KA NAKRUH BO -I

___________           __________
        KA NAKRUH BO -I
            (Chapter 1-9)


   
         

                  Chapter-I

Kan khaw zirlai pawlah Secretary ka nih vangin kumtawp a hun kan han hmang tur chu ka vir buai hle mai a, Aizawl ațanga ka haw chhoh dawn ata tawh mamawh leh țul hrang hrangte ka buaipui tawh bawk a, ka’n haw chho ta cheng a buai reh tih a awm chuang lo, mamawh tur hrang hrang buaipuiin ka hmanhlel leh a, ka thiante ho an lo la haw kim ve bawk si lo. A țhen Aizawl lam a mi te kan han inchah leh nawk nawk bawk a.

BA IIyr ka exam zo chiah a, midang aia ka zawh hma deuh vanga hawchho hma ta deuh ka ni. Karhnih dawn ka awm hnuah chuan zirlai dangte pawh chu an lo haw khawm ta nak nak a, December ni 22 zana Zirlai pawlin hun kan hman tur mawlh chuan kei chu min la tibuai a, midang han buai tur tehchiam an awm bawk si lo nen chuan a buai theihna lai zawng zawng chu min pa pek a ni ber mai a.

A hun a thleng ta.

Hun kan hmang nuam ve thawkhatin ka hria, kan tualchhunga zaithiam kan neihho te an zai a, fiamthu thawh pawl te nen, request hun te kan hawng bawk a, keipawh fiamthu thawh turin min request leh pek a, ka’n tih leh chiam pek kha!

Zirlai hlawhtlingte lawmpuina hun kan hman lai chuan Pawl 12 pass zingah ka mit la deuh ka hmu fu ta hlauh mai a, tunhma pawhin ka hmu fova eng he huah ka ngai ngai lem lo. Tunțum chu khawdang ka hawisan hleithei der lo nia mawle.

Amah chu Tuikhur kawng lama mi, a nuin a hmeithaipui, unau pathum hmeichhia hlir an ni a, an chhungkaw khawsak phung eng ang nge chu ka hre chiang lutuk hran lo. Hmundangah lehkhazirin a awm ve tih reng reng ka lo hre lo bawk a.

Kha hun kan hman ațang khan tihtakzetin ka vei zui a ni ta ber mai. Kelphung tapchim hmu ang tlut tluta ka birh hnu chuan Krismas leh kumthar inkarah chuan ka lam hawiin a nui sen sen thei ta. Ka lung a va han awi hliah hliah tak em ve le.

Kumhlui thlah zanah chuan a nuin ‘hmundanga chhuah aichuan’ tiin ar kan tur min pe a, a naute țhiante ho nen chuan an inah chuan kan ri ve lai lai a, a nu lah kohhran lenkhawmna lamah a kal daih bawk si, an thingrem lian chunga țhu chung chuan a nauteho ar puah chu kan vil dun a ni ber mai. Tihpui tange pawh kan ti lem hlei lova.

Kan awmna lam chu eng kan ti thim țhen a, tualtah shawl lian leh lum tha zet mai chu kan in zawn hlan a, kan lung a awi dun kher mai.  Zawite te chuan ka kut hmeh niap niap pahin a ti ti sep sep a, a zirna chung chang te, an chhungkaw chanchin thleng chuan a sawi keuh keuh a, a khat mawitawka kan hmui a insi zeuh zeuh tih mai loh chu changdang kan zai kan rel lem lo.

Thliin a beng fuh deuh tum chuan lengkhawm zaithawm chu kan hre leh zauh zauh țhin a, a tam zawkah erawh chuan an khuangri bak kan hre meuh lo thung.  Kal ve tuma kan in buatsaih nasat ve teh reng nen rinloh lamah a nuin remchang min siamsak ta hlauh zawk mai si a. Kal hram lam chu kan tinzawn lo dun ve khawp mai.

Zanlai inkhawmna lama kal pawh kan tum hran chuang lo, a nu mitmei ven tur a awmloh rau rau chuan an in lama hun hman chu kan duh zawk. Bakah kan sa ei tur pawh a la hmin lo hrim hrim a.

Rinloh tak maiin a nu chu a lo lut hlawl mai a, engtin lo awm mah suh ila kan inring hman meuh lo chu a ni e. Shawl pakhat hnuaiah kan lo inkuah ve ngial bawk si. Engtin tehvak awm lo ta chu min sawisel chuang lem hlei lo va, “Zanlai Inkhawmah in kal duh ka ring deuh a” ti a lo haw a ni a insawi dan hmangah chuan. Mahse, keni’n kal kan lo tum si lova, thirbel lian a la inchhuang sur sur mai bawk si a, “Inkhawm intum loh chuan ka va inkhawm a nge, mahse lo chhuak lo ula aw” tiin tapchhaka ketli ung ve lampang tawh chu a han kuaibuk a, thingpui a in hnu chuan a chhuak zui ve leh mai bawk a.

Zanlai inkhawm an țan fel tawh ang tih velah chuan chhuatlaiah chuan belval chungah thirbel chu dahin kan țhut bial laih a, hlimtak chuan kan ei ve laih laih a, a mawitawk vel chu kan zuah ve ta in ka hria.

Kumthar ruaițhehnaah te pawh chuan țhianteho nen chuan kan in zui ve ral ral hlawm a, ruaițheh zawhah khawhlui tlangah kan leng bawk a, a tluka nuam a awm thei chuang lo, hun leh hmundang beisei tur a awm miau lo bawk a.

Kumthar lama BA zir zawm a tum lo chuan ka rilru a ti buai viau mai. Mahse, a nu leh a nau hnathawk chu a khawngaih ve bawk si. Lehkha zirtir chu an la inhuam viau nain amah ber chu a inthlahrungah a țang a, ‘ka chhungte ka ti rethei lutuk’ a ti ve tlat bawk si. Fuih ti tih te chuan ka’n nawr ngial țhin a, a rilru ka hmin zo meuh lo chu a ni e.

A nihna takah chuan chuti teh chiama khawsak harsa chu an ni lem lo. A pa hi kan khaw Middle Sikul chowkidar țhin a ni a, a boral vangin an  pension an la zawm thova, kan khuate ang thingtlangah chuan langsar takin awm nuamsa le lu lo mahse a khawsak ziaawm pawl an ni tho tho. Unau hmeichhe pathum an ni a, a patea fapa tlangval uai tawh chu an hnenah chuan a cheng ve bawk.  An teberin pawl riat a zir mek a, an milai erawh chu zirna a chawlhsan tawh thung.

Chutiang a nih vang chuan zirna chhunzawm chu a duh a thu-ah ka ngai, harsatna lutuk an neiin ka hre lo. Chhungte ti hah han inti viau mahse a awm vanga an hahdamna tur teh chiam awmin ka hre ve tlat lo. Tlang lo pawh an nei ngai lova, leilet hmunnghet an neih vangin thlai hmun tur lek fangin a hming lekin țin khat hmun erh awrh emaw te an nei ve țhin a, chu chu han hahpui vak turah ka ngai lo. An leilet lam lah hlawhfa hlir an khawitir bawk a.

“Aizawlah awm thei dawn ila chuan chhunzawm pawh ka hnial chuang lo. Mahse, ka nu hian min ngaihtuah deuh bawk sia, chubakah chhungkhat  hnaivai lutuk hi kan nei chiah lo va. Tuna ka awmna ngaia awm leh tur chuan ka duh tawh lo” tiin ka ngenngawl tak viau hnuah min chhang ta hram kha a ni a.

Zawhna ka la zawh belh zui ta cheu a!

“Engngatinge a an tha vak lo a mi?”

“Țha tho e” tiin hnuailam bih pah chuan a sen deuh țan țan a.

“An țhat tho si chuan engnge chhuanlam tur vak a awm a mi? Han chawlhsan ngawt chu keichu a uihawm ka ti, pass lo chu ni la ka hrethiam a, First Division-ah i pass hial a nia”

“A.. A buaithlak a lawm, i hrethiam lo a nih kha” a’n ti leh ngawt a. Hmeichhia țhin tak hi chu aw.

“Hriatthiam tur pawh i sawi si loh chuan ka tan chuan hriatthiam ngaihna a awm hleinem”

“A ni khawp mai” a ti ve leh ta ringawt a. Keilah hi engemaw zep an nei ni a ka hriat chuan zawhchhuah țalh hi ka tum ta mai țhin a, thil țhaber pawh a ni viau lo.

A tawp a tawpah chuan ka hlawhtlin leh tak nge nge kha.

“Ka nu cousin te inah ka awm a, an fapa nupui nei tawh hian min beisei țhin a” hnuailam en ran chung chuan a ti ta nge nge a. “Lehkha zir chu duh viau mah ila midang hrawn leh tur chuan ka ngam tawh lo a ni. In luah dawn ila ka nu hian a ngaingam chiah bawk si lova” a ti zui a.

“A va tenawm ve mawle, nupui nei tawh leh nghal! Engtinnge lehkha pawh i zirțhat theih zawk a” tiin khawngaih zet chuan ka leh zawh ta mah a.

Theihtawpin a nu hmin tum chuan țan kan han la dun a, a rilru chu a hmin thei zat lo. Mahse, fate duhzawng han hnial fithlak țhak chu a hreh ve bawk si. Thu pawtchat hlei thei lo chuan a inkhap reng a.

Vahsan laklai a nih vangin tlangval khawchhunga awm chu kan tam teh chiam lo. Nula in pawh kan kim zo awm lo mahnge tih tur lek kan awm țhin niin ka hria, ram lama riak an tam viau ni tur a ni. Ram a bua duh an tih vangin kumhlui lamah hian ringthar tur lam hi an vat ngai meuh lo va, kumthar țiak tuk lawkah hian chempui tuaițhain an liam zung zung mai țhin a, Hmeichhe lam lah thingtuah tur lain an hmanhlel țhin bawk nen chhunlawnah phei hi chuan khua a reh thei lutuk hi mu in min la mai ang tih pawh a hlauhawm lek lek țhin chu a ni.

Chu hunremchang chu keini pahnih tan chuan duhthusam hi a ni hrim mai. A nu te lah chuan thingphur turah ai chuan inlama lo che ah an duh zawk bawk si, kei lah lo kan neih ve ngai meuh loh vangin ram hnathawkin ka chhuak ve zen si lova nileng leng chuan kan in rim a ni ber mai. Chuti e ti lo chuan zanlama ka len lah a kham lem hlei lova.

Ka pa hi kan khaw middle school Headmaster a ni a, u hmeichhia pakhat ka nei a, pasal a la nei lo. Ka nu leh pa nen pali kan ni tlawng mai a, kan khawsak a harsa teh chiam lo. Kan khaw tlangvalah chuan a to pawl ka ni pha ve tlat!

Mi lerh ka ni hran lo a niang ngaihzawng hi ka nei ve zen lem lo. Duhzawng te veibur mi ka nih vang erawh hi chuan ka buai zeuh zeuh, ka duh zawngte hi mi bialnu te an lo ni hman ta țhin a. Ngawireng hian ka lo tuar ve em em ringawt zel! Bakah mi han ‘try’ vel hi ka zei fa lua lova, țhiante tana phur fal thei viau si hi mahni tan chuan ka zum leh duk lawi a, chuvang te pawh chu a niang ngaihzawng neih ka harsat em em țhin ni.

Zorini pawh hi țhianpa Vala min sawihawn sak zara va intat lut ngam ve chauh kha ka nia, a hmawr hawng det lo phei se chuan keimah thu chuan ka insawiluh ngam pawh ka ring leh pek lo. Dawih leh pa lo nih duh bau si lo hi ka kawlhrawng tehchiam si lova.

Pawlkua ka zir laiin Pawl sawm zirlai hmeichhe pakhat hian mi ngaizawng chiam tawh a, ka buaitheih zia kha aw. Kum lama u zawk na na na chu mi hmakhalh dan a hre phian bawk si. Ani aiin ka la te zawk zui leh ta nghal a, loh theih lova kan han inzui ve te pawh chu Khaukhuap nupa kan ang viau ta ve ang.

Zei lo min tilutuk a ka nguiban der ni berin ka hria, mi han tih zui dan tur hre miau hek lo. A harh hma deuh bawka tunah chuan a chhangchhe fe tawh, a chi a țha a niang Pastor Bialfan apiangin baptisma chang tur an lo nei ve hman ziah an tih fiam khum hlut țhin. Fa pathum an nei tawh a, kumchhirin an piang nitain ka hria.

January thla tawp lamah chuan chhuk turin ka inbuatsaih ta a. Zorini nu pawhin ‘inluah tur țha i hriat chuan lo melhsak la’ tiin min chah ve tak hial kha.

Kan inluahna hnaiah hlir ka zawng ang!

A tellova kha leh chen awm tawh si kha tun țum ka chhuk tur chu ka tha a za zat lo deuh chu a ni e. Nitin leh zantin deuh thaw in lenchilh rawt kan ni bawk a, amah pawhin min ngai ve viau chuan ka ring.

Ka chhuk dawn zanah chuan Vala nen kan leng dun a, a nu te an mut fel hnuah chuan Vala pawh intizei takin ngawireng chuan min chhuahsan zui ve nghal daih a, tapchhakah țhu dunin vawk chaw so barh barh chu kan thlir dun ta ran mai kha a nia.

“Lehkha zir leh tura min duh chuan kan awmna tur tha deuh i zawn hmuh a ngai a ni mai”

“A awm mai ang, hmuhloh tur thu a awm hleinem”

“Mahse, inruak nazawnga in vawmluh ngawt chu a chi bik lo alawm. A hmun hma te, bakah in neitu pawh mi pangai deuh te ni se duhthusam a nia”

“A dik alawm, Mahse duhang thlip thlep chu a ni thei kher lo mai thei a, awm reng na tur pawh a ni chuang lova, a aia țha zawk hmuh chuan a insawn leh mai theih bawk alawm, lungngaih vak na tur a awm lo” ka tih sak a.

“I hmu lo ta a nih leh i lo hawchhoh hun nghakhlel taka lo thlir kha ka tih theih tawk chu a ni mai dawn a, khawhar taka ka awm i duh loh chuan i vir vat vat a ngai a ni mai”

“Nang aiin i lo chhuk theihloh ka hlau zawk ang, i lo chhukloh chuan lehkha ka zir theih pawh ka ring lo” ka tih chuan a nui seih a.

“Ka lo chhukin i zir thei lo zawk lovang maw, lo len reng te i tum phei chuan kan pahnih hian lehkha zirna hun pawh hi kan nei lo zawk ange” mei chhawm țhat mawlh mawlh pah chuan a ti a.

“Zir thei ang, chutiang em em te chu kan insum ve thei ang chu”

“College kalna tur te pawh min ngaihtuahpui vek a ngai dawn a nia, engmah chinchang kan hre ve bawk si lo. Min zahpui em lovang chu maw Aizawlah chuan?”

“Zahpui lah lo ve a, ka chhuang ngawt ang che. Kan college-ah admission tih kan tum phawt ang a, senior kan ni ve tawh dawn a, kan tlangnel ve tawh alawm a theih maiin ka ring”

“Ka nau pawh buaipui a ngai dawn ania, i buai phah viau a ngai dawn nih chu”

“Inluahtur chu han hmu hmasa phawt ila, chuta țang chuan i nau kalna tur chu remchang a awm mai dawn a, tuna lo sawilawk vak hleihtheih pawh a ni lo. In awmna nen a inhlat deuhah te a kal chuan a buaithlak ve thei a”

“Nia, a dik reng. In inluah lai kan lo luah ang a, in awmna tur zawng zawk mai la” nuichung chuan a ti pek a.

“Kan bulah lo awm zawk ula, kan in luah a lian alawm, kan leng lutuk mai” ka ti ve mai a.

“A khai a, kumtawpah hian dul puar lian lutuk hi kan haw ngam lo palh ang tih a hlauhawm dawn e” tih pah chuan min rawn melh ralh a.

“Fate  nen kan haw chho duah anga a ni mai alawm” ka tih chuan min chum taih a, “A chi loh viau ang” a ti zui a.

“Aizawla awm chu ka chak viau rualin ka huphurh ang reng bawk sia”

“Huphurh chhan tur a awm hleinem, mi pawh khuti zo zai an awm alawm le”

“Keini chu hmeichhia kan ni dawn bawk sia, chu chuan min ti huphurh ber a, mipa awmlohna hi chu a zahawm tak tak thei lo. Naupangte pawh awm se mipa an nih chuan a dang ve hrim hrim”

“Hmeichhe hlanga khawsa pawh an tam em mai, buaina bik tur a awm hleinem, harsa tur engmah a awm lo”

“Ngai awlsam bawk sia” tih pah chuan chuan a lu chu ka lamah chuan a lo ti hnai ria riai a. Kan ti ti chhunzawm ta vak lo. Kan reh rei lutuk tur dalah kan țawng leh zauha a ni mai e.

Zan dar 11:30 pelh thleng rak chuan an tapkawm chu kan mawi dun a, inkham tih lah a awm thei bawk si lo, duh reng vang ni lova hunin min hnawhchhuah dawn meuh chuan an kawngka biang nghengin a mittui a tling ve pam a sin.

Kawngka chu kan han khar a, luhkaah chuan kan ha inpawm leh rih a, ‘kal tawh rawh, a tlai tawh’ ti reng chung siin min kuahna chu a la kiang duh lawi si lova. A thlun emin min thlung lo mahse keilah chu ka talpit zo bik der bawk si lo.

“Ngawi rawh lawk aw” tiin inchhungah chuan a tlan lut leh rih a, rei phei chu a thang hran lo. Lehkha them niawm tak hi a lo kengchhuak va va a. Engtak chu niang maw?

Min kuah pah chuan ka kekawr hnunglam ipte chu a dap rak rak a, ka wallet chu a phawrh nalh a, ka passport size thlalak mamawh huna hman mai theih tura ka dah reng chu lachhuakin a thlalak cheh tet, lehkha them emaw ka tih kha a dah lut ta than a, ka thlalak erawh a hum zui nghal daih thung. A nuam veng veng mai.

Lungchim zeta kan in fawh hnu chuan muangchangin kan inlam pan chuan ka in chhep chhuak ta hnak hnak a.

Damlo phurhthlak tel tur an neih vangin ‘zing dar 6:00 ah chhuah i tum ang u’ an ti hem mai si a, thawh a peihawm fahran lo khawp mai.

Ka mu ve lah chu mut a’n chhuak lo em em khawp a, ka khumlu lama tukverh chu hawngin pawnlam te chu ka’n thlir leh rih a, zanlai thlifim thaw heuh heuh te chuan mut chhuak lo turin min ti ni hmiang a chhuah loh dan em em hi.

Ka pawisa ip-a thlalak inthiat thar chu la chhuakin ka thleng ta veng veng a, a maha a lak a ni lo tih hriat tak mai hian a tlang chu a inchep kawi deuh a, a uniform hak chu mawi tih vang pawh ni lovin a inhmeh ngawih ngawih hian ka hria. Ka passport size thlalak thlengna atan chuan duhawm hliah hliah tak a ni. Chu thlalak, Sikul Gate pui saron par vulna hnuaia mi ngei chu.

Zing dar 5:00 pelh awrhah chuan ka nu chuan min kai tho va. Mut kham lo viau mah ila thawh loh theih miau hek lo le, mit thial ur chuan ka tho lo thei ta lo va. Thingpui ka in peih loh vang chuan chawțhing te chu ka’n bar nawk nawk a, intihfel chhung nen chuan dar 6 a lo hnai thuak tawh a, ka zin bag ak chuan ka nute nen chuan kan in mangțha zui ta a.

Biak in bul, tual zawl zau deuh awmna laiah motor a din țhin vangin chu lam chu ka pan zui nghal mai a.

Motor-a ka bag ka dah zo ka inher chiah chu ka hnung chiahah chuan Zorini a lo ding reng chu lo niin. Phawk fe chuan ‘e he’ ka’n ti ringawt a.

“Min va beisei awm lo ve” a ti sap a.

“Nia, beisei chiah lo a ni ber ang chu. I thawhhma phah hle mai”

“Hei hi ka lo thawn dawn che a, ka nuin ‘a buaipui dawn che u chuan bus fare tur tal thawn rawh, a in thlahrunawm’ a  tia” tiin envelope uk hi min pek a tum a, ka laksak duh lo chu kan inhnawn lui deuh chat chat a. A dik chiah chuan a nu nen han in biak lumlam na hun an neiin ka hre lo. Ama remhriatnaa ti mai a nih ka ring zawk mah.

A lawm lo dawn takngiala ka hriat vang chuan ka laksak ta nge nge a.

Mi dang an awm ve tho vang chuan duh ang pawhin kan inthlah hleithei lo chu a ni ber mai. Mahse, ka vui hran lo, keimah vanga chutiang huna a lo chhuak ka hmu hrim hrim chu ka lung a awi tawk viau tawh a ni.

Inhmuh leh vat beiseina chuan lungleng tur hnem lawk viau mahse kar a hla lutuk tur chuan phurna min pe chuang si lo.

Ban in vai lap lap chung chuan kan vangkhawpui chu kan chhuahsan ta a.


_____________                     _____________
                     KA NAKRUH BO

                         Chapter-II



Aizawl ka thleng ta chu zawlkhawpui meuh pawh a ngui ruai hian ka hre mai a, mi zi nuaih nuaih te chu an lung a leng ve lo emaw ni le ka ti!

Ka pa u fanu leh an nau pakhat nena in luahho kan ni a, anni lah kan khawlamah an la awm bawk si. Ni a rei tluk zetin zan lah a tawi chuang bawk si lo. Khua a har vawng vawng a ni ber mai.

Țhianteho nen țangtlangin Zorini te inluah tur chu kan han zawng kual ru deuh a, a lu nunga zawngkual tu tam na na na chuan pathum dawn lai kan hmu ta mai a, ka tan remchang melh ru deuh ran chuan kan vengchhung a mi, in neitute pawh kan hriatchian sa te in chu ka biak sak ta rawih a, anni pawh chuan harsatna dang awm lovin an lo rem ti ve mai a. In sakthar, lian lutuk lem lo leh kan vengah chuan a hulum lai deuh ber pawl a mi chu an luah thei dawn ta a nih hmel e.



Dear Love Zorini,


 A hmasain vawn loh chibai min siamtu chung Pathian hmingin ka buk a che. He ka lehkha tlawm tak maiin a’n hmachhawn bik tur che hi chu thik rual mah ni suh se, ka thik deuh hial mai ka ti!

 Aizawl pawh tluangtakin ka thleng a, mahse i awmlohna hmun chu ka tan chuan hmun nuam a tling zo ta lo a nih hi. Hawina lam apiangah mitthlaah i lang zel a, i tel lo chuan khawilai pawh hi a ruak mai a lo ni e. Ka ngai che’ tih mai hian ka ngaih zia che sawifiah zo tak maw, hei ai nasa a sawithiam ka chak a, mahse ka thiam si lo. Min lo pawmsak hram dawn nia. Ka ngai tak zet che.

 Kan chhukthlak ni khan Pi Ropuii te ho khan min fiam thla char char a, ka zak ve deuh bawk sia, a nuam ka ti tho bawk sia. Kawngtluanin ka ngaihtuah thla char char che a, nidang ang chu ni se in thingrem lian chungah ka mu leh mai mai awm sia tih te ka ngaihtuah a, ka mittui a tla tep a ni.

 In ka thleng thla a, tumah an awm bawk si lo, ka bulah chuan awm la eirawngte kan bawl dun ang a tiin ka ngaihtuah a, mahse, lunglen ti zualtu mai a ni zel bawk si.

 Zanah pawh ka leng chhuak peih ngai lo, midang hlimtaka an awm hi ka hmu peih lo. Chu ai chuan mahnia awm a, mu chunga ngaihtuah mai mai che ka duh zawk. Sihal u vak zana kan awmdan te kha ka ngaihtuah a, meng phar deuh chunga min kuah laite kha ka ngai țhin emai. In tlai chawhmeh tur kan eizawh tak daih te kha tunah chuan ngaihawm an chang zo vek tawh. I nu thleng khan ka ngai hial tawhin ka hria, i nau te pawh min lo biak mawlh mawlh dawn nia. Rinkima hnenah khan ballboot chu a duh ang chi ka hmu a, pawisa chu lo thawn rawh a ti tih i lo hrilh mai dawn nia.

 Inluah tur pawh chu ka hmu tawh a, kan vengah tho a nia, in sak thar thlakhatah Rs 700/- in a nia, a lian lutuk lova, in unau chuan in tawk viau ka ring. Inneitu pawh mi pangai tak an ni e. Engmah venthawn tur a awm lovang, ka mi hriatchian te an nia. Chuan, ka lo lenna tur a hla lo bawk!

 A hma lam deuhin lo chhuk thei la ka ti hle mai, college admission te pawh chu ngaihven pahin leh in inluah tur vel enfel pah chuan.. I nau pawh kan veng High School-ah kal mai rawh se, zirna a țha thova, kalna a buaithlak lo bawk ang a.

 Vala khan ka Leather Jacket kha a la kawl a, remchangah min lo va lam sak la, min lo thawn theih chuan ka lawm ngawt ang. A nih loh pawhin i lo chhuk hunah i lo keng mai dawn nia. Amah kha min lo biak nghal bawk la, a lehkha tur pawh ka ziak ta lo mai. Min thawn ve peih ngai si lo.

 Lo chhuk vat la chuan ka hlim a ni mai. Min ngai ve thin ang ti raw ka ngaih ang che hian? I tan ka rinawm reng dawn vangin nang pawh rinawm takin lo awm zel rawh aw.

 Sawitur tam hle mahse chhiartu mitmengmawi tak kha a lo kham lutuk palh ange, zing nichhuak hi ka chibai bukana che ni sela, tlai nitla hi ka mangthana che lo ni rawh se.


 I tana rinawm,


         ‘C’

Ka ziak zo chuan maimitchhing meuhvin ka’n ngaihtuah chhunzawm leh ngial a, ka thawl deuh huaiin ka hria.

Ka lehkhabu kawmah envelope ka dahțhat chu ka va hai ngial a, ka hmu zo mai lo leh ta nghal a, a tawp a tawpah chuan lehkhabu karah ‘by Airmail’ ngei chu ka va haichhuak ta hram a, Open with smile tih vel chu ka ziak tel ta lo mai. Kan țhianpa hian a uar lutuk a, ka duh ve lo. Uluk taka ka charțhat a, lukham hnuaia ka dah thlap hnuah chuan ngaihngam takin ka mu ta siai siai a.

Zing dar 6:00 a motor chhuak nang hman tur chuan Zarkawt lam pan chuan ka pen chho hlawk hlawk a, tho hma ve viau emaw pawh hi inti ila Zarkawt kawnah meuh chuan mi an lo vei leh sup sup tawh.

Kan khaw motor chu ka hmu mai lo leh ta nghal a, a lo la ding lo nge mawni, reivak lo ka nghah hnuah chuan a lo thleng zui ve mai a, thawn mai tur ka ngamtlak chuang tur an la awm lo leh ta nghal a, zak ru ve deuh tak chung chuan a khalhtu ber U Sailova chu ka va bekbawr ta ngawt kha a nia, ka’n hel deuh ngial nain mi fiam zui tho mai.

Tukțhuan ka eikhamah chuan ka chhuk hma chhan deuh ber ka țhianpa u te inneihna lama kal tur chuan ka thawk chhuak zui nghal a, tlaikhat eirawngbawl pumpelh pawh thil lua alawm mawle.

Inneihnaah chuan ka rin aitakin mi an tam lem lo. Mahse, inneih thuthlung nghehna tur chu mipui tam leh tam lovah a ni lem lo bawka inneih țhulh ngawt thu a awm lo. Tam lo han tihah thaw riai phei chu an ni hran law, an biak in a len deuh vang te pawh a ni mai thei e.

Theihtawpa nalh tura induang chhuak ve kha ka ni bawk a ka incheina chu chawhma pawh a ral hma chuan ka ning țan leh der tawh mai. Tu emaw a awm ve bawk si lo, ni a rei duh dawn mange.

Mo lawmna ruai erawh dulhmul khat phuar khawpa ka’n lim leh pek kha!

Chumi hnu karkhat awm velah chuan Zorini te lo kal an tum thu chu ka hre zui a, lehkha lah a rawn chhang mang reuh si lova. Mi ka ațanga a chanchin han hriat chu ka vui ru ve deuh, mahse han tum kawh vuauna tham erawh a ni meuh lo thung.

Kan nau, kan hnena awm ve chu a nawmsam loh vangin a nuin in entir turin a lo chhuk pui a, chumi ni chuan Zorini te pawh chu a nu nen an lo chhuk ve a ni awm e. Lehkha them hi min rawn hawn țat țat a, An thlenna veng leh pa ber hming a lo in ziak a, ‘zanah i hman chuan lo kal la’ tih thu chah seipui nen chuan.

Kan naute in entir tur chu han buaipui ngai tehchiam an nih loh vang chuan zan lama han tekbo san chu pawi teh chiam lo turah ka ngai a, zanriah kan kil hma chuan fai tak maiin ka’n inbual hmasa zet a, chaweikham veleh ka phit chhuak nghal daih ang chu ka ti.

Mi lah chu an fiam teh sek a!

Thleng an seng mawlh mawlh lai chuan ka chhuahsan ta a, “Lo haw leh rawh aw” ti a min auh zui vau vau ka hriat chuan ka khi var var mai asin le.

Zorini te thlenna chu ke a han kal ralah chuan a hnai lutuk lo. Thingtlang tlangval tan a hla han tih tham em chu a nilovin ka hre bawk sia, hmanhmawh ru deuh, thlantla hluamin ka thleng ang tih hlau deuh bawk si chuan ka kal hlak hlak a. Țhiante ina leng tur ang ngawt ka ni lo bawk a a phur zawng ka phur nameuh mai.

Ka chhuah ațanga darkar chanve dawn ka thang hnuah chuan Zorini te thlenin chu ka zawt chhuak ta hram a, luhnghal mai duh mah ila duh ai chuan ka la thaw nasa he hu deuh hlekin ka hria, kawtzawl kinah chuan pangpar buk bulah ka’n ding khawmuang leh ren rawn a.

Ka pen lut ta.

Hmelhriatloh ina mikhual zawn chu tlangnel har tak a ni. Chaweidawhkan kilin nu pakhat hian maikuang a lo hik mawlh mawlh a, a bul maia ding chunga lo tihpuitu ber chu a ni ka kalchhan ber chu.

“E, i lo thleng thei maw, Nu Marin hei hi kan khua a mi a nih hi Chhuanawma, Admission vel min tihpui rawh ka tia” tiin min lo chiau au thuai a.

“A nih tak chu mawle, i va fel ve, khawi vengah nge in awm a?” a ti a. Kan awmna veng vel hrilha kan inchhan mawlh mawlh lai chuan an pindan lam ațang hian patling, inneitupa niawm tak hi a lo chhuak a. Amah lah chu ka hriathnu ni tlatin ka hria, ka chiang ngam bawk si lo.

Chu pa pui roh lah chuan, “Pu Ramzauva fapa i ni em?” a la rawn ti zui leh ta nghal a.

“Aw ni e” ka ti zui ve mai a.

“I pa chu a dam amaw? Beai kam a la hrat em?” a ti zui zat a.

“Hrat ve tho mai, a awk thei vak tawh lo tunhma angin ka ti ve mai a”

Zorini chuan ka hriat hmelloh a ti deuh a niang, “Kan khuaa lo thawk țhin Pu Chama kha a nih hi, i pa sikulah” a rawn ti a. Ni dawn tak e, ka chiang ta.

“Ka hrechiang ngam lo alawm” ka ti mai a.

“Nia, a rei ve leh deuh tawh em alawm, ka lo thawhlai te chuan Middle School kha in kai awrh chauh a la nia, kum 6 dawn a vei leh tawh alawm” Pu Chama chuan a lo ti ve bawk a. “Engnge i zirtawh nang?” a tih zawm a.

“BA ka zir mek, IIyear ka zo ve chiah”

“A nih chu, i va zirsang tawh ve, i u le?”

“A, a tuizawng a ni ve vak lova, ani chu ka nute bulah a awm, puan te a țhui a”

“A țha alawm, eizawnna a nei der a lawm chu. Lehkha kan zir pawhin kan tum ber chu eizawnna tur atan tho a nia, peih leh peih lova lehkha zir vak vak ringawt hi a kawng hmang lo. Lehkhathiam inti ve si hna nei lo phei chu zaha lak tur zawk a nia, mihring quality nei lo ka ti mai a sin” a ti deuh duah a.

Sawi zui tur tehchiam ka hre ve lo chu lam chu.

Kan khawlam chanchin sawiin reitak chu a nute leh an thleninteho nen chuan kan ti ti reng a, nula rim ve a hetia chhungte nena inkawm hi ka ning țhin. Dawhtheihna ka tlachham ,an mek niin ka hria!

An tlangval leng a lo haw hnu rei vaklovah chuan keipawhin ținzai ka rel zui ve nghal mai a, a tuka inhmu tur tho kan nih vang chuan han lungkham tur tehchiam awmin ka hre lova, zankhat lek han am chiam lah a țul ka ti hek lo.

Kal lam aingawt chuan hawlam erawh chu kawng a thui ta deuhin ka hria.

Zing ka han tho chhuak phat chu ka inleng nei tur chuan min kap nghal țun mai a, ka mikhual te lah chu zingkarah in entir tura an chhuah daih vangin eirel zawng zawng nen ka kovah a tla lo thei lova. Ka hawina lam apiang chu a hnawk nuaih mai hian ka hria a, ka chaw chhuan ut rim nam rum rum mai pawh chu ka in senghawi felna lamah ka lo hre mai lova, a va han buaithlak ve mawle.

Ka unaute ho lehkhabu te chu han remfel țhat pawh a awm lo, an thehkai țawk țawk emaw tih mai tur hian a hnawk neih nuaih mai a, an pheikhawk bawm lah chu ti bawk. An thawmhnaw dahna phei chu ka tifel peih lo lutuk a puan ka zar hliah ta ringawt mai kha a nia. Engtinnge hetiang hmu lo hian kan lo awm theih zawk le ka ti rum rum mai!

Engahmah ka lo ngaih ngailoh kan chhuat te lah chu Carpet phah niawm hial a mawi zawk hi a ni pek a, carpet angah han ngai ngawt dawn ila ze mumal a nei lawi bawk si lova, keini’n ngaia kan neih ang ngawtin vawikhat lo luhna tan chuan ngaia neih ngawt tur niin ka hre bawk si lo. Dal chhum lo liam ve sek karah chuan chhuat chu thlan tla hluamin ka nawt ve nawk nawk a.

Ka unaute ho an lo chhuk kim hun chu an va han chak dawn lo rua em!

Ka buai tukpum chiang khawp mai, ka zo fel thawkhata inhriain ka u te in entir pawh nghak lo chuan tukțhuan chu ka kilzui nghal mial mial a, ka hawina lam apiangah chuan mit tikham tawk chu ka la hmu nual mai, mahse an hrethiam ve tawh turah ngai ang, uipuibu ang em chu a nih tawh bik loh hi mawle.

Chaw ka eikham hnu chuan thlanrim nen ka inchiahpiah viau bawk nen ka inbual zui nghal a, chutihmek lai chuan kan u te inentir pawh an lo thleng ve chiah a, ngaihtuah ngai an ni lo a nih hmel e. Anni pawh chuan chaw chu an eizui ve nghal mai a, ka chaw chhum kan chu an phunpui ve nang nang mai! Nge, mahnilomaha buai ve mah nak laia!

“Chhuana chawkang chauh hi a mi min eitir i tum a?” tiin bual in ațanga ka chhuak chiah chu ka u chuan a lo ti var a.

“Haha, a kang lo lai kha zawng khawm ve mai rawh u, ka buai ve mahnaklaia tukin chu in a hnawk lutuk a, chhuat bal bawk si”

A fapa lah chuan, “Inleng kan nei dawn ni maw!?” a lo ti fahran leh ta nghal a.

“Nauva lo ngawi mai mai teh, in che țawp lutuk a min ti hah lutuk. Zing kar karah thlantla hluamin min chettir alawm mawle” ka tih chuan a nui kak kak a.

“Chhuan, an lo kal dawn mi?” ka u chuan a lo ti a. Amah hi ka u ka’n ti awlsam mai a, ka pa u fanu a nia.

“Aw, an inluahtur kha kan veng a mi hi a nia, min enchian pui la an tia, bakah admission vel te pawh ngaihven pah an duh deuh a, ka kutah an innghat vek bawk sia”

“Chu ‘mark’ a va țha dawn ve aw, tu nen nge in chu an luah dawn a?”

“A nau nen a niang”

“Eheu chu nuam i va ti dawn ve aw, lenna hnai bawk, free bawk” a’n ti zui leh hram pek a.

“Tehngawt chuan a” ka tihsak ta ringawt a.

“Fiamthu lovin nupui tlak niin ka hria, a fel bawk sia, an taima bawk si. An chhungkua khi an taima hrim hrim a nih khi, a naute pawh khi an fel ka ti” a ti zui zat a.

“A hmel pawh a țha alawm” ka lo tih chuan a nui țha a.

“Nia, a lian zuah zuah bawk si. A damthlup mai bawk sia chhuah reng reng suh. Mahse, fimkhur ula, free tih vang ngawt khan duh ang anga khawsak ngawt loh tur a nia, in hmalam hun thuitak ngaihtuah ula, a hun lovah naute in lo pai ngawt ange” tiin min han zilh leh ang mawlh mawlh bawk a.

Ka rin aiin an lo thlenghar daih mai ka ti. Ka nghahhlelh luat vang ni maw.

Ka u chuan kan thawmhnaw bal chu a su mawlh mawlh a, keini putu chuan tihtur vak nei hek lo le kan kutzungpui kan lo insual tir a, ring deuh deuh chuan kan lo nui uar uar a, chutih meklaia kan kawngkhar lo kik ri pawh chu kan lo hre lem lova. Ka u chuan bual in ațangin “lo lut rawh u” tiin a lo chhawn ta hlauh zawk a.

A nu nen chuan kan țhutthleng sei neihchhunah chuan mawng an hung chu a ni ta reng mai. Huphurh ang he hu phei chu a ni ta lo.

Ka u sawi hi ka hre reng țhin, ‘Thingtlang nula chu Aizawl kan han thlen hian kan kesir hi a eng puap mai a, kan tukkhum a dum chal mai bawk sia, inti nalh ve viau mah ila a hai theih tak tak loh’ a tih kha. Chu thilrna mit ațanga ka thlir chuan Zorini chu a zahpuiawm bikloh a ni tih ka hmu thuai a, taksa țhanglai leh inphut chho tak a nih vangin awmhmun sawn vel a ngeih te pawh a ni ang Thingtlang nula a ni tih a hriat bik hauh lo mai.

A incheina lah chu țhing ni hauh si lo hian mawlmang tak hian awlsam takin a inchei mai a, a zonu hliah hliah mai hian ka hre pek a, a sambu chhah ang reng tak chu a hnunglamah a țawnfel mai a, hmuh hahthlak a awm lo.

A bula țhu a nu erawh chu thingtlang nu diktak a ni thung, a fip fap mai a, a sa a țha lutuk bik bawk si lova, hna hram tak thawk nasa hmel a pu.

Thingpui hang te kan han lum leh rih a, ka u te nen chuan an ti ti zui luam a, an inluah tur lam pan chuan kan inzui chhuak ta kha a nia.

Inneitute an lo la awm lo zui a, kan han nghak deuh a, nuber chu a lo haw ve mai bawk a. Inhnuai lamah chuan kan lut thla zui ta a. A nu pawh a lung a awi khat viau chuan ka hria. An duhthusam ang thlip thlep chu ni thei lo mahse an duhthu chu a sam khat ang chu. Duh ang thlip thlep ni thei nghal hek lo mawle.

Inluah man tur te chu an han inhlan lawk ang nawk nawk a, ‘Sikul tan dawnah chauh an lo chhuk hman ang’ ti a inthlahin kan kalsan ta kha a nia.

A nu chu bazar lamah a kal zui a, keini kan college lam panin kan kal bawk a. Office an hawng angem phei chu ka hrebik lo. Kan kal chhan ber pawh seat hauh a ni mai a, Marksheet leh Certificate vel engmah a la chhuak bawk si lova, admission pangaia han tihnghal rum rum theih pawh a la ni lo.

“Lalvala a sual lutuk”

“Engatimaw?”

“Aizawla in inluah chuan nau ilo paihaw hrim hrim ang min ti ziah” nuih sen sen pah chuan a ti a.

“A ze ngai bawk a ni maw chu. Chutia an rin tho tho dawn che chuan pai haw hram dan ngaihtuah a ngai a nih chu” ka tih chuan min melh zauh a.

“I ho emai a, a chi loh viau ang”

“Kan innei hma deuh anga a ni mai lawm” ka ti a.

“Kan la naupang e, inneih te chu hmanhmawh vut vut a ngai hleinem. Lehkhate han zir zo phawt ila”

“Lalvala faten kan fate an vel dawn asin, ani chuan khi pahnih lai a nei tawh bik a nia”

“A ho e chutiang te chu” amah pawh chu a nui ve tho mai.

“Tinge ka lehkhathawn kha i lo chhan miah lova?”

“ Ka ziak ve ngei a, mahse thawn tur remchang an awm lo alawm. Driver han thawn ngawt kha a dik lo deuh bawk sia, bakah lo chhuk har kha kan tum lo hrim hrim a”

“I chhoh hunah i ziahsa chu i lo thawn ngei a ngai dawn a nih chu” ka la tih sak hram a.

“Hram hram chuan, a țul ber lovang chu kher chu. Ka dahțhatna pawh ka hre tawh lo”

“A ziah pawh ilo ziak lo hrim hrim te hi a ni ange”

“Ziak chiang lutuk. E, ih maw ka nuin i lehkhathawn kha a lo hmu a, a la chhiar zui!” a hmel chu a sen deuh țan țan a.

“I chhiartir maw?”

“Chhiartir nang, ka lukham hnuaiah ka dah a, samkhuih emawni a zawn tak kha le, a va haichhuak a, a lo chhuah a min fiam khan ka dah tih ka hrechhuak chiah alawm, a zahthlak ve reng” a hmui chu a a pet sawi laih a.

“Zahthlak vak a mi, zahna tur chi ka ziah vak pawh ka hre lo”

“Awm hran chuang lo ve, mahse nu te meuhvin an chhiar atan chuan ‘love letter’ chu a chi loh, mahni chauhvin kan zak ru veng veng mai ni” a ti zui a.  A nih duh hmel viau a ni.

College kan han thleng a, Gate pui ațang chuan a lo inkalh pang mai!

Tihtheih awmnghal hek lo hunawl kan ngah deuh a ni mai tiin muangchang chuan kan let leh lo thei ta lova. Thingpui dawrah paratha leh thingpui te kan han hlawmbei dun ve bawk a. Kan lung chu a awidun ve hliah hliah teh a sin.

Han lenpuina tur vak hrechuang hek lo kan inlamah bawk chuan ka let pui leh a, vanneihthlak takin ka u te nufa lah chu an lo awm lo hlauh lehnghal a, ruahman lawk ang mai alawm le.

Țhutthlengseiah chuan chep zet hian kan țhu dun a, thildanga  han pen chu a duh chiah lo, infawh erawh chu kei ai mahin a duham thiam zawkin ka hria. Keilahin ka lo hnar lutuk bik lem bawk si lo nen, a hahthlak loh chiang e.

“Rinkima chuan ballboot man chu a lo thawn nange a?”

“E thawn e, ka theihnghilh daih. Ka nu khan a ak daih ang chu, zanah i lo lam mai anga” min nuihtlawn deuhin ka hria.

“Chuan ka jacket pawh”

“Khitah ka dah, ka lo keng tel duh lova”

“Engati?”

“Ka kawl reng dawn”

“Ka ha har awm mange aw, Lalvala chuan a ti pawr viau em?”

“Pawr pawh ka hre hran lo, a rim chu a tui zat lo deuhin ka hria”

“Ani ruiphur hak kha a nia, a rimtui lo tawp ang. Bakah, leather jacket chuan rim a nei ve deuh hrim hrim alawm”

“Suk ka tum zet a, mahse, suk chi a nih loh takin ka tia ka su ta lova, nihnih ngawt ka pho alawm”

“A țhat chu, i lo chhuk hunah em chuan i lo kengthla tawh ang chu?”

“Kengthla ringawt mah ila ka pek phal miau loh che chuan..”

“I ha dawn a zeng pawh a ni awm si lova”

“Hm.. ka kawl duh ve a ni mai lawm. I phalloh viau chuan ka thlen chhoh veleh ka lo thawn thla nghal dawn nia” a ti nghat a.

Chutia a’n titau der vel chu ka lo nuih pek a. Mi tihvakngaihna a hre si lova, ka mit te chu min han hupsak leh ringawt a.

“Tlaiah chaw einghal la, chuan chaweikhamah kan phei mai ang a”

“I sual emai ka ei duh lo”

“Haha, kan ei hma deuh ang a”

“A chiloh”

“Engnge chi lohna?”

“Engmah kan sawi lawk bawk si lova, ngawirenga eibo ngawt chu a inthlahrunawm” a ti a.

Tlai eirel dawnah chuan ka thlah phei ta a. Ni a rei lo ka ti kher mai.

Aizawla an cham chhung chuan kan inzui kual nasa viau a ni. A nu thlimdan tur kan zawng reng bawk a, a thlim lah kan thlim zing na rawh e.

Awmnghal tura lo kal ni lo ta chu kan khawlamah min kirsan leh ta kha a nia. A khawhar thlak viau, mahse, a lo chhuk leh har dawn chuang lo a lawm. Ka lo chiri hman bik em lovang chu maw.

Engtikah tak lo chhuk ang maw ti a ka dahfan vak vak lai chuan thu thințhawng zet maiin min rawn deng ta tlat mai!

Zorini a bo!


_____________                     _____________

                    KA NAKRUH BO


                     Chapter-III



A nu nen an Leileta Mai phur tura an kal chu a bo a ni awm e.

“Vau depah maikuang chhat turin a kal a, keiin leilet sira ka ba chin ka cho thung a, a lo let har ka tih vang chuan vau lam pan chuan ka va kal a, a maikuang chhah sa lo awm ram chu ka hmu a, amah ka hmu zo lova, ka au vak vak a” tiin a nu chuan a sawi a ni awm e.

Chu chu Aizawl ațanga an hawchhoh hnu karhnihna vela thil thleng a ni a, ka hriat ve meuh chuan zanhnih zet a lo bo tawh!!
Class tan a hun leh hun loh pawh ka ngaihtuah tawh lo, kan khaw motor a lo chhuk theih tak si lovah chuan khaw țhenawm motor man chawpin a tuk zingah chuan kan khawlam pan chuan ka haw chho leh ta nal nal a. Kawng a thui kher mai. Chu a chhapah kan khua leh khaw țhenawm inkar hi kilometer 20 zet a ni leh ta nghal a, motor veivak a awm loh phei chuan ke a kal mai a ngai ang.

A motor țawng berah chuan ka chuang leh ta nghal a, kan tluang em em hran lo a ni. Kawnglakah kan motor ke te a chhe thul! Huiham, manganthlak zawk hian.

Dar 4 :00 pelh hretah kan thleng ve ta hram a, chuan man pawh han titlawm deuh awm hial an ni.

Vanneih thlak takin kan khawlam kalphei tur motor a lo awm hlauh mai a. Mahse, an pheichhan tur erawh chuan min va han tina si em ve le. ‘Mi bo zawng turin’ an tih chu.

Aizawla ka hriat hlim leh ka awm lai kha chuan hmuh leh mai beiseina vang te pawh aniang ngaihtuah hah vak dan ka thiam lo. Mahse, khawțhenawm meuh puna zawn a ngaih takah chuan ka inngaihtuah harh ve thiam ta, Motor bracket vuan chuan i pik zet chuan ka țhu ngawi ran a, ka chuanpuite ho chu fiamthu te thawhin an ri ham ham reng a, ‘Pasal um te hi kan lo zawng hut hut mai te hi a lo ni angah’ ‘Tu emaw awngphah mai mai hian kilkhatah a lo tawm reng si angah’ tih vel an sawi chuan ka nuih a ti za lo, min tina ngawih ngawih a ni.

Unau hmel hai hun ruaiah chuan kan khua chu kan lut ve ta hram a, motor ațang chuan țumthlain Lalvala te inlam chu ka pan nghal a, a nu leh a naute chauh an lo la awm zui leh ta nghal a.

“Community Hall lamah a chho leh a nih kha, tunlai chu inah pawh a awm hman meuh lo” tiin a nu chuan mei a’n chhawm tha sat sat a.

“E he, Chhuana lah ni rengin, engtikah nge i lo chhoh a, mikhual riakah ka lo ngai che asin” a ti leh hnuhnawh a.

“Hei ka lo thleng chiah a nih hi. Kan in pawh ka la lut lo”

“A nih chu, țhu ta che engatia i din reng ni. Kan mibo vang hi em ni i lo chhoh a?”

“Aw, ni ber ang chu. Vala chu ka hmu duh asin maw aw”

“A chaweikham mikhual an țhahnem riauva ka han ngaihven a nge a tia, an inkulhna lamah a chhuak chho leh a nih kha mawle. Ka han koh tir dawn mi?”

“A pawi lo mai thei”

“Bawihi, i u han ko teh u. ‘U chhuantea a lo haw a inah a nghak che’ han ti rawh u” tiin pindan lama naupang awm chu a auva. Naupang pahnih hi lo chhuakin pawnlam pan chuan an inzui chhuak nghal a.

“Kan inlamah lo phei mai rawh se, ka lo va intifai ange” tiin keipawh chuan ka chhawm ve nghal mai bawk a.

Khawlaiah chuan mikhual vei vak an tam hle mai. Chu chuan kan boruak tawn mek chu a hril chiang viau awm e.

Kan in lah chu a lo inkalh țhap leh nghal a, lungzin naklaiin aw. Khawilamah nge maw an kal vek le? Ka ril te pawh a țam ve tawh asin mawle. Luhkaah chuan ka’n țhu ren rawn a, hmundanga kal pawh ka peih chuang lo. An rei em lo turah ngai ang.

Zorini chu aw.. Engtinnge tunah hian a awm ang le? A tlusual ang a, khawi emaw laiah te hian a lo bawksawp reng nge niang, khawmu chawi ang chi hi niang le? Ka ngaihtuah lo thei si lo, ka ngaihtuah nasat poh leh ka buai ting mai bawk si.
Vala leh ka u chu an lo lang dun hlawl a.

“Eng motor in nge i lo chhoh a?” Vala chuan a rawn ti nghal a.

“Khaw țhenawm te motorah ka lo chho a, Pu Rammawia motor ka rawn man phei leh”

“I lo thlenna a rei tawh em?” tih pah chuan ka u chuan kawngkhar chu a hawng rak rak a.

“Rei love, ka thleng phei zawt chauh a la ni” ka tih chuan inchhung kan lut ruai tawh.

“Engtinnge i hriat a?”

“Pu Roțhuama nen kan inhmu a”  ka pindan lam chu ka pan nghal a, engmah chu thildanglam a awmin ka hre lo. Danglam awm chu ka rilru chu a ni. Khumah chuan ka țhu a, engnge ka tih tur ber pawh ka hrethiam hauh lo mai.
Lalvala chu a lo lut ve leh nghal a. Ka bulah chuan ngawirengin a lo țhu a, sawi tur kan van dun kher mai.

“Chhuante, lungngaih lutuk tur a ni lo a nia. Kan hmu em em ang” a ti hul hak a, ani pawh chuan a thusawi chu a awih pawh ka ring bik chiah lo.

“Ka beisei alawm chu chu, mahse, beiseina mai a ni ang tih pawh ka hlau hlel lo ve,. Hmeichhia, mahni chauh lehnghalin ramhnuaiah engtinnge chu chen chen a dam khawchhuah theih ang!?”

Mi chhan ngaihna vak pawh a hre chuang lo. Eng engemaw chu a sawi nual, ka hre em em lo thung.

“Mama, chawei ka siam zo a nia” tiin ka u chuan min lo auva. Chawei pawh chu a chakawm chuang lo, ka ril erawh a țam viau thung. Ka ei tam leh tam loh ka hre lo va, ka eirei hle tih erawh ka hre thung.

Ka inbualfai hnu chuan khawtlang hruaitute rorel ngaichang turin kan inzui chhuak dun ta a, ka u pawh kan zingah chuan a tel ve ta zel a, min ngaihtuah deuh nge maw ni le. Community Hall kan thlen chuan mi chu an lo phusa lui lui ni ber hian ka hria, hnukulh ru țeuh chung chuan mualpho hlau takin ka awm ve reng a, mikhual lo thleng thar an awm ve reng bawk si nen, a țhenin Hall kawtah chuan riahbuk tur an lo sual mek bawk a, a khawilai mai pawh chu han hawi thawvenna lai tur chai a awm si lo.

Zanlai thleng chuan Vala chuan min awmpui a, mikhual titi thiam tak tak leh fiamthu thawhkarah chuan rilru muk lutuk te pawh a ziaawm deuhin ka hria.

Chu zan zet chu ka muhil lo chiang kher mai, ka mut a chhuak lo mai pawh a ni satliah lo, ka kham hluah hluah niberin ka hria. Ka thochhuak ta daih a, tihtur a awm bawk si lo. Kawtlaiah te chuan ka va chhuak thul, zan boruak thiang tak hnuaia thlifim leng heuh heuh chuan min au tlat hian ka hria a, kawngpui dung zawh chuan ka kal chhuak ta daih a, khawilam nge maw ka pan dawn le.

Ngawireng chuan ka kal zel a, ngaihtuah manghlei lo chuan Zorini te in lam pan chuan a ni ka lo kal reng ni.

An kawt ka thlen chuan Silpauline a lo inzar duai mai a, chumi sir deuhah chuan meipui an chheh hi a lo la vam hiam mai bawk, an mutsanna a la rei lo a ni ngei ang. Inchhung chu a thim țhiap a, a reh diak mai bawk si. Țah tlawk tlawk mai ka va han chak tak em!

A la rei lo a sin hlimtaka kan inthlah lai kha.

“Mama tirawh i haw tawh ang, hetia awm ringawt chu a dik lo” titu chu ka u a ni.

 Engtia rei nge ka bulah chuan a awm tawh ang tih ka ring thiam lo tluk zetin keipawh chu ka awmrei zawng ka hrethiam lo. Ka awm rei thawkhat chuan ka hria. Chutia ka u in min lo zui zel mai chu thlamuan thak viau mahse thil nuam tak a ni lo. Min ngaihtuah lutuk chuan a ti hrehawm phah ngei dawn a nih hi.

“U, min ngaituah suh ka tha lawm”

“Ka hria alawm, mahse, hetia awm ringawt hian engmah kawngro a su chuang si lova” ka țhutna bench-ah chuan ka dara min kuah pah hian a lo țhu zui a.

“I tuar em em ang tih chu ka hriatpui che, i hrehawmna belhchhah tur zawng chuan awm kher loh tur a nia. Naupang chhia i ni tawh lo va, thil awmdan thlir thiam hram hram tum rawh” a tih zawm a.

“A chang hi chuan kan inhmu leh mai dawn ni hian ka hre țhin a, mahse chu chu a thlen ka ring ngai bawk si lo.”

“Beiseina kan neih chu a thiang a lawm, in inhmu leh em em ang”

“U a dam i la ring em?” tiin ka zawt tawp a.

“Ring e, a la dam em em ang. Pi Chuailovi pawh ni sarih ral hnuah dam deuhin an hmuh leh mai kha, hlauthawng lo la, a thih ring suh” a tih chu min hnem tumna mai a ni tih hre reng mah ila ka u sawi a nih miau vangin ka dam phah huai huaiin ka hria.

“Engtinnge hetiang thil hi a thlen theih le?” ti bawk chuan kan ngawih vang vang hnuah bul ka țan tha leh a.

“A vanduai thlak khawp mai, tihtheih a awm bawk si lo” ka u chuan a lo ti sap a.

“Aizawlah a lo chhuk mai tawh dawn emaw tih laiin hetiang thu hian min rawn deng ta mai si a, dawnsawn dan tur ber pawh ka la hrethiam lo, ngaihtuah ngaihna ka hre bawk si lo. Aizawlah chhuk leh pawh ni ila engtinnge ka awm ang, amah nen kan sulhnu hlir a ni mai bawk si. Khawihmun mah ka tan chuan a nuam ve tawh dawn lo a nih hi”

“Chutiangin a thim zawngin engmah thlir loh tur asin. Indawm kun ringawt hian engmah awm zia a nei hleinem, thil chu paldarh zung zung ila chu chu a damdawi tha ber a ni mai. A chhe ber pawh țawng thu chhe lovah lo thleng ta se amah ringawt ngaihtuaha hun i hman chu a dik lovang. Kan chunga harsatna lo thleng a awm a nih chuan dawn sawn thiam hi kan tih tur a ni, chumi a nih chuan engtikah mah kan puitling thei tak tak lovang”

“A har ngawt ang” ka lo tih sak a.

“I thei ang, i thei ngei tur a ni mipa i nia lawm”

Chutih meklai chuan Zorini te kawngkapui chu dimte hian a lo inhawng riai riai a, a nu chu a lo chhuak heu mai! A muhil thei lo ve a ni ngei ang. An kawta kan țhu chu kan thawm a hre zawk nge maw ni le. A shawl bahțhat mawlh mawlh pah chuan kan lam pan chuan a lo kal a, silpauline hnuai thu kan ni bawk nen a eng lutuk hran si lova chuti mai chuan min lo hre thei lovang.

Kan bulah chuan lo dingin “In va meng rei ve” a ti a. Min hre lo a ni maithei.

“Nia, hei kan mut a chhuak meuh lo a nih hi zanin chu” tiin ka u chuan a lo chhang a.

“A.. Zuali lah ni rengin, aw haw Chhuantea” tihpah chuan lehlamhawiin a hmai a hup ta daih mai. A hrilhhai thlak duh ang reng khawp mai. Ka dingchhuak hluai a. Tihdan tur erawh ka hre chuang lo.

“Zote, Chhuantea paw’n a nghak reng tawh che asin, lo haw thuai rawh” tiin rum hawk chung chuan a rawn chham chhuak a, a insut zui nghal hrawih hrawih a. Intih pachan chu har tak a ni. Mittui dan kir hram tum chuan chunglam chu ka’n lui ngial a, ka u lah chu a lo insut a lo insut mai bawk si.

Chu boruak inmung chu a rit tak zet.
Rei a rial thei ta lo, Zorini nu chu rawl chhuah meuhvin a tapchhuak ta hawk hawk a, zan a rei tawh sia. Haider chu a har ve ngawtin ka ring. Inchhung lam a,ang chuan an lo tlanchhuak țak țak reng a, han hnem ngaihna erawh vang kan ti tlang a nih hmel e. Keini unau kan lo awm ve bawk si chu an phawk ru hlawm viau chuan ka hria.

Zorini nu chu a nau chuan kuahin inchhunglamah chuan a hruai lut a, chutia awmreng chu a fel lo  a ni tih hre mah ila haw chakna ka nei hauh bawk si lo.

“Kal ang hmiang” tiin ka u chuan ka banah a vuan a, ka kal hreh kher mai.

Anmahni riahpuitute nen chuan in mangțhain kan kalsan zui ta a, kawngka biang nghenga Zorini nauvin min lo thlir reng chuan ka rilru a ti no zual niin ka hria.

In kan han thleng a, ka ipik zual niin ka hria.

“Chhuah tawh loh tur aw, zan a rei tawh munghal rawh” tiin ka u chuan min nghak tlat a, mut loh theih ni nghal hek lo, hreh zet chuan ka mu leh ta kha a nia.

 Ngaihtuahna a vah zauh tehlul nen mumal erawh ka nei meuh si lo.

Chu zan zet chu ka tlaivar chiang kher a sin.

Ka nu zing thawh laite pawh chu ka hre reng a, mei a chhem ri phat phat te pawh chu ka hrait hmaih lo. Thawhchhuah mai ka tum zet a, mahse tihtur awma ka hriat loh vang chuan ka țhulh leh mai a. A la hma deuh bawk hrim hrim a.

Ka pindana ka nu a lo lut dawn tih ka hriat chuan rangtaka insiam remin ka lo muhil der thuai a, rei vak lo a din hnuah a chhuak zui ve leh mai a. Harsatna nei lo thei ang bera lan hram ka duh. Ka nu leh ka u phei hi chuan min ngaihtuah em em reng mai si. Ka pa pawh a nih ve tho ka ring, mahse mipa ta na chuan a lantir ve vek lem lo a niang.

Nichhuah hnu lawk atang chuan inleng lo chuangkai neuh neuh an awm ta reng a, thawh pawh ka la thochhuak duh chuang lem hlei lova. Mut chu ning teh mah ila mi bula va thawhchhuah khan ka hahdam tak huaina chhan tur pawh ka hre chuang tlat lova.

“U Chhuantea a awm em?” ti a naupang rawlin ka hming a lam chuan ka beng a verh kher mai, ka hming a lam miau alawm le.

“Awm e, engnge ni?” tiin ka nu chuan a lo chhawn thuai a.

“Hei a lehkha tur va pe rawh an tia”

“I va fel ve, tunge tir che a?” tiin ka nu chuan a zawt zui leh a.

“U Sangzuali’n” a tih chiah chuan ka phu zawk mai! Chu chu Zorini chhang chiah kha a ni si a.

“Kan lawm e aw bawiha” tiin ka nu chuan a thlah zui a, pawnlamah chuan naupang tlan thawm chu a ri zui thlak thlak a.

Zorini chuan ka lehkha tur a hnutchhiah tihna em ni ang? Thu hnuhnung ka tan a lo dah maw? Ka chhiar ngam dawn em ni? Mahse, a chhan leh vang chu hriat ngei ka duh bawk si. Ka nu chuan min va han pe har kher ve aw. Ka va au hman țhelhin ka hria.

A lo lut ta ngei a, lehkha keng va va chung chuan. A hnungah ka pa a lo lut zui bawk. Chu lehkha a thuchah hnuhnung hre ve duh an nih ngei pawh ka ring.

Ka nu chuan “Hei i lehkha tur” ti a min pek pah chuan min en zui vang vang a. Ka pa lah a bang bik chuang lo. An inleng te pawh an lo luh san daih a nih awm chu mawle. Chhiar ta mai lo chuan a kawm ațang chuan kan bih ngial a, charhna hnuhma a awm lova, a laitakah a inthlep thawk tihmai loh chu hnuhma thar a awm hran lo. Ka nu chu a chhuak zui leh mai a, ka pa erawh a la ding ngau mai thung a, hriat ve ngei a beisei a ni.

Muangchang chuan envelope ațang chuan ka phawrh chhuak a, chhiar chak viau mah ila ka va huphurh si em aw..



Dear love U Chhuantea,


 I lehkha, ka tana i ziak ngei maiin ka hnen a lo thlen meuh chuan ka lawmzia hi țawngka mai chuan sawifiah thiam theih pawh ka inring love. Ka mutpui a, ka thawhpui a ni ber mai. Mutdawnah chhiar chhuak hmasa zet lo chuan ka mutui lova, zingah lah ka tihdan a dang chuang lo. I kiangah awm lo mah ila i kutchhuak hlutak hian min ti lawm țhin, ka ngaih che a zualphah deuh e tih mai loh chu.

 I chhukthlak ni khan awmngaihna ka hre meuh lo niin ka hria, engthilmah ka ti sawt thei bawk si lo, ka lo ngaihtuah leh veng veng țhin che a. Ka tihtur pawh tihhman loh ka nei nual mai. Mahse, nangmah vang a nih chuan pawi pawh ka ti duh lo, ka ngai che bawk sia. Chhuk thla lo la chuan hlimtakin kan awm dawn sia tih ngaihtuahin ka nileng a ni ber mai.

 Zanah lah hian i lo kal hun awmah lah hian i awm lo tih hrereng chung si hian ka lo beisei ve ziah che a, nghah chhuah theih lah i ni bawk si lo. Ka naute țhianho hian min chhaih nasa thei lutuk, min tiduhdah teh a nia, i lo chhoh hunah ka tiduhdah ve viau ang. Nizanah pawh i tihdan te an zir a, an nui vak vak a, ka lung a leng tih an ngaihtuah duh der si lo. Ka mutur te kha an phal lo vel a.

 Inluah tur vel chu ka nu ka hrilh a, a lawm khawp mai. Karleh lamah kan pahnihin lo chhuk kan tum ang a, min lo buaipui leh mai kan ngai dawn a ni. A inthlahrunawm tawh viau nain.

 Lo chhuk vat vat ka duh a, ka nu hian hman a la inti lo deuh a, karleh lamah a ti tlat a, hmuh thuai che ka chak tawh tehreng nen ka tilui ngam bawk si lova, zan engemaw zat chu nangmah ngai reng renga hun ka hman a la ngai dawn a nih hi.

Nangmah ngai em em hian ka lo chhuk ve ang a, Aizawlah chuan min lo hre țha duh lo vel ang tih pawh ka hlau ru deuh tho mai. Aizawlah chuan mi an nalh thei sia, keini thingtlang nula chu kan chuang leh mai mai ang tih te ka ngaihtuah țhin a, chutiang thleng lo tur chuan min siamtu khuanu hnenah ka dil fo țhin a sin. Beidawngin min siam lo hram ang che.

Ka lo chhuk hunah hlimtaka kan inhmuh ngei ka beisei, damna leh hriselna țhatak lo nei rawh aw, ka ngai che tih kha theihnghilh miah lo bawk la.

Ka nu in ‘I mengrei, mu tawh rawh’ min lo ti tawh, ziah tur tam hle mahse hun leh hmunin min daih dawn chuang si lova, i tan mit tikham leh ninawm mai a nih loh nan duhtawk dawn phawt ang aw.

Ka ngai lutuk che.


Love with

‘Z’


Beisei ang chu a ni hauh si lo!

A ri lova chhiar chhuak mai kha ka ni a, ka pa lah chuan min lo enkar mai bawk si.

“Pa, hmana ka lehkhathawn min chhanna a lo thawn hman loh anih hi” ka ti ringawt a, ka pa chuan maktih hmel zet hian min en a, nuam chiah lo mahse ka sawi dik ngei a ni tih hriatna tur chuan lehkha thawn chu ka chhiartir lo thei ta lova.

 Ngawireng chuan la in a chhiar zui nghal a.

A chhiar zawh chuan inthiamloh hmel taka lo hawichhuakin “A, engemaw thu hnutchhiah a neih ka rin vang a nia” a ti hlawl a.

“Ka hria alawm, keipaw’n ka ring deuh a..” ka tihlai chuan ka pa chuan kawngka lam chu a pan mek tawh a. Sawizui tur tehchiam a awm lo a ni ang e.

A hnulawkah ka nu chu a lo daklut zui ve nghal zat a, ani pawh zawhna mitmeng nen a ni a lo luh ni.

“Mama, eng thil nge nia?”

“A, eng thil vak pawh a ni lo, lehkha hlui mawle. Hman deuh a mi”

“Engthil mah sawi a nei lo a mi?”

“Umh.. Tuna a awmdan nena inkungkaih thei thil a awm lo, Aizawla ka chhuk thlak hlima ka lehkhathawn rawn chhan a tumna a nia, a lo thawn hman loh a nauten an haichhuak a niang”

“A nih tak chu, engemaw thu hnutchhiah a nei a nih kan lo ring deuh a” a ti tha ve mai a.

“Chutiang engmah a awm lo, ka pa pawhin a chhiar vek kha”

“I putea’n vawk a talh a, i peih leh lo va pui la..” a tih zawm daih a.

“Awle” ka tih sak ve mai a.

Muangchang lo chuan ka tho zui a, ka inphihfai hnu chuan ka putea te inlam pan chuan ka kal chhuak zui ve ta nghal a.

“Tukțhuan eikham veleh mibo zawnga thawkchhuak tur zawng zawng te Community Hall-ah kal khawm vek tur a ni a, chuta țang chuan kan bawh chin tur mumal taka siam tur a nih vangin tumah mahni thua chhuak lo turin kan inhriattir e” tiin tlangau a lo au lauh lauh a.

 Ngaihtuahloh luih tum pawhin kan chheh vel boruak chuan ngaihtuah lo thei lo turin min siam bawk si.

Putea te in ka thlen chuan an lo ti zo deuh duak tawh zawk hi a lo ni a, a phel vel chauh an hralh chhuah vangin buaipui rei vak a lo ngai lo a ni ange.  Engemaw chen chu ka’n tawikhawmuang zui a, chaweinghal turin min chelh teh an tum a chu ‘chaweikhama chhuak nghal thei turin ka va insiam zet ange’ tiin ka hawsan lui ta thova.

Tukțhuan eidawn hnaiah chuan ka chaw tur chu ka nuin min fun sak a, ka tukțhuan tur chu a hranin a bawk bawk a, Iptepui leh chemtum akin ka putea te inlam pan chuan ka in akchhuak zui ta a.

Ka ril a țam angreng bawk a ka eihnem kher mai.

A țhenin chaw an la ei a, a kham tawh nen. Kan vei suau suau lai chuan kan YMA Secretary hian min rawn zawng vat vat a. Min hmuh chuan min lo panthuai a.

“E, Chhuante kha i țha maw?” tiin a ban a rawn lek chhuak a, kan han inchibai leh rih a.

“Biak lawk che kan duh deuh a, Library lamah i lo kal lawk hman angem, chaw i ei tawh em?”

“Aw, ei tawh e, ka hman chu a ni mai tihian” tiin kan inzui chhuak nghal chu a ni mai.

Ka rilruah min ringhlel a ni awm mange tih a lo lut deuh tlat mai ka ti, chuti a nih chuan a mualpho thlak viau thei tlat mai. Mani lo maha hrehawm tih naklaiin a zia lo viau ang le.



___________       __________
           KA NAKRUH BO


              Chapter-IV



Library kawtah chuan Police motor hi a lo ding vang mai a, rinhlelh chu ka nih ngei hmel e.

Min bialtu OC chu a hmel chauh na na na chu ka la hre ve alawm, dawhkan kil chuan kan YMA hruaitu te, kan VC te nen chuan an lo thu fuk mai a, ‘nang hi maw?’ tih melhin min lo melh ni ber hian ka hria. Tihsual awm lo na na na chu han zam viau nachhan tur phei chu ka hre hauh law.

“Lalchhuanawma maw i hming?” OC chuan a lo ti thar thar a.

“Aw ni e”

“I hriattho ka ring a, kan koh chhan che chu i țhiannu Zorini bo chung chang vang a nia”

“Aw, ka hria lawm”

“Tukinah i țhiannu lehkha hnutchhiah i dawng niin kan lo hria a, a dik em?”

“Dik e. Mahse, lehkha kha tuna a bo chhan nen hian inkungkaihna nei a ni lo”

“Engnge a nihlohna chhan chu?”

“A hmaa lehkha ka thawn min chhan a tumna a rawn thawn hman loh a nia, tunhnai maia a ziah pawh a ni hran lo”

“Chu lehkha chu kan hmuh ve a remchang angem?” ka rin aitakin a zawl dawh phian a.

“Remchan lohna tur a awm hleinem. Mahse, inah ka dah daih a, in lo kal peih a thu a ni mai lawm” ka ti fel ta et a. Ka let peih chiah si lo alawm. A naute lam chu a’n melh kual a, ‘Rama, i va kalpui lawk mai dawn mi?’ tiin rawn ve si chuan thu a pe zui a. “Awle, sir” tih kha a hna a ni mai.

“Ka lukham hnuaiah khan ka dah, ka nu te an awm kha” tiin ka tho chhuak duh ta lo va, anni kawhkawi tur ka nih pawh ka hre chiah lova. Mamawhtu zawk chuan pan mai ang hmiang. Constable chu kan YMA President chuan a zui chhuak ta ngawt a, zakthei lo chu min ti ve ngawt ang.

An va thang chhung chuan ti ti pangai angreng deuh hian Aizawl lama kan inhmuh dan leh kan inhmuh hnuhnun ber chungchang te chu ka lo sawi a, ani chuan a karlakah zawhna min zawh belh ve reng bawk a, harsatna kan inkarah a awm loh thu chu uar takin ka thiam ang tawk chuan ka sawi ve bawk a. Awih hlawm tak maw le.

An lo thlen chuan ka pa hmel a lo lang tel hlawl mai le!

OC chu lehkha chu an pe a, ngawireng chuan a’n bih vang vang a. Dawhkana lehkha chu dah pah chuan “Hei hi tu kut ațangin nge i dawn?” a ti zui a.

“Zorini nau, mipa naupang min rawn pek tir a”

“Chu chu han hruai teh u”

“Ka pu, an inlamah i pan theih chuan a lawmawm viauin ka ring. An mangan laia an rilru ti phirkak zawnga a thlamuan tur bera ngaihin chet i thawh hi a fu ber lo deuhin ka hria, an rinhlelh awm tih pawh ni lo, thu engemaw zawh duh neih vang ringawta tihlauthawng zawnga khawsak hi a kawnghmang ber lo. Mi awmlohna hmunah i be duh ti dawn ila hetah pawh hei an țhu țhup thova..” lo ti fak tu chu lehhawi kher ngai lovin ka pa a ni tih ka hre nghal mai.

Ka hmaa țhu OC chu a sen țan ,an mai asin le.

“Min zawhbelh tur i neihloh chuan bo zawnna lama kal ka duh mange” tiin a hmaa ka lehkha a dah chu ka ban zui mai bawk a, kan ngeiawm pafa viau chuan ka ring.

Ka pa nen chuan rei rial lovin kan inzui chhuak ta daih a, keiin Community Hall lam ka pan a, ka pa chu kan inlam a pan niin ka hria, engtinnge min sawizui anga, engtinnge hma an lak zui dawn erawh ka ngaihtuah pui tehchiam lo.

Hall leh a chhehvelah chuan an lo awm thup tawh a, Mike in kaldan tur leh kalna lam tur te chu an puang lauh lauh bawk a, keichu an kalna tur siam lamah chuan kal tumna pawh ka nei hran lo. Ka rilruah a bo,anna laia kal chu a lang tlat. Chulam chu tuam tum lo mahse ka kal tho ang. Keimah chauh pawhin.

Lalvala chuan min rawn zawm thuai a, “Khawilamah nge keini hi kan chhuah ve anga?” a ti a.

“Val, an leilet lama kal ka duh deuh a, han fan ve hrim hrim pawh ka duh, nang chu hmundangah kal rawh” ka lo tih sak a.

“A, i bulah chuan ka kal ve zawk ange, kan tum chu a thuhmun vek tho alawm”

“Ngawiteh, midangin an hriat chuan a nalh vak lo ve thei a, min ngaihtuah suh”

“Ngaihtuah lam pawh a ni chuang lo, a duh te chua hria se engnge maw pawi teh chiam le, an thu hnuaia awm kan ni hleinem”

“Zawnna lam tur an siam vek bawk sia, chutia kan thian duna kan lo pen mai chuan a mawi lovang tih kan hlau deuh mawle, bakah zep nak emaw midang anga han phek zawn chiam kha ka ti hleithei dawn lova, theihtawp chhuah mah ila rilru hian tlinloh chang hi a nei thin sia, midang bula awm ka chak teh chiam lo va” ka ti zui a.

“A dik a lawm, Ruatpuia pa te saw kan zui ange aw, ngaihtuah awmin awm suh ang che. Mipa takin aw..”

“Awle” ka tih chuan iptepui mawng vaw hnak hnak chuan min kalsan zui ta a. Țhian țha tak neih hi a nuam țhin mange, mi hi an chhawk zangkhai țhin.

An kalna lam tur pana an chhuah zawh duak hnuah chuan muangchangin Zorini te leilet lam pan chuan ka kal zui ve ta a. Ngaihtuahna a vak thui kher mai.

Chau tak maia kawngsira a lo awm bal mai hmuh te chu ka’n inring thul. An leilet thlamah tal chuan a lo muhil mahna le.

Ngawireng chuan ka kal mawp mawp a, beiseina lian tak nei chung chuan an leilet chu ka thleng ta hlawl a.

Ding meuh chuan ka han thlir vang vang a, ka beisei ang hmuh tur reng reng a awm bawk si lo chu a hrilhhai thlak viau mai. Thlamah pawh lut lo chuan maikuang a chhahna lai ni a ka rin lam pan chuan tuikawng zawhin ka kal nghal a, kawrte kam ka thlen chuan a hmunhma chu an dap chhuak hneh hle  ani tih hriat tak hian a lo pe sen sun mai a, chulaiah chuan awm se han hmuh loh rual a ni lovang tih tur khawpin a ni an chil hneh ni.

Beisei a bo ta.

A hnuhma chhui zui tur awm si lo chuan ngaihtuah a ti thui viau a, sain a seh te ni dawn se a thisen far te emaw tal pawh hmuh tur a awm bawk si lo. Ama thuin a tlanbo han ti ngawt dawn ila a chhan tur awm ang ka ngaihtuah thiam bawk si lo.

Khawmu chawi emaw, hruaitu nei emaw a ni ta ve ang.

Chutiang chu lo ni ta ang se, zawn zawn hi awmzia a awm awm si lo. Chutiang em chu ni lo hram rawh se.

Kawrkama lung, Lawichal tia awm vel chungah chuan ka thu ran a, hawina lam apiang chu hnuhma thar hlir a ni mai si. Rilruin arbo a zawng tak meuh a ni. Tui in tum a ka iptepui ka zenna lamah chuan lehkhathawn kha ka dap chhuak nawlh pek a, iptepuiah chuan ka lo thun mai ni tur hi a nia, a fimkhur loh thlak mang e.

Muangchang chuan ka’n kaipharh țha leh a, a hawrawp kikawi dan zawng zawng nen chuan uluk fe hian ka chhiar chhuak leh dap a. Mahse, hrilhtihai sei thlawntu mai a ni. Uluk fe chuan thlepin ka ak țha leh ta a, ka ngaihtuahna a kal bing deuh a niang ka mittui a tla hial mai.

Ka inphih harh hnu chuan thlam lam pan chuan ka chhuak phei ta a, an leilet thlam chu kumhlun thlam tih takah a lian țha hem hawm hle a, a chung rangva erawh chu a hlui lam mah tawh a ni maithei tuiek a kai deuh țhat tawh a, khawi emaw laia thingphaw an hman te pawh chuan rawihlam an pan tan mek niin a hriat.

Thlam chhuat erawh chu a hnum ,ha khawp mai thung a, mau pangai chik nilovin eng rua emawber a nih ka ring a, a hlai tha bawk sia, a chhah bawk sia, hmunhulah chuan reitak daih tur a la ni.

Tapchhak sir maiah chuan Tuithawl leh Plastic um 10ltr vel dawng tur hi a inhung dun ral a, chumi chung deuhah chuan bel, nothum bel awm vel tur, rawng pawh nei tawh lo hi chhuar ve deuhreuh an siamah chuan a awm a, a bul maia ketli ung zet mai chuan thingpui no engzat tak chhuang chhuak tawh ang maw?

Inchunglamah chuan mutbu lian vak lo tak, silpauline a intuamin a inkhai lang lang a, chubak chu thil han hmuh tur teh chiam a awm lo, rapchunga thinghak tlem a zawng chu a ni leh mai.

A khawilai mah chu han hnemhnamna tur a awm chuang lo.

Ka chawfun te chu ka thet ta ngawt a, duh loh pui pui chu rilruah chuan a lo lang zut zut a, chaw bar theihnghilh țhak chuan ka lo inngaihtuah leh veng veng țhin a, a ei lah ka eirei phah nangiang mai.

Chutia tlangvala pumpa han awm ngawt chu diklova ka hriat deuh vang chuan an chhunchaw ka fak zawh hnu chuan an vau kual chu theih ang angin ka hrut ve e ka tia. Ka hmalamah an lo dap hneh tawh hle a ni tih ka hriatchianna mai niin ka hria, khawilai mai pawh chu an dai dar viau niin ka hria. Han bikbo na tur emaw, han hmuhlohna tur khawpa hmun kilkhawr a awm meuh pawhin ka hre lo. Ka vah nasat poh leh beiseina ka vahbopui thui mai niin ka hria.

Naurual chawchhum hun awm velah chuan beidawng takin an leilet chu ka chhuahsan ta a, kal lama ka suangtuahna zawng zawng te kha ka beidawnna belhchhah tu mai an ni zo leh bawk si.

Ka hmanhmawh lem lo bawk a nitlak suarah chuan kan in ka lut hman tawk chauh a ni. Thuthar engmah vawiin hian a awm lo.

 Zanlamah chuan Vala nen Zorini te inlamah chuan kan va leng phei ve a, a nau hmeichhia nen chuan kan ti ti a ni ber mai. Police in thu an zawh dan te chu a sawi siam siam a, a tawplamah erawh chuan lungchhia bawkin a ni kan in,in san leh ni.

Lalvala chuan ‘ka lo riahpui dawn che a mi?’ a ti a.

“A ngai lo, min ngaihtuah suh” ka tihsak a.

Kan veng kawn zau laia țhianzaho lungphunah chuan thuin kan ti ti dun ta reng a, Community Hall lam thawm pawh a la tha ham ham khawp mai, mi an la mu vak lo a niang khawlaia veivak pawh an la awm khat tawk reng a, mikhual chiahpiah leh kan boruak tawn mek chuan kan khawtlang nunphung chu a ti danglam lo thei lo a ni.

“Ka sawi tawh kha, eng thil pawh lo thleng se dawnsawn thiam tur a nia, mipa takin kan hmaa thilawm hi hmachhawn dan thiam tur a nia”

“A dik alawm, i hrethiam thovang. Val, nang chuan. Ka ngaihtuah lungpuam deuh tum hi chuan thih daih mai te hi ka chak rum rum thin. Mahse, nangni min fuihna te hian min chhawk thin a, beiseina min pe leh fo thin a ni”

“Thil hrehawm leh hriatthiam har tak a ni ang tih chu a hriatsa reng a, chutihmeklai chuan kan chunga thil lo thleng kan hmachhawn danah hian keimahni nihna tak tak hi a langchhuak thin a ni tih hriat reng tur a nia. Mihring taka thlir chuan tunah pawh Zorini chu hmu leh pawh ni ila dama hmuh leh beiseiawm a ni hran lova, chutih rual chuan kan rin loh ang tak pawhin thil a thleng ve thei thova, chuvangin eng thil pawh lo thleng se i inbuatsaih thiam hi a pawimawh. Thil țha tam tak kan chan zinga a tha lo ni a kan hriat a lo tel ve hian beiseina neih te hi a har thin a. Mahse, a thim zawngin engmah thlir loh hram hram tur a nia, tunah chuan a sarhu lai leh a boruakin min delh lai a nia, hlim tum rawh ka va ti hram lo che a, hunin a herliampui theih tura nangmah inbuatsaih thiam turin ka ti che a nih chu”

“Ka lawm thin val, thian țha tak nang ka nei che hi. Ka theihtawp ka chhuah ang. Damin kan inhmu leh ang tih hi han beisei ,hin mah ila i sawi ang khan chhungril takah chuan chu thil chu a thlen rin a har tawh viau mai bawk si a, awmdan thiam pawh a har ka ti khawp mai. Mi hmuha mawi lo khawp emaw thil țha lo tur zawnga ka awm a nih chuan min hrilh zel dawn nia, engmah hi ka ngaihtuah tak tak hleithei lo” ka ti a.

“Beiseina kan neih chu a thiang a alawm, thil dik lo pawh a ni lova. Chutihrual erawh chuan kan beisei anga thil a thlen loh hian a vuaklet hi a na țhin a, chuvangin beisei dan thiam a, engpawh thleng tura inbuatsaih hi mipuitling awm dan a nia. Harsatna chulamah chuan i nei lo turah ka ngai. Mi pangai i ni a, thiamna lamah nise nakin lawka graduate val ni mai tur i nia, midang aichuan thil ngaihtuah leh dawnsawn pawh thiam zawk tur i nia lawm”

Sarthli niawm tak, rozeta lo thaw vawk vawk mai chu ngaichang niawm takin kan ngawi dun vang vang a, khua chu thim viau lo selang chuan khawlai vaivut leh hnahthel ro vel chu a leng chum chum kan hmu ngei ang le. Khua a thim miauva hmuh theih hek lo le.

“Engtik nge Class in țan hun hi ni reng reng a?”

“Karleh lehpek khi a ni tawh, Thawhlehniah”

“A nih tak chu, a hnai tawh phian bawk si a ni maw chu”

“Nia, hnai tawh angreng khawp mai, rilru a phirkak țuai mai”

“Hetia Zorini a awm leh bawk si chuan a nau ringawt chu a awmthei awm si lova..”

“Nia, an inluah tur pawh ka chhuk hunah ka sawisak leh mai a ngai dawn a ni. A hlim ve asin mawle kan en ni te khan..” ka mitthlaah chuan an inluah tur kan en ni a kan awmdan te chu a lo lang nawn uai uai a, chhunzawm dan tur mai ka hre lo. Ka bula thu ka thianpa lah chu chuti ve bawk. A meibawm chu a phawrh rak rak a, zial chu a’n țan hluai ringawt a.

Tui tih hmel tak chuan a si vang vang a.

Tuallaia țhut tlaivar ngawt thu a awm si lova reivak lo kan țhutdun leh hnu chuan mahni inlam pan chuan kan haw dun ta a. Ka tan erawh zawng zan hi hahchawlhna hun a ni mawlh lo a ni ber mai.

Ni a liam a, hun a kal hnem poh leh beisei a bo tial tial mai si.

Khawtlangin an zawn hun ni hnuhnungber, ni sarihna pawh chu a lo herchhuak ve lo thei ta lova. Chu ni lo thlen chu a hma daih ațanga ka huphurh em em kha a ni. Thleng lo hram tura beiseina ka neih ve ngar ngar laiin duh reng vang ni loin a lo thleng lo thei bawk si lo.

Zorini bo zawnna, a nawlpuiin an neih chu a tawp tawh dawn tihna a nia, a hrilhhai thlak hle mai. Damchhunga in hmu leh tawh lo turin min kalsan ta em ni ang? Zorin, a lo va mak ngai ve mawle..

Zing ațang chuan ka thochhuak peih lo hrim hrim, ka chhungten tuk,huan kil tura min lo koh pawh chuan ka eichak loh thu leh nakina ka ei mai tur thuin ka lo chhang liam mai a, an rilru chu a nuam chiah lo mai thei, hmuh hrehawmin awm lem lo mah ila ka khawsak phung chu a pangai lo hle tih an hai bik hauh si lo.

Ka nu chawei kham chuan thingpui thlum min rawn siam sak a, chu em chu lo hnar nuam tawh hek lo ka insak ta hram a, a thawh phei chu ka thawhchhuah phah lem hlei lo va.

A hnu deuhah chuan ka u a lo lut ve thung a, “Insiam la, chhuak phei ve ila, khatia awm tlawk tlawk ringawt te chu” a ti a.

“A la hma e, nakin deuhah le” ka tih sak a.

“An thang rei vak pawh ka ring lo” a ti leh ringawt a.

“Tu te maw?’ tiin ka lo zawt hu a.

“Aw bo zawnga chhuakho mawle”

“Engngatinge?”

“An hmuh loh te chuan vawiin hi huntawp ni a ni tawh a, vuina hunserh te hman a ngai alawm”

“E, a ruang awm lovin vuina hun an hmang dawn maw?’

“Hmang dawn e, huntawp an siam țhin alawm.”

“A ruang pawh a awm si loh chuan a va ho duh awm ve”

“An siamchawp țhin alawm a ruang ang turin”

“Eng chu? Milem maw?”

“Amh.. aw. Mibo zawnga chhuak hovin a remchang ang angin an siam mai a, changel kung te pawh mihring ruangam ang thei tur khan a ni mai a, puanin an khuh leh vek thova..”

Ka țhuchhuak chiang kher mai.

“Chutiang a theih loh. A ruang ber pawh awm lova engatinge vuina hunserh te hman an tum ngawt” ka vin deuh mai thei e.

“Khai khai khai, chutiangin an ti ngailo, hmanlai atanga an lo chințhan tawh a nia, kan duh emaw duh lo emaw lam a ni lo”

Ka na ngawih ngawih.

“U, a thih hi ka ring thei  lo, engtikah emaw chuan kan la inhmuh leh ngei ka ring asin”

“Ni e, chu chu keini pawhin kan beisei vek a lawm. Mahse, tunah kan hmu mai rih si lova, kan khua mai bakah khawțhenawm te thlengin kan buai phah luih luih tawh a, a inthlahrunawm ve deuh a lawm, bakah tihdan phunga neih țhin a nih anga nisarihnaa hun tawp hman hi midangte buai lutuk tur ven n ate pawh a ni ang a, hemi hnuah hian zawn a ni tawh dawn lo tihna a ni chuang hleinem, lungngai reng reng suh” tiin min hnem a.

A hnu deuhah chuan ka pa leh ka u chu an chhuak ta a niang, ka nu zai kal rat rat bak chu hriat ka nei ta lo.

Mitthi ang maia an vui tur ber chuan min ti na a ni. A ruang tal pawh kan hmu si lo, lo kir leh ta se.. Zorin, lo kir leh rawh. Khawnge i awm Zorin..?

Ka mittui dang turin chakna ka nei lova, lungchhia tih reh nana penchhuak tur khawpin ka huaisen hek lo. Zorin, khawngaihtakin lo kir rawh…

A lo luh lai pawh ka hriat hauh lovin Lalvala chu ka pindanah chuan a lo penult reng tawh mai a. Chutihlai chuan khumah țhuin tukverhah ka dakchhuak mek kha a ni a, ka rilru no vanglai leh mittui nena ka lo inchiahpiah lai a rawn nang lo chu thil lawmawm tak a ni mahna le.

“In siam la, chhuak phei ve dawn tawh ila” a ti a.

“Val, ka peih lo viau a ni”

“A khai, khatia i awm khan i nawm phah huai huai chuang lovang. Bakah, vawiin phei chu huntawp ni a nia, lan ngei a țha e”

‘Hun tawp’ ti chuan ka phun sap a, ni chu thu chuan chemte tluk zetin min vit ni hian ka hria, Zorini tan huntawp siam hi ka phal thei lo a sin. Engtikah mah ka phal ngai lovang.

Ka phun sap chu a hria a ni mai thei, inthlahrun hmel tak chuan ‘Tihtheih dang kan nei rih lo a ni’ a ti a. A dik reng, engmah tih theih dang kan nei si lo alawm. A thusawi chuan ka ngaihtuahna bing lutuk ațang chuan min kai harh deuh a, vuina hunserh hmanna lama kal ve tur chuan ka insiam zui ta nghal a.

Kan chhuak tur chu ka nu chuan, “Mama, chaw bar lawk la” a lo ti a, chaw ka ei lo tih pawh ka lo inhre leh pek tawh lo. Ka ril a tam chuang bawk si lova, eichakna pawh ka nei lo.

“Ka ril a tam vak lo, nakinah haw hunah ka ei mai ang”

“Ei la, hmanhmawh ngai a ni chuang hleinem, chutia tlangvala pumpa chawnghei ngawt tur a ni ngai lo” Vala chuan a lo ti zui a.

Ka ei phah chuang lem hlei lova.

Zorini te kawmchhakah, inhnai berah chuan kan awm a, boruak chu ka kham hluah hluah a ni. An inah chuan nu leh pa thenkhat an zai dap dap bawk a, chu chuan lung a ti zing zual niin ka hria. Kan awmna inah lah chuan lut leh chhuak an in dawt zut mai bawk si. Tlanhaw leh mai a ni ka duh ni.

A țhenin Thingpui an sem bawk a, kawtkai velah zawng zawng nen chuan a rem lai laiah chuan an awm țhup a ni ber mai. Mihring kan tam khawp mai.

Ni a hertan tihah chuan thawm a lo ri hak a, tukverha ka’n dak chhuak chu ka inchhir kher mai.

Tuikhur lam ațang chuan mi an lo haw nguai nguai a, a hmalam kal te chuan ruang chu an rawn zawn ta a nih chu! Țap rawih rawih thawmin a lo chhawn thuai a, an ri ta mur mur a.

 Ka thlir reng lai chuan ka hmuzui miah lo thung, ka mittui chu ka biangah chuan a luang ngiai ngiai a, țahchhuah hawk mai ka chak, mahse ka hrawka hnawhtu awm vang chuan ka țapchhuak thei si lo.

‘Zorin, khati khan maw i lo haw tak, a va mak em ve le..’

___________       __________
        KA NAKRUH BO


          Chapter-V



Zorini kan vuiliam ni ațang chuan hmasawn a hnehin ka hnungtawlh hret hret zawk ni hian ka hria.

College țan hunah pawh Aizawl lam panin ka chhuk thei ta lo kha a nia, ka chhungte lakah pawh ka inthlahrung viau mai.

 Mahse, chhuk ngawt pawh ni ila lehkha ka zuk zir theih ngut pawh ka ring mang si law. Sum ka zu khawhral mai mai dawn a ka inhriat vanga chhuk duh ta lo ka ni. Ka chhungte pawh chuan mi han tih vak ngaihna an hre hran lo. ‘Kum leh lamah a chhunzawm mai ang chu thatharin’ te min tih sak ta vel mai mai niin ka hria.

‘Khaih khaih khaih, ka thu lo ngaithla theuh teh u khai. Sawrkar thuchhuak angin March ni 15 hmaa lo hal tur a ni a, Ni 10, zirtawpniah hian meikawng sial tur a ni ang. Chuktuah huan nei zawng zawng ten ni 10 ral hmain hal fel vek tur a ni. Meikawng țhataka satin mitin te fimkhur turin kan inngen a, ram tikang an awm a nih chuan lei chawitir an ni ang’ tia tlangau, thlertin rawn suartluantu chu lo au nawmnah deuh tawk lah bo lo.

Ka nuin kan huan sirah ținkhat hmun vel lek thlai hmuntur  a vahtir ve vang chuan phur em em vang pawh ni lovin kan huanlu a meikawng sat tur chuan hlawhfa hruaiin ka teichhuak ve kha a nia. Hna hram thawk ngai hran lo mah ila han tih ve chawt chuan a lo thawh theih phian mai. Bakah, ina awma inngaihtuah vung vung aichuan midang nena hna han thawh ho a, han ti ti ho te pawh chu a țha zawk mahin ka hria. Rilru an chhawk deuh.

Ka nu chawhmeh min siamsak turin a kal tel ve bawk a, ka u chu hnathawk țhang tih takah kan thawh ang ang chu a thawk ve bawrh bawrh mai thung a. Rin aiin a thawk thei fu lehnghal a, a mipa zawk mah ni ila ka tluk lo lam mah a ni.

“Hmanzan chu saw mi kan piah hnahkhar hmunah sawn sava riak ka chang e ka tia, vahrit an kai țan tihah mihring thawm niawm tak hi ka hre sek mai pek a, sava riak chang ve turah ka ngai a, a thawm a na angreng bawk sia sava riak changah chuan ka ti deuh a. Ka auh dawn chuan sava an kai chauh bawk sia, thawm ka chhuah loh chuan in ral palh ka hlau bawk si, a ngeiawm duh tak tak a nia aw. Pakhat ka kah hnuah chuan a thawm a reh leh hmak lawi a, rilru nuam lo deuhin ka awm phah alawm” tiin hmalai kan chawlh lai chuan kan țhian pakhat chuan a ti a.

“I hlau mai mai a ni lo maw?” tiin ka u chuan a lo chhang thuai a.

“Haha, hlau love, sawlai te chu kumtin ka sava channa alawm, mi hian an hre fu vak lova”

“A ti tak tak nge phei chu ka hre lova, kan makpa paw’n tun thlatir lam khan khu mi kan thlang kawngpuiah khuan ‘Sairawkherhin min perh e’ a tia lawm. Ani saw chu dawt pawh hi a thutak sawi mai thei zel a” tiin pakhat chu a lo nui kak kak bawk a.

“E khai chu helai ram chu zan lamah chuan a hrang a ni maw” ka lo tihsak ve hluai a. Kan khawmite thiltawn, hlauhawm deuh kan hriat te chu kan sawi chhuak zui a, hriat an lo ngah nangiang mai.

Meikawng kan sialna lai chu hmun rem a nih vangin a sawt ang reng viau a, chawfak hmanhmawh vak lo ila chuan a zawh hram theih awm mange tih tur khawpin kan sawt a,’ hmanhmawh vut vut lem lo ang u, kan tlai chuang lovang’ tiin chawfak tur chuan thlam lam chu ka pan pui ta hlawm a.

“Mami chi kan nei reng reng hleinem, lovah lai khan kg chanve kha kan dah kha nia” tiin thlam kan thlen chuan ka nu chuan ka u chu a lo be thuai a.

“Keima’n a nih kha dahtha, rapchungah khan burah ka dah a nih kha” a lo ti thuai a.

“Vawiin chu Mawite kan ei hâng deuh dawn nimai, tuideuhin ka siam sak ang che u tihnaklaiin chi ber a awm si lova, buh tlem ka thlak a, ka chhum ta ringawt mai” tiin kan hnathawhpui pakhat chu a be zui a.

“A tuizawk daih ang chu” Mawitea chuan a lo ti țha ve mai a.

Chi tel lo pawhin puar el euhvin kan ei thei tho mai.

Dar 2:00 a pel fel awrh tihah chuan kan zo der mai a, tih tur dang awm vak hek lo kan haw ta daih kha a nia. Inhlawhah chuan a nuamsa pawl tak an ni mahna le.

Zanlam chu thianpa Vala nen kan inzui rawt a. A bialnute inah bak kan leng ngai lem hlei lova, midang bulah chuan ka awm țha peih lo a ni ber mai. Anni pahnih hian ka khawhar an hrethiam berin ka hria.

“Nizan chu U Liankunga ramvak a lo tlanchhe haw a ni awm asin mawle” Vala chuan a ti a. A thiannu nen chuan phawk fe hian kan en hau ringawt a.

“Chhuana te huan lam saw tunlai chu an sawi hrang deuh tlat a ni” tiin a sawichhunzawm țha duh mang der lo lehnghal a.

“U Liankunga chu engngatinge a?” a țhiannu zawk chu dawhthei lovah a țang ta.

“A sava zawng an lo tihthaih a niang, a iptepui te pawh a tlansan phung a ni awm e”

“A va patling hna lo țhin e aw” ka lo tih sak mai a.

“Tunlai chu in huan bawr vel saw an sawi zauh zauh a nia, zan lamah chuan a kal chi loh mai thei a ni. Keichu ka kal duh miah lo” Vala chuan a tih zawm zat a.

“Mipa hi inhuai reng reng ka ti, zanah te hian ramhnuaiah te hian in kal mai mai zel a, keichu ka ngam teuh lo mai”  tiin kan nula rim chuan a lo tuihnih ve a.

“Vawiinah Mawitea paw’n thawm a hriatthu a sawi tak a sin, engemaw chu a awm a ni maithei ni chutia an sawi an sawi chuan, mipakhat lek sawi chu nise ngaihkhatah a ngaihsak mai theih a, pahnih pathum laiin an sawi si chuan” ka ti ve bawk a.

“Ramhuai a awm a niang” Vala chuan a ti sam mai a. Kan enghelh zui teh chiam lo.

Haw kan tum lah chuan a bialnu chuan ‘min sawi țhaih te te a’ a ti tlat bawk sia, duhaia rei kan lenphah a sin le.

Zana han mut chiah hian ka khawhar hi a zual țhin. Mut hma, mi bula awm lai hi chuan engmah ngaihtuah lem lo hian a lo awm ve mai mai theih a, mahnia awm a han mut chiah hian ngaihtuahna a vak kual ta țhin a, mutthilh mang lo chang hi a tam zawk mah awm e. Ngai ka awh hleithei meuh lo. A chang phei chuan Aizawlah chhuk ila ka zia deuh mai te ka ring leh rum rum țhin a, han chhuk em chu ka ngaingam chuang bawk si lo..

“Mama, nimin khan ka sana ka hawn theihnghilh daih a nia” tiin ka u chuan tukțhuan kan kil lai chuan min hrilh a.

“Aw, a va zia lo ve. I ti bo chu a ni em lo maw?”

“Tibo lo, kan bun hma khan thlamah ka dah a, charlam bangah khan hmawlhteah ka tar a, haw dawnah khan ka theihnghilh daih lawm”

“Chuan… lam sak i duh deuh tihna a mi?” ka tih chuan mi han nuihtlawn te te a.

“I peih chuan ka lawm viau ang. Kan kal leh har tawh awm sia” a ti a.

“Ka va kal dawn nia, Mahse, ka thawmhnaw chu i lo suk ngei a ngai dawn a nih chu”

“Su tuk e le, ka lo nawtmar thlap dawn nia”

“I kal chuan tel kha lo hawn daih rawh, nimin khan kan hmang leh ta mang bawk si lova, ka’n hnutchhiah ngawt taknain kan kal leh meuh chu a hla tawh dawn sia” tiin ka nu chuan min chah belh bawk a.

Tukțhuan eikhamah chuan muangchangin huan lam pan chuan ka inchhep chhuak a. Hnathawk tur ka ni lem lo bawk a ka hmanhmawh teh chiam lo. A rem leh thingtuah tur te ka pu haw pah ve bawk ang chu.

Naupan lai atanga dai vak hrat ka nih ve lem loh vangin dawih em em lo mahila ramhnuai hi ka nel hran lem lo. Chutihrual chuan kan huan lam na na na chu kan kal ngun ve em avangin hlauh ngaihna ka hre hran lo hial zawkin ka hria. Chuti a nih mek lai chuan kan huan chu ka thleng dawn hnai tawh tihah a bul vela thilthleng an sawi ho chu ka hrechhuak pek a, chhun eng mah nise a nuam chiah lo. Ka hlau viau hran lo nain engemaw awma ka rin ve tho vang chuan ngaih a ngam zat lo.

Thil hmuh leh hriat phei chu ka nei ve lem hlei law.

Thlamah chuan ka u Sana chu a lo inkhai nal nal chu ka hmu mai a, ka nu tel dah erawh chu ka hmu pek lo, ka’n zawn ngial pawhin hmeithai zinga englo zawn an sawi ang chauh a ni mai. Hmuh tur a awm chuang lo.

‘A hawn lo emaw a ti ang a, a phawrh hmaih emaw a ni ang’ te ka ti rilru ta vel mai mai.

Engemaw chen thlama ka khawmuan hnu chuan kawngpui kamah thing put haw mai tur remchang a awm takin tiin ka chhuak thla a, kawngpui dung chu ram lam hawiin ka zawh zel a, rinai takin a vang hrep a, ka duhai thui mah ka kal ta.

Kawr zai chhete, tuihna pawh awm mumallohnaah hian ka lut chhova, khawi emaw laiah chuan hnawng chip chep te chu a awm tho mai. Enginnge min mawlh pawh ka hre lo, thing ro puttur a awm ka ring a ni teh chek a niang chu. Hla phuahchawp nalh fahran lo sa chuan ka hawikual chho nasa mai a, thingro han lak mai tur lah chu a vang bawk si. ‘Pu haw lo tawp ang a vang emai’ ti rilru chung chuan let thlak leh mai tumin ka inher a, chutihlai chuan ka thlang lam atang hian tuemaw lo chho awm tak hi ka hmu a.

Hnimin kawrzai chu a khuh nasat bakah a kuang a zim bawk si, chiangtak pawhin ka hmu thei mai lo. A sam chu a bawrchhawr hle tih ka hre thei a, chutiang mi awm kan khuaah an awm lah ka hre si lo, hmeichhia emaw ni dawn le?

Kawr ațang chuan chhuakin a kam maia changel hung bulah chuan ka chhuak phei a, thawm ka neih loh vang chuan min rawn hmu hran lo. Ka thlang lam ațanga lo chho mek chu kan khaw mi a ni hauh lo mai! Tawnzau a ha mai bawk si, ramhnuaiah tawnzau nen chuan engnge a tih tak ang? Lo biak ka tum chu ka thulh chiang kher mai. Ka bula changel hung karah chuan ka inzep lut thuai a, lo enchian tum chuan thaw dep dep chung chuan ka lo nghak ta ran a, ka ngaihbel nge ni thawm a dim ve hrim hrim pawh ka hre lo, a lo chho thawm chu hriattur a awm hauh lo mai.

Changel hnahro lo uaithla min hliahtu chu dimte chuan ka han keu dai dai a, ka zawn tak mai chu a lo thleng tawh chu niin, amah chu ka hmu chiang ta kher mai. Kan khaw mi chu a ni lo chiang mai. Ka hmuh ngai awm pawh ka hre lo. A balh hmel roh phian bawk si. A sam lah chu enkawl uluk loh tih hai rual a ni lo.

Engnge hetah hian a tih ang le? Hei hi an hlauh țhin chu a ni angem le?

Helai ram a hrang an tih huai huai chhan hi amah a ni mai angem? Chu chu lo ni ta se khawiah nge amah ber hi a chen ang a, ramhnuaiah hian a vak rawlai mai mai em ni ang? 

Amah hmuphak tawk vel chuan ka zui chho ta a. Mahse, thui pawh ka zui hman lo tihah chuan ka hmu zo ta reng reng lo mai a, a penna lai awm pawh ka hre bawk si lo. Ngawireng chuan thawm ngaichangin lung phenah ka thu ran a, nghahloh ang hmak mai lah ni chuan.

Ni pawh a her bawih tawh tih thleng chuan ka ngaichang reng a. Engmah thawm riva hriat ka nei tawh lo. Mihring ni lovin ramhnuai mi ka hmu te a ni lek ang ka ti, ka han ngaihtuah chiang a, ka hlau dawn dawn ta mai a, a zia lo viau a ni.

A thawm ngaichangtu zawk chu ui eiru ang maiin ka thawm a hriat hlau tak chuan ka chhuk ta țhem țhem zawk kha a ni a, intih mipa chu a har ve viau a ni. Miin an sawi hran vanglai tak maia chutiang han tawn chu chhun lawn mah ni se a mi deh dan a dang zar mai.

Kawngpui ka thleng thla chu ka thawhuai a, ka tuipai ka inchhung chauh pawh chu ka ding khawmuang hman lo a ni ber mai. Kawrhma huh phung khawpa ka in tak kha mawle.

Hlau ru reng e ti lo chuan hlau anga awm loh hram chu ka tum lui ve tlat a, tlanchhiat phei chu tum lo ve tak mai ka ni.

A kal erawh chu ka kal chak thawkhat a niang khua reng ka thleng hma mai a.

In ka luh lai chuan ka nu chuan thing a lo hak mek a, “Nu, tel chu i hawn a ni lo maw ka hmu miah lo a nia” ka ti a.

“Hawn nang maw aw, tapchhak kil dinglamah khan sarangah ka dah kha mawle, ka chhuah dawn pawhin ka hmu alawm” a ti a. Amah lah chu a chiang viau bawk si.

“A awm lo reng reng, Mami sana chu ka hmu mai a”

“A hrang an tih kha, chu chuan a la niang” tiin Mami chuan a pindan lam ațang chuan min lo chhawn ve bawk a. Chu thu chuan min khawih zawk mai! Ka mi hmuh pa kha ka mitthlaah a lo lang nghal uai mai bawk a.

“A khawilam hrang nge maw awm ang le, a awihawm lo emai” ka nu chuan a ti hlak a.

“Tunlai chu sawlai ram vel saw zanlamah hian an sawi hrang riau a nia” ka u bawk chuan a lo ti leh a.

“Tupa zurui sual thilhmuh dikloh mai mai bak a ni hlei lovange a, khawia awih tlak pawh va ni nek suh”

Chutia an nufaa an inchhawn an inchhawn lai chuan inbual turin bualin lamah ka luhsan ta daih a. Ka thilhmuh chuan ka rilru a luah reng mai, hmuhthiang lo emaw ramhuai ka hmu te hi a ni mai angem? Mahse, chutiang thil ni se, ka khua te pawh a sik ve mai thei asin. Ka khua lah chu a sik der mai si lova, hmuhthiang lo chu a ni em lo a niang.

Chu ka thil hmuh chu Lalvala takngial pawh chu ka hrilh duh ta lova, a chhan chu an sawi hran lai a ni bawk nen a belhchhah zawnga thu thantir kha ka duh teh chiam lova. Mikhual ram vak mai mai te a lo nih phei chuan dawihzep chan ka chang mai dawn si a, a mualpho thlak mai mai ang.

Ka sawi chhuah loh vangin ka rilru a kap lo phei chu a ni hauh lo mai.

Muthmunah te chuan Zorini theihnghilh thak chuan ka ngaihtuah zawm a, ‘tunge ni ang?’ tih ringawt mai chu. A chhanna lah chu ka hre der mai bawk si lo. Khawțhenawm a mi ramvak kan khawrama lo lut an nih te ka’n ring deuh a, mahse tawnzau nen silai pawh keng lova ramvak an awm ka ring chiah bawk si lo. Rindan thiam a har viau a ni.

A tukzinga kawtlai ka chhuak chuan samthura niawm tak chu ka hmu hlawl mai!

Buhfai niawm tak hi satha ip hian a pu a, iptepui hluizet tawh hi puar luahin a ak bawk a, ka hmuthut kha ka’n phawk hman deuh viau a chu kan țhenawmpa tlangban ban phun lai chu kalchilh meuhin ka va zawt a, ‘Thingzai a niang, tute thing zai nge chu ka hre hauh lo’ a lo ti mai a. Hawlhthep ang suai suai ka ni maiin ka hria, ka helhkam zawng zawng chu lakbo ang hlauh a ni ta.

Lalvala te ho ka lo hrilh hman lo chu ka lawmna belhchhahtu a ni hial awm e, han hre na se chuan fiamthu thawh nan min hman sak leh nasa dawn emai.

Mahse, ka ngaih a ti țha chuang lo. Thingzai pawh chu lo ni ta se amah hi mite tihțhaihtu a nih ngat chuan a phutawk engemawni chu a dawng ve ngei tur a ni. He thil hi ka finfiah mawlh ang.

Thawhphan pawh la rehfel hma hawt chuan chu pa hnung chu ka zui phei ta a, Pu Rinawma te inah chuan a lut ta a, han zui lut ve ngawt ila eng chhuanlam nge ka siam tak ang aw.

Inngaihtuah buai hma chuan an kawngkhar inhawng huai maiah chuan ka dak lut reng tawh a. Nu ber chuan fianpui lianin a bai chhuan chu a lo thlau hauh hauh a, a bul maia țin thukah chuan hnahthial bal niawmtak hi thirbel lianah a lo inchhuang sur sur bawk a. Tapchhak hnungchhawn zawng chuan Pu Rinawma chuan dawnverh hian tuthlawh fang tur niawm tak chu a lo verh mawlh mawlh bawk a, min hmu mai lo. Tuidehna bul maiah chuan ka mi um pa chu a ding ther huang a, naupang pahnihin chhuata bawk meuh chuan lehkha an zir nge milem an ziak zawk an lo buai dun viau mai bawk a.

“In va buai ve” tihpah chuan ka pen lut zui mai a.

“E, lo leng rawh Chhuana, engnge ni i duh ve teh mial a?” Pu Rinawma chuan a lo ti a.

“A, eng duh love, ka lo teilut ve mai mai. In veng lam hi ka kal khat em a” ka ti ve mai a.

“Lo țhu rawh, thingpuite kan in dawn nia, i chhukthla leh daih tawh emaw ka lo tia, i lo awm reng a ni maw?”

“Nia, kumin chu thawk te ka’n la ve phawt dawn emaw ni te ka tia ka la chhuk rih lo a nih hi”

“A nih chu, engnge i zir ber tunah hian?”

“BA ka zir ve leih leih chauh a la ni”

“E khai chu i zirsang tawh khawp lawm. Leivunga in tawlhna reng a la rei loh nen” tiin a nui hak hak a.

“Hei mikhual in nei elo? Khawilam mi nge ni?” tiin ka thlang deuh a satha ip a buhfai leh chawhmeh tur eng ilo țawn mawlh mawlh lai chu ka melh a.

“Nia, Thing ka zaitir ve e ka tia, Ber thla velah in sak ve tur emaw ni te ka ti ve deuh a”

“E, a nih tak chu mawle. Khawilaiah nge i zai tir a, thing țha hi a vang tawh ang reng bawk sia”

“Nikum kan chul mawngah khan mawle. An zu hmu fu lo hlawm a niang, keipawh kumtawp lam khan ka hmu chauh alawm, a vanneihthlak khawp mai”

“A hnaiphian bawk sia, i vannei hle tak mai. A lian em? Tum engzat nge chhuah phak hmel a?”

“Fit 12 khan țum hnih chu kan han pawt a, a ler lamah a bawk sek a awm a, a zar lian a tla bawk sia, a tum thumna tur chu fit 9 erh awrh chauh a ni.”

“Chu a chhuak tha dawn khawp alawm”

“Nia, chak hlui te fawm khawm chuan kan in khawrpum ve phak mai ka ring deuh a”

Thingpui senhang te ka inhnu chuan muangchangin kan inlam pan chuan ka inchhep chhuak zui ta a.

Nikum chul lama thingzai daih si engngatinge kan huan lamah daih daih khan an thingzai pa kha ka hmuh le? Chu zawhna chhhanna chu a ni finfiah ka ngaih tak chu. An thing zaina hmun chu kan khaw chuan hnuai lam a ni a, keini huan awmna lah chu Chhim lam kawtchhuah hawia kal ngai a ni daih bawk si. Chu lai tak chu a ni ka hriatthiam loh chu.

Lalvala han hrilh dawn ila a nuih a zat mai mai ka hlau bawk si. Keimaha hma han lak ve ngawt lah chu niin ka hre chiah bawk si lo.

Ka rilruah chuan Zorini pawhin hmun a chang meuh tawh lo. Chu thil ramhuai sawia an sawi leh an hlauh chu finfiah a, manchhuah ka chak zek zek ringawt mai a ni. Ka hriatdanah chuan Pu Rinawma te thingzai kha ni miau hek!

Tukțhuan eikhamah chuan chempui ka tat hriam ver vawr a, kan huan lam pan chuan ding takin ka kal ta nal  nal a, kan huan pengah pawh kalpeng ta lo chuan kawngpui dungah chuan ka kal zel a, a hma ni a kawrchhete ka zawh chhohna ah chuan ka lut chho zui leh a, khawilaiah tak nge kha samthura kha a bikbo tih han chian tum ka ni ber mai.

Kawrte pawh zawh duh lo chuan mualdung zui chiah si lo hian kawrdepah a nakzen zawng hian tlang lam pan chuan hawi kual vak vak chung hian ka chho ta a. Țhang bawn leh perhte vel  a tam vang chuan khawhawi erawh a tawi viau thung.

Ka chho thui zel a, ka mi um ka hlohna lai ka thlen chuan uluk leh zual hian ka’n vak zau deuh a, engteh ruai pawh chu ka hmu chuang lem hlei lova. Chumi chhak deuh kawr ruam rai zau ve deuh hlek awmah chuan Thingzaina hnuhma hlui hi a lo awm a, hlang te pawh raw ram deuh hmel tawh mahse a ngai ang ang chuan a la awm a, hnuhma thar erawh a lang chuang lo.

Tlangdung ka han chuang chhuak hial a, engmah thildanglam hmuh tur lah a awm der bawk si lo. Ka innghahna ber chu ka chhoh lohna lam tlangdunga chhuk a, chutah chuan engemaw thil hmuh beisei a ni. Ka hmu leh chuang ngut ange mawle.

 Tlang zawlah chuan reife chu ka țhu chawl a, thawm riva hriat tur pawh a awm lo, thli thaw heuh heuh chuan hah a ti dam viau thung.

Tlangdung ațang chuan kawngpui lam pan chuan ka chhuk thla leh ta poh a.

Ka kal chhoh lohna lamah chuan beisei nei takin engemaw hmuh inbeisei fe chuan ka chhuk thla zel a, beisei ang he hu erawh chuan eng thilmah hmuh a awm hlei lova. Mihring hnuhma thar takngial pawh ka hmu lo chu mak ka ti viau mai. Engemaw thil vanga hmu palh mai mai te hi ka lo ni lek ang ka ti aw.

Mahse, mi tihțhaih țhintu kha mihring emaw, eng thil emawni chu a awm ngei niin a lang bawk si. Kha Samthura kha ni kher mahsuh se, ramhuai pawh ni ang hmiang ka fiah ve chak hrim hrim alawm mawle.

Kawngpui sir hnimbuk hnuaiah chuan ‘Engemaw’ hmuh inbeisei chuan ka thu ta ran a, kawrkam maia awm ka ni bawk a, chu kawr zawh tu chu tupawh nise ka hmuh hmaih bik hauhin ka ring lo.

A hma ni lama ka hmuh hun awm velah te chuan beisei nei takin kan dakfan kual vel a, mahse beiseiloh ang chauh a ni mai bawk si. Țhutrei poh leh mawng a kham satliah a ni ngawt tawh mai.

Ni chu vanzawl ațangin a her bawih tawh tihah pawh chuan thilnung chesawn chi han phezeuh awm pawh hmuh tur ka la nei chuang lo. Ka ril a țam ve tawh deuh bawk si chu haw mai țhain ka hria a, ka tawmna ațang chuan mawngkham urh chung chuan ka chhuak ta a, Ramhuai chãn chu chãnchhuah a har emai ti rilru chung chuan nui ru vur vur chungin ka haw ta hna hna a.

Tihngaihna dang ka hriat loh vang chuan Lalvala chu zana sava riak chanpuiah ka sawm a, ani lah chuan ‘nanga chhuak ngai hleilo kalpui chu hlawhtlin a har awm emai’ tiin mi lo hnial fithla țhak leh ta nghal a. Tunge maw thurualpui tur ka sawm tak ang aw.

Kan țhenawm naupang pahnih chu ka sawm ta ngawt a, anni lah chuan an lo chak sakhai a, ka thil tum lah chu an hre der mai si lova.

Kawnga kan kal țham țham lai chuan ka duh dan chu hetiang hian ka hrilh ta a, ‘Kawngpuiah mei in chhem ang a, min lo nghak mai dawn nia, thawm dim vak pawh a ngai lo. Keiin tlanglamah sava ka lo han chang ang a, thawm dim a ngaih deuh hunah chuan ka lo chhuk ang a, lungte in emaw ka lo vawm zeuh mai dawn che u a nia, in koh chi a ni tawh dawn si lova. Chuan ka lo vawm hunah che u chuan min hawsan mai dawn nia” tiin sawidan tur ka ngaihtuah mumalloh ang ang chuan ka sawichhuah pawh chu a thu a mum lo tih ka hai hauh lo. Mahse, tihngaihna dang hre chuang hek lovi.

“Kan lo kal ve dawn lo a mi?” tiin a u zawk chuan min zawt ta ngei a.

“Umh, kal lo ang, ka lo vawm hunah che u khawlam panin in kal ang a, chuan kan huan zawnah khan kawngthlanga hnahkhar hmunah khan nangni in lo va kal dawn nia, chuan hawpahin ka lo au mai che u ang a, hei silai ka keng bawk sia, intihpalh a hlauhawm tlat. Mahse, sawtah a hla lamah chuan khua han nghak tlai deuh phawt ula” ka tih chuan an hrethiam ve mai chuan ka hria.

Kan kawmthlang te U.T ka hawlchhuak ve ngawt kha a nia, vawihnih vawithum vel chu ka hmang ve tawh a, ka la kap thiam ve chek ang chu maw. Mu hnih leh a hlo tam tawk chu, musep kah khat daih vel tur nen chuan min paitir kha a nia. Kah ka tum ber lah hi..!?

Unau hmelhai hun awm velah chuan kawrte kam chu kan thleng ta a, thingtuah tur chu ka fawmkhawm pui zung zung a, ka chhem alh sak hluah hnu chuan sava zawng tur awm tak chuan kawngchhakah chuan ka perkai ta thauhva, thui pawh kal lovin chhun lama ka bihrukna laiah chuan a khawthlir a thui ber vang chuan ka țhu bo leh ta daih a.

Ka nau hruaite chu an ri teng tung mai a, rei nghah a ngai lo kher mai, thawm ka hre ta!

Mahse chu thawm chu ka chhak lam ațanga lo kal a ni tlat mai. Kan awmna a inzawn hmel ropui bawk si. Kawngpuia lo chhuak lovin kawngko chhaklam chu a chhui phei a nih ngai chuan amah chu ka hmu thei dawn si lo. Ho deuhvin ka chhuah dawn tlat in ka hria.

Khua lah chu a thim angreng bawk sia, vanvar eng uau mai lo chu eng dang han chhit ngam a ni bawk si lo. Thawm dim takin kawrah chuan ka vak chho thei mai angem aw..

Ka thawm hriat lah chu a reh hmak mai bawk si, vahchhuah tum a ka inher rem lai tak chuan ka hmalama kawrte-ah chuan mihring ruangam ngei mai hi a lo lang ta hlawl mai a, hairual a ni lo. Ka hmuhdan chuan kha thingzaipa ngei kha a ni.

Kawngpuiah chuan a chhuak thla a, ka zawn a thlen veleh ka kap ang tiin ka UT ken chuan ka lo tin vang vang a, ka kut a khur na sa mai chu kahțhelh ka hlauh luatah ka duhai hma in ka hmet per ta tlat mai le! Ka kap fuh angem le?

Mihring te țhawt chu ka hre ngei mai a, kawngpuiah chuan rang takin ka chhukthla nghal sun sun a, ka kahna lai awm vel ka en chuan hnuhma engmah ka hmu hauh lo mai!

Ringzet hian ka naupang hruaite chu ka auva.. Ka kahțhelh chu ka ring chiah lo. Mahse, thisen takngial pawh awm lo chu ka ngaih a țha chiah lo. Kawngthlang chu ka’ en kual pap pap a, phethla deuh san chu ka hmuin ka hria.

_____________                     _____________
                    KA NAKRUH BO



                    Chapter-VI



Naupang pahnih chu thaw hlawp hlawp hian an lo thleng chawp chilh ve mai a, “I kap tla em?” an rawn ti var a, sawi tur a vang kher mai.

“Ka kah țhelh a nih ka ring” ka ti hul hak a, an Hmehen ken chuan kawngthlang lam chu an han chhun kual pap pap a, ka hmuh ang erawh an hmu ve lo niin ka hria.

“Kan um dawn lo mi?” a nau zawk chuan a ti hem mai a!

“Um love, kan um phak tawh lovang Silai ri a hriat chuan keini chuan kan umpha tawh lovang, hawsan mai ang u. Sava pawh kan hmu tawh lovang, Silai a ri tawh bawk si” tiin haw chu ka han rawt a.

“Tlangah ka chho dawn i ti sia, helai lawkah i lo kap leh bawk sia” chu zawhna chu a ni pumpelh hram ka duh chu.

“Nia, Sava an thlawk kai țan tawh a, lo va pheiru tih tumin ka lo chhuk a, helaiah hian a thlawk kai lai ka hmu remchang em a, ka kap zui  ta nghal mai alawm mawle” ka ti liam ta ringawt a. Awih tak mawle.

In lam pan chuan ka haw pui ta daih a, hmundangah pawh ka pen pui duh ta lo mai, nuam ka ti chiah lo. Ka chhungrilah hian min țham er er tu a awm deuh tlat hian ka hria, ka tihloh tawp tur ka ti ta mai em ni ang?

Khawchhung kan thlen chuan a la hma ang reng khawp mai, ka intifai thuak thuak a Lalvala bialnu te inlam bawk pan chuan ka chhuak zui ve leh ta nghal a, hmundanga lenna tur hreve chuang hek lovi.

An kawmchhak kopang behchhan chuan ka’n zung zet a, inthlahrung fahran lo chuan an kawngkhar chu ka’n pawt hawng țhuai mai a leh! Nam khar leh nghal ngawt thu a awm si lo. Lalvala leh a țhiannu insiam țha chat chat lai chu ka melh ta ran mai kha a nia, sawitur a vang kher mai.

“Lo lut ta che” Lalvala chuan a lo ti hlak a.

Nui pat pat chung chuan ka lut zui lo thei ta lova, a țhiannu lah chu pindan lamah a tlan lut daih lehnghal rawl nen, awmdan thiam a har duh asin aw. Lalvala chu ka’n en țhin  a ngawi ngal mai a, ka nuih a za bawk si. Mi rawn en chu a nui ve ta ruh ruh a.

Ka tukkhumah chuan min țham leh rih a, “Mawl lutuk mai, thawm te nei hmasa ve ta che” a’n tiah! Ka nuih lah chu a za tial tial mai bawk si.

“Khatiangin in awm ang tih ring hek lo” ka tih sak a, “Chu pawh ni se” a la ti țalh a.

A țhiannu pawh a lo chhuak zui ve leh mai a, nula fing leh fel tih takah thil engmah thleng lo ang mai chuan pangai takin a khawsa zui leh mai a, a ruk tak chuan a insik nasa ve ngawt chuan ka ring. A mut hun hun chu aw rizai hnuaiah a zak ru veng veng dawn a ni maiah! Ka tih mah ni hlei lo le.

“Sava ka chang dawn i ti emaw tia?” tiin Pari chuan zawhna ang reng deuh chu min han pe a.

“Nia, ka lo haw leh tawh a nih hi”

“A lo tlan chhe haw  pek a niang chu mawle, amah te chuan khawiah nge maw a kal ngam ang?” Lalvala chuan a lo ti a.

“Thawm a awm lo lutuk a, ramhnuaia hun khawhral mai mai kha a țulna hre ve hek lo. Ka lo haw daih”

“I hlau a nih kha a” Lalvala chuan a lo la ti țalh a.

An awm a nuam lo dun ang reng bawk sia, zandanga kan len chen pawh kan leng ta lo, haw lam thleng chuan min la piai nawk nawk kha.

Mutura ka  inbuatsaih lai chuan ka lukham hnuaia lehkha lo lawr tat chu ka pawtchhuak a, Zorini lehkhathawn kha a lo ni a, uluk fe chuan ka chhiar chhuak leh dap a, ka chhiarchhuak hnem tawh ngang mai. Engngatinge heti ringawta min kalsan theih le? Thla thum dawn a liam ve ta, mak ka la ti tawp thei lo a ni.

Ka ngaihtuah nasat poh leh beidawnna mai ka chang leh bawk si. Engpawh nise he ramhuai ni a an chhal hi ka finfiah zet ang a Aizawl lamah ka chhuk thla daih ang. Class ka la chhunzawm ve thei chek ang chu maw, hetia ka awm ringawt hian sawtna a awm lem lo tlat. In pal harh vat ila ka tan pawh a țhat zawk mah ka ring.

Chutiang vel  ngaihtuah chuan ka lo chhing sek nge ni ka mumangah chuan engnge pawh ka hriat loh hian min lo um chiam pek a, ka thawm a na deuh a niang ka nu chuan an mutna lam ațang chuan min lo au thuai a, ka harh chuan thlanfim hian min lo bual nasa hle a, ka țhuchhuak hlawl mai.

Thosilen bana hrukpuan inzar chuan ka inhru thuak thuak a, ka mu zui leh mai a, mut erawh a chhuak ta lo khawp mai.

A tuk lama ka hmachhawp chu ka ngaihtuah chhunzawm nap nap a, ka kah ber kha mihring pangai nge ni ang Ramhuai? Tih mawlh chuan ka rilru a luah a, Ramhuai emaw te chu ni ta se khati mai chu a nih ka ring chiah bawk si lo. Mihring ni ta se engngatinge midang a tihțhaih kher ziah le? Khalai hmunah khan engnge a tih ang?

A hnu va chhui leh pawh chu thil chakawm tak a ni fahran lo khawp mai. Ka kahna hmunah lah khan thisen far takngial pawh ka hmu si lova chhui dan tur a vang dawn riau hian ka hria a, engpawh nise beidawnna tur tal te chuan han che chhuak ve leh hrim hrim phawt ila mawle.

Chu zan chu ka mu țha tehchiam lo kher mai, mang a fuh loh chu thuhran thawm engemaw hlekah ka harh nghal zel bawk si. Tukțhuan eidawna min kaihthawh pawh chuan ka mut a la chhuak ngawih ngawih hialin ka hria.

Ka pa Sikul kal tura a chhuah hnu chuan ngawirengin ka insiam ve nghal sawk sawk a, ka nu chuan “Khawnge i kal dawn?” min lo ti thuai reng a.

“Ka vak harh mai mai dawn, Lalvala te chulah thlairah a tam an tia, chungte chu ka thlen peih leh ka va en ang chu ka ti” ka ti a.

“Chutia i chhuah dawn rau rau chuan kaihzawl  pil min lo thelsak la”

“Engatan maw?”

“Ka pum hi a thip leh veng veng țhin a, ulcer ka nei ve deuh emawni ka tia”

“A awm leh ka lo hawn dawn nia, chaw min bawk sak la chhe te, chawhmeh pawh a ngai lo, chi nen khan a ni mai”

Hnuchhui tura thawk chhuak e ti lo chuan chemtum nen lawng chuan ka chhuak ta kha a nia, eng em a thleng lo turah ngai ta ila. Keimah hrim hrim hi chu ka inring tawk ve viau, ka kum phu lovin ka taksa a lian a, ka thau lem lova, sa inphut tawk vel hi chu ka ni ve. Thinthawk phutah chuan han hlauh vak bik ka nei tawh lem lo. Chemtum ka ak zui bawk alawm mawle.

Kawngpui ațang chuan kan thlek nawn leh ngial a, hmuh theih maiah chuan hnuhma thar chu a awm lo. Ka chem ah chu phawrhchhuakin ka hum nghet sauh sauh a, kawngthlangah chuan ka pengthla ta a. A zuanthlakna lai ni a ka hriat zawnah chuan kalin hnahthel ro a thisen lo roțhat mai chu ka hmu ta. A țha dawn e, mihring ngei a nih hi.

Mahse, hmanrua a keng angem? Silai te lo keng ta se ka hmuh hma hian min lo kap pawp tur asin. Chuti a nih chuan engnge ka tan awmzia awm ang le? Thisen chu thui vak lo hi mualdungzui zawng chuan thlanglam panin a kal a, a hnuah chuan a lang ta reng reng lo mai a. Ka enkual ngial pawhin khawilam hawiin nge a kal ka hre thei ta reng reng lo mai a. Thingler lam te chu ka’n melh țhin, engmah hmuh tur a awm bawk si lo.

Han bikbona tur rem chang a awm leh awm loh ka en kual ngial chung pawhin chutiang awm ka hmuzo bawk si lo. Chulai mual bawr vel fang chuan thlan tla hluamin ka vak kual a, hreh teh mah ila ka hlawhchham tih ka inpawm mai a ngai a ni.

A hnuhma chhui tur awm miau hek lo mawle.

Kawngpui ka chhuah chhoh chuan ka chau viau tawh, ka ril te a tam deuhin ka hria. Ka chawfun chu kawngsirah chuan theh ka tum zet a, ngaihtuahna thar lam um chuan  kal a tha zawkin ka hria, ka chawfun phawrh tawh chu ka ak tha leh a, khawlam panin ka let leh vang vang a, khaw thlen hma deuh a fehkawng hluiah chuan pengin chul lam pan chuan ka liam zui leh ta vang vang a.

Ka ngaihtuah chhuak har chu mak ka ti zawk hle mai.

Mahse, Pu Rinawma te lo chu keia feh ngai hlei lo hian ka va hre chuang lo ve mawle. Chul a kal an awm angem aw, zawh tur an awm loh chuan khawkhat zau ve lem chu a bawh chin a zau dawn sia phek zawn ngawt chu ka zuam chiah lo deuh.

Mahse, chumi vang ringawt a han thulh pha chu niin ka hre bawk si lo, beiseina zawng zawng sawmkhawm chuan ka kal lui zel tho kha a nia.

Ka kal chak bawk a niang chhuk kal a ni deuh bawk a ka thleng har lo kher mai, lo hmasa ber chu ka va chuang chhuak ta hlawl a, Buarpar leng chum chum karah chuan thlam ram tawh chu khat phuar hian a lo lang a. Mauhnuh dung chen chen tawh chu buhkung sawp rawp tawh tak mai ‘ka thlak e’ ti niawm fahranin an lawr fur mai bawk a. Chulram fan te chu a khawhar thlak an tih thin nen keilah chu ka khua a har mawlh lo a ni.

Ka kal tumna ber lah chu ka hre miau bawk si lova, lo fing thum chuangmah chu ka kal tawh awm e. Ka hawi ka hawi ringawt mai a ni.

Kawngbul maia thlamah chuan ka lawn a, a chung an thiah vek tawh vang chuan han tawmhulna tlak pawh a ni lo, nisa lakah takngial pawh min hum zo tawh dawn lo tih hre reng chung chuan khua chuan nan tia lawn kai mai ka ni.

Vamur thlawk nuaih nuaih te lah chuan ka zawhna min chhang thei awm bawk si lo. Chu chulram chu a ram tak zet a ni.  A reh hian a reh tlawk tlawk mai.

Reingial ka hawikual hnuah chuan hlataka bawng khalh niawm tak lo kal hi ka hmu ta hlauh mai a, ka lawm lutuk chu ka zuang lo chauh a ni. A lo kalna tur kawng awm ang chu ka’n chhui zar zar a, ka awmna lai nen chuan a inhmu hauh lo mai. Ka let leh angai a ni. Kawngpeng ka kalpelh takah khan ka lo chang mai aniang chu.

An lo thleng har tak zet.

Ka hmanhmawh bawk si chu anmahni tawk zawng chuan ka kal ta ringawt a. Mualthum pawh ka liam hman lo tihah chuan kan intawk leh lawi a.

Pu Thavela lek lo niin.

“Ehe Chhuana helam lamah engnge i tih a?” a lo ti var a.

“A, eng ti lem love, Pu Rinawma thingzainaah kal ka tum deuh a, kan vawkin chhuat a awngrawp tan riau va, thingphaw tei tur te a awm takin ka ti deuh a” tiin ka inphamar nghal thuai a.

“A nih tak chu mawle. Helam lamah a zai a mi? An vauah khan a ni law mi a zai?”

“E, ka hre chuang nang. An lo pawh ka hre lova, ka rin zawn ve tawp a”

“Khimi kan chung zawk kawngah khian phei la, Lo pangana emaw velah khan a niang, haitur a awm lo. An thlamah an thingzai te pawh an riah kha” tiin min hrilh ta a. A lawmawm mange.

A bawng chhawm hnungah chuan muangchang chuan ka zui ve ta zel a.

“Hei Seni hi a no neih a hunin ka hre tawh sia, amah lah hi a lo haw duh bawk si lova, tukin zingah ka chhuak a, ka hlauh ang ngeiin no a lo theh tak tak a, kan hmu lo rei ang tih a hlauhawm khawp mai” tiin kan chhawm mek a bawng chung chang chu a sawi suap suap a.

‘Khawiteh’ tih pah a han kal pelh rawk rawk mai chu ka duh a, rilru hmanhmawh mi nihnaklaia Bawngnote han chhawm chu dawhtheih a ngai kher mai.

Hla tham ni lo ta chu ka penna lai tur chu kan thleng ve mai a, ‘a nih aw’ tih pah chuan ka kalsan nghal vang vang a.

Thlam luahlai zawn chuan ka zawng phei a, thlam tam zawk chu a chung an thiat hlawm tawh a, hmuh mai harsa lo turah ka ngaih vang chuan a hma ang em em chuan ka hawi vual vual ta lo deuh.

Pan ve reng ta chuan kar lovah ka thlam zawn chu ka va hmu ve mai a, awm an awm nge mawni mei chhetein a khu chel chel a. Engnge maw ka ngaihtuah ni ka chemtum chu ka’n lekchhuak ngawt pek a.

An ri te lo atang chuan ka veh phei ngawt dawn emawni chu le.

Han fimkhur tehchiam tula ka hriat loh vang chuan ka thawm pawh chu ka dim hran chuang lem lova, tu pawh awm se rikrap tum pawh ka ni lem chuang law.

Tlamah chuan ka chuang kai ta, awm chu an awm ngei aniang kawngkhar a inhawng a, namthlak pawh a inhawng duai alawm.

Kawngka a ka va dak chu Samthura chu thlam chhuatah chuan a lo mu huang mai a, ka thawm hria chuan min lo melh ran a, “E in chawl elo?” ka’n ti ngawt a.

“Kan chawl a nih hi vawiin” tualchhung awphawi hmang lo tak mai chuan min chhang ve thuai a.

“In thingzainaah a phaw tei tur a awm angem?” ka ti zui zat a.

“Awm lo, nimin khan pakhat kha a lo kal a, a hawn daih alawm”

“A nih chu mawle, a awm takin ka tia, peih leh peih lovin ka lo kal ve hram hram a”

“Ka pu khan a hawn thin bawk sia, a awm hman lo” a ti ve leh mai a.

“Khawnge i thianpa a awm nange?”

“Khuaah kal a, ration a la dawn a”

“A nih tak chu, in zai zo tep tawh em thing chu?”

“Zo tep tawh ang, tumkhat a la awm a”

“Tu thing nge in zai leh ang?”

“Kan zai tawh rih lovang, kan hawchho phawt ang”

“In hausa tawh awm mange aw”

“Hausa thei lo, ration te lei a ngai ve zel a lawm” tiin a nui ve hai a.

Hmundangah pawh kal ta bik lo chuan Thlamah chuan ka ti ti pui ta reng a, a nihna takah chuan a thianpa lo let chu ka nghak a ni zawk mah ang chu. A chhan chu nizana ka kah kha anmahni hi an ni em tih hriat ka duh vang a ni.

Samthura lah hi na nei lo ang mai hian a mu tlat mai bawk sia, amah ngei hi ni khan ka hre bawk si. Amah ang deuh hi an awm tihna em ni dawn le? Ka rinhlelh hi a lo dik lo a nih teh chuan hmathar han lak leh dan tur a vang dawn mange.

Ka chawfun te chu ti ti mawlh mawlh chung chuan ka thet a, an bekang sa kan te chu min kawhhmuh a, ka eitui lutuk chu ka chawfun chu ka kham lo lam mah a ni. Chaw ka fak kham chuan ka’n zi mar vel a, rei pawh ka thut leh hma chuan Samthura thianpa chu a lo lang ta hlawl a, phawk zet chuan min en a, amah ai chuan ka la phawk zawk fe mai thei a ni.

A chhan pawh amah chu na nei hmel a put lat lo. Anni pahnih hi ka ring sual chhiava a ni ngei ang. Chuti a nih chuan Ramhuai  ka lo hmachhawn ve chiam tihna a mi niang le!?

Mahse, mahse…

Lo lutthar chuan a iptepui atang chuan Dettol leh pem tuamna chi a phawrh ta tlat mai le!

Samthura chuan mitmei a’n tum viau nain pa fingvar tak thian a nei lo chu a vanduai phah ta. A kekawr hak chu a hlim sak sawt sawt a, a chawn veilam chu a lo intuam bar mai hi a lo nia! Ka kahthelh lo chiang!

“E, i intina elo?” ka lo ti thuai a.

“Ka tlu a, perhte in a chhun a” a ti ve mai a. Makti hmel lantir loh hram hram ka tum a ni ber mai.

An tuamna khir iarh mai a hlihsak lai chuan a lo then chak chak a, ka kahthelh teuh asin aw, a chawnpuar chhunglam, a kiarlaiah hian a ni a, en awm lo ang tak chuan ka lang nain ka hmu ru ve reng mai. Inches khat bawk awm vel hi a hek thla hlawk niin ka hria, mahse tihrawl lai a nia a damhar pawh ka ring hran lem lova. A malpuia kah tum kha ka nia, ka hlat lutuk bik lem love.

Engtin nge hma ka lak tak ang le?

Helaia thingzai, hmundang daiha a awm chhan ber kha kei hian ka dawp chhuak zo angem? Ka ring chiah lo. Chu a chhapah midang a tihthaih kher chhan kha engvangnge ni ta ang le? Tu emaw, YMA President te hi hrilh ta ila thutak hlatakah min laksak duh angem le? Kan VC te emaw pawh hi. An ngaihpawimawh teh chiam pawh ka ring hran lo. An hmu a, an hre ve a zeng pawh a ni si lo.

Chuti a nih chuan keimahin chin fel dan ka zawng law law mai aniang chu. Engteh chiam a lo nih loh palh pawhin a zahthlak nep deuh dawn tihna a ni mai a.

Ka duh hmu khata ka inhriat vang chuan muangchangin ka hawsan ta a, hawkawngah Kaihzawl pil thel haw tur te ka zawn haw loh chuan, kut ruak ngawta in ka thlen mai chuan ka chhuak nileng thak mai bawk sia, a zia dawn lo emai.

Tih leh dan tur awm ang chu ka’n ngaihtuah ngial thin a, ka hrethiam chiah lo chu a ni ber mai. Mahni chauh aichuan Lalvala tal hian hre ve se, thil tihdan tur te pawh a hrethiam mahna, a ngaiho leh viau ange mawle.

Kawng in sawhkawi laia kawngthlang lama Kaihzawl lian zet mai chu ka nu damdawi tur chuan a pil ka thel sak a, Iptepui ang hawk khawpa han hnawh meuh chuan a khin ve nalh nalh khawp mai, ka duhaia a tam deuh vang chuan a then chu ka dahchhuak leh a, kawng lam pan chuan ka in ak chho zui ta par par a, ka chhuah chhoh hma deuh chuan Thingzaipa, a ke na lo zawk kha khawlam pana a kal hi ka hmu vuai a, han auh ka tum zet a, mahse kalpui kha a sawt tehchiam a ka rin chuan loh vang chuan ka au duh ta lova.

Ngawireng chuan a hnungah chuan ka kal ta zawk kha a, kawngkawia a liam tur chu ka hmu leh zauh thin. Zinglamah khuaah a kal tho sia, engnge maw tunah tih leh a tum le’ tiin ka ngaihtuah mai mai a, ka lo buai ve na tur phei chu a awm hauh lo nain.

Khawdai kan thleng tan a, kawngpui dung kan pawh chho tep tihah chuan ka umphak ruai tawh a, amah chuan min hmuh pawh ka la ring chiah chuang lo. Kawngsirah chuan a peng zauh mai a, a ek a chhuak a ni ngei ang ka ring. A penna lai ka thlen chuan hnim kar chu kalpah chuan ka va thlek vei ngial a, hmuh phei chu ka hmu chuang lem hlei law.

Kawngpui dung chu ka chuang chhuak chho zui mai a, kha thingzaipa kha kawngpuiah chuan ram lam pana a kal lai ka hmu leh pek ka ti! A kalna lam chu kan huan awmna lam kha a nia, rinhlelhna chu ka nei thuai a, khawchhung lam hawi ta lo chuan amah bawk chu ka umzui leh ta kha a nia.

Tlankhalhna tur awm se ka ti mange aw..

Kan huan pengah chuan ka ipte ah chu ka hrechhuak hlawl a, Kaihzawl pil zawng zawng nen chuan ka lo la in ak bawr chu niin! Kawngsira hnimpik karah chuan ka rawlh sawt sawt a, a penna lai hmuh hmanloh hlau chuan ka um zui leh thuai a.

Kha kawrteah khan a peng leh a nih ngat chuan a penchhan ka hre ngei tur a ni.

Mualtam kan kan hman lo, kawrteah ngei chuan a peng chho leh ta! Thawm dim tak chuan ka lut chho zui ve nghal a, ka thawm a hre palh ang tih chu ka hlau tak zet a ni. Thawm chhuah ka hlauh luatah ka pheikhawk te chu ka phelh leh rih a, hmuh theih mail oh turin lung puk deuh reuh hnuaiah hian ka thuk ru a, ka hmaah let leh pawh ni se a hmu mai bik lovang chu maw.

Ka hmaah chuan hmanhmawh vak lo hian a chho kat kat reng a, a lo lehhawi thut pawha a hmuh rem lo thei ang tur chuan phen tur ka melh chho hram hram zel kha a nia.

Thingzaina hmun hlui awmna lai chu a thleng chhova, chuta tang chuan mual dinglamah a peng ta a, a thlang deuh atang chuan a hawi zawng lam pan chuan ngawhnuaiah chuan ka um zui zel a, chhuah palh leh mawlh a ni ka hlauh ni.

Ni tla tur senphut mai chuan ngawihnuai chu a chhun pha meuh tawh lo, khua a lang duai ruih tawh mai a, Kawrpui a thleng tur awihtlana a kal chiah tihah chuan tihpalh thil takmeuhvin thingtang ka rap ri ta rawp mai a, min hmuh hlau takin ka bula Khuangthli bul lianzet phen chuan ka ding thuai a. A va hlauhthawnawm duh dep dep ve mawle.

Ka rial rei chuan a pil bo hman ka hlau bawk si, hlauthawng tak chung chuan ka bih dak dak a, ka hlauh ang ngei ngei chuan ka hmu zui leh pek tawh lo. Huiham..

Hmundang ka’n thlek kual ngial pawhin ka hmu zui tawh lo. Fimkhur tak chuan kawr lam pan chuan ka kalphei zui nghal a, a duh leh min lo hmu mai mai tawh rawh se’ tih rilru ka pu ber tawh niin ka hria. Tui luang thawm nen chuan thawm thup lutuk pawh a lo ngai hran lo.

Kawr ka thlen thleng chuan a hnu emaw a thawm emaw, amah emaw hmuh leh hriat ka nei leh chuang lo.

Mual leh lam chu a perkai hman lo turah ka ngai, a chhan chu thinghmun a nih vangin a hnuai a thelh ang reng a, kal phei se chuan hmuh loh tur thu awmin ka hre tlan lo, chaktaka a tlan fua fua a nih ngawt loh chuan.

Chuti a nih chuan kawrdung chu a zawh thla nge a zawh chho zawk ni ta ang le?

Chhak lam chu ka han en a, inchhung dung chen awm velah hian lengkir chhe te, 15ft awm vel a sang a awm a, chu ta tang chuan tui a lo khawhthla per sung sung a, mualdunga hel loh chuan lawn liam chhoh mai chu a har ka ring deuh. Hel chu ni se ka hmu hman ang.

Thlang lam chu kal theihna awm chhun ber niin a lang. Mahse, a chhengchhiat hmel bawk sia. Ka zawhthla ve mai dawn nge niang aw.

Zawh thla phawt mai teh ang. Hmundangah a bibo thei lovang.

Harsa zet chuan ka zawh thla a, ka kalthla thui zel a, a kal lah chu ka ring lo tial tial lawi a. A kawr  chhengchhe bawk si a, kawngpui ka chhuah thlak meuh chuan khuain min thimhnam hialin ka ring. Chu ai chuan let chho leh ila hnu ngaiah bawk let leh ila a sawt zawk mah ang.

Kawrah pawh chho duh lo chuan mualdungah ka tawlh chhuak a, a hnu ka hlohna lai man leh tum chuan hah viau mah ila ka chho leh ta hnang hnang a.

Lengkir zawna herliam ka tum lai tak chuan kha pa roh kha lengkir bul maiah chuan a lo ding reng a, kan kalna lampan chuan hmanhmawh angreng tak hian awih tlanah chuan a lawnchho zui leh a, ka tlan chiam chuan ka thawmah ka man hman dawn chuangin ka hre si lova, theih tawpa hmanhmawh chuan ka um zui na chungin chhuk lam a ni bawk a, a mawngphe pawh ka hmu hman ta lo..

Kawngpui ka chhuah thlak meuh chuan ni a tle fel der tawh a, ka chhungte chuan min ngaihtuah dawn mange aw.

Kha lengkir bulah khan bikbona a nei a ni. Ka hmuchhuak khawp ang.

___________       __________
             KA NAKRUH BO
           

               Chapter-VII



Ka hmanhmawh viau nachungin unau hmelhai hun thuakah ka thleng hman awrh chauh a ni. Chhungte bulah chhuanlam a vang duh dawn hle mai.

Kan ina ka lut chu phawk fe hian min lo melh a, Lalvala a lo awm bawk a.

“I bo emaw an ti hman alawm i chhungte’n” a lo ti thuai a.

“Nia, Sava riahna ka zawng pah e ka tia, ka duh aiin ka lo thleng hla hman pek alawm mawle” ka ti mai a, ka nu hmaah chuan ka iptepui chu ka nghat a.

“I va la hnem ve, in chhuak ve ngai si lova, chu chen chen thang tur a ni hleinem, in ngaihtuahawm lutuk alawm” a ti zui a. Chhan vak ngaihna ka hre lo, ka he he liam ta mai mai a. Ka pa chuan engmah a lo sawi ve lem hlei lova.

Ka intihfai zawh a zanriah te ka eikham hnu chuan Lalvala nen chuan muangchangin mawnghunna ngai bawka inhung leh tur chuan kan inzui chhuak dun leh ta a.

“Țhianpa, i awmdan hi a engemaw dik lo a awmin ka hre tlat” a ti a.

“Engtinnge ka awm vak a?”

“Chutia maksak takin i awm e tihna pawh a ni chuang lova, i mizia hi nidang a ang lo tlat alawm”

“Ang thei nang, a chhan te chu i hre reng alawm”

“Nia a dik alawm, Zorini hi i la zawng reng tihna a mi?” a tih chuan phawk fe hian ka melh zui a. Chu hming chu ka lo theihnghilh hman fahran zel a, ka inthiam lo deuh viau mai.

A zawhna ka chhan hma chuan amah zawk chuan a sawi chhunzawm leh a. “A chhan chu nidanga ramkalpuia sawm pawhin i peih ngai lo kha a nia, tunah lem sava riak te i zawng a, chhunah ni se i chin pawh hriat loh hian ram i kal awl lo mai bawk sia” a ti a.

“A dik alawm, thil tih ka nei a”

“Engnge i tih țhin a?” kei aimahin a phâwk tawh zawk mahin ka hria.

“Nizan pawh sava riak chang ang ka tia, min zui duh lo a nih kha, i hre duh lo nihmiang ka ti mai a”

“Engmah i sawi hleinem chutiang zawngin”

“Innu awmbawr te zet tumbailek kha i thlahlel tlat zawk alawm. Kei meuh ka vahchhuah chuan pawimawh a awm ang tih kha rin ve mai tur a nia, ka ramvak ngai lo tih hre reng bawk si”

“Chuan.. engmaw i tih ber chu han sawi mai mai la..”

“Naktukah min zui rawh, i hriat ve duh leh mahse in maniature kha keng la, hlauhawm a awm palh takin”

“Han sawi ve mai la aw”

“A tawp ka la thleng bik lova, fiah takin engmah ka sawi thei bik tlat lo alawm. Naktukah hian a hmawr ka bawk theih ka inring deuhva”

“Naktukah kher maw? Mau ka sat ang chu ka lo ti a sin”

“Țhulh ve mai rawh, sawi lo mah la ka sawm ang che ka ti thova”

“Umh, a hun lo thleng phawt se la, eng anga pawimawh nge i sawi duh bawk si lova”

“Mi rinhlelh ka nei a…”

“Zorini bo chung changah maw?”

“A, ni em em chuang lo. Eng ang zawnga rinhlelh tur nge pawh ka hrethiam chuang lo. Saw lai kan huan bawr vel a hrang ni a an sawi kha a nia, mihring anni tih ka fiah tawh a, anmahni pawh ka hria a. Mahse, sawlai rama an tal vel nachhan tak saw ka la man chhuak  thei lova, engemaw thilawm chu a awm a ni”

“Tute nge nia?”

“Haha.. naktukah ka tih chu mawle, i țawngvaiah te i sawichhuak leh roh si ang a, thil a kalsual palh ange”

“A va ho mai mai țhin e aw, zep thei țhin bawk si. An awmna lai i hre hrim hrim a mi a?”

“Hmundang daihah hnathawkin an awm a, sawlai hmun saw an tlawh țhin niin ka hria a, keimah ngei pawhin ka finfiah alawm vawiin khan”

“Anmahni chu i chiang a maw?”

“Chiang khat ang, nizan khan ka kap alawm”

“I kap maw!?” ding meuh chuan mi han thlek leh rih a.

“Kap ang chu mawle, ka kahțhelh emaw ka tia”

“I kaphlum a mi chu?”

“Teuh nang, a chawnah ka kap!”

“I man mai lo a mi amah chu?”

“Nizan kha chuan naupang ka hruai bawk sia, han umzui chi vakah ka ngai lova, vawiinah ka chhui zui a, ka duh ang thlapin ka fiah thei a, mahse sawilai rama an thiltih ber chu ka hre thei tlat lova, chu chu a nia naktuk lama enfiah ka tum chu, ka sawrzim viau tawh chuan ka hria”

“An ramvak mai mai te hi a lo ni ange”

“Ni lo, Sairawkherh takngial pawh an keng ngai lo, Chem te chu an keng ve mahna le. Engemaw tak tih an nei niin ka hre tlat. Ka ring sual lovang”

“Anmahni awmna i hre tho sia, engatinge i man mai loh, VDP te pawh hrilh la”

“Chu chu tihawm tak a nia lawm ti raw. Mahse,  engmah sawi duh lo ta se a ho der ve thei tlat a sin. Man ngawt nachhan tur khawp an thil tihsual kan hre hauh bawk si lova”

“A ni ve tho mai”

Pari te inah chuan zandang ang bawkin ka ri zui leh ta phar phar kha a nia, midang leng an awm ve bawk nen kan thawm chu a tha mah mah mai thei a ni.

“Naktukah ramhuai kan man dawn a” Pari bulah chuan Lalvala chuan a’n ti mai pek a!

“Engnga?” tiin an thlek ha a.

“Chhuana hian ramhuai manna tur a hria a, naktukah kan pahnihin kan man dawn” Pari chu a nui ta uarh uarh a, min han thlek tawn leh rih a.

“Nangni țhiandun lah hi thutak in pai lo ropui si” a ti a.

“A nia lawm mawle, i lo en ve dawn nia naktukah” a la ti zui ta cheu va. A țhiannu nuih lah chu a za tawlh tawlh emaw ni lehnghal ni.

“..ami Chhuana?” nui tet tet chung chuan min han zawt a.

“A tih tlat te chuan kan man anga a ni mai lawm, ka hual țeuh alawm manna tur” ka lo tih sak ve mai a.

Zandang ang em chuan kan leng rei ta lo deuh. Lalvala ngaih pawh a țha deuh a ni mahna a hma zan khan a kilh ngheh țhat hmel bawk a, inleng dangte ,in hma chuan keimahni zawk chuan kan hawsan ve ngei kha.

“Naktuk chu eng chhuanlam nge maw ka’n siam ang le?” a ti nang nang a.

“Chhuanlam siam vak a ngai hleinem, tihtur ka nei i ti anga a ni mai lawm tlangval a pumpa”

“Chutiang ngawt a ni hleinem, hnathawh tur ruahman vek tawh hnuah te chuan..”

“Ho lutuk, nidang atan a ni mai lawm. Thawh zawh tih tak tak a awm chuang hleinem” ka tih sak leh mai a, mi hnial ngaihna vak pawh chu a hre chuang lo.

A tukzinga ka tho chu ka harh țha vek vawk kher mai.

Tukțhuan kan eikham a ka han țhutmuan luih ngial hnuah pawh Lalvala hmel chu a lang hleithei reng reng lo mai a. Min ,hulh san leh ta mai emaw ni dawn le aw. A pawi love, mahni pawhin thil harsa a awm em lo turah ngai ang ti rilru chung chuan ka insiam mawlh mawlh a. Chutih mek lai chuan an maniature nen chuan Lalvala pawh a lo thleng leh lawi thung a.

“I thulh leh ta mai emaw ka ti hman a” ka ti a.

“A la hma em hi a hmanhmawhthlak vut vut hleinem mawle” a ti mai a.

“Khawnge in chhuah dawn a?” ka nu chuan a lo ti a.

“Sava kan zawng dawn” Lalvala chuan a lo ti thuai a.

“Lo haw har tawh suh ang che u aw, inngaihtuah a nat țhin em kha” a ti a.

“Haw har lovang, thim chu kan thim ve mai thei ni. Mahse, kan tlai chhe lovang” ka lo ti thuai a. Iptepui ka lak hnu chuan muangchang lovin kan chhuak dun ta nghal a. Hmanhmawh tur nge hmanhmawh loh tur a pawh ka hrethiam  bik love a.

Khua kan pelfel awrh tih ațang chuan Lalvala chu a’n fimkhur nghal em em khawp a, ka nuih a za zawk!  Fiamthu titak deuh chuan “Kan bawkvak țan mai dawn em ni!?” ka ti chu amah zawk chuan a lawm leh lawi a. Kan nui leh rih a.

“Pu Rinawma te thingzai kha i hria em anmahni?” ka ti a.

“Hre nang, ‘ngatinge?” a ti hu a.

“Chumi te chu an nia sawilai vela che tla thin chu”

“Sawilai velah chuan thing an zai a niang chu mawle”

“Teuh nang, nikum chulah alawm an zai daih. Niminah pawh ka kal vek alawm”

“Chuvang chu a ni maw niminah i khawthim țhiai..?”

“Umh, ka thim chhan tak kha chu chul lama ka kal vang pawh a ni chiah lo, ka haw lamah thingzai pakhat ka kah loh zawk kha hemi kawngpuia a peng phei hi ka hmu leh a, ka umzui leh a, chuvang chu lawm ka tlai”

“Chuan i umphak lo a mi a?”

“Um phak e, mahse a pawimawh lai ber turah ka hmu hman tlat lova, ka zawng kual hrep a, a hnu fe ah a let leh tur ka hmu leh lawi bawk sia. Ka um a ka hmu phak tawh bawk si lova, nimina ka hmuhna ațang khan a bikbona hmun chu a hla thei lo hrim hrim, amah ka hmuh loh chhung kha minute 2 pawh a tling lovang, chumi chhung chuan  a bo hman a nia”

“Chuti a nih chuan chulai hmun ațang chuan kan chhuizui anga a ni mai alawm”

“Nia, a bial a zau thei lo hrim hrim ang”

Chutihlai chuan kan penna hmun tur chu kan thleng der tawh a, “Helaia a ding lai hi khilai hnimbuk ațang khian ka kap a, sawlai deuhah sawn U Kawnga fate pahnih ka awmtir a, mei ka chhem sak a”

“Engatinge chutia i tih reng reng?”

“Mi an tihțhaih ni khan a lang bawk sia, khatia ka tih khan naupang te kha tihțhaih an lo tum leh ngei ka ring a, ka rindan chiahin an lo kal reng bawk a..”

Kawrah chuan thawm dim angreng tak chuan ka chhoh pui ta a.

Thildang pawh melhkual buai lovin lengkir awmna lai chu ka pan dingpui nghal a, lengkir thlangah chuan dingin kan han hawikual ngial a, beiseina min pe thei thil engmah hmuh tur a awm bawk si lo.

“Sawlai khuangthli phenah sawn ka ding a, ani helaiah hian a chhuk thla a, chu chu ka hmuh hnuhnun ber a ni. Ka en lo rei lo a sin mawle, ka chhuak phei a, ka hmu zui tawh bawk si lova, chhak lam chu khi lengkir a nia, lawn chho nise hmuhlohna tur a awm bawk si lo, helam mualah hian kal ni se hei a thelh deuh hun bawk sia, kawrah hian a chhuk a nih ka ring ber a ka zawh thla a, kawr a chhengchhe bawk sia kal ngaihna a awm mang bawk si lova,  ka let chhoh leh lamah helaiah bawk hian khulai zihnghal bul ațang khuan ka han hmu leh a..”

“A mak hle mai..” tih zawng chu min chhanna ka dawn a ni.

Tuiluangin a chim phakloh deuh lung chungah chuan țhuin zial a pak khu talh talh a, ngaihtuah bing hmel viauin lang mahse thil ropui tak erawh phuhchhuah a nei lawi bawk si lo.

Ka hmalawk lunghnuaia Chakai vaklut zawk chu man tumin a vela lung chu ka hai sawt sawt a, lunghnuai ka zen ngar ngar lai chuan dim leh fiah angreng tak si hian Lalvala chuan min lo koh sap a. Ka han hawichhoh chuan lengkir bulmai ațang chuan rang zet hian min lo hui sawk sawk a.

Ka thilzen lai pawh ngaihsak zui lo chuan ka kal chho nghal thuai a.

A bul ka thlen chhoh dawn chuan lengkir hnuaiah chuan a lut ta daih mai a! Eheu Puk maw!!?

Tui pawh chu ka pawisa tawh lo bakleng chuan ka palphei buan buan a, tuikhawhthla e thla lo lam pawh ngaihtuah lo chuan lengkir hnuaiah chuan ka va lut ve tawp mai a, ka rei, puk țha zet mai hi a lo awm chu niin.

Eng lam ațanga lut kan ni bawk a, khawhmuh erawh a tawi viau, puk chhung chu kan hmu thui lo kher mai, engtianga thuk nge a nih pawh a hriattheih loh.

Lalvala chuan a lighter chu a’n țalh tek chhak chhak a, dinglam hawi chuan puk chu a kua niin a lang.  Mihring pawh kun ngai miah lovin a kal theih hal hal. A zau zawng pawh hlam khat aiin a lian mah mai thei a ni. Hetah ngei hian a hmawr kan bawk ang chu.

Ka helhhawlh ni berin ka hria. Tlanluh nawk nawk mai ka duh.

Lalvala chu a inher vut a, mi nam chhuak nawk nawk pek a, hlauhawm a hmu ta nge mawle tiin rang zet chuan ka inher nghal a. Lengkir ațanga kan han chhuah chuan “Meichher siam ang” tiin kawr ațang chuan thinghmunah chuan a perkai chho nghal a, a kallohna lamah chuan kalin mauhmun a nih vangin meichher tur a awm ka rin zawk vang chuan ka kal ve nghal a, ka rin ang ngeiin Mau ro meichher tur chu ka hmu thuai a, țangphel aia sei mah tur hian ka tan a, chawnpuar tia leng lawnga ka tawnkhawm hnu chuan Lalvala chu ka au zui ta a, ani pawh chuan  a lo peihfel ve hman der tho mai.

Kawrah chuan meichher chu chhit tumin a lighter chuan ka’n han hliau dun țhin a, a alh a te bawk si, a kaițha hleithei  meuh lo chu a ni e.

Ka bula hnahthel chu thamin meichherah chuan ka vur a, chutia han tih chuan a fawhkai țha lutuk mai a lo nia, rei pawh nghah ngai lovin kan meichher pahnih chu chhun engah chuan kan chhi dun ta hluah a.

Mahse, lengkir hnuaiah khian engtinnge kan luhpui tak ang, tui a lo khawthla nasa ve ang reng bawk sia.

A sir veilama Changel hung behchhanchhan chuan Lalval chu awlsam tak hian a lut mai a, a hnungah a tih ang chiah chuan ka zui bawk a, meichher thi lovin kan lut dun thei ta a.

Puk chhung pawh a lang chiang ta, Lalvala chuan a maniature ken chu an kau rap a, keiin ka kut dinglamin chempui ka hmer nghet hle bawk a.

Puk chu  kan dinna piah mai ațang hian chhak lam nek zawng hian a lo var huau mai a, a bang chu lung vek a ni. Lung chhung kawrawng ang chi chiah chu a nih hmelloh deuh. Lunglianpui pui in a karcheh, a karawl leiin a hnawhkhah loh zau ang reng tak ni mai hian a hriat, khawi emaw laiah chuan mihring hnuhma te pawh a lang nial nual a, an zauh belh deuh te pawh chu a ni mahna le.

Zawimuang chuan kan kal hret hret zel a, puk var deuh lai kan thlen chuan lung lo inkhawh lut lian tak mai hian a lai bawr vel tak chu a hnawh hmuk mai a, chu chuan a chhuat lam chu a ti zim deuh hle mai a, chu mi sir dinglamah chuan insi deuh thaw hian lung bawk chu a lo lutthla leh a, chumi chunglam erawh chu maktak maiin a kawtlang thung. Pawnlam boruak chu chuta țang chuan lo lutin puk chhung boruak chu a vawng ngei ang. Chumi kua chu siamchawp pawh a ni hial zawk mai thei e.

Dinglam ațanga lung lo inkhawhlut ka kal pel chiah chu ka te țhawt mai a!

Ni, chumi phenah chuan ruang niawm tak chhuata mu deuh nuaih chu ka hmu tlat a ni. Lalvala chuan ka hnunglam ațang hian mi rawn su her nawk niber hian ka hria, ka hmaa thilawm chu a va thutchilh thuai a, a va sawi nawk nawk ni ber hian ka hria.

“Zorin Zorin..” a tih ri chuan min ti harh zawk mai.

A bulah chuan ka ,hu hniam ve thuai a, “Chhuan, a la thi lo” a ti sap a.

Awmngaihna pawh ka hre lo, ka bing mum mum mai nihian ka hria.

“Meichher kha keng kang ta che” Lalvala’n a tih chuan ka mumal lo hle a ni tih a ti chiang viau awm e.

Leia ka meichher dah chu ka’n lek kang leh a, Zorini hmel dang bei mai en a har ka va ti tehlul em!

“Khawmaw i tuipai kha han phawrh teh” Lalval’an a tih chu ka hre reng, mahse chet ngaihna ka hre der bawk si lo.

“Chhuana tui..” tihpah chuan ka banah chuan a rawn beng a. Phawrh nachang chauh chu ka hre ve leh mai.

A lu-ah chuan tui chu a leih a, a hming chuan a ko zui mawlh mawlh reng bawk a, hmasawnna erawh a awm lo viau thung.

Ka fim ve tial tial chuan ka hria.

A kut maw, a ke emaw an phuar lo chu a mak ka ti viau. A ka pawh an la hnawh lo cheu chu a mak leh zual!

Lalvala chuan a pawmlawka ‘min lo zui rawh’ tiin puk pawn lam pan chuan a kal zui nghal a, tui lo khawhthla pawh chu kan pawisa teh chiam lo,  ka meichher ken pawh chu a thi chiang kher mai.

Tui luan lohna laiah chuan a muttir a, a awmah chuan nemin tihharh tum chuan a bei lauh lauh reng a, puihngaihna pawh ka hre chuang lo. A sirah chuan ngawirenga dingin ka lo en ringawt a.

“Chhuan, damdawi an hmang a niang. Lungngaihna tur a awm lo nia, nikhaw hre lovin an siam ringawt a nih hi. A lo harhchhuak leh mai ang” a ti a.

“I țha em?” min han ti zui a.

“Aw, țha e” ka ti na chu ka țha em tih chu ka chiang bik der lo. Mumang mai ni hian ka hre tlat pek a!

“Ti hian lo awmpui la, midang ka va pun ang aw, nge, nangmah i kal zawk dawn mi?” Lalvala chuan a ti a.

“Ka lo awmpui ange”

A iptepui chu lain awihtlanah chuan a kai chho nghal thuai a, a pilbo zui chu a ni mai.

Lungnghengin ka țhuthluang a, ka malchungah chuan Zorini zawihniang mai chu ka pawm a, ka mittui chu ka dang zo meuh lo chu a ni e. Sa inphut vanglai, duhawm vanglai tak mai chutianga tlariam maia a lo awm chuan ka rilru a tina tak zet. Thawhlawka Chul thlam lam pan liah liah mai ka nap ka ti.

Lengkir ațanga tui lo inkhawhthla chu a thawm a ring viau a, thawmdang pawh awm se a chhilh hneh viau chuan ka ring. Lalvala te pawh chu an rei tawh viauin ka hria. An lo lang har hi ka han ti khawp a, ka bei a dawng hman nualin ka hria.

An lo kalna tur lam chu ka melh khat tawk reng a, lo lan tihlah an nei bawk si lo. Mahse, chan chhuah erawh ka nei!

Lo hawi se chuan min hmu nghal ngei ang le. Ka lum nghal pup pup mai chuan ngaihtuah a ti tawi viau mai. Lalvala silai chu ka melh nghal vat a, kan piaha lungah chuan a intung fel at mai a, min hmuh hmaa chu chu ka lak hman ngei a ngai. Chuti a nih loh chuan a tlanchhe dawn asin.

Muangchang chuan Zorini chu leiah chuan ka nghat riai riai a, silai chu ka va la thuai a. Mahse, min lo hmu hman tlat mai ka ti. Ka lehhawi leh chiah chuan a hmeichhe put hnuang mai chu a keuh dawt a, a tlan let thut mai a, tin pawh tin mumal hman lo chuan silai chu ka’n hmet puak thawr mai a..


_____________                     _____________
                    KA NAKRUH BO


                        Chapter-VIII



A  tlu ve tho, ka kahțhelh leh pek lo a niang.

Rangtakin awihtlanah chuan ka chho nghal a, hmeichhe pakhata leia lo thal reng pawh chu ka ngaihven hman lo.

 Chhuk zawng hian ka mi kah pah chu a lo vak thla han han mai a, silai chuan kah leh mai ka’n tum a, a mu ka lo keng ve hlek lo chu niin! Huiham.. Ka thehthla lawk a, ka umzui thla ve ta nghal a, a tlenga tleng na na na chu tawlh thui hman mawlh hek lo, ka nangching thuai a, a hnungzangah chuan ek țhawt khawpin ka chhuk tum a, keimah zawk lah chu ka la tlu thla zui rawl nen, thin rim tawh mahnaklaiin.

Kawihrui manin ka ding rem sauh sauh a ka chhir ngheng mai a, min chelh bettu an awm takah chuan ka che zui thei ta lo. Lalvala te ho an lo thleng chu lo niin. Chutia min han chelhbeh takah chuan chetzui pawh ka tum chuang lo, ngawireng chuan ka thu ta hle hle a.

“Hei hi pahnih vel khan lo buaipui ula, khilaiah hian Zorini a awm a..” tiin Lalvala chu a kal chho zui nghal a, thui pawh an kal lo, an thawm ri hlut chu a ring kher mai. Tunge pawh ka chian hman tak loh hmeichhe pakhat kha an han hmu ta a ni ngeiin ka ring.

Ka hmaa mi chu an phuarhlawm ngheh tak viau hnuah chuan Zorini awmna lam pan chuan ka chhuak chho zui ve leh nghal a, mipahnih hian kalkawnga mi zawk chu tihharh tum hian an lo bei lauh lauh a, chu nu chu nikum lailawka pasal nei, fa pakhat emaw chauh ala nei ang tih tur hi a ni a, nulian leh ngo lam, a it mi tan chuan itawm tham tur a ni.

A hming Engmawii.

Ka Zorini mawlh ngaihtuah chuan anmahni pawh ngaihsak lo chuan ka kal pel ve mai a, Zorini chu lung ngheng hian Lalvala chuan a lo țhut țhat tir mek a, ka thlen thlak lai tak chuan lengkir hnuai a,angin mipahnih an lo chhuak mek bawk a. Ka zawi hiai mai.

“Khawnge Silai?” tiin Vala chuan min lo zawt a.

“Khilaiah khan ka kalsan ta a ni awm mange” tiin ka chhang a.

“Remkung, khanglai velah khan Silai in hmu em?” tiin Lalvala chu a au  zui lauh a.

“Aw, hmu e, kan bula hi a awm” tiin Rema te chuan an lo chhawn thuai a.

“Engtinnge niang?” tiin Pu Lalkhuma chuan min han rawn a.

“Helai chu engmah venthawn tur a awm tawh lo. Tihian a kalsan theih tawh” ka lo ti a.

“Chuti a nih chuan i kal mai ang u, helaiah awm reng chu a fu ber love. Khawchhung lamah min nghak an awm bawk si. Kawng a mumal bawk si lova, kan inpuak chhawk thla mai dawn nia” tiin rem a han ruat zui a.

“Khawi ka lo pua ange” ka tih chuan Lalvala chuan ‘Keima’n le’ tiin min lo hmakhalh thuai a.

Hmeichhe pahnih chu an paw thla a, a țhenin hnunglamah kan dawm pui bawk a, a hnungberah chuan Thingzaipa chu pathum hian an lo chhawm bawk a, an hnungkhirh chu thuhran, kawihrui hian an la hling tel leh ta nghal a, chu a chhapah a malpuiah ka kahna vang chuan kal a nuam bik hauh dawn si lo.

Keiniho chuan kawngpui chu reivak lovah kan thleng thla mai a, Pu Ramthanga Jeep an lo keng hi a lo ni a, kawngsirah chuan kan hnunga mi te nghak chuan kan lo țhu țhap a, Zorini leh Engmawii chu a țhenin an buaipui a, an ti harh thei bik chuang lem hlei lova.

Lalvala chuan min lo hnaih var a.

“Engnge thianpa thilawmzia hi ni reng reng, Engmawii te saw?” a ti a.

“Zorini pawm khan ngawirengin ka lo awm a, in lo thlen hma lawk kha a niang chhaklam ka han hawi chho kha, hmeichhe pakhat pu hian a lo kal hi ka hmu a, min hmuh mai loh vang chuan Silai ka chuh thuai a, ka lehhawi leh laitak chuan min lo hmu hman hi a lo nia, a hmeichhe put chu a keuh lawk a, a tlanchhe zui a, keilah khan rinthu takmeuh hian Silai chuan ka han hawl zui a, a fu mial a niang chu hmalamah chuan a bawkthla thlawrh a, ka tlanchho zui ve nghal a, bawkvak hian a lo tawlh thla han han a, a bak chu in hmuh ang kha a ni mai” ka tih sak a.

“A nih tak chu, kawr zai kan lo lut chiah tihah khan Silai ri kha kan hreta mai sia, thil diklo a awm a nih hi tiin hmanhmawhin kan lo tlan chho zui nghal a, in lo in hambuai kan lo nang ta che u a nih kha mawle. Engtinnge a țhianpa chu ni dawn a?” a ti zui a.

“Thurualpui a nei elo?” Pu Lalkhuma chuan a lo ti hu a. Lalvala chuan engmah a lo hrilh hman lo a ni chek ang.

“Nei e aw, Pu Rinawma te thingzai an nia, pahnih. Mahse, pakhat chu thlamah a awm ka ring, hmanniah ka kap hliam tawh a, a che chhuakin ka ring lo”

“Leh zel chuan leh! Chuti chu a ni pawh chu zu tham chhuah nghal tur a nih chu” a ti nghal tun tun a.

Chutihmeklai chuan kan mi nghah te pawh chu an lo inhnuk thleng thla ve dawt dawt mai a, a zakah dawmin kai țha ta mai lo chuan a hnuh hian an lo hnuk pek a!

“Engtinnge Engmawii saw helaiah i hruai theih?” tiin Lalvala chuan a lo va dinchilh nghal thuai a.

A chhanna erawh hriattur a awm lo.

A samah chuan kuaidakin a zawhna ngai bawk chu a han zawt nawn leh a, a ngai te bawkin a reh leh hmak mai. A hnungah chuan pakhat hian a rawn tlawh zawt mai a, a dawmtu te lahin dawm nghet hek lo, kawngpuiah chuan hmai sawhchawrh chuan a tlu thlawrh a, a samah chuan an han hnuktho leh a, zawhna ngai bawk chu an han pe leh a. A ngai ang bawk a la ni.

Ka dawhtheihna piah lam hret a ni ta. Ka tho nawlh a, a khabeah tak mai chuan ka’n pet nghek mai a, paih ang derin hnunglamah chuan a thal tawp a. a ka ațang chuan thisen a chhuak nghal zawih zawih a, chhuih zui leh ka tum lai tak chuan Lalvala chuan “Țhianpa a tawk” tiin kan inkarah chuan a lo tlazep thuai a, chuti ni lo se chuan ka sawisa hlum duh ngeiin ka ring.

A iptepui ațang chuan damdawi bur lian lo tak hi a lo tlachhuak a, rangtakin ka ban nghal a, a kawmah chuan ka hriatloh lam tawng hlir a ni inziak ni.  Ka kailet thawk a, a iptepui chu ka zensak nghal rawk rawk a, Syringe leh Damdawi mum, saranga in thun fel thlap mai hi a lo la awm cheu a. Thawhpah chuan a nakah ka’n chhuihzui leh hram pek kha.

“Kal ang u, a țhianpa chu a lo che chhuak khanglang ange” tiin Pu Lalkhuma chuan tih dan tur a sawi lung lung a.

“Kal huk  a ngai lo a nia, thawm te  a lo hriat phei chuan a lo in saseng hman a hlauhawm a, fimkhur deuhin pahnih khat kal mai sela, duh leh an hnung deuhah midangin zui se” tiin a changtupa ber awm zia zang chuan ro ka rel zui a.

Motor-a kan han inhlan fel chuan Zorini chu a lo meng diar diar a, a chauh hmel kher mai. Țawng tum chuan a han ang zuau zuau a, richhuak tur erawh a awm lo thung.

“I him tawh, hlauthawng suh aw Zorin” tiin Lalvala chuan a lo hnem thuai a, țawng nachang pawh ka hre meuh lo. Ngawireng chuan ka malchunga a lu a nghat chu ka thlir tlawk tlawk ringawt mai a ni. Ka bana a chelhna chu Zorini chuan a hmer ngat ngat a, a thahrui chuan a tlin lo lam a ni. A na zo lo.

A mittui chu a luang ngiai ngiai a.

Ke a kal leh țhin ai chuan motora kal nge nge chu a lo sawt zawk a niang kar lovah khua chu kan lut thuai a, kan pelh a piang mai chuan mak tiin motor chu an lo en zui țawk țawk hlawm a. Zorini te peng kan thlen chuan Lalvala chuan chhuk ve a phal tlat lova. Ka thin a rim dawn dawn mai.
“Hmabak i la neih kha, midang kuta dah lovin le” tiin ka beng bulah chuan a rawn sawi sap a. Mahse, Zorini ber ka hmuh hnu chuan midangin lo chhunzawm mahse pawi ka ti lo asin mawle.

“Pu Khum, Chhuana nen hian Thingzaina lamah chuan kan zu kal ang e. Midang chu lo kal lo mai sela, tihsukuk te pawh a hlauhawm e, helam hi chu in kutah awm mai rawh se” tiin a chah zui a, chutih lai chuan Kan YMA Secretary hi a lo thleng ve chiah bawk a. Lalvala nen chuan in kheuh hrangin thil awmzia an inhrilh ni hmiang ka ti mai a, Zorini an ina an luhpui lai thleng chuan an in dinchilh a.

Engmawii te inlam pan chuan motor chu kal leh mai tumin an ti rum vut vut a, chutihlai chuan a țhen chuan ‘a hmel tal kan hmu duh e’ ti niawm fahranin motor hnung chhuata kan phuarhlawm pa chu an han bih hram hlawm bawk a.

Motor-ah pawh chuang ve ta lo chuan Lalvala te in lam panin kan kal a, “Kan chin a hriat bawk si lova, chaw tlem tal i bar hmasa phawt ang” a tih vanga kal kan ni.

“Midang hruai la zu kal mai teh u” ka la tihsak talh pek a.

“Ni lo, hei chu i kuta awm a ni a, a hmawr kan bawk ngei tur a ni. Midang kuta hlanchhawn a rem lo” a ti teh tlat a, engti ngaihtuahin nge maw a ngaihtuah pek le.

“Zorini kha ka ngaihtuah asin” ka han ti dek dek a.

“Keipaw’n ka ngaihtuah, ka ngaihtuah vang alawm hetia ka tih reng” a ti hlar a. ka țawngzui duh ta bik lova, a ngaihtuah vanga hetia a tih chhan kher phei chu ka mansak a zeng pawh a ni law.

“A țhianpa saw engmah kan zawh chhuah a rinawm loh, chuvang chuan kan zawh tur hnai ber chu kan la man loh zawk chu a ni. Midangin an man chuan insum zo lovin an lo tihlum hial pawh a ni thei a, chuti a nih chuan thil a pawi thui dawn a sin. An damdawi hman hi a thahna anmahni chuan an hre ngei dawn a, chuvang chu alawm kan pahnihin i kal ang ka tih” a tih chuan ka fiah ta kuar mai.

An inah chuan tumah awm pawh an lo awm lova, chawbel chu a hawng rawk rawk a, dawhkanah chuan a lo hung chhuak a, chawhmeh bel pawh chutiang zel chuan a ti mai a, chawbel chu kan zen ngang ngang a, ei erawh a awlai hran lo khawp mai. Ril a țam lua bawk si lo nen.

Lo lam pan chuan Zualko tur ang mai chuan kan phe ta hlawk hlawk a,  a kal lah kan kal chak narawh e.

Pu Rinawma thlam pan chuan kan kal bing nghal nalh a, min lo hmuh hmasak pawh a a ralkhel lutuk loh nan tiin an thlam a lang thei țan tihah chuan hmanhmawh ang pawhin kan lang duh lem lova, chutih rual chuan a put bo mai ang tih hlauvin thlam lam chu kan melh awl lo thung a.

Engmah thlam leh a velah chuan hmuh tur a awm hran lo. Kan mi hmuh duh ber a chu a mu leh ngei a nih ka ring. Tlan puat a va rik leh bawrh bawrh mai ka duh tawh.

Khai le, Thlam kawt chu kan thleng ta.

Thawm engmah a awm lo. Kawngka lah chu a inkhar țhap a, do phei chu a indo lem lo.  Lalvala chu a kal hmasa zawk a, inring takin silai lek vang chung chuan a kal a, a hnungah keiin chemtum ka hum bawk a. Kawngka hawn a tumlaitak chuan ka lo kheuh zeuh a, namthlak lam chu ka kawh hmuh a, a lo inkhar loh vang chuan chulam chu a pan thla leh a, kan han lut chu kan inti hlauthawng chawp mai mai hi a lo nia, kan hmuh duh ber a chu puankawp sinin a lo mu hnar kawk kawk pek a nih chu mawle. Hrep tak hian a!

Lalvala chuan “Țhianpa” tiin a han ko va.

A zi țial țial a, a rawn meng chu Lalvala Silai keng a hmuh chuan a phawk kher mai! Mahse, a awmdan chu  a ti danglam leh thuai a, lo enchik tu tan erawh chuan hai rual a ni lo thung.

Lalvala chu Thlam char bangngheng chuan a țhu zui mai a, a tan hlauhawm anga lan a hun lo tih chu ka hrethiam ve mai a. Kawngka chu hawngin ka țhu zui nghal a, ka chem hum erawh ka la dah duh bik lo.

A ni pawh chu a lo tho chhuak ta, a puanhlap sin a hlim takah chuan hmanrua a paipawn lo tih chu a lang mai a, ka thaw huai mai. Rizai tel ngheng chuan awn fe hian a țhu mu a, “In ramvak a mi?” a ti a.

“Aw, khawnge i țhianpa le?” ka lo ti thuai a.

“Luiah a kal, sangha man a tum a niang” a ti ve mai a. Lalvala nen chuan ka lam hawia awm an ni a, an hmachhawn zawngin ka țhu tihna a nih chu. Chuti e ti lo chuan kan thingzaipa chuan ka lam reng reng a melh lova, Lalvala Silai ringawt chu a mitmei niberin ka hria. Ka chemtum ken ngawt chu a hlau lo deuh pawh a ni mahna le.

An thingzai chung chang vel zawt chuan kan ti ti pui reng a,  rin ai tak chuan a lo țawng duh ve a, an ram lam chanchin te chu a sawi ve suam suam a , a awphawi chu awn leih lawih viau mah se a ti tipui theih viau mai.

Rizai intel hnuaia a kut a rawlh lut lai chu ka hmuh hmaih hauh lo, ka awmdan leh awki chu ka ti danglam duh chuang bik lo va. Engemaw tak chu tih tum a neih ka ring, kahlauthawng ru deuh. Lalvala lah chuan ka mitmei  a man hleithei bawk si lo.

Ti ti sur sur pah chuan a kut chu a phawi hret hret a, mitmei reng lo ila chuan a danglamna chu ka hrebik kher lovang, mahse a kut chu ka thlithlai ber a nih vangin a dahluh thuk zawng leh a lakchhuah pawnlan chin chu ka hai hauh lo.

A kutphah bawr a chhuah kim hmain ka chempui hian a lu-ah ka vawm ang.

Amah lah chuan a thilsawi lai chu a țhulhphah chuang der bawk si lova, a sira awm Lalvala tan chuan han rinhlelh zia pawh a ni lo. Amah thlithlai tum ang hrima a hmachhawn zawnga ka țhu chu ka tum reng ni lo mahse, ka fin hmel riau hian ka hria!

Lalvala dingchhuak ka melh zawk tih chuan ka hmaa thu chuan a tihtur a ti hman tlat mai! A phezawk chu ka hmu hman hram a ni. Silai puakri leh Lalvala thu leh hnawk chuan a zui nghal a, Ka chemtum chu ka vawm phei nghal kha a nia, ka bawhphei zui nghal bawk a, ka lam hawia a pistol lek chu a per hman ta lo.

Theihtawp chhuahin ka hnek mawlh mawlh niberin ka hria, Lalvala pawh ka ngaihsak hman lo.

A tawpah chuan ka rek bet ta a, a pistol ken chu rizaiah chuan thlauhin bangkil lamah a tla liam nghal a, a nghawng chu thlahin a zal ta deuh bawk a, a pistol tla chu ka chuh ta zawk a, a nakthawlah rem leh rem lo hian ka’n tlawh leh awrh a, a vial zui ngalh ngalh mai.

Hruikhau hih sa, phoro niawm tak namthlak lama in khai sung mai chuan a kut leh ke chu ka phuar zui nghal a, a tal ve viau nain ka hnek zui deuh nual bawk nen a țangrei zo lo a chha chu a ni e.

Lalvala bulah chuan ka chhukthla thuai a, a malpui veilam dawm hian a lo țhen chak chak a. Chhuat, dapah chuan thisen a tling kang mai bawk a. “Țhianpa khawilai nge, a na em?” ka ti zui a.

“Ka malpuiah hian a tlang a nih ka ring” a thisen chhuah vang nge a hlauh vang pawh ka hre lo a dang var lap mai a, na a ti viau zawk nge mawni.

“Mu rawh khawimaw” tiin chhuatah chuan dimte hian ka mut tir a, a kekawr chu ka han hlihsak dawn a, duh angin a ke ti kang ngam hek lo, a ek țhat țhat mai a, a țulnain a urthluk miau si vang chuan phelh loh theih ninghal hek lo. A khup thleng chuan ka phihthlak sak ta thova.

A malpui veilam, hnunglam deuhah hian a lo ni a, thisen lah chu a chhuak țha duh phian mai lehnghal a, a ruh khawih lovin a tihrawl chinah a tlang a nih hmel viau a ni.

 “Lo hmet rawh a tuamna tur kan zawng ange” tiin ka hrilh a, khur dar dar chung hian a rawn dawm a,  “Țhianpa zial lo tan teh, ka lu a hai deuh dawn tlat” a tih chuan thisuk a nei deuh a nih ka ring a, rangtakin a meibawm a mi chu ka țansak nghal thuai a. Am zet chuan a fawp kawk kawk a.

A tuamna tur ka han zawng chu hmuh tur a awm der lo, vang tak a ni.

Ka kawr hakthuah zawk chu ka phelh a, ka pawtthler kawk kawk a, a thichhuak a reh hleihtheih siloh vang chuan vutduk chu sawkin silaimu luhna laiah chuan ka bel ta ngawt a, țhatpui tak maw le. Ka kawr chuan ka vet zo vek a ni ber mai. Ani lah chu a khur der der mai lehnghal a.

Damdawi te chu ka han dap sak leh rawk rawk a, nachhawkna awm ang bera ka hriat chu ka pe ve hmiah mai. Enchian hman pawh a ni lo. Patling pahnih chuan chhul chaknate ngawt chu an kawl lo turah ka ngai ve ngawt mai.

Chutianga ka phet buai viau lai chuan Thlam lam pana thawm lo kal awm tak hi ka hria a, bangawng ațang chuan ka han bih a, kan khawmi mipa țhe țhaw sawm dawn lai mai hi an lo ni a, thaw a veng huai mai. Lalvala zawn tur an lo thleng e.

Rei pawh rial lovin rahkaah chuan an lo chuangkai thuai a, thawm kan lo nei lem bawk si lova, an ti deuh a niang an han ngawi leh vang vang a, keichuan ‘lo lut rawh u, a hlauhawm lo ve’ ka lo ti vat a. An lo lut zui ve nghal a, Lalvala kekawrte nena malpui tuambura lo mu leh chhaklam kila pakhat phuarhlawm renga lo mu an hmuh chuan an phawk kher mai!

Thilawm dan chu ka’n sawifuah zung zung a, chutihmeklai chuan a țhenin thlamkila mi chu an lo han chhuih nen, kan inkhap leh rih bawk a.

Lalvala zawnna tur chu hlang pangai han siamna chi ni hek lo, puantawlai an siam chawp a, thlam chhuata puankawp let reng chu an hmang zui hmiah mai bawk a. Sawisel tur chuang awm tawh hek lo le. An siam zawh chuan kal mai tum chuan an han intintuah uai hlawm a. Ka mi phuar hlawm pawh an hnungkhirh a, a nghawngah chuan an hruikhau herhchawp chuan an hling bawk a, ani a kara ke na lehnghal chu a chhuah a rinawm teh chiah loh.

Mahse, chuti ngawta kalpui chu a dik thei lo.

Lalvala nen mi kan hmakhalh chhan ber kha ka la hre hleinem mawle. “Ngawiteh u, kan chhuah hmain engemaw kan zawt lawk ange” tiin an chhuak mai tur chu ka chelh a.

Kan mi man pa chu ka din chilh a, mi pawh a en ngam meuh lo. “Eng damdawi nge in hman?” ka tih chuan mi han melh zawk a, a kun zui leh daih a.

“Ka zawhna che chu i hria em?”

A mi chhanna chu ka hre lo zawk niin ka hria, a damdawi sawi chu a hming ka hriat zawng a ni tlat lova. ‘Khi lam ațanga kan lo ken thlak a ni’ a ti mai a.

“Eng chena rei nge a thawh, engtinnge a thawh?” ka ti zui sek sek a.

“Nikhat vel a niang”

“Engtikah nge Zorini kha in pek hnuhnun ber?”

“Ka hre lo, ka țhianpa khan a pe a, kei chu nihnih vel ka kal tawh lo”

“A thahna a awm em? Engtia tihreh tur nge?”

“Awm lo” a ti chiah chu a hmaiah ka lo beng leh hman pek a!

“Ka that ang che, i duh em? Mawh i duh em?”

“Ka pu min ngaidam rawh”

“Ngaidam a!?” tihpah chuan a khabe kualah chuan ka’n dawm sak leh hram pek a, a thal em lo nain Rapchung inkham phei zui mai chu a tauh bur a, ka sa laklawh ve deuh bawk a ni e.

Tichuan Lalvala zawn ngai bawk, pakhat kalțha hleithei lo chhawm ngai bawk nen chuan khawlam pan chuan kan in awi chho ta thliai thliai a.

Thuipawh kan kal hma chuan kan YMA hruaitute an lo thleng chawpchilh ve leh a, ‘Kut in lo thlak vak kan hlau deuh a’ an rawn ti luam a, a nih ka lo ring ru deuh reng a, kha chen khawtlang tibuaitu te chu tumahin kan dim vak kha a rinawm loh reng a ni.

Khawchhunga kan luh tirh atang chuan hnunglama ka chuh deuh hret hret a, vengmawnglam kawng ațang chuan kan in lam panin ka pen bosan ta daih a. Zorini tlawh duh viau mah ila ngaihtuahawm tura ka ngaih loh vang chuan mahni intihfel hmasak phawt ka duh a ni. Tin, ka chau thawkhat bawk.

Ni tla tur chuan kawl chu a ti eng uau a, mi ka hmuh reng reng mai chu an hmanhlel em em vek mai nihian ka hria. Țah tlawk tlawk mai ka chak ber.

Inchhung ka han lut chu ka nu chuan tapchhakah mei a lo zial mawlh mawlh a, mi han hmu chu phawk fe a min melh chung hian a lo dingchhuak hluai a, “Mama leh..” hi a lo ti ringawt a.

“Nu inbual ka duh a nia, tuilum i neih chuan”

“A awm kha, kan lo siam ange aw” a ti zui ve mai a.

Ka inbual zawh chuan zanriah kil a hnai maitawh a ka hriat vang chuan chumi hma han mutthilh sek tumin ka khumah chuan ka tlu zal a, hawh awi, mutthilh te chu a hnai lo lutuk mai!

Community Hall lamah chuan thawm a ri leh deuh laih țhin a, chulam pan chuan ka kal ve ta nal nal a, kut an lo thlak leh mai emawni dawn le?

Ka thlen chuan Police motor, a hmaa mi bawk kha a lo ding leh pek a, Hall bulah chuan mi an lo pungkhawm hnem hman kher mai. Ka lehpelh apiang te chuan mi pawh be lem lo hian mak tih hmel fe hian min lo melh hrek hrek ringawt a, a țhen chu an la inhrilh ru rawl nen.

Hall chhungah pawh chuan ka lut ve mai thei lo, kawngka awm apiangah chuan an bawr em em vek mai, tukverh lam thleng chuan sawhthing thlar țha mi ang mai lah ni chuan.

Luh ve hram ka duh vang chuan harsa harsa chuan ka keu lui zel a, a tawpah chuan a chhungah chuan ka lut ve thei ta hram a.

YMA Bench ah hian kan man hmasa zawk kha a lo let ngat a, pakhat chu Folding chair, ke sawi deuh leih luihah hian an lo țhuttir bawk a. Mipui nen an inkarah chuan Police panga lai hi an ding a, OC chuan inti engemaw fe hian thupui a lo vai leh pek a!

“In kuta thi a nih angin, he thilah hian Tualthah case kan ziahluh a ngai a ni, chu chu dan a ni bawk” a tih chuan ka phu zawk mai! Bench-a mu chu a thi a ni ngei ang, an lo piai belh leh hlak emawni dawn le aw? Invensen chu a har khawp ang.

“Tunge he pa kutthlak tu zawng hi lo chhuak rawh u” a ti thur thur a, ka bula miho chu an inmelh kual deuh hrek hrek hlawm hian ka hria a, chhuah tum hmelpu pawh ka hmu lo ka ti.

“In lo chhuah loh chuan in khawtlang hruaitu te hian an tawrh a ngai dawn a nia, a kutthlak tu te kha lo chhuak mai rawh u” a han ti leh a.

Ka sa ta phat mai le!

OC melh ran chung chuan muangchangin ka penchhuak ta a, “Pu OC, hemi te pahnih hi ka man ve ve an nih hi, nang hlawh neia sawrkar rawih zawk che kha khatih lai khan khawiah nge i lo awm ve?” kutthlak duh nghal mai hmel ka put ka ring. Mi lah a la chhang duh lo leh ta nghal a.

“Helaiah mi man sa i rawn hmu a, chutah pawh koh chawp emaw i la ni lehnghal ang a, misual mantute ka man dawn che u ti a rawn vau kha a zah pawh i zak ve em em lo a mi? He thil manchhuak tur hian hun leh tha engzat nge ka sen ral i hria em? Engang fakaua hahthlak leh hlauhawm nge i hreduh kher em?” ka ang tui laklawh viau a ni. Mi ti phur tur tawk lekin ka pa chu ka hnunglawkah a lo penchhuak ve kher bawk nen. Ka pa hmaah hian tumah hlauh ka nei chai si lo a leh!

Hnunglam ațang chuan zurui tih hriat reng hian “Chil ila nimai lawm” pawr fe hian a lo ti zui a. Boruak daiduk chu a inthlak rang kher mai, ka hnunglama mi ho chu “Chil ang, chil ang” tiin an au ta hulh hulh mai a, OC pa chu a zam tih ka hre reng mai, a naute ho an melh kual țhin a, panga lek an ni bawk si. Keini lah Hall chhunga awm ngawt pawhin a chanve kan awh hmuk mai si, tlanchhuak ngawt dawn se pawnlamah lah an therfuk bawk a. Kan chil mai zawngin a nihlawh lo teh ang chu.




_____________                     _____________
                  KA NAKRUH BO

                    Chapter-IX

Kan VCP a lo penchhuak ve ta thung a, ban a rawn phar a, “Inbengdai rawh u, in beng dai rawh u” tiin a au lauh lauh a. Ka pa chuan a lo pui thuai bawk a. Thawm nasa zualpui chu a reh ta deuh.

OC chu ka pa leh VCP chuan pawn lamah an chhuah pui a, mipui leh police inkarah chuan keimah chiah ka tlazep ta, hnunglam atang hian pakhatin “Le, a hun chiah” a la rawn ti zui a. Ban phar chuan ka au ve chul a, min rawn nek lui ta bik lo chu a nia.

Engengemaw sawia ka lo rik lang lang lai chuan pawnlam ațang chuan tlangval pakhat hian min lo kova. Ka va chhuah chuan YMA lama kan hruaitu te engemawzat an lo lut mek a, inhrilhfiah ngai a awm te pawh a ni mahna le.

Hall dinglam sir a zunin bulah chuan OC, VCP, ka pa leh kan YMA President hi an lo ding khawm laih a, an lam pan chuan muangchang lovin ka kal zui ve nghal mai a. An sawi pawimawh hmel khawp mai.

An bul ka va thlen chuan kan VCP, Pu Kaptea chuan thilawmzia hetiang hian min lo hrilh var a, “Hei tual kan that a ni der mai a, kan duh leh tum reng vang pawh ni lo mahse kan kutzala borala nih miau avangin mawh kan phur lo thei dawn lova, kan police tan pawh han inhum a rem lohna chen a awm avangin Case an ziahluh a ngai dawn a..”a ti fak fak a.

“A thattu ber pawh an hre chuang hleinem, tunge an man chuan ang?” ka lo ti he haw a.

“Nia, chu chu ngaihtuah theih tak pawh a ni. Mahse, kutthlaktu tumah an inpe duh si lo a nih chuan a hminga khawtlang hruaitu kan nihna angin mawh kan lak mai  a ngai ang chu, mi tih  loh dan pawh a ni hleinem”

“Chutiang ngawt a ni thei nang, a zaizaptu zawkin intawrh daih te chuan engnge awmzia awm ang?”

“Mipui kuta boral an awm chuan mimala han in man fak theih a ni tawh țhin lova, chuvang chuan kut kan thlak emaw thla lo emaw mawh phurtu kan awm a ngaih vang zawkin khawtlang ai kan han awh ange tih a ni mai a, huphurhawm a ni hleinem” a ti leh a.

“Engpawh ni se, hei kan awmdan chu i hre vek a, kan khawtlang hotu emaw, tu emaw ber manin han hruai ngawt dawn la mipui thinrim hi kan indang zovin a rinawm lova, a innawkbuai lo zawnga hmalak theih dan ngaihtuah tlan a ngai a nih hi. Kan mi man pahnih te khi han hawpui phawt la, tichuan midang hruaitur chuan i lo kal leh zawk mai dawn mi niang? Han tlanbo tur chi pawh kan awm chuang lova” tiin ka pa chuan OC chu a han melh a.

“Chutiang ngawt chu a ni thei si lo a ni” a ti nang nang a.

“Chutia i ti duh lo a nih chuan i duhdan chuan ti la, mipui hi keinin khap lovin an duhdanin kan awmtir ve thung ang” ka lo tihsak hmak a. Mi chhan ngaihna lah a hre lawi si lo.

“Ka inrawlh buai ve na tur pawh a awm loh chu, min mamawh leh min lo ko mai dawn nia” tiin ka kalsan ta daih a. Engtin tak in rel zui ang maw.

Lalvala te inlampan chuan kal ta daih a.

Khumah chuan a lo mu bal a, ka khawngaih angreng viau mai. Ka nghahrei luat vanga kut tuar a ni bawk si. Kha ai khan chet lo la hma hret ila chuan hetiang hi a tawk kher lo maithei asin. Mahse, hun liamtawh hnu phei chu a nia, inchhir pawh a sawt ber awm love.

Amah pawh ngaihtuahawm a ni lem lo. Pangai tak chuan kan ti ti bawrh bawrh a, kan mi mante kalpui an tumdan te chu mi han zawt nual bawk a, thutlukna mumal hreve nghal hek lo, ka hriat ang ang chu ka han hrilh chhawng ve bawk a.

Kan in ka thlen chuan khua thim a ni ber tawh a, kan nu chuan “Khawnge i pa le?” a lo ti var a.

“Hall-ah a la awm a niang” ka mai a.

“Mama, Zorini saw a la țha miah lo a nia” ka u chuan a lo ti ve mek bawk a.

“A harh mai ang, damdawiin an lo chiu thin a, a thahna an hre bik bawk si lova, ti sawn a reh hun nghah a ni mai, tihngaihna a awm lo, chawei siam la” ka ti hul hak a.

“Nia, siam mai teh u, i pa pawh chawthlengin a ko ve mai ang, kan tlai bechhe lutuk tawh” ka nu chuan a lo ti ve bawk a.

Ka nu sawi ang ngei chuan chaw kan han kil țan chauh chu ka pa pawh chu a lo thleng chhawm ve mai a.

“Engtinnge in kalpui tak a?” ka lo ti thuai a.

“Zaninah vantlang inkhawm koh an rawt ta a nih kha mawle.  Kan thingzaite pahnih chu Police pathum khan an haw pui a, OC leh Constable pakhat an la chambang a”

“Chu mi man pawh an nei chuang lo a ni maw?”

“A, han man ngamna chi kha a ni lova, mipui khan an chil duh mai dawn sia. Amah lah tunhma atangin a lo in la Raja ve țhin bawk nen”

“Tichuan engtinnge vantlang inkhawm pawh chu ko se an tih chuan ang?”

“Thil awmzia inhrilhfiah nan a nih ber chu mawle. Mipui thilawm zia hrilhfiah ngai an ti a nih kha” a ti zui a.

“Chuan… Pu Kaptea te chu inpek an tum ta a mi?”

“Ele, ka hriatpui tawh bik nang chulam chu” a ti zui mai a.

Chutia kan ti ti mawlh mawlh lai chuan Tlangau a rawn auva, ‘Zanin Dar 7:00 ah hian Community Hall-ah vantlang inkhawm koh a ni a, kum 18 chin chunglam chu kal vek tur a ni ang” a ti kual lauh lauh a. Kan ti ti tuilai pawh chu kan tawp zui phah ta a ni ber ang chu.

Zanriah kan eikham veleh chuan țhutpawh țhu muang lovin ka tekchhuak nghal a, Zorini te inlam pan chuan ka kal hnak hnak a.

Rinai takin awm an lo țhahnem phian a, a changtupa tih takah min lo thlir țhap hlawm mai.

Han intih engemaw vak theih pawh a ni lem lo. An laina ho an thu ve țaih mai bawk si a, a nau kha a lo bengvar hlauh a, ka bulah chuan a lo țhu thuai a. A u chanchin chu min lo hrilh thuai thuai a, engtianga hmuchhuak nge ka nih chu min zawt sek sek a, tawikim angreng tak chuan ka chetdan tlangpui chu ka han hrilh a, ka sawi ring vak lo emaw ka tih laiin midang awm ve te pawh chuan an beng an lo dawh ha hlawm a.

Vantlang inkhawmna lama  kal ve ka duh bawk si vang chuan a nau bulah chuan an pindan lama min luhpui tur chuan ka han ti a. I he lovin a ni pawh a tho zui ve mai a.

A thawmhnaw bal zet te chu an lo thlak sak tawh a, amah pawh an tifai a ni ngei ang hmuh a nuam ta deuh. Kan thawm hria niawm tak chuan a lo meng a, a mitmeng chu a la pangai zat lo khawp mai. A bula țhuho chuan ka țhutna tur niawm tak chu min lo kian sat sat hlawm a.

Ka tang der duh ta bik lova.

“Hlauthawng suh aw, damdawi hnathawh kha a reh țep tawh ang, i taksa a chak lo deuha kha vang khan a thawk rei mai mai a nih kha. Thil țha deuhin ei la. Engtikah nge an chiu che?” ka tih chuan ri hriattur awm mang lo hian ‘tukinah’ a ti sap a.

“Nikhat dan angah  a mi an chiau che i hre thei em?”

A lu a bu nghat a.

“Chuti a nih chuan a damdawi chu nikhat chhung vel bak a thawk lo turah ngai ila, zaninah tuitakin mu la, naktuk zingah chuan țha mai ang” ka tih sak a.

Miidang ti ti karah chuan ngawirengin ka țhu ve ta kar a, Zorini chuan ngawireng hian min en kiauva, a mittui luang ngiai ngia mai chu hmuh loh der theih hram se ka va han ti teh lul em ve le. Mi hmuha hruksak em chu niin ka hre bawk si lo.

Reipawh awm zui duh lovin vantlang inkhawm kal chhuanlam chuan ka chhuahsan zui ta daih a.

Khawlaiah chuan Community Hall lama kal tur nge an nih pawh ka hre hlawm lo mi an tam riau hian ka hria a, tu khaw kha chuan min uk sak lo va, a tu amah ka be bik lem hlei law. Hall ka thlen chuan an lo tan tawh a, Kan VCP Pu Kaptea chuan sawihawnna a lo nei mek a nih hmel e.

Hall chhung chu an khat ti tih a, a pawnlamah veivak tawk an awm reng bawk a, a kala hrim hrim chu kan tam khat viau chuan ka hria. Tlarhnungber dawttu, a kil awllai chu chuhin ka țhu lut zui ve ta nghal a.

“…kan khawtlangin chhiat kan tawk a ni ber mai a, khawțhenawm lam nen buaipui ngai khawpin kan buai luih luih a, tumahin kan la theihnghilh loh kha. Boruak a’n daih chho viau laiin hei rinloh lamah beisei loh tak maiin boruak dang kan han hip thut mai a. A tu a te pawh he kan boruak tawn hian min ti chi ai tlang a, awmngaihna kan hre meuh lo a ni tih kan OC zahawm tak pawh hian min lo hriatsak se la.

Tin, inthununna kawngah duhthusam angin thil kan kalpui hlei thei lova, kan duh loh deuh mai kan han tawng leh bawk nen a luhai thlak angreng viau a, chutih rual chuan sawi leh sawi hnu kan boruak tawn hian a zir em a, kan ti dawn nge a zir lo em a kan ti zawk dawn-mahni thlirna zawn ațang theuh chuan indem leh chuang tur pawh kan awm chuang lova.

Chuti a nih mek lai chuan he khuaa cheng a, helai awm zawng zawng leh he rama cheng zawng zawngte hi dan hnuaia awm vek kan ni a,  kan țhatlohna leh felhlelhna kan lo nei anih chuan kan chungah Danin  ro a rel thei a ni tih hre ta ila, chumi chungchang chu inhrilhfiahna neih a țula a lan vangin zaninah pawh hei vantlang inkhawm kan han ko rum rum a ni a, kan OC hnen ațangin kan hriattur pawimawh ang te ngaithla turin inbuatsaih ila a tha awm e. Tichuan a ni’n hun a hman zawhah zawhna te kan nei a nih chuan chutiang hun chu kan hmang ang a, a kawizawng leh harsatna siam lo zawnga awm kan tum hram dawn nia, kan OC kutah hun awm nghal mai sela..” tiin a thuthmun a pan a, OC pawh chu a lo dingchhuak zui ve nghal mai a.

“Kan VCP in a sawitak ang khan hei kan khawtlang boruak chu kan hre tlang vek a, hun harsa leh  khirhkhan tak mai kan paltlang a ni a, chutih meklai chuan vawiin lamah hei thuthar lawmawm tak mai kan han hre leh a, a lawmawm han tih mai loh chu sawitur pawh a vang a, kan hlim lutuk hi kan sahawk tlang deuh te pawh han ti ila a sual awm love.

Pu Kaptea’n a sawi tak ang khan, hetia mipui kan han punkhawm hian inthunun sen te a har țhin a, vawiin lamah pawh kan tumreng ni pawh a lang lovin, kan kutah nunna hlutak mai lakin a awm hlauh mai a, he thil thleng hi a pawi em em a ni tih kan sawi hmasa duh a.

Tuin emaw tihhlum duh vang hrim hrimin kut kan thlakin a rinawm lova, chutih rual chuan kut rual deuh ta na chuan a zawh tawk aitam kan lo pe a ni mai a, in dinhmun ațanga thlir chuan han demna chhan tur che u pawh a awm hran lova, kha chen anmahni vanga inbuai zia te, in hahziate leh in rilru hrehawmzia te a tak hmutu te kan ni a, kan hrethiam em em che u a ni.

Chutihrual chuan kan hriattak ang khan kan chungah hian dan a awm miau vangin chu dan chu zawm famkim thei lo mah ila kan theih tawp chhuaha zawm kan tum a tul a, chu chu khua leh tui țha nihna pawimawh tak pawh a ni reng a. Chu dan hnuaiah chuan kan awm vek si avangin engnge chu dan chuan a thlirdan tlem a zawng sawi kan tum ange.

Mi tu pawhin thil sual ti se, India dan hnuaiah a chungthu rèl a, a phu tâwk hremna pek tur a ni, "Diriam leh deusawh, tualthattu/pawikhawihtu hmuh kher tumte leh thah ve mai pawisaklohnate hi dan palzûtna vek a ni a; tharum hian buaina a chingfel ber lova, tualthattu/pawikhawihtu kan chîl hlum ve leh mai hian tualthahna dang a siam belh a, pawikhawihtu kan huat em em turte nen khan danglamna kan awm miah lo tihna a lo ni reng a. Chu aia thil țha lo zawk pawh chu ala thlen thei cheu awm e.

Mipuiin pawikhawihtu hmel hmuh țalh te hi kan tum ṭhin a, hei hian police hnathawh nasa takin a tibuaiin a ti ṭhuanawp thei thin a ni.  Court-in rinhlelhna awm miah loa a titu finfiahna police-in an pek a phût a. Finfiahna zawn kawngah mipuiin boruak kan lo neih ṭhin hian harsatna a thlen ṭhin.

Misual hremna chu dan kutah dah ila keini mipuite hi chu kan him tawk viau a ni tih i hrethar ang u.  Chutih rual chuan Hnuchhui leh sualna kawng dang tam takah police-te ṭanpui thin ila, police mamawh petuah leh thuhretua tan te hi diknaah chuan hreh hauh loh tur a ni.

Tin, mimal/ sawrkar bungrua tihchhiat hi dan kalh tlat a ni a, a hremna pawh na tak niin kum hnih thleng jail tan theihna a ni (Sec 426, 427, 447, 448, 451 IPC). Mei/ fire leh puakthei thil hmanga mi bungrua tihchhiat sak phei chu kum 7 leh kum 10 thleng lungin tan theihna a ni (Sec 435, 436, 438 IPC), Sec 3 (The Prevention of damage to Public Property Act, 1984). Police duty tihbuai emaw an duty tibuai zawnga khawsak te hi Non-Bailable Offence ni in kum 2 thleng tan theihna a ni bawk (Sec 353 IPC). Dan kalha mipui pungkhawm (unlawful assembly) a tel ve vang hrim hrim pawh hian Jail bang zut theih a ni leh zel bawk (Sec 143, 144 IPC). Heng unlawful assembly hnawt darh tur hian Police te hian power sang tak an nei a, a țul a nih chuan vuak darh emaw silai hmehpuah thleng pawha chet phalsak an ni.

A bikin, zirlai, hna zawng mek te leh sawrkar hnathawk te tan Criminal Case neih hi a hlauhawm em em a. Criminal Case-a convict tawh nih chuan Central leh State hnuaiah eng sawrkar hna mah an thawk thei tawh loh avangin fimkhur a țul hle. Sawrkar hnathawk te pawh darker 48 aia rei an tan emaw tang tura convict/ thiamloh chan tir an nih chuan suspend anga ngaih nghal ni in an hna hial chan phah theihna a ni. Tin, private institution leh Company hrang hranga thawk tur pawh hian Police Verification Certificate an phut tlangpui tawh a. Criminal Case nei tawh te Verification Certificate pek an ni ngai lo a ni.

Vawiina kan khawtlanga thil thleng hi siamțhat tum erteh mah ila engtikah mah kan siam țha thei tawh dawn lova, chumi a nih meklai chuan lawmna deuh mai ka nei a, hei kan khawtlang hruaitute hi fak loh theih pawh an ni lova, chhiattawh a leiah a vanduai zawng leh indawmkun zawnga thil thlir duh lovin ‘he kan chhiattawhna hi engtinnge hma kan sawnpui theih ang?’ tiin ngaihtuahna an han siam daih mai a, dan leh dun kan hriatloh te inhrilhhriatna remchang atan tiin a eng zawng zelin hma min han lakpui a, hei hian nakin hun lo awm leh zel turah pawh he khawtlang tan hian rah țha tak a chhuah ngei ka beisei tlat a ni. Ka lawm e” tiin a țhu zui a.

Pu Kaptea chu pate mawngzang tih takah li nei ang mai hian a lo inperh tho thuai a, “Zawhna nei emaw, hriatbelh duh nei te kan awm chuan hun hawng leh ila” a ti zui a.

Khuh bawrh bawrh chung hian thlanglam kil atang hian Romani pa a lo ding chhuak a, “A nih leh ka pu, mimala kutthlaktu han malman tur an awm miau loh vangin kan khawtlangin tual kan that chu a ni ta ber a, Dan lekkawh tur a nih si chuan kan zavai hian min man mai dawn tihna em ni?” a rawn tih chuan an ham ham hlawm a.

“Ni e, zawhna awmtak pawh a ni. Nichin khan ka hmanhmawh deuh a duh ang pawhin ka han sawi chipchiar hman ta lo kha a nia. Hetiang thil a lo thlen hian keini police lam chuan ‘nang kha, nang kha’ tiin kan duh duh kha kan man ngawt dawn lo che u a. Khawtlang hruaitute nen in berawnin emaw a remchan dan angin thutlukna kan siam mai thin a, mipui kut a ni tawh miau vangin mansen rual a ni lova, khawtlang hruaitu ten hetiang hunah hi chuan mawhphurhna te an han la deuh tlangpui țhin chu a nia, ‘E, keiin mawh ka lo phur ange’ ti an awm a nih chuan chulam hawi chu a ni leh mai” a ti a.

Pakhat hian ring leng lawngin, “Pu Kaptea te an awmbo zawngin kan mawngah ek a chhuak hlei lo’nge” a lo ti lang lang a, kan nuih zui ham ham kha.

Ka rilru a buai ta hle mai.

He thil thleng hi mawhphurhna ka lak ngeina tur niin ka hre si. Mahse, chutiang tur chuan ka ngaingam chiah bawk si lo. Lalvala ka mamawh hle mai.

“Tualthat hremna chu Damchhung lungin tan a ni law’ mi?  A tu a pawh chu lo tang ta se, an tih bik pawh nilovah damchhunga an tan ringawt chuan ava na duh awm ve” tiin zawt pawh ni chiah lo hian pakhat hian a rawn sawi a. Chu zawhna chhanna chu ka hre chak ve tho mai, thutlukna siamna atan ka mamawh ve tlat.

“Ni e, chutiang hremna chu a awm awm the tak e, amaherawh chu a chhan leh vang a zir te hian case siamdan hi a dang ve thei a ni tih hre tel ta ila, tunah tuemaw kan lo hreng ta a nih pawhin Jail lama thawn liam nghal rum rum tur a ni lova, Court lama hruai an nih hma chuan District Jail lamah rei vak lo te chu an awm ve a țul mai thei a. Court-in an chungchang a ngaihtuah hunah Bail theih an ni e’ a tih chuan Bail in an awm thei a, in report tur an tih huna țha taka in report kha a ni mai a. Court lamin Bail theih loh, Convict nghal tur a tih chuan Jail lama kan inthawn liam nghal chu a țul a ni mai a” a ti a.

“A nih, hetiang lam case hi i khawih tawh thovin a rinawm a, Bail leh convict chungchangah chuan tuna kan case hi engnge i hmuh dan ni hrim hrim?”

“A..sawi sual palh te pawh a hlauhawm a, rinbur tur ni lo ta se. Ka hriat ve chinah erawh chuan hetianga mipui kuta boral kan khawih ve tawhah chuan Court pawh hian a hrethiam ve viau chuan ka hria, Bail theih loha an hren tak pawh ka la hre lo ka ti” a ti ve mai a.

“Eng pawh nise, in khawtlang in țanrual te pawh a tul ve ang chu, theihtawp keini lam pawhin kan lo chhuah ve ang a, harsatna liantham chu kan tawk lo turah ngai ila a țha ange” tiin a dam zawng chuan a han tlip zui bawk a.

Chuti a nih chuan harsatna ka neih loh chu.

Muangchang chuan ka penchhuak zui nghal a, dawhsan lam pana ka kal chu ka zam ve deuh ngemawni engtin emawni tak hian ka awmin ka hria.

“Keima’n mawh chu ka lo la ange” ka tih chuan an thum hak a.

“He thil thlengah hian a tu amah han inkawk tur chuang kan awm lo tih chu kan hretlang țheuh a, chutihrual chuan a bultumtu ka nihna chen a awmin ka hria, chuvangin midang bel lovin keima’n a tawp ka’n thleng law law ange” ka tih chuan an haw haw hluah hluah ka rin tehlul nen an reh duak lawi a.

Ka pa chuan inkuangkuahin ngawirengin min lo thlir vang vang a, a ngaihtuahna awm ang chu a hmelah chuan ka chhiar thiam hauh lo.

Police motor lo let leh hun nghah tho a ngaih vangin kal nghal rum rum a ngai lem chuang lo bawk a, Zorini bulah zankhat chu hun ka la hmang thei ang chu. Mahse, a mutthilh daih chuan a ho viau ang.

Hun kan hman zawh chuan OC lam chu ka va pan var a, “Tlangval i ti țha e, mipa diktak i ni” tiin ka rin loh deuh mai chuan min lo chibai daih a. A hrilhhai thlak lam mah alawm mawle. Engemaw chen chu ding chung chuan kan ti ti dun reng a, a thusawi pawimawh tak mai ka chhinchhiah tak chu hei hi a ni “Case hi chu kan ziahluh ngei ngei a ngai a, tualthihna a nih miau vangin. Chutih rual erawh chuan hlauthawng lo la, spot verification titu kan ni a, kan sawi hi a tlang ve ang tih ring la, kan duh chuan khamah a tla hlum pawh kan ti thei alawm..” a nui zui sak a.

Kan inlam pawh tlawh ta lo chuan Zorini te inlam pan chuan ka tlang nghal daih a..

©__________[ɐʞızɹɐp]___________®