HMANGAIHNA NGE BARULHNA

___________       __________ 

          HMANGAIHNA 

                   NGE

            BARULHNA

      *P.C Malsawmzual*

      1.8.2016- 19.9.2016

College ațangin chawhmeh leihaw tumin bazar lam hmanhmawh fahran lo hian ka pan a, mahnia khawsak ninawmna ber chu insuk leh ei leh in tur buaipui hi a ni mai awm asin mawle.

Bazar ka luh hma fe-ah chuan kan khaw pa, Pu Zatluanga ka hmu hlawl mai a. A rawksai a sawirem hnu chuan kan han inchibai ngial a, chanchinte kan inzawh hnu chuan insak tum a châk rawn lamkhawm a nih thu a sawi mai a.

"Enteh maw Rina, Mawbâl fawn han lei ve ka duh a, a țha leh țha lo ka hre silova bakah han tih vel dan ka thiam dawn silova mi han enpui lawk hman angem?" a tih chuan "Hman mai awm tak, engzat man vel nge kan en anga?" ka ti ve mai a.

"Romawii pa khan engzat man bawr nge maw a tih tak kha le, black & white te kha a ti maiin ka hria, Airtel a țha te kha tia,..nangni khawpui lama awm chuan chinchang in hre zawk ang chu" a'n ti mai pekah! Leipui ngei chu a ngai dawn a nih hi.

Mobile zawrhna dawrah chuan a man tlawmber ațang chuan kan han enchho dan dan a. Black & white, Romawii pa ta ang ngei mai chu lungsi takin ka han leipui ta a. A lawm thiam kher asin aw...Kan khawlam a mite number ka neih remchan ang chu ka han thunsak nghal nual bawk a, a kâ pawh zensak ila min seh lovang tihtur a ni, a khi reng mai.. Airtel ngei mai kha kan han vuahsak bawk kha a nia. 

Dawr ațanga kan chhuak, kawng kan kân fel awrh tihah chuan țe țhawt ri ka hriat rual chuan a ri bur a, ka tlu zui ta niin ka hria, a thim nghal mup mai.

Ka harh hlawl ni berin a lang. Ka taksa an cherkhawng tlat avang chuan ka che theilo. Thil pît chuah chuah te ka hriat avang chuan ICU-ah ka awm a nih ka ring ta ber a. Inchunglam ceiling bawr vel chu ka melh ngawt ngawt ringawt a, thildang han tihtheih awmnghal hek lo.

Engtia hetianga awm ta mai nge maw ka nih le? tih chu ka in zawt nawn fo va. Chhanna erawh ka ngaihtuahchhuak zo bik hauh lo. Pen ri thlek thlek thawm ka hre zeuh zeuh a, mahse khawilamah nge a awm pawh ka hrethiam lo. Ka hmuh tur lamah a lo kal ngai bawk si lo.

Ka muhil a, ka harh leh a, ka muhil leh ka harh leh a... chutiang hlir mai chuan ka awm a. Nurse takngial pawh ka hmu ngailo chu a mak ka ti viau mai. A ninawm takzet tawh a ni. Chhun nge zan a nih pawh hre lova han awm ngawt mai chu a mangan thlak hle mai.

"Tunge awm?" tia țawng tum ka niin ka hria. Ka benga a rik dan chuan "Tu gu gu" tih ang vel hi a ni. Ka țawng pawh a chiang hauh lo. Kei hi eng ka ti nge ni ta a!?

Chutia thawm ka chhuah chu an hria a ni ngei ang. Pen ri thlak thlak thawm ka hre zui nghal a, a rin tial tial avang chuan min rawn pan a nih tih hairual a ni lo. Mihring hmel ka hmu hrim hrim tur chu ka lawm a ni tawp mai.

Nurse hmaihlai phuk mai hian min rawn en a, "I harh ti raw, na i nei em, i eng nge na?" min be luam nain ka chhan leh chhan loh pawh chu ka hre mumal chuang lo. Ka chhang ve zel chuan ka hria a, engtinnge ka chhan erawh ka hre hauh lo thung. Ka BP te a check a hnu chuan ani pawh chu a reh zui leh vawng vawng a.

Engtia rei nge chutia ka awm ka hrethiamlova, engvanga awm nge ka nih phei chu ka ngaihtuah thiam lo lehzual. Ka inluahna te, ka pa te, țhian țhenkhatte hmel ka hmu zeuh zeuh. Duh angin ka țawng thei bawk silo. Huihammm.. Ninawm lutuk.

Engtinnge ka pa te hmel te a lo lan tak hial! Ka na viau a ni ngei ang le. Dammawh hritlan nikhua pawha min ngaihven tura lo zin țha duh mang lo kha a nia, ani hmel meuh a lo lan takah chuan ka dinhmun hi a țha lo tawp a nih dawn hi le. Ka nu erawh ka la hmu lo.

Ka lu vel an tuamna an phelh ațang chuan  ka thawpik lutuk pawh a ziaawm ta viau a. Ka ke dinglam erawh chu ka tiche thei map lo. Ka rilru a harh phian bawk si avang chuan a thawpik ka ti hle a ni. 

"Be rih suh aw, țawng a la harsat deuh a.." Nurse in a tih ri-ah chuan ka harh zawk mai, ka lo chhingsek ningei tur hi a nia. Ka lam pana nula lo kal phei chu ka ngaihtuah ngial pawhin ka hriat zawng a ni ta hauhlo mai le. Ka maimitchhing a, ka'n ennawn leh ngial pawhin ani nena kan inlaichinna awm reng reng chu ka ngaihtuah chhuak theilo mai ka ti.

ICU room dai duk maiah chuan a kephah no zet mai chu dam thlap hian a rawn phah phei thlep thlep a, a ke panthler thlawr hmawra a ketin, rawng senlar angreng tak a hnawih chu hmuh hmaih chi  pawh a ni lo. A mawi ngang mai. Pu Rûma te zawngin sawi se chuan 'khawlnuai ngei a ni' an ti leh pekin ka ring.

Awmhmun rawt kekawr niawm tak hi a ha a, kawr lah chuti bawk. T-shirt var a ni tlawng mai. A khawsa zia lah chu a inrintawk hmel khawp mai leh nghal vei nen. Chung zawng zawng timawitu erawh chu a hmelber mai chu a lo ni. 

A sam chu a ngil siau a, han tih tur a ni hauh lo. A dar chen vel, ngil si lo, kir si lo niberin ka hria. A hmai a bial deuh lek lek a, a mitmeng a fiah țha kek kawk viau. A hnarngul chu tlangmi niawm lo hial a mawi a ni. A hmui chu a chhah deuh emawni le aw..mahse, pan deuh hlek se chu ka ti chuang hauh bawk si lo. A khabe kual pawh vuahluih ang hlauh a ni.

A hmel erawh a mitmeng hmuhnawn leh hlauh vang nimaw ka ennawn leh ta lo!

Min be lova, keilahin ka be bawk hek lo. Ngawireng chuan min en veng veng ringawt a, keilah chu chesawn theinghal hek lo awmhmunah muchung chuan ka lo lai ve em em ringawt a. A hahthlak ka va'n ti teh kher ve le.

"Hma a sawn lutuk ringawt, a vûng pawh kha a phai duak tawh kha, khawsik a la nei zeuh zeuh a, han reh fel se ward lamah kan indah chhuak dawn nia" Doctor kawrfual ha chuan a rawn ti a. "Ward-ah chuan a ziaawm deuh ang, ICU chu hlauthawng reng renga awm reng a angai a.." a ti ve mai a. Tu nge maw ni dawn le aw...

A rei a reiah chuan ICU ațang chuan min nawrchhuak ve ta kha a nia. Kha nula hmelhriatloh bawk kha a rawn phusa leh ber pek a! Ka pa nen, țhian țhenkhat te leh ka inluah neitute nen chuan min buaipui laih laih a, ward pangaiah pawh awm ta lo chuan Cabin-ah min suanlut a, mahni in thleng ang maiin ka thawl huai ta mai.

Ka châk ber chu darthlalanga ka hmel en a ni! Kuta ka khawih chuan hmelhem a awm pawhin ka hre lo. Ka hmuchak em em ringawt mai a ni. Ka mobile phone ve te pawh kha khawnge maw a awm tak daih le. 

College a ka țhutpui leh ka kawmber Lianhminga hnenah chuan nula chu tunge a nih mitmeiin ka zawt a, ani lah pek chuan ring lenglawng hian "I bialnu" a'n ti mai pekah! Thei leh thei lo chuan ka nui sawng sawng a..

Tlailam dar 3:00 bawr velah chuan Lianhminga chuan min hawsan a, Nu Ruati (Ka inluahna te) pawh an hawzui deuh mai a, nula kha a hawlai awm reng reng reng ka hrelo thung. Kan pafa chuan kan awmdun ta rak rak a. A ni'n chanchinbu a chhiar a, keiin thil thlen dan ngaihtuahchhuah tumin ka ngaihtuahna ka lo seng ve bawk a.

Sana lah chu a tui a ral nge mawni a'n kal muang beuh beuh khawp leh nghal a. Darkarkhatah darkarhnih an belh zel emaw tih mai tur a ni. Engmah lah chu ka ngaihtuah chhuak thei lawi bawk si lo. Muchungin ka hah ve em em ringawt mai a ni.

Dar 4 vela Nurse lo kal chuan khawsik a awm leh awmloh te rawn enin min rawn chiu nghal bawk a. A kut a dam fahran lo hle mai. Zakkha nei hmel te pawh a pu deuh roh! Khaini a heh hmel bawk sia mawm..

Ka pa thawm emaw ti a kawngka lam ka melhphei lai chuan kha nula bawk kha a lo lang leh pek a! A mak zozai ta. Tu tak chu niang maw le? Ka pa nen chuan inhresa awm hrim hian an inbe hlut a, kan chhungte tu emaw ka hriat ve vak loh a nih ka ring ta ber a. Chutiang chuan ka pawm ta ngawt mai kha a nia.

Dar 5 pelh deuhah chuan ka pa chuan ka luchunga kutnghatin țawngțaina a hmang a, min riahpui dawn emaw ka tihlaiin 'Kan haw thla a nge aw' a ti ta daih si a! Kan nula hmelhriatthar chuan min riahpui dawn a va nih hmel ve le. Pawn thleng chuan ava thlah ngei a, a rawn luh leh lai pawh chuan uluk fe hian ka lo thlek a, a nui seih a..

A bag a zen rak rak a, "Kha hei i phone aw." Tih pah chuan ka mobile phone ngei mai chu min rawn pe a, "Ka hawng miahlo a nia aw.., password te kha ring ngam la" nui ver ver chung chuan a'n ti zui zat a.

Kut khawng țhum chuan ka phone lock chu phelh mai ka han tum a, "am.. ka switch off daih tak e.." tih pah chuan alo ban leh a. Amah ngei chuan a on ta kha a nia, "I țhiante call kha chu ka chhang zeuh zeuh a nia..a ri ngun lutuk a.." a kutțang sei leh nalh seng sawng tak mai hlir kha ka lo en pek a! Engmah a hnawih lo, a fai sar mai.

Ka han lut fel chiah chu whats app message luh inchuh chu a nghawr ta cher cher mai. Han khawih mai ngaihna pawh a awm lo, a tang tlat nia mawle.

Ka en theih hnua ka luh chuan alo tam reng lah tak a, phone puar awlh na tham tur alawm lo lut hman le.. Group message ho chu ka clear zung zung a, a muang zualpui pawh a ti reh ta deuh a. Inbox a awm mumal hran lo. Pali panga vel chu a awm. Ka en rei ta deuh a niang ka lu a hai miai miai mai...

Ka han harh leh chuan bangkil lam hawiin saisir deuh hian ka lo mu a, mipa țawng awmtak te pawh ka hria. Mahse ka lehhawi peih chiah bawk si lo. 

"A thluak hi chu a che lo a niang a, engtinnge doctorin an sawi?" Mipa aw chuan a han ti a. "A țha, a harhfim vek, țawng pawh a hrevek ang an tia, a lei a lo seh kak a, chumi vang chuan a țawng an phal chiah lova, an cher sak deuh nge mawni, a nakruh a auh bawk" nula khan a lo ti a.

"A ninawm tawh e, dam vat vat sela ka ti. Heti ringawt chuan ka tan hun pawh i nei thei hleinem" lungawi vaklo tih hriatreng chuan a mipa chuan a han ti a. "Ani khawp mai tiraw, mahse hei chu ka kut a ni miau mai bawk sia, i hriatthiam a ngai a ni" damthlap chuan nula khan a lo ti leh a.

"Ka hrethiam lutuk che lawm, mahse a chang hi chuan i ti lutuk deuh hian ka hre țhin. Min ngaihsak bok silova.." E hele.. a bialpa a ni ngei ang. Keimah vangin an inhau chu a ni awm phawtah! "Ka sawi tawh kha, ka mawhphurhna a ni. I hrethiam duh lo a nih chuan hrethiam tura ngen luih țalh che ka tum hran lo. Keimah vanga hetianga awm hi a nia, a thilova vannei kan intih tawh naklaia a damlo ka buaipui leh zel i hriatthiam duh siloh chuan..sawitur ka nei lo viau ang" a ti hul hak a.

"Chutiang te chu ka hrethiam ve tho va..." a ti nang nang a, chhanna a dawng lo nge ka muhil zawk ni.

Ka khelbawr kham lutuk chuan min ti harh leh a, bangkil lam hawi chuan ka lo la mureng chu niin. Thei leh thei lo chuan inleh ka han tum a, nula khan min lo pui thuai a, a lo mengreng a nih awm hi mawle aw. A va zahawm reuh ve mawle.

Na ka neih leh neih loh te chu min zawt siam siam a, ka lu ka thing mai a. Ka tui erawh a hal viau thung. Tui Bottle chu ka kawk a, a hrethiam a ni chek ang no ah chuan a thli kar kar a. "Ang rawh le" tihpah chuan ka hmuibulah chuan a rawn lek kang a. Ka ang zau hleitheilo chu amah zawk chu a hmuhnawm, a ang ziau ziau mai!

Ka muhil thei tawh silo. Ani lah mut tum hmel a pu bawk silo. Ngawireng chuan kan awmdun ran mai a. Chutia tunge a nih pawh hre lova zankhuaa han awmpui ngawt mai chu dik dawn lo hian ka hre ta tlat a. Ka lama chuan ka hui phei a, ka phone a message plate ah chuan 'tunge i hming?' kan ti tawng mai a. A nui leh ver ver a.

Ka phone chu lain 'Angela Lalmuanpuii' tih chu a han type ve mai bawk a. Chutiang chhungte kan neih reng reng ka hre hauhlo mai ka ti. 'Number plizz' ka han ti ngawt a, chu pawh nui ver ver chungin a type ve leh mai bawk a. Ka save ta than a. Whats app contact list te ka refresh hnu chuan Angela tih chu ka hmu ta kalh a.

"Engatinge hetia ka awm?"

"I accident a"

"Engtin?"

"I hmanhmawh hret..nakinah muangchangin le, i taksa a la chak lo emai"

"Ka hre chak viau asin"

"A la hun lo deuh e"

"Naa...."

"Naaa lo"

Khumah chuan a rawn țhu phei a, "Tun ațanga thil zawng zawng i hriat vek chuan i thluak a buai palh ang, i taksa chak lo emai..lo dawh hram hram teh, i la hre em em ang" hlim hmel pu sang chuan a ti leh a.

"A nih tunge i nih?" Whats app-ah bawk chuan ka'n ti leh a. Țawngka chuan "Ka hmingpum ka hrilh zo chiah che emaw ka tia" a ti a.

"Kan chhungte i ni nge, ka hre lo em che a hehe" ka ti leh a. "Inchhungte ni e, i la naupang em a min hre phak vak lo ang" a nui pawt pawt a. Ka awih chiahlo nachungin rindan dang ka nei hauh bawk silo.

"I ril a țam ve em? Ka ril a țam deuh, eitur kan dap ange aw.." a ti a.

Bawnghnute chu flask ațangin a rawn thli a, tlem tlem chuan min han tulh pah bawk a. A nuam țan riau mai a. Kan chhungte a ni tak tak angem le..? Amah pawh chuan balhla nen chuan a ei pang pang a. Hrehawm a tih hmel bikloh e.

Mahse, bialpa niawm tak a neih kha mawle. A pawi zo leh si.

"Mu la, i chau lutuk ang" tiin ka va text a, " I mamawh zawk daih alawm" a ti awlsam et a. Mut tum hmel pawh a pu hran lo.

Zing dar 6 vela ka harh chuan a țhutna țhutthleng seiah chuan puankawp sin hian a lo muhil bam a,  thawhphana hmuh atan chuan iaiawm loh ve tak mai a ni. Ka thlir char char ti ila dawt ka sawi pawh ka ring hran lo. A diktak sawi chuan mi bialnu atan chuan ka ui!

Reingial ka thlir hnu chuan a zi țiah țiah a, a meng diar diar a, thawhphan neilo awm fahran chuan a țhuchhuak hlawl mai a. Ka khum lamah chuan a lo kal phei a, "I harhna rei tawh em? Nâ i nei em?" a rawn ti zung zung a, damdawi lam thiam mi niawm tak chuan ka chal te chu a han dek vel a. Toilet lamah a lut zui nghal a.

Parda vel a haikian mawlh mawlh lai chuan Nurse a lo lut a, Ka BP te a rawn check a, "Nang hi hma i sawn ber a nih hi mawle, I mal engnge an? I lei a la na em? Han angchhin teh" tih pah chuan mi rawn keusak deuh tituai a, "A híl vek tawh alawm hei, Doctor round hunah ka lo sawi dawn nia, țawngtheilo bula awm chu a hahthlak awm emai" tiin a nui chhuak vur vur a. Chhân pawh ka chhang hman lo!! Bawrh bawrh chuan e.

"I țawng ve hman meuh nange" a rawn ti a. 

"Cake hi kan chiah ange aw, nizanah thil i ei mang bawk silova, drip ringawt rin chu.." tih pah chuan khumlua bawm chu a hai rawk rawk a. No ah chuan cake zaisa lêp hnih chu hnawhin bawnghnute nen chuan a chawk rak rak a.

Ka khumah a rawn țhu kai leh a, mi barh leh a tum chu ka lo man sak a, a fiante ken chu chhuhsak ka han tum a, a țang nasa mai. "Ka barh ve chak che lawmmm, i dam hunah chuan kan barh phak awm silo che.." a tih chuan chhuh ka tumlui duh ta bik lova, a hrehawm mawlh lo e.

Min eitir zawh chuan facetowel(ka neih pawh ka hrelo, a ta niang) a chiah huh chuan ka hmai leh ban vel a hru leh a, ka pum em chu hruk ka phalsak ta lo va, theih ang ang chuan ka han ban ve sa sawi a, " I tih țhat theih loh kha aw, han la mai mai teh" tih pah chuan min chhuhsak leh a. Amah bawk chuan ka kawr hlimin  a theih ang ang chu a'n hru leh thuak thuak a, ka ke dam lam te pawh mawle..

Min han hru zo chu ka harh hawkin ka hria. Zai kawr ka la hak hnuang avang chuan ka ning deuh a, phoneah chuan "Ka kawr thlakna a awm chuan thlak ang" tih ka'n chhu leh nauh nauh a. Ka zun an siak paih tura a lo kunhniam laitak chuan ka lo hmuh a. "I zun hi kan paih phawt ang e aw, a nalhlo leng luang emai" a ti leh mai a. 

Zankhat chiah kan la inhria a ni ber a, chuti chung chuan ka mit a tlung a ni satliah lo. Ka thinlung hi a hneh a ni. Thlâwt mai a. Kan chhungte chu a ni tak tak angem le!? Chuan a bialpa nen khan inhmuthiamlo zel ta bawk se...

"Hei hi i ha mai dawn mi?" Tih pahin t-shirt pakhat hi a rawn lek chhuak a, a'n keng pharh deuh chu thisen te a lo la awm nuaih a. Rangtaka khung leh pahin "Hei chu a bal a nih hi" a ti zaih a. Ka hmu hman reng sia. 

"Tawnzau chiah a awm a nih hi, i pa phone mai ila" a tih chuan ka pa number ka hmetchhuak a, ka phone chu ka han pe a.

"A la tho lo emawni reuh le..ee Pa Zar, Keimah Angela-i. Inthlakna tur hi a lo awm miah lova, haknuam deuh awm chi ilo keng chho mai dawn mi, a kawr hi a ning deuh a niang. Aw.....aw.....awle, rawn hmanhmawh duh suh aw amah pawh hei a țha lutuk a nia"

A tawnzau ken chu zaizirin hak ka duhthu ka han hrilh a, a'n hnim hmasa phawt pekah! "A rimtui lo asin, thlanrim te a nam, i pa lo kal chu nghak law law mai rawh. A reitawh chuang nang tiraw" a tih chuan hnial tur chuang ka awm leh pek lo ka ti. A sawi a piang ka lem duak duak a ni ber alawm.

Toilet lamah chuan a va pilbo leh vang vang a, a thâwm ațang chuan ka thawmhnaw kha a su ngei a nih ka ring. Ka rin ang ngeiin a thilsûk nen chuan a rawn chhuak mai reng a. Pawnlamah zar turin a chhuahpui nghal daih a. 

Zingkar rei viau tur pawh Angela-i bulah chuan a lo rei hauh lo mai. Ani țhutthlengah a țhu mu a, kei khumah, kan in message tukpum a ni ber e. Ka hriatduh ber ka chetsualdan erawh chu ka zawt chhuak thei chuanglo. Thildang a sawikual thiam lutuk tlat.

                          Chapter

                              - II -

Ka pa lo thlen hmain Doctor a lo lut hman a, hrisel țha ve țhin tak, damdawiin hnaih ngai lemlo ka ni bawk a tu doctor nge pawh chu ka hre chuang lem hlei lova. Pa upa lam deuh, palian zuah mai hi a ni a, a len ang aiin a țawng a nêm el el deuh mange a. 

Zinga nurse rawn kal khan a rawn zui bawk a, midang pahnihin an rawn zui bawk. Pakhat chu Doctor junior tê a la nih hmel. Nurse chuan ka report chu a'n hrilh zung zung a, ka chart te a thlek vung vung hnuah "A țhat hi, khawmaw i lei chu han ang teh" tih pahin min rawn pan a, zau mang hlei lo chuan theih tawkin ka lo ang ve sa sawi a. A hmehén ken chuan ka kachhung chu a han chhun a, "A țha viau alawm hei, lo phelhsak ula, hmundang kal zawhah ka rawn en dawn nia" a ti a.

"Zanah in mu thei em? Na a nei em?"

"Aw muthei e, nei hran lo niang, engmah a sawi lo" Angela-i chuan a lo ti a.

"A țhat chu, a malpui ringawt saw chu a dam har lovang, a nâk saw chu chetpui bawrh bawrh mai chi chu a ni dawn lova" tih pah chuan an inzui chhuak leh ta diah diah a.

"I țawng ve thei tawh dawn nih chu aw... Greenboard i pa chah ang hmiang, A B C te zirțhat leh vek i ngai awm sia, țawng pawh i thiam dawn mi!!?" a nui kar kar a.

Tray nen Nurse hi a rawn in chawi lut va va a, min rawn kar âng chiam a, a chaicheh tle vir ver ho chuan a chep zeuh zeuh a ka lei an chelh khawngna niawm tak chu a phawrh ta daih a. Ka thawl belh leh ta huai mai le.

"Thil sa lutuk leh vawt lutuk te, thak leh al te insum rih tur aw.., hmuam rei ngai chi sweets te eilo bawk la.." tiin min chhuahsan a.

"Han țawng chhin teh" tih chu Angela-i sawi hmasak ber a ni! Dangdai thei riau a ni.

"Engnge ka sawi ang?" tiin intifing fein ka'n zawt let ve bawk a. "Kha zawng kha ni mai e, zir hran pawh i ngaihdawnloh kha tiraw, ka rin aiin i țawngfiah tlat, a va va pawh ti miah lovin i duh in sawi thei nghal a niah...pui rem rem e..." a'n ti ngeiah! 

Ka pa leh chaw sem an rawn inzui lut a, "Engnge nizan lam in lo an a Mami?"  tiin Angela-i chu a zawt nghal a.

"A țha e, a fel khawp mai. Buaipui ngai paw'n a awm lo.. Riahpui lo ang  vel alawm maw kan nih le" a lo ti zung zung a.

Chawsem a chhuak fel awrh tihah Doctor kha a lo lut ve leh a. A chekawi te paw'n an lo la zui țham țham mai.

"Ka pu hei i fapa mi?" a rawn ti lut lung lung a. "Aw ni e" alo ti ve mai a.

"Fapa dang ila nei em?"

"Nei love, ka fapa mal a nia, u hmeichhia pahnih a nei a, a u te zawngin pawmlai an nei ve tawh hlawm a. Kan kawlchhun chu a ni hi nimai" 

"A nih chu mawle, hei tlema tlemah fapa i chan țep alawm mawle, a thluak a sawhkhawlo emaw kan ti hman a, mipa vannei bui meitawia tih zawng zawng a nei zo a nih hi.. heti a nih zawngin a dam har lovang. Rei in awm a ngai lovang..engnge i lei chu?" tiin min rawn pan zui a.

"A țha e, a chhah tupin ka hriaa, ana hran lo" ka lo ti a.

"Kha chu damdawi vang mai mai nih kha, i malpui leh nak bak hi nadang i nei hranlo tiraw, i lu te kha kan han cherkhawng ve bawkah!" A nui kuk kuk a...

"Umh...nei hran love"

"I malpui ruh hi a tliak a, thir kan phum a, in enkawl deuh chu a ngai dawn nia. Dam mai turah beisei lo la. Kumkhat hnuvelah emaw kan lachhuak leh turah ngai ila..i nakruh hi a auh bawk a"

"Engtinnge maw ka chetsual chiah le...?" Ka lo ti dek dek a.

"E, ila hre nange, motor in a su che alawm. I vannei hlauh zawka kha i damchhuak mai mai a nih kha..." a tiliam puat ringawt a.

Motor min sut dan tur awm chu ka la hrethiam chuanglo reng reng nia mawle.. Ka hriatna hi a mang deuh a niang.

Doctor te chu ka pa chuan a zui chhuak a, lawmthu te an inhrilh chhuak mawlh mawlhin ka hria. Angela-i chu tukverhah chuan a dâk vang vang a, a ngaihtuah bing hmel phian mai.

"Angela... i lung a leng tawh a mi?" Ka va ti hram a..

A lo hawilêt chu a sen deuh țan țan a. "Lêng love a..." a ti ringawt a. A mizia ațang chuan Engnge maw dik zat lo deuh chu a awmin ka hria. Han zawh chawt dawna ni mang bawk silo.

Khum hnuaia dawhkan lian vaklo, hniam tir ter chu a la chhuak a, ka chungah chuan a rawn hung a, "Chaw ei rawh aw..kan siam ange" a ti a. A che vel chu ngawirengin ka en reng a, a hma a ang tlat lo. Engngemaw diklo chu a awm chiang a ni.

"Angela.."

Min chhang lo chuan min en ringawt a. "Nâ i nei chu ni silo maw, engnge diklo awm?" ka ti leh a.

"Hm..engmah harsatna ka nei hleinem, min hmudiklo mai mai a nih kha" a ti leh mai a. Chhanna diktak min pe lo a ni tih erawh ka hrechiang viau thung.

Ka chaweina a seng zawh chuan a insiam a, a hawzui ve mai a. Ka pa nen bawk chuan kan awm dun leh ta rak rak a. Ka țawng ve theih tawh avang chuan a zia phian. Ka pa nen hi chuan inkawm thu-ah harsatna kan nei hran lo. Ka tetlai ațang tawha ka kawmngeih ber a ni ve tlat. 

Ka chetsual an hriata an talbuai dan te chu mi han hrilh a.

"Sikula kan awmlaiin Zatluanga'n mi han phone a, motor in a sut thu che a sawi a, damdawiinah kan dahlut fel chiah a, a țhalo khawp mai a rawn ti mai si a, baklengin ka tlanhaw a, i nu alo awm bawk silo. I u Tei teinah ka tlan phei a, Vala (ka u Tei pasal) nuamsamlo ina lo awm chuan ruahmanna mi han siampui zung zung a, Zan dar 7 velah Mami (kan upa ber) te motorin Tei nen kan lo chhuk thla a, Dar 2 bawrah Aizawl kan rawn lut a, Damdawiinah kan rawn thleng a, ICU lamah ilo awm bawk si. Rilru kha a mangang lutuk a, i u motor rui chau bawk si nen, kha zan kha chu tawn leh atan a chakawm loh khawp asin.

Zatluanga pawh kha a hawchho ta nge mawni, a rawn lawr ve reng țhin a" a tia.

"Tunge min sutu ni a..?"

"Mami kha, nizana riahpuitu che kha.." a tih chuan ka phu zawk hialin ka hria. A van mak dawn ve, engtinchiah nge maw min sut le? A mak e...

"Angela-i kha maw..?" Ka ti haw a.

"Niang chu, hrehawm a ti leh lutuk a, a chhungte lah chuti bawk. Ngaihdam min dil nasa a, a tihluih lah nibawk silo chu ngaihdam loh theih lah a ni lova, an fel lutuk a a inthlahrun awm lek lek zawk a ni. Mipangai tak an lo ni hlauh a vanduaina tawk mah ni ila a vanneihthlak lehling khawp mai. Chhungkaw thar kan nei a ni ringawt alawm." a ti a.  Ka pa meuhin chutiang ngaihdan a nei a nih chuan mi pangai tak chhungkua an ni turah ka ngai ve tawp lo thei lo. Ka pa ngaihdan a ni miau mai si a.

A mak e, Angela-i khan min su mawle...

Chaweikhamah hnu lawkah chuan Tei leh nupakhat hi an rawn lut a, Tei nen chuan inhmukhat tih takah kan han in lawm luam a, " I rawn kalpui hi ka hremiahlo nia!" ka han ti a.

"Mami nu nih hi, nizana riahpui tu che nu kha...chiang em?" A han ti kalh kalh a. A sawi takah chuan an in ang deuh alawm maw tak le.

"E, a ni maw.. in rawn kal kher duh a, in buai awm nen" ka ti ve mai a.

"A ho emai a, kan tih ve tur alawm heng te chu. Duh ang pawhin kan rawn lang țha hman lo zawk a nih hi" a ti duam a.

"Hna lamahte in buai țhin si a, kan phut lo viau che u ania" ka pa chuan a lo ti ve mek bawk a.

Angela-i nu pawh chuan hna lama kal turin rei awmlovin min chhuahsan ve leh mai bawk a. Kan pafa za chuan kan in kawm tal tal a, kan titi nasa mai.

Dar 11:00 a pel awrh mai thei Angela-i message ka dawn kha. "Min ngaidam rawh aw" tih ringawt hi a lo thawn a. Ka hrethiam lem lo khawp mai. 

"Engnge awmzia?" ka ti let hel hawl a. Nizan lamah chet fuhlohna deuh a nei emawni chu aw ka ti a, chutiang awm engmah ka hre bawk silo. Amah aichuan ka buai zawk mah awm asin mawle.

Ka messege lah chu a rawn chhang lem hlei lova, a hnu fe ah "Ka țah a chhuak" tih ngawt mai hi a rawn thawn leh a. Chhanna ka thawn chhuak ta bik lo.

Tlai dar 4:00 bawrah chuan awmhmun rawt thuam nen a rawn lang hlawl mai a, riah leh tumin a lo thawk chhuak chu niin ka pa leh ka farnu chuan an remti lo kher mai. Tei chuan min riahpui a tum thu sawipah chuan chawl hahdam phawt rawh a ti a. A'n hnial ve ngial a chu țawngkamah chuan a hneh meuh lo a ni.

A hmel chu chik taka en chuan vei nei hmel a pu a, thlir pangai tan erawh chuan a hmuh theih kher awm love. Hlim hmel takin a khawsa reng mai bawk si.

Ka bul hnaia chuan a awm duh meuh lo thung, eng emaw diklo chu a awm ngei mai.

"U Te, i riah dawn chuan zu haw rawh u. Ka lo nghak ang che u, chawte zu ei ula muangmarin ilo chho ang a..." Angela-i chuan a ti a.

"Haw pawh ka lo tum chiah hleinem, an chawsem ka ei mai ang chu ka lo tia" Tei chuan a lo ti awlsam et a.

"A khai chutiang ngawt, chhunah nilengin in awm bawk sia, Damdawiin boruak hi a hahthlak phian a nia. Boruak dang han hip pawh a țha hrim hrim, engtik thleng nge awm ngai tur a hriat bawk siloh" a ti a.

An han țangkawh ve viau a chu ka pa leh Tei chu an inzui chhuak leh ta nge nge kha a nia.

Ka khumah chuan a rawn țhu a, eng engemaw sawiin a ti ti siam siam a, a sawi mumal tak pawh chu ka hre lem hlei lova.

"Chuan..chhuna i message kha engnge a awmzia?" tiin ka lo zawt daih a.

Za lo tih hriat reng hian a nui sek a. "I hriatthiam vek kha" a ti a. "Hrethiam ila chu zawh awmloh tak che a nia" tiin a chhanna beisei tak mai chuan ka lo chhang a.

"A nuam lo nia, sawi tawh lovang.." titau hmel pu deuh reuh chuan a han ti nghar nghar a. "Ka hriatve miau loh te chuan nuamlo ka ti ve silo alawm" ka ti ve leh mai a. "Tuna damdawi ina i awmchhan te hi ngaihtuah ve la..." ka hmel danglam lai hmuh tum niawm tak chuan min en ran a.

"He.. chu zawng chu maw!?" ka ti hak a. "Umh.." a tih chuan "Thilthleng tawh, siamțhat theih bawk siloh vangin inngaihtuah buai a țul hleinem, tuna kan hun hman meklai hi a pawimawh zawk" tiin ka chhang a. A beisei vaklo niang.. a ka deuh heu in ka hria.

"Min ngaihtuah lutuk suh u, inbuaiphah lutuk a a țha lo angreng. Buaipui ngai em em pawh ka nih tawhlo hi, bakah hei Tei leh ka pa an awm a, țhian te an awm ve neuh neuh bawk a buaina tur vak a awmlo   nia" ka tih zawm leh a.

"Chu lam chu i thuneihna huang a ni lo tlat mai" a ti khauh a. Ka dang der chu a ni ber e.

"I bialpa pawh a lungawi loh em kha.." ka han ti zauh chu phawk fe hian min en a, "Engnga?" a ti hã a..

"Hriatloh der kher a ngai a mi, i hriatreng kha"

"I sawi awmzia ka manlo tal a niang" a la ti fan a. "I bialpa, min buaipui lutuk hi a lawmloh em kha" ka tih sak hmak a. "Eh.. engtinnge i hriat a chutiang?" a tih chuan "Hetah pawh a rawn kal tawh reng kha" vei hmelloh takin ka tih liam sak puat a.

Maktih hmel deuhvin min en reng ringawt a, engmah a sawizawm lo chu mak ka ti deuh viau a ni. 

"A tan hun siamsak ve rawh, mipa hi rin aiin kan vuina te hi a tê phian a nia" ka tih chuan "A buaithlak.." a ti sap a.

"Eng chu maw?"

"Ngaihzawng neih hi"

"Engnge a buaithlakna?"

"Nun a zalen lo alawm"

"Miin nuam an tia" 

"Ka ti ve țhin. Mahse, tunah chuan a ni tawh lo" a ti hnual raih a.

"Keimah vang vek a ni tiraw?"

Min melh zeuh pah chuan "Thil hi ngaihbel zung zung suh, duh leh a ni ang a, duh leh a ni lo ang a" a ti hlak a. Ka lo nui deuh chu a run hmel kher mai.

Lianhminga a rawn arnghal luh heu mai pekah! "Eh..in lo in ngaizawng elo!?" a'n ti zui zat a. Angela-in ka kut a vawnna chu a thlah zal zal a. "Lianhminga...ka college kaipui..ka țhian mah mah a nih hi, hmanni pawh khan a lo kal kha.." tiin ka hmelhriattir a, "Kan inhmu ngun alawm, nang aimahin ka hre hmasa zawk ang chu mawle" Lianhminga lah chuan a lo ti thawr thawr a. 

Kan ti ti luam a, college chanchin leh eng engemaw kan sawi nual mai.

"Naktukzan ațang chuan ka rawn riak ve thei tawh ang, i boral lo ta rau rau bawk a" nuisawng chung chuan a'n tia. "Lo riak ve tawh em em teh" ka tih chuan ka bula țhu chuan ka kut a rawn hmer salh mai le. Haider rual a ni lo. A mah ka en lah chuan a hrelo awm hmiah lawi a. 

Toilet-ah chuan a lut tharh a, a reilo, ka phone a hram țat thung a, tudang an nih ka ring lo. Ka han en a, ka rin ang ngeiin 'Ka riak dawn' tih ringawt hi a lo thawn pek a! Lianhminga ai ngawt chuan a thlan nahawm zawk ngei ang le.

"Bike check tir ka ngai, ka kal mai dawn sin, kha i țhat khawp kha tiraw.." Lianhminga chuan a ti a. "Nia, hei ka țha, ngaihtuah ka ngailo nia. E țhianpa, canteen-ah khan bâ ka nei maithei, a tam chu ka ring lova remchangah lo zawt ta che" ka han ti a.

"Ka pe tawh" titunu chu kan en rual țhawt a, kan phawk dun kher asin! Chutah Lianhminga chuan min han thumps up zauh a, nui var var chung chuan min chhuahsan ta a.

Maktih hmel deuha ka en chu haiderin "Ka riak dawn ka tih kha.." a ti nghat a. Ka chhang lo. "I țhianpa riahpui chu i duhzawk tihna mi?" lungawilo awki a hnai ta riau mai le. "Duhthlang thei ka ni hleinem" ka ti ve ngawt a.

"Bakah..tu emaw kha a lo thinrim leh ang a, rawn len te a duh ve awm sia" ka tih chuan a ngawi vang vang a, a hmui te chu a petsawi kual vel mai mai niin ka hria. Ka beisei ang chhanna ka hmu lo.

"Riah i phal leh phalloh chu sawi ve mai la, helkual duah kher lovin" a lungni zan lo tih chu hriatloh rual a ni lo. "Chutiang naktuk zan daih daih sawi nan te chuan a la hma alawm mawle" ka tih chuan min melh hrek ringawt a.

Tei a rawn thlenzui tak avang chuan thildang han sawizui vak theih pawh a ni ta lo. Dar 5:30pm velah chuan Angela-i pawh chuan min ținsan ta a.

Zanah chuan thildang teh chiam a awm lo. Buaipui ngai ka ni hran bawk silova, Tei pawh a hahdam viauin ka ring. Zan dar 10:00pm velah Angela-i chuan min rawn  phone a, nâ ka neih leh neihloh min rawn zawt a, thil pawimawh leh han chhinchhiah tlak em em sawi kan neih pawh ka hre lo. 

Zingah chuan ka pa a rawn lawr hma hle mai a, Tiffin-ah chaw leh chawhmeh a rawn keng thlap bawk sia, a tho hma viau ta ve ang. Tei phei chu a lo la muhil mawle!

Doctor ward rawn fang chuan "Naktuk lamah induh chuan inchhuak dawn nia, damdawiina in enkawl leh in lama awm a danglam hran love, damdawi hunbi a ei leh dressing hi nimai a, Sub-Center lamah in kal mai ang a.." a rawn ti a. Rilru a thawl huai tawh mai. Karkhat chuang mah ka lo awm reng tawh a..

Kan khawchhuakho an fel ka va han ti tehreng aw. Min rawn tlawh awl lova, mi an ngaihsak em em reng mai te hi a van lawmawm tak. Kei ka phungthluk loh teh reng nen chuan.

"Zanah ka riak dawn.." tih message chu tudang ațangin mah ka dawng lo. Angela-i hnen ațang bawkin a ni.

"Chuan..?" 

"I țhianpa kha lo hrilh rawh, Dar 4:00 velah ka lo chho ang" a ti a.

Chutia riah chuh ta na chu tiin Lianhminga pawh chu ka hrilh ta nge nge a, ani lah chuan eng he hu-ah a lo ngai hran lova, 'zandangah a ni mai lawm' a lo ti awlsam et a. Angela-i'n a'n er tehlul nen a.

Dar 4:00 pelh awrhah chuan a lo thleng mai reng a, reipawh a awmhmain ka pa te pawh chuan ngaihngam takin min hawsan leh ta mai kha a nia. An chei mihranglo phian lehnghal a.

"I țhianpa chu hetah pawh lo leng mai sela, inhauh phah aite chuan..." ka han ti ngawt a, mi melh ram ram mai asin le. Ka sawifuh lo a nih hmel viau a ni. 

"Engnge a țulna?" a ti hlak a. "Aw..bialnute bula awmte chu a thlahlel ve bawk ang chu" ka ti a.

"A thlahlel lovah ngai mai rawh" a ti chauh a. Ka bulah chuan a rawn țhu a, "Ih maw, ka ngaihzawng tih velah hi chuan buai ve vak lo la, keimah ka buai hi a tawk viau lo mi.." a rawn ti sa sa a.

"Hm..nia tihpalh" 

"Naa..khatia tihtauh phah kher kha chu a ngailo nia"

"Titau kher hleinem.."

"Tau deuh chu nih kha..."

"Tau pawh ni ila engnge pawivak, i hek phah lo chiang e"

"A nuam lo a..."

"Engnge nawmlohna vak tur a awm a mi keini vang mai mai chuan...?" ka ti leh kher pek a.

"Rin, sawi tawh lovang chutiang mai maia inhnial chu a țhalo...a țullo nia" a ti a.

"Ih maw...thil țha leh țul ringawt kan sawi chuan kan bula miten boring min ti dawn sin...țul em em lo pawh sawi ve zeuh zeuh a țha lawm" ka tih chuan hnialhrat tih hmel zet hian min melh a.

"Sawi char char teh nih leh, ka lo ngaithla ang" a ti nghat a. A sawitur neilo zawk chu ka ni leh lawi bawk sia. "I sawi tur zawk alawm, i bialpa chungchang a nia kan sawi lai kha" ka tih sak a.

"Bialpa sawitur ka nei tawh lovang tih pawh ka hlau hlel love" a ti zuai raih a 

"Engnga!?" phawk zet chuan ka han ti a.

"Ka sawi kha a chiang viau, sawinawn a țul lovang"

"Sawi nawn lovin, han sawifiah teh.."

"Ka personal life a nih chu"

"Hm.. țha lawm"

Kan ngawidun vang vang a, a phone chu a tuai kual a tuai kual ringawt a, sawi leh maitur ka hrebik hauh lo mai ka ti. Khuavang kallai a niange.

"Naktukah kan chhuah hmel" ngaihtuah manghlei lo chuan ka'n ti ngawt a. 

"Chuan...?"

"Kan khawlamah kan hawchhoh mai loh chuan, hetah keimah chauh awm ka ni sia, class ka kal thei dawn chuang silova heta awmreng awmzia awm lova" ka ti ve mai a.

"Rin.."

"Umh.."

"Ihh..dressing vel te a ngai awm sia.." a ti bah niaih a.

"Sub-center a awm thova, an ti ve thei em ang chu"

"Bakah a hlimchhawn lutuk a motor a inphurh chet chu a chi dawn mi? Ruh lam a ni lehnghal a..." 

"Ka hre lo le chulam chu, ka pa hi a hna chawlhtir reng chu a ni chiah bawk si lova, Tei te lah chhungkaw nei an ni tawh bawk sia, heta awmreng thei kan nilo alawm"

"I chhungte dang pawh an awm thovang chu.."

"Awm rihlo chu nih ber hi.."

A ngawizui vang vang a. Keilahin sawichhunzawm ta nge ka ti bik lem hlei law. Hawchhoh chu ka chak bik hauhlo mai. Mahse, kan awmdanin a zir miau siloh vangin hawlo theilo kan ni bawk si. Helama min awmpui tutur an awmloh chu thuhran, awm tehreng pawh nise nu leh pa ten buaipui ngai reng fate hmuhphakloha awm chu an ngaingam dawn hauh silo.

Engnge a ngaihtuah ang le...?

"Rin, ka thiam loh vek a ni tiraw...i career ka tichhe ta vek a nih hi..." hnukulh țeuh chung chuan a rawn tichhuak hram a.

"Hm.. Chutiang zawngin ngaihtur a ni hleinem, duhdan ang vek hian thil hi a thleng thei lova, chu chu kan chantawka khuarel a ni tih hi pawmthiam mai tur a ni ngai e" 

"Engtin pawh min dem la sawitur ka neilo, a pawi a ni e.."

A kutah chuan vuanin ka hmer sak vang vang a. 

"Mi vanduai tak ka ni.. " thawk lak halh pah chuan a han ti a. 

Hmeichhe lunghnur hi thlem vak vak chi an nilo tih hmânah ka hre tawh. 'Kan tizual kai mai mai a, lo ngawih mai hian a reh hma zawk' tih rilru pu mi ka ni. Mahse, chutia mi an awmlaia lo ngawihkur chu a nuam hauh silo. Chetlak mai dan tur ka haihchham riau mai ka ti tun țum zet chu.

A kut ka vawnna chu muangchangin ka hnukhnai hret hret a, min rawn bawh ti tih thleng chuan ka pawt hnai a, a mittui tling pam mai chu a khap hnam țiam țiam a, ka kut chuan hruksakin a biang chu ka nûl sak a, a hmui sen sawk mai, fawh atana duhawm hliah hliah te chu ka kutzungpui chuan ka hmeh hrual sak a, a maimitchhin siar siar lai chuan a tukkhumah kuaiin a hmui khur der der chu ti reh turin chibai satliah ngawt lo deuh chu ka chhoh hlan ta kha a nia..

Ka banrekah chuan a hmer ngawt ngawt a, a taksa chu a țang khawp mai. Chubak erawh chhanna ka dawng lem hlei lova. 

Ka hmui ka phawi chiah chu ka bek dinglamah chuan a hmai phumin a in sut hraih hraih a. Chhunzawm ngaihna vak ka hre leh pek tawh lo.

A reiah chuan a tho hlawl a, Toilet lamah chuan min luhsan nghal daih a. A thinrim bik pawhin ka hre lo. 

A hmai a phih tihhriatreng hian huh hluamin a lo chhuak a, melh pawh min melh eih lo chuan a bag chu a hai rawk rawk a, a hmai a han hru hul chu mutho hlim a ang fu ni.

"Damlo ve si nghal lutuk mai..." mi pawh melh duh hlek lo chuan a han ti a.

"Zawhte rilțam hmaah Sazu a chhuak ngai hleinem.." ka'n tih ve ngat kha..hehe

"Zawhte maw i nih?" a nui sak a.

"Sazu i nih chuan..."

Ngawireng chuan a rawn tho nalh a, ka biang tawnah chuan dawmin min rawn fawp thut a! 

"I chimawm e mai Zawhte.. " a nui ver ver a...

                          

                          Chapter

                              - III -

Kawngkhar ri rawkah chuan kan hawirual țhawt a, Chawsemtu hi a lo ni a.

Khumah chuan chaw kan han eidun a, kan awmdan ka sawifiah thiam dan ber chu 'innei thar hlim' kan ang awm mange ka ti. A zahmawh liluh sak phei chu ka ni law, chubak zawng chu hlimna awmthei ang zawng zawng hi kan hlimpui a niber awm asin mawle.

Chaweikhamah puan huhin min han hru leh tak thlip thlep a, ka nupui niturah riak a ni ka ngaih ni. Duhthusam mai a nih erawh ka hlau hlel love.

Chutia kan hlimnain a vawrtawp a thleng ta emaw tihtur khawpa hun kan hmn lai chuan a phone chu a lo ri ral ral a, 'Ka nu' tih sap pah chuan a chhang a, a hmel chu hmuhtheih khawpin zuk danglam chaka mawle!

Eng thu emaw tak chu an in fah a ni ngei ang le.

Amah tak chuan a chhang em em lo, 'umh' tih vel bakin. Mahse, dawnsawn nuamtak a nilo tih chu a bula awm tan chuan hairual a nilo. Engthil tak niang maw.

Phone a dah rual chuan ka bulah a rawn mu a, a hmai a phum tlat a, khawngaih viau mah ila hnemdan tur ber ka hrelo. A hnungzangah chuan ka han kuah a, "Engnge thil diklo awm ta?" ka han ti a.

"Keima chung chang mawle.." hniam raih chuan a ti a. "Ka hriat ve a rem chuan..." ka han ti dak dak a.

"Umh...i la hre dawn chauh alawm.."

"He.." ka lo ti ringawt a. Meng ngui lap chung chuan a rawn dak chhuak a, a mitmeng chuan amah puiturin min ngen niber hian ka hria.

"Min buaipui lutukna lamah hian inbuaiphah niin ka hria, a dik em?"

"Dik e, mahse ka tihtur ni a ka hriat ka tih vanga tawrh hi ka huam asin.." a zawi viau nain ring tak a ni.

"I chhungte mai bakah i bialpa thlengin harsatna i tawh phah a, ka tawrh ai nasain nangin i chhiatpui tur hi a dik ka ti thei lo"

"Ka inhuam vanga ti ka ni" ka bâna a lu nghah pah chuan a ti leh sap a.

"Hetiang hian thil a thleng ang tih hi ka ring ngai bik lo asin. A lo thleng dawn tih ka hriat hnuah pawh ka inveng zo lo. Inven tumna pawh ka nei chuang lova, ka chhiatpui ta a nih leh ka chhiatpui tawh a ni mai. Duh ang diak diakin tumah an nung thei bik hleinem" a tih chhunzawm leh a.

"Chhung te, țhian te leh midang hi ngaihtuah tel an ngai fo asin. Mahni chauhin kan nunah hian kan damkhawchhuak zo dawn lova, midang kan mamawhna hi kan hriat a, anmahni ngaihven tel hi a țha viau asin" ka ti a.

"Sawițha khawp mai. A zawm leh zawm loh lam chu ka thu ni ve thung se.." ner nang nang pah chuan a ti kher a, ka thusawi chu zawm a tum hmel fahran lo kher mai.

"Thlaleh lehpek 24-ah khian pasal nei tur ka ni a..." a ngawi vang vang a, makti awmlo taka awm ka tum fan fan a chu min va nghawng na si em! 

Angela-i'n pasal a nei dawn a nih chu.

"Mahse, heti hi kan ni leh ta bawk sia.."

"Chuan...engtin zel..?" ka lo ti a.

Ka biang a rawn tuai a, ka hmui chu a hmet neuh neuh a, "In khawlama chhoh i tum bawk sia"a ti daih a.

"Tehdaih a.. I buaina a reh dawn tihna nih chu... engkim tluangtakin a kal thei tawh ang"

"Ka ring lo"

"Țha takin i awm ang a, chu pasal țhatak i nei dawn alawm. Hlimna tur zawk a nih chu" ka'n ti ve tak nain a sawitu zawk hian harsa ka va'n ti si em!

"Chutiang sawi suh" a ti nghat a. A lawmlo tih chu hairual a nilo.

Muangchangin a lu chu a rawn tikang țalh țalh a, ka hmui a hmeh neuh neuhna chu damthlap hian a rawn chuktuah a...

Boruak hip luh ham ham pah chuan min thawhsan ta a.

A tuk dar 9 pelh hnu chuan Ka pa leh Angela-i'n bill vel an tihfel chhungin Taxi in Tei nen ka inluah lam pan chuan kan lo hawsan ta kha a nia.

Biang tai têkin darkar a liam leh hnuah ka pa nen chuan an rawn inzui lut ve leh mai bawk a. Ka inluah lah zim, bungraw tam bawk silo chu han chhuan tur a vang viau mai. Ka pate tlangval laia an țhutthlengsei niawm tak pakhat leh stool pathum vel Chaweidawhkan leh lehkha zirna inkawp dawhkan lian vaklo pakhat a ni deuh tlawng mai. Khum awmchhunah lah ka mu daih bawk si a.

Inchungho leh țhenawm hnai ho an lo lut khawm ve țek țek bawk nen a thawpik thlak kher a sin.

Angela-i haw tur leh Tei bazar tur an chhuak rual a, tlem chuan kan thawl ta deuh. Kei erawh ka kimlo viau thung.

Kan khawlama hawtura kan lo inbuatsaih chu kan ti fuh hlein ka hria a, helaia che theilova awm reng chuan Angela-i hmakhua kan ti su kuk zo tak ngial dawnin a lang si. Thinlungah hrereng dawn mah ila an ruahmanlawk tam tak bawhchhe tur em chuan chakna ka nei tawklo deuhin ka hria.

Tin, midang nupui a ni tur thangva vel hi ka benga rawngah hian lut tawh lo se ka duh tak zet... Kan khuaah chuan chutiang chu ka tawng lovang.

Min ti na em em si a.

Pathian zara kan dam a nih chuan kumtawp lamah ka malpuia thir an phum phawrhtir turin Aizawl lamah kan kal leh ang a, chumi hunah meuh chuan lungawi takin a pasal țang a bel tawh ang a, harsatna ka siamsak thei tawh lovang.  Keipawhin thil nihpung ka pawmthiam ve ngei tawh turah ngai ang.

Tlai dar 6:00pm velah ka mutui lai chu ka phone nghawr dar dar chuan min ti harh a, en mang hleilo chuan ka han pick up ngawt a, Angela-i a lo ni a, "I țha maw?" a rawn ti a. A aw chu a dik zat lo deuhin ka hria.

"Umh..țha lawm, chhunah khan tlemin ka khuasik deuh a, damdawi ka ei a, ka lo muhil daih a" 

"A țhat chu nakinah ka lo be leh ang che" tiin tawpna pawh siam mumallo chuan a phone chu a hmet hlum nghal daih a. A hrilhhai thlak duh khawp mai.

Eng emaw tak diklo chu a awm a ni. Keimah vang a nih hmel bawk si, rilru a nuamlo tak zet, tihtheih lah ka nei a zeng pawh a ni silo.

Ka ngaihtuah nasat poh leh ka buai. Tihdan awm chuang bawk silo. Ngaihtuah loh theih bawk silo. Amah tal hian thil awmzia han sawifiah duh se chu tihdan tur pawh a ngaihtuah theih tur hi a nia, engmah a sawi duh bawk silo.

Lianhminga leh țhiandang te an rawn chuangkai hlawm a, ka inngaihtuah bing lutuk tur pawh min chhawk viau mai. College ka zawm theilo tur chu pawi min tihpui hle a, Final exam tal hmachhawn thei turin dil an rawt a, 'lo inbuatsaih rawh nangpawh, kum a uihawm' tiin min thlah ngei kha maw. Thil an tih theih hmel țhin bawk sia mawm ka țhian duh tak te hi.. Kawlkil lama MLA pa tê niawm tak an ni an țawngkamah hi chuan..

Ka pa țhutthleng seiah a mu a, Tei chhuatah; kan khat ve viau a ni.

Min rawn be tawh dawnlo emaw ka tih hnuah ka phone chu a rawn khûr ta char char a, Amah ngei chu a ni e.

Ka chhungte an mut tawh si avangin inbiak vak na chi ni tawh heklo 'in message mai ang' a ti ta kha a nia.

"Haw chhoh ngei chu i duh si a maw..?" a rawn ti zat a.

"Umh..nia, ka sawitawh kha"

"I duh ang thlapin i han awm dawn nia, a pawttu lam a chak deuh te pawh a niange" a'n ti ve fahran a.

"Haha.."

"Enge, chubak rintur dang awm chuang heklo"

"I rinna chak vaklo nilo maw..he"

"Chak viau pawh nise tuna ka rilru ang bak hi chu ka pu chuang lovang"

"Engnge chu chu...?"

"Buaipui phakah awm la ka ti..I hawchhoh chuan ka rilru nuam lovang"

"Kan hawchhoh hi i tan a țha zawk alawm, in buai reitawh lutuk a, pawisa nen..."

"Bleehhh..." tih chu min chhanna!! 

"Bleeh lo, lawmtakin pawm mai rawh. I tana țhatur zawk ka tih chu"

"Bleh bleh... țhatna pakhatmah awm lo"

"Engvangin?"

"Harsatna tam tak hmachhawn tur ka nei tih ka hria, heng zawng zawng hi keimaha su tur chuan ka dam khawchhuah zawh pawh ka ring nek lo" a ti a.

"Pasal i nei mai dawn a, chutiang lungkham tur neih a va hun lo ve"

"Ninawm e pasal pasal...i duh leh nei rawh nangma'n" a rawn ti erh pek a.

"Tihpalh... muhil tawh ila, a hma tawhlo nia" ka ti a.

"Muttui.." tih zawng a ni e a mi chhanna chu.

Kei hi chu ka mutui viau zel tho mai han mut chawt takah chuan. 

A lo kal tawh lovang chu tihnaklaiin tukțhuan eikham hnu lawkah chuan a rawn lang leh heu mai pek a! 

Ka pa te lah chuan 'i lo awm hman rau rau chuan naktuk haw kan tum sia, kan han bazar ange, ticket te en pahin zakdawh tiang te pawh kan hawn nghalloh chuan" tiin Tei nen chuan min chhuahsan mai bawk si.

Helhkam nei țun chung chuan kan inhmachhawn ta ran mai le!

"Khawngaihin khatiang kha chuan min en lo la" a ti sap a.

"Engtinnge ka en che a, hetiang bakin ka meng thiam hleinem" ka ti mai a.

"Ngei hmel deuh nilo khan..pangai talin"

"Mahni dikloh hi chuan thil kan dawngsawng dikthei țhin lo a nia" ka tihsak a, a'n chek karhah.

"Damdawiinah khan la awm zawk la țha tur nia..." a'n ti ringawt a.

"Engah ngawt chuan maw...?"

"Zanah ka lo riahpui tal thei che a.."

"I hahdam phah a ni mai alawm heti hian.."

"Taksa chu nimai thei..rilru chu a dam chuang lova.. i dam chian hma chu ka rilru a nuam ngailovang"

"Chutiang tur a ni ngai hleinem, hei țhatlam ka pan ve zel a, ngaihtuahawm ka nih loh hi. Keimah vang chuan harsatna insiam belh suh. Puitlingtakin i hmabaka tihtur awmte hmachhawn turin inbuatsaih rawh"

"Ka ngai ngawt ang che..." a tih sep chu hnuailam kunpui daih mahse  ka hrechiang viau a ni.

'Keipawh' tih mai ka duh asin. Mahse, pasal a neih tur thu hre reng chunga chutiang țawngkam lo rawlh a, lo uai lunglen fahran chu dikin ka hre bawk silo. 'Innei mai ila' pawh ti ila min hnial ka ring miah lo. Chutiang khawp chuan kan rilru a inhmu asin. Mahse, kar min dantu hi bang mah lo se a chhah lua a ni e.

Ka bulah chuan a lo kal phei a, ka lu dawmin ka chalah chuan a fawp zauh a, chhuatah chuan a țhingțhi niberin ka hria, khum a rawn bawh a, kan hmai chu insi lai a awm!

Dul raihin min en vang vang a.

"Rin.." 

"Umh.."

"Pathian hi a chang chuan ka dem fo țhin a sin.." a ti a.

"Engvangin?"

"Nang hi thlakhat liamta tal khan min sut tir loh vangin..." a ti tak tak nge a uang pawh ka hrethiam chiah lo.

"Ka bo viau"

"Tunah chuan engkim hi a tlai zo vek tawh..." a hmui chu a pet khur dar dar a.

"Tun ai hian na tuar hma se min tihna niang maw..!?"

"Nilo Rin, hrethiamlo der teh suh.." 

Ka nghawngah chuan nghet takin a kut a suih a. Vanduai a intihna ai nasa mah chuan vanneilo ka inti ve bawk. Bulțan ngawt tur lahin mualpho tho tho a ngai dawn si.

Ka bek remthlap chuan a lu a rawn nghat a, țahchhuak insum tih hriatreng chuan a insut leh zauh țhin. Țhianho zingah a ka kalber mah ni ila hetiang hunah meuh hi chuan hnamdang kara țawngthiamlo ang chauh ka ni lawi a, ka hnemhnam pui awmloh ve ngawt țhin ta ve ang.

"Lalmuanpui," tih ri țhak chuan min va ti ralkhêl si em! 

Kawngka kan lo kharphuilo a ni chêk ang. Kawngkaah chuan a nu chu a lo ding ul mai a, Quinine eizo hlim ang mai hian a hmel chu a nûr nûng a. 'Min ngaidam rawh' tih hmasak zet loh chuan keini ang duang tan chuan han biak ngam chi pawh a ni ngut lo.

"Engatinge ngawirenga i chhuah ziah a, kan va sawi zing tawh ve, em em mai..." a ti hlawk hlawk a. 

Chhang tur kan awmlo.

"Rina, damdawiin ațangin i chhuak ta bawk a, kan inbuaipui lutuk thei tawh lovang. Inlamah leh zel chuan beisei lo la. Chubakah nakin lawka pasal nei mai tur a nia, hetiang taka inbuaipui hi chu a fello hrim hrim, in enkawlna tur in mamawh chuan han sawi mai ula.." inchhung zim teah chuan a vei tuak sek a.

"Engmah a ngai love..Nia, hei buaipui ka ngai lemlo viau tawh alawm" țawngnem viau mah ila ka kut erawh ka va humruh nasa si em!

"Tirawh i haw ang, nangma thil vangin kan buai kan buai a, nanglah helaia i lo thep bo mai mai a..." 

An nufa inzui chhuaklai chu ka thlir lo chiang.

Ka rum chhuak hawk a.

Pathian hial a dem chhan pawh ka hrethiam ve ta ruakin ka hria. Kan lo intawng tlai chu vanduaina ka hriat reng tur zingah a tel ngei tawh dawn a nih hi.

"Zawhte, i tellova nun ka hmang tur hi ka va'n huphurh tak em.. " tia min message lawm lawmna chu chhang lovin kan vangkhaw sumtual belturin an sawi zawlkhawpui chu ka chhuahsan ta a...

                          Chapter

                              - IV -

Zemabawk daia țawngțaina kan hmangzo kan han chhuak leh țan chiah chu engkim chân ta ang mai ni hian ka inhria a, kan khua thlen chakna reng reng ka nei hauhlo mai ka ti.

Motor khalhtu chu kan țhianpa Lalrova a ni a, hrehawm ka tih hlauvin mi a ngaihven hle a, a duh ang pawhin a tlanchak ngamlo tih a hriat reng mai. Tlar laiah chuan ka mu zar mai a, a hnungberah tlangval pahnih an chuang a, a bak chu kan pafa kan ni mai. 

Tei front seat-a țhu ber lah chu thui pawh kan tlan hma chuan a luak tak iak iak a, khawngaihthlakawm hian. Keipawh taksa chak vaklo nen ka rui ve deuhin ka hria. 

Ka pa hla duhzawng a nih ringin Lalrova chuan Routmawi sak, 'Ka tan ni leh thla reng a eng tawh lo' tih bawr chho vel chu an han zaitir a, keilahin hnukulh țeuhin ka lo ngaithla pek a, keimahah ka lo inchan zel a, hla ngaihnawm tak a ni nge nilo ka hrethiam tawh lo.

"Zawhte, i tellova nun ka hmang tur hi ka va'n huphurh tak em.. " tih message chu chhan châk tak, chhang ngam silovin ka thlir vawng vawng ringawt mai a ni.

Tlai ni tlak ruaiah kan kawt ngeiah chuan kan ding che ta lawih a.

Lusûn ang mai ka ni. 

Mahni in ngei thlen pawhin ka rilru ka kalsan niber hian ka hria, țah tlawk tlawk ka duh hial a ni. Ka awmdan chu ka pa chuan a hrethiam viauin ka hria, lehkhabu chhiartur te min ngaihtuah sak a, ka mutna bulah TV a hûng lut bawk a, zanah pawh a chang chuan ka bulah a mu mai a, ka nu aimahin min ngaihsak zawkin ka hria, ka tan pa nih a va tling țhin em.

Kan in awmna chu signal a țhat lemloh avangin duh hun hunah phone a hman ve theih ngawt lova, ka tan erawh a țha phian a ni ber ang chu. Ka phone pawh zai ngaihthlak nan bak chuan ka hmang hran lo. Message pakhat ka enziah tih mai loh chu.

Ka awihloh leh ka rinloh lutuk maiin ka pain hma a lo la ve tlat mai chu awihhar ka va han ti teh lul!

Ka țhiante kaltlangin kan veng KȚP Committee member mawngzang leh fakhlawh tak mai Rinpuii chu min lo 'try' sak hi a lo niawm a! 

Ka țhian ten an han sawichhuak chu ka nuih a za viau mai. Mahse, a za reilo. Ka pa min ngaihtuahna leh ka khawhar hrehawm tih hlauin hma a han la ta mai chuan ka rilru a khawih tak zet. A fapa lungleng khawhar chu hmuthei lovin a tiha mawilo khawp hiala a che ta chu min hmangaihzia ti langtuah ka ngai lo thei lo a ni.

Mahse, Rinpuii chu felin țha viau mahse ka 'type' a ni vak lo. Ka duh aiin a zawi awi mah mah. Ri bawrh bawrh, hlimthei tak leh 'zei' ka duh. 

Angela-i khan ka mamawh chu a nei vek asin!

Karkhat lai ka awm hnu chuan inchhung dungah zakdawh tiang nen chuan ka chesawn ve ngam țan a, lunglen pawh zia tak tak awmlo mahse hriatchhuah loh chang ka ngah ve ta.

Inrinni zankhat chu muchungin TV ka lo en a, ka pain ka bulah lehkha a chhiar bawk a, keilah pek chuan Tom &  Jerry ber kher ka en lai takin inleng ka nei a, ka țhiante pahnih leh nula pahnih.

Rinpuii chu a lai ve viauin ka hria, ka pa chuan țhutna alo kian sawk sawk hlawm a, bedroom lian lemlo takah chuan kan inhnawh ve hâng mai a, ka thil en ber kher chu mi sawisak nan an la hmang zui.

Choka lamah an phei zeuh zeuh a, Rinpuii nen chauh chuan kan țhudun ta ran mai a. Sawitur a hre lo tluk zetin keilah ka hul bawk. Hul ve tak ka ni ringawt mai, amah lah chu TV lam a hawi ngar mai bawk sia, thildang ber aiin a tlukloh nu bawk a ni ka rilrua lo awm leh ta chu.

"In van fel ve a mite in lo kan a.."

"Hun hi a awmlo ve thei lutuk a, duh hunah pawh kan lo kal thei lo zawk alawm" a nui chen chen a, a ngainatawm țan dawnin ka hria.

"School lam te in tluang maw, naupang in ngah em?"

"Umh..pangai, 150 vel niin ka hria, nikum lam ai chuan kan țha deuh kumin chu, tidaih ila engtinnge class hi i tih, i tawp tawp rih tihna mi?" 

"Nih mailoh chuan, hei ka kal thei miau bawk silova..."

"Ni bawk sia..a uihawm hle mai, i zawh kum a ni kher bawk sia.."

"Nia mawle, kan awmdan turah hian thu kan lo neilo khawp mai..ruahmanna ka'n siam lawk nasat teh reng nen a..." ka ti a.

Nakum lamah țha deuhin chhunzawm leh mai dawn lawm, lungngai lutuk lo la. Tunah chuan țhataka in enkawl i mamawh zawk, taksa tih chak.."

"Nia, ka chhungte hian min duat khawp a, ka bukrit sawt khawp mai hei.."

"Mizo artui te i hip țhin em?" 

"Aw ka ei nual tawh mai, tunah tak chuan lei tur a awm lo an tia..kan lo nei mai bawk silova..."

"Nih chu, kan nei maithei ka lo enchhin dawn nia.."

"I lo buai phah lutuk ange.."

"Buaiphah viau lo turah ngai ila..." min melh ralh pah chuan a ti a.

An hawhnuah erawh chuan thildang ka rilruah a awm thei lo.

'Angela Lalmuanpuii' chauhlo chu.

Bawkkhup chung chuan ka insehruh fan fan a ni ber mai. Ka ngai takzet asin. Engtinnge a awm ang le tunah hian... A pasal tur nen an țhudun rial angem? Duat takin a bianga chulin a fawp ang maw!  An inneih tur chungchang hlimtakin an sawi dun ang maw! Aih, aih...Nilo, chutiang a nilovang. A ni theilo alawm.

Ih maw... ka va'n ngai tak Angela-i kha..

Ka pa rawnlut pawh chuan min be hauh lova, ka puan sinlai chu min rawn khuh țha a, TV chu off in țhutthlengah chuan lehkha a chhiar chhunzawm leh niin ka hria.

Ka mittui chu a tla em lo. Mahse, ka va'n na ngawih ngawih si em!

A tuk a ka pa school bang chu ka roomah chuan a rawn lut tlang nghal a, engmah a sawi hma hauh chuan "Pa, ani hi chu ka ngaizawng thei lovang..." ka lo ti tawng ringawt a.

"Han nghak ve deuh phawt la mawle, i hmanhmawh a nih kha.." min tihsak duh chauh a. Sawizui tur a'n awmlo mai mai.

A bag ațang chuan parcel lian vaklo hi a phawrh a, a hawng nghal mawlh mawlh a. A chhungah chuan bandage, lapua, forcep leh dressing aid tur chi ho a awm nual a, a chah nihmiang ka ti mai a ka ngaihven zui fahran lo, khum bulah chuan a dahfel mawlh mawlh a, chutih lai chuan ka nuin a lo koh a, a va chhuak leh rih a..

Parcel kawma ka hming inziak chuan ka mit a lak deuh vang chuan thei leh thei lovin ka va ban țawk țawk a, harsa tak chuan ka va la hram a. Thil tla nalh awm chu ka'n bih zui a, ka mit ka lasawn mai thei ta tlat lo.

Angela-i phone a damdawiin ka awmlaia kan lak dun kha a lo ni a!

Ka ban pha bawk silo, ka pain a lo hmuh hman ka hlau bawk si..Khumlu a tiang ka dah chuan ka han thai hnai dawn a, carpet nen chuan a lo inhip bet ve deuh bawk si. Chutia ka buai chât chât lai chuan ka pa pawh chu a lo let leh ta nge nge a.

Ka thil buaipui lai a hmuh chuan min en hau ringawt a. Chhar a tumlo a ni tih ka hriat hnu chuan ka nu ka au ve thung a, ani chuan ngaihtuah mang hlei lo hian a rawn chhar mai a, ka pa chu a din ngaiin ngawirengin a lo ding a, ka nu pek lah chuan, "Engnge ni ta rûn rûn a..." a'n tiah!

Ka pa lakah chuan ka inthiam chiah lo, Engmah pheichu a sawi hauh lo nain. Mahse, ka duhthu renga chu thlalak chu dawng ka ni bik hauh silo. A tan pawh min han dem viau chhan tur a awm pawhin ka hre bik chuanglo.

Angela-i'n min theihnghilh mai bik lo tih ka hriatna chuan rilru a ti thar lo thei lo a ni. Mahse, ani chu pasal nei mai tur a ni a, keimah zawk hian ka theihnghilh ngei chu a ngai dawn a ni. Hun erawh ka mamawh deuh chu ka va'n ring em!

Zanriah eikham hnulawka room a ka luh laichuan inleng kan nei a ni tih an țawng thawmah chuan ka hre thei a. Ka inleng tur an nih chuan room lamah an rawn lut mai turah ngaiin ka va lawr buai peih ta lo.

Rei pawh nilovah chuan ka room kawngka chu an rawn kik mai reng a, lo lut tura ka chhâwn hnuah chuan rinloh tak maiin Rinpuii a lo ni a, hmeichhe naupang hmel fel kîrh kêrh te hi zahzelah ti niawm fahranin a rawn hruai a.

Zoartui pum 6 awm vel tur hi polythene-ah a rawn bawk țat a, "Hei aw artui chu, kan lo nei bik lova, țhenawm ten an lo nei hlauh a" a ti a.

"Khai a.. a ngai lo sin mawle, ilo kenghnem bawk si.." tihpah chuan ka lukham hnuaia pawisa ka dah chu banin pek ka han tum a. 

"I ti mah mah deuh lo maw... ka lo kan vena che a nih kha.. " tiin a la duh tlat lova, pek ka tumchhan pawh a la duh dawn chuanglo tih ka hre reng a!

"Nizanah rawn biak che ka tum a, a tlang thei miah lova. I number ngai i hmang lo a mi a?" a ti a.

"Hmang e, kan in hi signal a chhe lutuk a, message takngial pawh ka dawng thei lo. Airtel ka hmang bawk sia, Aircel emaw Reliance emaw la ngaihtuah ve a ngai a ni."

"Nih chu, Airtel te chu top up thun tur pawh hetah te chuan a awm mumal hleinem, Reliance hi hmang an tam ber a, top up vel pawh a awlsam a..."

"Nia, ngaihtuah ve a ngai a ni. Zai ngaihthlak nan chauh chuan a man nen a inmillo emai.."

Ka khumlu lama parda thliin a chhemlen sek mai a siam țha zo lo let leh chu ka lo hui a, "Enge..?" tih pah chuan a lo kal ve mai a, a banah chelhin ka han pawt a, a nauhruai lam chu a han melh zawk a, ani lahin Tom & Jerry alo entui phian bawk sia, chhuanlam tur a nei lo a nih hmel viau.

A sam lo uaithlahnuang mai chuan ka nghawng vel a zar pha hial a, a biang ka chul lai chuan mit khap lêk lovin min en kur a..hui ham a zeilo reuh mange!

"I nu te an lo lut thut ange" ala ti zui ta dah a. 

Tluk loh a nei.

'Angela, engatinge midang nen hian ka khaikhin zel mai che aw....'

A tukkhumah chuan dawmin ka kuaihniam riai riai a, a țang țo mai le ta nghal a, ka fawp malek dawn mawni zawk le..

Kan hmui chu a insi det hman chauh a ni. 'Umh..' a tia a tal pit zui nghal daih a, thingtlang nula țang laklawh an sawi chu a lo nih ngei dawn hi a te ka ti ta vel mai mai a.

Ni, chutiang thuartham vel chuan bet tak tak mang silovin inngaizawng ang chuan kan han awm ve deuh roh ta chu a nia. Angela-i nena kan thlalak chu pawtthlerin khumbula bawlhlawh bawmte-ah chuan 'bawlhhlawh' niturin a lut ta. 

Mahse, ka theihnghilh aia tam zawk mahin nitin ka la hrechhuak chu a nih si hi mawle.

Țhenawm velah te pawh ka inhawlchhuak ve thei țan ta a, ka nakruh auh an fûnna chu a thawpik thlak lek lek țhin a ni.

Lengchhuak hla thei lo ta chu Rinpuii pawhin min rawn tlawh zauh zauh a, phone erawh chuan kan inbe ngai meuh lo. Simcard thar ka ngaihtuah duh tlat lova, hunawla biak ve sek ngai tur kha ka peihlo. 

Mahnia inngaihtuah veng veng ka duh zawk daih!

Tukkhat chu a school kai tur hi a rawn lut kawi a,  simcard hi min han pe ngeiah! " Nula tan rawn kal rawn kal hi a nuamlo ve a, phone-ah i biak theih siloh" tiin.

Ka vuahsak lem chuang hlei lova. Ka biak peih miau loh vangin a thinrimna a tam mai mai ang.

Tin, ka simcard ka thlak chuan Angela-i'n engtikah emaw min be thei nang.. 

Ka bawlhhlawh bawma 'bawlhhlawh' ni tura ka thehluh pawh zankhat pawh a riah hmain cellotape-in ka char khawm leh hman vek a nia! Rinpuii tan hian hmun a la awm meuh lo chu a ni e.

Ka u fanu pawlriat zirlai kan hnenah a rawn awm a, inchhung boruak a tinuam viau reuh a. Inchhung chet ngai țhenkhatah a pi a lo awl ve thei bawk nen kan zangkhai phah hle mai. Mahse, Rinpuii mi chhak zuk zuk a ching a, ka duh teh chiam lo.

Amah Rinpuii bawk chuan simcard ka vuahloh chhan chu hmaichhanah min zawt ta ngei a, "Ka phone in a hmuthei lo" te ka lo tihkual sak vel ta mai mai a, a lawm hmelloh nai nai khawp mai, țangțung chunga 'fawh' chu ka hlawh ve ta tho tho e.

Țhianpa Lalrova lo hawchho lamin 'Ui sa ka rawn lei haw a, țhian hovin i eikhawm ang u' a tih teh tlat avang chuan Pathianni chawhnu her zawtah chuan a sumo in min lo hruai a, 'In bialnu te ka phur khawm vek dawn nia' a la ti zui a.

"Hmeichhiain uisa an eive duh nang.." ka tih chuan, "Beihlawi an bai ve anga a ni mai lawm, keini'n uisa kan siam ang a, an hmeh tur chu siam hrang ve mai rawh se" a ti awlsam leh mai a. Chu zawng chu ni mai, ro dang rel vak pawh a ngai teh chiam lo.

An in kan thlen chuan Chhuanate hovin Uisa chu kawtlaiah chuan an lo mûng tluk tluk tawh a, a rim ngawt pawh chuan kua a ti ri nghal rawih rawih thei hial alawm mawle. 

Kan țhiannu te phur khawm tur chuan nimaw Lalrova chu a tlanchhuak leh nghal daih a, tlangval pathum lai kan awm a, phurkhawm kim thei tak mawle. A tu a mah chu kan thawt lawklo tlang bawk sia. A nupui nei tawh leh inti patling ber kalchhuak a ni bawk a a rawn kim thei em ang chu maw.

Veng hmawr ti a sawitur ni silo, veng hulum lai ni phak chiah bawk silovah an awm a, a fate primary school kairual awmhlir mai pathum lai a dintlartir thei tawh a, Lalrova hi chu kan chung en deuh hlek chu a ni. 

Ama Line-ah chuan mi fakawm han tihtur hi a ni ve hrim hrim a, Pawlriat a failed vangin school a chhunzawm duh lova, mi motor te zuiin kumhnih dawn a tal kual a, chumi hnuah kan khaw sumo a'n vuan leh ren rawn a, 'Mipa inti ve a mi motor khalh reng chu..' tiin a bansan a, 'khalh mai mai teh, kuthnathawh a hrehawm tehreng nen' kan tih pawhin a duh tlat lo.

Kumhnih emaw sawhthing leh hmarcha, thlai hmun zau hek hawkin a valh a, a vanneih ai ve te pawh a niang a rate san kum a lo ni ve ve kher bawk si a Sumo thar lain ruahmanna feltak neiin thil a ti a ni tih a lantir ta reng mai.

Motor thawm kan hriatna lam en chuan kan hawi țhap hlawm a, a kawtzawlah ngei chuan hmeichhe pathum a rawn chhuah thei leh ta tlat mai! Keini kal ila bialnu te sawmchhuah pawh huphurhawm kan tih dawn vei nen, ani zawng Lalrova a la ni reng e.

Hmeichhe lam chuan Lalrova țhiannu ho chuan an hmeh tur chu an siam hrang ve a niang, mi pawh an ngaihsak lutuk bik lo. Keini pawh uisa a hmin hnu chuan țhutkhawmna pindan kil lamah chuan kan in dêng laih laih a. Țhianhova enghelh awm map lova han awmkhawm chu a va nuam țhin ve aw..

A dawngtu kohhran lam in a senchi a rawn kheuh hawng ta khauh mai phei chu Chhuana te ho hapui lang langin an nui țhen reng mai alawm mawle.

In ve loh ka'n tum zet a, 'tlemtal, ruitham lovin' an tih tak tlat si-ah chuan no khat chu kan tlak ve pawp a, hrawk chu a sa țha duh mawle. "Kha ti pup pupin in tawh suh, muangchangin in tur alawm" an ti laih laih a, ka ka tlak fel der tawh sia..

Taksa chak lo chu thuhran ka in ngai vak bawk silova, nokhat chhah lêng lâwng chu ka kaipui ruai tho mai ka ti.

Kan card khelh chu dah felin zai lam a lang leh ta tlat mai a, Guitar țawngțawl lam tawh, a hruisin ber pawh awm tawhlo lehnghal chu nuberin a rawn phawrh a, zaithiam em em lo Guitar ki hre hnem bera kan neih Mama'n a kuah a, 'Di chambawihpui' ațang ngeiin kan han suartluan chho ta kha a nia.. 

'Mahse biahzainem ten min chhang lo hian maw,

Sirah min hnawl ka hlau leh si;

Ariang lunglawm ve nan maw biahthu di min hlan mai se maw,

Aw di chambawihpuiin....

Luahloh di zuna uai reng aichuan,

Fam changin pialral rûn rem ila;

A nêm mahna famrûn nghah hnu chuan...

Awww.....Haleluiah amen.. a dik lutukk... 

Ka lo tui fal deuh nge mawni Rinpuii chuan min en duh hle mai a, ka țhutna chair bânah chuan a rawn insawn ta nge nge a, a hnâr chu a lên ru deuh tih ka hre reng maiah! Pawilo sih sah lutuk..

Kan zaitui viau mai, chawei lam pawh kan hrechang meuh lo chu a ni.

Ka zun a chhuah avangin Rinpuii chuan kawt lamah min kaichhuak a, kan han inhnim hnai ta deuh chu "Zu i in ve ni maw?" a ti ta ngei a. Kopang zun khum tur tur chung chuan ka la zai tak bai bai a... A zawhna ka chhang lo

Kan lêt leh lamah chuan "Tinge zu te i in ve a?" a ti țha leh a. 

"In ve mai mai" tiin awlsam zet chuan ka chhang a, a lungawi hmel loh khawp mai. Țhian te bul pawh min panpui duh lovin choka țhutthlengseiah chuan min țhutpui a, "A awm anglo e Rina, zute in reng reng, i dam țha pawh a ni lova, dam pawh ni la zuin a țullo hrim hrim" a ti leh pek a, councellor councellor....!!

Min en leh ran țhin a, ka chhan a beisei nimaw. Keilahin chhang tange ka ti lem bawk silova, a kutzungțang a elh a elh ringawt mai ni.

Țhianteho pawh chu an zai chau ta deuh aniang chawei an rawn rawt a. Hmeichhe ho chuan an siam zui nghal mai a, kan chawei thawm pawh a țha teh e.

Chaweina an tihfel hnu chuan hmeichhe lam chuan zan inkhawm chhuanlamin haw mai an rawt a. Rinpuii lah pek chuan kuhva mi han dil pahin "Haw ve rih suh aw..inkhawm ban velah haw chauh la" a rawn ti a.

"Engatimaw, i rawn kawi dawn mi?" 

"Kawi dawn nang, inkhawm banah kohhran zaipawl hlazir a awm alawm, zu i in bawk sia, khatianga haw te chu a chiloh alawm" a ti chu ka run kher mai.

"A ho e a.." ka tihsak a.

"Ho lo, i chhungten engtinnge an ngaih ang che, keimah thlengin engtinnge min hmuh ang, ngaihtuah thui ve deuh la" a ti nang nang a.

'A ho e' han tih leh mai ka tum zet a, "Nia..' ka tih sak ta zawk a. 

Țhiante vengthawng map lovin a hmui chhah țha tep tawp tak mai ka'n seh sak tak kha.

An chhuak ta.

Lalrova te chhung leh kei chu a awmchhun kan ni ta mai a, Lalrova chuan khûn khân fe hian min titi pui a.

"Rinpuii lakah hian i tui vaklo niin ka hria țhianpa" a rawn tichhuak hlawl a.

"Chutia mi..ka tui ve viau emaw ka lo tia sin"  ka tih chuan ani la rui deuh phût bawk si chuan a awih hmelloh kher mai. "Aizawl lam hi i la ngai deuh niin ka hria" a rawn ti zuk a.

Tukkhuma ben lawlh ang mai lah ni chuan.

"In mak dûn ve ngawt mai" a tih chuan makti zetin ka han melh a. 

"Engnge kan makna?"

"In induh ve ve a, in inngaizawng chuang bawk silova"

"Aw..pasal nei maitur alawm a nih tawh, keia lo inrawlhna chi a ni tawh hleinem" ka ti bung nghat a.

"Țhianpa, man em an la inhlan hleinem mawle.." a'n ti hep mai a le! Mang a ti ang.

"Hetah ngaihzawng min neihtir te te a, tunah midang i kawk leh a...mumal teh" 

"I pain hrehawm i tih a hlauh vang mai mai alawm a diktak chuan maw țhianpa, chuan maw țhianpa Angela-i chu maw kan stand-ah kan hawchhoh dawn hian a lo kal ziah asin" a la ti tak deuh deuhah!

"Ka khawngaih ve deuh țhin, pasal nei tur chuan a inbuatsaih reng tho. Mahse, a rilru a dam thei biklo a ni."

Ngawirengin ka țhu a, sawitur ka hre map lo mai.

"I chanchin hi min zawt ziah. I ngaihzawng neih thu tihloh hi chu i hmasawn dan te hi ka hrilh vek, vawikhat tal hmuh leh a chak thu che hi a sawi țhin"

"Hrehawm i tih ka hlauh avangin ka hrilh duh ngailo che a, mahse Rinpuii lakah hian i tuivak lo nia ka hriat vangin ka sawi mai mai a nih chu" te chu a ti leh ang lawi a.

"A theih hram chuan Rinpuii hi ngaihven lui hram hram rawh, Pasal nei mai tur ngaihtuah reng hi i tan a sawt lo. Chumi a nih loh chuan Angela-i chu ka lo rûk sak ang che, i rilru siam la, i duh thlang fel rawh, Man em pawh an la inhlan hleinem" a ti tak tak. Ruiphur thusawi pawh a ni chiah tawh lo.

Reingial ka inngaihtuah hnuah ti hian ka chhang ta a...

                          Chapter

                              - V -

"Ama'n an inneih tur a țhulh a nih chuan keiatan hnar a țulna a awm lova, chuti nilova keimah vanga țhulhtir erawh a țulna a awm love" tiin.

"A dik alawm, mi inkar keimahni duhna vang ringawta tihbuai hi thil țha ber a nilo mai thei. Pathian samsuih in nih zawngin in la intawng em em ang. Tunah chuan Rinpuii hi i ngaihsak luih hram a țha ang. A chhawktheitu hnaiber a nih ka ring."

Chutiang tur chuan inbuatsaih mai ka ngai.

Thingtlang khawlian lemlo taka awm tihtakah chhiattawk an awm te, innei an awm te, lungphun te hian kan vai chawlh țhup zel mai a, a tam zawk ram hnathawka eizawng an nih vangin official a chawlhpuan hran awm ve heklo, he'ng nite hi 'Holiday' a ni lo theilo țhin. 

Kan tan chuan Krismas pa tê a ni hawt lo thei lova, Pa Kima'n 'Inngaizawngte inhmuh ni' a ti pawh hi a dik nachen a awm ngei ang. 

Biak in bul maiah chuan lungphun tur an awm avangin Rinpuii nen pawh kan inhmuh fal ve ngei ka ring.

Tlailama ruaițheh tura kal tho a ngaih avangin chhuah phei ve mai ka rilruk zet a, mahse inhmuhna hmuntur a vang dawn a ka hriat vangin ka pa phone chuan Rinpuii chu leng turin ka sawm ta zawk a, ka nu leh pa an kal dawn tho avangin kan ina inhmuh chu a rem zaw ber zawk ang chu ka ti deuh.

Dar 11 pelh hretah a lo thleng a, ka nu a lo la chhuak hman silova, lài zeta a rawn khawsak tak ngawt kha, khawngaihthlak zawk hian..Mahse, ka nu chu rei pawh awm bik lovin a chhuak zui ve ta mai a, kan hmeichhe naupang kawl lah a chhuahna a rei tawh mai si a, thinlai a hnîm țan nghal ruih mai a!

Engtin nge an sawi țhin kha aw... Arirang an ti niin ka hria, pawnfen arh hlei hluai deuh ang chi kha a dum a rawn feng a, t-shirt vutbuak rawng hain, rawlhthawt aia u deuh hlek chappal a bun bawk a kan khua atan na na na chuan a nalhpui alawm.

Keilah tawnzau leh kekawrbul nen ka lo awmhuai mai bawk si.. 

Mitmei ven tur awm lo ta chu a thla a ngam ve ta deuh a niang han hnuhnaih deuh pawhin a țang fun bik ta lo. "Mi an lo lut thut ange" a ti a.

"Tunge lo lut ang a?"

"Ka hre bik nang, an lo kal palh thut thei alawm" a ti a.

"Kawngka va kalh daih la" 

"A chi em em loh, mi lo kal ta se min hmuhdan a diklo vek dawn sin"

"Kalh lo ila min lo phawk ta thut tho se..."

"Tihian awm mai mai ila phawk tur kan awmlo a ni mai lawm" a ti a.

Muangchangin ka tho țham țham a, room kawngka zawk chu ka va kalh a, "A va'n țullo tak, kalh suhhhh.." a tih chu ka bengkhawn bik lem lo.

Khumah chuan ka lawn leh nghal mai a, mut pah chuan ka han kuah mu mai dawn a, a țang deuh. "A chiloh e.." a ti sap a.

Hreh deuh chuan a mu ve mai bawk a, han mut tak rau rau si-ah chuan a ti deuh nge ni mi a kuah leh tlat lawi a. Awm hahdam rei ta deuh bawk a mipa rilru a chhuak țan chu ni der mai le!

Infawh a zei fahran lo chu ka duhkhawp lo viau a ni. A âng hlui hlui zel mai a, thawpui te a la leh hulh țhin a! Tharum hmangin min kuah fun mai bawk si, mang a ti ang rum rum mai alawm le.

Keilah duh angin ka che awlsam mai thei bawk si lo, ka țãng ru țeuh ringawt mai ni.

A kawr rawng a nalh tih vang pawh ni em em lovin a awm zawn chu ka'n hup sak a, ka bânrekah nghet zetin a man zui a, hnawlkian tum teh mahse ka in hamtang ve laklawh tlat! A duh anga awlsam chuan a lasawn thei bik ta lo. 

Reingial kan in fawh hnu chuan a zal ve ta deuhin ka hria, a țang țung pawh a zia ta deuh. A âwmbawr pawh a funna chhungah ka tumbailek thei ta! Hmasawnna ropui tak a ni.

Tharum nen ka beih fê hnuah a kawr phelh chu sawiloh a kawr hma ka hlimsak êk thei chauh a ni. Dam țha ni ila ngûk hrawih khawpin kan phekphelên tur asin mawle. A vanneiah ngaihsak tawh mai ang.

Beidawn tawh lamah engtin tin emaw a kawr leh pawnfen chu ka hlihsak thei leh lawi a, a malpui ngo puak mai, thau hauh silova chum tar mai te chu ka chul sak hauh hauh a, nundan mawi a hre chak khawp mai.

A maimitchhing duar duar a, a awmbawr khuhtu la awm chhun ka phelhlai pawh chu hria ang pawhin a awm tawh lo. Khawih ang ang chuan a thingtum mut ngût tawh mai a, belchhung sâ mai pawh nilo, hawp tawh sa la lêm duh mailoh ang vel a ni ta.

A tir khan i țan nasat fen fun nen, nuam ti leh dêr duar hle si...ka ti rilru țhuai țhuai a.

Chutianga nula itawmloh tak pawh ni lem lovin ka khumah ngei lace parda tereuh te chauh zara min hmachhawn tâkah chuan kan țawngțai hmasa ange tih thu awm hek lo, a sual dan chahna kulhpui puanzar thehlep zet mai chu tuboh leh chheni pawh ruai hauh lova țhiahdarh tumin ka inbuatsaih ta a. 

Tâwnlui dawn pawh ni ila chutiang thuartham chu ka va han huphurh lo chiang tak em aw.. Mahse, a sakal tê tein kan ti ve thlip thlep ang chu tiin a tlangah chuan ka dawm țan ta dai dai dai a..

Hm..kawngkapui rirawk ruala kan nauin "Â pute..." a tih lauh ri zet chu Hiroshima a atomb bomb thlak tlut zeta pawi a va ni si em!

Ka bula mi chu a lengbut a, a lei silhfen ho chu a dapkhawm ta rawk rawk mai a, dan tumin awmzia lah a nei heklo. 

"Lungphunnaah inkal ve dawnlo mi?" a rawn ti leh a, "Dawn e mate, chawei dawnah chauh ka kal ang" ka ti ve mai a. Room lamah chuan rawn luh tum ang pawhin a awm lo.

"Â pi a kalna rei tawh em?"

"Umh, rei tawh e.. Engtikah nge i kal dawn a nang?"

"Â nuin min lo sawm rawh a tia, ka chho leh phawt ang, Tala chu TV chungah hian a awm a nia aw, Chabi chu â pu hmingah hian i dah mai dawn nia" tiin chhan pawh ka chhan leh hma chuan kawngka chu a khar ri țhak a.

Rinpuii chu thawmhnaw ha fel thlapin tukverah a lo dâk vang vang hman nia mawle! 

Khumlamah chuan lo pheiin lukham hnuai chu a rawn zen rak rak a, a brazzier a phawrh nawlh pek a! "Ka ha hman lova.."a nui deuh..

"La ha lo la.."

"Naa.. chiloh, an lo lut leh ang"

"Lut lovang, lut tur an awm tawhlo. Ka nu te chu chaweikhamah bak an lo haw lovang" ka ti a.

"A chi loh, duhaiin kan kal thui hrim hrim.." a tih lai chuan a kawr chhung chu ka lo zen leh ruk ruk hman tawh a, a ngaimawh ta biklo niang a dawh ve hle hle mai.

A brazzier kenlai chu laksakin lukham hnuaiah chuan ka rawlh lut leh daih a. Khuma mut tir leh tum chuan kan bei ngial a, a rawn mu duh ta țhak lo. Ka khum tlangah chuan a țhu reng a, kawihmut ve ka tum pawhin a țang kawh ta tlat bawk sia, ka tilui duh ta bik lova.

"Insiam ve tawh la, chhuak phei ve tawh ila, chaweitur chauha lan chu a nuamlo, inchhawp hnai ve deuh tal ang" a ti a.

Ka insil thuak thuak hnu chuan muangchanga insiamin zakdawh tiang nen chuan min chhawmchhuak ta a.

"Lalrova te tih ang apiang chu tih ve zel kher a ngailo ania aw.." a tih sap chusn ka nui  ringawt a, "Nui ringawt lo la, ka ti tak tak..ka duh lo" 

"Țhiante nena han awmkhawm chang te chuan a țul ve țhin alawm. Regular-in kan pawh a ni lova,"

"Chutiang ngawt a ni lo, tumahin regular-in an innghal char char hleinem..tlemte ațang khan alawm an kaisan zel.."

"Kan lo ngaihtuah dawn nia.." ka'n ti mai chuh a run kher mai.

"I țhiante bulah vawiin chu awmlo la a țha ang" a tih hmak kha.

Lungphuntu Pu Zahawma te țhenawm lawkah chuan kan lut a, midang pawh an lo awm nual a, mi an fiam reng mai bawk sia nuam pawh ka tilo. Mi lutchhuak an tam bawk sia, duhaiin kan kal hma deuh a ni.

Lalrova teho Thlanmusl lung zu phun zo chuan min lo zawng niawm tak hi a nia, Rinpuii phone-ah chuan an rawn be heu mai a! 

Ner nang chung chuan, "Lalrova.." tihpahin a phone chu min pe a, Rinpuii sawilawk ang ngeiin 'i duh ve dawn em?' a rawn ti ngei reng a. "Ti khan lo awm rawh, nakin deuhah kan lo lam dawn che nia" tiin a phone chu a hmet hlum nghal daih a.

A beisei angin ka chhuak leh mai bawksilo chu mak a tih hmel viau.  Mi a zawt ngam chiah bawk silo.

A hnu reivakloah chuan Lalrova teho pawh an lo lut ve ta hlawl a, Rinpuii pek lah chuan min han țhuthnaih sauhah!

"A la hma bawk sia teichhuak lawk ila" an tih chuan "Nia pawilo" ka lo ti mai si a, Rinpuii chu a mengrang teh e maw..

Midang hriattham ve mang lo tur chuan "Kal a ngailo nia aw.." a ti a.

Han runluih ve hrim hrim ka chakna hi a reh hleitheilo, amah ka duh lutuk loh vang nge pawh ka hrethiam chiah lo. An zu ka in ve chak vang pawh a ni hran lo. Rinpuii hi ka ti thinrim chak zek zek..

Ka ding hluai a, Rinpuii pawh a ding ve mai a, "Chhuah a ngailo ka tih chu, țhu mai mai rawh." tum deuh bar chung chuan a ti a.

"Lo kal ve la" ka'n ti daih a.

"A ho emai a, hetah hian lo nghak ila nimai" a ti hmak hmak a. "Kan rei lovang, 'tah hian min lo nghak mai rawh" ka tih chuan lungawi lo nâng nâng tak a ni.

"Rina a mak em em emai" a'n ti ngawt a.

Lalrova motor lam pan chuan ka inhawlchhuah san ta a, lungawilo viau pawh nise ka hlawhtling nimaiah ka ngai.

Hmarlam kawtchhuah Lungdawh awmna lam pan chuan kan tlanchhuak ta daih a.

Thiltih tur chiangsa a kal si a tu a mah chuan no ngaihtuahna chang pawh chu an hre lem hlei lova. Lalrova motora tuipaina chu kan tan bung ta ringawt kha nia, ringtakin 'I dam țhin maw ka țhianpa pa pa pa' an han play dup dup mai a, nuam a ti viau a ni.

'Lunglen tuar zir maia'n hei chen min tirh le'

No hnih ka tlak ta! Rinpuii pualin nokhat ka in leh ang.

"Țhianpa, i țap palh hlauh ange aw i hmel nei nui kha..." Chhuana chuan min rawn ti a. 

"Bialnu nei reng chunga khawhar thei awmchhun a nih hi" Lalrova'n a lo ti bawk. Min la nuih zui..

Chutiang chiah chuan ka awm lawi bawk sia hnialdan tur ka hre silo, ka țhenkhum vel ta mai mai.

A chang hi chuan 'engatinge ka neih mai loh le' tiin ka ngaihtuah fo țhin. Tlângthang ta deuh hat pawh ni ila rei an sawipeih awm chuang silova, a innei tura te kan induhna kha a hlu zawk daih awm si a..Mahse, mi thuthlunna kar em a inrawlh chu niin ka hre silo. A duh a, a ngam a a tal chhuak a nih leh le..

A kebai ber chu ka chhah ta mah mah a ni e. Luak lah chu a chhuak mang der bawk silova, han luak thawl deuh ila chu ka ziaawm tur a sin mawle.

Chawei tur an kal țan tih chuan Rinpuii minlo nghahna hmunah chuan min dah leh a, tiang nena kal ta chu kawngkalah ngawt chuan ruih leh ruih loh hriat a har deuh a niang min thlek ngial a. 

Midang an awm ve tho vang chuan han intih vak ngaihna awm heklo, a lungawilo hmel chu pe na ve tak a ni. "Khatiang te chuan chaw pawh i ei thei dawn mi?" a ti hlak a.

"Theihloh thu a awm a mi?" ka ti ve mai a.

Mi han tih vak ngaihna a hre lo niin ka hria. Lalrova te ho an rawn lut a kan inchîl phul zui deuh bawk nen ngawireng chuan a țhu bar a. Khawngaihthlak reuh hian a.. 

A țhiante hovin chawdawh puiah an rawn sawm a, kal duh, min vengthawng ve deuh si tih hriatreng chuan a awm a. 'Kal rawh, min ngaihtuah suh' ka lo tih sak a.

"Anih ka kal mai ng aw" Ngui hmel tak chuan a țhian te chu a zui chhuak ta a.

Chaw ei pawh ka chak fahran lo hle mai. Han eiloh ngawt lah chu a ni mang bawk silova. Pu Rawna te kawmchhakah chuan țhiante chaw min dawhsak chu ka khel ve nuau nuau a. Ei thei vak pawh kan awm lo, kan nawi tlang deuh a ni ange.

Rinpuii pawh chuan min rawn ngaihven lo a niang chu a reh zui ta hmk bawk sia, ka ngaihven zui ta bik lem hlei lova. Lalrova inlamah bawk kan va inhnawhkhawm leh pek a..

"Zanin chu Rinpuii maw kan rim dawn a, kan la chhuak ho miahlo a nia zan lam hi.." 

"Peihawm loh ve" ka lo tih sak a.

"A rim pawh ila rim reng reng hleinem a, makpa interview te i neih ve loh te chuan"

"Ni ang hmiang, kan va tla han han anga nimai lawm" ka nui hak a.

Kan ti leih leih a, khua a thim chhawm chu a ni mai a, Lalrova țhiannu thingpui senhâng lum te kan in zawh hnu chuan sumo pawh ruai tawh lovin Upa  Ramnghaka te in lam pan chuan muangchangin kan kal chhuak ta a.

Tunhma pawha kan lênluh ve fona a nih avangin tun a takah han huphurh thar chiam tur kha awmin ka hre lova, kan kam nam leh phur lutuk chu inkhap deuh kan ngai maithei ni. Chaweikham lamah an tauh leh nual bawk si. 

Chhuana'n hma hruaiin a han kik kauh kauh a, "Lo lut rawh u" tih thawm kan hriat takah chuan kan inzui lut ta țham țham a, an țhutkhawmna pindan lamah chuan an lo țhu țhap a, "E in inkhawm elo!?" Chhuana chuan a han ti hel hawl a.

Pu Nghaka chuan, "Nia hei, kan lo țan dawn chiah a, lo țhu ve nghal mai rawh u, a rei lovang" a'n ti zet chu tukkhum a hit mam mam mai alawm le. Chhuah leh ngawt a chi tawh mang bawk silo. Ka alh phut maithei ni!

Țhutkhawmna pindan lam ep, choka lam ni deuh bawk si-ah chuan tawt zetin kan țhukhawm tât a, a lehlam zawng taka ngaihtuah chuan a nuihzatthlak angreng. Upa Ramnghaka lah chuan a urhsûn vei phian reuh bawk sia. 

Han mitthla chhin mahteh puitling țhe țhaw, hawklak zet leh ruiphur bawk si te țhutthleng pakhata naupang fel ang maia an han țhu țhap mai tur chu. Maimitchhing hlawm tak mawle ka țhutpuite ho hi..

'Amen' kan han ti chiah chu saphing hampuar hawlhthep ang suai suai alawm kan nih le. Huai tak ei..

"Kha Rina i țha zel amaw?" Pu Nghak chuan a rawn ti a.

"Aw, ka țha tawh khawp mai hei.. " ka lo ti ve mai a.

" A țhat nasat chu, thir te an phum awm sia, zai țhat leh a ngai dawn nimaw?"

"Nia, kumtawp lamah chuan zai leh a ngai ang chu"

"I khawilai tak nge ni reng reng?" duh aiin a dilchhut mah mah a ni. A rawn kal hnai bawk si, ka țhiante ho chu an thaw țha ngam pawhin ka ring lo.

"Ka khup chung chiahah hian, maltê lai hi nia"

"A nih chu, i khup ruh te a ni ang tih a hlauhawm hle mai, khup ruh chhe tawh hi chu an pangai thei tak tak țhin lo, vanduai rau rauvah chu a la zia viau chu tiraw.."

"Nia, a ziaawm khawp mai"

"A sutu che lamin an rawn buaipui che em?" a la ti tak deuh deuh ah!

"Umh..buaipui e, min ngaih ven khawp mai a inthlahrunawm zawk alawm mawle" ka ti mai a.

"A țha leh zel a nih chu... Khawpuia motor khalh chhuak ve si mite han sut khut khut mai chu a khalh thiamlo tawp a nih chu..." ti nung nung pah chuan tuidehna lam a pan a.

Chu țawngkam chuan ka thin a khei zar mai thung.

'A ve mai mai mai che chuan, nang aiin thiam a ngah fe ang chu' tiin ka rilruin a thlavang ka lo hauhsak mawlh mawlh a.

Chhung inkhawm boruak a reh țan deuh tawh a niang țhianteho zia pawh a chhuak țan ta, țhutkhawmna pindanah chuan TV hmachhawn chuan mahni vei zawng zawng an sawi leh țan a. 

A unaupa a chhuak a, a pa pawh rei rial lovin a chhuak ve mai a, a nu chuan tapchhakah țhuthluang diai hian vaihlo a zial thung a, țhiante chîm chin sang lutuk chu ka inthlahrung angreng hle mai a. Anni lahin eng he hu-ah an ngai bawk si lo.

Tapchhak lamah Rinpuii nu vaihlo zialna bulah chuan ka va țhu phei a, kan ti ti dun ngial a, ka zirna chungchang te, ka chetsual dan te chu ka sawi na sa mai.

Ani pawh chuan rei a daih bik lo, "Ruatdiki pa te inah (lungphun tute kha) ka va lan ve loh chuan, a pa lahin min kalsan daih bawk sia" tiin a vaihlo zial lai chu rapchunga dahin shawl a bat a, a chhuak zui ve leh mai bawk sia..

"Thingpui kan chhuang ange aw" tiin Rinpuii pawh chu a lo țhu phei ve mai a, a hmel chu a tak ran mai a, ka bula awm chu a chak hmel fahran loh khawp mai.

"Nge.. ilo tum bur a?" ka han ti chu ka chhaihkawlh hi ni ringawt. 'Ve a che' tih melh hian min melh a, "Rui chunga in lo leng hi a lawmawm i ring a mi?"

"Eh..kan lo leng hi i lawm vak nange chu?"

"Rui chunga lén a ngai hleinem, vawiinah pawh kal suh ka ti mawlh mawlh a, i kal lui a, ruitawkin in lo haw a, mi pangai tan chuan a zahthlak ve asin"

"Min zahpui ni maw chu.."

"Hm...a! Ninawm, min ngai pawimawh lo bawk si, kei chu hahthlak ka ti nia" 

"Engnge hahthlak?"

"Ka thusawi i ngaipawimawh lo bawk si, engahmah min ngailo tih a hriat reng alawm"

Haire hai! Ka game-ah a lut e....

"Zu in i chin phei chuan a țha lo khawp ang" a ti hlak hlak a.

Țhiante thingpui a pe zo chu ka bulah pawh țhu duh lovin țhutthleng hniam țhutin tapchhaka meialh lam chu a melh ngar mai a, a sam a zut a zut a.

"I lakah zahawmin ka awmlo a ni mai thei, nang tal chu zahawm takin awm ta che" a la ti.

"Nun te chu duh dan dana thlak ngawt theih a ni hleinem" ka ti a.

"Tum chuan a theih tur a ni"

"Tuna ka nihdan ang a min pawm lo a nih te  chuan keichuan tihdan dang vak ka hre lo"

Chhanna ka beisei tehlul nen engmah ka dawng ta lo. Țhiante hovin min rawn kil hnai ve ta bawk nen titi dang kan vawrh ta daih kha nia.

Chumi ni ațang chuan harsatna dang awm hauh lovin kan in hnim hnai ta lo. Engmah a sawi lova, keilahin engmah ka sawi bik hek lo. Kan ințhațhen a ni ta ber ang chu.

Țhianteho an inhuam viau nain kei berin ka um e tâk silovah chuan kan boruak chu a dai hlen dawn a nih hmel viau mai. Hmelțha leh fel tak ai chuan duhzawng ka dah pawimawh hmasa zawk pawh a ni ang e.

Hun a liam chak phian mai a, thlaleh leh pek ni 24 a tih kha a hnai ta riau mai! Thawm engmah a rawn nei bawk silo. Keilahin ka be hreh tawh bawk si. 'Pasal neiturin a rilru a siam fel ta ngei a nih dawn hi' tiin rilru buai tak chungin ka ngaihtuah fo țhin a, midang hriat tur khawp chuan ka lan chhuahtir lo chuan ka hria.

Harsatna nei lutuk lovin tiang satliah deuh tak nen pawh ka leng kual vel thei tawh a, hnathawk theilo na na na chu vengtawp lam thleng thleng chuan ka lengkual ta țhin a, zuin ka ching ta viau, a țha lo hle mai a.

Ni 24 a lo thlen chuan ruih chhum hmawk tumin ka vak chhuak a, engtizia nge maw ni tehreng ni nidang zawnga ka inna țhin te chuan a tu a mahin an nei reng reng lo mai a, ka hawi riau riau ringawt a ni ber mai.

Khawchhung dep a YMA Reserved ngâwah chuan ka kal phei a, ngaw dai ruih mai leh sava thawm nen chuan a nuam phian mai. Shed an sakah pawh chuan awm duh lovin lungpui chungah Zawng kahthlak ang dêr hian ka mu a, awmdan tur pawh ka hre ber lo. 

An in kutsuih tawh angem le! 

Chutia inngaihtuah buai vak vak chu a sawt bawk silo. Muangchang chuan inlam pan chuan ka haw leh ta a, a zawi theih hniang hniang tak e maw..

Khumah chuan ka mu zawi leh ta tlân mai a, mutthilh chu khawilam hi niringawt, kan thlalak dun ka charkhawm leh takngial pawh chu ka thlir ngam ngang lo a ni.

Ka pa school a lo bang a, ka awmdan chu a hrethiam deuh a nih ka ring min rawn be lûm lâm sek pek a!

A hnuah phei chuan "I nu hi a phun sek mai a, tlangban kan zar sak ngang mai dawwn emaw ni le, i peih em?" a ti a, mahni a inngaihtuah vak vak aichuan a nuam deuh ang chu mawle.

Kan pa fa chuan kan kawtzawl ah chuan tlangban ban phunna tur chu kan cho dun a, amahin a cho a ka lo en a nimah zawk e. Ka nu daihnai kal pawh a lo haw ve ta bawk.

A ban kan phun fel a, a hrui kan pawt țan tih chuan kan kawtzawl luhna tur gate bulah chuan Lalrova Sumo chu pawthûr hian a lo ding su laih a, a tu a amah chu an rawn chhuak mang bawk silova, reingial ka en hnuah hmeichhe pakhat, vai puannema lutuam bar mai, Sunglass bun va mai hi bag khai nen hian a rawn chhuk a.

Kan gate-ah chuan lo lutin ding meuh chuan min en a.

Hm.. Angela-i maw!!!!??

                          Chapter

                              - VI -

A sunglass chu a han la thla a...

A bag khai chu a thlauh tawp a, a hmai a hup zui a..

Ka pan phei a ni tih ka inhriat hmain a bul ka thleng der tawh! Ka kuahlo thei lo, Lalrova'n passenger engzat nge a neih tih leh ka pa mitmei meuh pawh chu ka veng zo ta lo a ni.

Țahchhuak insum tih hriatreng chuan a khur dar dar a, nghet takin kan inkuah vawng vawng a. Ka mittui chu tla em lo mahse a parawl kuang ang chu mawle.

"Rin, i bulah ka awm duh"

"I awm dawn, engmahin min dal thei lovang..." ka hnuk a ulh zawk mahin ka hria.

Lalrova'n bag khai chunga min rawn kal pelh takah chuan midang kan ngaihsak lo tih ka hrechhuak zawk a, kan inkuahna chu thlahin a darah ka dawm sak a. 

Ka pa pawh a rawn thleng phei ta. 

"Fapa.. inchhung lama luh a hun e" 

Chu țawngkam chu ka va'n dawnglo reitawh tak em! Ka tetlai khan min koh țhin a, min hmangaih tih ka hre țhin si a..

Ka nu hrilhhai leh makti hmel zeta veranda a lo ding chu kalpelin inchhungah chuan kan lut ta a, 

"Ka va intifel hmasa ang a, ka rawn phei dawn nia" tiin Lalrova chuan min chhuahsan leh mai a.

"Mami i chau em? Kan kawngte hi a țha mang silova tunlai chu zin a hahthlak a nia" ka pa chuan a han ti a. Helhkam nei țeuh hmel erawh a pu thung. 

Ka nu nen chuan an han inchibai țha leh rih a, boruak chu a zangkhai fahran lo khawp mai. Sawi tur a vang a, bulțanna tur ber hriatthiam a har tak zet. 

Ka pa bawkin ruahmanna a siam thiam leh pek, "Han inthlak sela chawl hahdam rawh se, a chau ang" tiin.

Ka roomah chuan a bag chu khaiin ka luhpui ta a. Ka nu nen chuan eng thu tak lo sawi ang maw.

Bag ka nghah hma hma chuan min kuah țha leh a, min fawp a, min chul a, min hrawm nawk nawk a ni ber mai. Awmngaihna a hriatloh tluk zetin awmdan ka thiam bik hauh lo!

Mittui parawl deuh kiang, hlim hmel tak bawk si a min chhoh en hâ mai chu kei rinna lama pachhe ve tak mai hian ka tuar hleithei meuh lo chu a ni e. A thawmhnaw thlak tur pawh chu a sawt lo viau reng a.

A inbualzo room a a lo luh lai chuan ka lo mu zal a, a țap a ni tih hriatreng chuan a mit chu a sen râm a, amah pawh a taksa a tla ve deuh riamin ka hria, cher chhia ti a han sawi tur phei chu a ni chuang lova, amah lo hmutawh tan chuan chu thil danglam chu haider harsa tak tur a ni.

A in tihfel khat hnu chuan ka khum tlangah chuan a rawn țhu a.

"Rin"

"Umh.."

"Vawiin hi ka pasal neih ni tura ka sawi kha nia.."

"Ka hria lawm, i pasal tur te inah chuan i lawi ta ngei alawm hei.." ka tih chuan lungawi hmel takin a nui ver ver a.

"Ka awm thei ngang lo a ni. Hetiang thleng thlenga mualpho phah tur che hian ka inring ngailo asin mawle..mahse.."

"Mahse, chu..?"

Ka bulah chuan lo muin ka nghawng a kuah chial a, a rimtui inhnawih leh a huhâng mawlh mai chuan min la timûr ur ur hial nia..

"Damdawiin Cabin-a ka riahpui ațang che khan ka rilru hi a danglam nghal vek"

"Chu ka lutuamna an phelh meuh chuan hmelțha min ti a ni maw"

"Naaa...(ka beng a seh zauh a) chulam chu ni pawhin ka hrelo. I țawngkam te, mi i treat dan te khan min hneh niberin ka hria..tunthleng hian a chhan ka la ngaihtuah chhuak zo lo"

"Țha min ti nih chu...sawi zahvak tur a ni hleinem" ka tih chuan 'nia nia nia..i țhaber' tihpahin min kuah chaih chaih a.

Engkim mai chu Herâwt a saum tah ang mai a ni. Sawifiah vak ngaihna pawh ka hrelo, a ni miah miah a ni tawp mai! A sapțawng a 'feeling happy' ngei mai kha..

"Engtinnge kan awm dawn..?" a ti sap a.

"Helama ilo kal dan leh i chhungte rilru sawi phawt teh" ka lo ti a.

"umh... inneih țhulh mai ang ka tia, Mawitea bulah pawh ka ti thova, a chhan min zawt a, nangmah nen kan lo inngaizawng chiah bawk silova chhuanlam vak tur ka hre lova ' ka rilru buai, harsatna ka nei' te ka tia, an pawm lo aniang, inbuatsaihna an kalpui zel bawk si a, 'ka nei dawnlo, ka duhlo' ka tih pawh an awih duh lova, ka chhang chiah hi nangnena kan inkar ka hrilh vek a awm a, nizanah i bula kal ka tum thu ka hrilh a, a ngaihdan chu a ni vak bik lova, mahse, min dan a tum bik chuang lova, 'ka nu te ilo hrilh mai dawn nia' ka tia."

"Chuan...?"

"Nimin tlai khan Lalrova kha ka be lawk deuh hrim hrim a, zingah kan in piah deuhah min lo nghak a..."

"Lalrova nen khan in ni ve deuh a nilo maw, a hma paw'n in inhmu țhin tih ka hre reng ania.." ka han ti chu a run khawp mai. Ka bânah chuan a chum taih taih a.

"Â pute, ã puin a koh che.." tiin ka u fanu chuan min rawn au lauh a.

Ka chhuak tur chu a chungchang sawi ngei turah min ngai aniang, a mang ang deuhin ka hria. "Ka lo kal ve a ngailo mi?" a ti reuh a. Rilru a ti nuamlo lek lek a ni.

Ka pa bulah chuan ngawirengin ka va țhu a, "Mami nu te ka zuk bia a, an lung a awilo nasa mai a, lungawithlak tak a ni hran lemlo bawk a. Naktuk lamah hruaiturin rawn kal chhoh an tum a nih hmel. Eng pawh nise, chhungkuain zanin lamah han sawikhawm phawt ila, i pa Thanga te ho nen... țha kan tih tlan ang ang chu in zawm a ngai dawn a nia, in duhthusam ang kher pawhin thil a kal lo maithei a..."

"Mahni duhna leh țha tih zawng ngawt awn lovin, chhungkaw thutlukna ngaih pawimawh i tum dawn nia, in tana țha lo tur chuan kan ngaihtuah hauh lovang tih ring la " a ti a.

"Pa, engnge i ngaihdan ni reng reng..?" ka lo ti daih a, chiang kek kawk chuan min han en te te a, "Damdawiina i awmlai ațang daih tawh khan hetiang boruak hi innei tih ka hre daih tawh. Beng daih che ka'n tum viau a nia, Rinpuii lah i chhuah leh mai bawk si. 

Heti khawp hian mi sawi leh tlangthan pawh huamin a rawn um zui che a, nang lah i țang zo a ni heklo. Chhuanlam ila siam a nih teh chuan i pa hian 'ka pa' tia min koh kher ka phut tawh lovang..

A nih tur ang leh mualphona zawng zawng huamin a rawn chhuak a, kan inah a rawn tlulut a, keni tan chhungkawpa mah niila chuti khati lo tih a rem lohna chen a awm a, i kutah a innghat tam ber.

Kan chhungkaw zahawmna thlenga nghawng thei thil a ni. 

Inchungchang ngaihtuah fel tur hian ka ring tawk che.." a'n ti zet chu pa te mah ni se kan fawp lo chauh alawm mawle.

"Ka hre ve châk e" khuma mu zawi nan chung chuan a lo ti var a. 

"I nute ka pain a lo zu bia a ni awm e, naktukah lo chhoh an tum a niang"

"Engtinnge niang Rin?? A! An lo chhoh chuan....mawhh?" a ti sek sek a.

"Hlauthawng mah ta che, engkim a țha vek ang"

"Mahse... ka hlauthawng a nia, i pa in engtinnge a tih?" 

"Zaninah chhungkhatho an inrâwn khawm ang, hlauthawng lo la, ka bulah i awm tawh kha.." tih pah chuan a lu chu ka awmah ka beitir a, ka chul hauh hauh a.

"Hei kan beisei phakloh tawpin mami vawiin lamah kan hnen a rawn thleng hlawl mai a, vawiin lamah hlimtakin pasal a nei ang chu kan tih vei nen. Amah erawh chu remchanglo te pawh a awm a niang e tiin pawm mai ila a țhat ka ring.

Mami nu te pawh ka zuk be tawh a, an beisei loh dan anga thil a thlen avangin an  lungni chiah lova, amaherawh anni pawh an rilru a dam chhawm ve zel turah ngai ila, naktuk lamah hian helama rawn chuan chhuah an tum dawn a nih hmel a, mami tan pawh awmdan a lai thei viauin ka ring a, amaherawh chu helaiah, kan in i rawn deng ta rau rau a nih chuan nangma thu lo chuan an hruailui lovang che. I kiangah kan awm dawn a ni tih hre reng la. Chutih rual chuan ngaihtuahna fim leh puitling zawk hmanga in chungchang erawh hi chu ngaihtuah uluk turin kan inhrilh ni ta sela, keini'n chutiang khatiang chuan awm rawh u han tih ngawt che u hi nakina hun lo kal zel tur atan thil țha ber a ni lova. Chuvangin in hmalam hun tur ngaihtuah rana thutlukna in siam thiam a pawimawh hle ang.

Zaninah chhungkhat kan han inrawn khawm ang a, naktuklama i chhungte lo dawnsawn dan tur te pawh ngaihtuah a ngai ang a, an lo ling chho viau a nih phei chuan harsatna dang te pawh a awm thei a, engemaw chen kan lo ngaihtuah lawk a țhat kan han ring deuh a. 

Engpawh nise, thlabarin han awmlo phawt ula, țha tak leh tluangtakin in kawng hi a kal ang tih beisei tlat ula a țha ange..nupa in la nilo tih kha han inhre tel bawk ula a țha awm e, kan țawngțai ange" tiin ka pa chuan chhung inkhawm kan hmannaah chuan hun a hmang a. 

Zanah chuan Bedroom lamah kan awm san daih a, kan chanchin leh Angela-i lo chhuah chhoh dan nen lam hretu Lalrova a awm tho avang chuan kan awm ve țul berin kan hre lova.

"Tunah chuan ka rilru a nuam huai tawh" a rawn ti chhuak hlawl a.

"Hm..?" Ka lo ti ringawt a.

"Chhung inkhawma i pa thil sawi kha mawle, i pate hian haw leh phawt mai rawh min tih tlat ka hlau ber a"

"Chu keima'n ka hawtir thei che tih i hre ve nange!?" 

"Tumbuai lo mai la ava'n țha zawk awm ve.. Kei aiin i buai zawk palh ange" a sawidik fu ang ka ring.

Bedsheet chuar a siam țhat na lamah ka thlalak charkhawm kha a hmuchhuak ta nawlh mai a, a thil tihlai pawh chhunzawm ta lo chuan a thlek veng veng a. A mittui a hruk zauh takah chuan ka lo thaw huai a. 

A bag chu a hai zui rak rak a, thlalak pakhat hi min pe a, kan pahniha kan thlalak dun tho, ka neih nen a copy in ang a ni. Thilmak zet ka hmu ve tlat mai le!

Chu thlalak chu a laitakah pawhthler a, char zawm ve leh tho a ni! Kan rilru kaldan in ang lutuk chu a mak zawk hial!

"Min theihnghilh chu i tum nasa ve hle mai.." a ti sap a. Ka kawngah kuahin ka kokiah chuan a khabe a nghat a.

"Engtik emaw lai kha chuan keipaw'n ka tum ve alawm. Mahse, thil awmze neilo ka ti a ni tih ka hrechhuak a, ka duhna leh beiseina tipuitling turin theihtawp ka chhuah a, helai hi ka rawn thleng tawh. A bak hi chu ka mawhphurhna piahlam niin ka hria.."

"A dik alawm. Ka tih theih zawng zawng ka ti ang, ka nun hian tuar hial dawn mah se..." ka tih chuan min kuah nghet sauh a.. a lungphu chet dan zawng zawng nen lam chuan ka țawmpui ta vek hialin ka hria.

"Ka nu mizia chu i hriat tawh kha, țha taka a rawn dawr che u ring lo la, amah hlau leh zah ni awm taka dawr chi a ni lova, a pawng tial tial a ni mai. Ngam deuha hmachhawn a ngai a nia ka hrilhlawk che nih chu" 

"A sam a kir emai, ka lo kek hrep ang." Nui  chung chuan ka han ti a.

Nui var var pahin ka hmuiah a fawp zauh a, "ih maw.."a tih chuan ka chhang lo.

"Aw lo ti ve la..." pangchang tak chuan a'n ti leh rih a.

"Aw.." ka han ti fân raih a.

"Thil engpawh hi i dawngsawng thiam em em mai hi a mak ka ti, i puitling bik e" a ti a.

"In pawihfak a ni lek lo maw?"

"Ni hran lo, ka ti tak tak lawm. A dik chiah chuan Damdawiinah pawh khan min ngainat vak kha ka ringlova, ka mawhphurhna a nih avangin min thlirdan tur chu engpawh nise ti kha ka nia. Mahse, kei ai aiin ka lakah i lo luangliam hmasa zawk a..!" a nui deuh..

"Chuta karah bialpa ka nei laklawh te ilo ti kawi ve khanglang a.." ka ti ve a.

"Hm.. Ka riahpui hmasak zawk zan ațang che khan ka rilru ațangin lakbo ang hmak  ni. Ințhen ang ka tia, innei mai tur inberem vek tawh kan ni bawk si, a duh der bawk silo. A inngaihpawimawh luatah thutlukna a siam sual ta a ni"

"I khawngaih em?" ka lo ti hmanhmawh a.

"I ho e a" tih pah chuan dingdihlip âk chungin min rawn fawp vawng vawng a.

"Mo thar hmel kan hmu chak e" tiin Lalrova chu a lo lut a, kan in thlahfel hman lo a chha chu a ni e. Khumbulah chuan ding chungin kan lo la inkuah ran a. A rawn nui lut ruh ruh a.

"Saw, mothar hmel an hmu chak a nih chu i patea tehovin" a ti a. 

"Naa..zahthlak awm e.. mo pawh ka la ni chiahlo!" hrilhhai hmel putak chuan a ti a.

"Mi khual pangai i ni chuang hleinem, va kal mai mai teh.. nupa hman theih ang zawng zawng hman hnu a ka zak te han tih leh" a'n tihsak zui a.

"I chhe zet zut e mai a...engtin mah kan la awm bawk lo aw" a sam huihțhat mawlh mawlh pah chuan a ti ve mai a.

"Kal ila a nimai lawm" a han ti chu Lalrova chuan a lo la fuh pek a, "Ham ham che chuan a..." an ti zui a. 

Kan chhuak zui ta nghal a.

Ka pate unauho leh ka nu u mipa hi an lo awm a, inhmelhriattirin an han inchibai kual dan dan a. 

An ri hlut mai.

Ka pa bulah chuan a ngampa ber a niang chu a țhu tharh a, Chhuana te ho an lo lut ve bawk nen chulam ngaihven chuan ka pen san a. Choka lamah chuan kan țhianho chuan awmin kan ri ham ham reng a.

"A su hlum ang che tih a lo hlauhawm a nih saw mawle.." Chhuana chuan a'n ti pek a!

"Keipawh ka in suttir huam khawp mai, a hnu leh boruak tur thlir ranin" Mama meuh pawh chuan a rawn ti ve bawk a. Kan thawm a țha tlang teh a sin.

Lalrova'n Angela-i chu a han koh phei a, Chhuana te nen chuan inhmelhriat tirin, "Hengho hian a lawm ngaihzawng a nei Aizawlah ka tih ka tih paw'n hetah ngaihzawng tur an lo zawnsak phet a.. ka thin a rim theih zia mai chu a..." a'n ti zui ngeiah!

"A ni mi?" tiin țhian te lawm tur zawng tak mai chuan min han chum taih a. 

Chhuana hmêl pha dai mai han hmuh chuan a nuih loh theih loh. 

"Nakinah a bialnu chu kan la rimho dawn nia" Angela-i'n an ti zui phei chu an lawm kher asin. 

"In inngaihzawn dan hi ana emai, kei chu ka zuam lo" Chhuana chuan a han ti a.

"Tiang hi a nghet duh phian asin!" a lo ti mai a.

"Kawngpuiah duhzawng a hmu a, a en vung vung a, a'n sutlu ringawtah! Lawmawm loh viau a ni, ka ni ang tih ka hlau a nia keichu" Lalrova chuan a lo tih zawm bawk a. 

"Khatia ka tih mai loh te chuan traffic-in kal turin min lo hui tawh bawk sia, biakna hun ka nei dawn silova, ka changlo takngial dawnin ka hria a lawm" tiin anmahni ai uang uang chuan a chhang ve zel a, kan boruak a zangkhai viau a ni.

Lalrova uang laklawh chuan, "Rina hi vawikhat chu a lo țap karh karh a,  ka va kal a, hnem dan vak ka thiam bawk silova, nuthlawi hnute lian deuh kha ka'n sawi pui mai chu(h)! 'Maw maw maw' a tia, a hawi nghal hru hru mai a, a lawmzawng hi chu a hriat ve a nia aw" a la ti zui a!

Țhiante ho an țin hnuah chuan chhungkua chuan reivaklo kan la titi zui a, kan nau awm ve chu a pite bulah mu mai se, a room chu Angela-i'n luah lawk mai se tih te kan sawi nual mai.

An mu ta chhungte chu.

Sitting roomah chuan kan țhu dun ren rawn a, chutah a bag leh thawmhnaw vel chu a room tur lamah chuan kan dah lut a, mu ta mai lo chuan ka room lamah chuan kan lut leh a.

"Ila bai nasat viau ka ring a nia, ka rin aiin i țha chak daih mai. I nâk vel kha engnge an?" tiin ka t-shirt hak chu a hlim sawt sawt a.

"A țha viau tawh e, thlahnihna chamah khan a tuamkhawngna kha kan phelh a, ka ke lam hi chu ka la tuam bur mai"

"A nih hi..i nâk chu ala na em, kalh zek zek ang chite kha awm em?"

"Awm pawh ka hre lo, a pangai viau tawhin ka hria" ka ti ve leh mai a.

"A nih i bialnu chu..!? Thutak hmel fe, nuihza angreng bawk si tih hriat reng chuan min han zawt thut a.

"Haha..an uang mai mai nih kha"

"Țhian ten an uanpui hi a lo dik nulh duh asin, " a la ti zui.

"Hei ka bulah i awm reng alawm, nge midang ngai.."

"Kan la inngaizawng hleinem, i bialnu angin min chei ngawt suh aw..." a'n ti zui zat a.

"Chutiang a nih te chuan i room lama i mut mai a va hun tawh si ve.." ka ti khauh a.

"Naa...titau țan dawn e... i bulah ka riak dawn, pasal ka um hi" a'n tiah!

12 bawrah chuan a room lam panin a kal chho ta a.

Ka bula che sat sat chuan min ti harh a, ka men chuan Angela-i chuan min lo nuih ver ver a, "I mu rei bik lutuk tho tawh rawh" a ti sa sa a. Chutia ti e tilo chuan amah zawk chu ka mutnaah chuan a rawn inthawlh țha sawt sawt lawi bawk sia.

A hmuia fawh ka han tum chu ka hmui a hup tlat a, "I kâ a tui awmlo emai, tui in phawt rawh" a ti teh tlat a. "Min va suah la" ka tih chuan 'aih' a ti lawi bawk sia. 

A țang tlang ngam ta lo. 

Chhunah chuan kan in awm nileng a ni ber e.  Hlim viau mah ila tlailama lo thleng tur te chuan rilru a kap lo thei lo a ni.

Ka pa school bang a rawn thlen hnu lawkah Pa Thanga a rawn kal bawk a, boruak in mûng chho țan chu a hahthlak viau mai. 

Room lamah awmbo reng lah chu a ni ber bawk si lo, rilru tawt zet chuan kan veichhen a ni ber mai.

Naupang hovin kan kawtzawla ball an pet chu kan thlir dun ta reng a, naupang hlimtak maia an ri chel chul mai chuan rilru an chhawk viau a ni.

Chutih mek lai a Bolero dum kan gate bula lo ding su zak mai chuan ngaihtuahna a la zo nghal vek a, eng thlipui nge lo thawk ang tih ngaihtuahna chuan min insehruh tir lo thei lo a ni.

Motor thawm hriain ka pate pawh chu an lo chhuak var a, Gate a lo lut mek sam kir bep bup nu chu kan thlir țhap a...

                         Chapter

                            - VII -

A lo hnai zel a, mautlawn chuan a hawlhphak tawh ang tih awm vel a lo thlen lai chuan ka pa chuan, "In rawn tluang maw?" tiin a lo chiau au a.

Chhan pawh chhang ta lem lo chuan, " Lalmuanpui, i lo va han nasa em em ve. A zah pawh i zak chai lo mi a..." a rawn ti nghal tawn tawn ringawt a.

Ngawireng chuan kan lo en ringawt a.

"Mi i tih zah zia hi i hria em? Engzatnge nangmah vanga pawisa kalral zat te hi i ngaihtuah em?" Huiham, buan buan mai a! Angela-i chu inchhunglama luhpui ka han rilruk zet a, mahse a chhungte chu kan chhaihkawlh mai mai ka hlauh avang chuan a nih nih nitlang law law tur chuan ka luhpui duh ta lova. A mangang hmel chu a khawngaihthlak tak zet.

A pa leh mipa pahnih te pawh chu an rawn thlengphei zui ve nghal mai a. 

"Tirawh u inchhunglamah i lut ang u, pawnlerah zawng a dik love" tiin ka pa chu a lut nghal a. "A luh pawh ka lut peih hrep love" a la ti tak buan buan a.

Lût peihlo na na na chuan sawmluitu hmubik heklo kan luhsan ta diak a, a hnungbera lut ka ni bawk a kawngka chu kan  khar hmak mai a leh! A hawi lawl lawl ta ve ang.

Pa Thanga chu a ding a, "Hei vawiinah kan lo ngaihtuah lâwk ngai loh thil kan chungah a lo thleng a. Engtia hmalak tur nge pawh kan hrethiam lo viau a ni. Mami nu leh pa tan chuan inchunga thilthleng hi hriatthiam a har viauin a rinawm a,  chutih rual chuan keini lam ațang erawh chuan hetiang taka kan chunga thilthleng hi han lawm loh zia a ni lova, kan dawnsawn dan a in anglo viau in a rinawm a ni. Engpawh nise, ngaihtuahna fim tak kan pu turah ngai ila a țha ange.

Thu in rawn ken emaw induhdan te, inchhungkaw lamin ruahmanna insiam ang te han hriat hmasak te pawh a țhat a rin awm a, chutiang tur chuan ngai bawk ta ila a țha awm e. Chutih rual erawh chuan hei hi min hriatsak hmasa ula kan han duh chu in fanu hian kan in a rawn deng ta rau rau a, mawi lo taka inhruai haw luih emaw hnehlak emaw zawng kha chuan ruahmanna han nei lo hram ula, a theih hram chuan tlawmah la lova ruahmanna kan siam tlan a ngaih hmel a ni. Engpawh nise, Mami pa te lamin ruahmanna inneih ang te han hriatte pawh a țha ang chu...țhu chung te pawhin titi phungchang deuh te pawhin a sawikhawm theih ang chu mawle." a ti a.

"A! ruahmanna han siam emaw kha kan nei hran lova, kan rawn kalchhan ber chu kan fanu hruaikir kha a ni mai a, engtin emaw han tih vak kha kan nei hran lo" Angela-i pa chuan a ti a. A nu ang buan buan chu a ni lo deuh.

An makpa senior zawk niawmtak chu a lo ding a, "Hei, helaia kan rawn lan chhan chu in hre vek a, rilru takah phei chuan inhruai chhuaha a zan la la a letthlak leh mai te pawh a awm rum rum a, amaherawh chu helai kan lo thleng a kan rin loh ang deuh maiin puitling zawkina an tih tur awm rengin min lo dawng sawng hi mak kan ti a, kan lawm hle a ni tih kha minlo hriatsak ula.

Ngaihtuahna fim pawh puhleitheilo leh thinso butin kan rawn chho a, kan dinhmun hrethiam tak leh mualphona thlen tam lo zawnga in lo kalpui thei hi keini tan pawh zirlai pawimawh tak a nih ka ring.

Sawitak ang khan kan lo kalchhan chu Mami hruaihaw kha a ni mai a, helaia a rawn chhuahchhoh dan te hi keiphei chuan tlaikhawhnuah kawnglakah ka rawn hre chho chauh lehnghal a, Aizawl lamah te khan lo hre mumal hman ni ila chuan kal pawh hi kan lo kal a țulber lo mai thei a, ani pasal nei tur lo ru chhuak ang thawthang khan ka bengah a ri deuh a, chutiang tehnuaih chu kan nih vangin thumum tak han neih pawh kan harsat viau a, chutihmeklai chuan kan nau leh kan fanu a nihna angin hetah pasal neih a duh emaw duh lo emaw pawh nise anmahni inlum ngei rawn thleng leh phawt sela, khulamah nise inberem vek, țhulhna thu sawi awm chuang bawk silovin kan rawn tlanchhoh san a ni a, chu'ng te pawh chu palaite tirin han tifel sela, anni hmalam hun hi chu muangmar deuh zawk pawhin a la ngaihtuah theih ang chu ka han ti deuh a ni" a ti a.

Ka pa din a tum laitak chuan Angela-i nu chu a rawn lut leh lawi a, "Engnge sawi kawi duah a ngai a mi, Lalmuanpuii kha rawn hruai ula a tawk a ni mai alawm" a la rawn ti tun tun a.

"Khai han țhu hahdam ve phawt teh, a zaizap zawng deuhin i ngaihtuah ang u" ka pa chuan ding lemlo chuan a ti a.

"Engnge chutiang ngai, kan fanu a nia kan duh hun hunah kan hruai ang chu nangni lo intihthuna chhan tur a awm hleinem" a nasa ve khat e.

An rawn kalpui pakhat chuan bengdaih an tum ngial nain a bengdai hleithei meuh lo chu a ni e.

Rapthlak a ti deuh a niang ka nu chuan ngawirengin Angela-i chu ka room lamah chuan a hruailut daih a, chu chu a nu chuan a run ngang mai le!

"Min va zahlo em em ve, Lalmuanpuii a tette ațanga enkawltute in ni a mi? Lo haw rawh se kan tih chuan lo haw se a ni mai, nangni lo inrawlhna tur chhan pakhatmah a awm hlawllo" a ti leh ta phiar phiar mai a. A pasal leh midang țhu ve ho chuan hawi ngaihna an hre vaklo, an țhu kunlap mai a, an chhungkaw zia tur awm ang chu a lang fiah viauin ka hria.

"Hruai in phalloh leh police kan rawn ruai ang a, in vai hian an khawm dial che u anga ni mai lawm"

"Eng police pawh rawn tir rawh. Ka inchhunga himna zawnga rawn tlanlut hi an nawma mâk chuan an hnukchhuak lovang. I fanu hi naupang a nilo, a duhthlang turin puitling a nihna angin zalenna a nei ve bawk. 'Ka chhuk a nge' a ti a nih loh chuan ka thawk țek țek chhung hi chuan inlak luih a rem lovang. Chhungkawpa helaiah hian ka ni ve bawk. " ka pa chuan a rawn ti khawl mai a. 

An makpa kha a lo ding thuai a, "Ngawiteh u khati zawng kha chuan kan boruak a kal dik dawn hauhlo a nia, a țha zawngin i ngaihtuah hram hram ang u, " a tih meklai chuan Angela-i pa chuan a nupui chu kawngkalamah alo chhuahpui mek bawk a, a hreh hmel țang țang e maw.

"Ani kha chu hmeichhia tihtakah hriatthiam a ngai țhin a, lunglohah in la bik em lovang chu. Hmeichhia hi zawngin an ngaihtuahna lailum te bak hi an thlir tel thiam țhin lo. Eng pawh nise, thlenin tur lam kan han pan ve phawt ang a, zanlamah thathara ngaihtuahho leh turin kan rawn kal leh zawk dawn a mi niang?" a ti a.

"Eh..thlenin tur te innei em ni?" Pa Thanga chuan a lo ti a.

"Aw nei e, Dawrkai țhin Pu Ruata kha..ani kha min rawn dawrna lama inhre țhin kan nia, zankhat chauh chu min mikhual thei turah kan ngai a.." a ti ve leh mai a.

"A nih tak chu in inthlahrun tak a leh kan inlam te pawh a remchang a nia, ro han rel te pawh a samkhai phah phian maithei asin. Pu Ruata in a lian vak lêm silova, tu emaw tal chuan mi han zui rawh u" a ti a.

Pa Thanga ho chuan an inzui chhuak ta kha a nia, kha an makpa pakhat kha tello se chuan kan in vaw nawk nawk hial mai awm mange!

Room a ka han lut chu mittui tla purin ka nu nen chuan an lo inkuah ran mai a, hmuh an nuam fahranlo khawp mai.

 "Angela" ka tih chuan an rawn hawichhuak dun a, an inkuahna chu thlahin ka nu pawh chuan min chhuahsan zui mai a, a bulah chuan țhuin ka kuah a, a insut hlap hlap a.

"Harsatna engmah a thleng lovang ka tih kha hlauthawng suh, i bulah ka awm reng hi.."

"Rin, min hawtir lovang tiraw, min hawtir dawn lo tiraw..?" țahchhuak insum tih hriat reng chuan a ti a.

"I bulah ka awm reng dawn alawm, hlauthawng mah ta che." A chalah chuan duat takin ka fawh sak a. A mittui te chu hruksakin a sam pawrpheng mai chu ka huihțhatsak bawk a.

Lalrova a lo lut hlawl mai a! Aizawl lama a chhukni niin ka hre bawk sia chutia a rawn lang tehnawlh chu mak ka ti viau a ni.

"Eh..i chhuk nange?" ka lo ti hê haw a.

"Nia, ka nau ka kaltir a, Angela-i te motor niawmtak kha a rawntlan phei ka hmu sia, chinchang ka va ngaihven ange ka tia ka rawn phei mawle" a ti a.

"Nia, an rawn thleng a, Pu Ruata te inlamah an innghat dawn a nih hmel e, an rawn lut kawi hmasa zet a, zanlamah kan rawn kal leh dawn nia an tia, an chhuak phei ta a nih kha" tiin ka hrilh zui a.

"A nih tak chu, engnge boruak a țhat hmel em?" a ti leh a.

"Țha turah chuan ngai ila, Angela-i u pasal hi a rawn tel ve a, a fel khawp mai a ni kha.."

"Țhat chu, in lo ri hluai mai ang tihte ka lo hlau deuh a, chutianga han bengdai thei deuh tur an awm chuan a țhat nasat chu.. fanu rangkachak kha a ni ve bawk sia..an ui ve ni mai a.." tih  pah chuan Angela-i chu a melh zauh a.

Mittui parawl țeuh chung chuan a lo nui var var a.

Zanriah kan han kil ve te chu maw kan ei tawn tawn lo kher asin. Kan in en hrek hrek ringawt hi a ni ber mai. Puarkhawp ei chu huphurhawm tak a ni. Kan naute chu chinchang hre lem lo a ni bawk a, a danglam viau lem lo. Ka nu leh pa te tak pawh chu an khawngaihthlakawm. " Zanah a țam leh kan ei leh mai dawn nia" tiin ka pa pawh a tho chhuak ta nge nge kha a nia.  Ka nu pawh chuan a khâl a khãl ringawtin ka hria.

Țhenawma kuhva ka lei chhung ringawt pawhin a awm hleithei a ni ngei ang veranda bul thim chinah chuan min lo nghak hman hram a!

Ka pa hi zial ka la zuk khum loh vangin pawnah chuan zial ka'n zu ru phawt a, ka nu hi chuan min hmu zeuh zeuh. Angela-i pawh chuan maktih hmel deuhin min thlir ringawt a.

"Zial i zulo emaw ka tia" a'n ti zui a.

"Ka zu tam lo,"

"A va'n țhalo ve..Nghei i ngai nih chu tiraw, thil țulber a  ni lo em a.." a tih chuan "Nia" ka tih sak mai a. Ka kuhva eilai fah te chu a'n phût leh rih a, thimthamah chuan kan han infah ang nawk nawk a.

Țhiante ho an rawn lang hma khawp mai. An rawn kim țhap mai a, țhian țha te hi mangan lai chuan an lo hlu hle mai.

Kan khualțha turte pawh an lo thleng ve ta, tun țum chu an 'boss' samkir bep bup a lo tello tlat mai ka ti! An pawr viau lo turah ngai ang.

"Kan awm ve a țul leh min lo koh mai dawn nia" tiin room lamah chuan kan luh san daih a. Engmah kan sawi ve leh dawn a ni chuang lova mawngkhama kan lo țhut ve reng țulna hre miau hek lovi!

Khumlu-ah chuan kan thlalak charkhawm leh pahnih chu a tar a, "A țha tiraw.." nui ver ver chung chuan a ti a. Kan pahniha kan awmdun hi chuan lungkham lutuk hi kan nei lo țhin asin mawle..

"Nangmah hi alawm maw țha le" tih pah chuan khumah chuan ka tlukpui thawr a.  Eizawh theihloh na na na chu kan in keih sek mai alawm le.

"I inluah kha engtinnge intih tak a!?" a rawn tichhuak hlawl a.

"Ka u ten an luah rih, an fate hostel a mi an lachhuak a, ka dam hunah ka fin ve leh mai ang chu an tia lawm"

"Ehe..in chep awm si.. khawiah nge kan mut anga!?" a'n ti daih pekah! A inchhiar tel ve nghal thlap!

"Nang chu ka nute bulah hian i awm ang chu, awmpui an ngaih em hi.." ka tih chuan a hmui a'n petsawi kual vel a..

"Kartin ka lo chhuk a ni mai" a la ti zui!

"I u te bulah chuan a free awmlo bawk sia, kan che ve ngam dawn maw ni le" fahran chuan a..Ka nui tawp.

"Nui ringawt suh aw, kan pahnihin hmundangah luah daih ila...chuan, ka duat dawn teh mai che nia aw.." 

"Engnge kan ei ang?"

"Chaw te, chawhmeh te..."a nui ve tho amah pawh. A rilru bing lutuk a peng thei chu ka lawm viau.

"Keiin lehkha ka zir ang a, thawhchhuah ka nei bawk silo, kan pahniha Aizawl awm chu chhungte an zahawm dawn e.." ka ti a.

"Hm..lungngai hma thei bawk sia mawm my dear.. ka chawm zo var var ang che, chulam chu ngaihtuah buai duh lo mai rawh"

"Ngaihtuah loh ngawt pawh chu a dik ber silo alawm, morning velah chhunzawm ila, chhunlamah engemaw a tih pah theih anga te ka lo tia.." 

"Tak tak a, kan dawr khu ka enkawl theih mai ka ring a.."

"Hehe..i beisei sang emai a.."

"A nia lawm, a enkawltu ber ka nia, Telawma'n hna a nei ve leh tawh bawk si, ka awmloh chuan enkawltu tur pawh an awm chuang lo. Bakah licence te pawh ka hming vek a nia.."

"I pa chuan a phal mai thei a, i nu bawk hian a phal pek lovang a..." ka ti a.

"Ka pa in 'aw' a tih chuan phun phun mahse awmzia awm hleinem, anmahni'n an buaipui thei dawn pawh ni hleilo te chu" a ti hlak a.

"A hun a thlenah chulam chu kan la ngaihtuah dawn nia, ka pain a ngaihtuah fel vek tawh in ka ring" ka tih sak a.

"I pa hi chuan a duat ve ngawt mai che tiraw, "

"Duat ve bawk ang chu, a thu ka hnial ngaihleinem" ka ti mai a. A ni reng lahtaka ka pa thu hi ka hnial awm pawh ka la hre meuh lo reng a ni. Ka nu lah chuti tho, a țawng tlem si, a taima si, midang phûtna a nei bawk si lo. Sî sawm chuang an daih hial ta ve ang.

Inlengte an țin tak hnua an rorel dan kan hriat chuan kan lawm lo lam mah chu a ni e.

"A chhungte hi chu chhuk phawt sela, nakinah karkhat hnu velah tal muangmarin Mami hi chu chhuk thla sela, kumthar lamah inneih lam chu Rina ke an zaițhat hnulamah kan ti ta a nih kha" tiin ka pain min lo hrilh a.

"I huphurh em Mami?" a ti zui a.

"Umh" a ti tawng mai. 

"Keimahni lam duh ang ringawt khan thil a kal thei bik silova in hriatthiam hram a ngai a ni. In inneihloh phahna tur thil engmah a awm lo a nia, Rina hi han dam țha sela chuan kan nawrna ngam viau ang a, heti hi kan la ni rih bawk si a, kan innawr lutuk ngam lo deuh a, chhuanlam tur tingtangin khulamah hnu khar felloh a la awm ve bawk nen kan pawm tlan mai a ngai a nih hi" ka pa chuan  ti zui a.

Chhungte mut hnuah chuan ka room lamah bawk kan inzui lut leh a.

"Rin, ka chhuk duhlo nia.." a ti nghal mawp a.

"Hm..duhdan ang thlapin thil a kal theilo ka pain a tih zawh chiah kha. Kan tana țha tur zawk te pawh a ni mai thei asin."

"Ka awih chiahlo chu kher chu.." tumbar chung chuan a ti a.

"Kumthar lama innei turin thute pawh an hnutchhiah fel vek kha, lungngaihna tur a awm hleinem..bakah, hetia kan in kawl zui mai chuan i mualpho lutuk dawn asin, miin kan inkar hi an hre kilh kelh lova, innei tura an in biakrem vek hnuah pasal dang a um san tih kha an sawi dan tur che a nia, a chhung te bulah țhulh a duh thu a sawi țhin a tumahin an ti dawn lo che."

"Chu pawh nise ka chhuk duh chuang hleinem.." a la ti ngâr ngâr a.

"Ka zuk dah dawn che nia"

"Ho emai chutiang lek, i hawleh vat ang a.."

"Ka hre tawh bik nang chûng leh zel te chu.. " tihpahin khumah chuan ka tluzal a.

"Min ning a nih kha..." lehlam hawi ngãt chung chuan a ti țha leh a.

Khumah chuan kuai muin ka kuahbet a, fawh ka tum te chu a'n țang kual ta vel a...

"Hrehawm deuhin hmuhphak lovah awm se min ti nih kha," a tih chuan a zakah ka lo dék thut a, a za ti lutuk han leng chuan ka malpui ber kher chu a tauh zui a, a na lutuk hran lo nain na ti awm tak chuan kan vial ta vel a nih kha!

"Tihpalh tihpalh..." tiin min ngaihven chul a, ka lo ngaihsak vak silo. A inthiamlo hmel mawlh chu...

Zangthal at chuan muin ka maimitchhing tlat a, mi tih vak ngaihna a hre lo.

"Rin a la na viau em?" a tih chu ka chhang lo.

"Mawhhh...Rin, a la na em min chhang teh" a tih pawh chu ka la chhang chuanglo cheu a. Min hre chiang ve thawkhat bawk a niang style dang a hmang ngam ta tlat mai ka ti!

Ka dulah chuan a rawn țhu a, ka bân dah kakin a kut pahnih chuan ka biangah a dawm a, keilah inti tuavawn fahran chuan ka la meng duhlo vel a, ka chungah a rawn mu mai dawn emaw ka tihlai chuan ka hmuiah chuan a rawn fawp pek a! 

Țan ka la ve dawn chiah tihah biang puar pawp khawpin a'n ham mai pek a nih kha! Ka nui chhuak lo thei lo a ni e. 

"Sual lutuk, mi pawh 'ka chhang duhlo e' te i tih vel le" a ti zui zat a.

A nghawngah kuaiin fawh ka han tum chu a hmui a ka chhungah a bilh lut bo daih a! A hmel chu a nuihzatthlak lutuk..

A khabeah chuan ka sehsak ta ringawt a, a rawn nuichhuak hawk a, ka bengah chuan a pawt nawk nawk a.

Ka chungah chuan a mu ta hle hle a.

"Rin"

"Umh.."

"Ka chhuk dawn tak tak em?"

"Ka pa thu ka hniallo hi ka la inchhir lo asin, i inchhir bik ka ring lo"

"Ka chhuk dawn chuan thil pakhat min tihsak la ka duh a..."

"Engnge i duh, i duh ang chuan tih kan tum ang chu"

"Promise em?"

"Sawi phawt la..."

"Naa..promise em ka tih chu..?"

"Hriat loh promise ngawt te chu chi dawn mi?"

"Thil harsa a ni hleinem"

" Chu pawh nise,..ka hre silo lawm.."

"Naa..i mak thei eee..promise lo tawp rawh"

"Nih min fawp la promise ang..."

Min fawh zeuh pah chuan ka hmui a seh hlak a, 'a reilo emai..' ka tih chuan...'aaa..' tih pah chuan uluk zet chuan min fawp ta vang vang a.

"Sawi tawh rawh le..." ka ti a.

"Sawi kher a ngailo, ka duh hunah a ni mai..." a ti daih a...chimawm ve pangai.

Chhunah min awmpui a, zanah kan in awm thung a! Thildanglam tehchiam a awm lo. Mak ve deuh chu kan chesual hauh lo chu a ni. Tleirawl laia 'Killer' hming pu phak ve ngat kianga Angela-i himdam taka a awm thei hi a mak tih piahlam a ni. 

A haw ni tur pawh a hnai ve ta zel a, țhulh a rawt fo mai chuan rilru a ti bui lek lek țhin chu a ni e.

Ka nu leh pate nen pawh an innel ta viau a, engmah harsatna kan nei hran lo. Chhuk tih loh chu.

A hun a lo thleng ta.. A tuk chu Aizawl lam pan kan tum ni a nih vangin a ngui ang reng riau a, a tha a tho hleithei meuh lo a ni.

Zana ka bula a awm reng lai pawh chuan sawi tur a hre lo. Min kuah a, min chul ruai ringawt mai ni.

Țhian te hovin an rawn thlah sap sap a, Dar 11:00 pelhah kan mu hman hram chauh a ni. 

A room a mutura a chhoh hnuah, a muhil tawh ang chu tihnaklaiin ka bulah bawk chuan a lo kal leh pek a!

"Rin"

"Ehe.. i muhil thei nange..?"

"Mutthil pawh ka lo tum chiah hleinem" a ti et a.

"Engati maw..naktuk motor kan chuang dawn sia i chau lutuk ange.."

"I promised kha..."

"Chuan...!?" ka bo deuh riau alawm mawle.

Ka bulah chuan mu in min rawn fawp zui nghal a, a fet țan viau mai le!

"Angela.."

"Thutiam sût hmang mipa ka mamawhlo a nia" a ti hmak a. Țan fung tur dapchawp leh ka ngai ta.

"Hetia awm hi a dik lo"

"Rin, khawngaihin...i ta ka nih zia leh ka ta i ni ngei tih hi nemngheh ka duh. Hei bak chu hun țha kan tan a vang tawh dawn asin...Engnge kan hmabak pawh a hriat loh hi.." tih pah chuan a duham tial tial mai bawk si.

Boxer ka ha awrh chauh a ni ta!

Light ka off chu khum bul maia plug a awm vangin ka han on leh a, tawnzau leh panty chiah a lo inbel ve tho mai ka ti!

A vun var thianghlim leh nelthep mai chuan beisei ngailoh min beisei tir a, a malpui vawng leh chumtar mai te chuan mipa ka nihzia min hrilh nawn awn awn asin.

A tawnzau hak a hlim chhoh rual a a laibu pawng țhiangrual mai chu mitlawnga en mai theih a ni ta lo! Bawp nalo lamah chuan ka sir tlukpui ta kha a nia..

A rilru a nawm phah tluka hlu a awm hleinem mawle.

A tukzing ka thawhlai pawh chuan a la mu tlat a, a room lamah chuan lutin ka va kaitho va, muhillo tih hriatreng chuan meng sen rum hian min lo ban a, kan la han inkuah leh rih a..

Dar 9:00 ah Lalrova Sumo chuan midang pawh tellovin kan kawt chu kan chhuah san ta a...

Ngaihtuah a thui viau...

           

                           Chapter

                              - VIII -

Sawitur kan vãn tlang deuh aniang thui fe chu ngawirengin kan tlan mawp mawp a.

"I van khalh chak" Angela-i'n a tih chuan a hlau emaw ka ti hman zet a, a mitmengah erawh chuan a hmanhmawh loh vang lek a lo ni bawk si.

Chuta țang chuan Lalrova titi chu kan ngaithla a ni ta ber mai.

Chaw eia kan din zawk bak chu kan tlan tluang viau a, hmanhmawh vut vut kan ni lemlo bawk a Aizawl chu kan thleng hma lutuk lo.

Zemabawk kan thlen dawn ațang chuan kan be țawng zo tawh lo. Ka darah chuan beiin min kuah tlat a, thlamuan theitu mah ni ila atan thlamuanna țawngkam han chhahchhuah tur reng ka hre bawk silo.

Zarkawt kawnah a u pasal khan min lo nghak a, motor-ah chuan a rawn chuang ve mai a, an inlam pan chuan kan tlan zel a, han thlen dawn meuh chuan keipawhin ka huphurh ve tho mai. Lalrova hmuipuipu deuh a ni bawk a ring vek tawh mai ang. Keizawng țawnghmang thiamlo tih takah ka insawi awk mai mai palh ang.

An inbul chu kâr lovah kan thleng ta mai a. Kawngkam mai chu an in awmna a lo ni a, an In pawh a ropui thawkhat viau e. Cement in chhawng nga emaw lai a ni ang chu. Kawng ân chungah chhawngkhat leh kawng hnuai lamah chhawngthum lai niin ka hria, kawng ân leh a chung chiah chu an luah a nih hmel viau.

Chutia Sumo paw thêr thûr an kawta lo ding ta chu an hrethiam a ni teh chêk ang a pa chu a lo chhuak a, awze mi niawm tak, sa muk țilh țelh, hnar per thlir thler te hian a rawn zui chhuak bawk a. 

Nu ropui tak hmel erawh a lang lo tlat!

An inchhungah chuan kan inzui lut ta țham țham a, Samkirnu bedroom-a a lut zuk lai chu ka va hmu hman rengah!!

A pa leh an mâkpa chu an țha viau a, an țawngkamah pawh mi han hmumawh awm ang zawng han hriattur a awm lem lo. Rilru chu nawmkhat chuan a nuam deuh e.

Chaw eitur te chuan min han sawm ve tak nain kan ei tak tak an rin hmelloh em a Lalrova nen chuan kal mai kan tum a, Angela-i chu inchung chhohna lamah chuan a tlanchho ta daih a. A hrilhhai thlak viau a ni.

Din reng thu awm heklo le, motor lam pan chuan kan chhuak dun ta kha a nia.

Motor ațanga ka hawilêt chuan inchunglam tukverh ațanga min lo thlir rengtu chu ka hmu thei a, kawngka biang nghengin...a mittui a tla tih hairual a ni lo asin.

Ka inluah țhin lam pan chuan kan tlan ta vang vang a, kan thleng chu kawngkhar chu a lo inkalh bãm mai a. Kan hawikual vellai chuan inchunglam ațanga 'Ã pute' ti a min koh lauh chu ka hria a, inchunglamah chuan kan lut zui ve mai a.

A luahtute an chhuah avangin remchang lain an lo insawn chho hi a lo ni a, inhnuai lam ai chuan a zau ta deuh e. 

Kan intih felfai hnuah Chaw ei ka u ten min han siam a, kan eikham hnuah Lalrova innghahna țhin a ute inluah lam pan chuan a bai a baiin kan inphur chhuak leh lawp lawp a, chumi hnu chuan Angela-i te inlam pan chuan kan tlanchhuak leh ta a.

An kawngkhar hmehrik kan hmeh meuh kha chuan dar 8 a pel ruai tawhin ka ring. 'Lo lut rawh u' an tih ri awm pawh kan hre lo, kawngka chu hawngin 'In awm em?' ka'n ti dâk dâk a.

TV a Korean film lo en mek sam kir bep bup nu chu a lo hawi hruk a, "Awm e, lo lut rawh u," a ti a.

"E, midang an awm nange, khawnge Angela-i?" Lalrova chuan a lo ti zung zung a, "A mu tawh nge maw ni le" a ti duh chauh ka ti.

Ka phone top up thun thar diai mai chuan ka han phone a, a lo mu ngei a, 'ka lo chhuk ang' a tih kha. Tunge thunun thei zawk chu kan fiah chhoh zel a ngaih hmel e.

Inchunglam ațang chuan Angela-i chu a lo chhuk thla ri thlarh thlarh a, a hmelah beiseina eng hmuh tur a awm hauh lo. 

A nu hmuikawhin a țhu ve vuau reng bawk sia titi boruak pawh a kal hleithei meuh lo. Ruah thimpui lo thawktur inmûng vut vut hi ka chan ber mai.

Chutiang boruak ințam țeuh mai chu a puak chhuak ta! Lalrova a chesual ta hlauh mai a, Ani thawpik, sawitur hre bik silo chuan ngaihtuah mang hlei lovin zial an țan khu luih mai a leh! Remchang zawnga lo in up ngar ngar chu a tawn keh ta!

A ânhla chu mumang a hmuh leh atan pawh ka la duh lo, a rapthlak tih piahlam a ni. Lalrova chuan 'ka tihpalh a ni' a tih hnuah pawh Bible-a Ruthi bu chen zet tur chu a la chham hial ang chu mawle. 

"Ka nu, em em a che" Angela-i'n a lo ti pawh chu a chhaihkawlhtu mai a ni.

"Nang kha lo ngawirawh, engmah lo sawi ve suh. A zah pawh i zak lawmi, i nikhua loh vanga kan mualpho zia hi i hria em? Țik pawh lo ti ve suh, zaka indawm kun tlawk tlawk tur i nia sin" a sawi duah mai..Inrinni zana Sermon tawi chen zet tur a belh!

"Ngawiteh ka pi min lo hrethiam hram hram dawn nia, engpawh nise kan va țin phawt ange" pangai hmel takin ka tichhuak thei hram a.

Meng kaw kaw chungin min han en a, a kutzungchal ngei maia min kawkin "Rina hei hi lo hre rawh, Lalmuanpuii nen hian in inneih hi beisei duh suh. In innei chuang lovang. Heti khawpa mualphona min thlentu hi kan mâkpa i ni anga maw...A teuh lo mai! Nang neihtir ai chuan pasal neilo hian awm mahse a pawi therte lo. A kal pawh rawn kal tawh suh, he in rap tur hian kan duh lo che" ka ding sai ngar ngar a ni. 

Ka tiang chuan ka hlap dawn nge, țawngkain ka chhang ang tih ka bûk laitak chuan Lalrova'n "Ti teh, kan kal a țha zawk e" a rawn ti hman ta hlauh a. 

A him phah ta.

Kan kal tur Angela-i'n ka ban a dawm chu a rawn phihthlak sak a, keipawh ka pai khat khat a, Angela-i phone chhuata tla chu a nu chuan chharin bang vawm nan a'n hmang teh reng a nih kha...Angela-i chu inhup chungin a țap tlawk tlawk ringawt a. Han hruai chhuak ngawt dawn ila keia ke țhalo bawk nen kan ropui lua dawn silo, rilru a buai tak zet a ni.

"Kal ang" tiin ka pen chhuak a, ka keah chuan Angela-i'n a lo dawm bawk si. A nu chuan "Lalmuanpui thlah rang mai rawh" tiin a dârah chuan a kuai lawp a, Lalrova chuan a hmuthei ta ngang lo a niang, Angela-i chu a zu dawm vat a, muangchanga rawn dingchhuakin Nu hruanghrau napui mai chu a en ang ren rawn a "Ramhuai a mi i nih?" a'n ti nghek maiah! Chhân ngaihna zuk hre der lova mawle.

"I room-ah han chho rawh" Lalrova'n a tih chuan a duh ka rinloh teh reng nen Angela-i chu inhup chan chan chung chuan a chho hna hna a, a mak ka ti kher mai, min zui a tum ve turah ka ngai deuh asin!

Chhuah tumin ngawirengin kawngka lam kan pan a, ka pang a za deuh tlat! Kawngka bulah chuan ka ding det a, "I fanu nei tur hian ka lo kir leh ang" ka'n ti zet chu a alh mai ang tih hlauhawm khawp a ni, mi vawmna remchang melh niawm takin a hawi kual a, kawngka ka khar fel chiah chu eng emaw a rawn vawm a ni ngei ang kawngkhar a ri bur mai.

Motor-ah chuan ngawirengin boruak ngaichangin kan han țhu ren rawn a, thildanglam vak awma kan hriat loh vang chuan kan tlan haw ta a.

"Kan hruai haw nghal ang chu ka lo ti rilru hman deuh asin.. Room lamah i kal tir leh ta daih bawk sia.." țhianpa bulah chuan ka han ti a. "A ni khawp mai țhianpa, mahse khatiang hunah kha chuan kan duh zawng anga awm a fuh ber lo țhin alawm, hmeichhia pakhat lek hmatawnga dahin khatiang taka min hmachhawn ngam chuan thildang eng emaw a awm tel ang tih kha rin thiam tur a ni ngai. Ti khan remchang dang a awm mai ang, lungngai reng reng suh" a ti a.

"Kan kal ngam tawh dawn silo, a phone lah kha a nuin a paihchhiatsak der bawk si. Khatianga an tih kha chuan pawna a chhuah an phallo ngei ang a, biakna tur awm bawk silo chu tihdan tur avang viau a ni" ka ti a.

"Lungngai mah ta che ar talhdan chikhat chauh a awm hleinem, rilru fim hman a pawimawh țhin alawm" a ti awlsam et a.

"Inbe thei tal ila chuan tihdan a ngaihtuah theih tur a nia"

"Ka phone a kawl alawm" a tih chuan phawk zetin ka han melh a, lu búk nghat pahin "A dik alawm, ka zu dawm khan ka phone ka pe a, thluak fim tlem ka lo la nei a..." a tih meuh chuan ka mittui ka khap hnam sawk mai! A motor khalh lai chu ka va kuah ti tih a.. ka hnuk a ti ulh tak zet. A va hlu em ka tan hian..

Ani driver ta chuan phone a mamawh asin. Bungraw phurh chung chang chu sawiloh a passenger tur te rawn biakna tur te, kawnglakah chhiat te pawh tawk thei an ni asin. Chung zawng zawng dahțha chuan keimah vangin a phone alo chân der mai bawk si. 'Ka phone hi kawl la ka lei leh mai nge keichuan' ka tih lah chuan 'Awmzia awm lo, ka tih chu ka tih a ni mai, min pekbuai tum duh suh' a ti hmak mai bawk si.

In kan thlen veleh Angela-i chu Lalrova numberah chuan ka han message a, a reh vang vang mai.

Lalrova chuan kan inah min dah zet hnu chuan a riahna tur lam panin a haw ta a. Ka ngai ngawih ngawih maiin ka hria Lalrova tak pawh chu. Ngaihtuahna mumal put a har ka ti hle mai.

Ka chhungte lah chu an hnâr kûk kûk mai bawk sia, an ngeiawm thei lek lek dawn mai ka ti.

Hetiang a nih rau rau chuan rûk chhuah leh mai a ngai dawn a nih hi. Chuti a nih loh chuan ka thlah hlen a ngai dawn tihna. 

Duhthlan tur pahnih chiah ka nei.

Dar 11:00 velah chuan ka phone chu a rawn nghawr det a, bengkhawn reng ta chuan ka hailo kher mai.

"Rin, min ngaihtuah suh aw ka țha a nia, ka ngaihtuah awmloh..ka ngai che" tiin.

"I chhungte rilru chu ka beisei phak bak a ni"

"Ka nu hian ro a rel vek a, ka pa hi chuan thil hi a hrethiam mai țhin a, ka nu hi a buaithlak ber, ka pa lah hian a hnial ngai bawk silo.."

"I lengchhuak thei angem?" tih ka han zawt zet chu ka tifuh lo tih ka inhre chhuak chiang kher mai, ka thawn hman tawh bawk si.

"Theih ka ring chiah lo, min mitmei reng ni hian ka hria" a ti a

Reitak thleng chu kan inbia a, anchhe tinreng nena țim a, room a kalhkhum em a tawk lemlo bawk a rilru luah ngut ngut tur a zia viau. 

Ka muhil har deuh bawk nen zinga ka thawh chuan dar 9:00 a lo ri hawlh tawh mai a, inngaihtuah buai pawh awm map lovin ka tho chhuak a, ka inphih fai hnuah tukțhuan ka kil chhunzawm nghal a.

Lalrova phone thlakna tur ka leisak loh te chuan..

Chaweikhamah chuan bazar lampanin ka in hawlchhuak ta kha a nia, kan awmdan chu mumang te pawh a ang rum rum mai alawm mawle.

Whats app hman theihna țawk țawk tur phone manto lo tak mai chu ka lei a, kawngkam simcard nen chuan ka tifel a ni zui nghal mai. Mahse, engtinnge Angela-i nen chuan kan inpek tâk ang le?

Ngaihtuahna a buai riau mai. Amah lahin 'chu chu rawn thawn rawh' han tih tur a hre mai bawk silo. A țhianteho lah a chhungten an ringhlel rûm vek tawh dawn bawk si. Thlunglu a hai e chawltui ningzu dawn silo hian..

Tihdan a awm mai ang tiin ka veivah awlsamna tur Sikuti thlithlai tur chuan ka kal leh ta a. 

A thlen thar lai a nih vangin inziahlawk pawh a lo ngai lem lova, laknghal mai theih tur a ni. Mahse keilah chuan thil pawimawhtur engmah ka lo keng lêm silova, Pawisa takngial pawh ka u in a la tãivawn daih pek ang chu mawle.

Lianhminga nen chawhnu lamah kn inhmu a, 'Sikuti chu tifel law law ang, i tan nihrana chhuah kual leh a buaithlak' a ti teh tlat a, kan inlamah tlanhawin mamawh te chu kan han la leh rih a, ani min phurhkuala min buaipui zarah reipawh buaipui lovin kan lachhuak fel thei mai a, a thawven thlak țhin teh e țhianțha neih hi chu.

'Kan inlamah vawiin chu chaw lo eirawh' a tih teh tlat avang chuan Sikuti thar nen chuan a hnungah ka tlan ve dat dat a. Bike khalhthei sa ka nih vangin harsatna lutuk ka nei hran lem lo. Clutch leh brake ka hriatpawlh zeuh zeuh tih mai loh chu.

Lianhminga chhung te nen hian kan inpawh ve viau a, inkawm a, inzui rawt kan nih vang hian ka duh hun hunah ka riakin chaw ka lam mai a, anni pawh hian min enhrang lemlo viauin ka hria.

"Eh..Hminga'n i haw chho a ti emaw tia?" a nu chuan a lo ti hluai a, "Nia, nimin khan ka lo chhuk leh a" ka ti ve mai a.

"I țha zel a maw, kha ka rin aidaihin i kal pawh a pangai tawh kha mawle tiraw.."

"Nia, ka țha lutuk, ka pangai a ni ber tawh e, khawnge Ramtei te ho hi.."

"A nau tarmit lei a ngai a, ka chhuahpui hman silova an pahnihin an kal ta  nih kha, chaw ka chhum kep dawn che em?" a ti zui zat a.

"Umh..kep rawh, vawksa rép ka eichak a ania aw.."

"Ham ham che chuan a... Arsa chhum hân țhing a awm, chu chu i inhmeh tawk chiah" a'n ti kherah!

Lianhminga room lamah chuan ka lut zui ve ta daih a. 

Computer on ruk ruk pah chuan "Engtin chiah maw in awmdan chu ni a, inkhawlamah a rawn chho tih te kha chu chianglo ruaiin ka hria a.." a ti a.

Kan chanchin chu ka'n hrilh zar zar a, "A buin siam ang hmiang!" a'n lo ti leh hmanhmawh pek a!

"Tak taka ava mak teh nuaih ve mawle, a chhungte pawh chu an timak ve hle mai.  Mipa takin kan che țiap anga nimai lawm le, mai mai salaa..."

"A hrim hrimah i chî te chu i kûi ve hman em ang chu maw..!" a ti zui a.

"Ka ke alawm nâ, thildang a na hleinem" ka tih chuan a nui hak a.

"A țhat chu, chutiang te a nih phei chuan engmah huphurhawm a awm loh chu. A rilru a chhungten an lo hmin mai ang tih a hlauhawm ve a, chutia i khenbur chat tawh te chuan ani pawh a țang ngam nang..Kan ru leh anga nimai lawm"

"Phone hi pek hmasak a ngai, engtinnge maw kan tih dawn ni, phone neilo chuan kan țhianpa hi a buai lutuk ang, neilo chi pawh a ni lo" ka ti a.

"Ka va kal mai dawn mi, ka hlau ve hleinem" a ti thar thar a.

"Kan hlau pawh a ni bik chiah lo, thil tih su kuk kan duhlo a lawm,"

"Ni viau bawk si" a ti ve mai a.

"I phone lei zawk chu i țhianpa chuan hmang sela nimai lawm.." a ti et a.

"A number zawk kha a pawimawh chu nia, a phone ai mah chuan" ka tih sak a.

"Tihdan 'awm ve leh mai ang... " a'n ti liam leh puat mai a.. 

Chaweikham chuan kan inlamah kan lut chho leh a, chuta țang chuan Lianhminga bialnu rim tumin kan chhuak leh a, a dik tak chuan ka peihlo hle a ni. Angela-i lo chu ka rilruah midang an awm theilo, engmah ka ngaihtuahnaah a leng lo. 'I leng thei chuang lo' tih țanchhanin min kar tlat mai bawk si. Phone pek dan tur te hi ngaihtuah a ngai asin mawle.

Kan veng kan pel fel awrh tih chuan bike pahnih hian min rawn umpha a, kan hnungah chuan mi lehpel duh silovin thawm an nei sek mai a, Lianhminga chuan a ning deuh nge ni kawngsirah chuan a ding zui a. Pakhat chuan min rawn tlanpelin kan hmaah chuan a ding ve chat a. Pakhat kan hnunglamah a ding bawk.

Lianhminga nen inphur kan nih vang chuan ka chhuk bik chuang lova, kan hma lama bike ding zawk chu ka en reng a, țhian te, college lama kan kalpuite uang mai mai a nih ka ring deuh a, mahse an bike number chu ka hriatzawng a ni tlat lo.

'Tute nge niang aw' ti a ngaihtuah paha an bike number ka chhiar mual mual lai chuan ka koki veilamah chuan thachak zet hian min rawn kuai nawk mai a, remlo zet chuan bike ațang chuan tuiluankawrah chuan ka tla thla nawk a, Lianhminga pawh a thum zui nghal țawk a, a bike a tlu zui bawk a, keilah ka kena lam  delh zawng ber kherin ka tla bawk nen tho leh tur chuang ka awm tlat lo.

Lianhminga chu an din chilh a, "Vawikhatmah Lalmuanpuii saw lo tibuai tawh suh ang che u" tih pahin an paihthal leh tawp a, motor lo tlan a awm tak avangin an bike-ah chuangin motor a dinfel rual chuan an tlan chhuak nghal a..

Motor ațang chuan nutling leh patling hi an rawn chhuk a, Lianhminga chu an han kaithova, na lutuk chu a neih hmel loh, a hnar chu a thi deuh a nih hmel. Keipawh engtin tin emaw ka thochhuak ve thei mai a.

A bike-ah chuan a lawn thurh a, "Țhianpa, lo awm rawh aw tikhan.." a'n ti chheu mai a nih kha!

"A chiloh" tih pah chuan a chabi chu ka va dawm sak a, nupa niawm tak te pawh chuan min kalsan ve leh mai a.

Kan din vang vang hnuah a thinrim lutuk tihngaihna hre bawk silo chuan "Ka thi dawnin ka hria" a'n ti ringawtah!

"Bike number lah kha chhinchhiah nachang ka hre lo lehnghal...va'n zialo thei e..." a ti bai bai a.

Ka chhinchhiah tih sawi ila chuan a zan a zanin zawnchhuah a duh leh rum rum mai dawn si a, ka hrilh duh ta lo mai.

Kan inbeng fai thuak thuak a, kan tumna lam pan bawk chuan kan kal lui leh ta thova, a nuihzatthlak viau lo khawp mai.

A bialnu chu tê fel ren rawn, hmaifang țha zet mai hi a ni reuh a. A mah a pumraw tet ang angin a mawng a zan hmel phian bawk sia, bialnu a nei țha ve khawp alawm le.

Lianhminga chuan a hmai te chu a'n phih țha sawk sawk a, a nghawngah chuan hamna hnuhma niawmtak hi a inrin ruak mai bawk a, a bialnu ngaih chu a țha chiahlo tih a hriat reng, amah lah chuan a sawi duh der bawk silova. Keilah ka bal deuh nuau mai bawk si.

"Sawlai kawiah khan kan tlu a" a ti ta nge nge a, a rilru a dam deuh a niang chhanna dang a beisei zui ta bik em lo.

Thingpui no hnih zet kan in hnu chuan kan țin ve thei ta hram a, zeihmel fe in an hmaah ka chhuah ve vau vau kha mawle, in pedâk dun tak maw..

Lianhminga'n kan ina min thlah hnu chuan chhuah leh mai ka tum a, "Dar 10:00 a pel tawh a nia, khawiah nge kal ila tum?" ka u chuan a lo ti a. Chhuaklo thei niin ka inhre bawk silo.

"Chhuahlawk angai, min lo ngaihtuah suh, țhiante nen thil kan ti laklawh deuh a, ka rei deuh leh min lo mutthilhsan mai la.." tiin ka chhuahsan ta a.

Angela-i te in thlenhma kawngkawi kual zau laiah chuan Sikuti chu dahin an in lam chu ka pan phei a, a chhungte an mut tawh thu message a min rawn hrilh chuan thla a timuang ve deuh.

Ka hnaih phei zel a, Angela-i room chu a thim țhiap a, a room tukverh erawh ala inhawng thung. 

"Le ka in ring e" tih ka thawn hnu lawkah chuan a tukverh ațang chuan puan zawmsei niawmtak hi a rawn thlak thla a, a hmawra phone a suih bâwk chu lain ka ah lai ka dah ve hma chuan inhnuai lam, a nu te room light chu a rawn eng thut mai a, hlauthawng renga awm tih takah a engamah hma chuan ka'n tlanchhe ngawt pek a! 

Phone ka dah ve hman silo, inbiak dan chu a buaithlak ta viau mai, puan lah chu a khaichho zet a, a rawn thlak thla leh mai bawk si, an rawn hmuh teh chuan aw..An inbula motor phen ațang chuan light thim hun chu ka thlir kar a, zun zung emaw lek a ni ngei ang rei pawh nghah ngailovin a thim zui ve leh mai a.

Chu veleh chuan a rang a rangin ka kal phei a, puanhmawrah chuan phone chu ka va bâwk ve ta sawk sawk a, ka phihdet hnu chuan a hrethiam a niang a khai chho ta a.

An in chu ka kalsan thei ta. Ka thaw huai mai.

"Engatinge khati em em a i rei a?" tih message chu ka dawn hmasak ber a ni.

Ka hrilh hnuchuan a pawm ve leh mai a, min vautu an awm thu leh Bike number te chu ka han hrilh a, Bike number chu a hriatngailoh thu sawiin kan khawlama haw rih mai tur leh boruak sârhu a reh huna lo chhuk leh maiturin min ngen a.

A hlawhchham chiang hle.

Tute nge min vau a, kut min thlaktu te kha kan zawng chhuak ngei tur a ni. An

phutawk lawmman an hmuh ve ngei theihna turin.

A tukah chuan Lianhminga class kal hlanin Transport Department lamah Licence buaipui turin ka kal a, anni lah chuan 'a hmain ila neih ngai loh chuan Learner la phawt rawh' an lo ti teh tlat a, hnialbuai lêm lovin ka nghak ve ta ran a. 

Chutia ka nghahlaia ka ngaihtuahna ka kawm veng veng lai chuan a hma zana bike number kha ka hrechhuak zawk a, 'Tranport Department-ah an chhinchhiah vek ang chu mawle' tiin ka zawt kual ta zung zung a, Darkar chanve dawn kalkuala ka zawh hnuah chu number neitu hming leh chenna hmun chu ka hre thei ta a.

Ka bitum hmasak ber tur chu.

Ka Learner pawh chu ngaihsak lo chuan ka tlanchhuak ta daih a, kha bike number neitute in kha zawnchhuah ngei ka ngai si a ni.

A hming ka hriat tho vang chuan rei pawh ka zawng hman lo, pitar pakhat hian min lo kawhhmuh thuai a, an in vel ka chian hnu chuan hlawhtling inti takin ka hawsan ta kha a nia.

Lianhminga a rawn lut kawi a, chaweiah ka sawm tlat vang chuan mi hnial duh ta bik lova, 'zânah kan leng dawn nia' ka ti chu chhuanlam a siam deuh. A țangrei hauh lovang.

Zanriah kan eițan tih chuan Lalrova a lo lut ve leh chiah bawk a, tumlawk sa ang hrimin, a mak zawk hle mai.

Chawei khamah zanlama chhuah ka duhthu ka sawi chu an phur teh chiam lo. Mumal deuh taka ka hrilhfiah hnuah chuan kei ai aiin an hman hmawh leh lawi bawk sia!

Lalrova leh Lianhminga pawh inhresa ang hlauh an ni. An mizia a lo in ang bawk nen phûr tak tein zu phûr dun a mawle.

"Kal ang kal ang, ka motor-in a mi?" Lalrova chuan a ti ruai tawh mai a, a'n han insehruh leh rih țhin chu pui tak a ni.

Ka tiang hawl țhin zinga rit leh chhah țha ber chu lain Lalrova leh Lianhminga chu ka zui chhuak ta a...

                     

                           Chapter

                               - IX -

Lalrova Sumo-ah chuan chuangin kan tumram lam pan chuan kan tlan chhuak nghal a.

Zanriah eikham hlawt a ni bawka lengchhuak tur pawh ni se a chhuah hman ka ring bik chiah lo. Inah tawm ta tlat se a buaithlak duh awm mange aw.

E! Eng hmelpu nge pawh ka hre miah lo! A van buaithlak thei tak e aw...

Kan mi duh te in piahdeuhah chuan kan ding a, lutchhuak an awm leh awmloh motor ațang chuan kan thli thlai reng a, a reh rei khawp mai.

Tleirawl pakhat lo kal phei nalh nalh mai chu Lianhminga chuan a lo zuk bek bawr sar sar a, lungawi hmel tak chuan zial a țan hluah a, dawr lam pan chuan a zui phei daih a.

Kan Lianhminga khawsa zia mai mai chu aw.

Inkhawm dar a ri chuah chuah a, keini lah chu kawng lunlaiah tak kan awm bawk si. Lianhminga chu kan han phone a, a rawn hmanhmawh phah lêm bawk si lo.

"Thlang deuhah khuan kan lo awm mai dawn mi helai a ualau lai taka din chu" tiin Lalrova chuan mi rawn a. Lianhminga chuan "Nangni lo zuk awm ula, keima'n ka lo thlithlai ange, nichina tleirawl kha ka zawt a, amah bak tlangval an awmlo a ti, a haitheih lovang" a ti a. Kan tawlhliam san ta a.

Inkhawm țan dar pawh a la rik hma chuan Lianhminga chu a lo chhuk thla chhat chhat a. "Inkhawm turin a kal daih" a rawn ti heu maiah!

"Eng ang nge amah ni reng reng?" 

"Tlangval la nau lam deuh, keini ai chuan a û deuh si ang, cher lam, sang lam deuh, a huai vak lovang a hmel kha..." a ti a.

"A Inkhawm bang chu hmelhriatloh chuan kan hruai peng thei awm bawk silo, inah haw tlang daih se engtin nge kan tih ang a?" ka lo ti a.

"Naktuk zanah a ni leh mai lawm" Lalrova chuan a lo ti awlsam mai a.

"Nia, a inkhawm bang han nghak phawt ila a lengchhuaklo a nih tak leh naktuk zan lamah kan chhuak țha leh mai dawn nia" Lianhminga pawh chuan a lo ti ve mai a.

"Kut te kha inlo tawngpawng thlak vak ange, chu aichuan a thurualpui te leh a tirtu hriat a pawimawh zawk a nia" ka ti a.

"Angela-i nu a ni mai lawm, tu dang nge i beisei chuan a, kha ramhuai nu kha..." Lalrova chuan a ti a.

"Ka kutthak hi chu ka tat reh ve hrim hrim tur hi ni ringawt mai, ka thisen kha a thlawna luangah chuan a tam hret" Lianhminga chuan a lo ti mek bawk a.

"Hnuk hlat deuh si na deuh a tih i duh em?" Lalrova'n a tih chuan kan thlek dun he haw a.

"I kutah i chilhnawm la, a mawngah tat rawh, kutthlak ni lova chu aia na tur chu a vang ve ngawt ang" a tih chuan kan nuihpui țiah țiah a.

"Ania lawm mawle, kan tetlai paw'n  Pu Rangkhuma khan a ching a, kan țap tawp zel alawm" a la ti zui ta dah a.

"Nang chu lo inrawlh hlek suh ang che, motor-ah lo awm tlat la chuti lo chu i ke a bai bawk si hriat chhuah i awl dawn lutuk"  Lalrova'n a tih zui chu ka amen fahran lo khawp mai.

Kan titi tui viau a niang inkhawmho pawhin hla hnuhnung tur niawm tak an sa ta dap dap a. Lianhminga pawh a tihtur hrilhnawn ngailovin zaithawm a hân ta maw tih chuan a lêt chho ve leh mai a.

Annu nen an inngaihzawnlai vel sawichhuaka kan nuih uar uar lai chuan venghmawr lam ațanga inkhawm niawm tak te chuan min rawn lehpel ve mek bawk a. Lianhminga ber chuan thuthar a la rawn nei bawk silo.

Minute 5 a liam a, Minute 10,  20

'A chhuak dawn lo niang' kan tih mek lai chuan ka phone a ri țat a, 'lo chho ru le' a rawn ti ta. Kan mi chan chu a chhuak tur nge a chhuah loh vanga haw ang a ti tur pawh chu kan hrethiam lo.

Hmanhmawh zet chuan kan tlanchho ta a.

Lianhminga lo awmna lai kan thlen chuan hmanhmawh deuhin a lo lut a, zawh nawn a ngai hran lo 'a chhuak chiah' a ti sap a.

Kawngpui tlangdung a nih lem loh vangin a zau huau hran lova, Bike pawhin chhuak se a tlan chak lutuk a rinawm lem loh. Chu a chhapah Sikuti in a chhuak ala ti zui a! Kan umpha har lo turah ngai ang.

Kawithum vel kan tlan hnu chuan kan muang hranlo bawk a kan hmaa sikuti tlan chu kan hmu pha tawh a, an veng pel chuan a tlan zel a, veng pahnih zet chu kan tlanpel ang tih chuan a ding ta mauh mai a, a bul kan thlen ve meuh chuan a dinna bul inah chuan a lut fel der tawh.

Kan hawihil der chu niber e. A hawlam chu kan chhuah tawh bik em lovang chu maw.

Motor chu kan veng lam hawna tur remchang laiah kan dah a, kan minghahpa lenna mitmei phakah mi veranda-ah chuan kan țhu ta reng a, a lo chhuak thut a a tlan nghal a nih pawhin tiin a hawna tur lamah chuan kan in sawn leh a, chang uluk ve tak chu kan ni. 'Motorah lo awm rawh' an tih chu ka duh ta bik lo kha a nia.

A nghaktu tan chuan ninawm duh tak a ni. Zial leh kuhva a hek hle a nimai.

Darkua leh a chanve a rik pawhin thawm ala awm lo, kan țhu a, kan ding a, kan țhu leh a, sawiber tur pawh kan hre mang tawh lo.

"A riah chilh țhin a niang" Lianhminga chuan dar 10 rik ruaiah chuan a'n ti ngawt a. Kohchhuak mai ang pawh ti ila a duh leh mai ang ka ring.

Dar 10:30 velah chuan a hmeichhe pakhat nen hian an rawn inzui chhuak ta! An in fawp hreh ve deuh nge maw ni a mipa chuan a biangah te a'n piai sak vel a! 

"Nangmah kha kan piai chak tawh che nia..." sehchilh deuh zawi sup hian Lalrova chuan a lo ti pek a!

A sikuti chu tinungin a rawn tlanchhuak ta a, kawng kawi lai taka awm kan nih vang chuan kan tih din theih mai kan ring a, A hmasa berah Lalrova, Lalrova'n a tih din theihloh chuan a hnunga inchhungdung chen aia hla hret vela Lianhminga lo awm chuan 'ka vawthlu mai ang' a tia, Tiang țangphel chen awm vel hi a keng a. Kei chu boss ber niawmtakin kawngsirah Lalrova bullawkah chuan ka țhu thung.

Lalrova chuan a'n lo phar a, harsatna awm lo chuan a ding ta mai a, lighter a dil zui zat, a indap ruk ruk lai chuan Lianhminga nen chuan kan dinchilh zui hman ta bawk a, motor khalhțhang leh chabi pawimawhna hria a ni bawk a, Lalrova chuan a chabi chu phawisakin Lianhminga'n "I bengchhen chuan ka vit ang che" tiin a nakah a lo hawlh ran mai bawk a. A hawlhna chu a hmutheilo mai pawh a, Dâp ther!

A chil a lem khulh a, a meng pawng hlawt ni berin ka hria.

"Nizanah ka țhiante kut inlo thlak a, in lo vau vel a ni maw?" Lalrova chuan sehchilh nak chuan a han ti a.

"Ka pu ka ni lo chutiang.."pha dai chuan a han ti a.  A hming sawiin a bike number nen lam chuan ka lo sawi a.

A awmah țhamsakin "Tihnat hmasak kher che hi kan duh lo, tutenge i țhian te kha?" a ngawi vang vang a.

"Mizoțawng i thiam chuan chhang rawh le" tih pahin Lianhminga chuan a lo nam thle nawk a.

"Tuinnge kha thil kha tihtir che u"

Chhanna awmlo, Lianhminga chuan a bekah a'n hnek siah mai a. A tla tur kan lo dawmding hman hram a ni. Țap țuau chung chuan "Ka sawi ang ka sawi ang" a ti chul a.

"Ti khan sawi mai ta che, kutthlak hmasak kher engatinge i phut" Lalrova chuan a ti a.

"Ka țhian te ka zui ringawt alawm Lalmama te"

"Khawi a mi Lalmama chu..?

"Vengdang a mi"

"Khawi veng?"

"Venghlun a mi?"

"Engnge in tih chhan?"

"Ka hre ve lo, mi vau a ngai an tia, ka zui ve tawp"

"Chhuk teh i sikuti ațang khan, i sawițha duh lo emai kan țawngtir ang che" Lianhminga chuan a lo ti a.

A chhuk duh țhak nang. "Ka hre lo tak tak alawm khawngaihtakin..chubak sawi tur ka hre lo" a ti chul a.

An address, phone number leh an bike number chen chuan a țhiante pathum chu a sawi ta vek a, kut kan thlak zui ta lo.

"He thil hi i țhiante i lo hrilh lawk emaw, tu bulah pawh i sawi a nih chuan kan chhuah lovang che, a chiang maw, ngawirenga i awm chuan i him a ni mai" Lalrova chuan a ti sap a.

Buk nghat pah chuan, 'umh.. ka lawm e" a'n ti thlapah! 

Khawiah nge an lên țhin te, an bialnu te awmna te nen lam han zawh chuan a sawi tak zung zung a, rilru huaisen tak a ni lo tawp ang. Whats app a an DP te kan inthawn tir vel!!

Chabi chu pek pahin a darah chuan a han bensak thak a, "I awmdan tur chu i thilsawi leh sawilovah a innghat a nih chu aw hre reng ang che, i kalthei" a tih chuan "aw" tiin a țhutlirh chu a tinung a, chak zet chuan a tlan liam zui ta a.

Lianhminga chuan min kheuh zeuh pahin Lalrova chu a kawk zoh a, ka han en chuan hmuihmul lem a lo vuah chu niin haha...a ngaihna awm lo!

Kan han nui leh rih a, buaina siam zo chauh e tilo chuan kan enghelh ber lo emaw tih mai tur a ni.

"Ka inti hlauhawm ve a ni mai a engnge!" a la ti ham ham zui a, "Ka hmuthut kha chu ka insum zo lo țep alawm le, han nuih chhuah em kha chu a ni bawk silova" Lianhminga chuan a lo ti a.

Chutiang chuan țhiandun pathum te chu harsatna karah pawh kan nui leh mai țhin alawm.

Motor a kan chuan hnua ka phone ka han en chu Message a lo tam kher mai, Angela miscall nen..

Rangtakin ka chhang let vat a, "Ka țha e, ka lo buai deuh alawm mawle" tiin.

"Engnge i tih? Sawilawk ta che..rilru i ti nuamlo asin" a tih chuan ka khawngaih viau a, han hrilhlawk chi ni nghal lo chuan a, ani mi ngaihtuah ta reng reng chuan a buaiphah lutuk dawn a sin.

Lalrova chuan, "Naktuk zan chu lo che bik s'u aw, tukleh zanah khek ang" a'n tiah!

Ani hawchho leh maitur bawk si tan chuan a ngaihtuahna chu a awmrêng bawk a, Lianhminga nen ngawt chuan ek kan cheh zawk palh ang tih pawh a hlauhawm deuh bawk a tin ni.

"Rina'n naktukah lo thlithlai leh sela, a rem chuan zan lam nen, tichuan a awlsam em kha, zanin pawh kha duhaiin kan awlsam mah mah a nia.." a tih chuan Lianhminga pawh chuan a hnial hran lo. 

Muchung chuan Angela-i nen chuan zanlai pelhrak thleng chuan kan in message a, a rinloh deuh maiin a pasal neih teuh deuh chu a chanchin ka zawt thut a, sawi nuam a ti lua lo. Ka zawhchhan tak erawh chu ka hre ta tho a.

Kan bitum leh tur te veng an ni tih chu.

Zingah chuan duhai hmain ka u fapain min kaitho pek a, "Â pute, sikuti-ah ka chuang duh.." a'n ti mauh pek a! Naupangte mah nise bula an din ve reng chuan ngaihsak loh theih pawh a ni lo, tukdanga mumang ka la zam nuaihna tur hun angah chuan phak zet chuan ka tho lo thei ta lova.

Kan putu in Sikuti chuan kan inphurchhuak ta lawp lawp kha a nia, zingkarah kan vengchhung na na na chu kan fangchhuak hman der mai. A țhiante an au kual vel, hlim lutuk chu hmuh a nuam ngei mai, tuktin a zawngchhang ang tih chu a hlauhawm ang reng.

"Mama, ka pain lo haw chho leh phawt mai sela a ti deuh che a.." tukțhuan kan ei meklai chuan ka u chuan a ti a.

"Haw chho ang, mahse karhnih hnu velah emaw nise, thil tihfel neuh neuh ngai ka nei a" ka ti liam mai a.

"Ru leh nghal dawn mi?" a nui pawt pawt a, "Ha..Driving Licence vel te buaipui a ngai alawm, ruk te pawh kan ru chho mah na, a țuldan a zirin" ka ti a.

Chaweikhamah chuan Lalrova thuchhuah angin ka hna tur chu enfel turin ka inkhalh chhuak a, chawhnu lamah Learner's ka dil te pawh chu ka han ngaihven ang chu ka ti deuh.

In ka zawn zinga ka va hmuh hmasak ber chu Lalchhuana MCS tih intarna a ni. A lian a, an neihnun hmel fu bawk. 

An in piah deuha dawrte-ah chuan kuhva lam pahin ka teilut a, zial te chu kan zu khawmuang leh rih a, "Pu Chhuana chu in a lo nei ropui hle mai a, amah hi a pension tawh em khah" tiin dawrnghaktunu chu kan zawt ngawt pek a!

"A boral daih tawh alawm, nikum hmasa nge hmasa leh zawk kha aw..ka chiang ta lo" a tih chuan ka hnar a lian det.

"A nih chu mawle, a thi tih pawh ka lo hre ve hleinem, a BDO lai khan kan block lamah khan a rawn awm ve reng a.. Engnge a fate ho hi...?"

"An fanu upa ber khan pasal a nei tawh a, Mawitea leh Rinawma leh an te ber hmeichhia chu an la awm, pakhat chauhin kawppui a la nei a nih chu" tiin. Ka rin aiin min chhang țha duh phian a.

Rinawma ngei chu a ni nizana a țhianpain a sawi kha. 

An kawmthlang lamah pakhat chu an awm tih ka hre leh a, pakhat chu khawilam nge tih ka hrethei ta hauh lo mai a, ka vahkual ngial paw'n beidawnna tizualtu mai chauh a ni.

'A pawilove, hriat chin hi chingfel leh phawt ila a nimai' ka ti rilru ta ringawt kha a nia, duhthu chu a sam ta chiah lo deuh a ni.

Chawhnu lamah Transport office-ah ka han in lam fel a, in lam panin ka haw leh ta a.

Tlai chaw kan eilai chuan ka u fanu pawlruk zirlai chu a luak chiam mai pek a, damdawi kan pek hnuah pawh a reh theihloh vangin Casualty lamah A nu nen kan tlan chhohpui a, a khawsik a lo sang bawk si, a va han buaithlak țhin em ve aw..

Zan dar 9 vel thleng chu casualty-ah chuan an han enthla deuh a, a ziaawm chhoh tak avangin "admit in ngai lo' tiin min hawtir leh a, a lawmawm viau nain ka thiltih tur erawh a sukuk phah ta.

Inlamah chuan harsatna kan nei zui hranlo nain han chhuahsan chi an ni tawh mang silova, bet lo ru zet chuan inah ka tawm ve ta reng a. Tihtur a va han vang si ve mawle.

Dar 11:00 vel ațangin Angela-i nen chuan inbiak kan țan ve leh thei ta a. A ziaawm viau.

Rinawma hriat a neih leh neih loh chu ka zawt var a, hrelo a tih zet hnu chuan, "E..Mawitea nau a niang chu.." a ti a.

"Tu Mawitea..?"

"Hm..nangmah vanga ka chân tak kha.." a'n ti duah a.

"E nih chu" ka ti ve mai a.

"Enga tinge min zawh teh daih?"

"Hm..i hreduh kher kher em? Ka sawi chak vaklo a nia" ka ti a.

"Hre duh thove, a pawi lemloh chuan.." a ti a.

"Hman zana min vautu te zingah khan a tel a..." ka ti a.

"Ehe... a van mak reuh ve, an zakthei lo e.." a'n ti ngawt a.

"Ka awmdan hi an lo chhui reng a nih hmel tlat, a u dah zero tu te kha ka lo ni ve sia, an lung a awilo niang" ka ti mai a.

"Engtin tak nge an vau che ila sawi miah lo" a ti leh a.

"Lalmuanpuii hi lo beisei tawh suh u min tia"

"An va han zaklo tak!"

"A tir kha chuan i nu tihtir a nih ka'n ring deuh a, i ex te lam hi an rawn in rawlhngam kan ring vaklo a, mahse, anmahni lam a lo nih hmel zawk sia.."

"Ka nu nen an inbe reng alawm, amah hian a ngaizawng niberin ka hria, a tihtir a ni pek ang"

"A nih tak chu..an la beidawng lo aniange, beidawng  hnap khawpin kan han siam ange, chuan ka haw chho ang" ka ti a.

"Engnga!!!!!??" a ti a.

"Ka haw chho țep, ka tihtur ka tih zawhah ka chho ang," ka ti leh mai a.

"Computer i zir dawn ni law mi?"

"Dawn leh lo, ka pain min ngaihtuah deuh a niang 'lo chho leh phawt rawh' a tia"

"Naa...chuan..?"

"Ka chho ang, karhnih hnu velah emaw.."

"Nangmahin maw..?"

"Ka hre nang, sikuti ka ken chuan keimahin nimai ang chu..mi phurh a peihawmloh e a hlatham si"

A reh zui vang vang a, a muhil emaw ka tia, online a la inti vu bawk si. A mutthilh san a nih ka ring deuh ngawt a, "Muttui le" tiin message hnutchhiah tur ka va thawn a.

"La mu suh"

"E..i muhil maw ka tia, min chhang bawk si lo a"

"Ka țap..nangmah vangin" a ti leh ta hnâp mai le..

"Ka hau hleinem che..tinge ilo țah?"

"Min hawsan i tum a nih kha..."

"Kan inhmu thei bawk silo, message ringawt chu kan khua ațang a in message nen a in ang tho lawm"

"Ang looo...Aizawlah i awm tih ka hriat chuan ka rilru a nuam asin, i haw chuan rilru dang i put ka hlau.."

"Pu dawn love a... i tan ka lo kir leh dawn alawm, ka paten min hlauhthawn pui deuh niin ka hria a, Lalrova hian a han sawi a ni mai thei.."

"A ni bawk si..mahse, i awm hlat daih chuan..."

"Reitak chu ka awm lovang...Thlahnih emaw vel a niang, tihtur a awm chuang silova, helai boruak hi han zia deuh se..."

"Ka thi hman ang!!"

"Ha ha...hman love a...lungngai lo la, ka lo kir leh dawn alawm"

"I rual chuan min hruai ve nghal mai la.."

"A fuh ber lo alawm, kan inchhaihkawlh mai mai dawn a, a bul ațang bawkin.."

"I chhoh hmain vawikhat tal ka va hmu chak che em..." a ti vawng vawng a.

A tuk chu ka mu nileng a ni ber mai, ka u chhuah a duh si avangin a fanu damdawiin lama kan hruai kha ka lo awmpui a, kan in mutthilh chhawk a ni ber e.

Rin ai takin a rawn haw har phian a, chaw te chu ka lo chhum hma ve e ka tia, țhutthlengah ka lo muhil leh lawi bawk si, a kang ut rim nam rum rumin ka nau awmin a lo suan a niang, ka harh chuan 'engnge kang awm?" te ka ti hel hawl a!

Ka u lo thlen hnu lawkah chuan ka pa a lo lut ve heu mai a! A hnungah kan khawlama ka țhiante pathum an awm bawk! Ka hawi phawk hraw hraw kher mai.

Chaw te chu kan han chhuan belh leh nawk nawk a, Lalrova hmangchang hriat zarah Vawksa rep an rawn lei thla bawk a puar el euhin kan lim leh tak nghek kha.

Rilru tinuamlotu deuh pakhat chu ka pa lo tel ve chu a ni. Tihtur pawimawh a nei lo in ka hre bawk si. A țawng hmangah chuan mi hruaichhoh a tum hmel bawk si. Tihtur tih zawh hmaa mi hruai chhoh teh chuan aw..

Buaina pakhatna, zanriah kan eikham hnu lawkah ka pa chuan vengdanga kan chhungte tlawh turin 'min han hruai teh' a'n ti nghal pang a! 

Lalrova chu "Engah nge i rawn phurhthlak?" te kan ti leh rih a. Ani lah chuan, "A tumlawk pawh ka hre lo, a ngaihtuah deuh che niang, kan țhianho kal tur hi min hmu a, a lo phar ding a, 'min lo nghak rawh u kan insiam ange' a tia.." tiin a sawi a.

"Hemi te pahnih te hi..a țullo lutuk" tih pahin Chhuana te pahnih chu ka kawk bawk a, "A phûr phûrah an țang a, chuan man pawh an chawi duh bawk silo, hawlam chu vawkphurh tawh ila țha ang" nui hui chung chuan a ti a.

A hma ni a ka thlithli lawk tawh chanchin chu ka hrilh zung zung a, 'Kan chhuah hmaa in chhuah chuan ka pa ngaih a țha dawn lova, ina lo awm tur angtakin lo awm phawt ula, ka pa ka dah leh hnuah ka rawn zawm ang che u, in kal dawnah Lianhminga bia ula" tiin. Lianhminga number pek pahin an in awmna leh an hming te chu ka han hrilh fiah hlawm a.

Ka pa nen chuan kan inphur chhuak ta vang vang a, kan lenna te pawh chu ka hmelhriat ve lem hlei lova, phone ka bih sek a, mawng a hawlh ang sek mai ka ni ta!  

Dar 9:00 rik hma deuh chuan kan haw thei ta hram a, zawng hnuhnung ang lawp lawpa kan inphurh haw tak kha.

Inah pawh zui lut duh lovin ka tawi khawmuanga, a lut fel ta maw tih ve leh ka țhian te zawm turin ka thlawkchhuak a ni deuh ber e..

                          Chapter

                              - X -

Lianhminga nen chuan kan inbia a, office kawtah an chân mek thu min rawn hrilh a, an sawina office lam pan chuan ka tlan leh ta vang vang a.

Lianhminga leh Mama lo awmnaah chuan ka va fin a, Lalrova leh Chhuana chu an lo kal hrang ve ngei chu niin.

Office chu a reh deuh ruih a, room pakhat eng pap mai chu a thim hun an nghak a ni ber mai. Midang awm ve awm ang an lan loh vangin office-a luh chilh mai chu ka rawt a. Lianhminga pawm zawng tak a ni.

Gate chu kalh lovin a lo inkhar ringawt a, thawm dim tak chuan kan lut ta țham țham a. Chhawnghnihna kawngkapui chu a lo inhawng huauva, chulai chu kan kal tumna hmun chu a ni.

Room chhung chu ka bih dâk dâk a, kan awmna hnungchhawn zawng chuan mipakhat hian computer-ah hna lo thawk mawlh mawlh chu niin. Mawia zawk nge Rinawma ni ta ang le..?

Amah enreng chung chuan kawngka chu ka kik kauh kauh a, phawk zet hian a rawn hawi hru a, "Mawia i ni em?" ka ti tawng a.

"Aw ni e, engnge ni ta?" pangai tak chuan a rawn ti mai a. Hlauthawng hmel pawh a pu chiah tawhlo.

"A! Thil eng emawah han biak lawk che kan duh deuh a, in venglamah kan lo kal a, helamah i lo awm daih sia" nelawm tum tak chuan ka han ti zet a. "Nia, hna kan ngah deuh a tunlai chu, engnge min hmuhduhchhan chu ni a?" a ti a.

"Hman zanah hmeichhia vangin vau kan tawk a, kan lawm zat lo deuh a ni" Lianhminga chuan a lo ti nghat a.

"Ka van hrelove chutiang..?"

"Kan hria alawm keimahn'in, Bike pahnihin mipa pali an nia, an bike number leh hming nen lam ka'n hrilh dawn che mi" ka lo ti a.

 "I nauteho i tir a ni law mi zep duhlo mai rawh" 

"Ka hriatpui lo chutiang," a la ti hram ka ti. Chhuana chu a rawn pen hnai viau tawh, kan hmaa țhu pawh chu in ring lo angtakin a lang na chu a boruakin a zir em avang chuan a inring ru ve lo thei lovang.

"Lalengmawia i nih ngai chuan i nau Rinawmate țhianho Angela Lalmuanpuii bialpa vau turin i tir" ka ti ram ta hmak a. Ka tiang chu ka vilik zuau zuau a.

"Kei hi Angela-i bialpa chu ka ni. Tihbuai che u hi ka duh loh vangin ka dang țang țang a, ka duhthu pawh hrilh lovin ka haw chhoh san a, ka haw chhung thla hial pawh a veichhung khat biak pawh kan inbe eih hleinem.. țhataka in inneih ka beisei laiin rinloh takin amah zawk kha a rawn lang ta hlawl a, chuti em em lo hnar chu ka ti ta a nih kha...

Țha takin nangpawh a hmain a hrilh che a, ințhen mai a duh thu te pawh, inneih țhulh mai tur te pawhin. I duhloh zel vanga tun hi thlen ngai ta kan ni. Keichu ni ila hmeichhiain heti hian min ti ve se chuan ka zak lutuk hi ka inawkhlum duh hial ang.." ka ti duah a.

A ngawi ngal a, a insehruh țeuh tih chu hairual a ni lo. "Vawikhat pawh hetiang hi kan tawk leh a nih chuan a pawikhawp ang" Lianhminga chuan a lo ti bawk a.

"Ka tihtir a nilo ka tih chu" a la ti țalh.

"Engnga?" tih pahin Lianhminga chuan a va zuan phei a, an ri ta rum rum mai a, Chhuana nen chuan kan han kaițhen leh rih a, an ding sai dun hlak hlak mai.

"A nih tu tihtir nge ni a?"

"A nu ruahman vek a nih kha..." a ti hmuk a.

"I naute i tir tho alawm nangmah paw'n"

Chhanna awm ta lo.

"Fair takin ti ila, Angela-i te inah va kal ila, ani'n a duh zawk lo thlang sela.." tiin ka cho a.

A melh ngai a melh run ringawt a, tlâwm hmel phei chu a pu duh bik țhak nang.

"A ke na ber hi in ngamtawk chu a nih hmel sia, a phênah hian mi engzatnge ding inhriat duh chuan buaina insiam leh dawn nia, a tawp kan thleng rat rat tawh ang, kal ang. Hmeichhe pakhat vang mai maia mi ka vau e te lo tih, nep sazu lutuk..." tih pah chuan Lianhminga chu a chhuak zui daih a, engmah sawizui ta biklo chuan kan zui chhuak ve nghal a, step a kan chhuk laia chowkidar niawm tak lo chho chuan mi a enduh hrak hrak khawp mai.

Lianhminga chuan Lalrova te awmna lama kal leh a rawt a, țul bera ka hriat tak loh vang chuan anni pawh kan ko ta zawk a. Mualpho te pawh a hlauhawm, a chhanber kan hre ta bawk a a tawk viau e tiin an lungawi vak lo chung chu ka hawpui a.

"Naktukah hawchhoh tur" ka pa chuan a ti bur mai le. Ka han hnial ve ngial a chu țanchhan mumal ka nei silo. "In awm dan hi a țha lo tawp" a tih takah chuan hnial ngaihna hre lovin țhianteho nen chuan kan inmelh hrek hrek ringawt a.

Zana Angela-i nen kan inbiak pawh chuan hnem ngaihna ka hre vak lo. Haw chho se min tih viau rualin awmhla turin min duh bik bawk si lo. Rilru a ti nuam lo kher mai.

Chhuatah chuan kan țhianho chuan kan mu țham a, zandangah titi tur inchuh țhin kan nih vei nen chu zan zet chu kan muhil der vek! Muhil thawri hriattur lah awm a chuang der bawk si lo.

Zingah chuan ka tho hma kher mai!

Khawfing pawh a chah hma hma chuan rangtakin ka inperh thova, Angela-i te inlam pan chuan ka inkhalh chhuak vang vang a. Ka hawchhoh hmain a hmel vawikhat tal ka hmuh loh te chuan le.

"Kawngka hi Tala-in an kalh vek, tukverhah bar a awm vek bawk sia" tih message chu an inbula ka din hnu lawka ka dawn a ni. Chuti a nih chuan inhruaichhuah ngaihna chu a awm lo phawt chu nia! 

An choka lama tukverh lian vak lovah chuan kan in dinchilh ta ran a, thawm a rin a hlauhawm bawk si. Leilung a lang țan tih te chuan kut in vuanin a mittui tla ka thlir a ni ber a. Hnem leh chuang tur ka awm hran lo. 

"Han awmrei suh aw.. , chho lo mai la..."

"Chu chu ka duh a, mahse helaia ka awm hian buaina tur hlir hi a ni bawk sia. Ka chhungte hian min ngaihtuah deuh a nih hmel, bakah han chho ila i nute lungawi lo pawh a zia ve deuh ang chu, ka awmlo tih an hriat chuan i tan pawh a țha ang, an inthlahdul phah ve deuh ang a"

"Chu ai chuan engemaw chang tala i hmel hmuh theih hram hi ka thlahlel zawk asin. Mahse, thilțha zawk turah ngai ang, ilo kir leh ngei ang tih tal tiam rawh"

"Min ring rawh, ka lo kir leh ang mahse keimah chauha haw leh tur chuan ka lo chhuk tawh lovang, ka ke hi zaiturin lo chhuk leh a ngai dawn a, chumi ka dam veleh chuan i chhungten an phal emaw phallo emaw kan innei tawh ang"

Ka kut chu a hmer vawng vawng a, a biang chuan a nûl a, a mittui far, luang ngiai ngiai mai chuan a thinlung rûmna chu a tarlang chiang tawk viau.

Ka kut veilam chuan a tukkhumah dawmin rem leh remlo chuan iron bar karah chuan kan in fawp vawng vawng a. A mittui ka hruksak hnu chuan khua a var chiang ta viau mai.  

Ka kal liam tur ka va hawilet leh chuan bar vuanin mittui luang zawih zawihin min lo la thlir reng a.... Ka mittui chu ka dang hman ngang lo a ni.

"Sikuti chu keng chho lo mai rawh, khilam kawng a chhe bawk si. I ti chhe mai mai ang, a țul tak leh nakinah Marova'n lo hawn chho mai sela.." ka pain a tih teh tlat avang chuan kan inneitute garage-ah chuan kan nawr lut ta kha a nia.

Nidang ang chu nise Sumo chhungah kan ri leh luai luai awm sia, tunah chuan ruangphur motor ang chauh a ni. Passenger dangte pawh an țawngbik em em bawk silo.

Ka pa la châm khawmuang chuan Angela-i a rawn hruai haw tur ang tein ka'n ngaihtuah a, chu lah chu a rinawm loh nasa mai si.

Ka room ka han lut te chu ka bing mum mum hialin ka hria. Chaw pawh ka ei lo, ka mu zawi hle a ni mai.

Ka nu chuan bawnghnu leh artui chhum hi ka bulah chuan  rawn hung a, chu em zawng a hmaizah vangin ka eisak hram a ni.

Muhil thei tal ila chuan a ziaawm tur asin mawle. Chu lah chu a hnai lo nasa mai si! 

Khumlu a thlalak tar en tum chuan ka han inbeng kang a, pakhat chiah a lo awm tawh! A tla nge mawni le tiin rangtakin chhuat chu ka han bih thuai a, engmah lah ka hmu bawk si lo. Amah Angela-i thlalak pawhthler zawk chiah kha a lo awm bãm a, ka khawih a, ka chûl lo thei lo a ni.

Angela-i lo kal phei chu ka thlir reng a, chik leh zuala ka en chuan a dulah chuan ka fa ngei a pai a ni tih hairual a awm lo. Nidang zawng aichuan ka hmu țha zual a,  chutia ka lam pana a lo kal mek lai chuan kan hun liam tawh te chu ka mitthlaah alo lang zut zut a, Lalrova te nen a kan han inphur chhuak lawp lawp te, a nu sual zia te ka ngaihtuah kai zel a. Mi vannei tak ka lo ni.

A lo hnai zel a, a thlan tlain a biang a tih tai ték mai te chuan a va'n ti hmelțha leh zual tak em! A sam chhawl leng huih pah chuan a rawn nui ver ver a, chutiang reng renga nuimawi chu ka la hmu ngai lo asin.

"Umhhh..." tih vak pah chuan ka biangah a rawn piai chiam a, nâ ti viau mah ila ka haw phal miau silo.

Ka malchungah chuan țhuin min kuah a, ka chalah a fawp a, ka biangahte. Ni, ka hmuiah pawh duat takin a fawp alawm. 

Ka mal a țhutna mu chur chur vang chuan ka țhangharh hlawl a! Aw..Angela, mumang mai atan chuan ka va ui si em..

Kan inbe fo va, ka tana hriat hrehawm tur thil leh a hun hman dan hrehawm a tih thu a sawi ngai hauh lo. Nuamin a khawsa lo tih hrereng mah ila a rilru puitlin zia ka hriatchian phah hle a ni.

Ka pa lo haw chho te chuan thuthar a rawn neih beiseiin hnaih țha duh chiah silo, hnaih chak bawk si hian a hmuh phakah chuan ka tawi kual hruk hruk reng a, "I kekawrte theihnghilh ka lo hawn a nia aw.." a ti. Chu zawng chu.

Beiseina hi vawmbo ang duak mai a nih chang a va tam țhin em! Beidawnna ka țhutpui a, chauhthubarawh suangtuahin, rinnain mitthla ka thlir lo thei silo.

Ka pain 'school-ah ka ai va kal rawh kan Headmaster te hnenah pawh ka sawi lawk vek kha' a tih vang chuan Middle school 'sir' te chu ka va ni leh ta lawp lawp a, a khawilaiah mah chuan han hahchawlhna hmun reng a awm pawhin ka hre nek lo.

Țhiante nena khawimawlai hmun fianrial deuh a rialno ri leh Țingțang hrui ruk inchhâwn kara ngaihtuah mumal nei lem lova han zai bawng bawng mai chu nuam ka ti ta berin ka hria.

Zankhat chu Lalrova te in ațangin dar 11:00 bawr vel hian ka haw a, an inah signal alo țha vaklo nge ni Angela-i min rawn biak a tumna message chu a lo lut țuk țuk mai a, zandangah phone call-in kan in be ngai silova, ka lenchhuah zan ber kher a.. a va'n zialo țhin ve le.

Muangchang lo chuan ka phone lêt nghal a, țap țeuh hian min lo chhang a, theih ang ang chuan ka'n hnem mawlh mawlh a.

"In in bulah darkar khat chuang ka awm tawh"

"Ka u te engatinge i kaihthawh mai loh, engtinnge i chhuah theih?"

"Țhutkhawmna pindan kawngka an kalh lova..Rin, i bulah ka lo kal dawn aw, ka awmthei tawh lo"

"Lutuk.. ka u ka lo phone ang a, han lut fel phawt teh, chuan tihdan kan ngaihtuah dawn nia"

Ka u chu ka han phone a, a ring ral țhak țhak mai a, vawithum lai a ring ral hnuah a fanuin a lo chhang ta hram a, "Bawihi i nu kaitho rawh biak ka duh" ka tih chuan a kaitho ve mai a, thil awmzia ka hrilh thuai thuai a, rangtakin Angela-i chu a hruai lut a.

"Naktuk zing a hma thei ang berah ka sikuti khan ilo chhuak chho mai dawn nia, kawnglakah petrol i thun ang a, daih loh palh awm thei, a hmathei ang berin.."

"Tunah ka lo chhuak mai ang.."

"Hei 12 a ri dawn tawh a, tunah chuan a chi loh ang, nangmah chauh i ni bawk si"

"Naa.. ka chhungten min rawn zawng ang tih ka hlau a nia"

"Zawng lovang, an la tho nang, zingah an thawhhma a lo chhuak turin in ring la, an zawn che paw'n sumo vel bak an en dawn chuang lova, hlauh tur a awm lo" ka ti a.

Chutiang chuan kan inbia a, țhatakin a mu mai emaw ka tih hnuah ka muhil țan dawn tihah chuan min rawn phone leh a "Zemabawk țawngțaina ka thleng chiah..."a rawn ti heu maiah!

"Awle, fimkhur la, hmanhmawh lovin muangchangin lo kal rawh aw" ka ti ta ringawt a. 

"Ka ngai tawh che...muah" a ti zui a.

Ka muhil tawhlo chiang kher mai! Ka u chu ka zu hau leh rih a, "'Rina'n chhuak nghal mai turin min tia' a ti nih kha " a lo ti tum hrang bawk si. 

Thla a ti muang lo viau a ni.

Biak ka tum khat tawk reng a, a tlang thei bawk silo. Kawng a hla tham bawk si.

Ka pa zing rawn tho chhuak hnenah chuan thil awmzia ka lo hrilh zung zung a,  engtia han tih theih lah a ni chuang bawk si lo. 

Hun a va han rei duh kher ve le e.

School-ah pawh kal duh lovin inah chuan ka tawm reng a, ka pa chu a kal ta a niang a reh daih mai.

"Tluangtakin a lo thleng ve mai ang ngaihtuah lutuk lo la..." ka nu chuan a han ti tak nain ngaihtuah loh theih lah a ni bawk silo.

Dar 11:00am chho ațang chuan a rawn thleng țep tawh ang tiin ka dâk fân ruai tawh a, ka nghakhlel tawh lutuk chu awm ngaihna ka hre lo a ni ber mai.

Inchhungah pawh ka leng meuh tawh lo chu a ni e. 

Kawtchhuah lamah chuan amah hmuak turin ka chhuak phei ta nge nge a, a rawn lan mai ring chuan thawm riva ka ngaichang reng a, ka lam pana thawm ring tial tial lah chu a awm thei bawk silo.

Dar khat a ri ta!

A rei ta viau, kawngah chhiat a tawk ta mai emaw ni le. Ngaihtuahna a dik lo zawngin a kal lo thei tawh lo. Engtinnge a awm ang aw?

Lalrova te lo chhoh ni a nih tak kha maw..tiin ka han be dawn a, ani lah chuan phone a la thei heklo. Rilru a ti nuam lo zual.

Minute 10 hnu velah chuan Lalrova chuan min rawn phone lêt mai a, Angela-i Sikuti a a lo chho thu te chu hrilhin a hmuh leh hmuhloh te chu ka zawt a, a hmuh loh thu leh an hmalamah a awm a rin thu te a sawi luam a, ngaihven deuh tura ka chah hnu chuan, "Khaih..khuruai țhin lo la, i nghakhlel lutuk a nih kha, a rawn thleng ve mai ang, a nghah lam kha lo taimãk phawt la.." tiin phone a dah a.

Lalrova nen kan inbiak chinah chuan rilru a zia ta deuh. Lalrova sumo hmaah a rawn tlan ang a, Lalrova chuan rawn chhawmin, min hmuh ve leh mo lawi tur hruai ang maiin a horn a hmet leh chiam chiam emaw a ni ang a..

Ka nui ver ver a.

Chutiang suangtuahna leh beiseina chuan zîk ngui lutuk tur lak ata min kaiharh a, hlimtaka intawh leh beiseina chuan hun kalmuang lutuk te pawh a ti ziaawm hialin ka hria.

Dar a kal thui ta viau, ka bul velah chuan zialbung ka thal rum tawh. Lalrova uangin a rawn hmanhmawh pui duh lo a ni ngei ang le, he pa em em țhin hi chu aw.

2:30pm.. 3:00pm a liam zel a.

Dar 3:30 a ri ta hial mai! An lo thlen a hun daih tawh, nidangah pawh dar 2-3 inkarah an rawn lut hman ziah a lawm. Em em bawka mawle. An rawn thlen hun chuan an va han chak lo rua e aw. Ka nghak tih a hriat vangin Lalrova'n a muanpui tih hriatreng chuan.

Hla taka motor thawm ri dar dar chu Dar 4 ruaiah chuan ka hre ta țawk a, chu ngei chu anni tawh ang.

Sikuti sen vir ver nena lo thleng tur mawlh chu a ni ka hmuh chak tawh. Lo va tlan hnaih ruak ruak mai ka duh a, a em em deuhin ka hre bawk si.

Hun rei phei chu a liam hauh lo, Lalrova motor ngei chu a lo lang ta! Mahse, khawnge Angela-i chu!!??

A awm hauh lo a nia!

Motor chu muangchangin a lo hnai zel a, ka hma pensawm awm velah chuan a ding dat a. Ka bul pawh thleng lova chutia an ding ta ngawt chu makti zeta ka enreng lai chuan Lalrova a lo chhuak a, amah leh mah lo angtakin a ke chheh chu a phûr hmelloh viau hian ka hria a, min bum leh pek dawn niang! 

Ka mitah pawh en lo chuan min rawn kuah chawt a, "Țhianpa" tiin a insût ta hlawp hlawp hlawp mai a, mi tider tur chuan khati em khan a khawsak ka ring bawk silo. Hrethiamlo zet chuan "Engnge awmzia, engatinge?" ka ti chul a.

A gamchha chuan a mittui hruk mawlh mawlh pahin ka banah a kai a, "Angela-i saw han en teh...a awm tawh lo...a kal tawh" a ti lawi ruai a. A pen sawn tawh lo, a țhuhniam a, a hmai a hup zui a..

"Engnga tinge?' tih pah chuan a sumo lam pan chuan ka pen nghal dawrh a.

Pakhat chuan sumo kawngkhar, driver hnung chiah a mi chu a lo hawng var a. A chhungah chuan....

Puan a hmanhmawh taka tuam tih hriat reng hian an lo mut a, an khuhna puan chu haikiangin aw...Angela-i hmel dâng lêp mai chu nunna nei lo a ni tih haider rual a ni tawh lo.

Engtinmah ka awm loin ka hria! A mak lutuk, țah ngaihna pawh ka hre lo, a biang chu ka chul ka chul a, ka nghahhlelh em em lo thlen dan chu a va hlimawm loh ve le.

Khawilam ațangin nge maw mi an lo punkhawm hman ni, kan zi luih luih maiin ka hria. Ka pa chuan ka darah a dawm a, țhiante hmelte pawh ka hmu alawm.

Motor ațanga Angela-i an han hlang thla chiah chu ka harh chhuak ta!

Angela-i a thi!

'Nilo, Angela.... a ni theilo. Ka lo hmuak che, ka lo nghak reng che sin. Engatinge khatia i awm, min chhang rawh Angela.. Ka koh che hi..min enla, nui ta che.. engmah hlau suh..ka bulah i awm tawh alawm Angela..min chhang dawn lo mi.. mawwhhh...?'

Ka harh leh meuh chuan ka u Tei te inah ka lo mu a, zan dar 11:15 vel a ni ta awm e.

Lalrova leh ka u Tei leh Mama.. pawnlamah midang titi thawm awm tak pawh ka hria.

"Țhianpa i harh maw, i țha em?" Lalrova chuan a lo ti thuai a, "umh" ka tiin ka hria.

Thawm awmloh karah chuan hlataka khuangri dap dap mai chu a hriattheih a, chu thil chuan min va run si em! Intihpachan ngial ka tum chung pawhin ka thei ngang lo a ni. Ka mittui chu a sur zung zung a,  ka sa pup pup hian ka hria a.

Tei chuan ka lu-ah kuahin min chul a, duhtawka ringa țah hawk hawk mai ka va chak em aw...

Ka insum zo ngang lo chu ka țap chhuak ta hawk a, ka tawt lutuk chu a ziaawm viauin ka hria, mi thilsawi pawh ka man țan.

Thingpui te min intir a, vawklubai niawmtak te pawh ka eiin ka hria!

Ka pangai ta viau..

"Țhianpa, engnge thil awmzia ni ngai, min va'n țhawng ve le..?" tiin Lalrova chu ka han zawt a, sawi chi em ti niawm fahran chuan Tei chu a mitmeiin a rawn deuhin ka hria.

"Sawi rawh sawi rawh, ka țha lawm, hriat leh tho tur a nia" ka lo ti a.

"Kan inbiak lai kha zunram thiara kan dinlai a nia, kan rawn tlan zel a, khawțhenawm thleng pawha ka hmuh tak lohah chuan tluangtakin a rawn thleng mai turah ngaiin ka rilruah a awm zui lutuk tawh lova.

Kan rawn tlan zel a, Pu Ringzela te huan thlen hma deuh, dâm phei kawng nâl thei deuh lai kan thlen khan a diaklai kan chhuak țep tihah ka passenger te chuan 'ding teh" an ti chul a, nala tan ka hlauh vang chuan ding lem lovin a diak chin kan pelh hnu chuan ka ding ta chauh a.

Kawngthlanga sikuti liam lek lek chu kan din chuan ka va hmu ve mai a, hlauhna min țham nghal ngawt a, Angela-i a nih loh reng ka ring lova. Sikuti bul kan va thlen chuan hlauh ang ngeiin i sikuti ngei a lo ni bawk si. Kei tak pheichu che tur ka awm tawh lo. Ka țhu veng veng ringawt.

Pu Rina te ho zam a lo țha hlauh a, ruang emaw hmuh mai tur a awm bawk siloh vang chuan kawngthlangah chuan pathum lai chu an liamthla nghal a, thui pawh a lumlo, Changel hung hian a lo dang a ni awm e. Kawngthlang maia lungchungah chuan a invawrh tlakna lamah a insawh a nih kan ring ta ber a, a lumnaah kha chuan thihpui tham tur a ni lo"

A sawi tawp lam chu ka hre zui ta lo. Mittui chu ka chhânna awm chhun a ni ta mai bawk si.

Lalrova chu zial ka dil a, mittui tla pur chung chuan ka han zu leh rih a, ka ngaihbel nge pawh ka hre lo ka zia phah viauin ka hre deuh ka ti.

Zan Dar 1: 00 Ka inphih harh a, ka pangai deuh hnu chuan kan inlam panin kan chhuak thla ta a, ka va'n huphurh tehlul em!

Kan thleng dawn țep tihah chuan motor pahnih hi a lo thleng ve chiah bawk a. Chu bolero ka hmu chiah chu ka sa pup a, ngaihtuahna hmang hman lo chuan ka tlanphei thut pek a, kan kawta lo ding laih ho chuan min dawm bet rang kher mai. Țhenawmah min luhpui nghal a, ka chhuah hlau tak chuan min dawm far a.

"Țhianpa khatiang tur a ni ngailo, engmah awmzia awm lo, a nih tur ang a ni zo vek tawh, insum mai kha mi puitling zia zawk a ni" Lalrova chuan a ti chat chat a.

"Kha ramhuai pitar nu khan alawm Angela-i tihlum le!" ka ti tuarh a.

"Kan hria alawm, kan hriatpui che.. " tiin dam dap chuan min zilh mawlh mawlh a. 

Naupang chhia takin 'engtin mah ka tilovang' ka tih hnuah min chhuahpui ta kha a nia. Ka insum thei ange maw..!

Kan inah chuan kan inzuilut ta! Min en țhup niberin ka hria. 

Ka khuma Angela-i ruang an zalh chu ka enrei ngam thlawt lo. Tlanchhuah leh mai ka duh, ka talbuai ange.

Chutih lai chuan Ramhuai pitar samkirin Angela-i biang a chul lai ka va hmu fuh kher pek a, hnuk ulh lam a lang leh tawh lo, ka pan phei ruak a, an bul ka thlen chuan Lalrova chuan ka kawngah kuahin min pawtding chiang kher mai! Fel awm tak chuan min kuah ding ta hle hle a, midang chuan an hrethiam vak lovang, ka â deuhvah an ngaiin ka ring. 

Ka pa te nen chuan an han inbekbawr a, pawnlamah min chhuahsan ta. Ka thawl ta huai mai.

Khum bul țhutthlengah chuan min țhutpui a, ka entlawk tlawk a ni ber mai, ka ringthei lo a ni hetiang hi chu aw...

A biang ka chul a, a hmuite.. a pang vawtthlem maite chu tih lum tumin ka bei a...

A kuta chelhsak tumin puanhnuaiah chuan ka zen lut a, eng emawni a hum chu laksakin ka han en a. Khumlu-a kan thlalar tar ka hmuh zawh loh kha...

'Khawngaihtakin Van angel thianghlim te  u lo hruailet hram teh u......'

Ka țhian te chuan ka zakah dawmin min kaichhuak a, khua a lo var fel uar tawh chu niin. Ni lo chhuahna tur kawl eng uau mai te chuan mawina reng an nei ta lo.

Tei te inlamah bawk chuan min kalpui leh a, chutah chuan Ka pa Zara chuan a thupui fun min lo țhehsak a.

"A ruang hi Aizawl lamah phurthla se la," a ti chiah tih chuan "A theih loh" ka ti nghal bur a.

"Rina, keini chuan thluakfimin kan ngaihtuah a, țhaber tura kan ngaih chu i pawm tur a ni, hetah phum ngawt ila enge awmzia awm, engatan nge ni ang?"

Chemte a vih ngawng ngawng ang mai ka niin ka hria.

"I hmalam hun thuitak kan ngaihtuah, i buaina awm thei tur thlengin, i duhdan tihpuitlinsak che hi engtiklai pawhin nuam ka ti, ka duh reng reng țhin, mahse, i tan a țhat leh țhat loh ka ngaihtuah hmasa țhin tih i hriat kha..." 

Ka lû-ah chuan a chul a, a lamah chuan min pawt hnai a, "Fapa, kan duh zawng zawng hi kan tihhlawhtlin chuan min siamtu Pathian hi mamawhna kan nei lovang..." a ti sap a.

Motor a Angela-i an han hlang tur zet chu ka insum thei thlawt lo, rawlchhuah meuh chuan ka țapchhuak a..Ka țhian ten min dawm ran a, rengial chu a kuang chhin pawh ka phal lo..Ka en ningthei lo alawm ka duh em asin..

Motorah chuan ka thawmhnaw an hlang vek tawh a, Ka pa pawh a țhu lut tawh, Lalrova nen chiah lut tur awm ang lut lo chu kan awm ta. 

Engnge maw min mawlh teh reng ni kal ve a lang tlat lo!

Darkar chanve dawn min nghah hnuah pawh che châng duh miau hek lo min tlansan ta a, a țul leh Lalrova motor a kal mai turin ka pa chuan min chahin ka hria.

Mi zi hut hut te chu an kal zeuh zeuh a, an tlem tial tial a, an bo zo ta, ka bula ngawirenga ding chu Lalrova emaw tiin ka han en a, Rinpuii min hrethiam tih hriat tak leh min lainat tih hriat renga lo nui sang mai chu ka hmu a, ka kut veilam chuan kuahin a chal ka fawhsak zauh a. 

Nakin lawka a hrin mai tur dulpuar luaha a pai ka fa ngei mai chu a kawrfual hak chhanah chuan ka chul sak heuh heuh a, lungawi tih hriatreng hian ka koki-ah chuan a bei tlân a...

Kum thum lai liamta a thilthleng min hriatchhuah tirtu thlalak kan khumlu a intar reng chu lathlain Almira locker-ah chuan ka kalhkhum ta daih a.

Rinpuii mittui luang ngiai ngiai chuan 'tunah chuan min hmangaih tawh tiraw..?' tiin zawhna min zawt hian ka hria a...

A bianga mittui luang hruksakin a hmuiah chuan duattakin ka fawp ta vawng vawng a... 

                  A TAWP TA....

©__________[ɐʞızɹɐp]__________®