KA CONFERENCE VE TAWH!
___________ ___________
KA CONFERENCE VE TAWH!
(My Untold Story)
*P.C Malsawmzuala*
[28.1.2018 - 29.1.2018]
KHUHHAWNNA: Thlarau nun lam hrut chiam ka tum lova, Biak In lam programme pawh ka thual dawn hauh lo. A hrula mi zawk zar zar, chutah pawh chip chiar lovin, a tlangpui ka lawr chauh ang. Tin, ka ziah chhunga mi hi a tak vek a nih vangin a khawneitu emaw, mihring tuin emaw ngaih loh lamah min lo ngaihsak lo hram turin ka ngen a, ka lunglen thu hla mai a ni e.
BULṬAN ANG: Kha Conference kan hman aṭanga kum 10 a nihna champha phâk a lo thlen tâkah chuan thup ṭhen nîl nial chungin nakkina bih lêt leh atan pawh ziakin ka han dah chhuak ve ve hrim hrim teh ang.
Hmanni lawk emaw kan tih chhungin kum 10 a lo liam leh der ta mai a ni a, hun hian luipui luang zel ang mai hian a tu amah hi min nghak lem si lo. Nun hi a lo hlui har lova, Thawnthu niawm taka kan sawi liam mai tur hi kan nun hian a lo va herchhuahpui hnem si em!
Kumin aṭang hian chhût la kum 10 liam ta chu i ngaihtuah chhuak har lovang, khami kuma thil thleng te pawh kha i mitthlaah chiang taka lo lang uarh uarh thei thil te pawh ala awm ve ṭeuh ang chu tiraw. Ni, a a kuma zawng chuan kum sawm a vei tawh, mahse, hmanni lawk ang mai khan fiah takin a lo lang leh ṭhin asin.
Khami ṭum khan mi engzat nge conference hmang tura kan branch aṭanga thawkchhuak kha ka hre ta mai lo. Ka diary emaw, ka lehkhathawn hlui emaw chu banphak maiah awm se chuan ka chhinchhiah leh pekin ka ring. Che phelh phing pheng awm tak si hi thil chhinchhiah ka hrat ru zek a!
Tichuan.. tiin bulṭan phawt ang. Kan vehkual rei lutuk dawn.
"207-motor pakhatin kan mutbu leh kan bag vel a phur anga, mihring chu ke-in kan kal ang.." tiin kan branch committee khan thu a pass ve thlap bawk sia, motor-a chuan kha tumahin kan beisei lo. Beisei teh reng pawh ni ila khawdang motor kan chah loh chuan kan khuaa motor awm zawng zawng chu kan hmang fai kêlh tawh!
Keilah hi pa phawkphawhraw leh hruanghrau napui niawm tak hian ka che leh mauh mai ṭhin a! Kan unau pathum ngawt mai kan chhuah dawn vangin Hawldawl (Hold-all) ka chang ve ta lo hlauh mai a, ka chhungte chuan 'bag-ah khung ila' an han ti a, keilah chuan a ngai lo ka ti tumhrang bawk si. 'Engtia tih nge i tum?' an tih lah chuan ka sawi duh bik ṭhak nang.
Ka pi shawl lian ṭha ang reng deuh mai, kan sin zen zen tawh loh hi ka la chhuak a, ka mutbu tur min lo dahchhuah sak chu ka fun a, sweet pian ang mai hian a hmawr tawn tawnah ka ṭawn leh thlap a, sweet lianpuiah ka chhuah a nih tak ber chu. A pawnlamah chuan Pentui pawl hian DARZIKA tih chiang fe hian ka la ziak zui a! Kha zawng kha ka Hawldawl chu a ni leh mai.
Tichuan le, tukṭhuan eikhamah innghahkhawmna tur lam panin kan inpuchhuak ta lu lu hlawm a, ka inputchhuah hma aṭangin ka chhungte'n min nuihpui tawh a, innghahkhawmna ka thlen hnuah chu nuithawm chu reh lam pan a hnêkin a zualkai zui bawk a! Ka thlenchin chu a heti tlat zel a nia!
Motor-a kan bungrua kan hlan fel hnuah chuan kan inchhepchhuak ṭan nghal mai a, keini ṭhianho kha 'batch' khat deuh khan kan kal tain ka hria, mi pasarih vel kan ni. Midang nen kan inthlau chuang lem law.
Roll Film hmang Camera ka neih lai kha a ni a, midang khan an keng ve hlawm lo nge an phawrh ve ngai pawh ka hre lo. Tunhnua kalkawnga kan thlalak ka thlir leh hian ka incheina mawlh kha - Hunter boot (ramhmangaih pheikhawk ang chi, puan zawk kha, burma pheikhawk te pawh kan ti ṭhinin ka hria) ka bun a, kawr lian hnek hnuk, pan fê mai leh thawleng zet mai ka ha a. Lukhum hmathlawk, Gamchha ka la awrh ṭut zui a. Rucksack ka ak a, a chhungah chuan chapal lian leh rit bêr bûr zet, chawfun leh tui nen ka ak tih ka la hre thei.
Ṭhian zahova kal tih takah nuam kan ti khawp a, kan khawṭhenawm te vahchapa nikang kan suartluan lai te chuan kan la inchhawm nui uarh uarh mai a nih kha. Nia, thingtlang nula leh tlangval dulkiar pawh nei lem lo, ramhnathawka tukchhuaka in awiliam ṭhin tan chuan hmanhmawh pawh nilova khatia han kalho dial dial kha hahna tham ni mawlh hek lo le.
Kawng lanthui deuhna laiah chuan kan khawṭhenawm Ṭhalaiho kal ve chu kan hmu phak a, mahse han um tur em chuan kan inhnaih lo. Kan in kûk khum raih raih phak chauh a ni.
Kawrpui lian deuhvah innghak khawmin chaw kan fâk a, Artui kan chu kan paichhuak deuh fur a, a boruak ngam deuhin bekang ro althak te, nutrela tui neia kan; saranga bâwk te, Ṭam-um althak pai te pawh an awmin ka hria!
Lungpui chungzawl remchang laiah ri lê lû chungin kan fâk a, ṭhian ṭhenkhat lah chu chawhmeh tui vãi kual reng renga hmanhlelin hlui mumal pawh an nei thei lo! Ka puar em ka hre tawh lo kei ve kha.
Chawfâk khamah kawngpui, Alkatra luan reng reng lohna chu zawhin, bek ni em zawnga chhawng ngat ngatin thuife kan han paidal leh a. Chuta ṭang chuan chho hlira motor kawng chu sawi loh, khamkâr ti tiha chhoh leh char char tur a ni.
Chu khua chu ka vawikhat kalna tur a nih vangin kawngchin pawh ka hre lem lova, ral aṭanga a landan kha chuan chho zawnga kan kal chinah chuan thui vak kal a ngaih ka ring lo ve ringawt a, a lang hnai em mai bawk a. Mahse, kan han kal ṭan a, a mual chu ral aṭanga kan enrem ang ngawt kha a lo ni awzawng lo mai a, mualdungzuia kawng kal a lawi pawh a lo awm lo, 'zig zag' deuh hian mual chu kan vêt tawn ta ngat ngat mai a, a huhova kal ni lo phei ila chuan ka chau chhe der awm asin mawle.
Chu lai chho chu a hahthlak, chawhnu her lam tawh niin bawp a lo rih ve deuh tawh vang te pawh a ni mahna le.
Kan teichho ngian ngian a, rûl tleng ang maia mual pawmveta kan chhawk-awlh chhoh nghial nghial lai chuan a hre deuh chuan khua a hnaih tawh thu an han chham chhuak hlawm a, 'a va lawmawm ve' tumahin kan ti lem lo nain chu thu chuan kan thinlung a thleng a ni tih kan thothang ṭha ta deuh sawt chuan a tilang chiang khawp mai.
Arkhuang te pawh kan ngaihruat chho ṭan ta nawk nawk a, mahni khawdaia kan chhuak hlim ang mai khan kan phur chho leh ṭan ta.
Mahse, chuti mai a lo la ni awzawng lo! Kan la thlep chho leh fe mai. Arkhuang te chu a fiah chho hret hreta a ni deuh ber mai!
A tawpah chuan Thingkhawn awmna kan chuang chhuak ta hlawl a.(Thingkhawn -Thingfak missionary kan ti deuh kher keini khua chuan - Thingfak missionary tih hi eng thu emaw ka post berah ka sawi lang tawh, chhiar ṭhin chuan inhriat mai ka ring e.)
Chutiang chu khua aṭanga hlatakah dah a ni ngai lo tih chu keini thingtlang nula leh tlangval te chuan kan hre ṭheuh, kan phurhlân te singsain muangmarin kan han chawl hahdam a, keipawh ka Hunter Boot phelhin ka bag-a chapal lian leh tlo hmel zet chu ka bunchhuak a, ka kawngkal pheikhawk chu ka ak ṭha ta thân a.
Chutia ka tih chhan chu kan khawṭhenawm nula pakhat *star* mangkheng mai ka neih vang a ni. Anni chu kan hmaa kal an nih vangin min lo thlenkhalh ngei ang a, hnathawh pheikhawk nena min lo hmu tur kha ka ngaingam bik ngang lova, chuvanga ruahmanlawkna fel tak neia kan in aṭanga chapal pawh chu akchhuak lawk thlap ka ni nghe nghe.
Karkawnga savun chapal, rit zet bun thu a awm bawk si law...
Kan han in awichho leh ta thliai thliai a, veng mawnglam aṭang chuan fanghmir hawlam ang maiin kan inzuichho ta diah diah a.
An khua hi a hmun a 'zo' hle mai a, thli a tam vangin thlasik laia kal chu a chakawm viau lem lo. Ranvulh khawlaia an la chhuah mai ṭhin vangin khawlaiah bawng ek leh vawk ek vel kân thauh thauh tur a awm nual a, châk lâkna a awlsam vak lo bawka hetih hunlai hian khawsa nuam fal tak an awm hmel bik loh niin ka hria. (Tunah erawh chuan hma an sawn tak zet a ni tih ṭhiante kal hnaivai kâ aṭangin ka hre thei)
An Biak In awmna lai kan thlen chhoh hma deuh chuan ka lo fin em em zia chu ka hrechhuak nawn leh ta! Hunter boot ka thlâk chhan ngei mai kha tukverah hian a ṭhiante nen lo dâkin kan ṭhian te kalhmasa lam chu an lo auchûl a, keilah chu bumro deuh siin ka lai vei ṭut pek a, ka gamchha awrh chuan ka mit chauh lang thei tur hian ka'n intuam chho leh mauh pekah!
Ka hisâp lâwk dik lutuk chu fing hi ka inti hliah hliah ringawt mai a ni.
Biak in kawtah chuan a thlengtu branch lam chuan min lo hmuak a, thingpui sen, a rawng leh a thlum dan pawh tak ngêk ngâwk tak mai chu min lo hlui thuai a, thlenin vel an siam fel chhung chuan Biak In hungna pal ngheng meuh chuan kan lo in dâr dâr a.
Zinchhuah nikhua hian fel vena riau ka nei a, tun thleng pawh hian ala ni. Uan thu hla ni lo se ka'n tilang ve hrim hrim teh ang. 'Thlenpui tur lamah hian ka buai ve ngai miah lo.' Ṭhiante nen kan kalho emaw kalho lo emaw a nih pawhin thlenpui tur hauh ṭung emaw hi ka tih mi a ni lo ve mauh a. Ṭhiante nena thlenho châng kan nei a, inkawp dan a laklawh vanga biak pawh biak zen loh te nena thlenho chang te pawh ka nei fo. Mahse, engmah hi ka sawisel ngai miah lo. Thlenin siamtute leh kan hruaitu ten 'heti hian aw' an tih ang hi ka lo Amen ve hmiah zel. Ka fel em mai ka hming chu fakin awm rawh se. 👏🏻👏🏻
Hemi ṭuma kan Conference pawh hian tet te aṭanga kan ṭhenawm hnai leh ka kawpchawt mi pahnih an kal ve reng a, eng ti ti a kan Leader nena thleng dun daih kha nge kan nih pawh ka hre teh chiam lo. A pawi ka tih pawh ka la hre chuang lo tun thleng hian.
Kan thlenna te chu an han naunawi ang reng khawp a, puitling ni lo zawng kha chu naupang vek an lo ni ve thova! Zirtawpni a thleng kha kan ni a, thawhṭan tuk thleng khan an chhungkaw member zat ka chhiar dik thei hauh lo nia! Anmahni lah khan an sawi bîk bawk si lova ka hre lo tluan ta ṭhak a nih kha.
Kan insingsak fel hnuah chuan chhuatlaiah chuan chaw an khawrh kual pût mai a, Ankhapui buhchiar chu kan 'main item' a nih hmel ta riau mai ka ti. A khawnbawl te lah chuan an ṭawiawm ṭha bawk si lo, anṭam tlak hmunhnihah an suak a, a chekawi dang; chi leh hmarcha-in an hual vel bawk a, a dang an suahbelh dawn tawh lo! Awi, kan Conference chhung hi a rei ka tih viau ka hlau mange!
An uipui nochawm niawm tak, hnute uaiṭhuah mai chuan a vêl thur thur reng vangin a ṭhu hmasa sa chan chu a ṭhat hmel riauva, kut ka sil thuai a, mawnga chhuat si lek lek khawpa fualah chuan ka han awphniam ve a, puarkhawp hmuh zawh loh bik chu ka tum ṭhak lo.
Kei hi ka vannei khawp a, chaweitui lo tih vel hian min tibuai ngai lem lo. Ka kîl chawt chuan a lehpek ban thleng thei khawp hi chawhmeh a tui emaw tui lo emaw ka thun mai thei zel a, conference manah a thau ṭha hmeh chakna rilru a awm ve deuh e tih a ni mai a. Puar leh puar loh lam chu ka buai phak lo, ka puar mai zel!
January thla tawp lam a nih aliamah an awmna a sang a, khâm chungzawl teh chawk a lo ni bawk nen a boruak chu a vawt tîk têk khawp a, nalh pangngai taka inchei duh chuan vawt tawrh huam deuh te pawh a ngai niin a lang, a bikin zanlamah.
An Biak In a len lem loh vangin mikhual zawng pawh kha kan leng lo lek lek mai thei a ni.
Inkhawm banah fellowship te a awm lem loh vangin ngamtlak te thlen ina thingpui kan in hnuah kan mu zui deuh mai niin ka hria.
Zan chu a vawt dawn tih a lang chiang bawk sia, ka mutpui tur a hnâr ring dawn tih a chiangsa bawk nen thli upna lam deuh zawngin ka ṭhianpa thleninah ka mutbu nen ka inpuchhuak daih a, vawt hre vak lovin tuitakin ka mu ta thên a.
A tukzing chu ka tho hma vak lo. Dar 7 tlangah ka thova, ka thlenin lam pan ka tum chu zanlama haklai nen kal mai emaw ka inti kha ka lo inbel hnem viau nitur a ni hak peih tawh loh pawmbawr tham fe mai hi ka nei a, inkuahbawr fe hian ka chhuak chhova, ka 'star' te ṭhianho chu tui point-ah an lo awm chu niin, chuti teh ṭeuha han tawn tlang chu ka hreh ve deuh sia, a phak a phakin kawnghnuai lamah te ka'n la hêl leh ta lai a!
Chu Conference chu Conference Palai ka nih vawikhatna tur a ni bawka ka phur khawp mai. Chumi piah lamah kan branch aṭanga Agenda lut tur pakhat, Bial Inkhawmpui thupui tur kha pulut tura tih ka la ni zui bawk nen, tawn ngai loh ram dâi turin ka inbuatsaih ve nasa alawm.
Tichuan le, Palai rorel inkhawm hun a lo thlen chuan chhiahhlawh chei niawm taka induang vein an kohhran Hall lam pan chuan hruaitute hnungzuiin ka chhuak ve ta rawih a, a tu a mai pawh chu ka hmu thar sur vek maiin ka hria. Conference Palai ni ve phak lo ho ka'n 'look down' deuh erawh kha chu a zia viau lo.
Palai badge chu an lo sem diat diat a, ka hming a awm ve ta hauh lo mai le! Lo inlâk palai ve tawh mahnaklai chuan le, mai mai ṭhin a. An hruaitu pakhat chuan 'a chuang ala awm kha' tiin a nau te a tir thuai a, ka hming chu Ball Pen-in min han ziahchawp sak ang nawk nawk a, lungthlu lo zet chuan ka tar sawi ve ta laih a...
Ngaihdan nghet deuh mai ka neih leh ka vawn ve tlat ṭhin chu - miin committee-a tel tura min ruat a nih chuan Agenda-ah hian ngaihdan kan nei ve tur a ni tih hi a ni. Heta rorel inkhawmah pawh hian Agenda kha pasarih (ka chiang fak ta lo) vel kan neiin ka hria. Ka ding kim lo deuh a nih pawhin agenda pakhat emaw chauh ka hâiin ka ring! Vawikhat telna mah mah!!
A chhan chu rel thei tura ngaih leh beisei ka nih vanga ruat ka ni a, an beisei ang tihhlawhtlin hi committee member/rorel palai ka nih anga ka bat ni a ka hriat vang a ni. Junior ka nihna rilru hi senior zahawmna ngainep si lo hian ka dahṭha mai zel.
Ka Thupui put luh kha 'Nun Kawngdik' tih lam niin ka hria, kawngbo te tan kawngdik hriat a harsat zia aṭanga ṭanin ka veh kual chho ve nasa mai a, ka tlangpui zo ta chuang hlei lova!
Tlailamah vawksa bai thak nen hnu tal kan khara a ziaawm ve tho e.
Zanriah lah chu kan eihma nasa mai si a, ka nî fapa nen, kan ṭhianpa Mawitea nen 'lengkual ve ila' tiin kan chhuak a, ka nî fapa chuan khawtual nula pakhat mitmei ka hmu hi a ti pek a, chumi te chu school tlang lam pana an chho lai kan hmu kher bawk nen kan zui chho ve ta alawm le.
Kan sep rawtui chho nasa mai a, 'chance' inpek dan tur thlenga kan ruahman fel thlap hnuah school kawtzawl chu kan chuang chhuak chho ve ta hlawl a, anni hmeichhe pathum chu mualzawl kinah chuan an tawi hrut hrut a, an bul kan thleng ṭep tawh tihah chuan bawngrual hlauhlawp ang maiin khawchhung lam pan chuan an tlan ta phut mai a!
Keini mangang lah chuan kan thlir zui lo thei lova, school kawtzawl aṭang chuan an khawdung chu a hmuh fai theih deuh vek vang chuan kawtlai dunga an tlan khu thla rum rum mai chu nuihza insûm ṭeuhin kan thlir ta ringawt a, a hrilhhai thlak duh teh asin.
Zan inkhawm bana kan luhna hmun pakhatah chuan chanchinbu hi an lo buaipui mek a, ka la hmuh ngai miah loh ka han hmu chu ka ṭhutchilh rang kher mai. Kan kohhran chanchinbu lamah Joint Editor ka nihlai a ni a, tu khaw chanchinbu pawh ka bihchîk em em vek lai a ni. Ka chîk zual chhan chu a herna khawl kha a ni a, keini'n changkang tawh lo ti ru deuh chunga kan tlin ngang si loh vanga Cyclostyle kan hman laiin Cyclostyle pawh chu an lo la hmang phak lo ve leh chhawng a! Kuta nawh ngai ang chi kha (ka sawifiah thiam tawh bik lo) an lo la hmang chu niin.
Ka star ngat kan han rim zui a, tapchhak bulhnaia stool-ah hian ka ṭhu a, an stool kapna kha a lo tla tawh chu niin perek chauh hi a lo awm tawh a, ka pheikhawk chu a lo tai leh ṭhin a, a tukzinga ka pheikhawk ka en chuan a hnunglam chu perek hian a lo thairang nian nuan mai a, tlema tlemah buntlâk lovah ka chhuah ṭep alawm le.
Ka duh aia thui ka ziak ta, ka kân duai tawh mai dawn e.
Khualrala ka star ve em em te nen chuan Pathianni Chawhnu inkhawm banah School tlâng lam pan chuan kan lengho ve ta dal dal a, keiin ka hmehdet kengin thlâ te pawh kan la nual a, Conference ka hman tawhah chuan ka hriatreng tur a lo ni ta hial mai. Hundang leh hmundang hian ka hriatrengna a lo luah lem hran lo a nih hi maw.
A ṭiak tuka ka star te kawngdanga an haw ta daih erawh chuan ka rilru a la peng viau a, tih theih erawh ka nei hauh si lo. Ka haw ruak ve viau ringawt mai a ni.
TLIPNA : KṬP Conference hi ka hmang ve ta fe mai a, thingtlangah leh khawpuiah. Khawpuiah pawh a laili ber pawl bialah hmangin chanvo pawimawh leh Bial Zaipawl nihna nen meuha ka hman ve ṭum pawhin kan khawlama kan hmandan bawk hian ka lung a lên leh ṭhin. Ṭhian te bulah phei chuan ka sawichhuak ngai lem lo nain khawpuia kan hmandan hi chuan Khawmpui/Conference boruak a keng lo lutuk hi a ho ka ti deuh riau ṭhin. In aṭangin kan chhuak tawrh a, kan va inkhawm zova mahni inah bawk kan haw leh a, engtik emaw tlaiah ṭhianten chaweia min sawm leh kan eihram a, eipeih loh leh hman loh ṭum te kan la nei zui bawk a!
Thingtlangah, riakchhuak ngata branch dang, khawdanga mi leh kan hmuh zen zen loh te nena hun han hmanho ngat chu a boruak hi a khawmpuiin a conference bik hliah hliah hian a hriat asin.
Khawpui fahrin i nih a, hetiang boruak hi ila tem ve ngai lo anih chuan vawikhat na reng reng chu hre turin han chhim ve teh. Thlarau nun lam chu thuhran ni ta se mihring taka thlir pawhin mahni pawipang khawih paha conference nge nuam engkim kalsana conference tih hi chhanna i pek theih ngei ka ring.
Keipawh ka dama Pathianin rem a ti ngai a nih chuan ka la kal leh ngat ang.
Star neih te pawh hi a lo ṭha, conference neih leh thildang pawh han tih hrim hrim hi a tinuam a, min tiphur riau asin!
©_______[ɐʞızɹɐp]_______®
KA CONFERENCE VE TAWH!
(My Untold Story)
*P.C Malsawmzuala*
[28.1.2018 - 29.1.2018]
KHUHHAWNNA: Thlarau nun lam hrut chiam ka tum lova, Biak In lam programme pawh ka thual dawn hauh lo. A hrula mi zawk zar zar, chutah pawh chip chiar lovin, a tlangpui ka lawr chauh ang. Tin, ka ziah chhunga mi hi a tak vek a nih vangin a khawneitu emaw, mihring tuin emaw ngaih loh lamah min lo ngaihsak lo hram turin ka ngen a, ka lunglen thu hla mai a ni e.
BULṬAN ANG: Kha Conference kan hman aṭanga kum 10 a nihna champha phâk a lo thlen tâkah chuan thup ṭhen nîl nial chungin nakkina bih lêt leh atan pawh ziakin ka han dah chhuak ve ve hrim hrim teh ang.
Hmanni lawk emaw kan tih chhungin kum 10 a lo liam leh der ta mai a ni a, hun hian luipui luang zel ang mai hian a tu amah hi min nghak lem si lo. Nun hi a lo hlui har lova, Thawnthu niawm taka kan sawi liam mai tur hi kan nun hian a lo va herchhuahpui hnem si em!
Kumin aṭang hian chhût la kum 10 liam ta chu i ngaihtuah chhuak har lovang, khami kuma thil thleng te pawh kha i mitthlaah chiang taka lo lang uarh uarh thei thil te pawh ala awm ve ṭeuh ang chu tiraw. Ni, a a kuma zawng chuan kum sawm a vei tawh, mahse, hmanni lawk ang mai khan fiah takin a lo lang leh ṭhin asin.
Khami ṭum khan mi engzat nge conference hmang tura kan branch aṭanga thawkchhuak kha ka hre ta mai lo. Ka diary emaw, ka lehkhathawn hlui emaw chu banphak maiah awm se chuan ka chhinchhiah leh pekin ka ring. Che phelh phing pheng awm tak si hi thil chhinchhiah ka hrat ru zek a!
Tichuan.. tiin bulṭan phawt ang. Kan vehkual rei lutuk dawn.
"207-motor pakhatin kan mutbu leh kan bag vel a phur anga, mihring chu ke-in kan kal ang.." tiin kan branch committee khan thu a pass ve thlap bawk sia, motor-a chuan kha tumahin kan beisei lo. Beisei teh reng pawh ni ila khawdang motor kan chah loh chuan kan khuaa motor awm zawng zawng chu kan hmang fai kêlh tawh!
Keilah hi pa phawkphawhraw leh hruanghrau napui niawm tak hian ka che leh mauh mai ṭhin a! Kan unau pathum ngawt mai kan chhuah dawn vangin Hawldawl (Hold-all) ka chang ve ta lo hlauh mai a, ka chhungte chuan 'bag-ah khung ila' an han ti a, keilah chuan a ngai lo ka ti tumhrang bawk si. 'Engtia tih nge i tum?' an tih lah chuan ka sawi duh bik ṭhak nang.
Ka pi shawl lian ṭha ang reng deuh mai, kan sin zen zen tawh loh hi ka la chhuak a, ka mutbu tur min lo dahchhuah sak chu ka fun a, sweet pian ang mai hian a hmawr tawn tawnah ka ṭawn leh thlap a, sweet lianpuiah ka chhuah a nih tak ber chu. A pawnlamah chuan Pentui pawl hian DARZIKA tih chiang fe hian ka la ziak zui a! Kha zawng kha ka Hawldawl chu a ni leh mai.
Tichuan le, tukṭhuan eikhamah innghahkhawmna tur lam panin kan inpuchhuak ta lu lu hlawm a, ka inputchhuah hma aṭangin ka chhungte'n min nuihpui tawh a, innghahkhawmna ka thlen hnuah chu nuithawm chu reh lam pan a hnêkin a zualkai zui bawk a! Ka thlenchin chu a heti tlat zel a nia!
Motor-a kan bungrua kan hlan fel hnuah chuan kan inchhepchhuak ṭan nghal mai a, keini ṭhianho kha 'batch' khat deuh khan kan kal tain ka hria, mi pasarih vel kan ni. Midang nen kan inthlau chuang lem law.
Roll Film hmang Camera ka neih lai kha a ni a, midang khan an keng ve hlawm lo nge an phawrh ve ngai pawh ka hre lo. Tunhnua kalkawnga kan thlalak ka thlir leh hian ka incheina mawlh kha - Hunter boot (ramhmangaih pheikhawk ang chi, puan zawk kha, burma pheikhawk te pawh kan ti ṭhinin ka hria) ka bun a, kawr lian hnek hnuk, pan fê mai leh thawleng zet mai ka ha a. Lukhum hmathlawk, Gamchha ka la awrh ṭut zui a. Rucksack ka ak a, a chhungah chuan chapal lian leh rit bêr bûr zet, chawfun leh tui nen ka ak tih ka la hre thei.
Ṭhian zahova kal tih takah nuam kan ti khawp a, kan khawṭhenawm te vahchapa nikang kan suartluan lai te chuan kan la inchhawm nui uarh uarh mai a nih kha. Nia, thingtlang nula leh tlangval dulkiar pawh nei lem lo, ramhnathawka tukchhuaka in awiliam ṭhin tan chuan hmanhmawh pawh nilova khatia han kalho dial dial kha hahna tham ni mawlh hek lo le.
Kawng lanthui deuhna laiah chuan kan khawṭhenawm Ṭhalaiho kal ve chu kan hmu phak a, mahse han um tur em chuan kan inhnaih lo. Kan in kûk khum raih raih phak chauh a ni.
Kawrpui lian deuhvah innghak khawmin chaw kan fâk a, Artui kan chu kan paichhuak deuh fur a, a boruak ngam deuhin bekang ro althak te, nutrela tui neia kan; saranga bâwk te, Ṭam-um althak pai te pawh an awmin ka hria!
Lungpui chungzawl remchang laiah ri lê lû chungin kan fâk a, ṭhian ṭhenkhat lah chu chawhmeh tui vãi kual reng renga hmanhlelin hlui mumal pawh an nei thei lo! Ka puar em ka hre tawh lo kei ve kha.
Chawfâk khamah kawngpui, Alkatra luan reng reng lohna chu zawhin, bek ni em zawnga chhawng ngat ngatin thuife kan han paidal leh a. Chuta ṭang chuan chho hlira motor kawng chu sawi loh, khamkâr ti tiha chhoh leh char char tur a ni.
Chu khua chu ka vawikhat kalna tur a nih vangin kawngchin pawh ka hre lem lova, ral aṭanga a landan kha chuan chho zawnga kan kal chinah chuan thui vak kal a ngaih ka ring lo ve ringawt a, a lang hnai em mai bawk a. Mahse, kan han kal ṭan a, a mual chu ral aṭanga kan enrem ang ngawt kha a lo ni awzawng lo mai a, mualdungzuia kawng kal a lawi pawh a lo awm lo, 'zig zag' deuh hian mual chu kan vêt tawn ta ngat ngat mai a, a huhova kal ni lo phei ila chuan ka chau chhe der awm asin mawle.
Chu lai chho chu a hahthlak, chawhnu her lam tawh niin bawp a lo rih ve deuh tawh vang te pawh a ni mahna le.
Kan teichho ngian ngian a, rûl tleng ang maia mual pawmveta kan chhawk-awlh chhoh nghial nghial lai chuan a hre deuh chuan khua a hnaih tawh thu an han chham chhuak hlawm a, 'a va lawmawm ve' tumahin kan ti lem lo nain chu thu chuan kan thinlung a thleng a ni tih kan thothang ṭha ta deuh sawt chuan a tilang chiang khawp mai.
Arkhuang te pawh kan ngaihruat chho ṭan ta nawk nawk a, mahni khawdaia kan chhuak hlim ang mai khan kan phur chho leh ṭan ta.
Mahse, chuti mai a lo la ni awzawng lo! Kan la thlep chho leh fe mai. Arkhuang te chu a fiah chho hret hreta a ni deuh ber mai!
A tawpah chuan Thingkhawn awmna kan chuang chhuak ta hlawl a.(Thingkhawn -Thingfak missionary kan ti deuh kher keini khua chuan - Thingfak missionary tih hi eng thu emaw ka post berah ka sawi lang tawh, chhiar ṭhin chuan inhriat mai ka ring e.)
Chutiang chu khua aṭanga hlatakah dah a ni ngai lo tih chu keini thingtlang nula leh tlangval te chuan kan hre ṭheuh, kan phurhlân te singsain muangmarin kan han chawl hahdam a, keipawh ka Hunter Boot phelhin ka bag-a chapal lian leh tlo hmel zet chu ka bunchhuak a, ka kawngkal pheikhawk chu ka ak ṭha ta thân a.
Chutia ka tih chhan chu kan khawṭhenawm nula pakhat *star* mangkheng mai ka neih vang a ni. Anni chu kan hmaa kal an nih vangin min lo thlenkhalh ngei ang a, hnathawh pheikhawk nena min lo hmu tur kha ka ngaingam bik ngang lova, chuvanga ruahmanlawkna fel tak neia kan in aṭanga chapal pawh chu akchhuak lawk thlap ka ni nghe nghe.
Karkawnga savun chapal, rit zet bun thu a awm bawk si law...
Kan han in awichho leh ta thliai thliai a, veng mawnglam aṭang chuan fanghmir hawlam ang maiin kan inzuichho ta diah diah a.
An khua hi a hmun a 'zo' hle mai a, thli a tam vangin thlasik laia kal chu a chakawm viau lem lo. Ranvulh khawlaia an la chhuah mai ṭhin vangin khawlaiah bawng ek leh vawk ek vel kân thauh thauh tur a awm nual a, châk lâkna a awlsam vak lo bawka hetih hunlai hian khawsa nuam fal tak an awm hmel bik loh niin ka hria. (Tunah erawh chuan hma an sawn tak zet a ni tih ṭhiante kal hnaivai kâ aṭangin ka hre thei)
An Biak In awmna lai kan thlen chhoh hma deuh chuan ka lo fin em em zia chu ka hrechhuak nawn leh ta! Hunter boot ka thlâk chhan ngei mai kha tukverah hian a ṭhiante nen lo dâkin kan ṭhian te kalhmasa lam chu an lo auchûl a, keilah chu bumro deuh siin ka lai vei ṭut pek a, ka gamchha awrh chuan ka mit chauh lang thei tur hian ka'n intuam chho leh mauh pekah!
Ka hisâp lâwk dik lutuk chu fing hi ka inti hliah hliah ringawt mai a ni.
Biak in kawtah chuan a thlengtu branch lam chuan min lo hmuak a, thingpui sen, a rawng leh a thlum dan pawh tak ngêk ngâwk tak mai chu min lo hlui thuai a, thlenin vel an siam fel chhung chuan Biak In hungna pal ngheng meuh chuan kan lo in dâr dâr a.
Zinchhuah nikhua hian fel vena riau ka nei a, tun thleng pawh hian ala ni. Uan thu hla ni lo se ka'n tilang ve hrim hrim teh ang. 'Thlenpui tur lamah hian ka buai ve ngai miah lo.' Ṭhiante nen kan kalho emaw kalho lo emaw a nih pawhin thlenpui tur hauh ṭung emaw hi ka tih mi a ni lo ve mauh a. Ṭhiante nena thlenho châng kan nei a, inkawp dan a laklawh vanga biak pawh biak zen loh te nena thlenho chang te pawh ka nei fo. Mahse, engmah hi ka sawisel ngai miah lo. Thlenin siamtute leh kan hruaitu ten 'heti hian aw' an tih ang hi ka lo Amen ve hmiah zel. Ka fel em mai ka hming chu fakin awm rawh se. 👏🏻👏🏻
Hemi ṭuma kan Conference pawh hian tet te aṭanga kan ṭhenawm hnai leh ka kawpchawt mi pahnih an kal ve reng a, eng ti ti a kan Leader nena thleng dun daih kha nge kan nih pawh ka hre teh chiam lo. A pawi ka tih pawh ka la hre chuang lo tun thleng hian.
Kan thlenna te chu an han naunawi ang reng khawp a, puitling ni lo zawng kha chu naupang vek an lo ni ve thova! Zirtawpni a thleng kha kan ni a, thawhṭan tuk thleng khan an chhungkaw member zat ka chhiar dik thei hauh lo nia! Anmahni lah khan an sawi bîk bawk si lova ka hre lo tluan ta ṭhak a nih kha.
Kan insingsak fel hnuah chuan chhuatlaiah chuan chaw an khawrh kual pût mai a, Ankhapui buhchiar chu kan 'main item' a nih hmel ta riau mai ka ti. A khawnbawl te lah chuan an ṭawiawm ṭha bawk si lo, anṭam tlak hmunhnihah an suak a, a chekawi dang; chi leh hmarcha-in an hual vel bawk a, a dang an suahbelh dawn tawh lo! Awi, kan Conference chhung hi a rei ka tih viau ka hlau mange!
An uipui nochawm niawm tak, hnute uaiṭhuah mai chuan a vêl thur thur reng vangin a ṭhu hmasa sa chan chu a ṭhat hmel riauva, kut ka sil thuai a, mawnga chhuat si lek lek khawpa fualah chuan ka han awphniam ve a, puarkhawp hmuh zawh loh bik chu ka tum ṭhak lo.
Kei hi ka vannei khawp a, chaweitui lo tih vel hian min tibuai ngai lem lo. Ka kîl chawt chuan a lehpek ban thleng thei khawp hi chawhmeh a tui emaw tui lo emaw ka thun mai thei zel a, conference manah a thau ṭha hmeh chakna rilru a awm ve deuh e tih a ni mai a. Puar leh puar loh lam chu ka buai phak lo, ka puar mai zel!
January thla tawp lam a nih aliamah an awmna a sang a, khâm chungzawl teh chawk a lo ni bawk nen a boruak chu a vawt tîk têk khawp a, nalh pangngai taka inchei duh chuan vawt tawrh huam deuh te pawh a ngai niin a lang, a bikin zanlamah.
An Biak In a len lem loh vangin mikhual zawng pawh kha kan leng lo lek lek mai thei a ni.
Inkhawm banah fellowship te a awm lem loh vangin ngamtlak te thlen ina thingpui kan in hnuah kan mu zui deuh mai niin ka hria.
Zan chu a vawt dawn tih a lang chiang bawk sia, ka mutpui tur a hnâr ring dawn tih a chiangsa bawk nen thli upna lam deuh zawngin ka ṭhianpa thleninah ka mutbu nen ka inpuchhuak daih a, vawt hre vak lovin tuitakin ka mu ta thên a.
A tukzing chu ka tho hma vak lo. Dar 7 tlangah ka thova, ka thlenin lam pan ka tum chu zanlama haklai nen kal mai emaw ka inti kha ka lo inbel hnem viau nitur a ni hak peih tawh loh pawmbawr tham fe mai hi ka nei a, inkuahbawr fe hian ka chhuak chhova, ka 'star' te ṭhianho chu tui point-ah an lo awm chu niin, chuti teh ṭeuha han tawn tlang chu ka hreh ve deuh sia, a phak a phakin kawnghnuai lamah te ka'n la hêl leh ta lai a!
Chu Conference chu Conference Palai ka nih vawikhatna tur a ni bawka ka phur khawp mai. Chumi piah lamah kan branch aṭanga Agenda lut tur pakhat, Bial Inkhawmpui thupui tur kha pulut tura tih ka la ni zui bawk nen, tawn ngai loh ram dâi turin ka inbuatsaih ve nasa alawm.
Tichuan le, Palai rorel inkhawm hun a lo thlen chuan chhiahhlawh chei niawm taka induang vein an kohhran Hall lam pan chuan hruaitute hnungzuiin ka chhuak ve ta rawih a, a tu a mai pawh chu ka hmu thar sur vek maiin ka hria. Conference Palai ni ve phak lo ho ka'n 'look down' deuh erawh kha chu a zia viau lo.
Palai badge chu an lo sem diat diat a, ka hming a awm ve ta hauh lo mai le! Lo inlâk palai ve tawh mahnaklai chuan le, mai mai ṭhin a. An hruaitu pakhat chuan 'a chuang ala awm kha' tiin a nau te a tir thuai a, ka hming chu Ball Pen-in min han ziahchawp sak ang nawk nawk a, lungthlu lo zet chuan ka tar sawi ve ta laih a...
Ngaihdan nghet deuh mai ka neih leh ka vawn ve tlat ṭhin chu - miin committee-a tel tura min ruat a nih chuan Agenda-ah hian ngaihdan kan nei ve tur a ni tih hi a ni. Heta rorel inkhawmah pawh hian Agenda kha pasarih (ka chiang fak ta lo) vel kan neiin ka hria. Ka ding kim lo deuh a nih pawhin agenda pakhat emaw chauh ka hâiin ka ring! Vawikhat telna mah mah!!
A chhan chu rel thei tura ngaih leh beisei ka nih vanga ruat ka ni a, an beisei ang tihhlawhtlin hi committee member/rorel palai ka nih anga ka bat ni a ka hriat vang a ni. Junior ka nihna rilru hi senior zahawmna ngainep si lo hian ka dahṭha mai zel.
Ka Thupui put luh kha 'Nun Kawngdik' tih lam niin ka hria, kawngbo te tan kawngdik hriat a harsat zia aṭanga ṭanin ka veh kual chho ve nasa mai a, ka tlangpui zo ta chuang hlei lova!
Tlailamah vawksa bai thak nen hnu tal kan khara a ziaawm ve tho e.
Zanriah lah chu kan eihma nasa mai si a, ka nî fapa nen, kan ṭhianpa Mawitea nen 'lengkual ve ila' tiin kan chhuak a, ka nî fapa chuan khawtual nula pakhat mitmei ka hmu hi a ti pek a, chumi te chu school tlang lam pana an chho lai kan hmu kher bawk nen kan zui chho ve ta alawm le.
Kan sep rawtui chho nasa mai a, 'chance' inpek dan tur thlenga kan ruahman fel thlap hnuah school kawtzawl chu kan chuang chhuak chho ve ta hlawl a, anni hmeichhe pathum chu mualzawl kinah chuan an tawi hrut hrut a, an bul kan thleng ṭep tawh tihah chuan bawngrual hlauhlawp ang maiin khawchhung lam pan chuan an tlan ta phut mai a!
Keini mangang lah chuan kan thlir zui lo thei lova, school kawtzawl aṭang chuan an khawdung chu a hmuh fai theih deuh vek vang chuan kawtlai dunga an tlan khu thla rum rum mai chu nuihza insûm ṭeuhin kan thlir ta ringawt a, a hrilhhai thlak duh teh asin.
Zan inkhawm bana kan luhna hmun pakhatah chuan chanchinbu hi an lo buaipui mek a, ka la hmuh ngai miah loh ka han hmu chu ka ṭhutchilh rang kher mai. Kan kohhran chanchinbu lamah Joint Editor ka nihlai a ni a, tu khaw chanchinbu pawh ka bihchîk em em vek lai a ni. Ka chîk zual chhan chu a herna khawl kha a ni a, keini'n changkang tawh lo ti ru deuh chunga kan tlin ngang si loh vanga Cyclostyle kan hman laiin Cyclostyle pawh chu an lo la hmang phak lo ve leh chhawng a! Kuta nawh ngai ang chi kha (ka sawifiah thiam tawh bik lo) an lo la hmang chu niin.
Ka star ngat kan han rim zui a, tapchhak bulhnaia stool-ah hian ka ṭhu a, an stool kapna kha a lo tla tawh chu niin perek chauh hi a lo awm tawh a, ka pheikhawk chu a lo tai leh ṭhin a, a tukzinga ka pheikhawk ka en chuan a hnunglam chu perek hian a lo thairang nian nuan mai a, tlema tlemah buntlâk lovah ka chhuah ṭep alawm le.
Ka duh aia thui ka ziak ta, ka kân duai tawh mai dawn e.
Khualrala ka star ve em em te nen chuan Pathianni Chawhnu inkhawm banah School tlâng lam pan chuan kan lengho ve ta dal dal a, keiin ka hmehdet kengin thlâ te pawh kan la nual a, Conference ka hman tawhah chuan ka hriatreng tur a lo ni ta hial mai. Hundang leh hmundang hian ka hriatrengna a lo luah lem hran lo a nih hi maw.
A ṭiak tuka ka star te kawngdanga an haw ta daih erawh chuan ka rilru a la peng viau a, tih theih erawh ka nei hauh si lo. Ka haw ruak ve viau ringawt mai a ni.
TLIPNA : KṬP Conference hi ka hmang ve ta fe mai a, thingtlangah leh khawpuiah. Khawpuiah pawh a laili ber pawl bialah hmangin chanvo pawimawh leh Bial Zaipawl nihna nen meuha ka hman ve ṭum pawhin kan khawlama kan hmandan bawk hian ka lung a lên leh ṭhin. Ṭhian te bulah phei chuan ka sawichhuak ngai lem lo nain khawpuia kan hmandan hi chuan Khawmpui/Conference boruak a keng lo lutuk hi a ho ka ti deuh riau ṭhin. In aṭangin kan chhuak tawrh a, kan va inkhawm zova mahni inah bawk kan haw leh a, engtik emaw tlaiah ṭhianten chaweia min sawm leh kan eihram a, eipeih loh leh hman loh ṭum te kan la nei zui bawk a!
Thingtlangah, riakchhuak ngata branch dang, khawdanga mi leh kan hmuh zen zen loh te nena hun han hmanho ngat chu a boruak hi a khawmpuiin a conference bik hliah hliah hian a hriat asin.
Khawpui fahrin i nih a, hetiang boruak hi ila tem ve ngai lo anih chuan vawikhat na reng reng chu hre turin han chhim ve teh. Thlarau nun lam chu thuhran ni ta se mihring taka thlir pawhin mahni pawipang khawih paha conference nge nuam engkim kalsana conference tih hi chhanna i pek theih ngei ka ring.
Keipawh ka dama Pathianin rem a ti ngai a nih chuan ka la kal leh ngat ang.
Star neih te pawh hi a lo ṭha, conference neih leh thildang pawh han tih hrim hrim hi a tinuam a, min tiphur riau asin!
©_______[ɐʞızɹɐp]_______®
Comments
Post a Comment