Di NGAIHZUALI

___________           __________

          [Di NGAIHZUALI]

   [ *P.C Malsawmzuala* ]

       

    28.9.2017 - 24.11.2017

                 Chapter  

                       - I -

                   Chapter - 1

Ruah fang hrawl zet mai chuan kan school chung rangva chu a deng ri phuar phuar a, chhum dum inlet but but mai te chuan hrilh hranpa ngai lovin kan khua chuan thawhrip a tum hle a ni tih min hriattir a, pindan lehlama tukverh inhlap ri țhuai chu darthlalang tlakeh riin chhunzawm nghal zatin, unau hmelhai hun ang em chuan thim lo mahse kan dur deuh khup mai nia mawle.

Ni, chutiang hunah chuan Zirlai 12-na keu a sawt lo va, chhiar turin kan mit a vâr fâl  a ni hek lo. Kan zirtirtupa lah chu office lam panin meikawhin a tlanphei kha a nia. A kalsan tak a nupui fanau te ni lo, zirlai naupang mai te kha chu kan hawina lam a pianga kan râk nuaih nuaih mai loh nakah!

Chawhnu ban hun ruai tawhah chutianga ruahthimpui a'n thawk mauh mai chu a ngeitu tan chuan ngeiawm tak tur hi a ni. Keini lahin nuam kan ti pherh hrep a, zirlai zir theih loh chu nge nuam kan tih anga ruahsur vang hrim hrim tih pawh kan hrechuang tawp nang. Kan sapatal chiam ringawt mai a ni.

Duhzuala te ho chu veranda, ruahin a thehhuh nâlah chuan pheikhawk hnuai hek thei ang ber turin an tleng leh puat puat tawh a, Ramzauva te lah hmeichhe hnute deh loh hlauvin an hman hlel a, hmatiam neiin hmeichhe inhup țawk țawk tawh pawh an țham țe leh tak tuarh tuarh saw le.

Keini tlar pawh kan bang bik chuang lo, 'musu musu' hla lar lai kha a nia, vaikhuang ben dan niawm takin -

'Musu Musu Hasi, Deu Malai Lai

Musu Musu Hasi Deu

Zara Muskura De, Muskura De

Zara Muskura De, Aye Khushi' tih lai ringawt chu a kelrâwl a kelrâwlin dawhkan kan chumchilh ve nasa mai!

Ruahsur chu tamin ri tlawrh tlawrh mahse ban dâr ri chu tumahin kan hai chuang hauh lo. A haw theih dawn loh tih hre reng chungin bag an la a, an chhuak sup sup tho.

Ruahsur thut a chin vang chuan ka school ipte-ah chuan nihliap dum, ka pain a lo zin hnuhnunbera min leisak ka roh em em ngei kha ka dah lawk ve thlap reng a. Mahse, a bawhawka a sur vang chuan nihliap thleh tet theih lek chuan min hul zo chuangin ka ring lo.

Chuti chung chuan min chhuahsan tak vek vangin ka ipte chu lain ka chhuak ve ta tho kha a nia, veranda velah chuan kan in pang-aw-inzial tup tup a ni ber mai e. A țhen an lo in um kawi zuai zuai mai bawk a, phûr fe a ruahdo haw ta te pawh an awm nawk.

Ruah tam zualpui chu a ziaawm hret hret a, do châk an tam nge ni kan tlem sawt viau mai a, a nihliap keng ber pawh chu kilkhatah ka la ding sawi ve reng a, haw chu ka duh ve tho. Mahse, ka pheikhawk leh mawza a huh ang a, ka kekawr a huh tel bawk chuan a thlakna tur ka neih loh vangin haw thei pawh ka la ni ve lo.

Ka nihliap ah chu ka phawrchhuak a, 'ka kal dawn nge dawn lo' tih chu ka han ngaihtuah leh rih a. Mawng chu a za ve deuh tawh; a chhan chu a tam zawk an haw tawh bawk sia, a hnukhawi hi kan tam lo riau. Bakah, mahni inlum ațanga school kai ka nih ve loh vangin tlai deuh taka han thlen chu a nuam fahran lo. Engtin phei chuan min ti hauh lo ang a.

Ruah a tlak tlem tâk deuh vang chuan nihliap chu kap parhin gate lam pan chuan ka kal ta a, gate bula Saron buk hnuaiah chuan High School lama mi niawm tak hi hmanhmawh hmel deuh hian a lo awm a, ruah chu a tam leh tam loh a kut te chuan a han dawh vel a, School building ațanga hmanhmawha tlanchhuak, rin aia lo tla tam leh siin chu saron buk hnuai chu a belhtir a nih ngei ka ring.

Kal pelh mai ka tum zet a, tumah ka kalpui chuang lo va tiin ka au leh ta zawk a.

"Khawilamah nge i haw dawn?"

"Bazar lamah"

"Lo kal rawh, keipawh ka haw dawn alawm" ka tih chuan lawm hmel takin a lo kal zui  ve nghal mai a. "Khawi vengah nge in awm a?" tiin ka zawt zui nghal zat a. An awmna veng a sawi chuan ka kal thleng dawn lo tih ka hre nghal. Ruah a la sur reng chuan engtinnge ni ta ang le? 'Kal mai rawh tikhan' han tih ngawt chu a ni thei si lova. Nihliap han hawntir dawn ngawt lahin kan inhre em em bawk si lo va!

Muangchangin kan kal dun a, ruah lah chu a bang mai duh bawk si lo. A zahzum hmel reuh kher mai, biak pawhin a rul tawk bak mi han chhanbelhna a nei ngai lo. A bag ah-na hrui chu dawmin a kawm a kawm ringawt mai hian ka hria.

Ruah a sur bawk si, kan vawikhat inhriatna a la ni zui bawk nen han sawi mai tur ka haihchham deuh tlat. Mahse, ngawirenga kaldun chu a nuam chuang der lo nia mawle.

A hming te ka zawt a, a pawl zat te. A subject har tih zawng thleng chuan ka zawt chho ta a, chutia biak reng na na na chuan mi a chhang ve zel lo thei lova, kawngtluan chuan kan ti ti a ni ta reng mai.

Kan in peng kan thlen dawnah pawh chuan ruah chu a la han chuang lo va, han khum haw tir loh chi ni nghal hek lo 'naktukah i lo keng leh mai dawn nia' tiin kan in mangțha zui ta kha a nia amah Lalngaihzuali, pawlsawm zirlai nen kha.

Hmanhmawh zetin kan inlam pan chuan ka tlan thlak thlak a, ka hnawm deuh chuap hman tho mai. Ka ní ei lo rel mek chuan "Nihliap i keng pek nange?" a lo ti a. "Keng e, țhianten an hawh tlang, a la tla reng bawk sia" tiin pindan lamah chuan inthlak turin ka luhsan nghal a.

Thingtlang mawngping ațanga khawpuia zirna sang zawk zir tura kal ka ni a, kan khua hi Aizawl ațanga hla tak phei chu a ni lem lova. Mahse, kawngpui tlangdunga awm kan nih lem loh vang hian changkanna lam kawngah hian kan hnufum rei hle a, kan khaw tiatpui, inding zat ațanga chhiara kan zawlpui te lakah chuan hniam tak kan la ni.

Kum engemaw ti ațang khan MLA pakhat hmalaknain Higher Secondary School te chu kan han nei ve ta a, chu chuan zirna lamah chuan mi a chawikang chho ve zel a, rualawhna châng te pawh kan hre chho ve viau tawh.

Hmasawnna dang erawh hmuh tur a tam lo. Kan khawthlen hma chiah khua thlengin black top a ni a, chu pawh enkawl zui chu sawi loh insawh tina zual tur tawk velin a khuar chek chuk tawh a, a chhe helna lama tlanliam mai pawh hlauhthawnawm tak a ni thei ang.

Chu chu keini aia khaw changkang zawk te chan a ni a, chu khua aia piaha awm kan khaw kawng phei chuan Alkatra farkhat far pawh hi a la hlawh lo hrim hrim tawp! A khawilam hawi zawng mah hian sawrkar hian kan khaw kawng tan Alkatra sanction order te hi a la chhuah ve lo nge, tute in bang velah emaw an vawm bei zawk tih pawh hriat va ni suh.

Khaw intodelh leh thawkzo tak khua kan nih vang erawh chuan harsatna liantham han sawi tur em em pawh kan nei chuang lo. Lirthei ni se kawng a chhiat teh reng nen an intihhmuh emaw tih mai turin an nei fer fur a, 'an mamawh emaw ni le' ti a kan sawi zui tak pawh an kat nuk, fûr lai erawh chuan driver huaisen deuh chu an 'luck' tlat zel! Chu chuan kan khaw kawng dinhmun chu a hril mai awm e.

Ka pa hi kan khuaah chuan MA pass hmasa ber pawl a ni a,  an sawi hmangin MA a zirlaia a siam ka ni awm asin mawle!

Ka pa hna vangin ka pi leh pute bulah keichu ka awm rawt a, insawnkual vel kha ka zirnain a tawrh an hlauh vanga zui ve zel ta lo ka ni. Chutianga seilian ka nih vang chuan ka pi leh pu te chuan kawng engkimah ka tan nu leh pa nih an fawmkem hneh em em a, midang han chhawnchhaih tur vak an awm loh vang chuan ngaihpawimawh leh duat rawn ka hlawh viau a ni.

Pawlkua ka nihlaiin ka nî te nupa, Aizawla lama awm te an lo zin a, anni hian fa an neih theih loh vangin an kianga awma lehkhazir tur chuan tih tak zet hian min sawm a, chhungkua an han inrawn khawm hnuah leh keipawh min rawn thlap hnuah chuan pawlsawm ațanga Aizawla zirțan tur chuan ruahmanna kan siam ta a nih kha.

Inah ka lal si, țhenrual ngaina mi ka nih bawk si vangin lehlam zawng taka ngaihtuah chuan Aizawl lama han awmbo daih chu a chakawm loh hi ka ti khawp a. Mahse, zirna leh ka nîten min mamawh piah lamah 'tihtur' pawimawh tak mai ka nei a ni. Chumi hlenchhuak tur chuan a ni thutlukna awlai lo tak mai kha ka siam ve tak.

Tunah chuan kum thum dawn an hnenah chuan ka lo khawsa ve ta reng mai a, fa pawh nei se kei aihian an duat chuang lovang tih tur khawpin min enkawl a, ka nî aimahin Pa Hminga hi ka tan a la fel zawk mah emawni. Ka nî hi chu a thin hi a chhe ve reuh a, rilru chhia phei zawng a ni law.

Ka uniform te tlangbana ka zar fel hnu chuan ka han inbual leh rih a, inchhungah hi chuan ka che ve lutuk hran lo. Ka fapa mal awm a ni ber mai. Chet ve ka tum pawhin 'lehkha zir rawh' min ti zel bawk sia. Mahse, min duat poh leh min hringtu ni lo te kiangah zawng inthlahrun a na mai a ni. 

Ka mamawh tura an rin chu min tihsak mai zel a, chutihlaiin ka mamawh tak tak erawh chu inthlahrunna vangin ka sawi ngam lo fo. Khualrala ka pi leh pute hnenah zawk thlen chang te pawh ka nei hial a ni.

Pawl sawmpahnih zirlai ka nih vang chuan nidang zawng aiin hunawl min siamsak  hnem zual a, chaw eithleng ka seng thleng chuan an rem ti ta lova. Awmpui, lehlânga kal tur te an lak phah hial a, a zia lo hi ka ti khawp a! Mahse, ka nîin thildang a khawih belh theih phaha anmahni tan tak pawh a țhat zawkna chen chu a awm ve tho mai. Pa Hminga lah nilengin office-ah a kal bo țhin bawk si.

In leh lo nghet an nei a, an (kan) in pawh mizopa chhiar chuan chhawngthum lai a ni ve. Pa Hminga hi eng office berah emawni thunei pawl tak a ni bawk a, kan khawsak chu a harsa hran lo. Ka nî lah hian a phak tawk tawkin eng engemawni hi ka zuar e hi a tia, a ti mi phian bawk sia, keini pathum lek chuan ka nî lakluh ngawt pawh chu kan kham hial awm e.

A tuka school ka thlen chuan gate bulah hian Zualtei chuan min lo nghak ran mai hi a lo ni a, 'ka lawm lutuk aw..' tiin nui sen sen chung hian a nihliap hawh chu min pe a, 'ka lawm e keipawh' ka tih chuan an inher a, an kal zui chu a ni nghal mai. Keipawh kan class room lam pan chuan ka inchhep chho zui ve nghal a. Țan dar a rik țep vang chuan zun hman hram tumin ka hmanhmawh chho ve viau a ni.

A mak khawp nia kan nun hi. 'Mi harhvang tak a ni'  tiin miin ka chanchin an sawi ka ring lem lo va, ngurchuai an tih lam hi ka pâwl mah zawkin ka hria. Bula awm te tan hahthlak khawpa ngawi chuah chuah ringawt phei chu ka ni lem lo va, ka țawng ve zawk zawk lo a nih ber chu.

Chutiang mi ka nih vang chuan hmeichhe lam hi ka ngaihven ve chiam lo, bakah zirlai ka nih vangin ka mamawh ber pawhin ka hre lem lo. Khawi khawia mi emaw te chu an hriat lem lova han 'star' te pawh ka nei ve alawm. Mahse, an hriat loh bawkin a thamral ve leh mai țhin.

Mahse, 'duhzawng' te, 'ngaihzawng' te hi kan thu leh kan duh hun huna kan neih theih a lo ni awzawng lo mai tih hi ka va han hrechiang ta si em! Han chhiar zel phawt mai teh.

Kan school ațanga chhuah chhoh chiahah hian dawr a awm a, tlaikhat ka school bang chu chu dawrah chuan vur hi ka lei pek a, ka leichhan pawh class room leh school vel kan tifai a, ka hah deuh bawk nen thlansa tihrehna atan lei mai ka ni. Pawisa nawi an neih loh vang chuan pakhat chauh lei tum khan pahnih lai ka humchhuak ta ringawt kha a nia. Dawrkaiho hi an ngeiawm țhin mange aw.

Chutia ka chhuak chiah tihah chuan Step-ah chuan Zualtei chu lum ti tih hriat reng hian biangtai tek hian a lo lang chho ve hlawl mai a, lum ti awm reng pawh a ni uniform kawrlum a la ha zui bawk a! Kawrlum ha lo pawhin lum kan ti a nia.

Tum lawk ang hrim chuan ka vur ken chu "Kha.." ka'n lo ti zui nghal ngawt a.

"Midang ta tur te hi a lo ni ange?" tiin lak a'n tum lo zet a. Mahse, ka hnawn tak zel vang leh midang hmuh tur an awm loh vang te pawh chu a niang a la ve ta hram a. Vur sen kan eihaw dun ta a nih chu.

Chumi ni ațang chuan kan hawrual thei ta riau mai pek a! Kan ban hmasak zawk pawh hian kan haw rual leh țhin lai hi a ni mak țhin chu. Ka tum lui pawh hian ka hre chuang bawk si lova, remchang a in nangfuh ve mai emawni zawk le?

Kan ban hun hi a inrual thlap thlap a niang kan hawrual thei emai!!

Chutiang chuan inhuatna awm hauh lovin kâr kan tluan ta fo mai a. Ka ngaizawng a ni ang tih pawh ka la ring thiam chuang lo. A tur rengah ka ngai deuh nge, țhian țha enin ka en zawk ni?

Nikhat chu kan bang rual ta hauh lo mai a, High School section lam an bang vek tawh bawk si, khawilaiah emaw a lo tawikhawmuan ringin ka han hawikual vel a. Mahse, mahni tukkhum en tum ang chauh a ni. A kal liam tur tak ngial pawh hmuh tur a awm lo.

Kawng tluan mai chuan umphâk tumin ka hmanhlel a, ka hnunglamah a awm em tih thlêk ka țhulh a ni hek lo. Kan in thlengin ka um tak hial kha!

Chuta țang chuan a ni Zualtei chu ka ngaizawng a ni tih ka inhriat thiam ve tak chauh ni.

'Engngatinge vawiin khan min lo hawsan le?' tih ringawt chu lehkhazir pawh rilrua pe thei lo hialin ka ngaihtuah a, a chhanna lah chu ka ngaihtuah chhuak thei azeng pawh a ni lo. Rinthu ka valh kual vak vak ringawt mai a ni.

Lehkha zir rilruah a awm chuang lo va tiin mut lam ka hma a, mutthilh chu a hnai lo mai, a hma aimahin ka ngaihtuah nasa zawk hialin ka hria.

'Min duh ve a ngem le?' tih ngaihtuahna chu chhangtu awm lovin ka muthilh pui ta a ni awm e.

A tuka school ka kal tur chu ka phur kher mai. 'Ka duh thu hi ka hrilh pawp ang mawle' tih ngaihtuah rauh rauh chung chuan school lam chu ka pan a, tlai ban hun ka nghakhlel teh asin.

Chhunah pawh chuan a țhiante nen an kal vel chu ka hmu zeuh zeuh, a liam tur te chu ka thlir zui tak țawk țawk a! A mak hle mai ka ti, hetiang hian ka awm ang tih pawh ka ring phak lo. Ngaihzawng neih hun ti lo ber hi ka buai der chu a nih tak hi mawle.

Chawhnuah chuan period hnuhnung ber chu kan neih loh vangin ka duh chuan ka hawhma thei reng mai a. Mahse, an la bang kim si lo. Chu chuan ka haw tur chu min khâm tlat! Kawtzawl piah maia canteen-ah te chuan ka lo va tawikhawmuang vel a, sana ka bih zing dup ringawt mai a ni.

Mawngvawmba ang maia ka vei tuak sek hnuah chuan an lo bang ve ta hram alawm. Canteen ațang chuan a ruk deuh hian ka en reng a, ka ngaihbel nge ni Zualtei chu zawn nei niawm tak hian a hawi kual deuh hian ka hre tlat pek a! Min zawng a ni ngei ngei ang mawle.

Kawngkaah chuan ka lo va dinglang hram pek a, min hmuh ve leh chuan a țhiante mangțhain kan hawkawng lamah chuan amahin a chho ta hnak hnak a. Ka la ngaihbel tluang zel e.

Muangchang lovin ka um chho nghal thuai a, ka sawi dan tur te chu ka ngaihtuah chho nap nap a. Ri mang lo te chuan ka han sawi chhin vel a. Sawidan turah ringawt te chuan ka buai mai dawn alawm le.

Ka hnaih telh telh a, ka zam tial tial thung. Ka thlan te chu a tla deuh hian ka hre hial a, ka hmai te chu ka romol chuan ka han hru thul!

Step kawi laiah chuan min lo nghak tih hriat reng hian a lo ding a. 'Khi, a lo nghak che a nia, a duh ve che tihna, zam suh' tiin ka rilru chuan ka infuih chho mawlh mawlh a. Mahse, a fuihtu chu keimah tho ka nih vangin ka chim chin chu a san phah chuang hlei lova.

"I haw daih tawh ka ring a..?" a tih chuan chhan ngaihna ka'n hre tlat lo pek a nih chu mawle! Ka hmai chu ka romol ken chuan ka hru mawlh mawlh ringawt a. Ka sa deuh hut hut emawni hial le!?

"Nia, ka..ka la haw lo mai mai" țet țut chuan leh! A va zei lo theih ngai ve. Ka zam bechhe der a ni awm asin.

"Engngatinge thak i kai a mi? I beng te kha a sen vur mai" a la ti zui tak deuh deuhah! 

"Aih, nichinah Lalruata'n ka lu a tuai vak a, chuvang chu niang" te ka ti kual ta vel a.

Muangchangin step-ah chuan kan chho dun a, han sawi ka tum lah chuan hnawhtu awm ang mai hian ka țawngchhuak zo der lova, ani lah chu ka hmaah kalin a ti ti mawlh mawlh mai bawk si. Ka awmdan ațang te hian a hrethiam mai lo emawni le!

Step kan chhuah chhoh dawn vel lai tak khian ka tiding anga ka sawi ang.

Ka kut te chu humruhin ka han nuai vel a, awmzia nei tak mawle. Kan hnaih chho hret hret a, kan thleng tak ngial dawn ta, ka huaisenna zawng zawng sawmkhawma auhdin ka tum lai tak chuan amah chu a lo hawi let ta thut mai a, chuti teh thut tur chuan ka inring leh  bawk si lo.

"U Mes, vur kha lei leh ila" a ti a. 

"I ei leh duh a mi? Lei ila"

"Umh, a tui reuh ka ti. Ka lo 'treat' ve thung ang che" a nui sêng a, a va duhawm reuh tak. Hnial pawh tum lo chuan ka lo en ringawt a.

Amah zawk chu vur lei tur chuan a lut zui nghal mai a, ka luhpui ve lem hlei lova. 

Ka țhiante ho hian Mes-a min tih vek vang hian ani pawhin midang min kohna chu a chhawm ve zel aniang 'Mes' tiin min koh ve tlat a nih kha. Ka hming a lamrik vawikhatna. MS ti a lam tur kha lam awlsam leh a tawi zawnga lamin 'Mes' ti ta mai an ni. Sâp hming emaw a ni hran lo. Malsawma tih lam awlsam zawng a ni deuh mai e.

Vur keng țat țat chung chuan a lo chhuak leh mai a. A vur ken aimaha ka ngaihtuahna luahtu zawk chu ka thilsawi tum hun ka bawhpelh kha a ni. Mahse, engemaw chen kan la kal dun dawn thova, hun ala awm turah ngai mai ang.

"Nimin kha i chawl a mi a?" ka ti zui a.

"Chawl lo ve, tlaiah khan practical ziahna tur bazara lei kan ngai a, ka țhiannu nen kan kal dun a" a ti ve mai a. 'Ka lo nghak hman ta lo che a' pawh a ti lo!

"Ban khan ka hmu si lo che a, i kal lo a niang ka ti ve ringawt a"

"Chu min lo zawng vak lo maw!?" nuichung chuan a la ti zuiah!

"Zawng hran lo ve, chak deuhin ka haw ta mai" ka tih chuan ka zei loh zia bawk a lang leh ta. 'Zawng e' te han ti ila thilsawi tur a inkahpukchaw chho zuih mai tur hi a nia. Mahse, ka sawi zo vek tawh bawk si.

"Hmanni a mi ang kha a ni miah lo an vur hi, a dang daih tiraw?" a rawn ti daih a.

"Ka lo hre vak hleinem, ka eitui viau tho asin, a leitu zir a niang" te ka'n tih ve tak luam kha.

"A in ang lo, a hma a mi kha chu bawnghnute rimnam deuh kha nia, tun a mi hi chu a rim hi engnge pawh ka hre lo e a. Tui lo chu a ni chuang lova"

Sawlaia electric ban saw kan thlen hun hunah ka sawi tawh tak tak ang mawle.

A titi chhân zauh zauh pah chuan ka sawi dan tur chu ka ngaihtuah țha leh a, ngaihzawng te lo nei ta se, min duh lo ta se a zahthlak tur zia chu, kan hawdun thei tawh awm bawk si lo, inhmuh ringawt pawh a hrehawm tawh dawn a nia tih vel ringawt chu ka ngaihtuah a.

A ding dat a, "A mak vung vung e, engnge i ngaihtuah a, ka sawi pawh kha i hre miah nange?" tiin min rawn thlêk a.

Enge a sawi reng reng ka lo hre hleinem mawle. A mak țhin mange aw.

"Hria e, ka ngaithla reng alawm"

"A nih enge ka sawi chu?" a tih chuan lai zet hian ka nui ta ringawt a.

"I hriat miah loh kha aw, i chiang lo tlat nang hi Psychiatrist panpui i ngai a nih hi" amah pawh chu a nui ve tho mai. 

"Ka hre reng alawm, ka chhan ve char char che kha aw" 

"Ka sawi leh i thilsawi kha a inmil lo em alawm, Sir Rk-a chanchin ka sawi ve em em a, 'a zahthlak awm e' te i lo tia!" 

"Haha...i hriatsual a niang"

"Ka va'n hriatsual lo chiang tak, i lo ti chiang emai a"

"Chutiang ka sawi pawh ka hre lo"

Chutia kan ti ti mawlh mawlh lai chuan ka hmun tiam thirban dinna pawh chu kan lo pel leh fe tawh a, a mak e. Engtinnge ka tih ang le? Kan in pengah thih leh thih!

Engemaw ho deuh deuh sawi chuan kan ti ti phei zel a, helhkam nei ru țeuh chung chuan thilsawi pawh a tui thei lo. Ani lah chu a dan pangai tein a awm reng mai bawk si. Keilah engto nei runin.

Ka penna tur kan han thleng ta cheng a, reitak nghak ta chu han ti ve pawp thei tawh awm hi ka nih nen, engmah chu ka hlenchhuak zo ta bawk si lo. Inlam pana ka kal te chu nep hi ka va han inti tak em!

Khatianga hunțha neichung pawha ka sawi ngam lo a nih chuan engtinnge ni chuang ang? Mahni hma pawh haikaw thei lo mipa han nih ngawt chu a hrehawm ka ti. Mahse, a hunlai kha chuan ka ngam ngang bawk si lova!

Engtinnge hma ka lak tak ang? 

Keimaha hma la tur chuan ka hlawhchham let der mai kha a nia. Mahse, midang han inrawlhna tur niin ka hre bawk si lo. Bakah, kan pahnih inkar sawi tur khawpa min nel dun tumah an awm bawk si lo.

A tuka hmalak dan tur hrang hrang zam nuaih chung chuan ka muhil ta a..

       

                 Chapter  

                       - II -

In ațanga ka chhuak hlim ka phur tehreng nen school ka hnaih tial tial a, chhuanlam tur ka ngah tawlh tawlh mai ka ti. Nitin inhmuin school khata kaltlang kan ni bawk si, min lo duh loh chuan a hrehawm ti zawk tur chu keimah hi ka ni asin. 

Ni lo, hei chu dawih vang mai mai a ni.

A bulțan ber hi a ni ka buaina chu. 

Țhian te tuemaw han sawi hawng zeuh tur awm sela aw, a bak chu ka chhunzawm ve ngam tur a nia. Min lo duh ta lo a nih pawhin chhuanlam ka siam thiam ve mai tur, keimaha ka sawi pawp chuan a sawhkhawk a awm palhin insawifihlim leh dan tur a vang dawn bawk si. Țhian bul; min han zui hnai deuh, thuruk han hrilh mai ngam tur ka nei bawk si lo.

Ka thil sawi tur chu ka va han pamțul zing tak em!

Vawikhat chu home work kan tih loh vang hian min hrem alawm le. Min hrem dan ber kher lah kha na hauh si lovah chuan hrehawm veng veng tak a ni. Higher section lam class room-ah min luhkual tir se chuan a zia tak a awm a. High School Section lamah zawk khan 'Home work ka tih loh vangin min hrem a' tih ringawt hi class room tinah chuan kan han sawikual teh reng a nih kha!

A hnuhnung bera class X section 'A' room-a kan lut tur zet kha chu thlanfimin min bual hialin ka hria. Ka hnungah hmeichhe pakhat leh mipa pahnih an awm bawk si. Class dangah anni'n hma an hruai vek tawh a, kei ka hun a thleng ve tawh, țan vak hleihtheih pawh a ni lo. 

Kan class room kawt ațang chuan min hremtu, kan zirtirtu te zinga tawhkhirh leh mi hremdan hre maksak thei ber mai chuan min thlir reng mai bawk a. Ka hnunglama mi ho lah chuan min lo tur sek bawk nen tlan haw liah liah mai ka va han chak tehlul ve mawle!

Kawngkaah chuan ka va dâk dêk dêk a, zirtirtupa chawp chuan phawk fe hian min lo en țhap mai leh nghal a. Hm, ka thi hman em lovang a!

"May we comin Sir?"

"Comin, engnge?" a mitmeng chu a chimawm kher mai. Mi nuihsawh hmel te pawh a puin ka hria.

"Umh... Home work kan ti lova, Madam in 'class room tinah home work in tih loh thu sawikual rawh u' a tia" ka hnungah chuan ka țhianteho chu an lo intlar ve khap khap bawk a. Zirlaiho chu an lo nui deuh țhat țhatin ka hria, tumah pawh ka hmu lo! An lam ka hawi ngam lo a ni ber zawk ang chu.

"Engngatinge home work chu in tih mai loh?"

"Ka lo theihnghilh palh a.."

"School kal i theihnghilh leh chuang bawk si lo, nang engngatinge i tih loh?" tiin ka hnung a mi te pawh chu a zawt diat diat a. Chhuanlam fahrah te te chu kan pai ve țheuh. 

Naupang lam hawi chuan min dintlar tir a, 'Baa Baa Black sheep' min han sak tir teh reng a nih kha! Ka khu ral daih lo kha mak ka ti hial zawkin ka hria. Ka sen awp awp lo a nih vêk chuan ka duk tlukin ka ring a ni. A zahthlak tih hian a zahthlak zia a sawifiah zo lo!

Kan room chu tlan hlirin kan thleng chho țhak! Tlan rawh u an ti pawh a ni chuang der si lova, awmngaihna kan hre lo a ni ber mai.

Kan class room kan thlen chuan keimah tak chuan hrehawm ka ti tawh mang lo zawk. A chhan chu engdang vang ni lovin haw kawng ka huphurh em vang a ni!

Class ațangin ka chhuak lo tawp dawn emawni le, an haw hnuah chhuak chauh ta ila a țha mai angem? Mahse, engtikah emaw inhmuh hun kan nei tho dawn a, zah thar leh hnuhnawh aichuan a sarhu lai hian tawn tlang pawp law law ila a țha zawkin ka ring leh deuh. 

Mahse, ka zak dawn e...

Engemaw țul neiin lo haw hma leh daih se ka va ti teh lul ve, hetiang a nih te chuan insawi luh a har dawn riau hian ka hria. 

Loh theih lovin ban dar chu a lo ri ta miau mai si. Țhian te an chhuah vek hnuah chuan ui eiru ang maiin a hnukhawiah ka chhuak ve a, a engamah hma chuan ka'n hawichhuak ngam lo ve nghal ringawt a!

Gate ka chhuahsan lai te chuan ka hawichhuak em em hran lo, han kal chak deuh vut vut chu niin ka hre bawk si lo. Lai zet chuan ka kal chho zui a, min lo nghak lo a niang, a lawmawm teh hlauh mange. Kal nal nal ila a ni mai alawm.

Ngawireng chuan ka kal chho nal nal a, dawr awmna lai chhuah chhoh dawnah chuan thlanglam hawi meuh hian a lo ding veng veng mai pek a! A va han țul lo tak e aw. Lo haw tlang ve mai tur asin mawle.

Vûr te pawh lei leh ila a țha ang, zah te pawh a ti reh deuh mai thei asin tih te chu ka ngaihtuah chho ta mai mai a, a bul thlen chu ka nghahhlelh loh țum ber a ni hial awm e. A lam pawh chu ka hawi chho ngam meuh lo.

"Tuna lo kal chho mek hi celeb zaithiam a ni a, induhna leh inchhuanna nei miah lova keini tehlulin kan kawmpha ve hi a lawmawm hle a ni" a la ti zuiah! Ka kalpel fua dawn emawni le, em em a na.

"I haw daih tawh turah ka lo ngai a?" pangai tak chuan ka ti zui ve mai a.

"Eh, ka lo nghak che, zaithiam lar bula haw te pawh kan chak ve alawm" nui var var chung chuan a ti a.

"I va han chimawm tak e aw, khatia intih kher, a zahthlak teh a nia aw"

"A zahthlak loh pawh ka ti chuang lova, special item te min lo neihsaka a lawmawm kan ti khawp mai"

"Lalngaihzual... nghal viau suh aw. Vur pawh ka treat ve lovang che, ka ei tur chauh ka lei ang"

"A chi nang, mahni chauha ei te chu tui pawh i ti lovang" a'n ti ngeiah!

"Ka kâ i hup te pawh a ngai a ni mai alawm. Ka eichak tawh a nia lei vat teh" a ti zui zat a. Hnial pawh ka hnial zui peih lo,  dawrah chuan ka luhsan nghal a, ka lei kep lo tak tak dawn emawni le!

"Yes, a tui chi.." a lo la ti ta lâiah!

"Tikhan ei la, ngawirengin" ka tih chuan a nuih a za kher mai.

Ruah a hmî seng seng a, ngaihmawh tham erawh a ni lo thung. Vur ei mial mial chung chuan kan kal zel a, nuam si hrehawm si a ni ber e.

"U Mes, nihliap chu... Ruah sûr te hi i hre ve lo emawni le?" a tih chuan ka ngaihtuahna bing tak ațang chuan kaihharhin ka awm chauh! Ruah chu a lo tla tam deuh tawh niin, nihliap kan khum emaw, mi bathlar vela kan ding emaw a nih loh chuan thui kan thlen hmain kan huh hman ngei ang le.

Ngaihtuah chiang manghlei lo chuan 'ka keng lo' ka'n ti ngawt a. "Chawl lawk mai ang i ken loh chuan kan huh takngial dawn" a ti a, mi garage-ah chuan kan lut dun a, keilah pek chu ngaihtuah mumal nei mang si lo hian ka ngawi leh vung vung tawh. Zei loh theih bawk sia maw!

Dithlifarfêm te han ti ngawt ila, a ni lo deuhvin ka hre bawk sia, Rangva thlifarfem kan ti mai dawn mi niang! Inchung rangva hmawr ațanga ruahtui lo tla chu a kut chuan a dawh a, a pen per chhak chhak a, kei a hnungah ngawirengin ka ding thung.

"Khati khân awm vung vung suh" tiin min rawn pen per khum a, phu deuh zuk chung chuan ka melh zawk a, duhawm tak chuan a nui sen sen a.

"Zualte.."

"Umh.." engnge tih melh chuan min zui a. Chutia ngaithla tura a han insiam rem meuh chuan ka buai leh lawi a.

"Nihliap chu ka keng leh si.." ka sawi tum loh zawk a ni ka sawi hi. Amah lah chuan mak a tih hmel bawk sia, lawm hmel pawh a pu lo, a âng deuh phiau zawk nimahin ka hria.

"Nihliap maw..!?" a awki chu; a beisei loh tak chhanna a dawng nge, ka ngaihbel zawk le? A zuai deuh tlatin ka hria.

"Umh, ka dah lo emaw ka tia.." ka tizui ve mai a, 'la chhuak la, kal ila' pawh a ti chuang bik hlei lova.

Ngawireng chuan ka phawrh sat sat a, ka kap parh lai chuan ka bag zipper inhawng chu a lo zip ve thung a, ka inher chu kan inhmu hnai kher mai!

A mipa zawk na na na chu a huaizawkah ka țang a niang hnuailam a melh ta ran mai a. "Zualte, thil hrilh duh che ka nei a..." zawi sap chuan ka han ti ve ngei a. Min chhang bawk si lo, a chhunzawm lehna tur a vang ta!

Engtin emaw tal min chhan ve awm a nia. Zak chung chungin ka sawi ve bawk asin mawle.

Kan han ngawi ta daih chu a boruak a rit viau mai. 'Kan kal dawn mi?' tiin mi pawh en lem lo chuan a ti zui daih a. Hrilh a hai duh fu a ni. 

Nihliap inzawn chung chuan kan chhuak dun ta a, insiriala kal e ti lo chuan kan in be lova, lungrual taka kan kaldun pawh ka ring hek lo. Ka ngaihtuahna chu a vak nasa kher mai. Tin, ka zak hle bawk a ni. 

Ka hlauh ber leh thleng tura ka duh loh thil ngei mai chu a thleng ta ni hian ka hria a, engtinnge ka pumpelh tak ang le.? 'Ngahnge maw ka lo sawi kher kher le.

Kalkawng chu ava thui tehlul ve le. Sawitur ka hre bawk si lo. Ani lahin sawi tange a ti bik bawk si lo.

Kan in pêng kan thlen thleng chuan ruah chu a la hân lova, tam tak phei chu a ni tawh lem lo. Ka ding dat a, 'kha hawn leh mai rawh'  tiin Nihliap chu alamah chuan ka ban phei a.

"A, a sur tam tawh chuang lova, a ngai dawn mi?"

"I huh vek hman ang" tiin ka pe lui ta thova, sen țan țan chung chuan 'A nih aw, mangțha le' tiin a kal zui nghal a. Tukkhum hik deuh mem mem chungin kan in lam pan chuan ka haw ta kha a nia.

In ka thlen chuan ka pu a lo awm reng mai a, a lo kal tur te chu han sawi lawk ve țhin tur hi a nia. Kan inlawm hlut a, putu tihtakah inkuah thuak thuak thlengin kan la bansan thei meuh lo. An tu hmuh hmasak ber kha ka ni miauva, keilah pangchang thiam ve tum hrang bawk. Duat hlawh tawk lekin ka nungchang lah chu a lo țha ve a.

Ka pu chu a pum lam țha lo inentir tura lo kal hi a ni awm a, nâ ti a han insawisel vak phei chu a ni law, anni ang kum upa deuhah chuan nidanga an pailiam mai theih ang kha an tlin tawh lova, chuvang chu a ni deuh ber zawk ang chu.

Pa Hminga nen zingkar lama Private clinic-a kan pahniha kalpui tur chuan rem kan ruat a, ka pu lah chuan 'keimah pawhin ka kal thei ang, hruai kher ka ngai lo' te a lo ti a. Mahse, Pa Hminga hi mi puitling tak a ni hlauhva holam takin thil a ti liam mai mai lem lo, ka pu lo tlawmngai ta pawh chuan a thiltum chu a sawh sawn tir chuang lovang.

Zana lehkha ka zir chu ka rilruah ava han lut lo tehrêng. Vawiina ruahsur hnuaia Zualtei nen kan inzui haw lai ringawt chu ka ngaihtuah a, engngatinge a ngawih reng lai khan ka sawi tlang hrâwk mai loh le, a zahthlak dan lah a thuhmun reng tho bawk sia.

Mahse, a hunlai kha chuan a har ve bawk em a ni. A sa seh han thlen meuh chuan tuang tihchhah theih loh hun te pawh a awm țhin zawng a nih hi. Huaisen ava har țhin em.

Mumanga hmuh țalh ka tum nen hmuh chu sawi loh Rinawma te uikawlhin min lo la um hrep zuia! 

A tukzîngah chuan hma fe-ah ka pu nen, Pa Hminga nen kan pathum chuan Pa Hminga motor-in kan inzui chhuak a, kan hming ziahna lah 13 na a ni dawrh mai bawk sia, bench pawh kan chang lo a ni ber mai. Anni motor-ah an țhu a, kei ka intlar thung a! 

A nghaha nghak reng ve ta chuan kan hun chu a thleng ve mai a, Pa Hminga chuan a luhpui a, kei pawnlamah ka lo awm ve thung a, rei fe hnua an lo chhuah chuan 'Ultrasound tih angai, ti nghal law law ang, a hrana nakina tih leh chu a buaithlak mai mai" tiin Pa Hminga chuan Ultrasound ti turin min kalpui leh a, chaw ei a hun tawh a niang pum pawh a ri nasa ta raih raih khawp mai.

Ultrasound kan ti zo kan chhuak chu dar 8:30 lai a lo ri tawh a, school ka kal hman dawn ta lo a nih hi mawle. A pawi love, a țulna vanga kal loh chu lana vak bik lo teh ang. Mi mah țul lo puiah an tlanbo alawm le.

Mahse, Zualtei ka hmu thei dawn ta lo a nih hi. Nihliap te kha alo keng ngei awm sia, engtinnge a tih ang le?

Pa Hminga chuan kan tlanchhuah hma chuan kan school chu min biak sak nghal a, nikhat chawlh chu ka nei fel ta law law a, tihtur phei chu ka hre lem lo viau. Tlailam dar thum velah ka pu ultrasound result han lampui a, clinic-a entir leh nghal chu ruahmanna kan neih sa chu a ni mai.

Tukțhuan te kan han eikham a, ka pu nen chuan kan chhungte tlawh turin vengdangah kan teichhuak dun ta daih a, kalna tur apui lah chu a lo hre hnem nangiang mai. Mahse, a zarah kan chhungte ho ka hriat kual phah ve zela a țha phian tho ve.

Inlam pawh tlawh tawh lovin ultrasound result lam tur chuan kan kal tlang nghal daih a, dar thum a pel fel zawt tihah kan thleng a, result entir mai kan han tum chu hming ziaktupa kha a lo khirh nek a, rei iak min nghahtir hnuah ka pu chu a luh tir chauh a, result chhe lutuk chu kan hawn lo hlauh zawk e.

Pumpui Ulcer a lo nei ve a niang, damdawi te kan leifel hnu chuan ngaihțhain kan haw dun ta hnak hnak a.

A tukah chuan phur zet hian school kai tur chuan ka insiam surh surh a, ka sam te pawh nidang zawng aiin ka thih mawm deuhin ka hria! Zualtei hmuh chu ka chak tak zet tawh, eng he hu chu sawi lem lo mah ila a hmel hmuh kha ka thlarau tan a țha a ni tih ka hre ve alawm mawle.

Ka kal reng reng chu nidang zawng aiin ka pen sau zawk hian ka hria, engnge mi phur ve te! 

Mak ve deuh chu hawlama hawrual ziah si hi kal lamah hian kan kal rual thei reng reng lo mai a, kalkawng in ang tho si chu han kal rual chang te pawh neih ve awm tak a nia, vawikhat mah hi kan la kalrual dun chhin lo reng reng, a hmuh pawh kan inhmu ngai lovin ka hria.

School ka han thleng chu hmuh mai inringin ka'n hawikual deuh a, hmuh tur pawh chu a awm lem hlei lova. A la kal lo a niang.

Ka bag te ka dah fel hnu chuan corridor-ah gate lan theihna lam hawi chuan ka ding a, a lo kal hun ka lo nghak hmiah mai! Mi hmu chak ve te!

Țan dar a rik thleng chuan hmuh tur reng reng a awm ta hauh lo mai! Engnge awmzia, school a kal dawn lo tihna mi, a damlo emawni le?

Hmuhchak mahnaklaia amah ber school a kal leh si loh chuan ava ho duh ve mawle. Min ti nguai zo vek hian ka hria. Zirlaiah pawh rilru ka pe thei meuh lo chu a ni e.

Chhun chawlh kan neih ve leh chuan canteen lamah in eipuar turin ka chhuk thla a, gate ka thleng dawn țep tihah chuan hmeichhe pakhat hian ka nihliap chu min lo pe nawlh a! Amah lah chu ka hriat zawng pawh a ni hran lo, pawl riat emaw pawl kaw zirlai emaw a nih ka ring.

A kal mai tur chu ka au zui a, "Bawihi tunge hei hi lo thawn che?"

"U Zualtei"

"School a kal dawn lo a mi?"

"Aw, a niang" a țhian te  bula kal thuai chu a chak hmel bawk sia, biak rei theih pawh a ni lo.

A kal loh chhan te tal chu hriat ava țha ve mawle. Zawh zui turin a kal nghal vang vang mai bawk sia.

Nihliap te chu han hnim ringawt mah ila amah Zualtei rim reng reng a nam bawk si lo, a hmuar rim a nam lek lek hian ka hria! Lunglen han hnem zia lah ni lo chuan.

Chawhnu dar a rik dawn ruaiah chuan kan class lam pan chuan ka chho ve ta a, kan tlarah chuan a kil berah ka țhu țhin a, ka bul chiah a mi a lo țhut tawh vang chuan dar a la ri chiah lo bawka țhutnghal kher pawh a ngai love tiin kan hmalam țhutthleng ațang ka bag chu han ban mai ka tum a, țhutthlengah chuan ka inpal a, ka nihliap chu bangkil lamah chuan ka thehphei dawrh a!

Ka ngal chu a na kher asin! 

A ruh a bung hial ang chu tihnaklaiin ka han en chu a vunchhia a lo pilh nuan chauh sia, a nat teh reng nen heti lek chu a ni lovang, a chhunglam tal engtin emaw awm tur a ni!

Ka nihliap tih tlâk chu ka chhar a, chhuat kil lam, a bal laia tla a ni bawka a paw țha thur thur kher mai. Zirtirtu dawhkan drawer-a puanchhia kan dah chuan hrukfai tumin ka kal phei a, ka hruk mawlh mawlh lai chuan a hmehkilh chu ka phelh a, dawhkanah chuan phahin ka hru leh hauh hauh a. Ka kilh leh tur ka la kang chu lehkhathem hi a lo tla chhuak zauh a!

Engemaw lehkhathem mai a ni hauh lo, uluk taka thleh a nih vang chuan chulai hmuna kalsan ngawt chu ka tih tur a ni lo tawp tih ka hre chiang hle mai. Bakah, he nihliap hawntu bak hian a kara zeh a nei awm lêk si lova, amah hmuh chak ngawih ngawih, hmuh theih si loh laia a kutchhuak tal kan hmu a nih chuan nachhawkna ang maia dampui tur a ni hial ang chu.

Ka ipte-ah chuan ka ak ta zauh a, ka bag-a nihliap ka khungfel hnu chuan dar a ri mai tawh dawn bawk nen zung tur chuan zun in lam ka pan zui a, mipa zunnaah pawh zung ta lo chuan commode an dahna zawkah chuan lutin ka in kalh khum sauh sauh a, ka kekawr ipte dinglama uluk tak inthlep lehkha chu ka lachhuak ta a.

Hawnga chhiar zui ta mai lo chuan ka'n hnim leh rih a! Umh, hei chu ka nihliap rim lakah kha chuan a danglam ta zar mai, pentui rimtui rim a nam chêk a, chu mai chu nilovin Zualtei rim te pawh hîp phak hiala ka inhriat tâk chu.

Hawng miah lova chutia dahțhat mai te pawh chu ka duh rum rum ka ti. Mahse, ka hawn loh chuan awmzia a awm dawn bawk si lova.

U Mes,

            Vawiin school i kal ka ring a, hei nihliap hi kan țhenawm a mi ka lo ken tir mai. Keimah ngeiin pek che duh viau mah ila nimin lamah school i chawl daih bawk sia ka pe thei ta lo che a ni. Nizan ațang khan ka khawsik a reh hlei thei lova, vawiin pawh school kal hram ka tumnain ka khawsik ala awm reng bawk sia, châk viau mah ila ka lo kal thei ta lo a ni. Ka dam anga kan inhmuh leh thuai ka beisei...

Always

Zualtei

A engber chuan nge min ti lungawi hliah hliah chu ka hre lo, ka lawm veng veng ringawt mai nia mawle. Mahse, a mah ber a damlo bawk si! Ka thleh țhat leh mawlh mawlh lai chuan dar a lo ri mang mang a.

Hmanhmawh zet chuan ka chhuak a, kan class room ka lut chiah chu "Tunge JF-a dictionary keng?" tiin ka'n au mai teh reng a! Min melh țha hlawm teh asin.

Ka țhutpui pa lah hi chimawm kumhlun tih takah "Engnge i hriat duh min zawt mai rawh, sap țawng te chu ka hre vek alawm, yes leh no inkarah vek alawm a awm" a lo tih leh sâwng tawh saw.

Tlar hnung lama hmeichhe pakhat hmel fai ving veng te hian a lo lek chhuak va va a, ka pan phei rang kher mai. Ka entur ber chu 'always' tih a ni. 

A awmzia chu ka hre ve riai ruai a, mahse awmze dang leh kawhdan bik a nei em tih ka hre chak et et alawm mawle. Chu vanga han lam ta ruai pawh kha ka nia.

Ka han phet char char a, hetiang hian Pu J.F Laldailova chuan a lo sawifiah a.

always: (awlueis), adv. ziahin, eng lai pawhin.

Englai pawhin ka tan a awm reng tihna em ni? Mahse, 'for you' tih pawh a dah tel bawk si lo! A, a dah tel zak a niang, tihian hrethiam turah min ngai a niang.

Nui ru ver ver chung chuan ka țhutna lam chu ka pan zui nghal a.

                 Chapter  

                       - III -

Hlimin lawm ru viau mah ila amah ber a dam si loh vang chuan ka rilru chu a pangkhing viau mai. Zanlamah tlawh tur emawni dawn le, nge, tlai school banah kal ila a mawi zawk ang. Mahse, an in pawh ka hre hleinem.

Kha hmeichhe naupang, nihliap min petu kha school banah hmuh ngei tur a ni. Chuan an in awmna lai zawt ila, inthlak felin kal mai ta ila. Ni lo, uniform nen kal ila thil tikual pah ang deuhvin a chi zawk ang.

Period hnuhnung ber chu nei lo ila ka ti hle mai. Mahse, a ngai ang bawkin ka'n chhiar chhuak leh ta dap a, kan ban ve meuh chuan High school lam chu an lo reh leh vek tawh! A va ngeiawm tak e aw, ka tumlawk ve nasat nena le.

A țha tho turah ngai ang. Naktuk lamah a lo la kal lo cheu a nih chuan tlaiah ka hrethei tawh chêk ang chu. Bakah, ka kal kual ngai bawk si lo va ka chhungte ngaih a lo țha lo palh ange. A tuk lam a nih chuan ka níte pawh ka hrilhlawk ve thei dawn a.

Mahse, amah chu ka hmu chak asin mawle.

Nitina kan inzui hawna țhinah chuan school Bag hnungpuakin ka kal hnak hnak a, mahni chauha chutia han kal chu ngaihtuah a thui duh ang reng viau a ni. 

"I nuam sam lo em ni?" tiin ka nî chuan inchhung ka lut chu min lo zawt ringawt a.

"Nuam sam e, engatinge?"

"A, eng ni hran lo ve, i hmel a ngui em a ka ti. Nâ i nei lo maw?"

"Nei lo ve, ka țha lawm. Boruak uap lutuk hian min ti zawi a niang" te ka ti ta vel mai mai a. Ni e, nâ ka nei hran chuang bawk si lova, Zualtei damlo ka ngaihtuahna chu ka hmelah ka lo lanchhuahtir deuh emawni zawk le.

"A nih dawn chu, vawiin chu a hahthlak khawp mai, khua a dur khup ringawt a, a tla duh mang si law, boruak a hahthlak khawp mai, inbual la a zia mai ang" a tih chhunzawm zat a.

A sawi dik khawp mai. Ka inbual zawh chuan ka zang deuh huai hian ka hria a, "Âte, naktuk chu kan school ami damlo kan tlawh kawi mai thei a nia, ka lo haw hun pangaia ka lo thlen loh palh paw'n" ka tih chuan a bungraw remfel lai chawl meuh chuan min en a, ka nî mah ni se ka tetlai ațanga ka kohna chu ka la thlah thei lo zel zawng a nih hi. 

"Damdawiinah maw?" 

"Aih, an inah"

"Awle, lo hawtlai lo ula. A enge nâ a?"

"A nâ an sawi ber pawh ka hre chuang lo" tiin ho lo lam zet chuan ka chhang liam ta ringawt a, kan sawi thui dawn chuan dawtsawi ngei a ngaih hmel. Chuvangin dawtsawi aichuan inthiarfihlim mai ka ngai a ni.

Zana lehkhazir tura ka țhu chu ka sawtpui lo kher asin! Ka note book hnunglamah te chuan 'Zualtei' 'Lalngaihzuali' tih vel chu ka ziak vak vak ringawt a! Exam-naah a chhuak lo chiang viauin ka ring!

I la hria em 'FLAMES' kha!? Khatiang te pawh kha ka chawk nasa alawm. Mahse, a chhuak țha teh chiam lo. A ho e, hetiang tuemaw ngaihtuah chhuah chawp mai mai alawm le tih te chuan ka inhnem ta vel a.

A tukzingah chuan ka pu haw tur chu ka han thlah a, a ngai lo ka ti chungin Rs 2000/- ngawt mai 'i mamawh huna i hmanah' tiin min hnutchhiah a, ka inthlahrung ang reng viau mai. Ka chhung te hian mamawh ka sawi lêm loh pawhin pawisa min pek hi an harsat vak lem lo. Khawsak harsa tak kan nih hran loh bakah kei hian ruih nan emaw, ho mai maiah emaw ka hmang ngai lem lo tih hi an hrechiang ve alawm.

School kal tura ka chhuak chuan heti hian ka ngaihtuah zui neuh neuh a, 'Zualtei te ina va kal ngawt chu a zahthlak ka va ring em, midang tumahin an tlawh ve awm bawk si lo va, kei ka lo va lan ngawt chuan a chhungte chuan inngaizawngah min ngai nghal ngei ang a, a țha ber angem? Keichu lo indah țha ta ila, ama tan a pawi thei angem?' tih thleng chuan.

Chu erawh ka thutlukna tur a ni pawhin ka hre lo. Râwn tur dang awm lo ta chu ka thu ber alawm le. Ka kal dawn.

Chhunah chuan nihliap min petunu kha hmuin ka zawt ta ngei a, an in awmna lai chu a sawidan hmangah chuan ka hre ve mai a, han bo viauna tur a awmin ka hre lem lo.

Nghah neih chuan nikhat hi a lo rei duh khawp mai. Sana battery te pawh a chiang lo ta emaw kan ti rum rum mai alawm le.

Huphurh deuh, phûr ru ang reng tak si chuan school ban veleh mahni in kal pel meuhin ka kal ta vang vang a, veng ințhenawm mai kan nih loh vang chuan ka hmanhmawh deuh bawk nen an in awmna lai vel ka thlen chuan ka thlan deuh hluam a, hmanhmawh hmel taka luh ngawt chu a ni ber lo ve tiin ka tawi khawmuang vel a, thlan sâ te pawh a dai deuh mahna le.

Ka ngaihtuah tel hauh loh chu a pa hming zawh nachang ka hre miah lo! A nu hming pawh ka la hre lo cheu! Engtinnge amah ala naupang ve sia an in chu ka zawh chhuah tak ang le? 

Kawngkam dawrah chuan ka han zawt a, an chhungkuaah amah chauh ka hre bawk sia, mi chhán vak ngaihna an hre lo. Luthak hauh lo chu ka hiat țan a ni der mai ka ti.

Mihring ka hmuh apiang mai chu ka zawt deuh chawt vek a, 'aniang' ti a min kawhhmuh lah chu inhnih ngawtah ka lutsual leh nghal! Kawngpui dungah chuan ka vei tuak sek a, haw mai tur emawni ka tih rilruk lai chuan nihliap min petu tè kha a lo kal ta hnak hnak a, Hnapkhawn pachang hmu an sawi ang maiin kan khi vun vun mai alawm le. Lo beidawn hman nak lai a.

Ani chuan inngaihtuah buai map lovin Zualtei te in chu min kawhhmuh zui nghal a, vawi engemaw zat ka kalpelh hnu lah lo ni rengin.

Concrete building pangai tak, chei thar vak a ni bik lo a ni tih hriat ve ang reng deuh mai hi a ni a, hmuhduh nei lem lo chu ni ila chuan emaw thilzuar vâk kual chi te chu ni ila chuan ka luh châk lohna pawl tak a ni ngei ang.

Mahse, amah Zualtei te in a nih miau si chuan le.

Kawngkharpui, lian leh han hawn pawha chîk țuah țuah hmel pu awm tak chu ka kik ta kauh kauh a. An in a phui țha viau nge ni tumahin 'lo lut rawh' an tih pawh chu ka hre lo. Nge, min chhawn lo hrim hrim zawk ni.

Mahni lo maha 'confi' loh sa naklaiin máw, kawngka bulah chuan ka ding zum zai mai a, kik nawn leh ka tum lai tak chuan kawngkhar chu a lo inhawng a, ka melh zawk chuan ka hriat hnu a ang mange. 

Min en vang vang a, keilah ka lo lai ve tumhrang bawk nge ni sawi mai tur pawh ka hre lo. "Lo lut rawh, enge i duh?" tiin kawngkhar chu a hawng zau zui nghal a, "Zualtei te in a ni em?" te chu ka'n ti tlai khawhnu leh pek a!

"Aw ni e, i hmu duh em ni?"

"A... aw, a damlo an tia, ka lo kan a.."

"E a nih chu i va fel ve, lo lut rawh. Pindan lamah a awm a, ka'n ko ange, Mate.. hei i țhianpain a lo tlawh che a nia" tiin a au zui a.

Amah Zualtei ngei chu pindan lam ațang chuan a lo chhuak zui nghal bawk a, "E he! U Mes, i lo kal a!?" mi beisei lo a nih tih hriat tak mai chuan a ti a.

"Nia, bazarah thil ka lei a, a remchang em a ka lo lutkawi zawk"

"Enge i lei a?" tiin ka school bag lam chu a melh zauh a. Zawhna țul lo tak a ni. Ka bag-ah lah chuan ka zirlaibu bak ka ak miah bawk si lo va, min zawh zel chuan ka inpuang zo mai dawn asin.

"A, eng emawni mai mai" ka tih chuan ka chhuanlam chu a hrethiam a ni ngei ang a nui sen sen a.

"I enge nâ a?" ka tihzawm nghal zat a.

"Nâ em em pawh a ni lo, ka khua a sik vak a. Tukin khan kan in entir a, ka zunkawngah hnai a lo awm a niang"

"A nih chu, hlauhawm a nih vak loh chu tiraw!" te ka'n ti thla ve ngawt a. Tih vakngaihna hrechuang hek lo vi!

"Nia, tui in tam tur ten min tia, in tam loh nâklaiin ka huphurh a nia. Nu, hei hi school-a ka țhianpa ve ber a nih hi, U mes-a, Malsawma"

"A nih chu, khawivengah nge i awm a Mes-a?" A fanu duatlai zawk chuan kan veng te chu a lo sawi zung zung a, ka chhân ve pawh a ngai meuh lo a ni e.

A nu eirêl chuan a fanu nena kan ti ti lai pawh chuan min mitmei reng ni hian ka hre tlat a, ka chezia chu a chîk viau nge mawni le. Ka hawiphei lah hian a mit a lo lasawn leh zuk țhin a, awm a ti nuam lo viau a ni.

Hlauh ang ngei ngeiin a fanu nen chuan min ringhlel a ni awm phawt maiah!

Ngawirengin thingpui a lo lum nge ni "Mate thingpui ka siam kep che aw" a rawn ti a. Thingpui in pawh ka duh lem lo asin mawle.

Thingpui pawh chu tuitangin ka in lo niber hian ka hria, a nuin min endan chu a lutuk ka ti ve deuh a ni. Min ti chi-ai pha tlat.

Rei pawh awm lovin thingpui ka inzawh chuan ka chhuak zui ta daih a, kawngpui thlengin Zualtei chuan min thlah a, sawi tur vak pawh kan hre lo, kan innuih ver vera a ni deuh mai.

Zan lam pawh ngaih a țha ta deuh a niang lehkha ka zir țha ta sawt e. Muthmunah erawh chuan suangtuahnain ka in awitlei thung.

A tukah pawh School a lo kal peih ta, țan hma chuan ka hmu zeuh zeuh a, rilru a nuam veng veng mai.

Chhun chawlha canteen lam pana ka chhuak thla chu gate bulah hian a lo ding a, min nghak a nih pawh ka ring lem lo va. Mahse, min lo nghak ve tlat nia!

"U Mes, ka pentui a ral daih a, min lo leipui la.." inthlahrun hmel tak hian a lo ti a. Ka ril a țam viau a sin mawle. Mahse, in eipuar hmasaka a bula awm loh aichuan rilțam chunga a bula awm chu ka thlang zawk daih.

School piah lama dawr awmna lam pan chuan kan inzui dun ta ral ral a.

"Nimin khan i lo kal pawh ka lo ring lo va..?"

"Lo kal lo ila i duh zawk tihna maw?" ka tih chuan a duh loh dan zâwngin ka chhâng a ni tih hriat takin a ner deuh a.

"I rilru hi a tuiêk ve thei siah!" a'n tih zauh kha.

"I nu kha a zahawm e, ka lo kal tawh lo mai thei a ni" ka tih chuan mak tih hmel deuh hian min en a.

"Enge, a zahawm loh lutuk, i la hriatchian loh vang mai mai a nih kha, i hawhnu khan  'i bialpa a ni maw?' te a tia, kan nui dun vak alawm" chu thu chuan ka beng a verh kher mai.

"Ehe! 'min ngaizawnga keichuan ka duh lo' i ti a ni maw chu?"

"Naa, a ni lo zawngin lo la zel lo la.." a tih chuan ka lo nui ringawt a.

"A fel hmel khawp mai a tih che kha, i chanchin te min zawt a. Ka hre thui vak si lo va.." a ti nang nang a.

Pentui te kan lei hnuah chuan kan kir leh mai a. Mahse, school lama kalphei ta lo chuan school compound chhung tho, school ațanga chhuah chhawng lama Laboratory building an sak kiangah chuan kan țhudun ta daih kha a nia. Biru tak ni si lo vah chuan a hmun chu a kilkhawr phian a, kan lam pana lo kal chu kan hmu thei vek a, hmundang ațang erawh chuan kawldai hling nei lo chi an phun leh thingkung awm neuh neuh te chuan min phen leh lawi a.

Eng engemaw sawi chuan kan ti ti ve nasa. Thil pawimawh tak erawh sawi kan nei pawhin ka hre lo.

"I nu nen chauh khan in awm tihna a mi a?" tiin an chhungkua chu hriatchian ve deuh ka duh vang chuan ka zawt rawih a.

"Ni lo ve,  ka pi leh pute pawh an la dam alawm. Chuan âpute-a a awm bawk a, inhnuaiah khan ânu u te an awm bawk a"

"E, i nu nen chauh khan in awm emaw ka lo ti mai a. A nih i pa?" chu zawhna ka zawt chu ka inthiam lo kher mai!

A sawi duh chin a sawi chuan zawh belh kher a țul lo asin mawle. Keipawh 'khawnge i nu?' ti a min zawhin rilru hrehawm leh beidawng takin ka chhâng țhin kha a ni si a. Ka inchhir tak zet. Mahse, ka sawi zo tawh miau mai si.

Mi pawh en lem lo chuan a kutțang a elh niap niap a, hul hak hian "Hmundangah a awm a, kan inhmu ngai lo" a ti sap a.

"A nih tak chu, keipawh ka nu hi ka hre bik hleinem. A hrehawm țhin tiraw. Zawhna țul lo tak ka zawh che vangin min hrethiam dawn nia"

"Engahmah ngai suh. Nangpawh i nih ve tho chu" ti a min chhanna chu a lungawi vang nge lungawi loh vang tih pawh  ka hrethiam chiah lo a ni.

Kan ti ti tluanglai chu țawngkam ka rawlh thui tak deuh vang chu a ni ngei ang a tawp a ni ta der mai a. Sawi leh mai tur pawh ka hre lo, ani lah chuan thingțang hian a hmazawna lei chu a thai sêrh sêrh ringawt mai bawk si. Kan boruak chu a nuam chiah lo a ni e.

Midang lo kal tlang an awm leh țhin bawk nen canteen a thil ei tur chuan kan chhuak phei dun ta a. Hlauhthawn nei deuh si, hlauh ber hre si lo ang deuh hian ka awm. 

A țhian te ho canteen kawta an lo awm vang chuan hla deuh taka kan awm lai ațang chuan min kalsan ta a, kaldun chu mawi a ti chiah lo te pawh a ni ange.

Keipawh pum lam a rik ruih ruih reng bawk si vang chuan canteen lamah chuan ka lut zui ve nghal a, Thingpui leh paratha kha a ni leh mai a, thil ropui tak eitur a awm loh chu thuhran, ka ei vak vak ngai lem lo bawk.

Inngaizawng ang chuan kan han awm deuh tituai chu a nia. Mahse, ka bialnu han ti tur em chuan alakah 'confi'-na tur ka nei leh chuang bawk si lo va. 'Ka duh che' emaw, 'Hnial thei che ka ni hleinem' tih emaw tal pawh engmah a sawi lo va, a cheziaah lah mi hnar angin a awm duh lawi si lo.

Ni si, ni si lo ang vela rilru arbo zawng ru ang reng takin a ni ka awm ni.

Board exam te a hnaih chhoh ve tak zel avangin mahni tawkah ka inbuatsaih ngawrh ve tial tial a, school kal leh sunday school hun tih loh chu ka chhuak ngai lo a chhâ chu a ni e. 

Zualtei te inah takngial pawh ka kal ngai chuang lo, amah pawh pawl sawm exam tho tur anih vangin school lamah kan inhmu thei reng thova tiin bawhbuai luih ka tum hran lo. Mi pawh a sawm ngai bik em em chuang lo va.

Chhunah hian canteen velah te han chawlhho chang te kan nei a, a bak chu haw kawng a ni mai. A hranpaa inhmuhfal emaw kan nei vak lem lo. Hmeichhe ti phawr phawr lo tak a nih vang hian mi nunchang ang zawng zawng han zirpui chu țul tihna tehchiam pawh ka nei lo. A awmdan anga dawh a, lungawi mai chu kan țhatna tur zawk te pawh a ni mahna.

Tlaikhat kan haw dun chu a school ID a ti tla a, min laksak a tum lai chuan ka lo keu hram pek a, a pianni vel en duh vanga keu mai ka nia, ani lah a lo zak nge mawni. Mi a um that that a, ka duh zawng chu ka hmu hman tho e. Ka pek hnu chuan min chum taih a, a na lo teih teih e!

A pian kum ka hriate chu a'n duh lo vel ngeiah! A class zat ațang pawhin chhût a har loh teh lul nen. 'Khawi i ID ka en ve duh' a ti zui a, keiin ka lo phal lo der ve leh bawk sia, a'n tûm der vel a, 'Exam zawhah ka pe dawn che a nia' ka tih tak ngawt kha.

Exam hmaa school kan kal hnuhnun ber niah chuan ka ID chu a lo sawichhuak leh nawlh a, ka lo hre tawh lo reng reng. Pek tak tak ka tum pawh a ni lo asin mawle. Mamawhna vak a nei bawk si lo va.

"Min pe ve dawn em?"

"I mamawh lo e..."

"Nangpaw'n i mamawh bik a mi?"

"Mamawh e kei te chuan.."

"Ka va awih lo tak, enge i mamawhna?"

"Hmanna tur ka ngah mai, țulna a tam lutuk" tihpah chuan a nui var var a, mamawhna tur a nei hauh lo vang tih ring mah ila chutia keini thil tehlul kawl a duhna chuan rilru a tihlim tak zet a ni.

"Exam-naah hian a buaithlak angem, nangin i kawl daih si chuan?" ka ti a.

"School ID kan hmang nang, admit card vel a awm vek tho a.." a tih chuan a ni awm teh tak e.

"A nih khawi min pe hmasa rawh.." ka la ti țalh a. Ani pawh chuan țha deuh hian a phawrh zui ve mai a. Mahse, 'phawrh ve phawt rawh, phakar i tum' a'n tih tlat pek chu!

ID chu kan inah thleng ta ran mai a, rilru a hlim duh kher mai.

"Engtikah nge exam in zawh dawn?" ka ti a.

"Umh, thlathar ni 28-ah niin ka hria, nangni?

"Keini chu in zawh hunah kan țan ang a, thlakhat a chuang in ka hria, ni 9 thleng a niang. Ni 9 kha chu practical a ni thung a"

"Exam karlaka chawlh a thui lutuk hi chuan ka ning hman țhin. Ka zir țha peih chuang si lo va, tih thuai thuai a, zawh vat vat ka duh zawk" a ti zui a.

"Inbuatsaihna hun a tam a, a țha e ka lo ti mai 'sin"

"Ka zir ve peih tak tak chuang lo va, exam lai pawh hian ka țang ve thiam lo. Ka ngai reng kei chu"

"A khawhar thlak ngawt ang" a ti leh sap a.

"Exam chu maw?"

"Ah, exam zawhah mawle. College te i kal tawh bik dawn sia, hawpui tur pawh ka nei tawh awm si lo va..." tiin min melh zauh a.

Chu a thilsawi tawi leh awmze nei tak mai chu chhanlêt dan thiam a har ka ti viau. Midang an awm leh mai ang chu han tih phal chi lah a ni bawk si lo.

"Ka lo nghak mai dawn che mi?" ka tih chuan nui var var chung hian min en a. "Min lo nghak mai la, tlaiah ka school bang min lo hruai țhin anga" a tih chuan a mah pawh chu a nuichhuak hak a.

"In exam zawh hunah inhmu ila?" ka tih chuan a ngawi daih a. "I duh lo 'mi?'' ka tih zawm leh mai bawk a.

"Khawiah nge kan inhmuh ang a?"

"Ka hre nang, remchang a awm mai ang chu"

"A la hla e, tuna lo sawi lawk chu"

"A, vawiin bak inhmuhna hun a awm loh hi, exam laiin kan inhmu tawh awm si lo va..."

"Ni bawk si, hmundanga inhmuh kher chu ti lo ila, kan inah lo kal mai la.."

"A! I nu kha..."

"Ánu a awm dawn hleinem, office a kal alawm. Âpi nen chauh kan awm ang chhunah chuan"

"I nu awm loh chuan a zia chu. Engtik ni-ah nge niang?" 

"Ka hre nang, i remchan hun hun a ni mai a, tih tur vak ka neih pawh ka hre lo"

"Ni 28 a in zawh chuan... Engtik ni nge chu chu?"

"Thursday a niin ka hria"

"A nih chuan a tuk zirtawpni-ah chuan tum ila a ni mai lawm"

"Nia, a țha ang" a ti ve mai a.

"I lo theihnghilh vel angah!?" ka tih chuan a ner nang a, "A har ang" a tih hnâp kha..

                 Chapter  

                       - IV -

Exam hmachhawn tur chuan ka inbuatsaih ngawrh ve viau tawh a, hriatchhuah châng awm bawk mahse Zualtei pawh ka ngaihtuahna ațang chuan ka dah bo thei ang reng viau. Han ngaih veng veng châng erawh ka nei tih zêp kher pawh a țul awm lo ve.

Tlaikhat chu Pa Hminga a lo haw har deuh vangin zanriah kan ei tlai deuh a, ka chaw eikhamin kut ka sil lai chuan Pa Hminga phone, țhutkhawmna pindan lama dawhkan chunga a dah chu a lo ri ral a,  a ringtone lah hi a phone a rik hlek chuan kan lo nuih ziah a -

  'Laakho hai yaha dilwaale

  Aur pyaar nahi milta

  Aankho me kisi ki wafa

  Kaa iqaraar nahi milta' tih hla Kismat (1968) film a mi, Mahendra Kapoor sak ngei mai kha a hmang a, a țhing nalh țang țang bawk sia!

A chawei lai chu a tho thuai a, 'Chaw ka ei tih an hre ve lo emawni le' a la ti phei nung nung zui a. Mi fate an 'Hello' puam țalh țalh laiin ani ve zawng lam nalh aiin an hriat chuan a tawk ti mai chi kha a ni a, a va 'HALLAW' leh luah tawh mai.

"I pa țhin hi chu aw, a bei ring țhin si" ka nî chuan a lo ti zauh a, chawbar lai chawl meuh chuan a thlir zui a.

"Putarte, hei i țhianten an be duh che a nih hi, in school a mi te" tiin keimah chu min hui a. Teh daih chuan a. Pa Hminga hian ka tetlai ațangin Putarte tiin min ko mauh mai a, tun thlengin kan la ëi ve lauh lauh zel chu a nia.

'Tu chu nge maw min lo be tur awm le, phone number pek ka neih ka hre bawk si lo va, tu tak niang maw'! ti a ngaihtuah rauh rauh chung chuan ka kal phei zui a, uluk leh thawp deuh satin 'hello' ka'n tih sap kha!

"U Mes, min hria em?" a tih chuan ka hre nghal mai. Ka meng phawk viau mai thei a ni.

"Aw, hria e, enge ni teh hlawl a?"

"Ânu inbual hlanin a phone ka lo hmansak lawk a, naktukah exam kan țan tawh dawn a, min lo țawngțai pui rawh aw"

"Aw le, enge in tih hmasak ber dawn?"

"English a nia..."

"I thiam em?"

"Thiam tho, thiam em em lo" a ti awlsam mai a.

"I ngaihtuahawm loh turah ngai ang, i thiam mai dawn chu"

"Nia, english chu a tih ve theih mai" a tih chuan sawi mai tur hre lo chuan kan han ngawi dun leh ren rawn a, a nui deuh tet tetin ka hre lehnghal.

"Ka dah dawn aw, a lo inbual zo țep tawh ang" a ti leh a, nia sawi chhunzawm tur ka hre tawh mang si lo va chutia a tih mai chu a ngai a ni.

"Aw le, min lo bia a, ka lawm e" te ka'n tih thlap pek chu, ava buaithlak țhin em!

"Einch, ka hrethiam mai..." muang fân leh ngeiawm zet chuan kan awmpui U Nghaki chuan a lo ti a. Kan awmpui hi kan ti tak nain kan chhungkaw member tluk zetin kan ngai a, kan enhrang teh chiam lo, ani lahin mi a enhrang bik lem lo bawk a. Awmpui, hlawh neia chhawr tih vanga 'nawkawr' leh chhiahhlawh cheia chei lutuk hian boruak a tichhe mai mai hian ka hre țhin.

Anmahni an fel a, an țhat phawt chuan han pawmthlap mai ila, anni tan pawh engkim mahni chhungkua anga an tih ve theih chuan phur tak leh nuamti takin an ti mai a. Chu chu chhungkaw tan pawh a chhenfakawmin a țha zawk hian ka hria. Chutih rual chuan a mihring a zir a ni ve thei tho awm e. 

Pa Hminga chuan "Zanah ka va miscall ange" ala ti zuiah!

"Ka țhiannu alawm, chutiang lam pawh a ni lo" ka'n ti ngawt a. Pa Hminga a lo duai lo nasa mai "I țhiannu a ni lo pawh kan ti lo va, 'chutiang lam pawh a ni lo' i tih kha han sawifiah zawk teh. Sawifiah tur i nei zawkin a lang tlat a ni" a lo ti khauh a. Sawi țha ka intih ve hman nen ka chhep sual der mai, țawngkam a thiam sia, ka lehthal zo pawhin ka ring lo.

"A.. ti khan ti vak vak lo ula, engmah a ni lo. Țhian ka tih chu țhian" ka tih chuan ka nî ho chuan an nui zo vek a, ka che zawng zawng chu a buaiin a lai zo vek tawh, hnial dan tur ber pawh ka hre lo.

Engtinnge maw Pa Hminga number te a neih le? Ka hrilh bawk si lo va, kan inhmuh vê leh ka zawt ngei ngei ang. Nge, min lo chhui nasa ve viau emawni le? 

Mak tak maiin an exam lai pawh chuan vawi thum emaw lai min lo bia a, keizawng ka lung hi a awi hliah hliah emai ka ti.

An exam zawh ve leha inhmuh kan intiamna chuan ka rilru a kap reng a, keini'n exam kan la țan ve dawn lo va, chu chuan ka rilru a luah deuh nâin ka nghahhlelhna chu a tireh chuang der lo thung. 

Vawihnih vawithum lai min lo biak takah chuan ka chhung te rinna chu a nemnghet zel lo thei lo va, mi sawisel leh hauh erawh an nei hran lo, fiamthuin min lakpui ber zawk a, rilru zawng zawnga ngaihzawng neih ala hun loh thu ka nîin a sawi zauh bawk.

An exam zawh ni tur chu calendar-ah ka en deuh sek mai a, zawh thut arâlah chuan exam beitu te aimahin ka chhang rang thei zawk hial mai thei a ni. Mahse, chu erawh a sawt si lo, nî lah a pawt hnai sawt a ni hek lo.

An exam zawhni a lo thlen chuan amah aimahin nuam ka ti zawk hial ang! A chhan chu a tukah kan inhmu dawn tlat alawm! Zanriah kan eihma ațang chuan Pa Hminga phone chu ka melh ru reng a, mahse, chu phone pui roh chuan ka melh reng a ni tih lah a hre der bawk si lo. Hria se chuan ngaihțhatna tur talin a richhuak tur asin mawle.

Zanriah kan eikham pawh chuan ala ri chuang lo cheu! A exam zo nuam ti lutuk hian min theihnghilh a ni khawp ang le. Naktuk te hi a lo lengchhuak daih ang tih a hlauhawm ta rum rum mai ka ti.

Lehkha zir pawh a ti tui lo zo vek!

Hma takah ka mu ta daih a, zingah chuan ka tho hma viau mai. U Nghaki a lo thlen chuan mawngkham urh khawpin ka lo țhu hman tawh a, thingpui min pe tura a lo luh chuan ka chhiartui deuh nge ni ka phu deuh zuk a, a nuih a za kher mai!

"Enge khatia i lo phût zuk a, thiltih rûk i nei a ni maw!?" tiin chiang fê mai hian min thlêk a.

"A, engmah tih ka nei reng reng lo, i lo hawng ri thut a nih kha" ka lo ti liam mai a.

"Ka va awih lo e aw, khawmaw thuhruk te i nei lo maw!?" a nui vawr vawr a.

"A awihawm loh e, min 'check' vek mahla i hmu awm lo e"

"Han ding teh nih leh" a tih chuan fel ber awm hrim hian ka ding vei vut a. Ka tisual chhiava a ni! Ding tur ka ni lo asin.

Rangzetin țhu leh mahila a nih tur ang a ni vek tawh, engmah a danglam phah tawh bawk si lo. Lai zet chuan ka nui pût pût ringawt a, amah lah chu inthiam loh hmel zet hian a chhuak zui bawk a.

Nia, mipa ve riang ruang chu taksa pêng țhenkhat hian zinglam boruak hi a lo man fâl bik ta țhin a, kawr ka ha lo va, boxer nen chauha awm ka nih vang chuan khatia ka han ding kha kan ding pawng thui ta deuh alawm mawle! 

Ka sawisa emaw a ti ngeiin ka ring. Mahse, engtin ka ti pawh a ni der si lo va.

Ani lah hi a ngeiawm thiam bawk sia, chawei lai te chuan min nuih tet tet a, awm a ti nuam lo zo vek alawm mawle. Engmah lah a sawizawm duh der bawk si lo.

Pa Hminga chaw eikham inthiarna lama a awm lai chuan a phone TV bul dawhkana a dah chu a lo ri ral ral a, a hnai ber ka nih vang chuan rang fe hian ka ban nghal a, ka rin ang ngeiin Zualtei a lo ni a, a hma zana min lo biak loh kha thinrim ka chak nen chutia a țawng ka hriat leh takah chuan vawm bo ang duak a ni leh tawh. Thinrim chu sawi loh a sawi apiang chu ka lem duak duak a ni ber zawk hian ka hria.

Inhmuh dan tur kan sawi fel ta! 

Mahse, a nu te office-a kalpui ngai chu ka va huphurh tak, a nu kha ka hmu châk vak lo asin mawle. Kal phawt ila tihdan a awm ve mai ang, duh leh lût ve kher lo pawhin pawnah ka lo nghak thei alawm.

Ka chhungte chuan min fiam zui țalh an tum a, pindan lamah chuan ka tawmbo san daih a, ka inlan sek chuan min chhaih leh sek emaw a ni ang a, hrehawm chu a ni lem lo. Mahse, laih a awl em alawm, hnial khân ka hre lo ve ropui si.

Ka pindan kawngkhar chu a lo ri rak a, "Sûk tur i neih chuan lo dahchhuak la" U Nghaki chuan a lo ti a. A lo lut zel ang tih mawlh chu ka lo hlau a, a luh em chu a lo lut tlang ta bik lo.

Engtin emaw min kâp leh chiam ang tih ka lo hlau deuh a, ani nuthlawi kap țet tawh chuan a phawk a chhuah ngat chuan mi chhaih buai leh nasa dawn bawk sia.

"U Nghak"

"Nge...?" tiin kawngkaah chuan a lo dâk leh a.

"Father te an kal tawh em?"

"Aw, an kal deuh chiah.."

"Âtei a kal ve maw!?"

"Aw, 'mitthi vuinaah kal kan ngai' an tia"

"Țhat hlauh chu, chhuah lawk ka duh a.."

"Khawiah maw? A țul lo emai, lehkha zir  mai mai rawh"

"Ka rei lovang, thil tih lawk ngai ka nei a"

"I bialnu te inah i kal dawn nih kha, zep buai lo mai teh" 

"Bialnu pawh ka nei bawk lo aw, mi chhaih  ve ziah suh"

"I nei chiang e, i awmdan ațang khan ka hre vek a nia aw"

"Engtinmah ka awm lo, hriattur pawh i nei lo hrim hrim, i rin thu mai mai sawi vak vak suh aw"

"Ka ring dik thlap ang"

"Fiah pawh ka ngam sak ang" ka tih chuan a nuih a za lutuk.

"Chiah em?"

"Aw" ka lo ti thuai a, ka lehkhazirna dawhkan lam pan chuan a lo kal zui a, engtia han fiah chu a tum nimaw.

A lo kal ang ang chuan ka lo melh ve zel a, ka hmaah chuan a ding a, 'Ding rawh' a tih chuan thuawih fe hian ka ding zui nghal a, ka nuih a za deuh bawk si, amah lah a nui duh der bawk si lo.

"Engtinnge min tih dawn?" ka tih pawh chuan min chhang lem lo.

"Fiah i ngam a ni lo'm ni?" a hnu deuhah chuan a ti hlak a.

"Ngam e le" ka la ti zui ham ham a.

"Min lo hnaih rawh" ka tawlh hnai thuai a, min si chêt chuan a lo tawlh zui ve bawk a. Ka kut chu lain a kawngah mi kuahtir a, "A! em em a" tiin talput ka han tum a, ka kawngah chuan a lo la fu kher bawk sia, amah ațanga in namsawn mai ka tum chuan ka kut khinghnih hnih chuan a âwmbawrah tak mai chuan ka la țham zui a!

Ka inthiam lovin ka thlah rual chuan a hma aia nghetin min lo pawm chawih a. Phâwk zet chuan ka melh a, a za ka ti deuh bawk si ka nui lo thei lo. A kut veilam chuan ka tukkhumah a dawm chat a, ka inrin hma chuan ka hmuiah tak chuan a chilh thut mai aleh! 

Rei phei chu a ni lo, kan ințhen chiang kher mai! Amah lah chuan mi la nuih zui leh ta nghal a, ka run lutuk, khatiang khera intih chu a.

Ka hmui chu ner nâng nâng chung hian ka nuai vel a, 'lutuk a che, tumah pawh ila fawh loh tawp kha' min la ti zui.

"A ve bawk a che a.." ka'n ti ngawt a, chubak hnial dân tur hre hek lo, tumah ka fawh loh thu lah chu a sawi dik kher bawk si nen.

"Khati chuan tumahin an ngaizawng peih lovang che, tunlaiah te chuan an zei tawh teh mai a nia" 

"Ka zei ka zei, ka ti duh lo mai mai a nih kha"

"Kha ti fen fun kha chuan i zei lul lovang" te chu a ti tak deuh deuh a!

"Kal teh kal teh, ka insiam duh a nia" tiin a darah chuan ka nam dat dat a, "Ka hmuh vek tawh kha..." a la ti zui ta dah a!

Rimtui loh mawlh hlauvin uluk fe hian ka inbual zui ta sar sar a, keimah pawh chu ka inhnîm lo chauh chu a ni e. Tiang khawp chuan a ni 'amah' hmu tura ka in uluk ni.

Muangchang chuan ka insiam zui a, ka tha a khur deuh der der hian ka hria, U Nghaki vang vek kha a ni. Khati tehchiama intih kher.

Ka 'hair style' chu ka siamdik hlei thei lo! Darthlalang hmaah te chuan ka'n nui chhin vel a, nui duai lova a tawk chauha țhen deuh sak dan te chu ka zir vel chiam a, keimah tak pawh ka lai deuh rum rum mai nia.

Ka chhuah dawn meuh chuan dar 10:30 a lo pel hial tawh a, a pawi em lovang chu maw. Lo kal hma rawh a ti bik lem lo bawk a.

Ka chhuak tur chu U Nghaki chuan min au let leh a, 'enge' ka va tih chuan flying kiss te chu a lo la ti tak deuh deuh a, nui sun sun chung chuan zangkhai fe hian ka kal ta thauh thauh a.

Zualtei te in lam pana kal ka ni bawka ka pên pawh a zang țha kher mai. Ka hmuh chak tluk zetin ani pawhin min nghakhlel vein ka ring a ni.

An in ka thlen dawn ruaiah chuan ka 'confi' lo thar leh a, ka pheikhawk bun te chu nalh ta lo riau hian ka hria a, ka kawrhak te lah chu a lian lutuk emawni le.

An kawngkhar pawh chu kikna remchang zawng niawm fahran hian ka thlêk rei ngial mai. A tawp atawpah chuan ka kik ta kauh kauh a, kik zawh hnuah doorbell te chu ka hmu leh lawi a.

Kawngkhar chu a lo ri rak a, Zualtei ngei mai chuan nui ver verin a lo hawng ta, 'lo lut rawh, âpi nen kan awm a, âpi hei ka țhianpa chu U Mes-a nih hi"

A pi chu kum 70 bawr vel a nih ka ring, ''I va fel ve a, sikul in kai ho a maw?" a lo ti bauh a.

"Aw, kal ho e" ka ti a.

"In pawl a in ang em?"

"Ang chiah lo, kei chu pawl 12 ka nia"

"A nih tak chu, in exam chu i ti țha em nang?"

"A... kan la exam ve lo va, karlehah kan țan ve ang"

"Chu in exam rual nange a?"

"Aw rual lo deuh. Anni chu an țan hma deuh a"

"A nih tak chu, Bawihi i nu hnenah chuan hmarchapui lo lei haw turin i ti dawn nia aw" tiin Zualtei pindan lam ațanga lo chhuak mek chu a chah zui zat a.

"Hmarchapui chauh maw?"

"Aw, a dang chu kan la neiin ka hria, a awmrei chuan a hlui mai mai alawm"

"Kan kal dawn mi?" tihpah chuan min melh zauh a, "Pi kan kal aw..."

"Awle, lo haw har lo ula. Motor kawng kân te kha fimkhur ang che u aw, tawhsual tawh palh te a hlauhawm a nia" a tih chu kan ngaihsak teh chiam lo. An in ațang chuan kan inzui chhuak ta chawm mai le.

A chappal kaih bun kara a kețang no senchek mai lo lang chu a 'pack-na' ațanga lakchhuah hlim niawm tak hi a ni. A ketinah chuan engmah a hnawih lo va, a thianghlim a ni deuh tawp mai.  A chappal lah chu a inhmeh em kher bawk si.

Jeans kekawr dum, tawt lam lek lek hi a ha a, a chungah t-shirt var, a hmalama chhetê a duma râng hi a ha a, a sam chu a thlah mawl deuh tawp nihian ka hria, chu erawh amawi loh phah pawhin ka hre lo. Țawn zawk se a nalh rinna pawh ka nei chuang lo. Bag tereuhte hi a ak țat a, engvak han leng tur pawh niin ka hre lo. Make-up a dah ve te pawh a niang.

Uniform ha lo va a inchei han hmuh takah chuan a lang hleitling riau hian ka hria a, a mal invuah chho cher hauh si lo va chum deuh lek lek te chu a mawipui satliah a ni lo. A inhmeh em em a ni.

"I nute office-ah lo kalna tur dang i nei em?"

"Umh.. Hawlamah bazarah kal ila, thil lei ngai ka nei a" a tih chuan ka pawmpui leh hle a ni. Kalna tur dang ka hre ve chuang bawk si lo va.

"Enge i nute office-a kal a ngaih nachhan chu?"

"Ka thil leina tur pawisa a lo lachhuak dawn a, lakchhuahsa a lo nei bawk si lo va, hlau suh a hlauhawm loh ka tih kha mawle" tiin a nui zui a.

"Ka hlau pawh a ni chiah lo, a zahthlak ve alawm" ka tih sak a.

A nute office kan thlen chuan luhpui loh ngawt lah chu a ni mang si lo va, kimki ru zet chuan ka zui ve zel a, huphurh nachhan tur ber pawh hre si lo chuan ka hreh ve em em ringawt a.

A nu thawhpui te chuan Zualtei chu an lo phulpui hlut a, kei erawh chu ka lo tuai thihul din zum ve zât ringawt a. Zah loh pawh tum ila a zahthlak ka ti tho tho.

A hnu deuhah chuan a nu țhutna bula chair-ah chuan kan țhu ta a, tlemin a zia ta deuh. A nu nen engemaw an sawi lai chuan ka lo hawikual hrek hrek a, a nu chuan min melh leh zauh țhin tih ka hria, a fanu bialpa atan ka tling tawk em tih min thlithlai te pawh a ni mahna le. Mahse, min ti thlamuang lo.

Ka rin aitak chuan an intifel har a, Zualtei nu hnathawk chu kan nghak pah deuh niber hian a lang. A nu chuan bazarah min kalpui dawn zawk emawni le? Chutiang te a nih chuan ka châk viau hran lo a ni. Rei lotê inhmuh pawhin thlâ a ngam lo a nia, a zuia inzui tur em chuan a huphurhawm ka ti deuh hlek.

Kan thlen hlim ațanga darkar khat dawn kan awm hnuah chuan Zualtei nu chu a dingchhuak ta hluai a, a la valai bawk a, mi chengvawng tak a ni tih hriat takin a incheina zawng zawng pawh chu a dak thlarh mai. A hmel a chhe em em bawk si lo va.

A bula țhu hnenah chuan, "U Ram, Bawihteii te hi canteen-ah ka zu chawlhpui lawk ange aw" tiin a bag pawh la chuang lo chuan a dawhkan chu a kalsan zui a, bazar lam thleng chuan kan kal ho dawn lo a nih hmel e. Ka lo thawhuai mai.

Inhnuailam panna step-a kan kal lai chuan Zualtei nu chuan "Bawiha, engtikah nge nangni exam in țan dawn?" a ti a. "Karlehah a niang, nilaini-ah" tiin ka lo chhang thuai a. 'Bawiha' te min ti thlap mawle, ka hlauh ang he hu chu a ni dawn lo a niang.

"I zir nasa em, țha deuhin zir rawh aw, kumkhat hloh pawh hi a uihawm țhin a nia"

"Zir țha ve tho chuan ka hria" ka ti ringawt a. Chhan vak ngaihna pawh ka hre lo.

Canteen-a thil kan eichhung pawh chuan a nu chuan rin ai takin min besawm peih a, ka lakah a lungawi lo hmel hmuh tur awm lo chuan ka rilru a tihlim ru veng veng a, kan thil ei te chu tui hi ka ti fâl bik riau hian ka hria. 

A nu tel lo chuan bazar lam pan chuan kan inchhep chhuak leh ta a. Enge kan lei tur pawh chu a sawi chuang lo. 

"Eng ber maw kan lei dawn?"

"Guitar" tihpah chuan a nui seih a.

"Ehe, i perhthiam a mi?"

"Thiam ve sawih sawih a, chawlh lai hian ânuin 'zir rawh' a tia, class ka kal ang tlailamah"

"A nuam ngawt ang"

Nia, ka ti tak tak. Rimawi hi ka ngaina, thiam tak tak chu ka nei lo nâin ka khawih ve dûm thei a, a zirna hmuna kal chu ka chak ve țhin khawp mai. Zualtei nen chuan han kaldun thei ila aw.. ava nuam dawn tak!

A nuin a țhiante a lo biak lawksa tawh vang chuan zawng buai lovin guitar chu kan lei deuh mai a, kal kualna tur dang kan hre bawk si lo va, an inlam panin kan kal zui ta a.

An in chu a lo inkalh țhap mai. 'Khawnge maw âpi chu a lo kal daih le?' a ti nang nang a. 'Ti khan lo awm lawk rawh aw, inhnuaiah a leng a niang ka ring' tiin inhnuai panna step-ah chuan a tlan thla thlak thlak a, a rin ang ngei chuan a awm a niang chahbi vai lauh lauh chungin a ni a lo kir leh ni.

Inchhung kan han lut chu ka bialnu a ni tih hrechhuak thut niawm tak hian ka inngaihtuah harh zawk a! Kuah te ka châk ve, 'muah' te pawh. Mahse, khawilaiah nge bul ka țan tak ang aw. 

Tumah ka la fawp lo. Ni lo ve, U Nghaki kha a ni mai. Tunlai mi chu an zei tawh a ti bawk si. A zei viau chuan kei tumah la fawp lo hi min hmusit mai ang a!? Engtinmah ti lo va ka haw leh ringawt chuan 'pa lo' min ti ang tih a la hlauhawm leh zel bawk si.

Ka lum leh țan ta pap pap mai le! 

Guitar, a bag ațanga a lakchhuah mek lai chuan a hnunglam ațang hian ka va ban ta dai dai a...

       

                 Chapter  

                       - V -

Ka kut chu ka han la lêt leh thûl! Chhungril lamah lah chuan tih ngei a țula hriatna a inthum rawn tluk tluk mai bawk si.

Ngaihzawng neih hi a hahthlak e! Ka thlan a tla leh mai dawnin ka hria.

'Risk' pawp ang, a thinrim bik lo turah ka ngai. Muangchang chuan a hnunglam ațanga a koki-a ka kut bân liam tum chuan ka han bei țha leh a, 'a nalh reuh tiraw?' tihpah chuan a lo inher thut mai a, keilahin ka bân phar phei chu ka la hman a ni hek lo. Ani lo hawi ta thut chuan ka kutbawr chu a biang hian a nawr nawk mai a, amah lah chu a nui zui leh ta nghal a, a zahthlak!

"A nalh khawp mai, a dum hi Guitar-ah chuan a mawi ka ti hrim hrim" hul zet chuan ka ti rût a.

Mahse, kha thil thleng khan min ti phûr viau thung, amah sichêt chuan sofa-ah chuan ka țhu zui nghal a, ka hnunglam a awlzauh teh reng nen hma ka sawn ve asin aw!

Chuti teh chêta țhutchilh ta chu mak tih hmel angreng deuh hian a lo hawi lêt a, lungawi lo hmel erawh a pu pawhin ka hre lo. Ka lo nui deuh a, a nihna takah chuan ka nuihtlawn a ni ber mai.

A 'string' chu bag ațang chuan a lachhuak a, ngaihtuah ngun hmel fe hian a thlek vang vang a, 'a kim lo a mi?' ka lo ti thuai a.

"Kim e, min vuahsak ngei chu a ngai dawn a nih hi" tiin ka lam chu a lo hawi a, hnunglam nghenchhan ngheng tur chuan a insiam rem hlek bawk a, min hnungchhawn ta bik lo.

"Kan vuah dawn nia, thu te han awih phawt la" ka tih chuan ka bânah a lo piai a, "Ka awih nghal..." tiin a thlah duh mai lo lehnghal a. A beina reuh phian leh nghal a!

Ka biangah chuan zu han piai a mawle! 'I lawmawm reuh e' a la ti zui a. A banrekah chuan ka lo man sak a, a inrinhma chuan hnaihchilh pheiin a hmuiah chuan ka fawhsak zauh a! Zauh satliah a ni lovang, zeuh a ni mah zawk ang. Ka tawk deuh awrh chauh alawm maw.

Mak tih hmel fe hian min en a, chetzui pawh a tum chuang lo, keilahin han tihzui ngaihna lah ka hre der bawk si lo. Kan inmelh a, kan nui dun ta ringawt a, ka bengah chuan a hmet neuh neuh a.

Fawh leh chu ka duh reng. Mahse, ka thiam ve dawn si lo va min hmusit ang tih te pawh ka hlau. Amah hian bulțan se aw..

Guitar hrui chu ka vuah sak a, thiam ang ang chuan ka han herh mil ve bawk a, a zaipui theih sawih sawih chuan ka chhuah ve in ka hria. Ani pawh a lung a awi hmel viau e.

'"C' key chiah ka la thiam a, key dang min lo zirtir la.." a tih chuan phurfe hian ka țhut hnaih sauh sauh a, 'D' key chu kan han beidun a, a harsat vak lo, awm ang deuh chuan a thai zui thei nghal mai a. Mahse, sawisel ka neih erawh chu duhthusamin a thai mil lo. A hla kaldan a zira thai dan te chu ka han hrilh ve leh chhawng a, kei tette ațanga sunday school lama khuangpu țhang ka ni bawka zai nuam lo deuha perh hrat hi ka ti hlei thei tlat lo.

"Nge..khatia min en vung vung, thiam lo min ti mi?" a tih chuan ka harh zawk mai! "E, ka lo thlir che a.." ka ti ta tawp a. Lai zet chuan a nui ve tho.

A pi a lo luh hnu rei vak lovah chuan haw ka duh thu ka sawi a, nûr deuh nang hian min en a, a la rem ti chiah lo a ni tih langsar taka a lantirna chu a hmui a ti pawrh deuh chu a ni. Țawngka chuan engmah a sawi si nang.

A pi thlazar hnuaiah chuan guitar bawk chu kan han buaipui dun leh a, a hma ang em chuan ka thlâ a ngam ta sarh lo.

Inbual tura a pi a luh lai chuan haw chu ka tum ta tak tak a, ani pawhin min hnial duh ta bik lo. Ngaihtuah chiang manghlei lo chuan 'naktukah ka lo kal leh anga...' ka ti a.

"Naktuk chu ânu a awm dawn a, nuam i ti leh lo vang. I lo kal duh chuan lo kal tho la..." a ti fân raih a.

"Inrinni a ni tak, ka lo kal lo mai ang. Nidangah a ni mai" ka ti ve mai a. Ka kal tur chuan kawngka bulah chuan ka han dinpui ve ngat a, hma ka va sawn tehlul!

Mahse, a zamawm duh reuh mange.

Kawngkhar chu kan la hawng lo va, hnaiteah kan dinchilh a nih chu. A koki-ah ka kut veilam chu innghatin, amah chuan hmalam a en lui tlat thung. 'Ka kuaiher ngam angem' tih lai ber chu a ni..

A khabeah chuan dawmin muangchanga ka lam hawi tur chuan ka han nawr a, a țangdeuh nain tihluih theih loh khawp erawh chu a ni lem lo thung. Chiang fe hian ka lo en reng a, a mit a khap sek sek a, ka mit chu a en ngam chiah lo.

Kunhniam paha han fawh zuai mai ka tum chu ani a lo dakchhuak ve leh chiah bawk si, kan han intauh leh rih a! Nui ri ngam chiah si lo, nuihza bawk si chuan kan inkuah khur deuh dar dar a.

Bual in kawngkhar ri rek kan hriat rual chuan kawngkapui ka hawng nghal rawp a, 'inthlah ang' tih chu kan ngai lo dun kher mai. Ani lah chuan ka hnungah mi piai pah ti tih hian min nawr nawk nawk a. 

Sen deuh țan țan chung chuan 'Suala..' a ti hlak a..

Keia kal ta pawh chu ka bîng haw mem mem tho mai. 

Engtinnge 'infawh' chu ka thiam ve theih ang aw, zir a ngai a ni. U Nghaki inzirtir ila a țha ang ti rilru nauh nauh chung chuan kan in chu ka thleng ve leh mai a.

U Nghaki chhuat nawt mek chuan "I ke tat nghal rawh Lalmalsawm.." a lo ti thuai a. Kei lah chuan tat hlei lo hian a dâi zau zawng chuan ka kal kual kher a, ani run chuan a chhuatnawhna pawh dah lo chuan min lo um a, ka pindana ka tlan lut chu min la um zel si vang chuan a kawtawpah ka lo țang ta ringawt a.

Nuihtlawn ngial bak chu tih theih a awm lo viau a ni.

Mi ben a tumna kut chu mansakin ka nawr hnung dawt dawt a, pindan bang thlenga ka nawr hnu chuan rang fe hian ka kuah a, a inrin hma chuan ka fawp thut a, ka kuah nghet bawka min nam arh arh nain ka thlah mai bik lo.

"Lalmalsawm em em a che.." a tih chuan 'a la ti...' tih pahin ka fawp lui leh ngat a, a hmui a ti lut daih a, han tih ngial dawn pawhin a har ang reng! Bialnu te ni lo na na na chu a lo ngam theih sarh sarh khawp mai. Zualtei bulah lah ka khur hlum lo chauh kha a ni sia.

"Enge i hriat a, i lo za haw riau mai" tihpahin ka bengah chuan a piai vak a, ana kher mai. Na ti bawk siin ka nui deuh uarh uarh a. 

"Kha ti khan min ti tawh reng reng suh" tihpah chuan a thlah a, a sa hut hutin ka hria. "Nge, tukinah nangma'n i ti hmasa a nih kha.." ka la ti hram a.

"Khatiang a ho teih teih emai, i zei loh teh reng nen.." a tih chu ka ngei tawk a tling. Tihvak ngaihna lah ka hre bawk si lo.

"I bialnu i fawp tawh em?" a tih chhunzawm zat a.

"Fawp lo, ka la ngam lo.." ka ti ta tawp a.

"I va'n dawih tak em, I pa vak lo a ni maw!?" a va han nghal tak!

"Ka thiam lo alawm" ka ti ta nge nge a.

"A har lo ber awm e"

"Min lo zirtir la" ka tih chuan a nuih a za kher mai. Inzirtir awm a ni em tih ngaihtuahna chang pawh ka hre lo. Ni, Zualtei tan ka inbuatsaih thiam ve dan a ni miau bawk si.

"A mawl bawk e maw!" a ti ringawt a, keilah chuan "Ka ti tak tak a nia" ka'n la ti hram a, thiam lo nih ka duh bik si lo alawm.

"Inbual rawh; i leng rei si, lehkha pawh i zir hman dawn lo" tiin ka pindan chu a chhuahsan a. Min zirtir ve mai tur a nia!

Bual ina ka luh dawn chuan 'ka inbual zawhah aw' tiin ka la au hram a, a nui vur vur a, tunhnua ka ngaihtuah leh hian ka lo la mawl zia ringawt kha a ni ka ngaihtuah ni. Inzirtir chi loh chu thuhran, a zahmawh zawnga ngaihtuahna chang ka hre miah lo te pawh kha a mak em em ka ti. Ka duh em em Zualtei tana training țha tak neih ringawt kha alawm ka rilrua awm le.

Bual in chhungah hian darthlalang lian ve deuh tak mai hi kan dah a, kâwng achin chunglam hi chu a lang theiin ka ring. Ka inphelh țan a, chu darthlalanga ka inhmuh chuan zeidan ringawt chu a ni ka rilruah pawh la awm ni. Ka pan hnaia ka hmai te chu ka han chul thuak thuak a, 'Zualtei bialpa ka ni' ka ti sap a. Lungawi fe chuan ka nui zui var var a.

Mahse, thiam loh ka nei miau bawk si.

Darthlalanga in en chung chuan hmui dawh dan tur te, pan hnaih dan tur te chu ka han zir vel ta a! A țul tlat bawk si a ni. Maimitchhin hun tur te nen lam ka zir tain ka hria. Tichuan, boruak ngawt fawp lovin Darthlalang te pawh ka fawp chhin ta hial a!

"Enge i tih chen chen a..!? Ka inbual ve duh a nia" U Nghaki'n a lo tih chuan vawikhat pawh ka lo la inleih hman lo! Mi inzir ve te.

Ka inbual zo ka chhuak chu uluk fe hian min lo thlêk a, pindan lamah rang fe hian ka luhsan daih a, U Nghaki tihbuai pawh a ngai lo ang, darthlalang a awm alawm le!

Towel vel ka pho fel hnu chuan ka pindanah chuan lehkha zir tumin ka tâp ta reng a, U Nghaki pawh a inbual ta a niang a thawm a reh daih mai.

Suangtuahna ațanga Zualtei dah țha a lehkhazir tur ka keu chiah tihah chuan ka pindan kawngkhar chu a lo inhawng rak a, a va buaithlak e, lehkha zir duh ve leh min chimbuai chu le.

A lam ka va hawi chuan ka thawmhnaw a sûk ho chu a lo keng lut hi a lo ni a, han huat tham em chu a ni leh bawk si lo.

"Enge nichin khan i rawn phur haw ve viau a?" a tih chuan ka phur thar leh pek a! A lam hawi chuan ka inher zui nghal thuai a, 'Ka thiam ve duh alawm le" ka lo ti a.

"Khatiang inzirtir chi a ni ngai emawni, i chhah ve bawk si. Engtinnge ngaihzawng te i neih ve theih le" a ti duah a. "Thiam loh te chu a zir theih ang chu" ka la ti hram a.

"Tuma'n an zir ngai lo, an thiam mai"

"Ka thiam ve mai hleinem, nangpaw'n zei lo min tih em kha. Bialnute bulah te chuan zei lo deuh te chu a zahthlak ve alawm" ka la ti fan a. Ka paltlang ve miau bawk sia lawm le.

"Thu te awih phawt la.."

"Naa.. ka awih hi, ka va'n fel tak.." ka tih chuan a nui ringawt a.

Amah zawk chu ka tilai deuh hian ka hria, chuti ngawng ngawnga han sawm takah chuan! A experience pawh a nuihpui vur vur chauh a ni.

Nuthlawi fa pakhat nei tawh a ni a, a fapa pawh 'school a kai tawh' a tiin ka hria. A hmel hi a țha han tih tur chu a ni lo va, a chhiat pawh ka hre chuang lo. Hmai hlai phek phuk, ngo lam deuh hi a ni. Chêr lampang ngaina tan chuan a dul chu a kiar hret mai thei. Mahse, chutianga 'a chhe liah luah' han tih tur em chu a ni lovang.

A âwmbâwr erawh chu kawmchhak pa țawngkam takin 'fate'n an hnêk zawh vek hnuah pawh patling tlaina tham' tur vel hi a ni.

"Khawi 'hanger' kha han la teh, kalna i dal tlat bawk si" a tih chuan ka ban sak ve mai a, hanger-a ka kawr a khai lai chuan ka ding hluai a, a hnunglam ațanga hian ka va  kuah a, a biangah chua ka va fawh sak a, 'Lalmalsawm, i va â thei tak e aw..' a tih pawh chuan ka thlah duh bik hlei lo va. 

Ka khuma a thilken lai thehthlak pah chuan a lo inher zui a, kan inhmachhawn ta ran mai le. 'Ka kâwngah kuah rawh' a tih chu îhe lovin ka zawm nghal a, ka nghawnga chelh pah chuan muangchang hian min rawn fawp ta!

A va'n thiam tak!

Ka taksa engkim mai chu a fawp tel vek emaw tih mai turin min thunun hneh a, engtin nge ka lo dawn sawn a, ka chhâng lêt ve em tih phei chu ka thluak hian a ngaihtuah hman lo hrim hrim.

A hmui a han phawi thut chu baloon hampuar thlah thut ang mai hi ka niin ka hria. Engtin emaw tak hian kim lo deuhin ka awm tlat. Ka kham mawlh lo a ni. Ka'n hnim hnai leh tur chu a țang ta tlat a, "A tawk.." a tih chuan mak tiin ka melh thuai a.

A mitmeng phelh phang mai chu ka hmu thei a, a hmui huh deuh hliam leh a thawrang ta deuh te pawh ka hria. Keipawh chutiang bawk chuan ka awm a ni. Ka ngaihtuah miah loh 'mipa' ka ni tih chu hriattirin ka awm mek a ni si a.

Min kuahna chu phelhin ka pindan chu a chhuahsan nghal a, keilah hrilhhai takin ka din ngai chuan ka ding khawng reng a, a mak hle mai a, 'khatiang khan infawhin hna a thawk thei a nih ngai chuan kan chesual thuai ang. Thil dik lo tak a ni dawn si, chuvangin tih tawh loh tur tiin' ka rilru ka siam a.

Ka nî alo haw hma chuan ka pindan chu ka chhuahsan ngam tawh lo. U Nghaki pawh chu a lo dak lut leh ta bik lo va, ka ngaihtuahna kalthui lutuk vang chuan lehkha zir lam pawh a lang thei lo.

Khatiang khan Zualtei fawp ve ta ila..!?

Puitling zawk a ni bawka U Nghaki mizia chu kha thilthleng vang khan a danglam pawhin ka hre lo, nidang aia a nunphung danglamna hmuh tur a awm lo, keimah zawk chu a lakah chuan ka inthlahrung dui mai hian ka hria. Mahse, ka chhungte hriatthiam theih tur erawh chuan ka awm bik em lo vang chu.

Zanriah kan eikham hlimah chuan min lo be leh a, 'mi pawh i be ve duh bawk si lo, keimah hlirin ka lo bia che a..' tiin a vui ve deuh a, chhunlama kan hun hman nuam a tih thu te pawh a sawi sap sap a, 'exam lai chuan inhmu lovang, i exam zawh ve leh kan inhmu dawn nia' tiin min thlah a. Kan inbiak zawh hi chuan ka hlim veng veng zel, a va'n nuam thei tak!

A tawi zawngin '..tichuan exam pawh chu ka zo ve ta a..' ti mai ang aw.

Exam zawh ka chakna chhan chu ka pa hnathawhna hmunah ka zin dawn a, chu chu zawh thuai thuai ka chakna chhan pakhat a ni. A dang leh chu Zualtei hmuh thuai thuai a nia. Mahse, tunah chuan ka pa hnathawhna hmuna zin chu Zualtei alo awm tak avangin ka châkna leh châk lohna chu a inzat thial awm e.

Kal lo ngawt dawn ila chhuanlam tur avâng dawn nasa mai si a. Englekhawle, ka kal ngei chu a ngaih hmel e. Ka lung a leng dawn hle a ni.

Exam kan zawh zanah chuan hlauthawng chung chungin Zualtei nu number chu ka nî phone ațangin ka 'ring' ve ta tawp mai a. Ka hlauh ang ngei ngeiin a nu chuan a lo la tak tak a, țawng nachang pawh ka hre lo!

'Hello, hello, hello...' a ti deuh lauh lauh a, keilah ka ngawi ngal mai bawk sia, 'I țawng ka hre thei lo..' a tih te pawh chu fiah tak mai hian ka hre reng mai. Phone chu ka'n hmet tawp hmak a, a nu ka hlauh hi a reh dawn lo aniang!

A hnu deuh lawkah chuan an rawn 'call back' a ni ang, ka la ken reng lai chuan a lo ri leh ta țang țang a, a nu a ni awm si a, ka la ngam angem aw..!?

Min hau bik em nang ti chung chuan ka la ta nge nge a, ka rin loh lutuk tak maiin Zualtei a lo ni tlat mai ka ti!

"Hello"

"Hello"

"Zualte.."

"I nih ka ring rengah" tiin a nui zui hak a. 

"I rinna a chak hle mai, keimah ngei chu ka nih hi mawle. Nichin khan i nu khan a lo la kurh a, a 'hit' viau lo. Ka chhang duh lo der a nih kha" ka ti zui a.

"I va ho tak, Zualtei ka be duh tih ve mai tur che nia, engtinmah a ti chuang nang"

"A zahthlak ve alawm"

"I ho e mai a, hei hi tu phone nge a?"

"Ka nî, Pa Hminga a chhuak daih a. E, engtinnge Pa Hminga number kha i neih theih a, ka pek awm che ka hre bawk si lova..?"

"A va ho e.. i ID card-ah khan a awm reng a lawm. I va'n chîk lo tak" a ti sap a. A ni dawn tak e, ID card-ah khan chhungte contact-na tur number kha kan dah tak e.

Atuka inhmuh chu a pi nen tihtur an neih vangin a rem ta lo phawt chu a nia. Hmuhchak tawh naklaiin aw..Mahse, a tukleha inhmu turin kan sawifel nghal thova a ziaawm tal e.

Kan inbiak zawh chuan ka lo enzui lutuk lem loh ka lehkhabu bawm ami Zualtei ID chu ka la chhuak a, tlaikhawhnuah ka'n en chiang leh hnuhnawh a, ani pawhin a nu number chu a lo dah ve khiau tho mai. A pa hming leh ka pa hming te chu a la in ang chiah leh ta nghal a!

Ka zin tur chu ka chak lo tial tial mai lehnghal a, ka pa lah chuan a awmna lam ațangin 'ticket' min lo lakfel sak diam tawh bawk si. Zualtei nena nikhat chauh inhmuh chu ka kham dawn lo mange.

Inhmuh kan tumni a lo thlen chuan phurtakin an in lam pan chuan ka kal ta a, a pi nen an awm dawn tih hre mah ila amah hmuh ka châkna chuan a pi pawh hnawk min tih tir thei lo chu a ni ber e. 

An in pawh ka thleng rang kher mai. A pi chuan an kawtzawlah hian pangpar a lo sawisa a, mi a lo biak ve luam kha maw. 

Inchhung ka luh chuan ka kalchhan ber chuan chhuat a lo nawt hliau hliau a, kawngka a inhawn deuh vangin kik pawh kik buai lova lut tlang mai ka ni a, amah chuan hmuh pawh min hmu ve lem lo niin ka hria. 

Awmhmun râwt kekawr, lian ang reng zet mai hi a ha a, a chunga a hâk t-shirt pawh chu ama puala an lei chu a nih hmel loh khawp, a lian țha hluai hluai emai! A tlâng lam chu a kawngdinglamah hian a la suihbâwk zui a! 

A lu-ah chuan puannem, puanlukhum niawm tak hi diar veh ang deuh hian a suih deuh țah bawk a, a incheidan chu a nuihzatthlak ang reng hle mai ka ti.

Kelâwng ngatin ala awm zui leh ta nghal a!

Țhawn thut tum chuan ka kal phei țham țham a, ka tum hrelawk ang mai chuan ani lah chu mi hnungchhawn zawng hian a ding reng a, chêt pawh a che châng lo. Ka rim a hria nge mawni zawk le!!? Haha..

A kâwngah chuan dimtei ka va kuah a, han phûtzuk pawh zu nei hauh lo va mawle! A taksa ti che lo chuan a lo thle a, a sen deuh țan țanin ka hria.

Chutia ngawirenga ka kuah hle hle lai chuan an TV lam chu ka va en a, kan lo lang reng mai. A in 'on' lo va, a thim vang zawk chuan kan lang thei mai chauh a ni. Ka luhlaia che lo va alo awmchhan pawh kha..a chiang ta viau e.

"Ãpi a lo lut thut ange.." a ti sep a.

Keilah hi thuawih fãl ta reng reng, ka'n thlah zui ve mai bawk a. 

"Ka room chiah a ngai tawh, ka'n nawt zo lawk ang aw, a rei lo vang. Lo țhu la"

"Umh, i pi khi ka lo han thawhpui zawk dawn emaw ni le!?"

"Enga!?" mak a tih hmel kher mai.

"A pangpar tifel khi ka lo han pui dawn mawni" ka tih chuan a nuih a za kher mai. 'Makpa interview a ni mai alawm' tiin a pindan lamah chuan a lut zui ta a.

An țhutkhawmna pindana Sofa dûp zet, savun țha mi a siam niawm taka dum hnûm hlurh maiah chuan țhuin ka hawikual riau riau a, ka khuate chu a har lawk dawn hian ka hria.

A lo chhuak leh chu a incheina chuan ka nuih a ti za deuh. Ka lo nui var var a, ngaihțha vak lo va mi en chung hian 'nge?' a ti zauh a.

Laipawng lang kawrhin a lo chhuak pek alawm mawle! A'n inhup tlaikhawhnu leh a, a tawpah pheichuan a khêlbawra a suihbawk chu a phelh ta ringawt a.

Inbual a tum chu ka rem tihsak tlat lo va, 'ka haw hunah ti mai rawh' ka tih tlat vang chuan a tilui duh ta bik lo va, nuam lo chu a ti deuhin ka hria. Mahse, inbualsan leh rih kha chuan... Hun ka ui ve alawm le.

Guitar kan perh a, kan ti ti a, TV kan en bawk a, Thingpui kan in bawk. A pi chu Thingpuii in turin kan ko lut a, a in zo thuai a, a chhuak lehnghal mai a, chubak chu a lo lawr reng reng lo. A țha phian mai.

Ka pa bula zin ka tum thu ka sawi chuan min en ran a, enge a rilruah awm ang tih chu a hmel ațang mai chuan ka chhiar thiam chiah lo.

"Engtikah nge i kal dawn? Kal ngei ngei a ngai ami?"

"A hmaa kan lo tumlawk tawh a nia, ticket pawh ka pain a lo la vek tawh a..." ka tih chuan a thingpui inna no chu dawhkanah a dah thla deuh dat a, TV awmna lam chu a melh vang vang a. 

"Engtikah nge i lo haw leh ang, a tûkah ami!?" a tih chuan amah pawh chu a nui deuhin ka hria.

"Ka hre lo le, a țuldan a zir te pawh a niang. 'Chawlh chhung chu i awm rih ang a' a tia ka pa chuan..."

"Awi, a rei dawn si. Exam zawh nghahhlelh man a awm lo e" a ti nang nang a, dawhkana a no dah chu a pen ri kerh kerh a..

Ka haw dawnah chuan a hmuiah ka fawhsak tak ngei kha. Mahse, rei a ni lo, a talpît nghal thuai a, mitmeng de sar sarin lungawi hmel zet chuan min thlir veng veng a...

       

                 Chapter  

                       - VI -

Ka pa hnathawhna lam pan chuan zing Sumo-ah zawlkhawpui kan chhuahsan ta vuah vuah mai a, hnuk te pawh a ulh rum rum mai dawn alawm le. Han țap ngawt dawn ila chham tur avâng dawn nasa mai si!

Ka chuanpui, ka bul chiaha țhu nula hmai fai ving veng lah chu a titi vel hmangah a changkan hmel teh reng nen a kuttin a bal roh fu leh ta nghal a!

Kan chuang rei tulh tulh a, kan chuanna motor khalhtu nen chuan kuhva te an han insiam chhova, an in 'zura' hmel viau e.

Kei ve lah chu Sumo seat hmasa berah țhuin ka hnuchhawn lam tleitiri ngaiin ka kûr a ni ber a, 'enge a tih ang le' 'min ngaihtuah ve ang em' tih vel mai mai ngaihtuah chuan school kalkawng chenin ka chhui leh ruak ruak a ni si a.

Ni, Pathian zarah ka 'fail' bik em lo turah ka ngai a, College te kal a țul ve ngei awm si a, chutih hunah chuan mi zingah mal taka awm a țul ngei ang a, a khawhar thlak dawn e. Kei ang chauhin Zualtei pawh a nih ve ngei ka ring. Inhmuhna remchang a vang tawh dawn mange, zanlama inrim tur em chuan amah ala nau ve lehchhawng bawk si.

Chutiang thil hrang hrang ka ngaihtuahna chuan min awimu a ni ngei ang, kawngkhuara motor insawh dawtah chuan ka harh chiang kher mai. Ka khabe chu ka tauh deuh leh ta nghal a!

Ka hawichhuah leh chuan kan kal tumna khua chu 3kms chauh a ni tawh tih kawngsira lung lo inphunah chuan ka zu hmu thei a, kawnglakah vawikhat inhnawhpuara kan ding bâk tawi khawmuang lo va tlan char char kan ni bawk a, kan sâwt viau a lo ni. 

Ka mu nguai deuh bawk nen Motor chuan chu ka ning kher mai. Ka mawng lah chu mi bâk bâkin a kham fâl emawni lehnghal ni.

'Welcome to..' tih piahdeuha lungdawh bulah chuan kan chuanna motor chu a ding ta dut a, driver chuan "Țawngțaina hmang lawk ang aw. Pa Ro, nangin i ti leh mai dawn em ni? A bul i țan bawk a, han zo law law la.." tiin tlarhnunglama țhu chu a au zui a.

Tirhkoh senior ang maia duaha a chham hnuah chuan zunram pawh thiar khawtlai lo vin kan kal leh nghal a, khawchhung chu kan lut a ni zui nghal mai. Ka pain Sumo counter-ah min lo hmuah tho dawn vangin ka vawikhat kalna tur mah ni se ngaihtuah buai vak tur ka nei lo va, a ziaawm viau.

District Capital a ni bawka ka rin ai takin an changkang, khawhmun rem tak, in leh lo ngial nghet tak tak tih hriatreng dinna hmun a nih hmel. Khawchhung pawh a thianghlim khat chuan ka hria.

Khawchhunga thui fe kan tlan hnu chuan veng lailî leh Bazar hmun niawm tak hi kan thleng a, chulai hmun chu Counter awmna pawh a ni ngei ka ring. Keima pa pawh a lo awm ngei ang. 

Bungrua vel an hlan thlak lai chuan ka pa chu kan sira dawr ațang chuan a lo chhuak phei a, ka lian ve tawh viau emaw ka tia, ka pa chu ka lo la tiat lo hle mai. A hmui hmul leh biang hmul vel a zuah buk leh pek viau!

Ka dârah chuan mi kuah thuak a, "Pa Hmingate an țha em? Ate-i te?"

"Umh țha e, zin bosan kha an huphurh ve lutuk a.."

"A niang, an khua a har ngawt ang" tiin ka bag chu a motor lam pan chuan kan kalpui nghal a, a bul dawra cigaratte leh kuhva a lam hnu chuan a quarter lam pan chuan kan tlan dun nghal a.

Ka pa hi nupui nei tura an nawr ngial pawha tumahin an nawr hlawhtlin theih loh a ni. 'Fapa ka nei tawha a tawk viau' a ti țhin an ti. 

Eizawnna lamah a vannei a, zirtirtuin bul a țan zet hnuah Departmental exam te bei chhovin tunah chuan District Education Officer a ni mek a, a inmehfai chuan pa fa aiin unau kan ang mah zawk. 

Insawnkual khat tawk reng a nih vang hian a bula awm chak ve viau țhin mah ila a remti ngai lo. 'I zirna a tibuai ang' a ti țhin. Mahse, harsatna dang a awm a nih loh chuan thlahnih/thlathum danah tal min tlawh turin kan khuaa ka awmlai pawhin a lo haw vang vang țhin. Ka ngai a, ka ngaih ang zeta min hmangaiha min ngai let ve tu chu 'ka pa' a ni.

A quarter chu veng tawplamah daih a lo la awm chu niin. Chhuahvah a peihawm awm lo mange aw.

A hmun han thlen chiah chuan rinaitakin a lo nuam a, hmunhma zau tak chu a ni lem lo va. Mahse, tlâng bâwk lian vak lo va awm a nih vangin khawthlir a rem chang a, hawi thawvenna atan chuan duhthusam a ni. Khawchhunglam lah chu vengtawpa Electric Department ho Complex thlengin a lang chiang phei nasa mai bawk si.

Ka pa quarter bulah chuan anmahni Department quarter tho in li vel hi a awm ve bawk a, pakhat chu luah pawh a nih hmel loh, a țhing deuh rupin ka hria.

Quarter kawta kan inhlan thlâk lai chuan țhenawm te chuan min lo be ve hlut hlawm a, an fel hmel hlawm khawp mai.

Ka pain a awmpui țhin ber, a driver nibawk, a insawn pawha a chhawmkual zel țhin chu a chhungte boral vangin loh theih lo vin a haw lai a lo ni a, kan pafa chuan kan awm rak rak mai dawn a nih hmel viau a ni.

"Zela a haw daih bawk sia, inah pawh chaw ka ei mumal hleinem, țhenawm hovin min kep deuh char char a.." a tih chuan ka lo nui ringawt a.

A țhenawmnu niawm tak, țawngduh zet mai lo lenglut chuan ei ka han rêl tur chu min khalh zung zung a, 'i chau awm si, tikhan lo va awm hahdam rawh. Kan in lamah te lo ei mai ula țha tur a nia, i pa hian a duh teh tlat lo va' a ti zung zung a. A țawng ran ang ang chuan thiltih vel lah chu a sam lam khawp a.

Unau hmelhai hun awm velah chuan zanriah chu kan pafa chuan kan kil dun ta a, kan titi nasa kher mai. Ka exam chung chang te, ka ní leh Pa Hminga chungchang bakah kan khawlama ka pi leh pute chanchin thleng chuan sawi loha hleih pawh kan neiin ka hre lo.

"Pa, ka nu chanchin chu min hrilh thei tawh em?" ka tih chuan chawhmeh suah tuma a ban dai dai lai pawh chu a țhulh leh daih mai. Mi pawh en lem lo chuan a melh ngai chu a melh ran a, vawihnih lai ka nu chanchin hi hriat tumin ka zawt tawh. Mahse, 'i la naupang emai, i puitlin hunah' a tih zel vangin chhanna mumal ka dawng ngai lo. Ka pi leh pute lahin an hriatpui lutuk bik bawk si lo va. A chhan pawh kei hi hnute ka nghei hlim hlawta ka nu hnen ațanga lakhran ka nih vang a ni. Chumi țuma ka nu an hmuh bak chu ka pi leh pute pawhin hmuh leh chu sawi loh a chin sawi tur pawh an hre bik lo.

A ngawih rei tak em vang chuan ka lawm chiah lo. Ka rilru a na em em bawk. Engvangin nge ka nu hriat hi phalsak ka nih loh? Engang mi nge a nih a, engtianga khawsa nge a nih? Ka nu hi ka hre duh, ka nu a ni asin.

Zawhna zawhbelh tur chuan ka țawngchhuak zo tawh lo, ka tho thut a, pindan lamah chuan ka lut zui nghal a, ka mittui tla pawh chu dan tumna ka nei lo. Ka rûm a, ka țap lo thei lo a ni.

Pindan pawh chhuahsan duh lo chuan khumah chuan ka mu tlat a, reife hnuah chuan ka pa chu a lo lut a ni ngei ang a thawm ka hre tlat.

"Bawiha, khatia awm tur kha a ni lo asin.. " khumah chuan a lo țhu a, ka hnungzangah chuan a chul a. "Ka sawi tawh kha, puitling i nih hunah, chhia leh țha engkim i hriatthiam hunah ka hrilh ang che ka tih kha"

"Tunah...tunah..." atthlak takin khum chu ka chum ri bur a! 

"Hahdam phawt la, committee te ka nei a nia, chhuah ka ngai a, khatia i awm chuan a țha ber lo. Pa takin awm phawt teh, mipa i nih kha..." damthlap chuan a ti zui a.

"Pa, nu tih tur nei lo va nun hman hrehawmzia hi engatinge min ngaihtuah pui loh? Min hmangaih miah lo, min lo hmangaih miah lo a nih hi..Zan engzat nge 'nu' ngaia ka țah...." ka țhu chhuak chiah chu ka insum zo lo, ka țapchhuak hawk a.

Ni, ka na tak zet a ni.

Ka pa chuan min lo kuah thuai a. Engmah a sawi lem lo. A rilru chu nuamin a awm pawh ka ring bik lo, ka hrehawm a hlau em em si a.

Ka hnukulh zualpui a reh hnu chuan min kuahna ațang chuan ka tal chhuak a, khum bula thinga siam 'chair' ah chuan ka țhu phei daih a. 

"Khatiang zawnga thil tih rum rum zel loh tur, ngaihtuahna fim hman hram hram tur a nia"

"Ka thei tawh lo, min hrilh dawn lo a nih chuan ka lêt leh nghal ang" ka ti hmak a, hnukulh lam aichuan thinrim zawngin a thawk tawh niberin ka hria. Mi pawh a chhang chuang lo. Kuhva a siam a, meizial a țan zui zat bawk a.

"KS pawh ni se, zu zuar pawh ni se ka nu a nihna a bo chuang lo. Zahpuiawm takin a awm emaw min duh lo tu pawh ni se min hringtu a nih vangin ka hriat ve a ngai" ka tih chuan hriat ka duh tak zet a ni tih chu a hai bik lo vang.

A phone chu a phawrh a, "Pu Zual, hei ka fapa tlaiah khan a lo thleng a, zanin meeting kha ka va hruai thei awm lo ve, a chin i hre vek tho va nangin i lo kaihhruai mai loh chuan, awmpui ka neih loh lai a ni bawk sia amah chauha han chhuahsan chu.." "aw,..umh, aw le aw le, a lawmawm ngawt ang" tiin a hmet hlum zui leh mai a.

'Kal hram rawh' pawh ka ti duh bik chuang lo.

A sawi mai dawn emaw ka tihlai chuan muangchangin a tho va, choka lamah chuan a chhuak phei leh daih a. Mahse, a thawm a țang chuan tukverh vel a khar fel a nih hmel e.

A lo lêt leh lai pawh chuan ka țhutna ngaiah zawi zet hian ka lo la țhu reng a, bangchhaklam depa almira chu a hawng rak rak a, enge a tih a, inthlak a tum nge tih pawh chu ka enzui chuang lo.

Ka bula a lo let leh chuan lehkha zawr ang reng deuh hi min pe a, a ngaihna hriat hmel loh zet chuan ka melh a, 'chhiar rawh' a ti sup a.

Chu lehkha chu a thlehna lai țhenkhat phei chu a thler deuh tawh a, a pentui pawh a dal raih raih tawh khawp mai. Lehkhathawn hlui a ni.

Dearest U Zira,

A hmasain min siamtu chung Pathian hmingin vawn loh chibai ka buk a che, Khuanu hualhimna zarah i dam ngei ka beisei a, keipawh ka dam lai a ni e.

Kan chhungkaw boruak hian rehlam a pan hleithei lo va, khawngaihtakin lo leng tawh lo mai rawh. Nangnena ințhen hi ka duhthusam chu ni lo mahse tunah hian ka nu leh pa te thu hi hnial ta ila, nakinah chanchhe zawk te lo awmpalh ta se ka belh leh tho tur an nih vang hian an thu awih mai hi ka tana țha zawk tur niin ka hria a, chutiang tur chuan khingbai angreng takin ka rilru ka siam fel ta a ni.

I hriatthiam ngei ka beisei,

Zotei

Tih thu a lo chuang a, ka bo viau thung. An inngaizawng a, an ințhen hnuah kei hi ka lo piang tihna em ni ang? A thuhrimah enge an ințhen chhan chu ni ta ber ang?

"Kha lehkha kha i nu kutchhuak ka dahțhat awmchhun chu a ni tawh" ka ngaihtuahna hria niawm tak chuan ka pa chuan a lo ti khauh a.

"Mahse, ka bo viau a ni.." 

Khuma tlukzal pah chuan heti hian an chanchin chu a sawi zui ta a-:

"I nu nen khan Shillong lama college kan kal laia inchhar kan ni a, kan inzui ngawrh ve khawp a, hna ka neih veleh inneih tumin kan inbuatsaih ve a, Shillong ațanga kan chhuahchhoh hnuah keiin Aizawlah  mi inhnuai luahin Private school-ah te hna zawnpahin ka inhlawh chho ve lawp lawp a. Mahse, chutianga kei thingtlang tlangval, hna mumal pawh nei lo vin an fanu ka lo duh ve viau chu a nu leh pate mit a kham thuai a.

A tirah phei chuan eng boruak mah an nei ngai lem lo va. Mahse, a rei tawlh tawlh a, min duh lohna chu an ti langsar tial tial a, han lenchang pawhin inbe lo satliah mai pawh ni lo vin mitmei kawi kan inhmuh ta fova. Mahse, kan induh ve țhin em vang chuan chuti maia kiansan chu ka tum chuang lo.

An ina ka len mumal ngam loh hnuah pawh pawnlamah remchang zawngin kan inhmu thova, thla ngam zan lo mah se kan la hlim ve viau tho.

Chutihlai chuan ka rilru hah ve bawk si chuan zuin te ka ching a, sim tura min ngen lawm lawm chungin ka thlah duh hlei lo va. Chutianga zuin mi ngaihzawn reng chu ani'n a lo duh lo chho ve bawk si. 

Chutiang neuh neuh vang chuan a nu leh pa nena kan inkar mai bakah amah nena kan inkar pawh chu a khi chho țan a, tichuan a tawpah chuan kha lehkha i chhiar kha ka dawng ta a ni.

Ințhen chu duh lo viau mah ila chutiang boruak țeuh a nih tawh vang chuan ka hna te pawh chu bansanin ka haw chho ta daih a, ka zu in țhin te pawh bansanin rilru puitling zawkin ka inngaihtuah a, a nu leh pa min hmuhsitna chu chhan let ngei tumin ka inbuatsaih a. Chutia kan khawlama ka hawchhoh hnulawkah chuan ka țhianpa hian lehkha min lo thawn a, chu lehkhaah chuan Zotei rai thu a rawn sawi a, a mak pawh ka ti hran lo. A chhan chu hun remchang kha kan ngah dun em mai a. 

Tichuan Aizawl lamah chuan ka tlan thla leh nghal a, i nu nen chuan kan inhmu ngei a, hruai ka tum lahin a duh bawk si lo va, kan inhau hrep nghe nghe a, ani pawhin ka fa ngei a pai thu chu a zep bik chuang lo.

A duh tak miau si lohah chuan keimah bawkin ka haw chho leh a, ka chhungte ka hrilh vek vangin i pi leh pu te pawhin an zin țumin an lo zu tlawh a ni awm e, chutah pawh chuan innei mai turin a nu leh pate an ngen a. Mahse, inrempui chu sawi loh hmusit takin an lo țawngkhum a niang, rilru damlo zetin an lo haw chhova.

'Nau a pian ve leh kan la ang, khutiang chhungkuaa kan thisen țhang lian tur hi ka duh lo' i pu phei chuan a ti hial a. Mahse, i lo pianhlim em em a lak kha chu a theih bik lo va, hnute i nghei fel chiahin kan hnen lamah kan hruai ta che a ni. 

Hna ka dil leh exam ka pek hoah ka tling hleithei bawk si lo va, a tawpah chuan High School zirtirtu hna ka hmu ve ta hram a. Khawdanga thawh a ngaih vangin kum 2 vel i nih lai chuan kal kalsan ta che a ni kha." A ngawi vang vang a.

"Ka nu chu vawikhatmah min hmu turin a lo kal lo em ni?" ka lo ti a.

"Kal e, ka awm loh laiin vawikhat chu a lo kal a niang, an sawi hmangin. A bula awm turin a thlem che a. Mahse, nangin i lo duh bik si lo a ni awm e. Chuta țang chuan a lo lang leh ta lo. A chanchin hi chu țhian te kâ ațangin ka hre ve leh zauh țhin a, a hranpa tak chuan ka ngaihven zui lem lo"  a thâwk huai danah chuan a sawi zo khat a ni mahna le.

"An in awmna vel i hre vek tho awm sia, min hrilh la, ka lo zawng chhuak mai ang. Nge, ka hmuh hi țul ila ti lo zawk em ni?"

"I hmuh chu ka khap hran lo che. Mahse, nangmah mai chuan hmu rih lo mahla a pawi lo. Ka theih ve leh ka lo phei anga, kan pahnihin kan hmu dawn a nia"

"Kan pheirual dawn lo maw, min dah dawn lo 'mi?" rang fe chuan ka lo ti a.

"Kan Department building thar tur sak kan lo țan chiah a, engemaw chen ka enpui loh chuan tunlai contractor te hna a chhe thei bawk sia, zinsan chi-ah ka ngai lo deuh a. A rei chuang lo vang, thlahnih khat vel a ni mai a, chumi hnuah te chuan office dawra lo kal tho a ngai dawn a..." a tih chuan hnial luih țalh emaw ngen luih hram emaw pawh ka tum chuang lo.

A chairman-na tur meeting pawh a fapa mal neihchhun huaibâk lutukin ka tih sukuk sak ta vek a nih chu. Lungawi lo hmel pawh a pu chuang lo.

Zing ka țhanharh chuan kei a khumah ka mu a, ani chhuatah! Ka zak ru deuh chem chem hian ka hria. Ka pa hian engtikah mah hrehawm ka tih hi a phal ngai dawn lo a nih hi. 

A khum chu a len lêm loh vangin pahnih han mutna atan chuan a hahthlak lam mah tur hi a ni a, pindan chhak lamah a driver mutna a awm tho si a, chutah chuan 'mu rawh' pawh min ti se ka hnial awm loh nen. 

Karhnih zet ka awm hnuah chuan haw chu ka chak ru et et tawh a, ka pa amah chauha awm tur ka khawngaih avang chuan haw ka sawi mai ngam bawk si lo. Zualtei nen pawh zantin kan inbia! A chang leh ka pa nen te an inbia a, inthlahrung lo va phone hman tur a awm vang chuan khawhar lutuk tur pawh a zia deuh. 

Kan pafa ti ti tam ber chu Zualtei a ni.

U Zela pawh a lo haw leh tak vangin kawm tur ka neih belh ve ta a, tlem chuan lunglen te pawh a zia deuh, a hma kha chuan chhunlamah ka pa hnaa a kal hlanin inah ka lo tawm rawt a, ka chhuah chhunah lah lenna tur ka hre bawk si lo. Khawlaidungah chuan ka kal chiam chiam ringawt a, ka peih loh tawpah ka let leh a, khatiang reng renga hun hmang ka nih vang khan lunglen loh theih pawh a ni lo.

Chutia U Zela a lo kir takah chuan chhunlamah ka pa office-a a dah hnuin motor khalh min zirtir ta a, intihthêng thâwn lai a ni bawka nuam ka ti kher mai. Hma lah ka sawn chak bawk.

Karkhat dawn kan inzuichhuah hnuah chuan zanlam, motor tlem laite chuan mahniin thui vak lo te chu ka chhuahpui ve thei mai a, bazarpui lama luhphei erawh chu ka pain a rem ti hauh lo thung. 

Keimahin nuam ka ti tluk zetin U Zela chuan ka awm ve chu nuam a tiin ka hria, a chang leh luiah te kan kal a, keilahin motor khalh theihna hun a ni tih hriain ka lo phurpui thei zel mai bawk si. 

Tlaikhat zu kan indun ringawt erawh kha chu ka pain min kamkhat dun hlak asin le!

Zankhat kan mu tur chuan "Pa, engatinge nupui i neih mai loh?" tiin ngaihtuah chiang manghlei lo hian ka zawng phawng a. "Fapa innghahna tur ka nei tawh che alawm, neih kher a țul hleinem" a ti.

"Mahse, mahni chauha awm chu i khua a har dawn e, keichu min ngaihtuah lo la, nei la a țha ka ti. I damloh velin a buaithlak dawn e. Hmundangah i awm daih zel bawk sia" ka tih chuan ka phak tawka ka ngaihtuah vena chu a hrethiam a ni ngei ang lungawi hmel takin a nui var var a.

"I tlangval hunah kan la zawng dun dawn nia" ti chauh chuan min chhang a, a ngaihtuah vak lo a ni ngei ang. Nge, ka nu lakah hian a rilru puthmang ala thlak lo zawk tihna em ni ang?

Light ka off zet tawh chu ka ti eng țha leh a, khuma vaițhut deuh at chung chuan ka pa chhuata mu chu ka thlir a, "A nih leh pa, nupui i neih mai loh chhan hi keimah tiam lo vin ka nu i theihnghilh theih loh vang a ni ber em?" ka tih chuan a maimitchhing chu a mengkawk a. 

Min melh zauh chung chuan 'Bawiha i zawhna a khirh țhin emai.." a ti leh ringawt a, ka hre chak asin mawle. 'Naa..' ti bai bai chung chuan khumah chuan ka let zui leh  thak a.

Ka kal ațanga thlakhat tlin nan ni li chauh a awm tawh tihah chuan haw turin ka inpeih ta a, Sumo-ah chuang tawh lovin U Zela'n ka pa motor (a dawn ni lo, ama motor zawk) chuan min dah dawn a ni. Ka haw chak viaunain ka pa chu ka ngai lawk a, ka khawngaih bawk. Ani pawhin ka hawsan tur chu a huphurh ve a ni tih a khawsaziaah a lang reng mai.

Ka chhuah dawn zingkarah chuan pawisa hi a lo lekchhuak a, "Pass i inring tho bawk a result chhuah hmain phone man tur chu ka pe mai ang che" a tih chuan ka lawm kher mai! Ka lawm tak zet a ni. Ka kuah chûk chûk hial alawm le. 

Ka lawm viau chhan pawh pawlsawm ka passed hma ațangin ka ngen tawh a, 'i puitlin hma chuan ka leisak lovang che, zirlai tan țhatna aiin țhat lohna a tam zawk. College i kal hunah chauh..' a ti zel kha a nia. Tunah chuan puitling angin min en ve țan dawn te pawh a ni mahna le.

Tichuan; ka pa, a ruka mittui tla tih hriatrenga meng sen deuh râm maiin min mangțha hnu chuan a quarter kawt chu chhuahsanin, Zawlkhawpui, 'i tel lo chuan hringnun kalh a kim lo a ni' lo ti ve mektu awmna lam pan chuan kan tlan ta vang vang a...

       

                 Chapter  

                       - VII -

Kan hmanhmawh lem lo bawk a Aizawl kan luh chuan ni a tla ruai tawh a, Zualtei'n kan kawtah min lo hmuak hlauh se aw.. A nuam awm mange.

Inchhung kan han lut chu ka nî chu a lo ri deuh hlut a, kawnglaka chawhmeh kan lei te chu lawmthiam takin a buaipui zung zung a, a hawntu tan chuan a hahdamthlak kher mai. Ka pa a țhat leh țhat loh te chu min zawt mawlh mawlh bawk a, Pa Hminga erawh chu hmuh tur ala awm lo. A la bang ve lo a ni ngei ang.

Zanriah an la kil bik loh vang chuan U Nghaki pawh a lo la awm a, choka lam ațang chuan a lo nui tak vur vur a.

Pa Hminga alo haw hnu reivak lo vah chuan zanriah pawh chu kan kil zui ve mai a. U Zela chu a chhungte inlama riah a duh vangin a chhuak zui leh mai a, chhungkaw pangai bawkin kan awm leh ta.

Ka nî nuihtlawn pah chuan a phone chu ka ban dai dai a, "Pindana luhpui lo vin khatah khan hmang rawh, kalsawn lo vin.." a la ti zui!

Thinrima sawi a ni bik lem lo bawka pawnlamah chuan ka chhuak zui leh ta thova, Zualtei nen chuan rei pawh kan inbe chuang lo. Ka thlen thu ka 'report' awrh chauh a ni. A bâk chu leng thuai tur te'n min sawm a..

Phone leina tur ka pain min pek thu ka sawi chuan an lawm lo lek lek niin ka hria, a chhan pawh an hnena awm ka nih vangin ka duh leh mamawh chu an kova tla tura an ngaih vang zawk a ni. Keia tan chuan han laknat chhan tur a awm lo chiang, lawm mai tur zawk ka ni.

Pa Hminga chuan ka pa chu a va be zui a, ka pa lah chuan 'pawlsawm pahnih i zawh hunah ka lo ti ve laklawh bawk sia' a lo ti et a, boruak chhe tur zâwnga lungloha la an ni lem lo bawka a țha viau zel mai.

"Naktukah ka rualin chhuak la, kan lei dawn nia. Nge, nangmaha en kher i duh zawk em? Chhunah nangmahin enkual la a țha i thlang thei zawk ang a, company hlun leh pangai deuh khawl thilah chuan en hram hram tur a nia" a ti zui a. Simcard lakchhuah awlsamna hmun te nen lam min hrilh hnu chuan nghakhlel taka ngaihtuah zui veng veng chungin ka muthilh san ta a.

A tuk zingkar ațang chuan Zualtei biak helin ka nîte nupa phone chu ka melh ru reng a. Chhunlama min chhuahpui tura sawm ka duh. Mahse, remchang a awm hleithei tlat lo. A pawi lo ni mai teh se. Ka haw tawh tih a hre thova, ka len a ring ve em ang chu ka ti ta ringawt a.

Tukțhuan te kan eikham fel chuan Pa Hminga chu a hnalama kal turin a chhuak zui mai a, ka nî nen chuan Gas stove kan țhiat darh a, uluk fe mai hian kan tifai a, kan zawh felah ka chhuak daih ang!

Kan tihfel meuh chuan dar 11:00 alo hnai thuak tawh a, hmanhmawh takin ka intuaifai thuak thuak a, ka insiam zui nghal mawlh mawlh a, "Bawiha, phone chu i en dawn em ni?" Ka nîin a tih pawh chu ka chhâng hman hram a ni ber mai. Em em lutuk a!

Kekawrbul dum, t-shirt var leh Converse - heng te hi ka ngainat em em leh ka chhuah hleka ka inbel tlangpui te an ni. Tunțum pawh a bikimin ka inthuam chhuah leh pek tawh hi!

Zualtei te in ka thlen chuan kawngkhar chu a lo inkhar deuh țhap a, Tala chuan a inkalh em lo. A pi chauh a lo awm ang tih ka hlau kher mai!

Doorbell awmna ka hre tawh bawka ka han hmet ri țang țang a, ka rinaiin thawm a reh rei riau mai ka ti. Vawikhat chu uar zet hian ka han hmet leh hram a, kawngkhar chu a lo ri ta rak rak a.

Pitar, lu a kelsam țo tawh hmuh ka inrin tehreng nen min lo hmuaktu chu chutiang awzawng a lo ni lo va, a va hmelțha kher si ve le!

'Lo lut rawh' pawh ti ta mai lo chuan kawngka biang nghengin awnfe hian a'n ding te te a, mi tihlaih te a tum deuh reuh emawni zawk le. Mi a en veng veng mai leh nghal a.

"Luh i phal lo tihna..?" ka tih chuan a nui chhuak ta nge nge a, kawngka chu hawng zauvin kan inzui lut dun ta a. 

"I lo va'n kal tlai em em, i lo kal dawn tawh lo a niang ka ti hman a.." mi melh râm râm pah chuan a ti hlak a.

"I nuih zawh chauh kha.. tikhan i hmuite tichhah vel lo la.." ka tih chuan a uar zual sauh a. Sofa-a ka țhut tawh hnuah pawh chuan ka hmaah chuan a la ding ngar a. 

Mi pawh a chhang duh lo, lungawi loh hmel zet chuan ka pheikhawk zawn vel chu a bih tlat a, 'khatia i tûm khan i hmel a țha zawk daih a nih kha' ka ti chiah chu a thawk lawk a, min rawn chum taih taih mai asin le!

Ka samah te a kek thul, ka hnungah te a beng bawk! "Suala.." a tih leh pek kha.

"Ka sual chung chung pawh hian ka ngai tho che alawm" ka ti zui hram a.

"Min ngai lo bawk, min ngai ni la khatianga rei i châm lo vang"

"Ka pa amah chauhin a awm a, min ngai ve bawk sia.."

"Chuan...ka ngaih ve che i ring lo tihna maw!?" a tih chuan chhân ngaihna ka hre vak hlei lo va. Ani lah chu tihtauh chak hmel tak chuan a khawsa zui reng bawk si.

"Mawhhh...mawhhh, 'tinge i chamrei em em chhan chu!?" 

"Ih maw, motor khalh te ka zir a, chuan ka pa ka awmpui khan phone man tur ka hlawh bawk a... A țha viau lo mi?"

"Phone i nei dawn maw!?" keimah ai aiin a hlim hmel zawkin ka hria.

"Umh, father-in min pe alawm"

"A van țha, a nuam awm bik e, ka lo kawl țhin ang a.." a tih chuan kan han nui dun leh rih a.

"Naa... ka tûm ve hman asin mawle, a va ho tak" tiin ka lu chu a tuai chiam ringawt a.

"Khawnge i pi?"

"Mitthi ka râl dawn a tiin ka hria. I ngai a mi?" deuh kher chuan. "Ngai lo lutuk, hei hi ka ngai" tih pah chuan a kawngah kuahin ka lamah chuam ka pawt hnai a, ani lo inring bawk si lo chuan min bawh deuh ruak a, țhutthlengah a ke a lo hlang bawk nen mu em lo mah ila ka chunglamah chuan a țang a ni ti tuai a.

A sambu chhah tak lo uai hnuang mai chuan ka hmai chu a zar tawk vel viau a ni. 'Harh suh aw' a tih chuan ka kuah nghet zual sauh a, chutia ka kuahngheh tak sauhah chuan a hma aiin min hnaih lo thei si lo, a sam chu ka bek tawnah chuan liamin hnai feah chuan kan inmelh ta ran mai a.

Hnai set sawtah chuan mi han chhiatkhum teh reng a!

Ka bân veilam chuan a tukkhumah dawmin muangchang chuan ka kuaihniam tial tial a, kan taksa a insîk thleng chuan...

"Awm țha ang, âpi a lo haw thut chuan a chi loh viau ang" tiin ka kuahna ațang chuan a talchhuak a, a sam pawr deuh phang mai chu a huih mam thuak thuak a, 'throw pillow' chu pawmin sofa-ah chuan a vaițhut deuh ât a.

"Bazar chu..?" ka ti ringawt a.

"Enge bazar..!?"

"Min kalpui hman dawn em?"

"Min kalpui rawh pawh i ti bawk si lo va,  min ba țhin leh lawi bawk si" lungawi lo deuh anga langa mi thlêk pah chuan a ti a.

"Ka sawi tawh emaw ka tia lawm, 'khawngaihtakin bazarah min kalpui thei angem Zualte?'" ka ti chu a nuihza bawk ngei bawk si chuan a 'throw pillow' ken chuan min vawm zauh a.

A dingchhuak zui nghal a, 'kalpui i duh tak tak em?' a ti a.

"Umh, duh chiang.." ka lamah chuan a lo kal phei hret a, a kut pahnih chu ka lamah chuan alo phar chhuak a, mi kaitho dawn emaw ni tiin ka lo dawm sak a, inkaihthawh lam pawh chu a lo ni hran lo.

"I duh tak tak chuan 'Zualte, ka hmangaih che' ti phawt la" zuk ti mauh a! 

Mi tupawh ni se, țawngkaa 'ka hmangaih che' han tih chiam hi ka tum ngai hran lo asin mawle. Chetziain a hril turah ka ngai mai a.

"Heti hian i hrethiam mai lo 'mi?" ka tih chuan 'hm..' tiin a inthing deuh nghar nghar a, ka kuta hmer nat deuh salh pah chuan '..sawi dawn em?' a tih leh pek chu!

Ka dingchhuak chu kan inhnaihchilh bawk a kan inkuah zui a ni nghal mai a, fawh ka han tum ngawt chu a lo thlesawn zel bawk si, 'sawi phawt la... sawi loh chuan..a ni mai' a ti.

Ka sawi chu nghahhlelh hmel tak hian min en kiauva, han sawichhuah mai chu thil awlai a lo ni hauh lo mai ka ti. Thinlunglamin pawm viau mahse chutia ba țhin taka han ințhîn a râlah chuan khâ a chih ve deuh a ni e.

"A har viau a niang maw?" tiin min thlirna mit chu a lasawn a, ka nghawnga kuah reng chung chuan hmundang chu a melh daih a. A lungawi chiah lo a ni tih chu a thawklak dan ațang chuan hairual a ni lo.

"Zualte..." min chhang lo va, ka lam a lo hawi phah hek lo.

A khabeah chuan dawmin ka lamhawi chuan ka han kuai a, hreh hmel tak chuan a țang khawng hle a. Mahse, ka duhna thleng chu ka kuai thei tho e.

Chiang zetin a mitah chuan ka en a, a mittui tling pam mai te chu ka hmuh hmaih bik hauh lo. Engngatinge ka sawi ve mai loh le!?

A hmui chu a khur der der a, ka nghawng a kuahna pawh chu țang tih hriat reng hian a khawng lah tawh. Țahchhuak insum niawm tak hian a hnar chu a thaw vang deuh hek hek a, a maimitchhin vanga a mittui lo luang chhuak ngiai ngiai chuan 'Ka hmangaih zia' min hriatchiantir hlein ka hria.

Dimtein a hmui leh ka hmui chu ka intawh tir a, a mittui luanna a bianga huh thla phiang chu ka kutzungpui chuan nuaireh sakin - 'Zualte, ka hmangaih che'  ka ti chhuak thei ta hram a.

Insût hraih pah chuan min kuah châwih a - kha hmangaihna khawvel nemnghehna hun kha a va nuam tak em!

Min kuah nghet kher mai. Kan lungphute pawh kan ințawm ta emaw tih mai turin a phût dan nen lam kan inhriatpui pha tlat nia. 

Muangchangin alo dâkchhuak a, mi en vang vang pah chuan "Mi tih hrehawm hi chu nuam i ti ngawt mai tiraw, a tirah pawh i sawi thei reng a..." hnawhtu awm ang mai chuan a ti țiak a.

Rei ngial chu kan inkuah beh kha..

"In siam tawh la, i duh ka ti tawh bawk a, min kalpui thei tawh ang" ka tih chuan ka hnungzangah chuan a țham tawn a, a kunhniamin a chal chuan ka âwmah a tauh dat dat a. 

"I sual emai ka kalpui lo tawp dawn che emawni le" ti a.

"I insawibat kha..."

"A țhulh theih tho alawm" tiin a hmui chu min tihpawrh khum a, min kuahna te pawh a thlah fel ta. 

An in ațanga kan chhuah thleng chuan a pi pawh chu a lo la lêt lo va, ngawirenga chhuah chu nuam a ti chiah lo tih ka hre reng mai. Mahse, hrilhtur an awm miau bawk si lo. An inhnuai lamah tlanthlain chahbi dahpahin a zuk hrilh ta a niang.

Ka hlim veng veng mai hian ka hria, hetiang taka mihring hmangaih hi ka nei thei pawhin ka ring tawh lo. Ka en a, en satliah mai pawh duhtawk lovin kalpah te chuan ka thlir a ni ber mai. Ka va han duh hliah hliah tak!

A khawilai mah chu han sawisel tur awm pawhin ka hre lo. Mitmeng lian lam, hnarngul sang lam hret, hmaihlai ti a sawi tur ni lo, sîn hauh bawk si lo. A hmui chu a chhah hret em aw te ka tia. Mahse, chu aichuan pan se ka ti chuang der lo. A mawipui satliah a ni lo; a nalh a, a inhmeh em em bawk asin. 

Tichuan ka lam hawiin a lo nui leh ver ver țhin bawk nen.

Phone zawrhna dawra kan han lut te chu ani tlema la zakzum ve deuh bawk nen ka kutah chuan a lo dawm leh ran țhin a. Chu thil, ho te anga lang si chu ka tan a hlu a, a nuam em em nia.

Ka en apiang chu țha a lo ti thei mai zel a, a fel vang nge a ngaihtuah chian loh vang pawh ka hrethiam chiah lo. 

Pa Hminga thu min chah chu hre rengin dawr pakhatah mai en lo chuan kan enkual zel a, ni a sat deuh vang chuan khua a lum bawk sia a biang pawh a tai țan tawh. Mahse, ning hmel pawh a pu chuang lo. A hlim em em mai hian ka hria, kei ka hlim em vang ni maw.

Phone kan lei fel meuh kha chuan Dar 2:00pm kan thleng thuakin ka hria. A hmalamin sim card kha lo la lawk lo phei ila chuan kan vâk nileng țhiai awm e. Keitak pawh chu khawlum chuan min hmet chau lek lek a ni.

Kan vâk rilțam deuh bawk nen dawra chawlh ka rawt a, 'inah eitur siam zawk ila, wai wai kan chhum ang a' atih chuan ka pawm leh hle mai.

Muangchang chuan an inlam pan chuan kan kal dun a, tihdan ngai te bawkin vur bawk a ni kan khel dun leh pek ni!

Inah chuan a pi a lo awm tawh a, 'khawilamah nge inchhuah a?' te tiin min lo besawm thuai thuai a, a fel roh khawp mai.

Wai wai chu a chhum rak rak a, an chaweidawhkan kil meuh chuan kan ei dun a, a pi lah pek chuan 'chawțhing nen hian a tui asin, hmanniah kan ei alawm' tiin an chawțhing chu a lo chhawp hluai a, Zualtei sen deuh țan țan chu ka hmu reng!

Phone khawihdan te chu kan zir dun a, thla kan la hnem mah zawkin ka hria. Kan hlim dun tak zet a sin. A nu number chu ka 'save' luh hmasa ber a ni.

Eirel hun hma deuhin ka haw ta a, chutia ka kalsan takah chuan ka ruak deuh huai hian ka hria a, kekawrte ha lo va kal te pawh ka nih duh hmel, tumahin min hriatpui ve bawk si lo va.

"Khawmaw i phone thar chu.." tiin inchhung ka penlut chauh chu U Nghaki chuan a lo ti nghal a.

Chhuang zet chuan phawrhin a thla te chu ka laksak vel a, a hlim ar ar teh asin.

"Khawmaw thlalak kha enchhin ang" tiin ka kalsawn tur chu min chelh leh a, a thla ka laksak ho chu kan en dan dan a, ka tuai thui ta deuh hret a ni. Zualtei nen kan lakdun chu a lo lang hman ta tlat mai a, insawifiah vak ngaihna pawh a awm lo.

"Khawimaw, ava chhe lo reuh ve a" tiin a dang te chu a la enbelh ta lai a, a zahthlak lek lek a ni.

"Muah tawh em?" a ti țan leh ta!

"Umh.." a hmel chu leh! A awih loh hmel asin.

"I ngam ka ring lo"

"I ringdik lo tihna a nih chu"

"Ama'n a ti hmasa che a ni lo maw?" ala ti țalh a.

"A teuh lo mai; a zakzum lutuk, a ngam lo vang amah chuan"

"Ve ngei a.." a ti duh lek a.

"Ka zei tawh lutuk.."

"He he he... " tiin min nuihsawh zet chuan a nui a, 'i zei tih hi e, awih a har' a ti! Keipawh ka nui ve ringawt.

"I bialnu chu lo hruai tur che lawm"

"A ho e mai a, i thik ang" ka tih chuan a run kher asin.

"Ka thîk awzawng lo e, emaw i ti mai mai a niang"

"Emaw tih turin i awm a niang!" ka la tihsak hram pek a.

"Lalmalsawm, lutuk a che aw. Duh che chu ni ila ka chhuah teuh lo mai che"

"Min duh a, min chang lo, aaleh...zak ang chu.."

"I va han nasa tak e aw...i zei lo si, ka duh bawk lo che, ngaihzawn man i awm lo vang, engmah i ti ngam awm bawk si lo"

"Ngam loh chhan tur a awm lo e, mi paw'n an ngam alawm le"

"I ngam chuang lo vang, 'pa lo' emai" min han tih fahran chu! Fiamthu rawngkaia inbânlek mah ni ila 'pa lo' tih țawngkam kher chu ka pawmzam thei hauh lo!

Nui ruh ruh chung chuan ka pan hnai a, a hnunglam ațang chuan ka va kuah thâwr a. Rawlthar thisen lum lai leh thisena inzawmna reng reng nei lo ta chu pangti han innâwk chuan boruak a siam rang kher mai. Ani lah a boruak ti sa zual tur tawk leka khawsain, a sarhu ngam tur tingin sulhnu alo nei tum hrang bawk nen, kan tur et et ta mai le!

Țhutthlenga sirtlukpui ka tum chu mi nam lêt zel a, hnunglamah chuan mi nam zel a, a tharum ngah zawk e ti lo chuan ka tawlh zel lawi bawk si. A tawpah chuan ka pindan lamah chuan min khalh lut ta nge nge a!

Dingchung khan rei lawh kan inkuah hmanin ka hre lo, min namsawn dawrh a, ka pindan ațang chuan a chhuak nghal thuai a. Mak ti tak chuan ka zui chhuak nghal a, ka nî a lo haw lek chu niin!! A thawm ka hriat loh kha U Nghaki chuan a lo hre kar ni tur a  ni. 

"Bawiha phone chu i lei ta em?" a lo ti thuai a.

"Aw lei e" tiin pindanah chuan ka lut leh nghal a, ka zawng ngial a ka hmu bawk si lo. Hm, pindanah ka la keng lut reng reng lo! Chaweidawhkanah chuan ka lo dah reng chu niin. Ka nî chuan a'n thlek ve ngial bawk a, chuti takin a țhat leh țhat loh a hriat vak pawh ka ring lo. 

Ka rin ang ngeiin 'A mawi khawp mai' a ti daih! A țhat leh țhat loh han en vakna tur kha a hre dawn chuang lo va.

Ka nî chuan min ringhlel mai ang em? Tih ngaihtuahna chuan ka rilru a ti buai viau, ka awm a nuam lo. Engtia han tih vak ngaihna a awm chuang bawk si lo. Ka nî mitmei chu ka veng ru reng a ni ber mai a. Pindana ka luh leh ka rilru a nuam lo va, ka chhuahlahin tihtur a awm chuang bawk si lo.

Min hau dawn a nih pawhin U Nghaki awmlai kher chuan min hauh ka ring lo deuh, zanriah eikham lamah, U Nghaki haw hnuah min hauh ka ring ber zawk a, ka huphurh kher mai!

Pa Hminga a lo haw pawh chuan eng boruak mah kan nei hran lo va, ka nî chuan min ringhlel lo a niang a, a ziaah danglam engmah ka hmu mai bawk si lo va, ka phone leithar chu kan en tal tal a, dan pangngai bak a boruak chuan a pelh pawh ka hre hauh lo mai.

Zanriah kan kil lai chua "Putarte, i pa i hrilh tawh em i thil lei chu?" tiin min zawt a, ka hrilh lo tih ka hrechiah. Bakah, a nachang pawh ka lo hre lo a ni ber mai.

"Hrilh miah lo, ka lo theihnghilh daih a.."

"Hrilh ve la aw, a nachang i hriat loh ve khiah chu le" a tih chuan 'awle' ka ti ve mai a.

Zanriah eina kan tihfel hnua U Nghaki haw tur chuan ka dul nemah a piai chiam pek a, keilah piai haw mi ka lo ni bawk si, ka țe chiam pek a! A zia lo ang reng khawp mai.

"I U Nghaki lah hi aw, a chhah ve bawk si. E, Nghaki, naktukah i lo kalpahin sahdah kha min lo lei leh teh, pakhat chauh a awm tawh a" Pa Hminga chuan a lo ti a.

Ka pa biak tumin ka pindan lam chu ka pan zui nghal a, a tlang thei mai lo leh  nghal, signal a nei lo emawni chu le.

A tawp a tawpah chuan kan inbe thei ve ta hram a, 'nunphung tidanglam leh tikhaihlak khawpa phone khawih loh tur a nia, mi bula awmin khawih sek loh tur. Zirlai i nih kha hre hmasa ber la, chintawk i hre dawn lo a nih chuan tih ral kha i tan a țha zawk ang. I zirlai tihchhiat phah a rem lo a nia' tih leh thilpawimawh tak tak min hrilh țeuh mai.

Kan inbe zo phone ka hmethlum chiah chu 'Message tone' a lo ri țang a, Zualtei nu! Amah Zualtei message a ni ngei ang tiin phur fein ka hawng a, mahse, phurpui hluai chi awzawng a lo ni lo.

"K byak loh ce cuan ph rih suh o, len pawh a ci loh kinah hrilh ang ce' tih a lo ni a, enge maw a awmzia ni dawn le?

       

                  Chapter  

                      - VIII -

A message vang chuan rilru nuam lo deuhvin ka awm a, ka phone ngam chiah bawk si lo. Eng harsatna nge maw a neih le? Ka biak dawn chuan a nuin a lo la ang tih ka hlau bawk si.

Bet lo zet chuan hun ka hmang chho va, Zualtei lah chuan min rawn be ngai lo va, keiin ka be ngam bawk si lo. Hun hrehawm tak ava ni tehlul em.

Tukkhat chu 'enge hetia chiang mang hlei lo va awm ngawt aichuan a nu office hlanin zuk chian teh ang' tiin ka tuang ka tichhah lui a, an inlam pan chuan ka kal ta a.

Min duh lo va ințhen a duh a nih pawhin rala khata hetia inchhaih ngawt lo deuh hian kan sawifel ve ang chu. Bulțan lama dawih viau e ti lo chuan a saseh tak takah chuan ka ngaihtuah buluk leh viau lawi a. Mahse, ințhen lam erawh ni lo hram teh se.

Hmuchak bawk, huphurh ru tak si chuan ka kal a, an kawngkhar chu tala hian a lo inkalh țhap mai! Lungawi lo thinrim thawk thut chuan an kawta cement bag a engemawni an dah chu ka pêt pawp a, ana lutukkkk!

Leinawi vel an dahkhawm mai mai emaw ka tih chu a lo ni awzawng lo, cement an lakchhuak bang, tuihuh vanga lo châr vek tawh hi a lo nia! A na a ni tawp mai!

A bulah chuan ka țhu nuaih a, ka pheikhawk phelhin ka ke chu ka chul hauh hauh lo thei lo a ni.

Ka kephah chunglam chu a vûng nghal deuh mai a, a va han țul lo tak!

Chutia țhusawp meuha ka lo intuai hauh hauh lai chuan inhnuai lam ațang chuan Zualtei chu chahbi vaivir lauh lauh chung hian a lo chho a, ka ke chu a na sawt!

"Enge awmzia, 'ngatinge khatia i awm?" tiin min lo pan phei nghal thuai a, keilah chuan na ber awm hrim hian ka ke chu ka lo kawk ringawt a, 'engtinnge i tih a?' a tih chuan hei hi ka pet han tih ngawt kha ka zak ve bawk si. 'Ka bilh' ka ti ta ngawt a.

"A na viau em, a vung nghal a ni maw!?" tiin a chul deuh thuak a, 'Engtia tih chi nge, Damdawi inah kalpui ila!?'

"A ngai lo, chutianga pawi engtham mah a awm lo vang" 

"A awm mai thei asin, khatia awmpui ringawt te chu"

"Bilh te chu a dam ve mai alawm, tuilum ten kan zut ang a, a ho tham lutuk.."

"Inchhungah lut ila chuti a nih leh, i tho thei em?" tiin ka zakah chuan a lo dawm a, ka pheikhawk pawh bun ta lo chuan kan inkai su ta lauh lauh a, a veilam chuan ka pheikhawk ala khai zui a!

Țhutnaah min dahfel thlap hnuah chuan choka lamah ngawirengin a kal phei a, a mizia chu danglam em em ka hmu bawk si lo va, enge maw kan inbiak loh chhan hi ni ta ber le? A mak ka ti hle mai.

Lungawilohna nei te chu ni se chuan a awmdanah engemaw te chu lan ve awm tak a nia, chutiang engmah ka hmu bawk si lo. Ka message dawn kha amah a ni lo emawni hial le!?

Ka phone chu ka han en a, a nu number ngei ațanga ka dawn a ni bawk si. Chutiang vel ngaihtuaha sawt mang hlei lo va ka țhut sawih reng lai chuan tuinoah hian tuilum hi a lo chawi khu vat vat a, eheu leh!

Ka hmaa dawhkanah chuan a hûng a, min han melh leh ren rawn hnu chuan a pindan lamah a lut zui leh daih lawi a, engtia mi tih chu a tum ni maw? Ka ke zûtna tur chu a ni awm phawtah!

Face towel nen a rawn chhuak leh a, ka bul chhuatah chuan a țhu hniam ta tlat mai ka ti!

"Khawi ka ti thei alawm, keima'n ka lo ti mai ang" ka tih chuan a lo dâk chhuak zawk chauh a, ka kekawr hlimsan pah chuan 'I thei lo ka ti hleinem' a ti bauh a.

A towel te ken chu a chiah huh a, uluk fe mai chuan ka ke chu hru-in a zut zui hauh hauh a. Na tur ut ut a ni lem lo bawk a lehlam zawng taka ngaihtuah chuan a nuam phian!

"Khawnge i pi?"

"Amh.. An bethel in ka hria, Kohhran hmeichhe ho nge maw ni"

"Khawiah, Biak inah maw?"

"Ni lo vin ka hria, Picnic spot-ah emawni, ka hre chiang tawh lo"

"Chuti chu nilengin ka awm thei tihna a nih chu" ka tih chuan a hmela danglam hmuh inbeiseiin ka lo thlir reng a, engmah hmuh pawh a awm chuang lo. A zut ngai chuan a zut heuh heuh ringawt a.

Hetiang a nih chuan sawichhuah kher hi a ngai dawn emawni le. Țha taka kan awm theih tho te chuan țul uk lo kan sawi anga, kan inbakkaih phah zui ang tih te pawh ka hlauh deuh.

"A hma aiin a vung nasa tawh zawkin ka hria, zut hi a ngeih lo a niang" a ti chhuak hlawl a.

"A la hlimchhawn em alawm, a vung kha chu hlauhthawnna chi pawh a ni lo"

"A na viau em?" mitmeng de deuh sar chuan min han melh a.

"Na hran lo ve, a tur deuh et et a ni mai" 

"I haw dawnah a buaithlak duh awm, pheikhawk i bun thei dawn mi?"

"Ka hre lo le, thei maiin ka ring" ka tih chuan a tho a, Fridge chunga bawm an dah chu ava hawng rak rak a, damdawi leh tuino nen a lo kir leh a, 'Nachhawkna hi ei la, khatia tawrh tawp ringawt chu..' tiin min pe a, hnial buai lem lo chuan ka ei zui ve mai bawk a.

Tuilum vel pawh chu dahfel chuang lo vin ka bulah chuan a lo țhu a, ka kawr bâna bawlhhlawh kai te chu a'n tuaithla leh lawk bawk a. A lam hawia ka thlêk chuan sawiduh nei hmel chu ka hmu thiam ta!

Inthunun chu a tum ve hle a ni tih a awmdan ațang chuan a hriat viau a. Eng tak chu ni ang maw.

Ka hnunglam ațang chuan dimte hian min kuah a, ka ke awmdan vang chuan kan awmdan chu a rem țeuh lo hle mai a, ka dar dinglam ațangin a kuah a ni mah zawk ang. Sir zawng deuh hlekin.

Ingeuh zet chuan a hmuiah chuan ka fawhsak hram a. Mahse, ka thle nasa deuh bawk nen rei chu ka dawl lo, ka nghawng a kham! Hmalam chu ka hawi zui leh nghal mai a, ka beng bula a thaw lum ham ham chuan ngaihtuahna a tibuai phak dawn mai.

"Enge i 'message' kha a awmzia?" hmalam en vang vang chung chuan ka ti a. Lungawi lo anga lan hmasak zawk a țul thut! 

"Engmah a ni lo, ka sawi ang tawp kha a ni mai"

"Enge i sawichhan? Enge a awmzia a nia ka zawh che?" ka ti nghat a.

Ka khabeah chuan dawmin alama mi kawihher a tum chu a hlawhtling lo chiang kher mai. Ka duhzawng ka hriat hma chuan a thu anga ka awm a țulna ka hrebik tlat lo a ni.

A thawh hnihna atan a ngaibawk chuan mi kawihher chu a tum țha leh a, a hlawhtling chuang lo. A tihdan a thlak takah chuan ka tan chetlak dan tur a ti khirh viau a ni.

A tho lawka ka malchungah chuan rem fe hi a țhu a, ka tukkhumah a kut a suih sauh sauha lawm loh hmel tak chuan min melh a. A ho e, keipawh ka lawm bik hleinem maw le.

A bul ațang bawk chuan min hnimhnai țha leh a, mi fawh ngei a tum a nih si hi maw! Keilah ka lo thlesawn zel mai bawk si, 'U Mes...a mak ee..' a ti fan deuh raih a.

"Ka zawhna kha chhang phawt rawh"

"Ka chhan tawh kha.."

"Khatiang chhanna a ni lo"

"Vawikhat chiah, umh... chuan ka chhang ang che" tiin a rawn tihnai leh dai dai a, ka hmui chu chhunglamah ka lo tilut daih a, ka nuih a za deuh bawk sia, thinrim ala ngai bawk si! Ani run lutuk chuan ka hnarah a seh hmak a sin le!

"Sawi phawt la..." ka tih lehah chuan a tîm deuhin ka hria, hriat ngei ka duh leh tawh bawk si. Menghnuai raih chung chuan min thlir a, a sam chhâwlleng a hmai zartu chu huih kian sakin ka lamah chuan ka kuai hnai zui a, 'sawi dawn lo tihna maw!?' ka tih chuan min kuah chawih a, thawk a la ham ham a, eng thil nge mawni le. Sawi a har viau a ni ngei ang.

"Sawi lo mai rawh. Mahse, ka laka zêp i neih chhung chuan ka hlim ve thei lo vang" muangchang leh ngeiawm fe chuan ka ti zui a.

"Ka sawi dawn alawm. Mahse, sawi lo ila engkim a pangngai thei zawk asin.." a ti sap a.

"Ka hriat loh hian ka pangngai i ring em nih leh?" ka tih leh chuan mi chhan vakngaihna a hre leh lawi si lo. 

"Ânuin min hau a..." a ngawi zui leh daih a.

"Engtin nge a hauh che a, keimah vangin maw!?"

"Ah ni kher lo vang, 'zirlaite in la nia, ngaihzawng neirual in la ni lo' a tia, bazara kan chhuak kha min hmu a niang a sawi a..."

"Chuan engtinnge i chhan a..?"

"Ka ngawireng, ka chhan chuan a thinrim zawk ka hlau a"

"Chuan..?"

"Enge?"

"I thutlukna chu enge ni ta a?" nghakhlel lo ru angreng tak chuan ka ti a, ka hre chak viau lawi si.

"Harsatna ka nei lo turah ka ngai a.." a tih chuan phawk zeta melhin 'Eng chu, ințhen chu maw!?' ka ti deuh hmuk a.

"Ni lo ve, khati'n lo lungngai viau lo la, sawi zawh hma hmain.." a tih chuan lawm lo ru deuh, lawm ang reng bawk si chuan ka melh ran a. 

"Ințhen chu ka duh lo. Mahse.." a ti hul hak a.

"Enge mahse chu?"

"I lo len a rem rih dawn lo va, hmuh pawh kan inhmukhât dawn tihna a nia, a hrehawm ngawt ang, i thei ang em?" tiin inthiam loh hmel tak chuan min en a. Keilah chuan chhang mai duh lo vin inngaihtuah ni awm fahran chuan ka ngawi zui daih a.

"I theih loh chuan ka tan chuan tihngaihna a awm lo a ni mai, ânu hi a tih loh lamah chuan a khirh ve bawk sia.."

"Inhmu miah lo leh biak pawh inbe ngai lo va inngaihzawn chu enge awmzia ni ta ang le?" dimtein ka hmuiah chuan a lo fawp a, min kuah nghet viau thung.

"U Mes, ka hmangaih che niin ka hria, ințhen chu ka duh lo"

"Mahse... chutianga kan awm si chuan ngaihzawng nei lo va awm nen a in ang reng alawm" thawk a la ham ham a, a taksa țang țeuh chuan a rilru chu a lanchhuahtir niber hian ka hria.

"Ințhen chu ka duh lo..." țahchhuak insum niawm tak chuan a khur deuh der der a, tihvak ngahna a vang khawp mai. Inhmu ngai lo, inbe ngai bawk si lo va inngaihzawn chuan awmzia a neiin ka hre bawk si lo. Ani paw'n han ngaihtuah chiang se chuan thil theihah a ngai bikin ka ring lo.

Chutia ngunthlûk leh mûk fahrana kan inpawmchial lai chuan kawtlamah chuan  țawngthawm ri deuh lar lar chu kan hre ta tlat mai a, a tho nghal zawt a, a pindan lamah chuan a tlanlut nghal daih a,  keilah chuan ka ke vang chuan duh ang anga chet ka harsat bawk si.

"Lo tlan rawh, a lo lut hman ange" tiin a pindan kawngka ațang chuan min lo hui lauh lauh zui a!

Pheikhawk pawh bun hman lo chuan ka khawngkhawbai lut a ni ber mai. Ka pheikhawk khing pawh chu ka la kalsan daih zui! 

"Ka pheikhawk.." ka tih chuan ka hmui a hup thuai a, almira lamah chuan min nam kat deuh dat dat a, ka ke nâ pawh a hre chang tawh lo.

A pu chu a lo lut tawh a ni ngei ang Zualtei chu a au lauh a, Almira kawngkhar chu a hawng a, chumi phenah chuan kei ka ding thung a! Hmundang bihrukna tur a awm bawk si lo alawm.

A pu hmutur chuan a chhuak zui nghal a, an inbia tih chu ka hria a, enge an sawi tak erawh ka va hriatpui phak lem lo.

A hnu deuhah chuan a lo lut ve leh mai a, ka pheikhawk khing khai chuan a nui var var a, 'i ke a na tih pawh ka lo theihnghilh hman alawm' tiin min kai zui a, a khumah chuan min țhuttir a, 'a chhuak leh nghal a mi?' ka ti zui zat a.

"Chhuak lo ve, âpu chu a hlauhawm vak lo, alo lut chuang lo vang" 

"Mahse, chhuah dawn hunah..?"

"A kalbo lai kan chang mai dawn lawm" a ti zui zat a, a duhna lamah chuan a fing phian bawk si!

Chutia khuma han țhut takah chuan tlukzal mai chu harsa lo tak a ni. Mitmei ven ngai a awm tak si lo vah chuan ka thal der mai a, ani erawh a țhut ngai chuan a la țhu ran a. 

"I ke chu a la tur em?"

"Aih, a zia awm viau e" ka ke dahna lamah chuan a kal phei a, a va endik ni tur a ni. Ka pheikhawk la bun chhun pawh chu a phelh zui a, khum tlãnga ka dah liam chu khumlamah a dah zui bawk a. 'Mu țha rawh' a tihna.

Thosi len ban vuan chuan a ding a, min en kiau chung chuan "Inhmuh loh chu i hreh viau em ni?" a ti a.

"Umh, inbe tal ila chuan a ziaawm a, chuti a nih loh chuan awmzia awm lo" ka țawng ring deuh a niang a hmuiah chuan a kutzungchal chu a chhawng va a. Khumah chuan a lo țhu zui nghal a.

"Ka chhungte hian min hau ngai lo, inhauh tir pawh hi ka duh chuang lo va..."

"Anih chuan kan ințhen a ngai a nih chu" ka lo ti ram hmak a. Sawi chhunzawm lo chuan a ngawih rauh rauh a. A kutțang a elh niap niap a.

"Ințhen chu i duh viau tihna maw!?" a ti sap a.

"Ka duh lo. Mahse, i duhdan anga kan awm chuan enge ințhen nen danglamna awm chuang?" ka lo ti let a.

"Phone ka nei ve bawk si lo va, ânu phone ka hmang ngam bawk si lo va, tihdan tur a vang em alawm"

"Tum te chuan tihdan a awm ve mai ang chu" ka la tihsak țalh a.

"Engtinnge ka tih ang a?"

"I pi phone te pawh.."

"A chi teuh loh mai"

"I pu.."

"E, âpu phone a hman theih mai theih a ni. Mahse, duh hun hunah chuan a theih dawn loh a nia"

"Chu'ng te chu hriatsa a.. Pawnlamah pawh a inhmuh theih a lawm inbiak theih chuan"

"Khawiah maw!?"

"Ka hre bik nang, a remchang a awm mai ang chu"

"Kan inhmu dawn chiang lutuk.." tiin ka malpuiah chuan a piai vak a, ka auchhuak țep alawm mawle.

A banah chuan pawtin ka hnûkhnai a, duhthawh zet chuan kan infawp mial mial a, ka kut chekual ve tur erawh a dang hneh char char khawp mai!

Ka haw tur chu kan buai ta, a pi lo thlenhmaa haw fel ngei ka duh bawk si. Ani pawhin chu chu a duhthusam a ni. A pu chu an țhutkhawmna pindanah TV enin a țhu ngar mai bawk si a, chu hmun chu paltlang ngei angai. Zualtei pindan panna kawng a ni miau a.

"Engtinnge kan tih ang, âpu saw a awm tlat bawk sia" tihdan tur tak pawh chu ka hre chuang lo. Tukverhah lah chuan iron  bar an vuah vek bawk si. Chhuahruk tum chu Sazu kuaa luh tum tluk zetin a har hial ta ve ang.

Reingial chu tihdan tur kan ngaihtuah a, kan ngaihtuah rei poh leh kan buai a ni mai. Sawtna awm lo kan ngaihtuah chiam ringawt a ni. 

Tihdan tur ka ngaihtuah chhuak ta. A țha ang em aw..

"Va chhuak phei la maw, i pu bulah khan 'thingpui ka lum dawn, i duh ve em?' i ti anga, chuan i va chhuang ang a, gas cylinder-ah i off ang a, ka ti alh thei lo i ti anga i koh phei dawn nia" ka tih chuan a lo nui kar kar a, "Ka va ti ange" tiin a ding zawm nghal a.

"E leh lawk, i chhuahpahin sitting room lam kawngkhar kha hawng la"

"Kan hawng ngai si lo va a hrethiam ange"

"Hriatthiam loh turin bawlhhlawh paihtur kengchhuak la" 

"Bawlhhlawh chu a vang awm e"

A lehkhabu bawma lehkhapuan chu ka pawt thla a, ka hmethrual nawk nawk a, a kutah ka hmeh bel zui a, ani nuih lah a za.

Kal mai a tum chu a banrêkah chuan manin ka pawt let a, thawsa halh khawpa kan infawh tak kha. Ka thiam ve tawh chiang alawm!

Apu chuan che duh mang si lo vin țhuthmun ațang chuan tihdan tur a hrilh mai ang tih ka va hlau leh si e. A chhuak phei tur chu thaw deuh dap dap chu hian ka thlir zui a, ani pawh chu a 'confi' hmel vak bik lem loh.

A pu a koh hun ngaichang chuan ka lo awm ran a, a pu a koh hunah pindan kawngkhar ațangin ka bih ang a, choka lama a kal a, min hnungchhawn hunah ka chhuak ru țhamțham dawn a nih hmel. Kan inphâwk thut chuan a ho duh ve ngawt ang.

A pu lah chu a ko ri ka hre hauh lo mai leh nghal a, enge maw a awmzia le. Nge, an țawngthawm ka hre lo zawk le, ka hriatloh hian an lo intifel vek mai angr, kei ka la tawm reng si chuan a dik lo vang. A rehrei phian bawk sia, ka ngaih țha lo chuan pindan kawngkhar chu ka hawng dêk dêk a, lehlam ațang chuan Zualtei chuan alo pawt hawng leh thut bawk sia, ka phu nasa lutuk chu ka va han auchhuak teuh tak!

Min nawrlet nghal a, kawngkhar khar pah chuan 'a lo muhil a' a ti sap a. Ka thawhuai thei.

Inhmu leh tawh ngai reng reng lo tur ang maia duhthawha kan infawh ngial hnuah chuan a chhuak hmasa a, a hnungah chuan penri pawh awm hlek lo tur chuan ka zui chhuak ta a, an țhutkhawmna pindan kan pel chu ka thaw huai mai.

Choka lam, a puin min hmuh mai theih lohna lai kan thlen chuan mangțha nan vawikhat chu kan inkeih leh hram a.

"Ka ngai dawn che e" pawna kan chhuah hnu chuan a ti sap a.

Muangchanga a lam hawipah chuan "Min lo biakdanin a hril ang chu" ka ti zauh a.

A nui sek a, 'lutuk' tiin te reuhtein min 'bye bye' a ka bai chhohsan ta lauh lauh a.

Ka ngaihtuahnaah awm ta ber zawk chu ințhen leh țhen loh lam aimahin a nu te ngaihdan pawh kha dik tihna chen ka nei tho mai. An fanu, matric result la nghak ve chauh kha a kalkawng a la thui deuh niin an hria a ni mai a, ngaihzawng nei lo tura an tihna pawh chu dem vak ngaihna pawh ka hre chuang lo. 

Keipawh pawl 12 kan exam hma zawng khan ngaihzawng nei lo turin ka chhungte hian min fuih ve fo asin. Mahse, thu ka awih vanga zawm ka ni pawhin ka hre lo. Ka hmuh zawh loh vang zawk a ni mahin ka hria.

Bakah, ngaihzawng neih hun te hi duh hun huna siam ngawt theih pawh a niin ka hre lo ve deuh. A lan hun hi a awm ve tlat chu a nih hi. Mawlmang taka inkhap ngawt aichuan kan tihtur tih theih loh phah khawpa kan la urhsun tur min venpui se, kan zirlai ngaipawimawh hmasa tur te...

Chutihrual chuan naupang lutuk te chu an awm ve bawk e kan tia ni.

       

                   Chapter  

                        - IX -

A pu phone ațang chuan kan inberu leh țan ta a, duhthâl chuan inbe thei lo mah ila inbiak loh ngawt aichuan a ziaawm deuh hrim hrim. Inhmuh hun tur te, a hmun leh darzat nen lam kan inhrilh theih phah a, kei ai aiin nuam a ti leh tho sia!

Chutiang chuan hun engemaw chen chu kan kal ve bek bek a, kan result a chhuah dawn hnaiah chuan ka pain lo zin a tum thu min lo hrilh a, ka lawm kher mai. Ka ngaih piahlamah a awmlaia kan result a chhuah chuan a nuam dawn hian ka hria, pass ve ngei ka lo inring bawk sia.

Tukkhat chu office kai tur an rêm țan tihah hian Zualtei chu a lo lang hlawl a, ka sawm mahnise chuanlam a neih deuh vangin a lo kal duh tak tak pawh ka lo ring lo hial zawk a, a sawmtu zawk chuan mak tiin ka lo thlir a ni ber mai.

Leng tura ka sawmchhan tak pawh U Nghaki hian hria se ka tih vang a ni. Chumi a nih loh chuan mipa thalfang hi hmeichhe thalmu bawm nen a intâwklawi thei lo vang tih ka hlauh vang a ni.

Chu ka ruahman vena chu eng ang takin thawk ang maw?

Beisei lo rilru deuh, beisei deuh bawk siin ka huntiamah pawnah ka lo nghak ve tawp kha a nia, a lo lang chiah kha chu hmalama penthum pena zuan vak mai kha ka chak a!

Engemawni a ei, borai niawm tak a ni. Amah lah chu a nui sen sen leh nghal a.

"Ka lut zak e, tu tu nge awm?"

"U Nghaki chauh a awm, a zahthlak loh e, pindanah kan awm daih dawn nia"

"A, pindana awm te chu a chi loh emai, min ngai dik lo vek ang asin"

"A ho e, engmah kan tih loh ber te chuan"

"Aho e tiringawt zel suh, a ho lo" a tih chuan kawngkhar chu ka hawng der tawh a, U Nghaki hmun lo phiat mek chuan phâwk fe hian min lo melh a. Mahse, puitling ngang chu a insiam rem thuai a, Zualtei chuan a hmu ve kher pawhin ka ring lo.

"Einch, hei hi maw i sawi ve ziah chu?" a tih chuan Zualtei chu a lo sen țan țan a.

"Tunge a hming khah?" tiin chibai tumin a kut a pharchhuak nghal a, an inchibai lai chuan 'Zualtei' ka lo ti zauh a.

"I hming hi chu kan hre zing a nia aw, kan chhungzingah chuan i larber alawm. Țawihvaih te hi ala hrat bawk sia" a la ti zui ta dah a. A zak ve em em bawk si law.

Reivak lo choka lama kan țhut hnuchuan chhuanlam siamin ka pindan lamah chuan ka luhpui a, midang awm ve laia pindan lama awm chu a duh vak lo tih ka hre reng. Mahse, ka duhdan a ni miau bawk si.

Kan lut chiah chu er zawk khawp hian ka hnungzangah chuan min kawm a, khumah chuan a țhu zui ngât a.

"Chhuak ang, pindanah chuan awm lo vang"

"A ho lutuk a lo lut ngam teuh lo mai"

"Chu lam a ni lo, a mawi lo emai. A zahthlak.." a tih chuan a hmuiah ka fawh sak zauh a. A ti țha duh ve vak lo.

"Kan inah chhuk ang a nih leh" a tih chuan ka nui ringawt a, "Kan la chhuk ang chu, i lo thleng  ve chauh a, i pi a awm leh awm bawk sia, kan chêp leh dawn emai"

"A ho e, guitar min zirtir leh anga, ka thiam sawt ve lutuk asin."

"A țhat chu, chawhma kan inah kan awm ang a, chawhnu lam in inah, a țha em?" ka ti a.

"Mahse, pindanah hian awm reng lo ila, a nuam lo ka ti tak tak a nia."

"Mi mitmei ven ngaia awm chu ka peih lo e.."

"A ho e, engtia awm vak nge i tum a?"

"Muah te..." a nui var var a.

"I tih tawh kha aw"

"Kha te chu tihchhinna chauh alawm, a tak tak pawh ala thleng lo"

"A va huphurhawm!" tiin a thaw huai a.

"I nu chuan a sawi leh tawh em?"

"Sawi chiah lo. Mahse, a phone chu ala dah fimkhur khawp mai"

"Kan induh ve miau bawk sia tiraw.." tiin ka kuah zui a, kan thiam tawka uluk chuan kan inkeih ve ngial a, chu aia thui kalpui tumna ka nei lo va, ani pawhin a beisei pawh ka ring lo. A nachang ka hre em em lo bawk nge mawni.

"Naktukah kan țhianho chaweikhawm kan tum a, lo kal ve la.." a ti a.

"Khawiah maw?"

"Kan țhiannu te inah, kan tam dawn lo. Pali vel chauh kan ni dawn a."

"A zahthlak awm e, bakah in va tilai reng reng, result chhuah hunah te ti law law ula."

"Result chhuah hunah kan ti leh tho ang a,  'a pass țha berin an lawm ang' an tia lawm."

"Ka tibuai mai mai ang che u, ka lo tel ve chuan nuam in ti lo palh ang."

"A ho e, Janet-i bialpa pawh a lo kal dawn alawm."

"Min zahpui lo mi?" ka tih chuan 'over' a ti hlak a.

"Kal tawh ila kan inah chuan, a nuam lo hetia awm hi."

"Thingpui in phawt ila."

"Kan inah in mai ang, chhangban kan nei.."

"Haha, a tuivak dawn emaw ni le, a lem hun hi ka hre lo țhin a" ka tih chuan a nui hak hak a.

Reife kan ina kan awm hnuin thingpui pawh in ta lem lo chuan an inlam panin kan kal dun ta a, thildang timah suh ila U Nghaki laka hnehna hlado ka chham hrim hrim chuan ka ngaih a ti țha viau a ni.

An in kan thlen chuan a lo inhawng deuh huai a, 'Ka kalh ve thlap sia, âpi te an haw tawh emawni le," tiin a au zui a.

Pindan kawngkhar inhawng ațang chuan a nu a lo lang hlawl mai le! Chheheu, a dik lo vel ta vek mai. 

"E, nu nangmah elo, i lo va haw hma ve" inrintawkna tlachham tih hriat reng chuan Zualtei chuan a ti a, keipawhin awmdan tur reng ka hre lo. Ka kaihza lam chu a khur deuh dar dar a, ka dâng te chu a ro hul mai hian ka hria.

Tlanchhuah nal nal a nia ka duh rum rum ni. Mahse, chu chuan engmah a siamțha tawh chuang bawk si lo.

Lungawi lohna awki lang hlek lo hian a nu chuan, "Nia, Conference-na lamah an kal vek a, ka kal ve peih lo va, ka lo haw hma deuh a nih hi," a ti ve mai a. Ka awm vanga awka vin hmang lo nge a nih ang le?

Țhutthlengah chuan ka țhutlai pawh ka hre lo, ka han inen chuan țhutthleng bân chu ka lo hmer ngat ngat mai hi a lo ni a, ka hah ka ti reng a ni.

Zualtei a pindan lama a lut tur ka va melh chuan a hmelah chuan a inthiam lo hle a ni tih ka hre thei a, chu erawh chu a sawt bawk si lo. A nu chuan min hau hrep ang nge, ka hawhnuah Zualtei a zilh leh zawk ang le?

A hma pawha thu awm sa a nih vangin ngawirenga a enliam ngawt chu a rinawm bawk si lo. 

"Thingpui in in tawh em?" a tih chuan min biak ka rin loh luatah chhanna chang ka hre lo țep chu a ni e. Keimah lo biak tur an awm bawk si lo. Zualtei lah pindan lamah a la awm bawk si.

"Aih, in lo.." ka tih bah deuh nuaih a, min be zui tawh lo hram se ka va'n ti tak em!

Zualtei a lo chhuah chuan "Mate, Nu Rinpuii dawrah eitur va lei la, thingpui ka lo chhuang ang a" a ti a. A mak ka ti e. A thinrim lo tak tak ang em le?

"Enge ka lei ang a?"

"Ka hre nang, in eiduh zawng a ni mai alawm, Alu leh papor te pawh a siam țhin kha..ka bag-ah khan pawisa a awm ang, lo va la mai rawh"

"Nizana ka thil leina bang pawh kha ka la kawl asin, ala daih ang"

"Aw...i thu thu.." a ti zui a.

Zualtei chu ka zui ve ruak mai dawn emawni le, a ni emin ka hre bawk si lo. A nu bula ngawirenga lo awm chu ka va han huphurh tehlul em! 

Zualtei achhuahfel hnu lawka chuan a nu chuan chokalam ațang chuan min lo auva, 'Bawiha' min ti leh tawh! Min hau dawn lo niang, hauh tur te bawiha tih thu a awm pawhin ka hre lo.

'Helamah hian lo phei teh' a tih zui leh kher vang chuan ka ngaițhatna chu vawmbo ang duak a ni zui nghal a, a hrim hrimah a fanu ka ngaihzawn vanga min hau a nih teh chuan ka runluih ve khawp ang. A duh a nih leh a fanu chu thunun mai ang hmiang tiin inthiamchawpna tur dap rauh rauh chungin muangchangin ka phei a.

"Engtikah nge in result a chhuah dawn a?" a tih chuan min zawhna ber kher chu ka lo inbuatsaih loh lam tak a ni si, tawi fel zet chuan ka chhang thuai a. An Gas stove awmna dawhsan ngheng chuan a ding a, kei an chaweidawhkan bulah ka ding zum dai bawk a.

"I pass i ring em?"

"Umh, ring ve tho mai, ka tihțhat vak chu ka ring chuang lo va" ka ti leh thuai a.

Engemaw zawhna ho deuh deuh zawta min tihtlangnel te te hnuah chuan ka rin ang ngeiin thupuiah a lut zui ta!

"Duh aiin ngihzawng in nei hma mah mah a.." chhandan tur ka hre hauh lo mai.

"Nangpawh pawl 12 i zo dawn chauh a, Zualtei phei chu pawl 10 chauh a la nia, ngaihzawng nei tur chuan duh aiin in la naupang mah mah a ni. Lehkha zir lo vin thildang ti te chu ni ula a ngaihthiam theih deuh a, zirlai in la ni bawk si. Lehkhazir leh ngaihzawng neih chu a inhmeh tehchiam lo a nia..

Nang chu i pass anga college te pawh kalin harsatna chu i nei vak lo mai thei a. Mahse, Zualtei thung chu pass tehreng pawh ni se pawl 11 a la zir ve leih leih dawn chauh a,  a hmalam kan ngaihtuahpui hian ngaihzawng nei rih lo se kan duh a ni.

Tun ațanga abuai țan mai chuan a kalkawng hi ala thui  ve si a, ama tan hian a țhaberin kan hriatsak lo va, bakah kum lamah pawh ngaihzawng nei tur em  chuan ala naupang deuh a ni. 

I țhen thei ang em?" A ti rawt a.

Dimtein ka lu ka thing ne ne a, țawngkaa sawichhuaktur chuan ka huaisennain a tlin lo niberin ka hria.

"Mahse, nakina inhmakhua zel atan pawh in ințhen hi a țha asin. Zirlai tibuai tawk lekin in inngaizawng ang a, nakinah in inchhir leh meuh chuan khua a tlai tawh viau dawn a nia, tuna a hlimchhawn lai hian ințhen rawh u."

"A har ka ti ngawt ang" kun deuh chung chuan ka ti sap a. A hre pha lo mai thei.

"Ințhen ula a țha a ni mai, țhataka ka hrilh lai che u hian. Hmanniah pawh Zualtei ka hrilh vek tawh a, hei vawiinah pawh in lo inhmu ru leh a, ka ngaihdan a ni vak lo a nia" a thin a rim chho țan viau tawh, keilahin chhan ngaihna ka hre map bawk si lo.

"Hetianga inhmu fal rual pawh hi in la ni lo hrim hrim, a țulna pawh a awm lo. Tuna țha taka ka hrilh lai che u a in ințhen duh lo a nih chuan in hrehawm tial tial ang, a tawpah hrehawm taka in ințhen a ngai dawn tho tho"

Chutiang ka ngaithla peih hrep lo. Chak zetin kawngkharpui lam chu ka pan a, Zualtei lo lut tur nen chiah chuan kan intawk a, engmah sawi lovin hmanhmawh takin ka pel zui a, min enzui vawng vawng ta ve ang.

Engtinnge an nufa chu an intihzui ang tih lam pawh ka dawn lem lo, lunglian thawk thut kha ka arkawtchhuah ve mawp mai niberin ka hria. Thinrim tak ka ni han ti turin na takin min hau lem bawk si lo va.

A chawm a hrai pawh ka ni lo, a duh leh a fanu hrilh mai teh se.

Ka haw ta chu in ka thleng rang khawp mai. U Nghaki chuan mi lo chhaih teh a tum a, keia țum fu lo bawk nen ngawirengin ka pindan lamah chuan ka luhsan a, khumah zawng kahthlak ang dera ka zal tak ngût kha..

U Nghaki lo lut chuan, "I thlah haw chauha i ngai zui leh nghal mai elo? Em em che chuan.." a lo ti lut bawrh bawrh a, chhan pawh ka chhang peih hrep lo. A nuin a hauzui hrep ang tih ber chu a ni ka hlauhthawn leh tak hnuhnawh ni.

Ka hmel awmdan chu dik lo a ti deuh nge ni, "In intithiam lo em ni a?" a ti zui a.

"A nuin inngaihzawn a phal lo va, kan chhuk thlak khan kan rin loh deuhin a lo awm sia, min zilh laiin ka lo tlanhaw daih" ka tih chuan za zet hian min han nuih phawt a, chutah ngunthluk zawk hian, "Enge a zilh chhan che u, inngaihzawn a phal loh vang chuan maw?" a ti zui a.

"A nih ber chu. Naupang min ti a niang"

"Kum engzat nge a nih tawh a Zualte kha?"

"Ka hre lo, ka chhangrual chiah a niang, pawlsawm result a nghak ve mek a.."

"A la naupang ve bawk em a nih chu nu leh pa ngaihah te chuan, bakah ngaihtuah tel fo ngai țhin chu sum leh pai mai bakah ngaihtuahna tam tak senga enkawl in nia, an beisei loh ang taka thil a lo thlen hian hriatthiam a har dawn asin. Nangpawh i chanah han dah ve mah la, i fate naupang ang maia i ngaihte khan ngaihzawng te lo nei ta se engtinnge i tih ang?"

"Ngaihzawng an neih ngam tawh te chuan an naupang chhe tawh lo tihna a ni mai alawm"

"Chutiang ngawt a ni ngai hleinem, nu leh pa ngaihtuahna ang hi hmunthuma țhen hmunkhat pawh kan țawmpui phak hleinem.."

"A  ho a ho, a ninawm chutiang.." ka lo ti hluk a.

"Thu țha han hrilh ila in ngaithla țha leh duh lo va, țhangthar ho em em hi chu aw.." nuiduh hlek lo chuan ati zui a.

"Ninawm mai a ni, ka ngaithla peih lo va ka lo tlanchhe na na na heta lo sermon leh chiam te chu a.."

"I lerh hma lutuk vang a nih chiah kha.." a ti chu ka runtawk a tling.

"Enge ka lerhna, a lerh hma zawk te chu kha in awmbawr pawh a kawh țhat tawh loh kha, a uai țhuah tawh kha" ka ti chu ka chawnah chuan a bengthlawrh a.

"I va han zak lo tak, naunei tawh si-ah chuan kei aia awmbawr nalh hi i hmu lo bawk ang, ve lutuk a che"

"Kha a lang reng alawm, a uaihnuang kha. Mi te chu a kawh lah a.."

"Ka'n entir ang che" tiin ka lu chu a lamah chuan a kuai her a, a kawrhma chu a hlim chho pawk mai nia! Bra lah a ha a ni hek lo, a nauchaw bawm chu a ngai ngaiin a lang rual mai a, Hnapkhawn pachang hmu an sawi ang maiin ka'n nui vun vun mai alawm le.

"Hei hi uaițhuah an ti ngai lo aw" tihpahin a kawr chu a pawtthla zui ve leh mai a. Keilah pek chuan, "A va'n lian em em.." ka lo ti hmanhmawh a!

"I ho emai a, it buai duh lo mai rawh, i chang chuang lo, i duh leh i bialnu awmbawr te zet kha 'tumbailek' sak ve nek nek la ti nia" a la ti zuiah! A va han chimawm zêrh zâwrh tak.

"Ka duh hun hunah ka khawihsak thei che"

"I thei bawk hlak lo aw, tumbuai duh lo mai rawh" a tih chuan ka tho thut a, a kawngah lain khumah chuan ka keuh dawt a, 'ka tlawm, ka tlawm' a tih pawh chuan thlah duh bik hek lo le, a laibu chu a hma ang bawk chuan ka haichhuah sak leh ta ngat a.

A tal chau nge ni, a che peih tawh lo a niang a mu hle hle hle a, keilahin tihzui ka tum chuang hlei lo va.

"Khatin thlir vung vung suh, cinema pawh a ni lo" a tih chuan ka harhchhuak zawk a, nazeta țhamsak pahin ka tho zui nghal daih a, ani pawh a 'ai-ah' țhawt kha, kalsan harsa chu ka ti kher mai. 

Mahse, virgin-a nupui nei turin kei hi ka intiam tawh tlat. Ka bawhchhe tur a ni lovang.

Choka lamah chuan chhuakin tui ka han inkhawlh khawlh ringawt a, pindan lama ka luhthlak leh chuan a mutdan ngai ngaiin a lo la mu a, a kawrhma erawh a inhlim huai ta bik lo.

"Lalmalsawm, i hmehna hi ana lutuk..."

"Tihchhinna mai mai a nih kha, min hlim khum leh chuan ka seh tawh ang."

"I ngam lo chiang ang chu.."

"Ka ngam lutuk hi sawi ngaihna pawh ka hre lo.!"

"Kha seh rawh i ngam phawt chuan," tiin zuk hlim lang leh ngam ngat a!

"I țap palh ang" tiin ka hnaih duh lo va, "Ka ngam lo ti law law rawh" tihpah chuan lukhamin min rawn vawm zui a. Ka ngam lutuk tlat!

Khumah chuan lawnin a kawr a pawhthlak mek chu ka hlim leh ngat a, ka seh, ka seh tak tak! Mahse, a na vak kher lo vang.

Ka tukkhumah chuan a dawm chat mai a, phawi ka duh hunah pawh a pawtbet tlat mai si, ngaihtuahna a mang rum rum thei hial nia!

Eng em ti lovin Josepha dungthulin 'pa lo' nih hlawh huamin ka tlanchiat san leh ta chu a nia leh! Ngaihtuahna erawh a vak thui țhin tak zet.

Zan dar 10:00 rik dawn ruaiah Zualtei chuan a pu phone hmangin min lo be ru leh hlauh mi a, chu chuan muthmuna ka inngaihtuah buai lutuk tur chun min chhawk zangkhai ta huai mai.

"Ka haw hnu khan a hau che em?"

"Hau lo ve, pindanah ka lut nghal daih a, a hnuah ngawirengin thingpui min rawn pe a, engtinnge a hauh che a?" A ti zui a.

"Mi hau pawh a ni chiah lo, a hmaa i sawi ang deuh kha a ni mai. Naupang min la ti deuh a niang, thinrima chhuak tau bur bur pawh ka ni lo a nia, ka inngaihtuah lungpuam thut a.."

"In lo inhau ta vak mai emaw ka tia lawm, tlaiah chaw ka ei duh lo va, an buai teh kha..pindanah an lo inluh chhawk zut alawm."

"Tunah i ei tawh em?"

"Ei nang, ka ril pawh a țam vak lo, nakinah thingpui ka lum ang a, chumi pah chuan an hriat lovin chaw ka ei ru ang," a tih chuan thawmdim fein kan han nui dun leh rih a.

Ni, kan inhmangaih ve miau alawm.

Zualtei te result a chhuak tawh, Disctinction-ah pass-in subject thumah letter a hmu a, keini erawh chu karthar lamah a la nih hmel e. Ka pa a lo thleng ta bawk a, Zualtei nen kan inhmuh loh pawhin rilru hrehawm leh khawhar lutuk chu a Ia peng viau, a office dawrna apiangah chuan ka zui ve mai zel a, a nuam ka ti, ka pa nena kan han inzui kual vel chu ka hlim em em si a.

Education Director dawhkan kila kan pafaa kan țhut dun khar lai chuan ka phone chu a lo ri țat a, ka han en chuan 'Zualtei mom' tih ațangin a ni tlat! A nu phone ațangin maw!?

Dawhkan hnuaiah chuan rem lo zet hian ka han bih a, 'Civil female wrd, 17 ah k om' tih zawng hi a lo ni a, ka ngaih a țha lo kher mai!

                   Chapter  

                         - X -

Pu Director room ațanga kan chhuak chiah chu ka message dawn chu ka pa chu ka hmuh nghal a, hrethiam lo tih hriatreng hian min melh a.

"Zualtei a nia, damdawiinah a awm a niang.." ka ti ban chalh a.

"A nih chu a va han zia lo ve, eng nâin nge a awm a?"

"Ka hre bik lo, tunah khan a message ka hmu ve chauh a. A damloh pawh ka hre bawk si lo va," ka ti nang nang  a.

"Kal i duh deuh em ni chu?"

"Ahh.. ka hre chuang nang."

"I duh leh lo va kal la, Bungraw thawnna tur challan ka tifel ang a, ka lo kal ve dawn nia"

"A..Nakinah a ni mai"

"Nangmahin i hreh deuh em ni?"

"Umh, a nu hian min ngaina vak lo va, a lo awm phei chuan.."

"Eu, a va pa dawn rep rep ve chu. Kan pahnihin kan kal dawn nia, an chhungte hian min han duh lo ngei se inngaihzawn chu a hlu ting mai alawm" a tih chuan ama awmdan ka ngaihtuah chhuak thut a, ka nuih a za deuh!

"Nangpawh i tihluih ngam bik loh kha" ka tih chuan za lo zet hian a nui a.

"Kei te chu a dan a dang alawm, ka zuin vang kha a nia, hmeichhe tan umluih ngam chi kha ka ni lo va" a ti țha ve mai a, a dik leh viau lawi bawk si.

Challan vel kan buaipui fel hnuah chuan khum no 17-na lam pan chuan ka pa hnungzuiin ka kal ve dat dat a. Amah chu a zam hauh lo vang tih ka ring, ka pa a nih miau vangin. Kei, a fapa erawh chu ka hlauthawng deuh a ni. A nu a lo awm hlauh chuan aw...

'Lalpa, lo awm tir lo hram rawh.'

Tlailam boruak dairuih maiah chuan mi an tlem deuh tawh ang chu tihnaklaiin a zual zawpui vailen hlo an tih ang maiin mi zawng zawng an thawk chhuak ta emaw tihturin kalna lam apiangah chuan an awm sup sup vek mai a, drip khailaia nena lo kal kual ta vu vu te, Zawhkawna an sawi ang maia nathmel leh chawrche, uluk taka kal țham țham te chen chuan hmuh tur an awm!

"Khawi ward-ah nge i tih khah?"

"Female Medical ward, Khum 17 naah" ka phone bih kher lovin chu thu chu ka sawi nghal zat a, ka chiang ve bawk em a ni.

Lut mai lo chuan kawngka ațang chuan khum number chu a bihkual phawt a, chutah muangmarin a pen lut zui ta a.

A kil bera mu chu luhphat ațangin ka va hmu nghal mai a, anu hmel a lang lo chu ka lawm kher mai. Chuti ni suh se chuan a engamah hmain tlawm zawk luha luh nghal ngawt a ngai dawn si. Pa te bulah lehnghal!

An inhnuai a mi (a nu u nupui) in a lo awmpui hlauh mai a, a pu pawh kawtah khan ka hmu awmthanin ka hria. Ka hmusual nge chu ka hre lo va.

A khum kan panlai min lo hmu chu a lo nui ver ver a, damlo hmel pawh a pu chiahin ka hre lo, a sam te chu a delh pawr ve deuh phang a, a hmelhmai chei loh chuan a ti lang dawldang deuh ni maiin ka hria.

A pitei chuan min hresa bawk a, min lo be sawk sawk a, keitak phei chuan ka chhâng lem lo. Ka pa nen an inbe zui a ni mah zawk awm e.

Khumlu lamah chuan ka țhu a, ka bulah a pitei, kan eplam, khum lehlamah chuan ka pa amahin a țhu thung.

An inhnuaia a kal tur step-ah a tlusual a lo ni awm a, a nakruh a auh deuh an ti a ni awm e. A bak chu na hran em em pawh a nei lo. A harh țha viau bawk.

Ka phone chu min laksak a, a 'check' char char nia! Lutuk hian a! Engmah a hmu awm der si lo va.

Pass lawmdan tur a rukin kan rel a, han rellawk vak theih pawh a ni lo. A damphawt angai. 

Kan ti ti mawlh mawlh lai chuan ka pa chu a tho hluai a, engmah sawi lo chuan a chhuak daih mai a, a zung tur emaw tiin ka ngaihven zui hran lo va. A lo kir ve leh mai ang chu.

"A khua a sik leh em?" tiin ka sir lamah chuan Zualtei nu țawng ri ka hre ta tlat mai! Khai leh, duhaiin kan awmrei ta a nih hmel ka ti. Kal nghal mai chi niin ka hre bawk si lo. Țhut reng dawnin ka bet mawlh bawk si lo.

"E, i lo kal elaw?" te chu a han ti khawmawi ve bawk a, a bak chu min be chhunzawm lo. Keilahin biak dan tur ka hria azeng pawh a ni lo.

Ka pa chu a lo va kir har tak em!

A lo kir ve leh kan kal nghal nal nal ang, a boruak a rit emai. A damlo aipawhin ka hah zawk hial ta ve ang. Chutiang chen chena rei zun reng reng pawh chu, a zun a khal emawni hial le!

Reife hnuah chuan a lo lang ve leh ta hram a, "Kan kal mai dawn em ni, a tlai hmain" a rawn ti a. Kan in mangțha hnu chuan kan kal zui ta nghal a, a pitei chuan pawn thleng min thlah a.

Ka pa chu a chhuahdaih chhan kha zawh ka duh viau a. Mahse, a hmel hi thil han sawipui a chakawm loh ang reng ka ti. A thinrim hmel chu niin ka hre bawk si lo. A chau ve deuh nge mawni dawn le.

Zanriah eina kan seng lai chuan ka pa chuan ka phone charge lai chu a lo khawih ngial a, a phone a hlui deuh tawh vangin leithar ve a rilruk nge mawni le.

"Engzatin nge phone hi i lei tak?" tiin min zawt ta ngei a, ka chhan hnuah chuan 'keipawh ka phone hi a hlui ve deuh tawh, lei ve ka ngai dawn a' a ti zui a. Ka message a check kher angem le? Zualtei nen kan inbiakna kha ka delete phal lo bur mai si a, a hmuh vek chuan a ho ve ngawt ang. 'Khawih suh' intih chi a ni tawh mang bawk si lo.

Zanlamah chuan ka pa chu a țhiante hmu turin a kal chhuak a, lehkha zir ka ngai bawk si lo, tihtur a vang khawp mai. TV ka en lahin ka entui chiah bawk si lo, Zualtei damdawi in awm ringawt chu ka lo ngaihtuah leh veng veng țhin a, ka nîte nupa lah chu an mu hma phian bawk si. Ka pa kha lo zui daih ila țha tur asin mawle.

Mut mai tumin ka inbuatsaih a, light te ka off țhen hnuah chuan pawnlamah ka chhuak a, boruak chu inchhung aingawt chuan a lo nuam deuh, thlifim thaw heuh heuh chuan min ti harh deuh sawng sawngin ka hria, chutia ka chhuah thawven tak rau rau si-ah chuan mut leh ngawt chu ka ui leh deuh. 

 Kan kawtzawl zau vak lo tawplamah chuan Tuizem lian zet mai, Rangva khawr ang chi kha a awm a, ka nîin Plant vel a dah nasat vang chuan a lang hnawk em em hran lo. Chu mi tuizem dai thlur mai ngheng chuan rem fe mai hian ka țhu diai a, tuizem ațanga hla vak lovah chuan kawngpui lam pan thlakna step a awm a, step ațanga lo chho chuan min hmu thei kher lovang, kan hawizawng a in ang chiah si lo va.

Zualtei chu a muhil tawh angem le? A khua te a sik leh angem aw? A nuin riahpui lo se chuan min lo sms theih te pawh ka ring deuh. Ka ngai hle mai a.

Ka phone te chu lachhuakin a pu phone hmanga min lo biakna te, a nu phone ațanga min lo biakna te chu ka enlawr dan dan a, a nu chu ka haw lek lek dawn mai ka ti.

Step-a lo pen chho khauh khauh thawm ka hriat chu ka pa pawh a ni tawh mai thei. Midang lo kal tur chi an awm pawh ka hre tawh lo.

Ngawireng chuan ka țhut ngaiin ka țhu reng a, ka lo barakhaih dawn emawni le!

Tuizem bulah chuan a ding nge mawni a thawm a reh zui daih a, a zung dawn a ni ngei ngei ang mawle!

"Hello.." a ti thûm ta chhak mai le!

Tunang hunah te tunge maw biak a tum le? Ngaihzawng te hi a nei ve deuh a niang ka ti. Ngawirengin ngaithla kar ila a ni mai alawm.

"I fanu i riahpui em ni?" A lehlamin a lo chhanlêtna chu ka hriatpui ve leh tawh mang bawk si lo va a khingbai ang reng.

"Malsawma pa" a tawi fel nghet nghawt khawp mai.

"Hre lawk chu ni ila ka lo kal hauh lo tur a nia, ka fapa vang chauha lo lang ka ni e" a mak ka ti kher mai! A biak chu Zualtei nu maw!? Chuan, chuan... Ani kha ka nu maw!?

Zualtei hi ka unaunu!!

Ni lo, chu zawng a ni thei lo. Thil theih a ni lo. Auchhuak lo tur chuan ka insum hram hram a ni ber mai. Enge a sawi pawh chu ngaithla pha reng mahila ka benga rawngah a lut tawh lo! Awmngaihna ka hre lo.. Ka bîng mum mum mai.

Ka pain min hmuh hma chuan inchhungah ka lut a, țah tlawk tlawk mai ka va han chak ve le. Awmngaihna ka hre lo, ka pindanah chuan ka vei tuak sek a, ka chunga thil thleng hi a mak sak lutuk mah mah a ni.

Zualtei ID ka kawl kha ka hrechhuak thut a, ka lehkhabu bawm chu ka chinglet ngial a, ka hmu mai lo leh nghal a, chutihlai mek chuan ka pa chuan ka pindan kawngkhar a lo hawng ri rak a.

"E, i la mu nange?"

"Umh, lehkhabu ka chingfel lawk a.." ka tih chuan a khar zui ve leh nghal mai a. Ka haikual nawn leh naah chuan ka hmu chhuak ta hram a. Ni e, ka pa hming leh a pa hming pawh a in ang chiah! Ni lo, hetiang em em chu a ni thei dawn em ni!?

Engatinge ka pa pawh khan unau ka neih thu hi a sawi miah loh, enge zêp kher a țulna le. An zêp rei luatah pawi kan khawih thui hman țep chu a nih si hi.

Thawhlawka ka pa chu han chhuahchhal hial ka duh! Mahse, chu em chu nitheiin ka hre bawk si lo. 

An inbe reng thin tihna em ni ang? Chu chu ka ring ngam chiah bawk si lo. Tlaiah khan ka pa khan ka phone a entak kha mawle, khatah khan a number a la chhuak a ni ngei ngei ang. Ka khawngaih ve tho bawk sia, ka rilru a hrehawm bawk si.

Kha zan kha chhinkhat mah ka chhing lo!

Khawvar hnulamah chuan ka mut a chhuak ve ta deuh a, muthilh hram tumin ka mu lui a, ka lo muhil ta a ni awm e.

Mang chhe tak ka mang a ni. Ka harh hlawl a, thlanin min lo bual zuih a, chu mumang aia chhia chu atakah ka tawng mek bawk si.

Ka muhil rei lo kher mai, darkar hnih pawh ka muhil hman lo niin ka hria. Ka chhungte lo thawh hma chuan ka inbual a, thawpik zualpui tih reh tum chuan ka vak chhuak ta daih a.

Kalna tur pawh ka hre chuang lo, kawngdungah chuan veng țhenawm pel rawkin ka kal a, ngawirengin ka let leh a, chu zawng chu a ni mai e.

U Nghaki a lo thleng tawh a, ka nî a lo tho tawh bawk. Ka pindan lam ka pan a, ka mu țha leh a, ka mut erawh a chhuak chuang lo. Ngaihtuahna fim hman ka harsat hle a, earphone-in zai ka ngaithla a..

Tukțhuan pawh chu ka eipui ve ta lo. Ka lu na chhuanlamin ka mu a, ka nîin nachhawkna min pek chu min dinchilh reng vangin ei loh theih pawh a ni lo. Engah tak chuan thawk ang maw!

Ka muhil ka harh leh chuan chawhma dar 11 a lo pel der tawh a, ka ril pawh a țam ve ta viau mai. Ka phone a message awm chu ka hawng a, 'kn cuakk a nya o' tih zawng hi 'A pu' tih number ațang chuan ka dawng hi a lo ni a. Mahse, engtinnge ni tawh chuang ang? Mahni farnute ngaihzawn chu... a rapthlak e!

Ka thochhuak chu U Nghaki chuan min lo ngaihven thuai a, min biakna pawh chhang lovin 'toilet' lamah phak tawkin ka luhsan kha.

"A la na em i lu chu?" tiin ka chhuah chuan min lo zawt leh thuai a.

"Na tawh lo ve, ka zawi em ema a ni mai."

"A nat tawh loh chuan a țhat chu, chaw i ei nghal duh em, ka lo siam ang aw?" 

"A, ka lo siam ve mai ang"

"Aw, nangmeuh damlo te chu kan duat che alawm le, ka lo barh dawn che em ni zawk!?" tiin a nui har har a. Pindan lamah chuan ka lut zui leh mai a, rilțam viau e ti lo chuan chaw ei chakna pawh ka nei lo. Ka pum lah chu a ri ruih ruih mai bawk sia.

Ka pindan kawngkhar lo hawn pah chuan, "Ka siam zo e, a eitheih," a rawn ti a. A nih leh le, kan ei poh a niang chu.

Chawhmeh chu tui lo a ni hran lo, keimah ber hian ka eitui lo zawk a ni. Lem a sak țalh țalh kher mai. Kan U Nghakdâki lah chuan mi tihnuih țalh a tum leh nghal a, a ninawm; ka vawm pawp dawn emawni le.

"Khawnge ka pa a kal?"

"Office ka dawr dawn a ti tlatin ka hria, Pa Hminga nen an chhuak rual a..."

"Âtei a chhuahna rei tawh a mi?"

"La rei vak nang, a kal deuh chauh. Dawr luahtur a hmu a, chung vel chu ka tifel dawn a tiin ka hria"

"A va țha ve"

"I hmel maw! Țha e.."

"Ka hmel ka sawi bawk lo" ka ti hmuk a, engahmah a ngai lem hlei lo va.

"Vawiin chu innuin a lo kal dawn em? In awm tir la.." a nui leh rawh rawh tawh.

"Bialnu ka nei lo"

"Hahai..a'n tia ni. Hmanni kha chuan nuam i tih viau kha aw.."

"Hmanni a ni tawh hleinem, vawiin a nih hi"

"Chu pawh ni se.."

"Enge?"

"I bialnu a nih tho te chuan"

"A ni tho tawh hleinem"

"Ka awih pît lo ve a..Enge in ințhen chhan?"

"A rem tawh lo a ni mai" ka thleng chawi chuan ka tho zui nghal a, ka thin a rim bur ringawt mai a ni.

"Tikhan lo dah mai rawh, lo ti duh suh" a tih chuan ka thleng chu ka sil zo der tawh a, thildang chu a duh leh chhunzawm ve tawh mai rawh se.

Ngawireng chuan ka insiam zui mawlh mawlh a, 'i chhuak dawn em ni?' tiin ka pindan kawngkhara ding nu chuan min lo zawt a. 

"Aw.."

"Khawiah?"

"Țhiante inah"

"I nuamsam lo bawk sia..."

"Ka țha alawm, min ngaihtuah suh"

Ka chhuak tur chu kawngkaa a din tlat vang chuan tawk lo va chhuah theih a ni lo va, a sira ka inzep mai tur chu remchangah lain min kuah zui zat a, dâwn tawi tawrh khawpa kan han infawh pek chu!

Ka chhuak ta chu ngaihtuahna a buai nghal map mai.

Zualtei te ina kal tum ka ni. A nu pawh awm se, tupawh awm se ka kal lui ngat ang ti khan ka insiam tau deuh kha a ni a. Mahse, zep nak emaw ka thleng ngam ngut ange maw chu le.

An veng ka thleng a, ka zam tial tial a, kal luih zel aichuan let leh ka tan a awlsam zawk. 

In ka thleng chu ka chau niber hian ka hria,  "U Nghak, zu leina tur i hria em?" ka tih chuan phawk fe hian min melh a.

"Engatan!?"

"In atan bak hmanna i hria 'mi?"

"A țul lo e mai a, tikhan awm mai mai teh. Chuti taka hmeichhe pakhat vanga indawmkun tur a ni hleinem"

"Thil awmdan hi a mak lutuk, a rapthlak zawkin ka hria, tihngaihna ka hre lo"

"Enge chutiang em em awm a?"

"Sawia fiah chi pawh a ni lo, kan ințhen tih pawh amah chuan a hre nang. Mahse, loh theih loh vangin kan ințhen a ngai a nih hi"

"Enge awmzia?"

"A ninawm, zawhna min zawt sek lo teh," ka ti hlur a.

"Zu chu leina tur i hria em?"

"I zak lo e, i chhungte hian engtinnge an ngaih ang che"

"Ka mu daih dawn alawm, an hre lo vang"

"Chu pawh ni se a țul lo"

"Mawhh, vatin"

"I va nasa tak..ka hrai rui vak zawk dawn che emawni le."

"Umhhh...i fel kha"

"Lalmalsawm, nasa viau suh aw.."

"Ka thu i awih dawn em?"

"Yes boss.."

"Pa Hminga ten an hriat vaih chuan aw, a pawi viau ang"

"An hre lovang ka tih chu..ka mu daih dawn alawm"

"Mahse, kan inah daih asin a awm, tlaiah ka haw hunah min lo zui la," tak deuh deuh chuan a!

"Tuna duh a.."

"I duh leh va la la.."

"I dahna ka hre ve nang, i chhungte ka va zawt dawn mi?"

"Hahai, chiloh lutuk.."

"Va la mai rawh"

A peih lo lutuk chu ka nuih a za zawk, ka tihluih ngial hnuah chuan ka hmin thei ta hram a. Mahse, awmze nei zeta min fawh hnuah a ni a kal chauh ni.

A lo thlen hma chuan inthlakin nghakhlel tak chuan ka lo veituak sek a, Taxi fair nen lam ka pe alawm le, a rei lo turah ngai ang.

Minute a liam fe hnuah chuan a lo lang ta hlawl a, a thawmhnaw te a lo va thlak ka ti! 'Ka inbual zuai a..' te chu a la ti tak deuh deuh a.

Ka khuma țhu chung chuan eng zu emawni chu ka dawm ve ta ran mai a, a tui ka ti lem lo nain tui lo han tih chiam tur pawh niin ka hre lo. A rim awm mang lo chu a țha ka ti khawp a, heti chuan chhungte paw'n an hre bik nang.

"I va han inthei lo teh lam ve mawle," tiin ka no ken lai chu vawihnih ngawt min tlak sak a, in ve ngai miau hek lovi!

Ka duh aiin min hnaih mah mah!

Mahse, min hlat tur chuan ka hnar kher lovang le. Ka rilru ana ve asin. Ka duhtak, ka hmangaih ngawih ngawih chu laksakin ka awm a, damchhunga ka tan kawppui atana rem lo turin ramri min kham sak a, enge tih theih ka neih tawh chuang? Enge ka lo inlâk urhsun viau pawh chu a țulna ni tawh chuang ang le?

Muangchangin ka Di Ngaihzuali hlat thei tur chuan min namthlu riai riai a, ka englaiah mah chuan hnial tumna a awm lo. Mahse, chhungrilah erawh chuan ka rum mek si.

A tum chu a hlen ta, hnialna ka neih miau loh vangin. Kei erawh chuan lungawina tur ka hmu lo va, ka hlim phah sawt lah ka hre hek lo.

Khum ațanga tho chhuaka a inha sat sat lai chu ka thlir reng a, saruak ngalngata a awm aimah chuan kei hi ka ruak zawkin ka hria, ani chuan a lungawina a hmu miau alawm.

A banrekah chuan manin ka bulah chuan ka pawt mu țha leh a, chetzui pawh awm chuang lo chuan kan inkuah hle hle ringawt a.

Min thawhsan lai pawh ka hre lo, chaw ei dawn hnaiah chuan min lo kai tho leh a, thuamhnaw pawh ka lo inbel fel ve thlap!

Ka inbual zawh chuan ka pangai chu a ni der mai, ka pa chhuak chuan hmundangah chaw ei a tum vangin ka nghak ta lo va, min hlata awm a chak riau mai ani hi!

Ka zu in vang chu nge ni ka chawei pawh a tui leh pek lo. Țamhnem pawh ka ei ngût lovang ka ring.

Pindan lama ka luh leh hnuah chuan purun sen ka kenluh chu ka kheh sat sat a,  zu kan inbang chu mut hmak tumin ka in leh ngat a, nohnih vel bak ka inthei lo, ka luak dawn zel.

Mut chu a hnai lo nasa mai, ka inngaihtuah lungpuam nge ni Zualtei te inlama kal chu a țul hian a țul et et mai a, ka rui ta deuh emawni le?

"Âte, ka țhiante inah ka kal lawk dawnnia aw, ka rei lovang," ka tih chuan mi pawh en lem lo hian 'awle' a ti mai a. Min enchîk lo chu ka lawm viau.

Engnge ka ngaihtuaha ka thin ti ur ber pawh hre si lo chuan ka insehruh țeuh a, a kal lah ka kal chak na rawh e.

       

                   Chapter  

                         - XI -

Doorbell pawh ka hmet lo, ka kik dat dat a, min chhanna ka hre lo a niang ka hawng lui ta tho va.

An țhutkhawmna pindanah chuan sofa-a muchungin Zualtei chuan TV a lo en a, a pi leh pu ka hmu lo, an inkhawm pawh a ni mai thei e. A nu erawh chuan phâwk fe hian min lo en a, chu aimaha maktih hmel zawk chu Zualtei!

Mi lo biak ngaihna pawh an hre lo. Keilah chuan sawi tur em em la hre bawk si lo va, bakah ka țawngchhuah chuan ka thin a rim nghal mai dawnin ka hria.

"Hmannia ka hrilh che kha i theihnghilh tawh tihna em ni?" tiin a nu chuan min be ta hram a.

"Theihnghilh lo ve, ka zawm lo ve mai mai a nih hi, mi thusawi zawng zawng ka zawm vek seng hleinem" ka ti duah a. 

"Mi ka ni lo."

"I ni," a engamah hma chuan kan inchhang lawk nghal der mai chu a nia. Mahse, nu ka mamawh em em laia ka nu a ni tih pawh min hrilh duh bik lo tu a ni a, ka na ve em asin.

"Khati khan min chhang suh" a aw chu a khur deuh hlak a.

"Ka chhang ang che" ka tih chuan Zualtei chuan zaizirin ngawi turin min lo ti a. Ni lo ve, zanin hian engkim puakdarh vek tawh rawh se.

"A tawk tawh lemchanna hi, engkim hi puanchhuahin awm vek rawh se" a diktak chuan ka țah a chhuak, ka duh ang pawh ka sawi zo hman lo.

"A tawk tawh Lalmalsawm..Haw phawt rawh, i rui emawni lehnghal ni"

"Rui e, zu ka rui.. a chhan chu maw fahraha min siam tu te hian min tina..Ka haw bawk lovang. He in hi..."

"Hei Lalmalsawma hi ruichungin a lo kal a, lo hruai rawh. A awmdan a mawi lo tlat" a tih chuan amah chu ka zuk en a, phone-in ka pa a bia a ni ngat mai. 

"Lo kal tak rawh se" ka ti sup a. Ka awmhmunah chuan ka țhu kun chal a.

"Haw rawh, i pa a lo thlen hmain, a hau hrep mai ang che"

"Ka pain maw, ka pain min hau ang maw!? Kum hei leh chen hi ka lakah zêpruk neiin nu ka mamawh leh ka ngaih ngawih ngawih laia thup bo tlat tu khan min hau ang maw!!..." ka mittui chu ka dang zo lo. Mahse, țah chu ka țapchhuak lo vang.

"A tawk tawh, engmah sawi a ngai tawh lo" a au deuh tuarh nimai hian ka hria.

"A tawk lo, thil engkim hi ka hre vek tawh, enge inlakah hian tihsual ka neih? Enge ka tihsual sawi rawh...."

A lo kal phei a, ka biangah chuan min rawn bêng siah mai a, a nat vang ni lovin ka thinlunga a thawhnat em vang zawkin ka țhuhnawk a, ka intih mipa vena chuan min khap bet zo lo, ka țapchhuak hawk a. Ni e, rawlchhuah meuhin a ni ka țah tak ni.

Chutihlai chuan Zualtei pi leh pu chu an lo lut a ni mai thei. Mahse, ka lung a chhe em a ni. Enge an sawi pawh chu ka ngaih ven lo, lungrun fe mai hian ka țap hliam hliam mai a, ruiphur țah ngemawni ber le!

"Bang tawh rawh, a zahthlak ania, țhenawm khawveng ten an hre vek ang" a tih te chuan ka lung a tichhe zual a ni chek ang ban lam chu a hnai lo nasa mai!

Zualtei lam reng reng ka rilruah a lang tawh lo. Khai raw, hliam hliam mai a na.

Ka pa a lo luh chuan ka lo bang ve deuh ti tuai tawh a, ka hawichhuah chuan Zualtei pi leh pu, a nu leh ka pa te chuan min lo en țhap mai hi a lo ni a, ka zak țan ta chem chem mai le. Kei hi ka rui a reh a ni chiang! Engatinge khatia ka awm chiam mai le.

Ka pa chuan ngawirengin min kai tho va, pawnlamah chuan min chhuahpuiin kan haw dawn a ni ngei ang. Tumahin engmah an sawi miah lo. Min thlir tawp ringawt.

Kawngsira motor a dahah chuan min luhtir a, amah pawh lo țhulut ve nghalin inlam pan chuan min hawpui ta vang vang a, ka harh chiang kek kawk tawh khawp mai. Kan thleng hla tial tial a, ka zak tual tual a ni ber mai.

Ka pa lah chuan țawngkam khat pawh a chhakchhuak duh der bawk si lo va, khami țum tluka kan pafa inkara boruak rit kha a awm leh theih pawh ka ring lo hial zawk!

Motor a dah fel lai chuan kawngpuiah chuan ka lo ding ve mai a, kan in panchhohna step pawh chu nidang zawng aiin a thui ta riau mai ka ti. In kan thlen hun chu ka huphurh kher mai, kamkhat satliah lo deuh hlek chu ka tawk ngeiin ka ring. 

Inthlena mut hle hle chu chak viau mah ila chumi hmalam boruak tur chu a ni huphurhawm ta ber zawk chu. Pa Hminga te an la meng ngei dawn bawk si. Ka huphurh tak zet a ni.

In kan han thleng chu rinlawk ang ngeiin an lo la meng tak tak a, rilru țawngțaina nena luh ngai ang chi kha! Rinna lah a chak vak bik bawk si lo.

"Ehe, khawiah nge in inchhar a?" tiin Ãtei chuan min lo zawt thuai a. "A nula rim ka lo hruaihaw lui a nih hi," ka pa chuan a ti mai a. Min hauh țan hmain pindan lam ka pan nghal a, ka mu nghal hmiah.

Zualtei chu ka farnu angin ka en thei lo chiang! Mahse, a nih miau bawk si chuan enge keia thlirna chu sawt vak chuang ang le.

Zanin te khan engtiangin nge min ngaih ang? Khatia ka tih chiam lai khan a lo kal bo daih nge min lo thlir ve reng? Engtinnge a lo awm ang? Chu thil ngaihtuahna chuan muthilh min ti har ngei ang le.

Ka pindana ngawirenga lo lut chu ka pa a nih ka ring, lehlam ka hawi vang chuan tunge a nih ka hre mai lo nachungin ka pa a nih ka ring nghet tlat a ni.

Ka khumah chuan a lo țhu a, engmah sawi lo chuan reife a țhu vang vang a.

"Bawiha, kha thil thleng kha hriatlawk engmah ka nei bik lo asin," a hul hek hawk khawp mai.

"I bialnu hmu tura damdawiina kan kal khan i hmuh leh hriatchin ang kha thil thleng chu a ni mai. Hre lawk ni ila chuan ka kalpui kher lo che ang a, tun ang ema i natuar pawh hi ka hmu lo tur a nia.

Min dem viau ang tih pawh ka ring. Ni e, kan demawm a ni ber e. Mahse, hetiang thil hi a thleng ang tih kan ring phak bik lo a ni. 

Ka hrilh tawh che kha, i nu nen hian inhmuh emaw inbiakzuina hi a hranin kan nei tawh lo. Mahse, damdawiina kan inhmuh hnu khan i phone ațangin a number ka la a, thil awmdan dik lo chu siamțhat tumin ka bei ve tho asin.

I nu pawh khan a fanu lak ațanga inthiar fihlim turin a ti țhin che tih a sawi a. Engtikah emaw chuan a fapa i nih thu sawi tumin a inkau a ni awm e. Mahse, kan heti leh ta nuaih bawk si a, a buaithlak zo ta a nih hi."

Chhang lovin ka inpet ruh fan fan a ni ber mai. Eng thil nge maw ka chunga thleng zo zai hi le!?

"Mi puitling chuan a chunga thil thleng harsatna emaw, lawmawm lam pawh ni se a dawng sawng thiam a, inbuatsaihna țha tak nen a chhanglet țhin. Chutiang tur chuan ka ring tawk che a, ka beisei bawk che. Thil pakhat vanga indawmkun reng tur fapa ka neih ka ring lo a nia. Ti thlawn lo hram ang che..." tiin muangchangin min chhuahsan zui ta a.

Ka ngaihtuah nasat poh leh mak ka tihna a zual a, Pathian em chu ka dem ngam lo. Mahse, ka lung erawh a awi lo thlu ve a ni. 

Zualtei nen chuan unau pianghmun pangngai chu kan nih hmel lo va, ani chuan pahran a nei ngei ang. Mahse, chhulkhat kual kan nih miau si chuan kan inhnaih leh hlat dan chu a lêm chuang si lo. 

Engtinnge ni ta ang? Zanin thil thleng te kha a nuin a hrilhfiah ve ngei ka ring a, engtiang takin nge a dawnsawn ang le? A mittui chu a tla ve tho ang mawle.

Ka pi leh pute bulah chawlh te han hmang ila rilru te pawh a thawveng thei deuh mahna tih zawng chu ka rilru siamthiam chhun a ni. A bak chu a tlachawp zelin ka hmachhawn ve tawh mai aniang chu.

Zinga ka thochhuak chu zanlama boruak engmah awm lo ang maiin ka chhungte chu an awm a, kei atan han tharthawh chiam a țulna a awm hran lo. Ka tawrh tawrhin ka tuar ve mai a niang chu.

"Ka pu te bulah ka han chho lawk dawn emawni, chawlh remchan lai lai" ka tih chuan ka chhungte hmanhlel taka chaw bar mek te chu an reh zui țhap a.

A mengphawk ber erawh chu U Nghakdâki a ni chiang lutuk!

"I result te han chhuak fel phawt se la," Pa Hminga chuan a lo ti khauh a.

"Result a chhuah chuan admission vel buaipui a ngai zui leh mai dawn sia, hun a awm ka ring lo deuh a.."

"A ni ve tho mai, i pa hi sawm la, han chho dun ula a ni mai alawm" a ti zui a. Ka pa chuan ka thilsawi chu bengkhawn hmel vak lo hian a chawei lai chu a chhunzawm mawlh mawlh a. A ruk tak chuan a bengkhawn hle awm tho si a.

"Buai a inti emai" ka tihsak ringawt a.

Harsatna dang an sawi tâk si lovah chuan an remti aniang a tuk zing sumo-a kal tum chuan ka inbuatsaih a. Mahse, vawikhat tal - thu tawp sawi tur talin Zualtei ka hmu leh duh asin. Vawikhat chauh tal chu.

Tichuan, unau anga en ve theih te pawh ka tum tur a lawm. 

U Nghaki laka inthiarfihlim ka duh vang chuan Pa Hminga chhuahrualin ticket ngaihven turin ka chhuak ve nghal daih a, chuti a nih loh zawngin chhul lak loh leh tilreh loh na na na chu banthal a han innawt ang a, kan che chukchu zui leh mai anga sin.

Ticket ka lakfel chuan haw mai ka tum a, mahse, U Nghaki'n inkhualtelem nan min lo hman a tum leh ngei dawn si. Kalna tur dang lah ka hre hauh bawk si lo.

Ni e, Zualtei te inlam ka pan law law mai ange. Engkim chu sukaw tlang law law teh ang. Heti ringawt chuan hahdamni a awm thei daan chuangin a lang lo.

Nidanga an inlam ka pan nen chuan inthlau veng veng tak a ni. Savawm awmna pûkah lut dawn ni ta ila ka huphurh dan a danglam vak pawh ka ring lo. Bawp a rit riau mai.

Ka kawngka kik chu a piin min lo chhawn a, min hmu chu a meng deuh uau hian ka hria, engdangmah a sawi hma chuan, "Pi, Zualtei biaklawk ka duh a.." ka ti nghal tawng a.

"A muhil ngemawni le, a reh riau mai" tiin țha deuhin Zualtei pindan lam chu a pan zui ve mai bawk a.

Zualtei pindan kawngkhar a han hawng chu a lo muhil awzawng lo. Chair-ah hian țhu mu ti tih deuh hian a lo awm a, a pi hnung ațang chuang ka lo bih ve dâk dâk a.

A pi chuan mi pawh be tawh lêm chuang lo hian choka lamah chuan min pheisan ve mai a. Amah hmachhawn chuan ka ding ta ran mai a. Ngui taka min thlir rengtu chu hmuhnuam a ni mawlh lo.

Muangchang chuan penlutin a hmaah chuan ka ding a, "Zualte, nizan thilthleng vang khan min ngaidam dawn nia, a pawi ka ti lutuk," tiin bul ka va țan chawt a.

Min thlirtu mit chu lasawnin bang lam chu a melh ran a, a sambu hnawk niaih ang mai chuan ka rilru a buai a, a tha a tho lo tlukzetin phurna rêng ka nei bik si lo.

"Ka insum thei thlawt lo a ni," tunah pawh ka insum hleithei lo chu ala ni ber e. Ringtaka khêk ruai ruai mai ka chak ber!

Muangchangin ka lam chu a lo hawi a, thilsawi tumin ang ziau mahse, a mittui luang ngiai ngiai chuan a sawi tur chu min hmuhtir hmasa ta zawk a..

Chair hnunglam nghen dat pah chuan a maimitchhing zui vang vang a, chair vawnban chu nghet takin a hmer ngawt ngawt a, a khur der der a ni tih pawh ka hai bik hauh lo asin.

A sambu chhah țha zet mai karah chuan ka kut veilam chu rawlhin a tukkhumah chuan ka dawm a, dinglama a sam huihțhatsak pahin ka lamah chuan ka pawt hnai a, ka âwmzawna ka pawmbeh meuh chuan a inhnît hlawp hlawp tawh a, a khur der der satliah a ni tawh lova, a khur deuh hlawk hlawk niberin ka hria.

Ka âwmah chuan hmaiphumin thei leh thei lo chuan min kuah bawk a, a hrehawm tih țawngkam hian khatihlai boruak kha sawifiah dawn ni ta ila 'hrehawm' tih ringawt hi vawi sawm tam chham chhuah a ngai ngei ang le.

"Zualte, engkim hi kan pawm thiam mai a ngai a ni. Chuti a nih loh chuan keini bak tuartu tur kan awm dawn chuang si lo.. Kan tum ang a, kan thei ve mai ang," ka tihlai tak chuan a hma aia nghet mah chuan min lo kuahna sauh a. Sawi leh pawh a tim-awm zo vek tawh!

"Vawiin hi kan bulțan ațanga kan tawpniah kan ngai ang a, tichuan engtikni emaw a lo thlen hunah chuan unau angin kan la inen ve thei mai ang," a rûm chhuak hawk a, a mittui chuan ka kawr áwm chu a chiah huh zo tawh, ka kawr chauh zawr lovin ka thinlung thleng chuan a chiah hneh em em asin.

Engmah a sawi ve lo chuan min ti hrehawm zual, sawithei hmel lah a pu bawk si lo. Anilahtaka, kei a khai uai zawk paw'n ka sawi chhuak țawng țawng chauh a nih si hi.

"Naktukah kan khawlamah haw chhoh ka tum a, result chhuah veleh lo chhuk ka tum ang. Pathian zarah ka pass ve em ang a, chumi hunah chuan unau angin pass lawm kan tum dawn nia, bul kan țan thar ve theihna turin..Keimahni bawkin kan siamțhat loh chuan midang siamțha tur an awm lo," ka ti hul hak a, chu chu ka tumdan leh duhdan pawh a ni reng. 

Inhmuh duh tawh loh, inbiak loh tih vel aichuan nunphung pangngaia kan awm vat theihna turin chîlphûl vat zawk ila a țhat ka ring. Chuti a nih loh chuan dam ve ta reng chu inhmuh ni a awm lo thei dawn lo va, chumi hunah chuan rilru a thar reng mai dawn asin. 

A pi, keima pi ni ve bawk chu a lo luh ka hlau deuh viau, chutianga kan awm chu min hmu lo se ka duh a. Mahse, ka chelhna aingheta min kuahtu zawk hian min thlah duh der bawk si lo.

A lungchhe zualpui chu a reh tawh aniang a hmai a phumbo tlat pawh chu a lang țan a, ka âwmah chuan bek si rem thlap hian a bei tlân a, kan awmdan lah chu a rem fahran bawk si lova le.

"I awmdan a rem si lova, a hrehawm lutuk ange khumah sawn țhu mai ila" ka tih chuan a lo duh ve mai bawk a, a lo hrehawm ru viau nge mawni. A pi min hmuh ka duh loh vang zawk a ni pakhat e.

Khumah chuan vaițhut dan deuh hian a țhu fel at a, pheikhawk ka phelh peih loh vang chuan pangai tak hian a bulah chuan ka țhu ve mai a. Han in 'muah' chiamna tur boruak a ni tawh lo, a laklawh vel viau a ni.

Farnu te khum ta chu inthlahrung lo zetin ka mu a, ka kelam chu khum tlangah chuan ka dah liam thung a, a țhutna nen chuan kan inkawm tawk vel tawh ang chu.

Chutia kahthlak ang dera ka han mut takah chuan ka kawr áwm, a mittuiin a bualhuh zawh tak chu a hmu a, inthiam loh hmel deuh chuan a chul a chul ringawt a, tihvak ngaihna lah a awm bawk si lo va.

Eng engemaw ka sawi ka sawi a, ani lah chuan min chhang ve lem hlei lova, min thlêk leh veng veng țhin. Nakin deuhah chuan a țhu ning ta deuh aniang ka âwmbawra lu nghatin, khum vangtan zawng chuan zangthal zawngin a mu a, kan awmdan chu a mawiber em tih pawh ka ngaihtuah duh ta bik lo. Engmah kan ti lo tlat a!

Ka țawng laklawh laitakin a pi a lo lut a, ka ngawi chiang kher mai, min hauh ka lo ring ringawt a, engtin min ti chuang hlei lo va.

"Mate, thingpui nge kan indawn juice?"

"Ka hre nang, juice pawh a pawi lovang, ka ril pawh a țam lo" a pi chu a chhâng fel leh hle bawk sia, ka van ngei reuh tak!

"Bawiha nang?" Bawiha min ti leh tawh, ka ngampa leh nghal sawt!

"Juice chu 'ni ve mai alawm."

A hnu deuh lawkah chuan eng juice emawni nothum lai mai hi tray-in a lo chawi lut a, a sirah chuan biscuit leh cake zaisa a awm bawk a, kan bulah a in ve dawn emawni ngawt le.

Ka tho chhuak thuai a, a thil chawi lai chu khumah chuan dahin, "Hei le, a in theih e," tiin amah pawh chu khumah chuan a țhu zui nghal a. Sawi tur a vang dawn rauh rauh mange.

"Bawiha in result a la chhuak ve lo em ni?" biscuit keuh zoh chung chuan a ti a.

"Aw, chhuak lo deuh. Karleh tawplam khi an ti tlatin ka hria."

"I pass i ring em?"

"Hre lo le, pass ve turah chuan ka inngai a."

"A țhat chu, i nîte bulah maw tunah i awm?"

"Aw"

"I pa le?"

"Ka pa chu hmundangah hna vangin a awm a..."

"E, a nih chu, mate khawnge hmannia bakcheh kha i dah tak a?" ka chhanna ngaihsak hmel vak loh chuan a tih zawm zat a.

"Gas hnuai drawer-ah khan a niin ka hria," a tih chuan a pi chuan a juice inlai chu a thawkkhat pup a, eng sawizui lovin a chhuak daih a.

Nileng țhiaia awm ka chak viau laiin a dikberin ka hre bawk si lova, amah a țawng țha duh vak bawk si lo nen haw ka han sawi ri dêk dêk chu kan inbe țawng zo leh ta lo!

Khum lu lam nghengin a țhu mu deuh a, kei a pangaiin ka țhu ve thung a.

Min en kar a, hawluih chu ka chak vak bik lo. Mahse, a nu inhmuhtir kher a țul ka ti lo ve bawk si. Riru phir deuh chuan ka țhu sawi reng a.

Ka dingchhuak a, a lamah chuan kun hniamin a biangah chuan ka fawh sak a, ka nghawngah chuan a lo uai rang kher mai. A mittui luangin kan infawh vawng vawngna hmui a lo luan thlen thlengin..

Kan khuaa ka han hawchho chu ka ruak kher mai. Ka pi leh pu leh chhungkua chuan min ngai a, min thlahlel ve em em tih hre mahila ka nun chu a nuam chuang lova, mahnia awma inngaihtuah veng veng emaw ka duh zawk zel niin ka hria.

Ka pa lakah ka inthiam lo viau a ni. Min ngaihaw hauh lovang tih chu lang reng mahse tlan tauhsan zawnga ka khawsak khum kher chu a mawi lo hlein ka hria a, ka khawsazia chu a zahpuiawm hle mai. Mahse, ka rilru a na ve țhin em a ni a chang kha chuan...

"I result chhuah hunah i pass phawt chuan vawk kan khawngthlu ang," tiin ka pu chuan a tupa pawl sawmpahnih result nghak mêk chu ngaina tih hriat takin min en a, ka pu hi ka pa emaw ka tih hial khawp kha a ni reng a, ka pi lah chuti tho, ka nu leh pa awmloh lang hlek lova min chawitleitu anni miau si.

Mahse, duh ang ngawtin thil a lo kal thei awzawng lo mai. 

Ka chhuahchhoh zan nen zanhnih chiah ka la riak hman, a tukchhuna ka pu nen dâi bul lawka kan leileta kan awm lai chuan ka pain min lo phone a, ka pu chu a be hmasa zet a, an inbiak laia ka pu chhanna leh a awm dan lah chuan ngaih a ti țha lo mai bawk si.

Chutah lunghnur fe-in ka pu chuan phone chu min pe a, ka pa nen chuan kan inbezui nghal a.

"Bawiha, Zualtei a țha vak lo va, damdawiin lamah nizan khan an lo tlanpui a ni awm e, naktuklamah a remchan chuan i lo chhuk mai dawn emaw ni le... a lam a lam che a.." tih thu chuan min va țhawng kher em ve le.

Ka phone chu ka thlauh lo chauh niin ka hria! Chhân mai nachang pawh ka hre lo hial a, ka chhanna pawh chu fumfe-in ka hre tawh lo.

Hnathawka kal kan ni hran lo bawka ka pu chuan hrethiam takin min hawpui nghal daih a, kalkawngah chuan a ti ti kawngtluan a, engnge a sawi ka hre hauh lo thung!

Ka inbual fai a, pindanah chuan ka tawm tlat a, ka pa ka phone khât tawk reng a, a 'zia deuh' tih thu a sawi ngai bawk si lo. 

Zualte, min lam min lam țhin maw, min lo nghak rawh aw ka lo haw dawn a nia..

                   Chapter  

                        - XII -

Zanriah kil tura ka piin min lo ti pawh chu ka châk lo kher mai. Mahse, ei loh ngawt dawnin awmzia vak a awm bawk si lo.

Phur lo zet chuan ka chhuak phei ve a, ka kil fel zawt tihah chuan ka pu a lo lut a, "Chhingpuii motor-in Liansanga nu an chhukpui dawn a ni awm e," a tih chuan ka beng a verh kher mai. Ka pu lam chu ka thlir thuai a.

"Aw, engti ziaa chuti rum rum chu?" Ka pi chuan a lo ti a.

"A pum a nâ a ni awm asin mawle, chhunlam ațang khan, kan lo benghawng lo lutuk a."

"A nih chu mawle, a va zia lo ve, an kal hmaa va lan ve hram a ngai a nih chu."

"Chuti chu a chhuk ve theih mai ang a, in kal tho chuan ka len ve dawn leh dawn loh lo zawt chhin ula."

"Ni e, a remchang tak ang chu, an chhuk dawn tho si a.." ka pu chuan kut sil pahin a lo ti zui a.

Zanriah eikhama ka pi leh pu chhuak ta chu zui hial ka duh mai ka ti. Zualtei bul thlen vat ka chakna chuan thathawh meuhin min nam lo mahse chhungrilah hian a turin min tur et et mai si.

Kawtlaiah te chuan ka va chhuak leh rih țhin, engmah awmzia lah chu a awm chuang bawk si lo.

Ka pindan lam ka pan hnulawkah chuan tuemaw lo lut thawm hi ka hria a, ka hming an lam ni a ka hriat vang chuan ka va chhuak thuai a, naupang pakhat lo kal chuan, "Pu Zika'n 'u Sawma kha insiam sela lo phei nghal rawh se' a ti," tiin a lo sawi mek a.

Insiam tur vak pawh ka nei tawh lo. Tlaiah khan ka thuamhnawho chu ka bag-ah ka khung vek tawh vangin khailawpa tlanpui nghal thei mai ka ni. 

"Awle, ka lo phei nghal ang," ka ti ve mai a. Chutia a ranglama chhukna tur awm ta chu ka lawm kher mai. Zing sumo nghak dawn ila kan thlen hun chu tlaiah dawrh a ni dawn a, chumi chhung chuan eng nge lo thleng hman ang?

Zana kan chhuah chuan a lo berah zing varțianah tal kan thleng hman ang a, chu ringawt pawh chu thlakhlel tham niin ka hria. 

Ka bag ka khaichhuah hnuah chuan ka nî nen inmangțhain ka kal zui nghal mai a, unau hmelhai hun a pel mah tawh a, ranchhuah hunlai chu ni se Bawngek kân a sakawr ek rahpherh theih tawk tur vela khawthim a ni tawh.

Liansanga te kawtah chuan mi an lo awm laih laih a, Pi Chhingpuii Pick up pawh chu kawng dungzuiin kawtzawl sirah chuan a inhûng ran bawk a. A damlo aimah chuan chu zawk chu ka ngaihven zawk emaw ni!

Ka pi leh pu chu ka'n melh kual deuh ngial pawhin hmuh mai tur an awm lo, inchhung lamah an lut ve a ni chêk ang. Inchhung em ema han zawnkual chu a țul pawh ka ti em em lo.

Upa Lianzawna a ni ngat ang țawngțaina hmang chu, kan kohhran upaah chuan min vûitu atan ka duh ber a ni. A rinna lam chu ka hriatpui hau law. Mahse, a aw alian a, a thum țha bik bawk sia, ani'n a han chham hluah tawh hi chu an kai hmel bik hliah hliah hian ka hre țhin. Bialtu upa emaw a nih dawn le?

Liansanga nu, Pi Tawni chu an lo pawm chhuak ta a, motor seat-ah chuan an țhut mut tir a, Mahindra pick up, seat double chi kha a nih vangin a chuang tur dang chu a seat lamah chuan an leng mai a. Keimahin a hnung bawmah chuan min țhâp dawn a nih hmel viau a ni.

Motor an han tihnun takah chuan ka lawnkai ve nghal thuai a, chutah chuan ka pi leh pu te nen chuan kan inhmu ta chauh a. Zan tlan tur kan nih vang chuan min ngaihtuah viau a, keilah ka lo inbel chhah mang si lo. Hâk lum vak tur pawh ka keng lem lo hrim hrim a, tum ngial pawh ni ila tihvak ngaihna a awm chuang lo.

Ka pi chuan a shawl bah lai chu a kek thla lawk a, "Kha hei hi sin thla mai rawh, tunah vawt lo mahse nakinah zan a rei anga a vawt tho ang" a tih vang chuan ka hnial viau nachungin ka țang zo ta chuang lo a ni.

Tichuan, tum ai mah maha hmain kan khua chhuahsan chuan min phurchhuak leh ta a. Kan khua leh khawțhenawm inkar chu a huphurhawm viau mai a, black top-na a rei tawh vangin black top loh nen a thuhmun deuh reng tawh mai bawk si.

Chu a chhapah dâmphei kan ti mai a, ni pawh hmu mang lo, tlangpangah hian kal ngai a awm a, kawng a lian lo va, tuihna a tam vangin kawng lah chu a chiau per pur mai a, kilometer 2 chuang mah a awh bawk si. Motor țha vak lo phei chu țhâlah pawh an in nam chat chat fo reng a, zana paltlang atan chuan chakawm loh tak a ni. 

Upa Lianzawna țawngțai khan min veng turah ngai ang!

Zanlama chaw zawng chi Bâk leh sava dang lo thlawk leh fua țhin chuan min ti phu leh zawk zawk țhin tih mai loh chu harsatna dang ka nei rih lo. Motor ke spare-ah ka țhu a, ka pi shawl min kentir pawh chu ka la hmang lo.

Kan tlanchak vak lo chungin Dâmphei chu kan thleng ve mai a, damlo phur tih takah duhthalin phih bawrh bawrh ngam hek lo, laklawh zet maiah chuan kopang nger to hian kan ding ta tlat mai a,  special gear nen ațang kawp viau chung pawhin hma a sawn theih tâk si lovah chuan a pangdam chin chu kan tek thla ta nalh nalh a.

Ka kekawr hâk chu ka thlep chhing sauh sauh a, ka chapal bun pawh motor hnungah chuan ka theh kai nghal a, Liansanga, Liansanga pa, a nutei leh kei kan ni mai a. A driver lah 'lo nam ve rawh' tih chi a ni mang si law. Mawng er tawn tawn khawpa kan nam a, ke zungțang kara chirhdiak a lo invial chhuah nguah nguah hnuah pawh chuan nam loh ang hlauhin kopang chu a la nger ngut tho mai a, a vawt lai tur bera ka ngaihah thlantla hluamin kan țang ta!

Kan thuamhnaw hâk lah chu motor ke ințhuaiin chirh a tihchhuah chuan min phuh berh pheng phung hlawm tawh a, lan mawina hun pawh a awm meuh lo a ni ber mai. Rilru hmanhmawh nen chuan a va han intu lo țhin tak! Damlo kan la phur bawk si.

Kan nampui ngial pawha a chhuah theih tak si lovah chuan driver pawh chu a lo chhukthla ta nge nge a, "Ka back thei em ang chu maw, hmalam ațang sawn min lo nampui leh ula, back kan tumchhin ange. Ka theih chuan tihdan a awm mai ang," tiin a țhutna lam chu a pan leh vut a.

Keini pathum pawh chuan a kal lohna lam tura kaltir tum chuan mawngkaw tha zawng zawng nen kan han bei leh a, a hma ang em a harsa a ni ta lo, a tânna lai chu hnung zawng chuan a chhuahsan thei ta hram a.

Driver chuan chempui chhah bel bul, engtika tah nge ni tawh ang tih pawh hriat loh khawpa hil leh tuiek rawng kai lek lek chu a lo hum chhuak a, kawngsira mau a ban phak ho chu a sat khawm a, khuar hnawhna atan chuan kan hmang ta a, engtak ang ang maw!?

Mauhnah nen lam chuan a bo a bang awm lovin khuarah chuan kan beng vek mai a, a țhen lai phei chu mauhnah chuan a ti vûm thur a ni ber mai. Thosi lah chu an tam pherh hrepah!

"Kan lo nam leh dawn em ni?" kan tih lahin "A ngai lovang, rit ila a duhawm zawk," a ti mai bawk sia, kan țhutna țheuh chu kan luah kim leh ta. A'n ti rùm ham ham phawt a, harsatna awm tawh lovin dâmphei chu kan chhuak ve ta hram a. 

Thawmhnaw leh taksaa chirhkai te chu a lo ro țan a, kan khing deuh uai thei nia! 

Intihfai deuh te pawh duh viau mah ila mi motor hmana bei ve mai ka nih vang chuan engmah han sawi ngam zia a ni lova, anmahni lah chu an berh ve vak lo nge ni an ding duh der bawk si lo.

Kan tlan ngat ngat a ni ber mai e. A chang leh indawm ran chung chuan ka lo muthlu a, a changin ka mawngkham ka dingchhuak leh rih a, chutiang reng reng chuan biak tur pawh nei lovin min vawk phurh a ni deuh ber alawm le.

Kan khua ațanga PHC hnaiber kan thlen chuan kan chawl a, nachhawknain an lo chiu a, reipawh ding lovin kan kal zui leh mai a, han inphihfai lam reng reng ka lo ngaihtuah lo ka ti. A va buaithlak țhin.

Zan a rei chho a, boruak a vawt chho hret hret a, bang nei lo va chuang tih takah a hau ngawta lo dawngsawng reng ta chu a vawt ve lek lek mai a,  a lubâwk (cab) chunga silpauline an phuarbeh chu la thlain chhuatah chuan ka phah a, rem zet mai chuan ka mu a, ka pi shawl min pai chu sinin chunglama arsi lang iar mai te chu ka thlir ta reng a, Zualtei suangtuahnaa kawm reuh reuh chung chuan ka lo muhil ta a ni awm e.

Motor ding dat thawmah chuan ka harh a, khua ala thim vek vang chuan zun zungin an ding nimai turah ka ngai a. Mahse, ka hming meuha min lo auh takah chuan chhan loh theih ni hek lo, chutah driver chu a lo chhuak a, "E, kan hmu mai thei si lo che a, i chhuk ta daih emaw kan tia," tiin a nui zui hak a. Chhuata ka mut hniam daih vang chuan ka awm ta lo emaw an ti a nih ngei dawn hi mawle.

Thlahrang phur min ngaihtuah chhuahtir!

Kan damlo phurh han rumchhuak leh hak țhin chu engemaw changin ka hre leh zauh țhin a, ngawhnuai dur deuh laia tlan lai a nih chuan a nuam chiah lo. Ka hlau chiam hran lo nain, zahthlak ka ti deuh!

Chaw ka ei mumal lo nen, rui chiah si lo hian ka ni deuh nghulh mai a, ka muhil thei hlauh zawk pawha a ziaawm deuh. 

Zing khawfîng chah dawn ruaiah chuan namen lo tak mai hian a vawt a, han muthilh hnan mai rual a ni lo. Khabe inkhawng tur vengin ka insehruh țeuh a ni ber mai.

Khua a'n var fel a, leilung a lan chhoh chuan a vawt chu a zia leh mai a, Aizawla kal tum țheuh kan ni bawka min phurtlang tur awm chuang hek lo muangtakin ka muhil leh ta daih a.

Civil Hospital OPD kawta kan chhuk khan zing dar 6:10 a ni a, ka rin ai daihin kan tlan rei, khawvar rual vela lut hman tura ka inngaih nen, damlo phur kan nih vangin kan tlan hleithei lo a ni mahna le.

OPD lama Pi Tawni ka zawnluhpui hnuah chuan ka kalchhan tak Zualtei awmna lam pan chuan ka bag khaiin ka kal zui ta a, ka pa ka phone a, rangtakin a lo la thuai a, an awmna ward te chu min hrilh nghal zung zung a, ICU-ah a awm ati emaw tia, Cabin lamah a tih leh chu. A sawi ka hresual zawk nge mawni le.

Cabin awmna building kawtah chuan  gate bulah Zualtei nu chu a lo awm a, ka nu ti a han sawi chu ka la harsat deuh a ni e, min hrethiam teh u.

Min nghak a ni ang tih ka rinngam loh vang chuan kal pelh mai ka rilruk a. Mahse, amah zawk chuan min lo au tlat mai nia! 'I chau em Bawiha?' tiin.

"Chau lo ve," ka ti liam ve mai a, ka bag khai lai chu min lak sakin inchunglam pan chuan kan inzui chho a, chutia min lo ti hluai chu ka hrethiam lo viau a ni.

A hma zawngin min hmumawh emaw tih turin min khawsak khum a, tunah a fanu thihngama a damloh ve leh min tih țhat phet a tum leh si, ka lawm viau lo.

Ka pa chu cabin luh dawn kawngka bulah chuan a lo țhu a, midang pawh pahnih pathum vel chu an awmin ka hria, ka pa chu a lo dingchhuak thuai a, midang chuan min lo chibai liam liam hlawm a, ka hnunga ding bulah chuan 'fapa tlangval i nei reng tawh alawm kha..' an ti a, ka ner deuh sawk mahna le.

Ka unaunu, thisena inzawmna piahlama thinlung taka ka hmangaih nibawk awmna pindanah chuan ka penlût zui nghal a, tuin nge min zui luta, tu tu nge a chhungah chuan lo awm pawh ka ngaihtuah lo.

Zualtei khuma lo mu bâm mai chu ka va hmu nghal a, oxygen nen an la țang kawp a ni tih hriat takin a hmaiah chuan a la inhrêng bet ran a, drip khai lai a nei bawk.

Ka hnaih chilh ruak a, tihngaihna erawh ka hre der bawk si lo. 

A hmel dâng lêp mai leh tlariam mai te chu mak ka ti hle mai, kan inhmuh loh chhung kha a rei lo asin. Hetiang em em hian a nimaw a lo nat hman le. Karkhat em pawh a liam hman lo a nia, eng em em nge ni a lo tawrh bik chu!

Hmanhmawh zeta ka chhuak chu khawnge ka kal dawn ka hre reng reng lo. Chu boruak ipik lutuk chu tlansan ka tum niberin ka hria. 

Step ka chhuakthla țep tawh tihah chuan ka hnung lam ațanga min kotu an awm vang chuan ka ding chawih a, ka ngaihtuahna ngawt chu ka lo um a ni tih ka hrechhuak zawk a.

Zualtei nu chu ka hnungah chuan hmanhmawh vak lo hian a lo chhuk thla ve zel a, ka hnungah chuan dingin, "Bawiha, engkim hi ka thiam loh vek a ni. Min ngaidam rawh."

Ka kut chu ka humruh kher mai.

"Keima tih dik loh vek a ni, hetiang hi thleng lo thei a ni asin" a insût zui hrâwk a. Engthil nge thleng chu ka hriatpui hauh lo, rindan tur em em pawh ka hre chuang lo. Mahse, ngaihdam min diltu hi min hringtunu ngei a ni. 

Muangchang chuan ka inher a, a hmai hupa lo kun tlawk tlawk mai chuan ka rilru a tinuam lo tak zet a ni.

"Nu, engmah siamțhat ngai a awm hleinem, thil hi a nihna anga kan pawm mai a ngai a nih hi." Ka inrinhmain a ni 'nu' ti a ka koh tâk ni! Keimah tak pawh chu ka lung a chhe rum rum mai.

A lo dâkchhuak a, "Bawiha, ka fapa..." tiin min kuah a, zing zingah kan nufa chuan kan țap dun hliam hliam mai! 

Reingial chu kan țap dun ta awm e, ka pa lo chhuk pawh chu kan lo hre hauh lova, "Duhtawk phawt teh u, miin mak an ti lutuk ang che u," a lo tih chuan ka nu nen kan inkuah chu inthlah ta hram a, ani lo awm ve pawh chu kan hriatphah ta chauh zawk a nih chu.

Kan han inhru dun chawt chawt a, ka pa lah chu a lo nui sun sun chauh leh nghal a, ava han ngeiawm tak.

"Enge khatilaiah kher khan in zu țah a?" ala ti zui! Ka nu nen pawh chuan chhan ngaihna hre hek lo, kan nuidun ve ta ringawt a.

Ahma tlaia zanriah tuitang pawha eitawh lo ka nih vang chuan ka pum ri deuh raih raih chuan ka kawruah zia chu min lo hrilh nawn leh a, sawitur haihchhama kan ngawihțhap lai chuan, "Ka ril a țam a nia," ka ti chhuak ringawt a.

"I nu nen khan zu kal rawh u, ani'n thil tui a hre deuh ang, khawiah nge a awm pawh ka hre lo, midang in tur coffee te pawh lo la chho nghal ula."

"Phakar emai a," ka nu chuan a lo ti sup a.

"A awmna ka hre ve lo alawm mawle, phakar lam pawh a ni lo," ka pa chuan a ti țha ve mai a. An han inep vel danah chuan an inkâr boruak chu a chhe hauh lo tih a lang reng mai a, chu chuan beiseina min siam a, min ti lawm viau a ni.

Kan nufa chuan building chu chhuahsanin inhnangfâk tur chuan kan chhuak thla dun ta a. "I lo intifai hmasa lova, khitah pawh khan a theih reng sia," a tih chuan zanlama ka thuamhnaw ka la inbel a ni tih ka hre leh chiah! Miin min enduh ka ti reng a ni.

"Chhoh hunah a ni mai, intihfai chuan inthlak te a ngai dawn sia, a buaithlak deuh ka tia," ka tih chuan a sawi zui duh ta bik lo.

Thingpui dawr pangngai ho an la inhawn loh vang chuan kangkama eitur siam ho chu kan belh mai a ngaih hmel a ni. Intih tiltîp vak a sawt lo, puar ka mamawh rih zawk tlat a ni.

Manipuri nu niawm tak chhangkan chu chu kan leisak țeuh a, thingpui nen lain a chhaka step-ah chuan kan țhu a, ka ril a țam bawk a niang tui ka va ti kher ve mawle.

"Ka hawchhoh khan a nakruh auh chauh kha a ni sia, engatinge hetia a awm chiam chhan hi?" Ka tih chuan ka nu chuan menghnuai deuh raih hian min en a, a sawi hreh hmel kher mai.

"A hmalam khan engmah min zawt lo hrim hrim a, a hrethiam ve mai emaw ka tihlaiin in inhmuh hnuhnun ber zan khan min zawt ta nge nge a, kha ta ka chhanna kha ka lo ngaihtuah chiang tawk lo deuh a ni."

"Engtinnge i chhan a?"

Eitur a ken chu a melh vang vang a, "I unaupa a nia, in inngaizawng thei lovang ka tih sak a,"

"Chu ringawt chu laknat viau tur a awm dawn em ni? Chhunah pawh țha takin ka sawpui vek tho va..."

"Thildang ala awm alawm, 'Ka unaupa a ni lo' tiin fel fak hian min chhang a.." Engngatinge ka unaupa a ni lo min tih bik le? Keilahin ka farnu anga en tumin mihranga min siamtu ni a ka ngaihte țhiah ka tum mek a ni si.

"Chuan..engtin zel?"

"A nihna takah chuan unau hi inni lo reng a.." a tih chuan makti fe hian ka melh a, ka thilken lai ka keih seki vûn tawh pawh chu ei chhunzawm nachang pawh ka hre lo.

"Nangmah bak hi fa ka la nei hleinem..." mitmenga lungawi tih hriat deuh chuan min en a.

"Chuan a nih Zualtei hi..?"

"I tetlaiin i pate khuaah ka lo kal a, ka hnena awm turin ka sawm che a. Mahse, khami țum khan naupang â mai ila ni a, ka hlawhchham pawh kha rilru na deuh mahse ka hrethiam viau a. Mahse, ka ngaithei em em mai che a, ka khawhar min hnem turin Zualtei hi ka adopt ta a, engemaw chen chu min chhawk viau.  

I pa rilru lenzia ka ngaihtuah apiangin ka fapa hian min la rawn zawng chhuak ngei ang tih ka ngaihtuah fo țhin. Chu chu ka inhnemna leh ka innghahna a ni bawk.

Mahse, tuna i lo landan erawh hi chu ka beisei loh dan a lo nikher bawk si a, lo dawnsawn dan ka thiam ta lo a ni." A sawi tawplam chu a zuih ral a ni ber mai.

A mak ka ti kher mai chu thil chu. Thawnthu ziak thiam takin an duhdana a changtute hlimna leh harsatna hrang hrang an hmachhawntir leh ruahmanna, kawngkal fel tak neia a ngaihnawm thei ang ber tura an duan lâwk te hi ka chan deuh roh!

"A mak hle mai!" tiin ka phun chhuak hial a.

Ka ngaihtuahnaah chuan Zualtei ID card kha a lo lang hmasa ber a, nu leh pa nei lo a nih vangin ka nu leh pa min țawm ve mai chauh a lo ni si. Ka khawngaih zual kher mai. Engkim chu a fiah chho uar uar mai a, a hlimawm viau rualin a lungchhiat thlak bawk si.

"A tirah khan i fapa ka ni tih i hre awm tho sia, engatinge ka nu i ni tih min hrilh nghal mai loh?"

"Engtinnge in khawsak, nu i nei nge nei lo tih te ka chhui vek phawt alawm bawiha.."

"Engatimaw?"

"A chhan chu i pa hian nupui dang a lo neiha nu i neih tho chuan nu pahnih neia i awm kha ka duh lo a ni."

"Ka hrethiam lo."

"Harsatna i tawk a nih chuan ka phatsan ang che chu ka ti hauh lova. Mahse, i pa nupuiin fa anga a en theih che chuan insawi kha ka duh lo. A chhan chu i rilru a phir kak mai mai dawn a, chu chuan i nun a tihchhiat ka hlau a ni. Nuhrawn hrawn ni a i inhriat chuan engemaw hlekah vuivaina a awm ngei ngei dawn a...Nangmah hringtu ngei ka la dam a ni tih i hriatphei chuan inchhungkuaah harsatna awm ngei dawn a, chutiang ka ngaihtuaha ka tihkual chhung chuan a tawp kan thleng hman ta a nih hi.."

A sawidan chu ka man ruau ruau chauhin ka hria, nu pahnih neih chu tlan tauhna tur an nei tih an inhria a, an nun a țha thei lo a tihna aniang.

"Zualtei hetianga a awmchhan ber pawh chu ila sawi miah lo," tiin a sawi lai ni lo deuh chu ka lo zawt leh daih a.

"Nakinah kan la sawi dawn nia, chho phawt ang, midang pawh an ril a țam tawh ang."

Kan nufa chuan Zualtei awmna cabin lam pan chuan coffee no chawi lû lû chungin kan chho dun leh ta a..

       

                   Chapter  

                       - XIII -

Kan chhoh hnu rei vak lovah chuan chuan ka bal bawk sia, intifai turin ka pa chuan min hruaithla ta a, zanlama motor min țhâpna vang chu nge ni ka chau ve deuhin ka hria.

In kan han thleng chu ka inbual nghal thuai a, chawei a hun mai dawn vang chuan han mutzalna hman pawh a awm lo.

Khawnge maw U Nghaki hi le?

"Ate, khawnge u Nghaki?"

"A lo kal tawh dawn lo, an chhung an buai ve deuh a niang."

"A nih chu mawle, kan chawlh lai a ni thova buaina tur a awm chuang hleinem tiraw?" ka ti liam ve mai a. Ka rilru tak takin ka lawmin ka hria, alakah khan ka der dêp ve phian bawk sia, inven ngai lo tur chu a lawmawm alawm le.

"Mahse, class ințan hunah a buaithlak leh dawn tho alawm." a tih chuan awm ka tihpui leh viau bawk si.

Tukțhuan kan kil zui a ni deuh mai a, eikham lamah rei lo te muhil lawk ila a țhat ka ring, tichuan chhunlamah damdawi in lamah chho ta ila.

"Eng nge a an a nizan lam?" tiin Pa Hminga chuan ka pa chu a zawt a.

"Tlem chuan a kang ve hret hret, hma han sawn chak vak tur chi a ni lo a niang."

"Nimin tlaiah khan ka lo kal kawi ang ka tia, rin aiin kan buai leh ta phian sia, vawiin chu ka hman ve tawh em ang chu maw."

"Putarte, nang i riahpui tlauh tlauh mai dawn em ni?" tiin nui vur vur chungin min melh zui a.

"Ka hre nang, a țul dan a zir a ni mai. Chhunah ka han chho ang a, tlaiah ka haw anga, a țuldan a zirin zanlam chu." ka ti țha ve mai a.

"Tlaiah i haw hman ang maw?" Ka ní chuan a lo ti a.

"Hman turah chuan ka inngai, engemaw a awm a nih loh chuan.. "

"Chuti chu ka lo haw hma lo mai ang aw, chaw i lo chhum ang a, chawhmeh chu siam vak a ngai pawhin ka hre lo. A tih nawk nawk theih mai ang."

"Umh..ka lo ti mai ang."

"A buaithlak dawn tlat, U Chhuani te nau chu lo kal vat sela a țha ang," ka nî chuan a ti a.

"Aw, ka awm tho hi."

"Damdawi in lam nen inbuai a ngai a, bakah awmpui neih chu kan ngai tho tho, dawrlama nena kawp chu ka tlin chiah bik lo."

"A dik chiah, dawrkai milian tan inchhungchet te a peih awm loh alawm," tiin Pa Hminga chu a lo nui kur kur a. Ka nî chuan a ngei hmel teh e.

Hna lama kal tura Pa Hminga leh ka nîin min chhuahsan lai chuan ka pa chu țhutthlengseiah a lo muhil der tawh a, nizan lam a chau ve deuh a ni ang. Khumah te han mut țhat ve mai awm asin mawle. A mutui lai kaihthawh chu ni chiahin ka hre bawk si lova, kawngkhar ka kalh fel a, ka pindan lam pan chuan muturin ka kal zui ve ta daih a.

Ka mut a chhuak thei awzawng lo mai!

Ka han maimitchhin ngial pawhin luipui tuilian daikai zo hlim ang maiin mutchhuak chuan min zem mawlh si lo. Rizai te chu ka han pawtsawi ngial a, a chhuah phah chuang der lo.

Darkar khat dawn chu chutiang chuan ka khumah ka inlet kual a, ka mut hmaa ka alarm set ve tawh pawh chu ka sût leh hial tawh. Mu lo tawp ang.

Ka thawhchhuah lai tak chuan phone ri niawm tak hi ka hria a, ka pa phone a nih ringin ka zawng kual a, a ri a zawi bawk si. 

A tawpah chuan ka pa mutna bul țhutna hnuaiah chuan ka hmu ta hram a, a hming a dah dan chuan ka mit a la kher asin 'Heart'!!

"Hello,"

"E, in lo chho dawn tawh em?" ka nu aw a ni ngat mai.

"Chho țep ang, engngatinge?" Ka pa emaw min ti tho ni a ka hriat vang chuan ka insawi duh bik lova.

"Flask i lo leichho mai dawn emawni ka tia, thingpui chhuan reng ngai lo hian a lumna a awm tho sia, dah mai ila a țhat ka ring a."

"Aw, kan lo lei dawn nia. Bawiha a la muhil a, han harh phawt se, a hmanhmawhthlak em?" tiin ka pa awphawi ang tur te chuan ka han ti leh rih a.

"Hmanhmawh thlak chuang lo ve, in lo chhoh dawn tho chuan tih thu mai mai mawle."

"Engtinnge Bawiha chuan a sawi zui?" a tih chuan ka pa bul ațang chuan ka kalsawn nghal thuai a.

"Engmah pawh a sawi zui lo, a hrethiam ve tawh a niang," tiin ka chhang zui a.

"A țhat hlauh chu, ka rilru a nuam thei lova,   a chhun che chuan a luhlul ve dawn bawk sia maw," a nui hak a. Keipawh chu ka nui ve tawp.

"Flask chu lo theihnghilh lo la a ni mai, Bawiha a mut tho chuan muhil ve lawk la nangpawh. Nizan i tlaivar țhiai bawk sia, i chau lutuk ang," a ti zui a.

"Nia, a țha mai thei. Chin a hriat bawk si lo va, Bawiha a awm hmel tho sia, zanin chu ka lo chho lo mai thei a nia." Ka'n ti leh pek a.

"E khai a, ava khawhar thlak dawn ve. Mahse, i chau tawh awm bawk sia, ka khawngaih ve deuh che. Zanin chu ka lo khawhar deuh mai aniang chu." a tih chuan ka nuih a za deuh tlat, ka insum zo lo țep chu a ni. Ka nuichhuak teuh thei lutuk.

Phone kan dah hnuah chuan ka nu leh pa inkar boruak țha tak a awm a ni tih ka hriatna chuan min tilawm kher mai. Hma a sawn zel pawh ka beisei. 

Zualtei damlo chu tu tan mah lawmna chi ni lo mahse kan chhungkaw tan erawh chuan malsawmna a ni tih loh rual a ni lo. He damlohna vanga thil thleng leh langchhuak chi hrang hrangte hi damțha ta se a langchhuak kher angem?

Ka pa harh hma chuan TV te lo enin țhutthlengseiah chuan ka lo mu ve a, dar 11:00 pelh hnu deuhah chuan a lo harh a, ka nuin a lo phone pawh chu ka hrilh buai ta bik lo mai.

A inbual hnuah chuan thingpuite kan in a, damdawi in lam pan chuan kan inzui chhuak dun leh ta a.

"E, flask lei a ngai a nia, khita ken chhoh tur," tiin ding tur chuan ka ti hlut a, ka chhuak tur chu, "Pawisa i nei 'mi?" a ti zui a.

"Nei em em chuang love, i ah tho chuan.." te chu ka han ti leh hnuhawh a. Min pe zui ve mai bawk a, ka rinaiin a lo vang phian a, tum aia reimah ka thang alawm mawle.

Awm an lo awm vak lova, ka nu leh a cousin vel niawm tak, amah ang ve deuh hmeichhe pakhat hi an lo awm a, midang hmel a lang lo.

"Khawnge ka thil chah che chu?" tiin ka nu chuan ka pa chu a lo zawt a, ehe, motor-ah kan theihnghilh daih!

"Enge min chah a?"

"E khai a, i hre tawh nange?"

"Hre nang, engmah min chah lo." ka pa chuan a ti ve fan a.

"Teh tlat chuan, ka lo phone reng che kha mawle," ka nuin a tih chuan ka lo nui vur vur a, a hrethiam a ni chêk ang a nui ta chiam mai a. Ka pa te ngaih a țha leh bawk si lo.

"Bawiha, a chin tam chi loh viau ang aw," tiin min han melh rum a tum ngial a, a nuihzatthlak viau mai bawk si.

"Enge, enge awmzia!?" ka pa chuan a lo ti a, a bo viau tak ang.

"Ka lo phone che a, i fapa khan nangmah ang hlirin min lo chhang pek a niang chu!" A bula țhu pawh chu a nui ve tho mai. Ka pa hreh zeta a nui hmel nen chuan kan nui kim ta.

"Flask kha maw?"

"Aw, motor-ah kan theihnghilh daih," ka lo ti thuai a.

"I lei a ni a ni bawka mawhphurhna pawh i kentlang mai angai a nih chu," titu ka pa lah chu a nui duh mang hlek lo lehnghal a!

Chahbi min pek chu lain motor lam pan chuan ka chhuak thla zui nghal a, a hla lem lo bawka rei ka rial lo.

Hmeichhe pakhat lo awm ve chuan min hawsan tawh a, kan chhungkaw bil te chauh chuan a vawikhatna atan kan awm ta ran mai. Tin, kan kawppui te nen!

"Naktukah hian ka phei dawn emawni ka ti deuh a.." ka pa chuan a ti a.

"Engati?" hmaichhawng deuh hâ chuan ka nu chuan a'n thlêk a.

"Nimin kha ka chawlh lãk tawpni a ni tawh zawk a, heti hi kan ni leh ta bawk sia."

"Lakbelh leh mai la,"

"Nithum chu ka lak belh tawh chu a nih hi. Kan building tur kan sa laklawh lutuk a, midang kuta dah vek theih loh thil te a awm ve bawk sia, ka awm loh reng chuan hna a sawt lo mai mai dawn a."

"Pawimawh viau mai bawk si. Mahse, i awmloh chuan kan thlâ a lo phang lutuk ang tih ka hlau deuh a.."

"A khai a, chutia thlaphanna chhan tur engmah a awm hleinem, kan enkawl thiam ve azeng pawh a ni lo va."

"I lo awm ve khan thlâ a muang alawm," ka nuin a tih chuan a ti tak takin ka ring, a melh dan a țang reng mai mai sawn a!

"Lerh s'u, hei damlo bulah in awm hi," ka han ti chu an lawm dun kher mai. An nui var var alawm le. 

Eitur lei turin dawrah ka kal a, chuta ka lêt chho leh chu alawm nuihzatthlak le!

Ngaihtuah mang hlei lo hian kawngkhar chu ka hawng pawp a, ka lut zui nghal mai si a, a chhunga lo awm mi pahnih chu an talbuai teh e! An lo ințhut hnaih fe ni tur hi a nia, ka nu phei chu toilet lamah a lut zui nghal daih nghe nghe a, ka inthiam lo deuh bawk si, tihngaihna a awm der bawk si lo!

Ti ti pawh a khaihlak phah! 

Ka eitur lak kan ei hnu chuan kan boruak chu a ziaawm chho ve leh mai bawk a.

"In inneihna daltu a awm tawh lovin ka hria," ka tih chuan min melh rual kher mai.

"Nangni pahnih pawh in induh tho a, in fate pawhin kan pawm vek a, eng nge harsatna la awm ang?" ka ti zui zat a.

"Damlo te han dam phawt se, tuna ngaihtuah rum rum theih pawh a ni chiah lo," ka pa chuan a lo ti khauh a. Ka nu lah chuan 'enge a sawi leh ang' tih châng niawm fahranin a lo melh ralh ralh a.

An nun chu ka awt, ka nu leh pa te mah ni se inhmangaihtak te inngaihzawnna kara awm tura ka duh țhin hi ka hmu vek hian ka hria, uchuak hauh lova an inngaihsak tawnna chu a hmuhnawm tak zet, an tawnhriat tam tak vang te pawh a ni ve tawh ang.

Keilah pek chuan, "Mahse, ka pa hmundangah a awm ang a, ka nu pawh..keipawh. A buaithlak teh nuaih e," ka ti zui a.

Ka nu chuan ka ngaihtuahna chu naupangchhia a ti deuh nge mawni nui vur vur chung chuan, "Kan awmkhawm ve tawh ang chu," a lo ti sap a. 

Chu thu chu alawm kum engemawzat ka zawn a, ka lo nghah țhin kha! Ka hnuk te chu a ulh deuh hialin ka hria, khum tlanga ka kiu nghat chuan ka țhu kun ran a, lawm avanga hnukulh hi a lo awm thei khawp e.

Ka nu chuan ka awmdan chu a hrethiam a ni ngei ang ka lam pan chuan a lo phei a, ka hnungah chuan dingin min kuah, ka lu-ah chuan a chul heuh heuh a, ka dam sawng sawng mai. 

Nu kut nge nge chu a lo hahdam thlak bik mange.

Zan lamah chuan ka pa chuan riah a chuh tlat a, keilah chimawm ve bawk, "Motor i khalh dawn bawk si i chau lutuk ang," ka tih sak a, riah theih loh chu a hlauh hmel bawk sia, ka kian ta mai a nih kha!

Hun a kal ve hret hret a, Zualtei pawhin hma a sawn chak ta viau a, chhuah te pawh kan sawi ri ve ut ut tawh. A damloh zarah ka nu leh pa mai piah lamah a pi leh pu, chhungkhat ho zawng zawng kan inhnukhnai zo va, ka tan tak phei chuan chu thil chu midang zawng aiin a hlu bik hle a ni.

Ka nu nen kan inriah chhawk zak zak a, a chang phei chuan zan zawn te pawhin ka awmpui chang a awm fo, amah buaipui ngai a nih tawh loh vangin duhtawkin; riahpui te aimah mahin a chang chuan ka lo mutui țhin a, hahthlak teh chiam awm hek lo.

Kan damlo inbuaipui vel atalangin ka result pawh kan hria a ni chauh a, han tihzui vak pawh kan la nei lo. Admission chu Pa Hminga'n a țhianpa a lo biaklawk vangin buaipui chiam ngai turah ka ruat lova, a hunah chuan min hrilh ve mai a niang chu.

Ka pa a hnalama a kal ațanga karhnih ral hnu velah chuan Zualtei pawh damdawi in ațang chuan a chhuak ve ta a, ka hman bawk sia, kan inah pawh ka awm hman meuh lo. Lehlamah pi leh pute nen boruak țha kan lo nei chho ve zel bawk nen, zankhat phei chu ka haw peih lova ka nu khumah ka riak nghe nghe a, ani'n Zualtei a mutpui thung.

Chutiang khawp chuan boruak a nuam chhova, 'Class i țan hunah Bike ka lei ang che' tiin ka pu phei chuan mi thlun ngheh a tum khawp mai.

Mahse, Zualtei nen kan awmdan tur chu a chang chuan a buaithlak deuh țhin a, unau anga in en duh viau mah ila kan thei ngang bawk si lo. Ka nu leh pa an inneih hunah phei chuan kan dinhmun a laklawh viau ta ve ang. Kan innei ve mai ang han ti ngawt dawn ila chutiang rual kan la ni chiah bawk si lo.

"Pi, ka nu te hi insawițha tawh se la, hetia laklawh deuha awm chu a buaithlak emai," tiin ka nu leh pate inneihna tur chu ka pi leh pu bulah ka thlen ve hmiah mai a, anni pawh țang leh chuang tur an awm lo tih an inhria a ni chêk ang sawibuai an nei hran tawh lo.

Mahse, ka pa te nen phone-a kan han sawi hian buaithlak deuh kan nei leh țhin a, chu chu Zualtei nen kan inkar chu a ni.

Ka nu leh pa innei ta se hmunkhata awmho ngei kan duh dawn a, chutah chuan keini innei ve lem lo ta chu kan tan a țhaberin an hre si lo. Chhungkua ve lem awmhran thluah chu ni theiah kan ngai bawk si lo. Keini lah kan ințhen duh bik der si law..

'Hmanhmawh chiamna chhan tur a awm lem lo bawk a, kan lo nghak mai ang che u, tlemin han puitling ve deuh ula' an ti ta ringawt mai a, a zia lo viau a ni. Min ngaihtuah ve lo thei bawk si lova.

Ka pa chuan ka nî te in ațanga hla vak lovah chuan inhmun a lei a, loan te lakbelhin theih ang ang chuan kan sa chhunzawm ve nghal a, a hranpaa Zualtei rimna hun pawh ka nei ta meuh lo. Mahse,  an in ațangin chhun thingpui tur an rawn ngaihtuah thung a, nitin phei chuan kan inhmu thova.

College te ka țan chho va, Zualtei pawhin Pawl sawmpakhat a zawm ve leh tawh bawk a, duh anga hunthawl pawh kan nei hlei thei ta lo, Inrinni leh hunawl dangah insakna lamah ka kal lo thei bawk si lo va. 

Hun a kal ve bek bek zel a, ka pa Aizawl lama an transfer-na kan lawm boruak a reh fel hmain ka chhang tur ka nu chuan a pai a ni tih kan han hre chho zui zat a, anmahni lah chu an han inthiam lo khawp lehnghal!

Kan boruak chu a nuam chho viau a ni.

EPILOGUE :

Kha nî kha ni mak leh danglam tak a ni. 

Kan pafaa kan awm rak rakna in lian leh zaupui maiah chuan țhenrual țha te leh chhungkhat ho an phusa sup sup a, inhnuailama hâr vil ho thawm nen chuan hlimna nî a ni ang tih tute tan mah hairual a ni lovang.

Hawina lam apianga mite chu an nuisâng hian ka hre mai a, ka hlim em vang te pawh a ni mai thei e. 

BA exam ka zo felchiah a, kan ruahman lawk angin ka nu leh pa insuih țha lova awm reng, keimahni min vengthawng ve bawk si te vang chuan chak viau mah ila duhaia hmain Zualtei nen chuan inneih kan ngai ta a ni a, ani phei chu BA 1st year ala kal chauh nghe nghe a, a hun tih zawngah chuan hun lo ve tak a ni. Mahse, nu leh pate, unau leh chhungkua awmhran reng mai chu țha kan ti bik bawk si lo.

Zualtei'n BA a zawh hma chu fa neih loh te kan han tiam ve deuh reuh a, kan thei ngût ange maw, hunin a la hril mai turah ngai ang.

Pheikhawk ka bun mawlh mawlh lai chuan ka pa chu a inpeih tawh a ni tih hriat reng hian suit nena induang zaih hian a lo lut a, chutiang taka a inchei chu hmu ngai hek lo, a lang naupang veng vawng kher mai. Min hrechiang lo chuan unau emaw min ti leh sup dawn a nih hi.

"Hmanhmawh suh, a la tlai lo a nia. Motor ka lo zu lachhuak ange," tiin min chhuahsan leh nghal mai a, hmanhmawh suh a tih chu hmanhmawh rawh tihna ang vel a ni ka che chu ka buaiphah sauh hian ka hria.

Ka pa u fate ho chuan min buaipui laih laih bawk a, engtin tin emaw chuan inhnuailam pan chuan ka chhuk thla ve thei ta hram a.

Kal lamah ka pain motor a khalh anga, Biak in panna kawngah keima'n - chutiang chuan ruahmanna kan siam fel lawk thlap a, tu zawk mahin driver anga awm kha kan duh lo ve ve a! Ka nuin ruahmanna a siam fel ta a nih kha!

Kan pafa chuan mo inlam pan chuan kan inkhalh chhuak ta a, a boruak awmdan kha ka sawifiah thiam lo, kan thlawk delh delh ti ila a ni chiah bawk si lo. Engtin emaw kan awm chiai chiai a niang.

Ka nu te in kan va thlen chuan hmeichhe dan pangngai tein an lo la inchei!

Chhuanlam phei chu an lo nei ve thova, a cheitu pakhat chauh an lo rawih vangin duh angin an che sawt thei lo a ni awm e. Mahse, innghahtir hi chu hmeichhe thiam zawng alawm mawle.

Ka chhang; kum khat leh tlem, hmeichhe naupang harh fe mai chuan hrethiam chiah lo mahse nuam a ti berin ka hria, a tlankual deuh char char a, tumahin an pawmbet hlei thei lo.

Engemawti chen kan nghah hnuah chuan kan mo te pahnih chu an inkawt ațang chuan ka chhuahpui ta a, keiin motor khalhin ka bulah ka nu a țhu a, a hnung lamah ka nu zawnah ka pa, ka zawnah  Zualtei a țhu thung a, chutianga kan inrem kher chhan pawh kawngkhar hawnsak ve ve remchang tur kan zawn hram vang a ni. 

Hetianga a ruala nu leh pa leh an fate innei tur hi awm ve tawh tak mawle!? Țhiana inhmang tawn ve ve lehnghal chuan an awm kher pawhin ka ring lo.

Kan Biak in te chu rawng an hnawih thar ta emaw tih turin ka hmu thar sur mai hian ka hria a, ka khawvel hman mek chu a nuamin ava hlimawm tehlul em ve leh!

Pastor-in inneih thuchah a sawi te chu ka benga rawngah hian a lut lo hrim hrim, englam nge asawi pawh ka hre meuh lo chu a ni e. Inneih inkhawm a ni bawk a, chulam hawi chu a sawi turah ngai ang.

Nileng mai chuan kan infam țap a, a hahthlak zawnga ngaihtuah chuan a hahthlak viau. Mahse, kan tana niropui ber a ni miauva hah pawh kan inti phal lo a ni ber mai, heibak tawn leh chuang tur awmin ka hre lo. Kan thihni lah engmah kan hre tawh dawn bawk si lova, kan pianni lah engmah kan hre chuang bawk si lo. Inneihni hi kan damchhunga hun pawimawh chu a nimai awm asin.

Zan dar 10 pelh tawhah Zualtei nen kan pindan lam chu kan pan thei ta hram a, a lo inbual lawk tawh vangin ka han inleihtleng ve leh puat puat a, lawițhat zan hmang tur chuan bualin ațang chuan ka penchhuak ta a...

Darthlalang lianpui hmaah chuan mutkawr pante hain a sam chu a lo khuih dalh dalh a, a thawmhnawhak chuan a taksa chu a phén zo lo hle mai a, a langtlang ruak a ni ber mai. 

A hnunglam ațang chuan a kawngah kuahin a kokiah chuan ka khabe ka nghat a, lungawi tih hriat fahrana min enin a nui ver ver a.

Inti zei fahrana a kawrbahna hlihkian ka tum chu a bengbeh kualah ka kutzungte a tang tlat mai pek a! Engtinnge ka rawlh pawh ka hre lo, ka lo hre mai bawk si lo nen ka han tilui deuh chu na tiin a țe țhawt a, a beng ka han en chuan thisen tlem a lo chhuak hman a, harsa zetin ka thun tih pawh ka hriat loh chu ka phawi thei hram a.

A nuih za, na ati deuh bawk si hmel mawlh mai chu ka mitthlaah a cham reng dawn a nih tak hi...

                       A TAWP TA...

©________[ɐʞızɹɐp]________®