte'n palai lo tir rawh tiin i pa hi an lo chah a ni ngei ang, palai an lo kal ta thut mai a, kei tak phei chu ka lawm lo viau nghe nghe a. Ka chhungte lah chuan an lo dawngsawng țha phian bawk si"

"Chutihlaia keimaha danglamna thleng awm ta chuan ka ngaihtuahna a hruai peng zo ta a. Chuthil chu ka thlatin hunbi ka vawng ta lo chu a ni. I pa nen hian kan chetsual loh vangin Hrangkima chu chiang sa a ni"

"Mahse, ka ngaihtuah ka ngaihtuah a  Hrangkima neih chu chakna ka nei hauh lo mai a. Ka ngaihtuah ngun poh leh ka hel nimai hian ka hria a. Thutlukna ka siam fel hmain Hrangkima chu ka thlatin hunbi ka bawhpelh thu ka lo hrilh thawi hman pek a!"

"Chumi behchhan chuan inrukpuiah min sawm ta chiam a. Mahse, ani han neih em chu ka ngam bawk si lo. Thi ka neih leh tawh thu te chu dawtin ka hrilh ta ringawt a. A hmu ve chuang  lo bawk a, ka bum theih mai ka ring"

" I pate palai an lo kal nawn leh chuan ka hnial duh ta lova, i pa pawh ka bum theih mai ka la ring cheuva!"

"Thlakhat vel bak hun kan rial lem lo, ka duhdanin kan innei nghal ta rum rum kha a nia, chuti a nih loh chuan ka naupai chuan min ti khaw lo hman dawn si"

"Chu thil chu tunhma zawng kha chuan ka thup thei țhin a sin. Mahse, a lanchhuah a hun tawh a ni ange..." a ti a.

"Chuan...ka u hi Pu Hrangkima fa maw!?" Ka chek tlak a.

"Aw ni e" a hmai mawm hmuar mai chu a kutphah chuan a han nuai a.

"Mama, min dem a nih pawhin thiamthu sawi tur pakhat mah ka nei lo. Ka thiam loh liau liau a ni e, keimah vanga nangni lehzelin inlo tuar hi a pawi ka ti tak zet a ni"

"Pu Hrangkima chuan nau i pai chu a ringhlel zui lo che a mi?"

"Ringhlel e, i u pawh nula uai a nih tawh thleng khan a ruk hian min la zawt țhin a sin. Mahse, ka chhanna erawh chu a ngai reng a, 'i fa a ni lo' ti hlirin..."

"Nu, hun kal tawh chu kan hriatreng a țul lo e. Hlauthawng lo la. Khawiahmah a richhuak lovang. Mahse, Zorini hi ka neih a ngai. Ka pa a hel zo tawh bawk si, tihngaihna ka hre lo a ni. Nichin mai khan kan inhmu a, anmahni thutlukna nilovin Pu Hrangkima te tih vel a nih thu min hrilh zo chauh a..."

"I pa lah hi a thu a duh ropui mai bawk si a. Engtia han tihchi nge mawni dawn le, ka va'n hrethiam mai love aw.."

"Ka ru ang a, Aizawl lamah chhukpui ta ila, duh leh ka pa rilru dam hunah kan lo chho leh mai anga emawni dawn ni?"

"Chu chu a țha ber tak ang chu. I pa chu theih ang angin a rilru hneh te pawh ka lo tum ve ang a. Hrangkima te ber kher kan han hmachhawn a, thil a buai zo ta vek a nih hi. Ani pawh hi Hrangkima te hmaah chuan a la ter at zel a nia" a ti zui a.

"Mahse, chhuk ringawt pawh ni ila pawisa vel engmah kan nei bawk si lova, ka u te lakah a inthlahrunawm dawn em alawm, ka pa berin min thawn duh loh chuan neihdan tur a vang dawn bawk sia. Keimah chauh chu ni ila ka inthlahrung chuang hauh lova, pahnih nih chuan a hautak ve deuh lo thei dawn si lova"

"Tlem a zawng chu dâkinah lakchhuah tur ka la nei ang, i pain a thawn loh che u chuan ka han thawn dawn nia. Nikuma kan vawk tihralna te pawh kha kan la khawih hleinem"

"Chuti a nih chuan chu chu lachhuak law law mai ila, tunah motor chuan man takngial pawh ka kawl bawk si lo" beisei tak chuan ka han ti a.

"Chhuk nghal vut vut in tum a mi a?"

"A ranglam deuh chu kan duh a, hetia awm ringawt chu awmzia a awm lo lawm" ka ti a.

"Naktukah lamah va ngaihven la, tunah lah hei a tlai ruai tawh bawk sia. Duh hun hunah a lakchhuah theih loh an ti lehnghal emaw ni."

"Chuti a nih chuan a chin ka va ngaichang hrim hrim ange" tiin ka chhuak zui ta daih a.

Engngatinge maw thil hi ka nghah theih miah loh mai le. Tih nghal rum rum tum nghal zel ringawt mai pawh chu.

"Tihian DPO ah kan thawn phei ang a, anni chuan sum an kawl tawh a, an sanction mai thei ang. Nihnih vel chu nghah ve angai" tih chu kan khuaa kan dakpu in min lo chhanna a ni.

A rei lem lo bawk a, chutianga ti tur chuan form te chu kan fill up nghal nawk nawk a. Ka nu hming nen lam ka signed nghal vek!!

Engtinnge ka chhukpui tak ang aw.. Motor lahin an chhuah hun an lo sawn tlai ve leh hman fahran bawk si. A pawi love, zin tur angin kal rual tawp ila a țha mai ang.

Motor seat chu pahnih ka hauh lawk nghal thlap a, ka pain kan ruahmanna a hriat loh chuan thil a kal fel ve mai turah ka ngai.

Kan huntiamah chuan pawisa chu a lo thleng ta hauh lo mai a!

Dakpu lah chuan "An rawn thawn loh chuan tihngaihna ka va hre bik love" a ti mauh mai bawk si.

"Naktukah chuan in lut kawi zawk anga a ni mai alawm, lakchhuah harsa a ni chuang lova, reina tur a awm hleinem" tiin tihdan tur min hrilh ta ringawt kha a nia.

Mahse, pawisa pawh ak mumal lova han chhuah ngawt chu a dik meuhin ka hre bawk si lo.

A tukmaia kal tur kan nih tawh vang chuan tihdan tur a vang viau mai a. Han țhulh lehngawt dawnin a ni mang bawk si lo.

Ka nu chuan a taivawn ațang chuan Rs 1000/- min pai ta ngawt a. 'Dak in chu tlawh phei dan kawng zawng mai rawh' tih bak mi han chah tur a nei bik chuang lo.

Ka pa bulah chuan Aizawl lama hawi thawveng tur ang chuan ka insawi ve tlat a, engmah phei chu a sawi lem hlei lova.

Chumi zan chuan Vala nen Zorini thawmhnaw la chhuak ru tur chuan kan kal dun a, kan rin loh tak maiin Zorini lah chuan 'Ka nu ka hrilh vek' a lo ti mai a. Kan han mengphawk hman viau nachungin 'Lungngaihna tur a awm lo' a tih leh takah chuan hawlhthep ang suai alawm kan nih le.

"La chho lo mai rawh u, ka naute ka lo inthlahtir mai ang" a tih takah chuan kan tumlui bik lem lova, sum lama ka buaina pawh chu ka hrilh duh ta bik lo mai. Keia rilru hah mah tiha ani leh zel han tih hrehawm chu a țul lem lo.

Reitak pawh awm duh lovin kan hawsan ta a, zandang ang lo takin thinthi tehmeuha ka'n mut khawvar ve țhak chu le.

Ka u takngial pawh ka hrilh loh vang chuan zin satliah turah min ngai nihmiang ka ti mai a, mi han thlah kual vel pawh an tum hran lo. Ka tan erawh a lawmawm viau thung.

Dar 8 a lo rik takah chuan motorah chuan kan lawn sap sap a. Lalvala kutzungpui min tih pir khum va mai chu kan tlansan ta vawk vawk kha a nia.

Kan tawt hran lem lova, a nuam tawk viau mai.

Ka bula țhu Zorini chu an ngaihven hlawm angreng phian a, ani lah chuan 'in check up turin ka kal dawn' a lo ti mai bawk si.

Tluangtak chuan kan tlan ve zel a, ka pawisa lak tumna khua kan thlen chuan motor khalhtu chuan min dinpui a, Dak in lam pan chuan Zorini nen chuan kan kal nghal thuai a.

Beiseina zawng zawng chu chu țawngkam tawite chuan a vawmbo hneh kher mai.

'Kan pu a zin a'

'Aizawl thlenna tur pawisa kan ak daih tho alawm le' ti rilru chung chuan a beidawng zawng chuan engmah ka hrilh duh ta lova. Mahse, ka hmelah chuan a lo hmu tho a nih hmel e.

"Pawisa i nei lo a mi?" tiin min zawt a.

"Nei tho e, Aizawl thlenna khawp chu ka la ak alawm. Mahse, mamawh zualpui leina tura ka vauchher ber hetia a lak theih silohah chuan engtinnge maw kan tih dawn ni. Han thlengthla phawt ila, ka nuin a hmuh hunah min lo thawn mai ang chu" ka ti zui a.

"Tlem chu ka nuin min kentir tho alawm" a tih chuan ka thaw huai a. Mangan tawh lama chutiang țawngkam han dawn chu a thlamuan thlak fe mai.

Zanriah bawp nang hman lo tawk vel chiah chiah chuan Aizawl chu kan thleng thla a. Kan hrilh lawk lem loh vang chuan chawte chu ka u te chuan an han chhum chawp chûk chûk a, ka naute ho lah chuan mi fiam teh an lo tum rawl nen.

Ka u (cousin) hnenah chuan kan chanchin chu ka hrilh puat puat a, ka pa bula sawi tur Lalvala ber a ni ka huphurh pui ni. Mahse, ani zawng ngaihtuahawm a nih ngai loh kha maw. Ka chhungte lahin an en hrang a zeng pawh a ni law. Harsatna a tawk bik lo turah ngai ang.

Pindan hran awm chuang nghal hek lo le mutdawnah chuan Thosilen behchhanin puan kan han zar kual ve kha a nia! Engtin zanlai tumtawi ve ang i maw!?

___________           __________
            KA NAKRUH BO


               Chapter-XV





Tukțhuan kan han kil chu mikhual riau hian ka inhre pek a, a hma zawng zawnga ka hova awm țhin kha kan nia, ka chhuk tak loh vangin naupang an ngaihtuahawm tiin ka u in a awmpui ta kha a nia.

Kan naute ho pawh chuan awmdan an thiam vak lo niin ka hria. Thil thlen dan a ni deuh thut bawk nen.

Ni chu kan hmang liam ve zel mai a, engmah tih dang nei lo ta chu zing kan han tho hlawt hi kan hman nileng nghal em em ringawt mai a, nilengin kan in awm a, zanlamah lah kan inkalsan a mi hek lo.

Rin aitakin kan khawlam thawm chu a reh rei a, chu chuan rilru a kap viau mai.

Ka pa chu thinrim viau angem? Engtinnge a ngaih ang le? tih chu rilru kaptu lianber a ni lo thei lova. Ka nu lahin pawisa min lo thawn chuang bawk si lo. Rilru a nuam lo țan viau mai.

Lalvala tal pawh hi mawle, engati chen chen nge mawni.

Karkhat a liam mai dawn. Thawm riva hriattur a awm bawk si lo. Pawisa lah keiin ka nei der mai bawk si lo.

Ka pawisa ip ruak chu ka khal ka khal ringawt a, lehkha them inzep pakhat chu ka hmuchhuak leh nawlh a, ka lo ngaihven miah lo a nih hi mawle.

"Pawisa engzat nge kawl ila neih, i la kawl em?" tiin Zorini chu ka zawt ta tawp a.

"Umh, kawl e. I mamawh a mi?"

"Mamawh tho a, i kawl hnem dan a zir a ni mai a"

"A zat chu ka hre miah lo. Singkhat tling lo deuh kha min ken tir a, sanghnih pawh kan la hmang lovin ka hria" a ti a.

"Chuti chu Champhaiah ka han zin lawk ang chu"

"Engati, nangmahin maw?" a hmel chu a nûr nâng nâng a.

"Sum neih dan ka han ngaihtuah ange"

"Engtin nge i tih ang a?"

"Țha lutuk, țha deuh a ni mai"

"Naa.. ka tel ve loh te chuan keimaha heta lo awm chu ka duh lo" a ti ta tlat mai pek a.

"Kan pahniha kan kal chuan sum kan khawhral hnem mai mai dawn a"

"Chu pawh ni se, kal lo mai rawh" zuk ti țalh pek a mawle.

Kan dinhmun tur a chian loh vangin kal ngei a ngaiin ka hre bawk si. Zorini a tel ve chuan duhangin ka che sawt dawn lovin ka hre bawk si.

Kal ngei chu a ngai.

Ka u bulah chuan zinkhawthawng mai tur angin ka insawi a, țul a ti chiah lo niin ka hria, mahse mi chu a khap chiah chuang lem lova.

Chinchang ngaihvenin Central Jail lamah ka chhuk thla a, ka beisei loh lutuk mai thil ka zuk hre pek a, ka mi hmuh tum ber chu a lo inawkhlum daih mai pek a! Ka lung phei chu a ti leng hauh lo nain min țhawng angreng viau mai.

Champhai lama kal tur chuan kan chhuak dun ta kha a nia.

Ka la kal ngailoh chu thuhran, hmelhriat han belbul tur pawh ka nei chuang lo. Engtin nge maw kan han awm dawn ni ti ru reng chung chuan Champhai chu tlai reih rawihah kan han thleng a, pan tur kan hre bawk si lo. Ka nupui lahin chhungte an neih a hre bik bawk si lova, Motor khalhtupa hnenah chuan “Țiau lama kal tur motor khawilaiah nge a awm ang?” tiin ka zawt ta ngawt kha a nia.

Ka zawt suallo kher mai.

“Ka kal dawn alawm, hei bungrua va dah hi a ngai dawn a, in kal duh a mi?” a lo ti nghal var a. Rilru hah zualpui chu a reh ve leh ta. Mahse, Țiau pawh chu va thleng teh reng ila khawilaiah nge kan innghah leh chuan ang? Ngaihtuahna a tibuai tho mai. Zorini lo tel ve hian min ti buai zual a ni. Keimah chauh chuan ni ila ngaihtuah harsa pawh a ni lo tur a nia.

Hotel mantlawm te pawh a awm ve turah ngai tawh mai ang.

“Engnge in tih dawn a Țiauah chuan?” tiin kan tlanchhuah hnu chuan Driver chuan min zawt a.

“Ti hem em tur pawh kan nei chuang lo. Kan zinkual ve mai mai a ni ber mai. Rih DIl tlawh te kan duh a” ka ti a.

“A nih chu, nupa in ni em? Nge, ni țep zawk?” a nui hak a.

“Umh, nupa chu kan ni ve tawh ang chu. Kan inru mek a” ka lo ti mai a.

“A nih chu, han zinchhuah vel pawh a nawm viau dawn chu mawle. Engtik nge in insawi țhat dawn a?”

“Hre lo le, palai te an la kal mek a. Ti daih ila, Hotel ang chi thlenna tur a awm angem?”

“Awm e, sawlai chu awmlo a lawi pawh a awm lo. A chikim lutuk” a’n ti ngeiah!!

Rinai takin a lo țawng duh a, kawngtluan mai chuan thil hrang hrang sawiin kan ti ti tlang a, kalkawng pawh beisei ai takin kan tlan rei lo e.

Kan thlenna tur te min kawhhmuh fel hnu chuana bungraw phurh te dahfel turin min tlan liam san leh ta nghal a.

Concrete Building hlui ve lam tawh, chhawngkhat nei hi kan hmachhawn ta ran mai a, Inhnuai lam kawngan chu thingpui leh eitur dang lam theihin an siam a ni ngei ang a inhawng dar angreng viau a. A chhungah chuan mi pawh an awm ve laih mai.

Ka nupui Zorini zin chau pawrpheng mai chu chu inchhunglam pan chuan ka kalpui ta a, kan luh hma hauh chuan nupakhat, hmaitluak țha ve ang reng tak, thau lam lek lek hian min lo chiau au thuai a.

Thlenna tur kan mamawh thu ka hrilh chuan “E, lo kal rawh u, lo kal rawh u” a lo ti sawk sawk a.

Inchunglam pan chuan min chhohpui a, “Nupa in ni ang maw?” a ti zui a.

“Aw ni e”

“Khawilam kal tur nge in nih a?”

“A, khawilam kal em em pawh kan tum hran lo. Hun awl chuhin kan zin khawthawng ve mai mai a nih hi. Helam hi kan la kal ngai bawk si lova, Rihdil te kan tlawh ve chak a..” ka lo ti thuai a.

“E a nih chu. Khawia awm nge in nih a?” ka rin aitak chuan a dil chhut roh ka ti.

“Aizawl” a ninawm zawhna hlir mai pawh chu.

“Han intifel ula, inhnuai lamah chaw eiturin in lo chhuk thla mai dawn nia, kan lo buatsaih ange” tiin min chhuk san a.

 Thaw a veng huai mai.

Zorini chu a thawmhnaw pawh hlip lo chuan khumah chuan a let nghal bam a, a chau tih chu a hmelah a lang reng mai. Mi a melh hrek hrek peih chauh a ni.

“Inbual harh ila, khatia i awm zawi nghal chuan i peih lo tawlh tawlh dawn a nia” ka tih chuan mi hnial ka rin nen ngawireng chuan a tho zui ve mai a.

Bual in tui haw lian lem lo tak maiah chuan dawhkhawl chawpin kan han inbual dun ve ta phar phar a, nupui ka nei ve ta hliah hliah hian ka hria.  A nawmdan a dang ta!

“Ka ril a țam lo e, ka ei ve lo mai ang” a ti a.

“Tlem tal, eitam theih loh paw’n. Chawnghei tawp chu a țha lo”

“Ka luak a chhuak deuh hlui bawk sia”
“Chaw i ei ang a, i zia mai ang. I kaw ruah vang te pawh a ni maithei asin”

“ ‘Va'n peihlo tak..” ti chung chuan inhnuailamah chuan min zui thla ta tho kha a nia.

Zan dar 8:30 a ri tawh a. A haw vanglai dawn chauh emaw tih mai turin khawlai chu thawm a la tam a, Dawr chhungah chuan inleng an la awm nual bawk.  A kil khatah chuan mi pali hian Playing card an lo deng laih laih a, thingpui ngawt ni lo deuh an intulh a ni tih an thawmah chuan a hriat viau mai.

Dawhkan kilin mi pahnih an awm a, chu mi sir deuhah chuan nula leh tlangval niawm tak hi an țhu ve bawk a. Hotela tawk nula pahnih leh a neitunu niawm tak nen chuan a khawhar thlak loh viau mai.

Kan zanriah tur chu an eirelna lam dep dawhkan bialah chuan min buatsaih sak a, inchhunga lo awm ve te chuan min uksak lem hlei lova.

Ka hmaa țhu chuan a’n eitui lo niau niau khawp a, keilah țam tlan ang maiin ka hnawh lut mial mial mai bawk si.

Kan bulah chuan Hotel neitunu chu a lo țhu ve a, kan tuipui zawng a ni em pawh ngaihtuah hmel mang lo chuan a rawn ti ti chiam mai pek a, mamawhna nei lo ni ila chuan ka ning viau ta ve ang. Mahse, a lak a,angin kan kal kual dan vel tur hi a hriat theih maithei a sin.

“Bo cung khua hi a hla em?” a ti ti mawlh mawlh lai chuan ka lo ti daih a.

“Hla ve tho, hlatak chu a ni lo. Engngati teh daih nge a?”

“Ka țhianpa te khua a nia, High School kan kal chhung zawng a ka kawm ber țhin a nia. Heta țanga a hlat vak loh chuan tlawh nghal a va rem awm ve” tiin Zorini rawn niawm tak chuan ka va melh a. Ani chaweikham tawh chu mutchhuak hmel zet hian awn zet hian a lo țhu a, mi lah a chhang hek lo.

“Kawng hi a buaithlak deuh a, Bo cung tak phei saw chu motor service pawh an la nei lo. Motor chu a lut thei thovin ka hria”

“Engtin nge an kal a?”

“Hakha(Halkha) lama kal dawn chuan Ti Bwar-ah in kal hmasa ber ang a, Thantlang, Hakha, Falam chumi hnuah Lumbang, Lumbang ațang chuan Daakdungh Buan thleng motorin a kal theih a, chuta țang  chuan ke in Saimun kal leh angai ang a. Saimun leh Bo cung chu a inhlat lo, engtham mah a ni lova” a ti a.

“A van hla awm em em ve” ka lo tih sak thuai a.

“Hla tak chu a ni lo, a kalna kawng hian a hel deuh a. Bakah khaw inkar hi chuti vaka hla a awm hleinem” a ti zui mai a.

“Darkar engzat nge kal ni ang, motora kal theih chin chu?”

“E ka hre miah lo mai. Kan kalna a rei leh tawh a, tunlai tak phei chu kawng a țha vak lo an ti lehnghal a” a la ti zui tak deuh deuh a.

“Halkha lo lamah Teddim Road lamah pawh a kal theih alawm. Tlemin a hnai zawk maithei. Kawng pawh a țha deuh zawk in ka hria”

“Engtinnge chulamah chuan kal dawn ta ila engtia kal tur nge ni ang a?”

“He ta țang chuan Laatui, Lamzang, Sezang, Sezang ațangin Dimlo a niang a. Liana, Dimlo piah a mi kha eng khua nge ni kha?” tiin Card khel ho zinga mi chu a va au lauh a.

“Saizang”

“Aw, ni tak e. Saizang ațang chuan Halkha lam ațanga motor thlenna chin kan tih Daakdung Buan kha a ni leh mai a” a ti zung zung a, a sawi dan hmangah chuan a awlsam hmel phian bawk sia.

“A nih motor chuan man te hi a to em? Eng ang nge ni ang?”

“To lo ve, India pawisa sang leh zanga pawh hawlam kal lamah in hmang lovang”

“Kan pahnih hian maw!?” chu zawhna ka pek dan chu ka mawl hmel hi ka’n inti khawp a! Ka zawt zo vek tawh bawk si.

“Aw, inpahnihin a ni lawmi in kal dawn?”

“Nih mai loh chuan, a buaithlak angem?”

“Buaina tur vak chu a awm lo. Duty ho saw lehkha in siamtir ang a, zahnih khat in pe anga a har lovang”

“Naktuk lamah buaipui tur a nih chu. Rihdil pawh chu duh leh hawlamah kal zawk ta mai ila a țha ang”

“Motor hi duh hun hunah chuan a awm lo maithei a nia, chan ve deuh te pawh a ngai ang” a ti zui a.

Vah kual a, khua han chuan vel pawh ka duh viau nain hotunu ber a muthlu lo chauh tawh mai bawk sia, amaha kalsan ngawt thu awm hek lo pindan lam pan chuan kan chho dun ta nge nge kha a nia.

Ka mutui viau a niang ka harh meuh chuan Dar 8:00 a lo ri vah tawh mai a, Zorini lah chu hmuh tur a awm hlek lo leh nghal a, inhnuai lamah a awm nge mawni le.

Ka inphihfai hnu chuan ka chhuak thla ve a, Hotel neitunu nen chuan Zorini chu an lo titi nasa mai hi a lo ni a, min han hmu thut chu nui var var chung hian a lo ding chhuak a, “I lo tho thei maw, kaihthawh che ka lo tum mek a” a lo ti thuai a.

Tukțhuan kan kil lai chuan pa, la valai ang deuh deuh mai hi a lo lut a, Zorini chuan “E, ka hre chhuak chiah tukinah hei ka pu hian Bo cung kal awlsam dan a sawi a” tiin min melh zui a.

“A va țha ve, kan hriatdan kha a kual the nuaih lutuk a” ka lo ti ve mai a.

Tihian a sawi “Heta țangin Ti Bwar-ah in kal ang a, chuta țang chuan kein a kal theih alawm, kal chak pangai tan chuan Darkar hnih kal vel bak a ni lovang” a ti zung zung a.

“A nih Ti Bwar chu motor a han kal mai na tur a awm angem?”

“A awm ve leh mai zel. Duh chuan Scooter te pawh a hman theih mai ang chu, a hla lova”

“A țhat chu chuti a nih a nih chuan, tihdan a awm mai dawn chu. A lawmawm e” ka ti zui a.

“Engnge in tih dawn reng reng a?” “A tihtur pawimawh tak pawh a ni hran lo, ka țhianpa ve ber hi a awm a, helai thlen takah chuan tlawhchhuah ka duh mai mai mawle”

“A nih tak chu, ke-a kal chu a va huphurhawm awm ve mawle, in kal ngai awm si lova” a ti zui a.

“Nia, engtinnge maw ni dawn ni kan nu hi, min zui ve zel dawn nge kan inhnutchhiah mai dawn ni?” ka tih chuan Zorini chu a lo ner nang nang a. Engmah phei chu a sawi zui chuang lem lova.

Chaw kan eikhamah chuan khawlaiah chuan ka teichhuak dun a, kan inhnial a ni ber mai.

“He tah min lo nghak dawn nge, Aizawl lamah i lo chhuk mai dawn?”

“I bulah zel..” a ti mauh mai bawk si.

“Kha kan kalna tur kha ngaihtuah la, ke a kal ngei te a nia. Khawchin hriatsa a ni bawk si lova, a hahthlak chu thu hran a buaithlak ka ring deuh a ni”

“Ka kal ve thei awm emai I kal theih te chuan..”

“Chutiang ngawt pawh a ni lo. Bo cung khuaah a tawp mai theih dawn lova, khawdanga kal te pawh a la ngai a nia”

“Khawiah maw? A hrim hrimah engnge kan tih tur ber i sawi chiang duh bawk si lova, hetia inhruai kual vak vak ringawt hi engnge awm zia? Kan tihtur chu sawi chiang ve mai la”

“I la hre mai ang”

“A ngaihțhat thlak vak loh a nia aw Chhuante..” lungawi lo tih hriat reng chuan min melh ran a.

“Thil dik lo leh fel lo pakhat mah tih tur kan nei lo. Ngaih ti țha lo duh suh” ka ti a.

 A dik tak sawi chuan ka hrilh lohna chhan ber chu amah khati teh hrepa tibuaitu ‘ro’ lak kan tum a nia, a duh pawh ka ring lova. A hel kual vel tur han thlem kha ka peih loh vang a ni pakhat.

Hetia min tawng min tawng a nih tak a leh ka la hrilh tho mai aniang chu.

“Bo cunga kal zawhah Ah Law lama kal leh a ngai dawn a, kan pahnih chuan senso a hautak mai mai dawn a, Map han en hian rin aiin Ah law awmna hi a han hla phian bawk sia”

“I bula awm ka duh vang alawm ka zui zel che” a ti tlat mai bawk si. Tihvak ngaihna pawh ka hre lo.

Chhunah chuan motor a remchanna lam umin rihdil lamah te kan va kal leh lawp lawp bawk a.

Chutah pawh chuan hun hman nuam lo rawih khawpin kan inthlem alawm mawle. Zanriah kan eidun lai chuan Aizawl lam min chhuksan chu a rem ti thei ta hram a, ka thawhuai mai alawm le.

A tukzing hmatak maiah chuan Aizawl lam kal tur motor service-ah chuan kan in mangțha ta kha a nia, a lung a awi chiah lo tih chu hai rual a nilova, mahse engmah a tilang duh lem lo. Ka khawngaih reuh hle mai. Tin, ka ngai dawn viau bawk. Chu aia nasa mah chuan amah chuan min ngai bawkin ka ring.

Luikam lehlama Motorbike neitu ka biak sa te inlam pan chuan ka kal zui ve nghal deuh mai a, bag lian lem lo takah hakthlak pahnih vel ka ak a, chu zawng chu ka bungrua chu a ni mai. A tam zawk ka nupuiin a hawn țhen a.

An inkawtah chuan a lo tinung vat vat tawh a, thingpui sa ver vawr kan in hnuah chuan muangchang lovin Ti Bwar lam pan chuan kan tlan dun ta vang vang a.
Fu ruahtui tlak hmaa ka kal hman chu ka inchhir lo kher mai! Kawngțha kan dap na lamah kan tlu lek lek reng ringawt mai a, a khuar lo lai zawng a pawng a, chu zawng chu a ni deuh mai.

Ti Bwar chu Tukțhuan bawp nang hman tawk velin kan thleng phei a, mawng leh kawng chu duhthusamin a kham hman a ni.

Min hruaitupa chhungte inah chuan chaw an han chuan belh nawk nawk a, puar el euh chuan kan ei ve tho mai. Mizoțawng an hrethiam vek a, anmahni an inbiak chuan kawl țawng an hmang mai a, min ti tlangnel lo zo vek mai.

Min hruaitu tur duh viau mah ila buaithlak dawna ka hriat vang chuan Ti Bwar ațang chuan Bo cung lam panin Fehkawng niawm tak zawh chuan ka kal chhuak leh ta a, kan chaweina pa khan ‘Bo na tur a awm lo, kawngfai ber kha zawh char char la a ni mai” a tih vang chuan ka thla a muang angreng viau a, Zorini erawh ka ngai viau thung. Rilru nuam lo țeuh khan kan intir haw kha a ni bawk si.

Tlangram kawng tih takah kawng ruh chu țha viau mah se hnimin a buk nasat vang chuan a țhenlaiah phei chuan kal sawt a har viau mai a. Mahse, kal ve reng ta chu ka thlen ve mai chu ka ring a, Darkar hnih dawn ka kal tawh. Ka hmanhmawh fahran lo nain an sawidan hmangah ka thleng har lutuk tawh bik lo chuan ka ring.

Ar khuangri ka hriat ațang chuan ka thaw a veng ta deuh sawt a. Mahse, kawng a inthlep kual nasa lutuk chuan ka rinai daihin khua a ti hla a, khawchhung thawm hrephak reng chuan khawmawng lamah kan inher nghet nghet reng mai a ni.

Khua chu ka lut ta ngei e. Sana ka han en a, Dar 11:30am chiah a ni.

Ka rilrua thil awm chu 'ka tihtur chu ti nghal ta ila, thil harsa tak a nih hmel loh bawk a, heta țanga motor man theihna khawhnai ber ka ban leh hman angem?' Tih a ni.

Khawchhungah chuan chawl duh lovin ka pawisa ip a lehkha inthlep zawr deuhin min kawhhmuhna lam chu ka pan ding nghal a, ka ke a nat deuh em vang chuan khawdaiah chuan ka chawl khawmuang a, ka pheikhawk ka han phelh chuan ka tawt deuh nge ni a lo nawt pilh chu lo niin! Ava buaithlak țhin em ve aw.

Ka pawisa ip ațang chuan lehkha chu ka han phawrh leh a, ka kalna tur chu a dik ngei em tih enfiah tur chuan.

Uluk fe mai chuan an khawthleng nena riruat chung chuan ka han thlek a, ka awmna lam chu a dik ngei ka ring. Sikul ti a a ziah pawh ka kalpelh deuh lawkah khan niin ka hria, naupang bengchheng zet lo awmna kha.

Chumi sikul ațang chuan ngil takin a thai phei a, lungphun a awm a ni ngei ang chu mi thleng chuan.

Lungphun ațang chuan hnuailamah thuivak lo a thai leh a, chumiah chuan thaibialin leilet tiin a chhin chhiah leh a.

Chu leilet sir maiah chuan luikawr tiin a chhinchhiah a, chu kawr zawh chuan thai thlain thuivak lovah lungpui niawm tak pathum lem in hnaihbangreng tak hian a ziak a, chumi bawr chu a nih hmel viau a ni.

Tuna ka awmna hi sikul leh lungphun inkar a nih hmel a, lungphun zawn ai chuan leilet chu zawng ta mai ila hmuh a awlsam zawk ka rin vang chuan leilet hmuh tum chuan ka thawkchhuak leh ta a, thui pawh ka kal hman lo, khawchhung ațanga fing hnih emaw vel lek turah hian Leilet pawh chu a lo awm reng a, mualpawng in phen deuh lo sela chuan khawchhung ațang pawhin a lang iarh awm e.

Leilet bial chu tantlangin a sira luikawr pawh tur chuan ka kal miah miah mai a, miin min hmuh leh hmuh lohnlam pawh ka ngaihtuah teh chiam tawh lo. Min lo hmu pawh ni teh reng se ka tihtur ber an hriat ve miau loh vang chuan han hlauh teh chiam chhan tur pawh awmin ka hre lo.

Leilet bial tawp ber chu ka thleng phei thuai a, ranvulh an awm vak lo nge ni an leilet an hung miah lo chu mak ka ti angreng viau mai a, khua ațangin a hnai hle mai bawk si.

Kawr zai pan chuan ka chhukthla nghal thuai a, rilru chu hlimin a su dep dep ni ber hian ka hria. Khatihlai khan i duh ber min dil rawh pawh ti mahae dil tir ka hre hauhvin ka ring lo. Nuam veng veng em asin.

Ka pheikhawk bun chu ka bag-ah chuan ka ak sauh sauh a, kelawng chuan kawr chu ka zawh thla ta a, lungpui pathum a ni ka zawn tak ber chu ni.

Ka rin aidaihin ka kal thui ta. Lung lah chu hmuh tih lah a awm bawk si lo. A map ziaktupa hian measurement lam chu a ti mi vak lo a nih hmel viau mai!

Ka kal thui thawkhat tawhin ka hria, ka ngaih a țha chiah tawh lo. Beiseina han nei lo tur khawp chuan ka thleng hla tawhin ka hre bawk si.

Ka hah deuh bawk nen, ka inpal huh nasa bawk si chu  ka țhu chawl ta ringawt a, bumin ka awm a nih ka ring ta riau mai ka ti!

Mai mai chuan leh! Kha pa khan min bum a nih vaih zawngin a chak lo teh ang chu aw. Tehngawt a, a thi daih tawh bawk si. Keimah hi a nih hi chawh ta ber zawk chu le.

Khuaah ka riak ang a, naktukah he kawr hi ka tuam țha leh ang, tiin haw phawt mai chu ka tum ta a.

Chutia Luihnar lam pan tuma ka hawi chhoh takah chuan ka kalpelh tawh maiah chuan lungpui pathum chu ka han hmu leh lawi a! A kawr a chhengchhiat deuh vangin a hnarlam ațanga han zawh chuan an lo langsar lem lo niawm tak a ni. A thlanglam ațang chuan a ziahdan ang thlapin a lang ti ila ka tisual chhe lutuk lovang.

Hmanhmawh tak chuan ka per chho thuai a, chu lungpui awmna ka han thlen chuan a hma aimahin ka beisei a bo zawmah hi a ni ber mai.

Chu lungpuihnuaiah emaw, a velah emaw chuan thil han dahțhatna tur awm reng reng hi ka hmu lova. A hnuaiah a niang han ti dawn ila leiin a chhilh ngheh hmel viau mai bawk si.

Ka thlek kual nasat poh leh ka rinhlelhna a zual ting mai a.

Reingial chutia ka veh hnuah pawh chuan beiseina tur awm ang pawh ka la hmu chuang lo. Kan misual lubuka hian min bum a ni khawp ang.

Mai mai chuan le...!

___________           __________
            KA NAKRUH BO


               Chapter-XVI



Chutia beidawng ru deuh tak, beidawng țha phal bawk si lova ka hawikual hrek hrek na lamah chuan Pãtêk awm ze nei ang reng zet mai hi ka hmu hlauh mai a.

Uluk leh zual a ka'n bih chik chuan chu thil chu khawvel piankenin a herchhuahpui reng a ni hauh lo tih chu ka hre thei mai. A chhan chu hnuai lam hawiin thalfang mu niawmtak hian a inkawk va a lawm! En uluk viau lo ni ta ila, kalpaha hmu mai emaw ni ta ila chuan han rinna chhan tur tehchiam chu a awm pawhin ka hre lo.

Rangtak chuan ka inperh tho nghal a. Chu thilin a kawh lam chu ka thlengthla rang kher mai. Chumi zawn, leiseh chinah chuan khawkhat chawilung tia lawng mai tur hi lung a awm bawk a, chumi hnuaiah chuan a thuk ru a ni ngei ang le.

Mi phâk lohna hi ka nei zel zawng a nih hi mawle. Hmanrua engmah ka ken leh pek tawh lo hi!!

Chu lung chu engtin emaw ka karsawn loh chuan kei tehlul hian ka chawi zo dawn ngut si lo. A karna tur han siam dawn ila Chempui tak ngial pawh ka la keng lo zui a, mi chuan a nachang an hria ang mawle. Mahse, mi ka ni miau mai bawk si lo. Keimah ngei ka ni si.

Lung chu tihsawn tum chuan ka'n nam ve bawk a, namloh ang chauh a ni. A chet pawh a che hlek lo mai.

Ka bula thingțang chuan theih aag angin ka cho kual a, a lung chu leiseh chin bakah chuan a inphum hran lo a ni tih ka hmu ve thei mai a. Mahse, chu chuan ka chawisawnna tur kawngah hmasawnna min pe der chuang si lo.

Tulung a beih mai a ngai dawn nih hi tiin remchang tur zawng chuan ka kalsawn ta a. Chempui te tal han keng ila chuan sah mai tur a tam nen hmanraw ken si loh chuan a vanlaitla zawn mai a ngai lo thei si lo.

Thuife kawrdung ka zawh hnu chuan mi ra sahna bul chhah lam țangphel aia seimah tur hi ka hmu ta hlauh a, hei em chuan ka karsawn ve thei em ang.

Dolung tur lubur tiat dawn chu tui chim chin ațang chuan ka chawi chhuak bawk a, duhthala rema țanhmun siam chunga ka han kar meuh chuan inham tanna nei lo zawk na na na chu a tawlh ve lo thei ta lova.

Dolung nen chuan sawn hnaiin ka bei zel a, thlan sa phata ka tih hnuah chuan ka karsawn fel thei ta kha a nia.

Mahse, a va ho leh si em!!

Sarang kutpha tiat vel tur, a pum pawh ni lo a phel leh nghal, engmah khuh nei bawk si lo chauh chu zu awma mawle, hrep tak chuan a!

Thaw he hu chung chuan ka karsawn tak lung chungah chuan ka țhu zui a, ka nuih a za lo tak zet a ni.

Beidawng fe chuan sarang chu phih chhuah mai ka han tum a, ka thei awzawng lo mai. A hnuailam chu a che dât leh nghal a, ka han phih leh pawh chuan chutiang tho chu a la ni.

Thingțangin lei chu ka cho thuai a, chawh vak pawh a lo ngai lo. saranga thil intuam, chartin tiat awm vela chhah hi ka phawrh ta nawlh mai a! E khai khai khai le..!!

Ka kut dinglam leh veilam chuan hawn hmasak an inchuh ni ber hian ka hria!

A tuamna chu ka phelh zel a, pawisa note hmel a lang țan ta, a va nuam ham ham ve leh!!

Kawrkam hmun remlaiah chuan ka bun ta ngawt mai a, a țhahnem ve viau mai. Rs 10 note ațanga 500 note thlengin a awm niin ma hria. A zat chu ka la chhiar peih lo.

Ngaihtuahnaah chua inlama haw ta Zorini a lo lang uai uai a, ka nu leh pa ten inneih an remti thei lo a nih pawhin heti a nih zawngin chhungte kalsan pawhin bul kan țan ve thei tawh ang chu.

Khawvel fahrin zingah hian ka hlim ber mai awm e!!

Ka rem luh leh lai chuan a sira lehkhaa infun lo let ngat hi ka hmu a, ka han phelh thuai a, awi ka rei leh! Lalpa ka lawm e.

A tirah pawh hrechhuak awm tak ka ni asin mawle. Ka pawisa hmu khan ngaihtuahna fim min hmantir lo a nih dawn hi maw.

Uluk deuh chuan fun țha lehin ka thawmhnaw karah chuan ka dahthlap a, lungmuang taka akin luihnar lam pan chuan ka faifuk chho ta rat rat a.

Lubuk, aw lubuk samthur pa
I malsawm min thlen zo zai hi
A va na sa em kirbup pa

Haha, ka va han zaithiam lo teh lul em ve le! Mahni phuahchawp saah pawh ka la rintlak chuang lo a nih hi.

Zawn nei lova ding taka kal mai ka ni bawk a, kar lovah khawchhung chu ka thleng leh mai a.

Dar 1:30 a pel tawh. Engtinnge ka awm ang aw.

Ka ril te pawh a țam, tin kalkawng chin te pawh zawh tho tho an ngai alawm. Keimahin kawng chin ka hre der bawk si lo.

Khawlaia hmeichhe naupang samthur hiang mai lo awm hnenah chuan "Mami, khawilai nge in in?" ka ti a.

A kuta faisa hlawm niawm tak a ken chu a han keih zet a, mi melh dan chu mak min ti a ni tih ka hre reng mai.

"Khawilaiah nge in in a awm" ka han ti leh a.

Ring zet mai hian 'zin, zin, zin' tiin a au ta reuh a. Kan mizoțawng hman ang chuan a au awzawng si lova, 'râl râl râl' a ti nge maw pawh ka hrethiam tawh bik lo. Ka lo sakuh ser nghah ve chawr mai loh te chuan.

Amah aia lian deuh tur mipa naupang pakhat hi kawrhma leng duai duai hian a lo tlan a, kan bul a thlen chuan mi be țha hle hle ta lo chuan hmeichhe naupang te chu a kai a, ka hmalamah chuan a kalphei pui dawr dawr a.

Engnge maw an hriat le. Ka hlauhawm viau nge mawni dawn le aw. Ka va'n hre thiam lo em.

An hnungah chuan muangchangin ka kal phei ve ta thova, thui pawh ka kal ve hma chuan in pakhatah hian an lut a, a hnulawkah chuam pu upa lam tawh tak mai hi a lo chhuak zui a, a kut chuan min han hui zauh zauh a.

An insak dan lah chu luikama awm ang mai hian a ban a sang ur a, a hnuaiah chuan engmah an dah leh chuang bawk si lova, ran awmna nge naupang chetna zawk tih pawh hriatlohin a bel hen hun lawi a.

"Zin i ni maw?" a lo ti a.

"Aw, mizoram ațangin" ka lo ti thuai a.

"E, Zoram ațangin maw? Engnge i rawn tih teh nawlh a?" tiin Mizo awphawi pai hlek lo chuan a ti zui a.

"A, engteh vak tih pawh ka nei chuang lo. Ah Law-ah kal ka tum a, helam tlangdung hi ka la tlawh lova kal pah a rem chang ka tia, Ti Bwar ațangin kein ka lo chhova" tiin mar zet chuan dawt ka han sawi a.

Inthiamlohna lah chu ka la nei der lo zui a.

"A nih tak chu, engnge Ah Law-ah chuan i tih dawn a, țhu rawh, țhu rawh"

"Khutah kan țhenawma hnathawka rawn awm hi Ah Law khua a nia, 'nupui ka nei dawn a lo kal ve rawh' a ti teh tlat a, hei zin chhuah remchan pah ka tia chumi hmang tur chuan ka kal ang chu ka ti deuh a"

"A nih chu mawle, Sesih khawchhuak alawm keipawh ka nih. Sesih i hre ngai em?" a ti zui a.

"Khuangthing bula a mi kha mi?" ka lo ti thuai a.

"Khuangleng zawk mawle."

"Aw ni tak e, engatinge helam lamah i awm teh daih a?"

"Nia, khawsak a awlsam zawk ka'n ring deuh mawle. Tlangval țhat laia chho kha ka nia hei kir leh tih pawh a awm thei tawh lo. A zin lah kan zinchhuak hleithei tawh bawk si lova"

"I chhungten an rawn tlawh che em?"

"Tlawh hran love, a..chhungte han tih em em tur kha ka nei lo ve deuh bawk a, han phut leh chuan tur pawh an awm lo. Khangte vanga helam lama chhuak chho ta te pawh kha ka ni deuh bawk a"

No chu a tuai pawk pawk a, Phan hmuichak mai chu mi han thlit a.

Ka chhawl a hal deuh a niang ințhan ni lem lo mah se ka intui viau mai a, chutih lai chuan naupang pahnih chuan puanzar phen ațang chuan min lo bih dâk dâk bawk a.

Kal leh mai ka ngaihthu ka han sawi chuan "E hetah i riak lo anga maw?" a ti he haw a.

"Riak lo mai ang. Heta ka riah khawtlai chuan ka thleng tlai lutuk ange."

"Aw, i riak turah ka lo ngai a.. Chuti vut vut tur emawni dawn le"

"Remchang dang a la awm leh turah ngai ang. Engtin nge heta țanga khawhnai ber hi ka pawh ang?"

"Kan kawt kawngphei zelah hian kal la, khawchhung pelh deuhah sawn kawngpeng a lo awm ang a, veilam zawkah i kal dawn nia"

"Kawngpeng dang a awm lo maw?"

"Awm love, ngil taka kal a ni mai. Saimun chu a hla hleinem, darkar khat pawh i thang lovang"

"Chuti chu Daakdung Buan ka la ban hman ang em heta țang hian?"

"Ban hman e, chulama kal i duh chuan Saimun tlawh lovin heta țang hian a kal theih theih reng alawm"

"E, chuti a nih chuan chulam kawngah chuan kal ila a awlsam a ni mai alawm"

"Saimun lamah chuan kawng chu a țha zawk mah ang a, link road an lai tlang țep tawh a, helam ațanga i kal chuan feh kawng rau lam ang chauh phei chu a ni ang a, a hnaih chu a hnai deuh zawk ang, sawlama kal kual leh rih ai chuan"

"A hnai hnai kha a țha mai alawm"

Khawdai thleng rawk chuan mi thlah pek a, ka lawm hle mai. Kawngpeng awmdan zawng zawng nen min hrilh kelh hnu chuan mangțhain kan in kalsan ta kha a nia.

A hming chauh tal pawh zawh nachang ka hre leh pek lo! Benghawng lo thei ve chhah chhah bawk sia mawm.

Chho zawngin ka kal ti ila ka tisual kher lovang. Chho ulh tak phei chu a ni law, tha erawh a heh phian thung. A hlat leh hnaih zawng hre ve miau hek lo le chawlh pawh ka chawl ngam lo a chha chu a ni e.

Dar 2:20pm a chhuak țan kha ka ni a, darkar hnih dawn ka kal tawh a, khua chu a hlat ka ring vak tawh lo. A chauh erawh ka chau ve ang reng phian mai. Ka rin aiin ka hah tawh!

Ni pawh ngawhnuaiah phei chuan a dul ruai tawh a. A lo la hla phian anga, ramhnuaiah te hian khuain min thim hnan mai ang ka ti!

Mahse le, kal ve reng ta chuan ka hnaih ve zel a ni chêk aniang chu khua a hnai a ni tih an chettlatna a țang chuan ka hrethiam ve mai a.

Khawdâi ka thleng tawh a nih ka ring deuh mange.

Naupang dâivak niawm tak ka hmuh te chu umphak tumin ka kal chak sauh a, karlovah ka umpha thuai reng a, an hming te chu ka han zawt a, an in en a an nui teuh teuh hlawm duh chauh mai a, ka țawng bawk an hrethiam lo niawm hi a nia.

Tihvak ngaihna awm hek lo an rual chuan khawchhung chu ka lut ve ta thova, Bo cung aichuan an lo lian deuh zawk a, an khawsak pawh a san hmel zawk deuh chuan ka hria.

Kawngkama in remchang thlenna tur melh chuan ka kal zel a, thingpui dawr niawm tak te pawh a awm ve alawm.

"Hotel riahna tur a awm angem?" tiin nu, la valai tak mai pakhat ka tawh chu ka zawt a. A mi chhanna chu ka hre thiam ve leh pek lo! Tin, ka zawhna chu a țulber pawhin ka hre lo. Chutiang thingtlang hmuna Hotel han zawn ngawt mai pawh chu.

Inbiak kan han tum ngial nain kan ti hleithei lo chu a ni ber mai. In pakhat hi min kawhhmuh ta ngawt mai kha a nia.

Chu in chu Hotel chu nge ni ang a, ka țawng hretur an awm a ring zawk ni ang le. Duhthlan tur dang aih awm bawk si lo chu chulam pan chuan ka in chhepchhuak ta thova.

Kawngka luchungah chuan eng engemaw inziak hi a awm kawi ve nuaih mai a, an khawchhunga nihna pawimawh ve tak chelh an awm ni ngei tur hi a nia. An hawrawp te chu chhiar thiam ila chuan an nihna nen ka hrefiah ve nghal mai tur.

Kawngkhar chu ka han kik kauh kauh a, lo lut rawh an ti nge pawh ka hre lo, inchhung ațanga chuan țawng lauh hi ka hria a. Engnge an sawi ber ka hre bawk si lova. Keimah min chhawn nge chhawn lo pawh ka hriatthiam ve si loh chu mawle.

Min chhawnah ngaiin ka lut ta tho kha a nia. Inchhung lah chu meikhu a lo zam khat chuai mai leh nghal a.

"In awm maw?" ka ti chuan nu pakhat thil lo chan mawlh mawlh hi ka hmu nghal a. Lehhawi meuha min en chung chuan "Awm e, hawng pawt awh" a ti zui a. Lo leng rawh a tihna a niang ka ring.

"Mizoram ațanga lo kal ka nia, thlenna tur ka zawng a..Hotel te hi a awm em le?" ka tih chuan tapchhak lama ka lo hawi kân pitar hian min lo chhang ta reuh a. Ka beisei loh lutuk mai chuan a ni pawhin luseițawng ngeiin a ni min lo biak ni. Ka lo thleng thei angem han ti rawt aichuan Hotel han hmatheh mai chu a lo remchang phian bawk si.

"Hotel a awm lo, hetah innghat mai rawh" a lo ti a. A țawngthluk dan erawh a dang deuh, keini'n kan hman ai hian a awn deuh hret ti ila a dik berin ka hria. A awphawi a mar nalh lo.

Chutiang chuan an ina zanriak tur chuan ka inbuatsaih ta kha a ni a, a sawidan chuan kum upa lam deuh hi chuan lusei țawng an la hmangthei vek hlawm a ni awm a, mahse, an hman ngai loh vangin țhangthar te zingah erawh chuan hria alawi an awm tawh lo a ni awm e.

An chhungkuaah pawh chuan amah chauh chu pangai taka han titi pui theih ka neih chu a ni mai a, midang chuan ka țawng an hre riak ruak a, chutiang bawkin an țawng pawh han ngaihthlak uluk deuh chuan 'chumi a sawina chu a ni awm e' han tih tur ting chuan ka man ve riai ruaiin ka hria.

"Zingah i tho ang a, motor chang turin i chhuak hma ang a, chuti a nih loh chuan chan fuh lo țum te hi a awm ve a, kan khua lah hi motor in a rawn tlawh ve ngai zen zen bawk si lova, kawngpui tlangdunga awm loh hi chu a retheih thlak a nia, a hlat loh tehlul nen insawn lah hi a tu amah hian kan tum bawk si lo" a ti zui a.

"Heta țang chuan khawi khua nge ka kal ang?"

"Ah Law lama kal dawn chuan Kale lamah i kal angai ang chu. Hmarlama i kal chuan Teddim lam a ni dawn a, chhim lam hawiin motor i lo phar ang a, tichuan Kale chu i thleng mai ang. Kale ațangin Khampat lam panin i kal leh ang a, chuta țang chuan Ah Law chu a hla tawh lovang" tiin uluk fe mai hian min chah thlap a.

Ka khawsak dan tur han ngaihtuah chuan muthma ka mamawh a ni. Tin, ka chau ve deuh hrim hrim bawk a. Zing thawh hma ngai leh tur bawk si nen chuan.

An pindan lam depa chhuatah chuan puankawp min phahsak a, a va han ruh teh lul ve mawle! Phah loh ang vel niberin ka hria. Mutchhuakin min zem ruai tawh tihah chuan ngaihtuah chhuah thut ka nei pek a, ka pawisaah vel hi hetia bag lawnga dah tawp chu a him dawn lo riau hian ka hre ta tlat a. Mahse, dahțhatna tur ka hre chuang bawk si lo.

Ka bag chu ka han lukham ren rawn a, ka mang a țha vak bawk silova, ka mutthilh meuh chuan ka kham leh tawh lo hial emaw a ni ang a, awmzia a awm chuang lovang.

Pawisa aimah chuan lehkha thema infun khan ka rilru a luah zawk mahin ka hria.

Ka ngaihtuah nasat poh leh ka hlauthawng nasa ti mai a. High school kan kal laia kan zirtirtupa thusawi te kha min ti hrechhuak uai uai a - "Burma ramah kan awmlai te chuan inrawk leh insuam hi a tam khawp a, sum nei deuh a an rin te chu an nunna hial laksak pawh engahmah an ngai lo" a tih te chu a rawn lang zut zut a.

Heti ringawt chuan dawtsawiin ka inhum reng thei bik kherin ka ring lo. Chuti a nih chuan kawngdang ka zawn ve a ngai a ni mai.

Ka bag a mi sarang a infun chu ka phawrh a, ka puansin hnuaiah chuan ka thlamuanpui hlawl si lo. Tawhsual tawh palh theih laka ka invenna tur awm chhun a ni tiin lehkha thema infun ber chu ka han hmuam vang vang a, harsa ti zet chuan ka dawlh thei ta hram a, ka hrawk chu a pilh hial emawni a thip thla vang vang mai.

Chuti chung pawh chuan ka la muhil thei chuang lo cheuva, an mut reh ka nghak te te a, an mu fel ta maw tihah chuan dimtea thovin ka bag chu an zawng palh a nih pawha an hmuh mai lohna tur ni a ka rin, hnathawh thawmhnaw vel an dahkhawmna karah chuan ka dah ta daih a. Rilru a nuam ta deuh huai e.

Ka chau bawk a niang, venthawn tur teh chiam awm ta lo chu ka muhil zui mai aniang, thil engmah ka hre zui ta lo.

Ka harh chuan khua a lo var iarh tawh mai a. Ka sana ka han bih thuai adar 5:37am chiah a ni.

Muangchang chuan thovin ka inphih sar sar a, chutihlai chuan pawnlam ațangin an pitar kha a lo lut nelh reuh a, a tho thawm lah ka hre der si lova, a va tho hma awm ve mawle.

"Chawțhing bar tur a awm kha, bar rawh" a ti a.

Mahse, hlauh ka nei a, ekchhuak ka hlau deuh! Dun hun hmaa a chhuah chuan buaina tur mai mai a ni. Ramhnuaiah tal chhuak rawh se. Chuti a nih loh zawngin ka thil dawlh ngawt kha a buaithlak mai dawn si.

Chawțhing pawh chu ka bar sak duh ta lo kha a nia. Ka ril chu a țam har pawhin ka ring lo. Chawțhing chu tuidehna chunga hnahtêl an dah chuan chi nen ka bawk ta zawk a, remhria ka va han inti tehlul em!

Mumang ngaihtuah zui tur takngial pawh ka nei lo kha a nia, lawmthu hrilh mawlh mawlh chung chuan pitar chu ka chhuahsan ta a. A kawng min kawhhmuh chu hmundanga ka kal tawhna lam nen chuan a inthlau ve deuh. Motor kal theihna kawng a ni tawh tlat alawm.

Melthum em pawh ka kal hman dawn emawni tihah chhan kawngpui pangai chu ka pawh hlawl mai a! A sawi dan khan a hlat hmel teh reng nen, a ti ho reuh viau mai ka ti.

Kawng zau lai deuh, han țhutchawlhna lai tur rem awm deuhah chuan engtika lo kal tur nge tih leh a lo kal ngei angem tih pawh ka hriat loh motor chu ka'n nghak teh reng kha a nia.

Thlarauva khah vang em em pawh ni lo hian țawngțai a zing duh viau mai.

Mawngkham bawk, kawng kham bawk. Tihtur a vang ngang mai. Ka hman emai tiin pawisa te chu ka'n chhiar leh rih vel a, India rupee vek a ni, anmahni pawisa chuan thleng ila ah lawih tham chu a awm ngei ang le.

Ka ngaihtuahnaa thil lo lut chu țha riau dawn hian ka hre pek a. Kan nuin Rs 2000/- vel min kentir kha a nia, tlem ka hmang tawh a, ka kalna senso vel te hi chu ka pawisa lakchhuah hi hmang ta mai ila tuma'n min dem bik dawn emawni le ka ti. Tam tham tak ka hmang hman dawn chuang si lova.

Tichuan, englekhawle motorah chuan lo chuang ta ila check gate te an lo neiha min check chuan ka sum ken chu an man ngeiin ka ring leh hnuhnawh pek a! Anmahni ram pawisa a ni bawk si lo. Keilah ramdang mi ka lo ni bawk nen, han insawi viau mah ila ka hmakhua ka sutkuak zawh ka ring tlat lo.

Chuti a nih chuan engtin emaw chhehrelh dan ka zawn a ngai dawn a ni. Helai ram vela thuhruk ngawtin ka pek tur tan tihngaihna a awm dawn bawk si lo.

Ka bag chu ka'n bih chiang ngial țhin a, han thurukna chai hi a awm bawk si lo. Kekawrte kar velah han paipawn ngawt dawn ila min check a nih chuan an dap dawn tho tho bawk si.

Ka bag hrui chhungah tlem tlema thlepin dah țha ta ila tih chiah chu ngaihtuahna fingtak pakhat ka neih leh a dawttu chu a ni zui mai.

Ka bag hrui han rehkuak na tur takngial pawh hmanrua ka nei lo a chha chu a ni e. Ka bag peng pakhata Nail cutter awm zawng chu ka hriam hrei neih chu a ni mai a!

Engtin tin emaw ka Nail cutter hmang chuan ka ti țet a, ka hnawh lut ve thei mai a, ka rehkuakna lai chu ka koki chungchiah hi a ni. Chulai kher ka rehna chhan pawh a țhui pin lehna tur ka neih loh vangin hnuailam ka reh chuan a tlak mai ka hlau a...

A note lianzual chu ka zep zo thei hram a, a Rs 100/- note hnuailam erawh chu a theih tawh ngang loh. Tam tak a ni tawh lem lo bawk a min hrethiam ve tawh em ang chu ka ti ta ngawt mai.

Chutia ka insam mial mial lai chuan hlataka motor ri lo thum vang vang chu ka hai lo chiang kher mai. Eng motor nge pawh ka hre lo Falam lam ațang chuan a lo tlan vang vang a, ka bul a lo thlen thleng chuan eng motor nge ka hre chuang lo reng reng, khatiang motor kha ka hmuh ngai pawh hre ve miau hek lovi.

A khalhtu lah chu veilamah a țhu vei awt leh ta nghal a.

Kawngchhaklama ding chung chuan ka lo phar va a, a khalhtupa chuan engemaw sawi sup sup pah hian a hnunglam chu a kawk zoh zoh a. A hnunga lawn turin min ti nihmiang tiin ka lawn zui ve ta thên a, motor pawh chu a tlan zui ve leh nghal mai a.

Supply thiar nge maw an nih le. Buhfai niawm tak a ni an phurh hi. Remfein an thil phurh chungah chuan ka mu a, a nuam viau mai.

Kan tlan rei tial tial a, ni a sa bawk si, a chung khuhna awm lova chutia han tuar ngawt mai chu hahthlak a tling ta tlat mai a! Tui a hal deuh huam huam tawh mai bawk si.

Kawng a țhat vangin kan tlan muang lutuk lo bawk a kan thleng har lutuk chuan ka ring lo. Mahse, ninawm tak erawh ava'n nichiang!

Ninawm viau mahse duhthlan tur dang a awm miau loh vang chuan tawrh tlawk tlawk chu ka chan a ni mai a. Motor a chuang ve si-ah chuan a hrehawm ber mai hian ka hria.

Dar 4:00 pelh hretah chuan Teddim khawpui chu kan thleng ve ta hlawl mai a. 'Kein ka lo kal tawh mai ange aw' han tih mai pawh a chakawm rum rum mai alawm le.

Police hmun niawm takah hian min tlanluh pui a, anmahni police bungraw thiarah riak ngaiin hlauhthawnna chang pawh ka lo hre pek lova.

Motor ațang chuan zuangthla in zunin lamah chuan zung turin ka lut a, motor a chuangve pakhat chuan min enzui reng ni a ka hriat vang chuan nuam ka ti chiah lo deuh. Mahse, han ngaihțhatlohna chhan tur ka la hre chuang lo.

Motor khalhtu zawk chu inchhunglamah chuan a lut daih kha a nia, ka zung zo ka chhuak chiah chu chu building gatepui bul ațang chuan pakhat hian min lo hui lauh lauh a, 'eng thil chu nimaw' tiin ka pan phei ve nghal mai a.

Pindan pakhatah hian min hruai lut a, eng khaw sawi set set lo chuan min handcuff nghal bawrh bawrh mai a. "Engnge a awm zia?" te chu ka'n ti ve ngial a, ka țawng chu an hrethiam lo nge an ngaihven lo hrim hrim pawh ka hre lo, an tih ngai chu an ti mial mial hlawm a.

Kuthnung khirh chung chuan kilkhatah hian min din tir a, ka bag chu an lepse ngial a, ka pawisa ve pangai sangkhat leh tlem chu an phawrh chhuak a, a dang chu ka thawmhnaw hakthlak karah khan ka zep mai kha a nia, an hmu lo nge ni an phawrh tel hauh lo. Tin, ka bag hruia mi pawh tiamin.

Uniform ha ber chu a lal hmel berin ka hria. Midang chuan an ngaichang viau bawk. Ka bag chu a bula dawhkan ruakah chuan a thehphei lawp a, pawisa chu drawer-ah chuan a hnawh lut zui hmak mai bawk a.

Tichuan an mitang ka ni ta ringawt a nih awm chu mawle. Engnge min manchhan hi ni ang aw, ka țawng lah an ngaihthla duh bawk si.

Pakhat chuan ka banah manin mi kaichhuak a, an thana niawm takah chuan min khung ta ringawt mai a, ka awmngaihna hre lo chu ka auchiam chiam mai pek a, tumah an rawn dîk dâk duh der mai bawk si lo.

Kilkhatah chuan mangang takin ka țhu ta ringawt a. Engnge awmzia? Engnge min lo man chham ngawt hi ni ta ang le?

Ka hrethiam lo fai  vek...


___________           __________
            KA NAKRUH BO


               Chapter-XVII




Khua chu a thim hnai tawh viau, ka ril lah chu a țam țan mai tawh bawk si.

Mitang dang te tal awm ve se țha tur a nia, chinchang han zawh tur awm miah si lo chu a buaithlak viau a ni. Ka rin ai takin an Thana chu a fai țha phian a, tang an nei ngai lo emawni ka ti hial mai.

Chhuah rukdan tur ka’n ngaihtuah lah chuan a vang pherh hrep bawk si. An thirkham lah han sawi chhiat mai chi a ni bawk si lo. Heti hian ka tuar ngawt ngawt mai dawn chu a ni awm sia leh! A va beidawnthlak ve mawle.

Duhthalin țawng te inhre thei tal ila chuan a ziaawm tur a sin mawle. Kan inhriat pawh dan lah kha ngaihruatin lunglen a hril chang chang tih pawh a la tluk pha meuh si lo.

Engtia min tih nge an tum ang aw..Jail a min dah luh vaih chuan ka chhe vek a ni mai. Chumi paltlang lo tur chuan tihtheih engmah ka neiin ka hre bawk si lo.

Huiham..

A tu amah chuan min rawn ngaihven em em bawk si lo, tuemaw tal chu lo kal se chuan tih dan dan te pawh a awm maithei asin mawle.

Khua a thim fel hle hnu chuan ka awmna lam panin manmi pahnih hi an lo kal a, ka awmna ațang chuan min hruaichhuakin an office pui lamah bawk chuan min hruailut leh a.

Chutah chuan Mizoțawng thiam pakhat hi an lo hruai chu lo niin.

Ani kaltlang chuan min han dawp ta a, chupa sawi hmangah chuan tunlai hian Teddim leh a chheh velah mi awmțha duh lo chetla an awm a ni awm e. Chumi an zawnna lamah chuan kei khatia ram palailenga lo awm ta ngawt chu min ringhlel hi a ni awm a, ka theih ang tawk chuan ka’n in sawifiah ve bawk a, an pawm lo a nih hmel viau mai. Ka ID vel engmah ka lo keng bawk si lo. Ka hmachhuan ber chu Border lama duty ten lehkha chhete min ziah sak kha a ni mai. Chu lah chu an hmethrual a bawlhhlawh bawmah an vawmlut nghal daih mai bawk si.

“Engtia min tih nge an tum a?” tiin ka bula mi chu ka han zawt a.

Ani lah chuan a hre lo nge min chhang duh lo ni “ka hre bik lo” a ti mai bawk si.
Ka thinrim bawk si, tihngaihna vak ka hre bawk si lo chu hrehawm tak hi a ni ringawt mai. Ka ban chu handcuff tlat lo sela chuan thih leh thih tiin ka bei mai duhawm a sin mawle. Heti hi chuan han bei ve ngawt pawh ni ila ka tan chet ngaihna a awm dawn bawk si lo.

Kan piah chair-ah chuan Office chemte ang chi, Stainless Steel tle vir ver ang chu khap khat vela sei, a fawng plastic ang chi kha a awm a, va kal nal nala ka lak ngawt chuan a dik thei dawn bawk si lo. Sawtal saw inhum him nan ka mamawh dawn a ni. Lakdan hram ngaihtuah a ngai. Ka kut hi aw..

Ka thiam ve loh țawnga an inbiak buai hlawm hle lai chuan muangchangin chair lam pan chuan ka tawlh ru hriau hriau a, chair-ah chuan țhuin chemte chu ka țhutbet thei ta hram a. Tuma’n min hmu bik lo chuan ka hria.

An rinhlelh loh tur ang ber chuan rilru hah hmel zetin dakvah hian ka maimitchhing a, ka kut erawh chu ka kapah ka vawzep thung a. Mahse, chumi hnuai lamah chuan chemte chu ka keng ran thung a. Engtin nge niang, ka che thut mai dawn em ni?
Han chethut dawn pawh ni ila mipakhat ka vih hman leh ka vit awrh chauh ang a, ka chan chu a chau teh ang chu.

Ka kekawrte chhunga dah tum chuan chemte chu ka buaipui ka zawk a, kawngka lam hnaih bera țhu chuan mitsir pawha min hmuh theih reng vang chuan fimkhur a ngai viau mai. Min handcuff vang chuan an ngaih a țha ni hmiang, mi phei chu an ngaihsak em em lo nichuan ka hria. Pawnlamah duty an awm țha viau nge mawni zawk ni.

Engtin tin emawni chuan ka kekawr chhungah chuan ka thun thei ta hlauh mai a, rilru a nuam ta huai mai. Ka thun hman lo teuh lutuk, an țhutna ațang chuan an lo tho chhuak zui sap sap a. Kan mizoțawng thiampa chuan “Tihngaihna a awm ngang lo a ni, Document engmah i nei bawk si lova..” tiin inthiam loh hmel tak chuan min melh a.

“A nih chuan ka chhungte tal min hrilh sak rawh”

“Awle, lehkha thawn a ni mai” a ti zui a.

Kan khawlama ka nu leh pate ka address dawn chuan a thlen har ka hlau bawk si. Aizawla kan inluahna lamah ka u hming chuan address chu ka chhinchhiah tir ta ngawt a. A lo thawn duh loh phei chuan helai hmunah hian ka arte thih tawp mai dawn a ang viau. Engpawh ni se, a lo thawn ve hram turah chuan ngai ila.

“Naktukah ka lo tlawh leh ang che” tiin min chhuahsan zui nghal a.

Misual ka nih an rin vang piah lamah dan bawhchhiaa an ram lut ka nih vang chuan min hreng ta a nih ber awm chu mawle. Ka ngaihtuah thiam tawh lo. Ka lum pup pup tawh mai.

Thana lama min dahluh dawn lai khan dar 8:00 bawr vel niin ka hria.

Pahnih bawkin min hruai let leh a, chet han lakna tur hun min pek hmel loh khawp mai ka ti.

Kan kalkawnga inthiarna niawm tak zawnah chuan ka ding a, inthiar ka duh thu zaizirin ka han hrilh a. Eng emawni an sawi zauh hnu chuan pakhat chuan min kirsan a, a la awm zawk chuan inthiarna kawngkhar chu min hawn sak a, ka lut zui ve mai a. Mahse, handcuff bun chung chuan kekawr pawhthlak a buaithlak deuh vang chuan leh hawi meuh chuan ka kekawr pawtthla mai tur chuan ka han hrilh a.

Mi melh ram ram mai a, kei lah chuan ka nghak ran mai bawk si.

A kekawr tlanga a chabi khaibawr chu a phelh sat sat a, chuta țang chuan handcuff chabi chu a la chhuak a. Umh..a țha dawn e, a țhianpa hi a lo let loh vaih chuan a chan a țha vak bik lovang.

Hancuff chu ka kut dinglamah chuan a han ti tang lui hram pek a, inthiarna chhungah chuan ka lut zui a, chutia ka handcuff meuh a phelh ngam nachhan chu ka hre ta thuai a, chu pindan te chuan ventilation takngial pawh a lo nei lova, a seha kan seh pawp te a nih ngawt loh chuan chhuahlam kawngka atan chuan hman a har deuhvin ka ring.

Kawngkhar chu phui chiah lo, lu rawlh theihna awm vel hian ka khar phui lo va, ka awmna lai chu a hmuthei lo chiah chiah. Chu'ng te chuan a ngaih a ti țha deuh nge mawni mi pawh a rawn ngaihsak lem lo. Ka va bihthlak lai tak phei chuan lehlam a hawi daih leh nghal a.

Ektum len hmel fahran chuan thawm chhuah meuhvin ka'n sang ri lui vel a. A țhianpa chu a lo let mai tak loh vangin a lo let dawn lo a nih ka ring ta hmiah a, tun chiah 'risk' lakna hun ka neih hmel. Ka tihsual leh tihfuhin ka dam chhung a nghawng tawh ang.

Kawngkhar chu dimtein ka hawng riai riai a, pawn lama min lo nghaktupa chuan lehlam a lo la hawi a, ka pen chhuah dawn lai tak chuan ka handcuff chuan kawngka biang a nawk ta hlauh mai a, a pawi zo ta!!

A lo leh hawi thuai a, handcuff chabi keng chuan min rawn pan nghal mai a. Chutia min rawn pan mek lai chuan ngaihdan thar ka nei thut, ka handcuff-ah chuan ka kut a zangthal zawng ve ve hian ka lo rawlh lut sa a, ka kut rawn ban tuma a rawn kun hniam chiah chu theihtawp takmeuhvin  Handcuff chuan kan chhoh dawm ngheng mai a leh!!

A khabe kual lai taka chhoh dawm tum kha duhaiin a lo kun hniam hman a niang a hrawkah tak mai ka dawm kha a nia. Mahse, a lo țha zawk, a hrawk ațangin ri chhuak tur a awm lo, a hup a, a ri hrawp hrawp mai!

Hnunglamah chuan a pai chiang chiang a, bang ngheng chuan a ding ren rawn a, din pawh a ding ngil thei lo.

Ka kekawr iptea chemte ka ah chu ka phawrh chhuak thuai a, a lam pan chuan ka che zui vat a.

"Thawm i neih vaih chuan ka that che a ni mai" ka'n ti ngawt a. Hrethiam tak mawle.

A țhianpa kha a lo let leh thuai ka hlau bawk si.  Ka hmanraw neih ve chhun lah chu chawhmeh chan nan pawha tlak mang loh tur a ni bawk si. Chet lak thuai ka ngai a nia.

Chemte chuan ka hawlh thova, amah zawk chu handcuff ka bun tir zui nghal mawlh mawlh a. A hrawk chu a na viau a niang, a mitmeng thleng chuan a sen nghal rûm mai a. A hmui hupsak chung chuan Thana chhungah chuan ka nawrlut nghal nawk nawk a.

Thana pindan kilkhatah chuan ka nawrbet a, a auchhuah ka hlau bawk si. Engtinnge ka tih tak ang aw..?

Ka kekawr iptea chemte ka ah chu ka phawrh chhuak thuai a, a lam pan chuan ka che zui vat a.

"Thawm i neih vaih chuan ka that che a ni mai" ka'n ti ngawt a. Hrethiam tak mawle.
A țhianpa kha a lo let leh thuai ka hlau bawk si.  Ka hmanraw neih ve chhun lah chu chawhmeh chan nan pawha tlak mang loh tur a ni bawk si. Chet lak thuai ka ngai a nia.

Chemte chuan ka hawlh thova, amah zawk chu handcuff ka bun tir zui nghal mawlh mawlh a. A hrawk chu a na viau a niang, a mitmeng thleng chuan a sen nghal rûm mai a. A hmui hupsak chung chuan Thana chhungah chuan ka nawrlut nghal nawk nawk a.

Thana pindan kilkhatah chuan ka nawrbet a, a auchhuah ka hlau bawk si. Engtinnge ka tih tak ang aw..?

“I thawmhnaw hi ka phelh dawn a, thawm lo nei hlek suh ang che” tiin ka veilam chuan chemtein ka chuktuah a, mihuaisen tak chu a ni lo ve a niang. Keichu ni ila chuan ka beilet khawp ang. A chanchhe zawk chu keimah tur tho ka nia. Țhiante thawm hrephakin an awm reng a. Ka chemte chhe zet ken chu a hlau viau nge maw ni. Nge, Khurbingho țawngkam takin awmpuitu ka nei țha viau zawk emawni.

Ka kut dinglam chuan a kawrhma kilhna chu ka phelhsak nghal mawlh mawlh a, buaithlak ta chu Handcuff ka lo bun fel tir vek tawh chu a ni.

A tawnzau chu ka zaițeh sak ta ringawt a, tihdan dang awm tawh nghal hek lo chu chuan a hmui chu ka phuar zui nghal a, heti chuan amah chu venthawn a ngai ta lo. A handcuff chu phelhsakin a kawr chu ka hlip zui nghal a. A pheikhawk leh kekawr nen lam chuan ka hlih sak vek a, a țhianpa lo let ta lo chu a va han vanneih thlak teh lul em ve mawle.

Hmanhmawh zet chuan ka inphelh sawk sawk a, a thawmhnaw ka han ha tur chu a rim a lo na kher mai. Zakkha rim niawm tak, khaini rim zawk emawni nen chuan a thang deuh huam bawk si. Hm, duhthlan tur dang awm se ka ti kher mai.

Ka thawmhnaw ka haktir leh vek hnuah chuan a lukhum chu sawi zetin ka khum a, a kut chu a nghet em tih te ka en leh hnuah chuan Thana kil sirah chuan muttirin ka chhuahsan ta a. Pangai tak chuan kawngka pawh chu ka kalh ve leh thlap a, ka chet vat loh chuan ama’n thawm a chhuah loh pawhin an va hmuchhuak vat dawn tho mai.

Office min hruailuhna lam chu ka pan phei zui nghal a, mi pahnih an awm tura ka ngai chu min hruaitupa hmel kha ka hmu hauh lo mai a, an hotupa nih hmel ber chauh kha a lo awm pek a, pindan lehlamah erawh chuan thawm a la țha viau thung.

Ka va luhchilh ang nge, ngawirengin ka kal tlang mai ang aw.

Ka bag-a pawisa ka thuhruk ho kha ka ui ve deuh bawk si. Ka neihsa an lak kha chu han ui viau thamah pawh ka ngai hran lo. Lak ngei ngei ka ngaih chhan chu pawisa engmah ka kawl tlat lo. Ei leh in han lamna tur takngial pawh ka kawl siloh chuan rei ka bibo thei dawn si lova. Ka pawisa ai mahin Ka thuhruk ho kha ka ui mah zawk.

Building luhna tur gate thleng chuan ka va kal a, pawnlamah chuan kawtzawl piah lama Gate tawn tawnah chuan duty an awm tih ka va hmu thei a. Chu erawh chu an uniform ka hak ve tho vang chuan ka huphurh teh chiam lo.

Mahse, min lo biak vaih erawh chuan chuti hlauh chu a ni mai.

Office chhunglam ka va bih leh laitak chuan pakhat lo awm bera khan zu a lo in kak kak a, sawti a nih chuan a ruih hun chang ila a ni mai alawm tiin kawngka phenah chuan ka ding ta reng a, a khat tawk chuan ka bih reng bawk a, duhaiin a ruih har hmel riau mai ka ti.

Ke kham ut ut khawpa ka din hnu pawh chuan meizial țanin a la fawp khu hliah hliah mai a, ka duhaiin a rei ta. Luhkhung mai tur em ni ang?

Chutih lai tak chuan pindan lehlam ațang hian ring zet mai hian an rawn țawng lawng lawng a, chu laia awm pa chu an lo au chu niin. Amah pawh chuan ring fe mai hian a chhawn a. Ka va bih lai tak chuan zu um chu a dahțha lai ka va hmu a, an rawn lut phei dawn a ni ngei ang le. Chuti a nih chuan kei hi min hmu ngei dawn tihna a nia!

Inthiarna lam pan chuan ka tlan phei thuai a, kawngka ațang chuan ka bihthla zui leh nghal zat bawk a, chutah pawh min la rawn luhkhung hram a nih chuan duh lo teh mah ila ka hmanraw neihchhun ka thawhchhuahpui tawh mai a niang chu.

Chutia ka bih reng lai chuan tumah an rawn lang ta bawk si lo. Pindana amah awm bera chu a rawn chhuak ta zawk a, kawngka pawh kalh lo chuan pindan lehlam pan chuan a kal zui a, corridor inthlep kawia a kal liam chiah tihah chuan rang takin ka chhuak zui ve nghal a, pindanah chuan tlanlutin  ka bag chu ka ban nghal thui a, a drawer chu pawhhawn mai ka han tum a, a lo kalh thlap mai bawk si.

A karna tur zawng chuan ka’n hawi kual a, a vang pherh hrep mai.

Dawhkan chungah chuan chabi bawr khat chu a let reng a, chumi-ah chuan a awm tak mialin tiin ka han chuktuah zung zung a, pakhat chuan a mil hlauh mai le. A chetfel teh reng nen a haihawt hlauh chu a pawi zo ta a nih hi mawle.

Pawhdawh chhungah chuan pawisa a lo awm nual mai a, ka pawisa mai bakah a dang pawh a awm nual. A vain ka bagah chuan ka khung hmak a, ka kalh fell eh thlap a, chabi pawh ka bag-ah tho chuan ka rawlhlut a, ka kal vang vang thei ta.
Ka chhuak tur chiah chian pawnlama penthawm awm hi ka hre ta tlat mai pek a!
Min rawn nangching dawn tlat mai ka ti!!


Dawhkana lehkha an delhbehna (Paperweight) chu hmanrua ka chuh hman awmchhun chu a ni mai. Chumi hum chung chuan kawngka luhna tur bul chiahah chuan ka ding a, ka tum dan chuan min kal pelh chiahah a tukkhuma chhut chu a ni mai. Duhthlan tur dang nei nghal hek lovi!

Ka lo inrin pen pawn lai chuan tualzawl lam pan chuan a kal tlang daih lehnghal a! A va ho leh si ve mawle. Ka chhuak zui ve nghal thuai a, Gate a a chhuak tur chiah chu ka va hmu zui a, an țawngthawm ka hriat loh vang chuan ngaihngam takin ka zui ve nghal a, thin chu a phu țha duh dep dep khawp mai.

Thlanglama awm pa chuan radio niawm tak hi a ngaithlain ka hria, min lo ngaihven lem lo. Chhak lama duty chu a țhu nge, a awm lo pawh ka hre lo. Amah ka hmu lo hrim hrim, ngawireng chuan ka kal pel thei ta. Ka thaw huai mai.

Gate duty-in min hmuh phak lohna lai turah chuan ka’n ding det a, ka hmaa kal chhuak kha umphak mai tura hnaiah hian a lo awm a, a kal liam hun nghak ta mai lo chuan ka umthla ta a, an police station hi hmun a fal ve deuh vangin in awmna lai chu a va la hla deuh a, kutthak hnawih ve hrim hrim ka chak tlat!

A bul ka thlen thleng pawh chuan ka thawm a hre lo nge ni a lo la lehhawi hauh lova, ka thil hum rauh rauh chuan a tukkhumah ka chhu dawn nge tih vel ka ngaihtuah laitak chuan a lo hawi mai pek a! Inring viau awm tak chu ka phu zuk a, a chalah tak mai chuan ka thil ken chuan ka chhut sak a, ka nawr na deuh nge ni hnunglamah chuan a tlu zui thlawrh a, a chet mai loh vang chuan kut ka thla zui duh ta bik lova.

E, vawikhat chu a nakthawlah ka chhuih zui hram tak e.

Tuihawk luankawrah chuan ka hnuklut a, a duh hun hunah vakchhuak ve tawh mai rawh se tiin lehhawi map lo chuan khawchhung lam pan chuan ka kal nghal nal nal a.

Ka tum ber chu khawchhunga eitur va lam khawm vat a, a rang lama khawchhung chhuahsan chu a ni. Eitur nei lova han bikbo ngawt chu a kawng hmang viau bawk si lo.

Minute 5 țha lam a niang khawchhung thlenna atan hun ka mamawh tak kha.

Mahse, kei hi engtinnge thil ka lei ve anga, ka pawisa te chu India Rupee vek a nih kha mawle.

Ka bag chu ka hawng sawk sawk a, pawisa chu ka’n en nawn leh a. Pawhdawh ațanga ka țham chhuah ho chu Burma Kyats (Chiat tia lam tur) a lo ni hlauh a, heng hian ka mamawh chu a phuhru thei turah ngai ang.

Dawr lo hnai berah chuan ka lut a, nula pawh la ni lo tur, naupang lam mah hian a lo nghak a, ka duh zawng chu ka pawtthla zung zung a, dawhkana ka dah hnu chuan a man chhut tur chuan ka han signal zauh a. Nia, ka țawng ngam si lo alawm.

A chhut nauh nauh hnu chuan Calculator chu ka lam hawiin a rawn nawr tawlh phei a, hlauh mai! A zat han sawi se chuan an tangka sawina kha ka hre ve leh dawn silova buaina bawk a ni leh dawn si.

Ka bag chhungah chuan a pawisa zat chu ka han thliar ve niap niap a, a nawi chuan a daih thei ngang lo. A tlang pakhat awm chu ka pe ta ngawt a, engemaw zat chu min la kir ve tho mai.

Khawilam hawiin nge ka kal tak ang?

 Khawilam hi nge Mizoram panna tur hnai ber ni ang le? An police form ka la ha bawk si chu ka buaina a ni lehling ta zawk a, thawmhnaw dawr inhawng ka hmuh phakah a awm bawk si lo. Motor-ah han chuang ngawt dawn ila, anmahni police, an țawng kawikhatmah hre ve bawk si lo chu min ringhlel dawn hian ka hre bawk si.

Kawngsir thim deuh lai bel chuan ka kal ka kal ta ringawt mai, he khua hi ka tlansan vat a ngai tih hre reng chung si chuan tihngaihna ka hre der bawk si lo.
In pakhat kawta ka kal lai chuan an tlangbana thawmnaw inzar dal mai chu ka hmu tai ta riau mai a. Mi reh deuhna lai a ni bawk a, laklohva kalsan mai a har ka ti thlu ngang a niang kamis țial zet mai leh lungi chu ka la ta hram a.

Dar 11:00 velah chuan kawmkar ațang chua lungi nen, kamis țial zet nen chuan ka chhuak ta heu mai a. Heti chuan ka thla a ngam ta deuh e. Mi lah an reh deuh țhuap tawh mai bawk si. Dawr inhawng phei chu hmuh tur pawh a awm tawh lo. A khat tawkin mi vei vak ka hmu leh zauh țhin a a ni mai.

Harsatna lian tak ka neih chu khawilam hawia kal tur nge tih lai ber chu a ni. Teddim khuaah ka awm a, a chhehvelah eng khua nge awm tih ka hre hauh bawk si lo. Chu mai pawh a la ni lo. Khawilamah nge Mizoram a awm pawh ka ring thiam der lo nia mawle. Helai hmuna awm reng lah chu ka tan a him lo tih a hriat reng mai bawk si.

Ka hmalama motor lo tlan chu khawpawn lam hawia lo tlan a nih vang chuan khawilam pawh pawn dawn se ka chuang ang tiin ka rilru ka siam thuai a, ka bul a lo thlen chuan ka phar vat a, a ding ve mai bawk a. Kawl țawngin niin ka hria min biak kha. ‘Mizo ka nia, țawng ka thiam lo a’ ka tih chuan a nui vur vur a.

“Khawiah nge i kal dawn a” tiin Mizoțawng diktak mai chuan min han zawt a.

“Ehe, mizo i nia law?” tiin a zawhna pawh chhang ta lo chuan ka’n zawt let a.

“Ni e, khawilama kal nge i tum a?” tiin min zawt leh a.

“Ka zin kual a ni deuh ber mai, kal tumna em em pawh ka nei chuang lo” ka tih chuan mak a ti deuh nge mawni min thlek zawk a.

“Khawia awm nge i nih a?”

“Mizoram ațanga lo chho ka nia, ka țhianpa te khuaa kal tur ka nia, khawdang te ka tlawh kual pah bawk a nih hi” ka ti a. A awih hmel loh khawp mai.

“Khawiah nge i țhianpa chu a awm a?”

“Ah Law-ah”

“Engatinge, tunang hunah te chhuah i tum reng reng?”

A zawhna pawh chhang lo chuan ‘heta awm nghet hi i ni em?’ ka ti leh a.

“Ni love, Champhaia awm țhin ka nia, helamah hnathawkin kan awm rih a nih hi Company hnuaiah” a ti ve mai a. Ka harsatna hi ka hrilh mai loh chuan a ni’n min pui theiin ka ring.

“Eng lo a nia, harsatna ka tawk a..” ka tih chuan a ngawi reng a.

“Vawiin tlaiah helai police te hian min man a, Thana ațangin ka tlan chhuak a..” ka ti chiah chu a motor chu a ding chik nghal tuarh a.

“Engnge an man chhan che?” a lawm lo tih chu a hmel ațangin a lang reng mai a.

“A chhan mumal pawh ka hre. Supply phur motor chunga chuangin Teddim hi ka lo lut a, chu motor chuan Police station-ah min phur lut a, chu zawng chu ka hriat dan chu a ni mai. Thil bawh chhiat ka nei bawk si lova, Thana ah chuan phalna ka nei lo tih te chu min hrilh hre leh lawi a, min man chhan ber chu ka hre ta lo a nih chu”

“Thil tawlhruk i nei te chu a ni lo maw?”

“Nei love, chutiang lamah chuan tihsual emaw engmah ka nei lo”

“I dikloh chuan inhum kher a țulna ka hre lova nia..” a ti zui a.

“Min ring rawh. Permit nei lova ka lo lut chauh hi ka diklohna niin ka hria” ka tih chuan a bu nghat a. A motor chu a khalh chhunzawm leh ta a, ka thaw huai mai.

“Helama kan mizopui lo chho țhinte hian mi hi an ti mualpho zauh zauh a, a zia lo khawp mai. Engtia awm nge tichuan i tum a?” a ti zui a.

“Ka hrethiam lo, Thana ațanga tlanchhuak ka ni bawk sia, Police ho hian min zawn ngei a rinawm bawk sia, kalna tur ka hre chuang bawk si lova, tihngaihna tak pawh ka hre lo” ka ti a.

“Cikha-ah hna kan thawk a, chulam hawi chuan kan kal mek a, Zampi khua thleng ka dah che ang a, chuta țang chuan Hnahlan kein a kal theih in ka ring, ka la kal chiah lo a, chu chu Mizoram lam panna hnai ber a niang. |iau lama let leh i tan a chi dawn bawk si lova”

“I tih dan dan a ni mai, kei chuan engmah chin ka hre bawk si lova.., Ka lawm ngawt ang min puih theih chuan” ka ti a.

“Police lamin min  umzui em lovang chu maw. Helamah chuan Police station a awm lova, hlauh tur chu a awm lovang a, min um lo turah ngai phawt ang aw.”

A chungah chuan ka va han lawm tehlul ve mawle. Kuah nawk nawk mai ka duh hial mai ka ti!

Kawng tluan chuan kan ti ti dun a, kan rilru pawh a lo in ang phian a, ka thil lei te chu kan ei dun bawk a. Ka kal chhan leh ka thil tih zawng zawng pawh chu ka zep duh ta bik lova. Mahse, Police Stationah ka pawisa erawh ka kalsan daih!!!

Tonzang chu zing dar hnih velah kan lut a, chawlh pawh chawl muang lovin kan tlan zel a, kawng a lo te ta deuh bawk nen tlan a sawt ta vak lo.

Kawngpui ațang chuan Alkatra luanloh kawngah kan peng leh a, Zampi kan thlen chuan zing dar 7 vel a ri tawh a. Khawlaia naupang dul rang rik rek lo in um kual zawr zawr, motor lam lo melh hru hru mai te chu tlan pelin khaw chuanhnuai lam chu kan pan zel a.

Motor khalhtu chuan Kawngsira patling lo ding pakhat chu anmahni țawng chuan a han bia a, kawng chu a mumal vak tawh lo a niang, an lui kalna kawng chu a awm a, Mahse, Mizoram lam chu kawng a mumal vak lovang, kan kal ngai lo an tia” a ti ve zui a.

“A, Mizoram anih hrim chuan a pawi lo, kan rink al ang a, kan pawh ve mai ang chu” ka ti ta ngawt a. Kawngdang inkawhhmuh hun pawh a ni tawh lo.

An khaw thler zaulaiah chuan motor chu a ti ding a, “Kal rawh le, peng thleng chu ka lo thlah ang che” a ti a, Police ho boot leh Lungi nen chuan ka pen chhuak ta kha a nia, min hmu duh hlawm kher mai.

Peng awmdan te chu min zawh sak bawk a, Rs 1000/- ka pe a, lak a tum lo viau nain lawmthu sawina a ni ka tih tlat vang chuan a duh lo chung chu ka bel lui a, tichuan lawmthu hrilh mawlh mawlh chung chuan daitam lam chu ka belh san ta a.

Khua ka chhuahsan fel zawt tihah chuan ka lungi hak chu  phelhin ka bag-a police kekawr chu ka la chhuak a, chu chu hain Lungi chu ka lu tuam na’n ka hmang a, helpawl tlachhe lam te pawh ka an hmel hi ka tia!

Kawng lah chu a’n hahthlak khawp a, bawng kawng rau pawh tia lo tur, khawilam lam pawh hnimin a bawh lek luk mai hlir a ni a, ding ngil chung pawhin ka kal hman meuh lo chu a ni ber mai. Lui pakhat ka thlen chuan ka inphih harh a, ka thil ah ho te chu ka’n ei leh bawk a.
Ka eihnem deuh a niang ka ek a chhuak ta raih mai le!

Kawrkama lungpui zawl zau deuh laiah chuan ka inhlip sat sat a, duh lai laia e ngawt thei pawh ka ni lo, ka ekchhuah tur hi a hlu em a sin!

Duhtawk ka san thlak hnuah chuan inhak țhat ngam ni nghal hek lo, kekawr pawh pawt chho lo chuan tui lam pan chuan ka kal kak thla țai țai a, ka mawng te ka sil zawh hnuah chuan ka ek hawlhpherh tur chuan lungchungah chuan ka kal leh ta a. Meichher bung chu ka lek va a, a uih phian awm sia leh!!

Phelhsep pakhat chu meichher ațang chuan ka pawt dawk a, ka ek tum inchhawng țha fe mai chu ka han hawlh țan ta kha a nia, hetiang thil hi kan kawchhungah kan pai reng chu a ni sia, kan lo va pai uih em em ve mawle. Ka lu hrenna chuan ka hnar chu ka hup ta ringawt a. Uih vet vet bawk em alawm mawle.

A hnuai lamah chuan ka hawlhchhuak ta hram a, engtinnge ka tihfai tak ang aw..
Phelsep chu ka vaw keh a, chumi chu kuai kakin ka chehtir a, tuilam pan chuan ka chhuk thla leh a, eng emaw chen chu ka’n chiah vang vang phawt a, chutah leiah dahin vut nen chuan ka raphrual nek a, a hma ang bawkin tuiah bawk chuan ka chiah leh a, a fai deuh tawh chuan ka hria, ka kut chuan uluk takin ka sil ta hauh hauh a.

Ka lungi chu zaithlerin uluktakin ka tuam a, ka bag penga ka dahțhat thlap hnuah chuan Mizoram lamah chuan ka per kai zui ta nghal a.


___________           __________
            KA NAKRUH BO



               Chapter-XVIII



Tlangsang tak lawn liam ngai a awm hran lem lo bawk a, muangmarin; hahdamin ka thleng thei tho tura ka ngaih vangin ka hmanhmawh vut vut lem lova. Zawi awiin ka kal tihna phei chu a ni law.

Zampi ațanga boruaka han thlir khan khawthlanglam, ngil taka hawi chuan veilam deuh hretah Hnahlan chu a awm an ti kha a nia. Chumi zawn chu ka rin chhui ve ngat ngat mai a ni.

Thingkungah te chuan ka'n lawn kang leh rih a, khua awm reng reng pawh ka hmu lo ka ti.

Khua a lum phian bawk si, chawhnu her zawt, dar 2:00 chho velah phei chuan ngan tak a ni. Ngawhnuaia kal fuh chang chu awm bawk mahse hnimpik tawn chang a tam zawk bawk si. Lunghmuna chhuah fuh hlauh țum phei chuan mangan thlak tak a ni.

Chau viau mah ila Zorini awmna lam panin ka kal a ni tih ka hriatna chuan chakna min pe țhinin ka hria.

Engtinnge a awm ang? A bula awm tura min mamawh ngawih ngawih lai khan ka tir haw a, hnemtu leh thlamuantu a mamawh em em laiin ka kalsan si..

Zorin, ka lo kir e, ka kalsan tawh lovang che.

Ka chau ta viau mai. Eitur ka pai lah ka eizo vek tawh bawk si. Heti ringawt chuan tu khawkha hriat lovin ramhnuaiah ka thi tlaw ringawt dawn a sin. Engtinnge niang? Chuti ringawt chu a ni thei lovang. Ni, chutia chauva thi tlaw ringawt thei ka ni lo asin.

Kamram tur eng ilo fahran pawh hmuh tur a awm bawk si lo. Khua chuan turin thingkunga han lawn tak ngial pawh ka peih lo chu a ni ber tawh e.

Ni chu la tla em lo mahse a dai ruai tawh, heti ringawt a nih chuan khuain min thimhnan tak ngial dawnin a lang ta!

Reingial ka kal leh hnak hnak hnuah chuan thil khawng ri kauh kauh awm tak hi ka hre tlat hian ka inhria a, ka bengchheri mai a nih ring chuan ka bengte chu ka han hup a. Mahse, ri ka hre tlat.

Talhkhuang khawngri ni berin ka hre ta!

Chuti a nih ngat zawngin Lo ka hnaih hle a nih ka ring a, thawm awmna lam chu ka pan zel a, a reh zui daih leh nghal a!

A hnuah chuan mihring kûk raih raih thawm ka hre zui ta nghal a, ka lawmzia mai chu e, beng thleng thlengin bawp ka khai lo chauh a ni. Ka zawi em mai pawha khai thleng zo dawn chai hek lovi mawle.

Kangfim ram, luang chawrbuk leh hluah tawhna te ka thlen takah chuan khawchhung thleng tluk hialin ka lawm tawh in ka hria. Taksa chau viau mahse ka rilru erawh a harh viau tawh.

Ran thlahna atana itawm tak tak, luang leh hnimhring han chawrno hlup mai te chu thlir satliah mai tur chu ni se an mawi viau ta ve ang. Mahse, luhchilh a, paltlang ngai ka nih miau vangin min tai thip sup sup tawh mai a, an mawi khawp mai ka ti hleithei meuh lo a ni.

A kara hruiduk lo inzam lah hmuhlawk a har hrep a, ka inpalh leh nuaih țhin.

Lo chu ka hlat lo viau a ni tih hriat takin mauhmun kar ațang chuan lo chunglam boruak thawl tak chu a lang deuh zauh zauh tawh a. Hmanhmawh har viau mahse ka rilru erawh a hmanhmawh a ni.

Lo ka chuang chhuak tur chu ka hma tak maiah chuan chhehrawp pik bawn zet mai, hruiduk leh luang me-in a bawm luk mai chu a awm mauh mai a, kalkhan dang avang bawk si. Kal tlang chu a chakawm loh viau a ni. Ka hmanraw ken lah chu serțawk khehna awm tawk vel lek a ni bawk si.

Engtin tin emawni harsa zet chuan ka lawn liam thei ta hram a, sawhthing hmun, kanghreng niawm takah chuan ka chuang chhuak ta hlawl mai a. A va nuam em.

Ding meuh chuan boruak chu ka han hip vang vang a, thla a ngam ta siai siai mai.

Ka hnaih ber thlam lam pan chuan ka kal zui nghal a, buh pawh leițha lai deuhah phei chuan khup an hawlh fur tawh ang tihtur an ni tawh a, kawrzai remchang lai apiang chu maian in a khuh hring hlep hlup mai bawk a, thlir a nuam viau mai.

Thlam ka thlen dawn laitak chuan a chhunglam ațangin patling pakhat hi a lo chhuak mek a, min han hmu chu a phu deuh zawkin ka hria. Keilah chuti ve tho bawk.

Mi biak mai nachang pawh hre lo chuan maktih hmel zet hian min en a, 'i haw dawn chiah em ni?' ka ti thuai a.

"Nia, hei haw ka lo tum mek a, khawnge i kal a?" a mak ti hmel chu a la reh fel lo!

"Burma ram ațangin ka lo chhuk a nih hi, kawng mumal a awm bawk si lova, ka rawn rin kal ve tawp a, he laiah hian ka lo chhuak ngawt mai a nih hi" ka ti zui a.

"Burma ațangin a!?"

"Aw ni e"

"Engati tehdaih nge?"

"Ka han zin chho deuh mai mai" ka sawi chu a awih hmel fahran loh khawp mai.

"Eitur engemaw i nei mial lo maw, ka țamchhawk lek lek a..." tlawm leh zah pawh dawn lo chuan ka ti zui zat a.

Thlam kawngka a khar zet tawh chu hawngin a lut zui a, a hnungah chuan ka zui ve nghal mai a.

"Eitur ava vang awm ve aw...Chawnawi lah kan lo thehthang hman bawk si. Thingpui kan chhuang mai ange aw. Chini ala awmin ka ring" tiin Mei chu a nun zui a.

"Ka va tibuai che ve mawle" ka'n ti ve bawk tak nain ka rilțam chuan khua ka hmu lo mah zawk chu a ni bawk si.

A iptepui ațang chuan banrêk pawh tia lo tur fanghma no hi a lachhuak a, 'kha hei hi lo eirawh, kawruak lutuk te pawh a dawm deuh ang chu' tiin ka lamah chuan a rawn theh phei a.

A rawn ban leh thut mai ang tih ka hlauh vang pawh ni lo chuan ka la rang kher mai. 'Țam tawk a piang a tui' an tih chu a lo dik kher mai! A mawngkha zawng zawng pawh ka fai miat mai a, pek manhla tak tur chu ka ni.

Tuithawla tui chu fenthlirah chuan ka han thli a, chu erawh chu ka inhnem ngam ta lo, thingpui in leh tur ka nih vang te pawh a niang.

"Khawia awm nge i nih a?"

Kan khawhming te chu kan sawi zet a, min ringhlel tlang mai dawna a lan vang chuan tihian thilawmzia ka hrilh ta law law a.

"Ka țhianpa nu tlawha kal tum ka nia, check gate-ah duty ten lehkha min ziah sak a, chumi kenga kal mai chu ka nia. Mahse Teddim ah police hovin min lo man a, tunlaiin khilai bawrah khian misual chetla an lo awm nge mawni, kei ID pawh keng ta lo chu man awm tak ka ni aniang chu mim hreng ta a, jail-ah min dahlut mai dawna ka hriat vangin remchang chuhin ka tlanchhuak a, mizo pakhat kal remchang motor hmangin Zampi thleng ka kal a, tichuan chuta țang chuan kein helai hi ka rawn pan ta a ni. Motora haw ngam a ni tawh bawk si lova" ka ti a.

A awih ve tawh em ang chu.

Thingpui chu a chawk rak rak a, min rawn pe zui nghal a.

"Tichuan inkhawlama haw tlang i tum em ni?"

"Aw, ti ila, Aizawlah ka nupuiin min lo nghak a, ka lam phawt ang"

"A nih tak chu. Ka han hmuthut che kha police uniform te i ha deub roh bawk sia helpawl an lo chhuak ta mai emaw ka ti hman alawm" a nui zui hak a.

Kan boruak pawh a zangkhai ta.

Thingpui ka inchhung chuan eng engemaw sawii  kan ti ti dun a, a bula awm a lo nuam phian mai a. Pa țawng duh leh titi thiam tak a ni.

Thlam kan chhuahsan lai chuan 'Hmelhriat te i nei em kan khuaah chuan?" a ti a.

"Nei lem nang. Ka vawikhat kalna tur a ni"

"Chuti chu kan kawmchhak te inah i thleng dawn nia" a nui tut tut a.

An thlawhhma chanchin te, an khawchhung chanchin te chu ngaihnawm fe mai hian a sawi a, tute emaw angin sa kapthei tak ang chuan a in sawi lem lo.

Khawdai kan thlen meuh chuan unau hmelhai hun a hnai thuak tawh awm e. Ngaw hnuaiah phei chuan hai mai chu sawiloh a vun thim lam phei chu kan insu churh churh tawh ngei ang tih tur hi a ni tawh a. Keimah vanga chutia a khawtlai chu ka inthlahrung ve angreng viau a. Sawtna phei chu a awm hauh lo ang a.

Ka rin loh dan deuhin khawthleng hawizawng chu a lo awm a, chhuneng ang emin lang lo mahse a awmdan chu a ngaihruat theih ve mai chuan ka hria.

Ka hmaa kal hnungah chuan ka zui ve dat dat a, an in lah chu kan thleng mai dawn maw tih hnuah kan thlep kan thlep a, rinaiin khawdung kan zawh rei phian leh ta nghal a.

A tawpah chuan kan thleng ta, an kawmchhak te ina min thlentir țalh chu a tum bik em lo turah ngai ang.

Inchhung kan han lut chu mikhual tih takah ka zum lut ve dai hian ka hria.

"Tinge i lo va haw tlai ve a vawiin chu, kha țhian i nei ni maw?" tiin tapchhak hawl mawlh mawlh pah chuan nuber niawm.tak chuan ka kalpui pa chu a lo chhawn a.

"Nia hei, burma helpawl a mi ka man a, min ti khawtlai zo ta vek alawm mawle" amah lah chu a nui duh mang hlek lo lehnghal a! A va han ngeiawm mai mai tak. A chhungte chuan an awih angem le tih ka ngaihtuah mek lai chuan tuidehna lam ațanga insum tak nui ri deuh țhat hi ka hria a, ka han hawi chuan nula dawlhkai zuah mai hi a lo nui dir cher cher mai hi a lo nia.

Za lo zet chuan ka țhen ve tak ngawt kha.

"In inbual hmasa dawn nge chawei kan siam dawn?" tiin nuber chuan a han rawn leh a.

"Siam mai rawh u, kan burma pa hi a țamchhawl lo chauh tawh ang. Khilamah vaimim chhum kawi vel bak an ei ngai si lo, chu pawh khamkhawp eitur an nei awm bawk si lova" a va mak teh fo e aw, an chhungkua hi an chimawm dawn tlat. Mi fel tak an ni ngei ang.

"Engti tia rawn inchhawmlut nawlh nge maw in nih le?" tiin min zawt zui a.

In neitupa chuan min chhan khalh hlautak chungin kan melh hmasa te te a, ka rin ang ngei chuan 'ka man ka tih chu maw aw' a lo ti leh hram pek a!

Zanriah kan kil lai chuan thutak deuh zawkin ka chanchin chu mumal takin ka sawi ta a. Mak an ti kher mai!

An fapa tlangval phei chuan mi hi an ngaihsan hmel khawp a, zawhna min zawt reng mai a, rilțam nen, zawhna chhan nen.. ka indaih meuh lo zawk chu a ni.

Zanriah eikhamah chuan an tlangval nen chuan a tuklama Aizawl lam pana ka kalna tur motor ngaihvenin kan chhuak dun a, ticket te kan va tihfel hnuah zanlama vawk phur thla tur motor kan hmu leh lawi a, kan han biak takah chuan anni pawhin rem min lo tihsak ve mai si a, zan la la a chhuk tur chuan ka inbuatsaih leh ta chûk chûk kha a nia.

Kawnglakah kan tluang viau a niang keiphei chu ka riaklut hi a ni ringawt mai.

Zing khawvar fel zawtah chuan Aizawl chu kan lut a, bazar lama an vawkphurh ka dah fel pui hnu chuan kan inluah lam panin ka chhuk ta hnak hnak a, Zorini hmuh mawlh a ni ka nghahhlelh tawh ni.

In ka han thleng chu tumah an lo la tho lova, kawngka chu kikin ka u te chu ka han au dât dât a, a fapain a hnu deuhah chuan a rawn hawng ta nge nge a.

Kan khum lam pan chuan ka kal thuai a, puanzar ka han hlim chuan Zorini awzawng a lo awm lo mai ka ti!!

"Bawiha khawnge i pitei?"

"Â pu a lo chhuk a, niminah an haw chho" a ti mai a.

"Ka pa maw!?"

"Aw..â pi nen"

Deuh deuh chuan a, engnge maw awmzia le.

Engpawh ni se,haw han tum ve nghal ngawt dawn ila motor a chhuak daih tawh awm bawk si, muzal phawt mai teh ang.

Naupang ho an bengchhen em vang chuan mutrei theih pawh a ni bik lo. Tukțhuan an kil rual chuan ka va zawm ve hman ta thova.

"Engmaw i han tih ber?" tiin ka u chuan min zawt a.

"Mi sum dahțhat ka han la"

"Engnge awmzia?"

"A dahțha tupa hian laksak a, a nu pe turin min tia, Mahse, an police ten min man kawirawi leh bawk sia, ka pe ta lo mai. Duh leh remchangah a ni tawh mai"

"Tunge chu chu?"

"I hre ve lovang a boral tawh"

"Engzat nge a?"

"Ka hre bik lo, a awm ve nual mai. Engtikin nge ka pa te chu an lo chhuk a?"

"Nimin piah a mi bawiha, ni lo, a piah leh zawk a niang"

"Engtinnge an tih kan chung chang chu"

"Sawi vak pawh an nei hran lo. Zorini bulah kha chuan 'khilamah chho phawt ila, i nu te pawh an nem deuh tawh ang,an la phalloh cheu leh i haw lo tawp anga nimai' te chu an tih kha. Harsatna a awm hran lo a niang"a ti mai a, ka thawl huai mai.

Chhun lamah chuan hawnchhoh tur mamawh zualpui leiin ka  tei chhuak a, khua a lum bawk nen ka teirei peih lo kher mai. Sum lah ka ngah tawk bawk a, burma kyats thlengin ka la kawl a nia! Engemawni hi chu ka la hum thei turah ngai ang tiin ka buaipui zui duh lem lova.

Ka țhian țhenkhat te erawh chu ka tlawh hram hlawm a, engtikah tak intawng leh ang i maw.

A tukzing varțianah chuan thovin nghakhlel taka min lo thlirtu awmna kan vangkhawpui lam pan chuan motor seat hnungberah chuan chuangin kan in sawh chho ta nawk nawk hlawm kha a nia.

Kawng a thui ber țum a ni hialin ka hria.

Ni suk chen vel ala awm ang tih hun awmvelah chuan kan khua chu kan thleng ve ta hram a, ka haw tur ka chhungte ka hrilh lawk lem lo bawk a, min lo hmuak turin ka beisei hran lo. Sawilawkna tur hmanrua lah a awm hek lo.

Ka haklai leh ka thawmhnaw tlem nen chuan kan inlam pan chuan ka kal lauh lauh a, zuan a zang thauh thauh tawh khawp mai.

Thawm pawh chhuah hmasa lo chuan kawngkhar chu kan pawt hawng hrawk mai a, ka nu dawhkana chawhmeh lo chan mek chuan 'e he' a lo ti ringawt a. Mi han tihvak ngaihna a hre lo. Nu țawngkam thiam tak kha a ni lo ve bawk a tin ni.

Ka bag pawh nghat lo chuan "Khawnge Zorini" ka'n ti nghal thawr a.

Ka nu chuan pindan lam chu a kawk ringawt a. "A inbual zo chauh a, a inthlak lawk a niang"

Pindan lam chu ka pan nghal a, Zorini chu towel bih chuan khumah a lo țhu a, a taksa chu eng engemawni a lo chulh vel niin ka hria.

Min han hmu chu a dung hluai a, min rawn kuah chûk chûk a. Awmngaihna a  hre meuh lo niin ka hria. Keipawh ka hlim a, ka lung a awi tak zet a ni.

Mittui luang ngiai ngiai chung chuan min rawn fawp vawng vawng a, 'ka ngai tawh lutuk che' tih pah chuan nghet zetin min kuah a, ka khabe hnuaiah chuan a hmai chu a phum tlat a, mi nawr chêk chêk niber hian ka hria.

Kan inthlah hleithei meuh lo chu a ni e.

Zanriah kan kil lai chuan ka pa chuan "Hetia i lo thlen ve tawh rau rau chuan nakzan lamah Zorini nute hnenah i Pu Mawia te va leng rang sela, hetia thil invialchial rei lutuk hi chu a țha ngai lo" a ti a.

"Harsatna a awm tawh em lovang chu maw, țha tetein a kal ve tawh em ang chu" tiin ka nu chuan a lo tuihnih ve bawk a.

Țhenawmte an lo chuang kai țak țak bawk a, mothar lawm ang mai chuan kan ri ve hat hat a. Rilru pawh a nuam viau e.

Zanlaia ka țhangharh chuan Zorini chu kuah mai ka han tum a ka dap fu ta hauh lo mai a, khumtlang ka dap thlen thleng chuan a taksa ka la dap fu tlat lo!

Ka tho thui a, light chu ka han ti eng a, pindan chhungah pawh chuan ka la hmu mai lo cheu mai ka ti! A inthiar nge mawni le.

Choka lam pan chuan ka chhuak phei nghal thuai a, bualin lah chu a lo thim țhiap bawk si. Mang a ang ru deuh tlat tawh!

Pawnlamah a chhuak nge mawni le tiin kawngkhar lam chu ka pan thuai a, ka rin ang ngei chuan a lo inkalh lova. Hmanhmawh deuh chuan ka chhuak zui nghal thuai a, pawn chu thla a lo eng kulh mai a, boruak a dai duk mai bawk si, a nuam viau mai.

Mahse, khawnge Zorini ber chu?

Kawtlaiah chuan ka hawikual ruai a, kan kawtzawl kina Lamkhuang buk hnuaiah chuan Zorini niawm tak chu ka va hmu a, a lam pan chuan ka kalphei nghal thuai a, amah ngei chu a ni e.

"Zorin..."

Min chhang lo chuan ka lam chu a lo hawi a, a dinghluai ringawt a.

"Engngatinge hetia i awm a?"

Min chhang mai ta lo chuan a kun daih a.

"Harsatna i neih chuan sawi ta che, hetia awm ringawt tur a ni hleinem" ka ti leh a.

"Chhuante, ka awmdan hi ka duh bik lo a sin. Mahse, ka tidanglam thei si lo a ni"

"Eng thil nge chu chu..?"

A ngawih leh vang vang hnuah chuan "I tana harsatna thlentu mai nih hi hrehawm ka ti a ni" a awchhuak chu a zuai raih raih khawp mai.

"Harsatna engmah min thlen hleinem, i kianga ka awm hian ka hlim em em asin"

"Keipawh ka hlim țhin alawm. Mahse, hei hi..." a dul chu a tuai zauh a.

Ka lama pawh hnaih pah chuan ka han kuah zui a. "I harsatna tawh hre reng chungin a lawm ka hmangaih che. I duhreng vanga thil thleng a ni lo tih kan hriatpui che kha, sawinawn a ngai tawh hleinem" tiin ka hnem a.

"Chutiang chuan ngaihtuah luih hram ka tum țhin a, mahse, i chantur ka ngaihtuah hian ka lung hi a awi thei ngang si lo a ni"

"Ka hmangaih che, chu chuan nangmaha engkim kha a huam vek asin. Engmah a lungngai zawngin ngaihtuah reng reng suh" tiin chu zan chhawrthlapui eng hnuaiah ngei mai chuan lungchim takin ka fawp vawng vawng a.

A tuk nileng chuan kan in awm a ni ber mai. Chhuan pawh kan chhuak lem lo.

Zan lamah chuan "Sikul thil tihfel tur ka ngah riau mai ka inkhawm lo mai ange" a tih vang chuan kan țhutkhawmna pindan lamah chuan a inchhawp hnawk hle a. Ka nu erawh inkhawm turin a insiam thung a.

Ka nu chhuah hnu deuh lawkah chuan "Lalvala lengah ka va sawm teh ang" tiin Zorini pawh hruai lo chuan let leh mai tumin ka chhuak a. Lalvala a chhuak hman lo turah ngai ang.

Biak in kawt lama chhuah chhoh a ngaih vang chuan inkhawm kal tur ho rual a kal chu a nuam awmlo mange aw kan ti zet a. Mahse, ka chhuak ve laklawh tawh bawk si.

A haw vanglai tak maia kal ngauh ngauh mai chu a nuam mawlh lo. Inkhawm lo tur tih hriat fe hian kekawrbul ka ha tau mai bawk si.

Biak in sira zunin bulah chuan ka ding ta ringawt a. Han kal reh phawt teh se tiin zunin hliah thim deuh laiah chuan ka țhu ran a.

Zun zung lah chu an insulpel deuh sek bawk a. Min hmu lem lo mahse a ninawm ve hrim hrim.

Inkhawm țan dar a ri țep tawh ang tihah chuan phun deuh ser ser thawm hi zunin chhungah chuan ka hre tlat mai pek a!

Nula leh tlangval tawm tur an ni ngei amg le. Enthla kiau teh ang.

Ka rin aichuan an phun rei a, an inhnial niberin ka hria. Thla chhuak tawh se chuan anmahni pawh ka hmu thei ng mawle. A la thim mup mai bawk si.

Inkhawm țan dar pawh a ri ta hial a, chu ri chu ka tan malsawmna a ni ringawt mai. A chhan chu a hmaa phun ser ser chauh kha mi veivak an awm tak lovah chuan țawngkam pangai ang em chuan in  be lo mahse an awki a ring ve ta deuh a.

Zunin bang si chet chuan ka va ding hnai ta a, an țawng chu bang phenah chuan ri deuh bel bel chuan ka va hre thei ta a. A mipa chuan tihluih a tum ang a, a hmeichhia chu a lo țang ve deuh ni ngei tur hi a ni. Zunin bang chu a rawn puar leh deuh pap pap țhin a, a țawng hmangah chuan a mipa chu a hlawhtling lo niin a lang tlat.

Chutia mi thawm ngaithla a, anmahni pawh hmu thei mang silova awm chu a zia lo ka ti viau mai. Tin, a ho deuh hrim hrim bawkin ka hria.

Kalsawn mai ka tum lai chuan ka bengverh zet mai țawngkam ka hre ta tlat mai a, ka beng chu ka'n dawh țha leh hnuhnawh a.

"Hetianga awm tur pawh hi kan ni lo" ti tu chu ka nu rawl a ni tlat mai le!

Ni, ka nu aw ngei a ni. A va mak em!

A mipa pawh chu tudang ni lovin Pu Hrangkima ngei a nih ka ring. Hetiang hian ka nu nen hian an lo inhmu țhin tihna em ni? Kawppui nei reng chung hian an lo la inzui reng ang maw!? A mak tih mai loh chu sawi dan pawh ka thiam lo. Ka rilru chu vih ang maiin a na hian ka hria.

“Ka duh lo, min tilui suh ka ti a ni lawm ni” ka nu chuan a ti leh a.

“Ka duh dan i tihhlawhtlin theih loh chuan i duh angin thil a kal bik lovang”

“Nutling patling kan ni tawh, kawppui nei lo pawh kan ni lo heti mai maia awm tur hi kan ni lo” ka nu chuan a ti hlak hlak a.

“I duh loh leh i thu a nia, i duhdan dan chuan i awm thei alawm, i fate hmakhua i ngaih leh ngaihloh a ni mai a”

“I rilru chhiat luat vanga tunah pawh innei țha lo an nih hi. Ka fapa hian chu thil chu a hre vek tawh, kan inkar pawh hi zep lovin ka hrilh vek. Inneih phal lo tu pawh hi nangmah i ni tih hi a hre chiang viau, nangmah hi inngaihtuah fel zawk rawh” ka nu chuan a ti leh hmak a.

Ka lo insehruh nasa tawh khawp a.

“Ka duh chu min tihhlawhtlin tir mai rawh. Tichuan engkim a kal tluang vek ang” a la ti cheu ka ti. Ka insum theihna hian a va han tlin lo teuh țhin ve le.

“Nanga duhthusam hi uirenain ka thleng anga maw, a teuh lo mai. Ka fate hi ka hmangaih, ka hmangaih vanga ka uire phah kher nachhan tur hi ka hre lo”
|awng thawm a awm ta lo. Mahse, Pu Hrangkima chuan tihluih a tum a ni ngei ang thawm awmdan a țang chuan.

“Ka au vak dawn nia aw”

“I duh leh au la, tunge mualpho zawk chu kan hre mai ang chu”

“Hrangkim, mawl suh..i a emai…” ka nuin a tih lai chuan a ni lo ta deuhin ka hria a, chiang leh fiah zet chuan bang bul maiah chuan aw ka han thian khak a. An thawm chu a reh chiang kher a sin.

Reife chu an ngawi vang vang, kei lahin ngawirengin ka ngaithla kar mai bawk a. Anni lah rawn chhuak ngam hek suh. Ka kalsawn ang nge, an chhuak ka nghak dawn aw.

A hnu deuh lawkah chuan ka nu chu puana lukhuh chung hian a lo chhuak a, a kal nghal vang vang a, kan inlam pawh chu a hawi chuang lo ka ti.

Rang fe hian ka inthiar fihlim nghal a, ka nu kalna chin enzui tum chuan a kual lam lamah ka tlan chiam a, ka va hmuh chuan kan inlam hawi chuan a kal tho mai. A haw tlang dawn a ni ngei ang. Chuti a nih chuan kan ina ka awm loh chuan a fel lo hle si ang le.

Hmanhmawh zet chuan kan inlam pan chuan ka nu thlen khalh hman ngei tumin ka kal zui nghal a. A thlen pawh ka thlen khalh ngei reng bawk a. Ka lut lai vel chu min hmu hman bik lovang.

Kan pindan lamah chuan ka lut zui nghal a, Zorini khuma mu chunga lehkhabu lo chhiar chuan ‘I lo va kir leh hma ve’ a lo ti a.

“Ka la kal lo, țhenawmah ka kal hmasa lawk a” te ka ti kual ta vel mai mai a.

“Kal tawh lo mai rawh aw, mu mai ang” nui ver ver chungin a tih ngei kha.

Khuma ka lawn fel ve zawt tihah chuan ka nu lo lut thawm chu ka hre zui a, ka pa hnathawk nen chuan an inbia a ni ngei ang. Engnge an sawi chiah pawh chu ka han hre pha law. A hnu lawkah kan pindan kawngkhar chu ka nu chuan a lo hawng zui a. Ni, ka awm leh awmloh a rawn endik a ni ngei ang.

“E nu, i inkhawm emaw tia?” Zorini chuan a lo ti thuai a.

“Nia, ka pum a nuam lo deuh a, ka rawn inthiar a, ka kal tawh lo mai ang” a ti zui mai a. Zorini phenah chuan muhil der niawm tak hian ka lo awm lui tlat a.  Zep nak emaw ka nu mah nise ka lai a ti na thlawt a ni.

Lehkhabu chu dawhkanah chuan a thehphei a, ‘Va zung ila, i chhuah dawn loh rau rau chuan mu law law ang”  a ti a. Ka zui lem chuang lova.

Ka nu khawsa zia chuan ka rilru a luah tak zet.

Engtinnge hetiang kumah, pasal nei chung lehnghalin midang ala hmuh theih le. Chu pawh mi pawmlai lehnghal! A rapthlak lu hret chuan ka hria a ni. Mahse, a țawnghmangah kha chuan a uire em lo chu a la nih hmel kha maw.

Nutling pui, inkhawm tura chhuakin mi pa han hmuh reng reng mai chuh! Mualpho te pawh an hlau lo em em lutuk deuhin ka hria.

Ka t-shirt haklai chu Zorini chuan min rawn hlihsak mawlh mawlh a. Min kawih ang ang chuan ka lo awm mai a. “I kekawr hi thlak angai em?” a ti zui a.

“Ngai lo mai rawh se. Pakhat kha in su daih bawk sia” ka lo tih sak a.

Mi kuah cheih cheih chungin ka bulah chuan a rawn mu a, a lama min kawih pah chuan dimtein min fawp dai dai a. A mood-ah ka cheng meuh lo chu a ni e. Ka nu vang vek a ni.

“Chhuante, i awmdan a dik miah lo a nia, na i nei a mi?”

“Nei love, ka țha alawm”

“Aih, eng emaw dik lo a awm alawm”

“Engmah ngaihțhatlohna tur a awm hleinem, ngaihtuah buai suh”

A inbeng kang a, a țhuchhuak zui a.

“Keimah vang a niang tiraw..?” min endan chu a lungngaih hmel kher mai.

“Ni lo, chutiang engmah a awm lo ka tih chu”

“Nih leh engatinge khatiang khan i awm si…?”

“Engtinnge ka awm vak a..?” ka tih chuan mi chhandan tur a hre leh bawk si lova. Ni, ka nu khawsazia in ka rilru a luah em vangin ka nupui  Zorini lakah rilru ka lo pe tawk lo deuh a ni tih chu ka hrechhuak zawk a. Mahse, thil zawng zawng hrilhfiah kher chi a ni bawk si lo.

A darah chuan dimtein ka kuaimu a, a chala fawh zeuh pah chuan “Harsatna in siam belh țhin suh. I rilru i tih paukhauh deuh a ngai a ni. Engemaw ni hlekah inngaih bel zel lo la, khati a nih chuan i hahdam thei ngai lovang” tiin keima lam zawk chu ka inthup bo ta daih a.

“Ka lawm e, nang kher hi ni lo la chuan khawvelah hian ka awm tawh dawn lo a nih hi. Ka hmangaih che” tiin min hmangaih zia chu a chetdan chuan a lantir chhunzawm zat a!

Ka nu leh pa chuan palai pangai taka tirh leh chu an duh mai a, keiber hian ka duh ta tlat lova! A chhan pawh ka nu te boruak vang kha a ni. Ka chhungte thu pawh ngaichang lo chuan mahni thu thuin Zorini nu chu ka lo va berawn a, “Palai pangai pawh kal tawh lovin man kan rawn khung tawp mai ang” tiin dil ti tih, rawt deuh bawk si hian ka va sawi a. Ani pawh chuan a lo hrethiam khawp mai. Rem a tih thu min hrilh ve hlauh kha.

‘Inneihna senso hautak vel tur kan pumpelh a ni mai lawm’ tiin ka la tlip zui zat a.

Ka chhungte bula ka sawi chuan an ngaihdan a ni chiah lo tih a hriat reng mai.
“Kan fapa neihchhun i nia, mo kan neih ve chhun tur a ni bawk a, chuti ringawta han tih chu mi ngaihah pawh a mawi dawn mawni em em le” ka pa chuan a ti a.
Mahse, a neitu tur berin duh ka thlan tak miau vang chuan ka duhang chuan man te chu kan va khung fel mai kha a nia. Tih bung bung hi inneih ropuina leh inneih nghehna a nih pawh ka ring chiah bik chuang lo. Ho lam taka kan tih vang kher pawh ni lovin.

Tichuan, nupui chu ka nei fel ve ta.

Remchang hmasa bera Burma rama zin rel chung chuan kan lawițhat zan ve chu amtakin kan khawhral ta mai mai a….


                  _A TAWP TA_

©__________[ɐʞızɹɐp]___________®