MIN NGAIDAM RAWH

__________           __________

    [MIN NGAIDAM RAWH]

   15.1.2017- 28.9.2017

         [P.C Malsawmzual]

                Chapter

                      - I -

"Țhiannu.."

Chhanna ka dawng lo.

Ka lam lah a lo hawihek lo. A dinna a hmawr bawk sia, a ruiphur emaw a nih ka ring. A tlak mai ka hlau bawk si.

"Țhiannu.." muangchanga pan pah chuan ka ti țha leh a. Earphone hmangin hla a ngaithla nge mawni, ka țawng chu hreawm pawhin a awm lo. A earphone hrui awm ang pawh chu ka hmu bawk si lo. Ka hnaihchilh lutuk chuan ka tiphuzawk anga a liamthla daih ang tih ka hlau bawk si.

Synod Hospital Durtlangah ka patea thihngam a nain a awm pek a, chhungkhat hovin kan menpui laih laih a ngai fo mai a. Chuta ka hawthla, zan dar 12 pelh tawh lama Durtlang kham kawngchhova thil thleng a ni ka sawi mek hi.

Khua a vawt hran lova, khâm tihtakah thli erawh a thaw heuh heuh reng a. Tumah ka ruala haw tur an awm loh vanga mahnia tlan haw ta mai ka ni.

Durtlang leitan ka tlan lai te chuan mutchhuak intihharh nan a kel râwl a kêl rawlin ka zai thla bûi bûi a, ka zai aimah chuan thlithaw chuan min ti harh zawk mah awm asin mawle.

Leitan ațang khan thui ka tlan hman pawhin ka hre lo. Footpath hrula tlâkdal an siam, chu pawh chhe tawh lehnghal a hmeichhe pakhat ding ka hmu ta kha a nia.

A bul maiah chuan scooty serthlum rawng lek lek, larzet mai hi a inhung bawk a.

Van vâr leh khawpui boruak eng chuan a dinna lai chu min hmuhchiantir viauin ka hria. Ka tlanchak bawk si lo nen chuan hmuhloh ngawt thu lah a awm lo. A dinna chu kawngsira din satliahna chi hmun ni a ka hriatloh vang chuan ka hmuh phut kha chuan ka lum deuh pupin ka hria.

Bike chu hungremin ka koh ta kha a nia.

"Lo kal hnai suh" tih țawngkam hul hek hawk tak mai chu haider rual a ni lo. Ka ding chawt a. Engemaw a sawi chhunzawm ring chuan ka nghak a. Amah lah chu ka awm ve tih pawh hre lo ang mai chuan a din ngaiin a ding leh reng lawi bawk si.

"Țhiannu, i dinna kha a him lo a nia, i chesual palh hlauh ange aw fimkhur deuh teh"

"A him loh vang zawka ding alawm ka nih"

A tawi; a chiang a, a fiah viau bawk.

Manganna namai lo tak, mahni hnukpawh chhat duh hial khawp a nei a nih si chuan engtinnge ka tih tak ang le? Țawngkamin thlem dawn ila mahni puala nula pawh chhaithlu hleithei lo chuan mi nunna khaichhuahna tur em chuan ka khak fuh theih ka ring si lo.

Hetia din reng lah chu midang an lo inrawlh anga a rilru so but a che mai ang tih ka hlau bawk si. Rilru ka va siam thiam lo ve mawle.

"Harsatna i nei a nih chuan ka puithei mai thei che asin" ka ti a. Engmah lah a sawi ve bawk si lo.

"Min hrilh la harsatna i nei a nih chuan.." ka la ti leh hram a.

"Min kalsan thei la ka ti zawk mah e tun atan chuan.."

Ka bula scooty thar ver vawr ding hle hle lai chu ka'n namtlu țhuai mai a!

 "Tihpalh..tihpalh" tiin ka țe nghal chul a.

Tundin tuma ka kun hniam laichuan ka bul a lo thleng der tawh! "Engtin nge i tih a, engtinnge a tluk theih?" a rawn ti hlak hlak a.

Ka tung zo chiah chu thlanglam a panna rem lo tur chuan footpath tlawhchhan meuh chuan a hma takah ka ding a. "Kal rawh, hetah hian engmah tih tur i nei ve lo, i ti rang vek dawn a nih hi" a la ti tan tan a.

Ka tum ka hlawhtling chiang lutuk chu ka nuih lam lam a za. Mahni intihhlum hial duhkhawp rilru lo pu ta se, khatia a scooty tlu mai maia a buai leh viau si khan a ni ka nuih ti za tu chu.

"Kal phawt la ka zui ang che. Helai hmuna hmeichhia mahni chauha awm ngawt chu a fel lo. Thil țha ber pawh a ni lo hrim hrim"

"Engmah hi ka tan țha a awm lo" a kamchhuak chu a vin lova, a dam dap mai han tih tur pawh a ni chuang lo. Midang awm ve lo ta chu min hrilh ni ngei turah chuan ka ngai ngawt a.

"Engnge harsatna i neih? Sawi la, ka pui thei mai thei che a sin"

"Engmah" a ti hlak a.

Titau niawm fahran chuan a Scooty-ah chuan lawnin Bawngkawn lam pan chuan a tlan thla ta kha a nia. Keipawhin muangchang lova ka zui ve nghal kha.

Bawngkawn ațangin Chaltlang road-ah a tlan chho va, Chanmari biak in helkualin kawnah bawk a chhuak leh a, a piah deuh waiting shed bulah chuan a lo ding ran a. Tum lo teh mah ila min hmuh vek tho si vang chuan din khawmuanin awmzia a nei tawh lo.

A scooty ațanga chhukin ka lam hawi meuh chuan a lo ding vang mai a. A bul maiah chuan ka ding zui ve nghal a.

"Engatinge min zui reng a?" lungawiloh hmel fe chuan a ti nang nang a.

"Ah..eng lo, ka ngaihtuah deuh che a"

"Ngaihtuah ka ngai lo, tu ngaihtuah mah ka ngai lo"

"Ka hria alawm"

"Engmaw i hriat?"

"Harsatna i nei tih"

Awmhmun sleeper niawm tak a bun chuan kawngpui chu a per deuh charh a. 'A ninawm e, kal bo rawh'

"I zahawm viau nain chu chu ka thei rih lo nimai rawh se"

"Engvangin maw?"

"I harsatna chu engnge a nih ka hre lova, heti ringawt chuan ka kalsan thei lo che a ni"

"Engtia min tih nge i tum a?" a țap lek lekin ka hria.

"A țul dan a zir a ni mai"

"Naa, engmah țul a awm lo"

Waiting shed-ah chuan kal san mai ka tum lo a ni tih hriat tur chuan ka țhu chho zui nghal a. A tlan zui leh daih ang tih chu a hlauhawm ang reng bawk sia.

A tlan chuan ka umzui tawh bik lovang. Duh leh chanchinbu lamah a thih thu te ka lo ngaichang ve tawh mai ang chu!

"Khawivengah nge in awm a?" tiin ka zawt zui a. Chhan phei chu ka hlawh lem hlei lova.

"A nih i hming tal?" ka ti leh țalh pek a!

"I va ninawm tak" tih zawng chu chhanna ka dawn a ni mai.

Ka tho lawka a banah chuan ka zu kai mai pek a! Țang deuh țuk chung chuan ka bulah chuan ka țhuttir ve thei hram e.

"Engnge i harsatna ni reng reng, a rem chuan min hrilh la. Puihtheihna che ka nei a nih chuan ka tlanchhiatsan miah lovang che"

"I hrethiam ngai lovang"

"Chuvang tak chuan ka hriatthiam theih turin min hrilhfiah dawn lawm"

"Ka sawi peih lo"

"Hm..a țha lawm. Ka la hre tho turah ka ngai"

"Engtin?"

"I hnen ațangin"

"A har ang"

"Kan la inhmu dawn tho alawm, zanin ni lo pawh hi.."

Chhân ka hlawh leh pek tawh lo. Ka confi sual ang tih te pawh ka hlau hlel love.

Reife chu ngawirengin kan țhu dun a, mi veivak hmuh tur an awm lova, a khat tawka vai motor lian bengchheng zet chu thawm awmchhun a ni ber mai.

"Ti teh, a tlai lutuk dawn. In inthleng ka thlah ang che" mak tih hmel zet chuan min melh a.

"Hetia awm ringawt hi awmzia a awm lo" ka tih chhunzawm leh a.

"Min kalsan mai rawh i duh chuan" a ti hul hak a.

"Ni lo, i kalsawn duh loh chuan ka țhut tlaivarpui ang che" ka ti zui zat a.

A banah bawk chuan kaiin a scooty lamah chuan ka kal pui a, 'lawn rawh le' ka tih chuan a hreh hmel kher mai. A lawn phei chu a lawn ve mai.

A scooty lu lam bawh meuh chuan a han nuar leh rih a, ka mut te pawh a chhuak ve deuh tawh asin mawle.

Chabi chu a phawi loh vang chuan ka tihnun sak a, a lo dakchhuak zui ve mai a. A mittui tla chu ka hmuh hmaih hauh lo. Mahse, ka thlem chuan kan inti zuau mai mai dawnin ka hre bawk si.

"I phone number i sawi hreh em?"

A sawi dawn lo emaw ka tih hnuah chuan a sawi ve mai bawk a.

"Tlan rawh le, ka lo zui ang che, hmanhmawh lo la" tiin ka bike-ah chuan ka lawnsan zui ve nghal a. Ani pawh chu muangchangin a tawlhchhuak zui ve ta nghal a.

Hei hi a ni Lalrinsangi nen kan intawn dan chu. Hmun ropui leh nuam takah emaw thil ropui leh changkang tak tihna hmun pawh a la ni lo cheu! Thihna kotlangah ngat!

A chanchin a sawi dan chu hetiang hi a ni:-

"Aizawl khua hi ka ni lova; thingtlang khawlian ve taka pianga seilian ka ni. Ka nu hi kan khuaah chuan Nurse senior pawl a ni tawh a, ka pa erawh hi chu BDO office-ah LDC in a thawk thung.

Ka nu leh pa hnathawh zarah chuan khawsak harsain kan awm lem lova, kan khuaah phei chuan concrete building sa hmasa pawl zingah kan tel nghe nghe. Chutiang dinhmuna ding kan nih vang chuan kan duhzawng hi kan nei ve thei viau a, rualawt hian min siam lo a ni ber mai.

Fanu mal ka nih bawk si vangin ka sawi chu ka sawi a ni mai a. Tihhlawhtlin loh hi an hlau emaw tih tur khawpin ka chhungte chuan min ngaihsak a, chutiang in enkawlna erawh chuan ka hmalam hun a lo sial hauh si lo. Chuti a hnekin vawiina lungngaia ka indawm kun chhan hi khatiang ațang khan a lo ințan daih tawh tih hi ka hre chhuak chiang viauin ka hria.

Chumi a nih vang erawh chuan ka nu leh pa leh ka chhungte ka dem viau tihna a ni hran lova, keima'n zir ni ila chuan engmah kha han chhiatpui tur a awm chuang lo. A bul tumtu ka nih vangin ka chhungte demna tur ka hre teh chiam chuang lo. Mahse, 'khati lutuk lo deuh kha chu ni ta se' han tih erawh ka nei ve zeuh zeuh.

Kan khuaah chuan Middle school ka zo va, kan veng a mi pakhat Shillong lama lehkha zir hi a awm a, a lo haw hi a nawm hmel hi ka ti thei lutuk a, ka chhungte hnenah chuan Shillong lama lehkha zir ve chu ka ngen ta kha a nia.

Rem an ti fahran lo, ka nu phei chuan a hmuhphak lova ka awm tur chu a ngai ngam lo niber hian ka hria. Mahse, ka ngenngawl tak em vang chuan min dang thei ta lova, amah ka nu ngei chuan min hruai ta nghe nghe a  nih kha.

Hostelah țha takin pawlsawm ka zawh thleng chuan ka awm ve mai a. Mahse, ka nin tak em vangin pawl sawmpakhat kan kaldawn tihah chuan țhiante inluah ka fin ve ta a, hostelah khan lo awm reng ni ila chuan hetiang lek hi chuan ka chhuak awm bik si lova tih ka ngaihtuah let fo țhin.

Ka țhian leh inluahpui te chu sum lama buai lo tlang țhiau an ni bawk a englaiah mah chuan harsatna kan nei lo ti ila a dik ber ang chu. Kan harsatna ni a lang ta ber chu kan awmchhan ber zirna lam kan hlamchhiah chu a ni awm asin.

Chhungte hmuhphak loh leh khuahkhirh tu pawh awm lova duhthala han khawsak chu a lo nuam kher mai. Pawl sawmpakhatah kha chuan harsatna lutuk ka la nei lo, ka la insum thei viau a, pawl sawmpahnih kum chanve vel kan kal ațang kha chuan beer in chu sawi loh 'bar' ah kan in luhchhawk ve ta fo mai kha a ni a, lehkhazir chu harsa tak a ni.

Chuti chung chuan pawl sawmpahnih chu ka inbang liam ve leh ta hram a.

College chhunzawm chu chak viau mah ila kan khawsak phung chu tu te emaw kâ ațangin ka chhungte chuan an lo hrethawi deuh a ni awm a, Shillong lam chu ka mangțha a țul ta a, Aizawlah ka u kalna College-ah chuan min admit leh ta a.

Ka u chu ka nî te hnen ațanga college kai a ni a, chutia Aizawl lama ka awm ve dawn tak si-ah chuan kan unau chuan inluah turin ka nu leh pa te chuan thu an titlu ta a, chutiang chuan kan upa ber nen chuan in kan han luah dun ta rak rak kha a nia.

Ka u hi kohhrana inhmang tak, inkhawm leh kohhran activity lama tal tam ve tak a ni a, keilah inkhawm pawh ti țha peih mang lo ka nih vang chuan kan nunphung chu a in ang lo tak zet. Mi pheichu a sawisawl ngai em em hran lova, inchhung chet leh insûk, eirel zawng zawng nen ka awl hneh em vang chuan mi sawisel a hreh deuh pawh a ni mai thei.

Ka u lah sawi tawh angin inah a tam lem si lova, zalen taka lo awm țhang ka nih vang chuan han in vawn khip khep chu ka lo thei thut awzawng lo mai a, a hma ang bawkin 'in kerh kerh' lam bawk chu ka han chhunzawm leh ta mai reng a.

College lamah pawh duhzawng in ang chu kan lo inhre rang khawp mai! Zu leh beer ka in a ni mai a, ruihhlo dang, damdawi tih bawr vel hi chu ka ti ve lem lo. Nulat tlangval kawngah ka fihlim viau bawk.

Mahse, vannei intih nachang pawh hre lo khawpa vannei kan nih lai mekin mihring vanneihna chuan a tlin seng ta ngang lo a ni....

Ka nu leh pa ten ka nawmsak loh hlauva theihtawp chhuaha min enkawl laia hetianga ka chanchin an han hre tur ka ngaihtuah hian ka ngaingam ngang lo a ni.  Keima tihsual leh ka tuhrah seng ni a ka inhriat vang hian mawhphurhna lak mai ka tum ta a.. tichuan kha hmunah khan nangin min rawn hmu ta a nih kha..." tiin lungchhe zet chuan mi hrilh a. A sawi bak zawng chu kan hmachhawn dun tur a ni ta!

"A mipa chuan a nei duh lo che a mi?"

"Ka hrilh ni bak kha kan la in be leh lo"

"A nih tak chu. Naupang chhia i ni tawh lova, i hmaa harsatna lo thleng hmachhawn thei tur hian inbuatsaih ang che. Kan duh vang a ni emaw ni lo emaw eng zawnah emaw tal hian harsatna hi tu te paw'n kan nei vek a, chu mi hmachhawn thiam a piang chu a dingchang tur chu an ni mai"

"U Rin, tih tlak mai ka duh" a mangang hmel chu hmuhnawn loh hram.ka duh viau a ni. A chalah chuan thlanfim a bawl țak țak a, a mit lah chu mut hmu mumal lo tih hriat reng hian a sen râm mai bawk a.

"Ti tla ta la i hlim phah ang em? Kei chu ka ring chuang hleinem.."

"Sâwn, a pa pawhin a pawm duh loh han pawm chu ka ngaihtuah ngam ngang lo a ni"

"A dik mai thei i ngaihtuah dan chuan. Mahse, nunna chunga thuneitu i nih loh zia hi han ngaihtuah teh, i duhthlanna awm hauh lovin nau i pai a, chu thil thleng chu hmachhawn ngam lovin tihboral i tum a. Mahse, i thei lo a nih kha. Tunah tihtlak i sawi leh a nia, a siamtu Pathian pawh a zahawm deuh lo maw!"

"Khatianga tenawm kha Pathian siam a ni meuh dawn em ni?"

"Teh reng mai. Thilsual leh harsatna, natna leh thihna te thleng hian Pathian ruat a ni asin. Chumi avanga indawmkun hlen lo turin kawng min buatsaih sak bawk țhin. Chumi vang chu alawm inbuatsaih ang che ka tih. I chak lohna i inhnehtir a nih chuan i dingchhuak ngai tawh lovang"

"Sawn pawm, nuthlawi te dinhmun te hi min ngaihtuahpui ve la.."

"Ka hria alawm. An thil tihsual lo langchhuak ta hi insiamțhat nan an hman ngei ka ring tlat a ni. Mipat hmeichhiatna sual hman a ni mah tih a chumi rahchhuah minung, nunna nei leh i rila rah ngei han tihhlum leh chu a sual thuahhnih mah mah tawh lo maw? Pathian hmaah eng thu nge i sawi tak ang?"

A hmai a tuai pap a, min chhan vak ngaihna a hre lo.

Ka thurawn chu a lawm vak lo a niang ni hnih ngawt chu ka biak pawh mi chhang duh lo kha a nia. Han tihzui vak ngaihna pawh ka hre lo.

                 Chapter

                       - II -

Khatia college rap ve zawt chauh; nula ti a han sawi atan pawh 'a la nau deuh ang a' tih turin a chhungte pawh a hrilh ngam loh a thuruk, a naupai thu min han hrilh ta mai kha ka dawngsawng thiam lo a ni awm mange aw tih te ka ngaihtuah a, amah lah chuan mi a biak duh loh phah der mai bawk si. A chungah a chhe ber lo thleng ta se tih ngaihtuahna chuan ka rilru hahchawl theiin a siam lo.

Mahse, khatiang lo khan chhan dan tur ka hre teh chiam bawk si lo. Lo hrethar leh hnuhnawh pawh ni teh reng ila tunah chuan hrilhna hun ka tlai tawh a nih hmel, mi a chhang duh ta si lova.

An in chu ka hria, ka duh chuan ka pan thei ngei mai. Mahse, min be duh lotu han pan hram kha - va kal tehreng pawh ni ila engnge maw ka va sawi kuak chuang ang ni. Amah ber a ngawih hmak si chuan.

Ni, chutiang chuan rilru insual reng rengin hun ka hmang a, tihtur atan a țha ruahmanna te chu ka nei ve duat alawm. Mahse, hlenchhuah an ni hlawm bawk si lo.

Ka u fapa nen Fifa khela kan intum lai tak maia ka phone lo ri ral ral chu ka la hman ngang lo. A chhan chu ball ka khalh lak lawh tlat! Tunge lo phone tu pawh chu ka en chuang lem lova.

Kan inkhelh tawh loh hnuah pawh chuan ka phone chu ka lo ngaihsak zui lem hlei lova, ka theihnghilh zui deuh bawk nen. Ka mut dawna ka han en chuan Rintei'n min lo biak a tum a ni tih chu ka hmu leh hnuhnawh kha a nia. A va zia lo țhin ve mawle.

Ka phone let rang khawp mai! Rang han tihah a lo tih hun ațanga chhut nilovin, ka hmuh ațanga chhut zawkin a nia.

A 'ring' ral țhiai mai.

A vawihnihna atan ka bengah chuan ka han chuktuah leh vang vang a, a la tawh dawn lo emaw ka tih hnuah chuan min rawn chhâng ta hram a.

"Ka buai lutuk a, i lo phone pawh ka lo hre lova.." ka'n ti nghal chiam a.

"A pawi hleinem" a tih ri chu a zawi viau a ni.

"Eng nge, thil pawimawh a awm em?"

"Awm hran love, ka țha e" 'ka țha e' chu a ti tak a, a awki chuan ka ngaih a ti țha lawi si lo. Bakah motor thawm te pawh ka hria, khawlaiah a awm a ni ngei ang. A dik dawn lo tawp mai.

"Khawnge i awm a tunah?"

"Inah"

"Ni lo, dawt sawi kher lo la"

A ngawizui daih mai, hmundangah chuan a awm a ni ngei ang le.

"I awmna hmun sawi la ka lo kal ang"

"Ngai lo"

"I chhuak tih i u in a hria em?"

"Hre lo"

"Sawi rawh le i awmna chu"

"Aih"

Benga phone chuktuah reng chung chuan ka thawmhnaw chu ka thlak mawlh mawlh a, 'chhuah leh lawk ka ngai' ti a ka chhungte hrilh pah chuan an mi chhanna pawh nghak hman lo chuan ka tlanchhuak nghal daih a.

"Durtlang kawngah a mi i awm?"

"Aih"

"Sawi țha la hei ka lo chhuak a nia"

"Eng ti turin?"

"I bula awm turin"

"Min ngaihtuah suh"

"Sawi la.."

"Chanmari" a ti sap a.

Chanmari kawn ka thlen chuan waiting shed bula a scooty, serthlum rawng ding chu street light eng sen rum hnuaiah chuan ka hmu nghal mai reng a, dawt a sawi loh vang chuan ka lawm hle a ni.

Bike ka hun fel a, a lam pana ka kal lai chuan a lo ding hluai a, engmah sawi lem lo chuan min lo thlek veng veng ringawt a.

"I awmna a rei tawh em?" ka ti thuai a.

"Umh.." ka bike chu a melh veng veng ni mai hian ka hria.

"Engtinnge i chhuah theih? Khawnge i u?"

"A zin"

"Chhuak kher lovin inah awm mai tur che nia, khawlaia awm chu a hrisel ber lo asin"

"Ka ipik lutuk a ni. Min hrethiam rawh"

"A nih tak chu ka hrethiam alawm. Mahse, in ti pachang la, i la tuarchhuak dawn alawm"

"Ka tuarchhuak zo pawhin ka inring lo. Awmngaihna ka hre tawh lo. Karlehah ka nu a lo kal dawn a..." a ti zuai raih a.

"Engatinge, harsatna a awm a mi?"

"Engtinnge niang, ka hrilh ngam bawk si lo. Ka awmdan ațangin min ringhlel dawn tho tho bawk si. Ka nu hi ka hmu ngam thlawt lo a ni, a rilru a na dawn lutuk"

A nu rilru na tur dâwntu chu a mittui a luang asin..

A rilru lakpen a ngai a ni. Heti ringawt chuan a dik dawn hauh lo mai. "Hmundangah kal ang hmiang, helai chu a ualau angreng sia, miin awmherh deuhah min ngai ange" ka ti a.

Romol a a mit hruk zauh pah chuan, " Ka tan chuan khawihmun pawh hi a danglam chuang lo" a ti a.

"A ni mahna le. Mahse, keimahni kan inngaihtuah vanga midangte mitmei kan ven loh ringawt kha chu a dik bik si lova... I hreh loh chuan in inah ka va dah ang che"

"Ka awm peih lo e..." a hmui chu a ti pawrh vel niin ka hria.

"Heti laia awm hian engmah a siamțha chuang si lova, ina awm nen a in angreng alawm. Bakah, khawlaiah chuan tawhsual tawh palh te pawh a hlauhawm a" ka tih chuan min hnial peih lo nge ka sawi chu dik a ti zawk ni a tho tharh a, a scooty-ah chuan a chuang fel ta at a.

An inchhung chu a zau hran lem lo. Unau pahnih lek awmna atan chuan a tawk viau chuan ka hria.

Engkim mai chu a hmunah thlap vek a awm nimai hian ka hria, tukverh 'purdah' chu tlem a ințawn sawi deuh a, chu deuh chauh chu ka mit tikham deuh ka hmu nimaiin ka hria.

An Țhutthlengsei vawnban hnuai,  an puannuam phahin a khuh si loh lai chu a bal em tiin ka'n zût kher pek a! A langlai nen a in angreng. Hmeichhe fel tak a nih ngei dawn hi a te ka ti rilru mai mai.

"I nu chu engnge a lo tih dawn a?"

"An hnathilah training an nei dawn a niang"

"A nih tak chu nurse i tia mi khah?"

"Aw, ka huphurh e...Engtinnge ka tih ang?"

"Lo hrilh tawp mai la"

"Ka ngam lo ti tia" a ti bak hlak a. "Hrilh aichuan tihtlak ka duh zawk" a ti zui zat a.

"Ka lo hrilhsak dawn che mi?"

"Awmzia awm lo, a thawhdan tur a in ang reng. Ti tla mai ang" a ti a, min dil a ni mah zawkin ka hria.

"Ka thuneihna a ni lo e. Mahse, tihtlak hi chu ka thlawp lo viau a ni tih i hriat kha. Englovin ti ang hmiang..."

"Engtin?"

"Naktukah Doctor rawn ila, i harsatna zawng zawng i hrilh vek bawk ang a, tichuan ani thutlukna ang ang chu pawm i tum ang a"

"Tunge kan rawn ang?"

"Ka hre chuang nang, an tam ang chu hmeichhe doctor pawh"

"Hmelhriat i nei tal em?"

"Neih awm pawh ka hre lo, ka hmelhriat ber thingtlang lamah a awm daih bawk sia"

"A, a buaithlak, zahthlak dawn bawk si"

"Chubak chu thurawn han pekdan tur che pawh ka hrethiam chiah lo keichuan"

"A nih min kalpui dawn mi?"

"I duh chuan ka kalpui dawn che nia"

"Mahni chuan ka kal ngam teuh lo mai"

"Umh, ka kalpui dawn che nia"

Zan dar 12 a rik thleng chuan kan ti ti dun a, mutthilh tum lo viau mahse han riahchilh ngawt thu a awm si lova ka hawsan ta kha a nia. A vakchhuak tawh bik em lovang chu maw.

A tukah chuan tlailamah Hmeichhe lam specialist pakhat hmu tur chuan clinic lamah kan in ziak lut ve kha a nia, dar 3:30pm ah chuan clinic-ah kan nghak ve ta vang mai.

Ka bula țhu chu a tla deuh riam hian ka hria, a mitkhur te pawh a thuk deuh, a mawh love, a dinhmun ngaihtuah chuan.

Doctor chu pa ruakhau pui mai hi a lo ni a, kan kalchhanin a zir loh vang nge a nelawmloh hmel riau hian ka hmu pek a, a țawng erawh a dam thlap mai thung.

Rintei chuan han sawi mai a ngam lo deuh a niang keimah zawk chuan bul ka han țan sak a, a tlangpui ka sawi hnu chuan Doctor zawh letna hmang chuan an inbe chho ta kha a nia. Keilah chu ka lo thipût țhut tak tlawk tlawk a..

Kan hnungah in entir tur an la tam teh reng nen chuan a veizawng lamah tak kan luhchilh fu nge ni Inrinni zan sermon chen zet tur chu a chham chho ta mial mial mai kha a nia -

"Kan tunlai khawvelah hian nau tihtlak hi thil thar pawh a ni tawh lova, nau titla kan pung tual tual a, kan pung chho zel dawn niin a lang. Nau tihtlak avang hian natna țha lo tak tak leh rilru lama harsatna nei tam tak an awm bawk a ni.

Mizote zingah sex a hluar nasa ta hle a, țhalai tam zawk hi chuan engahmah an ngai tawh lo zawk niin a lang. Tleirawl te te nau titla an tam ta hle a ni. Nau tihtlak avang hian, a titlatu khan amahah nghawng tam tak a nei țhin a ni tih hi an ngaihtuah phak lo ni hian ka hria.

Tunlai nula leh tlangval inngaizawngte hian an tum ber chu sex hman a nih tawh avangin naupang taka naupai an pung nasa hle a. Pai puitling ngam leh si lova titla tam tak chhiar sen loh an awm tawh. A pawi tak zet a ni.

Survey an neihnaa an hmuhchhuah chu - hmeichhia nau titla te hian an nau tihtlak avangin natna an chungah thleng em em hran lo mahse, an rilru chhungril a hlim ngai lova, nguina leh lungngaihna an chungah a thleng hma bik niin an hria a ni.  "Hmeichhia nau titla tawh te hian natna ho tak anga lang sawi neuh neuh tur an nei awlsam bik hle. Tin, an thil tihte avang khan nun hlimna an nei ngai meuh tawh lova, an nun a zalen lo riau țhin," tiin an sawi.

Loh theih lohna avanga nau tihtlakna hi chu awm bawk mahse, a duh nazawngin nau an titla hi chu thil pawi tak a ni.

 Mihring hriselna hi a inchen lova, nau titla țhenkhat te hi chu an hriselna in tawrh phah lo mahse, mi hrisel lo nau titla te erawh chuan damchhung țhat loh phah nan an hmang thei a. Nau an tihtlak avang khan a dang pai lehzelna tur lakah harsatna an nei thei a ni.

Tin, nau an pai leh a nih pawhin a hun lova hrin emaw chhiat an awlsam hle bawk. Kum la puitlin tak tak hma a nau tihtlak phei chu nunna in a tawrh theih avang leh piansualna hial pawh a thlen theih avangin a hlauhawm hle a ni. Vawikhat mai titla lova, vawihnih vawithum tihtlak phei chu a hlauhawm a ni tawp mai.

Nau tihtlak avang hian natna chi hrang hrang a rawn piangchhuak ve thei a. Mi hrisel lo tan phei chuan pawngpaw ba sa ngam ngawt chi a ni lo. Taksa hrisel țha pangngai ni țhin nau tihtlak avanga bawrhsawm ta viau mi tam tak an awm a ni. Nau tihtlak avang hian kal nâ, zun kawng țha lo, thi neih țhat theih lohna leh natna sawi neuh neuh tur tam tak a vei theih a ni.

Chu chu lang thei lama kan tan a pawi a ni. A dang lehah chuan kan thlarau nun thleng hian a nghawng a ni tih hriat tur.

Hmeichhe tam tak chuan nau tihtlak hi eng teh ualah mah an ngai lova. Vawihnih vawithum titla te pawh an awm. Tualthat an ni tih hi an hrethiam lo niin a lang. Hetiang mite hian sex hi infiamna ang lekah an ngai a, anmahni ațanga nunna thar lo piang tur chu an tichhia a ni tih an hrethiam phak lo a ni. Nunna hi duh duh a siama tichhe thei tu an ni lo tih an hriat a țul. A pe thei tu leh a la thei tu, kan Pathian thinurna hi an chungah a thlen vaih chuan a rapthlak hle dawn a ni.

Nau tihtlak hian nu hriselna-ah chauh nghawng a nei lova, a hun lokal leh zel tur thlengin nghawng lian tak a nei a ni. Pathian huat berte zinga mi a nih avangin nau i tihtlak avang khan thilsual lian tak i ti tih inhria la, mifel anga lan tum mahla, misual dum ber i ni tih hria ang che.

Midangte hriat loha ti ni a i inngai a nih pawhin nangmah hmu ru reng tu Pathian chu i bum thei hauh lovang. Pasal nei lova naupai hi sual a nih tawh nak a laia, a belhchhah nana tual i thah zui leh kher chuan a rapthlak dan a thuahhnih viau ang le.

Mualpho hlauh vang emaw mipate'n an neih leh duh loh vanga mahni rila rah ngei thah hi dawihzep hna a ni tih hria la, tum loh tak leh duhreng vang pawh nilovin hei nau i lo pai palh a ni a, huaisen takin i pai tlang ngam tur a ni. Sual thuah hnih chu ti nawn lul suh ang che. I taksa a himdam nan leh i thlarau a damna turin chu chu ka rawn che a nih chu.

'Ka ti tla duh tho tho' i ti a nih chuan ka dan theih i ni lova, i duh chuan doctor dang rawn mai rawh. Kei chuan ka pui thei lovang che"

"Ka pu a harsatna awm thei ta chu engpawh ni se a chhungte hrilh hi a ngam loh ber a nia" ka lo ti thuai a.

"A engnge i nih, a țhian nge?"

"A țhianpa ka nia"

"Nangman hrilhsak la a ni mai lawm. Thil awmzia zawng zawng i hre vek a, naupang i ni tawh lova an dawn sawn thiam dan zawnga sawi dan te pawh i thiam ang chu. Chu chu țhian mawhphurhna pawh a nia lawm" tiin bat neichungin a clinic ațang chuan min mangțha ta kha a nia.

'Nakinah lo kal leh ang che u' tiin min thlah tak hial kha.

Țhian țha mawhphurhna a tih tak mai chu ka va hlenchhuak châk lem lo tak e aw. A raitu chu ni ila thudang, dêp khat pawh hlawh lova mi hmaisa tâwn tu ringawt nih chu phûr serh sawrh har tak a ni.

Mahse le, inhmuh a khât bawka inmelhrum reng phâk nih loh chuan a zia tak pawh a awm alawm le.

Inngaizawng anga awm der si lo chu a u zin chhung chu zantin mai hian ka va leng ringawt mai a, bialnu nei bik lem lo ta chu han thîk buai tur awm nghal hek lo, raino thinchhe bulah chuan ka va tawlh tak hruah hruah a!

A u a lo haw hnuah erawh chuan ka reh leh hmak lawi a. Chhun lamah a class bang nen erawh kan inhmu thei tho mai. A railen hmaa exam an neih tho dawn vangin class kal zel tur chuan ka'n fuih ve kha a nia, mi a ngaipawimawh thiam viau.

A mizia erawh chu a hmaa a mizia a sawi nen chuan inthlak chiang tak hi a ni ringawt mai. Suamhmang piangthar an sawi ang mai lah ni chuan!

A nu a lo thlen thu a sawi chuan ka thilsawi tur ka huphurh zia chu ka hrechhuak thar leh a. Huphurh vanga tih loh ngawt chi niin ka hre bawk si lo. Nakinah a haw dawn țepah ka hrilh chauh ang tiin rilru ka siam a.

A nu a lo thlen tuk ațang chuan kan inbethei ta reng reng lo mai a, ka phone tlang thei bawk si lo, message a dawng thei bawk si lo. A nu hi a duhaihmain a hrilh ang a, chu chuan harsatna a thlen zui ta emaw ni dawn le?

Chutiang thil chu lo ni ta se, 'keia lo inrawlh ve kha awmzia a awm hauh dawn lo tihna a ni a, a țha phian ang' ti te chuan ka han ngaihtuah a.

'Engthil pawh ni se mi te lo hrilh ve hrim hrim tur a nia, kha chen ka buaipui ve em em a' tiin a vui vai zawng chuan ka la deuh a. Min be lo na na na ka be bik lovang tih chu ka thutlukna tenau a ni. A țul chuan ennawn leh theih a ni ang!

Mahse, chutiang ngawt chu a ni thei lo. Miin engharsatna nge a neih pawh hriatpui lova a taurau zawnga lo tlanchhiat ngawt kha a puitlin loh thlak viauin ka hria.

Ka hriatchian hnuah, min mamawhna reng reng a nei lo a nih chuan ka kalsan mai ang chu. Harsatna bik neiin min hrilh thei lo te pawh a lo ni thei a, a phone a chhia te pawh a lo ni thei! Ka thutlukna chu ka ennawn leh meuh chuan nikhat  leh zankhat a hmingin a tla chang chang hman awrh chauh a ni.

Zanriah eikhamah chuan ka leithuam zinga ka inhmeh deuh bik ni a ka hriat hmang chuan ka han inthuam a, ka u faten min ngen dawn a ni tih hre reng chungin a nu runah tiin ka'n sawm fahran a!

"Kal mai mai teh, hruai duh tak tak mang si lo, tikhan ti ziah suh i ti khawngaihthlak" a tih hlak hlak chu nuichungin ka kalsan zuinghal a.

Ka bike chu petrol a tam lo viau, nawrhaw a ngai em lovang chu maw tiin ka kenglui ta thova. Ke a han kal a ralah chuan a hla vei phian sia.

An inluah ka thleng chu a lo reh țhiap mai a, an lengchhuak nge mawni dawn le. Kawngka chu a inkalh bik em love. Ka kik ta kauh kauh kha a nia.

Mipa aw, zangkhai angreng tak hian min lo chhawn a, 'lo lut rawh u' tiin.

Ka han lut chu tlangval pakhat țhutthlengseia mu chu a lo tho thuai a, a u a nih ngei ka ring e.

"Lo leng rawh, engnge ni i duh?"

"Rintei a awm nange?"

"Aw awm lo, damdawiinah a awm a"

"Damdawiinah maw? Ngati nge a!?"

"A accident a"

"A nih chu mawle, a va zia lo ve aw, a na viau a mi?"

"Ngaihtuahawm tak chu a ni hran love tunah chuan, nimin khan an zai a, a nakruh te a lo tliak ve a"

"A nih tak chu, ka be thei si lova ngatinge maw ka lo tia, a lo hetih vang a nih hi mawle. Khawi damdawiinah nge?"

"Civilah, ngaihloh lamah lo ngai lo la, a țhianpa i ni ang chu maw?"

"Umh, nia, ni mai e. A la luh theih ang chu maw Damdawiin chu ka han lan ve loh te chuan.."

"Theih awm tak chu nia"

"I nuin a mi awmpui"

"Aw, ka nî fanu pawh a awm maithei"

"Awle, a nih ka han kal ve ange aw"

"Awle"

Damdawiinah chuan Rintei chu a lo mu bâm a, ka khawngaih viau mai. A nu te nen chuan reife kan han ti ti tlang a, nu pangai tak a nih awm hi mawle.

An nulain dawrah 'ka zu kal lawk' a tih vang chuan min chhuahsan a, chutihlaia a nu nena kan ti ti chu kan mûk dun kher mai.

"Engtia inkawm maw in nih?" a tih chuan chhan vak ngaihna pawh ka hre lo.

"A țhianpa hi i ni turah ka ngai ngawt a" tiin urhsun fe mai hian min melh a.

"Umh, a țhianpa chu ka nia lawm" tih ka sawi zawh rual chiah chuan 'ngaihzawng' a sawina a ni ang tih ka ringhlel nghal! Mahse, ka lo chhâng hman tawh bawk si. Siamțhat kher ngai lo turah ngai mai ang.

"Ka'n zawh kherna chhan che chu kha nau te in lo pai a..." a ngawi zui hmak mai. A hrehawm duh viau a ni.

"Nia, hrilh che kan tumlaiin hetiang hi a ni leh ta bawk sia" ka ti ve ta ringawt a.

"Nimin khan doctorin min râwn a, an zai hma khan - a țhatchhuah an ring chuang bawk si lova, a paitu ber lah thichhawngin a lum reng bawk sia, midang râwn tur an awm bawk silova ka paihtir ta a nih kha" a tih chuan amah chuan hrehawm a ti nge a thinrim pawh ka hrethiam chiah lo.

Sawitur avang duh rauh rauh khawp mai. Engkim a bulthuma han hrilh mai ka duh viau laiin thil țul ber a niin ka hre chiah bawk si lova.

An nula a lo kir leh hnu chuan Rintei harh pawh nghak duh lovin ka hawsan ta daih a.

                     Chapter

                          - III -

Kawngpui ka thleng thla chu ka thawl huai hian ka hria.

Nau an ti tla chu ka lawm nge lawm lo chu ka hrethiam chiah lo nain chutia mahni duhthu pawh ni lo, doctor te ber thurawn vanga ti tla an ni chuan ka rilru a ti nuam viau thung. Ka thisen zawm a nih loh vang te pawh a ni mahna le. Ka hrethiam chiah bik lo.

Ka ngaihtuah nasat ang he huin ka ngaihtuahna erawh chu a mumal hleithei lawi lo va.

A tuka ka han kal leh chuan a nu chuan amah chauh hian a lo awmpui ran a, Rintei pawh chu a lo harh tawh a, min han hmu chu a hlim ve hmel deuhin ka hria. Ka ngaihbel nge mawni.

A nu chuan min ngei ka rin teh reng nen chutiang lam lang miah lo chuan zuk khawsa theia mawle! Min be țha duh lo pawh ni se ka dem vak dawn lo asin maw. Titi pangai tak chuan thil a sawi suah suah a, nu rilru țha tak chu i nih dawn hi ka ti ta ringawt mai.

Ka sawi tur hre vak lo chuan zana riahpui te ka chuh ve ta vel kha a nia, min han hnial ve țang țang nain ka lo insawi ve laklawh tawh sia, min phalsak tak hram kha mawle.

Ka ngaih ngawih ngawih vang pawh nilovin, țhian nih manah ka ti ve deuh.

Zanriah te ka han lim nghek hnuah chuan Civil Hospital Cabin lam pan chuan ka inkhalh chhuak leh ta poh kha a nia.

A nu chuan min han kalsan tur chu min ngaihtuah deuhin ka hria, tihdan tur te chu min han hrilh leh rih a, 'engemaw a awm a nih leh min rawn phone mai dawn nia' tiin min chhuahsan ve tak hram kha.

"Naute an paih kha i hria em?"

"Aw hria e, nimin khan i nuin min hrilh a"

"Ni tak e"

"I hria mi ngawt a, 'ni tak e' i lo tih ve ngawt a?"

"Umh... hria e, nimin khan ka harh reng alawm, engatinge khati khan i tih? Thudik 'ngatinge i hrilh mai loh?"

"Hrilh ka tum lo pawh a ni lo, sawifiahna hun kha a awm lo hrim hrim alawm. A pawi viau a mi?"

"Hm, chulam te chu pawi i tih leh tih loh a ni mai a, ka tan chuan danglamna a awm hleinem"

"Tikhan, ka bialpaah an ngai zui vek dawn che a sin, i duh a mi?" a ti zui zat a.

"A, ka hrethiam tawh bik nang. A ho emai. Kan inngaihzawn chuan loh hi" te ka ti ta vel mai mai a. Ngaihdan siam thiam miau hek lovi.

A lu lam a harh țha viau a, a hnuailam erawh chu a duh angin a la chet țha thei lo thung a, a pangkham hunah lo chawirem chu ka tih theih tawk a ni mai.

A changin min mutthilhsan a, a chang leh kan ti ti hluai a, chutiang vel chuan zan kan tumtawi chu a ni der mai.

Zing dar 7:00 velah a u a lo thleng chhova, keipawhin ka hawsan ve ta kha a nia.

Karhnih dawn damdawiina a awm chhung khan ka riahpui ve nual hmanin ka hria, zan engzat nge ka riahpui chiah phei chu ka hre lo. Amah pawh a leikang sawt khawp mai, karhnihna tawplamah phei chuan zun zung tur pawhin amahin a kal thei ti tuai tawh a, riahpui pawh a zangkhai sawt viau a ni.

"Puia, engemaw sawidun a ngai a ni" tiin damdawiin ațanga a chhuah zana ka va leng chu a nuin mi lo ti a.

Chutihlai chu an ina ka luh hlim hlawt, mawng ka hun fel hnu lawk a ni. Rintei hmel pawh ka la hmu hman lo. Pindan lamah a mu a nih ka ring. A u chu kohhran programme lamah a tekchhuak a nih ka ring deuh. Ka hmu mai si lova.

"Hetianga damlohna vanga duhloh dan deuha kan awm tak rau rau si-ah chuan Rini hian college te chhunzawm leh se a țha ang a tih ka rilruah a lo awm deuh a.." tiin mi rawn ti tih hmel pu chuan mi en a.

"Nia, a țha alawm. A hma pawh khan chawlh kha ka phal lo a, tun ang boruak tur hre lawk ang hrim hian" ka lo ti ve mai a. 'Ka bialnu a ni lo' han tih ve mai awm a nia, mahse chu thil sawi chu thih hreh takin ka hreh nia mawle.

'Ka bialnu a ni lo' han tingawt ila 'tunge a bialpa?' tih zawhnain a zui nghal ang a, buailohna turah ka buai peih lo nge mawni zawk ni.

"Kum lamah a la naupang ve bawk si a, bakah zirna a laklawh bawk nen in innghah theih chuan nangmahni tan bawk a țha tur a nia, college te hi han zo ve sela rilru tharin in ngaihtuah ang a, ani pawh tlemin a lo puitling ve deuh tawh ang a" a tih chhunzawm leh a, han chhan vak ngaihna pawh ka hre chuang lo.

Min mâkpa chei lo chauh chu a ni e.

Rintei pawhin kan sawi chu a hriatphak vek ka ring. An in a lian lem lo ka tih tawh kha, plywood bang dan mai a nih vangin ti ti pangai chu beng a hup a nih ngawt loh chuan haider thu a awm lo. Chu a chhapah a chunglam a la kawtlang vek leh ta nghal a.

Kum lama la naupang leh țhanglai ngang a ni bawka a bawksawp rei lo ang reng viau. Inlama karhnih vel an in enkawl lehhnuah chuan a hma ang em chu ni lo mahse zawiawiin class te pawh a kal leh peih tawh. Chutia nunbul a țan leh thei ta chu amah aimahin ka lawm zawk hial mai thei.

Zirlai te a nih vangin a na zawngin ka leng bik lem lo. Bakah, inngaizawng pawh kan ni lova, khêl lova lan kha thilmawi leh dik ber pawh a ni chiah lo. A hmuh erawh kan inhmu zing viau tho mai. Min ngaizawng a nih loh vek pawhin min ngaina ve viau chuan ka hria.

Pathianni tlaikhat chu min rawn bia a, "In venglamah ka țhiante inah chaw ka ei a, zanah lo leng la, kan pheirual ang a" tiin. 'Awle' tih mai kha ka harsat lo, 'aih' ka ti hauh lo.

Ka rin aitak chuan an rei phian a, a sawm lo tu zawkin hmanhmawh tura lo tur fahran kha ni chiahin ka hre si lova, keizawng mawnga hawlh ang maiin a ni ka lo awm hman țhin ni.

Inkhawm țan dar a rikhnu lawkah chuan min rawn be ta a, a hman tawh thu leh kawmthlang kawngpuia min lo nghah tur thu nen chuan.

Tichuan an in lam pan chuan kan inchhawm dun ta a.

"Duhaiin ka țhu rei deuh a niang ka chau deuh tlat" a ti a.

"Mu la, a hahdam mai ang chu"

"Mut pawh ka peih em em chuang lo. Ka'n inthlak lawk ange aw" tiin an pindan lamah chuan min luhsan zui nghal zat a.

Kekawrbul leh t-shirt nena a lo chhuah leh lai chuan an tukverh biang ngheng meuh chuan ka lo dak vang vang a. Ka lo melh zeuh chauh a ni.

"A va hmuhnawm awm vung vung ve" tih pah chuan ka darah chuan min lo kuah ti tih a, ka enna lam a han hmuh ve chuan "a va ho tak..!" tiin ka bengah chuan a pawt zauh a.

Nia, an kawmthlang kawngpuiah chuan ui an inmawngzawm a, ka lo thlir pek alawm mawle!

"A hmuhnawm em khu" tih pah chuan a lam hawi chuan ka inher zui a, kan inhnimhnai dun ta kher mai! A kut dinglam lah chu ka darah a la inbang miau mai bawk sia, min pawm chu a ni deuh ber awm e.

"Thingpui i in duh em?"

"Duh tho e, nakin deuhah" tihpah chuan ka kutdinglamin a kawngah chuan ka vet kual  zui zat a. A nui sen sen a, mi chu a enchiang ngam vak lo.

Chutia chhûl lak loh leh tilreh bawk si lo pang insirem angreng taka han indinchilh takah chuan ralmuanna hmuna lungphu, phu dep dep țhin chuan a nih phung a thlak danglam a, vanzai khuang ang maiin ralți hauh si lo chu min phût khum ta zeih zeih mai kha a nia!

A khabe-ah chuan dawmin ka kuaidak zui a, a maimitchhing tlat pek a! Ka nghawnga a kut a dah erawh chuan min kuai nghet hle thung.

A hmui khur der der chuan min sawm tlat hian ka hre pek a! Ka insum theihna zawng zawng dahțhain ka han fawp chawt mai kha a nia!

"A nah a nah" a ti ruai a, ka thlah chiang kher mai! Keia phur pheng hian ka lo kuah na lutuk a ni awm asin mawle. Ani dam mang lo, nakruh tliak dam chhuak zawt chauh a lo ni bawk si. Han thar thawh leh chu huphurhawm tak a ni. Hnar a lian duh.

Sawi tur a vang duh rauh rauh teh emaw! Mahse, a lo chhah lutuk bik lo hlauh a, nâ ang chuan a awm zui ta bik lo, pangai tak chuan min be zui mawlh mawlh a, Thingpui te a lum zui nghal a, inthlahrung lutuk chuan min siam rei bik lem lo.

Kha thil thleng khan kan awmdanah thil danglam a thlen lem lo, inngaihzawnna kawngah bul kan țan phah pawhin ka hre lo. Kan inbiak dan a ril phah sawt lem lova,  kan inhuat zui phah lah a ni hek lo. Engkim chu ala pangai vek ti ila a dik ber ang.

Zankhat chu "Ngaihzawng i nei em?" tih message hi ka dawng hlawl mai a, a number chu ka lo neih lem loh vang chuan tuemaw min bawl tum mai mai a nih ringin ka ngaipawimawh lem lova, chhan tinah pawh ka tin lo.

A hnu deuh lawkah chuan "Mawhh..!!??" tih hi chumi number ațang chuan ka dawng leh pek a!

Rintei'n min chhaihkual vel a tuma ka ngaih vang chuan message pawh chhang duh lovin ka phone ta zawk kha a nia. Amah lah chu a insawi duh mai bawk si lo.

 A aw ațang chuan Rintei chu a lo ni awzawng lo mai.

Kan han inbiak rei takah chuan a thilsawi dan hmangah kan țhian pakhat, Hriatpuii a ni tih ka hre thei ta hram a, ka ni lo chu a'n ti ve ngial nain ka chiang ta viau e.

"Engnge ka ngaihzawng neih leh neih loh te min lo zawh ngawt a?"

"Ka hre ve duh a ni mai alawm"

"I țangkaipui tur thildang ngaihven zawk mai teh"

"Ka țangkaipui dawn lawm mawle aw"

"I țangkaipuina tur a awm lo chiang e mai aw"

"A hriat miah loh"

"Min ngaizawng lo chiang bawk sia, i țangkaipuina tur awm ang chu ka hrethiam phak ve hauh lo mai"

"Ka lo ngaizawng ru reng che pawh a ni mai thei asin" a tih chuan a ma nuih tak pawh chu a za a.

"I nei lo tak tak em?" a ti țha leh a.

"Nei nang, a ninawm chutiang sawi sawi a ngai lo, nangpaw'n ngaihzawng te chu i neih ve reng kha" ka ti zui a.

"Aw, a țha ve alawm mawle, țhiante chin pawh hriat miah loh chu a dik lo ve alawm. Țangkaina mual mual pawh kan nei ve mai thei asin. Karleh khi ka birthday a nia, ilo kal ve ang chu ka tia" a ti zui a.

"E, a va tui dawn ve chu!" ka'n tihsak nghal zat a.

"Kawppui nei lo chu a hmuna mi in rin nghal mai a ngai ang, a dang hruai a rem lo a nia"

"Ehe, a va țha leh zel ve, chutianga rinnghal tur an awm te chuan hruai tur i ti tlat ang tih hlauh mahnaklaia!"

"Zirtawpni a nih kha aw, nakinah kan inbe țha leh dawn nia" a ti a, kan inmangțha zui ta kha a nia. A phurawm ta hle mai, kan inhmukhat bawk sia, kal ve ngei chu a țha ang.

Rintei'n "Ka pa suit tur lei a ngai a, min enpui rawh, ka lei thiam loh ka hlau deuh" a tih vang chuan a college bang ka lo nghak a, millenium lam panin kan inkhalphei dun ta kha a nia, țhenkhat chuan inngaizawngah riak min ngai ngei ang le.

"Inkhawmpuinaah thu a sawi dawn a, ânuin 'suit thar a ngen a' a tia" tih pah chuan a nui kar kar a. Millenium centre-ah chuan kan inzui lut a. Mi an tam lem lo, ka kalpuinu chuan ka bânah chuan a lo dawm dai dai a.

Kan kal tumna dawr kan thlenhma deuh chuan ka ding chawih a, ka bula kal chuan maktih hmel fe hian min thlêk hau mai bawk a! "Nge?" a lo ti var a.

Mahse, ka chhang ta lem lo.

Muangchang chuan ka kalpui zui leh mai a, Rintei chu a ngaih a țha chiah lo tih ka hre reng mai a, "Ngatinge khatia i awm a?" tiin min zawt leh ta nge nge kha a nia.

"Ka thil ei ka ngeih lo nge ni ka pum a let but a, a reh tawh e" ka ti liam mai a.

"Nidangah i awm țhin a mi?"

"Awm ngai chuang love"

"A va mak awm ve, inentir i ngai a nih chu tiraw.. "

"A, a țha ve leh mai ang, engmah anih loh hi" awlsam fe chuan ka ti liam ringawt a.

 Engmah lah chu a hre ve der mai si lova leh!

Coat te chu ka'n ha chhin vel a, a diktak sawi chuan kan thiltihah chuan ka rilru ka pe thei ngang lo a ni e. Kha hmeichhia, ka ngaih em em laia min țhentu leh kumthum chuang zet ka hmuh tawh loh ka hmuh thut vang vek kha a ni.

A hming Lalthantluangi.

"A țha i ti vek ringawt a, kalpui man i va awm lo tak e aw" Rintei'n a tih chuan ka awmdan a hril chiang viau awm e.

Kan chhuah leh lam chuan ka hawikual viau nain hmuh leh chu ka hlau hle lawi a, hlau chung chung chuan hmuh tumin ka dâk fan iak iak chu a ni bawk si. Ka hmu ta lo, ka ngui deuh rawihin ka hria.

Ke nei ve ve kan ni bawk a, an in thleng pawh ka thlah duh ta bik lo. Millenium kawt ațang chuan kan ințha țhen deuh tawp mai kha a nia, a awlsam mai.

Ngaihtuah loh ka tum poh leh ka rilruah chuan a lang lian ting mai hian ka hria a, muthmunah chuan ka meng kar mai kha a nia.

College week-ah miss contest naah a tel ve a, stage a a lo kalchhuak a pheikhawk keartui a tlak vangin tlu lek lekin a ti tluan țhak a, keia fiamthu thawh tura dingchhuak phengin a tihdan ka'n zir mai pek a!

Programme kan zawh hnuah chuan a țhian te ho chuan min kamkhat laih laih a, fiamthu hlirin ka lo chhang nain ka chhungril takah chuan ka inthiam chiah bik lo, a lo zak viau a nih phei chuan...

A tukah chuan canteen lam pana an kal chu ka lo au ding kha a nia, min ngainat hmel teh chiam lo chuan a lo ding ve mai a, "Nimin thil thleng kha min ngaidam teh, i tan a zahthlak ang tih ka lo ngaihtuah miah lova" ka ti zui a. Ngawireng chuan min en a, a hrilhhai thlak duh fu mai.

A țhiannu lah chuan "I ti awm ang lo ve bawk alawm, khatia mi chetchhiatna hmanga fiamthu thawh kher a ngai hleinem. A tuartu tan a zahthlak tur zia te chu ngaihtuah ve awm che a nia" a lo la ti zui a.

Chhandan tur pawh ka thiam chiah lo.

A țhiannu ther thawr chuan 'a tlai tawh a nia' tih pahin a bânah a la lawk a, a kalpui zui daih leh nghal a, rilru a nuam lo hle mai. Mi huat leh ngei nih hi ka duh lo viau asin mawle.

"Tihpalh lutuk vawiin kha" tih ringawt chu zanriah kan eikhamah chuan message ka dawng a, min thawntu awm ang chu ka ngaihtuah chhuak thiam ve nghal mai.

 Mahse, chhandan tur bawk chu a ni ka buai leh tak!

Keiin ngaihdam ka dil a, a ngaihdamna thu pawh mi hrilh ta chuang lo chuan a inthiamlohna thu a rawn thlen leh daih bawk sia, engtia dawnsawn tur nge pawh ka hrethiam chiah lo.

"Eng chu maw?" tiin ka va chhang ta ngawt mai kha a nia.

"Vawiin khan mawle, ka țhiannu khan khati khan a chhang mai che bawk sia, nuam ka ti lo deuh a" a rawn ti ve mai bawk a.

"A, ka ngaihaw hran chuang hleinem, ka thiam loh a nia"

"Kei pawh ka haw lo a nia, ka țhian te khan duhaiin an lo la vâwng mah mah a, i lo hrethiam dawn nia" a tih chuan ka rilru a dam huai mai.

"A țhat hlauh chu, i rilru ka tinuam lo ang tih ka hlau ber a, ka lo ngaihtuah tlem lutuk deuh a ni. A thleng tawh lo turah ngai ang" ka ti zui a.

"A ho lutuk, fiamthu chu fiamthu a nia, tih tur leh tih loh tur thliar hran ngawt hleih theih pawh a ni hleinem. A hun leh hmun pawh siam theih ngawt a ni lo ang bawk hian...." a tih leh meuh chuan a rilru puitlin zia chu keini ang duang tan pawh hmuh hmaih rual a ni tawh lo.

"Ka lawm e, i puitling hle mai" ka ti ta ngawt a. Ka rin aitakin min chhang țha duh phian a, muthmun thleng chuan kan la inchhâng tak lauh lauh a.

Chu chu kan tawpna a la ni mai lo! Kan bulțanna tur chauh zawk a lo ni. A tukzingah chuan ka beisei loh tawpin 'Good morning' tih ka la dawng cheu nia!!

Chhunah pawh canteen-ah a țhian te a rawn thlim a, ka 'treat' thlap a sin. Nidanga phek en ve mai mai, țha em em pawha ka hriat ngai loh kha ka hmu nalh sawt ta riau mai nia mawle.

Chuti bek bek a kal ve reng ta chu Atluangi nen chuan kan inngaizawng chho chu a ni ta der mai a, a reiah phei chuan a țhiannu min kamkhat hlak hlak tu pawh kha a nui ring ringah a țang ta zawk kha a nia. Kan inzui ve ta rawt mai.

A puitling phian, thil hi a ngaihtuah thiam riau hian ka hre țhin. Amah hnaihchilh lutukin ka khawsa thei lova, ka hlat turin a awm ngai der bawk si lo. 'Zirlai kan la nia' a ti mai zel. Han rinhlelh tur eih a awm bawk si lova, ka tan chuan innghah na'na hman mai chu tih makmawh a ni.

A hunah chuan hlimtakin min siam a, hundangah a țul a nih chuan 'lehkha zir rawh, min rawn be suh' a ti leh mai a, huat ena en hleihtheih pawh a ni lo. Chhungkaw ziktluak tak an lo ni bawk nen ka phu lo dâwn te hian a nia ka hriat țhin ni.

BA final year pawh kan exam hma hawtin 'MA chu phaia kal ka duh, coaching kal pah ka duh a' a ti țhin a, keilah hian namen lo tak mai hian ka lo huphurh ta țhin a, a sawichhuah chang hi chuan a tawpah min tlawn a ngai deuh ziah!

Ni, a tel lova hun hman kha ka zuam lo ve bawk țhin em alawm mawle.

Kohhranah a phak ang tawkah a inhmang viau, keipawh min tur nasat țhin vangin peih leh peih lovin ka ti ve zel a, tunah chuan a kul a taiah ka in hambuai der tawh, a zar ka zona awmchhun a ni ta hial awm e.

Han peih loh deuh chang pawhin 'a rei chuang nang, han ti hram la' a ti zel bawk sia, duhber te thu han zawm loh ngawt chu a ni mang bawk si lova. Phur lo zetin ka kal țhin kha a nia. A nih loh leh 'inkhawm phawt la, banah i lo leng dawn nia' te hi a ti ta țhin a, han thep ruk châng te chu nei bawk mahila a reng chuan dawta han phat chu a nuam bik hauh lo. Chu chuan ka nun pawh engemaw chenah a kaihruai viauin ka hria.

Hmun fianrial hi kan ngaina lem lo a niang inhmuh fal pawh hi kan tum ngai lem lo. A chhungte pawhin kan inngaihzawn thu chu an hre vek a, min ti țha ve phian a, a lawmawm ang reng khawp mai. Keilah hian ka va zah dîk dêk lem hlei lova, mi pawh an ngaina der ve viau chuan ka hria. A pa hi chu a țawng tam lo hrim a, han nel vak hleihtheih pawh a ni lo. A sual phei zawng a sual hauh law.

Vawikhat chu a țhiannu Hriatpuii te inah tumlawk em em pawh ni lo hian kan inhmufal hlauh mai a, chu chu an in ni lova kan inhmuh fal hmasak ber țum a ni. An inah pawh hian inhmu fâl han tihah a chhungte muthnu hi a ni mai a.

Inrinni chhuna kan chhuak dun kha a remchanga tiin Alawmi tein kan pan kha a nia, a chhungte an lo zin vek a, amah lah chu chhuak mai turin a lo infam ap tawh mai bawk sia, 'tikhan in lo nghak mai rawh u' tiin min chhuahsan ta kha a nia.

Reivak lo chu kan han inpawmchilh ve thuak a, min nam kian pah chuan "Engemaw ti ang hmiang?" a'n ti mauh a.

"Eng nge tihtur awm a?"

"Țawngțai ang" hnial tinah pawh ka tin lo. A ti leh tlat dawn thova, duhloh chuan hawsan law law a fin thlak zawk. 'Kan inzui rei ve tawh, vawikhatmah kan la țawngțai dun lo' a la ti zui ta dah a.

A duhkhirh hrep lehnghal a, a mipa zawk chu ka zam a ni ber mai. Ka luchungah kutnghatin a țawngțai a, chumi hnuah a luchungah kut nghat vein ka'n chham chho ve leh kha a nia. A hnulama tisa lam taka han chetpui tum chu mipangai tan chuan har tak a ni. A tum pawh ka tumbuai peih lo law law mai.

Chutiang vela thianghlim taka inngaizawng kan nih vang te pawh a niang ka thlakhlelh em em țhin ni.

BA kan han zawh fel chuan phailama zirna chhunzawm tur chuan min liamsan a tum ta kha a nia, ngaiin han thlahlel teh mah ila ka tan 'kal suh' lo tih ve ngawt kha a rem si lo.

Chutiang boruak karah chuan chu thil aia duhawm lo zawk mah chu a hnen ațangin ka dawng ta tlat mai a, ka hrethiam lo tak zet a ni.

Chu thu chu 'ințhen ang' tih a ni.

                    Chapter

                         - IV -

Ințhen ang tih chu hmaichhana mi hrilh pawh a ni chiah lova, message hmanga sawi mai a nih vangin ka lak thutak sak duh vak lem lova. Zana ka va len țum chuan tihtak zet hian min ngen ta tlat mai pek a!

Ka ngaihdanah chuan 'ka hmangaih ber pawh ni se min duh lo a nih miau chuan rem leh rem lova inbah luih reng aichuan ințhen a țha zawk' tih mai hi a ni.

Ni e, khami zan khan beisei loh tak maiin kan ințhen fel ta der mai kha a nia, a chhan ka zawt lova, ințhen a duh a, chhan țha tawk a nei turah ka ngai mai.

Kan ințhen tak vangin ka ngaihna leh ka duhna chuan tlakhniam lam a pan phah lova, amah ka huatphah a ni hek lo. Mahse, min duh lo miau a nih chuan a lam hawia pen leh kher tumna ka nei bik chuang lo. Kha zan kha kan inbiak tawp leh kan inhmuh hnuhnun chu a ni ta mai kha a nia.

Tichuan kum thum hnuah Millenium Centre-ah ka hmu leh chauh. Khatih chhung zawng khan ngaihzawng ka nei hauh lo a ni tih ka ngaihtuah chhuak tel a,  amah vanga nei lo ka ni chu ka inti chiah lo nain chhandang vak puh tur chu ka hre chuang hauh lo.

Aizawlah a awm a ni tih ka hriatna chuan ka nunphung chu a tibuai niber hian ka hria. Ka chhuah hlekin hmuh ka beisei a, hmaichhanah kan inhmu ang tih erawh ka hlau hle lawi bawk si. Mahse, ka hmu ngai lo, hmuhtur a awm ngai lo.

A zirlai zir zo lo haw nge, chawlhhmanga lo haw lawk mai mai ni ang tih te chu ka ngaihtuahna luaha tibuaitu, a chhanna hre tura midang ka zawh ngam si loh chu a ni. A chhukthla leh tawh a niang, hmuh tur a awm tawh si lo.

Ni lo, hetianga awm tur hi ka ni lo a sin. A tel lovin kum thum chuang ka awm thei kha a nia, engatinge tunah heti tak maia ka buai leh chiam ni. Mahse, kha'ng kumthum chhung khan mal takin hun ka hmang tho lovem ni?

Ka insehruh poh leh ka duap zual nimai hian ka hria. Ka zahpuiawm hle mai ka ti!

"Puia, dawt i sawi a ni maw?" ti a țawngkamkhat pawh ka cheh ve hmaa min chhuahchhal ngawttu chu tudang nilovin Hriatpuii a ni.

"Engah ngawt chuan maw?"

"Ngaihzawng nei lo awm tak khan i awm vel a, sawi țha ve mai ta che"

"Aw...Nei miau hek lovi, sawițhat tur chuang a awm hleinem"

"Daw buai lo mai teh a"

"Teh tlat che chuan, tunge han sawi la ka bialnu chu?"

"Ka hre ve hleinem, i bialnute chu i hre zawk ang chu"

"I chiang lo emai, chiang phawt teh a.."

"Haha, tak taka ka birthday te chu ila hria maw?"

"E, hre leh tawh nang. Zirtawpni tiraw?"

"A mak thei. Rawngbawl turin ka ring che nia, midang rintur an awm lo, hmadeuhah lo kal ang che"

Chu pianchampha phâk, Zirtawpni a lo thlen chuan eng boruak nge ka tawn tur pawh hre hauh lovin tlai dar 2:00 velah chuan ka chhuak ta kha a ni a, țhianhlui te nen pawh kan inhmu leh nual turah ngai ang. A nuam phian thei a, ngaihzawng nen an lo kal kawp leh fir fer hlawm a nih chuan a hrehawm ve deuh mai thei bawk.

An in ka va thlen chuan tu teh vak mah an awm lova, Hriatpuii leh a nu chuan dawhkanah hian chawhmeh tur Anțam chu an lo thian mawlh mawlh a. 'Khawnge midang?" ka'n ti lut nghal thawr a.

"An rawn hma hlawm vak lovang, buai hi an inti hlawm thei bawk sia. Chuvang a nia nangpawh ngamtlakah rawngbawl tura ka'n phut deuh che" a ti zui a.

Gas thuk lian an hawh chu lachhuakin an garage lamah chuan ka va bun a, 'thuk lian a awm chuan a sawt deuh ang, a nepnawi deuh inchhunglamah an khawih thei bawk anga' tiin hmanhmawh khuruai lo chuan ka che zui ve nghal mai a.

Arsa chu zobuh tlem nen ka'n chhum hâng zet a, chumi hnuah vawksa, a misa nena inpawlh deuh nak mai chu ka bai zui a, a eitlak ve phian ang a rim pawh a tui châk châk khawp mai.

Chutia thlansa phulkaia ka chet turh turh lai chuan inchhung lam ațanga garage luhna kawngka ațang chuan Atluangi chuan min lo thlir veng veng mai hi a lo nia, ka han hmu thut chu ka phuzawk hial mai thei e!

A nui sen sen a, chhan ngaihna erawh ka hre hauh lo thung. Nuihlêt ngaihna pawh ka hre lo a ni ber ang ka hamhaih deuh tlatin ka hria. Engatinge a lo lan? A chhuk daih tawh turah ka ngai a sin. Hetiang hian a awm dawn tih hria ila chuan ka kal malek tur a nia.

"Tihpui i ngai em?" a ti a.

"Ngai lo" deuh hmuk chuan, ka tum dan pawh a ni chiah lo. Mahse, inrintawkna reng reng ka nei si lo. Meisa ur nen a lum tih tawh sa naklaiin ka thlan lah chu a sat belh leh ta nghal a, mipa hian intih pa theih miah loh hun hi kan lo nei ngei a nih dawn hi a!

Inchhung lamah chuan a lut zui leh mai a niang ka hmu ta lo kha a nia, ka thawl huai mai. A lo lang leh ang tih mawlh a ni ka hlauh ni. Ka mualpho mai dawnin ka hria. Kawngka te chu ka va khar țha ta vel kha a nia, kha hmeichhe lakah khan ka va han tlawm chiang tak em! Lutuk hian mawle.

Thil engemaw chu hrethiam tur ka ni a sin, Hriatpuii'n ngaihzawng ka neih leh neih loh min zawh te kha.. 'Ngaihzawng nei lo chuan a hmuna mi inring nghal ang' a tih te khan engatinge he thil hi ka ngaihtuah chhuah loh le? A hrim hrimah Atluangi pawh hian midang ngaihzawng a nei lo emawni teh reng le?

Chutiang thil ngaihtuahna hmanga ka lo zam hnawk nuaih lai chuan ka ngaihtuahmêk-i chu herhsawp nen a lo chhuak leh ta mauh mai kha a nia. Ka țhutna sir deuh, dinglam kawngpui hnaihlamah chuan țhuthmun a rem a, "Ril a ti țam, a rim a tui tawp" a ti ham ham zui a.

Kawrfual; a dum lam lek lek, khup khuh deuh tiuh teuh hi a ha a, a rawnlan hmasaka a jacket hâk erawh a phelh tawh thung. A sleeper bun erawh chu an in ațanga a lo bunchhuah a ni hauh lovang tih rin theih tur hi a ni a. Bata sleeper hlui deuh tawh, pan thlir thler leh lian zet mai hi a bun a, a kezungțang nalhzia erawh a hmuh hmaih rual a ni lo.

"Midang an lo thleng tawh hlawm em?" ka ti a.

"Umh, Remkima leh a bialnu an awm. Ka hriatngai loh pakhat a awm bawk. A la hma alawm"

"A tlai tawh viau emaw ka tia" ka ti ve mai a. Țawngsual ka hlau nge pawh ka hre lo ka tîm dui mai a, sawi tur lah chu a'n vâng em em khawp leh nghal!

Duhaiin ka chezia chu min en uluk mah mah a ni. Nunphung a tibuai pha deuh tlat hian ka hria. Kha chen a ngâia lo kur ve hrep tawh, tuna taka han huat viau thu a awm bawk si lo hian a ni min tibuai chu.

Inchhungah chuan ka va lut ringawt a, tihtur ka nei a zeng pawh a ni hauh si law. Ka hmaite chu ka va phih ta vel mai mai kha a nia.

"Chaw hi chu an lo thlen kimah chhum mai ila, a lo kal tur zat te chiang phawt ila" tiin Hriatpuii chu ka hrilh a, 'a pawi hleinem i tihdan dan kha a țha mai alawm' a ti ve mai a. Chuti a nih chuan ka tih theih chin chu ka zo rih a ang viau mai. Tuemaw pawh ka kalsan rih thei dawn e.

Garage a mi chawhtawlh leh fianpui vel chu ka va senghawi a, ani pawh chu ke per tlat tlat hian a lo zai rat rat a. Inchhung ka lut leh tur chu ringvak lo hian min au sapin ka hria, chhang ta mai lo chuan ka lut tlang ta thova. A lum ka ti deuh bawk nen inphelh thawlin thlanglam veranda lamah chuan thlifim dawngin ka țhu ta mai mai a. Mahse, ka rilru erawh ka kalsan chiang hle si.

Ka cigarate zuk pawh chu a tui thei meuh lo a ni. Rintei'n min rawn phone hlauh a, reingial chu kan inbe ta awm e. 'Kan haw hma theih chuan ka lo kal dawn nia' tiin kan inbiakna ka ti tawp ta kha a nia.

"Haw hma thei lovang" ti a ka hnunglam ațanga lo țawng chu hawi let kher lo mah ila tunge a nih ka chiang viau thung. A ding nge, engtinnge a awm phei chu ka hre hauh lo, ka awm a nuam lo tih erawh chiang takin ka hria.

"Engvangin maw?" tiin a lam pawh hawi chuang lo chuan ka zawt a.

"Kalkawina tur i nei a lawm"

"Ka neih pawh ka hriat ve si loh chu"

"I nei alawm" a la ti fan a, min rawn hnaih viau tawh a nih ka ring ka țhutna țhutthleng tlâng chu a dawm tlatin ka hria. Ka lu chung zawnah a țawngri tawh miau a.

"Chutiang ka hre lo" ka tih chuan ka koki dinglamah hian dimtein a lo vuan a, ka duh lo asin. Min hnaih lo hram teh khawngaihin..

"Pui, i nei alawm kalna tur. Min thlah te pawh ka ngai a"

"Midang an tam alawm" ka tih chuan ka koki chu a vuan nghet sauh a.

"Midang thlah ka duh hleinem" a tih chuan kan kalthui dawn tain ka hria, ka tho daih a, inchhungah chuan ka luhsan a, Remkima te computer games khelhna bulah chuan ka va țhu ta ringawt a.

Kalsan e ti lo chuan ka mitsir chuan ka thlithlai reng lawi a. Ngawireng chuan a ding char char a, a chesawn har lutuk chu mak ka ti zawk hial a ni.

A hnufeah chuan Hriatpuii'n a koh tak vang chuan chhan pawh chhang lo chuan ngawirengin a lo lut a, a hmel chu a dur deuh khapin ka hria, ka ngaihbel nge phei chu ka hre law.

Amah phei chu rei pawh ka hmu zui lo, khawiah emaw a kal ta a niang. Midang pawh an lo thlen belh zel a, kan college kalpui țhin te hmel, hun engemaw chen hmuh tawh loh te kan han hmuh thar leh takah chuan kan phûlzui hlut hlawm a, kan hunlai kha a lo ngaihawm dawn a nih hi.

"Puia, inchungah ka pindanah han chho lawk rawh, an nghak che" Hriatpuii'n a tih chuan bo fe hian ka melh a. Mi a hrilhru ve țawk țawk a "Tuin maw?" te chu ka la ti tak deuh deuh a, "Han kal mai mai teh" tihpah chuan a kalsawn nghal daih leh nghal a.

Ka hrethiam e. Mahse, ka chhoh a țul hran pawhin ka hre lo. Midang bulah chuan a ti ti ring berah chuan ka la țang zui zat a.

A hnu deuhah chuan chuan Hriatpuii bawk chuan min rawn tur țha leh a, 'chaw chhum a hun tawh, kalpenna hun a awm tawh lo' ka lo tih sak a.

"Midang pawh an tam, an lo ti ve mai ang, han chho mai mai rawh" amah ber chu a lungawi tawh lo niin ka hria, 'ka chhoh a țulna a awm lo' ka ti ta khawl a. Chaw chhum tur chuan ka tho zui nghal daih a, min umzui rang kher mai.

"Han kal ve mai la" ala rawn ti hram hram a.

"Engmah tih tur ka nei hleinem"

"A hmu duh che alawm"

"Hetah pawh min hmu thei reng, mi hriat loh thil sawitur engmah kan nei lo" tiin buhfai te chu keimah zawk chuan ka suak tau deuh nghawng nghawng hian ka hria.

"I va sual tak e aw.. I chho dawn lo tak tak a mi?"

"A duh chuan lo chhuk ve mai ang hmiang, min mamawhna a neih te chuan" ka ti ve ta hmak a.

Ani pawh chu a kalsawn zui ve mai, keipawh chawhtawlha buhfai ka sil zawh hnu chuan chhúm turin garage lamah chuan ka lutphei zui nghal daih a, ka hah up upin a nia ka hriat ni.

Tui ka lum so tawh, buhfai ka thlak țan tihah chuan kawngkabiang nghenga min thlir rengtu chu ka va hmu leh pek a! Engmah phei chu a sawi lem lova, keipawhin ka va be bik hek lo. Țhiandangte an lo vei tuak sek vang chuan duh duh sawina hun pawh a ni chiah lo mai thei e.

Kalsawn a tum hran bawk si lova, ngawireng chuan mi lo thlir mai a, keilahin ka ngaihsak bik bawk lo.

A tui te kan bunthlit hnuah chuan țhian te ho chu inchhunglamah an lut ta diak a, pawnah chuan duhloh rai an sawi ang maiin keimah chuan ka țhu ngal mai kha a nia.

Ka phone ka phawrh a, tih tur em em hre bawk si lo chuan game te chu ka han khel leh rih a, rilruah erawh a awm der si lo.

A che ta! Ka lam pan chuan muangchangin a lo pen phei thlap thlap a.

"Pui, min haw viau a mi?" ka chhang hran lo, ka zial chehlai chu ka fawp kawk ringawt a.

"Hetiang hi i nih ka lo ring ngai lo asin" tihpah chuan ka bulah chuan a lo țhu a, a rim leh a huhâng engkim mai chu danglam a la awm lo, a perfume rim, ka ngainat em em bawk kha a ni a la hman ni.

"Engthil emaw ni tal sawi rawh" ka duhai chuan min hnaihchilh ta mah mah a ni. Tawlhsawnna tur a awm chuang bawk si lo.

"Sawi tur ka hre lo alawm"

"Mahse... Khati khan awm tlat lo la, i lungawi lo hmel hmuh ka duh lo alawm"

"Hehe, chutiang i buaina tham a nih loh chu"

"Ni lo, i hrethiam lo a ni"

"Ni e, a nimai thei. Engmah hi hriatthiam theih alawi pawh ka nei tawh lo" tihpah chuan ka han nui lui deuh ngial a, tilui tih takah za lo tak a ni.

Ka darah chuan a rawn bei ni ber hian ka hria, tawlhsawn ngaihna a awmloh chu thuhran awm tehreng pawh ni se amah hlat tur chuan chakna ka nei lawi si lo. Hrui si lovin min thlung a ni ber alawm le.

Ka banpuamah chuan a kut pahnih hian a dawm tawh a, a ngheh em vang pawh ni lovin chutia a kut a lo dah chu min ti chak lo zualtu niberin ka hria, ka darah a la bei zui bawk si.

"Hlimtaka ka awm ve i phal lo em ni?" tiin zawhna a siam zui a.

"Phal teh reng mai. I duhdan chuan i awm thei alawm, ka dal hleinem che"

"I phal si lova...?"

"Ka thuhnuaia awm i nih loh hi, a thuhrimah hetianga inngaizawng ang maia awm tur pawh hi kan ni chiah pawhin ka hre lo. Mi hmuhah pawh a mawi lovang" ka tizui deuh duah a.

"Ka tan chuang engmah hi a la danglam lo asin" a ti pek a nih chu mawle! Em em hian a..

"Insum ve deuh teh, i ti lutuk deuh mah mah" ka ti nghut a. Ka bân chu a hmer nghet tawh kher mai. Tihdan dang vak hre tawh hek lo i ka dingchhuak nawlh ringawt a, țanpui ngai leh mangang tih hriat tak hmelpu chuan min chhoh en a, a sam pawr pheng mai leh a mitmeng dulriai mai te chu kalsan harsa tak chu a va ni em.

"Tho rawh le, lut ang" ka tih chuan din tum ang pawhin a awm lo. A melh ngai chu a melh ngar mai a, han tihluih țal chu a chakawm fahran lo.

"Inchhungah lut ang, hetia awm reng hi a țha ber lo" ka tih chuan min melh zawk a, kun leh nghal vat mah se a țahchhuak insum chu ka lo hmu hman tho mai. A banah chuan lain ka pawt ding a, inhmachhawn chuan min en ngam chiah bik lo chu a ni.

A khabeah chuan ka chawikang a, a maimitchhing chiah chu a mittui chu a lo farchhuak zawih a, a insût zui nghal hraih a. A hmuikhur der der leh a hnârkua var deuh hek hek chuan a lungchhiat dan chu a lanfiahtir ber hian ka hria.

Rei ka thlêk hman lo, ka nghawngah chuan min kuah chawih a, a rum hek hek a, rawlchhuah meuhin țap lo mahse a țah zawng a țap chiang a ni.

"Khaih khaih khaih, hetiangin awm suh. Naupang chhia ang maia awm loh tur, inchhunglamah lut ang. Mi te reu reuin min hmu ange" ka tih chuan amahah danglamna a thlen tehchiam pawhin ka hre lo, min kuahna lah a thlah duh hlek si lo.

Amah chu ka kuaiher lui ta ringawt kha a nia, inchhunglama luhpui tum chuan ka kalpui lui a, harsa a ti ngang mai.

Kawngkhar kan thlen dawn ruai chuan a țang ta tlat a, 'lut lo mai ang' a ti țha leh a.

"Engngati maw?"

"I bulah ka awm duh"

"Hei i awm reng alawm" ka tih chuan mi chhan tumin a ang ziauva, a puitlin lem hlei lova.

"Lût la.." tiin amah chuan mintur zawk emawni lehnghal ni. Mahse, amah chuan luh a tum hmel loh khawp mai.

"I lo lût ve dawn lo a mi?"

"Ka lo nghak ang che"

"Ka lo chhuak tawh dawn hleinem, hetah tihtur a awm loh hi"

"Thilsawipui tur che ka nei a, khawngaihtakin hun min pe hram la.."

"Tihian sawi mai la, a harsa a mi?" ka tih chuan a lawm hmel fahran lo khawp mai. A awmdan hi ka hrethiam chiah lo chu a ni ber mai. Ama'n min țhen te te a, lo lêt leh a tum chu a ni chêk ang a. Duh viau pawh ni ila a duh hun leh a duh anga awlsama a beiseina tihpuitlin chu ka ba chiah pawhin ka hre bik lo.

"Inchungah ka lo awm ang aw" a ti țha leh pek a.

"Atluang, inhmuh țulna vak hi kan nei lo asin. I duhloh a i kalsan hnu kha ka nia, sawidun tur kan nei tawhin ka hre lo a ni"

"Chutiangin ngai suh, khawngaihtakin... aw, ka ngen che..khawngaihin"

"I duhdan ringawt hian a mi kan awm dawn a?"

"A harsa a mi? Harsatna i neih chuan sawi la.." a tih chuan chhuanlam tur ka hre der bawk si lova. Ka duh lutuk, mahse, min tihdan kha ka lung a awi bik si lo a ni.

"Lût la, inchungah chuan ka lo nghak ang che. I lo chho lo a nih chuan harsatna i neiah ka ngai ang. Ka tibuai tawh lovang che" tiin min en veng veng a, ka rilru chhungril ber thleng chuan hriat a tum emawni tih mai tur khawp chuan min thlêk a.

Ka luhsan hmak! Ka chho dawn em tihngaihtuahna chuan min hnawh tawt mah mah si a ni.

Inchhungah pawh chuan ka leng lo a chha chu a ni e, ka vei tuak sek a, pawnah te ka va chhuak thul!

Chutia vei kual sek ta chuan thlanglam verandah kila Remkima te zu in pawh chu ka zu hmuthuai mai reng a, in ve ngaia zeng pawh ni lo chuan nokhat chu ka'n insak ve ngawt pek a! Ni lo, a no hnihna pawh uak tuarh tuarh chungin ka la in ve.. Engmah hre lo ila a nawm zawk ka ring. Chatthla khawpin ka in ve thei angem le!?

Ka thei lo chiang ang chu, no hnihna pawh ka uakpui viau tawh kha a nia.

Chawei hma kawruahlai a lo ni bawk nen ka pum chu a inlet but but mai hian ka hria a, hetiang hi emawni zawk le an ruih țhin dan chu. Hetiang a nih chuan keichu ka rui peih awzawng lo mai.

Inchhunglamah chuan ka lut zui ve mai a, boruak uap lam zawka ka han luh chuan ka ti hleithei hauh lo mai. Ka luak dawn takngial a hriain sofaah chuan ka mu ta ringawt a, taksa a chet loh chuan luakchhuak pawh a zia deuh e.

Chutia a ualau lai ber ka mu ngût mai chu a dik berin ka hre bawk si lo. Mahni mawnghlimna mai tur ni a ka hriat vang chuan hmundanga ka awm bo a ngai a ni. Chatthlaah min ngai der mai dawn a sin.

A nih nih ni mai ang tih rilru pu chung chuan inchunglam chhohnaah chuan ka lawn chho zui ta a, tuemaw beiseina tihhlawhtlin tuma chho ka nih aimahin bik bo ka duh vang chu a ni zawk mahin ka hria.

Hriatpuii pindana ka luh chuan amah Atluangi ber pawh chu ka hmu leh lawi si lova. A pawi love. Min nghak lo a nih na na na chuan harsatna ka nei bik lo turah ngai ang.

Khumah chuan ka let tawp a, ka vir miai miai mai ka ti.

Tuemaw chu khumah chuan a lo țhu ve a ni ngei ang le. Amah Atluangi pawh chu a ni mahna.

"Pui, 'ngatinge zu i in?" tih chu min biakna hmasa ber a ni. Ka chet chuan ka luak mai dawnin ka hre bawk si, 'nangmah vang' han tih mai ka duh a, mahse, chhan lovah ka tlak ta zawk a nih kha.

Ka insum thei dawnin ka hre ta lo, ka tho thut a toilet lam pan chuan ka kal thuai a, ka duhna hmun pawh ka thleng hman ta lo, kawngkhar ka hawng chiah chu penlut hman lovin ka uak zui nghal mai kha a nia!

A va han hrehawm teh lul ve le.

Ka chalah chuan a lo dawm a, chhuak tur awm tawh mang lo chu ka uak pui tak vak vak a, ka luahchhuah tawh sa lah toilet chhuatah chuan a kawi nuaih tawh mai bawk si. A zahthlak duh cham cham hle mai ka ti.

Tui a suak a, kam min țhuah tir a, ka hmai ka phih bawk a, lu leih huh tura min tih erawh chu ka zawm lem hlei lova. Chutia ka luak tak chiamah chuan ka harh deuh hawk a, mahse, zawi ngiai ngiai tak ka ni. Thei leh thei lo chuan ka luak chu leihfai tumin no chu ka ban a, 'lo va mu rawh' tiin amah zawk chuan a leih zui nghal a.

Ka țang der peih lo, chutiang turin tha pawh ka nei tawh lo. Muangchangin khumlam pan chuan ka phei a, a vawt ka ti nge pawh ka hre lo ka khur der der hian ka hria.

Lukham chu khumlu-ah chuan ka dah a, țhu mu ti tih deuh hian ka chhing diar diar a, ngaihtuahna mumal ka nei thei lo. Ka luak hnem thawkhat a niang ka ruak ngawih ngawih niber hian ka hria.

Toilet a a thawm a reh hnu pawh chuan a lo chhuak zui mai lo. Engnge maw a tih chen chen le ka tih rilruk hnuah chuan a lo lang ta hram a, a țap a ni tih hriatreng hian a mit chu a sen rum a, a bui deuh lâk mai bawk. Ka lam pana a lo kal chu peih leh peih lo chuan ka lo en reng a, a hmaizahawm duh viau a ni.

Khuma lo țhut pah chuan "Theithur i ei duh em? Ka zu la ang aw" ka rin loh tak mai chuan a ti a.

"Aih, duh lo. Ka țha" ka lo tih sak a.

Min ngheng chet chuan a lo tawlh chho va, sawi leh i pawh nei chuang lo chuan min en veng veng niin ka hria, keilah ka mengțha peih chiah bawk si lova. Chutianga reife kan awm hnuah chuan a insût hraih ri ka hriat vangin ka meng zawk a, bianga mittui luang ngiah ngiah chung chuan min lo thlir reng a! Ka che lawih ni ber hian ka hria.

A dara dawm pah chuan "Engatinge khatia i awm?" ka ti a.

Engmah sawi lo chuan ka âwmah chuan a lo beithlawp a, a insût nghal hliam hliam ringawt a, tihvak ngaihna ka hre leh pek tawh lo. Kuah chung chuan a hnungzang chu ka chulsak heuh heuh ringawt a. Ani lah chuan mi kuah ngawt ngawt nimai hian ka hria.

A zia ta deuh a niang "Engtinnge hetiang hian i awm theih?" a ti țiâk a. Ka chhang lem lo.

A lo dakchhuak a, mittui tla leh mai tur niawm tak chuan a mit chu a meng ser ser a, a mithnawih te pawh chu a pherh deuh niaih mai bawk a. Insum tih hriat reng hian a inpet fan fan a.

Ka biang tawnah chuan a dawm a, a kutzungpui chuan ka hmui chu a hmet kual zei zei a, a hmel chu a lo hnai sawt viau mai.

Min fawp takngial dawn a ka hriat vang chuan lo dawh tawp chu ka duh bik hauh lo. "Ka nun hi a danglam vek tawh" ka lo ti khauh a. A tawp chiang kher mai!

A tho nalh a, tukverhah chuan dakin pawnlam a thlir vang vang a, a mittui chu a hru zeuh zeuhin ka hria.

"A va hlêp țha awm ve a Puia chu" tih ri chuan min ti harh hlawl a, kei hi ka lo muhil daih a ni awm asin mawle. Ka han hawichhuak a, Hriatpuii khumah chuan ka lo la mu reng chu niin. Ka bulah chuan ngui nghiai hian Atluangi a la țhu bawk.

Engatinge ka mutthilh ngawt le. Khua lah chu a lo thim fel der tawh bawk si, ka sana chu ka han enthuai a, dar 7:42 a ni.

"I birthday lawm ve chu i riaklut a ni ringawt alawm le" tiin Hriatpuii chuan mi nuih zui kar kar a. 'Lo chhuk thla mai rawh u aw, chawhmeh ka lo tilum ang' tiin min chhuahsan zui leh mai a.

Khai, chaw pawh kan la ei ve lo. Ka bula mi pawh hian ala eibikin ka ring lo. A zia lo tih hian a sawifiah zo pawhin ka hre lo.

"Chaw i la ei lo a mi?" tiin ka bula mi chu ka han zawt a. 'Umh' ti chiahin min chhang!

"Zuk ei rawh, ka ei peih lo"

"Aih"

"Ngati maw?"

"I ei ve loh chuan.." teh tlat chuan le.

"Min lo hawsan mai lova..." ka tih chuan a lawm lo tih hriatreng hian a nersak a, "Min hua tih chu ka hria. Mahse, tlem talin min khawngaih ve lo a mi?" a ti sap a. Ka lam pawh a hawi tawh lo. Leh lam hawi chuan a țhu ngât a.

"Ka khawngaih i ngai hleinem, i duhdan takin i awm a, ka duhthlanna ni lovin nangma duhthlanna ngei a nia kan ințhen chhan kha. Engkim a nih tur ang a ni vek tawh, min duh lova min hnawltu na na na chunga 'ka la rinawm reng' lo tih hi ka ba bik pawhin ka hre lo" ka sawina mah mah em ka hre lo. A lo na ta deuh a nih pawhin amah hi khawih lêt ve ngei se ka ti a ni.  Anihna takah chuan ngaihzawng ka nei hauh si lo.

A hmai a hupin a thawhawk a, a țah zawng a țapchhuak em lo.

"In va rei ve, khu ka tilum vek tawh a nia" tiin Hriatpuii chu a pindanah chuan a lo lut zui leh a. Kan awmdan a hmuh chuan han phul hluahna chi niin a hre lo a niang Atluangi chu a țhutchilh thuai a.

"Țhiannu, engngatinge khatia i awm? Naupang ang maia awm tur a ni hleinem" tiin a kuah zui a. An ințah khum faih faih kha mawle.

"Puia engnge awmzia nia?" tiin Hriatpuii chuan min zawt a.

"Awmzia a neih vak pawh ka hre hleinem, a thiltihin a vaw let ve a niang" ka lo tih sak mai a, "Engnge, eng a thiltih maw?"

"Aw, amah kha zawt la a ni mai lawm"

"Sawi ve mai la, tih dan dan te pawh a awm mai thei asin" ala ti zui hram pek a.

"Hetiang tur a ni tih hriata lo kal malek tur a nia" ka ti zui ringawt a.

"Engnge chiam chiam che chuan..?"

"A tirah khan sawi țhat ve mai tur che nia" tiin amah pawh chu ka leh puh zawk ta mah a.

"Tehngawt che chuan, dawt i sawi a nih loh chuan engmah harsatna tur i nei lo. Dawt i sawi a nih leh buai chu i phû ve rengah kan ngai mai a niang chu" a ti ta duah a. A bulah khan ngaihzawng ka neih loh thu ka lo sawi vek tawh bawk sia, ka dang der chu a ni mai e.

Chawei tur chuan an inhruaithla a, 'min lo zui nghal rawh' tiin min kalsan kha a nia. A dikchiah chuan a zahthlak ve reng mai, ka zahberna zawk chu Hriatpuii chhungte lakah a ni. Midang chu a pal liam theih mai ang.

Chutiang vel ka ngaihtuah meklai chuan step-ah chuan hmanhmawh deuha lo chho thawm hi a ri thlak thlak a, Hriatpuii bawk lo niin. "Kal rawh le, kan siam zo e" a rawn ti a.

"Ka zak e, i chhungte an zahawm"

"Ka nu te an inkhawm, ka naute nen chauh kan awm. Lehkha an zir daih tawh" a ti hlauh a, a zia e. Inhnuailam pan chuan kan inzuithla ta nghal a, a țhiante ho an lo la awm turah ka ngai a, a tu amah chu an lo awm tawh bawk si lova, a lang chin chu kan pathum lawng chu kan ni mai e.

Thleng pathum ka hmuh vang chuan Hriatpuii chu 'ila ei bik nange?' tiin kan zawt leh a. 'I chahthlak vang alawm mawle rilțam deuh a ka awm. Hrehawm intih ka hlau sia' a ti deuh zek a. A la nui vawr vawr zui leh ta nghal a.

Chawei chu a tui fahran lo kher mai. Keichuan ka puar khawp chu ka ei leh thei mai a, ka veilama țhu chuan a puarkhawp a hmu ngut pawhin ka ring lo. A sik nawi vel mai mai niin ka hria.

Hriatpuii a țawng duh hrim a, a zarah boruak rit lutuk tur chu a ziaawm deuh. Chuti ni lo se chuan ngawirengin kan in melh tlawk tlawk emaw a ni ang a, nuam kan sa lo teh ang.

Ngawiteh u, Rintei pawh ka lo kalkawi ang ka ti pek khan ka hria, hun pawh a awm dawn emawni. Khawnge ka phone te hi le? Inchunglamah te chuan ka han zawng ngial a, ka hmu mai bawk si lo. "Hriat, ka phone i lo hmu em?" ka tih chuan 'Hmu nang' a ti bawk si.

Atluangi chuan a bag chu a zen rak rak a, engmah sawi lovin ka phone chu min pe pek a nih chu!

"Puia, țha deuhin awm ve mai ula, nge, harsatna i nei zawk a mi?" tiin Atluangi inthiar tura a luh lai chuan Hriati chuan a ti leh a. Ka nui suk duh chauh a.

"Ngaihzawng te hi i lo nei ru reng a ni lo maw nang hi, engmah i sawi chiang duh bawk si lo. Heti ringawt te chu atan pawh a hrehawm dawn asin, ngaihtuah ve la..." a ti leh a.

"A duh hunah min țhen ang a, a duh hun hunah min nihpui leh mai dawn tihna a mi?" ka ti let ve ngat a.

"I ngaikawi a nih kha" tihbak mi chhanna tur chu a hrebik chuang lo.

Midang an haw vek tawh bawk si vang chuan ka thlah haw ngei chu a ngaih hmel e. Ka phur viau lo a ni.  'Drop' chawrh ila a ni mai alawm.

Chaw kan eikham hnuah chuan rei pawh kan țhu muang ta lo, tlanchhiatna a awm tawh miau loh vang chuan duh reng vang pawh nilovin ka bike hnungah chuan a țhu ta vang a.  Muangchangin kan tlanchhuak dun ta kha a nia.

A țawng lova, keiin ka be bik hek lo. Ka hnungah chuan zeife hian a bei thlem a, mi erawh a kuah na ngam chiah lo niin ka hria.

Thui fe kan tlan hnuah chuan "Ding lawk teh" a tih vangin kawngsir remchang laiah chuan ka ding zui ve mai a. Engvang tak chu ni ang maw!?

                   Chapter

                        - V -

Amah chu a chhuk a, kei chu chhuk ve chuang lovin inrahkhalhin ka ding mai a, hmun fianrial deuh lai a ni bawk sia, eng a ti dawn chu nimaw tiin ka han hawi let a. Ani chuan a bag chhung a lo zen rak rak a, a phone a theihnghilh nge mawni dawn le.

"Theihnghilh i nei a mi?" ka ti a.

"Aih"

A bag chu a hai chiam bawk sia, chutia ka enreng lai chuan bawm tereuh te, fel khir kher hi a lachhuak a, ka hmuhdan chuan zungbun bawm hi a ang ka ti deuh ber. Mahse ka chiang ngam chuang lova.

Min han melh leh te te a, ka lam pan chuan penthum vel lo penin min rawn dinchilh chu a ni leh ruai tawh a.

A thil ken chu a hawng rak rak a, zungbun bawm emaw ka tih chu a lo ni chiah lova, țhi zawk hi a lo nia! Min melh ralh pah chuan 'hei hi ka lo hawn che a' a ti sap a.

"Ka va lawm ve, mi te i lo la hre ve a"

"Ka theihnghilh che i ring a mi?"

"Min hriatreng hi ka ring lem lo viau a ni"

"Engmah i hre lo"

"Hre lo e, hriat pawh ka mamawh miah hleinem" ka tih chuan a lawm lo hle a ni tih a hmel danglam dan ațang chuan a lang reng a.

"Hetiang em em hian min hua a ni tih hria ila chuan kan inhmu lo tur a nia tiraw" țhi chu ka nghawngah chuan min awrhtir a, 'min hrethiam hram rawh, tihbuai tawh lo che ka tum dawn nia. Mahse, ka thei ange maw" tihpah chuan min kuah zui nghal daih a!

A khur der der a, ka beng bulah chuan a thaw lum ham ham a. Reife chu min kuah, engtin ka ti ve lem hlei lova, "Engtikah emaw chuan ka nghak chhuak thei ang che tiraw!?" a tihlai chuan a taksa chu a țang țeuh hian ka hria. Ka hmangaih lo a ni lo, ka khawngaih lo pawh a ni hek lo. Min tihnat ang khan ka natna ang kha hre ve se ka duh bawk si.

"Chuang rawh le, kal ang" ka ti a.

"Mawh, ka nghak ang che aw. I rilru a dam hun thleng.." Bike ah chuan a lawn a, chhan pawh chhang lem lovin kan kal leh ta kha a nia, engmah a sawi zui ta bik lo.

An kawt kan thlen chuan current a awm lo a ni ngei ang an in chu a lo thim deuh țhiap a, an țhutkhawmna pindan chu inverter niawm tak hi dul deuh riai hian a eng thung a.

Bike ațang chuan chhukin ka dinglamah chuan a lo ding a, "Engtin pawh min ti mah la ka dem ngai lo ang che. Mahse, ka hmangaih che  tih erawh hi chu min theihnghilh sak lo la"

"Engtinnge ka hmangaih che min la tih theih? Ka hrethiam lo. Mi i țhen te te a i duhdan i puitlin ta maw tihah 'ka hmangaih che' in tih țhat leh chu dawnsawn dan pawh ka hrethiam tawh lo e a" ka tih sak a.

"Sawifiahna hun mi pe duh bawk si lova..." a tisap a.

"Sawifiah ngai leh tho tur chu ti loh mai tur alawm" ka la tihsak țalh a.

"I hrethiam lo a ni"

"Ni e, ka hrethiam lo. Hriatthiam tur thil a awm pawhin ka hre lo. Ka tel lovin i hlim thei zawk ang, kei chu min ngaihtuah duh suh, ka awm ve nawk nawk thei zel a nia" ka tih chuan inchhung a lut tur chuan step-ah chuan a tlan zui nghal daih a, a hrilhhai thlak duh ang reng.

Tlangnel taka zan tam ka lo lawiluh fo tawhna hmun chu zawhte thil eiru ang maiin ka chhuahsan ta kha a nia. Ka hmuhlohna pawh a rei ta hle mai.

Ka hawtlang dawn chuan a la hma deuh si, bakah zu rim te ka nam bawk sia chhungte an lo la men chuan a țha ber lovang. Mahse, khawnge ka kal chuan ang?

Rintei a lo lang hmasa ber a, lehkha a zir angem aw. Ka han phone rawih a, lengtur chuan mi a 'welcome' khawp mai. An in lam pan chuan ka tlan kual leh ta kha a nia.

Kawngka chu ka han kik kauh kauh a, chhangtu ka nei mai lo. Ka han kik nawn leh țhin a, a ngai ang bawk chuan a reh leh țhiap mai. Leng tur khan min sawm ve bawk sia, a muhil emawni reuh le.

Kawngkhar chu ka han pawt a, a inhawng mai bawk sia. Tumah ka hmu chuang der lo mai. 'In awm em?" ka han ti țha leh a. Pindan lam ațang chuan Rintei chuan min lo chhang ve ta hram e.

Pindan lam ațang chuan a lo lang nghal var a, a nui seng reuh lehnghal a!

"Ka bedsheet a lo bal lutuk a, ka thlak e ka tia" a ti zui nghal zat a. "Khawnge i u?" "Ani te chu i hriat kha, inah a awm hman hleinem, kohhran ban alawm, a tel lo hian a kal thei lo a niang" nui chung chuan a ti zui a.

"I fiamthu tak nain ka duhai chuan a inhmang mah mah deuh, ka thu chu a ni chiah lo nain. Zirlai te ala ni bawk sia"

"Nia, a tih hleihtheih loh, nihna te hi a lo nei ve thliah bawk sia. Aman a peih vang pawh ni lo hian a nihnain a phût chin te pawh a awm ve a niang, lehkha pawh a zir țha hman meuh lo chu a nih hi"

"Inhman te chu a țha lutuk a, inhman theih chuan duhthusam a nia. Mahse, zirlai tan hi chuan a țulber emaw ni hi ka ti ve fo mai"

"Nia tiraw, zirlai zirțhat theih loh kha a rau viau lo a ni" a lo ti ve mai a.

"Kan hruaitu te hi chuan tupawh mai hi inhmang tur hian min fuih vek a, an tihtur pawh a ni reng a, mahse mahni inhriatchian tur hi ka ti ve tlat kei chu"

"Engti zawngin maw?" a lo ti a.

"Kohhran leh țhalai vela inhmang tak examnaah te an han hlawhtling a, chhuangtaka sawiin 'kohhrana inhmang chung hian a hlawhtlin theih a ni' te hi an ti mai zel a, a dikna chin chu awm tho mahse ka pang a lo za deuh țhin kei chu"

"Dek i hua nimaw!?" a lo ti fahran a!

"A chhan chu mihring hi kan in ang lo tih hi hriat phawt tur a nia, mi tu emaw kohhrana inhmang tak chunga a hlawhtling thei a nih chuan a lawmawm em em a, lawmpui tur pawh a ni ang. Mahse chutiang mi kan nih vek si loh vang chuan a nia mahni inhriatchian phawt tur ka tihna chhan pawh.

"Mi tih theih ang kha ka ti ve thei kher lova, kan tih theih ang pawh an ti thei bik kher lo ang. Kohhrana inhmang tak chung hian ka zirlai hi țhatakin ka zir thei angem tih inngaihtuah hmasa ila, chuta kan thutlukna chu mawhphur ngam bawk ila, kan inhuam a nih chuan inhman chu a pawina a awm hauh lo. Huam mang si lo, zirțha peih em em bawk si lo, inhmang ve tho bawk si hian kan tei suau suau ringawt a.

Mizo pa lar tak pakhat chuan a tu leh fate hnenah, "Zirlai in nih chhung chuan in zirna chiah kha ngaihtuah ula, KȚP leh thildangah inhmang tam suh u, in zir zawh hnu, graduate in nih hnuah Kohhran pawhin a hmang țangkai thei zawk ang che u,” tiin a hrilh a.

Hei hi nu leh pa tam tak te ngaihdan pawh a ni ang ka ring. Kawng tam takah chuan a dikin a awm reng bawk a. Zirlai tam tak chu Țhalai pawlah telin rilru phawklêk, lehkha zir tihar tawk lekin an inhmang a, Pathian malsawm tlakin an taima leh peih si lo. Pathian hnaih leh ring ngam tak tak chuang si lo, thiamna tak tak pawchhuak tur khawpa nasaa zir peih chuang bawk si lovin a laihawl velah a then kual ve theih tlat a ni. Hetiang ang mi te hian KȚP emaw, SAY emaw, țhalai pawl hmai an ti bal fo țhin. Anmahni tan ngei pawh a pawi a ni. Kohhran țhalai pawla inhmang lo mai tura an chhungte’n an duh zawk pawh hi an thiamawm hle a ni.

Hetihlai hian mahni theihna hrechiang, a huna mahni in 'adjust' thei leh Pathian rinchhan tak tak tan chuan kohhrana inhman leh zirna hi an intibuai reng reng lova. Keimahni'n tih tak takna nena kan beih miau chuan kawng chu a kaw mai.

Thawhrim leh taimak erawh a ngai thung. Kan țhatlai hun tam zawk deuh thaw hi zirnaah kan hmang ral a, Pathian pawhin he hun tho hi ama tan hmang turin min duh a ni kan ti țhin a, a dik pawh a dik mahna. Mahse, kan hmalam hun pawh sial kaw zo lo khawpa kan inhmang a nih chuan a țha ka ti ve hauh lo. Pathian pawhin a duhbik ka ring chiah lo.

Bakah, a neinung te chuan phaiah an fate an thawn bo daih a, an rawn zirchhuak a, an rawn inhmang leh mai a, 'a țhatlai hun zawng a awm bo' tuman kan tihsak chuang lo. Lehkha zirin a awm bo kan ti mai. Helai tualchhungah kan hauh ngam leh kan tihngam ho hi kan ințim vak vak ringawt a, kan society-a huho nun tam lutuk hi kan zirlai hian a tuar deuh te hian a nia ka hriat ni"

Chuvang chuan lehkha zir chungin Țhalai ah chanvo leh mawhphurhna kan nei a nih pawhin kan tlin tawk leh kan zawh tawk hi chhut thiam ila, kan rawngbawlpui te pawh hian mi an hrethiam ve lutuk țhin a nia. Kohhran activities-a kan tel hnem deuh a nih chuan zirna atan hun țha kan nei tlem tihna a ni a. Mahse, hunawl remchang kan neih apiangah tihtakzeta kan beih phawt chuan Pathian pawhin mal min sawm ngei chuan ka ring. A inhmang ve lo te aichuan kan thawhrim deuh te pawh a țul thung ang chu.

"Engnge kan thupui khah!?" a tih chuan ka lo sawitui lutuk mah mah a ni tih ka hrechhuak thut a, lai deuh chuan ka nui ta ringawt a.

"Zanin chu i tui hliam hliam e ka tia, i rim a lo dik em a nih hi mawle" a la ti zui ta lai a! Za lo zeta a sira ka țhen țai kha.

"Tunlai hi i zia a danglam riau a nia, engnge dik lo deuh a awm nge, a dik lutuk zawk?" a ti zui a.

"Engmah ka danglam pawh ka hre hleinem, danglamna chhan tur pawh a awm lo" ka ti ve mai a.

"A awm a niang, i awmdanah a hriat miau bawk sia lawm. Hmanni Millenium a kan kal ni ațang khan nitain ka hria i danglam tak em em ni, a dik em?"

A dik pawh a dik ta ve ang. Kha ni kha Atluangi ka hmuh leh ni kha a ni miau alawm le.

"A awihawm lo e, i ngaihtuahna mai mai aniang" ka la tih sak ve țalh a!

"Ka uang lo a nia aw, ka hrechiang ve khat chein ka hria. Mawl viau mah ila min bum bik lovang" a la ti ve fan a.

"A nih engtinnge ka awm a?"

"Min be tlem a, zanah phei chuan biak pawh min be mang tawh lo. Min ngaihsak lo tihna nih chu, he he ka va phut sang tak em!" a la ti zuiah!

"Chutianga ka awm pawh ka lo hre hleinem"

"Tak taka, ngai thupui vak kher lo la. Ka tan chuan mi bîk tak kha i ni tawh hrim hrim a, hetia engemaw changa min han hriatchhuah te hi a tawk viau a ni. Engmah beisei ka nei hran lo a nia" a ti deuh duah a.

"Beisei ta tlat ila..?"

"Haha, ka lakah hian beisei i nei lo tih hi sawi kher lo mah la i awmdan ațang ringawt pawh hian ka chiang ve a nia aw"

"A ni lo mai thei asin, i hresual ve thei a"

"Daw lo mai teh. Thingpui i in duh tawh em kan chhuang ange aw?"

"Ka inchak vak lo. Lum lo mai rawh zanin chu ka awl ang che"

"I ti tak tak maw, ka lum dawn lo a nia a nih leh. A tuiril lam i lem hnem deuh a ni maw"

"Apple juice a lawm ka in, zu ka in hleinem"

"Haha, ve ngei a che a. Phâ buai lo mai teh. A hrim hrimah engatinge i in ve ngawt a?"

"Apple juice te chu a pawi vak a mi?"

"Dawtsawi i thiam lo emai, i mitmeng ațang khan dawt i sawi tih a hriat nghal vek. Chaweikhawmnaah i la kalzui a nia, tunlaia chaweikhawmin apple juice an in chu tuman an ring buai peih lovang"

"No hnih chauh alawm ka in, a ruih pawh ka ruih loh hi" ka tih chuan a nui ta chiam a.

"A inpuang ta hram e, engngatinge i in ve ngawt?" a tih chuan chhuanlam tur mai ka hre hauh lo mai ka ti.

"An insup sup sia, a remchang em a ka'n in  ve ngawt mawle"

"A va ho tak, thildang vang a ni zawk lo maw, i rilru lo hah te hi a niange i danglam sawt bawk sia?"

Hre lo se ka duh viau nain nakin zelah hriase a buaithlak loh ka rin vang chuan hrilh tlang mai ka duh ta zawk a, ka duh ang ngei chuan ka hrilh ta reng bawk a. Mak a ti kher mai.

"In ințhen chhan chu i hre miah lo maw?" a ti zui nghal a.

"Hre miah nang, ka zawt si lova, a sawi bik bawk lova, min duh tawh lova min țhen a niang chu ka ti mai a, 'engnge min țhen chhan?' ti a zawh fahran kha ka tlawmla ve deuh bawk sia"

"A ni ve tho mai. Ințhen an duh miau chuan ka țhen lo che lo tih ringawt kha a sawt mang bawk si lova, a pawi hle mai chutiang teh hrep i lo tuar ve chu. Keichu ngaihzawng neih pawh hi ka peih lo, heti hian mahni te hian hmelțha hle ila a ni mai"

"I hmel a țha mi?"

"I țha min tih kha nangma'n hmanah.."

"Ka tih pawh ka va hre lo ve, ka sawisual i hre sual a ni lo maw!?"

"A ni mai thei asin, chuan engtinnge in awm zel dawn? A nghah tlat si che chuan?"

"Tunah rih chuan hetia awm hi a tawk rih ka tia, a duhdan zawng zawng tihpuitlin nghal duak duak te chuan min ngainep anga sin. Han tuar ve deuh phawt se min duh tak tak leh tak tak loh chu a hriat ang chu ka ti mai a"

"A dik ve reng. Mahse, a khawngaihthlak ka ti kei chu. I la duh ve tho te chuan  chutia hrem kher a ngai a mi?"

"Kan fiahna te pawh a ni chho ve zel ang chu"

"I luhlul ve bawk siah! Midang ngaizawng se i buai awm nen, i'n induh khum leh kawi rawi a, mipa hi chu in mizia hi a mak ve ngawt mai"

"Chungnung lo tur zawkin chungnung zawk emaw an intih tlat hian thil a kal dik thei lo țhin alawm. Inngaihzawn lai ațanga engkima a thuhnuaia ka awm mai te chuan a tur ve reng emaw a ti ang a inneih hunah thuneih kan han duh ve anga, a bak hlar tawh mai dawn asin. Zawm duh loh leh tihduh loh luih te pawh hi a țul hun a awm ve alawm, hmeichhia hi sawizawi deuh inngai țhin" ka ti deuh duah a.

"A ni ve reng mai, hmeichhiate chu enkawl dan a zir an tih kha.." a lo ti liam mai a.

"Lo leng la ka duh chhan chu thil hrilh tur che ka nei a.." a tih chuan ka bengkhawn rang kher mai. Hriau zuma viha kan hawilet zawk ang mai hi ka niin ka hre hial.

"Engnge a? Sawi la?" ka ti thuai a.

"Zahthlak te pawh ka ti deuh"

"A ho e, englam nge ni hrim hrim a?"

"Vawiinah naute pa nen khan kan inhmu a.." hm, ka beisei loh lam daih a sawi ka ti.

"Chuan...?"

"Kan inhau deuh a..."

"Engngatinge?"

"Stepa ka chhuk tur min au ding a, 'Naute kha i titla a ni maw, i va nep ve' min tia nih kha..."

"Engtinnge i chhan a?"

"Biak pawh min be suh, i nep fe zawk ka ti, ka thin a rim lutuk a, ka țap lo chauh a ni"

"A nih tak chu a va ti mak bawk ve a, zah tak a ruanga chutiang tea a tih ngam che le"

"Zah te chu a hlat lutuk, a chapo bawk sia maw, zu kha rui lo ni ila a kut hmawr paw'n min khawih lo tur a nia. Midang zahpahna a nei miah bawk si lova, a nu leh pa thawhchhuah zarah kei ber emaw a intia, midang paw'n an ngei lutuk" a ti hlak hlak a.

"A tih leh che chuan engtin emaw kan ti tawh dawn nia, mipa pawh a nih nek loh chu"

"Min ti leh awm emai, zahpah a nei ve hleinem. Class a ruih an ching bawk sia, an țhianho saw an ninawm lutuk"

"Khawi vengah nge an awm a?"

An veng a sawi hnuah chuan 'engtinmah tih a ngai lo, i tih chuan a pawngpawrh tial tial mai ang, ka tan a zahthlak zawk ang" tiin inveng tak chuan a sawi zui a. A ngaihtuahna ațang chuan thil nithei tak te pawh a ni mahna. Mahse, kei ka ngaihdan erawh chu a ni hauh lo thung.

Dawl zawra zawr hnâp khawpin han ching mai ila khawiah a chhunzawm ngam hian ka ring lo. Ka ring lo hul hual a ni ber mai.

A u chhuak a lo haw takah chuan keipawh lengrei tawh lovin ka haw zui ve mai a, ka rin aitak chuan ka lo leng rei phian mai ka ti. Ka lo ruiphur chiam pek a ni awm e!

Ka mu turin darzat en tuma ka phone ka han bih chu 'miscall' te a lo awm a, a number lah ka nei bawk si lova. Tunge mawni dawn ni. Min mamawh a nih chuan a lo ti țha leh mai ang chu maw tiin ka ti lêt duh ta lova, whats app lam message ka'n bih leh thuak thuak a, ka number neih loh pakhat ațangin message ka dawng leh bawk.

'Ka hmangaih che a sin' tih thu ngei a ni ka dawn ni.

Rintei number ka nei a, ka hriat hnaivaiho number ka neih loh chu Lalthantluangi chiah a ni. Min miscall tu number nen pawh chuan a in ang chiah e. Amah bak an ni lovang. Chhan loh ka tum zet a, a muthilh tawh tho ka rin vang chuan 'mangțha le' tih ka va thawn hram pek a, ka thawn zo chauh chu ka inchhir leh nghal lawi a, awmze nei hauhlovin ka'n delete leh ngawt a, a hmu thei vek tho awm sia! A ngaihtuah tawi thlak deuh mange a.

Ka phone chu ka tihdan pangaiin ka switch off zui nghal a, ka mu ta kha a nia, ka mut lah chu a chhuak lo pherh hrep a, ngaihtuahna a vak kual zau duh khawp mai.

'Lo leng phei teh' Hriatpuii'n a tih vang chuan nikhat chu ka awldeuh bawka tiin ka va tlawh kha a nia, beisei lawk tho mah ni se ka duh aia tam a țhiannu chanchin ka va ngaithla pek alawm mawle.

Nula pakhat, la naupan hmel deuh nen min hmuh thu nen lam chuan Hriatpuii chu a lo hrilh vek pek a! Ni, Rintei nen hian kan inzui kual ve na sa ang reng sia, min hmutu tan chuan inngaizawng kan ni emaw tih mai chu awl tak tur a ni.

"I duh lo a nih chuan i duh loh thu hrilh tlang law law la, ngaihzawng i nei a nih pawhin hrilh tawp rawh. Hetia chiang leh chiang lo; beisei tur tinga awm si, beisei tak tak dawna ni mang si lova awm reng hi a puitlin loh thlak emai. I awmdan tur hrilh chiang rawh" a ti râwng mai a.

"A nihna takah chuan maw tun thleng hian kan ințhen chhan kha ka la hre reng reng hleinem. Na ve deuh a nia aw, intihbuaina pawh awm lova ințhen ang ti ringawt kha nihpui leh pawh ni ila khatiang tho khan min ti leh lovang tih i sawithei bik a mi?"

"In ințhen chhan i hre lova maw?"

"Hre nang, a sawi hleinem"

"A mawl a nih chu Atluangi pawh chu, 'lehkha zir ngawrh deuh hlek ka duh' a ti a nih kha. Engatinge sawina chang pawh a hriat loh, ka lo hau ange"

"A ho emai, a liam vek tawh. Tuna hauh khan awmzia a nei tawh hleinem. A hrim hrimah a lehkhazir ka tibuai țhin a ni teh chêk ang a chutia ințhen phah hial khawp chu.."

"Chutianga intibuai lam pawh a ni lo, 'MA zir pahin coaching kal nghal ka duh a, ngaihzawng hi ka la na ve thei sia, Ka zirlai min tihbuai ka hlau ințhen rih mai ka duh. Zir zawh lamah Pathianin rem a tih chuan hun a la tam dawn tho va' a ti a ni kha"

"Chu'ng te chu sawi țha mai sela, min lo nghak rawh pawh ti se nghah theih loh thu a awm hleinem"

"Chu tak chu alawm a mawlna reng. Engngatinge sawina chang pawh a hriat loh...?"

"A, Pathian remruat kan ni lo a niang" ka ti ta ringawt a. Tihvak ngaihna pawh ka hre bik chuang lo.

Chutia kan inhnial bawng bawng lai chuan Kawngkapui chu a lo inhawng riai riai a,  Atluangi chu a lo dak lut heu mai pek a!

Khai leh! An thil ruahman dan mai mai chu le. Hriatpuii chu ka han melh kawk a, ani lah chu a lo nui vur vur duh chauh leh nghal a..

                     Chapter

                           - VI -

"Hei a lo thleng alawm, amah hian han sawifiah sela" tiin a țhiannu chu a melh zauh a.

"Engmaw engnge in lo sawi a?" bo hmel fe chuan a han ti a.

"Nizanah 'a mumangah Atluangi'n min hmu e' a tia lawm, ka awih lo lutuk a ka lo hnial a, a țangkawh ve tlat bawk sia" a nui țhaw leh ta nghal a.

"A sawidik reng alawm, nangpawh min rawn zawh ve mai tur che a nia chutiang te chu" a'n tih zawm zat pek kha!

"Awi țhiannu i bengbeh chu a va nalh ve, khawimaw ka lo enchhin" tihpah chuan a'n hnaihchilh ruak a, a thlawnsak zui tak mawlh mawlh a.

"Hetiang te hi min lo hawn ve tur a nia, silver ori deuh ka duh ve a sin. Lei tur hi ka hmu ngai bawk si lova. Hei hi min lo pe la, a nih loh leh ka lo leichhawng ang" te chu a la ti tak deuh deuh a, hmeichhia țhin hi chu aw.

"A chi loh hei chu ka roh ve viau a sin. Silver te chu hei bak ka nei bik hleinem"

"Aw, i lei leh anga a ni mai lawm"

"Khawia mi nge ka lei bik tawh ang, kal leh hun tur pawh hriat loh"

"Enge a ori bikna? Engtinnge in hriat hran a?" ka lo ti a.

"En mai pawh hian a hriat alawm" tih pah chuan Hriatpuii chuan ka lamah chuan a lo keng phei a, ka han thlek ve ngial pawhin a danglamna leh a ori bikna riau pawh chu ka hre ve lem hlei lova. Mahse, hmuhchhuah erawh ka nei, chu bengbeh leh ka țhi chu a 'locket' a in ang chiah!

"I phal loh chuan Pheikhawk sen khan a tuar a ni mai" a la ti zui hram a!

"Pheikhawk sen a ti leh ta; i la dawn nia, mahse 'compact' pakhat kha ka la ve ang" ani pawh chuan a ti zui ve zat tho mai. An in dawr tawk vel viau e hmeichhia ve ve tih takah.

"Ka insu dawn, tikhan lo awm mai r'u aw. Induh leh ka pindan lamah han awm ula mahse inchahthlaksan awih tawh lovin, ril a țam duh emai!" nui vur vur chung chuan an sukkhawl awmna lam chu a pan a.

Sofaah chuan inthlah dah zet hian ka țhu a, a bengbeh chu a beh țha mawlh mawlh a, sawi mai tur pawh ka hre lo.

"Kan result a chhuak a!" amah zawk chuan a rawn ti a.

"I ti țha em?"

"A pangai a ni ve mai, țha tak chu a ni lo. Chuan UPSC combine exam kha prelims ka tlang ve hlauh bawk a.."

"Chu chuan ka lakah i dinhmun a tihțhat phah sawt i ring em?" ka tih chuan a tûmhmak mai! Ka duh aichuan ka sawina mah mah ka inti ve tho, mahse runluih ka chakna hi a reh thei hauh bawk si lova.

A hnâr a tuai a tuai a, a melh ngai a melh ngar mai bawk.

A inngaihtuah harh thut nge ni muangchangin ka lam pan chuan a lo phei a, ka bulchêtah chuan a rawn țhu a, a thawklawk anga min bengțhuai mai ang tih te pawh ka hlau angreng.

Engmah sawi set set lo chuan min han kuah ngawt mai kha a nia. Kuah satliah mai pawh a ni lo min bawh deuh roh bawk sia, a rihna zawng zawng nen - eng rilru tak chu pu ang maw!?

"Mi tihnat hrim hrim hi i tum ni ta berin ka hria. Engtin pawh min ti la ka tuar mai ang,  ka chantawka i ngai a nih chuan ka chungah i duh dan danin awm rawh" a mittui chu a tling pam a, a hmui chu a pet fan fan a.

Ka bawh zêk reuh nâng chuan..!!

"Ngaihzawng i nei tiraw?" a tih chuan ka chhang duh lem lova. Amah lah chu ka mal chungah chuan mi kapkalak zawng hian rawn țhu rem tak deuh deuh lehnghal a, ka nghawngah a kutpahnih chuan chelhin a kutzungpui chuan ka khabe lam chu a nawrkang a, "Zawhna ka zawt che a, mizo țawng i thiam awm tho sia, min chhang ve mai la" a ti zui a.

"Nei ila, nei lo ila i tan hlawkna a awm a mi?" a ner sak a, a hmelah chuan lungawiloh a chak tih ka hre reng mai. Mahse, 'i duhdan danin awm rawh' min ti ve luklak tawh bawk si a.

"Thuvawn ka nei țhin a..." ka'n ngawihsan leh daih, 'engmaw engmaw' tih melh hian min melh a.

"'Phâilama hmeichhe awm chu tumah ring lo phawt rawh. I hriatchian hunah an rintlak a nih leh i ring leh mai zawk dawn nia' tih hi ka unaupa min hrilh a nia. Ka zawm a, ka zawm zel pawh ka la ring" ka ti kha a nia, engtinnge a dawn sawn ka hre lo. Ngawireng chuan min melh ringawt a.

"Engnge rinloh ngawt nachhan tur awm?"

"Kan hmuh phak lova awm an nih vangin engtinnge an khawsak kan hre lova, țha takin an zu awm nge an lo rui nawi thei viau tih te, hnamdang an zu kawp leh kawp loh pawh kan hriatpui a ni hek lo. Mahni hnam leh țawng hmusit leh ngaihthah tawklekin an lo zu changkang ta em tih te pawh kan hriat a țul alawm" ka tih chuan a ngaihdan a nih hmel fahran lo khawp mai.

"Mi zawng zawng kan in ang vek kher hleinem"

"In ang ka ti bik hleinem, in ang vek ila chuan ngaihdan fahrah deuh deuh zam buai vak a ngai nang. Thutlukna kan siam nghal mai dawn alawm. Kan in an loh vanga in zirchian ngai a ni reng a"

"Chu min ring lo tihna a mi a?"

"Ka rin tur khawpin i awm hleinem. A dik tak chuan hlimtakin kan inzui emaw tih laiin ințhen ang i tia. Harsatna kan neih pawh ka hre lo. Tun thleng hian engnge kan ințhen chhan kha tiin zawhna awmze nei lo hi ka la inzawt fo a sin. Chu a chhapah hmuh phak loh leh chinhriat lovah i awm bo zui leh ta nghal a, thutlukna siam leh tur chuan hun ka mamawh deuh ang"

"Ka thiam loh a ni, ka hma ka lo sial lutuk a. Ințhen kha ka duhthusam chu a ni bik lo asin.."

"I duhthusam ni lo pawh ni se kan ințhen tho sia lawm"

"Ka thil zir tur kha ka huphurh ve deuh a, coaching class kal te ka duh bawk si, ngaihzawng ka neihin ka rilru zawng zawnga vei chi ka ni bawk sia ka zirlai a nghawng ngei dawna ka hriat vang a ințhen kha rawt ta ka ni. Ințhen hlen hi ka ngaihtuah ngai lo a sin" tiin ama kâ ngei ațang chuan kan ințhen chhan chu ka hre ta kha a nia. Tak tak nimaw!

"Mahse, huntiam i nei si lo chu a nih kha"

"Ni e, ka ngaihtuah kim lo a ni. Ka thiam loh liau liau a ni e"

"I duh i tih theihna turin min hnawl a, i beiseina umzui turin ka lak ata i kal bova, i thei tih i hriat hnuah i lo hawi leh a.... Ka ngaihtuahna luahtu chu engtikah nge hetiang thil hi a thlen leh ang tih chiah a ni"

Ka sawi na khel khawl viau chuan ka hria, mahse ka malchunga țhu hian a la na duh tlat bawk si lova. Sawi a sâwt hmel loh khawp mai. Min kuah a, a kut veilama ka beng hmeh neuh neuh pah chuan "Engtikah mah khatiang thil kha a thleng nawn tawh lovang, țha takin bul kan țan leh thei ang tiraw?" te chu a ti tak sep sep a.

Dorâl leh Sahrâng hmaa zam ngai lo vâl tiin inhûk khum dur dur țhin mah ila hmanah Eden huan ata tawh chhûl lak tur nei lo zawk hi hmapawng pahnih nei hmaah hian dawl zawr takin kan zawr fo, kan la zawr nawn leh awn awn dawn pawh a ni mahna. Hmalam hun hriat ni hek suh.

"A thleng nawn tawh lovang tih hi tufa mahin an hre lawk thei ngai lovang" ka tih ve rawk chu a fu chiah lo, min hnialthla chiang kher a sin, 'a thleng nawn leh ang tih sawi thei pawh tufa mah an awm bik lo' tiin.

"I rilru a dam theih nan engnge ka tih tur sawi la, chutiang chuan ka ti ang, i duhdanin" a tih leh tâk hnâp kha.

"I duhdan danin awm la, keipawh ka duh dan danin ka awm ang a, chu chu kan pahnih atan a țha ber ang" ti a ka chhanna chu țha hi ka va han ti tehlul, chhang fuh hi ka inti lutuk. Hnar si lo, pawm si lo țawngkam ka han ngaihtuah chhuak chu a hmanna tur diktakah ka hmang bawkin ka hria.

"Mahse..." beiseina chu a la nei a ni.

"Engnge mahse chu?" ka lo ti thuai a.

"Chutiang ringawta awm chu ka duh lo alawm, ka thei lovang"

"A hma pawn i thei alawm, nge midang i lo ngaizawng reng zawk a mi?" ka ti leh kher a. A lu a thing ne ne a, 'min ring rawh, nang lo mipa hi ka la tawng lo asin' a ti zui a.

Ka mit chu a kut chuan a rawn hup a, hup ti ila a kutzungpui chuan min maimitchhintir a ni zawk mah ang. A kut a laksawn hnuah pawh chuan ka meng zui duh bik chuang lova, dimtein ka hmuiah a rawn fawp a!

A vawihnihna tur a lo kunhniam leh laitak chuan 'a tawk e' ka lo tihsak kha a nia, rawn tihluih a tum ngial nain thaah min hneh ta lo a ni.

"Ka phei a hun tawh, tihtur ka nei a" ka ti hluai a.

"Khawiah maw?"

"Kan inah mawle"

"Engnge i tih dawn a?"

"A awm nual mai" ka malchunga a țhu chu ka hlangthla a, ka bulah chuan ka țhut tir kha a nia, min en leh tlawk tlawk tawh, a mak thei țhin mange aw, ka hmuhnawm viau nge mawni ta ber le.

Ka ding zui mai a, ka pên tur chu a rawn ding zui ve nghal a, ka hnunglam ațang chuan min rawn kuah a, ka hnungzangah chuan ka thawri ngaithla niawm fahran chuan insi rem thlap hian min kuah a, min kuah nghet kher mai.

"Pui, min ngaidam rawh, khawngaihtakin min ngaidam rawh. Min kal san suh" tih chu a țawngkam chhuak a ni ta! Ni, min ngaidam rawh a tih hun hi a ni ka nghah reng ni. Hmeichhe induh tawk tak leh kei ka ni inti ve tak a nih vang hian a hmaa tlawm hmasak hi ka tum lem lo.

Damchhung nghawng thei a ni ve tlat!

A chang chuan mipa pawh ni ila inphah hnuai a țul chang a awm ang a, thupha chawia ngaihdam dil hial a țul hun te pawh a awm ang. Mahse, tun dinhmunah hi chuan  'ngaihdam min dil a nih loh chuan ka pawm lovang' tih thutlukna ka siam ve miau vangin duh viau mah ila ka kalsan mai ang. Inphahhniam thei lo na na na chuan nakin lawkah min chungtlak a tum thuai dawn tho tih a lang sa reng.

Mahse, tunah chuan ngaihdam min dil ta, ka țanfung neih ve chhun a phehchim tak si-ah chuan kartu nei lo Lawngleng ang chauh ka va ni leh si awm ve a lakah chuan. Hun kha leh chen a ngaia lo kur ve hrep tawh; tuna taka mawngkawtha nen lama țan leh țung si chu har tak a ni.

"Atluang, tuna kan buaina ang bawk hi nakin lawka kan buai lehna mai tur a nih pawh ka hlau hlel love. Kan inven theih lai hian in veng mai ta ila, i tan leh ka tan pawh a țha zawkin ka ring"

"Ni lo, chutiang a ni thei lo. A thleng tawh lovang min ring rawh. Engkim kha ka thiam loh vek a ni. Khawngaihtakin bulțan țha ang.." muangchang chuan ka inher a, inhmachhawn zawng chuan  kan indinchilh ta ran a.

"Nangmah chauh hi duh leh hmangaih ka la nei asin, ka damchhung atan midang beiseina ka nei lo, ka nei ngai bawk lovang"

"Tun ang reng hi i ni dawn hleinem. Hun hi a kal ve reng a, kan nundan pawh hi a danglam ve zel alawm"

"Danglam lo tur chu ka thinlung hi a ni" menghnuai raih chung chuan mi en a,  sawi leh chuan tur a vâng, ka hnialna lah chu nalh fe hian min chhang thla zel bawk si.

"Engpawh nise, thutlukna siam nghal rum rum thei ka ni lo ka tih kha.. hun ka mamawh. Nangpawhin i mamawh bawk, exam hmachhawn tur i la nia, chu chu kan harsatna neih leh tur a ni nghal. Han intifel la, min la duh a nih leh ngaihtuahna te pawh kan seng ve ang chu" tiin ngaipawimawh awm lo fahran chuan ka han tih khum a.

"Aih, tunah exam hmain....aw"

"Exam dawnah ka rilru ka pe thei lo te kha i tih leh chuan a bul ațang bawkin kan țan țha leh dawn asin"

"Ti lovang, ka inbuatsaih țhat theih loh leh ka exam lo mai ang a.." ta hial chuan a!

"Exam lo ringawt la engnge awmzia awm ang?"

"Nang ka chân dawn che a nih ai chuan.....Engpawh ka kalsan mai ang" hurray!! Kha kha a ni mai. Lunghlu țha mi hmutu chuan engkim chân a huam asin.

"Maw!?"

"Umh..Ka hmangaih che. Min kalsan lo hram rawh"

Dimtein a chalah chuan ka fawh sak a, a hmui chu fawh beisei takin a dawh deuh hã a, amah lah chu a meng diar lehnghal vei nen; han chhunzawm nghal mai chu chakawm tak a ni.

A kawng dawmtu ka  kut chu lakiangin 'ka va phei phawt ange' tiin a inrin hma chuan ka inher zui nghal a, engtinnge a hmel a awm chu hmuchak viau mah ila hawilet a rem chiah tawh si lo.

Sawi a neih hma chuan kawngkapui chu ka thleng der tawh. Khati teh thut kha chu a beisei bik hauh lo ang le. Kei hian ka ti lutuk ta em le!?

Bike ka tihnun lai chuan kawngkapui bul tukverh të ațang chuan min lo thlir reng a, ka tlan liam thleng chuan ka hmu lo der ta ringawt a nih kha.

Ka tlanhaw ve ngawt nain tihtur ka nei der si lo. Fai zetin ka bike chu ka sil ta ringawt a, ka khuih tle thlap dawn emawni hial le!

Mahse, ka ngaihtuahnaah erawh chuan thildang a awm bik lo. Hmeichhe rilru ang chauh emawni ka lo put le? A chunga ka thiltih hi bansan a hun tawh viauin ka hria. Ka tilutuk ve ta deuh e.

Ka phone a rik vang chuan ka u nupui hian pawna ka awm chu min lo auva, Atluangi a nih beisei chuan rangfe hian ka lut a. Mahse, Rintei zawk a lo ni.

Ka han chhâng chiah chu a lo țap țuau mai a, ka zawh lah chuan a sawi hleithei bawk si lo. A sawi chhumbung nuaih mai bawk si. Ka remkhawm dan berah chuan a naupaina pain fiamthu thawh nan min hmang a ti ni mai hian ka hria.

Ka ter at mai a, 'College kawtah lo awm rawh' tiin phone chu ka hmet hlum a, ka tlanchhuak zui nghal mai kha a nia. Mai mai chuan le.

An college kawtah lah chuan dinna mai tur a awm lo leh ta nghal a, bike hunna tur zawng chuan ka'n tlan kual leh rih a, a tawpah chuan rem lo fe hian ka hûng ve ta hram a.

Ka hmuh hma chuan Rintei chuan min lo hmu a niang ka hun rem lai chuan ka lam pana a lo kal ka hmu a, a khawngaihthlak reuh țhin mange aw.

"U Pui, haw leh mai rawh" a tih chuan a hlauthawng tih ka hre reng mai. Nia, ka luhlul ve angreng sia a hlauthawng a nih pawhin a mawh love.

"Engmah hlauhthawn tur a awm lo, hlau suh" ka lo ti a.

"Mi zawng zawngin an hre dawn asin" a ti ta reuh a. Chu thil chu ka ngaihtuah loh thil a ni. Nia, lo va hau ve ngawt ila buaina lian zawk a thlen phei chuan duh aia thuia mualphona tur a ni. Kei chu thuhran, Rintei tan hlei hlei a țha lo zual ang.

"Nih leh engnge ka tih ang?"

"Engtinmah ti lo mai rawh, heti hian a reh ve mai ang. Mualpho vak ai chuan keima thiam loh a nia, ka tuar mai ang"

"Chuti ringawt te chuan a zual zel dawn asin"

"Ka tuar chhuak ve thei mai ang" teh țalh chuan le.

"A nih amah tal chu min hrilh ve la"

"A chi loh u Pui, haw leh rih phawt mai rawh"

"Engtinmah ka ti lovang min ring rawh" te chu kan ti ve bawk tak a, tih ngei chu ka duh lawi bawk si.

Amah hmuh si loh chuan inkawhhmuh a inhrilh tum pawh chu a harsa dawn hian ka hria, zawhna atthlak tak ka zawt a ni ber mai. College lama han inzui luh a 'hei hi a nia' ti a inkawhhmuh thu a awm bawk si lo.

Reife kan indinchilh hnuah chuan a bike min hrilh ta a, amah hmuh tur a awm miau si loh vang chuan haw tumin ka tlansan ta kha a nia. Thui erawh ka tlan lo.

Chawhnu her a nih tawh vangin an bân har ka ring chiah lova, kha bike neitupa lo tlanchhuah hun kha ka chan a ngai alawm. Rintei hriatloh lamah hma ka lo laksak ve hlak ang chu ka ti deuh.

Rintei a pil bo tawh ang tih awmvelah chuan ka tlan let leh a, chu college parking area hmuthei chuan kawngsirah ka țhu ta ran mai a.

Ka rinaiin ka țhu rei ta, ka incheina lah chu a'n nasa lo khawp a - kekawrbul, chappal leh t-shirt nghawng var deuh lek lek tawh hian ka inthuam a, ka bike sil zo inthlak hman lo ka tlanchhuak ngawt kha a nia. A hmaa ka thiltih tuman min hriatpui awm silova, țhing min ti fe fe chu an awm ang mawle.

Rintei a scooty-a a tlanchhuak lai pawh chu ka hmu reng. Ka awmna lamah a lo la tlanzui leh ta nghal a, lehlam ka hawi vang chuan min hre lo nge min hmu lo hrim hrim zawk ni a tlan liam zui ve mai kha a nia.

A tam zawk chu an haw tawh niawm tak a ni. Ka mi nghah lah chu nghah loh ang hlauhin a awm mai bawk si. A bike a hawsan emawni zawk le!?

Ka kuhva ah lai, a hnuhnung ber tur chinai ka tah mawlh mawlh lai chuan Bike lam pana kal chu ka hmu ta, khai le ka chang chhuak ta e.

Ka bike chu ka rap nung nghal hluah a, khawilamah nge a kal dawn ka hriatloh vang chuan inring fe hian ka lo awm a, ka chân lohna lam pan chuan a tlanchhuak zui ta roh lehnghal a!

Kei aiin a bike a fit hmel zawk sia muanchan ngawt theih pawh a ni lo. Theih anga chak chuan ka zui ve nghal a, kawngpeng awmhmaa ka hmuh hman loh chuan ani a buai dawn si lo. A buai tur zawk chu keimah ka ni si.

Thui phei chu um a lo ngai lova, traffic jam ah a lo hawi nasa mai a, a hnunglawkah amah umtu ka ding reng a ni tih a hre hauh lovang le.

Traffic jam kara han pan buan buan chi a ni mang bawk si lova, mi karah chuan muangchangin kan inzep zel a, ani lah a tawlh  ve zel mai bawk sia ka hnaihchilh thei meuh lo chu a ni e.

Ka rin loh laiin an in chu ka chhawm thleng der mai ka ti! Garage-ah a tlanlut daih a, ka hawihil chiang viau a ni. Rintei'n an veng a sawi te kha ka hre reng sia, ka ngaihtuahna te hi a mang deuh tawh emawni le.

A pawi love, an in tal ka hre tawh alawm tiin lungawi chiah lo chuan ka inkhalh haw ta hna hna a.

In ka thlena phone ka han bih chuan Atluangi miss call a lo awm ran a, biak let tur nge biak loh tur ti a ka inkhâp mêk lai chuan a lo call leh pek a!

"I va buai awm ve a" a ti nghal zat a.

"Buai hran love, ka chhuak a, ka thleng chiah tunah"

"A nih chu, khawnge i kal a?"

"Ka chhuak lawk mai mai, engnge ni ta?"

"Eng ni chuang love, zanah lo leng la i hman chuan.."

"Ngati nge?" a va'n sual thlak mai mai tak e aw.

" Aw i lo leng ang, engnge ni vak anga.." a ti ve mai a.

"Nia, ka hman leh aw..."

"Hman hram tum la, ka lo beisei ang che" tiin min thlah ta kha a nia. Rilru siamdan pawh ka thiam teh nuaih tawh love a.

Zanriah kan eikhamah chuan vawiin lama an intihdan Rintei ka va zawt zet anga a boruak a zirin Atluangi te inah chuan ka kalin ka kal lovang tiin ka tlan chhuak kha a nia.

Rintei te kawt ka thlen chuan vawiina bike ka um kha ka hmu ta tlat mai ka ti! Engnge awmzia!??

                    Chapter

                         - VII -

Ka chiang lutuk tlat,  ka hai hauh lovang. A number pawh ka vawng hial kha a nia, a rawng zawng zawng nen. Zanin hian engthil nge maw thleng ta le?

Bike chu ka'n hung rem a, inchhung lam thawm chu ka ngaihven deuh a, mipa awki ring ve tak pakhat chu a awm ngei mai, chu ngei chu a nih ka ring.

Ka lut ang nge lut lovang tih ngaihtuah chuan ka inkhâp reng a, luh loh law law mai chu a țhat ka ring a, kei hi inrawlhlohna turah ka inrawlh te pawh a ni ange.

Muangchang chuan ka inher a, Atluangi te inlama kal mai tum chuan ka kir leh ta a. Mahse, ka ngaih a țha thei ngang lo nia mawle. Khatia chin hriat lova kalsan leh ngawt chu ka rilru a nuam lo a ni.

Kawngsirah chuan ka ding a, Rintei biak tum chuan ka han phone a, a la thei hauh lo leh nghal! Rilru nawmloh sa naklaiin aw.

Ka inher leh a, ka hnungchhawn tawh lam pan chuan ka tlan kir leh ta a, bike pawh an kawtah dah duh lovin a chhak deuhah ka dah zui ta nghe nghe a.

Kawngka ka thlen thleng pawh chuan thawm a la awm lo. Ka kik lahin chhangtu ka nei hek lo. Kawngkhar chu ka han pawt a, a inhawng ve mai. Inchhunglam thawm hriattur a awm lova, kawta bike ding ka hmuh bawk si vangin ka ngaih a țha lo zual.

Mahse, lang lo lamah hian an inzui reng a lo nih si chuan ka tan a zahthlak viau ang le.

Ka pen lut ta!

Hlauthawng ru ang reng tak, inveng deuh roh chuan ka lut kha a nia, invenna phei chu ka nei a zeng pawh a ni lo.

"Rinte.."

Chhangtu nei lo rawlthang satliah mai a ni. Pindan lam chu ka pan zui nghal a, kawngkhar ka han hawn chuan mipa kekawr lo ha țha mawlh mawlh hi ka hmu zui a, a hnunglama khum chungah chuan Rintei a lo inpawt țha mawlh mawlh bawk!

A hrilhhai thlak duh kher mai!

"Tihpalh" tih leh khar chu ka rual nghal a, pawna ka chhuak tur kawngkhar ka hawng leh chiah tihah chuan pindan kawngka chu lo inhawngin Rintei chuan "U Pui" tiin min lo zuichhuak nghal a. Ka dinphah lem lo.

Ka bike lam pana ka kal chu min lo zui ve zel kha a nia, min rawn dinchilh meuh chuan ka tlan chhuak hman bik lo.

"Engngatinge min lo umzui?"

"U Pui, i ngaih ang kha a ni lo!" a'n ti ngawt a.

"Ka ngaih ang ni lovin ka hmuhdan zawk a ni ka rin zawk chu"

"Ni lo, amah khan min vau bet a ni"

"Tichuan a duh hun hunah chumi hmang chuan a mutpui țhin che tihna a niang maw!?" ka'n ti lui ngat a.

"Aih, chutiang a la awm lo. Zanin kha a lo kal vawikhatna a ni. Ka thu i awih loh chuan ka ti mualpho ang che tiin min vau bet a ni"

"Ka awih i ring em a nih leh?"

"Khawngaihtakin awih hram rawh, dawt ka sawi lo asin. Min ring rawh"

"A nih leh engngatinge ka phone che khan i lak duh si loh?"

"Lak ka tum a, min chhuhsak a, khumkilah a theh lut daih alawm"

"A nih tak chu a, thawm lah i nei mang bawk si lova.. I lungawi viau turah ka lo ngai asin" ka ti leh mai a.

"Min ring rawh, khawngaihtakin min pui la, ani khu lakiang rawh" tiin a men deuh pur a.

"A nih amah ka zawt ang aw, i ngam chiah angem engpawh thleng se"

"Aw, ngam" a tih takah chuan bike ațang chuan chhukin an inlam pan chuan ka kal nghal a, a ni'n ka hnungah min zui bawk.

A bike spoket-ah chuan maubung țangphel zet tur hi ka rawl lut a, tlanchhiat a tum thut pawha invenna tur atan ka dah a ni. Hman hmawha tlanchhuah a tum a nih chuan a buaiphah ngei ang le.

Kawngkhar ka pawt hawng a, kan inzuilut nghal mai kha a nia, a inleng pa lah chu zawmthaw zet hian țhutthlengseiah  chuan a țhu zui leh ta nghal a.

Pindan lam chu ka pan ruak a, kawngkhar hawngin a luh chu ka lut ta em lo. "I phone chu va la rawh" tiin ka be zui a, dawt a sawi nge sawi lo ka fiah ve duh alawm mawle.

Ani pawh chu a lo kal zui ve mai a, khum chu a mawnglamah chawiin tlem a hnuk kau deuh a, a kilah chuan phone chu a va la chhuak ta kha a nia, dawt a sawi lo ta phawt mai!

"Țhianpa, mipa i inti ve em?" ka tih chuan in la ngeng tih hriat reng hian min melh ve ram ram a. Mi a la chhang duh lo zui leh ta nghal a.

"Ka zawhna che chu i hria em?" dam thlap si, ngeiawm angreng tak hian ka ti zui leh a.

"Tunge maw i nih le chutiang zawhna mi zawt tur chuan?" a ti ve ham ham mai. A a naupan awm tehlul nen a. Le, ka zawh danin a zir lo ve te pawh a ni ange.

"Keichu maw, hmeichhe rui lai mutpuitu ka ni lo phawt, a naupai pawh ngaihsak duh lo tu phei chu ka ni lo leh zual! " ka tih chuan a insehruh tial tial tih ka hmu thei reng.

"Accident vanga nau tih tlak a nih pawh hre ngawt lova dem zui a, midang hmuha chhaihnawmnahtu, ransa rilru pawh tluk lo ka ni lo hlauh hi ka lawm a, chumi piah lama vau chunga mutpui la tum cheu tu hi Pathianin a hrem duh lo a nih pawhin keima'n ka hrem hreh hauh lo" ka ti zui charh charh a.

"Zawnga țawng tam lo mai rawh" tih leh rawn thawh phei chu a rual a, kei lah inring renga lo dingsa ka ni bawk a chutia min lo pan na na na chu tiin sutthluk tawp mai tum chuan kun chung deuh hian ka tlan phei a, ka koki chuan a dul nemah tak ka va su a, a fu bawk a niang a pai phei chu țhutthlengin a lo dal tawh bawk si, țhutthlengah chuan a tluk nuaih kha!

Rintei lo țe tuarh mai chuan midang a tih ralkhel ka hlauh vang chuan ka han khap leh rih kha a nia, pindan lamah chuan ka luhtir nghal a, han beih zui chiam ka tum nen ka hawilet leh chuan țhutthlengah a lo la mu zâwm na sa mai!

A lo in dawm ngaih ngaih mai sia, tharum han thawh nawn leh chiam pawh a ngaih hmel loh e.

Kei ai chuan a sang deuh awm e. Mahse, a cher zawk. A sa a pan a, a ria lam lek lek niin ka hria. A lumeh dan han en mai chuan kohhrana tlangnel tak a ni lovang tih hi a hriat nghal hliah hliah mai. A hmel han en pawhin a la upa lo a ni tih a hriat viau. Khabehmul chhe te hi a zuah ve tumhrang a, Kelpa niawm tak a ni!

"Mipa emaw i nih ka tia.." te chu ka'n tih zui leh hram kha.

"Nangni ang naupang nep lutuk, lîk len ve hle ringawt mai zahpuiawm lutuk, ka chapo e te i ti ve khanglang a ni awm a, nu leh pa thawhchhuaha lo chapo ve ngawt hi zahna chang hre rawh. I duh leh mahnia in leh lo i din hunah i thawhchhuah ngeiin chapo theia a dah che a nih chuan i duh tawkin ila chapo dawn nia. Chawmhlawm chapo ve ringawt hi ui ek pu pawh in tluk lo" ka âng tui nasa mai ka ti.

"Rintei hi i kuthmawra i tawk emaw, vawikhat pawh buaina i lo thlen leh a nih chuan i ngalruh kha ka khawngtliak tawh ang tih hria ang che"

Kan veng awmna ka'n hrilh phawt a, ka nu leh pa hming, kan house number nen - ka hmingpum nen lam ka hrilh kha, 'i ngam anih chuan min rawn zawngchhuak dawn nia' tiin.

Dawhkana a helmet a dah chu ka va la a, alam thehphei pah chuan "Haw nghal rawh, kut thlak leh i duh loh chuan" ka ti zui a, dul dawm chungin a inkhai chhuah tak kha.

Keilah pek chu sual ve bawk, ka la umzui hram pek a! "I nula rai leh i ngaihsak duhloh dan vel kha i chhungte ka lo hrilh hre ve hrim hrim dawn nia" tiin ka'n au zui hram a. A hlauhthawn ve viau chu ka ring, ani college naupang ve mai a la ni bawk si.

"U Pui, haw ve nghal mai la" tiin Rintei chuan ka lam a lo pan phei a.

"Engngati maw?"

"Engemaw a thleng leh ang tih ka hlau. Ka hlauhthawnpui che"

"Mai mai a, hlauhawm a awm tawh loh kha, dawl zawrin a nih kha a zawr haw le. Ka lo hlau ve vak hleinem" ka ti mai a.

"Kawngahte pawh an lo chang thei che asin, țhian a ngah ropui si" a tih chuan ka ngaihtuahna a ti thui ve ta deuh. 'Ka hlau e' tihna phei chu a ni lova.

"Mahnia awm i hlau lo a mi?"

"Ka u ka phone mai ang"

"A khai a, a ho emai. Ka lo nghahpui ang che, ka hmanhmawh chuang hleinem" tiin țhutthlengsei lam chu ka pan zui nghal a. Ani pawh chuan min lo zui ve mai a.

"Ka tiril hi a khur der der mai, engtin emawni ka la awm" a ti zui a.

"Țhu hahdam la a zia mai ang. A hrim hrimah engtin nge in inah te a lo kal ngam a, nangmahin i awm țhin tih a hria a mi?"

"Ka hre tawh bik lo. Engtinnge kan awmna pawh a hriat ni. E, hmanah kan picnic in min thlah haw tawh tak!"

"Engtinnge a vau che a?"

"Thleng ka sil laiin a lo lut a, min rawn kuah nghal ringawt a, vawikhat chu ka țe tuarh hman a, 'ka thu angin awm mai rawh, mualpho i duh loh chuan' a tia. Ka țawng dawnin ka hmui a hup zel bawk sia, a chang leh min rek a, ka tan chuan auchhuah loh mai kha ka dam hma na tur zawk niin ka hria"

"Ka lo hnek belh leh hram lo a nih chu mawle. Nawma maka chutia a lo khawsak le. A tilmu te lo petsak ila țha tur a nia"

"Ka haw daih dawn mawni le, ka nun hi a nuam dawn chuangin ka hre lo" a ti zui a.

"Haw lo ve a, i zirlai i zir zo vek ang chu. Haw chho la khilamah engmah hmabak i nei chuang lo. I nun a chhe tial tial anga chu chu a ni mai"

"Hetah pawh class pawh ka kal ngam chuang nang"

"Ngam lohna tur a awm hleinem, a tibuai ngam tawh lovang che. Amah vanga i nun tih chhiat ringawt kha engnge awmzia awm?"

"Min tihbuai leh tho ka ring, mipangai ni mawlh hek lo"

"Engpawh ni se, nangmah hi i huaisen a ngai hrim hrim. I rilru ti paukhauh la, thil lo thleng thei hmachhawn turin inbuatsaih la,  engamah hmaa 'ka thei lovang, ka theih ka ring lo' tih vel mai mai hi mi nep ber zia a nia. Tum mumal tak i nei ang a, chu mi thleng tur chuan engpawh paltlang țul se i paltlang mai tur a ni. Chu chu hlawhtlinna kawng chu a ni mai"

"Hmeichhia i ni lova, i hrethiam lo a ni. Ka tawn ang hi tawng la chuan tuna i thlir ang hian i thlir theih ka ring lo"

"Hmeichhia chu ka ni lo ngei mai. I tawn ang tawngtu pawh ka la ni chuang lo cheu a, mahse. Hmeichhia pawh ni ila tuna ka sawi ang bak khan keimah ka nih chhung hi chuan ka hrilh chuang lovang che. A zuau zawngin tumah ka fuih ngai lo"

"A ni mahna le" a ti duh chauh a. A thawk țha ang nge maw țha lo ang ni.

"Class pawh i kal țha anga, a lo tibuai leh che a nih chuan engpawh huamin FIR kan thehlut dawn nia"

"FIR thehluh te chu a awm ang lo emai a"

"Engnge, mi hriat i hlau tihna a mi? Mi hriat manglova chinfeldan awlsam zawk alawm. Police in an ko ang a, kan thehluh dan a zirin case siam emaw, zilhna emaw a dawng ang a, zanina thilthleng te kan sawi duh phei chuan pawngsual case in a tang daih thei a sin. A vau leh che emaw engtin emaw a tih leh hmasak berah che chu chu i sawi dawn nia, hriatpuitu che ka awm alawm. Lungngai reng reng suh"

"Hmeichhe nih hi chu ava han hrehawm tak!"

"Khatiang ngaihtuahna kha a dik lo. Mi tihtheih ang ka ti thei tih ngaihdan neih tlat tur. Mahni i inhmuhhniam chhung chuan hmasawnna i nei ngai lovang. I vanneih dan te hi chhut la, nau i pai a naupangtein, han pai puitling ve ngawt ni la chuan i retheih pui tur zia chu e. Nufain i chhungten an chawmhlawm che u anga, mamawh ngah bawk siin. A beidawn thlak tur zia chu aw.

Nau an paih te hi Pathian remruatah ngaih hmak tur, nakina i hmalam hun atan inbuatsaihna țha zawk pe thei tur che zirlaiah ngai hmak rawh. Chuti lo zawnga i ngaihtuah chuan i țhutna ațang bakin i dingchhuak ngai lovang. Mahni insit reng renga damchhung hun hman a ni mai"

"Na..Nang hi awm lo la chu..Hmanah khan ka thi daih tawh awm sia!" a tichhuak hlawl pek a!

"A, i sawi ho emai. Hmana mi daih daih sawi te chu, tun hun hi alawm pawimawh zel" ka lo tih sak a.

"Ka ti tak tak alawm. Ka tan chuan mi bîk tak i ni. Ka tibuai lutuk che hi ka inthlahrung țhin khawp mai. Midang pan tur ka hre bawk si lo"

"Intih buaina vak a awm hleinem, thil harsa engmah a awm lova..."

"Min fuihna ringawt pawh hi ka tan chuan a hlu tawh hrim hrim, a diktak sawi chuan khatia nau ka han pai țan, ngaihsak pawh ka'n hlawh lo leh hnawl ka han ni zet kha chu mipa zawng zawng hi ka haw ngawih ngawih vek a, ka u takngial pawh ka be țha peih lo.

Țhian te ho tumah rawn tlak an awm bawk si lova, thih kha ka damdawi țha ber turah ka ngai ber tawh a, chutiang tur chuan ka tlanchhuak ta kha a nia. Mahse...khati kha kan ni leh ta sia, Pathianin ka dam țul a ti te pawh a niang. Engemaw hmabak ka la nei ve te pawh a ni ange" a ti ve thei ta hram kha a nia.

"Thingpui lum la.." ka tih mek lai chuan ka phone a lo ri a, ka en chuan Atluangi a lo ni a.

"Lo kal i tum em?"

"Ka hman dawn leh dawn loh pawh ka la hre lo"

"Engnge i tih a?"

"Pawimawh deuh a ni mai"

"Hm..sawi ve mai la, i buai chung chung chu ka phut chuang lo che a"

"Pawimawh deuh a ni mai ka tih chu"

"A reidawn mi?"

"Chu chu ka hrethiam bik lo alawm"

"Awle, ka lo nghak che nia" tiin phone hmehhlum chu a rual zui nghal daih a. Sawi vak pawh tum ila a theih loh.

"I lo va thleng har ve a ti a ni maw?" tiin ka hnunglama thingpuilum nu te reuh chuan a rawn ti a.

"Ti lem nang, chutiang lam pawh a ni lo"

"A nih kha, in zêp velah! I awki leh i thilsawi khan tunge i biak chu a ti chiang viau asin" a ti a.

"Chutiang 'aw' ka nei hrang lo aw, lutuk che hian."

"I nei hrang chu a nih kha mawle, ka ngaithla zo chauha ka hre reng a lawm. Pha buai duh lo mai teh" tihpahin nui var var chung chuan a thingpui lo chawiphei chu min pe a.

"Tak takin i bialnu chu a vannei ngawt ang, i puitling ropui si"

"Haha, insum deuh teh khai i ti lutuk ange"

"Ka ti tak tak alawm, nupui țha tak neih hi i phu a ni. Ka 'type' chu ni la ka chhaihbuai ve khawp che in ka ring" a ti zui ham ham a. A nui kar kar leh ta nghal a.

"Ka tibuai chiam zawk ang che nge aw"

"Haha, ka buai lovang. Ngaihzawng neih ka duh lo hulhual rih. Mipa hian sex bak inngaihtuah lo a niang. Ka peih ve lo keichu, intihhlimna ang leka inngaihzawn chu a ho awm emai" a ti zui a.

"Sex ringawt chu kan ngaihtuah lo deuh ang a... Kan in ang vek bik lo a nia"

"I ngaihtuah ve tho ang nang paw'n"

"Ka ngaihtuah lo chiang e mai. Tuna ka ngaihtuah i hre duh a mi?"

"Hre duh e, dawt miah sawi lovin han sawi la.."

"Kha i hnute chunga fanghmir vak kha... ka lo man dawn chuan zahmawh zawngin i ngai tlat dawn sia" a en ve vut thova, fanghmir phei chu a hmu lem hlei lova.

"I va han daw tak. Tikhan nangpawh i ngaihtuahna chu a hriat mai alawm. Ka ringdik"

"Sex ka ngaihtuah loh chu mawle. I hnute chauh alawm. Hnute chauh te chu sex a ni  thei lovang"

"Awi leh, țalh țalh che chuan. Ka khawihtir hrep dawn che emawni zawk le!" a ti teh zêk a.

"A hek loh nen khawih te hi in han ui ve tumhrang a! Kan khawihpeih te chuan lawm hle zawk awm tak hi a nia, tikhan in ui em em kha nakin lawkah mi zingah nau hnute pek nan in hai lang leh țhuah ang a.. Tuma'n an melh peih awm chuang si lova. In ui ral țhak mai a nia, a ho hi ka va han ti tak!"

"Nangpawh i sazu i khawih tir sek ngai bik a mi?" ama nuih lah a za na sa.

"Sazu te chu a dan a dang alawm. Hnute chu a penhleh a mi a ni tawh a, ka ngaihtuah ngial pawh hian han ui viau chhan tur hi a vang ka tia lawm. Ka putea paw'n 'hmeichhiain phal deuha hnute min khawihtir chuan tihngaihna vak a awm lo  khawihdan style hi a vang thei sia, a chang leh tumbailek te kan tia, a chang leh mu ârlak dan te kan zir vel mai mai a ni. Khawih an phal lo chung khawihluih hi a lo nuam zawk' a tia lawm"

"Haha...i pute ni lovin nangmah i ni ngei dawn chu, mahni thiltihah chuan mawhphur ngam ang aw.." mi nuih pah chuan a la ti zui a.

"Naa, ka ni lo nasa. Kei chu ka nu hnute bak ka la khawih lo"

"Daw buai lo mai teh a. I hrat lutuk zawkin  nia ka rin ni. Ka hnute hi i khawihchak a mi? An khawihchak thei lutuk a.." a la ti zuiah!

"Khawi maw, khawih a chakawm nge awm lo han hlim la ka lo enchhin ang a"

"Mawla! Ka hlim khum che chuan i haw ngil âwt âwt mai ang. A bak ka khilai duh dawn der si lo che a"

"Han ti chiah la..."

"I ho i ho, tunge hnute te hlim pup pup duh ang ni"

"Ele, keima'n. I hlim duh loh chuan ka hlim sak che a ni mai aw"

"Nawi viau lo la a țha a ni mai. I bialnu ta i hlimsak dawn nia. Heng te chu kan bialpa te tan kan khêk ve ang chu"

"Het, nichinah pawh khan in lo inphelh thui hman viau kha aw, ka 'blackmail' dawn che" nui vur vur chunga blackmail tum chu a thawk na vak lo mai thei a ni.

"Min vau chiang, FIR ni ve nghal mai aw.." amah nuih lah chu a za ve thei bawk sia maw.

"Han hlim teh vatin..."

"A nih, i kut lo thawh hlek suh. 'Promise' em?"

"Yes"

A hlïm tak tak! A hlïm tak tak nia mawle. A rei lo hrim a, ka ngaihruat hman awrh chauh a ni.

Kan nuidun nasa a sin. A hmalam boruak awm lo ang hmiahin a ni kan inkawm ni. Thianghlimna kawngah phei chuan kan chesual a ni hran lova.

A u a lo haw lai khan dar 9 leh a chan ve bawr a ni mai thei e. Rei pawh țhu tawh bik lovin ka kalsan zui ta kha a nia.

Atluangi te inlama len leh tur nge haw tlang mai tur ni ang aw ti a ngaihtuah rauh rauh chung chuan ka bike dahna lam pan chuan ka kal nal nal a.

Ka bike ka han ti nung a, ka tlan chhuak tur chiah chu min rawn hnaihchilh ruak a!!

                         Chapter

                            - VIII -

Na em em lai sawi tur hre si lo chuan ka no nghual mai hian ka hria, ka pang lah chu a kham țhem țhum vek a,  ka kua lah chu a ri ruih ruih mai leh ta nghal a.

Khawla min en vel vangin min zawnkual sek a, chuvang chu a ni mahna chauh te pawh ka chau deuh viauin ka hria, min rawn kantu apiang lah chuan zawhna in ang pêt pût hi min zawt reng mai a, ka duh chin leh an hriat atana țul bak ka hrilh hlawm nek lo. Engmah an tan țangkaina a awm ve lo.

Ka chhungte chuan FIR thehluh an duh viau nain a țulbera ka hriat loh vang chuan an tilui duh ta bik lo kha a nia, 'tu te emaw ruiphur kutpalh a tuar a niang' tih chu midang te an lo hrilh dan ber pawh a ni a, chutiang chuan mi pawhin ngai rawh se.

Nizan thilthleng chu ka han ngaihtuah a, a tlawmthlak hle hian ka hre mai. Mi pathumin min khawih rawn kha a nia, pakhat chu ka hnek ve hman hram, a bak zawng kha chu ka thum dawt dawt a ni zui mai!

Kan thawm hriain a bul vel ina mi ho chu an lo kal khawm thuai a, kut minthlaktu te lah bike in an tlan nghal daih bawk sia, kei chu thisen nena inchiahpiah nuaihin a ni kawngpui dungah min kalsan ni.

Tukțhuan eikham ațang chuan Rintei pawh rilru nawm loh hmel zetin Damdawiinah chuan a lo tawlh ve reng kha a nia, amah vang a ni miau mai bawk sia, hrehawm chu a ti ve khawp ang le. Midang an lo lan ve reng vangin han inbiak falna hun pawh a awm thei lo.

Ka nu leh pa nen, Rintei nen chauh kan awm tawh, dar 3 vel nitain ka hria Atluangi a lo luh hlawl kha. Engtinnge a hriat pawh a lo hriat zawk ni, ka hrilh duh lo kha a nia, a hmel chu hmuh a nuam fahran lo khawp mai.

Ka nu nen chuan an inhriatsa vangin an ti ti zui thei mai a, ka awmdan chungchang vel te chu an sawi dun niin ka hria, a chang leh ka nu chuan a zirna lam te a sawipui a, an titi tui hmel khawp mai.

Rintei chuan nuam a ti ta vak lo nge ni "Ka va haw phei ve phawt ange" a ti ta kha a nia, ka nuin thlah tura a zui chhuak chu tuemaw chuan a melh zui râm râm kha!

Ka nute an chhuah takah chuan khum lu lam chu a rawn chuh vat a, "Engtin maw nizan chu, a pawimawh bawk maw?" a rawn ti a. A ngeiawm duh ang reng asin aw. Tihvak ngaihna a awm bawk si lo.

A chhân pawh ka chhang buai lo.

"Eng nge i tih reng reng a, saw'ng saw'ngah te?"

"A pawimawh ka tih kha"

"Ka thu awih ni la chu hetiang hi i chungah a thleng lo tur a nia, a hrim hrimah engatinge mi pawh i hrilh loh a?"

"Hei ka țha alawm, hrilh kher a ngai hleinem. Hrilh loh pawhin hei i hre thova" te ka tihsak ta vel mai mai a.

Ka pa chuan kan sawi chu a hrepha chiah lo a ni mai thei. Nge, chanchinbu chhiar awm taka langin a ngaithla kur zawk ni.

Ka nu pawh chu a lo lut ve leh mai a, an ti ti zui reng bawk sia, ka ngaih ven teh chiam lo.

Riahpui ka ngai lo ka ti chung chung chu ka nu chuan min riahpui a, han buaipui ngai tehchiam ka ni lem lo bawk a, a zia viau e.

Zanah chuan Rintei'n min rawn bia a, ka rin lawk ang ngeiin Atluangi chu i bialnu a rawn ti ta chat mai reng a!

"Teh ngawt a!"

"A awmdan ațang khan ka hre mai. A riahpui lo che mi?" ti te chuan a rawn fiamthu zui hlut a.

"A nuam lo e, engtinnge niang i inenkawlna senso tal hi ka lo tum ang aw" a rawn ti hem maiah!

"Engvang ngawtin maw?"

"Keimah vanga kuttuar i nia, ka rilru a nuam thei thlawt lo a ni"

"A ho emai. Engahmah ngai suh. I insen a ngai lo. Thil hautak pawh engmah a awm loh hi"

"Engmah ka ngaihtuah thei lo, ka bing mum mum mai hian ka hria.  FIR chu thehlut mai ang, anmahni kan hre tho bawk sia...?"

"A ngai lo. Țul lo deuhin nangmah thlengin i kangkai vak dawn a.."

"A pawi pawh ka ti lo, a boruak hi tawp fel vat se ka duh tawh. Ka nih nih ka ni mai ang"

"A reh mai ang. Hmanhmawh theih pawh a nih loh hi, class te kha kalloh i lo tum ringawt ange"

"Tunkar chu ka chawl mai dawn mawni"

"A țul lo khawp ang le. Naktuk ațangin i kal ang, vawiin i chawl bawk si. Boruak te pawh i thlithlai ang chu.."

"Ka hmu peih lo em a ni"

"Tlawmngai hram rawh, thil engmah danglam awm lo anga i awm luih char char a ngai alawm. Chuti a nih loh chuan i zuamawm tial tial dawn sin" ka tih sak a.

Reife chu kan inbe awm e, a sawi lah kan sawi hnem nangiang mai.

Phone ka dah chiah chu ka nu chuan min en uluk kher mai! Zawhna a'n ngah hmel khawp a.

"Engnge khatia min melh run run?"

"Tunge i biak a?"

"Rintei kha, chhuna awm ve reng kha"

"Engthil nge nia, engnge mi kut i tawrh chhan dik tak hi ni a?"

"A, thil sawi țul ber pawh a ni lo a sin mawle"

"Kha nu vang kha em ni?" a la ti zel bawk sia, chhan loh theih pawh a ni lo.

"Rintei khan vanduaithlak deuh maiin sawn a pai hlauh mai a, a mipa lah khan neih chu sawi loh a ngaihsak zui duh lova. Ani beidawng khan intihhlum te a lo tum hman hial a, chung lai vel chu ka patea Durtlang Hospitala a awm lai kha a nia.

Zankhat ka hawthla kha kham kova a awm hi ka hmu a, chuta țanga inhria a inbuaipui chho kha kan nia. Inngaizawng pawh kan ni lo. A manganna ka pui a ni ber mai"

"Nau a pai i ti bawk sia..A va puar si love?"  a lo ti a.

"Scooty-in a accident a, chumi vang chuan  amah enkawl ngai bawk nen doctor ten nau chu an tihtlaksak alawm"

"E, a nih tak chu ka lo ngaihtuah buai hman deuh a.."

"Tichuan class pawh chu chhunzawm tura ka ngenna vang te pawh a niang a chhunzawm ve leh mai a. Mahse, a mipa chuan a lo diriam vel a, 'nau i ti tla elo?' tih te leh fiamthu thawh nan te a lo hmang a. Nun nuam pawhin a lo siam lova. Nimin pawh khan hmuh tumin an college bulah te ka han kalphah nghe nghe a..."

"Engtinnge i tih chuan anga?"

"Ka zilh ang chu ka ti mawle. Mahse, remchang a awm lo kha a nia. Zanah khan Engnge boruak tiin Rintei te inlamah ka va phei a, a mipa bike kha ka hmu ta sia, inchhunglam thawm lah a reh țhiap bawk sia, an lo inzui ru reng a niang ka tia lungawi lo zetin kalsan ka tum a. Mahse, ka rilru nuam lo ka let leh a, a mipa chuan a lo vaubet a, mutpui a lo tum kha a lo nia.."

"A chhungte an awm lo a mi a?"

"A u mipa nen chauh an awm a, thingtlang lam chhuak an ni ve a, a u lah hi kohhranah a inhmang bawk sia, in pawh a uap hman meuh bawk si lova a duh tan chuan a remchang ve bawk em a ni"

"A nih chu. Tichuan kut in inthlak zui mai tihna a mi?"

"Thlak zui love, ka zilh ve e ka tia a rawn thinrim khang lang a, a lo tho chhuak kha ka lo su thlu tawp a, a hnuah ka haw tir a, reideuh ka la awm chumi hnuah pawh. A țhiante a pun ni tur a ni. Ka haw tur kha min lo chang a, amah pawh ka hmu zui chuang lo"

"FIR thehluh chi a nih chu engatinge i duh loh tlat ni"

"Rintei thlengin a nghawng vek dawna , miin an hriatloh țha țha kha an hriatphah dawn asin. A hma hun a chhe vek ang. Keima'n ka la chingfel ve ang chu"

"A lo va khawngaihthlak ve Rintei chu le. I bialnu turah ka lo ngai ve mai a, a va duh naupang e te ka lo ti mai mai a. Tlaiah khan Atluangi kha a lo lang leh hlawl bawk sia, ka hrethiam lo deuh a.." a ti ve mai a.

"Atluangi nen pawh khan kan inngaizawng tawh chiah chuang lo"

"Vel mai mai chuan a.."

"Phaia a kal dawn khan kan ințhen a, tunah hian mi a rawn beisei leh sia, ka la dang rih a nih hi"

"A fel alawm a ni te chu. A puitling bawk sia, tunlai țhalaiah te chuan mo atan iaiawm loh ber zinga mi a niang chu. Chhungkaw lamah lah mi pangai tak an nia, a pa te saw an office-ah sawn an fak asin. An fel viau ni tur a ni"

"Mi pangai tak chu an nia lawm. Mahse, inngaihzawnna te chu thildang a nia, felna ringawt hmanga teh theihngawt pawh a ni bik lo"

"A ho emai. A duh phawt che chuan lawmtakin pawm mai teh. Mipa hi in han inla pa ve sasawi a, intihpa vanga mi țha chân kha a hlawk lo teh ang" deuh duah chuan a.

A tuka ka result vel an han lamkhawm chuan thilpawi liantham a lo awm lova, ka pumchhung khawiberah emawni thisen tling a awm chu an tia, mahse hlauhawm a ni lo te an ti leh thova. Damdawiin awmrei ngai lo tur ber chu ka lawmna a ni.

Zanhnih chu ka riak ve ta tho a nih chu.

Rintei class bangin min lo tlawh a, naute pa(?) chu a hmuh ngai loh thu te a sawi sap sap a. An inkiltawih ve deuh nge mawni dawn le te ka ti ta vel mai mai a.

Ka nu chuan a khawngaih ngang a niang, a lo duat khawp a, fanu mal chei thawthangin a lo chiau au a. Eitur a hlui bawk, chaweiah a sawm thul! A thawk fu ngang a ni ange.

Ani lah chu a inthlahrun phah zo vek leh ta nghal a, rei pawh a awm duh lo eirel ngai chhuanlamin a haw tak daih kha.

A tukah chuan 'i thlahual ang' an tia, makpa berin ui pum a lei a, tukțhuan eikham ațang chuan kan ri laih laih nghal mai kha a nia, kei lah mu bet chi ka lo ni lem bawk si lova, a phusa saah chuan ka la țang zui a.

Ka u nupui nen chuan purun var kheha dawhkan kan kil dun lai chuan, "E, lo lut teh. I lo lang dawn lo emaw kan lo ti hman alawm le" ka nu chuan a lo ti hluai pek a, tu chu ni maw tia ka va hawichhuah chuan Lalthantluangi lek chu lo niin!

"Nia, ka buai ve lutuk a..." a ti țha ve mai a.

"Zaite, hei hi i 'junior' tur a nih hi aw" tiin ka nu chuan ka u nupui chu a han kawhhmuh a. A va han țul lo tak, chutia han fa mo chei nghal ngawt chu le.

Kan u nupui lah diau țhak si lo. A tho tharh a, kan chhungte zawng zawng a chibai kual pui a, pawnlama hâr vilho bul thleng chuan an inzui kual tak kha.. Em em lutuk a!

Haw a tum lahin an phal bawk si lova, chawei turin an inchelh tak hial kha!

"Uisa ei dawn te chuan tlem lem sek ila a tui ber" kan makpa chuan a ti teh tlat a, 'ka luak leh vak ang' ka tih pawh chuan 'dal deuhin pawlh la' a la ti hram a, ruihna tham ni si lo, a rim nam mualpho tur ting chuan ka in ve kha a nia, enga han thawk tham pawh ka inchai si law, a ho mange a. Chhungten a rim an lo hriat tumhrang phei chuan le.

Chawei kan peihfel tawh hnuah chuan ka inbual a, ka inbual zo ka inthlak lai chuan ka pindanah chuan Atluangi chu a lo lut pek a, a țul pawh ka va ti chiah lo ve mawle.

Kekawrbul ka ha zo chiah chu ka hnunglam ațang hian min rawn kuah a.

"Engngatinge chaw in eikhawm tur te min hrilh loh, haw luih a nuam chiah bawk si lova..Min ti lai vek alawm" a ti a.

"I lo kal tur i sawi lawk bawk si lova lawm"

"Ni bawk si. Ehe, zu i in maw!?" a'n meng phawk țha leh a. Ka rim a hria a ni ngei ang.

"Umh, in e. Buaina i nei a mi?"

"Engngatinge i in? I in țhin a mi? Hmanniah i in tawh bawk.."

"Ka ințhin leh țhin loh i hriat duh chuan midang zawt mai rawh"

"In tawh suh aw khawngaihtakin.."

"Hmalam hun a sawilawk theih hleinem"

"Mahse, i tum thei a lawm"

"Ka lo tum dawn nia" tiin khumah chuan ka'n tluzal nghal zat a.

Khum bul dawhkana taksa tihchakna lam chi damdawi leh eitur manto hmel pui pui chu ka han hmu thut a, ka chhungten an lei ka hriat siloh vang chuan ama lo ken ni ngei tur hi a nia.

"Saw saw i lo ken a mi a?"

"Umh"

"I va fel ve..."

"Fel nih ka hlawh phak ve tawh tihna a mi!?"

"A nih hmel khawp mai. Mahse, a man a to awm sia, a va inthlahrunawm ve a"

"Inthlahrung duh lo mai rawh"

"Engngati maw, a to dawn sia.."

"Rulhdan awlsam deuh ka hria a.."

"Engtin?"

Khumah chuan a lo lawnkai a, uluk zetin min fawh kha. 'Ka hmangaih che' a ti sap a.

                           Chapter

                                - IX -

Chutia keia damlo karkhat chhung zet min rawn vil tak rawtah chuan țang leh chuang tur hi ka awm lo ni ber hian ka hria. Lungawi takin min hawsan ta fo mai kha a nia. Ka chhungte lah chuan mitmei kawi an lo hmuh a ni hek lo. A tan chuan duh lam na na na chu a bawh ruak ruak mai loh nakah le.

Ka eizawn ve na pawh ka chhunzawm theih takah chuan hmabak ka neih chuan ka rilru a kapna sawt viau mai a, engtia bul țan tur nge erawh ka hre mai thei lo.

Amah Rintei sawi hmangin a bultumtupa chu class te pawh a kal tho chu a ni awm e. 'Mahse, ka hmuh tur zawngin a awm ngai lo' a ti. A țhian te ho kha college lam a mi an nih a ring lem lova. 'Ka țanna hi a dik ang' ti a țang țung phei chu a ni lo. An venglama a țhiante emaw ni turah keipawhin chutia Rintei'n a tih takah chuan ka ngai ve deuh ngawt kha a nia.

Zankhat kan laina hnai deuhte Civil Hospital ICU-ah 'goal' mai thei dinhmuna ding an awm vangin ka menpui ve e ka tia. Dar 11:00 velah chuan 'a ziaawm viau e haw tawh rawh u' an tih vangin haw mai turin ka chhukthla a, ka bike hunna ațanga ka tlanchhuah dawn lai tak chuan Bazar Bungkawn lam ațang hian bike pathum hi chak zetin an rawn in um phei a, 'an va mawl e' tih rilruk pah chuan ka lo ding det a.

A hnungbera lo tlan chu 'mi sualpa' bike a ni chiang mai ka ti!

Leh, an pathum khan ka bitum tur te chu an ni khawp ang. Hawklak vanglai ang mai chuan an hnungah chuan ka phitchhuak ve ta kha a nia, va umphak a lehpel fur fur tur chuan kei leh ka țhutna hian kan tlin lovang. Mahse, an dinna hmun thleng chu ka tlan ve thei tur a ni.

Zarkawt traffic point ka va hmuh phak ve meuh chuan  High field lama an tlanchho lai hi ka va hmu hman awrh a, an veng lam ni a ka hriat loh vang chuan kawnghnuaiah chuan ka tlan ngil phei pawp mai kha a nia, ka chhuahkhalh hman em ang chu maw.

Kei leh kei lo angin ka tlanchak zawng chu danglam tak a ni. Tlanchak țhang lo tihtakah a chang phei chuan ka thunun zo lo lek lek țhin chu a ni e.

Chanmari kawn ka thlen chuan pakhat chu a tlan liam hman hram a, a hnunglam pahnih erawh chuan min hmakhalh hman ta bik lo.

An inkarah chuan ka inzep ve kha a nia, Chaltlang kawngchhovah chuan min lehpel leh nghal mai a. Anmahni hnaih si lo, hlat bawk si lo chuan ka tlan ve zel a, um anga lang lo tura awm chu a țul ve bawk si.

Chaltlang kawn lamah chuan an tlan phei leh a, an tlanchak ta vak bik lo. Motor a awm tawh lem lo bawka tiin headlight ti eng lo te chuan ka tlan leh rih a, tawhsual tawh palh chu a hlauhawm duh viau a ni.

Chaltlang field sirah chuan kualin an her liam thla zel a, keilahchuan ding mai ta lovin ka um ve zel a, thui pawh ka tlan thla hman lo. Light ka on chauh tihah chuan ka hmalawk thlanmualah chuan an lo ding lawi chu niin.

Min va han ti lai kher ve leh e. An dinna lai chu veilama kawngpeng awmna laiah a ni a, min hmu vek tawh dawn si. Din ve leh ngawt chi a ni tawh mang si lova, an lo dinna laiah chuan veilamah, Tourist Lodge hnuai kawngpuiah chuan ka kawi phei ta ringawt kha a nia.

Eng hmuhin nge min lo hmuh ang aw? Ka um tih an hria a ngem le?

Thui tlan thla lovin kawngkawi lai ka thlen chuan ka ding a, an awmna ațang chuan ka dinna lai chu a ruam vangin min rawn hmu thei tawh lo. Tlanchhoh leh ngawt a chi mang bawk si lo. Ke-in han chho ve ngawt ila anni pathum an nia, kei hmanraw nei lo lehnghal chuan engtin ka han ti thei dawn chuang si lo. A awlberah hnunglam ațanga chhiatkhum a nih mai hmel e!

Mahse, chutia din ringawt chu awmzia a awm chuang bawk si lo. Muangchang chuan kopang behchhan deuh reuhin ka chho ta a, hmanrua engemaw tal awm se, han hlap zawt zawt ila kal leh daih ila a țha mai tur hi a nia sin mawle.

Kopang chu a sang hran lo. Mahse, dai a tla tawh awm sia, han inpalhuh vel a peihawm chiah si loh. Street light awm tho mahse ka awmna ațang chuan a hlat hlawm vang chuan a eng fahran lova, a thim lama țang zawk tan chuan anni chu an hmuh theih viau mai.

Thlanlung pakhat phen ațang hian an chetla chu ka thlir reng a, an langchiang khawp mai. An awmna chhak lawkah chuan streetlight a awm a, chu chuan an dinna lai bawr chu a en tawk vel viau a ni.

Mahse, engtinnge ka tih chuan ang le?

Pastor huan hal rim te a nam rum rumin ka hria țip an zu nge mawni. Sairawkherh awm sela han perh pawp pawp mai ka va han chak tak e aw..

Thlan cheina atana an dah lung kuttum tiat lo deuh tur chu ka hmu ta hlauh mai a, chu chuan pakhat hnungzangah chuan ka'n vawm dawp maiah!! A au țhawt mai asin le.

Haw a rawt a ni ngei ang an han in rawn khawm a, an pawmpui chiah lo nge ni an țhu țha leh kha a nia. Ka vawm leh dawn nge mawni le.

Ka bula kross in phun chu ka tuai vat vat a, a la thar lam hmel khawp mai. A lian lova, banpuam tia vel a nih ka ring, phawi mai atan awhawm tak a ni.

I hi le! Current a thim ta hlauh mai! A thim țha mem mem ta khawp mai. An dinna bawr velah chuan thing a din nual vangin chumi chuan a hliah thim leh zual a, duh anga chetna hun a awm dawn ta ka ti mai.

Ka bula kross an phun chu harsa lo takin ka phawi mai a, muangchangin an awmna lam pan chuan ka kal thla ta a, thawm dim a ngai viau. Mahse, ka vanneih leh zelna chu thinghnah tla ro ho daiin a tihnawng hlauh a, chu chuan ka thawm chhuah tur chu min hum sak hneh kher mai.

Kan inhlat lo bawk a, an ruangam awm chu thim deuh mahse ka hmu thei ruau ruau a, pakhatin zial a'n țan hlauh mai phei chu a lawmawm duh khawp mai. A lighter talh engah chuan an awmdan ka hrekim thei ta chiah.

Pakhat, ka vawm bera kha kawngchhak lamah thlanglam hawi niawm takin a țhu a, pahnih erawh chu thlanglamah an bike bulah an awm thung.

Chhaklam ațanga kal thlak chu a rem chiah lova ka hriat vang chuan kawngpui lam ațanga pan chhoh tum chuan thlanglamah ka tawlh thla leh kha a nia, kawngpuiah chuan thawm dim vak a ngai ta lova ka pan hnai sawt viau a ni.

Thlanglama țhu pakhat chuan zai a play niin ka hria. Chhaklama țhu pawh chuan phone a khawih bawk.

Thil kaldan fu lutuk chu a mak ka ti zawk hial mai! Phone an khawih chuan lo hawichhuak hman pawh ni se an mit vaiin min hre thei mai dawn lo va, chu thil remchang lutuk tak mai chu bawhpelh phal chi pawh a ni lovang.

"I hla play ber kher chu a va mawi lo tak, kan play ange aw" ti a a phone khawih lo berin a sawi te pawh chu ring vak lo mahse ka hrephak tawh. An pathuma phone an khawih vek phei chuan belchhunga sa an ni mai. Mahse, current hi lo awm thut lo se.

Ka pan hriau hriau lai chuan phone an bih kim ta!

Thlanglama pahnih țhu chu nge ka vuak hmasak ang chhaklama a mala țhu chu niang aw.. Pen thum vel ka pen leh chuan ka hlap pha reng tawh mai dawnah.

A chhak bera mi chu ka pan thut a, a hnungzanga hlap tum chuan ka kross ken chu ka lekchhuak a, ka kawkalh laiin ka bân chetna a dal deuh vangin ka ban thui hman lo a niang a nghawngah kan hlap mai pekah! Kawngpuiah chuan a bawk rawp mai a, a phone thlauh chu a tleng thla hrat hrat a.

"Engnge?" tihpaha a phone hmai lama lo chhun tum thlanglama mi lo penchhuak chu a dulah ka sawh sak hman hram a, a ni pawh a țhu hnawk a, a hnungzangah thum dawt khawpa ka'n hlap kha. Pakhat erawh chu a tlan chho chiam mai a, ka um zet nain ka umpha dawn chuang lova ka um lui ta lo. A thim bawk sia, bîkbona tur a tam dawn emai, inpal luhai lo law law ang.

A mawl ve reng reng, țanpuitu auh nachang pawh a hre lo. Ngawirengin a tlanchho ringawt kha a nia. Keichu ni ila ka țe nasa viau ang. Mi zawng zawng harh turin..

Inthiar fihlim thuai țula ka hriat vang chuan ka bike dahna lam pan chuan ka indap thla nasa mai a, min hmuh theihloh china ka hriatah ka phone ka ti eng a, ka thleng thla ta thuai a.

Ka romol tlang chu ka pawtthler den den a, ka bike number plate khuh nan chuan ka hmang ta a, a kilțet lai chu a kilah bah nan ka hmang zel a, chutia han tla mai tur chu a ni lem lo in ka hria. Tichuan ka bike number chu an chhinchhiah thei lo turah ka ngai.

Ka tlan chho ta, min lo hlap tlu ve tawp mai ang tih chu a hlauhawm ang reng hle mai ka ti.

An lan theihna lai ka thlen chuan chhaklama mi kha chu a mut ngaiin a lo la mu reng a, thlanglama mi erawh chu bike nghengin a lo țhu thung a, chupa ber chu Rintei buaina thlentu ber kha a ni tih ka han hre thei a, a tlanbo ta ber erawh a lo la lang lo a niang hmuh tur a awm lo thung.

A mit tivai tur lek chuan head light chu high leh low-ah ka thlak chho mawlh mawlh a, ka tlan pel zet tihah chuan ka ding leh a, thlanglama bike nghenga lo țhutung zawk chu ka'n tlawh tlu leh hram a, ka lung a awi khat deuh ta a niang ka inher a ka tlan liam zui nghal daih a.

Ka kross phurh chu kan țhenawmte pangpar bukah ka'n thehluh ngei kha!

Mahse, ka lungawina tur emaw ka tih chuan min ti lungawi reng reng lo. Ka hlimna tura phuba la emaw ka intihna chuan lawmna min pe hauh lo mai.

Keimaha hlauhthawnna awm chu dahkian tum teh mah ila a harsa lam deuh chu a ni. Thiamchanna tur ka indap chawp zut zut a, ka mitah chuan thiam ka chang chuan ka hria. Mahse, 'mahse..'a awm tlat si.

Muthilh pawh chuti mai chuan ka thei awzawng lo mai. Engemawni helhkam, min mawlh riautu hi a awm tlat pek a, huai ka intih ve țhin nen mahni khumlaizawlah pawh thlanfimin min bual lo chauh chu a ni e.

A tukzingah chuan ka nu hian min rawn kaithova, muhar viau e ti lo chuan thawhphan ka nei lo chiang kher mai. Tukdangah min rawn kaitho ngai miau hek lo le. 'An hrechhuak ta a niang' tih chu ka thawhchhuah hma hawta ka rilru luahtu a ni nghal.

Mahse, chulam chu a lo ni chiah lem lova, kan chhungte damdawiinah awm zawk kha a boral chu lo niin. Ka mengphawk sual hran love.

"Lo han chho ve la ruang lakna lamah. Lehkha tihfelpui ngai te a awm chuan lo han buaipui rawh. Anmahni chuan a ngaihna an hre leh lovang. Keini an inlamah kan lo va phei anga" a ti kha a nia.

Ka hmai ka han phih chu ka mit a thip viau a ni. Zan lama mut hmuh țhat loh nen chuan thawhhma chu a intu lo khawp mai.

Zing thingpui in tih vel bawr hi chu kâ awl ngai thei lo te tih tawk vela ka ngaih vang hian zinglamah hi chuan sleeper ka han bun a, hmai ka phih zawh hi chuan ka hman a ni nghal mai a, ekchhuak han inthiar kawi vel pawh hi ka nei ngai meuh lo. Zial zu mi ka nih vang erawh chuan tuisik hi nohnih tal ka in ve ziah a, chumi hnuah zial ka zu chauh țhin.

Zial pawh țan hman lovin damdawiin lam pan chuan ka tlan chho zui nghal mai kha a nia, a thlen lah ka thleng rang. An awmna ward ațang chuan ruang chu an lo la chhuak tawh a, building pui ber kawta ruangdahna inah chuan an lo la awmpui a,  hospital driver an la nghak a ni awm e.

A fate chu ka hmu kual zung zung a, ka nu rin ang ngeiin engmah buaipui nachang pawh chu an lo hre lo tak tak a, a hawiharh chi an nih tawh loh naklaiin  lu an la sun rawl nen an tan chuan a rit lua te pawh a ni ange.

Duty ten lehkha an pek ho chu ka la a, a țul ang ang chuan ka virkual pui ta zak zak a, zinglam tihtakah hmuh tur ang pawh an la hmuh theih loh a ni ber mai.

Chutia mawngvawmba ang maia ka vei tuak sek lai chuan a hma zan lama ka sulhnu ka hmu ta tlat mai a. Rintei țhianpa ber kha xray building lam ațang chuan an rawn zawn chho mek hi a lo ni a, a hmai an khuh loh vang chuan amah chu ka hmu chiang kher mai.

Ka ding chawt a, ka su deuh det hian ka hria. Khawnge pakhat kha niang le!?

Male Medical room lama an zawnluh thleng chuan ka en zui a, kan inrul na mah mah ang tih pawh ka hlau hlel love ka ti.

Hmuh ngai țhenkhat an la awm loh vang chuan chhunlama chhunzawmah tiin ka hawsan ve ta kha a nia, ka vak chau hman viau tho a ni.

"MISUAL KUT TUAR"

Nizan khan chaltlang thlanmualah mi tu tih hriat lovin mipahnih kut a thlak a, an dinhmun a țha lo hle. Pakhat zawk tunah ICU-ah awmin kuttuartu pakhat pawh hi biak theih lovin a la awm a ni.

Helai hmunah hian kar liam ta lawk pawh khan mipahnih tihbuai an lo ni tawh a, Bawngkawn P/S ah rinhlelh thuah tukin khan mi pahnih thuzawhfiah tura koh an ni. - tih thu chu ka u nupuiin chaw ei tur min siamsak lai chuan whats app lamah ka zu chhiar fu hlauh mai pek a, koh zingah chuan ka tel lo a va nih mai hmel ve le. Ka thaw huai mai.

An hming leh veng te pawh an tarlang vek a, ka tilang tel ve duh ta lo mai a nih khi. Vawiin chu dam lo tlawh tur pahnih ka nei a va nih hmel ta ve.

Chaw ka eikham hnu chuan muangchangin ka inbual a, mitthi vuina lama lan ve leh hman hram ka duh vang chuan damdawiin lam pan bawk chuan ka tlanchhuak leh a, ka hmuh tur te an lo awmkim ta bawk a harsatna awm lovin death certificate leh țul dang te chu ka ti fel ta thuai a.

ICU lam pana chhoh ka tum ve ngawt chu gate duty in min phalsak ta awzawng lo mai a.

Ka bag a reciept vel ka lakkhawm chu ka phawrh ta ngawt mai kha a nia. 'Death certificate te hi han sign tir a ngai alawm' te ka tia, mi  tlang tir hram e.

ICU kawt velah chuan ka han vei thuak thuak a, hmelhriat han hmuh mai ka nei lem bawk si lova a ho duh viau mai. A piah deuh, chaw an semna țhin dawhkanah chuan ka țhu ran mai a, ICU lama awm te chanchin ngaichang chuan ka beng ka dawh reng a, tumah an chhungte an awm lo nge mawni a reh riau mai.

Chutia beng nei lo ang maia bengvar lova ka țhut lai chuan officer niawm tak, hmel țha veng vung, palian zeh zuah tak mai hi kan lam pan chuan a lo phei nulh nulh a, ka sir a țhu chu ka bengverh zawng tak maiin a rawn be ta hlauh mai a. Amah chu ICU luhdawna pindan te pen awm ațanga lo chhuak a ni.

"Lo țhu phei ve ta che, helamah i awm daih a, sawlai saw țhutna te pawh a dup nuam zawk a sin" a rawn ti a.

"A uap ka ti deuh hlek a, lum hi ka tuar hleithei lo tunlai chu. Ka sa leh phut phut țhin" a lo ti a.

"Engtin chiah maw tawhsual an tawh dan chu ni a, phone-ah khan in nu khan chiang lo ruai khan a sawi a.." tiin a zawt chhunzawm nghal zat a. Chu chhanna chu a zawttu aimahin ka nghakhlel awm e.

"Nizanah a țhiante pahnih nen an lengchhuak kha khi mi chaltlang thlanmual, kawngpuiah khian an țhu a, an titi mai mai lai kha tu emaw hian hmanrua nen a rawn bei chiam ni tur hi a nia, current a thim bawk sia, amah a hmuh hleihtheih bawk si lo a ni awm e"

"Han rinhlelh tur ang chi pawh an awm chuang lo tihna a ni maw?"

"Chu, khilai veng ho khan rinhlelh deuh an lo nei a niang, a hma pawhin buaina a lo siam tawh a ni awm e. A ni ngei em tih phei chu a la chiang thei chuang lova. An țhianpa tlanchhe hman ber lah chuan 'mihring pawh niin ka hre lo' te a ti mai bawk sia, han chian tur awm nghal hek lo mawle"

"A nih teh nuaih chu a, chu pakhat chu himdamin a tlanchhuak hman a maw?"

"Niang chu, ke-in khi mi Laipuitlang pen pheina tur thleng khian a rawn tlan phei a ni awm a, mi motor remchangah betin a rawn tlanhaw thla a, khatia rawn tlanthla mai lo khan phungbawm sawmna changte hria sela chu a hlimchhawnah chuan tih dan dan a awm tur a nia. Chutiang lam ngaihtuah ta lo chuan ani naupang ta chu a rawn tlanchhe thleng țhiai mai bawk sia, kan hriat meuh kha chuan dar 1 a ri thuak tawh a, chhoh chhung nen kha chuan mihring a ni emaw ni lo emaw a in saseng fel vek hman dawn hrim hrim a..." a va han ngaihnawm em, thawnthu sawi thiam tak a ni. Ka ngaithla tui kher mai!

"Tu emaw anmahni hawtu deuh te hi an lo nei te hi a ni lo'ng maw?" a va zawt fu leh chaih chaih ve. Duhthusam zel a la ni mai ka ti.

"Chutiang tur ka hre lo' a ti ve miau bawk sia, bakah an la naupang a, khatianga thichhawnga kut inthlak duh tur khawp em em chuan tu pawi mah an sawi pawh a rinawm chiah loh" a la ti zui tak deuh deuh a.

"Ni e,  rinhlelh man te an neih chuan an hriatchhuah ve mai dawn chu. Tu emaw awmherh deuh thiltih a ang tlat. Ruiphur satliah chu a ni lovang"

"Ni e, a tuartu nih chuan lung a dam lo khawp mai, han man chhuak thuai se la kan ti vawng vawng mai a nih hi" a tih lai chuan dawr ak nu chana ka lei chu ka hmawm zauh zauh a, muangchangin ka thawhsan zui ta a.

Huaisenna nei ve deuh se chuan min man ran dawn nen; kei aiin an lo dawih deuh a nih dawn chu. Ka him lel anga ti nia!

Mitthi vuinaa ka awmlai chuan ka phone chu a lo nghawr dar dar a, hlauhthawnna hian min zem leh țhin. Ka han en chuan Rintei a lo ni a, engthilmah a sawi hma chuan mitthi vuinnaa ka awm thu leh ka hman ve leh ka biak tur thu hrilhin ka ti tawp nghal daih a. Mahse, ka ngaihtuah a dik berin ka hre leh chiah si lova, kawngpui lamah chuan ka chhuak phei zui nghal a, ka be ta kha a nia.

"Whats app lama nizan thil thleng an post i hmu ve em?" a rawn ti nghal a.

"Aw hmu e, tukin ka chawei dawn khan ka hmu a"

"Engtinnge i tih theih zawk, midang an ringhlel a an man daih bawk sia!?"

"Ka tih a ni hleinem"

"Engnga? Nangmah i ni lo maw?"

"Umh.."

"Tak tak em..?"

"A va mak e..min va'n ring lo ve"

"Nangmah turah ka lo ngai ve ringawt a sin. A mak hle mai a, ka lo hlauthawng hman lutuk a, class-ah an sawia ka hre ve chauh a, kan off ve leh ka lo be nghal che a"

"Hlauthawng suh, engmah hlauh tur a awm hleinem"

"Chutia nih chuan a țhat chu. Rilru a nuam ta deuh alawm"

"Nizan te chuan damdawiin lamah kan chhungte kan menpui alawm. Hei a boral a tunah hian an vui mek a.."

"Ok, nia, nangmah chu ni la engemaw tal i rawn sawi ka ring deuh bawk sia, anmahni kher chu midang tih a nih ka ring ngam chiah si lova, chutiang vel chu a ni e"

"I haw pahin min lo tlawh kawi la, coffee te in ila"

"Vawiin chu scooty pawh ka keng lo, ka u in a hmang daih a"

"Aw, bus in lo phei mai la, ka thlah dawn che nia"

"Umh, ka lo tum dawn nia. Mahse, last period ka nei a, ka hma lutuk lovang aw"

"Ok, a nih phawt aw"

"Awle, bye"

"Bye"

                        Chapter

                                 - X -

Police hmel lo lang ta lo chu mawh ka phur dawn lo a nih ngei hmel e. Mahse, mipa rilru an pu ve ngai a nih chuan inhmachhawn hun a awm leh mahna le.

Hun a liam ve zel a, mipa sulhnu pawh rilruah a cham reng bik lova, ngaihtuah chhuah chang chu awm bawk mahse han er chiam tham turin boruak tharlam a awm tlat lova, thut a awm ta a nih leh kan ri thut tawh mai a niang chu.

Zankhat chu Rintei te inah ka va leng a, kan ti ti tui țan chauh tihah chuan 'inhmu tawh lovang' a ti ta mauh mai a, ka lawm lo kher mai!

"Engvangin maw?"

"A, kan pahnih atan hian a țha zawkin ka hria"

"A țhat zawkna tur a awm pawh ka hre hran lo keichuan, min ning tawh zawk a nih chuan thudang a nia"

"Nin lam pawh a ni hran lo, ngaihzawng nei i ni bawk sia, i țhiannu tan ka hnawksak ang tih te pawh a hlauhawm alawm. Hmeichhia chu kan rilru te hi mipa ang kan ni ve țhin si lova"

"A ho e, țhiante leh zel an thik te chuan an thu a ni mai a, chutiang lehzela an buai chuan buaitlak an ni maiah ka ngai"

"Chutia i ngaih ang ngawt chu thil hi a ni țhin lo a nia, hmeichhia chu kan dang ka tih tawh kha. Mahni unaute ngei pawh thikthei kan nia, mihrang lehnghal phei chu a thik loh kha ring lo law law la a dik mah zawk ang. In inzui a nih rau rau chuan buaina nei turin ka duhsak lo che u a nia, hlimtaka in awm ka duh ber"

"Kan duh vek alawm hlim te chu"

"Chuvangin a thik tura lo awm buai vel kha a țul lo ka tihna zawk a nia, thil a harsat tawh hnua siamțhat tum leh aichuan inven lawk hi a țha mai alawm"

"Chutiang rilru a pu lovang, puitling a nia lawm. Thik tur chi te chu a thliar hrang thiam ve bawk ang chu"

"I ngai awlsam bawk sia maw! I ngaih ang ngawt chu a ni lo ang mawle"

Chumi zan ațang chuan kan inkar chuan nidang a phak ta lo. A tlahniam tial tial a, inbe lo tawp chu kan ni lo nain amah chuan min be hmasa ngai tawh lo hrim hrim a, ka biak chhunah lah a rul tawk bak chhanna ka dawng ngai lem lo.

A mak hle mai. Chhuanlam chu a nei ve tak a, a chhuanlam kha thil awm tak niin ka hriatpui lem lo. Thil thup engemaw a nei a ni ngei ang. Kei hian a ngaihzawng neih kawngah emaw ka lo dîp ru reng pawh a ni mai thei a sin.

A lakah hian thuneihna chan ka tum lutuk ang a, amah ber hi ka lo nêkchep te pawh a ni mahna. Mawihnai taka min hnarna tur kawng a dap a nih si chuan ka tan chuan tihluih hram hram a țul hran lovang. A tan harsatna thlentu mai ka lo nih phei chuan a duh ang ngeia kiansan zawk te pawh chu a țhat ka ring e.

Ni, min thlahlel a, ka mitmei veng reng renga nun hmang an awm ve mek lai a inhmuh leh inkawm duh lo ber laka changela sawibel taka han behluih hram chu ka chhia leh țha hriatna hian a duh lo țhin a nih kha.

A duh ang ngei chuan ka tihhlawhtlin sak thei tur a ni.

"Âpate, hmanni khan ka pa khan nupui neih  chungchang vel a sawi vuaiin ka hria" tiin ka u nupui chuan ka chhuak tur chu min lo be ding a. A fate min koh dan angin min ko ve mai zel a!

"Tu nupui neih maw?"

"Nangmah mawle"

"A khai a, ka va hriatpui ve lo ve, anmahni'n neih an lo tum zawk te hi a ni ange" nuichung chuan ka ti liam ve mai a.

"Tak takin, nei ve tawh ila. Mo lawm te pawh kan chak tawh a nia, a chawmna turah i buai pawh a ni si lo"

"A chhuakthar apiang hi an țha zel bawk sia.." a nuih a za kher mai.

"Ve lutuk che hian a.. Chungte chuan an pu zel ang che. Tuna mi hi a țha ber, a puitling bawk sia"

"Nei daih la chuti chu.."

"I va ho mai mai e aw, ka nu te ka hrilh dawn. 'Nupui neih a duh tawh, a sawi ngam si lova lo sawi mai rawh a ti' ka ti ang" a la ti tak deuh deuh a.

Chutia fiamthua kan sawi emaw ka tih chu ka nu leh pate beng a lo thleng tak tak a niang chu; anni lah chuan an lo la lungrun phian a, ka hriat hlek lovin chhungkhatho an lo punkhawm mai pekah!

Zana Atluangi te ina ka lenlai chuan a phone a lo ri a, an inbiak dan chu rinaitakin an la thutak phian a, engemaw tak a awm a nih ka ring reng a, ka chungchang te an sawiin a nia ka hriat ni.

An han inbe zo chu thawhuai chung hian min rawn kuah a, "Sawi lawk ve tur che nia" hi a rawn tichhuak ringawt a.

"Eng chu maw!?" ka ti deuh hu a, hre ve miau hek lovi.

"Aw... palai lo tirh in tum vel chu mawle"

"Ehe" ka ti ringawt a. Keimah tak pawh chu min barakhaih viau a ni!

"Engnge, 'ehe' i tih ngawt?" ka hriatpui reng reng lo han tih chi a ni tawh mang bawk si lova, han sawi chiam dawnin engmah ka hre chuang bawk si lo.

"Tunge lo bia che a?"

"I u nupuiin"

"Engngatinge, in inbe țhin a mi a?"

"Be țhin e, mak i va tih hmel ve"

"I sawi ngai silova ka ti"

"Ka biak zawng zawng ka hrilh zel che chuan i ning leh si ang. Tak takin, hetiang thil lian tham te chu han sawi lawk ve awm che a nia, engemaw chhungkaw lamah te harsatna kan neih lai te pawh a lo ni ve thei a"

"Chu i duh vak lo tihna a mi?" te ka tihkual vel tak mai mai loh te chuan thu bulbal hre ve miau hek lovi.

"Ah, ka tan chuan lawmna tur zawk a nia, ka lawm a , ka phu lo bawk a. Mahse, ka sawi ang khan engemaw harsatna te lo awm ve thei a nia tih thu mai mai mawle. A țha vek alawm" a ti zui ve leh mai a.

"Harsatna a awm te chuan kan țhulh anga a ni mai alawm" ka tiha a hmel landan inthlak ațang chuan ka țawngkam hman chu a fu lutuk lo a ni tih ka hrechhuak a, ka sawi zo vek tawh bawk sia le.

"A mak thei hmak hmak țhin" tûm deuh bar chung chuan a ti a.

"Aw, harsatna a awm miau te chuan engtin nge ni chuang ang? Duhdan bera awm theih loh a hnu te chu.." ka thuhriatin min țhawng deuh nge ni ka awmphung chu ka hloh deuh tlatin ka hria. Ka țawngkam lah chu a leila zawng hlirin ka chhep chhuak mai bawk sia.

"A bawplawkah i la mai mai a nih kha, eng harsatna mah a awm lovang, ka inpeih e"

A rilru hi ka ti hrehawm ve thei bawk sia, a chang hi chuan ka inthiam lo ve țhin. Mahse, runluih chak riau hun hi ka nei tlat zel a!

"Ka nu te pawh hrilh lawk ve la, ka tan chuan sawi a nuam dawn lo nia" a ti zui a.

"Zandangah a nimai, zanin tut tuta hrilh nghal chu kan virpilh palh ange" ka tih chuan a nui seih a. Amah chu dangmawn lang hawng hawngin a nui ve ngai lo. Ngaih la tawk lek hian a nui leh seih țhin a.

Haw dawnah kawngka biang nghengin uluk zeta min fawh kha maw!

A tuk zinga tukțhuan kan eilai chuan ka nu chuan a hma zan lama an thu tihtluk dan chu a sawi chhuak a, keilah pek chuan "A neitu tur ber pawh hriat lova thu in lo tihtluk ngawt chu..." ka ti duh chauh a.

"Aw, i nei duh tawh emaw tia?" ka nuin a tih pawh chu ka chhang chhunzawm lem chuang hlei lova. Ka u nupui chuan fiamthu nen a chawk chhova, nei duh huam huamah min chhuah tak der kha mawle.

Tichuan, palai thawhkhatna chu an kal ta kha a nia, ka phur tâk surh pawh ka hre lova, ka huphurh viau pawh a ni hek lo. A pa zin a ngaih vangin 'kan lo inrawn khawm ve ang a, min duh tak tak a nih leh in lo leng leh dawn nia' tiin a karkhatna champha phaka kal leh tur chuan thu an rawn hnutchhiah kha a ni a, a pa țet țut chu zin hun a va hre lo ve mawle.

Palai an kal chu thawhleh zan a ni a, lên pawh ka leng chhuak ta bik lo kha a nia. Phone phei chuan kan inbe reng thova, a hlimzia a sawi ve siap siap kha mawle.

A tuk zinga hna kal tura ka insiam mawlh mawlh lai chuan ka nuin min lo auva, ka va chhuah phei chuan kawr uk ha pathum lai hi kan chokaah chuan an lo ding chu lo niin. Ka han hmuthut chu ka phudeuh zawkin ka hria. Mahse, min hnungchhawn zawnga awm an nih vang erawh chuan min hmu ve hran lo.

Ka thin a phu der der țan!

"Engnge nia?" tiin biak bik pawh nei em em lo chuan zawhna ka va zawt tawng a.

SI ber chuan, "Engemaw thilah hriatchian duh deuh kan nei a, kan pu ten kan office lamah i lo leng hman ang em an ti deuh che a" tiin hawihhawm takin min lo chhang thuai a.

"E, engthil nge mawni le. Kan insiam zo ange aw, ka rei lovang" thlanglam, kan chaweidawhkan bula constable ding chu kan college kalpui țhin lo ni rengin "David, police-ah te i lo țang elaw?" ka tih chuan phawk fe hian min rawn melh a.

"Ehe, nangmah elo?" a ti hu a, kan han inchibai țha leh rih a. Kan ri dun hlut a. Mahse, ka chhungril erawh a nui ve ta lo.

Ka pindanah chuan ka nuin min lo zui lut thuai a, "Eng thil nge nia, engnge dik lo awm police hialin an koh che?" a rawn ti a.

"Ka nu, hlauhthawn tur engmah a awm lo. Engemaw an hriatsual a niang, ka han kal anga a fel mai ang. Engnge pawh ka la hriat bik loh hi" tiin ka chhang a.

A rilru chu a nuam lo hle a tih a hriat reng mai. Tihvak ngaihna ka hre bik bawk si lo.

An motor-ah pawh chuang ta lo chuan Davida chuan ka bike a khalh a, Thana lampan chuan kan inzui chho ta kha a ni a,   ka nu leh pa te pawhin min rawn umzui nghal niin ka hria.

"Thla hmasa ni 24 zan khan engnge i tih? Khawiah nge i awm?" tiin an OC zuheh hmel fe mai chuan mi han zawt a, 'A rei tawh e, ka lo chhinchhiah thlip thlep hran bawk si lova, ka va hre mai love" ka ti ve mai a.

"Chaltlang thlanmualah mi pahnih kut i thlak a ti raw!?" a ti ta chiah mai a. Khai a, manchhuah ka ni ta a nimaw!

"In hresual a ni lo maw?"

"Kan hresual lo khawp ang, tihkual vak ngai lovin inpuang la i tan a țhat zawk ka ring"

"Inpuan tur ka nei hleinem, tute nge khami te kha an nih pawh ka hre lova, engvangin nge kut ka thlak ve ngawt ang"

"I hria, i hre khawp mai. A hmain hmeichhia vangin khamite nen khan buaina in lo nei tawh a, chumi vang chuan kut i thlak a ni"

"Tu te nge chumi te chu?"

An hming a sawi diat diat a, Rintei laka mawi lo taka che pa hming a sawi zawh chuan 'kha pa kha chu kut ka thlak tawh, midang kha chu ka hre lo'

"Khawihmunah nge kut i thlak?"

"Kan nula rimnaah"

"A dik chiah, chumi buaina kal zel vang chu a ni maw ni 24 zan khan i beih leh tak?"

"Ngawiteh ka pu, i hresual a niang. Kum lamah nise kan inthlau em em a, han khin thamah pawh ka ruat teh chiam lo. Bakah, han haw zui turin a hmeichhia nen khan kan inngaizawng a zeng pawh a ni lova, engnge maw anni kut thlak leh chhan tur a awm emaw ni le"

"Engnge a hmaa kut i thlak chhan chu ni reng reng"

"Inneitu te kha unau mipa leh hmeichia an nia, a hmeichhia zawk nen chuan kan inkawm țhin vangin ka leng fova, khami zana ka leng leh tur kha khapa kha a lo awm a, khumah pawngsual tumin a lo vau bet a, chumi vanga kutthlak chu ka ni"

"A hmeichhia chu kan koh ang aw"

"Aw, mahse class a kal ka ring tunah chuan.."

"Tunge zing lama chhuak uniform ha lo an awm em va koh teh" tiin ka sira țhu chu a hrilh zui nghal a, "Khawi college-ah nge a kal? A hming? Engnge a subject?"

A zawhna ka chhan lai chuan ka sirah chuan pakhat chu a rawn inkheng khawng auh a.

Rintei hruaiturin a tirh chhuah tak kha..

A rilru tih hrehawm ka duh tawh lo a sin kha Rintei kha. A mualpho phah dawn ngei ta a nih hi.

"Engtia inhria nge in nih chu nu nen chuan?"

"Kan inhre ve tawp a ni mai. Chutiang a mumal taka inhria pawh kan ni em em lo"

"Inhre ve tawp ringawt maw, a va mumal lo angreng ve"

"A ni ber alawm, durtlang kawngah khian a scooty nen a lo ding a, ka ding zui ve a chuta țanga inhria a inkawm zui ta chu kan nia"

"In inngaizawng miah lo a maw?"

"Ngaizawng nang, ngaihzawng ka nei alawm, amah pawhin a hre vek"

"I leng zing em?"

"Zing ve tho ti ila zirlai te a la nia, chuti em em a zing chu a ni hran lo"

"A nih tak chu" chutihlai chuan ka pa a lo lut heu mai pekah!

"Hna laklawh kan nei tih an hrilh lo che emawni le?" tiin hmelhriat țha tih hriat tak hian OC chuan ka pa chu a lo be thuai a, 'I hna laklawh neih hi ka fapa alawm mawle' a ni'n a ti ve thung a!

Ka pa lo kal chu ka lawm viau rualin ka insawi fihlim zo dawna ka hriat loh vang chuan hrehawm ka ti khawp mai a, ka pa hmaieng zah chu a na dawn viau a ni.

"E, chuti a nimaw, ka lo hlaptir hman țep a sin" a ti liam ve mai a.

"Eng thilah nge ni a?" tiin ka pa chuan a zawt let thuai a.

"Thla hmasa lama Chaltlang thlanmuala mi kutthlak chungchangah khan mawle, hei i fapa hming hian FIR a rawn lut miau mai si a, kan bawhzui lo thei ta lo a nih hi" a tih chuan ka pa meuh pawh chu a ka hau mai.

"A va zia love mawle, țha takin a awm ve reng emaw tia" ka pa chuan a ti ringawt kha a nia. Ka pa chuan min ti vak pawhin ka ring lo. A tlangval laia 'street fighter' inti ve ngat kha a nia, mahse FIR te hial thehluh a nih si chuan hmai chu a uang viau lo a ni.

"Pawnlamah lo va awmpui rawh u, nakinah nula an hruai kha a lo thlen hunah in rawn luhpui leh dawn nia" tiin a naute chu a hrilh a, an office lamah chuan min awmpui ta kha a nia, mi an thithlai uluk angreng khawp mai tlanchhuah pawh tum ila ka thleng thui hman kher pawhin ka ring lo.

Rin aitakin Rintei te pawh chu an lo thleng har a, a ninawm lamah a kal țan tlat. Ka nu pawh kha a lo kal ve khan ka hre sia, khawnge maw a awm tak daih ni.

Davida nen chuan țhudunin kan ti ti reng a, ka chungchang erawh chu zawhna  pakhat mah min zawt lo thung. Kan college kal lai chanchin te a ni kan sawi daih ni.

Rintei te pawh chu an lo thleng ta, min han hmu chu ka lam pan chuan a lo kal thuai a, "Engnge awmzia?" a ti zui zat a.

"Hlauthawng suh, engmah hlauhthawn tur a awm lo a nia" ka tihlai chuan police chuan amah chu an lo hruai hrang ta daih a, inbiak dun a la rem loh thu an sawi zui a.

Rintei an hruailuh hnulawkah chuan ka pa chu a lo chhuak zui ve mai a, ka bulah chuan ngawirengin a lo țhu a, mi han tihvak ngaihna a hre bik lo a ni ngei ang. A hrehawm duh hle mai ka ti.

Jail lama tang mai tur te chuan ka han inngaihtuah a, ka sa pup pup mai hian ka hria. Awmngaihna a vang a ni e.

Rintei lah chu an rawn chhuahtir mai bawk si lo. A mangang dawn hian ka hre lutuk a, engtinnge a chhan ang le?

A rei ka ti tawh lutuk chu ka ding chhuak hlawl ringawt a..

                           Chapter

                                - XI -

Ka pa pawh chuan makti fe hian min en ringawt a.

Ka vei tuak sek hnuah chuan Rintei pawh chu a lo chhuak ve ta kha a nia, kei chu koh ka ni zui nghal a.

Rintei'n zawhna a chhandan lah ka hre ve bawk si lo, ka insawi awk ngei dawn ni hian ka hre tlat a, pawnlamah langchhuak kher mah suh se a nihna takah chuan ka zam ve viau a ni.

"Inpuang mai rawh, i țhiannu khan a sawi vek tawh" a lo ti khur khur a.

"Puantur pawh ka nei hleinem"

"I țhiannu khan zanah damdawiinah a kal a ti che a a dik em?"  Ni dawn tak, ka ngaihtuah chhuak miah lo ka ti!

"Aw, ni tak e. Damdawiinah kan chhungte ICU-ah an awm a, khami zan khan kan menpui"

"A nih engtinnge kha mi zan kha a ni tih i hriatchhuah theih?"

"Kan damlo awmpui chu a boral vangin a tukah vuinaah ka kal a, chutihlai chuan ka țhiannu khan min rawn phone a..."

"Engtinnge a rawn sawi?"

"A, a chiah chiah chu ka sawi dik kher lo mi thei a. Mahse, ani pawh khan a hmaa boruak nei sa kan nih vang khan keima tihah a ngai ve thova, whats app lamah ka hmu a a tia"

"A hmain whats app vela mi chu i hmu ve em?

"Zing chaw ka eidawnin ka hmu, anmahni kha ka hriat mi an nih hran lova, an hming tak ngial pawh ka hriat loh vangin chuti vakin ka lo bengkhawn lova"

"Damdawiinah khami zan khan in awm ngei tih hriatpuitu i nei em?"

"Umh, teh reng mai" ka pa chu a kohtir zui leh nghal a, ka pa chu kan chhungte mitthi hnaivai awm te chu a han zawt vel a, ani pawh chuan a sawi ve zel mai bawk sia, a ngaih a țha deuh nge mawni "Zanah chuan Damdawiinah i awmngei a ni tih hriatpuitu pahnih tal lo hruai rawh. Chumi i neih theih chuan case lak vak hi awmzia a awm dawn chuang lova, tihdan kan lo zawng dawn nia. Mahse, koh thut pawh dawl tur erawh chuan lo awm la, tun thla chhung chu lo zinbo lo la a țhat ka ring"

"Chutia lo kal leh a ngaihte chuan anmahni pawh lo awm ve se la, inchapchar law law ila. Ngaihdam min dil a nih lo chuan Defamation case ka file ve mai dawn a nia, ka lawm miah lo"

"Awle, lo koh kan tum dawn nia, i lo kal theih hun tur ti chiang la"

"Tunah pawh ka thei alawm keichuan"

"Tun tut tutah te chuan information kan pe hman nang, naktukah ti ila, chaweikham lamah"

"A țha mai alawm"

Lungphu rang pawh a reh fel hma chuan pawn boruak chu ka hip leh ta kha a nia. Ka pa erawh a la hnufual dawn a niang.

Rintei chuan pawnah chuan min lo la nghak ran a. Zawhna ngah tih hriat reng chuan a țhutna ațang chuan min lo en kar a, han sawi hmasakna tur ber pawh ka hre thiam lo.

"Kal ila" tihpah chuan ka va melh a. Mahse Davida khan khawnge maw ka helmet a dah daih le?

Almirah chungah hian ka va hmu ta ngât a, ka lak hnu chuan kan inzui chhuak nghal kha a nia.

"Engnge awmzia? FIR an thehlut tihna a mi?" a ti ta nge nge a.

"A ni ber ang chu hetia min lo koh tak si-ah chuan"

"Chuan engtinnge an tih che?"

"Khami zan khan damdawiinah i awm ngei  ni tih hretu pahnih lo hruai rawh an tia lawm"

"A harsa angem?"

"Harsa love a..Sawm pawh ti se a huphurhawm loh e, kan chhungte vek tho an nia"

"A țhat hlauh chu" a tih chuan amah pawh chuan min rinhlelhna a nei ta lo niin ka hria.

A mak ve hrim hrim, uluk deuha ngaihtuah chuan zawhna pakhat chhan huphurh zet mai ka nei a, chu chu 'engtik hunah nge damdawiin ațang chuan in haw?' tih hi a ni. He zawhna hi min zawt se chuan ka tan chuan tihvak ngaihna a awm lo. Ka țanhmun chu a phet viau ta ve ang. Mahse, min zawt miau si lova le.

"College-ah i let leh dawn em?"

"Aih, let tawh lo mai ang. A zia lo e, keimah vanga hetia i buai vak vak hi, a zahthlak bawk sia"

"A ho lutuk, ngai pawimawh duh suh. Engtham mah a nih loh hi"

"I tan hi chuan harsatna thlentu bak ka ni lo a nih hi tiraw. Lo in hre miah lo ila țha tur a nia"

"A khai a, em em țhin a.. Chuti zawngin thu an la ngai lo"

"Ka ti tak tak alawm, buaipui ngai satliah pawh ni mai lo, mualpho phah leh police hialin an kohphahna chu thil ho mai mai a ni thei lo alawm. Lawmthu sawi chi nge, engtia tih chi nge pawh ka hre thiam tawh lo"

"I ngai thupui lutuk a nih kha. Engtinnge, i haw nghal dawn nge?" ka ti zui a.

"Ka hre nang. Ka pa damdawi tur lei te chu ka ngai a. A! Nidangah a ni mai, vawiin chu kan boruak a dik lo emai engtihmah a phurawm loh"

"Chuan engtin zel..?"

"Ka hre nang, engtinnge nang i awm dawn?"

"Hnaah ka kal mai ang chu ka ti"

"Țha mai lawm. Kal ila.." a helmet a khum zet chu a hlip țha leh a, engtikah nge i chhungte chu i hruai dawn a?" a ti țha leh a.

"Naktukah a niang, chaweikhamah"

"Awle, a țhat chu" tiin a helmet chu a khum zui leh nghal mai a.

"A nih aw" tiin min tlansan zui ta kha a nia, lo leng la a tih ve te ka lo beisei ve em em a, a ho thei reuh mange ka ti.

A tukzing, tukțhuan kan eikhamah chuan Thana lam pan chuan kan inzui chho leh ta kha a nia, kan khingpui te pawh an lo awm ngei turah ngai ila, keimah ber hi ka sa leh phat mai ang tih chu ka hlau ang reng mange ka ti.

Rinloh deuh maiin inhnuailam motor dahnaah chuan Rintei a lo awm reng tawh mai a, a lo lan ka beisei lo viau asin mawle. A țha thove.

An pu ber pindan lamah chuan kan lut zui mai a, keimah ber chu min han chhuahtir leh rih a, engtin tak va sawi ang maw? Kan haw hun kha an sawi dik a, FIR thehluttu lamin a hun an hriat dik viau bawk si chuan awksa chu ka ni mai e.

Chutia pawnlama ka lo nghah lai chuan lo kal ve tura ka beisei te pawh an lo thleng zui ve ta kha a nia, damdawiin lama ka hmuh ber khan a rawn hova, midang pawh an lo tel nual mai.

A luh theih leh theih loh chu an han zawt a, constable pakhat chu an pu pindan lamah chuan  a tek lut zauh a, a lo chhuah leh chuan 'lo nghak lawk rawh u' a rawn ti kha a nia. Ka piah maia chairah chuan an țhu far a, a melh pawh ka lo melh hran lem lo.

Ka bula țhu Rintei chuan hrehawm a tih hmel kher mai. Han inhnemna khua a kaw mang bawk si lova le. Ti hian lo awm ve ngawt ngawt phawt mai teh se.

Ka chhungte ho an lo chhuah țham țham hnuah chuan min ko lut ve ta a, ka țhu fel zawt tihah chuan kutthak ka lo hnawih tawh leh ka hnawihbãng pakhat pawh chu an lo lût zui ve țham țham kha a nia. A nihna tak sawi chuan ka chhungte ho khan engnge an sawi kha ka va hre tawh bawk si lova, hlauhthawnna ka ngah kher mai!

"In FIR kha theih ang angin kan bawh zui a, thuhretu hrang hrang te thusawi kan ngaithla tawh bawk a, amah ngei hi a ni tih chianna tur in nei em?" tiin a han zawt a.

Chhanna a awm lo, an inmelh kual hrek hrek niberin ka hria. Kei ka lawmah a lo tla thung a, 'a bike chu chutiang khatiang chu a nia, a incheina pawh' te an rawn ti mai ang tih a hlauhawm duh kher asin.

"Sawitur in nei lo a mi? In rinthuin in rawn ti ve tawp tihna a ni maw?" chhangtu a la nei chuang lo.

"Thansiama hi tu ber nge?" tiin a zawt zui leh a, pakhat chuan 'ka pa' a lo ti thuai a. FIR thehluttu a nih ka lo ring ve ngawt a, ani pawh chu an kohlut zui ve ta kha a nia, ani pawh zawhna an han zawh chuan sawi tur nei chuang hek lo le. Ka arpa chan lai a ni ve ta, ka hawi larh ta mai.

"Fiahna sawi tur innei bawk si lo. Anni lam hian khami zan  khan Hospitalah damlo an menpui thu hriatpuitu tam tak an nei bawk asin. Chumi hnialthlakna tur thil chiang in nei a nih si loh chuan kalpui zui ngaihna a awm vak lo" a ti a.

"A hriatpuitu te chu an chhungte vek an nih chuan an ințan ve te pawh a ni thei asin ka pu" tiin Pu Thansiama chuan țawngkam a lo rawlh a.

"E ka pu chulamah chuan min vengthawng duh suh. Khami zana nurse duty nen pawh khan inhriatna leh inkungkaihna kan nei hauh lo, a duh chuan a sawi thei khawp ang, i duh chuan va zawt rawh" ka lo ti ve bawk a.

A ni reng bawk a, khami zan khan ICU kawta kan țhut țhap laiin male medical ward chhunglam a mite an rihlut a, kan zu tlanlut ve kha a nia, zu in a tih ât tawh pa sa țha lampang hi a lo buai deuh chu niin, midangin an hnaih ngam tawh si lova ka va bawhbet alawm le!

An Pu Thansiama ber pawh chuan mi a chhang zui ta lo chutah OC chuan heti hian a ti zui a, "In FIR thehluh dan fu lo deuh awmin ka hria, ani hi a hming lang meuhvin in rawn ziak a, khatiang tur kha chuan fiahna chiang tawk innei turah ka ngai a, țanfung mumal pawh in nei leh chuang bawk si lova, khatianga chiang lo tur si kha chuan a lehpek a awm a nih chuan kha 'issue' a kha chhuichian a nih theihna turin FIR in rawn thehlut mai ang a, rinhlelh in lo nei a nih pawhin zawhna an zawt tho tho dawn che u a, chutah chuan in sawi mai tur a nia.

Tuna inkalpui danah hi chuan a tuartu tan a lawmawm loh a ni. Defamation case ka file dawn a tia, hei kan lo inkhap hram hram chu a nih hi. In FIR hi kan tihtawp ngai lovin induh chuan in withdraw thei ang a, in lung a awi lo a nih chuan  court lamah in tlangpui zel thei ang. Intih dan dan a ni mai" a ti zui ta a.

"Sir, engemaw ka lo sawi ve thei ang em?" ka lo ti thuai a, 'Sawi ta che' a tih chuan min en țhap mai a.

"Hei, helai naupang pathum hian ka leng haw min lo khawih rawn tawh a, karkhat chuang mah damlo enkawl ngaiin ka bawhsawp phah tawh a, tuna an chunga thilthleng hi ka phuba lak ve naah an ngai ni ngei tur hi a nia, hmaichhanah pawh hian biru kher lova kan hlauh loh hlawm teh reng nen..

Chuta kut min thlak chhan pawh chu hei a lai țhu hian ka țhiannu Rintei vaubeta sex hmanpui a tum vang a nia, ani hi kut ka thlak a, kutthlak pawh ani meuh emawni a pumah ka kokiin ka su a ni ber. Chumi tlanhaw chuan a țhiante pahnih hi a va pun a, ka haw tur min lo châng kha nia. An la naupang a an insiamțhat ve mai beiseiin kha thilah pawh khan pawngsual emaw, kut min thlakna te pawh case kan  siam duh lo kha a nia. In la kal zel a nih chuan thildang pawh ka la sawi belh ang a, case kan file ve bawk ang, thil liam tawh zawng zawng nen kan inphawrh vek ang.

Insiamțhata ngaihdam dil chu sawi loh a inti mualpho zawngin FIR te  min han thehluh hnan vel chu a nia, inngam a nih chuan ka er let hi a na ve khawp ang" tiin ka țhu ta hmak a!

Pu Thansiama chu a lo dingchhuak thuai a, thupha a chawi nasa mai mawle. 'Kan nauten chutianga pawi an lo khawih a chunga hetiang thil kan lo kalpui hi kan thiam loh liau liau a ni. Min ngaidam mawlh rawh" tiin patling pui chuan min ngen kha a nia.

Police lamin zawhna min zawh kim loh zarah a vawtuten ek an cheh anih tak ber chu!

"FIR hi hnukdawk ula a țha a ni mai. Sir, ka kal thei em?" ka tia, a lu a bu nghut sia, ka chhuahsan nghal hmiah mai! An tih tihin lo ti ve tawh mai rawh se.

Ka chhungte min lo nghak chuan min lo en țhap hlawm a. "A țha vek e" tih zawng hi ka'n va sawi teh tawp a. Ka cousin te ho chu an lawm lo nasa mai a, case file ve nghal mai an duh a, mahse thil țul ber pawh niin ka hre lo. Kan indawr tawk vel viau a ni.

Kan kalchhuah dawnah chuan Pu Thansiama bawk khan min lo au ding leh a, a ngaite bawkin ngaihdam a nia a la dil ni.

Rintei chuan scooty a ken loh vang chuan an college thlengin ka va dah leh a, kalkawngah chuan kan inbe miah lo. A chhuk hnuah erawh chuan eng eng emaw a sawi deuh țeuh mai. Mahse, ka hlata awm a duh miau vangin chuti teh chiamin bengkhawn angin ka lang hran lo.

Chu thil thleng chu lak kiana awmin, harsatna min siam tawh lo turah ka ngai kha a nia. Mahse, lo en zel teh phawt..

A tu a nen mah buaina kan nei zui pawh a ni lo. Buai zui chu sawi loh zanah kan inlamah chuan an nu leh pa te an rawn kal a, ngaihdam an rawn dil hial kha a nia. Anni nen kan inkarah chuan harsatna a awmzui hran lo.

Buaina dang lo irhchhuak leh ta chu Atluangi te in lama palai, a vawihnihna atana thawkchhuak leh ten an rawn hawn ta tlat mai kha a nia! Huiham, a va manganthlak țhin ve mawle.

"A lawmawm lam kan la hawn thei lo a nia tun țum chu. Engnge ni kan tlangval hian Police lam koh te a lo tawk deuh em ni? Chung vel te chu an han sawi a, engmah kan lo hre ve bawk si lova..Kan va kut chi lo hawi ta vel mai mai alawm mawle, beidawnga lo haw phei chu kan ni lova" tiin ka nu u chuan a sawi a.

Keia computer games khel laklawh pawh chuan ka bengkhawn lo thei lova, engnge awmzia ni țhin le?

"Engemaw buaina chu kan nei deuh kha chu a nia. Mahse, inneih khâm tur em chu a ni lo asin maw. FIR pawh an hnukdawk leh daih kha a nia" ka pa chuan a lo ti ve mai a.

"Eng chungchangah nge ni reng reng a?"

"A, mi kutthlakah an puh deuh a, engmah chutiang a awm lem bawk si lova, kan in lam thlengin a nih kha ngaihdam min rawn dil chul ni"

"A nih chu mawle. Engmah kan lo hre ve bawk si lova. An sawi hmangah chuan hmeichhe chungchang niawm tak te khan an sawi a, chu chu an hel pui deuh ber a nih hmel a" chutihlai chuan ka phone ka han zawng a, ka hmu mai si lo. Ka pindan lamah ka ve en a, lukham bulah chuan ka lo dah reng chu lo niin.

Ka han hawng chu miscall a lo tam kher mai! Vawi 20 chuang mah hi Atluangi miscall a lo awm pek a!

Khuma tlukzal pah chuan ka call zui nghal kha a nia, a la tawh dawn lo emaw ka tih hnuah a rawn chhang ve hram a, hritlang na tak aw ang maia ril hian min rawn chhang a, a țap zawk nge mawni nghe nghe le.

"Ngatinge phone pawh i lak duh loh?" a rawn ti nghal a.

"Thil ka lo ti laklawh lutuk a, pindan lamah ka lo dah daih sia" ka ti ve mai a.

"Engngatinge engmah i sawi ngai loh? Eng  thil nge thleng hi? Engnge awmzia?"

"Eng maw palai ho in lo hnar chhan chu han sawifiah phawt teh"

"I thiltih vang a niang chu eng thil nge i tih zawk sawi ta che?" a rawn ti let fahran a.

"Mi thlavang hauh hi thil sual a ni ngai em ni? Engnge chutiang mai maiah buaina tur a awm a mi?"

"Mi thlavang hauh ringawt maw?" a tih ka chhan let hma chuan a nuin phone chu a chhuhsak ni ngei tur hi a nia, ka hmingpum chuan min rawn ko ta fak mai le.

"Lo be buai duh tawh lo mai rawh. Hmeichhe dang buaipui chungin kan fanu hi nupuia neih te i tum a maw? Nanga hmei mai mai atan kan phal lo. Police-ah case te i neihphah hial a ni law mi? Vawikhatmah lo be tawh suh ang che" tih leh phone hmehhlum chu a rual a, tihngaihna hre hek lo. Ka phone chu ka en tlawk tlawk ringawt a.

A hnu deuha ka nu lo lut chuan "Lo chhuak la, saw i pu te pawn an be duh che a" a rawn ti a.

Ka tho vut a, ka va chhuak zui mai kha a nia. "Kal nawn a ngai tawh lo. Tikhan a tawp a ni mai" ka va tichhuak ngawt a.

"In inbia mi?" ka pu chuan a lo ti thuai a.

"Aw be zo chiah, a nuin min rawn vin hrep lehnghal a, thilchiang engmah hre ngawt lova khatia min rawn tih fahran ni. An fanu lo pawh hi nupui tur te chu ka hmu ve awm emai a"

"A khai a, chutiangin a bawplawkah thu an la ngai lo. Țha te tein kan indawr ang a, thil a kal fel leh mai dawn alawm, thil awmzia an hriat loh vang zawk a nia. Kan inhrilhfiah mai dawn alawm" ka pu chuan a lo ti leh mai a.

"Hrechiang lo chung pawhin khati khawp khan min țawngkhum duh a nia, tikhan an chhungkaw zia tur awm ang chu a lang reng tawh alawm. Kal buai a ngai tawh lo"  ka ti hmak hmak a.

"I pu sawi te pawh chu han ngaichang ve phawt la mawle. Ngaihtuahna so butah hian thutlukna siam zung zung țhin loh tur" ka pain a lo ti ve bawk a.

"Chutianga harsatna awm thei ni a an hriat te chuan mi kâ ațang ringawta hre lovin mi te pawh lo zawt chiang ve ang hmiang, engamah hmaa ral ațanga thutlukna siam kha a dik lo hrim hrim alawm" ka la ti fan a.

"A ngawiteh u, zanin tut tuta thu han pawhchah chi pawh a ni lem lo. Kan boruak a kal fu lo laklawh a nih hi nakzan lamah rilru fimin kan ngaihtuah thei zawk ang" kan țhenawm pa chuan a lo ti a. Ani hi ka pu nena palaia kal dun an ni.

"Kal a ngai lo, chu zawng chu a ni mai" tiin pindan lam ka pansan nghal daih a.

Engtinnge an sawi zui a, engtia tih nge an tum tâk chu ka hre phak ta lo. Kal nawn leh rel pawh ni se hnaivai tak chuan an chet chhuah duh bik chu ka ring hran lova, hun engemawti chhung an rial ve turah ka ngai ngawt mai.

A hrim hrimah engtinnge khatiang thu khan an beng a lo thlen theih daih le ka ti. Ka ngaihtuah ngial pawh hian vengkar a hla bawk sia khatiang hre tur kha chuan hrilhtu an awm a ni. Nge ni, FIR thehluttu te lam nen khan an lo inhnaivai viau zawk emaw ni dawn le? Chuti a nih chuan ka chanchin chu a țha zawngin an hre hauh dawn lova.

Mahse, engngatinge Atluangi pawn țhataka min zawh ve mai loh le? A hmain a hre lo hrim hrim nge niang, hre reng chungin buaina a lo cho ru reng zawk?

Ngaihtuahna mumal lo zet pu chuan khumah chuan ka let ka let ringawt mai a, ka ngaihtuah chian poh leh palai vawihnih kal tawha hlawhchham kha miin a bulthum an hre ve dawn bawk si lo. A zahthlak hi ka ti lutuk. Awmngaihna ka hre meuh lo chu a ni e. A chang leh rizai te chu ka han seh leh ngawt ngawt țhin a.

'Engkim hi ka tuar vek mai ang, nangpawhin ka tan i tuar alawm tiraw?' tih message ka dawng a, chu chu Rintei lo thawn a ni. Rilru mangan lai lai a, hnemngai dang lo la awm belh chu a lawmawm viau loh. Chhan pawh ka chhang duh ta lo kha a nia.

A awm awmin lo awm ve phawt mai teh se, amah vang hian harsatna ka tawk ve ta nual chu a nih hi maw. Hmeichhe fuihphur chawp ngai, zikngui reng mai kianga awm zawng a hahthlak emai.

A tukah pawh chuan nilengin ka chhuak duh lo lui a ni ber mai. Miin an hre ngei dawn sia, a zahthlak mange aw...

Zanthum a ralna chiahah Atluangi call ka dawng a, ka chhang lem lo. Message lo thleng pawh ka chhiarsak ngai lo. Chutiang chuan ni hnih dawn lai a rawn ti a, ka lak ațangin chhanna a hmu ngai lem lo thung.

Mahse, a tuma tum na na na chuan midang phone a țangin min rawn be ta thova, keiin a number ringawt ațang chuan hrethei ngawt bik hek lo le!

"Thil awmzia pawh engmah sawifiah i tum dawn nange?" tih lam hawi zawngin a ni min rawn biak ni. Ka sawifiah a țulna pawh ka hre hauh si lo. A duh ang a sawizawh hmain ka hmet hlum daih asin le.

Chumi tuk zan chu a ni mai thei Rintei te veng lama engemaw țul ti a ka kal kha, a remchang em a ka'n tlawh ve hrim hrim teh ang tiin an inlamah chuan ka tlan kual a, an kawt ka thlen chuan an in chu a lo in kalh țhap mai a, zanah te chuan an awm ka rin vei nen khawiah nge maw an kal le? tiin an kawmchhak te chu ka han zawt kawi ve mai mai a.

"Ka pi inkawmthlang tlangval te hi khawnge maw an kal le?" ka va ti ve mai a.

"An khaw lamah a haw a, a nau a boral a.."

"E a nih tak chu, an pahnihin an haw tihna mi a nau nen khan"

"A.. heta a awmpui țhin kha nia boral chu"

"Rintei maw!??"

                           Chapter

                               - XII -

Chulai hmuna ka kal kher kher chu ka ti fu lo mang tak e aw..

Chu thil thleng chuan ka nunram a vaw chau tak zet, manganna belhchhah tur tingin phone ka han tum ngial pawh a phone chu richhuak tur a awm bawk si lo.

Ni engzat chhung nge a number-ah khan biak tuma ka call tak le? Tu emaw tal chuan min chhan ka ring țhin asin. A chanchin zawh chianna tur tal pawhin. Mahse, chhan chu sawi loh richhuak tur pawh a awm ngai si lo.

Hna te chu ka kal ve hram hram a ni ber mai. Theih chu ni se Rintei te khawlama zin ka duh ber, chu lah chu police lamin thlakhat chhung chetchhuah min khap sak bawk si.  Aizawl khawpuiah hian ka leng lo a ni ber mai.

Inneih kan țhulh boruak mah rih tawh naklaia chutiang teh hrepa nun ka hmang chu a va han vanduaithlak teh kher em!

Zan lamah mut ka hmuhțhat vak loh vang hian chhunlama hnathawhna hmuna han mutthluk mai hi ka hrat viau a, rei phei chu ka muhil thei lem hlei lova.

Nikhat chutia ka mutthlu leh chu tuemaw hian min lo kai thova, ka han hawichhuah chuan Atluangi a lo ni a! Hm, ka va mamawh lo kher em!

"Tinge min biak duh ngai loh a, biak che ka mamawh a sin"

"Sawidun tur kan nei hleinem, engmah"

"Hun pawh min pe dawn miah lo maw!!?"

"In mamawh lo"

"Hun mamawh lo an awm ngai a mi?"

"Engatan mah in hmang chuang nang. A hma pawhin hun in nei a, engmah in ngaihven duh chuang hleinem"

"Chutiang ringawt a ni thei hleinem"

"A ni thei a niang chu in hmang țangkai chuang hleinem. I nu khan 'biak pawh lo be tawh suh' min ti ve sia, engngatinge a fanu hi a lo lan leh si a..!?"

"Thil hriat dik loh vang a nia..."

"Thudik hriat tumin engmah in ngaihven chuang hleinem, tikhan ka laka in rilru puthmang chu a lang reng tawh alawm"

"Ni lo, chutiangin ngai suh. Ka phone che a i la thei bawk si lova.."

"A hmain hun a tam lutuk ringawt"

"A hmain engmah ka hre ve lo, palaite an lo kal khan ka hre ve chiah"

"Ka awih ring duh suh"

"Dawt ka sawi lova sin, khawngaihtakin min ring rawh"

"Engtinnge i nute khan an hriat si?"

"An hriatdan lehzel ka hriatpui tawh bik hleinem, engmah ka bulah an sawi bawk si lova"

"Hm.. sawi thui duah pawh a ngai lo. Tikhan kan inkar chu a tawp fel a ni mai, min kalsan rawh" ka ti tawl a.

"Ka thei lo alawm, khawngaihtakin"

Dawhkan bawh chuan ka awmsan zui leh mai kha a nia, muthilh leh chu khawilam hi a ni ringawt. Ani lah a chesawn duh bik bawk si lo.

Mutchhuak mang bawk si lo chu chutia awmreng theih ni hek lo le, 'I la awmdawn a mi? Ka haw dawn nia' ka ti ta ringawt a.

Ani pawh chu a lo ding chhuak ve nghal thuai a, "Puia, ka hmangaih che" a ti zui sap a.

A koki tawna dawm pah chuan ka en ren rawn a, "Keipawhin ka hmangaih che. Mahse, nang ka hmangaihna che vanga ka tawrhna hi tawk tawh rawh se" ka bag lain ka kal nghal nal nal a, engtinnge a awm zui lawh ka hre tawh lo. Ka tlan haw chak hle tih chu ka hrechiang hle a a ni mai.

Nî hi ka tan hian a mumal hleithei meuh lo chu a ni e. 'Damchuan' tih leh țhin ringawt pawh hi a ni lo.

Zankhat chu Hriatpuii'n min lo bia a, Atluangi damdawiina a awm thu chu min lo hrilh ve ngei a, kaldunpuiah te mi la sawm tak deuh deuh a, ka kalpui hmel loh viauin ka hria. A damlo a ni ve mai e. Damlo zawng zawng tlawh kher ka ba pawhin ka hre lo.

Chuta chin chu thawm riva an rawn nei ta lo kha a ni a, ngaihtuah chhuah chang chu awm tho mah se a thawven thlak deuh.

Hriatpuii'n min lo biak ațanga a zanthumna vel a ni awm e ka lengchhuak ka nuin min lo phone kha.

"Puia, i lo haw dawn tawh em?"

"Dawn pawh ka hre hleinem, engngatinge?"

"A, hei inleng kan nei a"

"Tu te nge, keimah min hmu duh maw?"

"Atluangi nu leh pa an nia, hmuh che chu an duh khawp a.."

"Ka kalna a hla asin, lo thlen mai theih pawh a ni lo, țhiante nen kan ni bawk sia, tikhan nangmahni khan lo chhang mai ula, ka rilru in hre vek tho alawm. Ka awm kher a ngai lo" ka ti deuh duah a.

"A, tun țum chu a thu a dang deuh a ni. Ngaihdam dilin a nia an lo kal ni"

"Vel mai mai chuan a, inneih lam kha lo sawipui lo ula, a bak kha chu in duhduhin chhang mai rawh u"

"Lo haw hma chu tum hrim hrim la thilpawimawh vak inti te a nih loh chuan"

"Aw, ka lo tum dawn nia. Mahse, hma ka ring lo zawk aw, min lo nghak duh suh se, tih khan nangni'n in lo dawnsawn khan thu a puitling zawk ang" tiin kan inthlah ta kha a nia.

Haw chu châk lem lo tak ka ni. Vengdanga lengchhuak phei chu ka ni hauh lova, duh ila chuan haw mai thei, minute rei lo tea thleng mai tur ka ni a, mahse, an hmel hmuh ka peih loh vanga chhuanlam dap ta kha ka nia. Ka thin a rim thar leh hluai phei chuan a mualpho thlak mai mai thei ve tlat.

Dar 10 pelah chuan ka haw ve ta hram a, ka chhungte chu an lo mut vek tawh ka rin nen ka nu a lo la meng mauh mai pek a, hre chak lo teh mah ila an thu leh hla chu ka ngaihthlak hmel ta riau mai ka ti.

Ka zungzo chu a bulah chuan thuawih hmel fe hian ka va țhu zui ve mai a. Ka nu nen hi chuan kan inpawh ve hrim hrim a, inkhel en hi a hrat vei phian a, kan pahnih hian zan reiah pawh kan en dun fo mai. Chutiang a nih vang chuan thil han sawiho kawngah emaw, thuchhia leh țha-ah harsatna kan nei lutuk hran lo.

"Nu, engtin maw zanin in inleng te chu?"

"A, thupha an rawn chawi a ni ber ang chu.  An rindan ang leh an hriat ang kha engmah a lo ni si lova, an rilru a hrehawm ve deuh a niang. Mipangai tak chhungkua chu an nih hmel viau kha mawle"

"An sual hran lo. Mahse, hmeichhe lalna hmun a nia, felfai țhulhin lang mahse hmeichhiain thu an neih viau chuan duap ru lai hi a awm leh nge nge țhin"

"Ka ring deuh a, an pa țawngkam kha a țha duam duam em a, ka ring dik chiah a nih chu"

"E khai, palai an kal nawn zana ka va biak pawh khan nasa ve tak mai a nia, an nu zawk kha. A hma te kha chuan a kâ pawh zen ila min seh lovang tih tur khawp kha a nia, khami zana min han ankhum kha chu an fate kan chilhlum ta mai emaw tihtur khawpin a nia min ankhum duh ni"

"Hmeichhia hi kan lo mawl a nih hi. Kan sual tiila a dik ber zawk ang. Kan hum lo hi kan dai mah mah țhin ve bawk a, chhungkua a lalber emaw intih tlat te hi an mawng an hlimna a ni tih an inhre duh der lo. Pasal te duh duha chawk kual thei neih hi intihtheih nan tak te zu hmang duha mawle. Kei chutiang pasal chu nei ila a sawi pawh ka sawi ngam lovang"

"Hmeichhe țha lo ngang hi chu an awm ve lawm. Mak ka tih ve mai mai țhin chu hmanlai ațang tawhin hmeichhia hi mi inah inlawi țhin a, mo nih hrehawm zia, mitmei veng reng reng leh thlamuang lo deuha hun hmang țhin an nih zia hre reng chung hian fa mo an han nei ve a, 'keini pawhin hrehawm kan tih țhin kha maw' tih rilru pu duh hmeichhia an awm hauh lo hi nia mak ka tih țhin chu"

"A dik ve tho mai. Mahse, tunlai mo te hi chu a ngaihna an awm lo ve bawk em a ni. Hei i u nupui ațang pawh hian i hre mai ang chu"

"A ni ngawt mai, in sawisel lo thei zawk hi ka tia. Ka u pawh hi a inthlahrung lo emawni ka ti țhin. Zingah a tho hma ngai bawk si lo. Naupang ni se nangni'n inbuaipui sak deuh vek a, an chhungkaw bil te chauh pawh hi a enkawl thei lo a nia, hetiang teh hrep hi ka nei ang tih ka hlau a nia"

"I u te chu engmah ngaihtuah hek lo mawle. Han indang na se chuan a rethei khawp ang. An nu te inlamah an lawi zur zut anga chu zawng chu a ni mai"

"Ka mu dawn nia, min lo nghak a mi?" tiin ka ding uai a.

"Nghak deuh tho e, eng lo a nia, Atluangi kha a damlova tunah damdawiin lamah an enkawl mek a, doctor ten a taksa chak lo lutuk a niang te an tia, a chhan mumal an hmuchhuak thei si lova an rawn tia. An lo țahawh deuh che a.."

"Tehngawt chuan a.."

"A lam țhin che a niang"

"Min mamawh hunah chuan an inphahhnuai hreh leh hauh si lo!"

"A khai a, chuti zawng ringawtin ngaihtuah țhin lo la. A dam zawng te hian ngaihtuah ve țhin tur. Tumah famkim kan awm hleinem"

"A runthlak ve em bawk alawm. Nangpawh ni la i tlawm reng thei bik lovang"

"A ni thova, mahse, midang i va buaipui san tak tak thei pawh a ni chuang lova, tlawmzawkah i țang tihna pawh a ni chuang hleinem. Anmahni zawk a nih hi tlawmzawka țang chu"

"A damloh an mangan vanga a rilru damna tura lo inphahhnuai bak an ni nang. Damțha ni se hetiangin an awm awm lo e mai"

"Khatiang rilru i put tlat chuan anmahni ang chauh kha i ni tihna a ni mai. I tihtheih loh zawng tak mizia ang kha i nei ve reng tihna a nia. Chungnung zawk i nihna lantirna tur chu ngaidamtu i nihna kha a ni asin"

Chhân ngaihna vak pawh ka hre lo. Nu te na na na, thluakfim leh lungfing zawka ngaihtuah ta chu ka khan lo khawp mai. Ka hnial khãn hriat zawng zawng leh țanfung awm thei zawng zawng ka dap hnuah pawh dam deuhin min chhang thla zel tho.

A tawp a pindan ka luh dawna a sawi tâk chu, "Naktukah kan pahnihin kan han tlawh dawn nia" tih a nih zui tak hial kha.

Damdawiina han kal ve kher chu țul pawh ka ti em em hran lo. Mahse, ka nuin a tih erawh chuan hnial vak ngaihna ka hre leh dawn si lova.

Atluangi chu ka ngaihtuah lo pawh a ni lo. Ka rilru luahtu tam ber pawh a ni. Mahse, an khawsak dan vang hian rilru hel hi a awm lo thei si lova. Chu chuan min ti luhlul zual te pawh a ni mahna. A lungna a chhuak a nih ka ring ve ringawt a, a chhan chu a pa sawi hi ka hre tawh a, a tetlai hian a lunglam țha lo vangin an buai hrep tawh a ni awm e. Kan boruak hetiang a lo ni chho ve bawk nen a lo lang leh a nih ka va ring em!

A tukah chuan tukțhuan eikham hlim teah ka nu chu phur lo zetin ka phurchhuak ta kha a nia, a nu hmel a ni ka hmuh peih loh ni.

Cabin-ah an lo awm a, a nu chu ka hmu hauh lo. A pa erawh chu a awm. A cousin niin ka hria hmeichhe pakhat lo awm ve hi, ka chiang lo.

A taksaah chuan eng engemaw khawl thil vel hi an lo vuah thleh thluah mai a, oxygen an pe mek bawk. Chutiang tehhrepa hmuh chu ka inring chiah lo asin mawle. Ka ni deuh nghulh mai ka ti.

A sambu chhah zet mai chu a delh pawr deuh hiang a. A cher hman viau bawk. A biang ki te pawh a lang hial asin. A hmel dâng lêp mai chu hmuh nuam a ni hauh lo mai.

"Ate, hei Puia a lo kal a..." tiin a lo awmpuinu chuan puan sin țhattir pah chuan a han hrilh a.

A lo meng diar diar a, a bân chu muangchang hian a lo dahchhuak a. Chutiang hunah meuh chuan intihluhlul chu a va har si em! Ni, ka hmangaih kha a ni miau si a.

Khumtlanga țhutpah chuan a kut chu ka dawm sak a, muangchangin a maimitchhing leh riai riai a. Sawi tur pawh ka hre lo.

Ka nu leh a pa chu pawnlamah an țhu chhuak daih a, engemaw sawi an duh te pawh a ni mahna le. A lo awmpuitunu chu a fel khawp mai, mi a be siam siam a, a dinhmun te chu a hriatthiam dan ang angin min hrilh ve bawk a. 'I hming ringawt a lam a...' tih chu a tlipna atan a hman a ni.

Chawhma zet chu kan awm ta awm e. Chumi chhung chuan vawikhat mah a rawn meng tawh lo. A kut nêm leh vawt deuh thler chauh chu a ni ka chan ni. Nilenga awm ngawt theih a ni si lova, kan nufa chuan kan inphur haw leh ta kha a ni a, rilru erawh a hahchawl lo em em thung a ni.

Ka nu chuan, "Han dam țha sela, inneih lam te pawh kan hawi dawn nia" a tih chuan ka phâwk kher mai!

"A engatimaw?" ka ti deuh hu a.

"Aw, harsatna tur engmah a awm tawh hleinem" a ti ve mai a. "Tikhawp hian a duhin a hmangaih ve che a, nanglahin i duh lo pawh a ni lova, engemaw harsatna vang mai mai a tihsukuk kha a țha ber lo" a tih zawm leh a.

A dikna chen chu a awm ngei ang. Mahse, ka la hmin chiang thei meuh lo chu a ni e.

Vawihnih vawithum lai chu ka tlawh hman awm e, ICU lamah an dahluh tak vangin han kal mahila amah a hmuh thei chuang lova tiin ka tlawh duh ta lo kha a nia, a nu ka hmu peih vak lo a tin ni.

Chutia hmuh theih bawk si loha a awm takah chuan 'ka zin thawveng dawn' tiin ka chhungte bulah chuan ka sawi a, ka kaltumna ka sawi chuan mak an tih hmel kher mai! "Hmelhriat i nei a mi?" tih chu min zawhna hmasa ber a ni.

Ka țhiante an awm thu chuan ka chhang ve mai a, kal lo turin min duh zawk vek a nih hmel. Mahse, Rintei thlah liam lova hun hman chu ka thei si lo a ni.

Police lamin min khapbehna pawh ka haider ta ngawt dawn a nih hi. Eng em kan ti tawh lovang chu.

Ka nu lah chuan mi han ngaihtuah fâl khawp a, "Bike keng suh, sumo-in kal rawh" te min tia, motor ka ruih hma țhin vangin chu erawh chu ka hnial fithla thei ta hram. Zanhnih ka riak anga ka lo haw leh nghal ang ka ti kha a nia.

Tichuan, hakthlak pahnih khat nen tukțhuan eikhamah chuan ka bike țawngțawl lam tawh hmangin ka inkhalhchhuak ta kha a ni a. Phûr serh sawrha chhuah chu a har mange aw.

Tluangtaka ka kal theih chuan zanriah bawp nang hman tawk velin ka thlen theih ka ring a, muangchang lutuk lo, hmanhmawh si lova ka tlan theih chuan.

Kawnglaka chutia mahni chauha han tlan tak liah liah mai chu a khawharthlak duh kher mai. Eng ti tur berin nge ka kal tihte chu ka theihnghilh chang a awm hialin ka hria. Chutiang khawp chuan a ni ka ngaihtuahna a vah thui țhin ni.

Kawnglakah vawikhat ka insil dai a, chumi lo chu khawchhungah chuan chhuna thil ka eibak ka chawl khawmuang lo kha a nia, tlai dar 4:00 velah chuan Rintei te khua ngei chu ka tlan lut ta hlawl mai a.

Thlen thuai thuai ka duh rualin ka va huphurh si ve mawle.

Puitling ka hmuh hmasak ber chu Rintei te in chu ka han zawt chawt a, a han ngaihtuah vang vang lai chuan 'A nu chu nurse' ka lo ti zauh a. A hrechiang ta a niang a kaldan tur kawng nen lam chuan min kawh hmuh zui ta a.

An inah lo khawnge ka thlen chuan ang? Hmelhriat dang ka nei a zeng pawh a ni law. Inthlahrunawm lo turah ngai ang.

An in lan theihna ka thlen chuan ka han ding det a, 'sawtah sawn hlimtakin a awm țhin awm si a' tih ringawt chu ka ngaihtuah a. Tlan let leh daih mai te pawh ka duh rum rum mai ka ti.

Mahse, chutiang ngawt chu a ni thei bawk si lo.

Muangchang chuan ka tlawhlir phei zel a, an in chu concrete rawng hnawih lo lian zet mai hi a ni a, a chung zawlah chuan iskut vel an ching nge ni thlai niawmtak a zam dul mai a, kawtzawl pawh an nei remchang khawp mai.

Kawngkapui lo inhawng huau chuan min hîp lem lo. Mahse, ka luh ngei a ngai bawk si.

Kawtzawla bike ka hun rem lai chuan nu pakhat hi a lo chhuak a, ka hriatzawng a ni hauh lo mai ka ti. 'Ka pi, hei hi Rintei te in a ni em?' ka lo ti thuai kha a nia.

"Aw ni e, khawi ațangin nge i lo kal?"

"Aizawl ațangin, a țhianpa ka nia"

"A nih tak chu, lo lut rawh. Kan chanchin hria a lo kal i ni em ang chu maw!?"

"Aw, ni deuh ber mai" chhan vak ngaihna pawh ka hre lo. Inchhungah chuan kan inzui lut ta kha a nia. Nutling leh patling pali panga vel tur hi an lo awm țhap bawk a, a nuin mi han hmu chu a lo dingchhuak hluai a 'E he, Puia lah ni rengin' tiin min rawn chibai thuai a.

Mahse, a awki erawh chu a zuai rang kher mai!

An boruak ka tihdik loh sak ta vek dawn a nih hi mawle. A va han zia lo em. Mahse, tihdan dang ka hre bawk si lo. Midang lo awm ve te pawh chuam min chibai liam liam hlawm a, thingpui te ka in zawh hnu chuan kawmcharah lamah a nu men deuh pur mai chu inbual turin ka kalsan ta a.

Ngaihtuahna a va han vak thui duh ram ram ve mawle.

Ka inbual zawh chuan a la hma deuh bawka tiin thlanmual lam pan chuan midang pawh hruai duh lovin ka chhuak zui nghal a, ka mittui chu a la tla em lo, mahse ka va na si em!

A thlan an hungna thingtuai bawh chuan reingial ka inngaihtuah a. Thinlung mitthlaa chamreng tawh tur thlanlung fawmchawp tih hriatreng, tereuhtea thu inziak chu hei hi a ni.

Lalrinzuali

K-20

Tn-12.8.2004

Thimhlimah chuan a țhiante ho an lo kal khawm țak țak a, a nu hovin rei vak lo chu an han thum leh hak kha. A hrilhhaithlak duh teh a sin.

An haw tur chu pakhat hian lehkhathawn niawm tak, mahse envelope a inkhung pawh ni lo. Stapler-a inchilh ve thlap si chu min pe ru zauh a, chu chu Rintei thuchah hnuhnung a ni ngei ang le. Mahse, ka chhiar ngam dawn em ni?

A nu nen chuan kan ti ti dun ta reng a, a fanu nena kn inkar erawh kan sawichhuak miah lo. Inngaizawngah min la ngai a ni ngei ang.

Mutura kan insiam lai chuan phone call ka dawng a, Hriatpuii a lo ni a, a thu rawn sawi chuan min va țhawng si em! Ka phone ka thlauh teuh kher mai!

"Engnge ni?" tiin Rintei nu chuan phone ka dah hnu chuan min rawn hnaih hnuai a.

"Ka țhiannu tunmai khan lungna vangin a boral!" ka ti hul hak a.

"Awi haw, a va han zia lo ve mawle. Helamah i lo thleng chauh a, a va mak mawlh mawlh dawn ve!"

Haw leh nghal mai chu ka duh a, Mahse, anmahni zawk chuan "kar hla tham si, i lo thleng chauh bawk sia i chau lutuk ang, tawhsual tawh palh te pawh a hlauhawm, zanin han mu hahdam zet la, naktukah zingah in kal dawn nia" an ti kha a nia. Rintei u chu min zui turin an ti fel thlap leh nghal a! Ani Aizawl lama kir leh a lo hun tawh bawk nen.

Mahse, ka muhil lo chiang kher a sin. 'Lalpa, engnge ka tihsual tak?' tiin ka chhuahchhal hial kha a nia. Ni, ka mangang ve bawk em a ni.

Khawvar hma hret chuan Rintei nu chu a lo thochhuak a, a fapa a kai tho zui a, thingpui te kan infel chuan khua a var zui a ni mai a. Ani'n Rintei scooty a khalh a, keiin ka bike, anu bulah chuan 'ka lo kal leh ang' tia intiam chungin kan inzui chhuak ta a.

Ka hmanhmawh zia min hriatpui bawk a niang kawng a chhe lem lo bawk a kan thleng har lo kher mai. Dar 11:00 a ri vel chiah niin ka hria in ka luh khan.

Ka nu te chuan engmah an lo hre lo chu niin. Ka han sawi chu kei ai aiin an phili zawk a, ka intihfel hma chuan min chhuahsan hman hial niin ka hria. Ngaihtuahna mumal ka nei thei bawk si lo, sawt mang silovin ka tei ka tei ringawt mai a, theihnghilh nei hauh si lo chuan ka'n zawng leh rih țhin a, Atluangi te in ka thlen ve meuh chuan thla an lo la dawn ruai tawh hi a lo ni a. Engnge maw ka'n tih kawi le?

Mumang ang deuh ruaiin ka awm niber hian ka hria, mumal pawh ka nei meuh lo. Ka mut a chhuak bawk si, ka ril a țam bawk sia, thla te kha ka lakpui ve chuan ka hria, ka nu leh pa te nen kan lakpui nimaiin ka hria, ka chiang tawh lo.

Ka harh leh meuh chuan ka khumah ka lo mu der tawh a, zan dar 10 a pel tawh. Ka chau tawngkhawng ka lo muhil a ni ngei ang le.

Ka nu chu ka khum bula chair ka dahah chuan a lo țhu reng mai a, lehkha a chhiar niin ka hria. Ka thawm hriain a lo kal hnai thuai a, ka pang te chu a rawn dek a, 'I mut ala chhuak em? Nge, i inphihharh dawn?" a ti a.

Ka chhang hran lo. Engnge ka chunga thleng chu a ni ka ngaihtuah zawk ni.

"I ril a țam em?"

"Umh țam, mahse ka eipeih lo e"

"Ei e, ka va siam dawn mi?"

"Aih, nakin deuhah le" a chhuaklui ta thova, a lo let leh chuan bawnghnute hi novin a lo chawi va va a. Ka tlak ve pawp kha, kawruak lutuk chu a zia ta deuhin ka hria.

"I u in chawei a siam a nia" a ti zui zat a. Ka u nupui a  sawina a nih chu.

"Ka eipeih lo mange a. Engtinnge vawiin khan - mumal pawhin ka hre meuh lo?" ka ti zui a.

"I taksa chak lo a niang, i zinchau ve bawk sia, i tlu a, kan phur haw che a nih kha. Kha drip te pawh kan khai kha" a tih chuan ka thosilen ban chu ka han en chhova drip khaina chu a lo awm tak tak a!

Chaw ei tur chuan ka nu chu ka zui chhuak ta a, ei loh aia ei an tih ang chauh a ni. Ka eitam lo kher mai. Kan u lah chu a lo mu leh hman nge ni hmuhzui tur pawh a awm lo.

Ka nuin ka chaweina a tihfel hnu chuan reivak lo ka pindan lamah chuan kan ti ti leh a, ka pa pawh a rawn daklut ve zawk. Mahse a awmrei hran lem lo. Ka nu pawh chuan an pindan lam panin min kalsan ve leh ta a.

Mut chhuak mawlh hek lo le, ka tho chhuak leh a, tukverh hawngin chair chu ka pawt rem a, thla engruai hnuaiah chuan hla taka khaw pakhat de sep sep chu ka thlir reng a.

Chutia mahni chauha awm a rilru lapengtu an awm tak silovah chuan mahnia inngaihtuah ngut ngut chu ka tih theih tawk a ni leh mai. A dam zawnga ngaihtuaha hmalam hun thlir chu harsa tak a va ni em!

Engkim chu a bul ațangin ka chhui chho ni ber hian ka hria, Atluangi nen kan intawndan zawng zawng te, Rintei ka nuna a lo lan dan te pawh.

Ka hrechhuak thut; kha lehkha Rintei țhiannuin min pek kha.

Ka bag chu ka han hai nghal rawk rawk a, a pengah chuan ka lo dahlut mai kha a ni a, chhiarna hun awm nghal hek lo. Ka lo theihnghilh tituai hman a ni awm e.

Chu lehkha chu chhiar chak viau e ti lo chuan ka va han huphurh si ve mawle. Mahse, ka chhiar tur a ni miau mai si.

U Pui,

He lehkhain i hnen a thlen meuh chuan keichuan thlafam țumkawng lamtluang chhuiin ka chatuan hmun tur ka pan tawh ngeiin ka ring. Chu hmunah chuan lei lungngaihna te awm tawh lovin rauthla tala lung ka rualpui che a nih chuan ka lawm tawk em em ang.

He lehkha hi ziah ka tum lo. I tan leh midang te tan pawh harsatna thlentu mai a ni ang tih ka hlauh vangin ngawih bopui mai ka thlang țhin a. Mahse, he mihring rilru hian thiamchan ve a chak a, engmah ni si lovin famkim a lo tum țhin a nih hi maw. Buaina leh harsatna, i chungah leh midang te chungah he lehkha vang hian thlen lo hram turin ka ngen che a, damchhung piahlam nun thlengin ka ngen nawn leh nang che.

Ka nun hi nangmah vang liau liau a pawhseia awm a ni tih hi ka theihnghilh ngai lo a sin. Kawngdik min kawh hmuh a, nundan țha min zirtir lai khan ka ta emaw ka ti che a, midang ta ni a ka hriat loh che vang khan 'ka duh zawng i ni lo' te pawh atthlak takin ka ti ta hial awm e. Mahse, ngaihzawng i nei a ni tih ka hriat chiah khan ka hmangaih zia che ka hrechhuak a sin! Mahse, ka lo tlai tawh si...

Min dem em? Khawngihin min dem bik suh aw, nangpawhin engmah i sawi bik si lo. I kianga ka hlim theih zia te, nuam ka tih țhin zia te pawh i hriat vek kha. Mahse, ka nuam tih zawng ringawt chu ka lo um deuh a niang tu emaw hnen ațangin message ka dawng ta zeuh zeuh a. A châng kha chuan ka sawi chuak teuh țhin mange.

Kalsan tur che a rilru siam kha ka tan chuan min chhanchhuah zan a ka thutlukna siam aikhan a awlsam chuang hauh lo asin. Nanglah khan engmah i hrethiam bawk si lo. Kei aia i hmangaih leh i duh nen chuan hlimtaka lengdun tura duhsakna ka hlan theih chhun che u a ni  bawk si. Nang chuan ngaihzawng neiah te min ngai a, nangmah kalsan chak leh tum ngawr ngawrah min ngai a nih kha. U Pui, ka dem hauh lo che a nia, engmah i hriat loh vang a ni. Theih chu ni se i bula hun hman tluka chak kha ka nei chuang lo a sin.

Vanduaina aikaih sa hi kan awmbik emaw ka ti hial țhin. Boruak a dai chho țan tihah police in rinhlelh thu-ah an han ko leh che khan boruak inmûng chu a ti zual leh a, khatih lai khan he number 986256.... ațang hian beihna nasa tak ka tawk a sin. Min hauva, țawngkam na tak takin min chirhtheh a, min vau hial a nih kha. Kei hmeichhe chak lo tak hi khati tehchiama beih tlak ka nih loh tehlul nen. Mahse, keimah vanga i tawrhna te ka ngaihtuaha chakna ka neih phah țhin.

Mahse, i hnen ațanga fuihna te, țanpuina te ka dawn tawh loh hnu hi chuan engkimah hmasawnna leh chakna nei lovin a hniam zawng zelin ka kal ta si a, ka chhungte tan pawh phurrit mai ka lo ni ta!

Tunah hian ka thluaka bâwk awm hi zai tura tih mêk a ni a. Mahse, ka tan hian he khawvel hi thlakhlelh tur chuang a awm tawh lo. Min dem ang tih chu ka hria. Min fuih țhinna te vang tal pawha huaisen tur ka nih vei nen chakna ka nei ta lo a ni e.

Chu hmunah chuan lungngaihna leh buaina te awm lovin i kiangah ka leng ve tawh ang a, he leia ka țahna zawng te hi hlim nuiri-ah a chang ve tawh ngei ang tiraw? Vawikhat tal i kianga awm leh ka va han chak tak em, i kiangah ka awm chuan engpawh ka hmachhawn ngam țhin kha a ni si a.. Tunah chuan chakna reng ka nei tawh si lo.

U Pui, ka hmangaih che asin. Mangțha chu ka ti phal ngai dawn lo che a nih tak hi..

Rintei

Chu lehkha chu ka hmet ngawt ngawt a ni ber mai. Ka mittui luang chuan a far ta hial a! A mak a ni, a mak a ni e. Kha number kha ka u nupui, kan mo number hi a nia sin! Atluangi nena kan inneihna tur ti sukuktu pawh kha a ni bak hi an ni thei lo! Engatan nge heng thu te hi a lo vaivir kual chiam ringawt chu le! Rapthlak zawk hian a!

Ka tho thut a, ka țhutna chair te chu ka paltlu tak rum rum a, ka pindan a țanga chhuak a ka u te pindan kawngkhar ka hawng tur chiah chu ka pain ka darah chuan hnehzet mai hian min kuai ding a, ka tal lui tur chu a aia chiang mah chuan min kuai hnung nawk a, țhutthlengah chuan min nam țhu nghal a, min bawhbet der mai.

Engmah sawi lo chuan rum zet hian ka melh ngai chu ka melh ngawt ngawt a, ka kut ațanga chhuata lehkha tla chu ka nu chuan chharin a chhiar zui nghal mawlh mawlh a...

                 A tawp ta...

___________           __________

[Note: he story ka ziah țanna leh a tawpna inkar hi a hla viau mai a. January thlaah ka țan zet a, thui pawh ka ziah hmai thawnthu danga ka kai ta daih a, thlariat hnu velah ka chhunzawm leh chauh nia..]

©________[ɐʞızɹɐp]________®