Hey TAXI

_____________                     _____________

                         Hey TAXI!!!

                 *P.C Malsawmzuala*

                28.4.2017 - 18.6.2017

                           Țhen I-na

Ka motor ka sil zo chu ka lung a awi kher mai.

A ke-ah țhi em awrhtir lo mah ila ka siai pek vanga tle hlarh mai te chuan mit a la  bik riau a sin.

Ka neihna a la rei lo. Ka neihchhun ngang a ni bawk. Hei lo hmachhuan tur dang ka neih ve miau loh vangin ka duat a, ka theihtawpa uluka enkawl ka ni reng bawk.

A chunga TAXI tih inziak ka tar fel hnu chuan ka mi hruai tur awmna lam Hospital pan chuan ka tlan chhuak zui nghal a.

Hospital ka thlen chuan ka nghak zawk ang chu tihnaklaiin ka mi hruai tur chuan gate bulah chuan min lo nghak vang tawh mai a, ka inthlahrung ang reng viau mai. Mahse, han kimki phahna tur em chu a ni lovang. Nidangah pawh kan in phur fo tawh alawm le.

"Min lo nghak rei em?" in thiam lo awm tak chuan ka han ti a.

"Rei hran love, damdawi te ka lo en kawi a" a ti ve mai a.

"Tinge, damlo innei a mi a?" ka lo ti var a.

"Aw, damlo han tihah seriuos a ni lova, ka u fapa mawle" a ti ve mai a.

"A nih chu a va zia lo ve mawle. Inhnena awm maw?"

"Aw, ti ila kan inhnuaiah"

Vawiin chu nidang a ang lo deuh riauvin ka hria, a mood a off deuh nge mawni le. A țawng tuitam teh chiam lova, engemaw vei nei hi a ang deuh tlat. Mahse, ka eizawnna nen erawh in kungkaihna a nei lo khawp hian ka hria a, ka lo buaipui chiam pawh a țul lem lovang.

Thui pawh kan tlan hman lo, "Motor dahna tur remchang a awm chuan ding lawk teh" a ti a. Theihnghilh a nei a nih ring chuan kawngsir remchang hmasa berah chuan ka ding zui nghal mai a.

A bag siamțhat mawlh mawlh pah chuan "Thil ei lawk ila" a ti zui zat a.

Sana chu ka'n bih ngawt a!

"Ka ril pawh a țam hleinem, ka lo nghak ang che, va ei rawh" ka lo ti liam mai a. Bakah, tlaichawei a hnai tawh a, tun anga thil ei chu a lai deuh hrim hrim, chawei a ti harsa palh ang.

"Aih" tih pah chuan min rawn en a.

Eng he hu-ah phei chuan ka ngai lem hlei lova, keia rilțam ve hlei lo chuan ka phurpui hluai peih hleinem mawle.

"Va kal rawh, a rei mai mai. Ka lo nghak ang che"

"Mahni chuan a nuam lo ve alawm"

Teh tlat chuan le. A diktak sawi chuan keini Taxi pu te chuan khawilai emaw dawr changkang taka inthunpuar ai chuan kawngkama thingpui dawr emaw, vai dawr emaw vela inhnangfak hi kan duh mah zawk ang. Tlangnel vaklohna hmuna eitur tui leh man to, order chawpa nghah ngial ngaia ei ai chuan 'khawmaw paratha min han pek belh teh' tih mai theihna kha kal leh mai tur tan chuan a thlakhlelh awm zawk daih ang chu.

Mahse le, min nghak ve miau sia, inthlahrung lo tur tawk velin kan inphur ve tawhin ka hria. Kan kal ve teh poh a ni ang chu.

Aizawla dawr changkang pawla an sawi teh fovah chuan kan inzui lut ta hna hna a, ani duty zo incheiparh leh kei kekawrbul leh puanpheikhawk, t-shirt banbul nen ka ni lawng mai a. Lukhum ka la keng zui bawk!

Inngaizawng, intithiam lo zo chauh hi kan ang ru riau hian ka hre pek a! A țawng em em lova, kei lahin sawi ka nei teh chiam bawk si lova. 

"Engnge i ei duh?" a ti a.

An menu chu ka'n melhkual ve ngial a, ka hmu mai lo leh ta nghal a. Waiter inchei thlerhthlawrh tak mai chuan min lo pe thuai a. Chow -50, Chow half -30 tih vel han melh kha ka nia, chutiang awzawng chu a lo awm lo mai ka ti! Eh, to țih țah tak a ni ringawt mai. 

Thlan tur ka hre lo, chutianga to ka hmachhawn ngai lo. Special Lassi- 50 man chu ka kekawr hnunglam ipte ngaihtuah chunga ka enbing ngam awm chhun chu a ni mai.

"I duh duh ti mai rawh, eichak pawh ka nei lo" ka ti liam ta ringawt a.

Ani chuan a hria. A sawi zung zung mai a, eng engnge a sawi pawh ka hre ve hman mang lo. Chicken tih te pawh a sawiin ka hria,  Arsa kan ei dawn te pawh a ni mai thei a sin.

Lo nghah chhung chu a ni ninawm ta ber zawk chu. "I hmanhmawh em?" min ti a.

Taxi driver țhu muang sur sur chu a zawmthaw pawl an ni ngei ang tih hrethiam phak tur tawk vel chuan a inzirchhuak ve lo emaw ni le. 

"Hmanhmawh hran lo ve" chu ka tihsak ta thova.

"Vawiin hi ka birthday a nia" zawi angreng tak, fiah fu si hian a ti a.

"Hm..maw!?" ka chhandan ber kher chu le.

"Umh, i awih lo a mi?"

"A.. awih tho e. Hetiang ni-ah te chuan tuemaw te nen hun hman i duh zawk lo mi? Mahse, in hnalam nen inbuai ve bawk sia tiraw"

"Nia, a tih vak theih loh a nih hi" a ti awlsam mai a.

"Zanlam tal hun ala awm alawm, thlaphanna tur a awm hleinem" ka tih sak a.

A hmui a petsawi vel mai mai a ni. Ka sawi chu a hriat chu a hre ve chêk ang chu.

Eitur lo thleng chu a namai lo kher mai!

Mahnia han ei maiah chuan ka ui viau a ni. Kawtlaia eichhuah a, mi inthlir tir tal ka va duh tak e aw. Inchi pawh pahnih lai a awm tel. Arsa niawm tak chu a niin ka hria, an siam dan erawh chu keia hriatphak rual a ni tawh lo. 

Ril țam viau lo mahse eizawh chu ka huphurh lo viau a ni. A rim reng a tui mai a, mahse zanriah erawh eitur ka awm ka ring chiah lo.

Mipa hrawk chak zawk tih takah ani aichuan ka eizo hma deuh a, ka wallet chu dawhkan hnuaiah chuan ka han sam niap niap a, Rs 650 vel nitain ka hria. Kan eina chu ka pek vei ngei chu a mawi ang. A mipa zawk nih manah min hruaitu mah ni se ka tih awm tak te pawh a nia lawm mawle.

A eizawh hma deuh chuan kan dawhkanah chuan bill chu an lo dah hman a, a kut awlzawk ka ni bawk a ka lo ban thuai a. Bill ka han hmu chu ka ipchawih ni ber hian ka hria. Ka pawisa ah zawng zawng pawh chuan a daih tlat lo. Rs 860 chu ka wallet a awm zawng zawng pawhin a daih lo tih ka hre chiang kher mai. Ka'n ngaihtuan ngial pawhin kan chawlhna bul velah chuan ATM booth a awmhnai lo tih ka hre chiang ngang mai bawk si. Huiham le..

Bill chu ka khup thawk a, dawhkanah chuan ngawirengin ka dah zui a. ATM booth chu awmhnai ngat se chuan chhuanlam siamin ka chhuahsan ngeiin ka ring. Mahse, a  awm miau si lova leh.

A neinung zawk a ni bawk a phatmar kual duah aichuan tiin a pawisa pek chu ka nghak ta ngawt mai kha a nia. A ruk tak chuan ka kim ki viau a ni.

Chu pindan kan chhuahsan lai pawh chuan puar sawt hmel a put pawh ka hre chuang lo. A lungawi hmel ka la hmu tlat lova.

Motor-a kan țhu lut chu ni thei ngangin ka hre tawh lova, zawh awma mawi a ni em pawh ngaihtuah lo chuan "I awmdan hi a dik lo, nidang i ang lo khawp mai. Harsatna i nei em ni?" ka ti ta ngawt kha a nia.

"Nei hran love"

"I nei chuan ka hria, hna lam a ni emaw, chhungkaw lam a ni emaw, ngaihzawng chungchang pawh ni se ka tan chuan engmah danglam a awm chuang lova. Ka hriat atan țul lo a nih phei chuan chhan kher pawh a țul lo ang"

Chîk fe chuan min han thlek a, "Zu i in ngai em?" a ti ta daih a.

"In ngai lo"

"A nih i in duh angem?"

"Duh chuang lo"

"A nih in ta ila engtinnge min ngaih ang"

"I chungchangah hi chuan inrawlh loh hram ka duh a sin, i in duh a nih chuan sawitur ka nei hleinem" ka ti a.

"Sawitur engmah i nei lo maw!?"

"Nei nang, nei pawh ni ila sawikher a țulin ka ring lo"

An veng lama kan tlan luh dawn laichuan ding turin min han ti leh mauh mai pek a! A chhuk mai dawn emaw tiin ka'n melh a. Ani lah chu a che mai bawk si lo.

"Engnge?"

"Ka la haw peih lo"

"Kalna tur i nei a mi?"

"Nei chuang love" a va han buaithlak țhin e aw. Induhthaw ve mahnaklai hian aw. Ani anga thawhloh pawha hlawh la ka ni ve lo tih tal hi ngaihtuah ve se țha tur.

"Engtinnge niang?"

"Ka hre lo..."

"Hre bawk si lo...Ngaihzawng te i nei lo a mi.. vawiin angah te chuan a bulah te awm ve mai la" 

"Nei e"

"Tinge, hmundangah a awm a mi?"

"Awm nang"

"In inti thiam lo a mi nih leh?"

"Aih"

"I birthday leh zela i bula a awm duh siloh chuan engemaw chu a awm a ni lo maw?"

"Awm lo chutiang"

"Ka hrethiam chiah lo, in chungchang chu"

"Ka hrethiam bik hleinem keipaw'n"

"Engnge i hriatthiam loh ve ngawt?"

"Ka ngaihzawng hian min ngaizawng ve em tih ka hre lova!!"

Ka nui chhuak hawk ringawt a, amah lah chu a nui duh mang hlek lo leh ta nghal a.

"Hrilh pawp la a ni mai alawm"

"Zahthlak ve alawm"

"A ho e, tunlaiah zahin awmzia a awm hleinem, duhzawng chu sawi pawp hi a țha ber. Min lo duh lo a nih pawhin chawibelhna a awm chuang hleinem"

"Chutiang ngawt a ni bik lo a nia aw"

"I ngai harsa a nih kha, mi tih ngailoh pawh a ni hleinem, hrilh pawp la i venghawk mai ang. Nge, ka lo sawi sak dawn che a mi?"

"Naaa... ka thaw pik a nia. Khawiah emaw kal ang?"

"Kalna tur i hre bawk si lo alawm"

"I hre lo mi nangmah paw'n"

"Hre nang, ka bialnu te chu ni la ka hre mahna le.."

Chu mi țuma a mitmeng ka han hmu chiah chu a ni engkim ka hriatfiah tak ni!! 

Engmah sawi zui lo chuan ka motor chu ka her zui nghal a, chak zet chuan ka lim chhoh pui ta ziai ziai mai kha a nia. Engmah a sawi zui lo. Min melh zeuh zeuh tih chu ka hre reng mai.

Aizawla veng hulum pawh chang phak tawh lo nih naklaiin kan vengah pawh a keltil berah, mi inhnuai a kara mawngberah parawl nunchan ka zir kha a ni a, chu'ng dinhmun te chu han hre ve sela a mitmeng hi a danglam ngei ang. Tichuan, sawichhuak kher lovin min hlat mai thei ngeiin ka ring.

Kan kawtah motor lah ka hung thei a zeng pawh a ni law. Kawngpui zau laia motor ka hun rem hnu chuan ka inluah lam pan chuan Zuhrei hawlam ang maiin stepah chuan hma a mite tukkhum chhir phak dawn thaw chuan kan inzui thla ta kha a nia.

Engmah a la sawi lo cheu!!

Doormat a free a ka neih, ka inluahna te buhfai bag hlui hnuai chu ka han keu sat sat a, chabi ung zet mai chu ka la chhuak a, kan in zui lut ta.

Pawn boruak ang lo takin chu parawl in chuan rim a nei hak mai le! Nghal pang mai a. 

Khum hunna lam chu plywood 6ft thân hian a ințhen hrang ve a, a chunglam phei chu a hawlh zo chuang lo. TV en tur ka nei lova, țhutthleng erawh chu Baktawng lama ka țhianpain man tlawm te, tlo hmel zet hi min leisak a, mi anga dûp phah lem lo mah ila a hming chuan mawng dam tur ting chu ka phah chhuak ve thlap.

Țhutthleng sei pathum chu a inrem kual ve bawk tak a, TV chu sawiloh center table takngial pawh anmahni han hmachhawn let tu an nei hauh thung si lo.

Țhutthleng ațanga ban phak maiah chuan chaweidawhkan, mi pathum ei theihna tawk vel, chawhmeh tam țum phei chuan dawhkan tlangah thleng a liam mai ang tih hlauhawm khawpa awmna tur ang chi ka hung a. Plastic chair, rawng in mil lo em em mai pahnih hian dawhkan chu an hual vel bawk.

Chu dawhkan ațanga kár pawka penkhat awm velah chuan Gas thuk a awm, a chunga artui kanna niawm taka frying pan inchhuang chu hmuh mai rual a ni lo.

A piah mai chu tui dehna a ni. Tui khaichawp ngai lo turin barrel lian ka lei a, chumi ațang chuan herhhaw mai theih turin tui lakna ka siam a, hna a ti awlsam.

 khawp mai. Tuidehna nena inzawm deuhthaw chuan bualin leh inthiarna inkawp chu chhungkhungin a awm a, ka tan chuan a awlsam viau a ni.

Inchhung kan han lut chiah kha a hawikual riau riau mai kha a nia, ka game plan chu a hlawhtling dawn viauin ka hria. 

"Kan inbual lawk ange aw" tiin pindan lamah chuan ka lut tlang pawrh a, kawrphelh tungin, kekawrbul nen chuan bualin lam chu ka pan a, a mitmeng ațang chuan a tlangnel loh hmel kher mai. A bag khai chu țhuchungin a la pawm at zui a.

Ka inbual zo ka chhuak chuan Zonuni chu ka hmu ta hauh lo mai a, pawnlamah a dak chhuak nge mawni le. Nge, ngawireng hian a lo haw ru daih zawk ni.

Pindana ka luh chuan khum bula dawhkan, engkim deuhthaw ka chhawpna a thlalak chu țhutchilh meuh hian a lo thlek veng veng mai a.

"A hmel țha kher mai..!" a ti sap a.

"Hria se chuan a lawm ngawt ang"

"I hrilh dawn nia"

"Ni e, kan la hrilh dawn nia" ka ti ve mai a.

Ka inthlak lai chuan khumah chuan a lo tluzal hman fahran a, mipa rilruah chuan 'belchhung sa' tih loh rual a ni lo. Mahse, chuti zawng erawh chuan ka ngaihtuah ve hauh si lo.

Hlimna emaw ti a mawng phe lawp lawpa chetlak hnua lungngaih hi ka peih teh chiam lo. A hrim hrimah driver mai mahni ila sex lamah hi chuan ka fihlim, mahni infak pawh ka ngam sak mai. Ka duh a, ka tum a, ka thei mai.

Lo țhut chhuah pah chuan "Sangte..englo" a ti hman chauh chu ka lo pawhchah sak a.

"Khati khan min ko țhin lo teh" ka lo ti fahran a.

"Engnge i huat em em, koh duat pawh duh lo"

"Dinsang tih kha a tawk viau. Inkohduat hi intih pangchanna mai mai a nia"

"I tih tlat chuan le Dinsang"

"Hehe..Zonunmawi" ka tih chuan țha deuh hian  a 'ëi' lauh a. A va han chimawm reuh tak! A bianga piai ka tum chu a lo thlesawn hman pek a, a bengah ka pawhsak ta ringawt kha a nia. 

"A na, a na" a tih pawh chuan engah tehvak ka ngaih sak duh lova. A ban veilam chuan ka beng a rawn man fu ta hlauh mai a, pawtsatliah mai lo chuan sik titih deuh hian a bei a, a na lungrun kher mai.

Ka thlah hnu pawh chuan thlah ve mai hek lo, a lamah chuan min hnuk hnai zel a, kan inhmu hnai ta kher mai! 

Kan inliak phak tawh ang tihah chuan a thlah ta hlawl a, a sa hut hut mai nia mawle. 

Maimitchhing chuan a thaw zui ham ham a, ka hmabak chu... Thla ka nei lova, ka chawn a thahrui lah chu hlih vek ang hlauh a ni mai bawk si.

A biangah ka dawm sak a, ka kut chu a lo chelh thuai a. A rawn meng ziauvin ka hria.

"Zon..."

"Umh..."

A hmui chu ka kutzungpui chuan dimtein ka nûl den den a.

"I chunga thil thleng mek hi i hria em?" ka'n ti khauh mai a.

"umh.." tih zawng chu min chhanna a ni.

"Kan kal thui hmain duhtawk ang" ka tih chuan a meng kawk a. A thinrim nge pawh ka hrethiam chiah lo. 

"Ka thiam loh a ni e, tihpalh" tih pah chuan a țhu țha sat sat a.

Chu thil thleng chuan boruak a ti chhe vek.  Ka duh reng vanga thlentir ka ni miau mai bawk si.

Khumah chuan zangphar der hian a tlu leh a, "Dinsang"

"Eng nge Doctor sap"

"I duhzawng ka ni lo mi?" teh tawl chuan le. A mipa zawk pawh ka hawi heu mai alawm!

"Chutiang ka sawi a mi?"

"I sawi loh vang a nia ka zawh che"

Khumah chuan ka mawng ka'n hung ve zet a. "Chu zawhna chu vawikhat min zawhna a nia" ka ti zui a.

"Chu pawh ni se..."

"Engnge?"

"I haider lui zel alawm. Ka awmdan ațang paw'n i hrethiam vek a"

"Ka mawl lutuk, engmah ka hrethiam ve lo" ka tih chuan a run hmel kher mai. A kețhiah fai zet mai chuan ka khêl bawrah chuan mi han tlawh zauh a.

"Over lo mai teh"

"A nia lawm, engmah hi ka zei ve lo, a ruh lang rawta hrilh zel ka ngai kei chu"

A lo țhu chhuak zui zat a, "A nih ka hrilh ang che aw"

"Aw"

"Lo hawi phawt la"

Ka han hawi chu kan inbih hnai ta kher mai. A mitmeng lian leh val ke kaw tak mai chuan min melh ran mai a.

"I hun a ințan.." ka tihsak hmanhmawh a.

"Uang lovin"

"Ka uang hleinem..."

"Ih maw Dinsang, ka duh zawng tak i nia..."

"Chuan..?"

"I duhzawng ka ni ve em?"

"Uluk deuhin ngaihtuah la, vawiin ringawt hi ngaihtuah suh" ti ngawt chuan ka chhang a.

"Ka ngaihtuah theih chin chu ka ngaihtuah alawm. Naupang chhia ang maia talrual chu ka nih tawh bik loh hi" a ti a.

"Ka hria lawm"

"Chuti a nih chuan ka zawhna che chu..?

"Chuti vut vutin thutlukna an siam ngai hleinem" ka tih chuan a hmui chu a ti pawrh deuhvin ka hria.

"Engngati?"

"Chhan tam tak a awm thei ang chu"

"Thlakhat liamhnuah pawh zawt leh che ila tuna ka laka i rilru ang bak kha i pu dawn chuang a mi? A danglam ka ring teh chiam lo"

Min hnial dang titih chu a ni der mai. Chhan vak ngaihna ka hre lo.

"Duh ni la chuan hman ațang tawhin ka awmdan ațangin i hrethiam tawh ngei ang. Mahse, i haider lui zel a. Hrethiam tur hi ka ni asin mawle" a tih pawh chuan ka la chhang lem hlei law.

"Ka zahpuiawm tiraw?" a ti zui a.

"Kei aia țha midang tam tak i hmu tho awm sia.." ka lo ti ringawt a.

"Țha tih zawng hi a tehna a zirin a nih ka ring, chuan kan tehna a in ang lo a nih ka ring bawk" min chhan dan chu ka man viau lo. 

"Eizawnna chungchangah te, in leh lo leh khawsak phung hrim hrimah te hian tehna vantlang a awm ve alawm"

"Chutiangah chuan tling vek ta la.."

"Haha... i tilutuk dawn"

"I ngaihdan ni lovin ka ngaihdan a nia ka sawi" a lungfing chin tihtakah mi a hnial thla hneh viau zel mai bawk si. Amah lah ka duh lo hran a ni lem lova, ka venthawn ber zawk chu kan khawsak inthlau lutuk chuan harsatna min thlen ang tih mawlh a ni ka hlauh ni. Chuti ni lem lovah chuan han hnialna chhan tur teh chiam ka neih pawh ka hre lo.

Ngaihtuahnaa 'duhna' ngawt um ila chuan han hnial leh chuang tur ka awm lo chiang. Mahse, Khawsak phung in ang lo hian harsatna min siam thei dawn hian ka hre bawk si a ni.

"Harsa i tih chuan sawi mai la, ka tihluih theih i ni hleinem"

"Chhang lo ta che ila...?" ka tih chuan a taksa chu engtin emaw tak hian a awmin ka hria.

"Sawi theih ka nei hleinem" a ti sap a.

A hmel chu uluk fe hian ka han en a, a thim deuh khapin ka hria, a hmuichhah leh sen ling hler mai chu a pet fan fan a, ka lam a hawi lo. 

A chalsam  tla chu ka huih kian sak a, ka lam hawia a khabea ka han kuai chu a țang țak mai a, lehlam hawiin nem han tum ila a țang tlat awm tho sia!

Ka țhut hnaih sauh a, a khur deuhin ka hria.

Lungawi lo tih hriat reng hian min melh deuh ram a, dimtein a hmuiah chuan ka fawh sak a.

Chhanlet chu sawi loh min nemsawn chiang kher mai!

                           Țhen II-na

Engah teh vak phei chuan ka ngai lem hlei lova.

A inrin hma chuan nghet zet hian ka pawm bet a, a tukkhumah thlesawn thei lo turin ka kut veilam chuan ka man a, a khabeah dinglamin ka dawm bawk a, a hma ang bawk chuan ka tilui leh ta ngat a.

Rei fe chu a dawh tawp a. A tawpah chuan chhanna ka hmu ta! A'n țang ve fahran bawk a, a duham leh vei phian bawk si.

Ka awmah chuan a nam zui a, kan han inthlah chiah chuan "Hetianga awm tur kan ni lo, min duh ve hunah..." mei nei fe chuan mi melh zui a.

A bul ațang bawk chuan ka țan țha leh a, mi tihvak ngaihna hre hek lo, duhthaw zetin min fawp let leh ta ringawt mai kha a nia. Chu aia thui chu kalpui tumna pawh ka nei hran chuang lo.

"Suala" tih pah chuan ka darah chuan a chum taih a, a va han na lo teih teih tak em!

Ni, khami ni ațang khan a lawm ka duhthu pawh ka hrilh ve hauh si lova kan induh tak em em ni.

Engnge a awmzia pawh ka hre lo, kei tehlul hi mi a thlahlel ve em em ringawt mai a, keilah bang bik lo. A ngai bawkin a duty hawlam hruai chu ka hna leh bawk kha a ni a, zan lama len zauh zauh phei chuan kan inhmu zing khat viau chuan ka hria.

Taxi driver nih chuan nalh taka inchei zuar reng theih ni hek lo le a chang chuan min zahpui chang a awm țhin mai thei a ni. Mahse, engmah a tilang ngai bik lem hlei lova.

Min hrechiangsa a ni bawka tiin kan inhmuh nazawngah hi chuan ka in uluk duh ngai bik lutuk lova, an ina ka lendawn zanah erawh chuan theihtawp deuhthawin ka inthuam ve hram țhin chu a nia. Nalh min ti ngût ange maw.

An chhung hi an hlung phian a, a pi leh pute Aizawla dawrkai lian hmasa pawl an ni a, inpui luahtu an nih vangin chu'ng te chu an rochung ve zel lo thei lova, tunah phei chuan dawr lian tak tak hmun 3 emaw vel laiah an nei hial awm e.

An unau hi panga an ni a, an upa berin nupui a nei a, fa 2 naupang te te an nei a, inhrang chang hmingpu ve siin inhnuai chiahah an awm a, engkim deuhthaw chu inpui lam an ban thung niin ka hria. Midang chu kawppui nei an la awm lo. Sawrkar lamah enghna emaw tak a thawk niin ka hria.

Chumi chhang chiah chu mipa tho a ni a, ani chuan an dawrlam a enkawl thung a, kohhran lam a belh vak hmel loh, lu kawlh tel tul a ni a, zu a in zeuh zeuh ka ring.

Chumi chhang chu Zonuni.

Naupangber dawt chu hmeichhia bawk a ni a, phaiah lehkha a zir țhin a ni awm e, a tuihnai reuh viau a, a țawngtuihnai lutuk erawh zopa bengah chuan ngaimawh tham zet tur hi a ni. Buhțhap takngial pawh thiam lo kumhlun tur tih hriat reng mai a ni. Phone bih taima tak a nih hmel e.

An te ber chu mipa, College kai lai a ni. A vun ngo ang ang chuan a rilru pawh a no deuh niin ka hria, a hairstyle ațang reng mai chuan makpa atan ka iai zawng tak a ni mai.

Zonuni nu leh pa chu an la upa lutuk lo, sawrkar hnathawk chu nise an la pension awm lo mange tih tur rual hi an ni. Dawr an la enkawlpui peih bawk a, a nu chu a thawlian ham ham viau!

Chutiang karah chuan Zonuni nen Ui leh a mei ang maiin kan lo inzui ve nawk nawk mai kha a nia. An ina len aichuan khawlaia inhmuh chu nuam ka ti mah zawkin ka hria. Mahse, khawlaia inhmuh lah hi a hautak phian bawk si!

Kan khawsak phung in ang chiah lo chu a lang zeuh zeuh țhin a. Mahse, chu chuan harsatna liantham min thlen ngai meuh lo.

"Ticket chu ka la dawn em?"

"La lo mai la, i duh leh i ta tur chu la tho la"

"A! Mahni chauh te chuan ka duh bik lo e a, la lo mai ang aw"

"La rawh, la rawh. I en chak kha, keichu ka chak vak lova. I u te an kal dawn tho te chuan an rualin i kal ve anga ni mai alawm"

"Ka la ta lo mai, ka kalpel tawh"

Concert liantham deuh tak, international band in an rawn perform na tur ticket a ni kan sawi chu. A duh phawt chuan en mahse pawi ka ti lem lo. Mahse, keichu hetiang lam hi ka tuipui ve tehchiam lova, sum heka enah phei chuan a hlutna ka pawh pha meuh lo a ni ber mai.

Mahse, a hnuah ka ngaihtuah ka ngaihtuah a, bialnute berin enchak a keimah vanga a en lo ringawt tur chu a dik ka ti leh thei meuh bawk si lo. Hetiang hun hi a thleng zen si lo a, a ngaina mi tan chuan a hlu dawn em asin tih te chu ka ngaihtuah chhuak chho ve zel a.

Ka rilru nuam leh si lo chuan ticket pahnih chu ngawirengin ka va lei ve ta ringawt a, ka nikhat hlawh aia tam dawn alawm ka hman le. Tihian a rin loh takin ka țhawng thut mai ang chu. Ve reng reng a.

A hun a thlen dawn ni thleng chuan concert lamhawi chu engmah a sawi tawh lo hrim hrim, keilahin sawi tange ka ti bik hlei lova.

Dan pangai ang bawkin a duty zo chu ka lam leh a, zana concert ka enpui tur chu a ruk tak chuan ka hlim a ni. A chhan pawh concert-a an zai lam aichuan kan pahniha kan chhuak dun tur kha ka hlimna chhan zawk tak chu a nia. Ani pawhin nuam a ti viau ta ve ang.

"Lo leng la zanin chu.." a ti a.

"Tinge?" tihian ka ti leh hu țhin.

"A, i lo lengkhat em a, i buai tih chu ka hre thova, mahse a khat tawk tal hi chuan lo leng ve țhin la" a ti zui a. A ni reng lah tak a zanlamah chuan ka leng ngai mang lo ka tih tawh kha.

"Zanin te chu kan chhuak dun ang chu" ka tih chuan muangchang hian rinloh hmel fe hian min melh a.

"Engnge?"

"Concert en ang i ti ni lawmi?"

"Hm... i duh lo nih kha" a ti hmak a.

"Ka duh tawh a lawm"

"Duh tlai emai, ticket pawh a awm tawh hleinem tunah te chuan, an hralh zo vek tawh"

"An va hralh thei ve" ka tih chuan a ngaihdan a ni vak lo tih hriat fe hian thawk a la hap a.

"Chuan kan en dawn lo tihna a mi?" ka ti leh a.

"En ngaihna pawh a awm loh chu. Min luhruk pui i tum a mi?" a tih chuan amah pawh a nui chhuak ta ringawt a.

"Deskboard kha hawng la.." ka tih chuan phur fe hian a han hawng a, Taxi document vel bak engmah a awm lawi si lo.

"I va'n sual tak" tih pah chuan min melh ram ram a.

"Ka dah ang, uluk deuhin han en țha leh teh"

"A awm lo, document bak engmah a awm lo. Heng hi ticket an ti ngai lo" tih pahin a lekchhuak va a.

Khawnge maw ka dah daih le. Ka tibo ringawt te hi a ni ange. A chi loh viau ang.

"Mi tih der kher a ngai hleinem" a ti zui sap a.

Ka lu chunga ka wallet chu ka la thla a, "Tah hian han en leh teh" tiin a malchungah chuan ka thehphei zui a.

Phur lo tih hriat fe chuan a la a, a han keu niap niap a, ticket chu a hmu ta a niang "Tak tak maw!?" a rawn ti chhuak hlawl a.

Ka mit ka lo siai khum zauh pek a, a țah nuih țep niin ka hria. Gear ka vawnna kut chu a rawn chul ringawt pek a! Duh common lo thei a nia, thildang han tihvakna hun leh hmun ni nghal hek lo chuan mawle.

"Engtia i neih nge a?" a lungawi hmel mawlh chu a ni hmuh nuam ber zawk chu ni.

"Ka lei a"

"Ka lei dawn khan i phal bawk si lova, i lo lei tawh tihna mi?"

"Leichuang nang"

"Van ho reuh tak, pawisa i nei a mi?"

"Kha ka ngah kha.."

"Ka'n chhiar chhin aw.." tih leh wallet hawn chu a rualzui nghal a, uluk fein a chuar zawng zawng nen a zut mar thlap hnuah "1230" a rawn ti chhuak hlawl a.

"Petrol ka la la lo" ka lo ti ringawt a.

"Engzat mante nge i lak țhin?"

"A in ang chiah lo. 500 ațanga 700 inkar vel te a ni tlangpuiin ka hria"

"500 vel i hawn țhin tihna nimaw?"

"700 leh1000 inkar a ni tlangpui"

"A chhiat vak loh chu ti raw, nangmah chauh i ni tho sia, a khawl theih deuh ang"

"Ka la rul pah a, khawl tak tak chu a la theih loh"

"Loan in i la mi a?"

"La love, ka pa lei a nia. A zat ve ka rul ang che ka tia, thlanga vel a kal leh chuan ka rul zo ve mai ang"

"Rulh kher a ngai a mi?"

"Amah chuan rulh pawh a ti chuang lova. Rul ang thlip thlep pawh ka ni chiah lo. Chhungkaw pawisa leh tho a nia, ka submit a ni deuh ber ang chu"

"Ok, ka hrethiam"

"Hrethiam ve thei ngawt mai" tih pah chuan lehlam ka hawi san, ka banah chuan a chum taih taih a.

"Dar engzatah nge zanah chuan kan kal ang?" a ti zui a.

"Kal hma ila, 7:30 țan a nih chuan dar 7 ah te chuan thlen a țha khawp ang. Mi an tam awm sia"

"Nia, tam ka ring. Parking a buaithlak leh pek ngawt ang" a ti a.

"Vana pa hall kawta dah mai a finthlak ka ring"

"Nia, awlsam ber zawk ang. Ka lo inpeih hma ang a tiraw, chaw hi kan ei tlai thei lutuk a"

"Țha khawp ang, nghah ngai lo turin"

"Umh, bye aw chaweitui"

"Bye, chaweitui le"

Phur hmel taka a chhukthla chu ka thlir zui reng a, a liam dawnah a rawn bye bye zui a.

Kei aiin kum 2 in a upa. Chu chuan a chang chuan ka ngaihtuahna a luah deuh țhin. Nupa han ni ta ila ani chuan fa neiin thisen pal zawk na na na chu a lo chuai hma deuh ang a, kei ka lo la țhat țung si chuan kan nupa nun a khingbai ang tih ka hlau deuh țhin. Mahse, mi pawhin an paltlang thei alawm mawle.

Harsatna te hi a lo thlen tika dawh ngawt lovin vaikian țhen dan te pawh zawn nachang hriat hi a țha awm mange. A hêlna kawng te pawh ngaihtuah lawk chuan a awm thei hial maithei asin ka ti rilru.

Dar 6:30pm a la ri lo deuh tihah chuan in ațangin ka inkhalh chhuak a, Zonuni te veng lam pan chuan faifuk rat rat chung chuan ka tlan a.

Ka len pawhin an kawtah hian motor ka dah ngai lem lova, tlema an kawt bawr kawngpui chu a zim deuh lai a nih vanga dah lo mai phei chu ka nia, an in langpha lo deuh lai, kawngkual zau laiah ka dah mai țhin a, an garage țawmpui ve ngawt ngam hek lovi!

Ka motor dahna țhin ațang chuan ka han bia a, a pick up miah lo leh ta nghal a, chaw a ei laklawh nge mawni dawn le.

A hnu lawkah chuan min rawn be let zui mai a, "Kan kawmthlangah damlo serious deuh kan nei a, ka buaipui lawk a" tiin inthiam loh hmel deuh chuan a rawn sawi a. 

"A nihtak chu, ala hma alawm hei"

"I lo thleng tawh a mi?"

"Aw thleng chiah, motor dahnaah ka awm a"

"Lo chhukthla la, ka insiam rei lovang. Chaw ka ei tawh thova"

"Awle" ka'n ti ve bawk taka, ka lut chak teh chiam chuang lo. 

An in thlen hma dawrah chuan ka thep kual thla ta vel mai mai a, min lo biak thleng chuan lut lovin ka awm ta ringawt  kha a nia. A hoh chu a ho ang reng mange.

Karei, a nalh kher mai!

Ka lo nghahna dawrah chuan ei rep rep chi eng engemaw hi a leizui ve nghal a. Kan inzui chhuak ta.

"Ka u in an ruala kal ve turin min sawm a. An hmanhmawh bawk sia"

"I lo kal daih lo a nih chu mawle"

"Em em  a che a.."

"Hehe, tui ka lei miah lo a nia, nakinah theihnghilh loh tur aw"

"Yes boss, beer awm bawk se" a tih chuan ka lo melh deuh zauh pek a, inthiam loh hmel tak chuan a nui deuh a.

Vana Pa Hall kawtah chuan motor kan dah a, kein lammual lam pan chuan kan kalphei dun ta a, mi veivak chu a boruakin a zir bawka an tam kher mai. 

Kan thlen dawn hnaiah chuan ticket chu ka han check a, pakhat chauh ka hmu ta tlat mai a, ka'n lepse ngial pawh chuan a pahnihna chu ka hmu thei chuang lo. Engnge maw awmzia le.

"Chhunah khan a pahnihin i khung leh si maw?"

"Khung ve thlap kha mawle. A va mak ve"

Thlan tla hluamin ka taxi chhung te chu ka va hai leh a, ka hmu bawk si lo. A ngaihna ka hre tawh lo. Manganthlak zawk hian..

"Kha nangmahin zu en mai rawh" tiin ticket chu pek ka han tum a, "A awm ang lo emai a" a ti hlak a, khawnge maw a awm daih le. 

Chutianga mai mai a sum leh hun han khawhral ngawt mai chu a zia lo viau a ni. 

Concert lah chu an țan ruai tawh a, Opening changtu kan tualchhung zaithiam te pawh an inlar țan tawh. Gate bul velah chuan ticket black-a leitur zawngin  ka teikual fua fua a, pakhatmah ka hmu der mai bawk si lo.

A khawih hnuhnung zawk kha amah hi a nia, a la anga a hre pek lo a niang. 

"Kal mai ang, a buaithlak emai" a tih chuan ka pawm hle mai. Ka ning deuh hman tak tak a, ka en chak ve a zeng pawh a ni hleinem mawle.

Motor dahna lam kan pan țan chauh tihah chuan ngaihdan dang ka nei ta thut a.

"Khawmaw i purse lo phawrh teh" ngawireng chuan min pe ve mai a. A ID card ho chu ka en dan dan a, a thawhna Hospital ID chu ka lachhuak var a.

"Hei hi keng rawh, kan lut thei ang. Keiin ticket ka keng ang a" tiin.

"A.. an lo phalloh chuan a zahthlak dawn nia, en lo mai ang" a hreh ang reng khawp mai.

"A ho lutuk, kan tlang zo awm emai. Medical i ti ringawt ang a, duty ti tel lo la!"

"A hranin card an siam vek ang chu chutiang te chu"

"Ka theihnghilh a, i ti mai dawn alawm" ring lo angreng zet chuan min zui lo thei si lova. 

"Kal hmasa rawh aw"

"I kal hmasa ang chu, i luh theihloh chuan ka lo ti ve kher lo ang a, i luh theih chuan keichu ka rawn tlang dawn thova"

"Naa..ka va'n huphurh tak"

"A ho emai, confi la a tawk a ni mai"

Gate kan thlen phei chuan an lo intlar nguai a, mit min siai khum zauh hnu chuan kal rawh tih pawh ngai lovin a pan phei ta nal nal a. A card chu a lek va mai le! Ka nuih a za ru viau mai.

Mi a la rawn hui zui leh ta nghal a!

Ka intlarna ațang chuan ticket lekchhuak va chung chuan ka phei zui ve nghal a, midang intlar te hmakhalh chuan duty chuan min la luhtir zui leh ta nghal a!

Kha zawng kha a ni mai Taxi driver thluak chu! Mahni line-a officer lianpui nih a, a hun leh hmuna chetlak thiam leh si loh hi 'mutthluk' nen a in ang reng.

A chhung kan lut chu kan nui dun țiah țiah ringawt!

Ground chhungah chuan an lo zi lui lui tawh a, rui nawi fe fe pawh an awm leh pek e, dan pangai tein.

"An țan tak tak hmain zung nghal ila, thawh chhuah leh a peihawm dawn loh emai" ka ti a. Lammual chhimlam, galery hnunglam pan chuan kan kal zui nghal mai a. A thim deuh ruai vang chuan phone light ka ti eng a, mi veivak an kat nuk nuk tho mai helam pawh.

A țhen lo inkuah chîl chial lah bo lo. Bang nghenga lo inkeih ve ngial te pawh chu lai thim chin leh chin lovah chuan hmuh tur an awm ve bawk e.

Hlui eng emaw zat tur hi an țhubial tiau hlawm bawk a, chu'ngho chuan thildang tehchiam an kîl hran lo. Mawng kan awk awk a lehlam hawichunga uak ta thawr thawr lah bo lo.

Lung ka rap pial a, ka tlu tur in vai vel chuan kan bul maia țhubial zinga mipakhat hnung hi ka va vai fu hlauh mai a, "Tih palh, tihpalh" ti a kalzui leh nghal mai ka tum chu ka hnunglam ațang hian min kuai her lawp a, "I pawr ve deuh elaw!?" tiin ka âwmah chuan min țham zui nghal nawk nawk mai a.

"Ka tihpalh a ni, min hrethiam rawh. Lung ka rapsual a" ka ti țha ve mai a. Zu rim a nam huam huam lehnghal a.

Ka hmaiah chuan min bêng hram pek a!

Chutiang zurui mai mai chu ka'n hlau lo teih teih khawp a, ka awma a țhamna kut veilam chu vai kian pahin a khabeah tak kan hnek bur mai a, ka chesual zui a ni nghal mai!

A țhiante ho chuan min rawn hnek liam liam a, ka inveng viau nachungin kutrual zawk na na na chu ka inveng seng ngang lo a ni. Zonuni lah lo țe chûl bawk!

Police duty lo lang thuai lo sela chuan ka nasa lo viau ta ve ang.

Police hovin hmehen a an han chhun takah chuan ka hnek hmasak ber kha Zonuni u a lo ni reng a! Kei lah ka âng baw zaih zaih mai bawk si.

"I thil tih hi i hria em?" tiin Zonuni chuan a u chu a va dinchilh thuai a. Police pakhatin tui min pek hmang chuan ka kam vel țhuaha ka tihfai vangin engnge an unau indawr dan chu ka hre zui thui lo.

SI pakhat chuan kan intihbuai dan chu min zawt a, a nihna angin ka hrilh mai a, anni lam pawh an han zawt ve a, "kan țhianpa a hnek" tih bak han sawi thui tur an hre vak lo. Zu nen an la ni deuh nuih bawk si nen.

Ka hmai chu a rawn vûng chhuak țan a, a lawmawm viau loh.

"Ngai dam rawh aw, an rui lutuk a..." Zonuni chuan a'n ti tak nain vawikhat na na na chu hnek leh hram a nia ka duh ni. Eng em chu ka sawi ta bik lova. 

An zu inbang zawng chu laksakin "Lammual area a kan hmu leh che u a nih chuan kan man ang che u" tiin gate pawnlamah an hruai chhuak ta thliah thliah kha a nia. An tan concert a tawp fel der mai!

"Din, i țha em? A na em? Engtinnge i awm?" tiin a phone chuan ka hmai chu a rawn en a. Ka hmui chu a kawh deuh luah tawhin ka hria, ka biang dinglam a vung bawk. A nat zawngah phei chuan a na ti a han buaipui hlut tham phei chu a ni hauh lo.

"Engtinnge niang, damdawiinah tlanphei mai ila..?"

"A ngai lo, a na hleinem, a vung ringawt a nih hi"

"A na lo tak tak em? Khawmaw âng teh" tiin ka kâchhung te chu a'n en kual leh rih a, "I hmui chhunglam hi a kak a nih hi, i khabe vel te hi nâ a awm lo tak tak a mi?"

"Ka țha ka tih chu"

Concert lam pawh rilruah a awm tawh lo. Zurui mai mai kut ka tuar kha ka la tak zet. Ka lum pep pep mai hian ka hria. 

"Haw mai ang" a tih chu hnial pawh ka hnial buai duh ta bik lova. Concert lo neitu te ber stage an rawn luh mek lai chuan keini pawh chuan gate chu kan chhuahsan ta a.

Sawi tur avang kher mai. Amah pawhin sawitur a hre bik lo a niang ngawireng chuan kan kal mawp mawp a. Motor a kan luh hnuah chuan "Civilah chuan kal lawk ang aw" a ti ta hram a.

"A ngai lo, hetiang mai mai kalpui tham a ni lo"

"Aw... damdawite, i pem hnawihtur te kha kan lei ang chu, khatia tawrh ringawt te chu a ang lo emai"

"A ho tham e"

"Ngaihzam viau tur a ni ngai lo" a tih chuan chhan pawh ka chhang peih tawh lo. 

Hospital thlanga kan tlan lai chuan 'I ding dawn lo tak tak a mi?" a ti a. Chuti na na na chu tiin Bus stand bulah chuan ka ding ta kha a nia. 

Amah chu a chhuk tharh a, gate lam pan chuan a kal chho nghal thuai a, kalpui pawh ka tum chuang lo.

Rangfe hian a lo let leh a, motor-ah chuan a lo lut mai dawn emaw tihlaiin hnunglamah chuan a kalphei thlak thlak a. Gate a lo inkalh hman a ni ngei ang. A zia lo hle mai. Ka kalpui lo lak lawh bawk sia, a thawhna hmun a ni bawka harsatna a nei em lo turah ngai mai ang.

Minute 5 lo liam chu a thang lovang Polythene-a damdawi engemaw khai chung hian a lo let ve leh mai bawk a, a rawn thaw na sa he hu khawp mai. 

"Nangmah vang, purse ka ken theihnghilh" tih hlak pah chuan a lo țhu lut zui nghal a.

"Engtinnge i tih a?"

"Naktukah ka lo pe mai ang che u ka ti mai"

"I haw tlang nghal dawn nge?"

"Aih"

Ka inluah lam pan chuan concert-na lam hnuchhawn zawng bawk chuan kan tlan leh ta liah liah mai kha a nia.

In kan han thleng chu tuilum a chhuang nghal sat sat a. Darthlalanga ka hmel ka han hmu chu ka va han dawh fu lo teh lul!!

Engmah ka la ei mumal bawk si lova ka ril pawh a țam țan viau mai. Kan chhuahnaah ka inhnawhpuar mai ang ti kha ka nia, engpawh nise puar hmasak hi a țha a nih hi, mihring chin hriat loh.

Țhutthleng seiah chuan min muttir a, ka kachhung vel chu a tifai a, a pawnlam chu vurin a dep thung a, a pangchan theih ngher ngher hle mai ka ti Val hi!

"Damdawi hnawih hma" tiin ka hmui chhah leng lawng tak mai chu a fawp zauh a, ka kua a la ri ruih ruih zui a.

"Chaw i la ei lo mi?"

"Ei nang"

"E khai, ti em em nge a?"

"Tlaiah khan ka tlan laklawh bawk sia, ka haw hma hman lova, kan chhuahnaah ka ei mai ang ka tia, ka ei hman ta lo chu a nih kha" ka ti mai a.

"Ka va siam ang che aw, engnge leisa i neih?"

"A awm vak lovang, bawnghnute a awm ang va thli mai rawh"

"Chutiang ringawt te chu a ho tham awm e, a țam leh vat tho dawn a sin"

"A țam leh nakinah chhang nen ka ei leh mai ang. Chaw chu ka ei peuh chiah lo hrim hrim a"

Dawrah te a han kal a, eng engemaw min eitir ta nual mai.

A nazawng chuan a lo leng duh hauh lo nain a lo kal hi chuan inchhung hi khawihfel tur a ngah thei khawp mai! Zan e tilo chuan tunah pawh pindan lam a khawih ri leh rawk rawk tawh. A mak khawp mai. Ka rinai daihin a che peih.

Dar 10 pelh rawtah chuan thlantla hliam hian a che tawh a, phur fahran lo chuan ka thlah haw tak nge nge kha.

                      Țhen III-na

Ka pum nuam lo chuan zing dar 5 velah min kai thova, inthiar ila a reh mai ang tiin peih leh peih lo chuan ka tho chhuak a, ka nawmphah sawt lem chuang hlei lova. A na zual hret hret emawni lehnghal ni.

Thlanfimin min bual țan ta tlat mai. Ka nu chu ka han auva, nachhawkna min eitir a, ka lu-ah kutnghatin a țawngțai bawk a. Mahse, engmah mah chu a thawk pawhin ka hre lo. Khumah chuan ka vial ka vial ringawt mai a, ka nu chuan ka pa chu a va kai thova, PHC lamah chuan min tlanpui ta ringawt kha a nia, ana ve bawk em a ni.

Ka pa motor khalh te chu khalh muang hi ka'n ti khawp a, kan thleng har lutuk mah mah in ka hria.

Damdawiin kawtah chuan motor chu a din tir a, Doctor quarter lampan chuan ka pa chu a tlanchho zui nghal a. A kaitho mai thei lo emawni lehnghal ni! Hrep tak chuan le.

"A natna a rei tawh em?" ti tu doctor chu thei leh thei lovin ka melh a, ka rei maw!

Zonunmawii!!

"In lo hruailut thei angem? Ka lo va tifel ange aw" tiin a lut zui nghal mai a. Min la hmu lo chu a ni awm phawt mai.

Ka na viau, Mahse kha Doctor nu khan ka rilru a luah zawk daih!

Khum dai thler thlurah chuan min muttir a, ka nu leh pa chuan min dinchilh ran a, pindan lehlamah chuan doctor chu a ri rak rak a.

Kan awmna pindan lam pan chuan a lo penphei thlak thlak a, a lo lut a kan mit a'n intawng chiah chu a ding chiang kher mai!

A âng ziau a.

Ngawireng chuan a inher a, a chhuak leh ta daih mai a, ka pa chuan a lo hmu ve reng mai bawk sia, ngaihțhatloh hmel fe a min en hnuah chuan a chhuak zui ve nghal a.

A hnu deuhah chuan ka pa chuan kan nurse senior, doctor awmloh pawha kan rawn ber mai chu a lo hruai lut ta hlauh a. Ani chuan nachhawkna chuan min chiu nghal a, rei lo teah chuan nader ang chauh ka ni. Ka dam chiang khawp mai. A natlaia a nat ngawih ngawih nen a le.

Ka pa nen chuan nurse, Nu Kimi chuan eng engemaw an ziak fel vel niin ka hria, chumi chhung chuan ka nu nen motorah chuan kan lo nghak a, Doctor quarter lam chu ka'n melh viau nachungin Zonuni chu a rawn inlar leh tawh lo.

Hetah a lo thawk tihna emaw ni le?

Kan kal lam leh hawlam chu ava han inthlau tehlul em ve le. Ka nâ chu awm lo mahse ka chau deuh nghual hian ka hria. In kan thlen chuan ka thlan tla nasa bawk si nen ka ban deuh chuap sia ka inbual zui nghal a, ka nu eirêl pawh chu pui tange pawh ka ti chuang lo. Țhutthleng seiah chuan ka mu ta vang vang a.

Zonuni mawlh chu ni mak ka tih tak ber chu ni.

Thlathum DIET-ah training tura min rawn koh vangin Aizawl lamah Training in ka awm a, chumi chhung chuan kan Doctor thau liar luar nen khan an lo inthlak a ni awm mange tih chu ka rilru siamthiam ve dan ber a ni.

Theihnghilh tak tak thei lo mah ila inhmu ngai lo ta chu inhriat reng theih pawh a ni lem lova. Mahse, nupui chu thuhran, ngaihzawng neih ringawt pawh min harsat tirtu a nih miau vangin ka tan chuan mi bik tak a ni lawi bawk si.

A hmel kha tlemin a lang nu ve deuh tawhin ka hria. Mahse, an eizawnna ten a zir bawk a nûhnuang chu a ni lem chuang lo. A pasal nen an lo kal angem le? 

Ni lo, ka hmuduh lo chu thil chu. 

Mahse, engtikah emaw chuan ka hmu ang a, ka la hre dawn tho bawk si. Engatinge kan khuaah kher kher a lo thawh le. A pasal fanau te nena khawlaia an chhuak vak chu ka hmuh lo hram ka beisei.

"A na leh a mi?" tiin ka nu chuan min lo dinchilh thuai a.

"Na love, engtinnge ka awm a?"

"Na tuar niawm takin thawk i la hum hum sia" a ti a.

"Ka lo chhing sek a, ka lo indelh mu a niang" ka ti ta ringawt a. 

Zing țhang țhangah Zonuni chu ka va mualpho pui leh teuh ve mawle.

Tukțhuan kan kil lai chuan ka pa chuan "A na tawh lem lo maw, vawiin i kal peih dawn em?" a ti a.

"Na love, ka kal peih ang" ka ti ve mai a.

"Vawiin te chu chawl ve la a ni mai alawm, i chawl khât emai, inthlahrunna tur a awm vak a mi?" ka nu chuan a lo ti ve bawk a.

"A ka training rei bawk sia, an lo hah lutuk ange, ka țha tho alawm" tiin ka chhang a.

Kan eikham chuan school kal tur chuan ka insiam zui nghal mai a, training hnua ka kalna hmasa ber tur a nih vang chuan ka phur ang reng viau a. Ka rilru tam zawk erawh chu bangbo takin a vak kual mek lawi a.

Ka incheina hrim hrim chu nidang zawng aiin ka uluk a, a hmazawng aiin ka confi lo thung si. Kha Doctor khan ka nun a tibuai zo leh vek dawn a nih tak hi.

Engah nge mi nupui te ka han ep thar leh tak mai le! 

School ka han thleng a, naupangho chu an lo awm leh nuai nuai tawh a, a chhan pawh awm hawt si lo hian ka thin a rim em em ringawt mai a ni. Naupangho hlim taka an lo awm chu ka hua niberin ka hria. A zia lo viau a ni.

Miss Diki paw'n a tihdan ngaite bawkin a chair chu ngheng awnin a phone chu a lo kheuh leh mawlh mawlh tawh a, ani hi Aizawl lam ațanga lo thawk thar a ni a, sambu chhah zet mai, nula vantlang aichuan a lian mah mai thei e. Hmaibial lam, tarmit lianpui vuah a ni a, a hmelțha an ti. Chutianga a chungchanga thutlukna siamtur khawp erawh chuan amah hi ka ngaihtuah ngai lem lo keichuan.

"Ehe sir, i lo zawm tawh dawn elo? Engnge min lo hawn?" tiin a țhutna ațang chuan a lo ding hluai a.

Midang pawh pathum pali vel chu kal an awm tawh awm e. Parker pen dawrzawn khat ngawt mai ka hawn chu Miss Diki kutah chuan ka dah a. Lawmthu an sawi liam liam kha mawle.

Ka pindan lamah chuan ka lut tlang nghal a, engkim chu a hmunah, felfai takin a awmthlarh vek a, peon fel tak kan nei hi a lawmawm hle a ni. 

Tui chu ka'n khiat nghal khawlh khawlh a, keimah ber hi a hmun lova awm chu ka ni ta ber awm asin mawle. Ka awmna hmunah hian ka rilru a awm tlat si lova.

Nikhat rei ni ber a ni hial awm e. 

Sir Rinawma a kal loh vangin a class te chu ka va laksak a, rei vak lo chhung chu ngaihtuahna dang ka pu ve bawk taka ka pindana ka luh leh chuan a ngai ang bawkin ka awm leh zel bawk si. 

Teacher Common room lamah te chuan ka va țhuchhuak leh ren rawn a, khawilai mah chu ka tan hmun nuam a awm lo a ni ber mai. Hla taka zinbo vang vang a ni ka chak tak ber ni. Chu lah chu a tiha tih mi rual a ni si lo, thlathum chhung teh meuh ka thang bo tawh a, han zin leh ngawt chu a kawnghmang tawh si lo.

"E sir, Pu Buanga school in naktuk chu inkhelh min rawn chova, 'aw' kan lo ti ve ngawt a nia" tiin Pu Sangpuia kan Vice Principal chuan min hrilh a.

Pu Buanga school kan tih mai hi chhim veng lam High school a ni a, keini hi hmarvenga lama awm kan nih vangin Hmarveng High School kan inti leh mai bawk a.

"A țhat chu, han tih ho te pawh a nuam ve alawm mawle, volley ball nge football?"

"Volley ball turah ka ngai ngawt a, kan zawt chiang ange"

"Volley ball ti ila, zirtirtu te pawh kan inkhel ve ang chu. A chak lo zawk zawkin sa lei tirawh" tiin ka lo va au hram pek a!

Chutiang chuan a hrilh a nih hmel,  anni pawh an phur hmel khawp mai.

"Engtiknge ka ben tawp pawh ka hre tawh lo. High school kan kal lai vel kha a ni daih tawh ang" Miss Diki chuan a lo ti ve mek bawk a.

"An miss pakhat awmbawr lian deuh a awm kha, miss kan pu hi tihpui nghal ila" a tih chuan an nui tlarh tlarh a.

"Ama thu hi chuan tihngaihna a hre vak dawn lo a ang tlat" a la ti zui hram pek a!

A tu a te mai pawh hi kan innel em em vek a, a junior ber Miss Diki lah rualpawl mi a lo ni ve si a, midang hi chu government-in kan school a lak hma ațanga thawkho tawh vek kan ni a, chhungkaw lam thlengin kan inpawh em em a, thawhhona boruak țha hi a lo va nuam em. Mahni inlum aimahin men chhung chuan kan khawsa hnem zawk bawk si a.

Intai țhîm țhem chu ni ila kan thawkho lo thei dawn bawk si lova a hrehawm viauin ka ring.

Tlai haw kawngah chuan Miss Diki nen kan haw rual a, nidangah pawh kan haw rual fova, boruak kan neih tehchiam vanga hawrual ta pawh kan ni chuang lo, nula leh tlangval awmchhun kan ni bawk a kan ti ti a rual deuh a ni mai thei e.

A tam zawkah phei chuan zirtirtu dang nen kan haw rual dial dial a ni mah zawk ang.

Ka training chungchang vel te chu min zawt a, ho lo lam fe fe chuan kan ti ti nasa leh pek kher mai.

"Tukin chu ka pum a rawn na vak ringawt a, engnge maw a chhan ni" 

"I thil ei ngeihloh i nei a ni lo'ng maw?"

"Chutiang ngeihloh tur ka ei pawh ka hre lo, thildang vak ka ei chuang bawk si lova, ka inthiar a, a reh thei bawk si lova Damdawiin lamah kan tlanchho ringawt alawm"

"Engtinnge an lo tih che a?"

"Min lo jection-a chuzawng chu ni mai, a'n damchiang em em khawp lehnghal a"

"Haha, pumna dam leh chu a damchiang thei khawp mai an tia lawm.  E, doctor thar kan nei an tih tak kha mawle, i han hmu em?"

"Tukin a mi kha a niang" ka ti ringawt a, sawithui vak pawh ka duh lo. 

"A hmelțha em?"

"Chuti zawng paw'n ka lo en vak hleinem"

"Eng ang hmelpu nge pawh i hre leh pek lo a ni maw chu, i hmeichhe ngaihven lo lutuk hi chu engtia tih chi nge maw ni dawn le" a ti pek a. Ka ngaihven lutuk vanga hetiang ka nih a hre der mai bawk si lo.

"Leh ta mai mai țhin a" ka tihsak ringawt a.

"Tak taka kan doctor hmasa kha ka ui a sin mawle, a fel hi ka tia, biak a nuam bawk sia"

"Nia tiraw, a len ang ang khan a rilru pawh kha a zau roh a, a dul a kiar tih mailohah kha chuan sawiselna tur avang khawp mai"

"Hmeichhia phei hi chu a engamah hma hian kan han induh ve nghal ringawt zel a, inlâk hi nuam kan ti tlâng a nih ka ring. Thingtlangah hi chuan tlema thingtlang lam background nei țha deuh hlek hi awm thei se a duhawm zawkin ka hria" a ti ve ngial a, a khawpuinu ber si hian.

"Ni e tiraw, harsatna kan neih hi a in ang țhin si lova, 'mawl' leh 'țhing' nih te hi kan hlawh thuai thuai mai bawk sia, kan changkan pui deuh hi chu chang thei țhin ila duhawm tak tur a ni"

"Khawpui mi hi chuan thil hriatthiamna hi kan tlachham deuh nihian a hriat lehzual a, mahni veng leh inlum angvek turah hian kan ngai emaw teh reng ni"

"Hmanah kan doctor pakhat pawh ka hau tawh alawm, naupang te mai hi a nia"

"Engngatinge a?"

"Tu damlo ber nge maw kan han tlawh lai hian khawdang ațangin inentir tur hi an lo kal a, 'OPD hawn ni a ni lo, nidangah lo kal rawh u' a lo ti fahran pek a. Anni khawdang ațangin ke lehnghalin an lo kal țawk țawk a, damdawiin thleng ta chenga nidang lo kawhhmuh leh kha ka ngaihdan a pel ta deuh a  niang ka insum hman lo khan 'Damdawiin area a i awm chhung hi chuan damlo enngai chu en chawt mai teh, hmundang pawh a nih loh hi, mi tih ang thlip thlepin hetiang laiah thil a kalpui theih tak tak loh' ka tia. Țha deuh chuan a en zui ve leh mai bawk a"

"Chutia tih ve deuh ngaihchang te pawh chu a awm ang chu. Khawpui anga systematic lutuk a kalpui tum țalh te pawh hi kan zawh miau si loh chuan a doctor bak kha mi dem hlawh tur an awm chuang lova, doctor ka nia lawm tih vang ngawt a  'ka tih chu ka tih' tih an chin fo chuan mipui tan hnawksak an ni thuai țhin a, mahse, han tih tlang deuh hrawk ngaih changte pawh chu a awm tho bawk ang a"

"I zei hmel phian mai a, nang han țang mai la" ka tih chuan a nuih a za kher mai!

A inluah awmna pêng kan thlen tak vang chuan 'chaweitui' tiin min pensan ta a.

Chhun hian chhun hnenah chauh pawh ni lo, zan hnenah thleng hian thu a sawi chhawng zel a nih ka ring ta, heti tak maia ka rilrua doctor nuin hmun a luah leh danah hian.

Mut chu ka muthei, mahse mutthilh erawh ka harsat thung si.

Nunhlui te mitthlaah a lo lang zut zut a, han maimitchhinsan tum mah ila a fiah tulh tulh mai bawk si. 

Engatinge hetianga awm leh tho tur siin ka kalsan le? Keima duhthlanna ngeiin ka kalsan a nih kha. Min auva, min ngen lawm lawm chung pawhin ka tukkhum chhah ka chhawn a ni lovem ni? Engatinge hetianga ka awm leh si.

Ni, kha tihlaia ka thutlukna kha 'a dik lo' tiin tunthleng hian ka la ngaihtuah ngai lo. A na em a ni kha thil thleng kha.

A tuka ka school kal tur Ropuia dawrah chewing gum vel leiin ka ding kawi a, ani hi kan khuaah chuan ka țhian bul ber a ni a, an inneih pawhin ka dinpui ve ngat kha an nia.

Cher lam, a sa en aia rilru nghet a ni a. Mi uangthuang mi a ni lem lo. 'Ka seh tawh chu ka seh' ti tlat chi a ni. Kan branch-ah KȚP Leader a ni nghe nghe a, keilah hian kan zui zo lo khawp a, sual hauh si lo hian ka fel der bawk si law.

"Țhianpa i hmanhmawh em?" a lo ti ngial a.

"Hmanhmawh lem love, 'tinge?"

"Lo țhu lut lawk teh"

"Țhutmuan em em chu ka hman si nang"

"A rei lovang" ve teh tlat chuan a tukin a tak a. A bula Herhsawpah chuan ka țhu lut zui ve mai a.

"Engnge nia, i sawi muang leh awm ropui si" ka ti hmanhmawh a.

"Nimin tlai khan kan doctor nu khi a lo lang hlawl mai a...."

Ka hmel landan chu en niawm tak hian mi'n thlek leh fahran a. Țawng muan tawh naklaiin.

"Engnge ani lo kal chu, i star deuh a mi?"

"A thil lei tur a en lai khan hemi dawhkanah hian a purse kha a dah mai a, a chhin a țha lo nge ni a magnet a inbat fu lo zawk a chhin kha a inhawng sa nghal ngawt a" zaizir meuhin a ni a sawi lehpek ni.

"Duh emaw duh lo emaw ka țhutna bul maia awm a nih vang chuan hmuh loh theih a ni lova"

"Engnge awm a chu?"

"Chu chu alawm mak ka tih reng" a'n ngawi leh daih a.

"Hmeichhe purse chhungah chuan thil ropui tak chu a awm lo phawt angah" ka lo ti a.

"Ka hmuhtirh phei chuan ka ringhlel a, ka'n thlek nawn ngial țhin a, mahse kha purse chhunga thlalak awm kha nangmah ngei i ni" a ti ta tlat mai pek a!

Awih ila, awih mah suh ila a țanna ngaiah a țang tlat dawn tho, bakah ani hian dawt min hrilh pawh ka la hre ngai lo bawk. Mahse, ka awih ngam chiah bawk si lo.

"A awihawm loh emai, min hrechiang lo a ni lo'ng maw nangmah pui hian" tiin a lâp zawng chuan ka lak sak a.

"Kha leh chen kan inhre tawh alawm mawle, nanga hmel te chu khawiahnge ka hai tehlul ang ni" a ti ve tlat bawk si.

Ka kawrhak rawng nen, a background a Zawlbuk thla nen lam a sawi thlap mai bawk si. Țanchhan tur ka van ru khawp mai.

Ni, kha mi ni khan - Falkawnah kan kal a nih tak kha mawle. Damdawiinah a tihtur a tih zawh hnuah Zokhua te kan tlawh dun a, muangchangin hun thawl nei inti takin hun kan hmang a nih tak kha mawle.

"Mi nupui purse chhunga ka thlalak awm ngawt thu a awm lo emai a, keimah ang tak pasal a nei a niang" te ka tihsak ta vel mai mai a.

"Nia, mak ka ti deuh a keipawh, fa a nei tawh an ti bawk sia, mahni pasal te thlalak ni lo tarngawt thu a awmin ka hre si lova. Ka hmuh kha chu nangmah ngei i ni bawk si a ni, a mak khawp mai" a la ti fan a.

"Kan in ang viau a nih dawn chu"

"I Aizawl awm kha i lo che zuva ta viau emaw ka lo ti hman deuh a" a nui deuh țai a.

Zawiin school lam pan chuan ka chhuahsan thei ta hram a.

Thildang ber aichuan 'fa a nei tawh' a tih kha ka la na ta berin  ka hria. Kha thu khan min tina tak zet a ni. A tihtur diktak, ka neih duh miau loh chuan ani chuan pasal neih mai chu a tihtur a ni. Mahse, ka ta ni silova midang ta ni kumkhua tur chuan ka ngaihtuah ngai lo a sin mawle.

School ka han thleng chu țah tlawk tlawk ka chak ber mai. Hetiang hian a ni maw 'Hmangaihna' an tih hian mihring nun a lo sawisak theih le. A tirah kha chuan ka chhang țha duh lo vel zawk kha a nia, tunah lem amah vangin mittui ka dang hram hram chu a ni ta ber bawk si. Hringnun hia a lo va han mak ngei ve mawle. 

Engatinge hmanah khan nupui ka lo neih mai loh le? Nupui te nei ila, fate han nei ve tawh ila chuan hetiang boruak rit hian min kiansan thei mai awm si a. Ni, ka chantawk chu 'hmanah khan engatinge?' ti a inngaihtuah mai a ni ta.

Chawhnu lama Pu Buanga te school nen kan han infiamho te chu nuam tih a hnekin ka kham hluah hluah a ni ber mai. Zirtirtu lah a chak lo zawkah kan la țang leh ta nghal a, chawei kan buatsaih ngei chu a ngaih hmel e.

"Sir, i nuamsam lo mi a?" tiin Miss Diki chuan min zawt hlawl a.

"Dam e, ka țha alawm, tinge?"

"I nawm loh hmel em a, nidang i ang miah lo a nia"

"Chutiang pawh ka lo hre hleinem, ka țha alawm min ngaihtuah suh miss"

"Awle, mahse khati khan awm vung vung tawh lo la"

"Engtinnge ka awm a?"

"Thil vei deuh nei i ang em a, i ngawi vung vung zel bawk sia, Aizawl lamah hian vei i rawn nei haw deuh nge mawni le" tiin a nuizui har har a.

"Haha, a awihawm loh emai a Laldik, i uar emai"

"Ka  ti tak tak alawm, i danglam riau"

"I ngaihtuahna mai mai a nih chu, mi hi vei lutuk lo mai teh"

"Aleh, ka dang, ka dang" tiin min kalsan daih a.

Hun lah chuan min nghak bawk si lo. Ka rilru hrehawm tal hi chu liampui ve sela țha tur asin mawle.

Kan doctor te chhungkua niawm pawh chu ka la hmu lo zel chu a nia, amah nen pawh kan inhmu ngai chuang lem hlei law. Kan damdawiin hi khawchung lama awm a nih vangin a na zawnga han hmuh hi a rem lo ve deuh bawk a. Khawchhung lama mamawh an rawn lam kan hmu a nih lem loh chuan kalchilh deuh tawp an ngai. Pathianniah lah Kohhran mi tak doctor kan nei ngai lem bawk si lova.

Ropuia'n mi fiam zuk zuk tihbak chu a hming hi ka hriatphakah chuan a ri khat khawp mai. Ani min fiam dan lah hi "Mi nu purse-ah i chuang veng mai a niah" tih vel te hi a nia.

Pathianni tlaikhat chu ka nu leh pa hian Miss Diki chu chaweiah an sawm pek a, engmah sawi lem lo mahila ka ngaihdan chu a ni lo chhiava mai. Zonunmawii hriat leh phak turah hnuhma mawi lo thei thil engmah tih ka duh lo asin. 

Ka ta ni lo mahse, a mit tihkham pawh ka la duh chuang lo țalh chu a nia leh! A va hahthlak țhin em.

Ka chhungte hian mo atan an it zawk nge maw ni dawn ni. Ka thawhpui a nih chhuanlamin an sawm miau mai bawk sia, ka tan han hnial a remchang bawk si lo.

Tlai dar 3:00 velah chuan ka nuin min rawn bia a, "Diki chu lo hruai nghal mai rawh aw" te chu a la rawn ti tak deuh deuh a.

Miin an  hria ang tih hlauh mah naklaia chutia la inhruai haw tak deuh deuh chu mawle.

Hnial ngawt dawn ila hruaitur dang an awm miau si loh vang chuan Diki inlam pan chuan ka kal lo thei bawk si lova. Engnge maw ka hriat ni kawngka pawh kik lo chuan ka'n lut ngawt mai pek a, ka hmu mai lo lehnghal a. 

Pindan lama zai rat rat thawm chu ka hre zui nghal a, pindan kawngka chu a inkhar loh vang chuan ka va bih hram a, ka rei!

Ka chhuak leh zawk mai dawn emaw ni le!

                     Țhen IV-na

Thawm nei lo chuan ngawirengin ka chhuahsan a, kawngka chu ka kik țha leh ta zawk a.

"Lo lut rawh u" tiin min lo chhawn a.

Ka va luh chuan a lo inhafel deuh ti tuai tawh a, towel huh hnuang mai hian a lo bât bawk a. 

"E Sir, lo kal rawh. Ka lo inbual a" a lo ti thuai thuai a.

"Pawnlamah leh zel chuan 'sir' in ti lo ila mawle" ka ti sup a.

"E nitak e, tlangval te ila ni bawk sia tiraw, kei nula einch.."

"In sawi luh a tum leh ta!!"

"Haha, i ninawm e. A tum te pawh kan tum ve bawk ang chu mawle, ngaihzawng nei hek lo che" sam khuih mawlh mawlh pah chuan a ti zui a.

"Hehe..i ho e a. Aizawlah ngaihzawng i nei tho ang chu, kawp nan mai mai ka inphal lo" ka tih chuan a nuih a za kher mai.

"Sir, eng sa nge kan hmeh dawn a?"

"A va mak e aw.."

"Oh Dina.."

"Ka hre lo.. sa kan lei pawh ka hre hleinem. Tukin pawh behlawi rep bai te alawm kan hmeh mai mai"

"In hausak nen.. in va'n uikawm awm em em" a ti zui hram pek a!

"Sa hi kan ngaina lo a niang, kan eitam vak lo"

"Keichu uisa pawh ka ei duh a sin" a la ti ham ham zui a.

Muangchangin kan inlam pan chuan kan inzui chhuak dun ta a, Pathianni tlai a ni kher bawk si. Nuam chu ka ti chiah lo a ni. Ka kalpuinu lah chuan ka rilru a hre der mai bawk si lo. A khawtual mi aimahin mi biaktur lah chu a hre hnem emawni lehnghal ni.

Ka chhungte lah chuan an han bețha khawp mai leh ta nghal a, fate zin haw niawm fahranin a ni an lo cheibawl ni. Em em lutuk a.

Ka nu nen an inkawm tho vang chuan ka pindan lamah computer ka khawihsan daih a, ka rilruah phei chuan a lut lem hlei lova.

"A goal ta!" ti a ka hnunglam ațanga rawn sawitu chu a lo luh lai awm reng reng ka hre lo. Diki chu ka hnungah chuan a lo ding reng hi a lo nia.

"Nge, ngawirenga i lo luh?"

"Ka ngawireng hleinem, i khel tui lutuk a i hre lo mai mai a nih kha"

"Min enthla nih kha..."

"Hahai, room i neinuam hle mai. Mahnia awmna atan chuan a zau deuh  nih hi, nupui neih i ngai tawh" a ti a.

"Min duhtu te chu awm se chuan kan nei ve mai ang chu, an awm si lo a nih hi"

"Ka awih lo ber awm e, i duhtui lutuk a niang"

"Duhtuia tui lo tur paw'n a hmuhin ka hmu lo hrim hrim alawm"

"Insawi thei vel lo mai teh"

"Teh țalh chuan le, tihian awmtlang la, kan innei anga a ni mai alawm" ka tih chuan a mengphawk kher mai!

"Engnge kha ti vaka i awm?" ka tih zawm a.

"Ka haw duh lo ti chiah ila chuan e, a buaia i buai tur zia chu(h)!"

"Aizawl lama mi pawh silai nen an lo thawk chho duh mai ang a" ka lo tih sak a.

"Aizawl hi ti ve ziah! Ka nei bawk hlak lo aw"

"Maw!??"

"Aw, aw, aw"

"Ka va'n awih lo ber mai"

"I duh leh awih lo la"

"Nia, ka thu ber. Fiah theih ni nghal hek lo, i duh chuan dawt pawh i sawi thei alawm"

"I duhdan danin fiah rawh, ka cho khawp mai"

"Chiah maw?"

"Teh reng mai.."

Ka ding hluai a, ngawi reng chuan ka va fawp ta hmiah mai a, a tal bat bat mai asin le.

"I ho lutuk"

"I duhdan danin i tia lawm mawle"

"Khatia tih kher a ngai hleinem, nghal lutuk mai"

"Ka duhdan a nih miau te chuan engnge a pawi vak a mi?"

"Blehh... i chimawm si"

Nuam a ti ve viauin ka hria kan in chu, ka nu leh pain an ti țha bawk si. Keilahin lo biakchhiat ngawt chhan tur ka hre lem bik bawk si lova. Ngaihzawng ang erawh chuan en loh hram ka duh țhin mange. Ka hma hun tur phei chu ka sawi lawk thei bik lova.

Inkhawm tura ka nu leh pa an chhuah thleng pawh chuan kan la che chhuak ve lem chuang lova. 'Inkhawm țan dar rik hnuah min va thlah ang che' a ti miau si alawm le. Ka duh dan phei chu a ni hauh lo. A fala inhmuh tam loh hi a țha ang, kan awmdan hi a dik ka ti ber lo tlat.

Țan dar lah chu a'n ri har em em khawp lehnghal a, kan sitting roomah chuan ka tuai thi hawrh țhut tlawk tlawk ringawt mai a, ani lah chuan 'mark' tih țhat a tum vei bawk si. Ka chau leh țan tawhin ania ka hriat ni!!

Kan chhuak ta cheng a, a beisei ang chu ka thlenpui ka ring hauh lo. A inluahah pawh chuan ka va dah thleng hram hi a ni ber mai. Țhutpawh țhu muang lovin tui ka in a, 'kalna tur ka nei' tiin ka chhuahsan zui daih a. Min mangțha zawi sap sap kher asin!

Kalna tur ka nei a zeng phei chu a ni law. Ropuia te inah bawk chuan ka tei lut leh mai a, a fate lo chhaih kual vel kha ka hna chu a ni leh mai a, lenna tur dang hre mawlh hek lovi.

Naupangho chu dawrah te ka kalpui hnu chuan inkhawm pawh an lo bang zui ve mai a, Ropuia nen chuan ngawirengin inkhel kan en dun a, an nuin thingpui min lumsak pawh chu sawizui lem chuang lovin kan in mai a, an nu zawk hian kan awmdun chuan a lo ning țhin a, 'Sawi tur te hi in hre ve thlawt lo emaw ni le, in bula awm hi a hahthlak, in mi dip a na ve bawk si' a tih leh pek kha.

Chu e kha e pawh kan tihsak chuang hlei lova.

A tukah chuan DEO dawr ka ngaih vangin lehlanga kal tur chuan ka inbuatsaih a, a peihawm loh țhin mange aw. Khua a lum bawk si. Keini motor, maruti 800 a kara Taxi a ka hman hrep hnu kha a nia, a liang a hniam bawk si. Khawlum nen chuan a in tuha fahran dawn lo khawpin ka hria. A kal loh theih bawk si lova le.

Chaw eikhamah chuan ka inkhalhchhuak ta poh kha a nia. Kalpui tur tal  awm se țha tur a nia. Zinkawnga mahnia han kal vuah vuah mai hi chu a khawhar thlak deuh țhin chu a ni e.

Ka hmanhmawh hran teh chiam lova, ka kalna tur chu 40km vel bak a nih loh vangin hmanhmawh chiam a țul lo ve bawk a. District capital kan hlat loh vang nimaw kan kawngpui pawh a țha thawkhat viau mai. 

Ka kalna tur khaw thlen hma chuan khawpakhat paltlang tur a awm a, chutah chuan thingpui te ka inkawi ang chu ka ti deuh. Khaw țhenawm mai mah nise kal a khat viau a ni. Kohhran lama a kul a taia inhmang ka ni ve lem bawk si lo. Kohhrana inhmang deuh hlek ho chu khawmpui nikhua ten an chhuak fo si a.

Khawțhenawm te nen a kan inrina, ramrilui kan tihmai ka thlen dawn țepah chuan kawngsira motor ding hi ka hmalamah chuan ka va hmu a, pawnlamah midang ding awm tak an awm vang chuan an chhia a ni awm mange ka ti.

An hnung deuhah chuan ka va ding zui ve mai a. Motor ațanga ka chhuk chiah chuan motor thlanglama Zonunmawii kawngsira lo țhu reng chu ka va hmu leh pek ka ti!

Driver chuan a ke chu a lo thlawn mek a, engemaw an chil a ni ngei ang.

"A ke elo?"

"Nia, perek kan chil nge maw ni ka tia, a spare kan pai loh țum a lo ni bawk sia, dendrite i pai mial em?" Driver chuan a ti zui a.

"Pai bik nang, khawnge in kal dawn a?" Zonuni chu ka zawt tawh mah zawk. Mahse, thlanglam hawi chuan ngawireng hian a lo țhu a. Min bengkhawn lem lo.

"Aizawl lama chhuk kan tum a, hmanni kan lo hawchhovin a ke spare ka siam tir a, chu chu ka'n ring thla deuh ngawt mai mawle. Engtinnge niang aw.." a ti vang vang a.

"Ka spare hmang rawh ti ngawt ila in motor nen a in ang bawk si lova, a charhna chu lei mai a ngai a nih chu"

"Nia, signal ka nei der bawk silova khawchhung lam be turin, nang i nei em?"

"A ruam em a nih hi mawle, ka nei bik miah lo keipawh"

"Be thei ila chuan bike velin inpek a awlsam mai tur a nia, ke a han kal rual a ni bawk silova, engtinnge niang aw"

"Khawnge kal i tum hrim hrim a?" a ti zui leh a.

"DEO dawr ka ngai a"

"Ka lo zui lawk mai dawn che emawni le, lêt lehna lam chu bike vel hman tur a awm mai turah ngai ila" a ti a.

"A pawi chuang hleinem, i tihdan dan a ni mai" ka lo tih sak a.

"Mahse, ka pi hi amahin a awm ngam leh si nang" a ti bawk si.

A tawp a tawpah chuan ka motor chuan kan khawlamah a tlan lêt ta a, Doctor Zonunmawii nen chauh chuan ramhnuaiah chuan kan awm ta ran mai kha a nia.

An motor bang ngheng chuan ka ding a, Zonuni chuan thlanglam a la hawi ran a, lungte chu chharin kawngthlang lamah chuan a vawmthla kauh kauh a.

"Zon..i țha em?"

Muangchang chuan a lo lehhawi a, a ngai ang bawka thlanglam a hawi leh hnuah chuah "Ka țha lawm" a ti ta hram a.

Sawitur avang duh kher mai. Ngawirenga awm lah chu a nuam chuang der bawk si lo. Mipa hian intihpa theih loh țum hi kan lo nei tehmeuh zawng a nih hi mawle.

"Fa engzat nge i neih tawh?" chhangkhat fe chuan ka han ti leh hram a.

"Pakhat"

Ka zawh chin chauh min chhang bawk si, engemaw sawibelh se, emaw zawhna te tal pawh nei ve se chuan tihlet dan tur a awm ve zel tur hi nia. A ngawi ngal mai bawk sia.

"Kan khua chu nuam i ti em?"

"Ti lo khawp mai"

"A va'n zia lo ve aw, tinge, engber nge nuam i tih loh chhan?"

"A tam mai.." a hul thei hak hak bawk sia maw. Sawi leh tur hi a vang thei țhin.

"Ni a sa bawk sia, i lu te kha a na ange, motorah hian țhu lut daih la"

"Tu emaw tal inkhua a mi hian kan inhre tawh țhin tih hria an awm em?" a ti khauh mai a.

"Awm lovang, chulam chu vengthawng duh suh. Mahse, i purse kha chu dah fimkhur deuh tawh la" ka tih chuan "Engvang ngawtin maw?" a rawn ti thuai a.

Chhan a țulna em em pawh ka hre lo. Ka duhaithui ka sawi hman tlat.

A țhutna a țang chuan a lo tho chhuak a, "Engnge ka purse chu dah fimkhur a țulna chhan?" a  ti țha leh pek ka ti.

"A chhunga thlalak kha hmu an awm a!" ka tih chuan a mengkawk a, "Maw, tuin?"

"Sawi kher a ngai lo, ka țhian țha ber a nia, khawiah mah a chhuak lovang hlauthawng suh. Ka ni lo ka tia, ka pha fel tawh" ka tih sak a.

A sam thliin a chhem len chu huihțhat mawlh mawlh pah chuan hlatak thlir niawm takin kan piah ngaw chamdur lam chu a melh vang vang a.

Zawh duh leh hrilh tur ka ngah tehlul nen engmah lah chu ka sawi hleithei der bawk si lo. Keimah ang tho hian a awm ve angem le. A awmdan ațang hi chuan a rilru ka la luah ve hle a ni tih chu ama sawi kher ngai lovin ka hre ve thei. Mahse, mi nu a ni tawh miau si.

"Ka lo fimkhur tawh dawn nia" a tih sap chu kan ngawih vang vang hnuah chauh a ni. 

"A ninawm e, he motor țet țut hi ni. Kan tlai zo vek dawn nih hi" a ti zui a. Motor chhungah chuan a țhu lut zui nghal daih a.

"Engtikah nge i lo chhoh leh ang?" tiin tukverh bawh meuh chuan ka daklut a.

"Ka hre tawh bik lo" a ti ringawt a.

"Nangmah chauhin i lo chho tihna a mi a?" ka ti leh hram a.

"Aw"

"Ngatinge midang?"

"Joining report pe tur chauhin alawm ka lo kal, ka duh airei ka awm leh nghal a"

"E, nih chu. I awmna a rei tawh emaw ka tia" ngaihtuah manghlei lo chuan ka ti liam mai a.

"Doctor inneih leh neih loh pawh i hre lo a ni maw chu"

"Hre lem nang, Trainingin ka awm bo daih a, ka lo haw deuh chauh alawm"

"Engnge i thawh a?"

"Zirtirtu"

"Thinchhe awm e" a tih hlak kha. Ka nui ringawt keipawh.

"Luhlul ropui si, hrawn i hahthlak ngawt ang" a la tizui tak deuh deuh a.

"A hrawntu a zir te pawh a niang chu"

"Engmah a danglam awm lo emai" a in âng thinrim mai dawnin ka hria, ka nuih te pawh a za deuh.

"Insum teh, khati hmuar hmuar a tih te chu a, a mawi lo emai. Kan pahnih chauhin kan awm a kan la inngeihloh zui te chuan a hahthlak dawn emai" nui deuh chung chuan ka ti a.

"Nang anga rilru chhia leh hmangaihna nei lo hi ni lo, midang lo kal se la țha tur a nia, a nawm pawh a nuam zawk ang" a la ti zui tak deuh deuh a.

Chutianga tih thinrim tuma han bia pawh ka ni chiah lo a sin mawle. Kan chhaka kawrte-ah chuan ka kalsan ta daih a, khua a lum bawk nen ka hmai te chu phihin ka insil a, a nuam huai huai khawp mai.

Ani zawng motor chhungah a la țhut bar kha.

Motor bul ka thlen thlak leh hnulawkah chuan ka motor pawh chu a lo thleng zui ve nghal deuh mai a. A driver nen chuan thlantla hluama kan khawih hnuah chuan kan zo ve thei ta hram a, kal turin kan inpeih ta.

Office dawr tur ka nih vang chuan duhaiin ka tlai ta si a, ka hmanhmawh ru ta deuh a, an tlan țan hma chuan ka chhuah khalh ta kha a nia, puannem a lukhuh bar maiin min thlir dan chu tunhma ami ang reng kha a la ni.

Kha mitmeng, ka hriatthiam em em kha a la ni reng asin.

Rilru pangkhing zet chuan ka tlan pel ta vûk vûk a, ka tlan chak poh leh ka hnunglama motor lo thlen chin chu side glass ațangin ka bih zing ting mai a. Ka thinlung ka tlansan ta emawni hial le!

Ka office dawr tur te chuan ka va thlen lai chuan chhunchawlh an lo nei mek a, thingpui inchawlh te an lo nei hrang thlap a ni awm e. Nghah loh theih hek lo le, mawngkham urhin ka lo nghak kha a nia.

Kan pu (DEO) chu biak a lo nuam kher mai a, kan school building sakțhatna tur grand a awm tih pawh kan hriatloh te chu min lo hrilh suah suah mai a, kan indawrna pawh a kaltluang viau mai. Remchang hmasa bera tlawh min tiam hnu chuan hlawhtling inti takin a room chu ka chhuahsan ta a.

Dar 3:12 chiah a ni.

Ka hawnghal ang nge aw tih ka ngaihtuah lai chuan Ropuia fate ka rilruah an lo lang a, bazar lam pan chuan ka inkhalh thla leh ta zawk kha a nia.

Keia chhuak vak ang lo takin tunțum chu chawhmeh te pawh ka lei ve nual mai ka ti. Ropuia fate thil tur nen chuan kan khawlam panin ka inkhalh chhuak leh ta a.

Zonuni te khan khawilainge an thlen tawh ang le?

Ka kekawr iptea awm ka phone chu a lo ri ral ral a, ka number a neih ring lo teh mah ila a ruk tak chuan Zonuni a nih ka'n beisei ngawt pek a!

Ka han lakchhuah chuan Miss Diki lek lo niin!!

"Sir, i lo haw tawh em?"

"Haw dawn mek"

"Chemte min lo lei teh a, ka pe leh mai che ang a, hetah lei tur a awm bawk si lo. Chawhmeh channa tur pawh ka nei lova"

"Sobji chemte maw?"

"Aw, a harsa viau angem?"

"A harsat ka va ring em aw"

"I buai phah viau dawn chuan ngai lo mai ta se"

"Buaiphah viau dawn a nih chu, bakah a liantham awm sia, a phurhna lam pawh ka buai mai thei a ni" ka tih chuan a nui zui kar kar a.

"Kawmchhakah ka lo chang dawn che nia, i lo thlen dawnah min lo hrilh la" a ti a.

Intat lut thiam dawn riau mai ka ti!

A țhalamah ngai tawh mai ang. Zonuni lah ka tan besei tur a awm tawh si lo. Hetia hmeichhe pakhat vang maia nun uaithla tak maia hun hman reng zawng a dik pawh a dik lo e. Ka sûn rei tawk tawh bawk alawm le.

Kan khua ka thlen chuan ni a tla fel der tawh a, ka inphawrhna lamah Diki chemte tur lah chu ka pek theihnghilh tih ka hrechhuak leh ta nghal a. A pawi love, school-ah ka keng tawh mai ang.

Zanriah kan eikham zawt tihah chuan Diki chuan min rawn phone zat a. 

"I tlan tlang nge, i lo la thleng lo" tiin.

"Ka lo theihnghilh daih a, tihpalh lutuk.."

"A pawi hleinem, i lo hawn hrim hrim hrim chuan"

"Ka lo dah mai dawn nia zaninah"

"A, em em a. Ka lo lam mai ang"

"Chhuah tho ka ngai a, chumi pah chuan a ni mai. A remchang thova"

"Awle, a zahthlak dawn viau nâ, ka lawm dawn hle mai. Thingpui tuitawkin ka lo lumsak ang che" tiin a phone chu a hmethlum zui nghal a.

A kuttin nalh leh sei sel sawl zet mai kha ka mitthlaah zuk cham reng a mawle! Thildang chu ka la ngaihtuah lo, a tlachawpa inbarhluih zel mai loh chuan he thinlung hian mi pakhat tan hmun a lo dah rei tawh si a.

Ropuia te in ațang chuan a faten min ngen lawm lawm chungin nula maltlat awmna lam pan chuan ka inchhep chhuak leh ta a. 

Châk vanga kal tur chu ni ila chuan penkhat pawh hi ka pen belh lo tur hi a nia leh. Mahse, duhthlan tur chuang awmlohna hmunah leh kawl-awkna hmunah chuan rahbi remchang rah nachang hriat chu ka tihtur niin ka hre bawk si.

Ropuia inkhawm bang nen kan intawk a, 'ka lo kal ve ang min lo nghak rawh' a tih teh tlat vang chuan a inthlak chu khawlaiah chuan ka'n nghak leh rih a, ani leh ni lo angin ka rinai tak chuan a lo lang leh hma a. Vei ngei chuan a.

Kan țhiandun chuan nula rim turin kum engemawzat kan inzui tawh loh hnuah kan han inzui țha leh ta a nih chu.

                     Țhen V-na

"Tunlai chu kan miss thar hi i zui uluk riauvin ka hria, a țha dawn viau e" 

"Tehngawt țhin a, kan inzui ngai emawni ngawt le?"

"Ngawiteh ka hmu zauh zauh ch'u in ka hre tlat a ni"

"Hmu lovang, kan inzui ngai hleinem mawle"

"Nimin tlai pawh khan in rawn in zui chhuak lo maw, ar ka puah lai khan kan in piaha inliam phei tur kha ka hmu che u a nia"

"Tak a na, ka'n fiamthu hlut nain han rim uluk ve deuh la mawle. Nupui atan pawh a tlak viauin ka hria a ni"

"Nangma'n nei la" ka lo ti hmanhmawh a, ani hi chu thutak a sawi chinah chuan chhaih eng ang mah ila a uang ngai lo. A duh zawng chu a sawi zo ngei ngei a ni ber mai.

"Khawpui mi te chu keini ang khua atan chuan itawm viau mahse kan it ngam lo țhin kha a nia. Mahse, hma kan sawn ve zel tawh a, chuta karah nangni ngat phei chu sum leh paiah ni se khawpui mi tam zawkin an tlukloh tur in ni a, tunhma anga sadai ek hampherh tura khawpui nula chawkluh ngawt ang kha in ni dawn lo tih a chiang reng a.."

"Chuta karah ani pawh hnathawh nei ala ni zui leh ta nghal a, i duh a nih phawt chuan a cho ngam ber tur i nia lawm" a tih chuan ka nuih a za kher mai. A cho a cho zawng ber khera nula han insihhmuh vel chu mawle!

"A hmanhmawh thlak vak emawni le, an chhuak țha tial tial zel tho alawm" ka tih chuan a nui ve vur vur a.

"I lerh lo han ti dawn ila, kha chen kan inzui tawh a, kei aia hrechiang tur che an awmin ka hre bawk si lo. Ngaihzawng i hmu lo a zeng pawh a ni lova, a chang hi chuan ka hrethiam lo lek lek che a ni, eng emawni harsatna liantham deuh hi i lo nei ru reng emaw ni te ka ti hial țhin a sin"

"Nei hran love"

"Chuti a nih si chuan engnge ni ta ang? Ngaihzawng takngial pawh i nei miah lo a nia, ka hrethiam lo helai bawr vel hi. Engemaw tak chu zêp i nei a niang. Le, mihring chu harsatna kan neih te a in ang lova, sawichhuah chi te, chhuak tura kan duh lem loh chi te hi a awm ve bawk a"

Huiham ka ning! Ka hrilh hrep dawn emawni zawk le.

Țhianduna leng ta na chu pahnih chauha awmdun ang chu kan ni thei ta lo deuh a, titi pawh a zangkhai lam kan hawi hram hram kha a nia. Keitak phei chuan a pawi pawh ka ti lem chuang lo.

Diki nen chuan kan inngaizawng a ni ta ber awm e. Ka rilruah erawh chuan ngaihzawng ang pawhin ka dah meuh lo chu a ni.

Ka ngaihven phah sawt lem lova, ka miziaah danglamna ka lantir em em pawh ka hre lo. Zanlamah te hi chuan kan inbe fova, lenluh zauh zauh chang ka nei bawk. Nitin school-a kan inhmuh tho vang chuan kelphung tapchim hmu ang tluk tluka birh ka tum lem lo. Tin, ka peih lem lo bawk.

Mi hlim thei tih takah a lungawi ve tho ni hmiang ka ti mai a. Engmah lungloha la zawngin a sawi ngai bik lem lo chu a nia.

Office a lehkha chhuak tur ka lo draft mawlh mawlh lai chuan "May I come in Sir" a rawn ti țalh a.

"Lo lut rawh" tiin amah pawh chu ka lo en chuang lova.

Ngawireng chuan min rawn pan phei a niang chu min kuah lawk a, min han fawp mai teh rengah!

'Ip ip ip..' ka ti lo chauh alawm le.

Engmah sawi lem lo chuan ngawirengin a chhuak leh daih lawi a, a hnulawka message ka dawn chu 'Nizana i lo len loh man a nih kha' tih mai te hi.

Mi ze duhawm tak a nei. Zonuni nen in anna an ngah khawp mai. Chu chuan engemaw zawng tak chuan min hip viau in ka hria. Ti phawr phawr chi ka ni lem lo nachungin ka lungawina tur tawk vela mi han chhawnchhaih chu a harsat hauh lo. Keimah ang bawk a 'boring' chu ni ve se chuan kan inbețha peih pawhin ka ring lo.

Tleirawl inngaizawng ang maia hman hleka inbiak/text sek ang chi hi ka peih ve lo. Inbiak changte chu a awm lo thei lova, chutih rual chuan kei chu hunawl zawng zawng hnawhkhah tum chu ka tih loh lam tak a ni. 

Ani pawhin ka duh dan chu a hria a niang, engmah a sawisel lem lo.

Midangin an hriat mawlh ka hlauva, ani lah chuan a pawisa vak lo emawni lehnghal ni. Kei a kar mi ngaizawng chu a intihtheihpui lek lek em aw te ka lo ti ru țhin. Mahse le, mipuitling a nia, midang tan hmuh hrehawm leh beng ti thlep khawp chuan a khawsak pawh ka hre lem chuang lo.

Tlaikhat ka school bang chu hawtlang mai lovin Ropuia dawrah chuan ka chawl kawi a, eng engemaw sawia kan ti ti mawlh mawlh lai chuan damdawiina thawk Nurse pakhat hian Scooty-in naupang pakhat hi a rawn phurthla a, kan lo en reng lai chuan Ropuia dawr an lo pan niin a lang.

Rin ang ngei chuan Dawr kawtah chuan an lo ding ta dat a, chu nulain naupang a phurh ka'n hmu chiah chu hmundang reng reng ka hawisawn thei ta lo mai a. A mak lutuk, ka hriathnu niin ka hria, mahse khawia mi nge a nih ka hre thei bawk si lo.

Kan veng naupang chu a ni lo chiang! A ngo danah te leh a hawiher a țang chuan henglaia khawsa țhang a ni lo tih chu hairual a ni lo.

Dawr chhung an lo lut chiah chu "Bawiha lo kal teh" tiin ka lo hui thuai a, ani pawh chu a lo kal ve mai bawk a. 

"Tunge a pa hming?" ka tih chuan a ngawi rauh rauh a, "Â nu hming a hria em aw.." ka tih leh chuan a kut ben thak thak pahin "Zonunmawii" a ti ta reuh a!

Hei hi Zonuni fapa maw!

"Tunge i hming?"

"Marvin Lalruatfela"

"E a va nalh ve aw, a nih engtinnge an koh țhin che" ka ti leh a.

"Marvina, ânu chuan bawiha min ti țhin" a ti reuh a nih chu mawle.

"A nih maw, kum engzat nge i nih tawh?"

"Kum 4"

Chutia kan inbiak chhung zawng chuan Ropuia leh a lo hruaitunu chuan ngawirengin min lo en char char a. An rilrua thil awm chu ka hre hial mai thei a ni. A nih loh pawhin a teuh viau ta ve ang.

Pafa kan ang!?

A mittlang kawm neih loh dan te, a sam nem leh buang thang mai te, a hnâr leh a engkim mai chu min hrechiang tan chuan... enliam chu a har khawp ang le.

Engmah phei chu an sawi chuang lem hlei lova, an duh zawng an lei fel hnuah chuan an inphur haw zui ve leh mai kha a nia. 

Ngaihtuah a thui duh kher mai!

"Dina i sawifiah ve ngei chu a ngai ang" ti tu chu ka bula țhu Ropuia chu a ni.

"Engnge sawifiah vak tur awm a?"

"A la ti ngam ka ti, enteh kha naupang nen khan zawng fian phel ang tluk zet in nih kha. Kha kha i sawifiah a ngai"

"Min ang ve a ni mai alawm. Nangpawh khaw țhenawmah nangmah ang deuh a awm ve tho kha, sawifiah ngaihna i hrebik a mi? Min ang ve a ni mai a..."

"Chutiang ringawt a ni thei lo. Thil thleng hrang hrang han lakkhawm hian thil inthup hi chu a awm a ni"

"I ho emai a, engmah a awm lo"

"Ngaihtuah teh, hmannia purse chhunga i thlalak awm te kha.."

"Ka ni lo ti tia aw, mi hi ring ve mai la, min puh țalh i tum te chuan inhnerem tur te chu a fawmkhawm chawp zel theih alawm" ka la tihsak țalh a.

"A, ka pawm thei chuang lo" tih chu a țanna a la ni fan mai.

Marvin Lalruatfela maw!?

Engatinge a pa hming ka zawh khan min chhan loh? 

Sulhnu ngaihtuaha ka chhuikirna lamah chuan zan dar 3 thleng ka meng hialin ka hria. A mak tulh tulh mai hian ka hria. Engngatinge? Tih zawhna mai lo chu thutlukna siamtur reng ka hre lo.

Mit thial ur a school ka kal chu mi chîk ta reng reng chuan 'engngatinge?' a lo ti var mai a. Ka va'n chhang peih lo tak em.

"Nia, computer ka khawih rei deuh a" tih zawng chu a ni mai.

"A van ho si ve, vawiin chu haw hma deuh ka va duh e aw, ka nu te an lo chho dawn a" a ti zui a. Min hrilh aimahin midang hriata sawi niberin ka hria. 

"Saw hotupa saw va dil la, a phal leh phalloh a ni mai alawm" tiin Sir Sangpuia chu ka kawhhmuh a.

"Han phal lo vaih teh se, a class ka laksak tawh lo a ni mai" tih pah chuan a pan phei zui nghal a.

"Sir, tlai chu min hawhmatir deuh thei angem? I khawngaihna diltu miss Diki" deuh kher chuan a.

"Application pawh awm lo te chu kan grant ngam nang, verbal ringawt lovin official-in indawr țhin ang aw" a lo tih sak pek a.

"Naa Sir, tihian pawm mai rawh"

"I ziah loh leh i thu a nia, ka sawi tawh alawm" a lo ti ve tlat bawk si. Chutiang vel chu kan ni kan thawhhona boruak chu. A hrehawm loh viau. 

Ka room lamah chuan ka luhsan ta daih a, an lo inphalsak ve mai ang chu. 'Awle, awle' han tih duam duam kha ka tan thilmawi a ni chiah si lova. Mi ngaiha mawi zawnna lamah mawhphurhna kan penper fo a țul hmel riau mai. 

Marvina ngawt chu nilengin ka rilruah a awm mai ka ti.

Engtikin nge maw an lo chhoh hrim hrim le. Ka benghawng lo ve thei bawk sia, doctor awm leh awmloh pawh ka hre ve ngai lo chu a ni ber a, a hrisel thlak zawk nge mawni dawn ni.

Miss Diki haw tur chuan min rawn luhchhuah hram pek a, "Zanah lo kal rawh aw" a la ti zui leh ta nghal a, ka boruak hian nula rim lam pawh a hawi meuh lo asin mawle. Chuta karah a nu leh pa an la awm dawn zui leh ta nghal a, ka phur teh hawrh lo mange ka ti.

Chhuanlam tur lah chu ka hre der bawk si law.

Ropuia sawm leh hmak ila a ni mai alawm. Ani a inla patling deuh a, keichuan sawitur vak ka hre leh awm si lova. 

Ropuia nen bawk chuan chu zan chu kan tumtawi leh pek a! A ngeiawm dawn hian ka hria, inchhâl ngawt thu lah awm hek suh.

Zanlamah thil ka ngaihtuah nasat lutuk vang chuan ka mumal thei țhin lova, chu chuan ei leh in thlengin a nghawng lo thei si lo.

Ka nu leh pa te pawh chuan fapa rangkachak chu min ngaihven viau a, eitur kan hmuh phak china a țha leh khawpuia mi thlengin min chah sak a, ka eng ei mah chu a tui chuang bawk si lo. Ka thû deuh that a, tlemin ka cher deuh, ka hmaiah chuan ka cher tih a lang leh zual. 

Inentir an sawi lahin ka duh bau bawk si lo.

Diki pawh chu a mangang viau mai, inentir tur chuan min thlem reng a, keilahin doctor thiamna hmanga damtur ka ni lo tih ka inhre chiang bawk si.

Ka chhungte chuan an lo be ru nge pawh ka hre lo, Ropuia chuan uluk fe mai hian Aizawl kalpuiah mi sawm pek a, "Bungraw lak ka ngai, nang i in check up pah bawk ang a, kan sulhnu te pawh kan zu chil phul leh ang chu. Kan inzui khât tawh alawm le" tiin.

'Zin thawvenna remchang a ni mai alawm' tiin ka pawmsak ta kha a nia. Inentir tumna erawh ka nei hauh thung lo.

"Ka lo kal ve chak e"

"A khai, a inthlahrunawm awm e midang lakah"

"Ni tho mai, Mahse, i zin daih te chuan ka khua a lo har dawn asin"

"Phone in a inbiak theih tho alawm"

"Min be khât leh awm si. Bakah i bula awm chaka phone ringawt te chu" ka kutzungțang hmeh niap niap pah chhan Diki chuan a ti a.

A țhutthlengsei, a hming pu zo lo ve tak mai tawngchham zetah chuan ka mu a, ani ka âwm zawnah a țhu kha a nia. 

"Kan chamrei dawn chuang hlei nem, thil țhadeuh ka lo hawn dawn che nia" ka tih pawh chuan a lung a awi zo meuh lo chu a ni e. 

Zandanga ka haw hun angah pawh chuan haw a phal ngang si lova chepzetin a țhutthlengseiah chuan awmin zawite tein kan ti ti dun reng a, a t-shirt puan nem zetin a hliahkhuh a âwmbawr chu tilreh lo ta chuan ka'n dap sak ve ruk ruk kha mawle!

Ka haw tur chu pawn light a off zauh a, kawngka biang ngheng meuhvin kan in mangțha ta kha a nia.

Aizawl kan han kal ve chu tihtur hi ka'n hre lo khawp a, Ropuia dawr bungraw la tur ka peih changin ka zui a, ka peih rei ngai lem hlei lova. Inentir turin min hruaichhuak zo bawk si lo chu eng emaw zawng tak chuan ka khawngaih viau. Keilahin mi hmaizah vang ngawta hun leh tha heka in entir chu ka tum lo ve bur mai si. 

Ka innghahna ka nî te chhungkua pawh chuan min han ti ngial a, Ropuia tluk zet chuan an hlawhchham ve tho. Min mihrang chei lem lo bawk a, keipawhin ka ngaina phian hlawm. High school kan kaitirh, pawlriat leh pawlkua kan nih lai khan an hnenah hian ka awm țhin kha a nia. Fa u ber chan te hi ka chang deuh roh a, a nuam phian mai.

Zin na na na chu chamreng theih ni hek lo le ka kalchhan bera ngaih ti lo chuan ka haw leh ta kha a nia. Chhungte ngaihțhat nan tal pawh han tih ve hram awm hi a nih vei nen ka peih ngang si lova le.

Chhungte chuan min lo zawt ve ngei bawk a, 'ka țha' tih kha a ni mai a. Thil harsa lutuk chu a awm hran lem lo.

Vawikhat chu school chawlh ni a ni a, engvanga chawl nge kan nih ka hre ta lo, Vai chawlh a niang. Tihtur vak ka neih loh vang chuan fehrehsan hnu deuhah Ropuia dawr lam panin ka chhuak chhova, dawr pawh ka thlen phei hma chuan kawngpuiah naupangho nen Marvina chu ka hmu leh pek a!

Ball an pet chu lo niin, thlan tlahluamin a lo tal ve nasa mai. Ngawireng chuan ka thlir reng a, a aia u te kiangah chuan a tlan ve laih laih reng a, hmuh ava nuam teh lul ve le. A nuin nge lo chhuahpui ang aw ka tih rilruk neuh neuh lai chuan hmannia a mah lo phurtu nurse bawk kha inchhung ațang chuan a lo chhuak leh a. An awmna chu kan damdawiina nurse senior ka tih tak Nu Kimi te in kha a ni. An lo leng a niang.

Chu nula chu ka pan nghal a.

"Marvina hi ka lenpui lawk dawn nia aw, kan rei lovang"

"A nuin min hau ange"

"Hau lovang, a țul leh min lo phone mai dawn nia" tiin ka number chu ka hrilh zui nghal a. 

Marvina chu ka han koh a, min en vang vang hnuah chuan a lo kal ve leh mai a, a mak lutuk min nel nghal siah mai a, ka tan chuan a lawmawm ang reng viau a ni.

Mahse, hmundanga han kalsawn chu a thla a ngam chiah lo a nih hmel viau a ni. Theih ang ang chuan ka han thlem a, ka ti hleithei meuh lo. Amah hruaitu nurse chu lo kal ve mai turin ka sawm ta ringawt a, hmel lamah chuan kan inhriat țhim țhem tho avangin mi han hlau viau turah ka ngai bik lem lo.

Inchhung lamah chuan a lut a, a lo chhuak leh mai a, tuemaw a zu hrilh emaw, a zu dil emaw a ni mahna. Zonuni pawh a ni mai thei asin. Kan inlam pan chuan kan kal zui ta nghal a.

Ka nu chuan hmun a lo phiat mek a, ka pa chuan TV a en niin ka hria. Marvina pawm chung chuan ka lut a, ka nu chuan "Tu nau nge ni tehngawt a?" a lo ti thuai a.

A thlêknawn ngial hnuah chuan "Engnge awmzia Mama? Pa-a lo kal teh" tiin ka pa chu a au zui a.

"Eng nge ni?" tiin ka pa pawh chu choka lamah chuan a lo phei ve mai bawk a.

"Hemi te pahnih hi han en teh" tiin Marvina ka pawm lai chu min kawk a.

Ka pa meuh pawh chu a mengphawk kher mai!

"Tu nau nge?" tiin ka pa chuan min zawt zui nghal a. "Kan doctor fapa a nih hi, kan in ang em a, in hmuh ve duh ka ring a" ka ti mai a. Ka nu mitmeng buainak mai chu ka hmu reng.

Ka pa chuan Marvina chu a besawm nghal thuai a, reilo teah an inpawm zui thei mai a. Ka nu thung erawh chuan zawhna ngah tih hriat reng hian min melh a. Kan nurse hruai lah kha a lo kut chi lo hawi vel mai mai bawk a.

Naupang lawm tih takah ka pa nen chuan an in awm thei khawp mai a, school lamah primary school zirtirtu a ni a, naupang chhawnchhaih nitin a ni bawka Marvina han tihlawm chu a harsat hauh lo.

Amah hruaitunu chu a beh hmel tak loh em vang chuan kan chhuak leh ta kha a nia. Veranda ațang chuan ka nu leh pa chuan min thlir zui vawng vawng mai. Haw hun a huphurhawm ka ti viau.

Zawhna chhan tur ka ngah hmel hle si a.

An lennaa an luh fel hnu chuan Ropuia dawr lam pan chuan ka kal zui nghal a, a nupui Mâ-in a lo nghak leh ta nghal a, 'inah a faten Tawlailir an ngena a siam sak' a lo tih pek chu! 

Ani hi zawng tlangval lai ațang tawha patling kan tih tawh kha a nia, a fate tan pawh pa nih a la tling zel zawng a nih hi. Khawnge an inlamah chuan ka va teiphei leh dawn ange.

An pafa chuan kawrphelh tungin an kawtlaiah chuan an lo buai nasa mai a, Ropuia lah pa themthiam tak a ni bawk si lo chu thlantla hluamin an lo buai dun a, theih ang ang chuan ka han pui ve bawk a.

Diki thil leitur lo chhuak chu kan lo chelh bawk a, rinloh deuhin 'chance' ve angreng chu Ropuia inah chuan kan nei a ni ta reng mai!

Chutianga chet han thawh chiam phei chu kan ni law, titi lai han chawlh deuh vang vang te chu kan nei ve bawk a, bangphenah lo ngaithlaru te an awm a nih zawngin 'an rilru a va'n chak lo em em' min ti hial mai thei a ni!

'Insûk tur ka la ngah bawk sia, lo lengthla mai la' a tih vang chuan chawhnu herzawtah chuan ka chhuah thla ta kha a nia, mi insu te chu ka rim peih awkawng lo mai.

Ropuia te pafain an thil siam an zawh meuh chuan dar 3 a ri ruai tawh a, keipawh chu haw mai tumin ka thochhuak hluai tawh a, chutih lai chuan ka phone chu a lo ri a, 'A dai hlen ta emaw ka lo ti hmana ka hmangaihna che, an thamral ta emaw ka ti țhin nunhlui ngaihawm zawng te' tih ri ngei kha a ni 'ringtone' a ka hman ve țat kha..

Ka phone ka han en chu a number ka hriatzawng a ni ta hauh lo mai. Lak loh ka tum zet a, em a tiin ka chhang ta hram kha a nia, ka 'hello' leh 'hallo' kual vel hnuah pawh a reh hmak mai a, ka țawng a hre thei lo nge mawni le. Nge, țawngthei lovin min biak a tum zawk ni!

'Ka țawng a hrethei lo nge mawni le' tia dah ka tum mek lai chuan 'Ka hrethei' tih ri chu ka hre leh lawi a.

"Engnge ni ta? I number hi ka nei lova, ka hre mai lo che a nia" ka ti zui zat a.

A reh leh vang vang mai.

"I hre thei em ka sawi?"

"Hria e" a ti lawi bawk si. Signal țha lo nge a aw lah chu a ril ruih a, a ri deuh țuk țuk mai bawk sia.

"Engnge min biak duhna chhan?" ka'n ti țha leh a.

"Ka fapa kha in inah lo hruai tawh suh" a rawn ti ta fak mai le. Ka chiang ta!

"Ka duh a ka hruai a ni ve mai alawm, amah paw'n a duh a, duh lo se ka hruai nang"

"Naupang a nia, duhdan danin an tih theih alawm. Hruai kha a ngai lo bur. Lo ching tawh lo la a țha ang"

"Ka thuneihna huang a ni ve tlat, min nawr lui lo mai teh. Kan inah chuan ka duh duh ka hruai thei alawm"

Ropuia chuan kan inbiak dan chu mak a tih hmel kher mai!

"Lo ti tawh lo la a tawk a ni mai"

"Ka fapa a nia, ka thu thu.." ka ti ve ta hmak a.

"I fapa a ni lo" a tih chu ka la hre phak, phone chu ka hmet hlum ta daih kha a nia..

"Ka fapa a nia, ka thu thu tih chu han sawifiah rawh le" tiin Ropuia chuan min melh ran a. Lungzin sa tawh naklaiin hei lah hi a.

Ka ding ngawi rauh rauh ta mai!

"Dina, sawi nuam i ti lo a ni maithei a, hreturin min duh lo pawh a ni maithei bawk. Mahse, engkim hi ka hre vek tawh asin. Kan doctor nu nen in inngaihzawn lai chanchin te, an chhungte vanga in ințhen dan zawng zawng te hi ka chhui chhuak vek tawh" a ti heu mai a!

"Țhianpa.."

"Hrehawm ti suh. Ka hrethiam lutuk che alawm"

"Marvina ber kha ni..Engtinnge min hrilh loh theih?"

"Ngaihtuah ve ta che, i chanchin pawh hrilh duh lovin i bosan a, ani chuan khati chung chung rawn zawn chhuah che kha a ba reng reng lo. Dem miah suh" ala ti hmak zui a. A dik chiah bawk si.

"Engtinnge i hriat hrim hrim a?"

"I thlalak ka hmuh ațang khan ka ringhlel che tih i hriat kha. Vawihnih vawithum lai in chungchang vangin kan doctor pawh ka han lenchilh tawh alawm mawle"

"A nih chu. Ka chhuk phawt dawn, zanah lo lengthla la" ka ti zui a.

"Nia ka lo tum dawn nia" a tih hnu chuan ka chhuksan ta nghal a.

Ka damchhunga inlama ka haw hreh ber țum a ni hial awm e. Haw loh theih chu ni se ka haw lo chiang ang.

Ka pa chauh chu a lo awm hlauh a, ka nu chu a lengchhuak nge mawni ka hmu mai lo. Ka pindan lamah chuan ngawirengin ka lut zui nghal daih a.

Khumah chuan ka bawk thlawp a, ka ngaihtuah zui ta vang vang a, awmngaihna ka hre meuh lo chu a ni e.

                     Țhen VI-na

Ka khumlu-a phone ka dah chu ka han en a, message a lo awm nual hman a, 'engnge i an?' 'I chhuak peih dawn em?' tih vel bawr te a ni nuaih mai.

Khatia hmui kawh leh luaha ka han tho chhuak kha han service leh chi pawh ka ni lo. Ka hmel hmuh chu a nuam lo satliah mai pawh a ni lo. A hahthlak deuh tlat!

A pawi love. Hahdam nî a ni ve mai alawm tiin a dam zawng chuan ka ngaihtuah ta zawk a. Han thinrim teh hlur kha a țulna pawh ka hre teh chiam lo.

Hmatakah pawh tho duh lovin muangchangin ka che a, tukțhuan ka eifel ve meuh chuan dar 10 a kawk vu tawh a, ina awm hi a lo hahdam a nih hi mawle.

College ka kal lai leh University ka kal thlenga ka zirbu mai piah lamah B.ed ka training na lama ka lakkhawm lehkhabu ho chu ka ching fel e ka tia, țul lo pui dahhnawk ve reng ka ngah khawp mai a. Satha ip bag hnih dawn hi lehkhachhe paih tur chu ka lo khawl hman pek a!

Ka dahna almira pawh chu a kang awkin ka hria! 

Lehkhabu te chu ka'n thlir a, a lunglen thlak phian mai ka ti.

College kan kal laia lehkha kan zirtlem zia mai te kha aw. University lamah kha chuan rilru tlemin a lo puitling ve deuh tawh a, midang elna chang kan hre ve deuh tawh kha a nia. BA ai ngawt chuan a tih pawh ka ti țha reng a.

Ka pa hi zirtirtu tihtakah Zirtirtu ni ve tur hian min duh khawp a, chutiang tur chuan min fuih char char a ni ber mai. BA ka passed hlimah pawh B.ed training mai turin min ti tawh a. Mahse, MA tal zawh ka duh ka tih vangin mi tilui duh ta lo kha a nia.

MA ka han zova, B.ed bawk chu min offer leh nghal a, keiin Taxi min leisak turin ka phût thung a, a tirah phei chuan a ngaihdan a ni lo khawp mai a. Mahse, ka thil tumdan te ka han hrilhfiah hnuah chuan lawmtakin a pawm ve leh mai kha a nia. 

IGNOU lamah B.ed tih zawmin, regular class ngai lo tur zawngin ruahmanna ka siam kha a ni a, chuvanga mahni inenkawl ve theihna tura Taxi lei ngen mai ka ni.

'A man chanve i rul ang' tih kha kan thu delhkilh kha a ni ve a, rulh loh pawha vui lo tur mahnise ka la thehlut ve thlap thlap zel chu a nih hi.

Kan training result erawh chu thawktu te nawrh vangin kan la hrethei lo cheuva, kumdanga a chhuah hun awmah pawh chuan la chhuak hek lo, co-ordinator lam nen kan inbe zing hle ringawt mai a ni.

Chutiang lai hunah chuan alawm Zonuni nen hian kan lo intawn tak kha.

Țhenawm naupang te nen kan lo infiam lai chuan Zonuni chu a lo lang hlawl mai a, eng engemawni hi a rawn khaibawr viau bawk a. Inchhung lamah kan inzui lut dun ta kha a nia.

Eitur chi hrang hrang, chawhmeh thlengin a ni a lo ken ni. Ka buaipui pawh ngai lovin amah chuan a ti fel nghal zung zung a, ani a awm hi chuan a hahdam theih khawp mai.

"Engnge in boruak?" tiin bawnghnute chhuan a vil lai chuan ka lo zawt a.

"Eng boruak maw?"

"In chhungkua, nizan thilthleng chung chang kha"

"Engmah chutiang a awm hran love, kan țha alawm" a ti zui ve mai a. 

"A țhat hlauh chu, i u hian a lo hau palh ang che tih ka hlau deuh a"

"A ho e, min hau pawh ni se, ama thiamloh alawm" a ti țha ve mai a.

"A zia lo khawp mai, keipawh kha insum tur ka ni asin mawle, ka thin hi a ram țhin mah mah a"

"A! Chutiang lam chu sawi lo teh ang, a ninawm" a ti hlak a.

Ka bula lo țhut pah chuan "Damdawi tukinah i hnawih em?" a ti zui a.

"Hnawih nang, a ngaih pawh ka lo ring tawh lova. Ka thawhhlim khan a vung nasa deuh a, tunah chuan hei a pangai deuhthaw chu a ni tawh alawm tiraw?"

"Damdawi chu hnawih phawt a ngai a nih chu. Deuhthaw ringawt aichuan dam a țha zawk ang chu" a ti zui a, a nui duh mang hlek lo leh nghal a. 

Ka nu leh pain an bula awm tura min duh thu ka sawi chuan a meng phar deuhin ka hria. 

"An pahnih chauhin a mi an awm a?"

"Aw, unau dang ka nei bawk si lova"

"Ehe, pianpui unau i nei miah lo maw!?" ka hrilh tawh khan ka hre sia, ka lo la hrilh lo a ni maw.

"Nei nang, khumlu-a ka tar saw ka u a nia, college a kal laiin malaria vangin min boral san a"

"A nih chu mawle. A va khawharthlak duh dawn ve, inchhung in tlem bawk sia, i u a boral bawk si chuan i nu leh pa chuan an thlahlel viau dawn che a nih chu"

"Nia, chuvang chu a nia an kiangah awm tura min duh. Nangnen chuan intawng lo ila chuan ka kal tawh hialin ka ring" ka tih chuan a mitmeng lungawi tih hriat fahrana de sar sar mai chu a hmuhnawm kher asin.

"Keimah vang a ni meuh maw?"

"Umh, ni chiang e mawle. Mahse, țan reng theih loh hun chu ka nei ve maithei a ni. Kum lamah pawh upa an ni ve țan tawh mai bawk sia"

"Ni e tiraw, mahse, engtinnge ka awm ve ang a?"

"Kan innei mai anga" ka tih chuan a nui sak a. Ka awmah chuan a rawn bei a, min kuah chaih chaih chung chuan min rawn fawp a.

"A nuam ngawt ang" a ti sap a.

"Mahse, thingtlanga awm chu a buaithlak awm e, hna nen" a ti zui a.

"Buaithlak deuh mai thei ni. Tihdan a awm mai dawn alawm a hun a lo thlen te chuan, hnathawh te lo nei ve ila chuan i chawl mai anga țha tur a nia" ka tih chuan a ngaihdan a nih hmel vak lovin ka hria. Ka sawizui duh ta bik lova.

"Awm chhoh loh hram dan chu ngaihtuah la a ni mai. Kan inneih hunah pawh min sawn loh te chuan helama awm ka ngai tho dawn sia"

"Ni e tiraw, kan la ngaihtuah dawn nia. A hunte lo thleng phawt se la"

"A chhan chu fa te kan nei ang a, thingtlang  lama bul țan ringawt tur chuan rualawh a na duh dawn em a ka ti deuh. Bakah khawpui nge nge chu khawsak a lo awlsam a"

"A dik alawm. Mahse, duh ang thlip thlepa kan awm theih loh pawhin pawm chin te chu kan nei ve ang a tiraw" ka la tihsak hram a.

Eirawng a bawl a, khumpui kai silovah chuan khami ni ang renga kan hlim dun kha a vang ve mai thei e. Zanriah kan han kildun te chu 'nupa ni tawh mai ila tihian' a ti deuh reng mai ni.

A haw tur chu "La chhuak lo mai rawh, motor dang ka hmang mai ang, vawiin chu ka awl ang che" a tih teh tlat vang chuan kawngpuiah taxi ka lo chan pui a, peihloh hmel zetin kan in vailiam ta kha a nia. Min han kalsan hi chuan ka ruak huai zelin ka hria.

Kan khuaa High School an hawntharah thawk ve turin ka pa hian min duh khawp a, chuta ka thawh chuan kan awmho theih dan tur a ngaihtuah ve te pawh a ni mai thei e. Mahse, private high school-a thawh ngawt aichuan taxi han khalh beuh beuh a Zonuni nena hlimtaka nitin han inhmuh theih chu ka la thlahlel ve miau mai bawk si.

Reitak chu ka țang thei lovang tih ka hria, mahse, kan training result chhuak lo te chu țanfungah ka hmang chawp a, ka la hnial thei hram hram zawk a.

Ka nu leh pa ka ngaihtuah chhuah chang chuan ka inthiam lo viau țhin. Min ngai a, min thlahlel em em tih hre reng chunga helaia hna pawimawh thawh pawh awm chuang silova ka tangkhang reng chu nuam lo ka ti ve țhin.

Zonunmawii vang vek hi lawm mawle!

Nikhat chu Zarkawt pheiah passenger ka dah zo stand pana ka tlan lai hian nutling pakhat hian "Hey Taxi.." tiin min lo hui a.

An piah deuha kawngzau laiah chuan ka dingzui mai a, mipathum an niin ka hria. Min phartu ber chu motora țhulut ta mai lo chuan ka lamah chuan a lo kal kual a, 'Durtlang engzatin nge i tlan theih?" a rawn ti a.

Amah ka han hmu chu Zonuni nu lek lo niin! A chhan pawh ka chhan hma chuan ka hmel a hmu chu a lawm lo nge ni teh reng ni, 'A ngai leh lo' tiin motor hnunglamah chuan a kal kir leh ta daih mai a.

Engnge maw awmzia le!?

Nileng mai chuan ka ngaihtuah zui a, min lo ngaina vak lo a nih dawn hi kei taxi pu hi ka tih phah ta hial kha a nia.

An fapa nena kan buaina hrinchhuah nge ni ang a, ka dinhmun vang zawk hi ni ang tih chuan ngaihtuahna a ti thui kher mai.

Ngaihbel tur tingtangin tunlai hnaiah hian , khatia a unaupa nen kan inhmuh taih vak loh hnu ațang khan Zonuni hi ka thlah ngai ta vak lo bawk nen. An chhungkuaah kha concert zana thilthleng khan engemaw irhchhuah a nei a ni ngei ang tih chu ka ring thiam ve ta chauh kha a nia.

Zonuni nen erawh kan inbiak dan a ngai reng a, harsatna a neih engmah a sawi ngai lo thung. Ka han zawh ve pawhin chutiang a awm loh thuin min chhang mai zel a, a khat tawk chuan kan inhmu reng thova, ka thlah a duh loh chhan ka zawh erawh chu heti hian min chhang, "Pawisa i la duh ngai bawk si lova, ka tan a nuam lo alawm. A man ila rul bawk sia, min phurh loh khan i hlawk zawk. Kan inhmu reng thei tho alawm" tiin.

Chhuanlam nge a tak pawh hriat va ni suh.

Zankhat chu an veng lamah passenger ka neih vangin dar 8 bawr vel hi nitain ka hria ka kal a, han len nghal mai a remchang em a tiin ka phone a, ka lo leng ang phei chu ka ti hauh law, inah a awm leh awmloh ka zawt thuphung mai chauh a. Ani pawh chuan a awm thuin țhatakin min lo chhang ve mai a.

Len chak ngawr ngawr lam aimah chuan an chhungkaw boruak hriat ka chak vang a ni pakhat a, 'a niang a, a niang a' tih ngaihtuah kual vak hi ka peih lo. Fiah chawt zel mai hi ka duh.

Doorbell chu ka han hmet țang țang a, chhunglam ațang chuan "Lo lut rawh" an tih chu ka hria a, Zonuni aw niin ka hria.

Ka han lut chu Zonuni chu a lo ni chiah lo deuh a, a nau hmeichhia zawk a lo ni a.

 Min han hmu phat chu a'n meng tal rawlh  a!

"Lo leng rawh, engnge i duh?" nghal pang mai a le!

"Khawnge i u, Zonuni?"

"A room lamah a awm a niang" a ti mai a, koh pawh a tum chuang lo emawni.

Ngawireng chuan Zonuni chu an ina ka awmthu hrilhin ka message a, chutihlai chuan pindan lam ațang hian a nu a lo chhuak a, "E, Taxi driver inleng kan nei a ni maw?" a rawn ti chhuak a! Ka lum leh pep pep tawh mai ka ti.

Chhan vak ngaihna pawh ka hre lo. An hriat phak loh tawk vel chuan ka ne ne ral ta vel niin ka hria. Ka sen ve țawn țawn mahna le.

"Zonuni i nghak em ni?" a ti zui a.

"Aw" tih zawng a ni mai e.

"Nghak duh lo mai rawh. Inzui tam lo ula a țha ang"

"Engngati maw?" Chu zawhna chu ka mawl vanga zawt ka ni lo tih ka inhrechiang khawp mai.

"I phutawk zawng ve rawh" min han ti zet mai chu țek a tla hi a ni ringawt mai. Thil pakhat chiah chutihlai chuan mamawh ka nei, insum. Ka taksa chu chechhuak thei turin a inpeih at a, ka leili lah chu ka thunun loh zawngin a thlun phelh ang zar zar a ni mai dawn bawk si. Buaina zakhua ka thlen thei tlat mai.

Ka chhan lêt chuan tu ve ve pawh kan zualkai mai tawh dawn si. Ka chhuak zawk mai ange. Mahse, ka lai a va han na deuh ve mawle.

Ngawireng chuan ka tho ta nalh a, kawngka bula ding chung chuan 'mangțha u le' ka'n ti thlap mai pek a! A chanloh khanah ka chhuak chiang ve viau ang. Ka chhuah dawn laitak chuan inchunglam ațanga "Dina" rawn ti awm than hi ka hria a. Mahse, ka chhuak laklawh tawh bawk si.

Kawngpui ka thleng chiah tihah chuan an kawngkhar chu a lo inhawng a, Zonuni chu a lo chhuak zui nghal a, "Dina" tiin ka lam pan chuan a lo kalzui a. Keipawh penlui duh bik lo chuan ka lo ding ve mai a.

"Engngatinge, kal leh mai i tum a mi?" a rawn ti a. A nu min țawngkhum kha a hre ve awm bawk si lova, ka hrilh ang nge hrilh lovang le?

Ngawireng chuan ka en ran a, a diktak chuan țawngchhuak mai thei lova insehruh ka ni mah zawk hial ta ve ang.

"Mawh, ka biak che chu.."

"Ka phutawk ka lo va zawng a nge" tiin ka inher a, ka motor dahna lam pan chuan ka kalzui nghal a.

"Engnge a awmzia chu chu?" tiin min rawn um a  ka banah chuan a chelh a. "Sawi rawh, engnge i awmdan hi?"

"Sawi tur ka nei lo, ka hul viau a ni"

"Engvanga kha thu kha sawi nge i nih?"

"I duh leh i nu zawt la a ni mai alawm" tiin ka kalsan ta kha a nia.

Ka nâ; ni e, ka na ngawih ngawih a ni.

Motor chhungah chuan reingial ka țhu tain ka hria, ka bing mum mum mai ka ti. Ka zak bawk si, hrehawm hle bawk si. Engatinge khatiang hmachhawn tura ka inbarhluh kher kher le?"

Ka phone chu vawi engzat nge ri ka hriatloh tluk zetin message engzatnge lut pawh ka hre hrep lo! Ka switch off tak hial kha.

Ka mu, ka mu ve mai mai a ni. Mutthilh chu a hnai lo nasa. Khawlum bawk si nen chuan thlan tlahluamin ka tal tlaivar a ni ngawt mai.

Service tur pawhin zingkarah chuan ka tlanchhuak peih ngang lo a ni. Mi thawh hma hmain fai zetin ka inbuala chu zawng chu a ni mai.

Țhutthlengseia ka mu zal chu ka lo muhil tlang daih pek a, dar 10 pelah ka harh ve chhak mai.

Ka inphihfai hnuah chuan chhuah paha thil ei mai ka rilruk a, ka insiam zui nghal mai a. Ka chhuak tur kawngkhar ka hawng chu pawnlam stepah chuan Zonuni a lo țhu reng chu lo niin!

Beisei loh lutuk vang nge ni ka phu deuh hialin ka hria. A handbag chu a țhutna sirah chuan a dah a, earphone a bengah a vuah țat bawk a, t-shirt var leh jeans hain puanpheikhawk dum, nem lam chi deuh hi a bun a, enthuak chuan tleirawl zawt chauh niawm a ni.

"E he.." ka ti ringawt a.

A earphone chu muangchang chuan a la thla zui a, "Engnge awmzia?" tih chu a țawngkamchhuak hmasa ber ka dawn a ni.

"Chu zawhna chu ka zawhna awm tak zawk a ni?" ka lo ti khauh a.

"Engnge i lungawi loh chhan? Engngatinge hetianga i awm?"

Ka lu ka thing, chuti deuh tawp chuan ka chhang a ni ber mai.

"Mawh...?"

A țhuthmun ațang chuan a lo ding a, kan inkarah chuan penthum lo liam a tla lovang. Ka chhân chuan ka thinrim zui mai dawnin ka hre bawk si.

"Khawngaihtakin aw, khawngaihna awmzia chu i hriat kha" tihpah chuan min rawn hnaihruak a. 'I phutawk zawng ve rawh' tih ri chu ka bengah chuan a inthum rawn tlut tlut a, ani hi ka phu lo maw!? He doctor hi ka phu lovang maw? 

Ni love, Mipa ka nih chhung chuan hmeichhe phuloh ka nei ngai lovang. Ni e, ka nei ngai miah lovang. Sum leh pai vanga ka phu lo ni a an inhria a nih chuan an chapo ve hle tihna te pawh a ni mahna le.

"Ka phû lo che maw!?" ka awki chu a pangai thei thlawt lo a ni e.

"Ni lo, chutiang zawngin thu la suh khawngaihtakin" tih pah chuan ka awmah a rawn bei a, a insût zui nghal hlap hlap a. Ka kawngah chuan nghet zet mai hian min kuah a, tih leh vak ngaihna pawh ka hre chuang lo.

Reife hnuah chuan inchhungah chuan ka luhpui a, "Kan ințhen hi a țha" ka'n ti tawng mai a.

A lu thin nar nar pah chuan, "Aih ka duh lo Din, ințhen ka duh lo" țhutthlengah chuan ka țhutpui a, min kuahna thlah chu sawiloh min hnaih tial tial zawk emawni lehnghal ni.

"Awmzia a awm lo, engmah puitlin zo lo tura inngaihzawn hi a țulna a awm lo. Kan tlai hmain ințhen hi kan pahnih tan a.." ka hmui chu a rawn hup hmak mai!

"Khatiang thu ngaithla turin ka lo kal lo asin, ka hmangaih thu che hrilh turin ka lo kal a..." a lung a chhia a ni. Sawi harsa a ti.

"Tunah chuan duhthusam leh kan beisei ang vek hian kan awm thei lo a ni tih ka pawm mai a ngai ta a nih hi. Nangpawh chutiang tur chuan i inbuatsaih ve mai a țhat ka ring" ka ti leh fan a.

"Din, ka hmangaih che" mittui khap far zawih chung chuan min rawn kuah țha leh a.

"Keipawhin ka hmangaih che alawm"

"Min hmangaih takzet maw?"

"Aw, chu aia chianga sawi dan chu ka thiam hauh lo" ka ti ve mai a.

"Mahse, hetiang hian engngatinge i awm si?"

"Ka phuloh 'an tih' chu ka lo hmangaih vang a ni"

"Chuvang chuan ka hmangaih i tih chu țhen vang vang i duh maw!?

"Natna insiam ching chu mi â nileng a ni ngei ang"

"Khawsik, tlunhluah chunga nachhawkna takngial pawh eina chang hre lo chu a la â leh zual ang" a tih chuan beih rîl ve ngial ka tum nachungin a mi chhanletna chu ka man lo zawk zawmah kha a nia.

"I chhungten khati khawpa min duhloh chuan inngaihzawn hi awmzia awm hleinem"

"Keima'n ka duh che alawm"

"Nangmahin i awm si hleinem"

"Din, ka sawi lovang ka ti țhin a, mahse sawi a țul ta a niang.."

"Engmaw..?"

"Ka chhungte hian hman ațangin harsatna min siam tawh. Nangnena kan ințhen theihna tur hian min hauva, min vau hial bawk a. An tihtheih anga nasa hian min khap beh hi an tum țhin asin. Chu'ng zawng zawng chu tunthleng hian ka la paltlang zel. I benghriatah vawikhat pawh ka la sawi lo..." a lu a thing ne ne, a hmui a hup zui a..

Chu țawngkam chuan ka rilru a khawih kher mai. Chhan ngaihna erawh ka hre lo thung. Ngawirengin a hnungah chuan ka chul sak a. Min hmer ngawt ngawt nimai hian ka hria.

Reife hnuah chuan min kuahna kut chu phelhin ka koki ve veah chuan a bãn chu a chhuang a, ka tukkhumah chuan a suih a, kan inhmu hnai dun kher mai!

A țahna vanga a mithnawih pherh niaih te, a hmuisen da lam tawh te chu hmuh hmaih tum teh mah ila mengve kur ta chuan ka hmuh hmaih hauh lo.

Insum tih hriat reng hian a hmui chu a pet fan fan a, a khur der der mai. 

"Din, ka hmangaih che" a tawplam chu a richhuak zo lo țepin ka hria. A tilui emawni tih tur khawp chuan min fawp a, duhthaw tih hian a hrilhfiah zo lo hial ang. A duhâm tel ngei a ni.

A rûm hek hek a.

A hnuah chuan ka awmah chuan a bei hle hle a, ka beng chu a hmet neuh neuh a, eng engemaw a sawi sep sep a, ka beng a rawngah a lut teh chiam lo thung. 'I phutawk zawng ve rawh' tih mawlh khan a ni ka thinlung vit chu ni. 

Ngawirengin eitur ka siam a, kan eilai pawh chuan kan inbe em em hran lo. Ka chezia chu nguntakin min thlithlai niber hian ka hria. 

Chawhnu herah chuan kan inzui chhuak ta kha a nia, Hospital lamah a ni a kal a, kei ka hna ngai chhunzawm turin.

Ka engtihmah a tui lo. Motor seat ka kuai awn sauh sauh a, stand-ah chuan ka mu veng veng a ni mai e.

Tlai dar 4:00 velah chuan min rawn phone a, ka la pick up sak ta chuang lo kha a nia. Whats app message tone riin a zui nghal zat a.

'Khawngaih takin...' tih te mai hi.

                     Țhen VII-na

Chhanna ka pe lem lo.

Vawikhat emaw chiah ka tlanchhuak ta in ka hria, a zia lo viau a ni.

Ka lukhuma hmaikhuh meuhvin Taxi-ah ka mu kha a nia, muthilh leh hilh loh chu ka fawmkem vel niin ka hria. 

Tlai Dar 3:00 velah chuan darthlalang kik kauh kauh thawm chuan min ti harh a, ka han men chuan Zonuni chu pawn lamah chuan a lo ding reng chu lo niin!

Lo kal lo mahse pawi ka va han ti lo teh lul em ve le.

Darthlalang chu ka tihniam nghal thuai a, kawngkhar kalhna te ka hawn hnu chuan ngawirengin a lo țhu lut a, "Phone i la duh bawk si lova, message i chhang bawk si lova" a ti zui a.

Tuisik chu ka inkhawlh ringawt a, engtia han dawnsawn chi nge maw ni. Ka thlah chu a duh ngai tawh lem lo bawk a, thlah a ngai tawh lo turah ka ruat ngawt mai.

"Naktukah Falkawnah training an ko a, ka ring dawn che nia aw" mi pawh en lo chuan a ti leh a.

"Hm...Midang hmang mai la, ka tan thil nuam a ni lo a nia"

"Din, ka bula awm chu nuam lo i ti viau a mi!? "

"I tana awlsam hi ka tan a awlsam ve si lo a nih hi"

"Chuan..?"

"Engnge?"

"Min hruai dawn nge dawn lo?"

"Ka hre lo"

"A dam zawngin thil ngaihtuah hram hram la, a harsa lai ringawt ngaituah chuan engmah a tih theih dawn loh a nia"

"Ka thutlukna chu a la ngai reng"

"Aih, a danglam tawh. A danglam tawh tiraw?" tiin min en veng veng a. A lam pawh chu ka hawi ngam lo a chha  chu a ni e.

"Keimah vangin i chhungte paw'n an hauh phah che a, boruak țha pawh in nei lo hial emaw a ni ang a. Mi chhungkaw tibuaitu nih ringawt hi ka tan awmzia a awm hleinem, ti hian awm ila, reiloteah min theihnghilh mai dawn lawm"

Chhanna ka dawn chu kawngka inkhar rikhap chu a ni.

Motor hmalamah chuan a kalphei nal nal a, reipawh ka enzui ngam lo.

Engtikah emaw chuan min theihnghilh thei mai dawn alawm tikhan. Keichu mipa ka nia, ka hmaa awm apiang hmachhawn ngam tura zirtir ka nih kha mawle. Harsa deuh mahse ka thei ve mai ang.

Heti em em hian ngaihzawng vangin rilru hi a lo mang thei a ni tih hi ka hre ngai lo. Ngaihtuahna mumal put harsa ka ti a, chu ber aia pawi zawk chu ka hna a nghawng tel zel chu a ni. Ka che chhuak peih si lo.

Zanah chuan țhianpa Ropuia a lo lang hlawl mai a, ani hi kan khawlam ațanga inkawm tawh, college te pawh kaldun zel kan ni a, BA kan zawh hnuah khan ani zawng a chi a nung hma deuh a niang nupui a nei ta a. Kan khawlamah eichawp dawr te siamin a in bengbel ta kha a nia.

Zin thleng hlim tih hriat reng hian zin bag nen paw deuh thûr hian a lo lut a. 

"Tehhlawl che chuan, mi te hrilh lawk ve țhin tur che nia" ka lo ti nang nang a.

"Engnge maw hrilh lawk kher ngai le. Ka pu te inlamah ka tlangphei dawn emawni ka tia, mahse i motor kha ka hmu leh sia, i awm rau rau chuan ka tia, ka lo chhuk thawr mai"

"Muangmarin aw chawei lam chu, keipawh ka la ei bik lova, han intifai la"

"Nia, ka ril pawh a țam vak lo. Kawngah chaw kan rawn eithla bawk sia"

"In damtlang maw, in nute?"

"Aw, kan țhat lai tak a ni e. Ka fapa pawh kumin chu a nî-in KG ah a hruai ve a, kan buai ve tawh khawp mai. Pa tak tak kan ni ve ta" a ti zui a. A nui hau mai a.

"A hur hma deuh hi chu inhriat mai lawm" ka lo tih sak pek a!

"Ve bawk a che aw, luck vang a nih hi" a ti zui a.

Țhian sabawp man tur ber a lo thlen tak rup si-ah chuan chaw te chu ka chhuan belh leh loh te chuan tiin buhfai chu ka sil sat sat a. Chutihlai chuan ka phone a lo ri leh pek a, ka thil khawih lai a laklawh deuh bawk nen ka ngaihven duh lem lova. 

A nihna takah chuan Zonuni a nih leh tho ka ring a!

Ropuia chu a kalphei nal nal a lehlam ka hawi hlan chuan ka phone chu a lo va chhang hram pek a! Dah rawh intihna chi ni tawh hek lo le.

"Hello, ...a țhianpa ka nia. Aw, awle.." tiin min rawn pan phei leh a. "Kha.. i bialnu ningei tur a ni" a la ti zui a.

Chhan loh theih tawh nghal hek lo. Ka rin ang ngei chuan Zonuni a lo ni a, "Din, engmah harsatna a awm lovang tiraw?" a rawn ti țha leh pek ka ti! Kan inkalsan nal nal tawh dawn emaw tia.

"Ka sawi tawh kha mawle"

"Ka hria lawm. Mahse, ngaihtuah ringawt pawh ka la ngam rih lo a ni"

"A zia ve mai dawn lawm chung te chu"

"I ngaih anga awlsam hi ni sela chuan harsatna hi ka siam lo tur che a nia tiraw. Mahse, a ni bawk si lova.."

"Kan inhmuh zel chuan, a lehpek a hring zel a, a buaithlak"

"Naktuk chu kal phawt ila, chuan...?"

"Engnge chuan..?"

"Tihdan kan ngaihtuah țha ang a.."

"A lehpek awm tawh lo sela"

"Kan ngaihtuah dawn alawm chu"

Chutiang vel chu kan inbiak dan a ni. 'Ka ring che nia a ti miau sia, kan inphur leh ngang mai a ni ang chu. A tawpna tur te pawh a ni tawh mahna le.

"I va be uluk thlap thlap ve a, boruak a țha vak nange?" Ropuia chuan a lo ti zui zat a.

"Ni ber mai. A thar zawn a hun leh tawh a"

"I va han ho mai mai tak e aw, nupui neih te pawh i hun ve tawh a nia, khatiang mai maia tal rual pawh i ni tawh lo" mi la ti zui leh ta nghal a.

"Aw, a fuh miau loh te chuan a dang kan zawn mai loh te chuan, lungthlu lo zeta nupui neih i duh bik dawn mi ngawt?" ka tilêt kha kha a.

"Mi pangai, mi puitling ngaizawng la, inngaihzawn hma te hian zawng uluk ve țhin la, inngaihzawn tawh hnua an țha lo tih leh si kha chu tleirawl laia tih awm tawk vel chauh a ni"

"Ka la tleirawl alawm" ka tih chuan mi tih zui ngaihna vak pawh a hre lo. A nui ve tawp.

Zanriah kan han eikham chu 'innu chu rim ila.." a ti zui a.

Chhuanlam eng engemaw ka dap chawp a, ka pha hul thei ta kha a nia, min tilui țãwng țâwng ang tih a hlauhawm khawp mai. Țhiante hriatpuina thlapa mualpho kher kha a țulna ka hre hran lova!

Zingah chuan ka thawh hun pangaiah ka thova, tlanchhuak lem lovin ka mikhualpa nena kan eitur chu ka bawl a. Ani lah chu a la hnâr tak thlurh thlurh a.

Dar 7:30 dawnah chuan a lo tho chhuak ve ta chhar chhar a, thawhphan chu pe na ve tak a ni.

Chhuah hmanhmawh hmawhah te chuan ala țang zui leh ta nghal a, hmai a phih fel zawt chu chawthleng a ban a ni nghal ruai mai a, 'tlailam chu i duh leh rawng inbawl la, i peih loh leh eibona tur zawng mai rawh aw' ka tih kha. Ka haw hun tur ka hre lawk bawk si lova. Chutia tih mai loh chuan kan innghak khawtlai mai mai ang tih a hlauhawm ve a.

Chabi dahna te kan inhrilh hnuah chuan mawngvawmba ang maiin a chhuak tak nal nal a.

Zonuni lah chuan thawm a rawn nei hauh lo lehnghal a, a hmanhmawh thlak loh nge, midang a hmang leh dawn zawk emaw ni le? Kan inbiak khan kal hun zawhna chang reng reng ka lo hre bawk si lova.

In ațanga lo nghah veng veng ringawt chu tiin ka chhuak a, muang fân reih rawihin motor te chu ka han hru hlarh hlarh phawt a, a la reh veng veng tho mai. Dar 8:45 a ri tawh.

Ka laklawh em lovang chu tiin stand lam pan chuan ka tlanchhuak ta a, ka thleng țep tihah chuan min lo phone leh lawi a, "Dar 9:30 velah kal ila, programme kha dar 10:30 a țan tur a nia, a tawk angem?" a rawn ti a.

"Tawk mai ang, chuan ka lo nghak dawn che tihna a mi?"

"Nghah loh te chuan..."

"In rei dawn lo a mi?"

"Ka hre lo le"

"A va ninawm duh dawn ve" ka ti hram a.

"Rei lo turah ngai ila.."

"He..awle"

Kan kal hmain vawikhat chu passenger ka lak tak hram kha. Ka lost nileng leh dawn a ang bawk sia, mi pek hi chu a tum ve ziah a, laksak nuam nghal hek lo mawle.

An veng kawnah chuan min lo nghak a, Falkawn lam pan chuan kan inphur chhuak leh ta poh mai kha a nia. A khawsa ziaah chuan engmah boruak nei lo ang hmiah hian a awm a, min biak dan engkim chu a pangai em em vek mai.

A mipa zawk ka tum deuh bur thung a!

"Tunge nizana phone lo la kha?"

"Ropuia, ka țhianpa"

"A lo leng tihna mi, i chhuak lo a mi a?"

"Chhuak nang, kan khua ațangin a lo zin a"

"E, nih chu. Nangmah emaw ka tia, ka țawng nghal mawlh mawlh sia a zahthlak ve reng"

"Engahmah a ngai teuh lo mai"

Aizawl kan chhuahsan dawnah chuan petrol la turin ka din pui a, kan dawh zo chu pawisa min pek khalh hlauh mai a, 'a ngai lo' pawh ka ti duh ta bik lo mai! Țawngkam mawi ka rawlh peih lo.

Eng engemaw sawi chuan a ti ti reng a, an thawhpui te chanchin te, a lehkhazir lai chanchin thleng chuan a sawi a. A khat tawkin ka chhang zeuh zeuh hman ve țawk chauh a ni. 

Hetiang a nih zel chuan ințhen kan harsat dawn mange aw.

Rin aia hma chuan Falkawn chu kan thleng a, thingpui dawrah muangchanga kan inhnangfak hnu chuan Refferal Hospital lam pan chuan Training turin ka phur chho ta a, engnge maw ka lo tih ang le.

Min kalsan hnuah chuan Driver room lampanin ka kal ve ta daih a, carrom board an lo pen laih laih a. An fel hlawm khawp mai.

Kilkhatah a țhenin playing card an deng bawk a, muthlu tawk an awm bawk a, an indaih viau a ni.

Ka peih tawk ka awm ang a, chuan khawchhungah ka leng thla ang ka ti kha a nia, carrom board te ka'n țhutchilh ve takah chuan rinaiin ka tui leh ta phian sia.

A naupan hmel ber,  bazara an tirh niawmtak a lo thlen chuan an ri deuh hlat hlawm a, rin ang ngeiin zu laah an tir hi a lo niawm a. Chhaklam kilah chuan a han indahchhuak sat sat a.

Kan carrom board pen ngawt ka ngaihtuah lai chuan ka bulah chuan 'no' an lo hung ve reng chu lo niin. 'In rawh u, ka inngai vak lo, in kham lo nge' ka tih pawh chuan 'kan thlip kep tawh che, i duh leh leihbaw mai rawh' min ti hmiah mai si a, no khat na na na chu ka'n tlak sak ve pawp kha!

Zepnak emaw Zu hi chu ka in thei khawp a, ka heh luat ka hlauh vanga insum mai zawk ka ni. Pathian zarah insum lam ka lo thei phian a, mi hmuhah chuan zu in lo chu ka ni der mai. 

Engemaw tihkhawm nikhua a țhiante nena han dawm tlan hi ka duh tawk viau a ni. Mahni phei chuan ka inpeih lo hrim hrim bawk. Phûlpui hlut tur hi awm se, a nih loh pawhin zai pui tur tal, tichuan zuin chu a nuam ka ti.

Min thlit kep ve zel sia, ka duhtawk aitam hret ka in tawhin ka hria. 

Ka han tho chhuak tur pawh chu ka nghet lo riauvin a nia ka hriat ni.

Ka zungzo in darzat en tuma phone ka han bih chuan miscall a lo awm nual mai a, Zonuni miscall hlir a ni leh nghal a!

An zo der emaw ni le.

Ka phone lêt thuai a, 'motor bulah ka nghak che' a tih hlak kha.

Engtinnge maw ka phone ri pawh ka hriat loh theih le. Silent-ah ka dah lah ka hre bawk si lova.

Motor dahna lam ka pan chu min lo en uluk kher mai. Hmuhnawm ti a min melh chu niin ka hre lo, engah vak phei chuan ka ngai lem hlei lova.

"Min lo nghahna a rei tawh em?" ka inthiam lo ve deuh a.

"Umh.."

"In va zo hma leh si ve a"

"Kan la zo hleinem, ka lo chhuak ru a nih hi"

"E, tinge mamawh i nei mi?"

A chektlak ringawt a! A thinrim deuh hi chuan mi hi a chhang țha duh vak lo.

Motor chhunga țhutluh pah chuan 'kan haw nghal dawn nge?' ka han ti hram a.

"Aih, Zokhuaah kal ang"  

A hla lem lo bawk a, ti ti pawh kan ti ti hmain kan thleng chho mai a. Chowkidar te kan biakfel hnuah chuan kan inzui chho ta hnak hnak a, chowkidar te sawihmang khan tumah an awm lem lo bawk a, kan free phian dawn a nih hmel e.

"Din, tinge zu i in?" a ti ta ngei e.

"Ka in tam hleinem" ka in lo tihbuai vel kha awmzia a awm dawn bawk si lova.

"Ngatinge i in ka tia lawm"

"Driver hovin min pe a"

"Chuan?"

"Ele ka lo in mai"

"An pek apiang che i in dawn tihna a mi, tûr pawh maw?" deuh kher chuan a.

"Haha ila ulh a nih kha"

A hmui a tih kawh lâk lâk chu ka fawh luih sak a, mi tih vak ngaihna hre hek lo a ner țeuh ringawt a. Hmanlai Mizo Lal in anga  an sakah te chuan kan lut a, rem leh rem lo chuan min han selfie pui ve bawk a. 

In hrang hrangah chuan kan kal kual zel a, Zawlbuk kan luh chuan a thim ruih bawk nen keia ruiphur pheng chu khawsak loh lohvin ka khawsa pek a!

Min dan a tum ve deuh nain min hneh chiah silova, a tawpah chuan hnehna chu ka ta a ni ta.

Inhak țhat mawlh mawlh pah chuan "Kal leh ka ngai dawn asin, ka thawmhnaw i ti chuar vek a..."

"Engnge kal leh kher?"

"Attendance an la leh dawn a chawhnuah"

"A nih chu mawle, a va'n zia lo ve" tih pah chuan a inha tur chu ka dang leh hram pek a!

Chu hmun kan chhuahsan meuh chuan dar 3:30 a ri hial tawh a, chawhnulam Training kal bawk si lo; ka awmpui danin zir bawk si lo chu a ngaihdan a ni lo khawp a, mi han tih chiam dawnin engahmah ka lo ngai bawk si lova. A ngawi ngal mai a, kal lam leh hawlam chu boruak in ang lo tak a ni. Kan inlet thawk a ni ber mai.

Rui lo hai lo ni ila chuan kha thil kha a thlen kher ka ring lo. Mahse, ka inchhir chuang hauh lo. A chhan chu a chhungte chunga phuba laah ka inngai tlat pek a! 

Khami ni kha kan inhmuh hnuhnun nî tur leh kan inbiak tawpna tur a nih chu ka ring pha bik hauh lo. Lo hrelawk ni ila chuan...

Zonuni ka thlah fel hnu, inlam pana ka tlan lai chuan ka nî hian min rawn phone teh nawlh a, ka rinloh tak mai thu thințhawng zet min hrilh zui a, "I nu inkawmchhak step-ah khan a lum a, hei damdawiin lamah kan kalpui nghal a, ala harh chhuak lova!" a rawn ti mai pek a!

A va han buaithlak tehlul ve mawle.

Nute thichhawnga lum renga an fa neihchhun ve ber, chhuanlam siamtur mumal pawh awm lova Aizawla khawtan ngawt thu a awm bawk si lo. 

A zan la lain ka tlan chho ta rum rum mai kha nia.

Eng em chu kan ti ta lo a nih hi. Tunthlengin hrisel țha ang reng takin min la dampui zel chu a nia.

Kha zan, ka hawchhoh dawn khan rilru belebut nen a thuphung chauh pawhin Zonuni kha hrilh nachang ka hre reng reng lo mai kha a nia. Ngaihtuah chhuak pawh ni ila ka hrilh kher angem chu ka hre chuang lo.

Mahse, țawngkam khat talin ka chhoh a ngaihthu hi lo hrilh ni ila chuan boruak a dai deuh mahna le.

Ka ngaihtuah chhuah meuh chuan signal awmlohna hmunah ka awm tawh si. Kan khua ka thlen lahin ka simcard vuah chu hnahthel vuahluh nen a lêm chuang tawh si lo. A thi hmak, tuma'n ka simcard vuah company ang chu an hmang lo. Signal awm miau hek lo mawle.

Mi phone hmang tur em chuan ka tlawmngai ve tumhrang a, kan ințhen theihna tura khuanu ruatah riak ka ngai ve hmiah mai a ni.

Chutiang chuan thlakhat dawn ka nu buaipuia ka awm chhung chuan ka be ta lo kha a ni a, thlakhat hnulama ka inluah chingfel tura ka kal pawh chuan ka be chuang lo. 

A chhan pakhat chu signal ka nei chuang lo tiin ka phone chu inah ka dah tawp kha ania, tuemawin a lo awt deuh nge ni a bo daih mai a, a thar ka neih leh a signal te ka pawh ve thlap hnuah ka contact list ber ka nei leh tawh si lova!

Biak ngaihna a awm lo, a rem lo ka ti hmin thlap. Chhuanlan tur tingtang chu ka nei ve alawm.

Chutiang chuan Aizawl lama ka bungruate senghawiin kan khawlamah chuan mutbu nen ka pem chho fel leh ta kha a ni a, han awm chawt chuan a lo tih ve theih viau mai.

Mipa vannei buimeitawia an ti ang deuhvin ka hna chungchangah pawh ka vannei phian a, ka pa duh ang ngeiin High School an dintharah chuan ka han thawk ve lawp lawp a, kumkhat ka thawk tlingawrh tihah kan Principal chuan hnadang hmuin min chhuahsan a. Kei, a hminga degree kawl hnember MA, B.ed ve riang ruang chu School Managing Board chuan Principal sâpah min han kaitir ta vung mai a. Private High School mah nise a nuam ve reng mai.

Kan khawtlang hruaitute an țang bawk a reivaklovah Adhoc in kan school chu a awm ve ta hial a, hlawh te pawh a zia chho ve hret hret e.[Adhoc - hi private school ang chi, 50% DA sawrkarin a tumsak ang hi a ni a, sawrkar hnathawk pangai te angin hamțhatna sawrkarin engmah a pe lova, chutih rual chuan adhoc school chu sawrkarin a la a nih chuan adhoc an nih ațanga an service kha an chhawm thei thung.PCM)

Principal hna ka chelh ațanga kum 2 na vel, chumi kum tawp lam a ni ang chu. Chumiah chuan MLA election awm tur a ni a, mi anglo VC nei lo ta chuan kan veng lam chan, Hmar veng VC area Public meeting an han ko hmiah mai a, 'kan veng High school hi sawrkara min dahsak thei apiang vote tur' an ti hmiah mai!

Chumi zar kan zo te pawh chu aniang Sawrkar thar a lo pian ațanga thlalina vel lekah chuan order hrawlpui mai kan VC te chuan an rawn hawn ta kha a ni a. High school hmunah vengchhungin ruai nen kan lawm hial a ni.

A nihna taka chuan khawlian pawh kan ni hran lova, High School pahnih neih kher chu kan mamawh ber lem lo. Mahse, veng in elna hi a lo na duh khawp mai a, a tira he High School an din chhan ber pawh English medium ang a enkawl an duh vang a ni a, chu an duhna chu tun thleng hian kan la chhawm ve chuan ka hria theih ang tawk tawk chuan.

Chhim veng lam aichuan naupang pawh kan ngah mah zawk.

Chutianga hun ka hman chhoh ve mek lai chuan alawm Dr. Zonunmawii chuan ka buzawlah ngei min lo luhchhuah leh tak ni..

                     Țhen VIII-na

Zanriah kil tur chuan ka nu chuan min lo auva, ka thochhuak châk mawlh lo a ni.

Ka huphurh ang he hu chuan eng boruak mah chu kan nei lêm chuang hlei lo va, ka lo ințam lawk nasat ve teh lul nen chuan.

Chaw ka eikhamin ka thleng tuidehnaa ka dah fel, kut ka sil mek lai chuan boruak in up reng chu a puakchhuak ta!

"Bawiha, naute kha i fa tiraw!?" tih chu ka nu chuan min zawt ta!

"Tinge?" rang fe chuan ka lo ti thuai a.

"Ka hmuh phat khan kan thisen zawm a ni tih ka hre thei" phat lehna tur a va han vang tehlul em! Ka pa lah chuan ka chhanna nghak niawm tak hian ka kal kual dan dan chuan min en rulh rulh mai bawk si.

"Hmanni khan ka hre ve chiah" ka ti ringawt a.

"Eng nga, engtinnge i hriat loh theih?" ka pa chuan a lo ti thuai a.

"Ka nu damloha ka lo chhoh ni khan kan inhmu a, zanah khan ka lo chho leh ta thut sia, helamah signal ka nei ve tawh bawk si lova kan inbezui thei lo va"

"Amah pawhin engmah a hrilh lo che a mi?"

"Hrilh bik chuang nang"

"In va han nep dun tak em.." ka pa chuan a ti zui a.

Sawithui ngam vak hek lo ka pindan lamah ka lut zui daih a, min koh chhuak ta bik em lo chu a nia.

Chaweina pawh ka va senghawi pui ta lo mai. An hmaizah a na riau!

Ropuia chu a lo thleng ve ta hram a, ka nghahhlelh vang nge ni a lo thlenghar hi ka ti khawp a, ka pindan lama thukhawchang kan sawi hnuah ka nuin thingpui in turin a lo ko a, chumi remchang chu lain ka zui chhuak a, leng turin ka kal tlang nal nal asin le.

Han lenchhuahna tur em em ka hria pawh a ni hran lo. In a awm chu ka zak ve deuh a. U Rinawmi dawrah kuhva te ka han thelpui ta vel mai mai a ni.

Ka mawngkham ka zik mar lai tak chuan kan motor lo tlanchhuak chu ka hmu a, tun ang zanah te ka pa chu engnge maw tih a tum le? Ka ti rilru neuh neuh a. 

Haw tuma ka dinchhuah meuh chuan dar 10 a lo ri thuak tawh a, ka phone-ah chuan Ropuia missed call a lo awm pek a, ka be zui nghal thuai a, 'kan inlamah lo phei teh' a la ti zui tak deuh deuh a.

A țha thove, ka nu leh pa te thu leh hla te pawh ka hriatphah ang a.

An in ka han thleng chu anni leh ni lo angtakin a fate pawh tumah an lo la mu pek lova, Ma-i chuan "Zanin chu eng nge maw an hriat ni hei an mu duh reng reng lo mai" a lo ti a.

A te ber chu ka malchungah a lo lawn nghal thuai a, mi hi an ngai ve țhin a nia.

"Eng nge ka pate ngaihdan chu ni a, an lawm lo viau em?" tiin ka zawt zui a.

"A, ngaihdan danglam vak han putna chi kha a ni tawh lo hrim hrim a, an țha khawp mai. Quarter lamah te kan han lengchho alawm zanin chu, 'Thupha chawi kan ngai a nih chu, heti chen chen ngaihsak lo va kan awm hi' an ti teh tlat sia, ka han kalpui alawm"

"A lo țeu viau lo maw Zonuni chu?"

"Țeu hran lo ve, a lo puitling khawp mai ka rin ai daihin, ka belchiang ve ta viauin ka hria a nia. Han sawisel maina tur ang hi ka hre tlat lo"

"A sual hleinem amah te chu, a chhungte vanga ințhen pawh rawt ka nia. Ama dik loh leh thiam loh a awm lo"

"A niang, ani pawhin in ințhen chhan ka zawh khan chutiang lam hawi deuh chuan min hrilh tlat a ni. Engpawh ni se thil thleng tawh chu thleng tawh a nia. Țhatakin han awm nawk nawk phawt ula, inneih lam te pawh hawi a țhat ka ring. Chu chu i nu leh pate duhdan pawh a nia" a ti zui duah a.

"Chu kher chu ka va beisei lem lo e aw, thil harsa tak a nih ka ring"

"Tum chuan kawng a awm an tia lawm mawle, a engamah hmaa 'a harsa ang' tih ngawt zawng a fel lo ka ti ve deuh"

"Nge, Miss Diki i vengthawng deuh em ni?" a ti zui a.

"Venthawn ve chu a ngai alawm"

"Venthawn a ngai reng reng lo a nia. Han hrilh mahla a lawmpui ngawt ang che" a ti ngawt a.

"Eng aiah chuan nge maw min lawmpui ngawt ang le?"

"A tir lamah khan ka hmakhalh vek tawh che. Țuan muang hi mi ti ve ziah a he thu-ah kher hi chuan i hmaah ka kal ve tlat! Ka game plan angin in awm ve mai mai" a ti zet chu ka ngei kher mai!

"Maw! Diki khan a tider vek maw?"

"Doctor-i nena in chanchin zawng zawng hi ka hrilh vek alawm. A chhan chu țul lo va i inhambuai vak ka hlauh vang a nia, a hrethiam khawp mai" a mak hle mai ka ti!

Ka țhianpa chetdan hi a makzual ka ti!

Nidangah hetiang hian tulakah mah a khawsa ngai lo. Lawmthu sawitur nge sawi loh tur pawh ka hrethiam tawh lo.

Ropuia chu thuhran, Diki leh zel pawh mawle. Mi ngaizawng tak tak si lo, engtinnge khati khawp khan a thiam theih le. A hlauh te pawh min hlau lo emawni reuh le? Min duh ve deuh emawni zawk le..

Zinga tukțhuan kan han eite chu sawitur a vang kher mai. Ka nu leh pa lah chuan engmah an sawi lem hlei lo va.

Tukțhuan kil lai chu a ve lek chauh a lo la ni. School ka kal tur ka huphurh em em zia kha aw. Miss Diki ka hmu hreh ngawih ngawih a ni.

School ka thlen chuan tu tehvak an lo la thleng lova. Miss Diki pawh a țhutna a la ruak hiai mai. A la zia viau e.

Ka pindan lamah chuan ka lut tlang nghal a, tukkhuma kutsuih meuhvin ka inngaihtuah!

Miss Diki te lo thleng thawm pawh chu ka hre reng. Mahse, thlâ a ti ngam lo zual sauh mai bawk si. Thlan tla hluamin ka țhu tawh.

Chawhma chhung zawng chuan ka pindan chu ka chhuahsan lo a ni ber mai. Diki mawlh chu a ni ka hmuh hreh.

Pindan kawngka kik kauh kauh ri chuan ka ngaihtuahna ata chu min ti harh zawk a, 'lo lut rawh' tiin ka chhawn zui a.

Kan Zirtirtu pakhat hi a lo lut a, "Sir, class IX a mi Lalrinpuia saw'n exercise bu pawh a lo nei mumal lo a ni awm asin mawle. A țhiante ho ka zawt chiang a, an chhungkua an harsa viau a niang. A nu a damlo an tizui bawk sia" a ti a.

"A nih chu mawle, a va'n zia lo ve. Kan enzui a ngai dawn a nih chu. Class Teacher kha i ni em khah IX ah khan?"

"Miss Diki zawk"

"A nih chu, miss chu ka lo sawipui phawt anga a țul leh staff meeting kan nei mai dawn a nia" ka tih sak a.

A awmlai hian miss Diki chu lo lut nghal se a țha phian ang tiin ka koh tir nghal a. Reiloteah Miss Diki pawh chu a lo lut zui ve nghal mai a.

Kan han sawiho fe hnuah chuan Miss Diki kutah, ani lo enzui tur chuan kan dah ta thova. A țul anga school pawisa te pawh naupang exercise bu vel leina tur chu awm thei turah kan han ngai ngawt chu a nia.

An pahnih chuan an inzui chhuak zui mai a, a lawmawm ang reng. Ka thawhuai mai.

Mahse, chu a lo let leh!

"Sir.."

"Eng nge ni?" tihpah chuan ka va melh a. Ngainatawm tak hian a lo nui sen sen reuh a.

"A..Thilpawimawh tak chu a ni lo va.."

"Han sawi phawt la mawle"

"Min hua em?" zawk zawmah chuan leh! Chu zawhna chu keima zawh tur zawk asin mawle.

"Miss, ka haw lo che. Mahse, hrehawm ka ti khawp mai" ka ti a.

"Engngatinge?"

"I chunga ka khawsak dan vang khan"

"Ni lo ve, engmah hrehawm tihna tur a awm hleinem.Thiam lohna i nei miah lo a nia"

"A zahthlak alawm. Mi nikhua lo tak hmuhin min hmu mah la ka dem hauh lovang che"

"A khai em em a, chutiang em em chu ni lo ve a, i hmangaih ber leh i fa hial pawmtu ngei i tawng leh hi ka lawmpui em em che asin" a ti reuh a.

"Lawm tur a ni em ka hrethiam lo kei chu"

"Engngati maw?"

"Țawngkam țha pawhin kan inbe thei hleinem, hun țha hi kan tan a inherchhuak a nih chuan a lawmawm lam a nih ka ring"

"I beidawng hma a nih chu. Bakah khachen kha i awmbo san tawh a, a lungawi lo ve bawk ang chu. Nangpawh ni la i lungawi bik nang. A thinrim pawhin dawh hram hram rawh, a duhtawk inhrikthlak tir la tichuan i hneh a ni mai. Chu chu hmeichhe mizia a nia, i lo pawr ve zel chuan i thunun ngai lo vang. A duhtawk a âng anga chumi i nghah chuan a zo der a ni mai" a ti duah a.

"Engtin pawh awm se thiamthu sawi tur tehchiam pawh ka nei lo. Keima'n ka duhthlannaa kalsan kha ka ni deuh ber a. Ka kalsan hnu khan ka duhzia leh ka lo hmangaihzia ka hrefiah chauh niin ka hria"

"A ni ve bawk ang chu. Engmaw i kalsan chhan ni reng reng?"

"A bul berah chuan kan khawsak phung inthlau lutuk kha a ni ber a. Ani Doctor a nia, kei khatihlai khan Taxi driver kha ka ni ve mai a,  lo innei ta pawh ni ila kan inmil rei vak kha ka ring lo va"

"A va han ho ber mai, hmangaihna i hrethiam lo a nih ber chu" a ti sap a.

"A ni maithei. Bakah, a chhungte khan min hmusit tumhrang bawk sia, kei mi luhlul chi ka lo ni ve bawk nen ka ti hleithei vak lova, chutah ka nu chetsual vangin min lo chah haw a, signal țha lo chhuanlam khan ka be zui ta lo kha a nia.."

"I fa pawh i ngaihsak lo reng reng mai"

"Chumaw ka fa a pai tih pawh ka hre hleinem, ka nu chetsual vanga min lo chah ni khan kan inhmu kha a nia, khami ni kha kan chetsual ni chu a ni. Zanah kei ka haw thut bawk sia, inbiak zuina awm tawh hek lo. Heta an lo chhoh hnuah ka hre ve chauh alawm"

"E he, i fa a pai pawh a hrilh miah lo che maw?"

"Hrilh bik chuang nang"

"A va thei zawk ve a, mahse a mipa zawk i awmdanin a zir lo ve bawk em a nih chu. Keipawh khatianga i tih ang khan min han bosan ve ngat se chuan ka zawng buai bik teuh lo mai" a ti a.

"Ni e, thiamthu sawi tur chu ka nei lo khawp mai" ka ti țha ve mai a.

"Țha taka in inneih theih ngei ka beisei" a ti zui a.

Chhâng ta mai lo chuan ngawireng hian amah chu ka lo en veng veng pek a! "Eng nge kha ti vak a min en a?"

"Ka lawm e, mi fel tak i ni" ka ti ringawt a.

"Mahse, mi felfamkim chu ka ni bik lo va"

"I fel thlawt alawm, lawmthu sawi ka ba nasa"

"Ka sual ve zeuh zeuh țhin asin" a la ti tak deuh deuh a.

"Engtin?"

"I hre duh maw?"

"I sawi duh chuan..."

"Hetiang hian..."tih pah chuan a lo kal phei a, min kuah pah chuan âm zet hian min rawn fawp a!

Rilruah lut tawh mawlh hek lo, mumal lo zet chuan ka chhang let ve mahna le.

Thawk lak ham ham pah chuan min en a, a meng de sawr sawr mai hian ka hria. 'Vawikhat leh chiah, a tawp nan aw..' tih pah chuan ka tukkhumah chuan a dawm sauh sauh a, a hma aia uar mah chuan min han nawr chilh leh pek a!

Mipa thluak na na na chu a chhaw chhawih thei. Thluak tih lêmah..!!(?)

Diki'n min chhuahsan hnu chuan hawlhthep ang suai suai mai alawm maw ka nih le.

Ropuia remruatna hnuaia inngaizawng kan han ni hrim hrim chuan ka nuih a ti za ang reng. Mahse, Marvina te nufa hi lo lang lo sela chuan kan inngaihzawn tho ka van ring si ve.

Ka chhungte chuan ka awmdan chu nguntakin min thlithlai niber hian ka hria. Danglam loh chu ka tum viau, ka thei em phei chu a thlirtu ka nih ve miau loh vangin ka hrethiam chiah lo. 

Zanriah kan han kiltlang pawh nidang kan la phak lo nasa, Marvina lo piangchhuak chuan kan chhungkua chu min sawi hneh hle a ni.

"Hetia nupa pawh ni si lova lo fa te i neih tak si-ah chuan kohhran lama kan in report ve loh te chuan..In innei dawn emaw dawn lo emaw nupa in nih miau si loh avangin kohhran chuan inchungah thununna a lek lo thei dawn lova, zaninah han chho la, kohhranin a thunun tawh em tih te han zawt la, thununna tawk lo hian a lo awm ve reng theih a, engmah a chungah kohhranin hma a lo la la lo a nih chuan a rual law lawin tihdan ngaihtuah ila a țha ang, i lo han zawtfiah dawn nia" tih chu chaw kan ei laia ka pa thuchhuak a ni.

Hnial chi niin ka hre bawk si lo. Hnial lo ngawt dawn ila ka kal duh bawk si lo. Rilrua helhkam nei țun chung chuan sawichhuahna tur ka nei lawi si lo va, a hrehawm viau  a ni.

'Ropuia a awm alawm le' tiin hmatheh tum rilru tak chuan ka chhuak chhova, ani lah țhalai thiltihna lamah a lo chhuak daih bawk si. Hui ham.

Hreh teh mah ila Damdawiin tlang lam pan chuan ka kal lo thei bawk si lo. 

Tawi khawmuang viau mah ila kal ve reng na na na chuan Damdawiin tual chu ka chuang chhuak lo thei si lo. Helai hmun hi a ni beisei bo tawh hnua kan intawn lehna kha.

Quarter lam chu ka'n melh chho țhin a, ka tha a za mawlh lo a ni.

A nu hian a lo awmpui khur mai ang tih te pawh ka hlau hlel love ka ti.

Damdawiin kawta waiting shed-ah chuan ka'n țhu leh vang vang phawt a, tuemaw lo kal hlauh se ka va han ti tehlul em! Mi lah chu an reh țhiap a, thlifim thaw heuh heuh chu ka lam pan awmchhun a nih hmel viau a ni.

'Min lo be țha duh lo ta se engtinnge ka tih ang? A biak pawh min lo be duh lo hial mai thei asin' ka pa bum zawk mai te pawh ka duh rum rum mai ka ti. Mahse, a puitling hna lo viauin ka hre bawk si.

'Ka thi bik em lovang' tiin quarter lam pan chuan ka penchho zui ta a, kawngka ka kik dawn meuh chuan ka zâm bechhe lo chauh a ni.

"Lo lut rawh u" ti chuan min chhang ve ngei mai le. Marvina nu aw chu a ni lo vin ka hria. Kawngkhar ka han hawn chuan inchhungah chuan Nula pakhat hian thleng a lo sil mawlh mawlh a, sitting room-ah chuan Marvina chuan toys a lo khal a.

"Eng nge i duh? Lo lengrawh" thlengsil mek chuan a lo ti a.

"A, ka lo lenglut mai mai" tih pah chuan Marvina awmna lamah chuan ka kal zui nghal a, 'i va fel ve, lo țhu rawh' a rawn ti zui a.

Pindan kawngkhar inhawng thawm chu hriain ka hawi thuai a. Kha, hmana ka Zonunmawii ngei kha a lo chhuak asin!

Mi pawh be ta lem lo chuan choka lamah chuan a phei a, tui a va in niberin ka hria. Marvina chu keiin a toys ka khalhpui thung a, a țawngduh bawk sia, biak a nuam khawp mai.

Fridge kawngkhar ngheng meuh chuan hotunu chuan min thlir reng tih ka hria, val senior khaih, pathlawi ve riang ruang hian ka awmdan ka theihnghilh deuh tlat mai nia mawle.

Kan bula a lo kal phei leh laite chuan thinthiin ka awm lo a ni ber mai. Engthilvak phei chu a thleng lem hlei lo va.

Kan veilam țhutthleng seiah chuan a țhu a, engtak sawi ang maw!?

TV chhuah a tum emaw ka tia, TV awmna lama phei si khan a lo let leh lawi a, "Kha hei hi nizan khan i pa khan a theihnghilh a" tiin Lighter hring hi min rawn pe a. Ka insûm zo lo chu ka nui chhuak țep zawkin ka hria!

Ka pa in zial a zu ngai lo, lighter theihnghilh thu a awm lo tlat alawm! 

Mi biakna tur zawnga a lo inhawng ve viau erawh chu ka tan chuan lawmna luipui luang an sawi teh fo ang mai lah ni chuan.

Lighter pawh chu la ta mai lo chuan ka bula țhu tur chuan mitmeiin ka han hrilh a, ngawireng chuan a țhu ve mai a. Sawichhunzawm tur em em chu a hrebik lo a ni mai thei a lighter ken chu a khal rauh rauh a.

"Ka pa in kohhrana i in report loh te chuan a tia" tiin laklawh angreng zet chuan bul ka han țan a.

"Eng nge chu chu?"

"Fa kan neih vel hi mawle. An phuar țhin ang kha"

"In report kher angai a mi? An lo thununun ve mai a ni law mi?

"A ngai a niang ka pa khan a sawi bawk sia lawm, nang an phuar tawh che a mi?"

"Ka hre lo reng reng, phuar daih tawh ang" te a ti vel mai mai nia mawle. 

"A nih danchhungah i lut leh tawh em? An phuar hnuah che"

"Lut nang, min la phuar lo a niang" te chu a ti leh lawi a.

"I chiang lo emai, i chhungte emaw zawt chiang rawh" ka tih chuan a phone a hmetzui nauh nauh a.

"Nang pawh an la phuar lo che ni lawmi?"

"Kei te chu fa ka nei tih an hre hleinem, hria se chuan thingtlang angah te hi chuan phuar mai awm tak a nia"

"Ka nuin 'an thunun awm che pawh ka hre lo' a ti"

"Kohhran secretary emaw zawh chian tir la, chuti ringawt te chu"

"Kan zawhtir ange" a ti țha ve mai a.

Inngaizawng țantir ang mai chuan kan han inzahthar leh rih a, ka beisei loh dan lutuk a min lo dawngsawng chuan min ti hrilhhai deuh nge maw ni pawh ka hrethiam chiah lo.

Ropuia chuan a lo fah hneh viau a nih te pawh ka ringhlel ta lo ve.

An nula thingpui chhuan pawh nghak hman lo chuan a va chhuang ta vel kha a nia, kal lama thaw dep depa kal ka nih vei nen darkar khat ka țhut tlin meuh chuan țhutthlengseiah chuan ka tluzâl lo chauh tawh a ni.

Choka lamah an lo va inhrilh ru nge ni an nula chu a lo phei nal nal a, "Marvina pa maw i nih?" tih leh a kut mi pek chu a rual a, kan han inchibai leh ang nawk nawk a. 'In in ang ka ti reng a ni' a la ti zui a.

Marvina muthnu fe-ah ka haw chauh, hehe!!

Daidanna bang sutchima a'n awm takah chuan Marvina awimu tur chuan ka chho zantin a ni ber mai! Nau chauh lo pawh kan awimu mahna le, ka sawi duh bik chiah lo.

Chutiang reng reng chuan ka hmanhlel chho ta kha a ni a, Marvina pawh kan inah a riak lo chauh a ni ta. Ka nuin a awm hman bawk nen kan la thla reng mai a, a dah leh lam lah ka hman thei phian bawk si!

Chaw pawh an lo eithlak tâk zeuh zeuh kha.

Chutiang kan nih takah chuan ka nu leh pa te chuan palai dang pawh tir duh lovin anmahni ngei Marvina pi leh pute be tur chuan Aizawl lam panin an thawk chhuak ta kha a ni a, a hun leh ni nen lam an rawn hawnfel nghal vek kha mawle.

"Ka lo hmangaih hman che a nih ka ring. Mahse, harsatna chu ka siam lo vang che. Ka thiam loh a ni, U Ropuia khan min hrilh chiang viau a sin mawle" tih sap pah chuan a inluah lam pan chuan thimthamah chuan a kal thla ri thlak thlak a.

Ka ngaihtuah zui duh lo. Marvina nu tan pasal țha tak nih ka duh ber. Chutiang tur chuan naktip lawkah thutiam kan la dawn a nih kha.

Mo thlah tur te pawh an lo ngîr khup khup tawh laia 'a biang a no zawk' tih mai maia ka lo thlêk kawi si chuan a dik nang mawle.

Khami tukzing khan kan phe suau suau mai kha a nia, ka nu erawh chu tukverh thlanglamah, pawnlam hawiin mittui a lo hru fap fap thung a. Ni, ka u kha... Keipawh hian ka ngai asin. Ka țhian țha ber a nih țhin kha mawle!

Vawiin hian kan kiangah awm se, nuam a ti dawn asin, U kan theihnghilh ngai lo che a nia aw, van ațang khan min lo thlir ang che aw..i vahpa te hi i lawm ve awm si a....

"Kal a hun e, kan tlai mah mah" tiin tu emaw hi a rawn au lauh a, hmanhmawh takin Marvina nu nen damchhunga thutiam la tur chuan ka penchhuak ta a..

Dar a rîk val val lai chuan Marvina chu Biak in ațang chuan ka lam panin a lo tlan dat dat a....

               A TAWP TA....

©________[ɐʞızɹɐp]________®