KEIMAH SANGZUALA

____________                     ___________

              KEIMAH SANGZUALA

              *P.C Malsawmzuala*

                        Chapter

                              - I -

"Thlazuang kham kovah khan khawthlanglam hawiin i chhuk thla ang a, Tawitaw kung ngil deuh leh Vang kung hlamthum awm vela inhnaiha ding i hmuh hma chuan kal thla char char la, i hmuh hunah chuta țang chuan hmarlam panin ngil takin lo fîngkhat tlinglo deuh tur i kal ang a, chutah chuan kawrte kamah kham chhawrdawh chhete a lo awm ang a, thuipawh a thui lem lovang. Kobung a ni deuh zawk mah maithei e.

Chutah chuan i dungchen ai a sang tur awm velah khan Mihring tawmhul theihna awm lek pûk ve deuh reuh a awm a. Chutah chuan kan phum a, thuk takah pawh kan phum lem lo, hmanhmawh a chempuia cho mai kan ni a, lak a harsa hran lovang"

Chu thu chu ka pa, a vanglaia MNF Hnam Sipai Captain lai ni phain min hrilh a ni. Chu a thil min hrilh chu an rammut laia an Battalion rosum dahkhawmna a ni a,  amah leh Pvt. Liantea leh Sailiana bak hretu an awmlo. Pvt. Liantea lah chu rambuai a reh hnu lawkah a boral zui a, Sailiana chanchin hi ka pain a han chhuizui ngial pawhin a thi nge a dam tih pawh a hre thei lo.

Ama sawidan takin, "Vai sipai vawi thum kan lambun a, vawikhat kan tlawm a, vawi hnih erawh chu kan chimih deuh thaw a, tlanchhe bo hman chu pahnih khat an awm mai thei, chunga an bungrua leh an sum lak theih ang chi chu kan khawm ve ve a, Silai leh a mu țhenkhat kha chu kan surrender tel ve,  sum pawh a awm nual ka ring. Strong box pakhat kha chu kan karchhe ngei mai a, khata sum awm kha a remchang chang khan kan tuam nawk nawk mai kha a nia. A zat han hriatna hman pawh a awm lo."

In zali nufa a inchhal khuaah khawsak nuamsa silo, harsa em em silo hian vantlang tawk vel hian kan khawsa ve nawk nawk a. Damdawi dawr lian vaklo a hmingin kan nei ve a, chu chu kan chhungkaw eibel ber a ni. Tunhnai deuhah ka farnuin Primary Zirtirtu hna a thawk thar ve leh hlauh a. Rual awh loh theihlohna lai chu awm bawk mahse rilru nuamlo khawp chuan bakberhin kan awm hran lo.

Ka pa hi vai sipai nen an inkahna lamah a khelruh bawr hi a chianloh avangin a kawngkal hi a dik zan lo deuh a, kuthna han thawk zia a ni lo. MNF sawrkar laiin Țanpuina angreng deuhin sumfai tlem a zawng an pe ve a, chumi hmang chuan damdawi dawr siam bul țan ve thei te pawh kan ni.

An hruaitute an lo kal hi chuan Pu Kung Pu Kung hi an tia, mamawh leh tihtur hi an rawn sawi ang zung zung a, thildangah lem an hrezui leh roh mang silaw. Keimah zawk hian ka lo huatpui deuh țhin.

Kan chhungkua chu ka nu leh pa leh ka farnu nen pali kan ni mai a, puitling țhe țhaw han inngaihtuah leh chuang tur awm vaklo kan ni. Keimah ber hi min chawmrawn a ni ta ber a. Shillong lamah M.A ka zir a, final year exam dawn ruaiah ka nu chu thihngam khawpa a nat vangin ka zirlai chhunzawm lovin ka hawchhoh san a, ka chhunzawm ang ti chung rengin chhunzawm tak tak phei chu a awm lem hlei lova.

Ka pa thu min hrilh chuan min tiphur hle mai a. Chutiang rosum chuhpuitu tur pawh awm tawhlo kan kuta a'n awm mai tur te ka ngaihtuah chuan ka helhhawlh a ni deuh ber e. Kan awmna ațangin hla lo phei sela chuan chet lak nghal rum rum hial mai ka nap a! Amaherawh chu zin ve deuh vang vang ngai a nih vang chuan duh angin ruahmanna a kal tluang mai thei biklo.

Ka pa min hruai turin a chhiava tawh chu thuhran, a khelruh chiang lo nen han chechhuak zia a ni lova. A țul ang a keimaha mawhphurhna ka inpek mai a ngaih hmel viau. Phungbawm han sawm phalna chi ni nghallo chuan mawle.

Ka intintuah chhungin thlali dawn a vei hman. Inbuatsaih ngai em em nilo mahse fur khuaa chet chhuah ka peihloh vang a ni pakhat a. Fur khawcheng tlur tlur a zia awm țan a, Favang kawl a lo engțan tih chuan Sawngsawng bawk bawk leh fahmathar ko hram chhim hman ngei tum in kan khua chu ka chhuah san ta kha a nia.

Motor chianloh vangin thimhmulah Aizawl kan lut hram a, Shillong lama ka inluahpui țhin Ramtea te inah ka in vawmlut rawih a. A chhungte nen pawh in hresa vek kan nih vangin a hrehawm hran lo viau. An sakhaw mi a, an phungthluk chu thuhran min enhrang lem lo viauin ka hria.

Zanah chuan chau inti viau mahila Shillong awmlaia ka 'tawih' ve kha 'rim ang' a ti teh tlat a. Châk vaklo chung chungin mi phurchhuak lui ngial a. A bialpa ni ve awm tak tuai ngiak nguak hi a lo țhu ve khar a. Keini thingtlang lamchhuak a kara tukkhum dum tlêk tlawk leh kesir eng pip pep chu ka ui ka ar pawh min lo ti țha duh mang hlek lo! Ve sasawi chuan leh, a chungah ka Arpa khuan al al tawh tih te kha ka sermon khum chiam dawn emaw ni le. Het shalla..

A tukah chuan ka kalna tur khaw Sumo ticket lakna tur zawng chuan ka hmanhlel a, Zarkawt, Dawrpui leh Chanmari vel ka hrut kual ngial hnuah pawh hmuh chu sawiloh 'chulaiah chuan' ti a min kawhhmuh thei tu pawh ka la tawng lo cheu. An zin ngailo emaw ni le an khua ve hi a!

An khawțhenawm sumo counter ka hmufuh ta hlauh a, an khuain Sumo service an neihloh thu min lo la hrilh zui leh ta nghal a! Service angreng deuhvin Pick up a tlan ve țhin thu te chu panhnah khawr mawlh mawlh pah chuan min hrilh bawk a. An tlan ni ka zawh lah chuan 'hunbi pawh an nei meuh emaw ni le, a remchan dan ang angin an tlan mai niin ka hria' a la ti tak deuh deuh a. An driver mobile phone number erawh chanloh khanah a lo nei mial a. Chu erawh ritphur inchhawk ang hlauh a ni.

Ka biakhlatna hmang chuan thlunzawm tumin ka'n bei ngial a a dawngsawngtu tur lamin a dawng hleithei lo a ni ber mai. A ri țuk țuk a, a thi leh daih zel bawk si. Tihngaihna tak pawh a awm love.

Tlaiah nen, zan lamah dar 10 dawn thleng chuan biak tumin ka bei a, lungpui a liluh tum ang hlauh a ni. Beidawnthlak zawk hian. Engtia han tih chi nge maw ni dawn le aw.. Ka bangbo ta viau mai. Sakuh ser nghah ngawt ngawt ringawt lah chu hun a uiawm ka ti deuh bawk si. Naktukah an khaw țhenawm te sumo-ah chuang ve thawr phawt ila chuta țang chuan a hlat vakloh phei chuan ke te pawhin kan kal lawp lawp mai niang chu tiin rilru ka siam ta ngawt kha a nia.

Ngaihtuah ngai a awm ta! An khua a lian vak silova ka kal tih a tam zawkin an hre ngei ang a, chhuanlam mumal tak ka neih a ngai a ni. Chuti a nih loh chuan thil kalsual a awm thei dawn tlat. Chhan mumal nei silovin min ringhlel ve thei tlat. Engnge chhuanlam ka siam tak ang le?

Surveyor angin kal ta ila a fuh angem? A fuh maithei, ram lama chetla tur ka nih hmel bawk sia a awm ang ber maithei. Mahse, office thil leh engemaw țul te min lo zawt ta sela office chin chang engmah ka hre hauh bawk silo. Ka buaithui palh ka hlau.

Wildlife Photographer angin kal ta ila? A chi phian ang. Ramhnuai lam behchhan sa nghal tur a ni dawn a. Mahse, Camera pawh chu ka va nei silove.

Dar 11 rikruaiah chuan Rama chu ka va kaitho leh rih a. Phak zet chuan a steel almirah chu a hawng ruk ruk a Konica Vintage 35mm a rawn phawrh nulh a. An hmang zing lutuk biklo a niang a paw te chu a'n chhem fai thuak thuak a. Amah lah chu biak huphurhawm khawp hian a thophang chu a țawng duh mang hleklo lehnghal a. Kumpui lingleta khawsa dun tawh kan ni bawk a keilahin engah tehvak ka ngai bik lem hlei lova. A tihdan te chu kei Phone camera bak la hmet ta lo chuan hre ve nghal heklo, min han hrilh chawp nawk nawk a. A battery te chu a'n charge leh ang lawp lawp bawk a.

Zingah chuan hma fe hian ka thova, ka thleninte pawh hrilh chuang lemlo chuan ka zin bag nen chuan ka in akchhuak leh ta liah liah mai kha a ni a. Vai Pathian ka thawhkhalh ang chu tihnaklaiin a vai muția thleng mai chuan min lo thawhkhalh vek zawk ni mai hian ka hria. Kawngdung tluan mai chuan an lo awm emaw tih mai tur a ni.

Sumo counter ka thlen chuan dar 5:30am bawr vel a ni tain ka hria. An counter bera lah chu a in hawng a zeng pawh a ni law. Bengchhet kawngka kik nachang hrelo ang maia ka va lang tehhlawl chu ka ngaihtuah chuan a kawnghmang lo viauin ka hre leh hnuhnawh a. Motor kaldan chin pawh zawh nachang ka hriat loh a kara a chhuah lam hmanhmawh leh viau, thleninte pawh hrilh hman mang lova mawngvawm ba ang maia ka chhuak chu a finvarloh thlak hian ka hre leh hnuhnawh viau mai.

Mahse, ka hmachhawp hian min ti phur ve em bawk a ni. Thlenin te pawh nakinah an thawh hun awm velah ka be tawh mai ang chu. Mawngkham urhin k țhu tawh, Counter lah chu an lo hawng duh malek a. An kal dawnlo a ni chek ang.

Chaweikham lamah thawkchhuak țha leh mai ang ti rilru chung chuan ka bag chu ka'n hnungpuak leh ren rawn hman a, chutihmeklai chuan Dawrnghaktu nu reuh kha khawilam ațang emawni ber hian a rawn lang hlawl a. Hmunzawl khuaa kal tum ka nih thu leh an khawțhenawm sumo a bei mai ka tum thu te chu dawr hawnpui pah chuan ka hrilh leh mawlh mawlh a.

"Ticket la full khawp pawh tunlai chu an awm ngai meuh lo, i leng lutuk ang, an lo kal mek, an lo thleng țep ang." a ni pawh chuan a ti ve mai a.

Rei pawh ka țhut leh hma chuan Sumo chu a lo thleng mai reng a. A banga luak kai te tal chu han tihfai ve awm a sin maw léi luai le.. A driver lah chu vaihlo tui a hriat hmel em em mai lehnghal a!

Dar 6:30am bawrah chuan kan tlanchhuak ta kha a nia.. a hnungberah chuan keimah chauh chuan ka țhu ve ran a, ka hma chiahah pathum, a hmasa berah hmeichhe pakhat a țhu bawk a. Kan thawl nuam viau mai. Duh chuan kawngtluanin ka mu hnar sûk sûk thei ang chu mawle.

Dar 10 tlangah chuan chawei turin kan chhuk sang sang a, Rama te pawh chu ka chhuah thu te ka han hrilh leh ang lawp lawp bawk a. Ka rilțam ve lemlo bawka chaw chu eibuailo mai ang tiin Hotel kianga 'Káwngkam Tea Stall' tih intarnaah ngat mai chuan inhnangfak turin ka teilut ve nawlh a. Chow satui leih leh Paratha per hnih leh thingpui nokhat! Ka puar ve reng mai.

Sumo bulah chuan an chawei nghakin Kuhva leh Țhâl vaihlo tui ka lo țhei pawlh vel a. Tlâkdeng nikang vaihlo tui, hnahthial hnaha bilh ngei mai puar nelh nawlh laia han hip luh vang vang mai chu dawn a tawi tawrh thei nia mawle.

Sumo din hunah engtinnge Hmunzawl khua chu ka pan tak ang le? Motor veivak a tam lo tih lah a chiangsa ropui mai bawk si. Khawțhenawmah chuan ka riak khawtang tingtang mai ang tih ka hlau viau mai a. Hlauh vang ngawta tih danglam theih lah a nih hmel bawk siloh. Han thleng ve chawr phawt ila, a thak thakin kan thak tawh mai a niang chu.

Chutiang thil ngaihtuah a sawt mang silo ka lo suangtuah kual vak vak lai chuan ka hmazawn Hotel ațang chuan mit la zet mai nula a lo chhuak a. En mai chuan zin chau hmel hmuhtur a awm a, a sam pawh a pawr deuh phang mai.

Nula lian leh dawlhkai zeh zuah a ni han ti ngawt ila chu min pawmpuitu an awm vaklo mai thei. Nia, a lian ti a sawi tur a ni tlat lo. Mizo nula vantlang aiin a te mah mai thei. Te chhe zawk zawk ti a han sawi tur em lah chu a ni mang bawk silova.

A hmel a fiah kek kawk hle mai. A sam chu ngil mang silo hian tlemin a kir ve deuh a, tihkir chawp a nih pawh ka ring chiah lo. Mitmeng lian kel kawl tak mai, mithmul pawh kawlh mang loh, a hminga siamrem ve mai niawm tak chuan a chawi hle. A hmai chuan arngeng a chhawm ve lo a ni chek ang a hawlphum lakchhuahna hnuhma awm ang pawh a lang eih lo mai. A ngo tuihnai, tisen erawh a ngah lutuk biklo.

Jeans kekawr, t-shirt dum banbul leh sneakers a inbel a, saree puan niawm tak thehlep deuh hi a darah chuan a bat bawk. Khawilam chhuak tak niang maw ti a ka thlir reng lai chuan kan chuanna Sumo lam chu a rawn pan phei ve zel a, ka lo enchian dan em em chu a hming hre hial a mawi ka ni.

Ka hre der bawk silo.

Kan chuanna Sumo chu a rawn hawng tharh a, a seat a bag chu a hai rak rak a, ka hrechhuak chiah.. tlarhma ber a țhu, lu tuam tlat kha a ni dawn tak e, saw a puan bah te pawh saw.. A hmel ka lo hmulo mai mai a nih saw mawle aw..

Ka phone bih a ka kun ngar ngar lai chuan "Chaw i ei ve nange?" tih zawhna ka dawng nawlh mai a. Ka han hawichhuah chuan kha nula te reuh kha a lo nia. "Nia, a lai lutuk a ka eipeih ta lo mai, thildang ka ei a," sawitur ngah deuhin ka inhriat vei nen chhunzawm dan tur ka haihchham tlat lawi a. A zeiloh thlak țhin mange aw.

Amah zawk chuan, "I zin dawn nge haw tur?" a rawn ti zawk ta hlauh a. "Aw, zinkhawthawng mai mai.. Nang?" "Keichu haw tur ka nia" duh aiin min chang tawi mah mah a ni. Sawitur ka theihnghilh zui mai zel bawk sia. "Lehkha ila zir nge, hna i thawk zawk?" "Ka la zir ve leih leih chauh a nih hi" a nui seng a.

"A nih chu.. Khawiah nge i zir Aizawl maw?" "Ummm.. Shillongah zawk" Chutia kan lo tualchai ve hrep tawhna an sawichhuah chuan min ti phur ta riau a. Kan ti ti dun nasa ta mai a. Shillong ațanga ka chhuah chhoh kum khan alo awm ve reng chu niin. A fel reuh phian, a țawngkam a zangkhai bawk si. Mahse, Helaiah hian ranngo zawng tura kal ka nih loh vangin ka thinlungah hmunruak siam sak loh hram ka duh.

Mahse, a va'n duhawm si em!

Ka lo mutui deuh nge mawni Sumo ding che lawihah chuan ka harh hlawl a. Ka chuan theih chin khua chu kan thleng ta. Sana ka han en a, Dar 2:40 a ni. Engtinnge kei hi ka awm tak ang le aw...

Ka bag nen chuan mi dawrah hian ka lut bawr luk luk a, Hmunzawl lam kaldan tur leh a hlat dan te chu ka zawt a. 'KM 12 vel a niang, motor kal hi a vangthei bawk sia. Tukin kha chuan Lalrema khan buhfai ava dah asin mawle.' a ti a. Km 12 chu pangai taka kalin darkar 2 leh a chanve velah ka thleng ve thei maiin ka ring a. Heta riah khawtlai leh aichuan ke a ka kal mai loh chuan.

Kawnglaka rilțam tur vengah tiin biscuit leh theitui ka lei a, chutia kan indawr mawlh mawlh lai chuan ka dawrnu ber chuan "Pa Thang... lo kal teh" tiin kawngpuia mi chu a va au liah liah mai pek a! "Engnge maw ni chiam chiam le..ka lo biak tho tho ang che" a rawn tilut mawlh mawlh a. "Hei kan  țhiana hi in khaw lam kal tur a nia, kaldan tur a buai deuh a.."

"E, a ni maw.. engnge i tih dawn a?" kuhva țhial mawlh mawlh pah chuan mi han ti a. "A! Zinkhawthawng a ni ber ang chu, a remchan dan a zirin thlâ te ka la kual țhin a" ka'n ti ve nghal zat a. "A nih tak chu mawle, ka rualin i kal dawn nia, tumah ka phur hleinem, BDO office-ah thil ka han tifel ang a, tichuan ka hman a ni mai, min lo nghak mai rawh, a hla chuang hleinnem, reitlan a nilo helai karlek chu" a ti zung zung a.

Darkar khat leh a chanve a liam hmanlo deuh ang tihah chuan a bajaj Scooter chuan kan inphur dun ta vawk vawk a.

Kan ti ti dun nasa mai. An khaw kawngah chuan developement an tih ang hi ala awm ve lo a ni chêk ang Lawi kawngțum nizawk awm tak kan zawh nasa emai. Fûrah phei chuan ke a kal mai a thlannahawm zawk ngeiin ka ring. Mi khaw kalkawng chhiate chu black top khawk leh tawh te a nia, anni khaw kawng hi chu alkatra far khat pawhin a la far loh, tuihawk zaina thlur seng sung mai leh a chhe helna lama khuara tlakluh palh theihna deuh hlir nimaiin ka hria.

Scooter in min sawhna vang chuan ka mawng a duk tluk hial ka ring. London road țheuh țheuh a inthlau țhin mang tak e aw.

Hmunzawl khawdaiah chuan hmanlai kawtchhuah lungdawh tlar țhut mai kha a lo la awm chu niin. Meizuk te siamin kan han chawl khawmuang a.

"Hmelhriatsa emaw, thlen tumlawkna i nei em?" a tih chuan chulam chu ka ngaihtuah lawk miah lo tih ka hrechhuak chiah! "Amh.. nei chuang love, ka zinchhuah hi chuan VCP te in hi ka risk tawp zel!" nui deuh chung chuan ka'n ti ngawt pek a.

"A țha mai lawm. Kan ina han hruai awm tak che nia, Mahse tunlai chu kan chhangchhe lutuk a, in kan sa buai nen i tan a hrehawm mai mai dawn sia, VCP te in pawh chu a remchang phian ang, anni an fa fel deuh a.." a ti liam ve mai a.

"Pa Rova a nia kan VCP chu. Pa dam thlem thluam, a tihloh lamah chuan luhlul zet mai hi a ni roh a. A tu a te pawh hian kan nel vek lawi a. A kum lam a upa deuh tawh e tih lovah chuan khawtlang kaihhruai kawngah chuan ani han el pha tur hi kan nei meuh lo chu a ni. Mizorama VCP reiber a ni hial law maw chu le..Term 6 ngawt a President tawh a zawn hlir lehnghal a nia" tiin chhuan hmel fe chuan an VCP chanchin chu a sawi tuam tuam a.

A pheikhawk chu a phelh sut sut a, Vangvat puar zet mai hi a lo tlachhuak nawlh mai a, "A thak ka ti rengah" tih pah chuan a zialzuk lai chu a fawp ling kawk kawk a a'n nawrhchilh mai pek a!

Hmunzawl khua tih takah tlangrama awm ni awmlo tak hian an khawthleng a rem a, chhuah chhawng leh tlakdeng lam pawh a awm hran bik meuh lo a ni. Khawthleng a zau duar lova, a bit mawitawk hle. Ruahmanna fel tak siama rem a nih hmel viau mai.

In 150 khua an inchhal na chu a landanah 120-130 bawr vel an nih ka ring mah zawk. Khawchhung kan tlan hnu reivak lovah chuan kan ding a, "Hei hi kan in a nih ve hi, remchangah min lo tlawh dawn nia, sawlam vengpui lamah sawn in kan sa ve mek a, tunlai chu mahni tawk tawkah kan buai ve map map khawp mai" a ti a. Ka lo chhuk vei hmanhmawh a, "Ti rawh, Pa Rova inthleng chuan ka va thlah ang che. Mahni ngawta i luh zawngin nuamlo i ti palh ang e" a tih chuan 'a ngai chuang hleinem..' tih leh lawn chu ka rual lawi a.

Thui pawh kan tlan hma chuan Biak in châr lama kawtzawl zaupui mai lam chu kan pan a, an kawtzawl vel chu phelsep hian zawngdaikalhin an hung pup mai a, kawldai hlingneilo chi khan a hualchhuak bawk a, an sekawtrawlh chungah chuan enkawl ngun tih hriat fe hian saron a inphan kual pup mai bawk a. A par lai chuan a mawi hle ang.

Gypsy softop, hman rim a ni tih hriat zet mai chu an bang hrulah chuan chhimlam hawi hian a inhung ran a. A piah deuh maiah chuan Yamaha RX 135 sawi zet mai hian an kamding hram hram bawk.

An in chu a fel thlerh thlawrh khawp mai. A ban leh skirting chu concrete a ni a, a dung chu fit 36 vel emawlai ni tur hi a ni a,  a zauh hmel tawh teh reng nen a chungah Assam type in mawi zet mai hian an la sak zawm lehnghal a, an țhenawm inte nen han khaikhin chuan an khaw lal in nih chu a in mawi phian awm e.

Sekawtrawlh chu a lo inhawn loh vang chuan chumi hrul maiah chuan Scooter chu a tihlum a. Kawngkapui inhawnghuai mai chu kik pawh kik bik ta lemlo chuan "Hei khualțha ka rawn hruai a nia," a ti lut lur lur a. Pindan lam ațang chuan nu hmaitluak țhazet mai, mahse kum 50 ral a kai tawh ang a han tih tur hi a rawn chhuak a, "E heu..Pathanga te lah ni reng chuan, engnge ni teh uaih, țhu rawh u." a rawn ti bawrh bawrh a.

"A hei kan naua hi vawiinah khaw țhenawm motorah a lo chhova kan rawn in nangfuh a, zin khawthawngin khua a chuan vel a nih hi, pawipangte chu a nei thovang chu.. keini kan insa buai nen inhnen lamah hian a tlei zawk ang tih thu ah ka rawn nghat chawt mai a nih hi" a ti a.

"A nih tak chu, inbuai loh lai han nise khualchhawn in han thiam tehlul nen a le... keini te chuan in nê pawh kan ek pha hauh awm silova, kan mikhual teh poh a niang chu. A chibai te pawh in chibai ve ila mawle, Zari ka nia, duh leh nu zar min ti la, duh leh min pi la" a ti bawrh bawrh a. A nelawm fu mai.

"Sangzual min ti mai"

"Ranngo zawngin maw chu ilo thawhchhuah ber a?" nui vur vur chung chuan Nu Zari chuan mi han zawt a. "A ni pah zel tawh mai ang chu.(ka nui a) thla vel te hi ka la kual țhin a,a remchan angin ramthla leh sava thla te, Wildlife photographer ka ni ve ber ang chu." ka ti leh pek a.

"A nih chu, chutiang te mizo zingah kan lo awm ve tawh a ni maw, i ti țha hle mai. Helai velah phei hi chuan a sa ei bak hi kan ngaihtuah lo emaw tih mai tur hi a nia, helam zawnga kan țhanharh hi a ngai asin aw..kan tan an hlut dan hi kan la man hlawm lo a ni chek ang" a ti ta duah a. Min zawh thui vaih chuan a chi loh viau ang aw.

Pu Thanga chuan zanlama an ina lengah min sawm ngial chungin min hawsan ta kha a nia. Nu Zari nen chuan an khawchanchin te chu kan sawi dun luam a. Amah chu Primary Head Teacher a lo ni awm e. Khawsak harsa tur an nih loh chu ka ti rilru nep nep a. A fate pahnih Shillongah lehkha zira an awm thu te an upa ber hmeichhiain Aizawl lama pasal a neih thu te, an u te fa, tleirawlte an awmpui thu te chu a sawi suam suam a. A țawngduh bawka a bula awm a nawm hmel khawp mai. Nu rilru țhapui a nih hmel a ni.

An bualin ațanga inbualzova ka chhuak chu an sitting room a țhu kum 60 bawr vel tur lo țhu chuan min en uluk kher mai. Ka thleninpa tur a nih ngei pawh ka ring. Nu Zari chuan an pa a nih thu leh Pa Ro i ti mai dawn nia tih thleng chuan min hrilh nghal mai a. Ka hming te pawh a sawitel tak e.

Pu Thanga sawi ang deuh kha a ni ka thlenin pa chu mitmeng fim leh thip lam deuh hmel túr khâi mai hi a ni a. A palian lemlo nain 'ka rah chin chu ka ram' ti chi hmel a pu.

Uluk zet mai hian ka tihtur chu min zawt a, keilah chuan holo lam zet hian 'Sava ka veh dawn a ni ber mai' ka ti awlsam et a. Engnge a hlawkna? A harsa em, a hrehawm em, engnge a țangkaina tih zawng zawng chu an ina ka thlen man nihmiang ka ti mai a phuahchawpin seizetin kan chhamkual duah mai a leh! Ka sawi tawp lamah chuan min khap ngam bik chai heklo, lehlam hawiin a ham bai bai asin le.

Zanriah te chu pangai takin kan ei ve mai a. Harsatna lutuk a awm lo.

Chaweikhamah chuan paber a tekchhuak nalh a, nuber lah Nilai zan inkhawm turin a chhuak zui mai bawk si a, an nau nen chuan țhutkhawmna pindanah VCD player  hmangin Rambo part -III kan en dun ran a. Ani lah chuan reiloteah lehkhazir turin pindan lamah min luhsan leh mai bawk sia.. Lengchhuak ve daih ang ti a ka thawhchhuah mek lai chuan pindan kawngka ațang chuan chhunlama sumo a ka chuanpui nula te kha a lo chhuak hlawl mai a!

Mutho hlim tih hriat tak mai hian a sam chu a pawrphang a, hmaihnawih leh cheimawina dang bel lo mahse khuanu duanbik a nihna chu haider rual a ni lo. A thophang hmel pawh designer kutchhuak tluk zeta nalha ka'n hmuh pek chu le!

Maktih hmel zet chuan min en a, keilahin amah tluk zet chuan mak ka ti ve tho bawk sia. A nui seih a.

"Engatinge hetah te..kan in hmuh nawlh a?" a ti bah niai a.

"Nang pawh....hei hi in in tihna mi?"

"Ni e, engtinnge i lo thlenphei theih a?"

"Pu Thanga Scooter-ah ka rawn chuangphei, nangni engtinnge in kal a?"

"Ka pa ten motorin min lo nghak a, i lo phei dawn tih hriata lo chuang ve mai la ni tur"

"Ni ngawt mai tiraw..." ka tih mek lai chuan an bual pindanah a lut ruai tawh a. Keilah chhuah tumin ka lo ding uai tawh bawk si. Ngawirenga lo chhuahsan ngawt chu a dikin ka hre chiah bawk silo.

Rei phei zawng a rial bik lem law. Chawei dawhkan bula Filter tui a in khalh khalh lai chuan, 'Ka'n  teichhuak lawk ange aw' ka lo ti a. "Lenna tur i hria mi ngawt a?" "Hre chuang lem love, Kan daidar ve hrim hrim ange khawchhung hi" tiin ka chhuahsan ta kha a nia. Ka chhuahsan lamah chuan ka rilru a awm zawk mahin a nia ka hriat ni.

Khawchhungah chuan ka kal kual thuak thuak a ni ber mai. Pu Thanga in lam pan chuan ka kal leh ta a.

Thawm a awm laih laih chuan ka hria, Kawngka chu ka han kik kauh kauh a, chhawntu phei chu ka nei lem hlei lova. Ka kik ri an hrelo a nih ring chuan ka hawng ta thova. Tapchhaka pitar meivil chu ka va hmu hmasa ber a. Ka thawm pawh chu a la hre lo ni ngei tur a nia, aw then khak pah chuan 'in awm maw' tih leh penluh ka rual nghal mai a.

"Awm e, lo leng rawh, engnge ni i duh a?" a lo ti thuai a.

"A, engdang duh love, ka lo chuanglut mai mi a nia. Khawnge Pu Thanga le, a mu tawh em ni?"

"Pindan lamah khan an awm a, an la mu mai lovang, chu an thawm an thawm chu, khawilam mi nge i nih a, mikhual i ni ang chu maw?"

"Nia, ka rawn zin khawthawng ve mai mai a nih hi. Pawipang han tih tur em em pawh ka nei hran lo"

Chutihlai chuan Pindan lam ațang chuan naupang pakhat alo tlan chhuak  a. A pi chuan "Mama i pa han koh teh hei inleng a nei a nia" a ti a.

Pu Thanga nen chuan reitak kan inkawm a, an khawram awmdan leh nungcha awmdan te uluk deuh chuan ka'n zawt a. A hmawrbawk nan Thlazuang kham chu ka hmang a, kalkawng awmdan ka zawt a,  a fate ziakloh bu chu pawtthlain kawngpeng awmdan nen lam chuan min ziah sak a. Mahse, pawi ta ber erawh chu Thlazuang kham chung ram rai țhalai chu lovah an țheh tlat mai chu a ni.

Ka pate thil thuhrukna lai chu lovah chuan an nei tel angem? An neih tel vaih chuan ngawirengin an ro phumruk pawh chu an lo haichhuak tawh mai thei asin. Tunge sawi kher kher duh ang. Chu chauh chu ngaihtuah ngai pawh a ni lo, Tawitaw kung leh Vang kung te pawh chu an lo kit daih thei bawk. Engatinge aw an lo țheh thawt thawt mai le..

Favang boruak a thaw tawh a, a hnukhawi deuhten pawhchhiat an nei mekin ka ring. A tam zawk chuan hlo an thlawh a rinawm chiah tawh lova. Buh pawh a hmapawl chu a tulzum fe tawh ang  chu. Chuti a nih chuan mi nawlpui chu Lo lamah chuan an kalin ka'n ringlo thlangawt a. A țul zual leh nuho anhnah lawr bak chu an awm lutuk lo ve thei. Chuti a nih chuan mitmei ven lutuk ngailovin Lo lamah chuan a chettlat ve theih tho mai.

Ka thlenin lam pana ka hawkawng tluan chuan chu'ng thil te chu ka ngaihtuah kual vel a ni. Biak In zawn ka thlen lai chuan ka thlen inte sekawtrawlhah chuan thil pangai ni chiah lo hi ka va hmu tlat mai pek a! Saron buk phena ding chunga hruihrual vaikual hi niberin ka hria. Tunang zanah sawlai hmuna hrui han vaikual loh loh mai chu hriatthiam a har viau mai.

Ka lênghaw hi min lo châng emawni dawn le? Ka thil tih tum hi lo hreru te pawh an awm a ni mahna le. Engtinnnge ka tih tak ang aw tiin reingial chu ding chungin ka inngaihtuah a. Tupawh ni se a hnunglam ațanga ka va hmuhchian theih ka inring ta tlat a. Sekawtrawlh chhung lam hawia hrui chu vaikual a ni tlat. Chuti a nih chuan a hnunglam ațang sawn a vehkual theih ang chu mawle.

Muangchangin, thawk pawh thawțha ngam lo chuan ka vehphei țham țham a, ka va hmuhchian meuh chuan mahniin thimthamah ka nui chhuak hawk alawm le. Bawngpui meivai lek hi a lo nia!! Saron kung buklai phenah a taksa lam a lo awm si a, a mei vai chu alo langsar viau mai hi a lo nia.

Thawhuai chung chuan Sekawtrawlh karah chuan ka inzep lut a. Inchhung ka luh chuan an nula tereuh khan TV a lo la en khar a! Țhutthlengseia mu chung chuan mi lo melh hrek a, "Ila meng a ni maw?" kan ti mawi ve luam a. "Nia, tlaiah khan ka muhil hman khanglang a, mut a tichhuak lo zo vek alawm" a ti ve mai a.

"I hlau angem i mutna tur khi?" an tiah! Inchungah an tlangval pindan min luahtir kha a nia.

"Hlau love, a hlauhawm a mi?"

"E ka hrechuang nang, i mutthilh ngamloh leh min lo koh vak mai dawn nia" tih pah chuan a nui sen sen a. Biangsum neilo nuimawi berah ka puang nghal e.

A ep a țhutthlengah chuan ka țhu kawi ve leh rih a. Min lo nghak emaw nghaklo emaw pawh nise han țhutkhawmuan pui tham a ni ve hrim hrimin ka hria. Chawei dawhkana Flask an hun ațang chuan thingpuisen hâng a va thli kar kar a, ka inngaihbel vang nge maw ni min pek pah chuan ka bulah a rawn țhu nia mawle!

A rim chu thingtlang nula rim atan chuan tawrh hrehawm tak avan nilo chiang tak! Thu holam mai mai sawiin kan titi tui dun viau mai a, min melh zeuh zeuh. Chumi awmzia chu min haw ngawih ngawih bik lemlo tihna!

Dar 11:00 a rik thleng chuan kan la țhu dun ta reng a, 'Mu tawh ila' tih pah chuan min rawn zai ralh a. 'Nia, mut a hun viau a ni, i chau awm bawk sia" ka lo ti ve mai.

Ka hmazawna no seng tur chuan a lo tho chhuak a, no a rawn ban laitak chuan a banah ka lo vuan a, rawn melh zauh pah chuan 'hm..' a ti nghat a. Ka'n hnuk hnai deuh a. A țang țak mai. Hmai in si lek lek chuan ka en vang vang a, ani lah chu sen țan țan chung chuan a kun ran a. At huai ka sim tawh vang nimaw a chalah chuan ka fawp zauh a. Ka thlah zui nghal a.

Hmui petsawi pawt pawt chung chuan no chu a va tleuh rak rak a. A lo pheileh lam chuan 'Mu ang lem..' a rawn ti a. Ka bul a lo thlen laitak chuan ka lo ding hluai a, ani lah mawl lo bawk, TV lam pan chuan a kal thla ta daih a. A off hnu chuan min țhenkhum lui a, tereuh te hian min bye bye a, pindan lamah chuan min luhsan ta daih a.

Keipawh nuivar var chungin inchunglam pan chuan ka kal ve ta nghal a.

Ka dawihzep vang pawh ni em em lo hian ka harh vang viau mai a. Ka mutui viau emaw ka tih lai pawh hian ka hminga min koh ngat phei chuan ka 'èi' hman deuh zel tho nia! Chutiang mi ka nih vang chuan pindan khatah na na na hi chuan ka bulah thil an tiru hlei thei meuh lo.

Hmunzawla zankhatna ka hman zan hian ka riahna pindanah chuan inleng ka nei tih ka hrethei a, che zui lo chuan ka mut ngai chuan ka mu tlawn reng a. Kha nula in a 'i hlau angem i mutna tur khi?' a tih kha ka hrechuak zawk mai a. Ka hlauh leh hlauh loh pawh chu ka hrethiam chiah biklo. Ka la ngaihtuah hman lo a ni ber e.

Thlarau lam chu nilo turah ka'n ngai ngawt a, ka bag a dap niberin ka hria. Ka thawmhnaw tlem leh camera, chemte lian țha angreng tak leh Lukhumparh bak a awm silo. Ka pawisa ip lah chu ka lukham hnuaiah ka dah daih bawk sia. Camera chu la lo se a țha a ni mai. Ka tho dawn uau uau țhin a, enginnge min dal pawh ka hrelo. Pindan kawngka a khar thleng chuan ka la mu nia!!

Mahse, inhnuai panna stepa a chhuk mek lai chuan ka tho nawlh a, pindan kawngka ațang chuan ka va bih ta dêk dêk a, thawm chu a dim dai dai khawp mai a, mahse, bualin lamah chuan lutin current a han ti eng a, a lo chhuah leh chuan ka thlenin pa ngei a ni tih ka zuk hrethei a.

A engnge maw ka bag te patlingpuiin a rawn check chiam le. Kutkem a nei deuh emaw ni dawn le aww..

Ka bag chu ka'n en thuai a, engmah a lak phei chu ka hre lem hlei lova. Pawisa a zawng pawh a ni mahna le. A va'n patling hnalo țhin em ve aw.

Tukțhuan duhthawh angreng taka ka bar mawlh mawlh lai chuan Nu Zari chuan, "Vawiin lam i vakchhuak nghal dawn nge? " a ti a. "Umh, chhuah chu ka tum chu a nia" ka ti ve mai a. "Ramhnuaiah te i bo ang ka ti aw.. thurualpui tur chi te an awm a nge maw le.." "Bo bik lovang, kan chhuakțhang alawm ramah te chuan, vawiin tak phei chu Lo lamah ka kal chhin dawn mawni te ka tia"

"A țhat chu lo lamah chuan kawng a hai theih loh deuh ang chu. Buhhmun te hi a mawi a nia, va kal rawh nuam i ti ve khawp ang" a ti a.

Chaw min fun sak a, chaweikhamah chuan muangchangin ka in akchhuak ta a.

Fehkawng lam na na na chu bo thu awmbik hek suh. Hmunhma thlithlaia kal mai tum ka nih vang chuan ka hmanhmawh hran lem lova. Muangchang chuan kal in minute 45 vel bawr ka kal hnu chuan zau hmasa ber chu ka chuangchhuak ta hlawl a. An lo ho chu a hmun a rem angreng sia buhtuh lai leh hlothlawh lai vel chuan an kawngkham an dingchhuak nawlh nawlh fovin ka ring.

Pu Thanga'n kaldan tur min ziahsak chu enin kawngtlangdungah char char chuan ka kal ngat ngat a. Vahbak ngaw thui vaklo han kal pelh zeuh zeuh tur te pawh a awm nual mai. Han hawikual vel chuan rin aiin an kumkhat rambawh a lo zau nek mai hi a lo ni a. A hmuna han kal ngat ngat a ralah phei chuan Buhphurh huna zau mawnglam deuh ho ami tan a hrehawm tur zia chu ka mitthla thiam ve ruak mai.

Thlazuang kham va chuangchhuak tur chuan Lo fîng nga emaw vel kal ka la ngai ang tih chuan ka hnunglama tlangval pahnih rawn kal ve reng mai chu ka la hmu ta cheu a, ka muan leh an muan ve zel avang chuan ka ngaihțhalo chu kawngsira behliang buk țawi laih mai hnuaiah chuan ka țhu bo ta daih a.

Rei vak lovah chuan an thawm ka hre chhawm mai a. Pakhat chuan "Ka hmu tawh miah lo a nia, hmanhmawh deuh ang kan hlauh hlauh ange" a tih ri chu ka hre phak a. Tlan deuh ti tih hian min kalpel hlawk hlawk a.

                        Chapter

                               II

Ka chefuh dawn ta hauh lo mai ka ti, Keimah min zui chiang mai. Chuti a nih chuan ka thil tihtum hi hretu an awm a niang chiang mai le. Engtinnge ka tih tak ang aw.. Ka kal tumna ber pawh ka la thleng bawk silo. Kawnga ka chhuaha ka kal lan chuan min hmu mai dawn bawk si. Rilru a buai ta map mai le.

Ka thlang maiah chuan Thlam a awm a, chu mi behchhan chuan an kalbo hun nghak ta mai ila a fuh thei angem aw.. Mahse, ka awmna ri te Thlamah chuan awmin Namthlakah chuan an hawikual chiam chiam mai bawk si. Reingial ka țhut hnu pawh chuan an la kalbo duh mang silova a beidawnthlak duh viau mai.

Hetia ka awm reng chuan ka tan awmzia a awm dawn chuang hauh lo mai. 'Buhhmun pik a ni thova, kunhniam chungin lo mawnga vahloh tlem awm khu panthla ta ila khuta țang khuan kawng a awm thei zawk ang' tiin ka ngaihtuah a.

Muangchang chuan kawngkanin ka tawlhthla hret hret a. Thlam hnuai ațang chuan ka va bih dak dak a, an la hawikual nasa mai.

Hnawmbawm sirah chuan tawlhthlain bun kawngah chuan țhutung ti tih hian ka tawlhthla a, chhuk zawng a ni bawk a rinaiin a sawt angreng viau. Mahse kalna tur a thui phian bawk sia a buaithlakna chen chu a awm leh tho mai.

Lomawng lam chu kawng a mumallo sawt hle a, a hnudeuhah pheichuan kawng pawh a awm ta lo. Rinawmtaka an changkham zui mai te pawh ka pel ta, Buhkarah chuan buhkung tiche tlem thei ang ber tur chuan muangchangin ka tawlhthla ve zel a, ka thlang lam hlam 30 bawr vel turah chuan Thlazuang kham lam depah vahloh lai ngaw chhete hi a awm a, chumi chu ka bechhan tawh mai loh chuan.

Tlakdeng lam hawia mual inkhawhthla a nih vangin veilam a nak pangper thlaah chuan ka kal phei a ngai dawn a. Ka tawlhthla hriau hriau a maubul mawihtawh ka kuai fuh chu niin; dungchen zet tur chu awihtlanah, buhhmunah lehnghal chuan ka tawlh a, ka dinchian hnuah pawh thawmngaithlain ka'n mu vang vang a, engmah riva ka hriat zui loh vang chuan muangchangin ka tawlh thla zui leh mai a.

Kawrzai, tuiluang pawh awmlo ka thlenthlak chuan mang khawh khawm nan an lo hmang chu niin, hruizam nen, luang pik nen a kuang zaulo mahse kalkai chhung a rei hrep a, ka thak nghal sup sup mai.

Vahbak ngawah chuan ka lut ta a. Lo halnaah a kang lûm ve a ni tih hriat reng hian țhâng leh hnimdang a țo hnem em em a, bihruk nan chuan duhthusam a ni. Mahse, biru reng turin ka lut lêm silova. Hmeithai lo tiat awrh tur bak hi a ni lovang tih tur mah nise a chhung a lo chhengchhe phian chu niin. Lo a tana han neihzia pawh ni nghal lo chuan.

Reife ka thang hnuah chuan a lu lam chu ka pawh dawn hnai ta a. A chunglam phei chu a eng uau toh. Thingse kungah lawnin  thlam chu ka han bihthla a, tumah chu ka han hmu ta hauh lo mai a. Chhuk leh mi tuma ka hawikual chuan khawlam hawia pakhat kal mek chu ka han hmu a, mahse khawnge pakhat kha le..

Min bum tumin ruahmanna an nei ve pawh a ni mahna. Nghak rih phawt ang ka tih mek lai chuan ka chhak lawk ațang chuan tlangval pakhat hi a rawn faifuk thla rût rût a, 'umh..khi ngei khi a nih dawn khi' vahbak ațanga hlam nga awm vel lekah chuan kawng a kal chu lo niin. Ngaihngam zet chuan a rawn faifuk thla hlarh hlarh a. Reiloteah ka awmna chu a rawn kal pel thla mai a. Thaw a veng ta huai mai.

Minute 5 hnu velah chuan thlawhlai lam pan chuan ka vakchhuak ta țhem țhem a. Kawngah pawh kal duh lovin thlawhlaiah chuan fimkhur takin ka vakchho zel a. Thlam thleng chuan ka bawkvak ti tih a ni ber mai.

Kãwng a kham ta viau.

Thlam piah lawka kawrteah chuan ka inphihfai sawk sawk a. Kun deuh do chung chuan hmanhmawh deuhin kham ko lam pan chuan ka kal hlawk hlawk a. Ka kalchak bawk a niang khamko hnaihber thlam chu ka thleng rang kher mai. Thlam chhungah chuan rangtakin ka lut nghal vat a, min zui an awm leh awmloh chu theih ang angin bangawng ațang te chuan ka thlithlai a, engmah han rinhlelh tur hmuhzui ka nei ta lo.

Thlam namthlak an khar vek si avang chuan khawhawi a zau theilo hle mai a. An phuarna hrui phelh a han thlah ngawt dawn lahin ni berin ka hre bawk silo. Ngawirengin thlam hnuaiah chhan ka lut thla a, kham ko chu chhui thlain thing pahnih ding inhnaih deuh chu kan zawng thla dan dan a, a lo awm fuk mai chutiang hrim hrim chu. Chu aia awlsama zawndan ka ngaihtuah chhuak ta hlauh thung a, ko awmna lai kha zawng zawk ila tiin.

Ka awmna mual ațang  chuan ka chhuithla zar zar a, Thlâm pathumna zawn vel, Thlâm ațanga khawlam depah chuan ko angreng chu a awm ngei mai a, chulai chu a nih hmel ta ber mai. Lo chhung a nih chu thuhran, thlambul mai a la ni lehnghal a, a buaithlak viau mai thei khu lai chu a nih ngat chuan.

Lo fîng thum zet zawt chu ka palthlak leh a ngai dawn chu a nia leh! Pakhat kha thlanglam hawiin a chhuk bawk si, a va buaithlak țhin em aw...

Mualrem laia chhukthla tawh lovin thlam châr lama kawrte zawh chuan fimkhur takin ka chhukthla ta a. An lo hâl hi a kâng țha vak lo aniang mang an khawh nasat hmel emai! Ka kalna lai pawh hi Mângkhawh khawm nan an hmang leh pek tho mai.

Lei ko awmna lai zawn kha a sir deuha Thlanvawng kung an kih loh, a zar an thlak nual, chawrbuk leh hlup tawhah khan ka chhinchhiah kha a nia, kawrte rem lo tak mai zawh thlak chuan a lo hla phian mai a, ka hêlna lamah a țhenlaiah phei chuan mual lai te pawh ka han chuang chhuak țhelh hial a ni. Ka zawh lai kawrte kam mai a nih tho avang leh kalbo tur ni chuang heklo a hahthlak emai tiin mualdung zui chiah silovin a nâkpêkah dinglamah chuan ka chhukthla ta a, buh a țhat em avangin ka nghawng chin chunglam bak a lawr hran lo. Tlemin kan kunhniam deuh a, ka langlo chu a ni chhawm mai.

Buh karah chuan fanghma tuai te kan ei leh rih a, chhun nisat vanglai a ni bawk a hmahnip tuai han ei chu manhla tak a ni ringawt mai. Ka chhuk thla zel a, kawng ka pawh ta hlawl mai a. Zau thlang lam ho kalna a ni tawh ngei ang. Chu kawng ațang chuan thui kal a ni tawh lo, hlam sawmnga vel emaw lek a nih ka ring.

Kawng chu zawh duhlovin thlawhlaiah bawk chuan luh leh mai ka'n tum zet a, mahse chawfak a hun fê tawh a ni tih ka pumin min rawn hrilh tak avangin kan hawikual ngial a, tumah ka hmuh tak silovah chuan thlam lam chu ka pan ta zawk a. Khawlum bawk si nen ka mê sup sup tawh bawk si Namthlak chu pawilo turah ngaiin ka phelh thla ta rawk a. Thlifim nen chuan hah a dam sawng sawng thei alawm le.

Thlam ațanga langthei maiah chuan kham/lei ko chu a awm a, mualdungzui zawng chuan hlam 100 vel zet tur hian a awmthla zui a, ka pa sawitak ang a puk deuh reuh a tih pawh chu a awmtak ka hmuthiam mai a, hnimin a bawh lûk avang chuan pûk ang tak pawhin a lang lem lo. Chubak chu han rinchhin tur dang eih pawh a awm lo. Hnuhma thar awm ang hmuh tur a awmlo chuan min va'n tilawm si em.

Ka rilru tak chuan va pan nghal ruak ruak mai ka duh a, mahse chhun pachanga duhthala ka rik pawp pawp mai chuan a fuh ka ring chiah bawk silo. Chawfâk phawt a țhat ka ring a, chutiang tur chuan ka han inbuatsaih zet a, hun tih tlai nan chawhmeh te siam ila ngawirenga nghah ngawt ngawt aichuan a țha zawk ang tiin Maian sik turin fimkhur tak bawk chuan ka chhuak leh a.

Sikthiam viau lemlo mah ila ka duhkhawp chu ka ngah ve thei mai a. Maite pahnih vel ka lo tel bawk a, thlawhlai lam ațang chuan Thlâm chu ka pan a, Berûl, changkha, Thurte-an leh Baibing te pawh ka la tel nual mai.

Thlairah ka chhuan hmasak lai chuan thiam ve hmel fe hian Maian chu țhuthluang diaiin ka'n hik ve dalh dalh a, a tharlâm bawk a, a tui viau ang le.

Duhthala chaw ka fâk hnu chuan Thlam char bang nghengin kuhva ka'n seh sak a, a chhilh nan țhalrêp kan hmang leh bawk a. Ngaih a va han țha veng veng tak em aw....

E! Camera te pawh ka ken ve tak kha mawle. Kha kha ka chhuanlam ve ber a ni si a, ka ipte ațang chuan ka phawrhchhuak a, thlanglam hawi chuan thla ka'n la ve ngawt pek a! Ka la kual zel a, buh hmun cham pût mai chu rin aiin a lo mawi duh phian ta ve ang.

Ni pawh a her țan, khawlum vanglai, dar hnih bawr vel a ni tawh tih chuan ka hmabak ramtiam lam pan chuan ka inchhep chhuak ta a.

Kawrah chuan ka Camera chu ka dah sauh sauh a, lawndan tur ka ngaihtuah nghal a. An mangkhawh khawm zinga țang ngah deuh, rahbi remchang tur ka melh kual a, a vang phian mai.

Chhakdeuhah chuan malpui tia vel tur hi ka han hmufuh ta hlauh a, hlamthum dawna seiah chuan tanin ka puthla a, chu pûk lawnna tur chuan ka dawh ta zar mai le. Ka'n hawikual a, ka'n nghak vang vang chungin mihring thawm emaw che zeuh pawh ka hmuh loh vang chuan ngaihngam takin ka lawn chho ta a.

Hnim vel chu hnuhma langlo thei tur angber chuan ko bula mi ho chu theih ang angin ka kâr a, mawngtawlh zawngin ka lut a, țangphel awm vel hian a lo kaw ve deuh hi a lo nia, a chhung chu a kolama hnim a tam ang aiin a lo fai phian a, a kovah a hnawhna niawm hrimin a lo țobuk ve mai a nih hmel viau a ni.

Din ngil chu sawiloh kun pawh a tih hleihtheihloh, ka țhutung a ni deuh ber mai. Ka chemte ken chuan lei chu ka'n cho mawlh mawlh a, sipai kawr niawmtak them hi a lo lang va va a, ava'n phurawm si em! Lei a dup hrim a, rei chawh a ngai lo kher mai, uluk deuhin an thilphumho chu ka lachhuak țan ta a, sipai kawr emaw ka tih kha motor bracket/hood hi a lo nia, pistol pathum leh Silai pakhat țhiahdarh vek hi a lo infun a, Silai mu erawh chu a hran pawha funlo chuan silai bulah chuan an dah nuaih ringawt a, a sir deuhah chuan sipai kawr ngeia intuam chu ka hmufuh ta! Pawisa hlir mai hi feltaka ințawnin a lo awm a. An fun uluk kher mai! Țhelretpuana tuamin feltakin an țawn a, a chungah Ram hmangaih kawrin an tuam leh bawk a. Ka auchhuak lo chauh chu a ni e. Huhuiii.....

Ka haikual leh thuak thuak a, Thil fun liam lemlo tak, ki țiuh țeuh hi ka haichhuak leh a, ka han phelh chuan sana, țhi leh zungbun, darthlalang leh pheikhawk siai hi a lo awm bawk a, țhi leh zungbun te lah chu Rangkachak vek a nih hmel lehnghal! Sana erawh a pawkhui a, a nung tawh chiah bik lo. Engatana pheikhawk siai chu dahtel ni maw aw...

A hawndan tur chu a buaithlak ta ber mai. Ka ipteah chuan a hnawhlen theih mai chuan ka ring a, chu pawh Camera dahchhuakin. Chutiang chuan hawpui ta tehreng pawh ni ila thlen inah ka luhpui ngam dawn bawk silo. 'A țhen a zar hawn țhen ta ila naktuk lamah a dang hi chu la ta zawk ila a fuh mai ang' tiin rilru ka siam a.

Ka bag a a thun mawlh mawlh lai chuan 'min enthlatu ten min hmuh chuan helaia hnutchhiah țhen leh hi a himlo tih ngaihdan ka nei thar leh a. Ka bag ah chuan a vai chuan ka hnawhlui ta hram a. Ka lawnna thingte chu ka sahchhumna laiah lei te kan tat nawk nawk a, kawrah chuan let thlain hnuhma hnutchhiah lo thei ang ber tur chuan ka kalsan ta a.

Ka bag ah chu a rit mah mah chu a ni. A hrui pawh a ri țawt țawt reng mai. Camera ka hmalamah ka ak a hnunglamah rawksai mar țeng țawng, bawr ve tak chu ka ni.

Mi hmuh hlautak chung chuan ka haw ta hnak hnak a, ka hnunglamah chuan hmeichhe pahnih bawrtaka thilphur an lo kal ve a, min umphak ka rin chuan loh vang chuan anni chu eng he hu ah ka ngai lem lo. Chuber ai chuan Lo chu chhuahsan vat ila, ramhnuai ngawah ka tan chuan a ralmuan thlak zawk ka ring.

Thlan tla hluama ka kal hnuah chuan Lo chu ka chhuahsan dawn ta a, min zui an awm leh awmloh hriat nan tiin kawngsir buh karah chuan rei fe hi ka țhu a, Nu pahnih thilphur te ningei tur thawm chu ka țhut vang vang hnu chuan ka hre pha ta hial a, min kal pel law law se a țha ang.

Ka bul an rawn thlen chuan tlangval pakhat kekawrbul ha hian a rawn chhawm a, an ti ti pawh ka hre pha nual a,  "Thlalakna a keng a, a kal kual a kal kual a, kan inhlauh daih alawm mawle," an mipa kalpuiin a tih chuan ka beng a verh kher mai. "Pu Ruata te lova kan kal laia Remthangi nu te lo zawn a kal loh loh kha a niang, rawksai ak awm than khan ka han hmu a, a hla deuh bawk sia" nu pakhat chuan a ti a.

"A nih dawn chu, rawksai chu a ah ngei kha mawle. Kan um a nge ka la um pha hman ang, ngaihsaklo min ti lutuk palh ange" tiin nupahnih te chu a kal pel a. Hmanhmawh zetin vau lamah chuan a kal liam zui ta kha a nia.

Chêr ria lampang, fip hmel tak, phakar hmel zet mai hi a nia. An chetphung pawh an thup thiam awm hle kha mawle. Tikhan min lo han um vang vang sela a hnungah muangmarin kan kal ange.

Minute 15 vel ka'n țhu muang leh a, meizial te ka zuk kham hnu chuan muangchangin ka kal leh ta a. Ni suk chen vel a la awm ang tih chuan kawtchhuah ka chuang chhuak dawn hnai tawh a, ka thil ah chu thuhrukna ka zawn a ngai a ni.

Kawngsir veilamah chuan hnimpik karah ka lut phei a, Bêkte tiat vel tur lungpui hi ka va hmufuh hlauh mai a. Chumi chu chhinchhiahna a hmangin dahțhat a rem viauin ka ring a. A thlanga bahra khur niawmtak mai ka hmuh chu ka hai fai thuai thuai a, a va'n remchang tehlul em aw.. ti rilru chung chuan a tuamna chu ka phelh mawlh mawlh a, pistol pakhat leh a mu paruk chu ka dah hrang a, a dang zawng chu uluk fahran hian ka tuam țha leh vek a, khurah chuan ka dahlut ta vek a. A ko chhete chu chemte chuan ka cho chim a, a chungah hnim leh hnahthel ro chuan ka haikhuh leh vek a, chuti mai chuan an hmu bik kherin ka ringlo.

Ni tlak suarah chuan ka thleninah chuan ka lawi hman hram a, ka thlenin nu chuan 'I hlawhtling maw, i chau em?" a lo ti sawk sawk a. Inbual tui tur te min lo lumsak thlap chu niin "Mami, inbualtui han siam sak la, in tifai rang sela a hahdam hma zawk ang" a tih chuan a fanu chuan thuka ketli liana an tuichhuan lai chu bual pindan lamah chuan a chawi lut nal nal a.

Fanu duatlai meuhin inbualna tur min siamsak bawk a, nuamti tak chuan ka inbual phar phar a. Ka inbual zo ka chhuak chu TV en niawm tak chuan Fanu duatlai Rintluangi, Terini chuan min mitsir reng tih ka hai hauh lova.  Inchunglamah chuan Hrukpuan veng țat chung chuan ka chho nghal daih a.

Ka inthlak zawh chuan inhnuailama chhuk mai lovin Pistol chu ka țhiat darh a, BA kan zirlaia NCC a ka lo țan ve hrep tawh avang chuan Silai han țhiahdarh chu ka harsat fahran lo. A chhiatna lai awm ka hmu lem lo, Tel hnawih ila han chiah deuh vang vang ila a hmantlak leh maiin ka ring.

Chutia ka hruk hauh hauh lai chuan pindan kawngka chu alo inhawng thut a, Terini chuan nui seih chung hian "I van phu nasa em em" a rawn ti lut a. "Ka lo inngaihtuah nasa lutuk a" ka ti ringawt a, khum hnuaia ka thil rawlhluh chu ka ke chuan a aia thukah ka nawr lut leh sauh a.

"Ka nu ril a țam deuh a niang chawei a rawt a, lo chhuk la" a ti a. "Awle, ka lo chhuk nghal.." ka tih chuan min chhuksan ve leh mai a. A liamta maw tihah chuan ka thil țhiahdarh chu ka remkhawm leh sawk sawk a, ka bag ah pawh dah lo chuan Khum bula Almira hlui zet, a chhunga puankawp leh rizai vel an dahna karah chuan ka rawlhlut daih a. Chawei tur chuan ka chhuk thla ta a.

Zanriah kan eikhama TV muang mara kan țhutchilh lai chuan Nu Zari chuan "Terin, i pite vaimim chu i lo hawn si lo a mi?" chhuar hai mawlh mawlh pah chuan a rawn ti a. "E..ka theihnghilh daih, ka haw dawn khan an sawi leh bawk silova, ka va la leh mai ang, ka eichak nen a le.." a ti niah niah a.

Pindanah chuan a va lut a, A chhehchhawl kawr chu thlakin puan chhete hi a rawn bat chhuak bawk a, "U Sangzual, tih tur i nei em?" a rawn ti a. "Nei hran love, kalpui i ngai a mi?" ka lo ti var a. " I peih chuan min kalpui la" a ti a. A pa chuan min melh hrek hrek tih ka hre reng!

Kan inzuichhuak dun ta thova.

Kal lamah chuan kan ti ti bawrh bawrh a. A zirna chung chang te, ngaihzawng chungchangte chu kan sawi dun a, "Hmangaihna hi keichu engnge a awmzia pawh ka hre lo" a ti kher chu ka run kher mai. "I la hre dawn nia" ka ti sap a. Min melh zeuh pah chuan a nui sak a.

"I awih meuh nange?" Ka ti leh hram a, "Awih a awihloh tur pawn ka la tawng ve hleinem, ngaihzawng te chu ka nei ve țhin a, hmangaih hi ka la neilo niang ka ring, han sawifiah la, nang i hrechiang deuh ang chu" a ti a.

"Hmangaihna hi hrilhfiah chi ni pawhin ka hrelo, a taka tawn chi niberin ka hria. Hetiang hian.." tih pah chuan a banah ka hmersak a, ka lamah chuan ka pawt hnaih sauh a, a țang hman meuh lo chu ni e. A tukkhumah dawmin a hmui chu ka chuktuah nghal var a.

A țang țak mai.

Ngawireng chuan kan kal dun leh nghal mai a, a pite in pawh kan thleng zui deuh mai. Țhutpawh țhumuang lo chuan kan chhuak leh nghal mai a, ngawireng a engngemaw chen kan kal hnu chuan, "Terin, i thin ka tirim a nih chuan min hrethiam dawn nia" ka ti ta ngawt a.

"Rim love" a ti ringawt a.

"Mahse, i awmdanah a lang tlat bawk sia"

A ding thut a, "Engmah a ni lo, ka thinrim lo tak tak alawm" tih pah chuan a thil khai lai chu a then a then a. A dara dawm pah chuan "Tak tak maw?" ka han ti zet a. "Umh.." tih chiahin min chhang.

A khabe chu dawmsakin ka chawikang a, a hmui nemthep maiah chuan ka fawhsak leh ta vawng vawng a. A insum bik ta lo, a thil kenlohna lam chuan min kuah ve ta hnap mai a, ngaih a ngam siai siai mai alawm le.

"Terin, ka duhzawng tak i ni" ka'n ti tawng mai a. Min chhang hran lo. "Ka hmuh tirh ațang che khan ka rilruah hian i awm reng a sin, mahse khami ni a ka hmuh hmasak ber che kha chuan i bulah hian ka awmtheih ka ring ngailova" ka ti sap a.

"Ih maw...kei chu engtikah emaw chuan tuna kan awmdan ang hi a thlen ka lo ring a sin" a ti reuh a.

Reingial chu kan ding dun a. Inkham lo tak chung chuan an inlam pan chuan kan kal dun ta a.

A nu chuan anțam tlak tur hi a lo túm mawlh mawlh a, kan lut a hmuh chuan 'Kheh nghal law law rawh u, chhum nghal ang" a ti a.

An chawei dawhkanah chuan kan khehdun nghal mawlh mawlh a.

Shillong lam chanchin sawiin kan ti ti nasa khawp mai, a nu chuan inhresa emaw te min lo ti vel a!

A pa leng chhuak a lo haw a, Thingpui a in zawh hnuah khumlam a pan mai a, Terini nen chauh chuan vaimim chhum chu tapchhakah kan vil dun ta ran mai kha a ni.

A awmdan ațang chuan a lâi ve deuhin ka hria, chaicheh chuan tapchhak chu a thai a thai a, mi a melh leh zeuh țhin.

A kutah dawmsakin ka khalsak ta niap niap a, na mang silo hian kan insi leh țhin a, a hrehawm hauh lo mai.

Kan thil vil kan suanhnuah pawh reitak chu kan la meng dun a, zan hlimawm tak, bulțanna țhatak a ni.

Khuma ka han mu fel zawt chu thleninpa in min rawn endik leh ngei ka ring a, ka lo phâwk dawn nge, engtinnge ka tih ang aw, tihdan mai avang si. A rinhlelh lo tur zawnga chet a ngai bawk si nen chuan tihdan tur ka ngaihtuah nasa mai a, țha thawkhat tak mai chu ka hrechhuak tain ka hria.

Choka lamah chuan thawmdim deuhin ka chhuk thla a, hmanraw remchang han lak mai tur a vang viau mai. Tapchal a chingal bûr atana an hman saidawium chuan ka mit a la hle mai, Chingal bur chu lain tuidehnaah chuan ka leihbaw zet a, burdangah chuan ka chhunglut țhen ta zawk a.

Chutia ka tih zawh hnu chuan inchunglamah saidawium nen chuan ka chho leh ta a, pindan luhna kawngka chu pindan chhunglama hawn a ni a, tlem tikau deuhin ka khâr phui duh lova, a chungah chuan remzet mai hian saidawium chu ka tung a, kawngka hawng an awm chuan chu saidawium chu a tla lo thei lovang. Kawngka luchunga bangrela mi lo tla emaw a ti ngei turah ngai ila. Tichuan rinhlelh awm lutuk lovin kan in phâwk thei mahna.

Thâwm a awm veleh rangtakin khum bula plug chu ka hmet a, chhun vanglai angmaiin kan inhmuchiang ngei ang le.

Mengchunga nghah ka tum teh reng nen chhunlama ka vahkualna ka chau deuh a niang ka meng hleithei dêr lo mai a. Ka muhil tlang bik em lovang chu maw.

Saidawium tlari bawlah chuan ka harh chiang kher mai! "Engnge ni?" ti țhawt pah chuan plug chu ka han on a, beisei ang ngeiin ka thleninpa lu tuai vat vat chu ka va hmu a, mak tih hmel zet chuan "Engnge ni ta?" ka ti a.

"A eng nilove, i rum i rum sia i mu diklo deuh emawni ka'n ti mawle" a ti ve mai a. A awihawmloh ber awm e.

"A nih chu mawle, a va'n zialo ve" ka tih sak ringawt a. Saidawium keng chuan a chhuk leh ta hnu hnu a,  a rawn kal nawn leh ngeiin ka ring, pawi pawh ka ti lem hlei lova chu ringawt chu. Engmah han hmuhchhuah tur a nei dawn chuang lova tiin ngaihngam tak chuan ka mutthilhsan ta daih a.

A tukzinga tukțhuan eitura kan han inhmachhawn zet chuan a chal a pawng lang mai le! A ruk chuan ka nui tet tet lo theilo. A chhungte bulah chuan engtin tak sawi ang maw ka ti.

Ka tihtur ber ka zo fel khat ta bawk a vawiin chu zelthel deuhin a awm theih ang chu maw ka'n ti zet a, rinhlelhawmin ka langthei dawnin ka hre leh deuh si, vakchhuak tur bawk chuan ka insiam leh lo thei lova, ka thleninpa chuan kalpui tur an nau min han kawhhmuh a, min zuiruk leh ka rin tho vang chuan 'A ngai love' ka tih sak kha a nia.

Camera nen, chawfun nen chuan ka in ak hnawk leh ta rup mai! Terini chuan sarêp hranghnih a thukphum chu a țhet chat chat a, Hmarcha leh chi nen chuan min bawk sak a.  'Lo haw vat rawh aw' a nute hriatloh tur chuan a ti sap a.

Hmarlam kawtchhuah lam pan chuan ka kal ding ta liah liah a, ka tum ber chu khawilai lungpui chungah emaw hunawl hnawhkhah nana va mutthluk mai mai a ni. Tihtur dang nei nghal hek lovi mawle!

Vengtawpa in hnuhnung ber ka pel fel a, lo fîngkhat emaw vel ka kal leh hnu chuan a awm tawh ngailo emaw ka tih țhin ka hmu hlauh mai! Lung a va'n tileng reuh tak e aw..

Chu chu 'Thingfak Missionary' kan tih țhin ngei mai kha a nia. Nu leh nula thingphur ten an thingphurh ațanga an phal ang zat an dah țhin a, chumi chu hralh lehin kohhran hmeichhe lam sumhmuhna ki khat a lo ni ve reng mai a, țangkai tak a ni. Kohhran hmeichhe lamin a dahna hmuntur khawdaifem deuh, kawng pengțhuam emaw remchang laiah an siam mai țhin a, rûk thianglo leh Pathian ta a nihna kha kan tetlai pawhin kan va chiang țhin si em! Lung a ti leng hle mai, tunah chuan hmuh tur a awm zen zen tawh lovang.

Nunhlui min ngaihtuahtirtu ka hmuh tak avang chuan kan tetlai chanchin chu ka ngaihtuah zui reuh reuh a, kalkawnga Sairawkherh lo let ngât mai chu kalpelh mai ka'n tum zet a, naupan lai ngaihtuah lai nen a in hmeh chho viau mai, ka chhar lo thei ta lo a ni. Duh leh hawlamah ka dah leh mai ang chu.

Naupan laia kan khawsak dan ringawt ka lo ngaihtuah a talangin ka lo kal thui fe hman ni tur hi a nia, kawng lah chu ka pêng diklo nge ni chul kawng pawh a tluk meuh tawh lo.

Khuangthli kung lianzet mai kawngsira ding behchhan chuan chhuak zet chuan ka zung tur tur a, thun pawh ka inthun fel hma chuan ka hnunglamah chuan thawm ka hre leh ta tlat mai! Min zui an awm lehpek chiang!

                        Chapter

                              III

A hmawrbawkna pawh thingper hmanlo chuan ka thun vat a, khuangthli kung phenah chuan biruin ka lo sakuh sernghah ta ngawt mai kha a nia.

Rei a ni lo. Thâwm chu ka hrezui mai a, thâwm an dim ve deuh a ni ngei ang an kal bawrh bawrh lo khawp mai.

Ka bihrukna khuangthli kung an kal pelh hnu chuan fimkhur takin ka bih dâk dâk a, mi pahnih bawk an ni leh tawh! Pakhat phei chu nimina ka hmuh zawk kha a ang viau leh nghal a, a hnunglam hmu mai ka nih vang erawh chuan ka chiang ngam chiah chuang lo.

An liamfel ta maw tihah chuan an hnungchhawnlam hawi chuan chak zetin ka liam chho ve nghal thuai a, min umpha har viau chuan ka ring.

Kawihnih kawithum emaw lai ka kal hnu chuan chutia han bikbo san leh ngawt mai chu dik berin ka hre ta lo riau mai a, engtin emaw tak tih an ngai a ni. Mahse, min zui ngei a ni tih han fiahna tur ka nei em em bawk silo. Thildang engemaw tih chhuanlam tur an neih chuan ka khawk ve thei tlat! Engtin emaw tih ve ngei ka duh bawk si.

Tawi hrut hrut chung chuan ka inngaihtuah a, 'Hm..a țul a nih leh kan inpawmchilh tawh mai ang chu' ti rilru chung chuan ka kalsan tak lamah chuan ka let leh a, min hmuh mailoh chuan min hlohna lai velah an lo let leh ngeiin ka ring a, chulai bawra lo chan chu a suallo berin ka ring a, chuti a nih loh chuan anmahni zawkin min lo chang khiau thei tlat!

Khuangthli bul ka zu thlen chuan thawm kan ngaichang deuh a, engmah hriattur a awm lo. Ngawhnuai dairuih mai chu thehmeh ang maiin a reh tlawk tlawk ringawt mai a, hla phuah thiam chu ni ila chhamchhuah tur a mual mual chu a awm ngeiin ka ring.

Ngawhnuai chu a thelh hran lemlo khawp a, hmunphiah hung leh luang bawn in a bawh nual mai. Engah nge maw kei hi ka lêt leh kher aw.. Ka chêt chhiat ai tur te hi a ni roh ang ka ti.

Kawngchhaklamah chuan per kaiin kawng langthui thei laiber tur chu ka zawng a, chulai bawr chu hmunphiah hung awm khât deuhna lai a la ni zui a, a pawi love, luang hmunah zawk le.

Hâl ila a alh hluai mai awm mange tih tur luanghmunah chuan kal harsa ti zet chuan ka lut chhova, thingkung te chu awm tho mahse hmundang angin a zing ve lova, ka dinglai chu ka lansarh viau ka ring. Ka țhut erawh chuan kawng ațang chuan hmuh mai theih tur ka ni bik lovang.

Ka țhutna tur te chu haikaw chawpin ka han siam rem a, an hmel tal ka chhinchhiah loh chuan nakinah an lak ațangin harsatna te pawh tawk ta ila a buaithlak ang tih chu ka rilru a ni ta ber awm e.

Ka țhutna ațang chuan hnimkarah kawng chu a lang raih a, an rawn zawh a nih ngai chuan tu pawh nise hmuhloh theihlovah ka ngai. Camera in an thla ka la hial teh ang.

Camera chu ban mai theih turin ka hung rem a, thawm lah chu a reh tlawk tlawk mai bawk si.

Ka bula lungchang chu ka chemte ken chuan ka vel ka vel ringawt mai a, tih tur dang awm chuang heklo mawle.

Ngaihtuahna thar ka neihbelh hlauh asin le! Lungchang chu saihlum aia lian mah tur hian ka siam a, mum pawh mum țha manghleilo chuan panga emaw lai ka siam hman.. Thawm ka hre ta!

Khuh kharh thawm chu ka thlang lam ațanga lo richhuak a ni. Chuti a nih chuan kawng chu an rawn zawh chho leh a ni ngei ang.

Camera chuan ka lo tin nasa mai a, an rawn lang ta ngei a, mi pahnih te chu. An hawikual nasa mai le..

Camera chu ka han hmet dawn a, engtinmah a awm thei hauh lo mai a, ka'n tinawn leh țhin a ngai ang bawk chuan hmehloh ang hlauhin a awm zel mai bawk si.

Camera chu dahin Sairawkherh zawk chu ka phawrh chhuak ta a, lungchang ka hrual ngei mai chu a phanah chuan ka han hmeh bel a, âwm si rat khawpa ka kawihfân hnu chuan a tumram pan turin ka thlah ta!

A hmaa ka zunna lai, Khuangthli zawn vel taka thlanglam hawi zawk chu "a nah" tih pahin a eu zawk mai a, a hnungzang takah ka perhfuh a ni ngei ang.

A țhianpa zawk tum chuan ka perh leh thuai a, a hma a mi bawk chuan a malpui a dawm leh chut pek a! An hawikual nasa tawh mai!

A vawithumna tur ka perh chuan a fu tawh chêk ang chu maw tiin ka thlah leh a, a ngai bawk chuan a lu a hup rang kher mai! A va zeiloh theih ngai ve aw..

"Kal ang" tih hmuk pah chuan a kal nul nul a, a bula mi pawh chuan a zui ve mai a, ka zawn an lo thlen lai te chuan han perh thum leh dawp mai ka va'n châk tak! A ni em silo. An liam tur chiah chu a hnungzawka kal hnungzangah chuan ri kawng khawpin kan perhsak leh hram pek a, a tlan zawk mai!

Pakhat chiah ka nei ta.

An kal hnu feah chuan ka che châng ve ngam chauh a, kawngah min lo chan ka hlauh vang chuan ka kal ngam lova, ka chhak tlâng lampan chuan ngawpik tak karah chuan ka chho ta a. Tlang zawl chhuak chho tur pawh chuan ka beirei khawp mai, thip sup sup chung chuan ka chuang chhuak thei ta hram a, khaw awmna lam ka hriat tho vang chuan ka bo pawh ka ring hran lo.

A lum bawk si, ka thak nasa sup sup bawk si nen nuam chu ka sa lo viau a ni.

Tlangdung mualrem lai chu zawhin khawchhung lam hawi chuan muangchangin ka kal ve zel a, ka khawsak dan vel chuan lung a'n ti leng lo khawpah!

Tutenge hetia min umkual vel tute hi ni ta ang le? Engtinnge min rinhlelh nachang an hriat? Ka pain Sailiana a tih kha he khuaah hian a awm a ni mai angem le? Chuti a nih loh vek pawhin a fate emaw, he thuruk hretu hlanchhawn hi a nei a ni ngei ang.

Ka thleninpa ber lah hi han zawt ngawt dawn ila a phusak hmel viau mai bawk sia, zawh chi a ni mang silo. Sailiana chungchang hi ka chinfel phawtloh chuan he khua hi chhuahsan pawh ni ila 'ro sum' vang hian umzui ka ni dawn tho thoin ka hre tlat. Min ringhlel a, min umzui a nih chuan awlsam taka an tawp mai a rinawm bik loh.

Sailiana chungchang chu zanah Pu Thanga va zawt ila a țha ang.

Kal ve reng ta chuan ar khuang ri te pawh ka hre phak ta hial in ka hria, kawng pangai pawh loh a țhat zawk ka rin vang chuan khawlu lam pan zawng chuan ka kal lui zel a, dãm pangperah mi huanah hian ka va chuangchhuak hlawl a.

Khua lah chu a tlai mawh phian bawk si, dar 1 erh awrh chauh ala ni mai si a, hahchawlh vang vangna hun ala awm e.

Thlam chu a inkhar țhap avang chuan kal an awmlo a nih ringin ka pan phei ta zel a, huan hlun ve tak a niang an thlai pawh a puitling țhulh tawh a, a vanglai chuan sum tam tak dekchhuak thei tur a ni. Mahse, an khua hian a zir lo em a, chuti tak chuan sum chu an lakluh phah pawh ka ring chiah lo!

Thlam chhungah chuan ka han mu diai diai a, hah a dam khat deuh hnuah chawfun chu țhetin Terini sarep min pai nen chuan chaw ka fâk a, a puar theih viau a ni.

Thlam châr lama kawng kalphei riah mai chu tuichawikawng a nih ka'n ring thlangawt a, inbual thlandai tur chuan ka chhuak phei ta a.

Tuihna alo țha khawp mai a, Pipe hmangin chhaklama mi an la thla a, kawrkam hmun rem deuh laiah chuan an hawtir tur tur a, engatinge thlam kawtah an hawtir mai loh le tih ka rilruah a lo awm deuh.

Ngaihtuah mang hleilo chuan ka thawmhnaw chu ka lo hlip fel vek tawh hi a lo nia! Patling țhakin meuh ramhnuai mah nise chutia saruak nglngata han awm takah chuan mahni chauh pawhin kan lai ve țut thei tho hi a lo ni a, hawi kual hruk hruk chung chuan tuikhawhah chuan ka va ding ta kha a nia.

Sahbawn takngial pawh a awm mang bawk silova tih leh dan tur avang viau. Inkhawhtir tawp chu a ni deuh mai, a nawm erawh a nuam viau thung.

"Kha va nuam awm ve.." tih ri ka hriatna lam ka'n hawi chhuak chu pa pakhat silai keng hian min lo thlir reng chu niin! Kan inhup ve țit țet tak nain a hmu vek tawh awm sia, zah a reh phah meuh lo.

Chu ber aia ka rilru kaptu chu 'Pu Sailiana chu amah hi a ni mai angah' tih a ni. Ka hmanraw ken chhun Sairawkherh leh Chemte lah chu va ban mai phakah a awm silo. Ani lah chuan Silai a keng miau mai bawk si.

En pawh en lemlo chuan 'Kha khawilam nge?" tih pahi ka thawmhnaw dahna lam chu ka pan a, a ruk tak chuan 'che tawh suh' min lo ti ang tih ka hlau viau a ni. Mahse, chu em chu a thleng ta love.

Ka inhak mawlh mawlh lai chuan Tui chu a lo dawh a, "Pi Zari te mikhual kha i ni em?" a tih chuan ka thaw a veng ta huai a.

"Aw ni e, kha sa i chang dawn em ni?" ka lo ti var a.

"Nia, lo lamah kal an tam țhin si a, helam hi kan hrut ange ka ti deuh alawm mawle" a ti ve mai a.

Thlam lam pan chuan kan kal dun a, thil eng engemaw sawiin kan ti ti dun luam a, remchang lain Pu Sailiana a hriat leh hriatloh chu ka zawt thawr a.

"Chutiang kan khuaah an awm awm ka va hre lo ve mawle, Satkunga chu an awm ngei mai a" a ti ta lek mai a. "Ramhnuai mi ah te pawh a țang ve țhin a ni awm e, ka pa țhianpa a nia, inkhuaah hian a awm an ti mai a, ka'n zawng chhuak duh deuh mawle" ka ti ve mai a.

"Ramhnuai sipai a țang chu i thlenna pa te pawh saw an niah, pahnih pathum vel chu an awmin ka hria, tu tunge maw ni ta kha le.." a chiang lo phian reuh bawk si maw.

Ani huan mawnglamah a chhuk a, kei haw turin khawchhunglam hawiin ka kal thung ta kha a nia.

Chaw ka eihnem deuh nge ni kawngchho ka kal hlek chuan ka thaw he hu nghal zel mai a, thlan lah chu a'n tla rang khawp leh nghal a.

Sailiana hmingpu an khuaah hian an awm lo, mahse engatinge enthlak reng ka nih bawk si! Sailiana chu boral tawhah ngai ta ila chuti a nih chuan a țhian țha emaw, a tu leh fate hnenah thu hnutchhiah a nei a ni mai angem le?

Mahse, chutiang chu lo ni ta ang se midang an hrilh chhawng phal awm silova, ka thlen inpa inrawlh ve dan hi ka hrechak tak zet. Sailiana țhianpa a ni thei mai angem?

Naktukah emaw khua hi chhuahsan ta ila, haw tur ang takin. Khaw țhenawm vel ațangin ka thil hmuhchhuah ho chu a ruk deuh hlekin va la leh ta mai ila a va țha awm ve.

Chuti nilova, ka thuam ken bak ka chhuah pui chuan ka rinhlelhawm ting mai dawn si.

Mahse, Terini hi.. Ka duh viau asin.

Mipain ruahmanna kan siam fel a nih chuan hmeichhiain kawng min dal tur a ni lovang. Hmeichhia an inrawlh hian buaina  a tam țhin.

Khawchhung chu khawlu lam ațangin duhdan thlapin ka lut ta, nuih a za lut ver ver mai lawm le.

In ka thlen chuan a lo reh țhiap a, a inkalh bawk si lova tunge maw awm le. Terini room chu ka va bih dêk dêk a, a lo muhil bam a, ka lut lo thei lo.

Boxer tawngchham deuh mai leh tawnzau hi a ha mai a, a taksa langlai chu a thianghlimin a duhawm kher mai.

Engtin emaw tal ti lova han chhuahsan leh ngawt atan chuan a uiawm deuhin ka hria. A chawn ațang chuan ka chul chho dân dân a, a zi țiah țiah a, inleh thak pah chuan a rawn meng a, a phu ve deuhin ka hria.

"I lo haw tawh elo?" khik sek pah chuan a ti a.

"Umh...nih hi. I va mutui ve"

"A lum lutuk a, min ti zawi zo vek alawm, i lo thlenna a reitawh a mi?"

"Rei love, ka lo thleng deuh chiah zawk"

A rawn țhuchhuak a, ka darah chuan a rawn kuah a, a bei tlân a.

"Naktukah haw mai ka tum asin"

Min kuahna chu a thlah chiang kher mai! "Maw..? Naktukah maw?" a ti a.

"Aw, ka tihtur ka zo tawh a, mikhual nih reng chu a nuam lo"

"Aaa...i haw daih te chuan?"

"Hm..hei phone te a awm thova, a inbiak theih reng tho lom, lungngai lutuk lo la.."

"Awm reng turah che ka lo ngai asin, engtinnge kan inhmuh anga chutiang te chuan?"

"Tak taka kan kalthui hma hian ințhen mai a țhain ka hria, kan awmna a in ang bawk silo, i tan pawh a hrehawm mai mai dawnin ka hria, zirlaite ila ni bawk sia"

Ngawireng chuan min en a, engnge a ngaihtuah pawh ka hrethiam chiah lo.

"I tan mi țha tak, pasala neih tur hi an tam ka ring. Harsatna ka thlen tam hma che a ka inthiar fihlim mai hi i hmakhua atan a țha zawk. Pathian ruat kan nih chuan kan tan hunțha a her chhuak ve  mai ang"

Engmah ala sawilo cheu chu a mak ka ti ta viau. Khumah chuan a bawk a, lukhamah chuan a hmai a phum tlat a, a khur der der a, a țap a ni ngei ang.

He khua nen hian inkungkaihna nei hauh lova felfai taka chhuahsan ka tumna chu harsa dawn viau mahse ka thei ve maiin ka ring.

Ngawirengin ka chhuahsan a, ka inbual fai hnuah chuan motor neitu te inlam panin ka chhuak phei ta kha a nia.

Khawilaiah mah chuan kan bet tawhlo, khawlaiah te chuan min zuitu awm reng hian ka hre tlat a, ka nun a nuam lo viau a ni.

Zanriah kan kilho lai pawh chuan Terini chu a lo tho chhuak lova, a nu ka zawh chuan 'a nuam samlo deuh a ni awm e' a ti mai a.

"Naktuk lam hian haw mai ka rilruk deuh a.." ka tih chuan an nupa chuan min en ha a. "Chuti vut vut tur em ni dawn, i duh ang te i ti hman em ni, i inthlahrung te hi a lo ni ange" Nu Zari chuan a lo ti thuai a.

"A, ka zo khat chuan ka hria, zawh tih tak tak leh zawhloh tih tak tak pawh a awm thei chuang lova, ka duh ang chu ka nei thawkhat chuan ka hria" ka tihlai chuan ka thleninpa chu a nersak in ka hria.

"Khaw țhenawm lamah naktukah phei ila, sawta țangin muangmarin ka kal leh zel ang chu te ka lo ti deuh a" ka tih zawm thuai a.

"I lo inthlahrung te chu a ni lo maw.." thleninpa chuan damduai hian a lo ti a.

"Thlahrung lah love, hei mahni in ang maiin ka rawn khawsa a, a nuam ka ti khawp mai. Chhungkaw thar ka nei e ka lo ti mai a" ka ti a.

"Naktuk chu keini pawh khawțhenawm lamah BDO dawr kan ngai alawm, kal i duh țalh a nih leh kan chhuak pheiho dawn nia" a ti zui a. A va remchang leh zel em aw..

Zanah chuan Pu Thangate inlamah bawk chuan ka va chuangkai leh a, ani pawh chuan Pu Sailiana chu a lo hrebik hauh lo mai a, an khuaah chutiang hmingpu an awm ngailoh thu meuh patlingin a sawi chuan hnial rual niin ka hre bawk silo. Tihngaihna a vang ta viau mai.

Chuti a nih a hnu chu ngaihthah luih ve deuh te pawh a ngai dawn a ni ta ve ang. Duh ang thlip thlepin thil a kal theilo ni mai rawh se.

Hma takah ka mu thuai a, thil danglam viau tur awm ka hriat loh vang chuan ka hlauthawng teh chiam lova, min zuiru tute tan pawh han hnem hnanna tur sulhnu ka hnutchhiah lo viau chuan ka hria. Beidawng ve tak mawle.

Terini ringawt ngaihtuahin ka lo muhil a.

Min en veng veng a, a mittui luang tur chu a dang hram hram niberin ka hria, ka khumah chuan rawn țhuin ka pum zawnah chuan a kut a nghat a, thawm dim tak chuan a insût leh hraih țhin a.

Muangchang chuan ka sirah chuan rawn muin ka nãkah chuan a rawn zen lut a, hm.. Ka mumang a ni hauh lo mai ka ti. ka hnungah chuan a mah ngei chu a thaw lum ham ham a, ka harh chiang viau mai.

Ka mut ngai chuan ka mu reng a, engtia han tih vak pawh ka tum chuang lo. Ka rilru erawh a ti hrehawm viau a ni.

Chutia reife ngawirenga kan awm hnu chuan inhnuailamah penthawm a lo awm a, apa alo lut leh ngei dawn a nih ringin mutthilh der theih niheklo, inher pahin ka rizai chuan ka khuh nghal a, hriatthiamloh hmel zet chuan a rawn in hai hawng hlawl a, thawm chu a hre velo a ni chêk ang 'I pa a lo kal' tih leh khuh ka rual leh nghal a.

Ka lu chu ka dahchhuak a, pindan chhung chu a thim tho vangin pahnih kan mu tih a hriat ka ring chiah lo.

Fimkhur taka pen thawm chu ka hre ta ngei a, light ka on leh thut chak mange aw..

Ka bag lam bawk chu a tum leh pek niin ka hria, muhil awm tak chuan ka thaw sûk sûk a, ka bula mu erawh chuan min țham ngawt ngawt thung a.

A zanthumnaah pawh hlawhchham bawkin a kir leh ta, eng rilru tak pu ang mawle.

Thawm a rehfel hnu chuan rizai chu ka keu kau a, "Engnge awmzia? Engnge a rawn tih?" a ti sa sa a.

"Ka muttui leh tuiloh a rawn en a niang" ka tihsak ringawt a.

Sawizuitur avang kher mai.

"Nupui i nei tawh a mi?" rin loh deuh mai chuan a ti leh sap a.

"Neilove.."

"Ngaihzawng tal..?"

"Nei chuanglo"

"Ngatinge hetia min tih si? Engnge harsatna i neih?"

"Chhunah ka sawi tawh kha, i tana țha tur zawk a ni"

"Țhat phah lo ta ila"

"I țhatphah ang, tunah chuan a hlimchhawn ala nia, i hrethiam chho ve mai ang"

"Min duh loh vang mai mai a ni tiraw, puitling takin sawi mai ta che, chhuanlam dang siam kher lovin" a ti leh a.

"Ka rilru diktak alawm ka sawi, chhuanlam dang engmah ka nei lo"

"Nang chuan min kalsan ang a, hlimtakin i awm thei mai ang tiraw, mahse kei hi engtinnge ka awm ve tak ang le?"

Ngawirengin kan mu dun tlawk tlawk a ni ber mai, tisa chakna lam pawh a lang meuh lo.

Muhil si lo, sawitur em em awm bawk silo chuan khawvar thlengin kan awm dun a ni ber e.

Khua a var chiang ta tihah chuan a tho țham țham a, ding chung chuan reife min thlek leh pek a, keipawhin  ka en lo bik chuang lo.

Lo kunhniamin min rawn fawp a, "Ka lo nghak reng ang che" a ti sep a.

Tukțhuan chu kan kil kim ta hram a, Terini zia erawh damlo tak tak a ang viau, hrethiamlo tan chuan.

Chaweikhamah chuan nimin lama sawirawkherha ka perh ngei mai kha a lo lut hlawl a, ka nuih a za ru viau mai! Ani chuan motor chu a rawn tinung ta vut vut a, an motor khalhtu a nih hmel e.

Min mitmei ru reng nachungin ka bag kensa bak ka chhuahpui ta silo chu mak an ti viau ta ve ang.

Terini lang ve hauh lo chuan minti hrilhhai viau a ni. Tihtheih dang awm nghal hek suh motor ah chuan ka lawn ta nge nge a,  nuber chuan 'i lo zin leh vat dawn nia' te chu a tih ve luap luap tak kha mawle.

A nu te pindan tukverh ațanga min thlir reng tu chu ban vaiin kan herliam san ta a.

Kawng a țhat loh vang chuan km 15 bawr lek nimahse darkar 1 leh a chanve dawn kan tlanin ka hria. Mawng chu kham duh nget nget tak a ni. Thlen in pa lah a țawng tuitam teh chiam bawk silo, motor khalhtu lah ka perh hrep hnu kha a ni bawk sia, ka hmel em hmulo mahse min ringhlel tho tho dawn sia, an lak ațangin thil ropui tak ka beisei teh chiam lo.

Ngaihtuah chhuah thut erawh ka nei! Motor hi tidingin silai emaw hmangten min vau ta se engtin nge ni ta ang? Sumo ah khan lo chuan hle hle tur a nia aw. A van ngaihtuah tawi thlak țhin em ve le.

Ngawirengin ka bag a Pistol model hlui zet chu ka la chhuak a, chemte pawh phawrh mai theih turin jipper ka hawng huau bawk a, a hnunglama chuang zawk ka ni bawk a engemaw palh pawh thleng se ka che chhe bik lutuk lovang chu maw.

Chutiang em chu thleng lovin 'Kan lo lawm a che, khawchhung dan te bawhchhe suh' tih intar te kan tlan pel ta, thaw a veng ta huai e.

Thlenin chungchang bawkin ka rilru a tibuai, hmelhriat lah ka nei der mai bawk silo. Dawrkawna min dah mai turin ka ti ta ngawt a, thlenin tur ngaihtuah pahin a hmaa ka chawlhna nu kha pan leh phawt mai țhain ka hria a.

A dawrah chuan kan in mangțha hnu chuan ka lut zui a, min lo la hria a ni chek ang, "I va tluang maw" te chu min lo ti ve hlut a. Reingial kan titi hnuah "Khawnge i innghah a?" min ti a.

"Innghahna pawh ka la neilo, ka rawn lut thawr ringawt a nih hi" ka ti ve mai a.

An dawr hnung mai chu an in alo ni a, rinloh deuhin ka thleng fel chu a ni der mai.

Zanah Hmunzawl lama lêt leh ka tum avang chuan zanriah ei dawn ruaiah two wheeler hman tur zawngin ka vak chhuak a, thlenin nu min kawhhmuh, annaute veng tawp lama mi te chu biak tumin ka va pan ta thawr kha a nia, temchang tak maw le. Engtinnge chhuanlam ka siam dawn ni.

An in min kawhhmuh ka thleng țep tawh tihah chuan Hmunzawl lam Gypsy, ka chuanna kha veng tawp lamah chuan ka hmu leh ta tlat mai pek a! Ni lah chu a tlaruai tawh mai bawk si. Ka rilru chu a ti nuamlo viau mai. Ka tumram pawh thleng ta lo chusn ka let leh ta daih a.

Zanriah eikham, thimhmulah chuan kawng pangaiah pawh kal lovin kawmkar ațangin ka put ru a, țhenawmte inhnuaiah lut pheiin huanah te ka kal ang nawk nawk a, chutiang chuan in sawm dawnlai pelin kawngpui chu ka pawh ta chauh a, min chang an awm palh hlauh chuan ka bum nalh ve viau mai thei. An awmloh chuan a ho viau thung ang.

Jumper lukhum awm ngei chu lumti chungin ka inkhum hlun a, vengtawp lam pan chuan ka thawk chhuak leh ta kha a nia.

Gypsy chu a la ding ta cheu mai ka ti.

Heti a nih chuan engtinnge ni ang? Min thlithlai char char a ni khawp ang, Hmunzawl lamah chuan let chi pawh a ni tawh hauh lovang, mahni luzuar kan ni mai dawn asin.

Aizawlah chhuk daih ila, thatharin khaw țhenawm ațang hian han bei țha leh ila a fuh ber tawh zawk ang tiin rilru ka siam fel ta a.

A tukzing Sumo-ah chuan Aizawl lam panin ka kal ta daih a, an hawi hai ve teh ang chu le.

                        Chapter

                               IV

Ramtea te inah bawk ka lut leh a, 'kan khawlamah ka hawchho phawt ang nge ka zo fel law law ang aw' tih chu ngaihtuah ngai si, ngaihtuah thiamhar tak a ni.

"I bike ala țha em?"

"Țha e"

"Long run nan..?"

"Teh reng mai, duhthusam a ni, a fit vanglai"

"Chuti chu naktuk tuklehah Hmunzawlah mi han hruai teh"

"A! Ka peih mai mai lo e a.."

"Peih a ngai, kal ngei ngei a ngai"

"Engnge tih tur awm a, i rawn haw chauh a"

"A țulleh nupui te pawh kan ru ang a.."

Ramtea chu a nuisuk duh chauh a, a ngaithutak fahran lo kher mai.

"Ka ti tak tak a nia, pawisa pawh ka pe dawn che nia"

"Nula rim tura tlangval pahnih thawhchhuah kher a ngai hleinem nangmahin han kal la ni mai lawm"

"Ke ka neih ve loh hi.."

"Ka bike i keng mai dawn lawm mawle, tak tak a, longrun chuan ka khalh ngam rih lo, i khalh thiam reng kha nangmahin han kal mai rawh. A chain saw i pawhtir deuh ang a.."

"Ka khalhlo rei tawh em a.."

"A! Ho emai a..kha chen i khalh tawh a.."

Nia, Shillongah khan a bike hi kan țhutlir dun hrep tawh a, han huphurh thar tehchiam thu phei chu a awm lo. Keimaha kal tur chuan ruahmanna ka siam fel lo thei ta lova, a țhat pawh a țha zawk mahna le.

Zanah chuan Terini ka han bia a, a țawngțha duh vak lo, tluangtaka Aizawl ka thlen thu te ka han hrilh zawr zawr a ni ber mai e.

Zanah ka muhil hma viau, ruahmanna felfai thawkhata ka hriat vang te pawh chu a ni mahna. Mutthilh hnuah inleng ka neih a rinawm tawh lemlo bawk a thinthiin a mut theih ang chu.

A tuk zingah pawh ka tho hma fua fua khawp mai, chhungte tlawhna remchang tiin inhnih emaw lai chu ka tlawh a, a pathumna tur erawh chu ka peih buai ta lo, chhungte tlawh ve a 'tunge i nih kha' min lo ti vel, insawi chawp ngai hi ka peih ve lo. Kan inpawh tak tak lo tihnaah ka ngai, ka tlawh peih ngailo.

Chhunlamah lah tihtur vak awm chuang heklo, ka thlalak hmeh ve ho te chu ka han print tir nual a,  thlenin pa pawh mengfip rãma a lan ve kha maw.

Terini chu ka thlek nawn fo lo thei lo a ni.

Chawhnulamah Ramtea bike chain pawhtir pahin test ride te ka'n nei kual vel a, ka khawr lutuk bik love, ka hmabak nen erawh chuan ka hahpui viau mai thei a ni.

Kal leh nghal mai tura rilru ka siam lo chu ka ning leh hnuhnawh deuh a, tihtur awm bawk silo, hmachhawp awm run chunga awm mai mai ngai lawi si chu ka za zek zek a ni ber mai. Mahse, ka chauh lutuk ka hlauh vang a ni ber a. Chuti chu nilo se chuan kan tlan chho leh nghal mai awm asin mawle.

Zanah pawh tui pawhin ka mu meuh lo, ka helh hawlh niberin ka hria, chuti chung chung chuan mumang lamah Terini nen hlimtakin hun kan lo hmang dun a, a pa te kan lo runluih kual vel a!

Mumang lah hi ka chhawrlo ve thei bawk sia keilah hian.

Thimhlima Hmunzawl khawdai thlen tum ka nih vang chuan ka hmanhmawh teh chiam lova. Khawchhung lut lova ka thil dah lak mai theih a nih vang chuan harsatna awm hauh lovin ka kir leh mai thei ang chu ka ti.

Zing Dar 11:00 velah Ramtea te kawt ațang chuan ka tlan chhuak a, ngaih a țha ta veng veng mai.

Ka bag-ah chuan Pistol, Chemte, Torchlight, bag ruak, tui um khat leh biscuit a awm a, chu'ngho chuan thlamuanna thuchah min hrilh lo mahse ngaih an ti ngam hle thung.

Ka kutțang chu a kham hma viau, ka mawng lah chuti bawk. Kawng a hla tham bawk si a huphurhawm ru angreng hle mai ka ti. Tu emaw tal lo hruai ila țha tur asin mawle.

A tluan phei chu ka tluang viau a, Petrol la a ka ding kawi zawk tihloh chu khawmuan teh chiam pawh ka nei hran lo. Zana let thla leh tur ka nih vangin petrol khaihlak awm thei tiin tanky ka thun khah hnuah Coca Cola burlian ruakah 2 ltr. chu dahin bike bag khaiah chuan ka dah tel bawk a, ka theihtawk chin chu ka inbuatsaih țha thawkhat chuan ka hria, hriatlawkloh thil a awm chuan thudang le.

Tlan ve reng ta chu duh aihma mahin an khaw țhenawm ka lut chu a ni leh ta reng mai. Dar 4:00pm a ri zawt chauhin ka hria, duh ai chuan ka thleng hma lam deuh chu a ni e.

Kawng penhleh laideuhah bike chu dahin Ka thlenin nu dawrah bawk chuan ka lut leh a, maktih hmel zet hian min lo en hau a!

"I lo va lâng leh rang si ve.." a lo ti hlut a.

"Nia, Hmunzawlah bungraw theihnghilh ka nei pek alawm mawle"

"Umh...tlangval lai ațanga chutiang i nih teh chuan a va mangan thlak dawn ve aw..nupui i neih hunah pawh i theihnghilh fo dawn chu" nui uar uar chung chuan a ti a.

"I tlangphei dawn nge, engtinnge i awm dawn?"

"Hetah chaw ka ei ang a, chuan chaweikhamah lamah muangchangin ka phei ang chu ka ti deuh a, riah pawh ka riak lovang, ka zan haw leh mai ang chu ka tia"

"E he..a va hahthlak awm ve chutiang te chuan, hetah lo riak phei la a ni mai alawm"

"Ka riahpeih loh vang 'lawm let leh ka tum, muangmarin.."

"I ti peihawmloh e mai zan tlan te chu, Bike chhiat palh te pawh a hlauhawm alawm"

"Ni tho mai, mahse, a chhelo ve thei tho bawk a!" ka tih chuan a nui liam ve ta vel mai mai a.

"I phei dawn rau rau chuan Pu Roliana te Vawk damdawi tur hi ka thawn mai ang che, kal remchang han hmuh mai tur an awmlo tlat" chu kher chu hnial ka va'n duh tehlul ve le. Khawchhunga luh loh hram dan zawn a ngai asin.

"Ka hre ve awm silova anmahni?"

"Biak in bulah khan 'nimai, an hre vek ang sawtiang arhmai tiat lekah te chuan.." tak deuh deuh chuan leh! Umh..tihdan awm mai ang chu maw hnial buai lo phawt mai teh ang.

Zanriah eikhamah chuan Hmunzawl lamtluang chhui turin ka inkhalh chhuak ta a.

Khawchhung luh a ngaih rau rau chuan Ramtea camera charger ka theihnghilh te pawh hawndan ngaihtuah ta ila. Tin, chumi denchhen chuan Terini pawh a hmel tal hmuh a va chak awm si ve mawle.

Thui pawh ka tlan hma chuan kawngsirah ka'n in hûng leh ren rawn a. Terini biak ka han tum chu mi chhang thei reng reng lo mai, 'pawi love' tih mai loh chu beiseina a ni leh mai. Ka tlanchhuak leh tur chiah chu amah chuan min rawn phone leh lawi a.

Inhmuh ka duhthu ka sawi chuan mak a tih hmel kher mai. Ka thil theihnghilh Camera charger lam tura ka chhoh leh thu chu ka hrilh zui mawlh mawlh a. Engvanga an intlawh tumlo nge ka nih te chu min zawtin, chhuah a nawm loh thu te chuan a'n pha kawi viau na a ka nawr ve tlat avang chuan Primary Sikul tlanga dar 7:30 vela inhmu tur chuan ka tiampui thei ta hram a.

Kawng a țha ti a han sawitur chai a ni silova zan tlan chu ka huphurh viau mai. Ka tihtur ber hmabak hlimawm tak nilo phei se chuan kawnglakah pawh ka tumtawi duh mai awm asin mawle.

Ka tlu chu ka ti duh bik chiah lova, mahse bike ațang chuan ka chhuk lek lek fo mai! Intihnalhna hun a awm lova, inlak pain awmzia a nei heklo. Kawng a chhia chu zawng chu a ni mai e.

Ngiltaka tlan par par chu a tiha tih rual a nilo, kan hér tlûn tlûn a, kopang emaw kawngthlang emaw kan nger leh to mai țhin a, din loh theih pawh a ni țhin lo. Kawngțha dapna lamah kan tlulo chauh chu a ni ber e.

Bâk lo thlawk leh phut țhin te, Rûl leh sazu kawnga hmuh tur awm zeuh zeuh te chu ka țhiante an ni ber mai. A khawhar thlak chiah chiah khawp mai.

Tlan ve reng ra chu khua pawh ka lut dawn ruai chu a ni ta.

Ka thil thuhrukna zawn velah chuan boruak thlithlai pahin zunram ka'n thiar khawmuang a, zial ka zuk vang vang hnuah boruak danglam awma ka hriat loh vang chuan 'haw lamah ka la ang chu' ti rilru chungin khawchhung lam pan chuan ka inkhalh chhuak leh ta a.

Hmunzawl khua pawh a lang uarh tawh tihah chuan tlangval pahnih hian kawngsirah zu an lo indun ni ngei tur hi a nia, thlanglam hawi hian an lo țhu ran a, keilah chimawm ve bawk ta chu an bulah kher chuan ka ding pek a!

Pu Roliana te in awmna lai chu ka zawt a, khawchhung a lan uarh avang chuan pakhat chuan ding meuhvin min kawhhmuh a, a ding ve lo zawk chu ka hmuh hnu ni tlatin ka hria.

Zu in emaw ka ti ngawt nain zu pawh chu ka hmu chuang hlei lova, hlauhthawnna ka nei thut chu 'Ka lawm e' tiin ka tlan zui nghal daih a. Engtinnge an awm ka thlirlet hman lo.

A piah deuha kawihnihna vel bawr a kawr ruam, khawchhung dep mai, thim deuh ruih laiah chuan kawngsirah bike chu ka din tir a, ka dinna piahdeuh hlam 100 bawr vel turah hian In hmasa ber a ding a, zu zuar in niawm takin a âwn luih a, lutchhuak hmuh tur erawh an awm lo thung.

Engemaw thil thleng tur awma ka hriat tlat vang chuan ngaihțhalo fe hian kawngsira lung chungah chuan ngawirengin ka țhu a, tlangval pahnih te khan min lo châng a ni thei angem? Chu chu finfiah ngai chu a ni ta.

Min lo châng nita se engtinnge ka chho tih an hriat ang? Tunge hrilh ta ang le?

Mi pahnih chiah rintur ka nei, kha dawrkainu, ka thlenin nu nibawk  leh Terini!

Ka bike chu kalsanin tlangval pahnihte awmna lam pan chuan ka let phei ve leh ta thung a. Eng emaw chu a awm a ni, ka thãuvah min țhàm deuh tlat mai ka ti.

Thui pawh ka kal hma chuan thawm ka hre ta thuai a, kopang depah chuan beichhovin ka lo nghak ta zawk a, Torchlight emaw an hman loh vang chuan min hmuh mai ka ring bik lo.

An țawng ring fahran lo hle a, mahse min lo chãng ngei a ni tih chu an țawngkamah chuan hairual a ni lo. An hnungdeuhah chuan ngawi rengin ka kal a, ka bike chu an han thlek deuh a, lighter an talh țek chhak chhak pawh chu ka hmu reng a, an khawihchhiat hlau viau mah ila va pawhloh law law ka thlang ta zawk a.

Rei an dinchilh lo, hmanhmawh takin khawchhunglam hawi chuan an kal leh mai a.

Inhnai ber zawn an thlen lai chuan bike chu ka lo tinung hluah a, ram lam pan chuan chak zetin ka tlan ta daih a, ka thawm pawh an hrephak ngei ang le.

Kawngpuia ka tlan zel chuan awmzia a awm dawn silova, fehkawngah kan tlan lut ta pek a nih kha! Rin ai tak chuan a tlan theih viau, thui pawh ka tlan lo, kawihnihna velah chuan ka ding a, thim thamah harsa zet chuan bike chu ka chawi her kual a, thlan a tla țha duh bawrh bawrh bawk e maw.

Sana ka han en chuan dar 8:00 a lo ri thuak tawh a, Terini pawh chu hmuh chi a ni dawn em ni? A pa te nen an țangrual a ni thei angem? Nge, a pa te hian an chhimbudawi kual ang a ka chanchin hi an hre zawk niang!? Ka thlenin nu te nen khan an lo in be pawp țha viau zawk nge ni dawn le..Rilru siamthiam a har ka va'n ti em aw.

Mipa vannei Buimeitawia an tia lawm le!

Bike chu kawngsir remlai deuh a hnimbuk karah ka nawrlut a, ramvak kal te an awm pawhin an hmu bik mai lo turah ka'n ngai deuh ngawt a. Ka bag chu akin kawngpui lamah pan chuan ka kal leh ta ngat a. Vawk damdawi pawh chu ka la khai tak nawlh nawlh a!

Fimkhur tih piahlama fimkhur chuan khawchhung lam chu ka pan lui leh ta zel kha a nia, khûr em lo mah ila a chakawm fahran loh hle mai.

Sikul tlâng chu hêlkualin kawng pangaiah pawh chho lovin kopangah ka lawn chhova, sikul building ka thlen chuan a lo reh țhiap mai. Terini hi bumtu a ni ang maw!??

Ka phone chu la chhuakin ka phone zui nghal a, zunin lamah chuan a ri țang țang ka hre ta tlat mai pek a, a hmuh phak loh tur ațang chuan ka be ta kha a nia. Amah ațang chuan hlauhtur ava awm hmel siloh ve mawle.

Thim deuh roh, van vâra eng deuh ruau mai hnuaiah chuan zunin lam chu ka pan phei ta a.

Zunin bang ngheng chuan a lo ding ran a, ka hawikual ngial nain midang hmuh ka nei lemlo bawk nen thla a ngam huai e.

"Ngatinge kan inah ilo kal mai loh?" tih chu zawhna ka dawn hmasa ber a ni.

"Tihian kan inhmu thei a, a țha zawk alawm, in inah te chuan hetiang hian kan inhmu thei nang.." ka ti ve mai a.

Zunin bang ngheng chuan thlanglam hawiin kan țhu a, khawchhung chu a lang raih a.

"Lo chah mai tur che nia,"

"Ti hian kan inhmuh theih phaha a țha i ti ve lo mi?"

"Hm.. Min tihrehawm tur ringawta hmuh che hi ka tan a harsat tur zia chu i hriatthiam ve mai ka ring" a ti sap a.

"Reilo te chauh ka nuna lo lang tur hian ka la ngai theilo che a ni" a tih zawm leh a.

A darah chuan kuahin ka lamah chuan ka kuah hnai a, ka kutbawr chu a hum vang vang a.

"Thil khirhkhân leh harsa tak mai hmabak ka nei a, chu thil chu ka hlenchhuak thei a nih ngai chuan i tan hian ka inpeih em em asin, mahse, hlenchhuah phawt a ngai.."

"Engnge chu chu..?" a lo ti vat a.

"Ka sawithei rihlo, min hrethiam dawn nia, nakinah ka la hrilh ang che"

"Kan khuaa ilo kal chhan hi eng emaw tak a ni ngei ang tih ka ring, chu erawh chu zawh kher che pawh ka tum lo" a tihlai chuan an motor niawm tak chu khawpawn lam pan chuan a tlan mek a.

"Chhan dang vak a awm hleinem, ka thil tih te chu i hriat reng kha.."

"Enteh, khu.. motor khuan kan khuaah i awm tih a hria a ni ngei ang a phi leh ruai tawh khu" tih pahin motor tlan mek chu a kawk a.

"Tehngawt chuan a, inzawmna kan neih pawh ka hre lo" ka ti mai a.

"Ih maw, kan khua i lo thlen ațang khan thil danglam a awm tih ka hria asin" a ti a.

"Awih awmloh e, chutiang a awm lovang, engtinnge chutiang ngaihdan te chu i neih theih?" ka ti let ta zaw mah a.

Min melh zeuh pah chuan, "Ka pa mizia hi a danglam vek a, midang punin nangmah hi a enthlak tir hial che tih pawh ka hria, nanglahin i hre der bawk silova. Ka rin dan chuan mi hlauhawm tak i nih ka ring" a ti chhuak hlawl a!

"Min hlau silo a ni maw chu..?"

"Midang i endan chu ka sawi thei lova, i mitmeng ka hmuh tirh ațang khan ka tan chuan mi danglam tak i ni"

"Engthil nge i buaipui a, engatinge ka pa te hian an enthlak reng che tih hi ka hre duh" a tih chhunzawm tawl a.

"Inkhuaah hian thil inthukru a awm a, chumi haichhuah tum chuan ka lo kal a, i pa te hi engtia lo inrawlh nge an nih ka hre lo"

"Engnge chu chu..?"

"Ka sawi a rem rih lo, A fel fai hunah ka hrilh dawn che nia"

"A țha lawm, ka pa te chungah chuan engmah i tihloh hram ka beisei"

"Kei chuan engtia tih mah ka tum lo, mahse ka kawng an dal dawn a nih chuan ka hmachhawn mai angai dawn a.."

"Chutiang hun a thlen pawhin zahngai hram ang che. A nih tunah hian engchen nge i kal tawh.."

"Hm.. i pa te i hrilh palh ang" ka nui deuh a.

"Hm.. min ring lo ve bawk siah" a ti a.

"I hna i zawhfel hunah Shillongah ka awm leh daih tawh awm sia.." beisei nei tih hriatreng chuan a ti a.

"Chuan..?"

"Midang tan chuan ka phallo che a ni.." ka bân chu a hmer nghet kher mai!

"I zawh fel veleh... i bula awm ka duh, thildang chu engmah min hrilh suh" a ti leh a.

Ngawireng chuan kan inkuah a, kan in fawp kham hleithei meuh lo chu a ni e.

Dar 9:00 a pel tawh, kham lo teh mah ila ințhen a țul miau mai si. Dingdihlip âk âk chung chuan âm fe hian min han fawp leh pek a, "I zawh veleh aw..." a ti sap a.

Ka chhang lo.

"Mawwh..i zawh fel hun hunah aw" a ti țha leh a, pangchang tak chuan min kuah a.

"Awle.." ka tihsak ta nge nge a.

Kan thil ken kan inthleng hnu chuan Step-ah chuan a kal thla thlak thlak a, a thawm a reh fel thleng chuan ka ding reng a.

Ka lawnna kopang lam ațang bawk chuan ka lêt leh a, khawte tih takah a reh țan der chu a ni mai. Fimkhur tak chuan khawchhung chu ka pel fel thei ta, ka hmaah gypsy lo awm tur erawh chu ka pumpelh theih ka ring chiah lo.

Kawnglakah nge, khawchhungah nge, khawi hmunah nge min lo chan ang tih chu hriatthiam a har viau, khaw mawngping tih takah kalkhân pakhat chauh an nei bawk si.

Terini rinhlelh tur a awm tâk silovah chuan Ka thlenna nu bak kha han puh chhin tur dang pawh an awm ta lo. Chuti a nih chuan an khuaah min lo chãng ngei ang le!

Bike dahna lam pawh pan hmasa lovin ka thil phumrûkna lai chu ka pan nghal a, lei tlem leh chhawla ka haikhuh satliah deuh mai chauh a nih vangin harsa lo takin ka bag kenah chuan ka khung fel thei mai a, a hma ai mahin a rit tawhin ka hria.

Bike seat-ah chuan nghet tak maiin ka phuarbet a, ka hmabak huphurhawm tak mai chu ka hlenchhuak zo em ang chu maw.

Bike ri ring lutuk mai chu a buaithlak ta ber mai, tihngaihna lah a awm der mai bawk silo. Ka puakruk virgin chu ka jacket ipteah chuan ka ak a, fehkawng ațang chuan ka tlan chhuak ta poh chu a nia.

Thlâ a ngam mawlh lo a ni.

Kawng vangtan zawnga gypsy lo ding hmuh inring reng chuan ka tlan zel a, kal lam ang dêm dêm chu ka ni ta lo khawp mai, kawngchhia pawh ka ngaihtuah thei meuhlo chu a ni e.

Ka tlan thui zel a, engmah hmuh leh i a awm bawk silo, khawchhung lamah hmuaktu ka nei a nih ngei dawn hi.

Engemaw ka tih a ngai, tawngpawng hmachhawn ngawt chu a fu lo thei tlat. Tunge thluak hmang zawk chu kan hre mai ang chu.

Khaw thlen hma chuan ka thilphurh chu hmun remchangah ka thukru te te a, thawveng zet chuan khawchhung chu ka tlan lut ta ham ham a.

Ka beisei ang he hu chuan tumah ka hmu ta mai bawk silova, keimah tak zawk pawh ka hrilhhai hman mai dawn alawm le, ka lo in rin tehlul nen a!

Khawchhung chu a thui lua lo, kilometer 2 thuartham bak a ni lovang, a khawdung sei lovin a vang pharh hlai zawnga an awm vang chuan rei tlan tham a nilo hrim hrim.

Mak ti ru ang reng zet chuan khawchhung ka tlan chhuak ta ringawt mai a, 'engnge maw a awmzia le' ka tih rilruk nauh nauh lai chuan gypsy var ngei mai chu ka va hmu ta. Hlauh viau awm tak, ka thawhuai zawkin ka hria ka ti.

A bulah chuan patling pali panga dawn lai hi an lo awm bawk a, min lo phar huang huang bawk a, ka'n dinsak tak kha maw.

Putara te hmel ka hmu hauh lo mai ka ti. A motor lah hairual a awm bawk silo.

Bike pawh ka tihhlum hma chuan pakhat huan ka chabi chu a lo chuh ve that a, ka nuih a za ang reng zawk mang e!

"Hmunzawl lam ațangin report kan dawng a, chumi vanga lo tiding che kan nia"

"E a nih tak chu, eng lam thil nge ni a?"  ka ti hu a.

"Thil bo a awm a ni awm e, i bag vel te kan check ve hrim hrim dawn mi niang" tiin zahawm tak chuan a phanchang ber chuan min dawr a.

"E, en ru en ru" tih pahin ka bag chu ka phelh thuai a, an han lepse ngial a, engmah hmuh lah chu an nei der bawk silo.

"Engnge Hmunzawlah i tih a?" a ti leh a.

"A, hmanni khan thlalain ka zin a, Camera charger ka theihnghilh daih a, a nungthei tawh mang silova, chumi lam tur chuan ka kal leh a" ka ti mai a, charger lah an hmu thlap bawk sia, rinhlelh tur awm lo ta chu in hrên ngawt thu a awm bawk silova.  'La la la la la..' ti rût rût chung chuan ka tlan liam san leh ta viah viah a.

Ka thawm an hriat phak lohna awm vel ka thlen chuan ka ding leh a, bike han thuhrukna mai tur a awm tawh silo, kawngsir zau laiah chuan hûngin tihdan ngai bawkin khawchhung lam chu ka pan leh ta chhek chhek a.

An khawchhung kawng kal dan ka hriat chianloh vang chuan bo khawtlai ai chuan tiin kawngpui dung ka zawh ngawt ngawt mai aniang chu..

Min lo chânna lai chu ka va bih dâk dâk a, engmah hmuh tur a awm tawh lo, thlamuang zet chuan ka kal ta nghauh nghauh a, dawrkawn laibawr ka thlen lai chuan ka fimkhur ve ta deuh a, Gypsy pawh a ding vang mai. A bula in chu a la êng bawk. An la mu lo tawp a ni. Mai mai chuan a...

Fimkhur takin Gypsy chu ka pan thla hret hret a, a ke zawng zawng chu ka hawlhthêp sak vek a, ze khîr lam a lang tlat mai pek a!

Anni gypsy, soft top a kara țawl lam tawh lehnghal chu a chhunga luh mai har mawlh hek lo, a chhungah chuan lutin ka kekawr ka hlip sawk sawk a, ka êk kan chheng ngheng kha! Mawngsil nan ka tui pai pawh ka hmang zo țhak alawm le! Mai mai shallaaa..

Ka thil chheprelh la a, bike ka dahna ka thlen leh meuh chuan dar 1:00 a pel fel der tawh a, harsatna lutuk awm lova ka tihtur ka zo fel thei chu ka thaw huai a. Ti kha chuan kan in thing thla fel tawh em ang chu maw..

Zing dar 6:00 pelh hretah Ramtea te garage-ah chuan  bike chu ka hung fel thlap hman a, mut pawh mu ta lem lo chuan Dar 9:00 chhuak sumo-ah kan khaw lam pan chuan ka kal tlang zui ta daih a. Kawng tluanin ka muhil ti ila ka tisual tam lo viauin ka ring.

Fapa neihchhun ramchhuak hlawhtling ta chu ka pa pawh a lawm viau kha mawle.

Ka nu inkhawm turin a chhuak ta maw tihah an bedroom-ah chuan ka bungraw hawn chu kan phawrh dun a, ka bag a pistol vel ka phawrh pah chuan thildang chu an khumah chuan ka bun ruih a, thlalak pakhat chu a la nalh a, "Hei hi engnge a awm zia"? tih pahin ka thlenin pa putara lan vena thlalak chu a rawn lek chhuak va a, "An VCP a nih kha ka thlen in pa, Pu Rova.." kan buaina chung chang chu ka sawilang duh ta bik lova.

"Pu Rova a!?" maktih hmel zet chuan a ti a.

"Aw, i hria mi a?"

"Eng Rova mah a ni awkawnglo mai, Sailiana a nih hi.." a ti ta leh!

"Engnga?" tiin phawk fe chuan thlalak chu ka melh a,

"A hming a ti danglam a nih chu, hetiang thil velah hian a ringhlel che em?" a ti zui zat a.

Zep theih ni nghal heklo kan in umkual dan zawng zawng chu chipchiar takin ka hrilh ta vek a, a hmêl chu a danglam eih lo, a melh ngai a melh vang vang a.

"Fimkhur deuh kan ngai dawn a nih chu. Sailiana aia luhlul mizopa ka la hmulo" a ti hul hak a.

Pawisa zat chu ka sawi duhlo, Min rawk palh ang!!

Silai țhiahdarh chu kan remkhawm dun a, "Hetiang silai hi ka hmu ngai miah lo, rambuailai te chuan mark-III kha hman tlanglawn ber kha nia, hei chu commandant kan ambush țuma mi kha  a awm mange" te a ti vel mai mai.

Pawisa pawh chu a awm țeuhnain hmanlai chhuak Za note hlaipui pui ho kha a nia, tawngpawng hman ngawt chi pawh a ni dawn emaw ni le. Rangkachak țhi vel erawh chu man man tham tak a la ni chêk ang chu.

Inchhunga in dah ngawt chu a him berlo tiin remchang hmasaa buaipui turin hmun him lama kan ngaihah kan dah chhuak daih a, Pistol erawh kan pahnihin kan kawl dun ve ngei kha.

Ka haw ațanga karkhatna cham chiahah harsatna kan tawk țan ta!

Zan dar kua velah damdawi lei tur an awm vangin dawr ka va hawnsak a, darkar chanve vel dawn chu ka țhu tain ka hria.

Ka hawphei tur chu Sumo pakhat chakzet hian ka hma lamah chuan a lo tlan phei a, kawngsirah chuan ka lo ding ringawt a, 'tu fa lulawk nge mawni le' ti rilru chung chuan ka lo thlek ngial a, a tu amah chu ka hre chuang lem hlei lova.

In ka thlen dawn chuan kan inbula mi zi hat hat chu ka hmu a, rangtaka tlan pheiin  ka hnaih ber chu thil awmzia ka zawt thuai a, min chhanna erawh ka hrelo.

Inchhungah chuan ka tlan lut a, ka pa te room lama țapthawm vang chuan ka lut tlang nghal rawp a, ka pa chu khumah chuan thisen luang zuih hian a lo mu a, kan țhenawmpa chuan a lu dawmin midangin a nghawng an lo tuam mawlh mawlh a.

"Pa..i țha em?"

A rawn meng siar siar a, țawng tum chuan a âng zuau zuau a, 'țawng rih suh' an lo ti vat hlawm a.

A hmui phun sep chu ka hai lo kher mai, richhuak tur awmlo mahse 'SAILIANA' tih chu darkhuang ri tluk zetin ka bengah chuan a ring asin.

Ka tlan chhuak hluai a, engnge tih ka tum a, khawnge kal ka tum pawh ka hre chuang lo. Ka bula awmho chuan min chelh bet rang kher mai!

Engtin nge maw ka awm tak ber le...

                        Chapter

                               V

Ka pa kan vuiliam ațang chuan karkhat lai a liam leh tawh. Nunphung pangai erawh ka zawm thei meuh lo chu a ni e.

Zanah ka mu thei lova, ka tawt up up a ni ber mai.

Police ho lah chuan 'kan chhui mek e' an ti reng a, chinchang hreber kei engmah min zawt lo bawk a, engmah ka hrilh duh bik țhak lo. Ka chhungte paw'n a chhan an hre silo.

Sum chu ka ngah ta, ralthuam pawh ka nei ngei lawm. Mahse, engnge a hlutna ni vak chuang le, 'pa' ka neih loh phah tak hi! Sum hian hlimna min pe chu nise ka hlim tho ang chu, ralthuam hi himna chu nise thlamuang takin ka awm dawn asin. Chu'ng zawng zawng chu ka lak ațang chuan vawmbo ang hlauh an ni bawk si.

Kan Almira zawng zawng kar chhia a, kan bungruate suasama thehthal tute khan ka pa nunna chiah an la! Rosum an duh an hmu lo. Nunna chu nunna vekin an thleng ngei angai ang, chu ti a nih loh chuan 'Liankunga fapa ka ni ngai lovang'.

'Hûk thlâwn ngailo keimah SANGZUALA ka lo thawk chhuak dawn e, a ngam chuan min lo hmachhawn dawn nia..'

Buaithlak awm ta chu ka nute'n zinchhuah an phallo chu a ni. Chhuanlam tur chai ka hre bawk silo. 'Tun ang hunah zinchhuah sawi, a awm anglo emai' an ti tlat mai bawk si.

Ka kutțang tin hi phuba lak chakin an phu et et tawh asin.

Thlakhat dawn a vei hnuah duhthusam hun a lo herchhuak ta, MNF hnam rûn lam ațangin lehkha a lo kal a, ka pa thihdan chungchang leh a chanchin tlangpui an office-ah report thehlut turin min rawn ti a, chumi chhuanlama hmang chuan zin tur chuan ka inbuatsaih ta a.

Pawisa note ho pawh Bank lamah thleng dan zawn a ngaia ka hriat vangin ka keng vek a, pistol pahnih nen..

Aizawl chu ka lutthla leh ta rawih a.

Terini pawh ka pa boral thu te chu ka han hrilh a, a chinchhuak chuan ka hrilh lem lo. "Chanchintharah ka lo hmu a, i pa maw!?" te chu a tih ve kha mawle.

Hnam Rûn lama report ka pekfel hnuah State Bank dawr tur chuan ka chhuak nghal a, ka va dawrnu ber chuan 'min lo nghaklawk rawh' a tih vang chuan an thir țhutthleng vawt thler thlurah chuan ka mawng ka lo hung sawi ve ta reng a, amah lah chu an manager roomah a pilbo daih lehnghal a.

A lo chhuak chuan an manager hmuturin min hrilh zui nghal a, ka va lut chu min lo melh uluk kher mai, khawi ațanga chutiang note hlui chu ka neih nge, engnge ka eizawnna tih zawng zawng nen chuan chipchiar mangkhenin min zawt a.

"Ka pa ro ka khawm" tih chu ka chhanna khaikhawmna chu a ni ber e.

Chutia kan indawr lai chuan Police pahnih hi an lo lut a, an Thana lamah min hruai ta ringawt mai a, tihngaihna vak a awmlo a hrilhhai thlak viau a ni.

An OC roomah chuan min hnutchhiah a, kan pahnih chuan kan țhudun ta ran mai a. Engtin tak min ti ang maw?

"Pawisa hi khawi ațanga i neih maw ni a?"

"Ka pa ro ka khawm"

"I pa chu eng ti mi nge?"

"Damdawi zuar.."

"Engtinnge hetianga tam hi bank ah pawh dah lova in kawl theih?"

"Ka pa hi midang ring lemlo chi a nia, a sumhmuh ang ang pawh bank-a dah duh lovin ama'n a vawngțha mai niin ka hria"

"Hetiang anga tam tham, Note chhuak tawhlo a nih vang hian kan sawitlang mai anga rinhlelh i ni a, engtikawng emaw a sawrkar sum chhehrelh theih a nih vangin bank lam pawh kha an han fimkhur deuh a nia, Mahse, kan document hlui leh report awm angte kan han en kual a, chutiang hnuhma kan hmu mai bik lova, station dang kan zawhkualin report tur an nei bawk silova, engpawh nise, i details erawh chu kan lo chhinchhiah ve hrim hrim ang a, palh awm thei ven nan"

Ka address leh thildang chu ka hrilh nghal mawlh mawlh a, "I pa hi... hmannia tualthi kha mi?" a rawn ti hlawl a!

"Umh ni e"

"A nih tak chu, a case an chingfel tawh em?"

"Fello, tihngaihna vak an hre lo niberin ka hria"

"Engnge a chhan awm a i hriat?"

"Kan pawisa vel rawk tum an nih ka ring ber, ka pa kha a mu a, a ni lo țang ve deuh kha an khawihzui mai a nih ka ring"

"An hrechiang ve khat che u niang a tiraw.."

"Ni maithei ni"

"A zialo hle mai, an la manchhuak em ang chu maw"

"Nia, kan beisei viau chu a nia..tihian pawisa chu ka thleng thei dawn em?"

"Thei turah ngai ila.. object nachhan tur kan hre bawk silova.."

"An lo phallo ringawt ange, min phone sak tal la.."

"Nia, ka lo be dawn nia.."

'Ka lawm e' tiin ka in akchhuak leh ta hnak hnak a.

Ka account-ah chuan a mak a mak a tam!!! Pawisa an thun ta! Hehe..a zat in hre ve der mai silovah!!

"Ramte i bike hi min lo leitir teh" ka'n ti ngawt chu a phallo chiangkuang!

Seconhand bike leitur chu min ngaihtuah pui ta thova, Bullet kher kha ka duh ve tlat! A pa riauvin ka hria ni ve mai a..

Kan hmu ta hram e, mahse duhai chuan a body chu a hmelhem nasa hret, leithar ve chauh e tilo chuan workshop-ah cheiturin kan han dahlut nghal daih peka! Duhairei Aizawla khawtan a ngaih phah dawn ta tlat mai ka ti.

Zan thum ngawt ka riak tawh, thleninah a inthlahrun awm duh viau..

Engkim peihfel ni chu a thleng ta. Ramtea bulah tlaidaiah ka haw chhovang ka tih thlap kha mawle.

Taaza te leh packing lam chi eitur ka ak ruih mai! Puanhlap te.. Ka chin tur ka hre tlat silova a țul ve tlat.

Bike cheițhat hlim a nih bawk avangin ka tlan chak lutuk theilo, a engah hmain ka mengrum sa nghal em em ringawt bik lo a nia, ka tum erawh ka chiang viau thung.

Ngaihtuah kimloh ka nei tih ka ngaihtuah chhuak! Khawnge bike hi ka thuhruk tak ang?

Thleng phawt ang. Chuan a tlachawpin tihdan a awm leh mai ang.

Kalkawngah chuan luiah te ka inbual khawmuang chhova, hmanhmawh fahran lo chuan ka kal ve zel a. Zan dar 11:00 rik hma deuhin Hmunzawl khawțhenawm te khawdai chu ka thleng awrh a ni.

Muangchangin thawm zawi thei angber tur chuan ka tlan lut a, ka thlenna nu dawr ka hmuh chuan han halsak hluai mai ka van chak tak! A țul tak leh hawlamah le.

Hmunzawl khaw daiah chuan zing lam Dar 2:00 velah bike chungah ka țhu vang a, ka bike dahțhat dan tur chuan min va'n tibuai tak e aw..

Kawngdungah chuan thuhruk na tur remchang melhin ka tlan let leh a, a vang pherh hrep leh nghal a. Kawng han penna tur a awm bawk silo. Fehkawnglama dah leh mai kha ka rilruk ta ber a, ka tlan let leh chuan ka pelh hnu a mi thingchhehkhawm, motor remchanga phurh an tum niawm tak kawng kawi kual zaulai, kawngthlang lama an dah chu a remchang angem tiin ka bêl a.

An chhehna lai chu thlanglamah hnim a tam vangin  an thing chheh pawh chu a rawn bawh deuh luk a, bike light engah chuan luh theihna tur sawih sawih hian ka thian fai a, reingial ka beih hnuah bike chu ka dah lut thei ta hram a. A hautak phian chu le.

Thing chu chhunlama an phurh thut chuan a ho der dawn chu ni maiah!

Chu em chu thleng suh se, a lo thleng palh ta hlauh a nih leh kan thu ni suh.

Khawvar hma deuh chuan khawchhunglamah ka lut phei ta a, min hmu an awm em lovang chu maw. Khawlu lam kawngah chuan thuivaklo ka chhova, hnimbuk remchang bel chuan ka biru ta thân a, Terini te Veranda eng pawh a lang at mai.

Reipawh ka dawllo, mutchhuak namen lo hian min zem tlat mai pek a nih chu mawle. Reilote chhing sek ila ka ziaawm phah deuh ang chu maw tiin remlo zet chuan ka mu hér tlân a.

"Hei hi Hmunzawl YMA information center a ni, khaw mipuite hriattur chhiattawh thu kan han puang ange, Pi Sumtuahi, Section-II Pu Kiamlova nupui chuan tukin zing dar 8:30 khan awmlaiin chatuan ram min lo pan san ta a, khaw mipuite kan inhriattir a ni. Chhun dar 1:00 ah vui tur a ni a, Tlangval tlawmngaiten thlan laih tur a ni ang"

Chu thupuan chuan min kai tho hlawl mai!

Sana ka'n bih vat a, dar 9:00 a lo pel vah tawh leh nghal a, em em lutuk a, spy muthlu!!

Chuti tak maia chianga ka tum ka tisukuk mai chu a nepthlak viau mai. Chu a chhapah chhiat an tawh chuan mi zawng zawng inah an awm țhuap dawn a, kawng a khirh fat fat dawn viau mai ka ti.

Biscuit leh Taaza chu ka'n țhei pawlh niau niauva, eitui hleihtheih pawh a ni lo.

Ka mi chan ber lah chu mitthi inlamah a kal daih tawh awm bawk sia, engtia han tih chi nge maw ni dawn le. Helai ațanga nghah ngawt chu inhremna mai a nih pawh ka hlau hlel love.

Ngaihtuahna thar erawh ka pu thei meuh lo chu a ni e. Duh ang thâla khawlaia vahchhuah ka tan a rem ve bawk silo.

Chutihlai chuan Nu Zari mitthi inlam pan tur niawm taka chhuak chu ka thlir reng a, tunge inah chuan la awm ang aw..?

Ka bag chu ka awmnaah chuan hnutchhiahin kaihthleh chemte leh pistol pakhat chu remlo zet hian ka ak a, lukhum chhezet khum chung chuan tuikhur kawnglamah chuan fimkhur takin ka chhukthla a. Naupang țhenkhat chuan min hmu nual ta ve ang.

Ngaihpawimawh sên pawh a ni meuh love.

Tuikhur mawnglamah chuan ka chhuk zel a, venghmawr lam a nih tawh vang chuan mi pawh hmuh tur an awm meuh lo. In a awm mumal tawhlo bawk a thlamuang deuh chuan a kal theih ta a.

Ka tumber chu Terini te huan mawng ațanga an ina luh ruk a ni ta ber awm e, ruahmanna hmasa ka lo mutthluk san daih tawh bawk si.

An huanpalah chuan lawnliam ngei a ngai dawn ta, uluk fe hian ka lawn zui a, an pal chu a lo rawih phian a niang chu a ri țet țet a a  chim ta rup mai a, thawmdim ve mahnaklai chuan aw leh!

Mawngsawh dawta lei ka țhut chawrh hnuah zi țhal țhalin ka thova, riva dang awmlo ta chu ka tumram pan chuan ka chho lui ta zel thova.

Bahla hung kar ațang chuan an in chu ka han bih dak dak a, thlanglama leihka an dawh chu a lang vuai vuai a, lawnkang deuh roh chuan balhla kungah chuan ka in tlawhkhalh chho sang deuh a, ka duh tak kawngkhar chu inhawng hiai hian ka han hmu ta.

Chu ngei chu ka luhna tur chu.

Zawimuang chuan ka pan chho hret hret a, leihkapui hnuaiah chuan thawm ngaithlain ka ding vang vang a, thehmeh ang hlauh a ni.

Banah chuan ka lawn chho ta a, Chhawntual ber kher, a ngil ve phian bawk sia, rahchhan tur pawh a awm meuh lo chu a ni e. A chhunkalhna behchhan chuan engtin tin emaw ka inbang liam hram hram a ni.

Inchhung chu ka'n thlek dak dak a, TV enthawm chu a awm ngei mai le. An nau awmpui kha a ni angem aw...

Ka'n dak fan thui deuhva, Sailiana ngei chuan a tukkhum lam min chhawnin TV a en tih ka va hmuthei a, hlauh mai a, midang an awmlo lehnghal a.

Vawthlu tawp ila a felfai ber awm mange ka ti. In pawmchilh chuan thawm te a chhuah anga a buaithlak thei ve tlat!

Chutihlai chuan veranda lamah chuan thawm alo awm a, 'Pa Ro, kan kal mai dawn mi niang" a rawn ti lar lar a, a van hunlo teh lul em ve le.

"Nia, a pawi chuang hleinem, lan har lutuk pawh a nalh ber lo" tiin an inzuichhuak ta aniang, kawngka khar ri chu ka hre zui nghal a.

A! Ka tlai hret a ni. Ka mutthluk vang phiangsen kha mawle.

Ti kha chuan hunremchang dang a vang leh dawn si. Zanlam nghah mai a ngai tawh ngei ang le.

Inchhungah chuan tu tunge awm pawh chian duh talovin huanmawng lam pan chuan ka chhuk zui ve ta daih a. Kual zetin ka bike dahna lam chu ka pan a, ruahmanna felfai tak ka nei hleitheilo chu a luhai thlak duh viau a ni.

Ka bike dahna bul chu lungphenah chuan ka'n hai rem deuhva, puankawp phahin ka tluzal leh ta mai mai a, tihtur dang awm chuang nghal heklo mawle.

Mutthluk leh mawlh chu ka hlau tawh. Ka awm mai mai chuan mutthluk ka hnaih leh dawnin ka hre si. Tihtur a vang ropui mai bawk sia.

Bike chu a lang lai lai uluk zet hian ka hru hliau hliau a, a faițha duh han han khawp mai, a langlo lam erawh chu chuti hlauh chu a ni ta ve ang.

Nghah reng na na na chuan khua chu a tlai chhawm ve mai a, tlai nitla tur kawl senphût mai chuan ka lung a ti leng ve dawn mai ka ti.

Van ațangin ka pain min thlir reng ni hian ka hria a, hnuk a ulh deuh roh tlat.

Ni a liam fel hnu, zanriah eilai awma ka ngaihah chuan ka chhuak ta a. Khawchhung ka thlenlai chuan unau hmelhai hun awm vel hi a ni tawh a, hlauhthawng lutuk lovin hun ka hmang thei ta deuh e.

Biak In hungna behchhan chuan a thim deuh laiah chuan ka țhu khar a, mi vei an awm zeuh zeuh. Min hmuhchian theih ka rinloh vang chuan eng hehuah ka ngai lem chuang lo.

Reingial ka țhu tawh, Terini khawhar in kaltur pawh a chhuah tak kha.

Huanpal rirek ka hriat lam ka'n hawi chiah chu ka bek a ri nghal chawrh mai a, ka tlu nghal tih chiah ka hria.

Ka lu na ngut ngut chuan min ti harh a, ka kuthningkhirh a phuar leh ka ke phuarhlawm tlat a nih vang chuan ka awmdan chu ka hrethiam mai lova, ka ngaihtuahna a fim deuh hnu chuan ka awmdan chu ka hrethiam ta hram a.

Mahse, khawihmunah nge ka awm tak le aw.

Ka dang a rovin ka tui a hal bawk si, a va han hrehawm tehlul ve aw..

Engatinge ka fimkhur tawklo deuh em ni ang hetianga ka awm tak mai le. Tu khawkha hriat lovin ka arte thih mai mai dawn tlat. Ka tum a hlawhchham teh chuan ...

Ka harh leh chuan khua a lo eng tawh a, Terini te in, ka riahna roomah khan ka awm tih chu hairual a ni ta lo. Mahse, ka che thei map bawk silo.

Inhnuailam thawm lah chu ka hrepha reng mai bawk si.

Tukțhuan an eikhamah chuan Sailiana ngei mai chuan min rawn hmachhawn ta kha a nia.

Ngawirengin a lo lut a, ngawirengin min en a.. A chhuk leh hmak nia mawle.

Ka bek ațanga thisen luanna chu a khir țhat a, ka chau deuh riau mai thisen a chhuak hnem deuh nge maw ni dawn le. Ka kâ an hnawh vang chu nge mawni ka tui lah chu namen lovin a hal bawk si.

Kawngkhar ri rawk thawmah chuan ka harh zawk a, țe țhawt riin a zui nghal a,"U Sangzual..." ka hawiphei chuan Terini mangang hmel taka hmunphiah leh bawlhlawhruhna kenga lo ding reng chu ka va hmu a.

A lo tlan phei thuai a, "Engnge awmzia?" a ti khur hlawk hlawk a, ka kã an hnawh miau bawk sia chhang thei heklo.

Ka hmui vel an țawnna chu a phelh sawk sawk a, ka thawl ta huai e. "Engatinge hetia i awm, engnge a chhan?"

"I pain min man a nih hi" ka ti bung nghat a.

Min phuarna chu a phelh mai dawn emaw ka tihlaiin khumah chuan a  țhu kai ta daih a. Phatsantu bawk maw!!!

"Thil awmzia hi i sawifiah a hun ta viauin ka hria"

"Thawnthu sei tak a ni a sin"

"Sawi phawt teh."

"Hetia awm chung hi chuan ka sawi theilovang"

"Ka tan eng anga hlauhawm nge i nih ka hriat phawt angai"

"Ka tui a hal viau, khawngaihin tuisik tal min han lak phawt teh"

Inhnuaiah chuan a tlan thla thlak thlak a, saikhupno khat pem pawm hian a rawn chawi chhova, ka inzo țhak tho mai!.

"I pa te lo hawthut ta se, heti hian min kalsan dawn tihna a mi?" ka tih chuan rilru buai tih hriatreng hian min en reng a.

Muangchangin ka ke an phuarna phelh tur chuan a rawn țhuhniam ta a, hruizena phuar a nih vang chuan a phelh hleithei lo, inhnuaia mi chemte lain a zai chat ta ringawt a, ka kut chu phelh tum awm paw'n ala awm chuanglo cheu ka ti.

"Kan chhungkaw chungah engmah i thlen lovang tih min tiam phawt rawh" a ti

"Terin, ka tiam thei lo che, nangmah leh i nu chungah hi chuan kuthmawr pawh ka lek lovang. Ka pa thattu i pa hi ka ngaidam ang maw..?" a tawp lam chu ka vin tuarh tawhin ka hria.

"I..i pa kha.... ka pa thah maw...?" a phâwk tak zet!

"Ni e, i pa hi eng Rova mah a ni lo, Sailiana a nih hi" ka ti leh hmak a. Maktih hmel tak chuan min en ngawt ngawt a.

Ka kut an phuarna chu ngawirengin min phelhsak ta a. Ka ding mai theilo, ka tha a khûr tlat mai ka ti. Min rawn dawm vat a, khumah chuan min țhut tir a, ka hmaah chuan kuangkuah meuhin a ding a.

"Tunge midang awm?"

"Tumah"

"I pate room ah min hruai thei angem?"

"Engvangin?"

"Ka bag vel a dah țhat ka ring"

Min hnial ka rin nen min hnial lo hlauh mai, thakhur te a ziaawm ta bawk a inhnuailamah chuan kan inzui thla ta a.

A nu te pindanah chuan ka zuilut zel a, ka bag chu almira chungah hian ka va hmu nghal mai a, ka thildah ho chu a la kim viau. Mahse, pistol leh chemte kha ka kekawr vela ak mai ka nih vangin hmuhtur a awm lo. Khawiah emaw chuan an dahțha ngei ang le.

"Almira chabi hi ka mamawh khawngaihin"

"A awmna ka hrebiklo" ka chevel chu ngawirengin min thlir ringawt a, a theih theih chu ka hai kual a ni ber mai. Dawhkana inthlakna niawmtak awm nuaih mai chu dawhkan chawisawn ka tumna lamah chuan a tla nuaih a, chabi bawr tla ri rak chuan beng a verh kher mai.

Almira locker chu ka hawng thuai a, Pistol pakhat chu a lo awm bal a, a mu pawh phawrh lovin muruk a la kim țhap mai le. Pistol pakhat leh chente erawh hmuhtur a awm talo.. Huai tak  ei..an chhungkaw pawisa niawmtak pawh a awm nual mai..

"U Sangzual, khawngaihtakin engtinmah ti suh"

A melh pawh ka melh eih tawhlo, ka duh  ber ka hmu tawh bawk a.

Ka hnunglam ațang chuan min rawn kuah a, a țap ta hlep hlep mai a. Chutiang inthlemna hun pawh a ni chiah tawh lo.

"Terin, ka sawi chian viau tawh kha..min dal i tum a nih chuan a tuar hmasa ber i nih a ngai ang"

"Khawngaihtakin...kal bo rawh, kal bo rawh engmah ti suh"

Pindan ațang chuan chhuakin TV bulah, kawngkharpui lam hawi chuan ka țhu a, ngawirenga lo chhuakin min zui ve zel a.

"Chhaklamah khian țhu rawh, min tihbuai tum suh" ka tih pawh chuan ka bulah chuan a ding tlat a, a insut hlep hlep reng a. A banah kaiin ka ep a țhutthlengseiah chuan ka țhuttir a, a țhu fel zawt tih chuan kawngkapui a lo inhawng a..

Ka mi duh Sailiana ngei mai chu a lo lang ta, mi hmuthut chu a phu ve deuh ningei tur hi nia, țhutthleng chu engtiangin ka kân ka hre hman lo, inher a tum lai tak chu a nâk hnuai deuhah hian ka va tlawh a, kawngka biang ribur leh Terini țe tuarh ri chuan a zui nghal a.

Kawngka chu ka khar nghal thuai a, Terini mangang chu ka'n khap leh rih a, Sailiana chu kawngka bulah chuan a nâk bawr dawm chung chuan  a mu ngat a, thawh mai pawh a tum lo.

A kawrawmah chuan țhamin țhutthleng lamah chuan ka hnuk phei a, ka rinloh dan tak mai chuan a awm ka țhamna kut chu a seh thut mai a, eh pawh ka ti hman lo, ka kut veilam chuan a biangah ka'n hnek bur mai a, a thlah chiang kher mai!

Terini chuan min en ngam ta lo a niang, hmaihupin țhuttleng chu a lo bawh a, a țap tlawk tlawk niber in ka hria.

Parda thehlep deuh an zar chu pha leh phalovin ka ban a, ka phihthlak hnu chuan Sailiana chu chhuatah ka nawrber a, a kuthnungkhirhin ka phuar sak thei ta hram a. Hruidang ka'n melh ngial nain hmuh mai tur a awm lo.

Tapchhak bula Hnam an khai chu ka han hmufuh ta hlauh a, chu chu lain a ke pawh ka phuar thei ta, a chhuak tawh lo tawp ang le.

Terini darah chuan ka dawm sak a, "Hlauthawng suh, engmah a thleng lovang" tiin.

"Room lamah lut phei rawh" tiin ka din tir a, a roomah chuan ka luhpui a, nghet takin ka kuah a, "Hlauthawng suh aw, engmah a thleng tawh lovang, tikhan lo awm tawp rawh. Ka hmangaih che" tiin a darah chuan ka chulsak a.

Min chhanglo, tihngaihna a hrelo niberin ka hria, khumah chuan ka țhuttir a, ka chhuahsan nghal a.

Inchunglamah chhovin min phuarna hruizen chu ka han la a, a kut pardaa ka țawnna chu ka thlaksak nghal a, țhutthlengbânah chuan țhu chung chuan ka țawn bet zui nghal a.

A hmaah chuan stool dawhin ka țhutchilh a, a biang chu a vungbar mai, a mitmeng erawh hlau hmel han hmuh tur eih a awmlo hrim hrim. Tlangval thaza lai te chu nise kan innuai ngial awm asin mawle. Ani tar, thațhum lam a lo ni hlauh a tlem a tlemah ka vanneih phah ta deuh chauh a ni.

"Ka that nghal lo che chu i va han vannei teh lul em.. Ka pa kha engvanga that nge i nih sawi rawh" ka tih chuan chhanna min pe lo, a ngawi ngal a.

Hawisawk khawp chuan ka'n beng țhuai a, "I ngawi hlen thei ang maw?"

"Ka thah a ni lo"

"Tu thah nge?"

"Ka sawi lovang"

Dâk awrh khawp chuan ka hnek leh chawrh a, ka țawngzui mai thei lo.

Chutihlai chuan an nau awmpui kha a lo lut hlawl mai a, a pu chu a hmuh remlo zawngin ka din hliah vat a, "i pi va ko teh, mitthi inah" tiin ka tirchhuak leh nghal a.

Sailiana hmachhawn zawng chuan țhutthlengseiah chuan ka țhu thla ta a, ka hahdam hleithei meuhlo chu a ni e. Police station hnaiber biakpawhna ka hriatloh vang chuan kan bial lam OC chu ka be ta zawk a, reingial kan inhrilh hnuah station hnaiber ațanga police an rawn kal tur thu min hrilhin kan duhtawk ta kha a nia.

Nu Zari chu a lo thleng har ngei mai ka ti.

"E he Sangzuala teh reng chu.." a rawn tilut hluai a.."Pa a enge awmzia?" a ti zui nghal zat a.

"Nu zar, a pawi ka ti khawp mai, ka pa thattu a nih vangin khatia ka tih mai kha a ngai ta a ni"

"I pa thattu a, i pa a that a maw..a va mak awm ve?" a ti chiam chiam a.

"Ni e, thla hmasaa an zin chhuak kha kan khawlamah lo kalin ka pa chu an rawn that a ni" ka ti chang rat a.

A bul țhutthlengah chuan a țhu hnawk a, a pasal ka phuarbeh chu a en tlawk tlawk a, Terini a rawn chhuak zui a, anu chu kuahin a țap ringawt a, a nu lah menpur bawk.

Nu zari chu an YMA President min phone sak turin ka ti a, a hmeh nuap nuap hnuah a phone chu 'kha' tiin ka lamah chuan a rawn ban daih a.

An YMA President chu Pu Rova te inlama hmanhmawh thila kal tur chuan ka hrilh ta nghal a.

Reipawh rial lovin a lo thleng zui nghal mai a, Mi pahnih hian an rawn zui lut bawk a, an phâwk lutuk a reh fel hma chuan thil awmzia chu ka lo hrilh zung zung a. Police lo kal tur kan nghah mek thu te nen lam chuan ka hrilh vek a. Makti zet chuan an chek tlak tlak hlawm a.

"Han sawi fiah teh he thil thleng hi, chhan mumal tak chu a awm ngei tur a ni" an tih vang chuan hmai vungbur chuan tihian a sawi ta a.

"Liankunga Battalion-ah hian rambuai lai khan kan awm țhin a, misual pawh a ni hran love.

Kan battalion in silai leh sum kan man khawm ho kha rambuai a reh a ramhnuai ațanga kan  chhuah dawn khan surrender kim duh lovin Hmunzawl ramah hian thukru turin kan kal a, Liankunga leh kei leh Liantea kan ni.

Ruah a tlak hnem avangin kal a harsa hle a, tun angin kawngpui te a la ni lem lova, Muallian ram kal khân awm țhinah khan kan rawn chhuak phei a, vanduaithlak takin ruahsur nen khawthim bawk si ah ka tlusual ta hlauh mai a, ka ngalruh hi ka sawh auh deuh ni ta in ka hria, kal zawm thei ka nih tak lovah chuan Changel te satkhawmin bûkte min zar hul sak a, zing khawvara lam leh intiam chuan min kal san ta a.

A tukah chuan kan thil ken ho chu thukru felin min rawn lam leh reng bawk a, ka mawl deuh te pawh a ni mai thei e, an thil thuhrukna chu zawhna chang reng reng ka hre lova, chu chu kan buai phah ta a nih hi.

Hmunpui lamah kan silai ahlai te chu kan zuk in dah fel ve a, mahni mual mual lamah pengin kan khawlam țheuhvah kan hawdarh ta daih hi a lo ni awm a, tun ang a inbiak pawhna leh inkal pawhna a țhat loh vangin chanchin kan inhre zui hlawm ta lo reng a.

Liankunga te ho chu kum engmaw ti chhung chu ka chhui zui a, vanduainain min aikaih a ni chêk ang a tu a te mah chu ka hmuchhuakin an chin ka hrethei reng reng lo mai a, tihdan kawng awmchhun nia ka hriat chu Hmunzawl khuaa lo chan tawp hi niin ka hreta a, chutiang chuan helai hmunah hian ka rawn lut a, ka țhiante hian min thlim emaw pawh a ni thei a tih thuah ka laiah hming Sailiana chu thupin Lalrova ka inti ta daih a, tichuan helaia ka rawn khawsak dan chu in hre vek a, nupui te neiin lo kal tura chu ka sakuh ser nghah ngawt ngawt mai lo thei lova, mikhual lo lut apiang ka lo thlithlai a, a kum a kum fe a vei hnuah hei Liankunga fapa hi kan chang chhuak ta a.

A ni lah hi manfakna tur kan nei thei der lo mai a, kan chhuizui char char a, an khawlam thlengin.. An khuaah chuan Liankunga ngei chu ka han hmuhtak avangin khatiang thil kha a thleng ta a ni.

Thiamthu han sawi tur ka nei love.

Zari te nufain min lo enkawl a, min tuamhlawmnaah ka lawm tak zet, Naupangho pawhin min enhrang lo viau a, an patak ang maiin kawng engkimah ka thu an ngai chang țhin a, an tan pa nih ka tling zo ta lo erawh pawi ka ti hle a ni.

Hmunzawl khawtlang chungah pawh lawmthu sawisenloh ka ba a ni. In duh ang ka puitlin loh chu thuhran chhungkua leh khawtlang timualpho thei ang bera ka khawsak avang hian min ngaidam ang che u.."

Nu Zari lo țap hawm hawm mai chu ka khawngaih viau a, tihngaihna ka hre der thung silo.

Terini pa tak a lo ni lo reng a nih chu mawle, a van mak!

"Helaia awm reng hi a țha ber lo deuhin kan hria a, YMA hall lamah police lo kal tur chu kan lo va nghak mai ange." an YMA hruaitu chuan a ti a, thurualpui a neih thu ka lo hrilh zauh a, Sailiana chu a han zawt a, țhataka a zawh takah chuan a thurualpui mi pathum lai Hmunzawl khawmi vek te chu awlsam tein a sawi mai a, a lo hruai zinga pakhat chu tirchhuakin tihdan ngaihtuah nghal tur chuan a hrilh zung zung a.

Chhun engah chutia inhruaichhuah vut vut chu boruak ngaihchan nen chuan a inrem lo a ti leh deuh a niang, a tirhchhuah pa nen chuan an han in be zak zak a, Darkar khat dawn hnuah chuan Hall lam pan chuan an chhuahpui ta a..

Midangho pawh an rut kim ta a ni ngei ang.

Nu leh paho an rawn kalkhawm țak țak a, Nu Zari awmngaihna hrelo chu hmuh a hrehawm tak zet. Terini erawh a ziaawm viau.

Terini a pindan lama a luh hlan chuan remchang chuhin ngawireng chuan ka bag ka la a, ka chhuak ta țham țham a.

An khawdung chu a sei ka ti kher mai! Han tlan em chu niin ka hre bawk si lo. Kal pangai tak, rilru hmanhmawh zet si chuan ka kal a.

Khawchhung ka pel fel chiah chu ka thawhuai mai.

Lungdawhah chuan ka țhu ta vang vang a, ka mitthlaah ka pa ringawt a lan vang chuan ka inngaihtuah lungpuam a, ka mittui a parawl țeuh mai a, 'Pa, i duhdan ka puitlin zolo a nih chuan min ngaidam ang che' ka ti chhuak hial a.

"U Sangzual, min kalsan ngawt thei lovang" tih ri-ah chuan ka hawi let thuai a, Terini thlan tla hluama lo ding ngawi reng chu hmuh hmaih rual a ni lo.

Ka tho chhuak chu min kuah chawt a..'Ka hmangaih che' tiin ka awma bei tlan chung chuan a insut hlap hlap a..

                           A tawp ta...

©__________[ɐʞızɹɐp]__________®

[Keia bengtla lo leh khaw hawizim lutuk hian ka phuah chawp emaw tiin 'Hmunzawl' khawhming ka lo hmang pek a! Hmunzawl khawneitu te in mi ngaihthiam ka dil e. Duhlo emaw, ngaimawh emaw kan awm a nih chuan inbox lamah min hrilh mai dawn nia, siamțhat dan kawng kan zawng mai niang chu...]

©__________[ɐʞızɹɐp]__________®